<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 1055) Иже во святых отец наш феодор бе при царствовании ираклиа, и константина брадатаго, к шесть сот шестьдесятое лето, первее же постническим житием подвизався в обители святаго саввы, послежде избранием Божественным на епископский престол града едеса возведеся, и многих чудес самоделатель быв в живых еще, и по смерти, и Божественными своими ученьми, многих мучеников и спасаемых показав, в единонадесятый день иулиа в вечным обителем преставися, якоже в книзе нарицаемей калокаирини житие его списася. Писания же аще остави и ина некая, известно о сем сказати не можем. Настоящия же сто глав, его трудами сочиненныя, в число прочих постнических книг включены суть. Многообильный бо главы сия Священнаго трезвения и Духовныя пользы плод предлагают чтущим с разсуждением, и спасения себе желающим: приидите и обильнейший плод обымите. В конце же настоящих сих глав и умозрительное списание имущее имя феодора приложися, еже тогожде со главами трезвеннаго разума быти, и темжде словом последовати усмотряюще, яко от неких образов и знамений, истинному быти произведению тогожде феодора заключаем. (с. 1056) Главы детельныя Преподобнаго отца нашего феодора едесскаго. 1. Понеже убо благаго Бога благодатию отвергшеся сатаны и дел его лукавых, ко Христу приложихомся банею пакибытия, и ныне паки иноческим обещанием, соблюдем заповеди его: сего бо от нас требует, не точию сугубое обещание, но и естественный долг, имже созданы бывше Богом первее добри зело, таковы и должны есмы быти. Аще бо и грех вшед от невнимания нашего еже чрез естество введен, но и паки призваны быхом милосердия ради милости Бога нашего, и обновлены быхом страстию безстрастнаго, и ценою искуплены быхом, кровию Христовою. Избавлены бывше древняго преступления праотеческаго, то уже аще будем праведни, ничтоже чудно: но еже отпасти от правды, се окаянно, и всякаго рыдания достойно. 2. Якоже дело благо, кроме правыя веры бывающее, мертво есть, и отнюд недейственно: такожде и вера едина, без дел праведных, не избавит нас вечнаго огня. Любяй бо мя, рече Господь, и заповеди моя соблюдает. И аще убо любим Бога и веруем вонь, противу заповедем его делание сотворим, да жизнь приимем вечную. Аще ли презрим заповедей его соблюдение, емуже вся повинуется тварь, како верными себе наречем? Почтены суще паче всякия твари, и непокоривейшии всех обретаемся всесотворшаго повелению, и невозблагодатны о благодати являющеся. (с. 1057) 3. Заповеди Христовы блюдуще, ничесоже тому подаем, не требующу, и всех благих подателю, но себе благодеем, вечный себе исходатайствующе живот, и наслаждение неизглаголанных благ. 4. Всяк противляяйся нам на исправление заповедей Божиих, аще и отец есть, или мати, или ин ктолибо, мерзок нам буди и ненавистен, да не услышим: любяй отца или матерь паче мене, несть мене достоин. 5. Со всею убо силою понудим себе на делание заповедей Господних, да не узами неразрешимыми похотей лукавых и сластей душегубительных стягнемся, и речено будет о нас безплодныя смоковницы осуждение: Посецы ю, да не всуе и место упражняет: всяк бо, рече, не творяй плода добра посекается, и во огнь вметается{Луки гл. 7, ст. 9.}. 6. Похотьми и сластьми побеждаяйся и в мире живый, скоро в греховныя впадает мрежи: грех же единою сотворен быв, огнь есть в тростии, и камень с горы сваляяся, ровище водное быти претворяя. Сия убо реченная, всякими образы стяжавшему их делают погибель. 7. Душа убо елижды разсверепеет, на чрезестество отторгшися в сласти, жилище есть страшных зверей, по реченному: ту почиют, рече, иппокентаври, ту вогнездятся ехидны, и стичутся беси иппокентавры, яже суть различныя страсти безчестия. Да аще на естественное взыдет, может победити егда хощет, дондеже с плотию сопряженна есть, и укрепит себе любоделанием, и тако в естество приидет, и в законе Божии поживет: прежде же угнездившиися зверие побегнут, и живота нашего стражие ангели приидут, день веселия творяще о обращении ея, и Духа благодать приходит в ню, учя ю разуму: яко да сохранена будет во благих, и на большая взыдет. (с. 1058) 8. Оружие отцы духовное, молитву уставляют, и несть мощно разве тоя на брань исходити, да не в страну врагов яко корысть пленены будем: молитвы убо чистыя несть стяжати, не пострадавшему ко Богу правым сердцем, той бо есть даяй человеку разум. 9. Еже стужатися души от страстей, и влагатися той в свары и не хотящей, ничтоже есть чудно: а еже коснети в нас помыслом их и страсти подвизати, яже в нас суть. Первое убо безгрешно есть, второе же аще мужески противу бравшеся победим, венец прияти сподобимся: аще ли слабостию и устрашением побеждени будем, мук и томления достойни будем. 10. Три убо суть рождественныя страсти, ихже ради бывают вся. Сластолюбие, сребролюбие, и славолюбие, имже последуют других пять духов лукавых, и к тому от тех многое бывает множество страстей, и виды различнообразныя злобы. Победивый убо три начальники старейшия, разрушил есть и пять, посем и вся победи страсти. 11. Елико убо страсти содеяхом, сих память душу страстне мучит: егда же страстная помышления отнюд от сердца очистятся, яко ниже прилагатися к нему, тогда знамение является отпущения прежних грехов. Дондеже убо страстне душа подвизается, повинна является, и греховное в ней познавается одержание. 12. Телесным убо и плотским страстем, телесными злострадании умалятися подобает: душевным же и не явленным смиренною мудростию, и кротостию, и любовию разорятися. 13. Похоть убо страстну увядает воздержание со смирением, ярость же палящую укрощает любы. Помыслы лукавыя собирает молитва простерта с памятию Божиею, и тако тричастное души очищается: се бо исправляя Божественный апостол рече: мир гоните и святыню, без неяже никтоже узрит Господа{Евр. гл. 12, ст. 14.}. (с. 1059) 14. Нецыи убо недоумеша рекше, яко помысл ли страсти воздвизает, или страсти помыслы? И овем убо се глаголющим, некиим же оно, аз же глаголю, от страстей помыслом подвизатися: аще бо не быша были в души страсти, то не быша тех помышления стужали ей. 15. Обычай есть присно борющимся с нами врагом, возможныя и готовыя нам добродетели возбраняти, невозможныя же и неутвержденныя любовию крепкою нам творити влагают: молчаливым убо и отшельником, желание общаго жития правила влагают, под властию же преуспевающих, молчаливых дела делати понуждают: и сею убо лестию на куюждо добродетель превзимаются: но мы убо разума не не вемы, вся добрая ихже ведяще, во время их и в меру творим: паки же вредное, безмерное и неутвержденное до конца возненавидим. 16. В мире живущим и приближающимся к вещем страстей, бранию по деянию беси воюют и борются, сущим же в пустынях, вещей ради недостатка, помышленьми стужают: зело же лютейши первыя вторая брань бысть. Она бо, вещи ради, времене требует и места готоваго, сия же ума благоподвижна некако и неленостна: противу тойже безплотней брани, противная брань, нам чистая молитва дана есть. Тем и победительна сия взаконенна есть, вооружающимся тою к бранем мысленным. 17. Кончину убо страстем, мертвость Божественный апостол являя, рече: иже суть Христовы, плоть распяша со страстьми и похотьми{Галат. гл. 5, ст. 24.}. Егда убо страсти умертвим и похоти погубим, и плотский смысл повинем Духови, тогда возмем крест, и в след пойдем Христа. Ничтоже бо ино отхождение от мира есть, но умерщвление страстей, и явление во Христе сокровеннаго живота. (с. 1060) 18. От востания телесе смерти сея страждущии, и на брань по вся часы на ню вооружающиися, не плоть, но себе да порицают. Аще бо тии не дали быша крепость и послабие той, и волю ея творили, то не быша толико от нея страдали. Или не ведают распенших ю со страстьми и похотьми, носяще ту яко да поспешницу паче ко благим притяжут, а не к сопротивным, и повинуша ю пребывати в Божии законе? И тии убо такожде да творят, и тогожде, егоже и предреченнии насладятся покоя: даждь бо, рече, кровь, и приими Дух. 19. Всякое сложение помысла, к некоей отреченней похоти, рекше мановение сластное, грех есть иноку. Первее убо помысл приходит страстною частию ум омрачая, таже посем прекланяется душа к сласти, не держащися брани, и к тому сложение наричется, еже якоже речеся грех есть, понеже подвизает глаголемую страсть, посем помалу приходит и в деятельное деяние. Сего ради ублажает пророк вавилонския младенцы разбивших о камень{Псал. 136, ст. 9.}, да уведят иже алфавиту сему учившиися реченное. 20. Любве мира ангели служителие суще, радуются о нашем покаянии, и предуспеянии в добродетели, и отсюду тщатся Духовных исполнитися нам Боговидений, и поспешествуют на всяко благо. Бесы же гнева и злобы суще содетели, радуются разоряему видяще добродетель, и дела благословна подвлагают, во еже в срамная мечтания души наша уклонити. 21. Вера есть завещание благо, та бо раждает нам страх Божий: той же научает нас заповедей соблюдению, еже глаголется действенно, от негоже возрастает нам блаженное безстрастие: любы же совершение всех сущи заповедей, вся сосвязует и утверждает. 22. Якоже телесное чувство здраво бывая, ощущает некий одержащий его недуг, не разумеваяй же, нечувствием (с. 1061) недугует. Такожде и ум, свою детель спасаему аще стяжет, разумевает свою силу: и весть откуду ему страсти мучительне приходят, и к ним крепкую воздвизает брань. Люто же аще не чувствуя провождает дни, с нощию борющемуся уподоблься, сония помыслы бранныя вменяя. 23. Егда словесное наше неослабно прилагается к Боговидения добродетели, и похотное к самому желающи дателю благих Христу, яростное же на бесы вооружается, тогда по естеству первозданному силы наша действуют. 24. Тричастна есть всяка словесная душа, по Богослову григорию, в словеснем составляющейся добродетели, смысл нарече и разум и мудрость. В яростнем же мужество и терпение, в похотнем же любовь и целомудрие, ивоздержание. Правда же во всех сих несеянна бысть достойне действовати устрояя. И смыслом убо сопротивныя покоряти силы, и спешити к добродетелем. Целомудрием же безстрастне вся созерцавати. Любовию вся человеки яко и самаго себе любити. Воздержанием ко всякой сласти пакость творящей, мужеством же и терпением на невидимую брань вооружатися. Се составление Богословесныя души язык извещавает. 25. Целомудрию прилежай, блаженную любит чистоту, юже никтоже погрешит безстрастием ту нарек. Да удержит убо и поработит плоть, смиренным помыслом Божественную призывая благодать, и желаемая получит. Питаяй же тело в невоздержании брашен, Духом блуда болезнен будет. Якоже вода многа угашает пламень, тако раждежение плоти и мечтания срамна, погубляет алкание со смирением. 26. Злопомнения страсть, отнюд да отступит от души твоея, _о Христолюбче! никакоже даждь место вражде: якоже бо огнь сокровен в коноплях, тако и злопомнение гнездяся в сердцы, паче же молися за оскорбившаго тя тепле, и добро твори ему, елико аще рука твоя может, яко да (с. 1062) избавиши душу твою от страсти, и не без дерзновения будеши во время молитвы твоея. 27. В сердцы смиренных почиет Господь. В сердцы же гордых страсти безчестия. Ничтоже бо тако сильно возмогает на ны, якоже гордостнии помыслы. Ничтоже сице искореняет злое былие душевное, якоже блаженное смирение, темже и страстоубийца в правду нареченно бысть. 28. От помысл злых душа твоя да очищается, и в добрых да просвещается разумех, имея присно во уме реченное: яко сластолюбиво сердце, темница и верига есть во время исхода: трудолюбиво же дверь отверзенна. Душу бо воистинну чисту исходящу от телесе ангели наставляют к блаженному ведуще животу, оскверненну же и не покаявшуся, увы мне, бесы приимут. 29. Красна убо глава украшенна венцем многоценным, камением индийским и бисеры светящися. Краснейша же несказанно душа богатящаяся разумом Божиим, и светлыми Боговидении просвещенна, всельшийся имущи в ню святый Дух. И кто исповесть доброту блаженныя тоя души. 30. Ярости и гневу, _о мнише! не даждь водворитися в тя. Муж бо яр, не благообразен. В сердцы же кротких, почиет мудрость. Аще ли гнева страсть обладает душею твоею, лучшии тебе обрящутся в мире живущии, и посрамлен и небрегомь будеши мних. 31. Во всякой напасти и во всякой брани, молитву стяжи, непобедимое оружие, и Христовою победиши благодатию. Чиста же сия да будет, якоже мудрый нам учитель вопиет: хощу бо, рече, молитвы творити мужем на всяком месте, воздеюще преподобныя руки без гнева и размышления{1 Тим. гл. 2, ст. 8.}. Таковей же не прилежай молитве, предан есть напастем и страстем. (с. 1063) 32. Вину убо, веселити сердце человеку{Псал. 103, ст. 15.}, писано есть, ты же плакати и рыдати обещався, таковаго уклонися веселия, и возвеселишися даровании Духовными, веселяся же вином, со срамными поживеши помыслы и во многи впадеши скорби. 33. Праздники не винопитием твори, но обновлением ума, и души чистотою, обядаяйся же и вино пияй, прогневаеши паче праздником начальника. 34. Бдети в молитвах и во чтениях всегда убо, в праздники же паче повелено нам есть. Бодр убо инок тнит разум свой к Богу в видениях душу свою насыщая. сон же мног ум одебелевает: но блюдися не вдати себе во бдение неподобно помысл злых, лучше бо есть спати, нежели в словесех и помыслех бдети суетных. 35. Змию питая на лоне, и помысл лукав в сердцы, умерщвленна будета: ово убо тело уязви жалом ядовитым, ов же в души положив яд смертоносен. Но исчадия змиина скоро убием, и помыслы лукавыми в сердцах не болим, да не горце болети имамы. 36. Душа чиста сосуд избран правды нареченна будет, и оград заключен, и источник запечатлен, и престол чувства. Сквернами же нечистыми оскверняющийся скаредия и злосмрадия исполнится. 37. Удобрением риз, исполнением чрева, и от бесед вредных, злым раждатися помыслом в души, от искусных и делательных отец слышахом. 38. Похоть имения в душах иноков да не водворяется, многоименный бо монах, корабль есть вод исполнен, волнами печали труждаяся, и в скорбней глубине погружаяся, многим бо страстем сребролюбие родительница есть. Темже и корень всему злу{1 Тим. гл. 6, ст. 10.}, в правду нарицается. 39. Неимение и молчание, сокровище есть сокровенно на селе монашескаго жития, шед убо продаждь имение твое (с. 1064) и даждь убогим, и се купи село, и сокровище вскопав себе некрадомо сохрани, да обогатееши богатством неистощаемым. 40. Со отцем Духовным вселився, и пользу ощутив от него, никтоже тя да отлучит от любве его и совокупления, не осуди его, ни в чемже не злослови обличаемь, или биемь, не вдаждь слуха твоего никомуже нань глаголющу, не сочетайся с клеветающим нань, да не прогневается на тя Господь, и потребит тя от книг животных. 41. Отречения подвиг, покорением, якоже и от искуса навыкохом, сего же преходяй, треми да оградится знамении оружия, верою, реку, и надеждою, и любовию, и подвигом добрым подвизався, правды приимет венец. 42. Не буди делом отца твоего судия, но заповедем совершитель, обычай бо бесовом того недостатки показовати тебе, да твои уши оглушат к глаголемым (от него) или на брани не крепка тя и страшлива покажут воина, или пребывати в неверствия помыслех, и разслабивше тя повинующася им слаба сотворят ко всякия добродетели образу. 43. Отеческих преслушаяйся заповедей, первых обетов отречения преступник обретается: послушание же приемый и свою волю мечем смиреннаго смысла отсек: сей обещание исполни, еже пред многими послухи Христови обещася. 44. Назнаменовавше разумехом, и ясно научихомся, яко в покорении отечестем пребывающим, зело завидят врази живота нашего беси, скрежещуще зубы своими на ня, и всякия ухищряюще козни, еже отступити им и лишитися отеческих недр. И вины показуют им аки благословны, раздражения приводят, ненависть на отца возставляют, того наказания яко буесловия являют, обличения же яко стрелы из_ощренны подтыкают. И что рече свободь сый, и раб бысть, и паче раб немилостиваго, и неразумнаго, и невежды, (с. 1065) и неразсудительнаго, и яростнаго сего бысть человека суща по всему тебе подобна, доколе же игом работным стираешися, и свободнаго света не у зриши. Посем гостинницы, и недужных посещения, и убогих милования влагают. Посем конечнаго молчания, и подвиги иноческия яже в молчании, делати похваляют, и всех злых плевел образ в сердце насевают страдальца и воина Христова благочестиваго, да токмо от Духовныя ограды того ижденут, и от безмолвия тишины извлекше, к мятущейся душе пагубней бури в море ввергнут. Посем яко пленника в свою власть приемше, по злей тех воли последовати сотворят. 45. Тебе же в покорении отчи сущу, вражия борющая тя лесть да не утаится, ни обещания своего еже к Богу забывай, ни бесовским наруганием побежден бывай, ни обличения, ни укорения отбегай, ни влаганию злых помысл повинуйся, ни лютости отеческия бегай, ни самоугодия и самоволия дерзостию, смиренномысленному и Благому безчествуй игу, но владычнее в сердцы положив слово: яко претерпевый до конца, той спасен будет. С терпением тецы на предлежащий ти подвиг, взирая на начальника веры и совершителя Иисуса{Евр. гл. 12, ст. 1 и 2.}. 46. Златарь убо злато в горнило вложив, чистейше творит е, и новоначальный инок, покорения страданием себе вдав, и всем скорбным по Божественных заповедех разжигаяся, по трудех же и терпении и скорбех обычаи злыя погруж, и послушания навык, светел устрояется, и достоин бывает небесных сокровищ, и негибнущаго пребывания и Блаженныя кончины, отонудуже отиде болезнь всяка, печаль, и воздыхание, веселие же и выну благоухание насажденно есть. 47. Вера права, и соблюдение заповедей, раждает Божий страх, идеже бо Божий страх, ту и заповедем соблюдение, от (с. 1066) соблюдения заповедей, составляется действенная добродетель, сея же плод есть чистая молитва, и Боговидению начало, безстрастие же достигий, в любовныя двери вниде, о любви же возлюбленный ученик предгласи: Бог любы есть, и пребываяй в любви, в Бозе пребывает, и Бог в нем{1 Иоан. гл. 4, ст. 16.}. Благосочетанну некую главизну глаголющу некоему слышах: яко ничтоже рече о очищающих телеса составляется посем со очищшимися, добродетели же купно очищают душу, и со очищенными спребывают. 48. Яко красно воистинну и добро мнишеское житие, понеже заповедем и закону, имже начальницы апостоли, того самаго Владыки, от святаго Духа научишася, исполнители бывают. Христову бо воину невещественну подобает быти, и безпечальну от всякаго мудрования и деяния мирскаго, якоже рече апостол: никтоже воин бывая, обязуется куплями житейскими, да воеводе угоден будет{2 Тим. гл. 2, ст. 4.}. 49. Подобает убо мниху невещественну быти, безстрастну, всякия похоти злыя кроме, не питательну, не пиянице, не закосниву, не лениву, не сребролюбиву, не сластолюбиву. Аще бо кто от сих не удалится, не может ангельскаго жития исправити, сие же даруется предреченная тщащимся исправити иго благое и бремя легкое, Божественной надежде облегчающей сия, и все безстрастне и с покоем действовати. Сладко поистинне таково житие, и делание красно, и часть благая, яже не отимется от души стяжавшей сия. 50. Житейския отступивый печали, и во иноческий вшед подвиг, не восхощи богатства на раздаяние убогим, есть бо и сия лесть лукаваго к тщеславию приводящая, яко да в многопитание вложит ти ум. Аще бо и хлеб токмо имаши и воду, можеши и сими страннолюбия творити дело, аще ли и сего не имаши, токмо предложением благим приими (с. 1067) страннаго, и слово утешения дав ему: тако можеши страннолюбия мзду прияти. Имаши бо и в евангелии от Господа свидетельствуемую вдовицу{Марк. гл. 12, ст. 42.}, двема цатама токмо превозшедшую богатых многое подаяние. 51. Сия же реченная в молчании седящим заповедащася, сущим же в покорении отчем, едино точию тем во уме имети достоит, еже ни в единой отнюд делательныя заповеди отпадати, сие бо исправляющии, все суть исправльше, якоже паки и сопротивное разумевай, аще от таковаго отпадут жития и опасения небрегомы по всякому образу добродетелей и жития Духовнаго будут. 52. Приими мой совет _о Христолюбче, и возлюби странствие и любы: сия бо тя изменят твоего отечества печали. Родительными печальми, и ближних любовию не прельщайся, пребываний яже во градех бегай, в пустыни же паче терпи глаголя с Давидом: се удалихся бегая, и водворихся в пустыни{Псал. 54, ст. 8.}. 53. Особна и удаленна от мира гони места, аще и скудость нужных имут, и аще обступят тя врази яко пчелы и злыя осы, всякия ти прилагающе брани, не отступай, ни устрашайся, не преклони им добропослушлива слуха, ни отбегай постническаго подвига, долготерпеливно же паче постражди, поя в себе и глаголя: терпя потерпех Господа, и внят ми, и услыша молитву мою{Псал. 39, ст. 2.}. И тогда узриши Божия величия заступление, строение и ин всяк на спасение промысл. 54. Други имети ти подобает _о Христолюбче, полезныя слагающияся к житию делы: мужие бо рече, мирны да будут други твои, и братия Духовна, отцы святии, о нихже рече Господь: мати моя и братия моя сии суть, творящии волю отца моего, иже есть на Небесех. 55. Не буди похотник брашном различным и изрядным, и обядении смертоносных, и техже обычных, аще (с. 1068) мощно есть, отрицайся сытости, речено бо есть: не прельщайтеся сытостию чрева. 56. Вне келлии частое пребывание, да будет ти отреченно, (паче же молчати изволи,) есть бо тщетно зело: отемлет благодать, омрачает смысл, увядает желание: сего ради речено есть: парение похоти пременяет ум незлобив{Прем. сол. гл. 4, ст. 13.}, и пресекает многих благая стремления: да не будет убо ум твой преклонен, и возмятен молчания образ. 57. Седяй в келлии своей небезсловесно и праздности исполненно твори свое дело, без разума шествуяй рече, всуе трудится: но стяжи делание благо, и собери свой ум, (и) пред очима кончину имея, помяни мирскую суету, яко прелестна есть, и ничтоже суща, разумей страшнаго словаположения ответ, како хотят нас горцыи сопротивницы, и живота нашего врази, по образу представляти деяния наша и словеса и помышления лукавая, яже мы приемляхом, тем сия влагают. Поминай и во аде сущия муки, како убо суть тамо затворенныя души, в какове страсе и болезни, поминай и во оном последнем воскресении, хотящих слышати страшное осуждение, нелицемернаго судии: поминай студ приемлющ грешныя, помышляй поношение, обличение совести, еже тоя обличением изриновенным быти от Бога, и вверженным быти в вечный огнь, идеже плачь и скрежет зубом, и другия муки вся воспоминати не престай, и течением слез обливай лице в разуме, или стоиши, или седиши: сими бо помыслы многи видех множество слез стяжавших, и душевныя силы до конца ясно очистивших. 58. Но и праведным щадимая благая размышляй, одесную Христа предстояние, Благословенный глас Владычень, и наследие небеснаго царствия, к симже и дарования, и радость конца не имущую, и не преторгаему печалию, и обители оныя небесныя, (с. 1069) и со ангелы пребывание, и ина вся обещанная Господа любящим. 59. Сии же помыслы да пребывают с тобою, да спят с тобою, и совостают. Зри убо, и не забывай сих николиже: но идежелибо аще еси, от онех памяти не изводи свою душу, да и злии до конца отбежат помыслы, и утешения Божественнаго исполнен будеши. Сими бо делы не огражденна душа, молчания исправити не может: источник бо воды не имый, суетно стяжа имя. 60. И се устав молчальным исправити взаконися: пост елико мощно противу силы, бдение же и на земли лежание, и ино всяко злострадание будущаго ради покоя: недостойна бо, рече, страдания нынешняго времене к хотящей славе открытися в нас{Рим. гл. 20, ст. 18.}. Изрядно же молитва чистая непрестанна и неоскудна, сия убо стена есть твердая, и пристанище тихое, и добрым делом хранило, страстем разорение, души благая помощь, уму чистота, труждающимся покой, плачущимся утешение, ангельское пребывание. Молися убо, _о постниче! день и нощь, со страхом и трепетом, трезвым умом и бодрым, да молитва твоя приятна будет Господеви: очи бо, рече, Господни на праведных, и уши его в молитву их. 61. Речено бысть некоему от древних зело искусне, и влепоту, яко от сопротивных нам бесов, рече, первии в брани начальницы, иже нас вся сопротивная действовати потыкающе, суть сии: похотения, чревообядения дух, и сребролюбия, и тщеславия, инии же прочии возследующе сим ходят, вся пакости душам нашим исходатайствующе. 62. И воистинну от искуса разумехом, яко несть человеку впасти в грех, или в которую либо страсть, аще не первее от некоего триех сих исполин уязвлен будет, и инако несть. Темже и три сия помыслы диавол иногда Спасу принесе, (с. 1070) ихже Господь наш болий явлься, вспять отлучитися диаволу повеле. И даст нам победу на них, яко благ и человеколюбец Владыка, по всему в подобострастное нам тело облекшися кроме греха, показав нам безгрешную и нелестную стезю, по нейже ходяще воображаем новаго человека в себе, обновляюще по образу создавшаго и. 63. Совершенною ненавистию ненавидети бесы, яко спасения нашего враги, Давидское учит слово, и есть се к добродетели зело полезно. Но убо кто есть совершенною ненавистию ненавидяй враги, иже ни в деле ни в помышлении согрешив? Аще убо помышлений сосуды в нас суть, како к ним совершенну ненависть исправим? сластолюбивое бо сердце сих николиже возненавидети может. 64. Одежда брачна есть, безстрастие души словесныя, от мирских отлучившияся страстей, и всех отвергшияся злых похотей, ум Боголюбивый, Боговидении светлыми светящийся. Ум же подавляемь от безчисленных страстей, и к сим сладце прилежай, совлачится ризы целомудрия, и облачится рубищи срамными и оскверненными, и постыдится, якоже и во евангелии рукама и ногама связанный во тьму кромешную вметаемый{Матф. гл. 22, ст. 13.}: зане от таковых помысл и деяний, истка себе одежду, юже недостойну Божественных словес, слово осуди быти. 65. Еже о самолюбии лукавом и ненавистнем всемудр некто вправду провеща: первая убо есть всех помысл, люта сия самолюбия брань, якоже некий лютый мучитель, с нимже и трие, и по сих пять, таже и вси ум наш восхищают. 66. Дивлюся, аще кто брашны насыщаяся, может безстрастие стяжати: безстрастие же глаголю не точию от греха очиститися по действу, сие бо воздержание глаголется: но еже и ума от страстных капищ и идол нечистых и скверных (с. 1071) востягнути, и на небо возвести, еже и вправду чистота сердца именуется. 67. Удобь нечистую очистити душу, или очищенну паки осквернити: отрекшимся же мирскаго смущения, и не вкусившим сладости Божественныя в души, и в некия впасти им грехи несть се чудно. Чудно же, поистинне чудно, вкусившим сладких Божиих глагол, и чувствовавшим в душах своих некое Божественное посещение, и ходившим по путех спасения, и посем паки обращшимся ко греху, не удобь в первый чин приити мню. Первый убо от неведения правыя стези, прилучшаяся пострада: сей же, бесу скорбь присно ему в зеницы очию влагающу, и немилостива Бога ему творящу, и греховный во уме приносящу ему кумир, тщащися в ров отчаяния вринути и. Мужественная же душа и трудолюбивая зело исправит сия Божественным поспешением долготерпеливно человеколюбствующу о нас, и обращаяся утробою неизреченных щедрот, приемлет нас, якоже во евангелии блуднаго ради сына, притчи научихомся. 68. Ни един же нас своею крепостию может преодолети кознем и художествам лукаваго, но непобедимою силою Христовою. Всуе убо прельстишася естествословцы творимых ради в них пощений, своею силою упразднити грех помышляюще, единем Божиим хотением упражняемый, зане упражнен бысть таинства ради еже на Кресте. Сего ради и церковный светильник иоанн златоустый глаголет, яко не довлеет произволение человеческое само о себе, аще не свыше кто приимет помощь. Якоже паки ничесоже успеет от вышния помощи, не сущу произволению: обое бо показа иуда и петр, ов убо желание свое исполнив насладися, и обратитися не хоте, и не сущу того произволению, ничтоже свыше успе. Петр же по отвержении плакася горце, и свыше помощь прият. Темже молюся, рече, ни вся на Бога возвергшим спати, ни тщащимся мнети своими труды вся исправити: (с. 1072) но показующим Богови произволение, и от того помощи просящим добре, якоже и _псалмопевец учит: Аще не Господь, глаголя, созиждет дом, или сохранит град, всуе бдит стрегий и зиждай{Псал. 126, ст. 1.}. 69. Не безбедно есть наступати на аспида и василиска, льва же и змия попрати, аще не первее очистится человек, якоже достоит, и помощь приимет от рекшаго апостолом: Се дах вам власть наступати на змию и на скорпию, и на всю силу вражию{Луки гл. 10, ст. 19.}: темже в молитве повелено нам есть, молитися, не внити в напасть, но избавитися от лукаваго. Аще бо не силою помощи Христовы, избавимся раздеженных стрел неприязненных, всуе мним от своея силы исправити что. Хотяй бо козни диаволи недейственны показати, и Божественныя славы причастник быти, должен есть слезами и воздыханием и безмолвием в нощи и во дни искати Божественныя помощи и заступления: того же хотя причаститися, чисту да стяжет душу свою от всякия сладости мирския и имения. О таковых бо душах рече Господь: Любяй мя, заповеди моя соблюдет, и отец мой возлюбит его, и приидем к нему, и обитель у него сотворим {Иоан. гл. 14, ст. 23.}. 70. Разумно зело и благоприятно слово о помыслех глагола некто от древних: Суди, рече, помыслы на судищи сердца, аще наши суть, или от супостат наших. И своя убо нам благия, во внутренней души хранительнице положи, в некрадомом сокровищи сия храня: сопротивныя же ранами словеснаго ума мучив изгони, и не давай места тем во окрестных души твоея: ибо сей, рече, известный помыслов испытатель, есть истинный заповедей рачитель. 71. Воюющия на ся страсти и стужающия тщайся победити, прочия пособники да приимет, и с ними да соополчится на брань, смирение души, реку же, труд телесный, и от (с. 1073) скорбна сердца со множеством слез молитву. Якоже поет давид, виждь, глаголя, смирение мое и труд мой, и отпусти вся грехи моя{Псал. 24, ст. 18.}. И паки: Быша слезы моя мне хлеб день и нощь, и питие мое с плачем растворях{Псал. 41, ст. 4.}. 72. Супостат убо живота нашего умаляет многащи, и забвением наши грехи покрывает. И помыслы покушается хвалити нас в сердцы, и безстрастны и праведны творити нас, и непщевати о соблажнениих наших плача. Мы же братие поминаим соблажненная, аще и мним покаянием тем очищенным быти. Но поминаем присно согрешения, и о тех непрестанно плачимся, да смирение сожителя блага стяжавше, тщеславных и гордостных убежим сетей. 73. Ниедин же от своея силы труды претерпевати, и добродетели исправити да мнит: вина бо всех добрых нам есть Бог, якоже и злых, душам нашим прелестник. Еже бо творити ти благая, добрым виновному благодарение приноси: а еже стужатися ти злыми, начальнику тьмы та приметай. 74. Детельную силу к разумней сопрягий, делатель есть похвален, от двою сладкою источнику душевную свою ниву напаяет. Разумная бо возвышает чистое существо, лучших видением: детельная же умерщвляет уды сущия на земли, блуд, нечистоту, похоть злую, нечистую страсть. Сим же умерщвленным, добродетелей цветы красне процветают, плодяще духовный плод: любы, радость, мир, долготерпение, благость, милосердие, веру, кротость, воздержание. Таковый же речет с Богоносным проповедником: живу же аз не ктому, но живет во мне Христос. А еже ныне живу, верою живу Сына Божия, возлюбльшаго мя и предавшаго себе по мне. 75. И се же от тебе, _о Христолюбче, да не утаится, яко страсть едино место обретши в тебе, и обычаем вкоренившися, и иныя в тожде место вводит: аще бо и едина (с. 1074) друзей противятся страсти, сия бо из_обретоша беси, но нашея погибели вси согласно взыскуют. 76. Пощения болезни скончаваются в безстрастия покои, пищнии же образи постизают в безместныя страсти. 77. Цвет плотский пощением увядаяй, и волю отсекаяй носит язвы Христовы на мертвенней плоти своей. 78. Не исчитай многих лет иноческаго жития твоего, ни терпение пустынное, ни жестоких твоих подвиг уловлен буди похвалою, но владычнее присно во уме имей слово, еже рабу быти неключиму, не у долг исполнившу: и еще бо в нынешнем житии есмы, не у к иерусалиму призваны быхом, но и еще на реце вавилонстей седим: и еще во египетстей работе страждем, не у еще землю обетованную видевше. Темже убо слезити достоит, и молитися могущему спасти нас от работы горькаго фараона, и изятым быти лютаго мучения, и возвести нас в землю обетованную, и почити во святилищи Божии: сих же паче ума даров получити нам, не от дел праведных, ихже мнимся сотворше, но безчисленною милостию Божиею, непрестанно молимся, днию же и нощию слезяще, по глаголющему: утрудихся воздыханием моим, измыю на всяку нощь ложе мое, и слезами моими постелю мою омочу{Псал. 6, ст. 7.}: сеющии бо слезами, радостию пожнут{Псал. 125, ст. 5.}. 79. Далече от себе многоречивый отгони дух, зане от него всяка люта страсть раждатися обыче. Отсюду лжа, отсюду дерзость, отсюду буесть, отсюду смех, отсюду оклеветание, отсюду оглаголание, отсюду срамота, отсюду буесловие, и да не много глаголю, от многоглаголания не убежиши греха. Муж же молчалив, премудрости сын, темже зело полезно есть молчание. 80. Оклеветающих нас, и укоряющих, хвалити паче и благословити повелено нам есть. Егда бо с человеки смиряемся, боремся со бесы, ихже совершенною ненавистию возненавидети научихомся. (с. 1075) 81. Бегай запяти ближнему языком льстивым, да не от губителя запнешися. Слыши о сем пророка вопиюща и глаголюща: Мужа кровей и льстива гнушается Господь{Псал. 5, ст. 7.}. И, потребит Господь вся устны льстивыя, язык велеречив{Псал. 11, ст. 4.}. Такожде бегай поносити прегрешению брата твоего, да не от Благостыни отпадеши: не имеяй бо любве к брату своему, не у позна Бога, яко Бог любы есть. Якоже иоанн сын громов вопиет: аще бо, рече, Христос душу свою положи за ны, и мы друг за друга душу свою положити должни есмы{1 Иоан. гл. 3, ст. 16.}. 82. Вправду наречена есть любы, добродетелей митрополия, глава же закону и пророком. Темже тоя ради всяк труд показуем, зане любы Бог есть, и имеяй любовь, Бога имать в себе: той же не сущей, польза нам есть никаяже. Глаголет бо возлюбленный: Бога никтоже виде нигдеже, аще же любим друг друга, Бог в нас пребывает, и любы его совершенна есть в нас. Отсюду убо яве есть, яко любы вещь есть, благих содержащая, и ту конец святым писанием уставлену обретаем: и несть добродетели образ, имже человек приближается к Богу, аще не любовию совершается, и от нея приемлется неизреченным словом содержимь и соблюдаемь. 83. Приходящую к нам приемлюще братию, ни стужение, ни пакость се молчанию да мним, да не от устава любве отпадем. И не яко благодать им дающе приимем, но яко мы паче приемлюще благодать, с мольбою и тихостию их приимем, якоже авраам патриарх показа. Сего ради Богословеснейший вопиет ум: Чадца, глаголя, не любим словом, ни языком, но делом и истиною{1 Иоан. гл. 3, ст. 18.}. И о сем разумеем, яко от истины есмы. 84. Патриарх страннолюбия содела дело, и пред храмом седяще мимоходящия призывая, и всем поставляя трапезу, нечестивым же и иноплеменником нелицемерне: темже убо (с. 1076) и дивнаго онаго сообетования сподобися, приемь со ангелома владыку. И мы убо тому уподобимся, да не токмо ангелы, но и Бога приимем{Быт. гл. 18, ст. 2.}: понеже бо, рече Господа, сотвористе единому от сих менших, мне сотвористе{Матф. гл. 25, ст. 40.}. Всем убо Благотворити добро, паче же немогущим воздати. 85. Егоже сердце непорочно о отметании заповеди Божия, или помышления противнаго приятием, той убо наречется чист сердцем, и влепоту, и сподобится слышати: Блажени чистии сердцем, яко тии Бога узрят{Матф. гл. 5, ст. 8.}. 86. Словом наказовати чувствия исправити потщимся, паче же очи, и уши, и язык не страстно, но на приобретение наше зрети и слышати потщимся и глаголати направляюще сия. Ничтоже бо от состав тех на грех удобь поползновеннейше, аще и ненаставятся словом, и ничтоже паки к спасению их готовейше, владычествующу ими слову и правящу, и на няже подобает и хощет водящу. Безчинствующее же, и обоняние смущается, и осязание сурово простирается, и безчисленных страстей множество приходит, и творят в них, еже хотят: благочинно же словом повелеваемым им, мног некаков мир и тишина является. 87. Якоже миро многоценно аще и в сосуде затченно будет, воздух наполняет своего благоухания, не близ стоящия токмо, но и ины далече стоящия многи наполняет сладости: тако и добродетельныя души благоухание из всех чувств исходя от телесе, показует всем зрящим добродетель. Кто бо видя язык ничесоже лживо и несочетанное вещающь, нозе красне ходяще, лице к слезам и к плачу присно уготовленно, не познает внутрь сущее в души благоухание. Темже и Спас глаголет: тако да просветится свеч ваш пред человеки, яко да видят ваша добрая дела, и прославят отца вашего, иже есть на небесех{Матф. гл. 5, ст. 16.}. (с. 1077) 88. Еже во евангелии Христос и Бог наш, тесный и прискорбный сказа путь{Матф. гл. 7, ст. 13 и 14.}, и паки тойжде, иго благо и бремя легко{Матф. гл. 11, ст. 30.}, рече: како убо обое совокупится: сопротивным мню быти сим: ей обое совокупляется, исправляющим сия с произволением, и надеждею, благолюбезна суть и рачительна, и сладость паче, а не скорбь, любодобродетельным исходатайствуют душам. Послушай же Блаженнаго луку глаголюща, яко биены бывше, рече апостоли отхождаху от лица собора радующеся: прежде бо во всякой вещи приходит скорбь, таже потом веселие и радость. Якоже и от давида: вечер водворялся плачь, и заутра радость, ясне научихомся глаголюща. Сея главизны и другий конец обретох, сицев: Яко биени бывше, рече, апостоли отхождаху от лица собора радующеся{Деян. гл. 8, ст. 34.}, ибо не таковое ран естество, не радость бо, но болезнь обыче делати. Но ран убо естество не таково, якоже и естеству его вещи одержати. Аще раны Христа ради сладость родиша, то что дивно, аще и прочее злострадание, и удержание телесное тоже делает того ради? 89. Мучими и пленяеми от страстей не домышляемся многащи о себе, сия чесо ради страждем? Подобает убо ведети, яко зане удалятися нам от Боговидения, такова бывают нам пленения. Аще ли же кто пригвоздит ум свой ко Владыце и Богу нашему, таковый дерзнет со пророком рещи: предзрех Господа предо мною выну, яко одесную мене есть, да не подвижуся{Псал. 15, ст. 8.}. Что же твердее или сладчае, еже имети присно Господа одесную, покрывающа и блюдуща, и не дающа подвижатися? а еже сего получити, в нашем произволении есть. 90. Добре рекоша отцы и со опасением, яко не обретает человек инако покоя, аще не такова крепка стяжет ума, яко он токмо и Бог есть в мире, ни на чесоже отнюд ум прельщающе. Но того единаго любя, и к тому (с. 1078) единому прилепляяся, таковый в себе обрящет истинный покой, и свобождение страстнаго мучения, и сподобится воспети: прильпе душа моя по тебе, мене же прият десница твоя{Псал. 62, ст. 9.}. 91. Самолюбие, и славолюбие, и сластолюбие, Божию память от души отгонят. Самолюбие бо несказанных зол родительница есть, не сущи бо памяти Божией, многий и страстный мятеж, в нас место приемлет. 92. Иже самолюбие своея души чисто восторгнувый, удобь и прочиими страстьми обладати имать, благодати поспешествующи. Якоже паки гневом и печалию, злопомнением и сластолюбием, дерзостию и прочиими побеждаяйся, от сих и обладан будет. Самолюбие же, глаголем, еже к телу страстное прилежание и любление, и плотских воль исполнение. 93. Иже аще что любит, с тем несумненно и неразлучне всяко хощет быти, и вся возбраняющя ему, дружня беседы не хощет ни поне слышати, и совокупления их отвращается: сице и душа яве любящая Бога, желает выну к нему приближитися, и с ним быти. Сие же в нас бывает, чистою молитвою елико по силе, и прилежанием к Богу присным: та бо приближает нас ко Владыце, яко и нам глаголати: Боже, Боже мой, к тебе утренюю, зане тебе единаго душа моя возжада{Псал. 62, ст. 2.}. Утренюет бо всегда ко Богу, удаливый свой ум от всякия злобы, и непрестанно Божественною любовию уязвлен. 94. От воздержания и смирения, безстрастию навыкохом, а от дел разуму бывати: от нихже в разсуждение и любовь душа преспевает. Божественною же обемшися любовию, крилома чистыя молитвы к тоя высоте непрестанно восходит, дондеже постигнет в разум Божий, якоже рече апостол: в мужа совершенна, в меру возраста исполнения Христова{Ефес. гл. 4, ст. 13.}. (с. 1079) 96. Делательным убо и добронравным порабощается похоть и ярость обуздавается: разумом же и Боговидением ум возвышается, и вознесшся от плотских, приложится к Богу истинное получив блаженство. 96. Се нам первый подвиг есть, разорити страсти, и державне победити сия. Вторый же подвиг, еже стяжати добродетели, и не тщу, ни недетельну душу нашу оставити. Третий же подвиг, еже трезвенне хранити деланий наших и трудов плоды: не делати бо нам точию труды, но бдением сия хранити повеленно есть. 97. Да будут чресла ваша препоясана, и светильницы горящии{Луки гл. 12, ст. 35.}, рече Господь: тако себе уготовившии, подобни суть воистинну человеком чающим Господа своего, да пришедшу и толкнувшу ему, абие отверзут: и вшед со отцем убо и со святым Духом, обитель в них сотворит. И блажени раби тии, ихже пришед Господь, обрящет тако творящя{Тамже ст. 36 и 37.}. 98. Подобает убо иноку, якоже сыну, от всего сердца, и от всего помышления любити Бога, и яко рабу говети и боятися и слушати его, и разсуждати себе на всяк день о помыслех злых и деяниих лукавых, и недостаточныя наполняти, о исправлениих же не возвышатися: но раба неключима себе нарицати, зело лишающася ко исполнению должных: хвалити же Бога, и того благодати исправления написовати: и отнюд по тщеславию или человекоугодию не творити что, но в тайне творити вся, и токмо от единаго Бога хвалы искати. Прежде же всех и над всеми, правою верою оградити свою душу, по Божественному велению соборныя церкви, проповеданною от святых отец, и Богопроповедных апостол. Живущим убо тако воздаяние много, жизнь безконечная, обитель неразорима отца, и Сына, и святаго Духа, единосущнаго, и триипостаснаго Божества, обильно подается. (с. 1080) 99. Конец слову, вся слыши, рече церковник, Бога бойся, и заповеди его храни{Екклес. гл. 12, ст. 13.}. Аз бо ти, рече, главный и скорый путь спасения показую: Бога бойся, и заповеди его соблюди. Страхом невводным мук ради, но совершенным совершение творящим, егоже любве ради повелевшаго имети должни есмы. Аще бо страха ради мучения не сотворяем грехов, яве яко аще не предлежали быша нам яже о мучении, то вся яже ко греху творили быхом, грехолюбиво имуще произволение. Аще ли же не прещения ради мук, возненавидевше злая, от сих воздержимся, люблением ко Владыце соделаем добродетели, боящеся, да не отпадем внегда делати еже боятися, да ничтоже от заповеданных презрим, сей страх чист есть, того ради виновен добраго бываяй, и очищает души наша, равномощен сый любви. Имеяй же сей страх, и с ним заповеди храняй, сей есть весь совершен человек, и неоскуден ни в чесомже. 100. Мужественная душа, яже во всем своем житии яко два светила делательное и Боговидетельное имеет горящи, и тем потребная творит: немужественная же паче изнемогает сластьми. Сия убо разумевше, (братие) Бога убоимся и заповеди его сохраним, да совершенны будем и устроенны в добродетелех, имуще смысл смирен, и сокрушенно сердце, и ланиты своя по вся часы слезами омакающе, и непрестанно яже от великаго арсениа реченную молитву поюще Господни: Боже, Боже мой, не остави мене, ничесоже бо благо сотворих пред тобою, но даждь ми милосердия твоего ради, от ныне сотворити начало: все бо наше спасение, в щедротах лежит, и Божии человеколюбии. Емуже слава во веки веков, аминь.