Тропари и кондаки воскресны Тропарь, глас 1: Камени запечатану от иудей, и воином стрегущим пречистое тело твое, воскресл еси, тридневный Спасе, даруяй мирови жизнь: сего ради силы Небесныя вопияху ти, жизнодавче: слава воскреснию твоему, Христе. слава Царствию твоему. слава смотрению твоему, едине человеколюбче. Кондак, глас 1: Воскр\сл еси, яко Бог из гроба во славе, и мир совоскресил еси: и естество человеческое яко Бога воспевает тя, и смерть исчезе: адам же ликует, Владыко, ева ныне от уз избавляемя радуется, зовущи: ты еси иже всем подая, Христе, воскресение. Тропарь, глас 2: Егда снизшел еси к смерти животе безсмертный, тогда ад умертвил еси блистанием Божества: егда же и умершия от преисподних воскресил еси, вся силы Небесныя взываху: жизнодавче Христе Боже наш, слава тебе. Кондак, глас 2: Воскр\сл еси от гроба, всесильне Спасе, и ад видев чудо, ужасеся, и мертвии восташа: тварь же видящи, срадуется тебе, и адам свеселится, и мир, Спасе мой, воспевает тя присно. Тропарь, глас 3: Да веселятся Небесная, да радуются земная, яко сотвори державу мышцею своею Господь, попра смертию смерть, первенец мертвых бысть: из чрева адова избави нас, и подаде мирови велию милость. Кондак, глас 3: Воскр\сл еси днесь из гроба, щедре, и нас возвел еси от врат смертных. днесь адам ликует, и радуется ева, вкупе же и пророцы с патриархи воспевают непрестанно Божественную державу власти твоея. Тропарь, глас 4: Светлую воскресения проповедь, от ангела уведевше Господни ученицы, и прадеднее осуждение отвергше, ап\столом хвалящеся глаголаху: испровержеся смерть, воскресе Христос Бог, даруяй мирови велию милость. Кондак, глас 4: Сп~с и избавитель мой, из гроба яко Бог, воскреси от уз земнородныя, и врата адова сокруши, и яко Владыка воскресе тридневен. Тропарь, глас 5: Собезначальное слово отцу и Духови, от Девы рождшееся на спасение наше, воспоим, вернии, и поклонимся: яко благоволи плотию взыти на Крест, и смерть претерпети, и воскресити умершия славным воскресением своим. Кондак, глас 5: Ко аду, Спасе мой, сошел еси, и врата сокрушивый яко всесилен, умерших яко создатель совоскресил еси, и смерти жало сокрушил еси: и адам от клятвы избавлен бысть, человеколюбче. темже вси зовем: спаси нас Господи. Тропарь, глас 6: Агг~льския силы на гробе твоем, и стрегущии омертвеша, и стояше мариа во гробе, ищущи пречистаго тела твоего. пленил еси ад, не искусився от него: сретил еси Деву, даруяй живот: воскресый из мертвых Господи, слава тебе. Кондак, глас 6: Живоначальною дланию умершия от мрачных удолий жизнодавец воскресив всех Христос Бог, воскресение подаде человеческому роду: есть бо всех спаситель, воскресение, и живот, и Бог всех. Тропарь, глас 7: Разрушил еси Крестом твоим смерть, отверзл еси разбойнику рай: мироносицам плачь преложил еси, и апостолом проповедати повелел еси, яко воскресл еси, Христе Боже, даруяй мирови велию милость. Кондак, глас 7: Не ктому держава смертная возможет держати человеки: Христос бо сниде сокрушая и разоряя силы ея, связуемь бывает ад, Пророцы согласно радуются, предста, глаголюще, Спас сущим в вере: изыдите вернии в воскресение. Тропарь, глас 8: С высоты снизшел еси, благоутробне, погребение приял еси тридневное, да нас свободиши страстей, животе и воскресение наше, Господи, слава тебе. Кондак, глас 8: Воскрес из гроба, умершия воздвигл еси, и адама воскресил еси, и ева ликует во твоем воскреснии, и мирстии концы торжествуют, еже из мертвых востанием твоим, многомилостиве. Празднику Богородичну тропарь общий, глас 4: К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши: потщися, погибаем от множества прегрешений: не отврати твоя рабы тщи, тя бо и едину надежду имамы. Кондак, глас 1: Честное жилище бывшее неизреченнаго естества божественнаго, выше слова, и паче ума, и грешным еси споручница, подаваеши Благодать и исцеление, яко Мати всех царствующаго: моли Сына твоего, получити нам милость в день судный. Ин кондак, глас 6: Не имамы иныя помощи, не имамы иныя надежды, разве тебе, Владычице: ты нам помози, на тебе надеемся, и тобою хвалимся: твои бо есмы раби, да не постыдимся. % Тропари и кондаки общия святым Пророку тропарь, глас 2: Пр\орока твоего 173, память, Господи, празднующе, тем тя молим, спаси души наша. Кондак, глас 4: Просветившеся Духом чистое твое сердце, Пророчества бысть светлейшаго приятелище: зриши бо яко настоящая далече сущая: сего ради тя почитаем, Пророче блаженне, 173, славне. Апостолу тропарь, глас 3: Апостоле святый, 173, моли милостиваго Бога, да прегрешений оставление подаст душам нашим. Кондак, глас 4: Яко звезду пресветлую Церковь всегда стяжа тя, апостоле, 173, чудес твоих многоподаванием просвещаема. темже зовем Христу: спаси чтущих верою память твоего апостола, многомилостиве. Апостолом двема и многим, тропарь, глас 3: Апостоли святии, молите милостиваго Бога, да прегрешений оставление подаст душам нашим. Кондак, глас 4: Лозие явистеся Христова винограда, мудрии, гроздие приносяще в добродетелех, вино нам Спасения источающе: егоже приемлем, веселия исполняющеся. празднуем честную вашу память, в нюже молите дароватися нам велицей милости и отпущению грехов, Господни апостоли. Святителю, тропарь, глас 4: Правило веры, и образ кротости, воздержания учителя яви тя стаду твоему, яже вещей истина: сего ради стяжал еси смирением высокая, нищетою богатая. отче Священноначальниче, 173, моли Христа Бога Спастися душам нашим. Кондак, глас 2: Бж~ественный гром, труба Духовная, веры насадителю, и отсекателю ересей, Троицы угодниче, великий святителю 173, со ангелы предстоя присно, моли непрестанно о всех нас. Святителем двема и многим, тропарь, глас 4: Бж~е отец наших, творяй присно с нами по твоей кротости, не отстави милость твою от нас, но молитвами их в мире управи живот наш. Кондак, глас 8: Яко добродетелей учителие, и иерархов украшение, Церковь поющи вас славит: молитвами вашими подайте чтущим вас любовию, добродетелей исправление, и соблазнов избавление, яко непобедимии. Прп\обному тропарь, глас 8: В тебе отче известно Спасеся еже по образу: приим бо Крест последовал еси Христу, и дея учил еси презирати убо плоть, преходит бо, прилежати же о души вещи безсмертней. темже и со ангелы срадуется Преподобне 173, дух твой. Кондак, глас 2: Чистотою душевною Божественно вооружився, и непрестанныя молитвы, яко копие вручив крепко, пробол еси бесовская ополчения, 173, отче наш, моли непрестанно о всех нас. Преподобным двема и многим, тропарь, глас 4: Бж~е отец наших, творяй присно с нами по твоей кротости, не отстави милость твою от нас, но молитвами их в мире управи живот наш. Кондак, глас 2: Волнений множество невлажно проходяще, безплотныя враги струями слез ваших крепко погрузили есте Богомудрии и Преподобнии: и чудес дар приимше, молите непрестанно о всех нас. Мученику, тропарь, глас 4: Мчениик твой, Господи, 173, во страдании своем венец прият нетленный от тебе Бога нашего: имеяй бо крепость твою, мучителей низложи, сокруши и демонов немощныя дерзости, того молитвами Спаси души наша. Кондак, глас 2: Звезда светлая явился еси, непрелестная мирови, солнце Христа возвещающи, зарями твоими страстотерпче 173, и прелесть погасил еси всю: нам же подаеши свет, моляся непрестанно о всех нас. Мучеником двема и многим, тропарь, глас 1: Болезньми святых, имиже о тебе пострадаша, умолен буди Господи, и вся наша болезни исцели, человеколюбче, молимся. Кондак, глас 2: Светильницы светлии явльшеся, Божественнии Мученицы, тварь всю светлостию чудес озаряете, недуги разрешающе, и глубокую тьму всегда отгоняюще, Христу Богу молящеся непрестанно о всех нас. Священномученику, тропарь, глас 4: И нравом причастник, и престолом наместник апостолом быв, деяние обрел еси Богодухновенне, в видения восход: сего ради слово истины исправляя, и веры ради пострадал еси даже до крове, СвященноМучениче 173, моли Христа Бога Спастися душам нашим. Кондак, глас 2: Во святителех Благочестно пожив, и мучения путь прошед, идольския угасил еси жертвы, и поборник быв твоему стаду, Богомудре. темже тя почитающе тайно вопием ти: от бед избави ны присно твоими мольбами, отче наш, 173. Священномучеником двема и многим, тропарь, глас 4: Бж~е отец наших, творяй присно с нами по твоей кротости, не отстави милость твою от нас, но молитвами их в мире управи живот наш. Кондак, глас 3: Яко светильницы незаходимии разумнаго солнца, сошедшеся днесь восхвалим песньми, возсияли бо есте сущим во тьме неразумия, всех созывающе к высоте Благочестия СвященноМученцы. тем вопием вам: радуйтеся постников всех основание. Преподобномученику, тропарь, глас 4: В тебе отче известно Спасеся еже по образу: приим бо Крест последовал еси Христу, и дея учил еси презирати убо плоть, преходит бо, прилежати же о души вещи безсмертней. темже и со ангелы срадуется Преподобне 173, дух твой. Кондак, глас 3: Яко постника Благочестна, и искусна, и страдальца произволением честна, и пустыни жителя сообразна, в песнех достойно восхвалим, 173, приснохвальнаго: той бо змия попрал есть. Мученице, тропарь, глас 4: Агница твоя Иисусе, 173, зовет велиим гласом: тебе, женише мой, люблю и тебе ищущи страдальчествую и сраспинаюся, и спогребаюся крещению твоему, и стражду тебе ради, яко да Царствую в тебе, и умираю за тя, да и живу с тобою: но яко жертву непорочную приими мя, с любовию пожершуюся тебе. тоя молитвами, яко милостив, Спаси души наша. Кондак, глас 3: Храм твой всечестный, яко цельбу душевную обретше вси вернии, велегласно вопием ти Дево Мученце, 173, великоименитая: Христа Бога моли непрестанно о всех нас. Мученицам двема и многим, тропарь, глас 1: Агницы словесныя агнцу и пастырю приведостеся мучением ко Христу, течение скончавше, и веру соблюдше: темже днесь радостною душею совершаем досточуднии святую вашу память, Христа величающе. Кондак, глас 3: Стр\стотерпиц Христовых память празднуим, и верою просяще помощи, избавитися всем от всякия скорби, зовуще: Бог наш с нами, иже сих прославивый, якоже изволи. Преподобней жене, тропарь, глас 8: В тебе мати, известно Спасеся еже по образу: приим бо Крест последовала еси Христу, и деющи учила еси презирати убо плоть, преходит бо, прилежати же о души вещи безсмертней. темже и со ангелы срадуется Преподобная 173, дух твой. Кондак, глас 2: За любовь Господню Преподобная, покоя желание возненавидела еси, пощением дух твой просветивши, крепко бо звери победила еси: но молитвами твоими противных шатание разори. ПреподобноМученце тропарь, глас 4: Агница твоя Иисусе, 173, зовет велиим гласом: тебе, женише мой, люблю и тебе ищущи страдальчествую и сраспинаюся, и спогребаюся крещению твоему, и стражду тебе ради, яко да Царствую в тебе, и умираю за тя, да и живу с тобою: но яко жертву непорочную приими мя, с любовию пожершуюся тебе. тоя молитвами, яко милостив, Спаси души наша. Кондак, глас 2: Бж~ественная память твоя, 173, днесь возсиявши явися мирови яко солнце, сказующи житие твое: ты бо воздержанием плотская двизания разорши, и страдания кровию уневестилася еси Христови. темже хвалящия тя избави от всяких зол, да зовем ти: радуйся, Мати Преподобная. Исповеднику тропарь, глас 8: Православия наставниче, Благочестия учителю и чистоты, вселенныя светильниче, архиереев Богодухновенное удобрение, 173, премудре, ученьми твоими вся просветил еси, цевнице Духовная. моли Христа Бога спастися душам нашим. Кондак, глас 2: Насладився Богомудре воздержания, и желания плотская ты успил еси, явився верою возращаемь, и яко живота древо райское процвел еси, 173, отче Священный. Безмездником и чудотворцем тропарь, глас 8: Ст~ии безсребреницы и чудотворцы, посетите немощи наша: туне приясте, туне дадите нам. Кондак, глас 2: Благодать приимше исцелений, простираете здравие сущим в нуждах врачеве, чудотворцы преславнии: но вашим посещением ратников дерзости низложите, мир исцеляюще чудесы. Христа ради юродивому тропарь, глас 1: Глас апостола твоего павла услышав глаголющ: мы юроди Христа ради, раб твой Христе Боже, 173, юрод бысть на земли тебе ради: темже память его почитающе, тебе молим: Господи, Спаси души наша. Кондак, глас 2: Вышния красоты желая, нижния сласти телесныя тощно оставил еси, нестяжанием суетнаго мира, ангельское житие проходя, скончався, 173, Блаженне: с нимиже Христа Бога моли непрестанно о всех нас.