<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 1039) Преподобный отец наш филимон, из Богоносных отец трезвеннейший и плачливейший бяше: в киих же процвете летех, повесть нам о сем не изяви. А яко благоговейнейший и многоискуснейший, и безмолвие, аще ин кто от старец, зело любящий бяше, и великаго арсениа искреннейший подражатель, от настоящаго слова хотящим видети мощно. В молитвах бо и молениих нощь и день, в своей отшельнической кущи, яко в некоем пространном чертозе пребывая, и приснотекущими слез и рыданий источниками, часте омывая себе, не токмо, еже кийлибо в себе порок имеяше, но и еже добрейшия бяше части, и вся вкупе чувственная и мысленная Боголюбне превозшед, аки глух и нем предстояше Богу, и дивнаго Божественныя того Благодати сподобися причастник быти просвещения, от негоже аки от солнечнаго сияния, испытанием, разсуждением, провидением, и прозорливством, крайнейшему прилежа безмолвию и молчанию, обильно обогати себе, приснославимый филимон преподобный: свидетель же реченных достоверный предлежащее сие о нем слово, в немже Священнаго трезвения разсудительнейшее учение, аще и во ином коем слове, аки испещренна и Богоистканна порфира в изящнейшую сотчевается доброту. Елико и к деянию сопростирается, и елико умозрению сопоспешествует, долговременным делы испытанием истину утверждая. Аще убо кому вожделенно есть, оскверненныя, и без_образныя страстей одежды, еже тожде рещи, ветхаго совлещися человека, в светлое же безстрастия и благодати облещися одеяние, еже есть новый во Христе Иисусе человек, той о сем часте поучаяйся, и по силе самим поучаемая делом исполняяй, желаемое удобь получити имать. (с. 1040) О авве филимоне. Слово зело полезно. Рех о авве филимоне отшелнице, яко заключи себе в некоей пещере мало отстоящей от лавры, ромиева именуемой: и труждашеся в молитвенных подвигах, оное в мысли своей себе приповедуя, еже великаго арсениа слыша к себе самому глаголюща: Филимоне, чесо ради изшел еси? Пребываше убо в пещере время довольно делая вервь, и плетя кошницы, даяше иконому, и от него приимаше хлебы малы в пищу: ничесоже бо ядяше, кроме хлеба с солию, и сие чрез многи дни. Отсюду яве есть, яко отнюд плоти промышления не творяше: внутрь Божественнаго бысть просвещения. И оттуду неизреченнаго тайноведения сподобляяся, в веселии пребываше. В церковь в субботу и в неделю, един и в размышлении хождаше, никомуже попущая приближатися к себе, во еже не отторженну быти уму его от делания, еже имеяше. В церкви же став в углу, и лицем долу поник, источники слез испущаше, непрестанное имея сетование, и память смерти, и образ святых отец, и наипаче арсениа великаго, емуже и последовати тщашеся. Бывшей же ереси во але_ксандрии, и во окрестных тоя местех, удалися, и отиде в лавру никанорова именуемую. И восприяв его павлин Боголюбивейший, и определив ему в особь отстоящем от себе быти месте, во всяком его устрояет безмолвии. Чрез целой бо год никомуже попусти отнюд приходити к нему, но ниже сам стужи ему когда, точию во время, в неже нуждный хлеб даяше. Наставшу убо (с. 1041) святому Христову воскресению, в собрании быв посреде их, идеже бывшу о пустынном житии разглагольствию, и разуме павлин блаженный, яко и благоговейнейшему брату, сие есть намерение изящнейшее, словеса ему внушает подвижническая от отец преданная, писанная и неписанная, всеми показуя, яко кроме совершеннаго безмолвия, не возможно угодити Богу, якоже негде и моисей Божественный отец любомудрствоваше: яко безмолвие раждает подвиг: подвиг же раждает плачь: плачь же, страх: страх же, смирение: смирение, прозрение: прозрение, любовь: любовь же творит душу безболезненну и безстрастну, и тогда познает человек, яко не далече есть от Бога. Рече убо ему: подобает ти безмолвием совершенно очистити ум, и дати ему непрестанное делание Духовное. Якоже бо око взирает на чувственная, и удивляется видимой вещи: сице и чистый ум взирает на умная, и от духовнаго видения восхищается, и неудобь отторжен бывает. И елико безмолвием обнажается страстей, и очищается, толико сподобляется разумения. Тогда же совершен есть ум, егда естественный свой разум поперет, и соединится с Богом. Зане царское имея достоинство, обнищати к тому не терпит, ниже совоздвизается дольными вожделении, аще и вся ему царствия дарствуеши. Аще убо хощеши на вся сия взыти добродетели, не буди попечителен ни о едином же человеце. Бежа бегай мира, и шествуй усердно путем святых, и имей образ небрегомый, и одежду смиренну и худу: и нрав прост, и слово просто, и ступание нетщеславно, и непритворный глас, и в нищете жити, и презренну быти от всех, и паче всего хранение и трезвение ума, и во всех теснотах терпение, и вся, яже суть благая, невредима хранити и недвижима. И блюди опасно ничтоже от привходящих сластей приимати: душевныя бо страсти, безмолвием укрощаваются, возжигаемыя же и возбуждаемыя паче свирепствовати обыкоша, и имущих тыя множае согрешати понуждают. И якоже телесныя раны повреждаемы (с. 1042) и раздираемы неудовь излечимы бывают: может убо и слово праздно удалити ум от памяти Божией, бесом на сие нудящим, и чувствам тем повинующимся: велик бо подвиг и страх душу хранити. Подобает убо тебе удалитися от всего мира, и отторгнути душу от любления телесе, ничесого имущу своего, ни града, ни келлии, и быти несребролюбиву, нестяжательну, непопечительну, недружелюбну, человеческим делом необученну, смиренномудру, милосерду, благу, кротку, безмолвну, готову восприяти сердцем привходящая впечатления от Божественнаго разума. Не бо на воску возможно писати, не прежде загладившу лежащия черты: сему бо нас научает великий василий. Таковый бысть лик святых, совершенно мирскаго жительства удаленный, и небесное мудрование несмущенно в себе храняще, Божественными законы просветишася, и благочестивыми делы и словесы облисташа, умертвив уды, яже на земли, воздержанием, и страхом Божиим и любовию. Непрестанною бо молитвою, и поучением Божественных писаний отверзаются души умныя очи, и зрят Царя сил, и бывает радость велия, и желание горящее возжизаемое в души зельне: взимающейся и плоти от Духа, бывает человек весь духовен. Сия блаженнаго безмолвия, и теснейшаго подвижническаго жития делатели, иже от всякаго человеческаго утешения себе самих удаливше, едини с единем, иже на Небесех, Владыкою чисте разглагольствуют. Сия услышав той Боголюбивый брат, и Божественною любовию уязвивши душу, постизает с ним скит, идеже велицыи от святых отец благочестия течение совершиша: жиша же в лавре святаго иоанна колова, попечение о себе предавше строителю лавры, за еже хотети им безмолвно пребывати: и пребываху Божиею благодатию во всяком безмолвии, исхождения неизменно творяще в субботу и неделю: прочия же дни седмицы, в келлии пребываху, молитвы и служения кийждо особь творяще. Бяше же святаго старца служение сицево: в нощи убо пояше всю _псалтирь, и песни (с. 1043) безмятежно, и глагола едино зачало от евангелиа. И потом седяше, внутрь себе глаголя: Господи помилуй, непрестанно сице и на много время, яко уже не мощи ктому гласне рещи, и абие сна приобщашеся. И сице паки во утрии пояше первый час, седяше же на месте своем зря к востоку, и поя пременне: и паки изустно чтя от апостола, и от евангелиа. И сице совершаше по всяк день непрестанно поя и моляся, и небеснаго наслаждаяся видения, якоже многажды к видению уму его возводитися и не ведети, аще на земли бяше. Видя убо его брат сице в непрестанном Богослужении труждающася, и Божественными помышлении всячески изменяющася, рече к нему: ты ли отче, в толицей старости тако трудишися, умерщвляя тело свое и порабощая е? Он же отвещав, рече: веруй чадо, толико усердие и желание к служению вложи Бог в душу мою, яко не могу зельнаго тоя напряжения исполнити. Любовь же яже к Богу, и будущих благ упование, телесную немощь побеждают. Сице все желание воскриленно во уме имяше на небо: и не во иная точию времена, но и в самое трапезы время. Некогда убо сожительствуя с ним брат некий, вопроси его: кая бы видения была тайна? Егда же уведети хотяща, и прилежаща его виде, рече к нему: глаголю ти, чадо, яко аще кийлибо ум очистится совершенне, самых служебных сил, и чинов видения открывает тому Бог. Вопроси же его и о сем: чесо ради отче, паче всякаго Божественнаго писания _псалтирию соуслаждаешися, и чесо ради, поя тихо, яко с некиим разглагольствуя словесы мнишися? Он же к нему рече: глаголю ти, чадо, сице предызобрази Бог силу _псалмов в смиренней души моей, якоже и во пророце Давиде: и отлучитися от сладости многоразличных, яже в них, видении не могу, все бо Божественное писание обемлют. И сия убо много принуждаемь пользы ради, со многим смиренномудрием, вопросившему исповеда. Брат некий именем иоанн, от страны приморских, пришед приступи к святому сему и великому отцу (с. 1044) филимону, и держав его за нозе, рече к нему: что сотворю отче, да спасуся? зрю бо, яко ум обходит и парит семо и овамо, в няже не подобает. Он же мало помолчав, рече: сия страсть от внешних есть, и пребывает: понеже еще не имаши совершенныя любве к Богу, еще бо не пришел еси в теплоту любве и познания его. Глаголет брат: и что сотворю отче? Глагола ему: иди уже, имей сокровенно поучение в сердце твоем, еже может ум твой очистити от сих. Брат не уразумев глаголемых, ненаучен сый, глагола старцу: что есть сокровенное поучение отче? И глагола к нему: иди, трезвися в сердце твоем, и в мысли твоей трезвенней со страхом и трепетом глаголи: Господи Иисусе Христе помилуй мя! Ибо и блаженный диадох новоначальным сице предаяше. Отшед убо, и содейством Божиим, и отца молитвами безмолствовав, усладися сицевым поучением вмале. Якоже абие отступи от него, и не можаше сие трезвенне творити и молитися, пришед паки к старцу, случившееся ему возвести. Он же глагола ему: се уже познал еси стезю безмолвия и делания, и яже от сего сладость искусил еси, имей убо в сердце твоем сие всегда: аще яси, аще пиеши, аще в беседе с некиими обретаешися, аще вне келлии, аще на пути, да не мимоидет тебе, трезвенною мыслию и непрелестным умом, сею молитвою молитися, и пети и поучатися в молитвм и _псалмех. Но и в самой нуждней потребе твоей, да не празднен будет ум твой, сокровенно поучаяся и моляся. Сице бо возможеши уразумети глубины Божественнаго писания, и яже в нем сокровенную силу, и дати непрестанное уму делание, яко да исполниши апостольско слово сказующее: непрестанно молитеся {1 Солун. гл. 5, ст. 17.}. Внимай убо прилежно, и храни сердце твое еже не прияти лукавы помыслы, или каковыя когдалибо суетныя и неполезныя: но всегда и спя, и востая, и ядя, и пия, (с. 1045) и беседуя, сердце твое сокровенно в мысли, овогда убо да поучается во _псалмех, овогда же да молится сице: Господи Иисусе Христе, Сыне Божий, помилуй мя! И паки: егда поеши языком, внимай не иная глаголати усты, и во иных парити мыслию. И паки вопроси брат: многая во снех тщетная мечтания зрю. Старец же к нему рече: не обленишися, ниже вознерадиши: но прежде неже уснеши, многия молитвы сотвори в сердце твоем, и противу стани помыслам, да не всюду водимь будеши хотении диаволи, да Бог восприимет тя. Елика же сила в тебе, подвизайся, да во _псалмех и умнем поучении уснеши, и да не вознерадиши и попустиши мысли твоей восприяти чуждыя помыслы: но в нихже молился еси, в техже и поучаяся восклонися, яко да спящу ти соустроится, и востающу соглаголет ти. Глаголи же и святый символ православныя веры прежде неже уснути тебе. Еже бо о Бозе право мыслити, источник есть и хранение всех благ. Паки вопроси его глаголя: сотвори любовь отче, рцы ми, кое делание имать ум твой? научи мя, да и аз спасуся. Он же глагола: что хощеши сия испытовати? Он же востав, и держа нозе святаго лобызая, моляше изрещи ему. По многих же часех рече: не можеши носити еще, мужа бо есть в навыкновении благих сущаго, еже раздати коемуждо чувству подобающее дело, не бо мощно есть кому, не очищшуся совершенне от суетных помышлений мира, сподобитися сицеваго дарования. Темже, аще сицевых желатель еси, имей сокровенное поучение в чистом сердце. Аще бо пребудет непрестанная твоя молитва, и поучение писаний, отверзутся ти умныя твоя очи души, и будет ей радость велия, и желание некое неизреченно и крепко, возжизаемей и плоти от духа, яко всему человеку быти духовну. Аще убо в нощи, аще во дни сподобит тя Бог чистым умом помолитися чисте, да не внемлеши своему правилу: но елика ти сила есть, сопростирайся прилеплятися Богу, и той просветит сердце твое в Духовнем, (с. 1046) еже начал еси, делании. И сие такожде приложи, яко прииде ко мне иногда некий старец и вопрошен быв от мене о устроении ума, рече: яко два лета пребых моля Бога от всего сердца, прося неослабно, да даст ми выну и немятежно, впечатлеватися в сердце моем молитве, юже предаде сам своим учеником: и видев труд мой и терпение, подаде прошение великодаровитый Господь. Рече же и сие, яко сущия в мысли о суетных (вещех) помыслы, недуг есть праздныя и унылыя души. Подобает убо по писанному, всяцем хранением блюсти нам ум свой, и непрестанно пети в разуме, и чистым умом молитися. Темже убо братие, хощет нас Бог, первее в трудех, таже в любви и непрестанне молитве являти к нему тщание, и той подаст путь спасения. Яве же яко не ин путь к Небеси возводящий, разве совершенное безмолвие, и всех злых удаление, и благих стяжание, и совершенна к Богу любовь, и еже быти с Богом в преподобии и правде: и аще кто в сих будет, зело вскоре к небесному востечет лику. Подобает же всяко на сию взыти высоту желающему, умертвити уды, яже на земли. Егда бо душа наша видением истиннаго блага услаждается, ни к единой же от действуемых сластию страстей уклоняется: но всякаго отвратившися телеснаго сладострастия, чистою и нескверною мыслию приемлет явление Бога. Многа убо нам потреба хранения, и трудов телесных, и очищения души, да вселим Бога в сердца наша: да прочее безгрешно совершим Божественныя его заповеди, и сам он учит ны твердо законы его хранити, якоже лучи солнечны своя действия испуская, низпосланною Духа благодатию. Трудами бо и искушениями подобает очистити нам образ, по немуже быхом словесни, и всякаго разума и подобия Божия приятельни: всякой скверне не примесна и некиим образом огнем искушений аки новопрекована чувства имуще, и в царское достоинство претворяеми. Всякаго бо блага причастно и человеческое естество содела Бог, могущее (с. 1047) умне зрети ангел ликования, славу господствий, силы, начала, власти, свет неприступный, славу преоблистающую. Егда же исправиши добродетель, да не вознесешися помыслом твоим на брата, яко тебе исправившу, тому же вознерадевшу: начало бо гордости сие есть. Всею силою блюди ничесоже творити человекоугодия ради. Аще же подвизаешися на страсть, да не возскорбиши, ниже да уныеши, аще не престает брань: но востав поверзи себе пред Богом всем сердцем, со пророком глаголя: Суди Господи обидящия мя{Псал. 34, ст. 1.}, аз бо не могу противу их. И той зря твое смирение, абие послет помощь свою. Егда же ходиши с кемлибо в пути, не восприими суетныя беседы, но даждь уму Духовное, еже име, делание, да будет ему обычай благ, и забвение сладостей мирских, и в пристанища безстрастия достигнет. Сими и множайшими словесы поучив брата, отпусти. По мале же времени паки прииде к нему, и вопросив рече: что сотворю отче, яко в нощнем моем служении сон отягчает мя, и не попущает трезвенно молитися, ниже бдети множайше, и хощу рукоделия коснутися, егда пою? Он же рече, егда можеши трезвенно молитися, да не касаешися рукоделия. Аще же унынием одержимь будеши, мало подвигнися претящи помыслу, и коснися рукоделия. Он же паки рече к нему: ты сам отче, не отягчаешися ли сном в служении твоем? Глагола ему: не удобь убо, обаче, аще приидет иногда, мало движуся, и глаголю зачало от евангелиа иоанна, возводя к Богу око ума, и абие исчезает. Подобне же и с помыслы творю. Егда бо приидет, сретаю его яко огнь со слезами, и исчезает. Ты же еще сице не можеши вооружатися: но паче держи всегда сокровенное поучение, и из_ображенныя от святых отец дневныя молитвы, глаголю же: третий, шестый, и девятый (час), вечерняя и нощная служения потщися совершати: всею же силою (с. 1048) блюди, ничесоже творити ради человекоугодия: ниже имей когда вражду на брата твоего, да не отлучиши себе от Бога твоего. Тщися невозносливу мысль блюсти, прилежащу ко внешним помыслом. Егда в церкви сый, восхощеши причаститися Божественных Христовых таин, да не изыдеши, дондеже аще приимеши совершенный мир: на единем месте стояй да не отступиши оттуда даже до отпуста. Мни же себе на небеси стояти, и со святыми ангелы Богу предстояти, и сего восприимати в сердце. Со страхом убо и трепетом многим готовися, да не недостойне участником будеши святых сил. И в сих добри вооружив брата, Господу и Духу благодати его, сего вручив, отпусти. К симже повествоваше еще и сущий с ним брат сия, яко седящу ми иногда близ его, вопросих его: аще искусися побеждати наветы диаволи в пустыни седя? Он же глагола: прости брате, аще попустит Бог приити на тя, яже претерпех искушения от диавола, не мню мощи тебе понести горесть сих. Седмьдесятое сие лето имам, или и более, во искушениих терпя, и в различных обитах пустынях в безмолвии крайнейшем: толикими искусихся, и претерпех от них, яже не пользуют еще не приявшим искуса безмолвия, повествовати горесть сих. Сие же выну во искушениих творях, всю надежду мою возлагах на Бога, пред нимже и обеты отречения сотворих. И той абие всякия скорби избавляше мя. Темже брате, не ктому о себе промышление творю. Вем бо того о мне промышляюща, и легчайше несу наводимая ми искушения. Сие же едино от себе приношу, еже непрестанно молитися. Вем бо, яко елико возстают лютая, толико готовятся венцы терпящему: залоги бо сия суть у праведнаго судии. Сия убо ведый брате, да не унынием низпадеши, ведя, яко посреде брани стоиши подвизаяся: и яко множайшии суть о нас противу врага Божия ратующии. Како бо возможно было бы нам дерзати противу тако страшнаго противника нашего рода, аще не бы державнейшая десница Бога слова, содержала (с. 1049) нас ограждающи и покрывающи? Како претерпело бы человеческое естество наветы его? Кто бо, глаголет, открыет лице облечения его? В согбение же персей его кто внидет? Из уст его исходят аки свещи горящия, и размещутся аки искры огненни: из ноздрей его исходит дым пещи горящия огнем углия: душа же его яко углие, и яко пламы из уст его исходят: на выи же его водворяется сила. Пред ним течет пагуба: сердце его ожесте яко камень, стоит же аки наковальня неподвижна. Возжизает бездну, яко пещь медную: мнит же море яко мироварницу, и тартар бездны, якоже пленника. Все высокое зрит: сам же царь всем сущим в водах{Иов. гл. 41, ст. 4 и след.}. Противу сего брань нам брате. Таковаго и толикаго описа слово мучителя. Но над оным победа законно иноческое житие восприимшим бывает удобна, за еже не имети им чтолибо от сущих его, отвержением мира и величеством добродетелей, паче же яко имамы поборающаго по нас. Кто бо пришед ко Господу, рцы ми, и страх его во уме прием, не преложися естеством? и Божественными законы и делы просветив себе, светлу не содела душу? и Божественными разуменьми, и помышленьми облиставати не устрои? праздну же ю не попущает быти? Имать бо Бога возбуждающа ум, ненасытимо желати света. И часте действуема такова душа не попущается от Духа страстьми разслаблятися. Но якоже некий царь жестоко и страшно противу врагов дыша, посекая же нещадно, и никакоже вспять возвращаяся: но действенно руце на небо воздевая, и молитву умную творя, побеждает врага. Поведаше же паки и сие брат той, яко ко инем его добродетелем, и сию стяжа: ниже когдалибо праздно терпяше слышати слово. Аще же кто от невнимания поведаше вещь не на пользу души, ниже отнюд отвещаваше. Но ниже, отходящу ми иногда на послужение, вопрошаше, (с. 1050) чесо ради отходиши? или паки приходящу ми, глагола: где был еси, и како, или что сотворил еси? Некогда отплывшу ми во але_ксандрию ради нуждныя потребы, и оттуду взыдох в царствующий град ради церковныя купли, и посетив тамо сущую благоговейнейшую братию, возвратихся, ниединаго ответа воздав служителю Божию. Пребыв убо тамо время довольно, возвратихся паки в скит к нему. Он же видев мя, и обрадован бе, и целова мя, сотворив молитву седе: ничесоже отнюд вопроси мя, но в видении упражняяся пребываше. Иногда убо искусити его хотя пребывах дни некия, не подав ему хлеба ясти. Он же не взыскаше, ниже рече что. Аз же по сих, поклонився ему рекох к нему: сотвори любовь отче, и рцы ми, не оскорбился ли еси, яко не принесох ти по обычаю ясти? Он же рече, прости брате: двадесять дней аще не даси ми хлеба ясти, не ктому взыщу от тебе: донележе бо терплю душею, сице и телом. Толико бе в видении истиннаго блага упражняяся. Глагола же, яко отнележе приидох в скит, не попустих помыслу моему изыти вне келлии: и ниже ин помысл в мысль мою восприях, кроме страха Божия и судилищ будущаго века, помышляя грешником прещение суда, и огнь вечный, и кромешную тьму. И како грешных души обитают, и праведных: и яже праведным уготованная благая, и коегождо приемлюща свою мзду по своему труду: оваго убо за многия подвиги трудов: оваго же, за милостыню, и любовь нелицемерну: оваго же, за нестяжание, и отречение всего мира: инаго, за смиреномудрие, и совершенное безмолвие: инаго, за истинное повиновение: другаго, за страннолюбие. Сия вся размышляя, не попустих иному помыслу действовати во мне, ниже могу ктому с человеки быти, или с теми упраждняти ум мой, да не от Божественнейших помышлений отлучуся. Приложи к сим и повесть о едином некоем иночествующем, и глагола: яко к безстрастию бе достиг, и от руки ангела хлеб (с. 1051) приимаше в пищу, и нерадением чести сея отщетися. Егда бо душа крепость и твердость ума послабит, тогда обемлет душу нощь. Идеже бо Бог не возсиявает, вся яко во мраце расторгаются, и не может к Богу единому взирати, и трепетати словес его: Бог бо приближаяйся аз есмь, глаголет Господа, а не Бог издалеча. Или утаится человек в сокровенных, и аз не узрю ли его? Еда небо и землю не аз наполняю, рече Господь{Иерем. гл. 23, ст. 23 и 24.}? И о инех мнозех воспомяну подобная пострадавших. К сим же и соломоново приведе падение, иже толикую, рече, прия премудрость, и о всех славимь бяше: бе бо яко денница утро восходящая, светлостию премудрости всех просвещаяй, но малыя ради сласти славу погуби. Страшно убо есть нерадети. Непрестанно подобает молитися, да не ин помысл нашед отлучит ны от Бога, и чтолибо уму нашему представляемое. Чисто бо сердце, все быв Духа святаго вместилище, всего самаго чисте зрит Бога. Сия убо слыша аз, рече, и делы самеми уразумех, яко недейственны в нем отнюд суть плотския страсти: вожделетель же лучших всячески бе, яко всегда зретися ему Божественным Духом образуему, и воздыхающу воздыханьми неизглаголанными, и в себе обращающуся, и себе самаго разсуждающу, и боящуся, да не како что прившедшее чистоту ума возмутит, и скверна некая тайно прибудет ему. Зря убо аз сия, жительствуяй с ним брат, рече, и яко к подражанию подобных добродетелей возбуждаемый, неотступно настоях, и частыя к нему вопрошения творях. Како могу, глаголя, стяжати чистый ум, якоже и ты? Он же рече: иди, трудися: труда бо потреба, и болезни сердца. Не бо спящим нам и ослабевающим, достойная тщания и труда прибывают: егда ниже яже на земли благая, без труда обрести кто может. Подобает убо хотящему приити в Духовное преспеяние, прежде всего отрещися своих хотений, и имети всегда плачь, и нестяжание: не внимати прегрешениям (с. 1052) иных, но своим точию, и о сих плакати день и нощь, и не имети дружбы с человеком. Душа бо скорбящая о своем бедствии, и памятию прегрешений уязвляемая, мертва бывает миру, и мир ей мертв бывает: сиречь недейственни бывают плотския страсти, и человек страстем. Ибо отрекшийся мира и сочетавыйся Христу, и в безмолвии пребывающий, любит Бога, и хранит образ, и подобие богатит. Свыше бо приемлет от него обилие Духа: и бывает дом Божий, дела праведна представляяй Богу. И душа очищенна житием, и свободна от осквернений плоти, не имуща скверны или порока, украсится венцем правды, сияя благовидением добродетели. В немже бо в начале отвержения не бывает плачь в сердце, ниже слезы Духовны, ниже память вечнаго мучения, ниже безмолвие истинное, ниже непрестанная молитва, ниже _псалмопение и поучение Божественных писаний, и ниже во обычаи бысть, да непрестанным терпением понудится, и не хотящу ему, от ума сия деяти, и не пребывает страх Божий в мысли его: еще в любви мира таковый покоится, и не может стяжати чистаго ума в молитве. Благочестие бо, и страх Божий, очищает душу от страстей, и ум свободен устрояет быти, и к естественному видению ведет, и Богословия касатися творит, еже во образе блаженства восприемлет, и проходящим е отсюду обручения подает, и неподвижну сию хранит. Всею убо силою да прилежим действенному деланию, имже ко благочестию возводимся еже есть в мысли чистота, еяже плод естественное и Богословное видение: деяние бо, восхождение видения, якоже прозрительный и Богословнейший глаголет григориа ум. Аще убо деянии вознерадив, всякаго чужди будем любомудрия. Аще бо кто и крайнейшую постиже добродетель, обаче требует постническаго труда обуздавающаго безчинныя телесе стремления, и наблюдение помыслов имети. Тако бо едва возможем вселение получити Христово. Елико бо в нас избыточествует правда, толико Духовное мужество прибывает. (с. 1053) И в совершенство пришед ум весь к Богу прилепляется, и Божественным светом осиявается, и неизреченная открываются таинства. И тогда научается истинно, где есть мудрость, где есть сила, где разум, еже разумети вся, где долголетие и живот, где свет очес, и мир: доколе бо во брани страстей обращается, еще не может к наслаждению сими удобно имети время. Добродетели бо и злобы слеп соделовают ум. Тии бо, да не видит добродетелей: сии же, да не видит злобы. Егда же брани прекращение восприимет, и Духовных сподобится дарований, тогда весь световиден бывает, часте споспешествуемь благодатию, и непоколебим в видении Духовных пребывает: сицевый не пригвожден есть к здешним, но прейде от смерти в живот. Подобает убо достоподражательнаго жития желающему, и приходящему к Богу, непорочное имети сердце, и уста чисты: яко да чисто слово от устен происходящее, достойно возможет воспети Бога. Прилепившаяся бо душа к Богу, непрестанно к нему разглагольствует. Потщимся убо братия оный верх достигнути добродетелей, и не пребудим на земли пригвоздившеся страстем. Подвизающийся бо, и достигнувый приближитися к Богу, и в причастии святаго света быти, и любовию того уязвитися, наслаждается Духовным некиим и непостижимым веселием Господа, якоже глаголет Божественный _псаломник: Насладися Господеви, и даст ти прошение сердца твоего: и изведет яко свет правду твою, и судьбу твою яко полудне{Псал. 36, ст. 4 и 6.}. Кая бо любовь души столь зельна, и нестерпима, якоже яже от Бога раждается в души, от всякаго порока очищенней? и от истиннаго усердия глаголющей: уязвлена есть любовию аз{Песн. песн. гл. 2, ст. 5.}. Неизглаголанна отнюд, и неисповедима Божественныя доброты облистания, не изявляет слово, не приемлет слух: аще и денницы озарения речеши, аще и луны светлость, аще и солнца свет, вся недостойна суть к подобию славы оныя, и множае к сравнению (с. 1054) истиннаго света оскудевающая, нежели елико глубокая нощь, или страшная тьма чистейшаго полудне. Сице бо и василий, во учителех Божественный, искусом прием, и научився предаде нам. Сия убо и множайшая сих сожительствуяй ему брат поведа. Но и сему такожде кто в нем не подивится, имея великое его смиренномудрия знамение? Издавна бо пресвитерства сподобився, и небесных житием и разумом коснувся, сице Божественных священнодействий убегаше времене, яко во множайших его подвигов летех не изволяти к священней поне приближитися трапезе, и Божественных причащению таин сподобитися. С толиким опасством жительствуя, егда к человеком собеседование творяше, не причащашеся: аще и ничесому земному глаголему от него, но на пользу требующих беседоваше. Хотяй же Божественных причаститися таин, молитвами, и _псалмопении, и исповедании Бога умилостивляше. Ужасашеся бо иереова гласа, тако при сем возглашающа и глаголюща: Святая святым. Глаголаше бо, всю церковь исполнятися святых ангел, и самого же царя сил таинственне священнодействуема, и претворяема в тело и кровь в сердцах наших. Темже и глаголаше: подобает нам непорочно и чисто: и яко вне плоти сущим, кроме всякаго сомнения и смущения, со дерзновением приступати ко святому причащению пречистых Христовых таин, яко да от тех просвещения будем причастницы. Мнози бо от святых отец видяху ангелы хранящия их: темже и молчанием блюдоша себе, ни к комуже разглагольствуще. Глаголаше же и сие: яко аще потребно бяше, самому продаяти свое рукоделие, да не от глаголания и отвещания, ложь кая, или клятва, или многословие, или ин вид греха последует, юрод быти притворяяся стояше, и всяк хотяй купити, взимаше от него и подаяше ему, еже хотяше. Делаше же он некое ткание, приимаше же даемое благодарне, ничтоже отнюд глаголя сей воистинну любомудрый муж.