<::рус> Оцифровка и приведение к грамматическим нормам ЦС-языка: протоиерей Николай Диваков, Людоговский Ф. Б. <::слав> Благословение супруг чад неимущих. {Источник: Требник. Рим. 1980} Услыши ны, милосерде и всемогущий Боже, да еже деется служительством нашим, сие исполнится твоею Благодатию. Буди милостив, Господи, молением нашим, и воспомяни уставы твоя, имиже умножения человеческаго рода уставил еси, милостивне предстани, да еже тобою сочетано бысть, сие твоею помощию сохранится. Боже преБлагий, властию силы твоея, от несущих вся сотворивый, и всяких вещей начатки установивый, человека во образ Божий сотворивый с неразлучною помощию жены, да телеси женскому даси от мужеска начаток, уча: никакоже разлучитися, еже Богу от единаго установити подобаше. Боже наш, иже высокою тайною супружества союз, во еже им предзнаменовати тайну Христа с церковию соединения, освятил еси: имже невеста совокупляется мужу, и дружество первее установленное сицевым даруется благословением: еже самое токмо ни прародительным грехом, ниже потопом ноевым разорися. Сего ради призри, милосерде, на рабы твоя сия им\рк, супружным союзом связанныя, твоего же прибежища и помощи просящия, да будет в них иго милости и мира и радования, и ничтоже в них от дел их сатана обрящет: да будут плодовити, и да узрят сыны сынов своих, даже до третияго и четвертаго рода, к вожделенной старости достигнут и внидут в Небесную скинию. Яко милостив и человеколюбец Бог еси, и тебе славу возсылаем, отцу, и Сыну, и святому Духу, ныне и присно, и во веки веков. Лик: Аминь. И кропит я иерей священною водою. Молитва иная. Гд\си Иисусе Христе, преБлагословенныя Девы марии обрученныя иосифови пресвятейший Сыне, в раи земном женитву установивый ко умножению и сохранению рода человеческаго, и туюжде в пришествии твоем чудесне почтый, и начаток чудес твоих освятивый: благоизволи рабы твоя сия им\рк яже сочетал еси, заступлением преБлагословенныя Девы Марии, Матере твоея, и моленьми всех святых твоих, благословити и от всякаго связания, злодействия и волхования сатаны и слуг его свободити: даждь им чадородия благодать, да свободне совершают женитву свою и оплодоносят ложе свое, во еже родити и воспитати чада в хвалу и славу твою: во имя отца, и Сына, и святаго Духа. Аминь. Молитва иная. Гд\си Иисусе Христе, Сыне Бога живаго, иже чрево пресвятыя Девы Марии чудесне плодно сотворил еси, да от Духа свята зачнет, родит и воспитает тя, Бога и спаса нашего, молим ти ся и мили ся тебе деем, премилосерде Господи, да сим рабом твоим им\рк плод подаси, о еже им родити и воспитати чада в живот вечный. Боже превечный, ты благословил еси прародители наша супружеством, благослови и сия, даруя им плод семене, и оживотвори утробу невесты, еже имети наследие дома Христианскаго во благое: во имя отца, и Сына, и святаго Духа. Аминь.