<::лат> OCR: <::рус> Библиотека святоотеческой литературы <::лат> http://orthlиb.ru <::слав> (л. 123 об.) [гл\ва 22] СЛУЖБА ОБЩА Преподобней жене единей. Вечера, на Господи воззвах, стихиры, глас 8. Подобен: Мчениицы твои Господи: В болезнех постнических терпящи, прияла еси Благодать, душевныя и телесныя болезни очищати, мати честная, им\рк, и нечистыя духи прогоняти Духом, и всем скорбящим предстательствовати, темже твоими молитвами, проси исцеления всем, и велия милости. Рака мощей твоих слепым прозрение источает, и всем болящим исцеление, приходящим верою, и просящим посещения твоего мати Преподобная и досточудная, им\рк: темже твоими молитвами испроси нам велию милость. Милование стяжала еси ко искреннему, веру же православную, и любовь яже к Богу, БогоБлаженная честная, им\рк: сего ради Божия Благодать духовная, в тебе мати Преподобная, препочила есть. темже твоими молитвами сохрани верою Блажащия тя. Слава, и ныне, Богородичен: Тя молим пречистая, предстательницу нашу, одержимии в печалех, не презри до конца погибнути рабом твоим: но ускори изяти нас от настоящаго гнева и скорби, _о Боговместимая пресвятая чистая! ты бо еси нам стена и помощь непоборима. КрестоБогородичен: Тя видящи пригвождаема на Кресте, Иисусе, и страсти приемлюща волею, Дева и Мати твоя Владыко, увы (л. 124) мне, вопияше, чадо сладкое: язвы неправедно како терпиши врачу исцеливый человеческое неможение, и от тли вся избавивый Благоутробием твоим. Аще имать самогласен. Слава, глас 2. Душевная ловления, и страсти плотския, мечем воздержания посекла еси, и мысленная согрешения молчанием поста удавила еси, и струями слез твоих пустыню всю напоила еси, и прозябла еси нам покаяния плоды: темже твою память Преподобная, празднуем. И ныне, Богородичен: Сп~си от бед рабы твоя Богородице, яко вси по Бозе к тебе прибегаем, яко нерушимей стене и предстательству. КрестоБогородичен. Подобен: Егда от древа: Егда нескверная агница виде своего агнца, на заколение яко человека волею влекома, рыдающи глаголаше: безчадствовати мя ныне тщишися Христе, тебе рождшую, что сие сотворил еси, избавителю всяческих, обаче воспеваю и славлю твою, юже паче ума и слова Благость, человеколюбче. [зри] Аще празднуеши с полиелеем, глаголи Богородичен воскресный: Прейде сень: Вход. Прокимен дне. Чтения 3 Преподобническая, [писаны в конце книги сея.] На стиховне стихиры, глас 1. Подобен: Нб\сных чинов: Славы отцев воистинну возжелавши, * славу нетленную возлюбила еси, * темже отступльши сладких, * тело твое болезнем всем отдала еси, им\рк, и ныне болезней приемлеши возмездие, со Христом Царствующи. Стих: Дивен Бог во святых своих, Бог Израилев. Жениха красную доброту * возжелавши, им\рк, * Христу уневеститися ты восхотевши * всеми виды Благих, * (л. 124 об.) болезньми и воздержании тебе украсила еси: * темже ныне со Христом Царствуеши в чертозе его. Стих: Честна пред Господем смерть Преподобных его. В пристанище Божественное устремившися, * тихо прешла еси волны мирских мятежей: * и души своея корабль всечестная, * непогрузимь везущи, * от сластей горести, * тайных имений исполнь сущий. Слава, глас 6: Возсия днесь Священное твое торжество, солнца светлейши, сущия во тме души озаряющее, мрак бесовский всегда отгоняющее, досточудная. И ныне, Богородичен: Бц\де, ты еси лоза истинная: КрестоБогородичен: Видящи тя распинаема, Христе, тебе рождшая вопияше: что странное еже вижу таинство, Сыне мой, како на древе умираеши плотию повешен, жизни подателю? Тропарь во уставе. Аще ли несть устава, глаголи сей тропарь, глас 8: В тебе мати, известно Спасеся еже по образу, приимши бо Крест, последовала еси Христу, и деющи учила еси презирати убо плоть, преходит бо: прилежати же о души вещи безсмертней, темже и со ангелы срадуется Преподобная, им\рк, дух твой. Слава, и ныне, Богородичен, или КрестоБогородичен. На утрени, на Бог Господь, тропарь тойже. По 1-й кафисме седален, глас 5. Подобен: Собезначальное: Мужески подвиги воздержанием претерпевши, низложила еси многокозненнаго, и в терпении жизнь поживши Благочестно (л. 125) Преподобная, им\рк, ныне прешла еси к Богу молящися о всех, Священно святое твое совершающих празднество. [Дважды.] Слава, и ныне, Богородичен: Всенепорочная Мати, возсияй ми покаяния лучу, и разори мрак безмерных моих зол, лукавыя отжени, Дево, помыслы сердца моего. По 2-й кафисме, седален, глас 4. Подобен: Скоро предвари: Плоть распяла еси со страстьми, и все любление ко Христу имела еси, им\рк, жениху твоему нетленному. сего ради прияла еси венец, и ангельским ликом сочислилася еси Преподобная, молящися тому прилежно о чтущих тя. [Дважды.] Слава, и ныне, Богородичен: Труждает мя буря греховная, и возмущение безместных помышлений: умилосердися всенепорочная, и руку ми помощи, яко милостива простри, да Спасся величаю тя. По Хвалите имя Господне: Припев: УБлажаем тя Преподобная мати, им\рк, и чтем святую память твою: ты бо молиши за нас Христа Бога нашего. Псалом избранный: Терпя потерпех Господа: По полиелеи седален, глас 8. Подобен: Повеленное тайно: Предызбранная от Бога Преподобная мати, ко пристанищу жизни наставляема, без волнения жития бурю претекла еси, со ангелы песнословящи избавителя, и молящися непрестанно о нас, яко да Благодать и милость Христос дарует нам, сохраняющи паству, юже болезнию составила еси. [Дважды.] Слава, и ныне, Богородичен: Радуйся, ангелом радость мира приемшая. радуйся, рождшая творца твоего и Господа. радуйся, сподобльшаяся быти Мати Божия. Степенна, 1-й антифон 4-го гласа. Прокимен: Дивен Бог во святых своих, Бог Израилев. (л. 125 об.) Стих: В Церквах Благословите Бога, Господа от источник Израилевых. Всякое дыхание: Ев\глие Преподобней, [писано в конце книги сея.] По 50-м _псалме стихира, глас 2: Душевная ловления: [Писана Слава, на Господи воззвах:] Канон, глас 8. Песнь 1. Ирмос: Колесницегонителя фараоня погрузи, чудотворяй иногда моисейский жезл, Крестообразно поразив, и разделив море: Израиля же беглеца, пешеходца Спасе, песнь Богови воспевающа. Страстными мя бурями всюду погружаема, и помышлений молвою душу мою колеблему, ко пристанищу тихому Христовы воли, молитвами твоими Преподобная им\рк, направи, яко да достойно тя воспою. Девственными добротами просвещена, БогоБлаженная, им\рк, честому слову уневестилася еси, поживши пощением Божественне: и того живоносным стопам последовала еси, умерщвление страстей претерпевши. Бж~ественных отец наказанию последовала еси славная, им\рк, и сих нраву чисте поревновала еси, воздержанием яко безплотна, и чистотою и девством поживши Преподобная, и истинным смирением. Богородичен: Бж~ественную ручку и трапезу, хлеб животный понесшую, неделанную ниву, гору святую, Богу Деву песньми славим. Песнь 3. Ирмос: Нб\снаго круга верхотворче Господи, и Церкве зиждителю, ты мене утверди в любви твоей желаний краю, верных утверждение, едине человеколюбче. В Небесныя чертоги светозарныя вселилася еси, невеста избранна бывши вседержителю, исцеления реки источаеши, им\рк, страстная нам течения изсушающи. (л. 126) Украсилася еси желанием крайним желающи Христа, премножеством Благосердия, плотию обнищавшаго, и последовала еси животным его словесем, житейская вся красная возненавидевши. Позлащенне криле добродетели стяжавши, на высоту Небесную возлетела еси Блаженная, им\рк, яко голубица нетленная. Богородичен: Род Спасеся, Дево, человеческий Благодатию обнищавшаго плотию, из чрева твоего неизреченно: темже чтим тя, и Благочестно уБлажаем, пречистая Дево Богорадованная. Седален, глас 4. Подобен: Вознесыйся на Крест: Красотами явилася еси девственно преукрашаема, постнических Священных подвиг, яко невеста непорочная Дева Христова: и с ним в нетленный вошла еси чертог и красот его наслаждаешися, но моли Спастися нам от всякия беды, любовию поющим тя. Слава, и ныне, Богородичен: Чт\сая всенепорочная, и неискусобрачная, едина безлетнаго Сына и слово Божие в лете рождшая: того со святыми и честными апостолы, Мученки и Пророки, и Преподобными моли, даровати нам очищение, и велию милость. КрестоБогородичен: Дв~о пренепорочная Мати Христа Бога, оружие пройде твою пресвятую душу, егда распинаема видела еси волею Сына и Бога твоего: егоже Благословенная молящи не престай, прощение прегрешений нам даровати. Песнь 4. Ирмос: Услышах Господи, смотрения твоего таинство, разумех дела твоя, и прославих твое Божество. Светлое твое торжество, светом сияющее Божия Духа, озаряет души наша верою поющих тя, им\рк, Преподобная. (л. 126 об.) Чудесы Божественными уверила еси неведущих Владыку, и к познанию его возвратила еси, прелести тьму оставльших. Дары Христу принесла еси, чистое умерщвление удов, и труды воздержания: и противу прияла еси Небесное Царство, им\рк, и вечнующее наслаждение. Богородичен: Смиривши спаси мя, высокомудрием живущаго, рождшая вознесшаго смирившееся естество наше пречистая. Песнь 5. Ирмос: Утренююще вопием ти, Господи, Спаси ны: ты бо еси Бог наш, разве бо тебе иного не вемы. Руце твои Преподобно воздвизаеми к зиждителю, мати, им\рк, низложиша вражия шатания. Удержав руку твою десную вышний, наставил тя есть мати, к Небесному своему наслаждению. Стезю тесную прошедши в пощении, к широте приспела еси райстей, им\рк, всечестная. Богородичен: Иже Богородицу тя неведущии БогоМати, света не имут видети, рождшагося из тебе пречистая. Песнь 6. Ирмос: Ризу мне подаждь светлу, одеяйся светом яко ризою, многомилостиве Христе Боже наш. Умертвивши двизания плотская, над страстьми вельми воцарилася еси, и ныне всечестная, им\рк, в безстрастных живеши светлостех. Образу Спасову навыкла еси покланятися славная, делы и словесы твоими Спасительная его соблюдающи учения. Облак тя Христос показа мати, им\рк, дождь источающий животный, верою просящим у тебе преславная. Красен паче всех человек, Сын твой пречистая, добротою Божества, аще и плоть бысть нас ради. (л. 127) Кондак во уставе. Аще ли несть устава, глаголи сей кондак, глас 2: Подобен: Бл~годать приемше: За любовь Господню Преподобная, покоя желание возненавидела еси, пощением дух твой просветивши, крепко бо звери победила еси: но молитвами твоими противных шатание разори. Икос: Струи мне слова даждь Боже мой, и источник Благочиния сотвори мой ум, и Благослови язык мой, да воспою твою агницу, юже венчал еси ты Благостию твоею: аще бо сам не даси ми слова достойнаго, како принесу дар нищий, богатней в словесех и деяниих? тем подаждь ми силу, исповедати ея натрижнения, крепко бо звери победила есть: по молитвами ея противных шатание разори. Песнь 7. Ирмос: Отроцы еврейстии в пещи попраша пламень дерзновенно, и на росу огнь преложиша, вопиюще: Благословен еси Господи Боже, во веки. О доброте тлеющей, им\рк, Преподобная небрегла еси, смотряющи тамо сущая воздаяния и свет, и славу Божию нестареющуюся и красоту, и Божественное селение. Мир пременила еси тлеющий премирным животом нестареющим, и временную пищу пребывающим существом, и плотским обручником, Небеснаго жениха. Разум Боголюбив стяжала еси, им\рк, с плотию ангелом уподобилася еси, бдящи тепле любовию, и поющи: Благословен еси Господи Боже во веки. Богородичен: Виждь скорбь мою Дево, юже ми наведе множество зол моих, и родства огненнаго исхити мя, вопиющаго: Благословен еси Господи Боже во веки. Песнь 8. Ирмос: Бг~оглаголивии отроцы в пещи, со огнем пламень попирающе, пояху: Благословите дела Господня Господа. (л. 127 об.) Украшена сиянием чистоты, и чистым житием просвещена мати, предстоиши жениху твоему Христу Богу нашему. Болезни различныя уврачует человеков, и прогонит бесовския пакости, тело твое святое Преподобная, во гробе преславно сокрываемое. Сщ~енна жертва принеслася еси, и приношение светлое Преподобная мати, нас яко кадило Благоуханное, всех Владыце Христу Богу нашему. Богородичен: Без нетления слова паче словесе родила еси, тления всякаго нас избавляющаго: сего ради тя Дево, верою величаем. Песнь 9. Ирмос: Устрашися всяк слух неизреченна Божия снизхождения, яко вышний волею сниде даже и до плоти, от Девическаго чрева быв человек: темже пречистую Богородицу вернии величаем. Возжелела еси доброту мысленную жениха, и чисто возлюбила еси его, где почиваеши? где ли пасеши? тепле вопияла еси: да почию у тебе, и в твоих светлостех наслаждуся, величающи твою Благость. Разум имела еси в твоей души, и смирение, и Божественную кротость, веру несумненну, и надежду и любовь, юже к Богу: всенощными молитвами приближающися ему, и тамо сущими светлостьми Блаженная, им\рк, озаряема и просвещаема. Собрашася днесь людие, хвалами возвеличити Господа, возвеличившаго твое святое торжество сие: в немже поминай нас поминающих тя, предстоящи Христу жениху твоему, Преподобная, им\рк, и всечестная. Богородичен: Пощади мя Боже, рождейся от Девы, и сохранив рождшую тя нетленну по Рождестве, егда сядеши судити дела моя, беззакония и грехи моя презри, яко безгрешен и милостив Бог, и человеколюбец. (л. 128) Светилен: Князя утаившися студа, и сего в премудростнем образе показа безумна, Дева сущи душею и телом, была еси муж разумом и верою, им\рк, Преподобная, девственников доброта, черноризиц украшение. Богородичен: День мне возсияй разумнаго веселия, ты бо еси честая свет, и живот сущих во тьме: хотению бо мощна еси, и еже творити имаши яко сущи всех Владычица, избави всех от бед, и всех скорбящих от соблазн лукаваго. На хвалитех стихиры, глас 4. Подобен: Яко добля: Плоти играния * постными подвиги, * души любочестне покорила еси, * и Христу последовала еси, * и посреде постниц вселилася еси всеговейно, им\рк, * угашающи распаления сластная * Божественными тучами слез, * зельнейшее желание * к зиждителю возжигающи. [Дважды.] Сщ~енное жилище * во многих пользу Богу воздвигла еси, * бывши храм святаго Духа всемудрая, * чистотою душевною, * и путеводствила еси души к полезным подвигом постным, * и принесла еси сия якоже вено Спасены, _о им\рк, Владыце. * с нимиже верою тя почитаем. Отроковицы возлюбиша * невестника и Господа, * учению твоему покаряющияся: * и плотскую презревше слабость в дусе, * усердием страсти * Благочестно удержаша: * и введошася с тобою, _о им\рк, * в чертог Небесный и Божественный, * всегда веселящеся. Слава, глас 8. _О преславнаго чудесе! яко усердно себе Богу возложила еси постными болезньми, и постническими слезами, Божественную любовь исполнила еси, и плотския страсти победила еси, и попрала еси воздержанием демоны, и была еси невеста вседержителю. (л. 128 об.) И ныне, Богородичен: Архангела гавриила глас восприимше, рцем: радуйся, Мати Божия, яже жизнодавца Христа миру рождши. КрестоБогородичен: Пречистая яко виде тя плотию висяща на древе, сердцем разседашеся, и вопияше слезящи: слове, како зашел еси прелюбимый Иисусе Сыне мой и Господи? не остави мене едину Христе, тебе рождшую. Аще имать Славу на стиховне, глаголи вечерний: И ныне, Богородичен, или КрестоБогородичен.