<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 1035) Святейшаго каллиста, патриарха константиноградскаго. Образ внимания молитвы. Первее всех начинают в телеси подвизающагося и внимающаго молитве движения некая аки взыграния под кожею, яже мнятся некиим быти прелесть. Приходит (же) и теплота от почек яко опоясующи та, мнится и та прелесть быти. Сия же не суть прелести, но естества суть, якоже свойства раждаема от подвига онаго. Аще ли же кто славит сия, яко от благодати суть, а не от естества, сие есть воистинну прелесть. Сия же каковалибо (суть) должно есть подвизающемуся не любити сих, но отражати я, приходит же и ина теплота от сердца, и аще убо снизходит ум в блудныя помыслы, прелесть есть воистинну: аще ли же тело убо все от сердца растеплевается, ум же есть чист и безстрастен, и акибы прилеплен есть во внутреннейшей глубине сердца, сие есть воистинну благодати, а не от прелести. Овогда убо бывает в тако обретающемся и пот от многия теплоты бывающия в телеси исходит, и тогда подвижется от сердца святое действо, вземлющо аки лист некий от сердца, и движущо ум от внутреннейших, яко прилепши самому тому Божественному действу, якоже вопити часто: Иисусе мой, Иисусе мой. Абие бо во отверзении сердца, сие точию вопиет ум: Иисусе мой, и не может все рещи ум, еже: Господи Иисусе Христе Сыне Божий, помилуй мя, от частых отверзений сердца, но точию, Иисусе мой. Глаголющии же, яко всю совершают молитву во устроении таковом, прельщаются: внегда бо прилепится ум, якоже рехом, (с. 1036) Божественному действу во внутреннейшее пришед сердце, не может множае вопити, разве точию, Иисусе мой. Тогда убо бывает от святыя сея молитвы, и ужас от сердца, егда от святаго действа утешение бывает велие. И тогда скачет, и истекает со сладостию и слеза от сердца, и течет от очию сладчайше, и се есть радостопечалие. Возвревает же тогда сердце от многаго онаго священнаго действа, и бывает все тело распаленно. И вопиет ум ужасаемь: Господи помилуй. И якоже елей в сосуде полне разгреваемь от огня зельне, от многаго врения изливается и внеуду: тако бывает и на сердце, внегда возврит сие от Божественнаго действа, изливает и в телеси теплоту, и творит е распалено. И тогда страждай сие разумеет, яко внутренняя его ясне изскачут вон. Бывают же и ина некая преславная на имущем реченное устроение, есть егда и свет) темже и просвещение внутрьуду таковый смотряет просвещающо его паче солнца, и от сердца источающо свет. Бывают же внутрь сердца и ина таинства, яже не мощно и писанию предати: видит бо ум тварь всю, и ужасаемь от движения святаго действа, и от смотряемых Божественных таинств, возсылает из глубины сердца славословия, яже не могу писанием изявити. Весь бо бывает человек тогда обожен от Божественнаго онаго движения: вне же всякаго вещнаго и чувственнаго всего. И яко неудержимь от радости, якоже некий многим вином погружен. Таже по сих восхищается во видения Божественна, и видит таинства страшна, яже не могу написати тонкочастне: видит бо ум видения Божественна, видит же и наслаждения праведных, и райския доброты. И еще высочайше восхищаемь умом, видит на небеси ужасная и преславная таинства, и елико очищается человек от прилог сопротивных, толико еще видит и больша сих, якоже ему даровал всесвятый Дух, емуже слава во веки, аминь. (с. 1037) Тогожде о молитве вкратце. Молитва непрестанна есть, еже призывати имя Божие выну. Аще убо беседует кто, аще седит, аще ходит, аще делает, аще яст, аще что ино творит. На всяко бо время, и на всяком месте подобает призывати имя Божие, якоже пишет: непрестанно молитеся{1 Солун. гл. 5, ст. 17.}. Сице бо потребляется искушение вражие: молитися же требе есть кому сердцем, пети и усты, егда наедине есть. Аще ли же кто есть на купилищи, или с некиими обретаяся, не требе есть усты пети, но единою мыслию. Подобает же и очи блюсти, и долу зрети ради парения, и сетей вражиих. Молитва бо совершенна есть еже глаголати к Богу без парения умнаго, внегда собирати вся помышления с чувствами. Наставляет же в сие человека, еже умертвитися от всякаго человека и мира, и всех яже в нем: молитва же разумевается, яко пременяет смущения, егда видит, яко веселится ум просвещься о Господе, знамение же есть, аще коснуся кому, яко к тому не смущается, аще напаствует его и весь мир: Ибо совершенне моляйся, умерщвляется покою своему и миру. Молитва бо со смирением и трудом и слезами, и еже не творити волю свою, пресекает воспоминание, яже (кто) что содея, или виде, или слыша, или глагола: ибо исправивше сия отцы, кроме же труда (с. 1038) и слез, и отсечения волям не исправиша. Молитве и пению не точию умом подобает бывати, но и устнами. Ибо пророк Давид глаголет: Господи, устне мои отверзеши, и уста моя возвестят хвалу твою{Псал. 50, ст. 17.}, и апостол показуя, яко ищутся и устне, рече, сердце и плод устен{Евр. гл. 13, ст. 15.}, и яже по сих.