<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 1092) (с. 1093) Предисловие. Божественный сей отец илиа, иже и екдик (защититель) наречен бысть, аще илиа критский, иже бе ученик словес григориа Богослова, сей есть или ин некто, нам неизвестно. Елико же он настоящих главизн, яко от некиих дел познавати мощно делателя, муж бе, аще и ин кто возшедый на верх премудрости внешния, и много паче Духовныя, и то лучшия, силу бо в словесех и преиз_обилующую ему славу добродетели, удобно всяк разсудительный в тех уразумеет. Яже и мы уведевше, и многообильному плоду нравственнаго и разуметельнаго учения удивльшеся, и теми по истине усладившеся, яко некиим листвием покров плоду и красоту благолепнейшу подающим подобии глаголю, и речении добротами, имиже на обед отец тех приуготовя чтение любящим ко удовольствию предлагаем, и с любовию в красный сей и благовонный цветник многими и высокими произрастениями словес духовных насажденный и сладчайшими струями премудрости напоенный внити, и под сению того сести просим, да и тии не точию от потоков деятельнаго любомудрия насладятся, но и плодов умозрения до сытости вкусят. Изветословие совещательное тщаливых любомудрцев тщанием и трудом или смиреннейшаго пресвитера сочиненное источник учительных росу словес точащий зде обрящеши, аще искренне прочтеши. (с. 1094) Цветособрание. Советовательно любомудрецев тщаливых, излюбомудрствовано и сотворено илиею малейшим пресвитером и екдиком. Источник точащ нравоучительных росу словес зде из_обрящеши, аще пройдеши законно. 1. Достойно всякому христианину право верующему в Бога, не быти без попечения, но всегда чаяти и ожидати искушения. Да егда приидет, не ужасается, ниже смущается, но благодарне терпит труд, скорби, и разумеет, что поя с пророком глаголет: искуси мя Господи, и испытай мя{Псал. 25, ст. 2.}. И не рече, яко наказание твое низврати, но исправи мя в конец. 2. Начало убо добрых, страх Божий: конец же любы его. 3. Начало всякаго блага слово деятельно, и деяние словесно, темже ни деяние без слова благо, ни слово без деяния происходящее. 4. Деяние есть телесе убо, пост и бдение: уст же пение, и молитва, и молчание, слова честнейша. И руку деяние, еже онеми без роптания бывающее: ногу же, еже теми от перваго побуждения совершаемое. 5. Предваряет всех сих милость и истина, ихже зачатие есть смирение, и еже от сего по отцем пребывающее разсуждение, без негоже ни едино, ни другое свой увидети конец возможет. Деяние убо вес словесе безчествующо, зде и (с. 1095) онде в безполезных аки некая юница окрест заблуждающо обретается. Слово же деятельныя добродетели честныя ризы отмещущо, несть благообразно, аще и таково быти некако мнением вообразуется. 6. Мужественная душа яко жена во всем своем житии, аки два светильника, деяние же и видение горяща содержащи, содевает должная: сопротивная же напротив, разслабленна сластьми. 7. Не довлеет души к совершенному злобы избавлению, вольное злострадание, аще и невольным разжигаема не истает. Якоже бо некий мечь душа, аще не сквозе огнь пройдет и воду, сиречь, сквозе вольныя болезни и невольныя, не сломлена сопротивлении приключающихся не соблюдается. 8. Якоже вольных искушений три суть соборнейшия вины: здравие, богатство и слава: тако и невольных три суть: тщеты, досады и немощи. Бывают же некиим убо на созидание, некиим же на низложение. 9. Приподсудствует души убо, желание и печаль: телу же, сласть и болезнь. Вина же болезни убо есть сласть: хотяще бо избегнути еже в болезни приболезненнаго чувства к сласти прибегаем: печали же желание. 10. Завещательно убо добродетельный имать доброе, вымышленное же тщеславный. Злое же тщаливый убо, сверху имать, глубоко же, сластолюбивый. 11. Деяние души есть, воздержание простотою, и простота воздержанием действуема. 12. Ума деяние яже в разуме молитва, и в молитве разум. 13. Малижды убо и неприлежно в злом обретается, сия ненавидяй: многшекратне же и внимательнее, иже к винам онаго приближаяйся. 14. Имже не по предложениюо есть, еже клятися, сим часте и еже прегрешати. А имже без предложения есть (с. 1096) еже согрешати, извествованно есть покаяние: и вина сего не часта. 15. Чувство и совесть со словом на произношении да собираются. Яко да мирное и Божественное слово посреде сих обретатися не постыждается продерзостию, или безмерием глаголемых. 16. Не иже делами не обидяй душу свою, сей и словесы нескверну ту соблюде. Ниже иже сими храняй, уже и сквернами не оскверни: тройственне бо еже согрешати бывает. 17. Не возможеши лице добродетели увидети, сладце еще лице злобы смотряя. Ненавидимо же тебе тогда явится второе, егда наслаждения вожделеннаго вкус, и таковаго видения устраниши взор. 18. Помыслы, а не делы предварительне ратуют бесове душу. Самая бо та о себе ратуют дела. И дел убо, слух виновен и зрение: помыслов же обычай и бесове. 19. Тройственну убо согрешательность души обретаем: делы, словесы, и помышлении, и обидящу безгрешия доброту: без погрешения бо, пять чувств и произносное подобает соблюдати слово. Имже не согрешаяй, муж есть совершен, силен обуздати и прочия части души{Иаков. гл. 3, ст. 2.}. 20. Шестерично разделяется безсловесная часть души. На пять чувств, и на слово еже по произношению: еже с страждущим, не раздельне соблюдается безстрастно сущее, очищает же того злобу, страдательно обретающееся. 21. Ни тело без поста и бдения очистится, ни без милости и истины душа. Но ниже ум без беседы и видения Божия. Сия бо сопряжения сих нарочитейша суть. 22. Сограждаемая реченными добродетельми душа непреоборимь от искушений сохраняет град свой, еже есть терпение. В терпении бо вашем стяжите души ваша{Луки гл. 21, ст. 19.}, глаголет слово. (с. 1097) Аще же инако имеема будут: якоже град некий неогражден, и от отдаленнаго шума вереями боязни потрясаема будут. 23. Не елицы, яже по слову суть мудри, сии и во яже по разуму. Ниже елицы и во яже по разуму, сии и во яже по чувству обрящутся внешнему. Аще бо и всех подвластными имать чувство, но не равне тому, дани дают. От простоты бо множайшии во яже по нему почитати то якоже то истязует, не ведают. 24. По естеству несекома сущи мудрость, сечется или разделяется на различныя части. Овому бо тоя дается вящше, овому же менше: донележе возрастши деятельная добродетель, соединившияся имущи себе начальныя добродетели, приличное каждой исполнит благо. Мнози бо по оскудению деятельныя жизни, и мудрствования наследоваша оскудение. 25. В свойственных естеству не мнози мудри обрящутся: в естественных же мнози: страхом бо к тем всеестественное мудрование оставивше, тамо убо малое, в неподобающих же и не по естеству и не похвальных множайшее имут умствование. 26. Благословнаго молчания время и мера суть сопировницы: пирование же того бывает истина. Еяже ради ничтоже от искомых обретает входяй лжи отец в отходящую душу. 27. Милостив истинно, не иже подаяй излишняя, но попущаяй нуждная восхищающим. 28. Ови убо вещественным богатством приобретают невещественное, милостыни законами: ови же невещественным отстяжавают вещественное, в чувстве неоскудевающаго бывающе. 29. Любезно убо всякому богатети во благих, но прикорбно Божественне обогатившемуся, не попущаему быти ему множае возвеселитися о том. 30. Извне убо здравие непщуется быти в душе: внутрь же во глубине чувства обыче крытися недуг ея. Аще ли же (с. 1098) подобает всяко извне убо недугу оному пожату обличении быти: внутрь же здравию, яве яко сему обновлением ума: безумен есть обличения отреваяй, в непоболения всегда возлежати больнице не стыдяйся. 31. Да не ожесточишися на невольне тя рукодействовавшаго, но на источившуюся гнусность воззрев, окай убо самаго себе: ублажи же виновнаго тебе сея бывшаго пользы смотрением Божиим. 32. Да ничесого ради лютаго отчаешися недуга твоего, но действеннейшими трудолюбия лечбами далече буди сего, о душевнем здравии прилежай. 33. Да не смутишися от благовременно тя уязвляющаго. Но приступи к сему, и покажет ти, елико тихо жгущее чувство твое есть добро, и ясти имаши твое приснедие, сладко от здравия, по еже истребитися, еже от горести отметному. 34. Елико ощущаеши болезни, толико приемли показующаго ти сия обличении. Очищения бо совершенна, виновен ти бывает, без негоже в чисте месте молитвеннем не может быти ум. 35. Внегда обличаему быти, или молчати подобает, или кротце ответствовати поведающему. Не за еже составити своя обличаемому, но за еже возставити негли преткнувшася в неведении обличающаго. 36. Опечалившему праведно, иже прежде, неже призвану быти от него, каяйся, ничимже от приличествующих оттщетися. А иже по утешении, от гобзования пол приобретает: обаче прежде поверженное, иже никогдаже печали ради отлучен от сонмища обретаяйся. Прилагает же и мзду себе, иже согрешение полагаяй верху себе во всем. 37. Ни высокомудрый познавает, якова суть своя его умаления, ни своя смиренномудрый добрая. Покрывает бо того убо безумие злое, сего же благоугодное смирение. (с. 1099) 38. С равночестными гордый в добрых сравнитися не хощет, в сопротивных же, и преимущим сносно свое си прилагая вменяет умаление. 39. Укор убо крепку, разслабленну же похвала душу соделовает, и коснейшу к добрым. 40. Состав убо богатства есть злато, добродетели же смирение. Якоже убо злата лишаяйся убог есть, аще внешним и светлейший есть: тако без смирения добродетелен не будет подвизающийся. 41. Якоже купец без злата несть купец, аще и зело к купли есть приличен: тако ни без смиренномудрия во одержании сладких, добродетели обрящется обучаяйся, аще и зело на мудрость свою уповает. 42. Иже о смиренномудрии скорбяй, нижший своего возношения бывает: вышший же, иже без онаго, ниже равнятися с малейшими волею терпит, и сего ради о первовозлеганиих печаль показует. 43. Добро подвижнику мудрствовати убо менша паче делания своего, содевати же лучша паче боязни своея. Тако бо человеком убо честен, и Богу делатель обретается непостыден. 44. Или направлятися подобает ко всем заповедем Божиим, или едино усвоити смиренномудрие. Боящемуся не странну в невестнице возлежащих явитися. 45. Соедини простоте воздержание, и спряжи со смиренномудрием истину, и явишися правде сопиршественник: на еяже трапезе ина всяка любит собиратися добродетель. 46. Слепа есть без смиренномудрия истина: сего ради и прекословие употребляет руководителя, и утвердитися той убо на нечесом трудящейся. Не обретающей же точию на твердыни злопомнения. 47. Нрав благ красоту свидетельствует добродетели: удес благосостояние, мирну душу. (с. 1100) 48. Первое убо есть добро, еже ни в единой части согрешати: второе же, еже стыдением не покрывати согрешения своего. Ниже убо возвышатися онем: паче же смирятися. Ко оглаголуему самаго себе сооглаголовати, и приимати с радостию запрещение. Сему же не бывающу, не крепко есть все Богови приносимое. 49. К вольному злостраданию подобает, и невольное приимати, еже от диавол глаголю, тщет же и немощей. Сия бо не приемляй, но негодуяй, подобен есть, иже не с солию, с медом же точию хотящему ясти хлеб свой. Иже не всегда убо сласть имать своспитанну, сытость же присно соседа имать. 50. Владыка сый, в рабий образ{Филип. гл. 2, ст. 7.}, одеяйся видится, иже раздранную омывая ближняго словесы Божественными ризу, или сшивая подаянии: да смотряет же сие творяй, да не когда, за еже не яко раб сие совершит, спогубит и мзду, и присущее тому власти достоинство ради тщеславия. 51. Якоже вера уповаемых извещение есть: тако души убо мудрость, добродетели же смирение{Евр. гл. 40, ст. 1.}. И чудо, како самосовершенная, без случаев несовершенна быша. 52. Господь сохранит вхождение твое{Псал. 120, ст. 8.}, глаголет, и исхождение твое, брашен яве яко и глагол воздержанием. Воздержне бо имый от брашен и глагол, о вхождении же и исхождении, похоти убо яже от очию убегает: ярость же яже от гордости укрощевает. О нихже и подобает прежде всех творити прилежание подвизающемуся, и всяким образом тщатися подобает. Сими бо деяние убо здравствует, видение же утверждается. 53. Нецыи о вхождении убо брашен много творят прилежание: о исхождении же глагол, нерадиво залог имут. Таковии не ведают отревати ярость от сердца, и похоть от (с. 1101) плоти, по екклесиасту: имиже чистое сердце созидатися обыче от обновителя Духа{Глава 40, ст. 10.}. 54. Брашен убо не излишнее, о меншем пищи качестве: глагол же неповинное о лучшем молчания качестве обрящется. 55. Разжзи утробы твоя неядением брашен, и истяжи сердце твое воздержанием глагол, и имети будеши на послужение добрых, желательное же и яростное. 56. Сласть убо подчревных низпадает в постничествующих, телу состаревшуся: еще же пребывает гортани, в недостигшем сию праведно умучити. Потщатися убо подобает от виновныя винимаго поношение истерти: яко да не странен тамо яже в воздержании добродетели обрется, студом одеешися. 57. Нужно есть ведети постнику, когда и киими брашны подобает тело яко врага питати: когда же яко друга утешати, и когда утешати, яко немощно. Да не утаятся вражия убо другу, дружняя же врагу. И яже сего паки немощному прилагая, и обоих яко соблазнив, во время искушения обрящет ратующих его. 58. Егда паче наслаждения, пищу питаяйся предпочтеннейшу сотворит, тогда благодать слез пришедши к нему, утешати начинает. И иныя всякия сладости забывати, яко уже без сравнения сладостию сих поглощенней бывшей. 59. Разширяемому убо человеку спряташася слезы: источишася же сия тесный путь возлюбившему. 60. Несть без печали ни грешник, ни праведник. Но той убо, яко не отнюд остави злое: сей же яко не у совершенства коснуся. 61. Яже от нас, по силе добродетели, молитва же и молчание: а яже не в нас, но яко многажды телеснаго сложения, (с. 1102) пост и бдение суть. Еже убо подвижнику удобнейшее есть, сие проходити подобает. 62. Дом убо души есть, терпение: обдержится бо в нем. Имение же, смирение: питается бо тем. 63. Во трудех не терпя, похвалами почтен не будеши: прежде же сласти болезнь усмотревая, избежиши сея печальнаго. 64. Да не свяжешися малым, и не поработаеши большему: не бо обыче зло большее, прежде малаго соделоватися. 65. Взирая к большим, страшен будеши меншим: удобопрезрен же сими явишися, ко онем отрекся. 66. Не возможеши на большая достигнути добродетели, не постизая верха сущим по силе. 67. В нихже обладает милость и истина, во онех и все чтолибо есть Богоугодно: та убо никогоже судит без милости, сия же человеколюбствует ни о едином без истины. 68. С простотою растворив воздержание, во обдержании будеши тамошняго блаженства. 69. Не узриши отнюд ратующия тя страсти, аще не первее землю, от неяже питахуся, оставиши неоранну. 70. Ови убо телесе скверну точию очистити тщатся: ови же, и души. Ови бо убо противу единаго по действу греха мужество прияша, ови же противу страсти: противу же похоти, зело малейшии. 71. Вещество лукаво есть, тела встрастие: души же сладострастие: пристрастие же ума. Порицается же онаго убо осязание: сего же прочая чувства: конечнаго же сопротивно завещание. 72. Сладострастный убо, близ есть страстнаго: пристрастный же сладострастнаго: далече же от обою безстрастный. 73. Встрастен есть, иже согрешательное словество насильствующо имый, аще еще и не согрешает вне. Сладострастен же, иже действо греха имый немощнейше словества, аще и страждет внутрь. Пристрастен же иже в свободе (с. 1103) паче, нежели в работе средних пребываяй. Безстрастен же убо есть, иже всех сих разнствия не ведый. 74. Погибает от души встрастие убо постом и молитвою: сладострастие же бдением и молчанием: пристрастие же безмолвием и вниманием: безстрастие же составляется от памяти Божия. 75. От устен безстрастия, якоже сотове медвеннии словеса вечнаго живота искапают{Песн. пес. гл. 4, ст. 11.}. Кто убо сподобился бы устнам онаго прикоснутися, и посреде сосцу онаго водворитися, и вони сладкия причаститися риз онаго, сиречь законы усладитися добродетелей, сущих паче всех, глаголет, аромат чувствительнаго разсуждения. 76. Нази самолюбия убо ризы, негли суть мнози: любоукрашения же ризы мали суть: тщеславия же ризы, яже и последняя глаголется, назех обрящеши безстрастных. 77. Видимаго убо тела, всяка душа обнажится: греховнаго же, яже здешняго живота, мало сладких причастницы бывшия. 78. Мертвии убо от живых, вси видени будут: умерщвлени же будут греху едини о завещания сей возненавидевшии. 79. Кто себе прежде общия смерти телесныя увидел есть греха нага, и кто есть познавый себе же, и свое естество, яково есть, прежде будущаго облажения? О молитве. 80. Егда посреди чувственнаго и умнаго света словесная стоит душа, дадеся убо ей, по чувственному свету творити, яже суть тела: по умному же, яже суть Духа. Но понеже помрачися убо в ней свет умный: уяснися же древняго ради обычая свет чувственный, аще всяко с умным в молитве не будет сей, отнюд на Божественная взирати не (с. 1104) может. Нужда же душе среди тьмы и света быти: среди убо тьмы по мечтанию, среди же света по навыкновению обращающейся. 81. Внутрь узких молитвы врат, ум страстный внити не может, прежде неже оставити, еже по навыкновению, попечение: поболит же трудяся непрестанно при сенех попечения онаго. 82. Да спребывает во уме молитва, якоже в солнце луча, без неяже чувственная попечения, аки нецыи безводнии облацы окрест летающе, ум возбраняют от своея его светлости. 83. Сила убо молитвы есть, алчба брашен вольна: алчбы же еже не слышати, ни видети: яко не всяка нужда сущих в мире есть ничтоже. О сих не творяй промышления, здание убо поста не утвердил есть: молитвы же зданию на нем распастися сотворил есть. 84. Аще отлучен от всех ум, яже по чувству не будет, гореносен быти не может, и свое познати достоинство. 85. Дне убо знамение есть пост, за явственное, нощи же за неявственное молитва. Обоя убо сия во обоем праведно проходяй, в намеренный достигнет град, в немже отбеже болезнь и печаль и воздыхание. 86. Духовное делание, и без телеснаго притруднаго составлятися обыче. Блажен убо есть, иже лучшее паче вещественнаго дела невещественное вменивый делание: тем бо дела исполнил есть оскудение, пожив сокровенною жизнию молитвы, и явною Богови. 87. Терпети убо нас в вере, молит Божественный апостол: радоватися же упованием: в молитве же пребывати{Рим. гл. 12, ст 12.}, да радости в нас пребудет доброе: аще же сие, убо не терпяй, несть верен. Не радуяйся же, не благонадежен: отверже бо вину радости молитву, внегда не пребывати в ней. (с. 1105) 88. В мирских помыслех ум с начала спребыв толикое с теми любление стяжа, колико усвоение не стяжал бы с молитвою частою. Ибо в нихже, глаголет, коснит, в тех и разширятися обыче. 89. Якоже своего жилища древле разделився ум, тамошнюю светлость забыл есть: тако подобает сему паки в забвении здешних бывшу ко онем востещи молитвою. 90. Якоже некий младенец сосца умерша матерня, обрящет ум молитву, не могущую утешити его. Во инако же сущей, яко отроча от сласти усыпающее на обятиях ея. 91. Тамо, глаголет, на плачевнем, сиречь, одре добродетельныя жизни. По словам в песнях песней, рекла бы и невеста молитва к своему рачителю: дам сосца моя тебе{Глава 6, ст. 11.}, аще присно мне возложишися. 92. Любления с молитвою имети не может, иже всякаго не отрекийся вещества. 93. Разве жизни и дыхания, вне иных буди в молитве, аще хощеши с единым быти умом. 94. Ума Боголюбива свидетельство молитва мысленная, и слово благовременно, разумна помысла, и единовиден вкус свободнаго да будет чувства. В сих убо триех (силах) здравствовати душевная глаголются. 95. Угладитися добре подобает и умягчитися, якоже детей естеству молящагося. Яко да по естеству онех, и сего естество благопокорне приимет от молитвы вчиняемое изяснение. Темже да не нерадит, иже совокупитися с нею любяй. 96. Не вси тожде намерение в молитве имут, но ов убо сие, ов же ино, ов убо молится, аще мощно, с молитвою быти сердцу его всегда: ов же, во еже и превзыти то. Ов же да не помыслы в молитве просецается. Вси же молятся, или соблюдени быти во благих, или не сведени быти злыми. (с. 1106) 97. Аще от молитвы никтоже не смирен бывает. Ибо сокрушается со смирением моляйся. Не убо со смирением молится, иже извнеуду дерзаяй. 98. К вдовице, яже суроваго о отмщении подвизаше судию, взирай моляся{Луки гл. 18, ст. 3.}, не стужит си, когда закоснение благих обетований. 99. Не пребудет с тобою молитва, в помышляемых внутрь уду, и глаголемых вне уду, медлющу ти. Таяжде же узрится обращающаяся ко отсецающему ея ради многшая. 100. Аще не внутрь души входят глаголы молитвы, не убо на ланите лица слезы окрест изливатися попущени будут. 101. Прозябнут земледельцу убо рукоятия не на лице семенам поверженным земли. Иноку же слезы истекут, не без труда действующему глаголы молитвы. 102. Ключь небеснаго царства, есть молитва. Сию держай, якоже подобает, зрит в ней отложенная благая другом ея: едина же настоящая обсмотряет, иже дерзновения во оней не имый. 103. Не может ум во время молитвы со дерзновением глаголати к Богу: растерзал еси узы моя, тебе пожру жертву хвалы{Псал. 115, ст. 7 и 8.}, аще не боязни, и уныния, многоспания и сладоястия, от нихже еже согрешати, желанием лучших не отторгнется. 104. Вне первыя завесы стоит, в молитве паряй: внутрь же бывает, иже единодвижну совершаяй ту. Един же во святая святых приниче, иже с миром естественных помысл, и яже о всяк ум преимущ, разсмотряяй, и некоего отонуду Богоявления сподобляемь. 105. Внегда от внешних упразднившися душа совокупится с молитвою, тогда аки некий пламень окруживши сию, она яко железо огнь, разженну всю соделовает, и есть душа убо таяжде, не ктомуже осязаема. Ниже бо разженное железо внешними прикосновении осязаемо есть. (с. 1107) 106. Блажен есть, иже в житии сем тако зрителен быти сподобивыйся, и свое естеством бренное человекоподобие, благодатию огненно увидев. 107. Вводимым убо тяжек, якоже некий Владыка закон налагается молитвы: предуспевшим же, яко рачение споревающее алчущаго, якоже к пированию многоиждивну. 108. Добре проходящим деятельную добродетель, овогда убо молитва, яко облак осеняющи, палительныя возбраняет от них помыслы: овогда же аки каплями слез сих орошающи, показует Духовная видения. 109. Сладка убо сладость гуслем ударяемым от некоего, внеуду обрящется: душа же несогласующу с нею в молитве таинственному в дусе приглашению, благоумиленна не обыче бывати. О чесом бо помолимся, якоже подобает, не вемы{Рим. гл. 8, ст. 26.}, и прочая, в сие вводит молящагося. (с. 1108) Тогожде разуметельны. Просвещается ум, разуметельнаго видения к высоте взят быв, сия прочет словеса: помрачается же паки впадаяй в страсть. 1. Нужно есть ведети разуметельному, когда убо ум его во стране разумений есть: когда же во стране помыслов, и когда в стране чувственней. И в сей паки, в сущих ли во время, или в чрезвременных паче обретается. 2. В разумениих не сый ум, в помыслех всяко есть: в помыслех же сый, в разумениих несть: в чувстве же бывая, со всеми есть. 3. Чрез разумение убо ум преходит к мысленным, чрез помысл же к словесным слово: к деятельным же, чрез мечтание чувство. 4. Сам в себе ум собираемь, ничтоже ни от сущих по чувству, ни от сущих по помыслу видит: наги бо умы и Божественны лучи точащия мир же и радость. 5. Ино есть ум вещи, и ино слово его, и ино еже чувством возводимое, и то убо есть естество, сие же случай: сего же различие подлежащаго. 6. Многи пути проходя ум, несытен показуется. К единому же пути собираемь молитвы, прежде совершенства утесняемь видится моляся, причастнику отпущену быти к тем, от нихже изыде. (с. 1109) 7. Свыше низведен быв ум, не востекает паки тамо, аще не совершенное дольных сотворит презрение, о Божественных упражднением. 8. Аще душу твою не можеши с единеми сотворити сущими в ней помыслы, поне тело твое уединятися понуди, еже о нем злострадание выну помышляя: тако бо со временем милостию Божиею, и на первое востещи возможеши благородства достоинство. 9. Деятельный убо, покаряти ум удобне может молитве: зрительный же, молитву уму. Той убо от видимых собирая образов чувство: сей же душу к сокровенным во образех словесем преводя, и той убо телес повинует ум словеса не ведети: сей же безтелесных словеса разумевати. Безтелесных же суть словеса телес, свойства же и существа их. 10. Егда ум твой телес, и имений, и брашен сладострастия свободиши: тогда и еже аще твориши, дар чист Богови вменится. Воздастся же тебе, еже отверстися сердца твоего очесем, и ясне поучатися внутрь написанным во уме словесем Божиим, яже паче меда и сота, мысленному твоему вменятся гортани, издаваемою от них сладостию. 11. Не возможеши телес, и имений, и ненужных брашен, желания вышший сотворити ум, аще не в чистое праведных место введеши его. В немже смерти же и Бога память, паки истекши от земнаго сердца изгладит все желания востание. 12. Ничтоже, ни мысли смертныя страшнейшее, ни Божия памяти дивнейшее. Та бо убо есть печали спасительныя подательна, сия же веселия даровательна: помянух бо, глаголет пророк Бога, и возвеселихся{Псал. 76, ст. 4.}. И премудрый: поминай последняя твоя, и во веки не согрешиши{Сирах. гл. 7, ст. 39.}. Не возможно же (с. 1110) втораго кому во усвоении быти, искуса терпкости перваго не приемшу. 13. Дондеже славу Божию откровенных лицем не увидит ум, не может душа глаголати в чувстве своем: аз же возрадуюся о Господе, возвеселюся о спасении его{Псал. 34, ст. 9.}. Покров бо лежит самолюбия на сердце ея, ко еже не открытися ей основанием вселенныя, яже суть словеса бывших, еже не отемлется от нея, кроме вольных и невольных трудов. 14. Не по бегстве от египта, иже есть по действу грех: ниже по прешествии моря, работы, глаголю, яже по усвоению: но по пребывании, еже в пустыни, посреди лежащей действ и движений злобы, израилев народоводитель соглядати может землю обетования, яже есть безстрастия: зрительную посылая и назирательную свою силу. 15. Седящий убо в пустыни, сиречь в недействии страстей, слухом единем Блаженныя оныя имут благая земли. А яже в ней смотрившии в разуме, яве яко тонце видимых видения быша. Сподобльшиися же в ню внити, всем чувством истекающих от нея, яко млеко и мед, перваго, глаголю, и втораго видения словес насытишася. 16. Не у сраспятся Христу, еще естественна движения имый плоти. Ниже спогребеся душевными помышлении привлекаемый. Како убо воскреснет с ним таковый во обновлении жизни жити? 17. Трием сущим в души обдержнейшим добродетелем: посту, молитве же и молчанию: нуждно есть сущему убо от молитвы, избавитися хотящу, в некоем естественном видении почивати. Сущему же от молчания во правоучительной беседе, во второй же благодатней пищи постящемуся. 18. Дондеже в Божественных есть ум, спасает еже по подобию, благ же и милосерд обретаяся. В сущих же по (с. 1111) чувству быв, аще убо благовременне, и приличне сходит, искус дая и приемля во онех, благодарствуя паки к себе возвращается. Вне времене же, и потребы, якоже некий воевода не осмотрелив обрящется, многое своея пресецая силы, внегда ратоватися. 19. Внутрь сокровенный в нас безстрастия рай, образ есть имущаго праведники прияти. Обаче не вси вне онаго обрящутся, елицы внутрь содержимаго быти не возмогоша. 20. Чувственное убо солнце, странны своя лучи от храмины затворенныя сотворяет: мысленное же не может испустити сладких лучей на душу ожидающую, но не имущую чувств затворенных от видимых. 21. Разуметелен есть, иже схождения убо своя велелепно, души же восхождения смиренномудренне располагаяй. 22. Пчела убо цветники облетающи, отонуду меду вины приобретает: душа же веки обходящи различны, отсюду сладость во ум пущает. 23. Поядший убо елень змиев, яд угасити к водным течет источником: душа же стрелами Божественными уязвленна, непрестаннаго влечется ко уязвившему рачением. 24. Тонцыи убо помыслы во уединенной жизни прозябают: умышления же в раздельной: во многобезмолвней же души, помыслы убо отгнашася: уми же точию нази телес к той приближают, иже о промысле и суде словеса, аки некая основания земли открывающе, той изявляют. 25. В раздельной жизни мужеский пол и женский, просте видетися не обыче. Сие бо во иноческой обрящется, в ней же мужа и жены различие, за еже по подобию во Христе Иисусе, не познается. 26. Помыслы, ниже безсловесныя части суть души (не бо есть в безсловесных помысл) ниже умныя: зане ни во ангелех есть: самыя же тоя словесныя суще рождения, яко лествицу мечтание употребляюще, восходят убо к уму от (с. 1112) чувства, яже суть онаго, тому возвещающе: низходят к нему от него, яже суть онаго, советующе. 27. Якоже нецыи из глубины возводими, и нечесого в помощь ятися покушающеся, лукавии помыслы обрящутся, якоже кораблю бедствующей злобе слез потопом. 28. По подлежащему качеству души, или яко морстии разбойницы потопляти, или яко гребцы спомоществовати бедствующей, иже о ней собираются помыслы. Ови убо в пучину влекущи неподобных помысл: ови же ближайший путь избирающе, к тихим брегом корабль уклоняют. 29. Седмому тщеславия помыслу сущу желающая, яко последняя, отринути душа, аще не тех, иже прежде его, совлечется. Не возможет в осмаго иже по тех облещися, егоже и жилище небесно нарицати весть Божественный апостол, и воздыханми облещися{2 Кор. гл. 5, ст. 2.}, мощи его ради веществующих нагим сущим. 30. К совершенней убо молитве, ангельстии приходити обыкоша помыслы: к средней же, Духовнии: к водительней же, естествословнии. 31. Якоже благородное зерна класом, тако и чистота видения, молитвою являтися обыче. Имут же ов убо к возбранению птиц семенособирательных, аки некая копия, окружающия ости: ов же, любомудрствующия во искушениях помыслы ко онех потреблению. 32. Видимая убо душевная, деяния ради посребрена, якоже криле голубине суть: разумеваемая же, глаголю же междорамия, видения ради яко в блещании злата суть{Псал. 67, ст. 14.}. Не украсившаяся бо душа полетети и почити не может, идеже всех веселящихся жилище есть. (с. 1113) Тогожде главизны деятельны и зрительны. Поле зде плодов исполнено духовнаго деяния и видения. 33. Начатки гумна и точила, древле убо древним приносити во храм повелено бысть: ныне же мы деятельныя убо (добродетели) начатки воздержание подобает Богу приносити, и истину: зрительныя же добродетели, любовь, и молитву. Оными убо, похоти безсловесныя и ярости вины пресецающе: сими же мысли тщетныя, и яже от ближняго наветы. 34. Деятельныя убо (добродетели) начало, воздержание и истина: среда же, целомудрие и смиренномудрие: конец же ея, помыслов мир и святыня тела. 35. Деяние есть, не еже деяти просте мощи добрая, но и еже якоже подобает деяти та, время и меру и деемым сприносящу деющему. 36. Видение есть, не еже видети точию, якоже суть телеса естеством, но еже и словеса их к чесому зрят. 37. Несть ни деяние утвержденно без видения, ни видение истинно без деяния. Подобает бо и деянию достословну быти, и видению деятельну: да тем убо некрепка обретается злоба, сим же сильна добродетель, во благоволении благости. 38. Конец убо деятельных, умерщвление страстей: конец же разумеваемых, видение добродетелей. (с. 1114) 39. Якоже вещество зрению очес, тако деяние зрению ума: и якоже око лицу, тако умозрение деянию является. 40. В поприщи деятельныя добродетели, мнози убо текут: един же приемлет почесть, прежде конца тоя приити во видение желаяй. 41. Умиление убо питие приемлет деятельный в молитве: чашею же державною упоевается зрительный. Той убо во яже по естеству любомудрствуяй: сей же и себе не ведый внегда молитися. 42. Не попущаемь есть деятельный в духовне видении намнозе терпети: обретается бо яко странноприят быв некиим, и от онаго храмины скоро отай исходя. 43. Яко во врата убо входят деятельнии заповедей Божиих, внегда молитися: яко во дворы же добродетелей с песньми зрительнии благодаряще: ови убо яко разрешенни быша от уз: ови же яко и пленники яша ратующия их. 44. Подобает по державе деятельныя (добродетели) и державе видения обретатися. Да не по подобию корабля неравная ветрила обносящу, или беду претерпит ветров зельностию, за неумеренность их, или тщету духов за малость яже в ладии. 45. Гребцы убо мысленнаго корабля, разумей благочестивыя помыслы: весла же, животныя силы душевныя, ярость, и желание, хотение и произволение. Сих деятельный убо в требовании есть всегда: не всегда же и зрительный. Во время бо молитвы радоватися сей всем рек, сам себе на кормилех разумом посаждая, чрез всю бодрствоваше в видении нощь, хваления принося содержителю всего. Аще негде и песнь некую рачительну восприемля к своей напевает души, иного моря от далече смотря возвышения, и шумная движения, Божественными ужасаемь судьбами же и оправдании. 46. Иже посреде сый деяния и видения, ниже всяко веслами якоже корабленницы, творит плавание, ниже всяко (с. 1115) мысленными ветрилами: но обема потребу удобоплавания делает, сладце нося и труды деяния, меры ради видения: и словеса несовершеннаго видения, ради помощи от деяния. 47. Зрительный убо с произволением естество имея стекущее, якоже некаково течение без труда творит плавание: деятельный же сопротивляющееся обретая произволению усвоение, многу помыслов терпит бурю, и мало не во отчаяние бедствует тяжести ради приити. 48. Ниже нива не добре возделана бывши, много гобзовательно и чисто воздаяти семя сеющему обыче: ниже деятельную (добродетель) проходяй, аще не прилежне сию и без являтельства проходит, иже о молитвы узрит плод мног же и чист. 49. Попираемой часте, подобна есть земли мысль, непрестанными молитвами следами утираема. Оная бо гладка будет, и сия права к подятию: она убо ног мягких, а сия молитв чистых. 50. Во вещественных ум споспешника имать помысла: в невещественных же, аще того не оставит, пакостника имети будет пакости деющаго. 51. Покров убо имать деятельный на сердце своем в молитве, разум чувственных, открытися за усвоение не могущий: един же зрительный за неодержное, откровенным лицем зрети от части может славу Божию. 52. Молитва яже с духовным видением, земля обетованная есть: в нейже течет яко млеко и мед, разум яже о промысле и суде словес Божиих. А еже с неким естественным (видением) египет есть, в немже дебелейших похотей память в молящихся бывает. Простая же (молитва) манна есть яже в пустыни, яже за единовидное нетерпеливым убо затворяющи желанием обетованных добрая. Терпящим же в таковой утесненной пищи, виновна бывающи лучшаго вкуса и пребывающаго. (с. 1116) 53. Деяние с видением убо, яко тело с духом владычественным: без видения же, яко плоть с Духом произволительным вменится. 54. Словесныя души двор убо есть чувство: храм же мысль: архиерей же ум. Во дворе убо стоит ум, от безсловесных пресецаемый помысл: во храме же, иже от благовременных: ни от единаго же от сих, иже в Божественное святилище сподобивыйся внити. 55. Плачь убо и песнь, и горе, в дому деятельныя души труда ради обретается: глас же радования и исповедания{Псал. 41, ст. 5.} разума ради, в дому зрительныя слышится. 56. Деятельный убо, желает разрешитися трудов ради, и со Христом быти: зрительный же благоволит паче во плоти пребывати{Филип. гл. 1, ст. 23 и 24.}. И за радость юже приемлет от молитвы, и за ближняго пребывающую пользу. 57. В словеснейших убо, видение предваряет деяния: в простейших же, видения деяние, во един убо конец обоя оканчавающася. Сокращенейшее же сие явится, в нихже видение предваряет деяния. 58. Рай есть видение мысленных. В сей убо разуметельный, яко во свой дом внутрь входит молитвою: деятельный же яко путник явится, желая убо внутрь приникнути. Не попущаем же, за еже превзыти оплоту паче Духовнаго возраста его. 59. Телесныя убо страсти, зверем подобни суть, птицам же душевныя: и овы убо осеняет от словеснаго винограда деятельный, не ктомуже и птичныя, аще во видении Духовне не будет. Аще и яко наипаче творит тщание о внутренних хранении. 60. Иже во нравном благолепии лучший есть, деятелен быти не может. Аще и той по патриарху аврааму не вне (с. 1117) будет, яко убо земли своея естественнаго закона: а яко сродства сверстныя себе по усвоению жизни. Тако бо и сей яко печать приимет врожденныя сласти отятие: на нейже иже от рождения покрову облежащу, совершенной свободе не попущает податися нам. 61. Ниже жребя весною при яслех быти, и яже в них ясти претерпевает: ниже новообучаемый ум стеснение от молитвы на долзе терпети может, сладце паче хотя якоже жребя на широту естественнаго исходити ведения, нежели во _псалмопении и чтении обретаемаго. 62. Якоже чресла убо имать препоясана{Ефес. гл. 6, ст. 14.} постом и бдением деятельная добродетель животныя силы своя: и якоже светильники горящя, молчанием же и молитвою разуметельныя зрительная добродетель поставляющи мысленныя силы: то убо онем словество яко пестуна, сия же сим яко невестокрасителя слово взалогственное. 63. Несовершенный ум в плодовитый виноград молитвы не попущается входити, в едина же и едва яко к верхогроздийцам нищ простая _псалмов изглашения. 64. Якоже не вси к беседе царя входити сообедовати с ним могут: тако ниже к беседе молитвы идущии во видении еже во оней увидени будут. 65. Ярости убо узда благовременное бывает молчание: желания же безсловесна, соумеренная снедь: не удободержна же помысла единомысленная молитва. 66. Иже в дольнюю глубину поныряяй чувственнаго ради, и иже в разуметельную мысленнаго ради бисера, да того изнесет, аще не обнажится ов убо одежды, сей же чувства, оба взыскуемаго погрешает. 67. Внутрь убо мысли своея входяй ум внегда молитися, яко с невестою жених в чертозе беседуя. обрящется. (с. 1118) Непопущаемый же внити, вне стоя стеня вопиет: кто введет мя во град ограждения? или кто наставит мя{Псал. 107, ст. 11.}, до еже не зрети в суеты и неистовления ложная{Псал. 39, ст. 5.}, внегда молитися ми? 68. Якова без соли гортани вменяемая есть пища, такова и без умиления вменится уму действуемая молитва. 69. Взыскующая убо еще душа молитву, болящей при рождении есть подобна: постигшая же рождшей, исполнь бывшей о рождестве радости. 70. Древле убо аморей на горе сионе жительствуяй{Моис. гл. 1, ст. 44.}, исходя поражаше нудящихся проходити{Суд. гл. 11, 19.}, ныне же лукавое забвение возбраняет покушающихся прежде чистоты на вышшую и безмолвнейшую взыти молитву. 71. Чистыя молитвы во вражде мнозе обыкоша быти бесове. Ужасает же сих не множество _псалмов, якоже внешния сопустаты воинство, но триех согласие, ума к слову, и слова к чувству. 72. Простая убо молитва, яко хлеб явится молящимся, укрепляющи: а яже с неким видением, яко елей утучнающи: безвидная же яко вино благовонно: егоже насыщающиися несытно изступают. 73. Дивий убо осел, града глаголется, многу народу смеятися, и единорог же ни от кого привязоватися могий. Ум же, над естеством и над противуестественными воцарився словесы, суете убо насмевается помысл: моляся, и ни от чесого, может яже под чувством обладаемь быти. 74. Жезл убо на псы потрясаяй, разсвирепит на себе: бесы же, чисте понуждаяйся молитися. 75. Подобает подвизающемуся чувство убо свое в единовидную состяговати пищу: ум же в единопомысленную молитву. Тако бо не удержимь быв от страстей, и во еже восхищатися ко Господу приидет внегда молитися. (с. 1119) 76. Сладострастнии молящеся аки блатни суще, якоже жабы имут развлекающия их помыслы: мернострастнии же, умозрения яко славии услаждающия в единой на другую ветвь, си есть в различная умозрения прехождением: молчание же свойственно есть безстрастным, и многа тишина помыслов, и мыслей, внегда молитися им. 77. Древле убо моисеова мариам супостатов падение видевши, тимпан вземши, преднача поющим победительная{Исход. гл. 15, ст. 20.}: ныне же в благохвалении побеждшия страсти души, лучшая в добродетелех любы возставши, гусль яже с песнию яко некое видение усмотряющи, таковым образом древле содеянную от доброты превосхождений, не престает о яже о ней радующихся хвалите Бога. 78. Внегда частостию яже в молитве, удержана будут словеса _псалмов к сердце молящагося: тогда и то яко земля блага, начинает само о себе износити: яко шипки, видение безтелесных: и яко крины, светлая телеса, и яко цветы миродыханны, различное Божественных судеб и неудобозримое износити начинает. 79. С веществом убо связався пламень, светоносен бывает, от вещества же разрешившися душа, Богоносна обретается. И он взиматися обыче даже до подгнета: сия же даже до заключения еже в Божественном рачении. 80. Совершенно отрекшаяся себе душа, и всяко к молитве простершаяся, не егда хощет бывает долу, выше твари обретающаяся: но егда праведно быти возмнится вся наша весом и мерою управляющему. 81. Егда от души убо уныние отгнано будет, от мысли же лукавство извержется: тогда ум наг быв простотою, и жизнию безхудожною, и без всякаго на студе прикровения, песнь убо поет и сей нову Богови, Благодарит же песнь (с. 1120) бряцая с веселием, сею будущаго обновления празднует жития. 82. Егда в Божественная действа действоватися начинает молящаяся душа, тогда подобне и та якоже в песнех невеста к подобонравным, сицевая возглашает: Брат мой посла руку свою сквозе скважню, и чрево мое вострепета от него{Песн. песн. гл. 5, ст. 4.}. 83. И воин от брани возвратився, тяжесть оружий отлагает. И деятелен помыслы, во видение грядый. Ниже бо той разве точию во брани потребу имать оружий: ниже сей помыслов, аще не отай пребывает в тех, во яже под чувством. 84. Деятельнии убо в каковом суть положении, зрят телеса: зрительный же в каковом естестве. Едини же прозрительни суще зрят свойство обоих. 85. В свойствах убо телесных познаются безтелесная: в безтелесных же слово пресущное: к немуже разрешитися всякая добрая душа тщится. 86. Словеса безтелесных, якоже кости суть чувственными прикрываеми, ихже никтоже увидит, вне не бывших пристрастия чувственных. 87. Отлагает и воин оружия, оставив брань: и зрительный, помыслы, восходя ко Господу. 88. И военачальник на брани лишась корысти, в печали пребывает: и деятельный в молитве видения Духовнаго. 89. Елень убо на телесныя вод течет источники, от зверя угрызен бывши, душа же сладчайшею стрелою уязвившися молитвенною, на безтелесных лучи. 90. Ниже телесное око зерно пшеничное увидети может, ниже ум деятелен естество свое. Аще не обнажится: оно убо влагалища: сей же усвоения окрест покрывающаго его. (с. 1121) 91. Скрываются звезды при восхождении солнца: помыслы же оскудевают, уму к царствию своему возвращающуся. 92. По конце деятельности, Духовная видения облиявше ум, аки некая солнечныя лучи от определяющаго превозникша, мнятся извнеуду его приходити свойственна суща, и за чистоту того обемлюща. 93. Такова и ум зрителен изглаголати может, егда свыше с небес снидет естества нуждами преклонен, якоже и вещавый: Божественныя доброты что есть чуднейшее? и кая мысль Божия велелепия обрадованнейша? Кая же тако любы зельна и нестерпима, яко от Бога бывающая во очищенней от всякия злобы души, и от завещания глаголющей: яко уязвленна есмь любовию аз{Песн. гл. 2, ст. 5.}. 94. Онаго есть еже глаголати: согреяся сердце мое во мне, и в поучении моем разгорится огнь{Псал. 38, ст. 4.}, не утруждающагося в след Бога последовати молитвою, ниже день человечь желающаго увидети. 95. Да глаголет и деятельная душа по отложении злых, якоже оная в песни к лукавым демоном и помыслом, взирати на суеты и неистовления ложная ю паки нудящим: Совлекохся ризы моея, како облекуся в ню? Умых нозе мои, како оскверню их{Песн. гл. 5, ст. 3.}? 96. Души Благолюбивыя есть глаголати дерзающия к Богу: возвести ми пастырю добрый, где пасеши овцы твоя, и где почивати твориши в полудне агнцем твоим? да сим последующи, не буду яко облагающаяся над стады другов твоих{Песн. гл. 1, ст. 6.}. 97. Ищущии молитвенное деятельная удержати слово душа, и не могущи, такова якоже яже в песнех и та вопиет: На ложи моем в нощех исках, егоже возлюбих: исках, и не обретох его, воззвах его, и не послуша мене{Песн. гл. 3, ст. 1.}. (с. 1122) Востану убо молитвою притруднейшею, и обшедше во граде, на стогнах, и на торжищах, поищу егоже возлюбих, негли обрящется мною, иже во всем сем сый, и всего вне. Насыщуся внегда явитимися славе твоей{Псал. 16, ст. 15.}. 98. Егда вся слезна от радости яже в молитве начнет бывати душа, тогда и та не обинующися, яко к своему си жениху невеста вопиет: Да снидет брат мой в вертоград свой, и да яст слез моих, яко плодов древесных{Песн. гл. 5, ст. 1.}, содеянное утешение. 99. Егда деятельная душа от множества и доброты тварей чудитися начнет творцу, и наслаждатися сущею от них сладостию, сими и та ужасшися вопиет: Что украсился еси женише, раю отца твоего? цвет полный и кедр его, якоже кедры ливанстии. Под сень его восхотех и седох, и плод его явися сладок в гортани моем{Песн. гл. 2, ст. 1 и 3.}. 100. Аще царя подемляй в дом свой, тако светел обретается и знаменит, и всякия радости исполнь, кольми паче душа Царя царей внегда очиститися ей подемшая по неложному онаго обещанию. Обаче благоговейно зело таковая себе удержати должна есть. Вне убо помещущи все еже не ко упокоению онаго мнящееся: внутрь же вводящи все его ко онаго угождению. 101. Ожидаяй зван быти от царя воутрие, о чесом в попечении ином виден будет, точию о поучении словес ко онаго сущих угождению. Сие блюдущи душа, не явится не уготовленна к тамошнему судищу. 102. Блаженна душа, яже, за яже днесь приити чаяти Господа своего, ничтоже вменяющая весь труд дневный ниже нощный за еже абие воутрие сего чаяти являтися. 103. Вся убо видит Бог, зрят же Бога, зрящии ничтоже внегда молитися. И елицы убо зрят Бога, и услышаваеми (с. 1123) суть от него, елицы же не суть услышаваеми, ниже зрят его, блажен же веруяй, яко видимь есть от Бога: не подвигнется бо нога его без угождения онаго. 104. Внутрь нас сущаго царствия{Луки гл. 17, ст. 21.} благая, ихже добролюбиво око не виде, и слух честолюбив не слыша, и на сердце тще Духа свята не взыдоша, обручения суть имущих даятися праведником благ, в будущем царствии от Бога, и иже в сих не наслаждаяйся, иже суть плоды Духа, в наслаждении онех быти не может. 105. Деятельных помыслы, еленям уподобишася. Якоже бо сии овогда горе суть на высотах, ради страха ловцев: овогда же низу во удолиях ради желания сущих в них: тако и тии, ниже всегда в видении Духовнем быти могут ради немощи их: ниже присно в естественнем, занеже не присно покоя ищут. Обаче зрительнии земных видений презрители бывают. 106. Капли убо росы, земли упоевают бразды: завещания же душевная в молитве, слезная воздыхания от сердца издают. 107. Разумеваемаго в Троице Божества, никтоже узрит в видении, вещественныя двоицы, и близкия той единицы превыше не явивыйся, ниже сея будет вышший, не соделав свой един в познаваемых ум. 108. Не толико не удобно обрящется пресещи путь реки, дабы не стремитися долу, колико стремление ума удержати, да в видимых не разсевается, к горним же и сродным молящемуся, егда восхощет, совозводится: аще сие убо и по естеству, тоже паче естества бывает. 109. Очищаемии внутрь в видимая ум направляюще, толикаго исполняются ужаса, и толикия радости, яко ничтоже ино от земных вместити могут, ниже аще бы и вся стекалися к ним вожделенная. (с. 1124) 110. Довлеют точию речении законы естества, да чудимся онем: разсуждаемии же вертогради обрящутся благоцветнии, якоже от небеснаго сладкопития чистыми цветы точаще Духовнаго пирования сладость. 111. Росистыми убо цветы цветников царицу роя окружают пчелы: во умилении же бывающем непрестанно души, яко свойственны умныя силы окружающе, вкупе соделовают желательная. 112. Во видимем убо мире, яко ин некий видимь есть мир человек. В разумеваемем же помысл, небесе бо и земли, и сущих посреде, сей онех есть возвеститель. Ума же и чувства, и еже онем исповедатель есть помысл, ихже кроме, оба мира глуха были быша. 113. Не тако с радостию отпущен быв пленник временем шествует яко ум усвоения свобожден быв к небесным яко ко своим шествует радующеюся ногою. 114. Не со вниманием молящемуся, иноязычник убо _псалом вменится, и той _псалму яко иноязычник, и яко неистовящеся оба бесом. 115. Не тожде есть, имже мир распятся, и иже миру: овым бо гвоздия, пост, и бдение: овым же нестяжание, и уничижение. Кроме же вторых, труды первых безполезни. 116. Никтоже чисте помолитися может, добротолюбивою страстию и честолюбивою держимь: сих бо одержанием, и суетства помыслы усвоение имуще, аки ужи онем сплетающеся бывают, низвлачаще аки птицу связани возлетети покушающся ум во время молитвы. 117. Не возможно во время молитвы мирну быти умом, другиню не стяжавшему воздержание и любовь: то бо юже на душу от тела вражду разорити приподвизается: сия же юже на ближняго Господа ради и отсюду преимущий всяк ум мир приходящ обитель творити в тако умирившемся обещавается. (с. 1125) 118. Нуждно есть в Царствие Божие подвизающуся внити{Матф. гл. 11, ст. 12.}, избыточествовати во благих делу правды его, в милостынях убо от лишения подаянием, во трудех же иже о мире изречением еже о Господе терпения. 119. Ниже оскудевай в добродетели за нерадение, ниже избыточествуяй за возношение, внутрь пристанища еже в безстрастии обрящутся: ни един бо, ни другий, яже от правды в наслаждении бысть благих, средственнику обретающуся в них, оскудению, и превосхождению. 120. Ниже земля, аще не умножено земледельцеви семя, даровати имать, богата может соделати его, точию на семя подающи, или и мал некий прилог. Ниже деятельными совершаемое, аще не лучшее паче произволения его тщание ко Богу обрящется, праведна соделати может. 121. Не вси не любящии ближняго ненавидети могут, ниже не ненавидящии его любити. И ино убо есть еже завидети онаго предспеянию: ино же еже предпятием тому не бывати к предспеянию. Последния же злобы степень обрящется, еже не токмо угрызаему быти о онаго предпочтениих, но и оболговати онаго добрая, яко не такова суща. 122. Ины суть телесныя страсти, и ины душевныя. Ины же по естеству, и ины яже противу естества. И иже овы убо отреваяй, о овех же промысла не творяй, подобен есть человеку, оплот убо высок покровен на звери поставляющу, соуслаждающуся же птицам ядущим мысленнаго винограда гроздия, воистинну светлая. 123. Вопервых душа в мечтании бывает злаго, таже в желании, посем в сласти, или в печали, таже сице в чувстве, и посем во осязании видимом, и неявном во всех, с последующим, помыслом, кроме перваго движения, емуже прияту не бывшу, все еже по нем зло недейственно обрящется. (с. 1126) 124. Приближающиися убо к безстрастию, мечтании единеми колеблеми суть, желании же, умеренно страстнии, в чувстве же бывают злаго. Злоупотребляющии убо потребная, но скорбящии, во осязании же сопребывающии с ним безпечально. 125. Сласть во всех убо телесных седалище имать удесех, не всем же такожде стужающи видится, но овем убо наипаче в желательной части души, овем же в яростной, инем же в словесней, чревобесием, яростию и лукавством, виною всех скверных страстей. 126. Нуждно убо есть чувства яко врата отверзати града: нуждно же не попущати во отверзении нуждных совходити языком, хотящим браней и рати виновным бывающия. 127. Сласть убо, мати желания: ярости же острожелчие, зависти же лукавство бывает: не имать же мира с последними, противу начальных не подвизаяйся, ниже в пристанище умереннострастия может входити нуждею заповеди делая. 128. Прилоги отражающии не попущают внутрь словеснаго винограда, яко зверем, помыслом входити, и сущих его на вред бывати. Сочетавающиися же убо, но не соуслаждающиися, просте входити тем попущают. Не касатися же ничесого сущих его, сладце же убо сочетавающиися со страстьми чрез помыслы, в сосложение же не приходящии, уподобишася оставльшим вепри дивия внутрь села, и оплота внити, в сытости же того виноградных быти гроздий не попустившим. Таже обретоша того силы своея крепльша, в сосложении множицею страстей обретающееся. 129. Не у достиже в простоту еще требуяй прилежания о оплоте воздержания: совершенный бо, глаголет, не воздержится, но еще подвизаяйся. Подобен же есть имущему виноград или ниву, не посреде многих иных виноград или нив, но во угле негде: и сего ради требующему многа хранения, и трезвения. В простоту бо пришедшаго от всего виноград (с. 1127) неприкосновен бывает. Якоже царю или иному кому вкупе начальствующу страшну, и от единаго слуха, татем же и приходящим, ужасатися творящим начинание. 130. Мнози убо на крест злострадания восходят, мали же и гвоздия его приемлют: трудов бо и скорбей яже по произволению послушливи мнози, без произволения же приходящих, едини миру сему совершенне умершии и покою его. 131. Всех убо кожаных риз мнози совлекошася, последния же яже тщеславия, едини иже матери его самоугодия возгнушавшиися. 132. Похвалу человек и отраду тела приемляй, убо не стерпеваяй же, сей последния тщеславия ризы наг быв, со многими воздыхании взыскуемаго жилища Небеснаго в светлость отсюду сподобися облещися. 133. Ино действо, и ино дейстование, и сие убо греха совершившагося есть показательно, то же сладострастия единаго внутрьуду действуемаго, но не вне: якоже от своея убо не преходящии земли, дань же носящии обаче начальствующим тоя желанную. 134. Вкусу держащуся в сластех, не возможно и всем чувствам не споследствовати, аще хладнейших и мирна быти мнятся подчревная, якоже яже состаревшихся, разжжения не страждущих от увядения. Но не за еже не раждати целомудренна неплоды прелюбодействующи суждена будет. Целомудрствовати же всякаго не страждущаго внутрь, рекли быхом ни зрением услаждающагося. 135. В пищи и зрении и гласех желательное души обличается, яково есть: усладительными же и инако сущими во вкусе, и зрении, и слухе, или яко употребляюще их, или яко злоупотребляюще, или средственно ко обоим обретающеся. 136. В нихже страх не предваряет, яко овцы, не имуще пастыря в смущении помыслы обрящутся, во благочинии же (с. 1128) и внутрь ограды сущия по благозаконию, последующу или предыдущу ему. 137. Веры сын есть страх, заповедей же сей есть пажитник: и иже матерь не стяжавый, овча явится, яже о Господе пажити не сподобится. 138. Ови убо начала едина имут добрых, ови же и сих среды ови же и концы их: без нихже яко воин наг кийждо обрящется, или сановник без оброков. И сего ради той убо свою токмо храмину, от начинающих тей стужати соблюдая, сей же не в чести приличне обретаяся, с нимиже аще собирается. 139. Подущающии нас со сластьми ходити гортанию несовершенных сущих, подобно нечто творят срезовати побуждающим раны во здравие уже пришедшия, или красты за сладость чесати, или возжигающая огневицу ясти, или разграждати виноград свой, и попущати входити яко вепрю дивию мудрованию плоти, и мысли благия яко гроздия поядати, имже повиноватися не подобает, ниже безвременными прекланятися ласкании, человек же и страстей, укрепляти же паче оплот воздержанием, дондеже престанут и зверие плотския страсти рыкати, и яко птицы помыслы не сходити губити виноград, гобзующу душу видении, яже во Христе Иисусе Господе нашем, емуже слава во веки, аминь.