<::лат> OCR: <::рус> Библиотека святоотеческой литературы <::лат> http://orthlиb.ru <::слав> (л. 134 об.) [гл\ва 24] СЛУЖБА ОБЩА ПреподобноМученце единой. Вечера, на Господи воззвах, стихиры, глас 8. Подобен: Что вы наречем святии: Мченице страстотерпице всехвальная, им\рк, * воздержанием страсти низложивши плотския, * страданием змия умертвила еси врага, * ангелы удививши болезньми твоими, * человеки обвеселивши страдании твоими: * инокиням удобрение * и девства сосуд, * моли Спасти и просветити души наша. Что тя возыменуем славная? * девства добротами невесту просиявшу Христову, * дщерь избранну, вышняго Иерусалима жительницу, * ангелом собеседницу, * чертога мысленнаго наслаждающуся. * им\рк, многострадальная, * моли Спасти и просветити души наша. Терпела еси зубов искоренение, * рук отсечение, и ног и сосцев, * ссекаема на уды от беззаконных мучителей, * к доброте жениха взирающи, * и болезни паче естества терпящи, * им\рк, многострадальная, * невесто Христова нетленная. * моли Спасти и просветити души наша. Слава, и ныне, Богородичен: Что твоих доброт чуднее пречистая? * исцеляеши недугующия, * и избавляеши от страстей, * и отгониши борющих безбожныя прилоги: * от бед избавляеши поющия тя, * скорби утоляеши молитвою твоею. * радости лучшия Дево, ходатай буди рабов твоих, * молящихся Спасти души наша. (л. 135) КрестоБогородичен: Агница агнца яко виде * на древе простерта волею Крестнем, * вопияше Матерски, * болезнующи с плачем: * Сыне мой, что странное сие видение? * всем жизнь даяй яко Бог, * како умерщвляешися долготерпеливе, * земным подая воскресение? * славлю твое Боже мой, великое снисхождение. Аще имать самогласен, Слава, глас 2: Во гласе радования, и во _псалмех восклицания, воспоим ПреподобноМученцу, им\рк, яко низложи на землю идольскую прелесть, и сопротивнаго врага мужески под нозе свои подложи. темже и скончавшися на Небеса возлете, на главе венец носящи, и взывающи: к тебе женише мой, желаю, и желания любовь имущи, но тебе плоть мою на муки предах. да вселюся убо в честная селения, идеже есть веселящихся жилище. И ныне, Богородичен: На тя упование Богородице, возложихом, чаяния да не отпадем: Спаси нас от бед, помощнице недоумеемым, и сопротивных советы разори: ты бо наше Спасение Благословенная. КрестоБогородичен: Егда нескверная агница, виде своего агнца на заколение яко человека волею влекома, рыдающи глаголаше: безчадствовати мя ныне тщишися Христе, тебе рождшую, что сие сотворил еси, избавителю всяческих? обаче воспеваю и славлю твою, юже паче ума и слова, крайнюю Благость человеколюбче. Аще празднуеши с полиелеем, глаголи Богородичен воскресный: Прейде сень: Вход. Прокимен дне. Чтения 3, Мученическая, [писана в конце книги сея.] На стиховне стихиры, глас 4: Подобен: Дал еси знамение: Страдание претерпела еси, * твоим борением, * сугубо, им\рк, всехвальная, * потом воздержания, мучения кровь (л. 135 об.) смесивши Преподобная: * темже и венец сугуб Благодатель тебе дарова, * к немуже возшла еси испещрена светло, * яко дева всенепорочная, * и яко Мученца непобедимая. Стих: Дивен Бог во святых своих, Бог Израилев. Доброта телесе, * и красота Божественная души твоея стекошася, * яко крин просияла еси * во обителех Преподобных убелена, * и кровными токи обагрена, * невесто всенепорочная, им\рк, * темже тя и Небесный красный прият невестник * в чертог неразоримый, * яко деву и Мученцу. Стих: В Церквах Благословите Бога, Господа от источник Израилевых. Окрест тебе прииде, * им\рк, всехвальная, * избавляяй тя ангел: * от младенства бо явилася еси Господа боящися, * и возложена яко возложение честное, * соблюденое вседержителю. * темже попрала еси мучителево безумие крепко, * и востекла еси ко Христу жениху твоему. Слава, глас 6: Одесную Спаса предстала еси Дево, страстотерпице и Мученце, им\рк, одеяна добродетельми непобеждена, и преукрашена елеем чистоты, и кровию страдания, и вопиющи к нему радостно: свещу держащи, в воню мира твоего текох Христе Боже: яко уязвихся твоею любовию аз, не отлучи мене женише Небесный. тоя молитвами низпосли нам всесильне Спасе, милости твоя. И ныне, Богородичен: Око сердца моего воспущаю к тебе Владычице, не презри малаго моего воздыхания в час, егда судит Сын твой миру: буди ми покров и помощница. КрестоБогородичен: Видящи тя распинаема Христе, тебе рождшая вопияше: что странное еже вижу таинство, Сыне мой, како на древе умираеши плотию повешен, жизни подателю? Тропарь, глас 4: Агница твоя Иисусе, им\рк, зовет велиим гласом: тебе женише мой люблю, и тебе ищущи страдальчествую, и (л. 136) сраспинаюся, и спогребаюся крещению твоему, и стражду тебе ради, яко да царствую в тебе, и умираю за тя, да и живу с тобою: но яко жертву непорочную, приими мя с любовию пожершуюся тебе. тоя молитвами яко милостив, Спаси души наша. Слава, и ныне, Богородичен или КрестоБогородичен. На утрени, на Бог Господь, тропарь тойже. По 1-й кафисме седален, глас 8. Подобен: Премудрости: Воздержания росою погасила еси пламень страстей юношески, огнем же кровей твоих всю прелесть попалила еси, и жениху слову яко дар принесла еси честное девство и доблественное страдание. темже в чертог введе тя славы светле добльствовавшую, и змия поправшую, им\рк, многострадальная. моли Христа Бога, грехов оставление подати, чтущим любовию святую память твою. [Дважды.] Слава, и ныне, Богородичен: Яко Деву и едину в женах, тя безсеменно рождшую Бога плотию, вси уБлажаем роди человечестии: огнь бо вселися в тебе Божества, и яко мл\днца доиши зиждителя и Господа. темже ангельский собор и человеческий род достойно славим всесвятое Рождество твое, и согласно вопием ти: моли Христа Бога, прегрешений оставление даровати, достойно поющим славу твою. По 2-й кафисме седален, глас 1. Подобен: Гроб твой: Первее пощение, второе же кровь мучения, яко алавастр мира, за любовь принесла еси Христу жениху твоему: мзду же прияла еси от него досточудная Мученце, им\рк, венец (л. 136 об.) Божественный и нетленный, и исцелений Благодать силою духовною. [Дважды.] Слава, и ныне, Богородичен: Безневестная чистая Дево Богородице, едина верных предстательнице и покрове, бед и скорбей, лютых обстояний вся избави, на тя надежду отроковице имущия, и души наша Спаси Божественными мольбами твоими. По Хвалите имя Господне: Припев: Величаем тя страстотерпице святая, им\рк, и чтем святую память твою: ты бо молиши за нас Христа Бога нашего. Псалом избранный: Бг~ нам прибежище и сила: По полиелеи седален, глас 8. Подобен: Премудрости: Душу связавши любовию Христовою, тленная же и временная Мученце мудрая забвением преминула еси, яко слова ученица славная: постнически первее страсти умертвивши, страдальчески второе льстиваго посрамила еси. темже и зиждителя сугубаго дерзновения сподобилася еси Преподобная, яко того послушавши, им\рк, пребогатая. моли Христа Бога согрешений оставление даровати, чтущим любовию святую память твою. [Дважды.] Слава, и ныне, Богородичен: Яко всенепорочная невесто творца, яко неискусомужная Мати избавителя, приятелище яко сущи утешителя всепетая, беззакония мя суща скверно жилище, и демонов игралище в разуме бывша, потщися и сих злодействия мя избавити, светло жилище добродетельми соделавши. светодательная и нетленная, разжени облак страстей и вышняго причастия сподоби, и света невечерняго молитвами твоими. Степенна, 1-й антифон 4-го гласа. Прокимен: Дивен Бог во святых своих, Бог Израилев. (л. 137) Стих: В Церквах Благословите Бога, Господа от источник Израилевых. Всякое дыхание: Ев\глие, [писано в конце книги сея.] По 50-м _псалме стихира: Одесную Спаса: [писана вечера на стиховне.] Канон, глас 8. Песнь 1. Ирмос: Поим Господеви, проведшему люди своя сквозе чермное море, яко един славно прославися. Сию светоносную память твою почитающему, Богомудрая, просвещение ми подаждь, души моея тьму отгоняющи. Всю от пелен тебе самую возложила еси зиждителю твоему, им\рк, и огнем воздержания телесныя страсти попалила еси. К высоте мучения, Мученце, возшла еси, не пощадевши плоти, и чертогов мысленных яко Дева сподобилася еси. Богородичен: Тя Небомерную лествицу, на нейже Бог утвердися, человеки Небесны соделовав, отроковице почитаем. Песнь 3. Ирмос: Ты еси утверждение притекающих к тебе, Господи, ты еси свет омраченных, и поет тя дух мой. Стояла еси пред судищем мучителя, славная, им\рк, Христа творца всех и Владыку, Бога слова проповедающи. Доброта сердечная видимым зраком славная, им\рк, издавшися, тя краснейшую зрящим явила есть. Богатство неистощимо исцелений тебе подаде отроковице Христос, егоже нищету вольно возлюбила еси. Богородичен: Вещь грехов моих, твоих молитв огнем попали Мати света, росу ми Божественную оставления носящи. Седален, глас 1. Агница словесная агнцу и пастырю принеслася еси пощением, мучением же течение скончавши, и веру соблюдши, им\рк: темже днесь радостию совершаем досточудная, Священную твою память, Христа славяще. (л. 137 об.) Слава, и ныне, Богородичен: Мл~твы твоих раб приими, Богородице, и избави нас от всякия беды, яко рождшая Христа Спаса, избавителя душ наших. КрестоБогородичен: Твое предстательство имуще пречистая, и твоими молитвами лютых избавляеми, Крестом Сына твоего везде соблюдаеми, по долгу тя вси Благочестно величаем. Песнь 4. Ирмос: Услышах, Господи, смотрения твоего таинство, разумех дела твоя, и прославих твое Божество. Тя иго легчайшее Христово Мученце понесшую от юности, тяжкое бремя носити, пребеззаконнующии осудиша. Капли кровей твоих многобожия погасиша углие, лучи же чудес твоих, им\рк, страстей вещь попалиша. Выше земли вземся твой огнь, к персем Мученце возгнетися, возгнещая твое рачение, еже ко Владыце Дево. Богородичен: По Рождестве пребыла еси нетленна Дево, якоже прежде Рождества: юна бо младенца родила еси, прежде век познаваема. Песнь 5. Ирмос: Утренююще вопием ти, Господи, Спаси ны: ты бо еси Бог наш, разве тебе иного не вемы. Неизнуренна огнем вещественным явилася еси Мученце, им\рк, огнь бо тя сердечный Божественныя любве орошаше. Удареньми лица Мученце, им\рк, украсившися, врагов отразила еси мерзкое неразумие. Протяжена на древе Богомудрая, им\рк, любовию жениха твоего Божественную страсть образовала еси. Богородичен: Поем тя всепетая Владычице Богородице: Бога бо препетаго плотию родила еси пречистая. Песнь 6. Ирмос: Ризу мне подаждь светлу, одеяйся светом яко ризою, многомилостиве Христе Боже наш. Сокрушаемо тело ранами, являше правость твоея совести страстотерпице им\рк, ко Христу Богу нашему. (л. 138) Висящи высоко, раны Мученце терпящи, и неуязвенно хранящи души Благородие, им\рк, достохвальная. Терпяше сосцев отрезание Преподобная, верныя млеком Божественнаго рачения питающи, славная. Богородичен: Чл~веколюбца рождши Бога, Боголюбивая Владычице, того моли, геенны огня избавитися нам. Кондак, глас 4. Подобен: Скоро предвари: Бж\ственная память твоя, им\рк, днесь возсиявши явися мирови яко солнце, сказующи житие твое: ты бо воздержанием плотская двизания разорши, и страдания кровию уневестилася еси Христови. темже хвалящия тя избави от всяких зол, да зовем ти: радуйся, Мати Преподобная. Икос: Отверзи ми устне преБлаженная, Богоприятными твоими молитвами, предстоящи Богу всеславная ПреподобноМученце, да воспою Божественное твое житие, и возглаголю достойно страдания твоя, яже на земли теплою любовию совершила еси, и Мученца была еси непобедима: воздержания верою исправила еси бдение, и чистоту возлюбила еси. темже хвалящия тя избави от всех зол, да зовем ти: радуйся, Мати Преподобная. Песнь 7. Ирмос: Отроцы еврейстии в пещи попраша пламень дерзновенно, и на росу огнь преложиша, вопиюще: Благословен еси Господи Боже во веки. Шум гласа празднующих идеже есть, ликуеши страстотерпице, им\рк, с Девами Богу зиждителю песнопоющи: Благословен еси Господи Боже во веки. Уды сокрушаемы зрящи, им\рк, и ногтей истерзание терпящи, принеслася еси Богу жертва, песнопоющи: Благословен еси Господи Боже во веки. Явилася еси яко лоза Богомудрая, им\рк, руце и нозе (л. 138 об.) яко ветви режемы, и нам мысленно вино источающи, сердца утешающее, и страстей отревающее пиянство. Богородичен: Во всего человека облекся нескверный, кроме греха, из утробы твоея, чистая, пройде плотоносец: егоже умоли, верою тя чествующия Спасти. Песнь 8. Ирмос: Седмерицею пещь халдейский мучитель, Богочестивым неистовно разжже, силою же лучшею Спасены сия видев, творцу и избавителю вопияше: отроцы Благословите, Священницы воспойте, людие превозносите во вся веки. Юношески добльствовавши страстоносице всехвальная, на прелесть воздвигла еси победы: рук бо лишения и ног терпела еси, сосцев же и зубов твоих искоренение, Мученце претерпела еси, в радости песнопоющи: людие превозносите Христа во веки. Всесветла яко солнце девства светлостьми, и мучения добротами облистала еси, и мир просветила еси светолучными сиянии твоего терпения, страстотерпице, вопиющи: отроцы Благословите, Священницы воспойте, людие превозносите Христа во веки. Оскверненную страстьми душу мою, Богоневесто, и очерненую прилоги змиа, твоими мольбами от лютых очисти и светлым осенением твоим Мученце, им\рк, озари вопити: Священницы пойте, людие превозносите Христа во веки. Богородичен: Тя честую и непорочную, Дева желающи, непорочно и тело и душу соблюде, страстей подпаления терпением испепеливши, искушения же многих претерпевши мук: и ныне в Небесных чертозех ликует с тобою, веселящися во вся веки. Песнь 9. Ирмос: Ужасеся о сем Небо, и земли удивишася концы, яко Бог явися человеком плотски, и чрево твое бысть пространнейше Небес: тем тя Богородицу ангелов и человек чиноначалия величают. (л. 139) На древе повешена была еси, слова Божия образующи страсть Блаженную, и отсечение терпела еси рук твоих и ног, зубов искоренение, языка же отрезание и сосцев, честая, им\рк, монашествующих славо и Мученков украшение. Яко невеста украсилася еси добротою, обручившися жениху страданьми добротворными: внутрь же чертогов световидных яко избранная вселилася еси, носящи свещу Девственную. и ныне Царствуеши с живущими во веки, им\рк, сияющи. Искапают болезни твоя сладость, греха горесть отемлющу: рака же точит исцелений реки, и потопляет вся страсти и недуги лютыя, в славу Спасову, честная, им\рк, иже по достоянию тя славят. Богородичен: Понесшаго тя плоть от жены, яко позна Мученца твоя Господи, девственными украшена лучами, и мучения кровию обагрена тебе Богу, в след Матере твоея славно приведеся, яко Царствующему тварию. Светилен. Исцеления источаеши яко река, верою притекающим к твоей честней раце, им\рк, Боговидная, девства сосуде, и цвете естества красный, дщи Царева, внутрь имущая Божественныя славы Блаженство. Богородичен: Премудрость впостасную, и слово пресущное, и врача душ и телес рождшая, гноения и раны души моея исцели лютыя и временныя, и сердца моего устави болезнь Дево. На хвалитех стихиры, глас 8. Подобен: _О преславнаго чудесе! Мира оставльши красоту, * души Благородие * Благородия свыше * добротами уяснила еси, * им\рк, всехвальная, * образа Благодать немутну житием сохранши, * Мученце непобедимая, * девства забрало Боговидно, * и цвете естества всеБлагороднейший. [Дважды.] (л. 139 об.) Словом и житием и Благодатию, * и терпением души украсившися, * привела еси страдалец воинства, * и дев собор * от Девы возсиявшему, * и свидетельства яве отверзшему всем вход, * им\рк, всемудрая. * с ними же и ныне сего умоли, * Спасти стадо твое. Правды строитель, * тя яко деву чисту, * и яко славну Мученцу, * сугубыми венцы * Боголепно украси, * красен чертог тебе даровав, * светоявленьми просвещенный: * идеже всельшися, вечнующим невесто Христова * ныне Блаженством яве обогатилася еси. Слава, глас 4, самогласен: Стружему телеси твоему, души светлая доброта являшеся краснейши, Преподобная Мученце мудрая и пребогатая, постниц доброто, страстотерпиц похвало, чудес же приснотекущий источниче, и духов нечистых прогонительнице, и молитвеннице за чтущих память твою. И ныне, Богородичен: Тя стену стяжахом Богородице пречистая, и Благоутишное пристанище, и утверждение: темже молися, иже в житии обуреваема, окорми, и Спаси мя. КрестоБогородичен: Подобен: Званный свыше: Не рыдай мене Мати, * зрящи на древе висяща твоего Сына и Бога, * над водами повесившаго землю недержно, * и всю тварь создавшаго: * востану бо и прославлюся, * и адова царства сокрушу крепостию, * и погублю того силу, * и узники избавлю от того злодейства, * яко Благоутробен, * и отцу моему приведу, * яко человеколюбец. Аще имать на стиховне Славу, глаголи вечерний: И ныне, Богородичен, или КрестоБогородичен.