<::лат> OCR: <::рус> Библиотека святоотеческой литературы <::лат> http://orthlиb.ru <::слав> Стихиры и каноны апостолом, и святителю николаю. Глас 4. Подобен: Яко добля: Крепчайшим мудрованием воинствовавше славнии, на лукаваго врага ополчистеся, всеоружием ограждшеся духовным добльственне, и всю крепость бесовскую погубивше, восхитисте души человеческия, якоже корысти. сего ради во веки вас почитаем апостоли. Крестообразно распростерши мрежу веры, двоенадесятица Божественных апостол твоих, вся языки уловила есть, к твоему познанию Христе, и моря сланое страстей изсуши. сего ради тя молю: из глубины прегрешений воззови мя, тех всеБлагоприятными мольбами. Двоенадесятица Богоизбранная, апостольская, и всечестная, да восхвалится днесь, Божественными песньми, петр, и павел, иаков, лука, иоанн же, и матфей, и фома: марк, симон, и филипп: и преславный ныне андрей с матфием, и Божественным и премудрым варфоломеем, и с прочими седмидесятьми. Ины стихиры святому николаю, глас тойже: Миром Божественным тя помаза Божественная Благодать Духовная, миряном первопрестольна, и миром оБлагоухавша, добродетельми Священнейшими мира концы: сладкодышущими твоими молитвами, злосмрадныя прогоняюща страсти всегда. сего ради тя верно славим, и память твою всесвятую совершаем николае. Яко осиятеля тя незаходимаго, и яко светильника всемирна, на тверди возсиявша Церковней николае, и мир просветивша, и бед лютых мглу отгоняюща, и отемлюща печалей зиму, и тишину соделавшаго глубокую, по долгу уБлажаем. И сый и являяйся в сониих николае, иже неправедно имущия умрети Спасл еси, яко сострадатель, яко Благолюбивый, яко избавитель теплейший, яко предстатель истинный верных, и просящих твоего заступления, Священнейший отче, ангелов согражданине, Преподобных и Пророков равностоятелю. Слава, и ныне, Богородичен: Искушения всякаго, и ловления льстиваго, избави мя всенепорочная, и страстей стремления обуздай, молюся: и ума моего мглу и омрачение отжени,управи ко пристанищу Божественных заповедей Сына твоего БогоМати, яко да непрестанно почитаю тя. Тропарь апостолом, глас 3: Апостоли святии, молите милостиваго Бога, да прегрешений оставление подаст душам нашим. Тропарь николаю, глас 4: Правило веры и образ кротости, воздержания учителя яви тя стаду твоему яже вещей истина. сего ради стяжал еси смирением высокая, нищетою богатая. отче Священноначальниче николае, моли Христа Бога, Спастися душам нашим. Канон святым апостолом. Творение феофаново, глас 4. Песнь 1. Ирмос: Моря чермную пучину, невлажными стопами древний пешешествовав Израиль, Крестообразныма моисеовыма рукама, амаликову силу в пустыни победил есть. Божественнии утешителя органи, возглашающии сего Божественными всегда вдохновеньми, воспеша песнь нам, яко воистинну Спасительную, Благославнии Христовы апостоли. На одре лености слежа, и в смерти греховней недугом душевным люте истаемь, посещения мя славнии Христовы самовидцы сподобите. Иже словом безсловесие разрешивше языков апостоли, от безсловесных деяний люте омраченное сердце мое, утешителя Благодатию просветите апостоли. Богородичен: Дева по Рождестве нетленна пребыла еси, нас ради явльшагося на земли, паче слова рождшая: егоже прилежно моли, просветити души наша. Другий канон святому и великому чудотворцу николаю. Творение феофаново, глас 2. Песнь 1. Ирмос: Во глубине постла иногда, фараонитское всевоинство преоруженная сила, воплощшееся же слово всезлобный грех потребило есть, препрославленный Господь, славно бо прославися. Венценосец Престолу Христову, премудре николае, предстоя со ангельскими чинми, просвещение ми даруй, озаряющее души моея омрачение: яко да восхвалю радуяся, твою преБлаженне память. [Дважды.] Прославляяй вся Господь, иже того славящия, тя верным прибежище дал есть, напастей избавляюща, притекающия к твоему крову николае, и призывающия тя верою и любовию преславне. Богородичен: Изравнитися желание ми вложь змий вселукавый содетелю, яко пленника восхити: тобою же пречистая призван бых, обожився истинно: ты бо БогоМати, мене обожившаго родила еси. Песнь 3. Ирмос: Веселится о тебе Церковь твоя Христе, зовущи: ты моя крепость Господи, и прибежище, и утверждение. Град твой Боже, словесных рек твоих течения ученик, Владыко, Священно возвеселяют. Граждане Небеснии, сослужебницы мысленным чином, всеславнии апостоли, всякия нас скорби избавите. Утвердивый Христе, словесныя твоя Небеса, утверди мя тех молитвами на камени твоих хотений, яко Благоутробен. Богородичен: Яко Мати тя молит, с ликом ученик Господи, яже тебе чисто родившая: даруй нам милости твоя. Ин. Ирмос: Процвела есть пустыня, яко крин, Господи, языческая неплодящая церковь, пришествием твоим, в ней же утвердися мое сердце. Николае Блаженне, Владыки присный ученик ты быв, Спасаеши к тебе притекающия от лютых бед, и смерти горькия. [Дважды.] Очисти рабы твоя и грехов оставление яко Благ даруй, николаа твоего угодника иже к тебе ходатайствы, многомилостиве. Богородичен: Устави смущение страстей моих Владычице, и жизнь окорми пресвятая, Бога рождшая: в немже утвердися сердце мое. Кондак николаю, глас 3. Подобен: Дева днесь: В мирех святе священнодействитель показался еси: Христово бо Преподобне евангелие исполнив, положил еси душу твою о людех твоих, и Спасл еси неповинныя от смерти. сего ради освятился еси, яко великий таинник Божия Благодати. Икос: Воспоим ныне святителя песньми, мврским людем пастыря и учителя, да молитвами его просветимся: се бо явися весь чист, нетленен духом, Христови принося жертву непорочну, чисту, Богови Благоприятну, яко святитель очищен и душею и телом. темже есть воистинну Церкви предстатель, и поборник сея, яко великий таинник Божия Благодати. Седален апостолом, глас 4: Светила в концех, ученики твоя Христе явил еси, сияющия душам сущим во тьме, разум твой Владыко: и лесть идольскую тех ради омрачив, ученьми Благочестия просветил еси мир. тех мольбами Спаси души наша. Другий седален николаю, глас 8. Подобен: Премудрости: Возшед на высоту добродетелей, Божественными оттуду отче озарился еси сиянии чудес, пресветел воистинну явився мирови пастырь, и в напастех сый предстатель непобедимь. темже преславно врага побеждь, лжу отгнал еси, и человеки Спасл еси от смерти николае. моли Христа Бога, грехов оставление даровати чтущим любовию святую память твою. Слава, и ныне, Богородичен: Прибежище сущим в лютых, пременение к Богу согрешающим, пречистая Владычице, Спаси нас от всякаго обстояния, и озлобления человеческаго, и страшнаго мучения, и страстей безчестия, несумненною верою тя присно призывающих, Дево всепетая. Песнь 4. Ирмос: Вознесена тя видевши Церковь на Кресте, солнце праведное, ста в чине своем, достойно взывающи: слава силе твоей Господи. Навел еси на море кони твоя избранныя, человеколюбче, зловерия воды возмущающия, и всем разум твой истинный возвещающия. Звезды просветивше Благочестием мысленную твердь Церковную, славнии апостоли, от нощи неведения и прегрешений избавите мя. Явльшеся якоже стрелы из_ощрени апостоли, вражия разжженныя стрелы злобы моея ныне угасите и помышление мое утвердите. Богородичен: Душу мою огорченную ядом, сопротивнаго угрызением, действенным врачеванием исцели, молитвами Христе, рождшия тя, и Священных апостол твоих. Ин. Ирмос: Пришел еси от Девы, не ходатай, ни ангел, но сам Господи воплощься, и Спасл еси всего мя человека. тем зову ти: слава силе твоей Господи. Приближився чисте зарям духовным, светоносец был еси, мира просвещаяй концы, всем предстоя, и вся Спасая верою к тебе притекающия. Избавляяй от смерти, якоже явился еси первее николае, юноши Преподобне, тако и ныне мя Спаси от всякаго обстояния и напастей и бед всеБлаженне. Облистал еси добродетелей сиянием всебогате, подражатель преизряден своему Владыце быв: Спасаеши же призываемь, иже Благоговением и любовию тя славящия. Богородичен: Найде на тя Владыка и Господь воплощаемь, и Спасаяй яко Благоутробен всего мя человека, темже зову ти: радуйся Богородице всенепорочная. Песнь 5. Ирмос: Ты Господи мой, свет в мир пришел еси, свет святый, обращаяй из мрачна неведения, верою воспевающия тя. Лозы животныя, процветающя гроздие, напоиша всех вина мысленнаго веселия, славнии апостоли. К свету заповедей Божиих наставите, апостоли, иже во тьме душевнаго уныния, безумно пребывающия. Избавите нас душевных прегрешений и суда будущаго, и тли, и бед, апостоли Блаженнии. Богородичен: Спаси мя Боже яко человеколюбец, Спаси мя мольбами неизреченно тебе родившия, и всех Божественных апостол твоих. Ин. Ирмос: Просвещение во тьме лежащих, Спасение отчаянных, Христе Спасе мой, к тебе утренюю Царю мира, просвети мя сиянием твоим: иного бо разве тебе Бога не знаю. Боголепным житием преБлаженне просвещаемь, осужденныя неправедным изречением умрети, представ, избавил еси, Владыце Христу зовущия: иного разве тебе Бога не знаем. Дважды. На Небесех присносущную славу ныне зря, и неизглаголанныя и Божественныя зари, пресветлыми наслаждаяся сиянии, покрый мя предстательством твоим Преподобне, угодниче Христов всечестне. Богородичен: Да твой взыщеши образ погребенный страстьми Спасе, Небесных утаився сил, воплощься от Девы, явился еси тебе зовущим: иного разве тебе Бога не знаем. Песнь 6. Ирмос: Пожру ти со гласом хваления Господи, Церковь вопиет ти, от бесовския крове очищшися, ради милости от ребр твоих истекшею кровию. Пастыря добраго Богоизбранная овчата, разсеянная по миру, волков всяко зверство во овчую кротость верою преложиша. Божественнаго рая древеса доброплодная, преокаянныя души моея всенеплодство во Благоплодие добродетельнаго нрава преведите апостоли. Уязвен бых сластей оружием, и умрох: иже от Христа приемше славнии Благодать воскрешати мертвыя, умерщвленную окаянную мою душу оживите. Богородичен: Утоли души моея свирепую бурю, Боже всех щедрый, мольбами рождшия тя Богородицы, апостол же и Мученк твоих. Ин. Ирмос: В бездне греховней валяяся, неизследную милосердия твоего призываю бездну: от тли Боже мя возведи. Иже победы николае венец, на твоем версе достойно положися: яко победитель убо изряден, тя призывающия Спаси. Дважды. Умерщвлена мя Блаженне прегрешении, и страстными треволнении погружаема, явлься Спаси, направляя к пристанищу Божественныя воли. Богородичен: На тя упование возложих, Мати присноДево, Спасения моего: и тя предстательницу положих живота, тверду и непоколебиму. Кондак, глас 2: Твердыя и Боговещанныя проповедатели, верх ученик твоих Господи, приял еси в наслаждение Благих твоих и покой: болезни бо онех и смерть приял еси, паче всякаго всеплодия, едине сведый сердечная. Икос: Уясни ми язык Спасе мой, разширив ми уста и исполнив я, умили сердце мое, да яже глаголю, последую, и яже учу, сотворю первее: всяк бо творя и учя, рече, сей велик есть. аще бо глаголя не творю, яко медь звенящая вменюся. темже глаголати ми подобная, и творити полезная научи, едине сведый сердечная. Песнь 7. Ирмос: В пещи авраамстии отроцы персидстей, любовию Благочестия паче, нежели пламенем опаляеми взываху: Благословен еси в храме славы твоея Господи. Крепостию всесвятыя проповеди, нелестнии апостоли Христовы, прелести зиму разрушисте, и просветисте Богоразумием верных мудрование. Миро Благоуханное источающе всегда Божественнии ученицы, мира умнаго Благовония притекающих к вам исполните, и злосмрадныя страсти отжените. Растлевшаго мя плотскими безместии, слова нетленнаго славнии ученицы, Спасите мя поюща: Благословен еси в храме славы твоея Господи. Богородичен: Лик ангельский, лик Мученк и апостол твоих, слове, молят всегда многое Благоутробия твоего человеколюбче: всех ущедри Богородицею, яко Благоутробен. Ин. Ирмос: Образу златому на поле деире служиму, трие твои отроцы небрегоша безбожнаго веления: посреде же огня ввержени, орошаеми пояху: Благословен еси Боже отец наших. Во острое искушение впадох люте подстрекаемь, и ко вратом ада приближихся, печальми ударяемь, Спаси мя молитвами твоими Блаженне, и возстави поюща, Благословен Бог отец наших. Незаходимаго света невещественными молниями облистаемь, сущия во тьме скорбей озлобленныя исхити, и к просвещению веселия настави поющия: Благословен Бог отец наших. Богородичен: Моли Христа, Сына твоего и Бога, Богородительнице, проданным лютыми прегрешеньми и лестьми змииными, кровию его честною избавитися поющим: Благословен еси Боже отец наших. Песнь 8. Ирмос: Руце распростер даниил, львов зияния в рове затче: огненную же силу угасиша, добродетелию препоясавшеся, Благочестия рачители отроцы взывающе: Благословите вся дела Господня Господа. Уста огнедохновенная Христова, яже бездверная уста заградивше, и Спасительное проповедание повсюду разсеявше, от уст волка мысленнаго избависте вопиющия: вся дела Господа пойте, и превозносите его во вся веки. Вострубите окрест моея умерщвленныя души, Благогласнии трубы Христовы, апостоли славнии: и от гроба отчаяния и уныния лютаго сию воздвигните, во еже пети: вся дела Господа пойте, и превозносите его во вся веки. Мене, законы твоя Христе поправшаго, ума развращением: мене Владыко блуднаго, во глубину поползшася, и обычаю лукавому присно работающа, не презри учеников твоих мольбами. Богородичен: Марие, Госпоже всяческих, обладаема мя от змия, и согрешающа всегда, свободи молитвами твоими, и поработи Христу в житии чисте, воспевати: вся дела Господа пойте, и превозносите его во вся веки. Ин. Ирмос: В пещь огненную ко отроком еврейским снизшедшаго, и пламень в росу преложшаго Бога, пойте дела яко Господа, и превозносите во вся веки. Яко Благ и милосерд, иже во глубине напастей одержимыя свободи Блаженне, содержащих лютых [николае] разрешение подая молитвами твоими, яже ко Спасу Христу, Священнотаинниче. Дважды. Таинник иже паче ума, святых служитель, и Небесных сый Богомудре, архиерей же верен: прегрешений оставления проси от Спаса нашего, Священноявленне. Богородичен: Изнемогает мой ныне ум, во глубины впад безчестия, яко отвсюду различными обят есмь злыми: но ты Дево исцели, безстрастия светом одевающи. Песнь 9. Ирмос: Камень нерукосечный от несекомыя горы тебе Дево, краеугольный отсечеся: Христос, совокупивый разстоящаяся естества. тем веселящеся, тя Богородице величаем. Камение избранное, положеннаго во главу угла камене, создасте всех верных сердца, каменем веры вражия создания апостоли развергшии. Решити и вязати от Христа приемше власть, разрешите зол моих соуз, и к любви Божией привяжите, и Царствия причастника Божественнаго соделайте апостоли. Божественнии Владыки облацы, изсохшее мое сердце всяким лукавым деянием, Божественными тучами ныне напойте, и плодоносно покажите, апостоли БогоБлаженнии. Богородичен: Со святыми ангелы, с Божественными апостолы, с славными Мученки, твоего моли Сына и Господа Богородительнице пречистая, от бед избавити души наша. Ин. Ирмос: Безначальна родителя Сын, Бог и Господь, воплощься от Девы нам явися, омраченная просветити, собрати расточенная. тем всепетую Богородицу величаем. Свещами Благодати Богомудре просвещаемь, и светильник Благочестия яве быв, сущия в напастех Спасаеши, и иже во глубине морстей избавляеши, и питаеши алчущия преславно всеБлаженне. Дважды. Яко в раи пищи ныне водворяемь, и неизреченную славу ясно зря, от Небесных круг певцы твоя назираеши, от страстей избавляя, Богоносе всеБлаженне. Богородичен: Премурость и силу и слово впостасное отчее, БогоМати чистая, родила еси от твоих пречистых кровей, свой храм приимшую, и сему по соединению соединившуюся нераздельно.