<::лат>        OCR:

<::рус>        Библиотека святоотеческой литературы

<::лат>        http://orthlиb.ru

<::слав>

(л. 90 об.)

ЖИТИЕ СВЯТАГО ЕВАНГЕЛИСТА ЛУКИ,

от собрания дорофеа мученика, тирскаго 
епископа.

Лука евангелист, антиохианин убо родом 
бе, врачь же хитростию. Списа же убо евангелие, по 
повелению петра ап\стола: деяния же апостолов, по 
повелению павла апостола. Сошествова бо апостолом, 
наипаче же павлу, егоже и помянув павел писа в 
послании: целует вы лука, врачь возлюбленный во 
Господе. Умре же во ефесе, и погребен тамо: 
преложися же последи в константинополь, со андреем 
и тимофеем апостолы, по временам константиа царя, 
сына константина великаго. (л. 91)

ЕВАНГЕЛИЕ ОТ ЛУКИ.

Глава 1.

1: Предисловие начинательное луки. 5: Захариа и 
елисавет. 15: Иоанн Креститель каков имать 
быти? 20: Захариа нем вместо неверия. 26: 
Гавриил ангел Деву Марию целует. 31: Зачатие 
Иисусово. 39: Мариам целует елисавет. 46: Песнь 
мариина. 57: Елисавет раждает иоанна. 68: 
Песнь захариина уже паки глаголиваго. 76: Дела 
иоаннова. 80: Растение иоанново в Дусе.

Глава 2.

1: Повеление кесаря августа. 7: Рождество Христа 
Спаса. 13: Песнь ангелов. 21: Обрезание Иисусово. 
22: Очищение Мариино. 28: Симеон приемлет на 
обятия Иисуса. 29: Песнь симеонова. 36: Анна 
пророчица. 40: Растение Иисусово Духом. 46: Слышит и 
вопрошает Иисус, двоюнадесять лет сый, учителей 
во святилищи.

Глава 3.

2: Иоанн Креститель проповедует. 16: 
Свидетельство его о Иисусе. 20: Заключи ирод 
иоанна в темнице. 21: Иисус крещается. 23: 
Родословие Иисусово.

Глава 4.

1: Иисус постився, и искусився. 16: Учит в 
назарете. 22: Удивляющимся всем. 24: Пророк во 
своем отечестве не приятен. 33: Демон 
изгоняется. 38: Теща петрова исцеляется. 40: И вси 
немощствующии. 41: И демони исповедуют Иисуса быти 
Христа.

Глава 5.

1: Христос из корабля учит. 6: Рыб 
ловитва. 12: Прокаженный. 16: В пустынях молится 
Христос. 18: Разслабленный. (л. 91) 27: Левий 
мытарь. 34: Посты и скорби апостолов, по вознесении 
Христове. 36: Налагание ризы новы на ветхую. 37: 
Вино новое в мехи ветхи влагаемое.

Глава 6.

1: Ученицы класы терзающии в субботу 
второпервую. 6: Рука изсохшая в субботу 
исцеляется. 13: Избрание двоюнадесяте ап\столов. 
20: Нецыи блаженнии. 24: Некиим горе. 27: Любити 
подобает враги. 36: Заповеди о еже быти 
щедрым. 40: Сучец во очеси брата. 43: Древо 
доброе и гнилое. 45: Излишества сердца. 47: 
Слышати словеса Христова, и творити я.

Глава 7.

1: Раб стоначальника. 9: Вера стоначальника. 
11: Сын единородный вдовы в наине воста. 18: 
Посылает иоанн два ученика ко Христу. 24: 
Свидетельство Иисусово о иоанне. 33: Пища 
иоаннова. 37: Жена грешная слезами омочает нозе 
Иисусове.

Глава 8.

2: Жены служащия Христу от имений своих. 4: 
Притча сеющаго. 16: Светильник на свещнице. 19: 
Мати и братия Христова. 22: Запрещает Христос 
ветру, и бури водней. 27: Демонствуемый во стране 
гадарянов. 32: Свинии гадарянов. 41: Дщерь 
иаирова. 43: Жена кровоточащая. 52: Смерть, сон.

Глава 9.

1: Посылаются ученики проповедати Царство Божие. 
7, 19: Слава человеков о Иисусе. 13: Пять 
хлебы и две рыбе. 20: Исповедание учеников. 
24: Спасти и погубити душу. 28: Преображение 
Иисусово. 35: Христа подобает слушати. 37: 
Лунствуемый. 46: Кто от апостолов первый? 49: 
Изгоняяй кто демоны о имени Иисусове? 52: 
Самаритяне не приемлющии Христа. 57, 59, 61: Трие 
последствующии Иисусу, но не по томужде нраву. (л. 92)

Глава 10.

1: Седмьдесят учеников посылаются. 10: 
Градом, проповедь евангелиа не приемлющим, горе 
глаголется. 17: Возвратившеся седмьдесят. 29: Кто 
ближний? 30: Человек, в разбойники впадый. 33: 
Самарянин. 38: Марфа и мариа, сестры. 42: Едино 
есть требе.

Глава 11.

1: Учит Иисус ученики молитися. 10: Просяй 
приемлет. 14: Изгоняется демон глухий. 17: 
Царство на ся раздельшееся. 27: Жена воздвигшая глас 
от народа. 29: Иудеи знамения ищут. 31: Царица 
южская. 33: Светильник на свещнице. 37: Иисус, 
обедуя у некоего фарисеев, запрещает 
лицемерию их.

Глава 12.

1: Квас фарисеев. 5: Кого подобает боятися. 
8: Еже исповедати о Христе пред человеки. 10: 
Хула на святаго Духа. 15: Хранитися подобает от 
лихоимства. 16: Человек богатый, егоже 
угобзися нива. 22: Не подобает пещися о души 
нашей, что ядим, ниже о теле, чим одеждимся. 
31: Искати подобает Царства Божия. 34: Идеже 
сокровище, тамо сердце. 36: Господь возвращаяйся от 
брак. 39: Тать нощи грядый. 44: Верный строитель, 
и мудрый. 46: Раб лукавый разсеченый. 49: Огнь 
на землю вверженый. 51: Разделения в человецех 
ради евангелиа. 56: Время настоящее не искушающии. 
58: Примиритися с соперником в пути.

Глава 13.

1: Пилат смеси кровь галилеев с жертвами 
их. 4: Столп в силоаме. 6: Смоковница неплодная. 
11: Жена сляченая исцелевшая. 19: Зерно 
горчичное. 21: Квас в муке. 23: Вопрошение, аще 
мали спасаемии? 24: Подобает подвизатися внити 
тесными враты. 32: Ирод лис. (л. 92 об.)

Глава 14.

2: Воднотрудоватый некий в субботу исцеляяйся. 
7: Первоседания. 13: Подобает звати нищия. 16: 
Вечеря велия. 23: Убеждающии внити. 28: Столп 
созидаяй.

Глава 15.

4: Притча овцы погибшия. 8: Драхмы. 11: И 
сына блуднаго.

Глава 16.

1: Притча домостроителя, расточившаго имения 
Господина своего. 13: Никтоже может двема Господинома 
работати. 16: Закон и пророцы. 19: Богатый и 
лазарь.

Глава 17.

1: Соблазны. 3: Подобает оставити брату 
каявшемуся. 3: Раби неключимии. 11: Десять 
прокаженнии. 20: Когда приидет Царство Божие? 23: 
Лжехристи. 26: Кии день будет воньже Сын 
человеческий открыется? 33: Душу спасти и погубити. 
37: Тело и орли.

Глава 18.

2: Судия нечестивый и вдова. 10: Фарисей и 
мытарь молящиися. 15: Отрочата. 16: Сицевых 
Царство Божие. 22: Продати вся, и раздати нищим. 24: 
Богатии неудобь внидут в Царство Божие. 28: Апостоли 
оставляют вся. 31: Предрече свою смерть Иисус. 
11: Слепый просяй прозирает.

Глава 19.

2: Закхей мытарь. 12: Человек благородный, 
давый десять мнас десятим рабом. 29: Иисус 
грядет во Иерусалим. 41: Плачет о нем. 45: 
Изгоняет продающия и купующия в святилищи.

Глава 20.

4: Крещение иоанново откуду? 9: Виноград 
отдаемый делателем. 17: Камень краеугольный. 22: 
Аще достоит кесарю (л. 93) дань даяти? 27: 
Саддукеи прекословящии воскресению не быти. 41: Како 
Христос Сын Давидов?

Глава 21.

2: Вдовица убогая, ввергшая две лепте в 
газофилакию. 5: О разорении святилища. 20: И 
Иерусалима. 9: Рати и нестроения. 25: Знамения 
предыдущая откровения Сына человеческаго. 34: 
Подобает внимати, да не отягчаются сердца. 36: 
Подобает бдети.

Глава 22.

1: Иуда предатель Иисуса. 7: Ученицы 
уготовляют пасху. 19: Святая вечеря Господня. 24: 
Любопрение во ученицех, кто в них болий? 31: 
Сатана просит сеяти ученики. 35: Ничтоже 
лишишася ученицы. 39: Приходит Иисус к горе 
елеонстей. 44: Пот его яко капли крове. 47: 
Иудино лобзание. 50: Ухо малхово. 57, 58, 60: 
Петрово отвержение. 63: Ругаются Иисусу. 70: Божий 
Сын молится.

Глава 23.

2: Оклеветуют Иисуса пред пилатом. 7: 
Возпосылает его пилат ко ироду. 8: Варавва 
отрешается. 25: Иисус же предается воли иудеев. 
27: Жены рыдающия о нем. 33: Распинается Иисус. 
36: Поругания от воинов. 39: И единаго от 
злодей хула. 40: Емуже запрещает другий. 42: 
Верою спасыйся. 44: Затемнение солнца паче 
естества. 46: Иисус издше. 50: Иосиф от 
аримафеа. 53: Гроб Иисусов.

Глава 24.

1: Жены помазуют Иисуса. 4: Два ангела. 13: 
Два от учеников ходящии во еммаус. 31: Иисус 
невидимь бысть. 32: Сердце горящее. 36: Иисус ста 
посреде учеников, глаголя: мир вам. 45: 
Отверзает ум учеников. 49: Обетование Духа 
святаго. 51: Вознесыйся Иисус на Небо. (л. 93 об.)

ЕЖЕ ОТ ЛУКИ СВЯТАГО ЕВАНГЕЛИА ГЛАВЫ.

[1] О написании.

[2] О стрегущих пастырех.

[3] О симеоне.

[4] О анне пророчице.

[5] О бывшем глаголе ко иоанну: в матфеи, 3.

[6] О вопрошших иоанна.

[7] О искушении Спасителеве.

[8] О имущем дух бесен: в марке, 1.

[9] О тещи петрове: в матфеи, 8: в марке, 2.

[10] О исцелевших от различных недугов: в 
матфеи, 9: в марке, 3.

[11] О ловитве рыб.

[12] О прокаженнем: в матфеи, 6: в марке, 
4.

[13] О разслабленнем: в матфеи, 13: в 
марке, 5: во иоанне, 7.

[14] О левии мытаре: в матфеи, 14: в марке, 
6.

[15] О имущем суху руку: в матфеи, 21: в 
марке, 7.

[16] О избрании апостольстем: в матфеи, 19: в 
марке, 8.

[17] О блаженных: в матфеи, 5.

[18] О сотнице: в матфеи, 7: во иоанне, 6.

[19] О сыне вдовиче.

[20] О посланных от иоанна: в матфеи, 20.

[21] О помазавшей Господа миром: в матфеи, 62: 
в марке, 44: во иоанне, 12.

[22] О притчи сеющаго: в матфеи, 24: в марке, 
9.

[23] О запрещении моря и ветров: в матфеи, 
11: в марке, 10.

[24] О легеоне: в матфеи, и: в марке, 11. 
(л. 94)

[25] О дщери архисинагогове: в матфеи, 15: 
в марке, 12.

[26] О кровоточивей: в матфеи, 16: в марке, 
13.

[27] О послании обоюнадесяте, в матфеи, 19: в 
марке, 14.

[28] О пятих хлебех, и о двою рыбу: в 
матфеи, 26: в марке, 16: во иоанне, 8.

[29] О Господни вопрошении: в матфеи, 33: в 
марке, 24.

[30] О преображении Иисуса Христа: в матфеи, 34: 
в марке, 25.

[31] О беснующемся на новы месяцы: в матфеи, 
35: в марке, 26.

[32] О помышляющих, кто болий есть? в матфеи, 
37: в марке, 27.

[33] О неповеленнем воследовати: в матфеи, 
10.

[34] О явлении седмидесяти.

[35] О вопрошшем законнице: в матфеи, 54: в 
марке, 39.

[36] О впадшем в разбойники.

[37] О марфе и марии.

[38] О молитве.

[39] О имущем беса глуха: в матфеи, 22.

[40] О возопившей гласом от народа.

[41] О просящих знамения: в матфеи, 23.

[42] О фарисеи звавшем Иисуса.

[43] О окаянии законников.

[44] О квасе фарисейстем: в матфеи, 32: в 
марке, 22.

[45] О хотящем разделити имение.

[46] О богатем, емуже угобзися нива.

[47] О галилеех, и иже бяху в силоаме.

[48] О имущем дух недужен.

[49] О притчах: в матфеи, 24: в марке, 9.

[50] О вопрошшем, аще мало спасаемых?

[51] О рекших Иисусови ирода ради.

[52] О воднотрудоватом.

[53] О не любити первовозлегания.

[54] О званных на вечери: в матфеи, 51. (л. 94 
об.)

[55] О столпе притча.

[56] О сте овец притча.

[57] О отшедшем на страну далече.

[58] О приставнице неправеднем.

[59] О богатем и о лазаре.

[60] О десяти прокаженных.

[61] О судии неправеднем.

[62] О мытари и фарисеи.

[63] О вопрошшем богатем Иисуса: в матфеи, 
41: в марке, 29.

[64] О слепце: в матфеи, 44: в марке, 31.

[65] О закхеи.

[66] О отшедшем прияти себе Царствие.

[67] О приемших десять мнас.

[68] О жребяти: в матфеи, 45: в марке, 32: 
во иоанне, 14.

[69] О вопрошших Господа архиереех и старцех: 
в матфеи, 48: в марке, 35.

[70] О винограде притча: в матфеи, 50: в 
марке, 36.

[71] О вопрошающих кинсона ради: в матфеи, 52: 
в марке, 37.

[72] О саддукеех: в матфеи, 53: в марке, 38.

[73] О вопрошении Господни к фарисеем: в матфеи, 
55: в марке, 40.

[74] О вдовице, еже двою пенязю: в марке, 
41.

[75] О кончине вопрошение: в матфеи, 57: в 
марке, 42.

[76] О пасце: в матфеи, 63: в марке, 45.

[77] О стязающихся, кто болий? в матфеи, 37: в 
марке, 27.

[78] О испрошении сатанине.

[79] О уничижении иродове.

[80] О плачущихся женах.

[81] О покаявшемся разбойнице.

[82] О испрошении телесе Господня: в матфеи, 
68: в марке, 48: во иоанне, 18.

[83] О клеопе. (л. 95)

ПРЕДИСЛОВИЕ

еже от луки святаго евангелиа.

Лука Божественный, антиохианин убо бе 
родом, врачь же хитростию, и внешней премудрости 
мног, не точию же, но и еврейское наказание извык 
до конца, во иерусалим пришед, егда Господь наш 
учаше. Якоже нецыи рекоша: и того быти от 
седмидесятих апостол, и от мертвых воставшу 
Христу, срести с клеопою. Вознесшуся же Господеви, и 
павлу веровавшу быти сошествена, и последователя 
тому, глаголю, павлу. И убо списав евангелие со 
всяким извеством, якоже и самое то начало 
его обявляет, по пятинадесятих летех Христова 
вознесения. Пишет же к феофилу сигклитику сущу и 
князю: еже бо державный, на князех и игемонех 
глаголашеся. И павел рече ко игемону фисту: 
державный фисте. И всяк человек Боголюбивый, 
державу над страстьми восприим, феофил есть 
державный, сиречь Боголюбец, иже и достоин есть 
поистинне слышати святаго евангелиа. Тридесятолетен 
убо сый Господь крестися, понеже той возраст 
совершенный: в нем человек есть или искусен 
или неискусен. Родослови бо того лука, и 
возопять матфей яко да явит, яко иже ныне 
родивыйся по плоти, от Бога есть. Виждь убо 
родословие, како совершается на Бога: и яко да 
увемы, яко все еже посреде отца, к Богу 
возведет, и сыны творит, сего ради воплотися. 
Имать же ино рещи, не веровашеся рождество Господне, 
понеже безсеменно суще: хотя убо явити 
благовестник, яко и иногда без семене бысть 
человек, от дольних восходит ко адаму, и к Богу, 
точию не глаголя нам: аще не веруеши, како вторый 
адам бысть (л. 95 об.) без семене, взыди ми 
умом к первому адаму, и обрящеши того без 
семене бывша от Бога, и прочее не неверуй. Ищут 
же нецыи, како убо матфей иосифа иаковля 
глаголет быти сына, лука же илии? не возможно же 
тогоже двема отцем быти сына. Глаголя убо к 
сему: яко иаков и илий единоматерни братия, 
иного же и иного отца. Умер убо илий 
безчаден, привед жену его иаков детотворит от 
нея. И тако глаголется: иосиф иаковль, сый сын 
по естеству, и илии по закону. Иаков убо 
естеством того роди: и по истине и по естеству 
прочее сын того есть, илии же по закону точию 
бысть сын. Ибо закон повелеваше, аще кто 
умрет безчаден, сего жене спрягатися брату 
его. И еже от него рождшееся, мнимо суще 
умершаго, аще и по естеству живаго бысть. 
Темже добре благовестницы глаголют, и не 
сопротивляются. Матфей убо естественнаго отца 
иосифова восписует: лука же иже по закону отца 
его вменяет, сиречь илии: яко да явят 
обои, яко сего ради родися Господь, яко да 
естество и закон освятит. (л. 96)

ОТ ЛУКИ СВЯТОЕ БЛАГОВЕСТВОВАНИЕ.

Глава 1.

(пн\де) (за\ч 1) 1 Понеже{На Рождество 
честнаго предтечи и Крестителя иоанна, на 
литургии.} убо мнози начаша чинити повесть о 
извествованных в нас вещех, 2 Якоже предаша 
нам, иже исперва самовидцы и слуги бывшии 
словеси: 3 Изволися и мне последовавшу выше 
всех испытно, поряду писати тебе, державный 
феофиле: 4 Да разумееши, о нихже научился еси 
словесех утверждение.

(за\ч 2) 5 *{Септемвриа 23 на зачатие 
иоанна Крестителя: Во время оно,*} Бысть во 
дни ирода царя иудейска, иерей некий именем 
захариа, от дневныя чреды авиани: и жена его от 
дщерей аароновех, и имя ей елисавет. 6 
Беста же праведна оба пред Богом, ходяще во 
всех заповедех, и оправданиих Господних 
безпорочна: 7 И не бе има чада, понеже елисавет 
бе (л. 96 об.) неплоды, и оба заматоревша во 
днех своих беста. 8 Бысть же служащу ему в 
чину чреды своея пред Богом: 9 По обычаю 
священничества, ключися ему покадити вшед в 
церковь Господню: 10 И все множество людей бе молитву 
дея вне @в год@{@во время@} фимиама. 11 Явися 
же ему ангел Господень, стоя одесную олтаря 
кадильнаго: 12 И смутися захариа видев, и страх 
нападе нань. 13 Рече же к нему ангел: не бойся 
захарие, зане услышана бысть молитва твоя: и жена 
твоя елисавет родит сына тебе, и наречеши имя 
ему иоанн. 14 И будет тебе радость и 
веселие: и мнози о рождестве его возрадуются. 
15 Будет бо велий пред Господем, и вина и сикера 
не имать пити: и Духа святаго исполнится еще из 
чрева матере своея. 16 И многи от сынов Израилевых 
обратит ко Господу Богу их. 17 И той предыдет 
пред ним Духом и силою илииною, обратити сердца 
отцем на чада, и противныя в мудрости праведных: 
уготовати Господеви люди совершены. 18 И рече 
захариа ко ангелу: по чесому разумею сие? аз бо 
есмь стар, и жена моя заматоревши во днех 
своих. 19 И отвещав ангел рече ему: аз 
есмь гавриил предстояй пред Богом, и послан 
есмь глаголати к тебе, и благовестити тебе сия. 
20 И се будеши молчя, и не могий проглаголати, до 
негоже дне будут сия: зане не веровал еси 
словесем моим, яже сбудутся во время свое. 21 И 
беша людие ждуще захарию, и чудяхуся коснящу ему 
в церкви. 22 Изшед же не можаше глаголати к ним. 
и разумеша, яко видение (л. 97) виде в церкви: 
и той бе помавая им, и пребываше нем. 23 И 
бысть яко исполнишася дние службы его, иде в 
дом свой.

(за\ч 3) 24 По сих же днех зачат 
елисавет жена его,*{На Благовещение 
пресвятыя Богородицы, на литургии: Во днех онех, 
зачат елисавет жена захариина* Сие же и Рождеству 
иоанна предтечи на утрени.} и таяшеся месяц 
пять, глаголющи: 25 Яко тако мне сотвори Господь во 
дни, в няже призре отяти поношение мое в 
человецех.

Конец зачатию иоанна.

Преступи Рождеству иоанна.

26 В месяц же шестый послан бысть ангел 
гавриил от Бога во град галилейский, емуже имя 
назарет, 27 К Деве обрученней мужеви, емуже 
имя иосиф, от дому давидова: и имя Деве, 
мариам. 28 И вшед к ней ангел, рече: радуйся 
благодатная, Господь с тобою: благословена ты в женах. 
29 Она же видевши смутися о словеси его, и 
помышляше, каково будет целование сие. 30 И рече 
ангел ей: не бойся мариам, обрете бо Благодать 
от Бога. 31 И се зачнеши во чреве, и родиши Сына, 
и наречеши имя ему Иисус. 32 Сей будет велий, 
и Сын вышняго наречется: и даст ему Господь Бог 
Престол давида отца его: 33 И воцарится в дому 
иаковли во веки, и Царствию его не будет конца. 
34 Рече же мариам ко ангелу: како будет сие, 
идеже мужа не знаю? 35 И (л.97 об.) отвещав 
ангел, рече ей: Дух святый найдет на тя, и сила 
вышняго осенит тя. темже и раждаемое свято, 
наречется Сын Божий. 36 И се елисавет южика 
твоя, и та зачат сына в старости своей: и сей 
месяц шестый есть ей, нарицаемей неплоды. 37 
Яко не изнеможет от Бога всяк глагол. 38 Рече 
же мариам: се раба Господня, буди мне по глаголу 
твоему, и отиде от нея ангел.

Конец Благовещению на литургии.

(за\ч 4) 39 Воставши же мариам во дни 
тыя,*{На Благовещение, на утрени: Во дни 
оны воставши мариам,* Сие же и на иныя 
праздники пресвятыя Богородицы.} иде в горняя со 
тщанием, во град иудов. 40 И вниде в дом 
захариин, и целова елисавет. 41 И бысть, яко 
услыша елисавет целование мариино, взыграся 
младенец во чреве ея: и исполнися Духа свята 
елисавет. 42 И возопи гласом велиим, и рече: 
благословена ты в женах, и благословен плод чрева 
твоего. 43 И откуду мне сие, да прииде Мати Господа 
моего ко мне? 44 Се бо яко бысть глас целования 
твоего во ушию моею, взыграся младенец радощами во 
чреве моем: 45 И блаженна веровавшая, яко 
будет совершение глаголанным ей от Господа. 46 И 
рече мариам: величит душа моя Господа, 47 И 
возрадовася Дух мой о Бозе Спасе моем: 48 Яко 
призре на смирение рабы своея: се бо от ныне 
ублажат мя вси роди. 49 Яко сотвори мне 
величие сильный, и свято имя его. (л. 98)

Преступи Богородице.

50 И милость его в роды родов боящимся его. 
51 Сотвори державу мышцею своею, расточи гордыя 
мыслию сердца их. 52 Низложи сильныя со престол, 
и вознесе смиренныя. 53 Алчущия исполни благ и 
богатящияся отпусти тщи. 54 Восприят Израиля отрока 
своего, помянути милости: 55 Якоже глагола ко 
отцем нашим, аврааму, и семени его до века.

Чти Богородице:

56 Пребысть же мариам с нею яко три месяцы: 
и возвратися в дом свой.

Конец Богородице.

Чти рождеству иоанна:

57 Елисавети же исполнися время родити ей, и 
роди сына. 58 И слышаша окрест живущии, и 
ужики ея, яко возвеличил есть Господь милость 
свою с нею: и радовахуся с нею. 59 И бысть во 
осмый день, приидоша обрезати отроча. и 
нарицаху е именем отца его, захарию. 60 И 
отвещавши мати его рече: ни, но да наречется 
иоанн. 61 И реша к ней: яко никтоже есть 
в родстве твоем, иже нарицается именем тем. 
62 И помаваху отцу его, еже како бы хотел 
нарещи е? 63 И испрош дщицу, написа глаголя: 
иоанн будет имя ему: и чудяхуся вси. 64 
Отверзошася же уста его абие, и язык его, 
и глаголаше Благословя Бога. 65 И бысть на всех 
страх живущих окрест их, и во всей стране 
иудейстей (л. 98 об.) поведаеми бяху вси глаголи 
сии. 66 И положиша вси слышавшии в сердце 
своем, глаголюще: что убо отроча сие будет? и 
рука Господня бе с ним. 67 И захариа отец 
его исполнися Духа свята, и пророчествова, глаголя: 
68 Благословен Господь Бог Израилев, яко посети, и 
сотвори избавление людем своим.

Преступи рождеству иоанна.

69 И воздвиже рог спасения нам, в дому 
давидове отрока своего: 70 Якоже глагола усты 
святых сущих от века пророк его. 71 Спасение 
от враг наших, и из руки всех ненавидящих 
нас: 72 Сотворити милость со отцы нашими, и 
помянути завет святый свой: 73 Клятву, ею клятся 
ко аврааму отцу нашему, дати нам, 74 Без 
страха, из руки враг наших избавльшимся, 75 
Служити ему преподобием и правдою пред ним вся 
дни живота нашего.

Чти Рождеству иоанна:

76 И ты отроча, пророк вышняго наречешися: 
предыдеши бо пред лицем Господним, уготовати пути 
его.

Преступи Рождеству иоанна.

77 Дати разум спасения людем его, во 
оставление грех их: 78 Милосердия ради милости Бога 
нашего, в нихже посетил есть нас восток свыше: 
79 Просветити во тме и сени смертней седящия, 
направити ноги наша на путь мирен. (л. 99)

Чти Рождеству иоанна:

80 Отроча же растяше и крепляшеся Духом: и бе 
в пустынях до дне явления своего ко Израилю.

Конец Рождеству иоанна, на утрени и на 
литургии.

Глава 2.

(за\ч 5) [1] 1 Бысть же во дни 
тыя,*{В навечерие Рождества Христова и на 3 
часе: Во днех онех*} изыде повеление от 
кесаря августа, написати всю вселенную. 2 Сие 
написание первое бысть, владящу сириею киринию. 3 
И идяху вси написатися, кождо во свой град. 4 
Взыде же и иосиф от галилеи, из града назарета 
во иудею, во град давидов, иже нарицается 
вифлеем, зане быти ему от дому и отечества 
давидова, 5 Написатися с мариею обрученою ему 
женою, сущею непраздною. 6 Бысть же егда быша 
тамо, исполнишася дние родити ей. 7 И роди Сына 
своего первенца, и повит его, и положи его в 
яслех: зане не бе им места во обители. [2] 
8 И пастырие беху в тойже стране бдяще, и 
стрегуще стражу нощную о стаде своем. 9 И се 
ангел Господень ста в них, и слава Господня осия 
их: и убояшася страхом велиим. 10 И рече 
им ангел: не бойтеся, се бо благовествую вам 
радость велию, яже будет всем людем. 11 Яко 
родися вам днесь Спас, иже есть Христос Господь, 
во граде давидове. 12 И се вам знамение: 
обрящете младенец повит, лежащ в яслех. 13 И 
(л. 99 об.) внезапу бысть со ангелом множество вой 
Небесных, хвалящих Бога, и глаголющих: 14 Слава в 
вышних Богу, и на земли мир, во человецех 
Благоволение. 15 И бысть яко отидоша от них на 
Небо ангели, и человецы пастырие реша друг ко 
другу: прейдем до вифлеема, и видим глагол сей 
бывший, иже Господь сказа нам. 16 И приидоша 
поспешшеся, и обретоша мариам же и иосифа: и 
младенец лежащ во яслех. 17 Видевше же сказаша 
о глаголе глаголанном им о отрочати сем. 18 
И вси слышавшии дивишася о глаголанных от пастырей 
к ним. 19 Мариам же соблюдаше вся глаголы сия, 
слагающи в сердцы своем.

(за\ч 6) 20 И возвратишася*{На 
обрезание Господне, на литургии: Во время оно 
возвратишася*} пастырие, славяще и хваляще Бога о 
всех, яже слышаша и видеша, якоже глаголано 
бысть к ним.

Конец навечерию Рождества Христова, и 3-му 
часу.

21 И егда исполнишася осмь дний, да 
обрежут его, и нарекоша имя ему Иисус, 
нареченное ангелом, прежде даже не зачатся во 
чреве.

Преступи обрезанию.

22 И егда исполнишася дние очищения ею по 
закону моисеову,

(за\ч 7) Вознесоста его**{На 
сретение Господне, на литургии: Во время оно, 
вознесоста родителя отроча Иисуса**} во 
иерусалим, поставити его пред Господем. 23 
[Якоже есть писано в законе (л. 100) Господни: яко 
всяк младенец мужеска полу, разверзая ложесна, свято 
Господеви наречется.] 24 И еже дати жертву, по 
реченному в законе Господни: два горличища или два 
птенца голубина.

(за\ч 8) [3] 25 И се*{На сретение 
Господне, на утрени, и на память симеона Богоприимца: 
Во время оно,*} бе человек во иерусалиме, 
емуже имя симеон: и человек сей праведен, и 
благочестив, чая утехи Израилевы: и Дух бе свят 
в нем. 26 И бе ему обещано Духом святым, не 
видети смерти, прежде даже не видит Христа Господня. 
27 И прииде Духом в Церковь, и егда введоста 
родителя отроча Иисуса, сотворити има по обычаю 
законному о нем: 28 И той прием его на руку 
своею, и Благослови Бога, и рече: 29 Ныне 
отпущаеши раба твоего Владыко, по глаголу твоему с 
миром: 30 Яко видесте очи мои спасение твое, 
31 Еже еси уготовал пред лицем всех 
людей: 32 Свет во откровение языком, и славу 
людей твоих Израиля.

Конец сретению на утрени.

33 И бе иосиф и Мати его чудящася о 
глаголемых о нем. 34 И Благослови я симеон, и 
рече к Марии Матери его: се лежит сей на падение, 
и на востание многим во Израили, и в знамение 
пререкаемо: 35 [И тебе же самой душу пройдет 
оружие,] яко убо да открыются от мног 
сердец помышления. [4] 36 И бе анна пророчица, 
дщи фануилева, от (л. 100 об.) колена асирова: сия 
заматоревши во днех мнозех, живши с мужем седмь 
лет от девства своего: 37 И та вдова яко 
лет осмьдесят и четыри, яже не отхождаше от 
церкве, постом и молитвами служащи день и нощь. 38 
И та в той час приставши, исповедашеся Господеви, и 
глаголаше о нем всем чающим избавления во 
иерусалиме.

Конец святому.

39 И яко скончашася вся по закону Господню, 
возвратишася в галилею, во град свой назарет.

Чти обрезанию.

40 Отроча же растяше, и крепляшеся Духом, 
исполняяся премудрости: и Благодать Божия бе на 
нем.

Конец сретению на литургии.

41 И хождаста родителя его на всяко лето во 
иерусалим, в праздник пасхи. 42 И егда бысть 
двоюнадесяте лету, восходящим им во иерусалим по 
обычаю праздника: 43 И скончавшем дни, и 
возвращающимся им, оста отрок Иисус во 
иерусалиме, и не разуме иосиф и Мати его. 44 
Мневша же его во дружине суща, преидоста дне 
путь, и искаста его во сродницех, и в знаемых. 
45 И не обретша его, возвратистася во 
иерусалим, взыскающа его. 46 И бысть по триех 
днех, обретоста его в церкви, седяща посреде 
учителей, и (л. 101) послушающа их, и вопрошающа 
их. 47 Ужасахуся же вси послушающии его, о 
разуме и о ответех его. 48 И видевша его, 
дивистася, и к нему Мати его рече: чадо, что 
сотвори нама тако? се отец твой, и аз боляща 
искахома тебе. 49 И рече к нима: что яко 
искаста мене? не веста ли, яко в тех, яже 
отца моего, достоит быти ми? 50 И та не 
разуместа глагола, иже глагола има. 51 И сниде с 
нима, и прииде в назарет, и бе повинуяся има: и 
Мати его соблюдаше вся глаголы сия в сердцы 
своем. 52 И Иисус преспеваше премудростию и 
возрастом, и благодатию от Бога и человек.

Конец обрезанию.

Глава 3.

(за\ч 9) 1 В пятое же*{В навечерие 
Богоявления: В пятое*} надесяте лето владычества 
тивериа кесаря: обладающу понтийскому пилату иудеею, 
и четвертовластствующу галилеею ироду: филиппу же, 
брату его, четвертовластствующу тириею и 
трахонитскою страною: и лисанию авилиниею 
четвертовластствующу: [5] 2 При архиереи анне и 
каиафе, бысть глагол Божий ко иоанну, захариину 
сыну, в пустыни. 3 И прииде во всю страну 
иорданскую, проповедая крещение покаяния, во 
оставление грехов. 4 Якоже есть писано в 
книзе словес исаии пророка, глаголюща: глас 
вопиющаго в пустыни, уготовайте путь Господень, правы 
творите стези его. (л. 101 об.) 5 Всяка дебрь 
исполнится, и всяка гора и холм смирится: и 
будут стропотная в правая и острии в пути 
гладки. 6 И узрит всяка плоть спасение Божие. 7 
Глаголаше же исходящим народом креститися от него: 
порождения ехиднова, кто сказа вам бежати от 
грядущаго гнева? 8 Сотворите убо плоды достойны 
покаяния, и не начинайте глаголати в себе: отца 
имамы авраама. глаголю бо вам, яко может Бог 
от камения сего воздвигнути чада аврааму. 9 Уже 
бо и секира при корени древа лежит: всяко убо 
древо, не творящее плода добра, посекается, и во 
огнь вметается. [6] 10 И вопрошаху его народи, 
глаголюще: что убо сотворим? 11 Отвещав же, 
глагола им: имеяй две ризе, да подаст 
неимущему, и имеяй брашна, такожде да творит. 12 
Приидоша же и мытари креститися от него, и реша к 
нему: учителю, что сотворим? 13 Он же рече к 
ним: ничтоже боле от повеленнаго вам творите. 14 
Вопрошаху же его и воини, глаголюще: и мы что 
сотворим? и рече к ним: никогоже обидите, ни 
оклеветавайте: и довольни будите оброки вашими. 
15 Чающим же людем, и помышляющим всем в 
сердцах своих о иоанне, еда той есть 
Христос? 16 Отвещаваше иоанн всем глаголя: 
аз убо водою крещаю вы: грядет же креплий 
мене, емуже несмь достоин отрешити ремень 
сапогу его, той вы крестит Духом святым и 
огнем. 17 Емуже лопата в руку его, и 
потребит гумно свое, и соберет (л. 102) пшеницу в 
житницу свою: плевы же сожжет огнем негасающим. 
18 Многа же убо и ина, утешая, 
благовествоваше людем.

Конец навечерию Богоявления.

(за\ч 10) 19 Ирод же четвертовластник 
обличаемь от него*{Понедельник 18 недели: 
Во время оно, ирод четвертовластник обличаемь 
от иоанна*} о иродиаде жене брата своего, и 
о всех, яже сотвори злая ирод: 20 Приложи и 
сие над всеми, и затвори иоанна в темнице. 21 
Бысть же егда крестишася вси людие, и Иисусу 
крещшуся и молящуся, отверзеся Небо. 22 И сниде Дух 
святый телесным образом, яко голубь нань, и 
глас с Небесе бысть, глаголя: ты еси Сын мой 
возлюбленный, о тебе благоволих.

Конец понедельнику.

(за\ч 11) 23 И той бе 
Иисус**{Вторник 18 недели: Во время оно, 
бе Иисус**} яко летом тридесять начиная, 
сый, яко мнимь, Сын иосифов, илиев, 24 
Матфатов, левиин, мелхиин, ианнаев, иосифов, 
25 Маттафиев, амосов, наумов, еслимов, 
наггеов, 26 Маафов, маттафиев, семеиев, иосифов, 
иудин, 27 Иоаннанов, рисаев, зоровавелев, 
салафиилев, нириев, 28 Мелхиев, аддиев, косамов, 
елмодамов, иров, 29 Иосиев, елиезеров, 
иоримов, матфатов, левиин, 30 Симеонов, иудин, 
иосифов, ионанов, елиакимов, (л. 102 об.) 31 
Мелеаев, маинанов, маттафаев, нафанов, давидов, 
32 Иессеов, овидов, воозов, салмонов, 
наассонов, 33 Аминадавов, арамов, иорамов, 
есромов, фаресов, иудин, 34 Иаковль, исааков, 
авраамов, фаранов, нахоров, 35 Серухов, 
рагавов, фалеков, еверов, саланов, 36 Каинанов, 
арфа_ксадов, симов, ноев, ламехов, 37 Мафусалев, 
енохов, иаредов, малелеилов, каинанов, 38 
Еносов, сифов, адамов, Божий.

Глава 4.

(за\ч 12) [7] 1 Ии~с же исполнь Духа 
свята, возвратися*{Среда 18 недели: Во время 
оно, возвратися Иисус исполнь Духа свята*} от 
иордана, и ведяшеся Духом в пустыню,

Конец вторнику.

2 Дний четыридесять искушаемь от диавола, и не 
яст ничесоже во дни тыи: и скончавшимся им, 
последи взалка. 3 И рече ему диавол: аще Сын 
еси Божий, рцы каменеви сему, да будет хлеб. 4 
И отвещав Иисус к нему, глаголя: писано есть, 
яко не о хлебе едином жив будет человек, 
но о всяком глаголе Божии. 5 И возвед его 
диавол на гору высоку, показа ему вся Царствия 
вселенныя в @часе@{@черте@} временне. 6 И рече 
ему диавол: тебе дам власть сию всю, и славу 
их, яко мне предана есть, и емуже аще 
хощу дам ю. 7 Ты убо аще поклонишися предо 
мною, будут тебе вся. (л. 103) 8 И отвещав рече 
ему Иисус: иди за мною сатана. писано есть: 
поклонишися Господу Богу твоему, и тому единому 
послужиши. 9 И веде его во иерусалим, и постави 
его на криле церковнем, и рече ему: аще Сын 
еси Божий, верзися отсюду долу. 10 Писано бо 
есть, яко 877 своим заповесть о тебе, 
сохранити тя: 11 И на руках возмут тя, да не 
когда преткнеши о камень ногу твою. 12 И 
отвещав рече ему Иисус: яко речено есть, не 
искусиши Господа Бога твоего. 13 И скончав все 
искушение диавол, отиде от него до времене. 14 И 
возвратися Иисус в силе Духовней в галилею, и 
весть изыде по всей стране о нем. 15 И той 
учаше на сонмищах их, славимь всеми.

Конец среде.

(за\ч 13) 16 И прииде*{Четверток 
18 недели: Во время оно, прииде Иисус* Сие же 
и септемвриа 1, новому лету.} в назарет, идеже 
бе воспитан: и вниде по обычаю своему в день 
субботный в сонмище, и воста чести. 17 И даша 
ему книгу исаии пророка, и разгнув книгу, 
обрете место, идеже бе написано: 18 Дух Господень 
на мне, егоже ради помаза мя благовестити нищим, 
посла мя, исцелити сокрушенныя сердцем, 
проповедати плененным отпущение, и слепым 
прозрение, отпустити сокрушенныя во отраду. 19 
Проповедати лето Господне приятно. 20 И согнув книгу, 
отдав слузе, седе: и (л. 103 об.) всем в 
сонмищи очи беху зряще нань. 21 И начат 
глаголати к ним: яко днесь сбыстся писание сие во 
ушию вашею. 22 И вси свидетельствоваху ему.

(за\ч 14) И дивляхуся о словесех 
благодати, исходящих из уст его.

Конец четвертку и новому лету.

*{Пяток 18 недели: Во время оно, 
дивляхуся народи о словесех Благодати, исходящих 
из уст Иисусовых* Сие же и пророку илии.} 
и глаголаху: не сей ли есть Сын иосифов? 23 И 
рече к ним: всяко речете ми притчу сию, врачу 
исцелися сам: елика слышахом бывшая в 
капернауме, сотвори и зде во отечествии своем. 
24 Рече же: аминь глаголю вам, яко ни который 
пророк приятен есть во отечествии своем. 25 
Поистинне же глаголю вам: многи вдовицы беша во 
дни илиины во Израили, егда заключися небо три 
лета и месяц шесть, яко бысть глад велик по 
всей земли. 26 И ни ко единой их послан бысть 
илиа, токмо в сарепту сидонскую, к жене вдовице. 
27 И мнози прокажени беху при елиссеи пророце во 
Израили: и ни един же от них очистися, токмо 
нееман сирианин. 28 И исполнишася вси ярости в 
сонмищи, слышавшии сия. 29 И воставше, изгнаша 
его вон из града: и ведоша его до верху 
горы, на нейже град их создан бяше, да быша 
его низринули. 30 Он же прошед посреде их 
идяше.

Конец пятку и святому. (л. 104)

(за\ч 15) [8] 31 И сниде в капернаум, 
град галилейский: и бе учя их в 
субботы.*{Суббота 18 недели: Во время оно, 
сниде Иисус в капернаум град галилейский, и бе 
учя народы в субботы*} 32 И ужасахуся о 
учении его, яко со властию бе слово его. 
33 И в сонмищи бе человек, имый дух беса 
нечиста, и возопи гласом велиим, 34 Глаголя: 
остави, что нам и тебе Иисусе назарянине? пришел 
еси погубити нас: вем тя, кто еси святый 
Божий. 35 И запрети ему Иисус, глаголя: премолчи, 
и изыди из него. и поверг его бес посреде, 
изыде из него, никакоже вредив его. 36 И 
бысть ужас на всех, и стязахуся друг ко другу, 
глаголюще: что слово сие, яко властию и силою 
велит нечистым духовом, и исходят?

Конец субботе.

(за\ч 16) [9] 37 И исхождаше глас о 
нем во всяко место страны. 38 Востав же из 
сонмища, вниде в дом симонов.**{Понедельник 
19 недели: Во время оно, вниде Иисус в дом 
симонов, и исхождаше глас о нем во всякое место 
страны.**} теща же симонова бе одержима огнем 
велиим, и молиша его о ней. 39 И став над 
нею, запрети огню, и остави ю: абие же воставши 
служаше им. 40 Заходящу же солнцу, вси елицы 
имеяху болящия недуги различными, привождаху их к 
нему: он же на едином коегождо их руце (л. 
104 об.) возлож, исцеляше их. 41 Исхождаху же и 
беси от многих вопиюще и глаголюще: яко ты 
еси Христос Сын Божий. и запрещая не даяше им 
глаголати, яко ведяху Христа самаго суща. 42 
Бывшу же дни изшед иде в пусто место: и народи 
искаху его, и приидоша до него, и держахуся 
его, да не бы отшел от них. 43 Он же рече к 
ним: яко и другим градовом благовестити ми 
подобает Царствие Божие, яко на се послан есмь. 
44 И бе проповедая на сонмищах галилейских.

Конец понедельнику.

Глава 5.

(за\ч 17) [11] 1 Бысть же належащу ему 
народу, да быша слышали слово Божие, и той бе 
стоя*{Неделя 18: Во время оно, стояше 
Иисус*} при езере геннисаретсте: 2 И виде 
два корабля стояща при езере: рыбарие же отшедше 
от нею, измываху мрежи. 3 Влез же в един от 
кораблю, иже бе симонов, моли его от земли 
отступити мало: и сед учаше из корабля 
народы. 4 Якоже преста глаголя, рече к симону: 
поступи во глубину, и вверзите мрежи ваша в 
ловитву. 5 И отвещав симон рече ему: 
наставниче, обнощь всю труждшеся, ничесоже яхом: 
по глаголу же твоему ввергу мрежу. 6 И се сотворше, 
яша множество рыб много, протерзашеся же мрежа 
их. 7 И помануша причастником, иже беху во 
друзем (л. 105) корабли, да пришедше помогут им: 
и приидоша, и исполниша оба корабля, яко 
погружатися има. 8 Видев же симон петр, припаде 
к коленома Иисусовома, глаголя: изыди от мене, 
яко муж грешен есмь, Господи. 9 Ужас бо 
одержаше его и вся сущия с ним, о ловитве 
рыб, яже яша: 10 Такожде же иакова и иоанна, 
сына зеведеова, яже беста обещника симонови. и 
рече к симону Иисус: не бойся, отселе будеши 
человеки ловя. 11 И извлекше оба корабля на 
землю, оставльше вся в след его идоша.

Конец недели.

(за\ч 18) 12 И бысть 
егда*{Вторник 19 недели: Во время 
оно,*} бе Иисус во едином от градов, и се 
муж исполнь прокажения: и видев Иисуса, пад ниц 
моляся ему, глаголя: Господи, аще хощеши, можеши мя 
очистити. 13 И простер руку, косну его, рек: 
хощу, очистися. и абие проказа отиде от него. 
14 И той заповеда ему никомуже поведати: но 
шед покажися иереови, и принеси о очищении 
твоем, якоже повеле моисей, во свидетельство 
им. 15 Прохождаше же паче слово о нем: и 
схождахуся народи мнози слышати, и целитися от него 
от недуг своих. 16 Тойже бе отходя в пустыню, 
и моляся.

Конец вторнику. (л. 105 об.)

(за\ч 19) 17 И бысть во един от 
дний, и той бе учя:*{Суббота 19 недели: 
Во время оно, бе учя Иисус*} и беху 
седяще фарисее и законоучителие, иже беху пришли 
от всякия веси галилейския, и иудейския, и 
иерусалимския: и сила Господня бе исцеляющи их. 
[13] 18 И се мужие носяще на одре человека, 
иже бе разслаблен: и искаху внести его, и 
положити пред ним. 19 И не обретше куде внести 
его, народа ради, взлезше на храм, сквозе 
@скуделы@{@кров скудельный@} низвесиша его со 
одром на среду пред Иисуса. 20 И видев веру 
их, рече ему: человече, оставляют ти ся греси 
твои. 21 И начаша помышляти книжницы и фарисее, 
глаголюще: кто есть сей, иже глаголет хулы? кто 
может оставляти грехи, токмо един Бог? 22 
Разумев же Иисус помышления их, отвещав рече 
к ним: что помышляете в сердцах ваших? 23 Что 
есть удобее рещи: оставляют ти ся греси твои? 
или рещи: востани и ходи? 24 Но да увесте, 
яко власть имать Сын человеческий на земли 
отпущати грехи, рече разслабленному: тебе глаголю, 
востани и возми одр твой, и иди в дом твой. 
25 И абие востав пред ними, взем на немже 
лежаше, иде в дом свой, славя Бога. (вто\р) 26 
И ужас прият вся, и славляху Бога, и 
исполнишася страха, глаголюще: яко видехом 
преславная днесь.

Конец субботе. (л. 106)

(за\ч 20) [14] 27 И посем изыде, и 
узре*{Суббота 20 недели: Во время оно, 
преходя Иисус, узре*} мытаря, именем левию, 
седяща на мытнице, и рече ему иди по мне. 28 
И оставль вся, востав во след его иде. 29 И 
сотвори чреждение велие левий ему в дому своем, 
и бе народ мытарей мног, и инех, иже бяху с 
ним возлежаще. 30 И роптаху книжницы на него и 
фарисее, ко учеником его глаголюще: почто с 
мытари и грешники ясте и пиете? 31 И отвещав 
Иисус рече к ним: не требуют здравии врача, но 
болящии. 32 Не приидох призвати праведных, но 
грешныя в покаяние.

Конец субботе.

(за\ч 21) 33 Они же реша к 
нему:**{Среда 19 недели: Во время оно, 
приступиша фарисеи ко Иисусу, глаголюще:**} почто 
ученицы иоанновы постятся часто, и молитвы 
творят, такожде и фарисейстии, а твои ядят и 
пиют? 34 Он же рече к ним: еда можете сыны 
брачныя, дондеже жених с ними есть, сотворити 
поститися? 35 Приидут же дние, егда отят будет 
от них жених, и тогда постятся в тыя дни. 36 
Глаголаше же и притчу к ним: яко никтоже 
приставления ризы новы приставляет на ризу ветху: 
аще ли же ни, и новую раздерет, и ветсей не 
согласует еже от новаго. 37 И никтоже вливает 
вина нова в мехи ветхи: аще ли же ни, (л. 106 об.) 
расторгнет новое вино мехи, и само излиется, и 
меси погибнут. 38 Но вино новое в мехи новы 
@вливати@{@вливати подобает@}, и обое соблюдется. 
39 И никтоже пив ветхое, абие хощет новому: 
глаголет бо, ветхое лучше есть.

Конец среде.

Глава 6.

(за\ч 22) 1 Бысть же в субботу второпервую 
ити ему*{Суббота 21 недели: Во время 
оно, хождаше Иисус в субботу*} сквозе сеяния: 
и восторгаху ученицы его класы, и ядяху, 
стирающе руками. 2 Нецыи же от фарисей реша им: 
что творите, егоже не достоит творити в субботы? 
3 И отвещав Иисус рече к ним: ни ли сего чли 
есте, еже сотвори Давид, егда взалкася сам, и 
иже с ним сущии? 4 Како вниде в дом Божий, и 
хлебы предложения взем, и яде, и даде и сущим 
с ним, ихже не достояше ясти, токмо единем 
иереем? 5 И глаголаше им: яко Господь есть 
Сын человеческий и субботе. 6 Бысть же и в другую 
субботу внити ему в сонмище, и учити: [15] и 
бе тамо человек, и рука ему десная бе суха. 
7 Назираху же книжницы и фарисеи, аще в субботу 
исцелит, да обрящут речь нань. 8 Он же 
ведяше помышления их, и рече человеку имущему 
суху руку: востани, и стани посреде. он же 
востав, ста. 9 Рече же Иисус к ним: вопрошу вы, 
что достоит в субботы, добро творити, или (л. 107) 
зло творити? душу спасти, или погубити? они же 
умолчаша. 10 И воззрев на вся их, рече ему: 
простри руку твою. он же сотвори тако: и 
утвердися рука его здрава яко другая.

Конец субботе.

11 Они же исполнишася безумия, и глаголаху 
друг ко другу: что быша сотворили Иисусови?

(за\ч 23) [16] 12 Бысть же во дни тыя, 
изыде*{Четверток 19 недели: Во время 
оно, изыде Иисус*} в гору помолитися, и бе 
обнощь в молитве Божии. 13 И егда бысть день, 
призва ученики своя, и избра от них 
дванадесяте, ихже и апостолы нарече: 14 Симона, 
егоже именова петра, и андреа брата его: 
иакова и иоанна: филиппа и варфоломеа: 15 Матфеа 
и фому: иакова алфеева и симона нарицаемаго 
зилота: 16 Иуду иаковля, и иуду искариотскаго, 
иже и бысть предатель.

(за\ч 24) 17 Изшед с ними, 
ста**{Пяток 19 недели: Во время оно, ста 
Иисус** Сие же и преподобным.} на месте равне, 
и народ ученик его, и множество много людей 
от всея иудеи, и иерусалима, и помория тирска и 
сидонска: 18 Иже приидоша послушати его, и 
исцелитися от недуг своих, и страждущии от дух 
нечистых, и исцеляхуся. 19 И весь народ искаше 
прикасатися ему: яко сила от него исхождаше, и 
исцеляше вся.

Конец четвертку. (л. 107 об.)

20 И той возвед очи свои на ученики своя, 
глаголаше: [17] блажени нищии Духом, яко ваше 
есть Царствие Божие. 21 Блажени алчущии ныне, 
яко насытитеся. блажени плачущии ныне, яко 
возсмеетеся. 22 Блажени будете, егда возненавидят 
вас человецы, и егда разлучат вы, и поносят, 
и пронесут имя ваше яко зло, Сына человеческаго 
ради. 23 Возрадуйтеся в той день и взыграйте: се бо 
мзда ваша многа на небеси.

Конец пятку и преподобным.

по сим бо творяху пророком отцы их.

(за\ч 25) 24 Обаче*{Понедельник 
20 недели: Рече Господь ко пришедшим к нему 
иудеом:*} горе вам богатым, @яко отстоите 
утешения вашего@{@яко восприемлете утешение 
ваше@}. 26 Горе вам насыщеннии ныне, яко 
взалчете: горе вам смеющимся ныне, яко 
возрыдаете и восплачете. 26 Горе, егда добре 
рекут вам вси человецы: по сим бо творяху 
лжепророком отцы их. 27 Но вам глаголю 
слышащим: любите враги ваша, добро творите 
ненавидящим вас: 28 Благословите кленущия вы, и 
молитеся за творящих вам обиду. 29 Биющему тя в 
ланиту, подаждь и другую: и от взимающаго ти ризу, 
и срачицу не возбрани. 30 Всякому же просящему у 
тебе дай, и от взимающаго твоя не истязуй.

Конец понедельнику. (л. 108)

(за\ч 26) 31 И якоже*{Неделя 19: 
Рече Господь: якоже*} хощете да творят вам 
человецы, и вы творите им такожде. 32 И аще 
любите любящия вы, кая вам благодать есть? ибо 
и грешницы любящия их любят. 33 И аще 
благотворите благотворящим вам, кая вам благодать 
есть? ибо и грешницы тожде творят. 34 И аще 
взаим даете, от нихже чаете восприяти, кая вам 
благодать есть? ибо и грешницы грешником взаим 
давают, да восприимут равная. 35 Обаче любите 
враги ваша, и благотворите, и взаим дайте, ничесоже 
чающе. и будет мзда ваша многа, и будете сынове 
вышняго: яко той Благ есть на 
@безблагодатныя@{@неблагодарныя@} и злыя. 36 Будите 
убо милосерди, якоже и отец ваш милосерд 
есть.

Конец недели.

(за\ч 27) 37 И не судите,**{Вторник 
20 недели: Рече Господь: не судите**} и не судят 
вам: и не осуждайте, да не осуждени будете: 
отпущайте, и отпустят вам. 38 Дайте, и дастся 
вам: меру добру, наткану, и потрясну, и 
преливающуся дадят на лоно ваше: тою бо мерою, 
еюже мерите, возмерится вам. 39 Рече же притчу 
им: еда может слепец слепца водити? не оба 
ли в яму впадетася? 40 Несть ученик над 
учителем своим: совершен же всяк будет якоже 
и учитель его. 41 Что же видиши сучец, иже 
есть во очеси брата твоего: бервна (л. 108 об.) 
же, еже есть во очеси твоем, не чуеши? 42 Или 
како можеши рещи брату твоему: брате, остави, да 
изму сучец, иже есть во очеси твоем, сам 
сущаго во очеси твоем бервна не видя? лицемере, 
изми первее бервно из очесе твоего, и тогда 
прозриши изяти сучец из очесе брата твоего. 
43 Несть бо древо добро, творя плода зла: ниже 
древо зло, творя плода добра. 44 Всяко бо древо от 
плода своего познается: не от терния бо чешут 
смоквы, ни от купины емлют гроздия. 45 Благий 
человек от благаго сокровища сердца своего 
износит благое: и злый человек от злаго 
сокровища сердца своего износит злое: от избытка 
бо сердца глаголют уста его.

Конец вторнику.

(за\ч 28) 46 Что же мя*{Среда 20 
недели: Рече Господь: что мя*} зовете: Господи, 
Господи, и не творите, яже глаголю? 47 Всяк грядый 
ко мне, и слышай словеса моя, и творя я, скажу 
вам, кому есть подобен. 48 Подобен: есть 
человеку зиждущу храмину, иже ископа, и углуби, 
и положи основание на камени: наводнению же бывшу, 
припаде река храмине той, и не може поколебати 
ея, основана бо бе на камени. 49 Слышавый же, и 
не сотворивый, подобен есть человеку, создавшему 
храмину на земли без основания: ейже припаде 
река, и абие падеся, и бысть разрушение храмины 
тоя велие. (л. 109)

Глава 7.

(за\ч 29) 1 Егда же сконча вся глаголы 
своя в слухи людем, вниде*{Суббота 22 
недели: Во время оно, вниде Иисус*} в 
капернаум.

Конец среде.

[18] 2 Сотнику же некоему раб боля зле, 
@хотяше@{@имеяше@} умрети, иже бе ему 
честен. 3 Слышав же о Иисусе, посла к нему старцы 
иудейския, моля его, яко да пришед спасет раба 
его. 4 Они же пришедше ко Иисусови, моляху его 
тощно, глаголюще: яко достоин есть, еже аще 
даси ему: 5 Любит бо язык наш, и сонмище 
той созда нам. 6 Иисус же идяше с ними. еще же 
ему не далече сущу от храмины, посла к нему 
сотник други, глаголя ему: Господи, не движися: 
несмь бо достоин, да под кров мой внидеши. 7 
Темже ни себе достойна сотворих приити к тебе: но 
рцы слово, и исцелеет отрок мой. 8 Ибо и 
аз человек есмь под владыкою учинен, 
имея под собою воины, и глаголю сему: иди, и 
идет, и другому: прииди, и приидет. и рабу 
моему: сотвори сие, и сотворит. 9 Слышав же сия 
Иисус чудися ему, и обращся, идущему по нем 
народу рече: глаголю вам, ни во Израили толики веры 
обретох. 10 И возвращшеся посланнии, обретоша 
болящаго раба исцелевша.

Конец субботе. (л. 109 об.)

(за\ч 30) [19] 11 И бысть посем, 
идяше*{Неделя 20: Во время оно, идяше 
Иисус*} во град нарицаемый наин: и с ним 
идяху ученицы его мнози, и народ мног. 12 
Якоже приближися ко вратом града, и се изношаху 
умерша сына единородна матери своей, и та бе 
вдова: и народ от града мног с нею. 13 И 
видев ю Господь, милосердова о ней, и рече ей: не 
плачи. 14 И приступль коснуся во одр, носящии же 
сташа. и рече: юноше, тебе глаголю, востани. 15 
И седе мертвый, и начат глаголати: и даде его 
матери его. 16 Прият же страх вся, и славляху 
Бога, глаголюще: яко пророк велий воста в нас, и 
яко посети Бог людей своих.

Конец недели.

(за\ч 31) [20] 17 И изыде слово сие по 
всей иудеи о нем,**{Четверток 20 недели: 
Во время оно, изыде слово о Иисусе по всей 
иудеи,** Сие же и в 3-ие обретение главы 
иоанна предтечи.} и по всей стране. 18 И 
возвестиша иоанну ученицы его о всех сих. 
и призвав два некая от ученик своих иоанн, 
19 Посла ко Иисусу, глаголя: ты ли еси грядый, 
или иного чаем? 20 Пришедша же к нему мужа, 
реста: иоанн креститель посла нас к тебе, 
глаголя: ты ли еси грядый, или иного чаем? 21 
В той же час исцели многи от недуг, и ран, и 
дух злых: и многим слепым дарова прозрение. 22 
И отвещав Иисус рече има: шедша возвестита (л. 
110) иоанну, яже видеста и слышаста: яко 
слепии прозирают, хромии ходят, прокаженнии 
очищаются, глусии слышат, мертвии востают, нищии 
благовествуют. 23 И блажен есть, иже аще не 
соблазнится о мне. 24 Отшедшема же ученикома 
иоанновома, начат глаголати к народом о иоанне: 
чесо изыдосте в пустыню видети? трость ли ветром 
колеблемь? 25 Но чесо изыдосте видети? человека ли 
в мякки ризы одеяна? се иже во одежди славней, 
и пищи сущии, @во царствии@{@во дворех царских@} 
суть. 26 Но чесо изыдосте видети? пророка ли? ей, 
глаголю вам, и лишше пророка. 27 Сей бо есть, о 
немже писано есть: се аз послю ангела моего 
пред лицем твоим, иже устроит путь твой 
пред тобою. 28 Глаголю бо вам: болий в рожденных 
женами пророк иоанна крестителя никтоже есть: 
мний же, во Царствии Божии болий его есть. 29 И 
вси людие слышавше, и мытарие оправдиша Бога 
крещшеся крещением иоанновым. 30 Фарисее же и 
законницы совет Божий отвергоша в себе, не 
крещшеся от него.

Конец четвертку и иоанну.

(за\ч 32) 31 Рече же Господь: кому 
убо*{Пяток 20 недели: Рече Господь: 
кому*} уподоблю человеки рода сего, и кому 
суть подобни? 32 Подобни суть отрочищем, 
седящим на торжищах, и приглашающим друг друга, 
и глаголющим: пискахом вам, и не плясасте: 
рыдахом вам, и не плакасте. (л. 110 об.) 33 Прииде 
бо иоанн креститель, ни хлеба ядый, ни вина пия, 
и глаголете: бес имать. 34 Прииде Сын 
человеческий, ядый и пия, и глаголете: сей 
человек ядца и винопийца, друг мытарем и 
грешником. 35 И оправдися премудрость от чад 
своих всех.

Конец пятку.

(за\ч 33) [21] 36 Моляше же 
его*{Понедельник 21 недели: Во время 
оно, моляше Иисуса* Сие и мученицам.} некий 
от фарисей, да бы ял с ним: и вшед в дом 
фарисеов, возлеже. 37 И се жена во граде, яже 
бе грешница, и уведевши, яко возлежит во 
храмине фарисеове, принесши алавастр мира, 38 И 
ставши при ногу его созади плачущися, начат 
умывати нозе его слезами, и власы главы своея 
отираше, и облобызаше нозе его, и мазаше 
миром. 39 Видев же фарисей возвавый его, рече в 
себе, глаголя: сей аще бы был пророк, ведел 
бы, кто и какова жена прикасается ему, яко 
грешница есть. 40 И отвещав Иисус рече к нему: 
симоне, имам ти нечто рещи. он же рече: 
учителю, рцы. Иисус же рече: 41 Два должника 
беста заимодавцу некоему, един бе должен 
пятиюсот динарий, другий же пятиюдесять. 42 Не 
имущема же има воздати, обема @отда@{@остави@}: 
который убо ею, рцы, паче возлюбит его? 43 
Отвещав же симон рече: мню, яко емуже вящше 
*отда*{*остави*}. он же рече ему: право судил 
еси. (л. 111) 44 И обращся к жене, симонови 
рече: видиши ли сию жену? внидох в дом твой, воды 
на нозе мои не даде: сия же слезами облия ми нозе, 
и власы главы своея отре. 45 Лобзания ми не даде: 
сия же отнелиже внидох, не преста облобызающи ми 
нозе. 46 Маслом главы моея не помаза: сия же 
миром помаза ми нозе. 47 Егоже ради глаголю ти: 
отпущаются греси ея мнози, яко возлюби много: 
а емуже мало оставляется, меньше любит. 48 Рече 
же ей: отпущаются тебе греси. 49 И начаша 
возлежащии с ним глаголати в себе: кто сей 
есть, иже и грехи отпущает? 50 Рече же к 
жене: вера твоя спасе тя, иди в мире.

Конец понедельнику, и мученицам.

Глава 8.

(за\ч 34) 1 И бысть посем, и той 
прохождаше*{Вторник 21 недели: Во время 
оно, прохождаше Иисус*} сквозе грады и веси, 
проповедуя и благовествуя царствие Божие: и 
обанадесяте с ним. 2 И жены некия, яже бяху 
исцелены от духов злых и недуг: мариа 
нарицаемая магдалина, из неяже бесов седмь 
изыде: 3 И иоанна жена хузаня, приставника 
иродова: и сусанна, и ины многи, яже служаху 
ему от имений своих.

Конец вторнику.

4 Разумевающу же народу многу, и от всех 
градов грядущим к нему, рече притчу: (л. 111 об.)

(за\ч 35) [22] 5 *{Неделя 21: Рече 
Господь притчу сию:*} Изыде сеяй сеяти 
семене своего: и егда сеяше, ово паде при 
пути, и попрано бысть, и птицы Небесныя позобаша е. 
6 А другое паде на камени, и прозяб усше, зане 
не имеяше влаги. 7 И другое паде посреде терния: 
и возрасте терние и подави е. 8 Другое же паде на 
земли блазе, и прозяб сотвори плод сторицею. Сия 
глаголя возгласи: имеяй уши слышати, да слышит. 
9 Вопрошаху же его ученицы его, глаголюще: что 
есть притча сия? 10 Он же рече: вам есть 
дано ведати тайны Царствия Божия: прочим же в 
притчах, да видяще не видят, и слышаще не 
разумеют. 11 Есть же сия притча: семя есть 
слово Божие. 12 А иже при пути, суть слышащии: 
потом же приходит диавол, и вземлет слово от 
сердца их, да не веровавше спасутся. 13 А иже на 
камени, иже егда услышат, с радостию приемлют 
слово: и сии корене не имут, иже во время 
веруют, и во время напасти отпадают. 14 А еже 
в тернии падшее, сии суть слышавшии, и от печали и 
богатства, и сластьми житейскими ходяще, подавляются, 
и не свершают плода. 15 А иже на добрей земли, 
сии суть, иже добрым сердцем и Благим слышавше 
слово держат, и плод творят в терпении. сия 
глаголя, возгласи: имеяй уши слышати, да слышит.

Конец недели. (л. 112)

(за\ч 36) 16 Никтоже убо*{Суббота 
23 недели: Рече Господь: никтоже* Сие же и святей 
анне.} светильника вжег, покрывает его 
сосудом, или под одр подлагает: но на свещник 
возлагает, да входящии видят свет. 17 Несть бо 
тайно, еже не явлено будет, ниже утаено, 
еже не познается, и в явление приидет. 18 
Блюдитеся убо, како слышите. иже бо имать, 
дастся ему: и иже аще не имать, и еже мнится 
имея, возмется от него. 19 Приидоша же к нему 
Мати и братия его, и не можаху беседовати к нему 
народа ради. 20 И возвестиша ему, глаголюще: Мати 
твоя и братия твоя вне стоят, видети тя хотяще. 
21 Он же отвещав рече к ним: Мати моя, и 
братия моя сии суть, слышащии слово Божие, и творяще 
е.

Конец субботе.

(за\ч 37) [23] 22 И бысть во един от 
дний, той влезе**{Среда 21 недели: Во время 
оно, влез Иисус**} в корабль, и ученицы 
его, и рече к ним: прейдем на он пол 
езера. и поидоша. 23 Идущим же им, успе: и 
сниде буря ветреная в езеро: и скончавахуся, и в 
беде беху. 24 И приступльше воздвигоша его, 
глаголюще: наставниче, наставниче, погибаем. он же 
востав запрети ветру, и волнению водному: и 
улегоста, и бысть тишина. 25 Рече же им: где 
есть вера ваша? убоявшеся же (л. 112 об.) 
чудишася, глаголюще друг ко другу: кто убо сей 
есть, яко и ветром повелевает, и воде, и 
послушают его?

Конец среде.

(за\ч 38) [24] 26 И приидоша во страну 
гадаринску,*{Неделя 23: Во время оно, 
пришедшу Иисусу во страну гадаринску,*} яже 
есть об он пол галилеи. 27 Изшедшу же ему 
на землю, срете его муж некий от града, иже 
имяше бесы от лет многих, и в ризу не 
облачашеся, и во храме не живяше, но во гробех. 28 
Узрев же Иисуса, и возопив, припаде к нему, и 
гласом велиим рече: что мне и тебе, Иисусе Сыне 
Бога вышняго? молюся ти, не мучи мене. 29 Повеле 
убо духови нечистому изыти от человека: от 
мног бо лет восхищаше его, и вязаху его 
узы железны и путы, стрегуще его: и растерзая 
узы, гонимь бываше бесом сквозе пустыни. 30 
Вопроси же его Иисус, глаголя: что ти есть имя? 
он же рече: легеон: яко беси мнози внидоша 
вонь. 31 И моляху его, да не повелит им в 
бездну ити: 32 Бе же ту стадо свиней много пасомо 
в горе. и моляху его, да повелит им в ты 
внити, и повеле им. 33 Изшедше же беси от 
человека, внидоша во свиния: и устремися стадо по 
брегу в езеро, и истопе. 34 Видевше же пасущии 
бывшее, бежаша: и возвестиша во граде и в 
селех. (л. 113) 35 Изыдоша же видети бывшее: и 
приидоша ко Иисусови, и обретоша человека седяща, 
из негоже беси изыдоша, оболчена и смысляща, при 
ногу Иисусову, и убояшася. 36 Возвестиша же им 
видевшии, како спасеся бесновавый. 37 И моли его 
весь народ страны гадаринския отити от них, яко 
страхом велиим одержими беху: он же влез в 
корабль, возвратися. 38 Моляшеся же ему муж, из 
негоже изыдоша беси, да бы с ним был. отпусти 
же его Иисус, глаголя: 39 Возвратися в дом твой, 
и поведай, елика ти сотвори Бог. и иде по всему 
граду проповедая, елика сотвори ему Иисус.

Конец недели.

(за\ч 39) [25] 40 Бысть же егда 
возвратися Иисус, прият его народ: беху бо вси 
чающе его. 41 И се прииде муж,*{Неделя 
24: Во время оно, человек некий приступи ко 
Иисусу,*} емуже имя иаир, и той князь 
сонмищу бе: и пад при ногу Иисусову, моляше его 
внити в дом свой: 42 Яко дщи единородна бе 
ему, яко лет двоюнадесяте, и та умираше: 
егда же идяше, народи угнетаху его. [26] 43 
И жена сущи в точении крове от двоюнадесяте лету, 
яже врачем издавши все имение, и не возможе ни 
от единаго исцелети. 44 И приступльши созади, 
коснуся края риз его: и абие ста ток крове 
ея. 45 И рече Иисус: кто есть коснувыйся мне? 
отметающимся же всем, рече петр, и иже с ним: 
наставниче, народи одержат тя, и гнетут, и 
глаголеши: кто (л. 113 об.) есть коснувыйся мне? 
46 Иисус же рече: прикоснуся мне некто, аз бо 
чух силу изшедшую из мене. 47 Видевши же жена, 
яко не утаися, трепещущи прииде, и падши пред 
ним, за нюже вину прикоснуся ему, поведа ему 
пред всеми людьми, и яко исцеле абие. 48 
Он же рече ей: дерзай дщи, вера твоя спасе тя, 
иди в мире. 49 Еще ему глаголющу, прииде 
некий от архисинагога, глаголя ему: яко 
умре дщи твоя, не движи учителя. 50 Иисус же 
слышав, отвеща ему глаголя: не бойся, токмо 
веруй, и спасена будет. 51 Пришед же в дом, не 
остави ни единаго внити, токмо петра и иоанна и 
иакова, и отца отроковицы, и матере. 52 
Плакахуся же вси и рыдаху ея. он же рече: не 
плачитеся: не умре бо, но спит. 53 И ругахуся 
ему ведяще, яко умре. 54 Он же изгнав 
вон всех, и ем за руку ея, возгласи глаголя: 
отроковице, востани. 55 И возвратися дух ея, и 
воскресе абие: и повеле дати ей ясти. 56 И 
дивистася родителя ея. он же повеле има 
никомуже поведати бывшее.

Конец недели.

Глава 9.

(за\ч 40) [27] 1 Созвав же 
обанадесяте,*{Суббота 24 недели: Во время 
оно, созва Иисус обанадесяте ученика 
своя,*} даде им силу и власть на вся бесы, и 
недуги целити. 2 И посла их проповедати Царствие 
Божие, и (л. 114) исцелити болящия. 3 И рече к 
ним: ничесоже возмите на путь, ни жезла, ни пиры, 
ни хлеба, ни сребра, ни по двема ризама имети. 4 
И воньже дом внидете, ту пребывайте, и оттуду 
исходите. 5 И елицы аще не приемлют вас, 
исходяще от града того, и прах от ног ваших 
оттрясите во свидетельство на ня. 6 Исходяще же 
прохождаху сквозе веси, благовествующе, и 
исцеляюще всюду.

Конец субботе.

(за\ч 41) 7 Слышав же ирод 
четвертовластник*{Четверток 21 недели: Во 
время оно, слышав ирод четвертовластник о 
Иисусе,*} бывающая от него вся и недоумевашеся: 
зане глаголемо бе от неких, яко иоанн воста 
от мертвых: 8 От инех же, яко илиа явися: 
от других же, яко пророк един от древних 
воскресе. 9 И рече ирод: иоанна аз 
усекнух: кто же есть сей, о немже аз слышу 
таковая? и искаше видети его. 10 И возвращшеся 
апостоли поведаша ему, елика сотвориша. и поим 
их, отиде @един@{@особь@} на место пусто 
града нарицаемаго вифсаида. 11 Народи же разумевше, 
по нем идоша: и прием их, глаголаше им о 
Царствии Божии, и требующия исцеления целяше.

Конец четвертку.

12 День же начат прекланятися. (л. 114 об.)

(за\ч 42) [28] Приступльше же 
обанадесяте*{Пяток 21 недели: Во время 
оно, приступиша ко Иисусу обанадесяте ученика 
его*} рекоша ему: отпусти народ, да шедше во 
окрестныя веси и села витают, и обрящут 
брашно: яко зде в пусте месте есмы. 13 
Рече же к ним: дадите им вы ясти. они же 
реша: несть у нас вящше, токмо пять хлеб, и 
рыбе две, аще убо не шедше мы купим во вся 
люди сия брашна? 14 Беху бо мужей яко пять 
тысящ. рече же ко учеником своим: посадите их 
на купы по пятидесят. 15 И сотвориша тако: и 
посадиша их вся. 16 Приим же пять хлеб и 
обе рыбе, воззрев на Небо, благослови их: и 
сломи, и даяше учеником предложити народу. 17 И 
ядоша, и насытишася вси, и взяша избывшия им 
укрухи, коша дванадесяте.

(за\ч 43) [29] 18 И бысть 
егда**{Понедельник 22 недели: Во время 
оно, бысть егда Иисус**} моляшеся един, с 
ним беху ученицы.

Конец пятку.

и вопроси их глаголя: кого мя глаголют народи 
быти? 19 Они же отвещавше реша: иоанна 
крестителя, инии же илию: друзии же, яко пророк 
некий от древних воскресе. 20 Рече же им: вы же 
кого мя глаголете быти? отвещав же петр рече: 
Христа Божия. 21 Он же запрещь им, повеле 
никомуже глаголати сего, 22 Рек: яко подобает 
Сыну человеческому (л. 115) много пострадати, и 
@искушену@{@отвержену@} быти от старец, и 
архиерей, и книжник, и убиену быти, и в 
третий день востати.

Конец понедельнику.

(за\ч 44) 23 Глаголаше же ко 
всем:*{Вторник 22 недели: Рече Господь:*} 
аще кто хощет по мне ити, да отвержется себе, и 
возмет крест свой, и последует ми. 24 Иже бо 
аще хощет душу свою спасти, погубит ю: а иже 
бо погубит душу свою мене ради, сей спасет ю. 
25 Что бо пользует человек приобрет мир весь, 
себе же погубив, или оттщетив? 26 Иже бо аще 
постыдится мене, и моих словес, сего Сын 
человеческий постыдится, егда приидет во славе 
своей, и отчей, и святых ангел. 27 Глаголю же 
вам воистинну: суть нецыи от зде стоящих, иже 
не имут вкусити смерти, дондеже видят Царствие 
Божие.

Конец вторнику.

(за\ч 45) [30] 28 Бысть же по словесех 
сих яко дний осмь, и поем**{На 
преображение на утрени: Во время оно, поем 
Иисус**} петра, и иоанна, и иакова, взыде на 
гору помолитися. 29 И бысть егда моляшеся, 
видение лица его ино, и одеяние его бело 
блистаяся. 30 И се мужа два с ним глаголюща, яже 
беста моисей и илиа, 31 Явльшася во славе: 
глаголаста же исход его, иже хотяше скончати во 
иерусалиме. (л. 115 об.) 32 Петр же и сущии с 
ним, бяху отягчени сном: убуждшеся же видеша 
славу его, и оба мужа стояща с ним. 33 И 
бысть егда разлучистася от него, рече петр ко 
Иисусу: наставниче, добро есть нам зде быти: и 
сотворим сени три, едину тебе, и едину 
моисеови, и едину илии: не ведый еже 
глаголаше. 34 Се же ему глаголющу, бысть облак, 
и осени их: убояшася же, вшедшим им во 
облак. 35 И глас бысть из облака, глаголя: 
сей есть Сын мой возлюбленный, того послушайте. 36 
И егда бысть глас, обретеся Иисус един: и 
тии умолчаша, и никомуже возвестиша в тыя дни 
ничесоже от тех, яже видеша.

Конец преображению.

(за\ч 46) [31] 37 Бысть же в прочий день, 
сшедшим им*{Суббота 25 недели: Во время 
оно, сошедшу Иисусу*} с горы, срете его 
народ мног. 38 И се муж из народа возопи, 
глаголя: учителю, молю ти ся, призри на сына моего, 
яко единороден ми есть: 39 И се дух 
емлет его, и внезапу вопиет и 
@пружается@{@терзает его@} с пенами, и едва 
отходит от него, сокрушая его. 40 И молихся 
учеником твоим, да ижденут его: и не 
возмогоша. 41 Отвещав же Иисус рече: _о роде 
неверный и развращенный, доколе буду в вас, и 
терплю вы? приведи ми сына твоего семо. 42 Еще же 
грядущу ему, поверже его бес, и стрясе: 
запрети же Иисус духови нечистому, и исцели 
отрока, и (л. 116) вдаде его отцу его. 
(ср\де) 43 Дивляхуся же вси о величии Божии.

Конец субботе.

(за\ч 47) Всем же чудящимся о всех, 
яже творяше Иисус, рече ко учеником 
своим:*{Среда 22 недели: Рече Господь своим 
учеником:*} 44 Вложите вы во уши ваши 
словеса сия: Сын бо человеческий имать предатися в 
руце человечесте. 45 Они же не разумеша глагола 
сего, бе бо прикровен от них, да не ощутят 
его: и бояхуся вопросити его о глаголе сем. 
46 Вниде же помышление в них: кто их вящший бы 
был? 47 Иисус же ведый помышление сердец их, 
прием отроча, постави е у себе, 48 И рече 
им: иже аще. приимет сие отроча во имя мое, 
мене приемлет: и иже аще мене приемлет, 
приемлет пославшаго мя: иже бо меньший есть в 
вас, сей есть велик.

(за\ч 48) 49 Отвещав же 
иоанн,**{Четверток 22 недели: Во время 
оно, приступи ко Иисусу един от ученик его, 
и рече ему:**} рече: наставниче, видехом 
некоего о имени твоем изгоняща бесы, и 
возбранихом ему, яко во след не ходит с нами. 
50 И рече к нему Иисус, не браните: иже бо несть 
на вы, по вас есть.

Конец среде. (л. 116 об.)

(за\ч) 51 Бысть же, егда скончавахуся 
дние восхождению его,*{Сие святому убрусу: 
Во время оно, бысть егда скончавахуся дние 
восхождению Иисусову,*} и той утверди лице свое 
ити во иерусалим. 52 И посла вестники пред 
лицем своим: и изшедше внидоша в весь самарянску, 
яко да уготовят ему. 53 И не прияша его, 
яко лице его бе грядый во иерусалим. 54 
Видевша же ученика его иаков и иоанн, 
реста: Господи, хощеши ли, речема, да огнь снидет с 
Небесе, и потребит их, якоже и илиа сотвори? 
55 Обращся же запрети има, и рече: не веста, 
коего духа еста вы. 56 Сын бо человеческий не 
прииде душ человеческих погубити, но спасти: и 
идоша во ину весь.

Конец четвертку.

Преступи убрусу на зачало 52:

(за\ч 49) [33] 57 Бысть же идущим 
им**{Суббота 26 недели: Во время оно, 
идущу Иисусу**} по пути, рече некий к нему: 
иду по тебе, аможе аще идеши, Господи. 58 И рече 
ему Иисус: лиси язвины имут, и птицы Небесныя 
гнезда. Сын же человеческий не имать где главу 
подклонити. 59 Рече же ко другому: ходи в след 
мене. он же рече: Господи, повели ми шед прежде 
погребсти отца моего. 60 Рече же ему Иисус: 
остави мертвыя погребсти своя мертвецы: ты же шед 
возвещай Царствие Божие. 61 Рече же и другий: иду 
по тебе Господи: прежде же повели ми @отвещати ми ся 
(л. 117) иже суть@{@попроститися с сущими@} в дому 
моем. 62 Рече же к нему Иисус: никтоже возлож 
руку свою на рало, и зря вспять, управлен есть 
в Царствии Божии.

Конец субботе.

Глава 10.

(за\ч 50) [34] 1 По сих же яви Господь и 
инех седмьдесят,*{Пяток 22 недели: Во 
время оно, яви Господь и инех седмьдесят 
ученик своих,* Сие и апостолом.} и посла 
их по двема пред лицем своим, во всяк град и 
место, аможе хотяше сам ити. 2 Глаголаше же к 
ним: жатва убо многа, делателей же мало: 
молитеся убо господину жатве, да изведет 
делатели на жатву свою. 3 Идите: се аз посылаю 
вы яко агнцы посреде волков. 4 Не носите 
влагалища, ни пиры, ни сапоги: и никогоже на пути 
целуйте. 5 Воньже аще дом внидете, первее 
глаголите: мир дому сему. 6 И аще убо будет 
ту сын мира, почиет на нем мир ваш: аще ли же 
ни, к вам возвратится. 7 В том же дому 
пребывайте, ядуще и пиюще яже суть у них: 
достоин бо есть делатель мзды своея. не преходите 
из дому в дом. 8 И воньже аще град входите, 
и приемлют вы, ядите предлагаемая вам. 9 И 
исцелите недужныя, иже суть в нем, и глаголите 
им: приближися на вы Царствие Божие. 10 Воньже аще 
град входите, и не приемлют (л. 117 об.) вас, 
изшедше на распутия его, рцыте: 11 И прах 
прилепший нас от града вашего, оттрясаем вам: 
обаче сие ведите, яко приближися на вы Царствие 
Божие. 12 Глаголю вам, яко содомляном в день 
той отраднее будет, неже граду тому. 13 Горе 
тебе хоразине, горе тебе вифсаидо, яко аще в 
тире и сидоне быша силы были бывшия в ваю, 
древле убо во вретищи и пепеле седяще покаялися 
быша. 14 Обаче тиру и сидону отраднее будет на 
суде, неже вама. 15 И ты капернауме, иже до 
небес вознесыйся, до ада низведешися.

Конец пятку.

(за\ч 51) 16 *{Сие обще апостолом и 
ангелом: Рече Господь своим учеником:*} 
Слушаяй вас, мене слушает: и отметаяйся вас, 
мене отметается. отметаяйся же мене, отметается 
пославшаго мя. 17 Возвратишася же седмьдесят с 
радостию, глаголюще: Господи, и беси повинуются нам о 
имени твоем. 18 Рече же им: видех сатану 
яко молнию с небесе спадша.

(за\ч) 19 **{Суббота 27 недели: Рече 
Господь своим учеником:**} Се даю вам 
власть наступати на змию, и на скорпию, и на всю 
силу вражию: и ничесоже вас вредит. 20 Обаче о 
сем не радуйтеся, яко дуси вам повинуются: 
радуйтеся же, яко имена ваша написана суть на 
небесех. 21 В той час возрадовася Духом Иисус, и 
рече: исповедаю ти ся отче, Господи небесе и земли, 
яко утаил еси сия от премудрых и (л. 118) 
разумных, и открыл еси та младенцем: ей 
отче, яко тако бысть благоволение пред тобою.

Конец апостолом, и ангелом, и субботе.

Чти убрусу:

(за\ч 52) 22 И обращся ко учеником, 
рече:*{Понедельник 23 недели: Рече Господь 
своим учеником:*} Вся мне предана быша от 
отца моего: и никтоже весть кто есть Сын, 
токмо отец: и кто есть отец, токмо Сын, и 
емуже аще хощет Сын открыти. 23 И обращся ко 
учеником, @един@{@наедине@} рече: блажени 
очи видящии, яже видите. 24 Глаголю бо вам: 
яко мнози пророцы и царие восхотеша видети, 
яже вы видите, и не видеша: и слышати яже 
слышите, и не слышаша.

Конец понедельнику, и убрусу.

(за\ч 53) [35] 25 И се законник некий 
воста,**{Неделя 25: Во время оно, 
законник некий приступи ко Иисусу,**} искушая 
его, и глаголя: учителю, что сотворив живот 
вечный наследую? 26 Он же рече к нему: в 
законе что писано есть? како чтеши? 27 Он же 
отвещав рече: возлюбиши Господа Бога твоего от всего 
сердца твоего, и от всея души твоея, и всею 
крепостию твоею, и всем помышлением твоим: и 
ближняго своего, яко сам себе. 28 Рече же ему, 
право отвеща: сие сотвори, и жив будеши. 29 
Он же хотя (л. 118 об.) оправдитися сам, рече 
ко Иисусу: и кто есть ближний мой? [36] 30 
Отвещав же Иисус рече: человек некий схождаше 
от иерусалима во иерихон, и в разбойники впаде, 
иже совлекше его, и язвы возложше отидоша, 
оставльше еле жива суща. 31 По случаю же Священник 
некий схождаше путем тем: и видев его, 
мимоиде. 32 Такожде же и левит, быв на том 
месте, пришед и видев, мимоиде. 33 Самарянин же 
некто грядый, прииде над него, и видев его, 
милосердова: 34 И приступль обвяза струпы его, 
возливая масло и вино: всадив же его на свой 
скот приведе его в гостинницу, и прилежа ему. 
35 И наутрия изшед, изем два сребреника, даде 
гостиннику, и рече ему: прилежи ему, и еже 
аще прииждивеши, аз егда возвращуся, воздам ти. 
36 Кто убо от тех триех, ближний мнит ти ся 
быти впадшему в разбойники? 37 Он же рече: 
сотворивый милость с ним. рече же ему Иисус: 
иди, и ты твори такожде.

Конец недели.

(за\ч 54) [37] 38 Бысть же ходящим им, 
и сам вниде*{На вся праздники Богородицы: Во время 
оно, вниде Иисус*} в весь некую: жена же 
некая именем марфа прият его в дом свой. 39 
И сестра ей бе нарицаемая мариа, яже и седши 
при ногу Иисусову слышаше слово его. 40 Марфа же 
молвяше о мнозе службе, ставши же рече: Господи, не 
брежеши ли, яко сестра моя едину (л. 119) мя 
остави служити? рцы убо ей, да ми поможет. 41 
Отвещав же Иисус, рече ей: марфо, марфо, 
печешися, и молвиши о мнозе. 42 Едино же есть 
на потребу: мариа же благую часть избра, яже не 
отимется от нея.

Преступи Богородице на зачало 58.

Глава 11.

(за\ч 55) 1 И бысть внегда быти 
ему*{Вторник 23 недели: Во время оно, 
бысть внегда быти Иисусу*} на месте некоем 
молящуся, и яко преста, рече некий от ученик 
его к нему: Господи, научи ны молитися, якоже и 
иоанн научи ученики своя. [38] 2 Рече же им, 
егда молитеся, глаголите: отче наш, иже на 
Небесех! да святится имя твое: да приидет Царствие 
твое: да будет воля твоя, яко на Небеси, и на 
земли. 3 Хлеб наш насущный подавай нам на всяк 
день. 4 И остави нам грехи наша: ибо и сами 
оставляем всякому должнику нашему: и не введи нас 
во искушение, но избави нас от лукаваго. 5 И 
рече к ним: кто от вас имать друга, и идет к 
нему полунощи, и речет ему: друже, даждь ми 
взаим три хлебы. 6 Понеже друг прииде с пути ко 
мне, и не имам чесо предложити ему. 7 И той 
извнутрь отвещав речет: не твори ми труды: уже 
двери затворены суть, и дети моя со мною на ложи 
суть, и не могу (л. 119 об.) востав дати тебе. 8 
Глаголю же вам, аще и не даст ему востав, зане 
есть друг ему: но за безочьство его востав 
даст ему, елика требует.

(за\ч 56) 9 И аз вам 
глаголю:*{Среда 23 недели: Рече Господь своим 
учеником:*} просите и дастся вам: ищите и 
обрящете: толцыте и отверзется вам. 10 Всяк бо 
просяй приемлет, и ищяй обретает: и толкущему 
отверзется.

Конец вторнику.

11 Котораго же вас отца воспросит сын 
хлеба: еда камень подаст ему? или рыбы, еда 
к рыбы место змию подаст ему? 12 Или аще 
просит яица, еда подаст ему скорпию? 13 
Аще убо вы зли суще, умеете даяния блага 
даяти чадом вашим: кольми паче отец, иже с 
Небесе, даст Дух свят просящим у него.

Конец среде.

(за\ч 57) [39] 14 И 
бе**{Четверток 23 недели: Во время оно, 
бе Иисус**} изгоня беса, и той бе нем: 
бысть же бесу изшедшу, проглагола немый: и 
дивишася народи. 15 Нецыи же от них реша: о 
веелзевуле князе бесовстем изгонит бесы. 16 
Друзии же искушающе, знамения от него искаху с 
небесе. 17 Он же ведый помышления их, рече 
им: всяко царство само в себе разделяяся, 
запустеет: и дом на дом, падает. 18 Аще же и 
сатана сам в себе (л. 120) разделися, како станет 
Царство его? якоже глаголете, о веелзевуле 
изгоняща мя бесы. 19 Аще же аз о веелзевуле 
изгоню бесы, сынове ваши о ком изгонят? сего 
ради тии будут вам судии. 20 Аще ли же о персте 
Божии изгоню бесы, убо постиже на вас Царствие 
Божие. 21 Егда крепкий вооружився хранит свой 
двор, @во смирении@{@в мире@} суть имения его. 
22 Егда же креплей его нашед победит его, 
все оружие его возмет, на неже уповаше, и 
корысть его раздает.

(за\ч 58) 23 *{Пяток 23 недели: Рече 
Господь:*} Иже несть со мною, на мя есть: и 
иже не собирает со мною, расточает.

Конец четвертку.

24 Егда же нечистый дух изыдет от человека, 
преходит сквозе безводная места, ищя покоя, и не 
обретая, глаголет: возвращуся в дом мой, 
отнюдуже изыдох. 25 И пришед обрящет и 
пометен, и украшен. 26 Тогда идет и поймет 
седмь других духов горших себе, и вшедше живут 
ту. и бывают последняя человеку тому горша 
первых.

Конец пятку. Чти Богородице:

[40] 27 Бысть же егда глаголаше сия, воздвигши 
некая жена глас от народа, рече ему: блажено 
чрево носившее тя, и сосца яже еси ссал. 28 
Он же рече: (л. 120 об.) темже убо блажени 
слышащии слово Божие, и храняще е.

Конец Богородице.

(за\ч 59) [41] 29 Народом же собирающимся 
начат*{Понедельник 24 недели: Во время 
оно, народом собирающимся, начат Иисус*} 
глаголати: род сей лукав есть: знамения ищет, 
и знамение не дастся ему, токмо знамение ионы 
пророка. 30 Якоже бо бысть иона знамение 
ниневитом: тако будет и Сын человеческий роду 
сему. 31 Царица южская востанет на суд с мужи 
рода сего, и осудит их, яко прииде от конец 
земли слышати премудрость соломонову: и се множае 
соломона зде. 32 Мужие ниневитстии востанут на суд 
с родом сим, и осудят и, яко покаяшася 
проповедию иониною: и се множае ионы зде. 33 
Никтоже убо светильника вжег в скрове 
полагает, ни под спудом: но на свещнице, да 
входящии свет видят.

Конец понедельнику.

(за\ч 60) 34 **{Вторник 24 недели: 
Рече Господь:**} Светильник телу есть 
око, егда убо око твое просто будет, все 
тело твое светло будет: егда же лукаво будет, 
и тело твое темно. 35 Блюди убо, еда свет, 
иже в тебе, тма есть? 36 Аще бо тело твое 
все светло, не имый некия (л. 121) части темны: 
будет светло все, яко се егда светильник 
блистанием просвещает тя. [42] 37 Егда же 
глаголаше, моляше его фарисей некий, да обедует 
у него: вшед же возлеже. 38 Фарисей же видев 
дивися, яко @не прежде крестися@{@не первее 
умыся@} первее обеда. 39 Рече же Господь к нему: 
ныне вы фарисее, внешняя сткляницы и блюда 
очищаете: внутреннее же ваше полно грабления есть 
и лукавства. 40 Безумнии, не иже ли сотвори внешнее, 
и внутреннее сотворил есть? 41 Обаче в сущих 
дадите милостыню, и се вся чиста вам будут.

Конец вторнику.

(за\ч 61) 42 Но горе вам*{Среда 
24 недели: Рече Господь ко пришедшим к нему 
иудеом: горе вам*} фарисеом, яко 
одесятствуете от мятвы и пигана, и всякаго зелия, 
и мимоходите суд и любве Божия. сия же подобаше 
сотворити, и онех не оставляти. 43 Горе вам 
фарисеом, яко любите председания на сонмищех, и 
целования на торжищех. 44 Горе вам книжницы и 
фарисее лицемери, яко есте яко гроби 
неведоми, и человецы ходящии верху, не ведят. 
[43] 46 Отвещав же некий от законник рече 
ему: учителю, сия глаголя и нам досаждаеши. 47 
Он же рече: и вам законником горе, яко 
накладаете на человеки бремена не удобь носима, и 
сами единем перстом вашим не прикасаетеся 
бременем.

Конец среде. (л. 121 об.)

(за\ч 62) 47 Горе вам,*{Четверток 
24 недели: Рече Господь ко пришедшим к нему 
иудеом: горе вам книжницы и фарисее,*} яко 
зиждете гробы пророк, отцы же ваши избиша их: 
48 Убо свидетельствуете и сблаговолите делом 
отец ваших: яко тии убо избиша их, вы 
же зиждете их гробы. 49 Сего ради и премудрость 
Божия рече: послю *в них*{*к ним*} пророки и 
апостолы, и от них убиют и изженут. 50 Да 
взыщется кровь всех пророк, пролибаемая от 
сложения мира, от рода сего, 51 От крове авеля, до 
крове захарии, погибшаго между олтарем и храмом. 
ей, глаголю вам: взыщется от рода сего. 52 Горе 
вам законником, яко взясте ключь разумения, сами 
не внидосте, и входящим возбранисте. 53 Глаголющу же 
ему сия к ним, начаша книжницы и фарисее 
@бедне@{@зело@} гневатися нань, и 
*престати*{*вопрошати*} его о мнозе, 54 **Лающе 
его**{**Наветующе нань**}, ищуще уловити нечто 
от уст его, да нань возглаголют.

Глава 12.

1 @О нихже@{@Между тем@} собравшимся тмам 
народа, яко попирати друг друга, начат глаголати 
учеником своим первее: [44] внемлите себе от 
кваса фарисейска, еже есть лицемерие.

Конец четвертку.

(за\ч 63) 2 Ничтоже бо**{Пяток 24 
недели: Рече Господь: ничтоже** Сие же и святому 
георгию на утрени.} покровено есть, еже не 
открыется: и тайно, еже не разумеется. 3 Зане, 
елика во (л. 122) тме ресте, во свете 
услышится: и еже ко уху глаголасте во 
храмех, проповестся на кровех. 4 Глаголю же вам 
другом своим: не убойтеся от убивающих тело, 
и потом не могущих лишше что сотворити. 5 Сказую 
же вам, кого убойтеся: убойтеся имущаго власть 
по убиении воврещи в дебрь огненную: ей 
глаголю вам, того убойтеся. 6 Не пять ли птиц 
ценится пенязема двема? и ни едина от них 
несть забвена пред Богом. 7 Но и власи главы 
вашея вси изочтени суть. не убойтеся убо: 
мнозех птиц унши есте вы.

(за\ч 64) 8 Глаголю же 
вам:*{Ноемвриа 6, святому павлу исповеднику: 
Рече Господь:*} всяк иже аще исповесть мя 
пред человеки, и Сын человеческий исповесть 
его пред ангелы Божиими. 9 А отвергийся мене 
пред человеки, отвержен будет пред ангелы 
Божиими. 10 И всяк иже речет слово на Сына 
человеческаго, оставится ему: а на святаго Духа 
хулившему не оставится. 11 Егда же приведут вы на 
соборища и власти, и владычества, не пецытеся, како 
или что отвещаете, или что речете: 12 Святый бо 
Дух научит вы в той час, яже подобает рещи.

Конец пятку и святому.

(за\ч 65) [45] 13 Рече 
же**{Понедельник 25 недели: Во время оно, 
учащу Иисусу, рече**} ему некий от народа: 
учителю, рцы брату моему разделити со мною 
достояние. 14 Он же рече ему: человече, кто мя 
постави судию, или (л. 122 об.) делителя над 
вами? 15 Рече же к ним: блюдите, и хранитеся от 
лихоимства: яко @не от избытка@{@внегда 
избыточествовати@} кому живот его есть от 
имения его.

Преступи понедельнику.

(за\ч 66) [46] 16 Рече же притчу к 
ним, глаголя:*{Неделя 26: Рече Господь притчу 
сию:*} человеку некоему богату угобзися нива. 
17 И мысляше в себе, глаголя: что сотворю, яко 
не имам где собрати плодов моих? 18 И рече: 
се сотворю, разорю житницы моя, и большия созижду, 
и соберу ту вся жита моя, и благая моя. 19 И 
реку души моей: душе, имаши многа блага, лежаща на 
лета многа: почивай, яждь, пий, веселися. 20 Рече 
же ему Бог: безумне, в сию нощь душу твою 
истяжут от тебе: а яже уготовал еси, кому 
будут? 21 Тако собираяй себе, а не в Бога 
богатея.

Конец недели.

22 Рече же ко учеником своим:

Чти понедельнику:

сего ради глаголю вам, не пецытеся душею вашею, 
что ясте: ни телом, во что облечетеся. 23 Душа 
больши есть пищи, и тело одежды. 24 Смотрите 
вран, яко не сеют, ни жнут, имже несть 
сокровища, ни житницы, и Бог питает их. кольми 
паче вы есте лучши птиц? 25 Кто же от вас (л. 
123) пекийся, может приложити возрасту своему лакоть 
един? 26 Аще убо ни мала чесо можете, что о 
прочих печетеся? 27 Смотрите крины, како растут: не 
труждаются, ни прядут. глаголю же вам, яко ни 
соломон во всей славе своей облечеся, яко 
един от сих. 28 Аще же траву на селе днесь 
сущу, и утре в пещь вмещему, Бог тако одеет, 
кольми паче вас, маловери? 29 И вы не ищите что 
ясте, или что пиете: и не возноситеся. 30 Всех 
бо сих языцы мира сего ищут: ваш же отец 
весть, яко требуете сих. 31 Обаче ищите 
Царствия Божия, и сия вся приложатся вам.

Конец понедельнику.

(за\ч 67) 32 *{Суббота 28 недели: 
Рече Господь:*} Не бойся малое стадо: яко 
благоизволи отец ваш дати вам Царство. 33 
Продадите имения ваша, и дадите милостыня. 
сотворите себе влагалища неветшающа, сокровище 
неоскудеемо на небесех: идеже тать не 
приближается, ни моль растлевает. 34 Идеже бо 
есть сокровище ваше, ту и сердце ваше будет. 35 
Да будут чресла ваша препоясана, и светильницы 
горящии: 36 И вы подобни человеком чающим Господа 
своего, когда возвратится от брак, да пришедшу и 
толкнувшу, абие отверзут ему. 37 Блажени раби 
тии, ихже пришед Господь обрящет бдящя. аминь 
глаголю вам, яко препояшется, и посадит их: и 
@минув@{@приступив@} послужит им. 38 И аще (л. 
123 об.) приидет во вторую стражу, любо в третию 
стражу приидет, и обрящет их тако: блажени суть 
раби тии. 39 Се же ведите, яко аще бы ведал 
господин храмины, в кий час тать приидет, бдел 
убо бы, и не бы дал подкопати дому своего. 40 И 
вы убо будите готови: яко воньже час не мните, 
Сын человеческий приидет.

Конец субботе.

41 Рече же ему петр: Господи, к нам ли притчу 
сию глаголеши, или ко всем? 42 Рече же Господь:

(за\ч 68) *{Вторник 25 недели: 
Рече Господь:*} Кто убо есть верный 
строитель и мудрый, егоже поставит Господь над 
челядию своею, даяти во время житомерие? 43 Блажен 
раб той, егоже пришед Господь его обрящет 
творяща тако. 44 Воистинну глаголю вам, яко над 
всем имением своим поставит его. 45 Аще ли 
же речет раб той в сердцы своем: коснит 
господин мой приити, и начнет бити рабы и рабыни, 
ясти же и пити, и упиватися: 46 Приидет 
господин раба того в день, воньже не чает, и в 
час воньже не весть: и протешет его, и часть 
его с неверными положит. 47 Той же раб 
ведевый волю господина своего, и не уготовав, ни 
сотворив по воли его, биен будет много. 48 Не 
ведевый же, сотворив же достойная ранам, биен 
будет мало. (л. 124)

(за\ч 69) Всякому же,*{Среда 25 
недели: Рече Господь: всякому*} емуже дано 
будет много, много взыщется от него: и емуже 
предаша множайше, множайше @просят@{@истяжут@} от 
него.

Конец вторнику.

49 Огня приидох воврещи на землю, и что хощу, 
аще уже возгореся? 50 Крещением же имам 
Креститися, и како удержуся, дондеже скончаются? 
51 Мните ли, яко мира приидох дати на землю? ни, 
глаголю вам, но разделения. 52 Будут бо отселе 
пять во едином дому разделены: трие на два, и 
два на три. 53 Разделится отец на сына, и сын 
на отца: мати на дщерь, и дщи на матерь: свекры на 
невесту свою, и невеста на свекровь свою. 54 
Глаголаше же и народом: егда узрите облак 
восходящ от запада, абие глаголете: туча грядет, 
и бывает тако. 55 И егда юг веющ, 
глаголете: зной будет, и бывает. 56 Лицемери, 
лице небу и земли весте искушати: времене же сего 
како не искушаете? 57 Что же и о себе не судите 
праведное? 58 Егда бо грядеши с соперником твоим 
ко князю, на пути *даждь делание*{*потщися*} избыти 
от него: да не како привлечет тебе к судии, и 
судия тя предаст слузе, и слуга всадит тя в 
темницу. 59 Глаголю тебе: не изыдеши оттуду, 
дондеже и последнюю медницу воздаси.

Конец среде. (л. 124 об.)

Глава 13.

(за\ч 70) [47] 1 Приидоша же нецыи в то 
время,*{Четверток 25 недели: Во время 
оно, приидоша нецыи ко Иисусови*} поведающе 
ему о галилеех, ихже кровь пилат смеси с 
жертвами их. 2 И отвещав Иисус рече им: 
мните ли, яко галилеане сии грешнейши паче всех 
галилеан бяху, яко тако пострадаша? 3 Ни, глаголю 
вам: но аще не покаетеся, вси такожде погибнете. 4 
Или они осмьнадесяте, на нихже паде столп 
силоамский, и поби их, мните ли, яко тии 
должнейши бяху паче всех живущих во иерусалиме? 
5 Ни, глаголю вам: но аще не покаетеся, вси 
такожде погибнете. 6 Глаголаше же сию притчу: 
смоковницу имяше некий в винограде своем 
всаждену, и прииде ищя плода на ней, и не обрете. 
7 Рече же к винареви: се третие лето, отнелиже 
прихожду, ищя плода на смоковнице сей, и не 
обретаю: посецы ю убо, вскую и землю 
упражняет? 8 Он же отвещав, рече ему: 
Господи, остави ю и се лето, дондеже окопаю 
окрест ея, и осыплю гноем. 9 И аще убо 
сотворит плод: аще ли же ни, во грядущее посечеши 
ю.

Конец четвертку.

(за\ч 71) [48] 10 Бяше же 
учя**{Неделя 27: Во время оно, бе 
учя Иисус**} на едином от сонмищ в 
субботу. 11 И се жена бе имущи дух недужен 
лет осмьнадесять, и бе слука: и не могущи (л. 
125) восклонитися отнюд. 12 Видев же ю Иисус, 
пригласи, и рече ей: жено, отпущена еси от 
недуга твоего. 13 И возложи на ню руце: и абие 
простреся, и славляше Бога. 14 Отвещав же 
старейшина собору, негодуя, зане в субботу исцели 
ю Иисус, глаголаше народу: шесть дний есть, в 
няже достоит делати, в тыя убо приходяще 
целитеся, а не в день субботный. 15 Отвещав же 
убо ему Господь, и рече: лицемере, кождо вас в 
субботу не отрешает ли своего вола, или осла от 
яслий, и вед напаяет? 16 Сию же дщерь авраамлю 
сущу, юже связа сатана се осмоенадесяте лето, не 
достояше ли разрешитися ей от юзы сея в день 
субботный? 17 И сия ему глаголющу, стыдяхуся вси 
противляющиися ему: и вси людие радовахуся о 
всех славных бывающих от него.

Конец недели.

(за\ч 72) [49] 18 Глаголаше 
же:*{Суббота 29 недели: Рече Господь притчу 
сию:* Сие же и пред Рождеством Христовым 
суббота.} кому подобно есть Царствие Божие? и кому 
уподоблю е? 19 Подобно есть зерну горушну, 
еже прием человек вверже в вертоград свой: и 
возрасте, и бысть древо велие, и птицы небесныя 
вселишася в ветвия его. 20 Паки рече: кому 
уподоблю Царствие Божие? 21 Подобно есть квасу, 
еже приемши жена, скры в муце сата три, дондеже 
вскисе все. 22 И прохождаше сквозе грады и веси 
учя, и шествие (л. 125 об.) творя во иерусалим. 
[50] 23 Рече же некий ему: Господи, аще мало есть 
спасающихся? он же рече к ним: 24 Подвизайтеся 
внити сквозе тесная врата: яко мнози, глаголю 
вам, взыщут внити, и не возмогут. 25 Отнелиже 
востанет дому Владыка, и затворит двери, и начнете 
вне стояти, и ударяти в двери, глаголюще: Господи, 
Господи, отверзи нам. и отвещав речет вам: не 
вем вас, откуду есте. 26 Тогда начнете 
глаголати: ядохом пред тобою и пихом, и на 
распутиях наших учил еси. 27 И речет, 
глаголю вам: не вем вас, откуду есте, 
отступите от мене вси делателие неправды. 28 Ту 
будет плачь и скрежет зубом: егда узрите 
авраама, и исаака, и иакова, и вся пророки во 
Царствии Божии, вас же изгонимых вон. 29 И 
приидут от восток, и запад, и севера, и юга, 
и возлягут в Царствии Божии.

Конец субботам.

30 И се суть последнии, иже будут перви: и 
суть первии, иже будут последни.

(за\ч 73) [51] 31 В той день 
приступиша*{Пяток 25 недели: Во время 
оно, приступиша ко Иисусу*} нецыи от фарисей, 
глаголюще ему: изыди, и иди отсюду, яко 
ирод хощет тя убити. 32 И рече им: шедше 
рцыте лису тому, се изгоню бесы, и исцеления 
творю днесь и утре, и в третий скончаю. 33 
Обаче подобает ми днесь и утре, и в ближний 
ити, яко (л. 126) не возможно есть пророку 
погибнути кроме иерусалима. 34 Иерусалиме 
иерусалиме, избивый пророки, и камением побивая 
посланныя к тебе: колькраты восхотех собрати чада 
твоя, якоже кокош гнездо свое под криле, и не 
восхотесте! 35 Се оставляется вам дом ваш 
пуст. глаголю же вам, яко не имате мене видети, 
дондеже приидет, егда речете: Благословен грядый 
во имя Господне.

Конец пятку.

Глава 14.

(за\ч 74) [52] 1 И бысть егда внити 
ему*{Суббота 30 недели: Во время оно, 
вниде Иисус*} в дом некоего князя фарисейска, 
в субботу хлеб ясти: и тии бяху назирающе 
его. 2 И се человек некий, имый водный труд, 
бе пред ним. 3 И отвещав Иисус рече к 
законником и фарисеом, глаголя: аще достоит в 
субботу целити? 4 Они же умолчаша: и прием 
исцели его, и отпусти. 5 И отвещав к ним, 
рече: котораго от вас осел, или вол, в 
студенец впадет, и не абие ли исторгнет его в 
день субботный? 6 И не возмогоша отвещати ему к 
сим. [53] 7 Глаголаше же к званным притчу, 
@обдержя@{@внимая@}, како председания избираху, 
глаголя к ним: 8 Егда зван будеши ким на 
брак, не сяди на преднем месте: еда кто 
честнее тебе будет званных: 9 И пришед иже 
тебе звавый и онаго, речет ти: даждь сему (л. 
126 об.) место: и тогда начнеши со студом 
последнее место держати. 10 Но егда зван будеши, 
шед сяди на последнем месте: да егда приидет 
звавый тя, речет ти: друже, посяди выше: тогда 
будет ти слава пред званными с тобою. 11 Яко 
всяк возносяйся, смирится: и смиряяйся, вознесется.

Конец субботе.

(за\ч 75) 12 Глаголаше же 
и*{Понедельник 26 недели: Во время оно, 
вниде Иисус в дом некоего князя фарисейска в день 
субботный снести хлеб, и глаголаше*} ко 
звавшему его: егда сотвориши обед, или 
вечерю, не зови другов твоих, ни братии твоея, ни 
сродник твоих, ни сосед богатых: еда когда и 
тии тя такожде воззовут, и будет ти воздаяние. 
13 Но егда твориши пир, зови нищия, маломощи, 
хромыя, слепыя: 14 И блажен будеши, яко не 
имут ти что воздати: воздаст же ти ся в 
воскрешение праведных. 15 Слышав же некий от 
возлежащих с ним сия, рече ему: блажен, иже 
снесть обед в Царствии Божии.

Конец понедельнику.

(за\ч 76) [54] 16 Он же рече 
ему:**{Неделя 28: Рече Господь притчу 
сию:** Сие же и в неделю праотцев.} человек 
некий сотвори вечерю велию, и зва многи. 17 И 
посла раба своего в год вечери, рещи званным: 
грядите, яко уже готова (л. 127) суть вся. 18 
И начаша вкупе отрицатися вси. первый рече ему: 
село купих, и имам нужду изыти, и видети е: 
молю ти ся, имей мя отречена. 19 И другий рече: 
супруг воловных купих пять, и гряду искусити 
их: молю тя, имей мя отречена. 20 И другий 
рече: жену поях, и сего ради не могу приити. 21 И 
пришед раб той, поведа господину своему сия. 
тогда разгневався дому владыка, рече рабу своему: 
изыди скоро на распутия и стогны града, и нищия, и 
бедныя, и слепыя, и хромыя введи семо. 22 И 
рече раб: Господи, бысть якоже повеле, и еще 
место есть. 23 И рече господин к рабу: изыди 
на пути и халуги, и убеди внити, да наполнится 
дом мой. 24 Глаголю бо вам: яко ни един мужей 
тех званных вкусит моея вечери: мнози бо суть 
звани, мало же избранных.

Конец недели.

(за\ч 77) 25 Идяху же с 
ним*{Вторник 26 недели: Во время оно, 
идяху со Иисусом*} народи мнози, и обращся рече 
к ним: 26 Аще кто грядет ко мне, и не 
возненавидит отца своего, и матерь, и жену, и 
чад, и братию, и сестр, еще же и душу свою, не 
может мой быти ученик. 27 И иже не носит 
Креста своего, и в след мене грядет, не может 
мой быти ученик. [55] 28 Кто бо от вас, хотяй 
столп создати, не прежде ли сед разчтет имение, 
аще имать еже есть на совершение: 29 Да не 
когда (л. 127 об.) положит основание, и не 
возможет совершити, вси видящии начнут ругатися 
ему, 30 Глаголюще: яко сей человек начат 
здати, и не може совершити. 31 Или кий царь идый 
ко иному царю снитися с ним на брань, не сед ли 
прежде совещавает, аще силен есть срестися с 
десятию тысящ, грядущаго со двемадесятма тысящама 
нань? 32 Аще ли же ни, еще далече ему сущу, 
моление послав, молится о смирении. 33 Тако убо 
всяк от вас, иже не отречется всего своего 
имения, не может быти мой ученик. 34 Добро 
есть соль: аще же соль обуяет, в чем 
осолится? 35 Ни в земли, ни в гнои требует: вон 
изсыплют ю. имеяй уши слышати, да слышит.

Конец вторнику.

Глава 15.

(за\ч 78) 1 Бяху же приближающеся 
ему*{Среда 26, недели: Во время оно, 
бяху приближающеся Иисусу*} вси мытарие и 
грешницы, послушати его. 2 И роптаху фарисее и 
книжницы, глаголюще: яко сей грешники приемлет, и 
с ними яст. [56] 3 Рече же к ним притчу сию, 
глаголя: 4 Кий человек от вас имый сто овец, 
и погубль едину от них, не оставит ли 
девятидесят и девяти в пустыни, и идет в след 
погибшия, дондеже обрящет ю? 5 И обрет, 
возлагает на раме свои радуяся. 6 И пришед в 
дом, созывает други и соседы, (л. 128) глаголя 
им: радуйтеся со мною, яко обретох овцу мою 
погибшую. 7 Глаголю вам: яко тако радость будет 
на небеси о едином грешнице кающемся, нежели о 
девятидесятих и девяти праведник, иже не требуют 
покаяния. 8 Или кая жена имущи десять драхм, 
аще погубит драхму едину, не вжигает ли 
светильника, и пометет храмину, и ищет прилежно, 
дондеже обрящет? 9 И обретши, созывает другини 
и соседы, глаголющи: радуйтеся со мною, яко 
обретох драхму погибшую. 10 Тако, глаголю вам, 
радость бывает пред ангелы Божиими о едином 
грешнице кающемся.

Конец среде.

(за\ч 79) [57] 11 Рече же:*{Неделя 
34 о блуднем: Рече Господь притчу сию:*} 
человек некий име два сына. 12 И рече 
юнейший @ею@{@от них@} отцу: отче, даждь ми 
достойную часть имения. и раздели има имение. 
13 И не по мнозех днех собрав все мний сын, 
отиде на страну далече, и ту расточи имение свое, 
живый блудно. 14 Изжившу же ему все, бысть глад 
крепок на стране той: и той начат лишатися. 15 
И шед прилепися единому от житель тоя страны: 
и посла его на села своя пасти свиния. 16 И 
желаше насытити чрево свое от рожец, яже ядяху 
свиния: и никтоже даяше ему. 17 В себе же 
пришед, рече: колико наемником отца моего 
избывают (л. 128 об.) хлебы, аз же гладом 
гиблю. 18 Востав иду ко отцу моему, и реку 
ему: отче согреших на небо, и пред тобою, 19 
И уже несмь достоин нарещися сын твой: сотвори 
мя яко единаго от наемник твоих. 20 И востав 
иде ко отцу своему. еще же ему далече сущу, 
узре его отец его, и мил ему бысть: и 
тек нападе на выю его, и облобыза его. 21 
Рече же ему сын: отче, согреших на небо, и 
пред тобою, и уже несмь достоин нарещися сын 
твой. 22 Рече же отец к рабом своим: изнесите 
одежду первую, и облецыте его, и дадите 
перстень на руку его, и сапоги на нозе: 23 И 
приведше телец упитенный, заколите, и ядше 
веселимся. 24 Яко сын мой сей мертв бе, и 
оживе: и изгибл бе, и обретеся. и начаша 
веселитися. 25 Бе же сын его старей на селе: 
и яко грядый приближися к дому, слыша пение и 
лики. 26 И призвав единаго от отрок, 
вопрошаше: что убо сия суть? 27 Он же рече 
ему: яко брат твой прииде, и закла отец 
твой телец упитенный, яко здрава его прият. 
28 Разгневався же и не хотяше внити. отец же 
его изшед, моляше его. 29 Он же отвещав, 
рече отцу: се толико лет работаю тебе, и 
николиже заповеди твоя преступих, и мне николиже 
дал еси козляте, да со други своими возвеселился 
бых. 30 Егда же сын твой сей, изедый твое 
имение с любодейцами, прииде, закла ему телец 
питомый. 31 Он же рече ему: чадо, ты всегда со 
мною еси, и вся моя твоя (л. 129) суть. 32 
Возвеселити же ся и возрадовати подобаше, яко брат 
твой сей мертв бе и оживе: и изгибл бе, и 
обретеся.

Конец недели.

Глава 16.

(за\ч 80) [58] 1 Глаголаше же ко 
учеником своим:*{Четверток 26 недели: 
Рече Господь притчу сию:*} человек некий бе 
богат, иже имяше приставника: и той оклеветан 
бысть к нему, яко расточает имения его. 2 И 
пригласив его, рече ему: что се слышу о тебе? 
воздаждь ответ о приставлении домовнем: не 
возможеши бо ктому дому строити. 3 Рече же в себе 
приставник дому: что сотворю, яко Господь мой 
отемлет строение дому от мене? копати не могу, 
просити стыжуся. 4 Разумех, что сотворю: да егда 
отставлен буду от строения дому, приимут мя в 
домы своя. 5 И призвав единаго когождо должник 
Господина своего, глаголаше первому: колицем должен 
еси Господину моему? 6 Он же рече: сто @мер@{в 
греч. @ватос@} масла. и рече ему: приими писание 
твое, и сед скоро напиши пятьдесят. 7 Потом же 
рече другому: ты же колицем должен еси? он же 
рече: сто мер пшеницы. и глагола ему: приими 
писание твое, и напиши осмьдесят. 8 И похвали 
Господь дому строителя неправеднаго, яко мудре 
сотвори. яко сынове века сего мудрейши, паче 
сынов света в (л. 129 об.) роде своем суть. 9 
И аз вам глаголю: сотворите себе други от 
мамоны неправды, да егда оскудеете, приимут вы в 
вечныя кровы.

Конец четвертку.

(за\ч 81) 10 *{Суббота 31 недели: 
Рече Господь:*} Верный в мале, и во мнозе 
верен есть: и неправедный в мале, и во мнозе 
неправеден есть. 11 Аще убо в неправеднем 
имении верни не бысте, во истиннем кто вам 
веру имет? 12 И аще в чужем верни не бысте, 
ваше кто вам даст? 13 Никийже раб может двема 
Господинома работати: любо единаго возненавидит, а 
другаго возлюбит: или единаго держится, о 
друзем же нерадети начнет. не можете Богу работати 
и мамоне. 14 Слышаху же сия вся и фарисее, 
сребролюбцы суще, ругахуся ему. 15 И рече им:

(за\ч 82) **{Пяток 26 недели: Рече 
Господь ко пришедшим к нему иудеом:**} Вы 
есте оправдающе себе пред человеки: Бог же 
весть сердца ваша: яко еже есть в 
человецех высоко, мерзость есть пред Богом.

Конец субботе.

16 Закон и пророцы до иоанна: оттоле Царствие 
Божие Благовествуется, и всяк в не @нудится@{@с 
нуждею входит@}. 17 Удобее же есть Небу и 
земли прейти, неже от закона единой черте 
погибнути. 18 Всяк пущаяй жену свою, и приводя 
ину, прелюбы деет: и женяйся пущеною от мужа, 
прелюбы творит. (л. 130)

Преступи пятку.

(за\ч 83) [59] 19 Человек 
же*{Неделя 22: Рече Господь притчу сию: 
человек*} некий бе богат, и облачашеся в 
порфиру и виссон, веселяся на вся дни светло. 20 
Нищ же бе некто, именем лазарь, иже лежаше 
пред враты его гноен. 21 И желаше насытитися от 
крупиц падающих от трапезы богатаго: но и пси 
приходяще облизаху гной его. 22 Бысть же умрети 
нищему, и несену быти ангелы на лоно авраамле: 
умре же и богатый, и погребоша его. 23 И во 
аде возвед очи свои, сый в муках, узре 
авраама издалеча, и лазаря на лоне его. 24 И 
той возглашь, и рече: отче аврааме, помилуй мя, 
и посли лазаря, да омочит конец перста своего в 
воде, и устудит язык мой, яко стражду во 
пламени сем. 25 Рече же авраам: чадо, помяни, 
яко восприял еси благая твоя в животе твоем, 
и лазарь такоже злая: ныне же зде утешается, 
ты же страждеши. 26 И над всеми сими, между нами 
и вами пропасть велика утвердися, яко да хотящии 
прейти отсюду к вам, не возмогут, ни иже оттуду 
к нам преходят. 27 Рече же: молю тя убо отче, 
да послеши его в дом отца моего. 28 Имам бо 
пять братия, яко да засвидетельствует им, да не 
и тии приидут на место сие мучения. 29 Глагола 
ему авраам: имут моисеа и пророки, да 
послушают их. 30 Он же рече: ни, (л. 130 об.) 
отче аврааме, но аще кто от мертвых идет к 
ним, покаются. 31 Рече же ему: аще моисеа и 
пророки не послушают, ни аще кто от мертвых 
воскреснет, не имут веры.

Конец недели. Чти пятку:

Глава 17.

1 Рече же ко учеником своим: не возможно 
есть не приити соблазном, горе же егоже ради 
приходит. 2 Унее ему было бы, аще жернов 
осельский облежал бы о выи его, и ввержен в 
море, неже да соблазнит малых сих единаго.

(за\ч 84) 3 *{Суббота 32 недели: Рече 
Господь:*} Внемлите себе: аще согрешит к 
тебе брат твой, запрети ему: и аще покается, 
остави ему: 4 И аще седмищи на день согрешит 
к тебе, и седмищи на день обратится, глаголя: 
каюся: остави ему.

Конец пятку.

5 И рекоша апостоли Господеви, приложи нам веру. 
6 Рече же Господь: аще бысте имели веру, яко 
зерно горушно, глаголали бысте убо ягодичине 
сей: восторгнися, и всадися в море: и послушала бы 
вас. 7 Который же от вас, раб имея орющ или 
пасущ, иже пришедшу ему с села речет абие: 
@минув@{@пришед@} возлязи. 8 Но не речет ли ему: 
уготовай что (л. 131) вечеряю, и препоясався служи 
ми, дондеже ям и пию, и потом яси, и пиеши 
ты? 9 Еда @имать хвалу@{@благодарит@} рабу тому, 
яко сотвори повеленная? не мню. 10 Тако и вы, 
егда сотворите вся повеленная вам, глаголите, 
яко раби неключими есмы: яко еже должни 
бехом сотворити, сотворихом.

Конец субботе.

11 И бысть идущу ему во иерусалим, и той 
прохождаше между самариею и галилеею.

(за\ч 85) [60] 12 Входящу же 
ему*{Неделя 29: Во время оно, входящу 
Иисусови*} в некую весь, сретоша его десять 
прокаженных мужей, иже сташа издалеча. 13 И тии 
вознесоша глас, глаголюще: Иисусе наставниче, помилуй 
ны. 14 И видев рече им: шедше покажитеся 
Священником. и бысть идущим им, очистишася. 15 
Един же от них видев, яко исцеле, 
возвратися, со гласом велиим славя Бога. 16 И паде 
ниц при ногу его, хвалу ему воздая: и той бе 
самарянин. 17 Отвещав же Иисус рече: не десять ли 
очистишася, да девять где? 18 Како не обретошася, 
возвращшеся дати славу Богу, токмо иноплеменник сей? 
19 И рече ему: востав, иди, вера твоя спасе 
тя.

Конец недели.

(за\ч 86) 20 Вопрошен же 
быв**{Понедельник 27 недели: Во время 
оно, вопрошен быв Иисус**} от фарисей: когда 
приидет Царствие Божие? отвещав им, рече: не 
приидет (л. 131 об.) Царствие Божие @с 
соблюдением@{@со усмотрением@}. 21 Ниже рекут: 
се зде, или онде: се бо Царствие Божие внутрь 
вас есть. 22 Рече же ко учеником своим: 
приидут дние, егда вожделеете единаго дне Сына 
человеческаго видети, и не узрите. 22 И рекут 
вам: се зде, се онде: не изыдите, ни пожените. 
23 Яко бо молнии блистающися от подНебесныя, на 
подНебесней светится: тако будет Сын человеческий в 
день свой. 25 Прежде же подобает ему много 
пострадати, и *искушену*{*отвержену*} быти от рода 
сего.

Конец понедельнику.

(за\ч 87) 26 И якоже*{Вторник 27 
недели: Рече Господь: якоже*} бысть во дни 
ноевы, тако будет и во дни Сына человеческа. 27 
Ядяху, пияху, женяхуся, посягаху: до негоже дне 
вниде ное в ковчег: и прииде потоп, и погуби 
вся. 28 Такожде и якоже бысть во дни лотовы: 
ядяху, пияху, куповаху, продаяху, саждаху, здаху: 
29 Воньже день изыде лот от содомлян, одожди 
камы горящя, и огнь с небесе, и погуби вся. 30 По 
тому же будет и в день, воньже Сын человеческий 
явится. 31 В той день, иже будет на крове, и 
сосуди его в дому, да не слазит взяти их: и 
иже на селе, такожде да не возвратится вспять. 32 
Поминайте жену лотову. 33 Иже аще взыщет душу 
свою спасти, погубит ю: и иже аще погубит ю, 
живит ю. 34 Глаголю вам: в ту нощь будета два 
на одре едином: един (л. 132) поемлется, а 
другий оставляется. 35 Будете две вкупе мелюще: 
едина поемлется, а другая оставляется. 36 Два 
будета на селе: един поемлется, а другий 
оставляется. 37 И отвещавше глаголаша ему: где 
Господи? он же рече им: идеже тело, тамо 
соберутся и орли.

Конец вторнику.

Глава 18.

1 Глаголаше же и притчу к ним, како 
подобает всегда молитися, и не стужати си, 2 
Глаголя:

(за\ч 88) [61] *{Суббота 33 недели: 
Рече Господь притчу сию:*} Судия бе некий в 
некоем граде, Бога не бояся, и человек не 
срамляяся. 3 Вдова же некая бе во граде том, и 
прихождаше к нему, глаголющи: отмсти мене от 
соперника моего. 4 И не хотяше на долзе времени. 
последи же рече в себе: аще и Бога не боюся, и 
человек не срамляюся: 5 Но зане творит ми труды 
вдовица сия, да отмщу ея: да не до конца приходящи, 
@застоит@{@трудит@} мене. 6 Рече же Господь: слышите, 
что судия неправды глаголет? 7 Бог же не имать ли 
сотворити отмщение избранных своих, вопиющих к 
нему день и нощь, и долготерпя о них? 8 Глаголю 
вам, яко сотворит отмщение их вскоре.

Конец субботе. (л. 132 об.)

обаче Сын человеческий пришед, убо 
обрящет ли си веру на земли? 9 Рече же и ко 
другим уповающим собою, яко суть праведницы, 
и уничижающим прочих, притчу сию:

(за\ч 89) [62] 10 *{Неделя 33 о 
мытари и фарисеи: Рече Господь притчу сию:*} 
Человека два внидоста в церковь помолитися: 
един фарисей, а другий мытарь. 11 Фарисей же 
став сице в себе моляшеся: Боже, хвалу тебе 
воздаю, яко несмь якоже прочии человецы, 
хищницы, неправедницы, прелюбодее, или якоже сей 
мытарь. 12 Пощуся двакраты в субботу, десятину даю 
всего елико притяжу. 13 Мытарь же издалеча стоя, 
и не хотяше ни очию возвести на Небо, но бияше 
перси своя, глаголя: Боже, милостив буди мне 
грешнику. 14 Глаголю вам, яко сниде сей 
оправдан в дом свой паче онаго: яко всяк 
возносяйся, смирится: смиряяй же себе, вознесется.

Конец недели.

(за\ч 90) 15 Приношаху же к нему 
и**{Среда 27 недели: Во время оно, 
приношаху ко Иисусу**} младенцы, да их коснется: 
видевше же ученицы запретиша им. 16 Иисус же 
призвав их, глагола: оставите детей приходити ко 
мне, и не браните им, таковых бо есть Царствие 
Божие. 17 Аминь бо глаголю вам: иже аще не 
приимет Царствия Божия яко отроча, не имать внити 
в не.

Преступи среде. (л. 133)

(за\ч 91) [63] 18 И вопроси его 
некий князь, глаголя:*{Неделя 30: Во время 
оно, человек некий приступи ко Иисусу, искушая 
его, и глаголя:*} учителю благий, что 
сотворив, живот вечный наследствую? 19 Рече же 
ему Иисус: что мя глаголеши блага? никтоже благ 
токмо един Бог. 20 Заповеди веси: не прелюбы 
твори: не убий: не укради: не лжесвидетельствуй: 
чти отца твоего и матерь твою. 21 Он же рече: 
вся сия сохраних от юности моея. 22 Слышав же 
сия Иисус, рече ему: еще единаго не докончал 
еси: вся елика имаши, продаждь и раздай нищим, 
и имети имаши сокровище на Небеси, и гряди во 
след мене. 23 Он же слышав сие, прискорбен 
бысть: бе бо богат зело. 24 Видев же его 
Иисус прискорбна бывша, рече: како не удобь 
имущии богатство, в Царствие Божие внидут. 25 
Удобее бо есть вельбуду сквозе иглине уши 
проити, неже богату в Царствие Божие внити.

Чти среде:

26 Реша же слышавшии: то кто может спасен 
быти? 27 Он же рече: невозможная от человек, 
возможна суть от Бога.

Конец недели.

28 Рече же петр: се мы оставихом вся, и по 
тебе идохом. 29 Он же рече им: аминь 
глаголю вам, яко никтоже есть, иже оставит 
дом, (л. 133 об.) или родители, или братию, или 
сестры, или жену, или чада Царствия ради Божия: 30 
Иже не приимет множицею во время сие, и в век 
грядущий живот вечный.

Конец среде.

(за\ч 92) 31 Поем же*{Четверток 27 
недели: Во время оно, поем Иисус*} 
обанадесяте ученика своя, рече к ним: се 
восходим во иерусалим, и скончаются вся писанная 
пророки о Сыне человечесте. 32 Предадят бо его 
языком, и поругаются ему, и укорят его, и 
оплюют его: 33 И бивше убиют его, и в 
третий день воскреснет. 34 И тии ничесоже от сих 
разумеша: и бе глагол сей сокровен от них, и 
не разумеваху глаголемых.

Конец четвертку.

(за\ч 93) [64] 35 Бысть же егда 
приближишася**{Неделя 31: Во время оно, 
егда приближися Иисус**} во иерихон, слепец 
некий седяше при пути прося. 36 Слышав же народ 
мимоходящь, вопрошаше: что убо есть сие? 37 
Поведаша же ему, яко Иисус назарянин мимоходит. 
38 И возопи, глаголя: Иисусе Сыне Давидов, помилуй мя. 
39 И предыдущии прещаху ему, да умолчит, 
он же паче множае вопияше: Сыне Давидов, помилуй 
мя. 40 Став же Иисус, повеле привести его к 
себе. приближшу же ся ему к нему, вопроси его, 
41 Глаголя: что хощеши, да ти сотворю? он (л. 
134) же рече: Господи, да прозрю. 42 Иисус же рече 
ему: прозри, вера твоя спасе тя. 43 И абие 
прозре, и во след его идяше славя Бога. и вси 
людие видевше, воздаша хвалу Богови.

Конец недели.

Глава 19.

(за\ч 94) [65] 1 И вшед 
прохождаше*{Неделя 32: Во время оно, прииде 
Иисус*} во иерихон. 2 И се муж нарицаемый 
закхей и сей бе старей мытарем, и той бе 
богат. 3 И искаше видети Иисуса, кто есть: и не 
можаше от народа, яко возрастом мал бе. 4 И 
предитек возлезе на ягодичину, да видит, яко 
туде хотяше минути: 5 И яко прииде на место, 
воззрев Иисус, видев его, и рече к нему: 
закхее, потщався слези, днесь бо в дому твоем 
подобает ми быти. 6 И потщався слезе, и прият 
его радуяся. 7 И видевше вси роптаху, глаголюще, 
яко ко грешну мужу вниде витати. 8 Став же 
закхей рече ко Господу: се пол имения моего, Господи, 
дам нищим: и аще кого чим обидех, возвращу 
четверицею. 9 Рече же к нему Иисус, яко днесь 
спасение дому сему бысть: зане и сей сын авраамль 
есть. 10 Прииде бо Сын человечь взыскати, и 
спасти погибшаго.

Конец недели.

11 Слышащим же им сия, приложь рече притчу, 
(л. 134 об.) зане близ ему быти иерусалима, и 
мняху, яко абие Царство Божие хощет явитися, 12 
И рече убо:

(за\ч 95) [66] *{Пяток 27 недели: 
Рече Господь притчу сию:*} Человек некий 
добра рода иде на страну далече, прияти себе 
Царство, и возвратитися. 13 Призвав же десять раб 
своих, даде им десять мнас, и рече к ним: 
куплю дейте дондеже прииду. [67] 14 И граждане 
его ненавидяху его, и послаша молитву в след 
его, глаголюще: не хощем сему, да царствует над 
нами. 15 И бысть егда возвратися, приим Царство, 
рече пригласити рабы тии, имже даде сребро, да 
увесть, какову куплю суть сотворили. 16 Прииде 
же первый, глаголя: Господи, мнас твоя придела десять 
мнас. 17 И рече ему: благий рабе и добрый, 
яко о мале верен был еси, буди область 
имея над десятию градов. 18 И прииде вторый, 
глаголя: Господи, мнас твоя сотвори пять мнас. 19 
Рече же и тому: и ты буди над пятию градов. 20 И 
другий прииде, глаголя: Господи, се мнас твоя, юже 
имех положену во убрусе. 21 Бояхся бо тебе, 
яко человек яр еси: вземлеши егоже не 
положи, и жнеши егоже не сеяв. 22 Глагола же 
ему: от уст твоих сужду ти, лукавый рабе: 
ведяше, яко аз человек яр есмь, вземлю 
егоже не положив, и жну егоже не сеяв. 23 И 
почто не вдал еси моего сребра купцем, и аз 
пришед, с лихвою истязал бых е? 24 И 
предстоящим рече: возмите от него мнас, и дадите 
имущему (л. 135) десять мнас. 25 И реша ему: 
Господи, имать десять мнас. 26 Глаголю бо вам, яко 
всякому имущему дастся: а от неимущаго, и еже 
имать, отимется от него. 27 Обаче враги моя 
оны, иже не хотевшия мне, да Царь бых был над 
ними, приведите семо, и изсецыте предо мною. 28 И 
сия рек, идяше преди восходя во иерусалим.

Конец пятку.

(за\ч 96) [68] 29 И бысть яко 
приближися*{Понедельник сырныя недели: Во 
время оно, яко приближися Иисус*} в вифсфагию 
и вифанию, к горе нарицаемей елеон, посла два 
ученик своих, 30 Глаголя: идите в прямную весь, 
и в нюже входяща обрящета жребя привязано, на неже 
никтоже николиже от человек вседе: отрешша е 
приведита. 31 И аще кто вы вопрошает: почто 
отрешаета? сице рцыта ему: яко Господь его 
требует. 32 Шедша же посланная, обретоста, якоже 
рече има. 33 Отрешающема же има жребя, рекоша 
господие его к нима: что отрешаета жребя? 34 
Она же рекоста: яко Господь его требует. 35 И 
приведоста е ко Иисусови, и возвергше ризы своя на 
жребя, всадиша Иисуса. 36 Идущу же ему, постилаху 
ризы своя по пути.

(за\ч 97) 37 Приближающу же ся 
ему**{Понедельник 28 нл\ди: Во время оно, 
приближающуся Иисусови**} уже абие к 
низхождению горе елеонстей, начаша все множество 
ученик (л. 135 об.) радующеся хвалити Бога 
гласом велиим, о всех силах яже видеша, 38 
Глаголюще: благословен грядый Царь во имя Господне: 
мир на Небеси, и слава в вышних. 39 И нецыи 
фарисее от народа реша к нему: учителю, запрети 
учеником твоим. 40 И отвещав рече им: 
глаголю вам, яко аще сии умолчат, камение 
возопиет.

Преступи понедельнику сырному на зачало 108. 
[Прииде же день опреснок:]

41 И яко приближися, видев град, плакася о 
нем, 42 Глаголя: яко аще бы разумел и ты в 
день сей твой, еже @к смирению@{@к миру@} твоему, 
ныне же скрыся от очию твоею. 43 Яко приидут 
дние на тя, и обложат врази твои острог о 
тебе, и обыдут тя, и обымут тя всюду. 44 И 
разбиют тя и чада твоя в тебе: и не оставят 
камень на камени в тебе: понеже не разуме времене 
посещения твоего.

Конец понедельнику 28-му.

(за\ч 98) 45 И вшед*{Вторник 28 
недели: Во время оно, вшед Иисус*} в 
Церковь, начат изгонити продающия в ней, и 
купующия, 46 Глаголя им: писано есть: дом мой, 
дом молитвы есть: вы же сотвористе его пещеру 
разбойником. 47 И бе учя по вся дни в церкви. 
архиерее же и книжницы искаху его погубити, и 
старейшины людем. 48 И (л. 136) не обретаху, что 
сотворят ему: людие бо вси держахуся его 
послушающе его.

Конец вторнику.

Глава 20.

(за\ч 99) [69] 1 И бысть во един от 
дний онех, учащу ему*{Среда 28 
недели: Во время оно, учащу Иисусу*} люди 
в церкви и благовествующу, приидоша священницы и 
книжницы со старцы, 2 И реша к нему, глаголюще: 
рцы нам, коею областию сия твориши? или кто 
есть давый тебе власть сию? 3 Отвещав же рече 
к ним: вопрошу вы и аз единаго словесе, и 
рцыте ми. 4 Крещение иоанново, с небесе ли бе, 
или от человек? 5 Они же помышляху к себе 
глаголюще: яко аще речем, с Небесе, речет: почто 
убо не веровасте ему? 6 Аще ли же речем, от 
человек: вси людие камением побиют ны. известно 
бо бе о иоанне, яко пророк бе. 7 И 
отвещаша: не вемы откуду. 8 Иисус же рече им: 
ни аз глаголю вам, коею областию сия творю.

Конец среде.

(за\ч 100) [70] 9 Начат же к людем 
глаголати притчу сию:**{Четверток 28 недели: 
Рече Господь притчу сию:**} человек некий 
насади виноград, и вдаде его делателем, и 
отиде на лета многа. 10 И во время посла к 
делателем раба, да от плода винограда дадут 
ему: делатели же бивше его, послаша тща. 11 И 
(л. 136) приложи послати другаго раба: они же и 
того бивше, и досаждьше ему, послаша тща. 12 И 
приложи послати третияго: они же и того 
уязвльше, изгнаша. 13 Рече же господин 
винограда: что сотворю? послю Сына моего 
возлюбленнаго, еда како его видевше усрамятся? 
14 Видевше же его делателе, мышляху к себе, 
глаголюще: сей есть наследник, приидите, убием 
его, да наше будет достояние. 15 И изведше 
его вон из винограда, убиша. что убо 
сотворит им Господин винограда? 16 Приидет и 
погубит делатели сия, и вдаст виноград инем. 
слышавше же рекоша: да не будет. 17 Он же 
воззрев на них, рече: что убо писаное сие: 
камень егоже небрегоша зиждущии, сей бысть во главу 
угла? 18 Всяк падый на камени том, сокрушится: 
а на немже падет, стрыет его.

Конец четвертку.

(за\ч 101) (пя\к) 19 И взыскаша 
архиерее и книжницы, возложити нань руце в той 
час,*{Пяток 28 недели: Во время оно, 
взыскаша архиерее и старцы, возложити руце на 
Иисуса,*} и убояшася народа: разумеша бо, яко 
к ним притчу сию рече. 20 И соблюдше, послаша 
@лаятели@{@наветников@}, творяще себе праведники 
быти: да имут его в словеси, во еже предати 
его начальству и области игемонове. [71] 21 И 
вопросиша его глаголюще: учителю, вемы, яко 
право глаголеши и учиши, и не на лица зриши, но 
воистинну пути (л. 137) Божию учиши. 22 Достоит ли 
нам кесареви дань даяти, или ни? 23 Разумев же 
их лукавство, рече к ним: что мя искушаете? 24 
Покажите ми @цату@{греческ. @динарий@}: чий имать 
образ и надписание? отвещавше же рекоша: 
кесарев. 25 Он же рече им: воздадите убо 
яже кесарева кесареви, и яже Божия Богови. 26 И 
не могоша зазрети глагола его пред людьми, и 
дивишася о ответе его, и умолчаша.

Конец пятку.

(за\ч 102) [72] 27 Приступиша 
же*{Понедельник 29 недели: Во время оно, 
приступиша ко Иисусу*} нецыи от саддукей, 
глаголющии воскресению не быти, вопрошаху его, 28 
Глаголюще: учителю, моисей написа нам: аще кому 
брат умрет, имый жену, и той безчаден 
умрет, да брат его поймет жену, и возставит 
семя брату своему. 29 Седмь убо братия бе, и 
первый поят жену, умре безчаден: 30 И поят 
вторый жену, и той умре безчаден: 31 И третий 
поят ю, такожде же и вси седмь: и не оставиша 
чад, и умроша. 32 Послежде же всех умре и 
жена. 33 В воскресение убо, котораго их будет 
жена? седмь бо имеша ю жену. 34 И отвещав 
рече им Иисус: сынове века сего женятся, и 
посягают: 35 А сподобльшиися век он 
улучити, и воскресение еже от мертвых, ни 
женятся, ни посягают. 36 Ни умрети бо ктому 
могут: равни бо суть ангелом, (л. 137 об.) и 
Сынове суть Божии, воскресения Сынове суще. 37 А 
якоже востают мертвии, и моисей сказа при 
купине, якоже глаголет: Господа Бога авраамля, и 
Бога исаакова, и Бога иаковля. 38 Бог же несть 
мертвых, но живых: вси бо тому живи суть. 39 
Отвещавше же нецыи от книжник, рекоша: учителю, 
добре рекл еси. 40 Ктомуже не смеяху его 
вопросити ничесоже. рече же к ним: [73] 41 Како 
глаголют Христа Сына Давидова быти? 42 Сам бо Давид 
глаголет в книзе _псаломстей: рече Господь Господеви 
моему, седи одесную мене, 43 Дондеже положу враги 
твоя подножие ногама твоима. 44 Давид убо Господа 
его нарицает: и како Сын ему есть?

Конец понедельнику.

(за\ч 103) 45 Слышащим же всем людем, 
рече учеником своим:*{Суббота 34 недели: 
Рече Господь своим учеником:*} 46 Внемлите 
себе от книжник, хотящих ходити во одеждах, и 
любящих целования на торжищах, и председания на 
сонмищах, и преждезвания на вечерях: 47 Иже 
снедают домы вдовиц, и @виною далече 
молятся@{@лицемерно надолзе молятся@}: сии приимут 
лишше осуждение.

Глава 21.

1 Воззрев же виде вметающия *в храм 
набдящий имения*{*в сокровищное хранилище*}, дары 
своя богатыя. [74] 2 Видев же и некую вдовицу 
убогу, вметающу ту две лепте, 3 И рече: 
воистинну глаголю (л. 138) вам, яко вдовица сия 
убогая множае всех вверже. 4 Вси бо сии от 
избытка своего ввергоша в дары Богови: сия же от 
лишения своего все житие, еже име, вверже.

Конец субботе.

(за\ч 104) 5 И неким глаголющим о 
Церкви,*{Среда 29 недели: Во время оно, 
некоим глаголющим ко Иисусови о Церкви,*} яко 
камением добрым и сосуды украшена, рече: 6 Сия 
яже видите, приидут дние, в няже не останет 
камень на камени, иже не разорится. [75] 7 
Вопросиша же его, глаголюще: учителю, когда 
убо сия будут? и что есть знамение, егда 
хотят сия быти?

Преступи среде.

(за\ч 105) 8 Он же рече:**{Суббота 
мясопустная: Рече Господь:**} блюдите, да не 
прельщени будете: мнози бо приидут во имя мое, 
глаголюще, яко аз есмь, и время приближися: не 
изыдите убо во след их. 9 Егда же 
услышите брани и нестроения, не убойтеся: 
подобает бо сим быти прежде, но не у [абие] 
кончина.

Преступи субботе. Чти среде:

10 Тогда глаголаше им: востанет бо язык на 
язык, и царство на царство. 11 Труси же велицы по 
местам, и глади и пагубы будут: страхования же и 
знамения велия с небесе будут. (л. 138 об.)

Преступи среде.

(за\ч 106) 12 Прежде же сих 
всех,*{Вторник 29 недели: Рече Господь 
своим учеником: внемлите от человек*} 
возложат на вы руки своя, и ижденут, предающе на 
сонмища и темницы, ведомы к царем и владыкам, 
имене моего ради. 13 Прилучится же вам во 
свидетельство: 14 Положите убо на сердцах 
ваших, не прежде поучатися отвещавати. 15 Аз бо 
дам вам уста и премудрость, ейже не возмогут 
противитися, или отвещати вси противляющиися вам. 
16 Предани же будете и родители, и братиею, и 
родом, и други, и умертвят от вас. 17 И 
будете ненавидими от всех имене моего ради. 18 
И влас главы вашея не погибнет. 19 В терпении 
вашем стяжите душа ваша.

Конец вторнику. Чти среде:

20 Егда же узрите обстоимь иерусалим вои, 
тогда разумейте, яко приближися запустение ему. 
21 Тогда сущии во иудеи, да бегают в горы: и 
иже посреде его да исходят: и иже во странах, 
да не входят вонь. 22 Яко дние отмщению сии 
суть, яко исполнитися всему писанному. 23 Горе же 
имущим во утробе, и доящим в тыя дни: будет 
бо беда велия на земли, и гнев на людех сих. 24 
И падут во острии меча, и пленени будут во вся 
языки: и иерусалим будет попираемь языки, 
дондеже скончаются времена язык.

Конец среде. (л. 129)

Чти субботе:

25 И будут знамения в солнце, и луне, и 
звездах: и на земли туга языком, от нечаяния, 
шума морскаго и возмущения, 26 Издыхающим 
человеком от страха и чаяния грядущих на 
вселенную: силы бо Небесныя подвигнутся. 27 И тогда 
узрят Сына человеческа грядуща на облацех с 
силою и славою многою.

Преступи субботе.

(за\ч 107) 28 Начинающим же сим 
бывати,*{Четверток 29 недели: Рече Господь 
своим учеником:*} восклонитеся, и воздвигните 
главы ваша, зане приближается избавление ваше. 29 И 
рече притчу им: видите смоковницу, и вся древа: 30 
Егда прошибаются уже, видяще сами весте яко 
близ жатва есть. 31 Тако и вы егда узрите 
сия бывающа, ведите, яко близ есть Царствие 
Божие. 32 Аминь глаголю вам, яко не имать прейти 
род сей, дондеже вся сия будут.

Чти субботе:

33 Небо и земля мимо идет, а словеса моя не 
имут прейти.

Конец четвертку.

34 Внемлите же себе, да не когда отягчают 
сердца ваша обядением и пиянством, и печальми 
(л. 139 об.) житейскими, и найдет на вы внезапу 
день той. 35 Яко сеть бо приидет на вся живущия 
на лицы всея земли. 36 Бдите убо на всяко время 
молящеся, да сподобитеся убежати всех сих 
хотящих быти, и стати пред Сыном человеческим.

Конец субботе.

(за\ч 108) 37 Бе же*{Пяток 29 
недели: Во время оно, бе Иисус*} во дни во 
Церкви учя, нощию же исходя водворяшеся в горе, 
нарицаемей елеон. 38 И вси людие из утра 
прихождаху к нему во церковь, послушати его.

Глава 22.

(за\ч) [76] 1 Приближашеся же**{Во 
святый и великий четверток на утрени, до зачала 
109, без преступки: Во время оно, 
приближашеся**} праздник опреснок, глаголемый 
пасха. 2 И искаху архиерее и книжницы, како быша 
убили его: бояхуся бо людей. 3 Вниде же сатана 
во иуду нарицаемаго искариот, суща от числа 
обоюнадесяте. 4 И шед глагола архиереом и 
воеводам, како его предаст им. 5 И 
возрадовашася: и совещаша ему сребреники дати. 6 
И @исповеда@{@обещася@}: и искаше подобна 
времене, да предаст его им без народа.

Чти понедельнику сырныя недели:

7 Прииде же день опреснок, воньже подобно бе 
(л. 140) [время] жрети пасху. 8 И посла петра и 
иоанна, рек: шедша уготовайта нам пасху, да 
ямы.

Конец пятку.

9 Она же рекоста ему: где хощеши, 
уготоваем? 10 Он же рече им: се восходящема 
вама во град, срящет вы человек, в скудельнице 
воду нося: по нем идета в дом, воньже входит. 
11 И рцета дому владыце: глаголет тебе 
учитель, где есть обитель, идеже пасху со 
ученики моими снем? 12 И той вама покажет 
горницу велию постлану: ту уготовайта. 13 Шедша 
же обретоста якоже рече има: и уготоваста 
пасху. 14 И егда бысть час, возлеже, и 
обанадесяте апостола с ним. 15 И рече к ним: 
желанием возжелех сию пасху ясти с вами, прежде 
даже не прииму мук. 16 Глаголю бо вам, яко 
отселе не имам ясти от него, дондеже скончаются 
во Царствии Божии. 17 И приим чашу, хвалу воздав 
рече: приимите сию, и разделите себе. 18 Глаголю 
бо вам, яко не имам пити от плода лознаго, 
дондеже Царствие Божие приидет. 19 И приим хлеб, 
хвалу воздав преломи: и даде им глаголя: сие 
есть тело мое, еже за вы даемо: сие творите в 
мое воспоминание. 20 Такожде же и чашу по вечери, 
глаголя: сия чаша, новый завет моею кровию, яже 
за вы проливается. 21 Обаче се рука предающаго мя 
со мною есть на трапезе. 22 И Сын убо 
человеческий идет @по реченному@{@по 
предуставленному [совету]@}, обаче горе человеку 
тому, имже предается. 23 И тии начаша искати в 
себе, который убо от них (л. 140 об.) хотяй сие 
сотворити? [77] 24 Бысть же и пря в них, кий 
мнится их быти болий? 25 Он же рече им: 
царие язык господствуют ими, и обладающии ими, 
благодателе нарицаются. 26 Вы же не тако: но болий в 
вас, да будет яко мний, и старей, яко служай. 
27 Кто бо болий? возлежай ли или служай? не возлежай 
ли? аз же посреде вас есмь яко служай. 28 Вы 
же есте пребывше со мною в напастех моих. 29 И 
аз завещаваю вам, якоже завеща мне отец 
мой, Царство: 30 Да ясте и пиете на трапезе моей во 
Царствии моем: и сядете на престолех судяще 
обеманадесяте коленома Израилевыма. [78] 31 Рече же 
Господь: симоне, симоне, се сатана просит вас, да бы 
сеял яко пшеницу. 32 Аз же молихся о тебе, да 
не оскудеет вера твоя: и ты некогда обращься, 
утверди братию твою. 33 Он же рече ему: 
Господи, с тобою готов есмь и в темницу и в 
смерть ити. 34 Он же рече: глаголю ти петре, не 
возгласит петел днесь, дондеже трикраты 
отвержешися мене не ведети. 35 И рече им: 
егда послах вы без влагалища, и без меха, и 
без сапог, еда что лишени бысте? они же реша: 
ничесоже. 36 Рече же им: но ныне иже имать 
влагалище, да возмет, такожде и мех: а иже не 
имать, да продаст ризу свою, и купит нож. 37 
Глаголю бо вам: яко еще писаное се, подобает да 
скончается о мне: еже и со беззаконными вменися. 
ибо еже о мне, кончину имать. 38 Они же 
реша: Господи се ножа зде два. он же рече им: 
довольно есть. (л. 141)

(за\ч 109) 39 И изшед,*{Вторник 
сыропустный: Во время оно, изшед Иисус*} 
иде по обычаю в гору елеонскую: по немже идоша 
ученицы его.

Конец понедельнику сырныя недели, и великаго 
четвертка на утрени.

40 Быв же на месте, рече им: молитеся, да не 
внидете в напасть. 41 И сам отступи от них 
яко вержением камене, и поклонь колена моляшеся, 
42 Глаголя: отче, аще волиши мимонести чашу сию 
от мене: обаче не моя воля, но твоя да будет.

Преступи вторнику. Чти четвертку великому:

43 Явися же ему ангел с небесе укрепляя 
его. 44 И быв в подвизе, прилежнее моляшеся: 
бысть же пот его, яко капля крове каплющи на 
землю. 45 И востав от молитвы,

Преступи четвертку великому, в матфеи зачало 
108: [Прииде ко учеником:]

Чти вторнику:

и пришед ко учеником, обрете их спящя от 
печали. 46 И рече им: что спите? воставше 
молитеся, да не внидете в напасть. 47 Еще же ему 
глаголющу, се народ, и нарицаемый иуда един от 
обоюнадесяте, идяше пред ними. и приступи ко 
Иисусови целовати его. сие бо бе знамение дал 
им: егоже аще (л. 141 об.) лобжу, той есть. 
48 Иисус же рече ему: иудо, лобзанием ли Сына 
человеческаго предаеши? 49 Видевше же, иже беху о 
нем бываемое, реша ему: Господи, аще ударим 
ножем? 50 И удари един некий от них 
архиереова раба, и уреза ему ухо десное. 
51 Отвещав же Иисус, рече: оставите до сего, и 
коснув во ухо его, исцели его. 52 Рече же 
Иисус ко пришедшим нань архиереом, и воеводам 
церковным, и старцем: яко на разбойника ли 
изыдосте, со оружием и дрекольми яти мя? 53 По 
вся дни сущу ми с вами в церкви, не простросте 
руки на мя: но се есть ваша година, и область 
темная. 54 Емше же его ведоша, и введоша его 
во двор архиереов: петр же во след идяше 
издалеча. 55 Возгнещшем же огнь посреде двора, 
и вкупе седящим им, седяше петр посреде 
их. 56 Узревши же его рабыня некая, седяща 
при @свете@{@огне@}, и воззревши нань, рече: и 
сей с ним бе. 57 Он же отвержеся его, 
глаголя: жено, не знаю его. 58 И по мале другий 
видев его, рече: и ты от них еси. петр же 
рече: человече, несмь. 59 И мимошедшу яко часу 
единому, ин некий крепляшеся, глаголя: воистинну 
и сей с ним бе: ибо галилеанин есть. 60 
Рече же петр: человече, не вем еже глаголеши. и 
абие, еще глаголющу ему, возгласи петел. 61 
И обращся Господь воззре на петра, и помяну петр 
слово Господне, якоже рече ему: яко прежде даже 
петел не возгласит, отвержешися мене трикраты. 
62 И изшед вон, плакася горько. 63 И мужие, 
держащии Иисуса, (л. 142) ругахуся ему биюще. 64 
И закрывше его, бияху его по лицу, и вопрошаху 
его, глаголюще: прорцы, кто есть ударей тя? 
65 И ина многа хуляще глаголаху нань. 66 И 
яко бысть день, собрашася старцы людстии и 
архиерее, и книжницы, и ведоша его на сонм 
свой, 67 Глаголюще: аще ты еси Христос, рцы 
нам? рече же им: аще вам реку, не имете веры. 
68 Аще же и вопрошу вы, не отвещаете ми, ни 
отпустите. 69 Отселе будет Сын человеческий 
седяй одесную силы Божия. 70 Реша же вси: ты ли 
убо еси Сын Божий? он же к ним рече: вы 
глаголете, яко аз есмь. 71 Они же реша: 
что еще требуем свидетельства? сами бо слышахом 
от уст его.

Глава 23.

(за\ч 110) 1 И воставше все множество 
их, ведоша его к пилату.

Конец вторнику сырному.

2 Начаша же*{В четверток сыропустный: Во 
время оно, ведоша Иисуса архиереи, и книжницы, и 
старцы людстии к пилату, и начаша*} нань вадити, 
глаголюще: сего обретохом развращающа язык наш, 
и возбраняюща кесареви дань даяти: глаголюща себе 
Христа Царя быти. 3 Пилат же вопроси его, 
глаголя: ты ли еси Царь иудеом? он же 
отвещав рече ему: ты глаголеши. 4 Пилат же 
рече ко архиереом и народу: (л. 142 об.) никоеяже 
обретаю вины в человеце сем. 5 Они же 
крепляхуся, глаголюще: яко развращает люди, учя 
по всей иудеи, начен от галилеи до зде. 6 Пилат 
же слышав галилею, вопроси: аще человек 
галилеанин есть? 7 И разумев, яко от 
области иродовы есть, посла его ко ироду, 
сущу и тому во иерусалиме в тыя дни. 8 Ирод же 
видев Иисуса, рад бысть зело: бе бо желая от 
многа времене видети его: зане слышаше многа о 
нем, и надеяшеся знамение некое видети от него 
бываемо. 9 Вопрошаше же его словесы многи: он же 
ничесоже отвещаваше ему. 10 Стояху же архиерее 
и книжницы прилежно вадяще нань. [79] 11 
Укорив же его ирод с вои своими, и 
поругався, оболк его в ризу светлу, возврати 
его к пилату. 12 Быста же си друга, ирод же и 
пилат в той день с собою: прежде бо беста вражду 
имуща между собою. 13 Пилат же созва архиереи, 
и князи, и люди. 14 Рече к ним: приведосте ми 
человека сего, яко развращающа люди: и се аз 
пред вами истязав, ни единыя же обретаю в 
человеце сем вины, яже нань вадите. 15 Но ни 
ирод: послах бо его к нему, и се ничтоже 
достойно смерти сотворено есть о нем. 16 
@Показав@{@Наказав@} убо его, отпущу. 17 
Нужду же имяше на вся праздники, отпущати им 
единаго. 18 Возопиша же вси народи глаголюще: 
возми сего, отпусти же нам варавву: 19 Иже бе 
за некую крамолу, бывшую во граде, и убийство 
ввержен в темницу. 20 Паки же пилат возгласи, хотя 
(л. 143) отпустити Иисуса. 21 Они же возглашаху, 
глаголюще: распни, распни его. 22 Он же третицею 
рече к ним: что бо зло сотвори сей? ничесоже 
достойна смерти обретох о нем: 
@показав@{@наказав@} убо его, отпущу. 23 
Они же прилежаху гласы великими, просяще его на 
распятие, и *устояху*{*превозмогаху*} гласи их и 
архиерейстии. 24 Пилат же посуди быти прошению 
их. 25 Отпусти же иже за крамолу и убийство 
всажденнаго в темницу, егоже прошаху: Иисуса же 
предав воли их. 26 И яко поведоша его, 
емше симона некоего киринеа грядуща с села, 
возложиша нань Крест, носити по Иисусе. [80] 27 
Идяше же во след его народ мног людей, и 
жены, яже и плакахуся и рыдаху его. 28 
Обращся же к ним Иисус, рече: дщери иерусалимски, 
не плачитеся о мне, обаче себе плачите, и чад 
ваших. 29 Яко се дние грядут, в няже рекут: 
блажены неплоды, и утробы, яже не родиша, и 
сосцы, иже не доиша. 30 Тогда начнут глаголати 
горам: падите на ны. и холмом: покрыйте ны. 31 
Зане аще в сурове древе сия творят, в сусе 
что будет?

(за\ч 111) 32 Ведяху*{Ев\глие 8 
святых страстей: Во время оно, ведяху со 
Иисусом* Сие же и на 6-м часе, в пяток 
великий.} же и ина два злодея с ним убити. 
33 И егда приидоша на место нарицаемое лобное, ту 
распяша его, и злодея, оваго убо одесную, а 
другаго ошуюю. 34 Иисус же глаголаше: отче, 
отпусти им: не ведят бо что творят. (л. 143 
об.)

Преступи четвертку сырному.

разделяюще же ризы его, метаху жребия. 35 И 
стояху людие зряще. ругахуся же и князи с ними, 
глаголюще: иныя спасе, да спасет и себе, аще той 
есть Христос Божий избранный. 36 Ругахуся же ему 
и воини, приступающе, и оцет придеюще ему. 37 
И глаголаху: аще ты еси Царь иудейск, спасися 
сам. 38 Бе же и написание написано над ним 
писмены еллинскими, и римскими, и еврейскими: сей 
есть Царь иудейск.

Чти пятку великому вечер:

39 Един же от обешеною злодею хуляше его, 
глаголя: аще ты еси Христос, спаси себе и наю. 
40 Отвещав же другий, прещаше ему, глаголя: ни ли 
ты боишися Бога, яко в томже осужден еси? 41 
И мы убо в правду, достойная бо по делом наю 
восприемлева: сей же ни единаго зла сотвори. [81] 
42 И глаголаше Иисусови: помяни мя Господи, егда 
приидеши во Царствии си. 43 И рече ему Иисус: 
аминь глаголю тебе, днесь со мною будеши в раи.

Прейди пятку великому вечер, в матфеи: 
[Мимоходящии же:]

Чти четвертку сырному:

44 Бе же час яко шестый, и тма бысть по 
всей земли до часа девятаго. 45 И померче солнце, 
и завеса Церковная раздрася посреде. 46 И возглашь 
гласом велиим Иисус рече: отче, в руце твои 
предаю (л. 144) Дух мой: и сия рек издше. 47 
Видев же сотник бывшее, прослави Бога, глаголя: 
воистинну человек сей праведен бе. 48 И вси 
пришедшии народи на позор сей, видяще бывающая, 
биюще перси своя, возвращахуся. 49 Стояху же вси 
знаемии его издалеча, и жены споследствовавшия 
ему от галилеи, зряще сих.

Конец 8-му страстному, и 6-му часу.

[82] 50 И се муж именем иосиф, советник, 
сый муж благ и праведен: 51 Сей не бе пристал 
совету и делу их, от аримафеа града иудейска, 
иже чаяше и той Царствия Божия. 52 Сей приступль к 
пилату, проси тело Иисусово. 53 И снем е, 
обвит плащаницею, и положи е во гробе 
изсечене, в немже не бе никтоже никогдаже 
положен. 54 И день бе пяток, и суббота светаше. 
55 Во след же шедшия жены, яже бяху пришли с 
ним от галилеи, видеша гроб, и яко положено 
бысть тело его. 56 Возвращшеся же уготоваша 
ароматы, и миро: и в субботу убо умолчаша по 
заповеди.

Конец четвертку сырному.

Глава 24.

(за\ч 112) 1 Во едину же от суббот, 
зело рано, приидоша на гроб,*{Ев\глие 4 
воскресное: Во время оно, во едину от суббот, 
зело рано приидоша жены на гроб,*} носяще 
яже уготоваша ароматы, и другия с ними. 2 
Обретоша же (л. 144 об.) камень отвален от гроба: 
3 И вшедше, не обретоша телесе Господа Иисуса. 4 И 
бысть не домышляющимся им о сем, и се мужа два 
стаста в них в ризах блещащихся. 5 Пристрашным 
же бывшим им, и поклоншим лица на землю, рекоста 
к ним: что ищете живаго с мертвыми? 6 Несть 
зде, но воста. помяните якоже глагола вам, еще 
сый в галилеи, 7 Глаголя: яко подобает Сыну 
человеческому предану быти в руце человек 
грешник, и пропяту быти, и в третий день 
воскреснути: 8 И помянуша глаголы его. 9 И 
возвращшеся от гроба, возвестиша вся сия 
единомунадесяте, и всем прочим. 10 Бяше же 
магдалина мариа, и иоанна, и мариа иаковля, и 
прочия с ними, яже глаголаху ко апостолом сия. 
11 И явишася пред ними яко лжа глаголы их, 
и не вероваху им.

(за\ч 113) 12 Петр же*{Вторник 
светлыя недели, сие же и воскресно 5: Во время 
оно, петр*} востав тече ко гробу, и приник 
виде ризы едины лежащя, и отиде, в себе дивяся 
бывшему.

Конец 4-му воскресному.

13 И се, два от них беста идуща в тойже 
день в весь, отстоящу стадий шестьдесят от 
иерусалима, ейже имя еммаус. 14 И та 
беседоваста к себе о всех сих приключшихся. 
15 И бысть беседующема има и совопрощающемася: и 
сам Иисус приближися, (л. 145) идяше с нима. 16 
Очи же ею держастеся, да его не познаета. 17 
Рече же к нима: что суть словеса сия, о нихже 
стязаетася к себе идуща, и еста дряхла? 18 
Отвещав же един, емуже имя клеопа, рече к 
нему: ты ли един пришлец еси во иерусалим, и 
не уведе бывших в нем во дни сия? 19 И рече 
има: киих? она же реста ему: яже о Иисусе 
назарянине, иже бысть муж пророк, силен делом 
и словом пред Богом и всеми людьми. 20 Како 
предаша его архиереи и князи наши на осуждение 
смерти, и распяша его. 21 Мы же надеяхомся, яко 
сей есть хотя избавити Израиля: но и над всеми 
сими третий сей день имать днесь, отнелиже сия 
быша. 22 Но и жены некия от нас ужасиша ны, 
бывшия рано у гроба: 23 И не обретше телесе 
его, приидоша глаголюще, и явление ангел 
видевше, иже глаголют его жива. 24 И идоша 
нецыи от нас ко гробу: и обретоша тако, якоже 
и жены реша, самого же не видеша. 25 И той рече 
к нима: _о несмысленная и косная сердцем, еже 
веровати о всех, яже глаголаша пророцы. 26 Не 
сия ли подобаше пострадати Христу, и внити в славу 
свою? 27 И начен от моисеа, и от всех пророк, 
сказаше има от всех писаний яже о нем. 28 И 
приближишася в весь, в нюже идяста: и той 
творяшеся далечайше ити. 29 И нуждаста его, 
глаголюще: облязи с нама, яко к вечеру есть, и 
преклонился есть день. и вниде с нима облещи. 30 
И бысть яко возлеже с нима, и приим хлеб 
благослови, и преломив (л. 145 об.) даяше има. 31 
Онема же отверзостеся очи, и познаста его: и 
той невидимь бысть има. 32 И рекоста к себе: не 
сердце ли наю горя бе в наю, егда глаголаше нама 
на пути, и яко сказоваше нама писания? 33 И 
воставша в той час, возвратистася во иерусалим, и 
обретоста совокуплены единагонадесяте, и иже бяху 
с ними, 34 Глаголющих, яко воистинну воста Господь, 
и явися симону. 35 И та поведаста, яже быша 
на пути: и яко познася има в преломлении хлеба.

Конец вторнику, и 5-му воскресному.

(за\ч 114) 36 Сия же им глаголющим, и 
сам Иисус ста посреде их,*{Ев\глие 6 
воскресное: Во время оно, воскрес Иисус от 
мертвых, ста посреде ученик своих,* Сие же и 
на литургии вознесению.} и глагола им: мир вам. 
37 Убоявшеся же и пристрашни бывше, мняху дух 
видяще. 38 И рече им: что смущени есте? и 
почто помышления входят в сердца ваша? 39 Видите 
руце мои, и нозе мои, яко сам аз есмь. 
осяжите мя и видите, яко дух плоти и кости не 
имать, якоже мене видите имуща. 40 И сие рек, 
показа им руце и нозе. 41 Еще же не верующим 
им от радости, и чудящимся, рече им: имате ли 
что снедно зде, 42 Они же даша ему рыбы 
печены часть, и от пчел сот. 43 И взем, пред 
ними яде. 44 Рече же им: сия суть словеса, 
яже глаголах к вам, еще (л. 146) сый с вами, 
яко подобает скончатися всем написанным в 
законе моисеове, и пророцех и _псалмех о 
мне. 45 Тогда отверзе им ум, разумети 
писания. 46 И рече им: яко тако писано есть, 
и тако подобаше пострадати Христу и воскреснути от 
мертвых в третий день, 47 И проповедатися во имя 
его покаянию и отпущению грехов, во всех 
языцех, наченше от иерусалима. 48 Вы же есте 
свидетелие сим. 49 И се аз послю обетование 
отца моего на вы: вы же седите во граде 
иерусалимсте, дондеже облечетеся силою свыше. 50 
Извед же их вон до вифании, и воздвиг руце 
свои, и Благослови их. 51 И бысть егда 
Благословляше их, отступи от них, и возношашеся 
на Небо. 52 И тии поклонишася ему, и возвратишася 
во иерусалим с радостию великою. 53 И бяху выну в 
церкви, хваляще и благословяще Бога. аминь.

Конец еже от луки святаго евангелиа. стихов 
две тысящи осмь сот. издадеся по летех 
пятинадесятих Христова вознесения.