<::лат> OCR: <::рус> Библиотека святоотеческой литературы <::лат> http://orthlиb.ru <::слав> <::рус> источник и оцифровщики неизвестны <::слав> Стихира евангельская 1, глас 1. На гору учеником идущим за земное вознесение, предста Господь, и поклонившеся ему, и данныя власти везде научившеся, в подНебесную посылахуся, проповедати еже из мертвых воскресение, и еже на Небеса возшествие: имже и во веки спребывати неложный обещася Христос Бог, и Спас душ наших. Стихира евангельская 2, глас 2. С миры пришедшим яже с мариею женам, и недоумевающимся, како будет им улучити желание, явися камень взят, и Божественный юноша утоляя мятеж душ их: воста бо глаголет, Иисус Господь. темже проповедите проповедником его, ученииком в галилею тещи, и видети его воскресша из мертвых, яко жизнодавца и Господа. Стихира евангельская 3, глас 3. Магдалине марии Спасово Благовествующей из мертвых воскресение и явление, не верующе ученицы, поносими быша о жестосердии: но знаменми вооружшеся и чудесы, ко проповеданию посылахуся, и ты убо Господи, к начальному свету вознеслся еси отцу, они же проповедаша всюду слово, чудесы уверяюще. темже просветившеся теми, славим твое еже из мертвых воскресение, человеколюбче Господи. Стихира евангельская 4, глас 4. Утро бе глубоко, и жены приидоша на гроб твой, Христе: но тело не обретеся желаемое ими: темже недоумевающимся, яже в ризах блещащихся представшая глаголаста: что живаго с мертвыми ищете? воста, якоже предрече, что не помните глагол его? Имаже веровавша виденная проповедаху, но мняхуся лжа благовещения: тако быша еще косни ученицы: но петр тече и видев прослави твоя в себе чудеса. Стихира евангельская 5, глас 5. _О премудрых судеб твоих Христе! како петру убо плащаницами единеми дал еси разумети твое воскресение? луце же и клеопе спутьшествуя беседовал еси, и беседуяй не абие себе являеши: темже и поносим бываеши, яко един пришельствуяй во Иерусалим, и не причащаяйся в конец совета их: но иже вся к создания ползе строя, и яже о тебе Пророчествия открыл еси, и внегда благословити хлеб познался еси им, еюже и прежде того сердца к познанию твоему распаластася: яже и учеником собранным уже ясно проповедаста твое воскресение, имже помилуй нас. Стихира евангельская 6, глас 6. Истинный мир ты Христе, к человеком Божий мир твой дая, по востании учеником, пристрашны показал еси я, мнящия дух видети: но утишил еси мятеж души их, показавый руце и нозе твои. обаче не верующим еще, брашен причащением, и учений воспоминанием, отверзл еси их ум, еже разумети писания: имже и отеческое обетование обещав, и Благословив я, отступил еси на Небо. темже с ними покланяемся тебе, Господи слава тебе. Стихира евангельская 7, глас 7. Се тьма, и рано, и что у гроба марие стоиши, многую тьму имеющи в разуме, в нейже, где положен бысть, вопрошаеши, Иисус? но виждь срищущяся учениики, како плащаницами и сударем воскресение обретоша, и помянуша яже о сих писания. с нимиже и имиже и мы веровавше, воспеваем тя жизнодавца Христа. Стихира евангельская 8, глас 8. Мариины слезы не всуе проливаются тепле, се бо сподобися и учащих ангелов, и видения самого Иисуса: темже и отсылается не прикасатися Христу. но обаче проповедница посылается твоим учеником, имже Благовествование носящи, еже ко отеческому жребию восход возвещающи: с неюже сподоби и нас явления твоего Владыко Господи. Стихира евангельская 9, глас 5. Яко в последняя лета, сущу позде от суббот предстал еси другом Христе, и чудесем чудо извествуеши, заключенным входом дверным, еже из мертвых твое воскресение: но исполнил еси радости учениики, и Духа святаго преподал еси им, и власть подал еси оставления грехов и фомы не оставил еси в неверствия погружатися бури. темже подаждь и нам разум истинный, и оставление прегрешений Благоутробне Господи. Стихира евангельская 10, глас 6. По еже во ад сошествии, и еже из мертвых воскреснии, скорбяще якоже достояше, о разлучении твоем Христе, ученицы на делание обратишася, и паки корабли и мрежи, и лова нигдеже: но ты Спасе, явився яко Владыка всех, одесную мрежи повелеваеши воврещи, и бысть слово дело вскоре, и множество рыб многое, и вечеря странная готова на земли: еяже причастившимся тогда твоим учеником, и нас ныне мысленно сподоби насладитися, человеколюбче Господи. Стихира евангельская 11, глас 8. Являя себе ученииком твоим, Спасе, по воскреснии симону дал еси овец паству, за любве воздаяние, яже о пастве, попечения ищя. темже и глаголал еси: аще любиши мя петре, паси агнцы моя, паси овцы моя. он же абие показуя друголюбное, о друзем ученице вопрошаше: ихже молитвами Христе, стадо твое сохраняй, от волков губящих е.