<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 955) От яже суть каллиста катафигиота. 1. Всяко животно, от рожденнаго, лучшим естественным своим действом, и покоя причащается, и сладости равныя, и о сем радуется, и пристраствует сих ради. Темже и человек, аки ум имый, и то еже помышляти, естественне живот: паче услаждается, и покоя в причастии бывает истиннем, внегда лучшая помышляет, и яже или благая хощет кто глаголати, или добрая о себе. Еже бывает воистинну, Бога имея во уме, и добродетели его помышляя краю сущу и паче ума мысленному, и крайне любящую и паче ума человека: крайния и почести и паче ума благая и добрая своим си уготовляет, и сия вечне наипаче. 2. Аще всяко рождение приуподоблятися творит раждающему рожденное, якоже рече Господь: яко рожденное от плоти плоть есть: и рожденное от Духа, Дух есть{Иоан. гл. 3, ст. 6.}. Аще убо Дух есть рожденный от Духа: яве, яко и Бог будет по рождшему Духу. Понеже и Бог истинен есть Дух, от негоже по благодати родися причастник Духа. Аще таковый Бог есть и зрителен преявленно могл бы быти, влепоту. Ибо от еже зрети Бог речеся Бог. Темже убо не зряй, или духовнаго рождения и причастия не у получи: или получив е, смежавает от невежества зрительную свою силу, и мысленных окрест мысленнаго правды солнца Божественных лучей отвращается ненаказанне, и зрительныя силы причастник быв, действия сея лишается окаянне, аще и к святыни горе простирается. (с. 956) 3. Вся сущая от сотворшаго я по слову свое си прияша движение, и естественное. свойство: темже последованно и ум. Но движение ума имать присное. Присное же, безконечно есть и безпредельно. Противу своему убо достоинству и естеству воистинну ему будет, движиму конечно или предельно. Сие же постраждет, аще в конечных двизался бы и предельных. Не бо возможно есть быти убо вещи сей конечней или предельней, движению же ума еже к ней, или окрест ея происходити в безконечное. Требует же убо приснодвижное ума воистинну безконечная и безпредельна чесого, к немуже по слову и свое его естество было бы двизающося. Но убо безконечно и воистинну безпредельно ничтоже есть кроме Бога, естеством и воистинну сущаго едина. К воистинну убо безконечну единому, сиречь к Богу горе простретися, и взирати и двизатися уму подобает: сие бо воистинну есть ему естество. 4. Безконечна суть и безпредельна и яже о Бозе зримая, но обаче ниже в сих совершенне радоватися может ум, ища того, от негоже бысть. Ибо, понеже о подобнем себе коеждо естественне радуется, един сый ум естеством, аще и многа суть помышления, горе простираяся, и аки двизаяся к Богу, единому естеством, и многа действием, невозможно есть радоватися всесовершенне, прежде даже в естественне безпредельном единым Духом не будет, от многих аки прешед, в единем убо ум двизаяся Бозе, естественне радоватися может всесовершенне, но обаче от сущих коеждо, наипаче о свойстве радуется естественнем. Естественно убо свойство есть уму, и наипаче, еже в самом Бозе, просте и безпредельне единем, и двизатися и горе простиратися и бывати и радоватися всесовершенно. 5. Всяко каковалибо зданна движение, еще же и самаго ума к статию и почитию воистинну тщится и взирает, и еже стати и почити от него, и конец есть, и по равности (с. 957) покой зданному. Но обаче ум един сый от зданных, в зданных двизаяся, стояния и почития причаститися не может. (Зданней бо вещи приличне приемшей конец имети, аки наченшейся, приснодвижное ума праведне осталося бы, и последованне взыскало бы, где двизатися имать: и никакоже отнюд имети будет, еже преставати, или свой конец получити, или приснодвижное не будет имети с собою по подлежащим, аще сообят будет определенными и конец имущими, еже далече есть естественнаго свойства ума, преявленне приснодвижна суща.) Несть убо влепоту обрести еже преставати, или стати уму, в зданных сиречь обретающуся. Где убо возмогл бы ум употребити свое си свойство, еже движением стояти, сиречь и тако безмолвствовати, и мир имети, и покоя прияти чувство утвержденне, аще бы в незданное и неописанное не достигл: сие же есть Бог, воистинну и премирне едино сый. В сие убо единое и неописанное достигнути движением уму подобает, да естественную свою тишину обрет, в покой станет умне влепоту. Тамо бо есть стояние Духом и страннообразен покой, и всех конец безконечный, и движение во едино достигшу оно не оскудевает никакоже, всякому уму безпредельное и безконечное достигшу, и неописанное, безвидное, и невоображенное, и совершенне простое: таково бо есть реченное едино, сиречь Бог. 6. Аще творит Бог, по давиду, ангелы своя Духи, но и иже от человек раждает Дух, Духа творит их{Иоан. гл. 3, ст. 6.}. якоже рече Господь: Ангел убо ин есть человек рожденный от Духа явственным причастием его. Но убо ангел дело есть, еже выну зрети лице отца нашего, иже на небесех{Матф. гл. 18, ст. 10.}, якоже и сие рече Господь. Темже и светлому Духа свята причастнику подобает зрети, горе простирающуся, якоже лепотствует, лице Божие. Темже учит яве и давид: взыщите, глаголя, Господа, и утвердитеся: взыщите (с. 958) лица его выну{Псал. 104, ст. 4.}. Не блюдет убо лепотное и подобающее бывый причастник святаго и животворящаго и просветительнаго и рачителя Духа, и во искус неизреченнаго рождения пришедый сущаго от Духа, и к достоинству ангел востекий: таже якоже прилучися за излишнее говеинство смежавати творяй к Богу умное чувство свое, и не хотети к Богу горе простиратися и к Божественным: паче же Спасителю повелевающу пребывати в нем, зане и той пребывает в нас. И давиду глаголющу: приступите к нему, и просветитеся. И воистинну аще хощем творити подобающая и следующая, во свете Бога отца, глаголю же Духа святаго: узрим свет иже о Бозе, сиречь Божественную истину, аще не некако невежественне приимем к Божественным лучам не обращатися. 7. Треми образы восходит ум к видению Божию: самодвижне, инодвижне, и между сими. И самодвижный убо образ, от естества ума точию совершается хотение свое мечтанием употребляющ, егоже конец есть видение сущих о Бозе: яже и еллини некако мечташа. Вторый есть преестествен, хотением, и просвещением точию Божиим бывающ: темже и под Божественным содержанием тогда ум весь обретается, и в Божественна откровения восхищается, и неизреченных вкушает Божиих таин, и будущих сбытия зрит. Образ же, иже между сими, двема по части совокупляется. Зане елико убо хотением и мечтанием своим делает, самодвижному согласен показуется: инодвижному же приобщается, понеже от Божественнаго соединяется к себе самому просвещения, неизреченно видит Бога вышше своего умнаго соединения. Всех бо о Бозе видимых и глаголемых вне бывает тогда, ниже благоначалие или обожение, ниже премудрость или силотворну державу, или промысл, или ино что от Божественных зря, исполнен бывая наипаче умна света, еще же и радости действуемыя от Божественна огня любовию срастворенна. (с. 959) 8. Ум, свое мечтание ко еже зрети невидимая употребляя, верою наставляется, осияваемь же от Благодати, надеждею утверждается. От Божественнаго же света восхищаемь, сокровище любве бывает человеческия, и много же паче Божия. Тако тройственный ума чин, и движение в вере и надежде и любви совершенней, и Боготворен, и тверд же и непреклонен бывает: и сего достигши пространства верхоградия, якоже бы кто рекл, в стражбищи любве себе утверди. От еяже вины есть, еже глаголется от Павла: любы вся терпит, вся претерпевает за благость веры и надежды. Любы, глаголет, николиже отпадает, за разжженное свое с Богом соединение и совокупление неизреченное. 9. Ни в чесом зданном изрядне есть единое: яко бо разнствует коеждо когождо, по некоему образу свойства не возможно не ведети. А яко суть зданна коеждо когождо не разнствует, наченшося же сущо, и конец имущо, и под естеством сущо, и не сущо воистинну просто едино. Точию бо едино воистинну есть несозданное, яко просто, яко безначально, яко конца не имущо и безпредельно, и сего ради безконечно, еже есть Бог. К немуже аще бы ум зрел с причастием и пособием Духа животворящаго, выну приличествующее свое ращение приемлет, соединен сый и простерт, и Боготворна держася устроения. Еще же и зело разуме ясне, яко кроме единаго, и еже к нему духом взирания, уму лучшу быти невозможно есть. Ово убо яко ум расточися, многочастному миру и страстем повинувся, и требует приличне премирны силы, и последованно преестественна единаго ко взиранию: да тако от раздельных восхищен быв, вне будет страстей и разделения, и тако получил бы Боговидное. Сего ради и Господь моление творит ко отцу, да будем едино вернии во отце, и в нем Сыне Духом, и тако едино, якоже и тии суть едино (не злословне сиречь, якоже савеллий рече единое) яко да будем, якоже подобает, совершени суще (с. 960) и благодатию соединяющаго Духа, и видением единовидным во едином Бозе. Сие нам яве есть истинное предспеяние на лучшее: и сей конец, и истинен и един покой. Сего ради и завистная и человеконенавистная бесовская дружина, на многих богов, еже _о дабы не было! чествование расточивши, в прелесть посея единственное ума, и не остави сие имети, мечтание единаго премирнаго. Яко да на многи боги служением, взиранием же и разделением противу своему си естеству повинув двизатися уму, всяческих страстей желателя покажет и лжи, вместо истины и добродетели. Темже Дух святый завещавает пророком: Приступите глаголя, к нему, к единому сиречь, и просветитеся. И еще инде: аз Бог первый, и аз по сих, и кроме мене несть иного Бога{Исаии гл. 44, ст. 6.}. И паки: слыши исраилю, Господь Бог твой, Господь един есть{Второз. гл. 6, ст. 4.}. Не бо триипостасное единаго Божества единое разделяется Господьство, но и три суть опасне лица и ничимже мнее едино существом же и силою, хотением же и действом, и инеми существенными благими. Убо еже служити единству Божию, и взирати, и собиратися елика сила к нему от многих, воля Божия есть, и ума предуспеяние на лучшее, яко истины обретение, и Божественна рачения, и последованно обожения плод. 10. Аще лжа убо есть многочастна, едино же истина: убо ум духом к единому горе простирающийся, к превосходящему, премирному паче всех, к тому, от негоже многая, к самой той воистинну истине горе простирается. Но убо не может быти ум свободен от страстей, аще не истина свободит его{Иоан. гл. 8, ст. 32.}: ум убо страстей свободен бывает зря и горе простираяся единственным образом к единому премирному. Приличествует же истина уму к безстрастию, и Боговидну устроению и сыноположению духовну наипаче, никакоже рабство: занеже раб, глаголет, не весть что творит Господь его{Иоан. гл. 15, ст. 15.}. Аще (с. 961) же невежество рабие есть, яве яко причастник сый свободы, весть тайны отца, и взыти подобне бысть ему благо и добре на достоинство сыноположения. Якоже бо еже не ведети сему еже ведети противно есть преявленне, тако воистинну и рабий чин, сопротивне есть к сыновню яве. И аще не ведый, раб есть: ведый же воистинну несть раб, но свободен, или да реку сын. Ибо дух истины свобождая воистинну, сам сей сынополагает Богови тех, в нихже бы пришел: елицы бо, глаголет, Духом Божиим водятся, сии суть сынове Божии{Рим. гл. 8, ст. 14.}. Аще бо к пресущественну единому взирати, истины быти есть: истина же свободу уму подает: свобода же, сыноположения Божественна знамение есть явно: сего же дара сыноположения, ничтоже ниже больше есть, ниже убо естеству словесну паче приличествующо ино: зело смысленно и зело от нуждных было бы воистинну, еже горе простретися и взирати и собиратися духоносне уму, елика сила к единому премирну, сиречь к Богу. 11. Господь Бог твой, глаголет Духа святый, Господь един есть. Толико попечение есть Божеству Духа возводити ум к единому премирному. И не убо яко единое проповедает, ума же к нему обращение и взирание не любит, леть есть глаголати. Еже бо святый глаголет Дух, сему и помышлятися хощет: и еже помышляется, к сему и уму обращатися. Отсутствующу бо ума обращению к помысленному, и еже могл бы помыслити ум, отсутствует. И есть по нужде всуе речено проповедание единственнаго: и сего ради и вера. Аще же сие безместно: убо и еже не размышляти единое обращающуся уму к нему и горе простирающуся, безместно есть. 12. Аще естество есть к винимым и паче же словесным к виновному горе простретися и взирати обращательне. От вины же вся произведошася Бога, и от негоже и ум: Бог же (с. 962) есть верховное и просте единое: убо естество есть уму, к верховному и просте единому яко к виновному обращающуся, горе простретися и взирати. 13. Аще из того и тем и в нем всяческая{Рим. гл. 11, ст. 36.}: есть же и ум от всех едино, убо из того и тем и сей есть, паче же ближае из того и тем той, за Богоподобное. Темже и паче сей взирати должен есть к нему. Глаголемое же к нему, являет, яко на премирное единаго подобает явление обращательне взирати. На единое убо ум должен есть взирати. 14. От единаго происходят многая, не ктому же от многих единое. Но убо тварь есть многая, темже от единаго есть тварь яве. Будет же паче твари яко творец и содетель оно единое. Зряй убо тварь якоже подобает, по нужде к премирному единому имети будет видения своего заключение: понеже и суть в виновных премнога виновнаго аки изглашения, имиже познавается иже художеством и премудростию, и силою, и благостию промыслительне вся произведый, якоже восхоте. Сего ради и исаиа Духом, возведите, глаголет, очи ваши, и видите, кто сотвори сия вся{Исаии гл. 40, ст. 26.}? Сия убо вся многих ради, рек, винимых: сие же, кто? К тому от негоже сия суть, еже есть просте по естеству едино, возводя ум. 15. Собирается и тварь во едино, но сложно и многочастно, и не безначально, аки зданно. Зиждущее же есть едино: не токмо едино яко многих и различных согласия в едино содхновение всего и намерение творительно, но еще прочее и несозданно, яко предначально виновно. Восходя бо на последствующее ум нужда есть достигнути к нечесому едину, начальну же и устрояющу сего видимаго сущих чина и бытия, составления же и содхновения еже во едино: или аще не сие, в (с. 963) безконечность произшел бы, еже есть безвестно. Все бо движимое и бывающе есть, егда не бе, и не сущо начатся. Аще же начася, то и подвигнуся: подобает убо искати, что есть подвигнувшее и в бытие приведшее: еже будет убо и недвижно, поелику есть движущо. Аще бо ни, то что есть движущее, еже не под инем началом сущее, понеже есть безначально? Аще же недвижно есть, то и непреложно. Аще ли же убо сие, то отнюд и просто, да несложно суще преложится, еще непреложно нам явися. Сложение бо начало есть крамолы: сия же, решения, еже движения есть последнее. Никакоже убо тамо есть сложение, да не и крамола: ниже крамола, да не и решение: ниже решение, да не и прелог, и движение о непреложнем явится и недвижнем, яко движущем, а не движимем, и в бытие ведущем, не бывшем, или бывающем. Аще убо есть непреложно и недвижно, по нужде есть (и) несложно, и сего ради простейшо и совершенне едино премирно. К немуже горе простирающийся ум, всех всяцем образом вне бывает, взирания ради еже имать к предобротному, и желания ради о сущем паче всего, паче же о том, от негоже все, и к немуже вся естественне горе простираются. Сему же бывающу, по слову приличествующу, и страстей вне бывает. Превыше бо и предобротных препростираяйся и бывающий, никакоже бы сотворился пребыти в студе страстей. Сего ради тому единому послужиши{Второз. гл. 6, ст. 13.}, единому сиречь, священный глаголет закон. К единому убо верховному горе простретися подобает, аще хощем и закон Божий исполняти, и превыше страстей обретатися. 16. Господь, глаголет, един вождаше их, и не бе с ними Бог чуждь{Второз. гл. 32, ст. 12.}. Зриши ли единственнаго и единаго силу, како не бе с ними Бог чуждь: понеже един вождаше их Господь. Но убо Господь последующия, а не отвращающияся водит. А емуже (с. 964) кто последует, к тому и обратися. Темже аще не хощем бога инаго, беса или страсть с нами имети, возпоследуим самому и единому обращением умным: яко да и о нас не неподобне глаголано быти возмнится, яко Господь един водит их. Темже и Бог чуждь несть с ними. 17. Аще и от единаго, но различне суть многая: зане воистинну и сущих образ, по нему же сия от первыя единицы происходят, есть различен. Зане ова убо от сих наченшася суть изданна, ова же незданна, и словесе временнаго начала избегша, и всем убо всяцем образом, виновно пресущественное едино, но овем убо содетельне, овем же естественне. И сего ради не ко всем сим единою равне приступати, и сих держатися подобает. Но к под началом убо и созданием сущим приступати подобает за ино (нечто) а не нарочно, якоже к зерцалу за воображаемое в нем или показуемое. Инако бо тварь к преспеянию на лучшее неприступательна есть, точию за предявляющееся в ней крайняго единаго: к безначальным же приступаем и естественным, не за ино (нечто), но за та и за то от негоже суть. Она бо суть воистинну приступательна нарочно, и онех есть близ же и естественне верховное единое, паче же убо крайняго и верховнаго сия суть единаго близ и якоже глаголася естественне. Подобает убо не токмо к сим приступати, но и прилеплятися, и ко уподоблению перваго и единаго добра сими тщатися из_ображатися: да содействием и помощию благодати, сущия по образу и по подобию славы Божия имети будем достоинство. От сея вины разсмотряющим право, содетельне убо винимыми, случается: зрительне возводити ум к созерцанию единаго, и соединяти его в единственную мысль, иже паче ума единаго совершенне же и просте, аще убо в сия ум взирает, якоже подобает. А имже естеством есть виновное действительствующуся уму сими, или по ним воображающуся, сими мощно есть соединяти к (с. 965) воистинну единому оному себе. Темже от каковыхлибо всех или естественных, или содетельных сущих винимых, к различне единому виновному, ум собиратися обыче естественне, или действительне, или зрительне. И еже ум или едино, или множайша содетельна, или естественна употребляя, не единаго ради употребляет, ниже да к первому единому собрав себе приводит, и отнюд ко оному взирает святым причастием и пособием просвещающаго Духа, просте единовидне же и единственновидне, в грех ему сие вменяется: аще и мечтание имать добра сие употребление его. Сущая бо от единаго на единое водити естество имут употребляющих сия, якоже подобает. Всяко бо, якоже глаголет великий дионисий, от отца движима светоявления происхождение в нас благодетельне приходяще, паки яко единотворна сила воспростирательне нас исполняет, и обращает к собирателя отца единству, и Боготворной простоте: из того бо и в нем всяческая{Римл. гл. 11, ст. 32.}. Аще же не возводит к сему, вне естества есть и подобающаго употребление сие вне бывает не тако бывающе. 18. Есть деяние, предваряюще видения, и есть деяние, последующе зрительному. Первое убо совершается телесне, яко да стремления телесе обуздавшему, и благочинне водитися устроившему с разсмотрением, возмогло бы сице дати уму свободною ногою прейти во своя, яже суть мысленная, и тамо бы свою пользу добре делал: второе же от ума начинающеся, и от еже помышляти в Дусе, собирается к сущему паче ума, еже есть Бог. К немуже приближився ум во едино достизает: едино бо, Бог есть. Прочее уже и ум соединяется в себе во едино, и неразделен паки бывает. Единицы бо виновно есть единое и простоты Боговидны зримо. Не составно бо есть единое зрящу уму, не быти и тому едино и просто. (с. 966) Разделенна же зрящу и сложна, нужда есть разделятися же и различну бывати. Речеся же мною едино просте, еже само о себе осуществованное простое. Понеже бо что бы ни был ум, изменения страждет по действу, тойже есть прост, нужда (убо) есть едино быти и по действу единое зря. Аще же бы единое убо зрел, той же бы разделился на двоицу, еже есть малейшее, что бы была делающи голень его разделена сущи от зрящаго единое: или бо зрит ино что, или не зрит. И сие двойственне: или не хотящи, или притупляющися, или негли ко иному некоему деланию имущи естество, а не ко еже зрети. Но аще убо ино что подложил бы кто зрети, виждь, яко ум не зрит единое просте, но два вне слова, и два зря, едино быти не может. Сечется бо, якоже показася, на та, яже видит. Аще же не видит, аще убо не хотел бы сие, не возможно есть. Не мощно бо есть недейство и в самом том кратчайшем мгновении (времене) уму словесному пострадати. Но ниже притупляется голень сия ума, но быстру сию имать. Или сице сложен бы был, или не прост, от неподобночастий неких составляемь, якоже случится. И аще убо едина часть голени зрит, другая же ко иному некоему виду действа учинися, сложения (же) и сие, есть поречение: еже о простоте ума рещи, зело есть неприятно. За сия убо единственное и простое ума, аще бы просте единое смотрело, едино и то действом бывает. И аще бы едино было просте, простое едино зрит. Темже убо каковолибо деяние или видение, по нужде видимо быти должно есть к паче ума единому: аще ли же ни, не совершит ничтоже, но всуе явится дея или зря ум. Будет бо действительне под разделением страстей лежащ. Не пригвождается чувством души к паче ума единаго единовидне соединению. Еже убо соединение процеждати весть и очищати зрительное ума, ко оному единому возвышаемо и взирающо, и ко оному пристраждущо, от негоже вся, имже и в немже (с. 967) вся и на неже и бывают, и суть и в существо произведена суть. 19. Всех желаний край есть Божественное с душею и паче ума соединение: (и) Божественнаго ради соединения, нуждно есть Божественное подобие: Божественнаго (же) ради подобия, нуждно есть еже умом действовати, сиречь зрети. Таково бо и Божественное есть, от чего и имя, Бог, к сему определися. Но убо еже зрети абие на мысль Бога восходит. Везде бо, и во всех, аки некия лучи влагает Бог во зрительный ум, и ум зрителен прямоположна имать Бога, Бог же есть едино премирно. Есть же и естество ума бывати таков действом, якова зрит, якоже Богословный язык Божественнейшаго григориа являет: светлость Божию, глаголющ, и видети и пострадати. Еже бо ум виде, сие и пострада, уже таков и бысть: ошаряется во ум, глаголет петр иже от дамаска, по видимым им. И якоже в разделенных зря и различных, различен бывает и разделяется: тако и к взиранию премирнаго и просте единаго возшед, последованне едино бывает, якоже мною глаголася напред. Повнегда же бы во едином был, безначальное и безконечное зрит и невоображенное и простое, таково бо есть единое. [зри] Темже прочее и той безначален, безконечен и невоображен, и прост по действу бывает. Сие же пострадав, и сице изменен быв, во уподоблении по части Божии, поелику мощно есть, обретается. И отсюду востекает ко всех желаний краю, к Божественному (сиречь) и паче ума и неизреченному соединению, еже есть, крайнее по Богу намерение. Подобает же убо сих ради уму тщатися всяцем ухищрением горе простретися и взирати духом к премирнаго и единаго видению и взиранию. 20. Егда ум во многих, или еже малейшее будет поне во двою, яве яко не просте единое зрит, сего ради определен же есть и конечен. Яже бо несовершенно проста, такова суть. [зри] Внегда же воистинну единаго во осязании будет (с. 968) неосяжнем по умному на сие духом взиранию безочесне воззрев, безначален, безконечен, безприделен, невоображен же и безвиден бывает, и в неглаголание облекается, и еже молчати обучается со ужасом, и исполняется веселия, и страждет неизглаголанная. [зри] Безначальна же и безконечна и безпредельна да не по существу мя возмниши глаголюща бывати, но по действу. Зане и в неже прелагается ум, не существо его есть, но действо. Аще бо бы по существу изменился видев и пострадав обожение, сиречь, обожен быв от еже Бога видети, был бы по существу Бог. Но убо несть сие, ни от ангел никтоже, разве самаго и крайняго и единаго Бога, еже по существу быти Бог. Аще убо по существу обожатися уму рещи есть безместно, остается глаголати сие страдати ему самем тем еже зрети. Не убо естество имать изменятися на существе тому, но на действе. Паче же аще и изменяется естественне ум, якоже речеся, по видимым им, но отнюд никакоже зрит Божественное существо, но действие, убо ни той по существу изменится, но по действу. 21. Вся от премирнаго единаго яко возсиявша не отступиша, отонудуже прияша бытие всяцем образом. Но в нем якоже быша, тако и содержатся и совершаются: и ничтоже есть ни в чесом от всех, в немже несть излияния, и аки некая воня онаго творительнаго и сущаго единаго, и вся сущаго причащающаяся токмо не глас испущают в себе показующа, не премирное едино: сие бо превыше седит всякаго каковаголибо аще видения, аще помышления: но некую лучу единаго премирнаго. Темже, понеже всеми призывается единое, и вся зрят к единому, и само то единое премирное всеми сущими проявляет себе уму: нужда есть руководитися и наставлятися и водитися уму к единому премирному. Ово убо многих сущих уветом понуждаему: ово же и яко зиждущее едино: (о немже нам ныне слово есть) хощет зретися от ума избыточеством благости, да в сем ум (с. 969) страждет еже жити, якоже само то глаголет неизреченное едино: аз есмь живот{Иоан. гл. 11, ст. 25.}. И, се есть живот вечный, да знают тебе единаго истиннаго Бога{Иоан. гл. 17, ст 3.}. И инде: взыщите Господа, и жива будет душа ваша{Псал. 68, ст. 33.}: от взыскания бо есть видение, от сегоже живот. И яко да радуется и просвещается и веселится, якоже давид глаголет: яко веселящихся всех жилище в тебе{Псал. 86, ст. 7.}. И, во свете твоем узрим свет{Псал. 35, ст. 10.}. Или како ум убо созда зрителен, своя же во всех сущих разсея: имиже аки некиими окнами озарением умным уму показуяся, привлачит движима сего к себе просвещаема. 22. Бог, (еже есть троическое благое едино) еже сотвори, хотяй сотвори. Но убо еже Бог хощет, крайнее есть благо. Естество бо есть уму благость: сотвори убо ума самаго себе, или своих си зрительна, еже собирати весть зрящаго к единому: угодно убо есть Богови зрительну быти уму самаго его: и сие ему есть крайне благое. Бог же есть воистинну и просте единое, к немуже взирати и собиратися единовидне, крайне есть благо, якоже показася. 23. Аще едино есть, и соединенно рачение, соборное по Богомудрых сказанию, едино есть яве яко и рачительствуемое. Аще бо были быста два еже малейшее, рачительствуемая: или два были быста рачения, или на два разделилося бы единое рачение, и никакоже бы именовалося едино и собрано: ныне же едино быти глаголемо и собрано соборное рачение, ясне разумети подобает едино быти и рачительствуемое. Но убо преимуществует рачительствуемое еже окрест себе рачения. И не возможно есть отнюд, прежде даже кто не ялся бы за рачительствуемаго, каколибо дабы возмогл имети рачение его. Есть же рачение сие, протяжена любы, юже к Богу имети, естественный же и писанный закон Божий истязует от нас. Ов убо, крайне ум добротолюбен сущу увещавая ятися за лучшее, еже есть Бог: сей (с. 970) же, возлюбиши, глаголя, Господа Бога твоего от всея души твоея, и от всего сердца твоего, и всем помышлением твоим{Втор. гл. 6, ст. 5.}. И Господь же Бог твой, Господь един есть. Едино убо есть рачительствуемое: еже есть троическая единица, ейже воистинну и прежде быти подобает во уме еже окрест ея рачения. К премирному убо единому горе простретися уму желати подобает. Яко да обретением и видением сего, возсияет и еже окрест его рачение, и исполнитель человек быти возмогл бы и закона и заповеди, возлюбив, по реченным, Господа Бога своего. 24. Не возможно есть возшедшу уму к паче ума единому нерачительну некако быти его: доброту бо неизреченну и недомысленну произницающу из него, яко от вседержительна корене усретает: егда и аки мрежа раздратися бедствующи обретением многих рыб и влечением, от Божественных просвещений ум обретается: и юже паче ума доброту зря ужасается, и аки от вина упивается, и яко безумный изступает, и еже паче мысли страждет удивление, ужасныя доброты паче добротное видение не вмещая взирати. Темже воистинну и узами любве содержимь есть, и аки от жажды обретается опаляемь. Едино бо есть еже паче ума единое. Но от всех проповедуется яко всех предначало виновно, яко начало и яко конец, яко содержание всего. Но добрых и благих всех доброты и благости преисточением добрототворныя силы само произведе, превыше всякия доброты, и всякия благости безконечнократне безконечно внутрь седящо, и без сравнения едино сущо премирно: едино естеством рачительствуемо паче всякаго рачительствуема, яко едино воистинну добро и благо, превышше сущо всякаго добра и блага, и едино законом естества же и чина воистинну возлюблено, яко всех виновно, и яко толико, елико возлюбленная вся и рачительствуема превосхождением доброты (с. 971) и благости превозшедшо: и едино премирно воистинну, яко едино воистинну сущо, и всех сущих производительно. Обращатися убо подобает с благим получением, еже глаголется, Духом к самаго единаго обретению и разуму: отонуду же всех начала, и идеже всех концы, и всяко сама о себе Божественныя любве дверь нам благодатию Христовою отверзается, и внидем в покой Господа нашего в веселии и радовании мнозе, и сладость того единаго познаем, и Божественна наслаждения во искусе будем, едино и сами бывше, а не на многа раздирающеся, или разделяющеся, по Спасителя ко отцу молению, да будут, глаголющаго, едино, якоже и мы едино есмы{Иоан. гл. 17, ст. 22.}. Тогда убо и заповеди опасни будем хранители: возлибиши, глаголющия, Господа Бога твоего от всея души твоея, и ближняго своего яко сам себе{Луки гл. 10, ст. 27.}, и еже по человеку совершенства имемся, елико достигнути мощно. Конец бо закона любы есть, в нейже не токмо весь закон и пророцы, но и вси висят совершени бывшии по Богу во Христе. 25. Всякаго естества имущаго соединятися с Духом, умаление есть разделение. Темже убо и ум, действом аще бы нечто и разделялся, вне есть последствующаго ему по благодати. Сие же страждет различна некая зря: несть бо мощно в различных взираниих имети нераздельность. Аще бо бы кто (сему) учил не обрящет со удобством воздать слово. Чесого ради ум безмолвия, ин есть паче (ума) слияния, и ум ли Богобоящихся стужаемому от (непостоянства) страстей подобен быти докажет, еже есть безместно. Таков бывая всяк ум действом якова зрит, по нужде зря сложна, и той различен бывает: и простоты испадая, несть возможно, дабы возмогл имети в сем нераздельное. Под разделением же лежащий, отнюд никакоже есть от греха чист, внегда и само то еже разделятися о себе, возмогшими созирати (с. 972) о таковых, грех судися. Понеже умная ума вещь к высочайшему и премирному единому горе взиранием, пачеестественнаго вкусити умным чувством добра должна сущи, в разделение еже вне благодати изступльши есть уже. Подобает же убо премирнаго единаго держатися, и горе простретися, и взирати к нему, и точию и единственне всею душею, аще избегнути хощем разделения и инства. Не токмо же, но ниже аще бы к единому убо взирал, зданну же, неразделен может быти ум. Едино бо зданно, не может глаголатися воистинну просто: предельно бо есть и сложно, и описано: и сего ради ниже просте единое имети праведне есть именоватися, ниже просто имети будет и единовидно ум свое действо к сему неуклонне взирая: будет бо предельно и описано взирание сего со сложением, яково есть и зримое от него, и Боговидныя благодати проста, и безначальна, безпредельна же и неописана устрояющия его отпадет, и тайнаго, и паче ума единаго вне будет. И своея славы, яже есть наслаждение единоначальна свойства, и безначалия безпределие и простота, в безвидном единовидне бывающи, лишился есть. И преестественныя и неизреченнейшия доброты не достизает мечтание пострадати. Подобает же убо уму к безначальному простому и безпредельному и воистинну единому взирати, и горе простиратися: и тамо тщатися осияватися, (и) с началособирательною единицею соединятися, и сего ради с собою, да не токмо возлюблен будет от лучшаго, яко уподобился ему, елико есть возможно, безпределием же и простотою, безвидием и невоображением: но да и сам Божественную и предобротную доброту и преестественную возлюбити возможет, яко востек, по реченным, ко уподоблению. Понеже бо подобным бывати естественне обыче любительно завещание к подобным, яве есть воистинну, яко возлюблен будет, и взаим возлюбит ум Бога: подобное бо подобному есть подобно. И якоже подобие имать еже воз_обращатися, (с. 973) отнюд имети будет сице, и ко еже любити, еже взаим любиму быти. Паче чесого больша страдания между Богом и душею ничтоже есть. 26. Паче своего си естества тогда ум бывает, егда в сущем паче ума отнюд будет, безвиден же и без_образен, и отнюд обоженне невоображен быв, безначален же и безконечен, и якоже словом рещи, паче своего соединения. Егда же помысленное свое имать с собою, и в Божественных был бы и мысленных упраждняяся, тогда естественне глаголется, и двизатися и действовати, и во своем си естестве стояти. Помногу же превыше есть еже паче естества того, еже по естеству, и есть зело вышше. Подобает убо любити тщатися быти того, еже паче естества, яко наипаче лучшаго, по глаголющей заповеди, ревновати больших дарований. Но убо яве яко ум в пачеестественнем сый в Бозе есть, (кромешний бо есть всякаго естества Бог, иже воистинну есть древнейшее и просте единое) подобает убо к древнейшему и просте единому уму горе простиратися, и тщатися взирати и возводитися аки в преестественное едино, да паче своего естественнаго действа возшедшу, лучше будет ему, нежели во своем си по естеству стоящу. 27. Коеждо от сущих во своих си свойственных радуется же и почивает естественне: яже вся во древнейшем виновнем предсоставишася по вине единовидней. Тогда убо во истинна веселия ум приидет естественне, и радость имети будет не малу, и почиет отнюд, егда вся пришед и оставль, к единоначальней оней и первейшей вине горе простерлся бы, и тамо бы достигл обращением умным, от неяже вся же суть, и яже всех, сиречь начала же и среды и концы, и в нейже вся составишася и содержатся, и еюже к концу своему водятся совершаемая: и еяже ради благостраждут благостраждущая: от неяже и сам той уже ум, и каков есть, создася: образом неким самому к себе мощно есть уму (с. 974) обращатися, ко оней истинней и всех вине обращаему, сущей его истинному первообразию. А понеже коеждо само себе любит естественне, и наиначе же ум сие страждет, яко недостижныя доброты паче ума единаго образ сый предобротен: зело любит обращением взирая к своему си виновному, зане, якоже речеся, самаго себе зрит тамо зря, и превозлюбляет. И инако же, яко и сие любы некая есть тем, из него же к тому от негоже естественне любительна, якоже и напротив, рачение обдержится в родителех к рожденным. Сего ради многа некая возницает и неизреченна сладость к всех виновному возвращающуся единому. К тому бо из негоже есть, обращается, и к самому себе, якоже речеся. Тамо бо предсоставишася словом вины вся, темже и ум яко от всех сый едино, во еже быти есть в паче ума едином, яко виновнем первообразнем. 28. Якоже от паче существа сущаго всяко существо, и естество всяко от иже паче естества, и от безлетнаго и несложнаго, яже во времени же и сложная, еще же убо от незданнаго, зданная быти естество имут: так и всяк вид от безвиднаго бысть и от премирнаго единаго, многая и видимая. Убо к единому безвидному не упражняяйся, и взираяй, и аки от онаго зависяй, но ко иному чесому в виде и твари зримых: сей несравненною мерою умаленное превышесущаго первейшее положи, и идолослужителей негли близ стоит: в немже бо упражняется кто, и к немуже взирает, сего и желает, и егоже желает, сим и побеждается, и имже побежден бывает, сим и поработися. Сице служит сей твари паче творца. Сим во ум коегождо и поработися и служит ему, и любит (е) еже взирает, и в немже упраждняется. Аще же кроме единаго простаго и безвиднаго упражднение и взирание толико поползатися творит: к единому безвидному простому (да будет) нам тщание, и познание обращением: и горе простертием умным, идеже сокровища (с. 975) всякаго суть разума, и идеже достигшим, всякаго видения покой или почитие, и от еже помышляти престатие, и паче ума молчание, и неисповедимо радование во мнозе удивлении. 29. Аще вся сущая еже быти желают: есть же всех еже быти, по вине, в паче еже быти едином, вся убо и паче же словесная, от сущих, право и якоже подобает движущася, паче еже быти и единаго желают, еже быти желающая, убо не к паче еже быти единому горе простираяйся ум, ниже сего желаяй, развращенна и погрешна употребляет движения, и своего испадает достоинства, еже есть паче еже быти единаго познание, и Божественнейшее к нему паче ума единовидное соединение и возлюбление. 30. Виновная излишше имут доброты винимых: виновное же всех обще, единое пресущественное. Аще убо ум прилепился бы к нечесому от яже по единем пресущественнем, яко к добру, или яко како либо умна достойну привлечения, яве погреши намерение его. Добротолюбен убо сый, но не к первому и истинному (от негоже вся добрая причастием суть добра) пресущественному единому: но к причастным сущим от онаго доброты унынием или невежеством движимь. Улученне же разсмотревающий ум, к единому пресущественному свое простирает мысли взирание: разсуждая ясне, яко лишше получит то, егоже желает, яко в виновно во оно умно взирание достиг: и яко ничтоже есть своих, или какова либо добра преподательно, точию пресущественное едино. Аще бо некая и мнелася быша силы суща предподательныя своих, но не выну пребывати имут естество сия в рачительнем уме: единому бо сия святому Духу творити веруется, и якоже бы хотел действовати, и где либо, яко Господь сый, и естества сый Владычня, и лице триипостасныя единицы. К пресущественному убо единому обращатися подобает уму, идеже не токмо источник каковых либо благ, но и дарований неотемлемое есть раздаяние. (с. 976) 31. Вся сущая желают естественне благаго: едино же есть воистинну благо, аще и многим глаголемым благим. Просте бо благо, и аки всесовершенно во многих не обрящеши ничесоже. Но по некоему блага причастию глаголемо благо некако, от едина пресущественнаго причащающося благаго, никакоже сие имущо от себе. Оно бо токмо едино пресущественное, благо есть просте и преблаго, и источник всякия благости, и своих си преподательно, и к самому себе естественне обратительно, всякаго существа, бытия, навыкновения, силы, движения, действа, свойства, и каковыя либо доброты и благости: и просте сущая вся, и вся окрест сущих видимая, отонуду от единаго пресущественнаго прияша явление творительне. Сего ради ум к иному чесому, а не к пресущественному просту едину носимь, погрешно имать движение, двизаяся убо негли ко благу, не к воистинну же и просте благу. Ниже ко ублагодатствующему и лучша сотворяющему, и иная превосхождением благотворна преизлияния ублагодатствования и лучшинства требующая. 32. Ум убо многих под разделением от безумия лежащ и аки растерзаваемь от многих, не весть благое просте единое: ниже убо ищет, ниже упраждняется к нему. О нихже глаголет иже в Давиде Дух: Мнози глаголют: кто явит нам благая{Псал. 4, ст. 7.}? а не благое, и влепоту: о многих пекущеся и молвяще, неведуще яко единаго есть искати потреба. Егоже часть, яже святым Божиим словом блага изречеся, или не разумевше претекоша, или вознерадивше оттщетишася (ея) ни поне во ум полагающе взыскати паче всех взыскатися достойнейшаго: водими же бывшии Давидом наказателем, и яко стопам онаго последовати подобает судившии: знаменася на нас, глаголют, свет лица твоего Господи: сиречь разум единственныя славы твоея знаменася яко в зерцале в нас. (с. 977) Тако во многих радуются изобильнии и мнози людие благих. Сице внутрь озаряются живущии духовно единственнаго и просте благаго ведением от Духа премирне просвещаеми. 33. Якоже влечение воднаго течения больше бы было единовидне проливаемо, нежели разделяемо и раскалаемо на многа. Тако и взирание ума, и движение же его и желание зельнейше будет убо, взирающо не многочастне, ни многообразне, но единовидне и без разделения, еже бывати естество имать к премирному и просте единому горе протяжением и взиранием и видением. Собирательно бо есть воистинну премирное и простейшее едино. И сие зрети ум сподобися, не мощно есть не вообразитися якоже подобает подобне тому аки образ, и не быти безвиден, в чину единовиднем, прост, безшарен, безвиден, безкачествен, неосяжен, безпределен, безконечен, безобразен: и еще просте едино премирно, лучами Божественна и премирна рачения просвещен во откровении разума таинственна, безгласием и неразумием, паче слова и помышления увенчан быв, наслаждаяся духовна радования, и веселия небесна. И еще изменяется на Божественнейшее и в Божественный образ облекается, в простое и безконечное, и безобразное, и безвидное, и единое, и в предреченная иная духовне вообразуемь. И аще бы убо не сие тому было и не пострадал бы таковое Божественно изменение во осязание и мечтание единаго премирнаго, никакоже достиже. Единица бо единотворна есть Бог, и ум паче помышления, и тогда елико мощно есть ум премирне сего мечтает: егда с глаголанными и едино паче помышления будет, Божественным мечтанием сие пострадав. 34. Троическое пресущественнаго Божества в единственное собрася преестественне. Единица бо триипостасная есть Бог. Несть убо мощно в подобии приискреннем Божии быти души образне, не и той сущей тричастней, к себе бывшей преестественне едино: глаголю же тричастную душу: не по словественней (с. 978) и похотетельней и яростней части: истинно бо не в сем есть тричастна душа: не бо усвоенне обретается словесна душа к похоти и ярости: суть бо сия от безсловесныя части привзята настоящаго ради скотнаго жития приподстояща, безсловесна и темна о себе. Душа же и словесна есть, и естество ея исполнь есть света умна. И подобает воистинну она глаголати быти ея, ихже кроме действовати свое си не может действо. Но убо без ярости и похоти действует, и наипаче тогда воистинну действует, егда без сих действует. Не воистинну убо части сия ея суть, но якоже рех, скотнаго и дольнаго случая силы суть, той приподставше. Душа бо словесна, умне вышняя разсмотряющи, и мечтающи мысленная, и паче себе горе простирающися: и, якоже рещи, возскачущи, далече негде повергает яко буесловие суетно похоть и ярость, не имущи в няже сия да употребит, (тамо) идеже простота и безвидное, и безобразное, безшарное же и невоображенное, и иная елика ум свободен и единовиден и соединен к себе, и отнюд прост истязуют. Но есть тричастна свойственне своею простотою душа ум сущи, употребляющи слово и дух своя си свойственнейшая, и простоту ея отнюд никакоже повреждающая. Зане ниже тройственное единоначальнаго Божества, егоже образ подобен есть душа, своему единственному и простому препятственне стоит, но есть и просто единоизвестне Божество пресущественно, и паки ничтоже мнее, и тако утвержденне Троица. Сия убо, душа, (сиречь ум, ум бо есть, и все ум, душа,) слово, и дух, преестественне быша едино, истинное подобие подают нам триипостаснаго единаго Божества. Сие же не отинуду мощно есть быти, точию от горе зрения и видения преестественныя троическия единицы. сия бо есть душу такову сотворшая, и обращающая сию на сие, отпадшу: и кроме еже к ней зрения и видения сему быти души не возможно есть. Емуже не бывшу, ниже возвращшуся подобию, и сим (с. 979) образом скудни явимся, и паче же на зрительней части, и на истине, яже наипаче тщанию достойнейша. И без нихже, в безстрастно устроение достигнути нам несть возможно. Якоже бо во благом действенне нам быти подобает, да будем от безстрастных. Тако и ко истине зрительне, да будем Боговидни, Богу иже над всеми служаще и бози положением и сотворитися, и быти по возможному подобию началообразия желающе. Аще же едино быти нужно есть нам за первообразнаго премирнаго единаго подобие, сие же еже к самому тому премирному единому горе зрение и видение и горе простертие и умно обращение естество имут творити нам, и еже к самому тому единому неуклонне смотрети. Всяцем убо образом подобает покушатися взирати к паче ума единому премирному, и тамо завещати всех себе всяцем тщанием, и всем сердцем и душею, и питати в себе препростертое единаго и самаго премирнаго рачение, яко да само рачение его вместо крил святых будет еже к нему умному гореношению нашему. И тако всегда яко на воздусе в безвиднем устроении единовиднем с Господем будем воистинну единем, троичне троицу умне, словесне же и духовне воспевающе, и к ней яко воистинну возсияюще и ужасающеся, и еже по силе нашей соединением с единем соединяеми единовидне паче соединения. 35. Единица чувствена, всякаго числимаго множества есть начало. И единица премирна всего видимаго же и помышляемаго множества, и всего сущаго, начало есть. Якоже убо всяко число от единицы имать начало, тако все сущее каколибо, от премирнаго проливается единаго, по вине или естественней или творительней. Обаче числимыя убо единицы положение, елико чувствена есть, естеству своему последованне последствует. Начало бо сущих всех яже под числом, и чувство (сие) перво полагает ю числящи. На премирном же едином, зане есть паче ума, сопротивное зрится. (с. 980) Естественне бо сущи единица, первейшая всех, ум сию по всех полагает. Ни един бо возможе ум, премирное едино сотворити начало, от сего происходити на многая, но противное, от многих, ко оному восходит и собирается. И тако убо нужно есть чувству числимое едино, за происходна многая, инако не суще мощно числити, или предыти якоже хощет. Зде же нуждна суть уму многая, ради ко премирному единому сими возвождения, и аки самаго себе собрание, отинуду взыти якоже хощет на мечтание единаго премирнаго ни откуду могий. Тако убо ум чин и путь себе свойствен употребляя, начинает убо от многих, конец же творит премирное и верховнейшее едино. Понеже бо удобопостижно есть и удобопредельно числимое по чувству едино, естественне чувство, сие полагает, якоже естество его истязует, и положением первейше. Искомая же умом единица премирна и преестественна же сущи, и еже помышляема быти избегающи, далече негде есть, и своего еже по естеству положения, якоже от оныя уму начинати, но паче яко преестественну преестественне не начало, но конец ту обретает ум, по прешествии, и да сице реку исчислении многих. Понеже бо ум естество имать еже помышляти, премирное же едино есть о себе непостижно и неприступно, ко многим и не хотящо употребление прекланяется ума, ниже празден быти от еже помышляти могий ум, ниже верховное и премирное едино имея крепость обяти. Взирая убо на многая, в коемждо от всех взирает мысленно (нечто), не еже что есть быти, но еже есть некоего единаго. Таже собирая от коегождо видима коеждо мысленно предявляемо, и между собою сия согласна суща, а не противна зря, и вся аки единаго корене и изращения цветы, последованно происходит от многих на едино верховнейшее, из негоже суть многая и вся естественне собирается от естественных сущих в чин преестествен, преестественное и пресущественное аки в зерцале (с. 981) зря единое, якоже имать естество еже паче естества от сущих по естеству зретися единовидне. Тогда убо ум источительное благостей и всех доброт происточение, и творительно неизреченне взирая, и наслаждся пресущественнаго едина, не самоволен обращается на многая, аще суща и добра и части благия причастна. Добротолюбив бо сый наипаче, естественне неволею отстоит от еже паче всех, аще не како по обстоянию некоему случилося бы ему сие. Но понеже образ сущих есть различен, и различно имать умное взирание, и различне ум сими на премирное едино, и преестественное востекает: подобает якоже аз мню, мало некое ухитрити многими к пресущественному премирному единому пути приобретение: яко да аки по лествице ум восходя утвержденнейше свое творит движение, и познавает, аще бы что когда в нем оскудевало: или естьли когда в немже подобает быти, и всем неколико наслаждается ли, и что есть низмещущее и отставляющее его доброты оныя и восхождения или Божественнаго пирования: и како паки мощно бы было ему возвратитися, отонудуже поползеся. Отсюду познает и мглу страстей: и чистаго сердца озарение и познание истины каково некое есть возмогл вы зрети яко в зерцале, и небесных зрительств причастник будет, и Божественное чувство увесть, и не тайно будет ему, растет ли, или ко умалению идет. И многих досточудных в разумении возмогл бы быти, и намерение безмолвия, кое есть, уразумеет, и затвора. Глаголем убо тако: вся сущая, разделишася на чувственна зданна, и на зданна мысленна на мысленна не зданна, и на незданно паче ума едино пресущественно. В сих око душевное обращаяся, сиречь ум, и часте взирая, и в постничестве еже безмолвствовати изволяя, воздвижется от еже подобающая на едине деяти, яко от степене некоего во еже зрети, и в воистинну сущем упражнятися небесных, и лучами истины увенчаватися, и радоватися, и богатети безконечне присносущными, (с. 982) и чудне веселитися и услаждатися, негли же содейством благодати, и от земли восхищатися предыдущу времени, и утвердившуся умному свету по навыкновению, и не чувствовати сущих зде содержанием сущаго паче ума, и мечтанием сущаго паче всякаго добра несравненно. Пяточастне же Священней сей лествице разделенне сущей, и яко степенми восходящей на крайнее намерение, не местно имать разстояние степень от степене: но разнство, и еже разстоит от другаго, ин чин есть, аки качества, или свойства некоего. Якоже, суща убо, суть равне: чувственная зданна, и зданная мысленна, но вторая, многою мерою первейших превышают, елико чувство ум, свойственным добром: паки же превосходят по многу незданна мысленна, мысленных зданных, обоему сих чину в сущих явлену сущу: обаче низша суть сущая незданна мысленна пред паче ума незданным единым. И есть отсюду яве, яко еже в превосходящем всех сущих стояти пришедшу уму от деяния, и во онем верховнейшем сокровенстве превыше лежащем всех чувственных же и мысленных быти лучшее есть взирание его и видение, якоже смиреннейшее в чувственных зданных или и паче в делательстве. Подобает убо добротолюбну сущу ему естеством, всяцем образом лучшаго желати, не точию да насладится, но да и постраждет лучшее и паче ума, якоже подобает, изменение. Понеже якоже глаголася, якова ум зрит, и в яковых наслаждается: таково приемлет и изменение. Обаче понеже сплетенный с естеством ума прелог, никогдаже престанет от него, дондеже днешнее будет, и по глаголющему, дондеже двигнутся сени, то есть, дондеже прейдем от настоящия жизни, показующия аки в зерцале и гадании осененне истину: подобает препадающим от видения и взирания, единаго паче ума незданнаго, ухищрятися стояти, яко в ближнем в мысленных незданных, яко да паки скорее к единому паче ума незданному будет нам возвращение. Дебельшей же нападшей (с. 983) мгле, и еже помышляти помрачающей, и уныние возливающей ко еже зрети на ум, на молитвы деятельне с сердцем смиренным обращати подобает нам его, и тьме силою молитвы прешедшей, паки якоже основание некое творити чувственная зданна: предживущу в сердце действом духовным существенным свету умну, и предсодержащу уму яве яко деятельныя разумно зело державу. Яко восходити ум естество имать аки на некое верхогорие, или смотрилище воистинну, и зрети многими не токмо невидима, но и неискома и недомысленна: и егоже кроме никтоже узрит, ниже самого себе, ниже и наипаче Бога. О которой деятельне (добродетели) мимошественне ныне уже рещи негли не далече намерения будет. 36. Три душа внутрьуду имать требующа деяния, словесну (часть), желательну, и яростну. И три внеуду, желание славы, сласти, и многшаго. Сии убо две тройце разумно душа взирающи на еже во плоти жительство Иисуса Христа четырми своими соборными добродетельми, мудростию, сиречь правдою, целомудрием, и мужеством, благодатию Господа Иисуса исцеляет, и дает уму своему неомраченне возвышатися, и Божественная разсмотревати, и зрети Бога. Егда бо Господь Иисус веден бысть в пустыню духом, имея борением победити диавола, постом убо похотетельную часть исцели: бдением же и безмолвною молитвою, словественную: яростную же сопротиворечием: сластолюбие же, славолюбие, и сребролюбие: теми, имиже алча не взыска, якоже диавол советоваше, да камение хлебы будут, ниже вержеся низу от крила церковнаго, да от народа ничтоже пострадав низпадением прославится, ниже поклонитися повинуся обещания ради взятия богатства всех царств: но сопротиворечием яровидным, мудрым, и праведным, целомудрым же, и мужественным, сатану отрази, и нас сим уча побеждению его противу всякому нашествию. Сие убо истое кто и при Кресте Спасове узрит и увесть: ибо молится (с. 984) ли в тогдашнее время Спас, учеников удалився: Сие исцеление словественныя части есть. Бодрствует ли и бдит, и жажду терпит на кресте? сие врачба есть похотетельныя. Не вопреки глаголет, ниже убо прится и вопиет, да еще оболгаваемь, и о стужающих молится ли? Сие Благочиния есть яростныя: диавола убо сопротиворечием ударяти, человеком же стужающим, яко и тем стужаемым от сатаны (отпущати) молчанием, долготерпением, и о них воздавати молитвою. Оплеваемь ли есть, заушение приемлет, терпит подсмевания и поругание? сие исцеление есть сластолюбия, оцтом ли напояется, желчию напитовается, копием прободается? сие врачба есть сластолюбия. Наг ли повешавается подвоздушен, бездомен на кресте, презрен всеми аки некий нищ и убог? сие есть сребролюбиваго завещания упразднение. Внутренних убо страстей и внешних Спаситель дважды показа врачбу: егда в мире являтися с телом начат, и егда от мира отити имеяше. Темже и к нему, и ко учению его и ко кресту зряй, поелику есть мощно себе подражание его творя, мудре и праведне, целомудренне же и мужественне якоже он упразднит убо еже на зло действие страстей сих, и всех сими: употребит же сия, якоже подобает, и по сих вся, и деятелен муж будет воистинну, и ко еже зрети, и к Богу горе простиратися и упражнятися во умнем зрительстве готовейш. И тако убо от многих ум его чувственных зданных начен, и увидев доброделия их благополучие, и разумев зданная мысленна, и на мысленная незданна прешед, яко на лествице степени уже прейде четыри. По сих же Божественное и паче ума последствует ему невещание и молчание и ужас, и вкратце рещи, единаго премирнаго взирание и видение, и паче помышления соединение. Еже есть безмолвия верх: крайнее и совершенное желание елико в настоящей жизни: истины предел: веры приплодие: светлое просвещение надеемыя славы: основание любве: правило ума: стояние (с. 985) приснодвижения его, и недомысленно почитие, и единовидно устроение: еже яко во обручении делание есть будущаго века: вина безмечтанныя радости: ложница мира: угашение мудрований плоти: отвращение настоящаго века: пристрастие будущаго, книга распустная страстныя жизни, соестествие безстрастия: души веселое радование, и своих ея движений и сил собрание, покой же и стража: и всемственне рещи, Божественный разум и безстрастие. Подобает же смотрети, своим унынием или внешним неким обстоянием яту бывшу уму, паки на свое возвращатися видения добро сопротив стоящия страсти, и далече творящия его своего намерения отвержением, и колико отстоит крайняго желаемаго? и почто? и в чувственных ли зданных, или зданных мысленных, или мысленных незданных есть свое его зрящее? или помыслы суетными, или потребы ради некия разделяется от предлежащаго, и самаго воистинну, и единаго паче всякаго единаго премирнаго, и отяти сице яже посреде возбранения? Да паки возвратитися единовидне, якоже сам той чин истязует, к единаго премирнаго видению и взиранию. Вне бо негде премирнаго назданнаго паче ума ум обретаяся под разделением есть, и не в воистинну добрем, аще бы и двизался добре. Сие бо есть верховное добро, еже паче ума пресущественное незданное и простое едино: и сей есть воистинну крайний прямо ума лежащ конец. И убо здраво двизаяся ум тамо реченными обретается восходя, и еже паче ума страждет соединение. Гонити убо подобает, елика сила, безконечное, и испытовати еже паче ума, и зрети безвидное едино, и постизати нашествием непостижное, да возможем получити единственное единаго наследие крайняго Бога, благодатию Господа нашего Иисуса, и животворящаго Духа, имже просвещаеми зрительныя сподобляемся благодати, и бози положением Богосоделавшеся бываем даром Божиим. 37. В место Божественнаго сокровенства возшед ум, естественне молчанию прилежит соединився простоте, и (с. 986) последованно единственне еже паче мысли единому, осияваемь причастием Духа. Что бо и возглаголал бы превыше своего умствования достигши, и вне всякаго помышления быв, и наг отнюд яко паче еже помышляти? Аще бо слово якоже глаголати еще ему остается, яве есть, яко и помышляет: всяко бо слово есть по помышлении, и аще что помышляет, како в месте сокровенства ста? не бо есть тайно воистинну, еже иному не видящу сам той ум видит. Зане тако убо многа глаголалася быша тайна, яко премнога, или да сице реку, вся елика ум видит, не ведущу иному еже видит, сие видит. Будут убо сице тайная и безконечнаго близ: еже есть безместно. Едино бо есть воистинну тайное, в немже ум по всех восходит, яко в то, от негоже все есть, аще видимое, аще помышляемое. Темже и той, яко ко еже паче всех востек, и видимых, и глаголемых, и помышляемых, вне и еже помышляти и видети и глаголати бывает. И не у на толико взыде, ниже в Божественное достиже сокровенство, дондеже бы глаголати могл: помышляет бо. Но обаче тайное недомысленно, убо и паче слова есть. Убо ум в место Божественнаго сокровенства возшед и соединився, последованно молчанию прилежит не волею, но естественно и единственно паче мысли единым осияваемь. 38. Аще напред предыти и предуспевати творити ум словеса естество имут, убо возведут его предуспевша, идеже слово не достизает в вещь яве яко совершаему молчанием. Аще ли же присно словеса были быша уму, и присно требует их душа, аз не вижду, кое есть умное от еже глаголати предспеяние: еже бо глаголати, не токмо есть, во еже деяти полезно, но ничтоже мнее и во еже видети. В нюже часть ум восходит от яже во образе словес сущих, к просте паче слова без_образному, и совершенно и воистинну единому, внегда и всяко слово мнится (быти) чрездельно, или истиннейше рещи, есть на препятие. Словеса бо, по всему, в прехождении (с. 987) суть от помышления негли на ино помышление: простое же и совершенное, и безпредельное и без_образное, и отнюд едино воистинну и паче слова сущее, како словес востребует, да негде прейдет? или како возмогло бы обято быти? обятие бо некако слово творити обычай имать: необятие же, яко безпредельно и без_образно есть. Аще же слово не бы приличествовало тайному паче ума единому, не обяту же сущу и без_образну: воистинну восприличествует молчание, убо еже глаголати, окончати предуспевшим подобает ко еже молчати, понеже ко еже просте зрети, и невоображенне, и без_образне, предуспеша. 39. Аще словеса суть уведенных (вещей), тайное же есть неведомо: убо вне слова есть тайное. Аще бо вышше ведения неведение тайнаго есть, вышшее же ведения никакоже требует ведения, много мнее слова востребует. К тайному убо просте единому возшед ум, молчанию прилежит естественне, и аще не бы естеством и не ухищренне молчал, не у в тайное и препростое едино достиже возшед. 40. Якоже безмолвию прилежаще человецы, и от келлии овогда исходят, и самым искусом разнство сидения и исхождения разсуждают. Тако воистинну и еже молчати страждуще, и еже глаголати послежде приходяще зрительне славе Божией приседящии, ведят себе, что за устроение суть, (егда) еже молчати нападает на ня естеством, а не произволением. И что суть, егда ко еже глаголати прекланяются? И еще, аще естеством найде на ня еже молчати, молятся ли, или отнюд ниже уст отверсти бысть им когда, стоящим во оном устроении? Ангели бо суть на земли инии, единовидно, безвидно, безочесно, без_образно, и просте непреходными ума взирании истине совокупляеми, точию с собою имуще ужас и удивление без еже помышляти что. Паче же по еже безочесне взирати на безначальная и Божественная осияния, и отонуду сшедшу уму яко имущему прелог, достизают ко еже глаголати (с. 988) и преходити умне во многа и различна прехождения: и да паки тем еже молчати устроение возвратится, яко лучше много паче еже глаголати сущее, безмолвие лобызают и хранятся с чувственными чувств, и всяко ухищрение употребляют, како бы возмогли бежати со еже глаголати и самаго того еже помышляти. Да могут глаголати и тии с давидом: онемех и смирихся, и умочах от благ{Псал. 38, ст. 3.}. Ибо и благая глаголати, нижше есть молчания с разсуждением. 41. Ниже всячески изявлено есть Божественное, ниже паки тайно, но яко убо есть, изявися и зело ясне: что же есть по существу, есть тайно. Зело же разнствует ведети, еже что есть, от того, яко есть. Зане то убо, от действия является: сие же, что есть, от существа есть. Еже воистинну и ангелом в Бозе ведети отчаяно есть. Есть бо Бог паче всякаго существа безконечнократне безконечный: и паче всякаго ума, и паче еже помышляемь быти. Внегда убо ум достигл бы в являющая, яко есть Бог, тогда многа может глаголати, и любомудрствовати изряднейше, и любомудр может глаголатися и Богословен. Егда же превозник и превозшед от того, яко есть Божественным обят быв сокровенством, мечтанием того, что есть действуемь, и отнюд безвиден и неосяжен, и безочесен, якоже подобает, будет благодатию, всяко слово глаголати о Бозе что могущее, пребывает недейственно, и недвижимь пребывает ум единствуемь, (и) вшед в недомысленное. И тогда весь того, еже всех вне есть, бывает, идеже ни слово, ни помышление, ни умышление кое предуспевает различествующо, но простота и непостижность: безгласие же и ужас, без_образное и безконечное и безпредельное: и невидимаго странным образом видит видение, и безвидный вид, отрешен и той и безвиден в правоте быв, и по невидимо видимым им, и (с. 989) безочесно зримым, вкратце рещи, в себе Божественною и преестественною добротою ошаряемь, и создавшаго сего такова, прославляя Бога. 42. Не токмо яко прост есть Бог паче всякаго сый сложения глаголется едино, но яко и воистинну сый един той во всех сущих глаголемых, имущих же еже быти от него. Не воистинну бо и просте сущее, несть едино. И яко такожде сый везде необятне, и яко един Всем неподобен, и чисте всех вне. И яко присносущен, ниже наченся, ниже престающ. И яко во всех Божественную промысла своего лучу пречисте возсиявающ равне: аще и не подобне вся сию приемлют. Еще же убо и яко во всех неодержимо познаваемь, ума неразлична, безвидна, безобразна, безшарна, всех каколибо сущих некасательна, и отнюд отрешенна, в безконечность безпределия, времене же и места и естества, и сущих о естестве вышевосходяща истязующ, во еже образом некиим видетися (от него) единовидне паче соединения умна. 43. Егда паче еже помышлятися бывающее между Богом и умом духовное совокупление бывает, глаголется быти тогда во еже паче своего (естества) ум, преестественное, тайное едино чувством умным совершенно мечтая. Обаче сам ум, еже страждет, по своему естеству есть (стражда) очищшемуся благодатию: сие бо есть еже помышляти уму, еже оку зрети. Якоже убо внутрь во тьме видяй, видит убо ничтоже, обаче видит аки едино ону тьму, и видит, яко не видит. Аще бо бы покровен был на очию, негли бы и свет быти вознепщевал окрест себе и от вещей некая. Ныне же видя, ясне видит, яко не видит, и еже убо, внутрь тьмы зрительней пройти силе, и уведети сокровенная, паче естества очесе есть: а не убо, еже видети, яко не видит. Тако воистинну, и на уме в Божественную востекшем сокровенность, и еже помышляти выше бывшем, (с. 990) видит убо ничтоже. Откуду бо? Обаче видит, яко не видит. И яко еже не видит едино есть, яко во мраце некоем сокровенно: от негоже проливается все киимлибо образом сущее, или видимое, или помышляемое, аще с тварию счисляемое, аще присносущне сущее незданно. И аще бы не видел, не бы выше себе видел себе препростираема. Ныне же видя, явленнейше видит, яко не видит, сый паче еже видети. И яко видетися не возможно есть (тому) еже не видит. И внутрь убо Божественнаго и паче ума единственнаго сокровенства внити и зрети, паче естества ума есть. А еже, воззрети на Божественный мрак онаго сокровенства, и возмечтати неизреченную единицу в неизглаголанне таинстве превышележащую паче всех, и увидети яко не видит внутрь Божественнаго мрака ничтоже, и зело чиста ума свойственно есть зрящаго в Дусе. Не бо затворено имать и смежающееся умное взирание и недейственно ум егда видит, яко не видит, разве точию, (яко видит) Божественное и просте в сокровенстве едино: сие бо неведения есть знамение. Но егда паче яве зрети имать, тогда во еже паче ума востичет, и тогда зрит свое незрение в простейшаго единаго сокровенность зря. Аще и яко едино есть то, от негоже вся, и яко тайно, и зело ясне видит: что же есть, не видит. И за сия глаголется быти ум во яже паче естества своего, понеже в простейшее Божие взирает сокровенство. Сие же быти ему, по естеству есть чисту бывшу, и якоже рещи, по естеству есть ему в том, еже паче естества быти безочесне: то есть недомысленне взирати на Божественное и препростертое паче ума единственное сокровенство. Не бо имать тогда каковолибо разуметельное постижение, разве точию неисходнаго преестественнаго единаго. И ту убо достиг свойственным себе движением, в стояние оканчивается и престатие. Не стояние глаголю от еже зрети, сие бо есть неистовна страсть: но стояние и престатие от еже преходити от помышления в помышление, (с. 991) или зрительство. Ум бо тамо воскочив, понеже во глубину безконечия, и безпределия падает во свет умен, в непостижное пришед Божественнаго онаго необозримаго сокровенства, якоже рещи, исчезает и стоит, ничтоже ино точию ужас во светлости стражда умней, аще и не преходя, обаче умным просвещением действуется взирая недвижно в пресущественное сокровенство, единственне же и единовидне о неприступней внутренности неисходимаго озарения недоумеваяся и удобряяся. Аще ли же бы был от еже зрети недействен, како бы страдал, еже ужасатися и просвещатися? но сим образом глаголется стояти тамо достигшу уму, яко не преходит единое зря, и к единаго светлости и пристражда и радуяся и просвещаяся, и стоит недвижимь, никакоже смежавая свое видения наслаждение. Сия бо бегательна страсть, а не похвальна, и тьмы неведения исполнь, нигдеже никакоже зрети: реченное же стояние ума, по неприступну света осиянию бывает. И видение есть не ищущо прехождения, но почития и стояния. Безконечно бо есть оно преестественное и сокровеннотайное пресущественное едино и непроходно всякому уму, и инде негде зрети не попущает зрящаго е ума. Поелику был бы причащен ум подобающаго ему очищения и Божественныя помощи, и не инако припадает от Божественнаго сего видения и предобротныя светлости и безконечия, точию привлачимь от нечесого пристрастия имея, или приятием, или от естественнаго егоже страждет прелога. 44. Уму естество есть еже помышляти. А еже помышляти, во движении есть и прехождении. А понеже ум в Боге бывая, превыше помышления обретается и движения, в лепоту сице бы могл глаголатися ум во еже паче естества своего быти, совершенно Бога мечтая. Всяко во помышление, яве яко от вещи бывати естество имать: а идеже вещь не зрится, помышление ниже раждается, ниже убо обретается. Бог убо иже никаковым образом могий зретися вещне, (с. 992) мечтает ум естественне от яже окрест себе, яже сиречь действует: яже место содержат силы от некоего происходящия сильна. Понеже убо ум во иных всех обыче силы с могущими зрети, сие ищет и на Бозе пострадати, и не могий воистинну (паче бо естества сие всякаго зданна ума есть) яже окрест Бога зрит, и Бога безочесне, еже глаголется, простою мечтает и вкупе собранною мыслию. Безмолвна же воздуха емся, и Божественныя приязни быв получитель, и действующу в нем Божественному и поклонному Духу, от еже помышляти частее восхищается в безвидно и не качественно и просто устроение, внутрь сердца скоро входя силою Духа преестественною, и стоя в мечтании Бога, и ничтоже помышляя, но превыше еже помышляти бывая. От чесого сиречь от еже яже окрест Бога помышляти, восходит в Божественно мечтание, якоже речеся, прост быв, (и) глаголется, яко в превышшем естества своего есть, яко бывает превыше еже помышляти. 45. Всякому чесомулибо глаголему тайну имети нужда есть нечто предявляемо, отонудуже яко сие есть тайно разумевается. Аще бо ни, не сущему подобно есть наипаче. Совершенне бо не дающее явления разумевательна существования каколибо, равно возмнелося бы отнюд никакоже сущему. Темже воистинну и с тайностию Божиею вкупе суть некая предявляема. Имже аки припоследствуя ум, Божественнаго сокровенства чувство приемлет, постижным Божиим восходя к непостижному, в неже достиг весть, яко есть нечто известне, еже избегает своего его естественнаго постижения, превыше суще всякаго умнаго постижения, и ангельска каковалибо, яко сущаго превыше света, и всякаго убо естества и существа, и суща всего виною, и начало и конец тоже преестественно, и пресущественно всякаго превыше суще безконечне существа, нерожденно же и безначально и безпредельно, и естеством и местом и временем просте необемлемо, и сие есть единое тайное паче ума. И есть Божественная постижность (с. 993) естественно из того происходящи, премнога некая сущи, и нас паки от себе к себе горе простирающи, и аки воз_окружающи умными руковождении, и горе простертии к началу тайному преестественну едину, толико соединяющи ны с ним, елико уразумети яко есть, и яко едино есть, еще же убо и яко всяцем образом недомысленно есть еже ведети, что есть, по существу сие тайное едино. Превыше же ума обретенное и избегающее разума како бы слово проходити возмогло. Слово же проходити не возможе, мысленное. Невещанне (же) и неизреченне и в молчании уму паче мысли единовидне взирати яко тайно, и радоватися яко о виновне и промысленнице, и ужасатися яко о превышшем света и превышшем благости, превышшем премудрости же и превышшем силы, и Божественна наслаждатися от сего радования, такожде и о сущих безконечных и безпредельных всех, имиже зрится пресущественное тайное едино, отнюд естества словесна есть последование. Непоследовано же есть, в таковых сущу уму, словес употребляти и проходити преходящу: употребляяй убо не еже молчати, но еже глаголати, совершеннаго оскудевает устроения ума. Сие бо есть крайнее сего устроение, якоже и о ничтоже паче истины предпочитающих могло бы исповестися, еже в крайнейшее действа своего достигнути: крайнейшее же есть еже к крайнейшему взирание его: еже и безочесне совершатися глаголется: много убо мнее и неглагольно. 46. Взирая ум безочесно на Божественнейшее единственное преначальное, и верховнейшее сокровенство, (и) приятие, и сие безочесне отонуду находит на ум единовидно, и единственновидно, предобротныя и пресветлыя и неизреченныя светлости исполнен, и в глубину удивления и ужаса призывающе ум в молчании. И предудержавающе сердце действом духовным и радостию сладостною, оно бывает уму умно просвещение, осияние, и Божественно по мере рачение, и светло радование: имать же вину от Бога, отонудуже всякое даяние благо, (с. 994) за чистоту ума, и якоже бы рекл кто за вещество, еже от Божественных по части явлений писаний, и сущих, и увиденных разумно с правотою в безмолвии и молитве. Не бо якоже бы приключилося, взирается тайное внутреннейшее Божие едино паче мысли, но в происходящей отонуду светлости единовидней, взирание и видение преисполняющей умное, еже не пострадавый словесне же и разумне, отвнеуду восходит к преестественному и тайну просту единому, не сердечне действуемь, ниже убо умне осияваемь. 47. Светлейшее единовидное же и единственновидное ума в Бозе видение взирающо на единственную Божественную сокровенность, и на изблиставающее из нея сияние Божественно озарение приемшо безначальна и безконечна светоиспущения, не токмо уст молчание истязует, но и ума. Мощно бо есть и устом молчащим, внутрь уму завещаватися, и в помыслы и разумения преходити и упещрятися: еже сие слово бы могло быти завещательно, егоже далече есть ум востекш к препростертой Божественныя единицы невоображенной сокровенности. Ино бо есть зрительное ума, а ино еже завещаватися и размышляти, еже есть завещательна слова. От сея вины, созданна или сложна, или инако некаго различна достиг ум дела, первее видит, таже и размышляет упещряемь. И еще в вещи множицею единей, возмогл бы обрести не мала разумения: в единственнем же и единовиднем онем и внутреннейшем Божественнем сокровенстве, воспротязает убо и воспростирает зрительное свое око, и простотою Божественныя лучи осиявает, отнюд же не может размышляти завещаваяся: избегает бо единственная простота умнаго каковалибо прехождения, или различна завещания. Якоже бо есть тайность, что размышленна (и) рещи завещанием и усты. Сих ради убо молчанию прилежит естественно и усты и умом, в единственное внутреннейшее Божественное сокровенство умне человек востек. (с. 995) 48. Внегда обращение ума воззрит совершенне к Богу и пожерто будет зрительное его пресветлейшими Божественныя доброты лучами, и без_образне в простоту единаго тайнаго безвидна взыдет и безпределие, и будет той с собою един своим к единому горе простертием и взиранием духновением нань духа: тогда младенческаго бывает яве устроения, на самем мудровании, и царствия Божия неизреченнаго и преестественнаго вкушает, по словеси Господню: аще не обратитеся, глаголющему, и будете яко дети, не внидете в царство небесное{Матф. гл. 18, ст. 3.}: свободен бо тогда и неодержимь отнюд от всех ум бывает всякаго разума, всяческаго каковаголибо разумения, всякаго сложения, и пестроты пределы превозшед, и горе простираяся к невещанному и паче ума неведомому. Темже воистинну и молчит естественно, зане токмо паче слова, но и паче умна действа свое устроение, имущее с тайным и безвидным пресветлое и радостное и сладкое елико ко умну наслаждению. 49. В виде безвиднем, и пресветлейшей невещественней и несложней доброте в лице простейшем Бога зрят зрительнии единовидне едино, безконечными благими окрест увенчанна: безчисленными добрыми украшенна: ум световидными добротами аки лучевидне окрест озаряющий вся: блаженство неизреченно и неисповедимо: благих и добрых источательно, изобилие безконечно точаще и приснотечно: славы сокровище паче исчерпания бездонно, и неистощимо. Многа зело веселия. преисполняюща безочесныя умы. Радости и душевней сладости с веселием нетленным по течению приснотечну окрест текущу таинственно от Божественныя оныя и превышесветлыя единицы в невходнем превыше сущия сокровенстве: и еще (зрят) колика и елика неизследна проливается пучина от оныя необемлема благости неизреченныя, и любве несказанныя, и промысла недомысленна в силе безпредельней (с. 996) и премудрости неизреченней, и ангелы, и самеми серафимы недомысленна, паче всякаго ума суща: еще же и яже от настоящаго века в нас аки зачинаема неизреченным словом, в будущем же возустрояема, и аки паки раждаема и совершаема, яже и херувимск ум ужасают, и точию некако неясне о сем помыслити предложение имущь. _о благостыни и совета Божия и любве и благости, силы же и премудрости и промысла Божественна! воистинну блажени, ихже оставишася беззакония, и ихже покрышася греси{Псал. 31, ст. 1.}: и блажен человек, егоже аще накажет Господь, и от закона своего и Духа научит его{Псал. 93, ст. 12.}. 50. Духом и истиною открываются в мире убо сущими невидимыя немогущим Духа прияти святаго, якоже Господь изрече. А имже еже отшельствовати предпочитательнейше есть, и далече от мира сидети, и сущих в мире, и Божественною благодатию просвети мыслен свет очеса сердца их восток с высоты солнца мысленнаго, и бысть заступление им у Бога, якоже восхождения в сердцах своих полагати, и просвещатися Богозрительными осиянии якоже подобает, в сих и зело ясне зрятся и ина и премнога Божественна и мысленна, и духовна взирания достойна: еще же и будущее вечное и неуклонное возустроение преподобне пожившим како будет, не токмо чувственно, но уже и паче ума. Отнюд бо изменятся тогда вси сущаго паче ума бывающе, и сущаго паче всякия мысли и живота и наслаждения: якоже бози положением, пред сущим от естества Богом, наслаждающеся и радующеся о сущих паче естества Благих произскачущих от крайняго и единаго естеством Бога, окрест сего обстояще, и всесвященне совершающе чисте зело Божественный и паче ума праздник: и едину поставляюще прехвальнаго онаго веселия превеселую радость и торжество, со всеми мысленными ангелов украшении. Много (с. 997) некое есть и недомысленно течение оно, нетленнаго предобротных радования. Аще бо чувственна доброта чувствы ко уму приближшися, сущи предельна и скоротечна, ниже проста, ниже назданна, сладости обаче небезрадостны виновна бывати обыче, в души разсмотрети не далече есть и разумети ум имущим и возсловное разсмотряющим, чтобы могли быти, не в мысленна, но и паче ума безпредельна суща и (не) течна достизающе: незданна не наченшася, истекающа от Бога, от негоже суть вся добрая и благая, паче же веселия ради и радования и Божественныя жизни, и достойне века онаго и устроения. 51. Временным же и местным разстоятельным протяжением и определительным естеств свойствам радоватися рек, и сих проистек ум, наг бывает воистинну единовидною простотою и жизнию безхудожною и безвидною и без всякаго прикрова и одеяния безпомышлением и не глаголанием, в безначалие и необятие, безконечие же и безпределие преестественне возшед сердцем Духодвижным, Божественною силою и осиянием, к безконечию мнящимся и с самим тем видением ума спростиратися. Тогда мир Божий в души возсиявает и неизреченная святаго Духа радость и несказанное веселие лиется в ню. И иже превыше разума ужас содержит ю отай воспевающу: не явится, но зрится Бог богов в сионе во уме выспреходне и высокозрительне: Господи Боже сил, блажен человек уповаяй на тя{Псал. 83, ст. 8 и 13.}. 52. Внегда ум во ужасех обретается просвещен недомысленна неглаголания, между Богом и Божественными себе зря, тогда яст, якоже есть праведно духовнаго разума истинныя плоды, и Богодействуется, и радуется, и в Божественна предуспевает рачения: глаголя убо никакоже ничтоже, ниже преходя некако ни внутрь ни вне по завещанию, но ниже размышляя: но зря умне единственне во свете истины и духа, и наслаждение непреходнотворя зримая. (с. 998) 53. Егда лице ума зрящо внутрь сердца, видит просвещение Духа из него присноточне точащеся, тогда зело время есть молчати. 54. Егда все умное лице видети будет Бога, паче же убо егда весь ум внутрь достигнет Бога, или да тако реку, егда Бог во всем уме будет, тогда зело и более естественне время есть молчати. 55. Егда ум причастием духа зрительне воистинну Богу предстоя, славы же от лица Божия и светлости, образом подобающим наслаждается, подобает и зело влепоту молчати, безмолвне же и несмутительне зрети. Аще же некая тьма мрачна каковымлибо образом между умом и Богом припадет, внезапу аки некий световиден и горящ по естественну слову огнь, метати противу тьме слово краткоглагольно убо, обаче Божественна явления: да тако скорее тьму истребив светом, и теплотою мглу, и ретящийся в подвизе ум просветив же и согреяв самем сим, да паки может вкупе быти, якоже прежде с Богом, и зрети доброту его, и якоже подобает, наслаждатися его, и удобрятися и страдати: вкратце рещи, яже по умну взиранию совершаются, приятием животворящаго Духа, от Бога. И еще воистинну простретися и отпущатися истиною и Духом с Богом от всех, и самих тех, яже окрест Бога. Сие убо влепоту и приличне зрительный совершает, обаче единому внимаяй деянию, никакоже таковаго да держится устроения: не у зело ясне к себе, и собою к Богу соединися. Не убо есть чудо, сему от Божественных пети или глаголати каколибо, и многа же, и часте, частыми всяко отсюду аки убо сражении, и устрашая и отгоняя враждующаго на ны много и ратующаго усердно: ибо приидет и сему последаванно время, терпящему от Духновения воистинну нань духовна, внегда многих Божественных песней и пений и словес аки и скоровидна озарения соберутся во едину воистинну светлость огня: егда и врага удобь и смертною (с. 999) язвою уязвит, пожигая, сиречь и разсецая, или паче истребляя тьму онаго, себе же светлостию огня и согревая же и к Божественному наипаче воздвижя рачению: и к самому Богу сердечную в молчании песнь и ужас вознося: и таин показуя дивна себе зело чудеса: не неправедно бо терпящии Господа ублажаются, точию яко предыдущу времени наследствуют яко кротцы суще мысленную обетования землю, о Христе Иисусе Господе нашем. 56. Егда ум киимждо от светолияний Духа осияваемь, омрачается и недоумевает, и к безконечному и безпредельному себе разумевает простирающася и изменяема, тогда время есть молчати. 57. Егда же аки светлейшими взирании изнемогша ощущает, и слово произнести хотяща, да от крепости ослабев, образом сим получит покой: тогда естественне время есть глаголати, обаче краткоглагольна и свойственна Божественна осияния. 58. Внегда ум посреде вод избегая мысленнаго фараона, пройдет свою нощь просвещением огня, и покровом облака свой день, тогда благословне молчания время настоит и безмолвия, и начало воистинну души очищения: егда же сему лютый мысленный амалик сопротивляется, и последующии ему языцы возбраняюще преход к земли обетования, тогда время приличествующее есть еже глаголати: но к Богу деянием умным и свойственным видением поддержимым его рукам, якоже моисеевым древле от аарона и ора. 59. Внегда от бездны источательны Божественны, и мысленна взирания от сердца точится сила духовна истекающи, настоит естественне время еже молчати. Тогда бо неизреченно совершается служба, еще же и поклонение умом Божие, и истиною и духом: и сие истинным чувством умным. 60. Внегда от взирания к Богу умна, отнюд словесная убо часть души исполнися Божественна ужаса, умная же видения, (с. 1000) еще же и радования душа, несомненно тогда есть время молчати: духом бо благочувственно истину собранне ум взирает, и почитает покланяяся со ужасом возсияваемому в нем Богу. 61. Духом и истиною приличне Богу покланяющиися и тому служащии, якоже подобает, не токмо не в месте покланяются и служат, но ничтоже мнее сравна, ниже словом еже в произношении. Якоже бо от правоты воистинну вознесшееся мысленно чувство к неописанному, и егоже ниедино место есть покоя: никакоже хощет в месте покланятися, тако воистинну подобающее блюдущо, яко истине соединенно безконечному и безпредельному, безначальному же и безвидному и совершенне простому и всячески рещи паче ума, словес различием и пределом произношения покланятися и последованно служити, никакоже отнюд естественне терпит, егда сиречь время приидет во уме от пособия и надуновения Духа разуму истины единовидне озарятися: в неже время отнюд по всему всех отрешен ум быв, еще же и самаго себе изшед некако не токмо неглаголанию, но и безпомышлению благословно прочее прилежит, яко на вышшая и слова и ума умным светом с веселием и ужасом упражняяся и зря: невидимь и непреходен неухищренне безочесным взиранием по образу некоему быв соединением еже превыше себе. 62. Подобает уму себе внимающу с наблюдением управляти свое умное устроение разумне же и премудре с разсуждением, и егда ощущает себе зряща простыя и невоображенныя Богословия тайны, в молчании безмолвне стояти: абие не без удивления, ниже убо далече своего сердца действуема духом, еще же и осияваема. Время бо есть тогда не токмо безмолвия всех чувств от чувственных отнюд, но и молчания ничтоже мнее от коеголибо происходяща слова. Паче же убо разуметельным, аще что подобает рещи, и умна обычна безмолвия и невидения время. Отнюд бо недвижению (с/ 1001) обучатися подобает, в чувствах, в словесех, в помышлениих, да ум приметательно, и якоже подобает, един сый взиранием единовидным и единственновидным единаго и точию тройственна Бога может свободне образом мощным еже паче мысли безконечие и безначалие, еще же и не обятие, и иная, единою рещи, Божественная и непреложная и отрешенная взирати, и соединятися соизменен сый с видением и простерт, и отнюд Боговиден быв Божественною благодатию с веселием и удивлением. А понеже ум таковаго держатися устроения хотел бы присно, аще бы было мощно, но никакоже может, преложен же сый и с преложными живый, и составлен некако с телом и вещьми обстоятельными разумне подобает не отлучатися далече единовиднаго взирания отпад, ниже многоглаголати, но мала убо глаголати, и сия же от Божественных в нем озарений, да не токмо скорее может к Божию еже паче ума соединению паки обращатися, но и светлейше ощутит соединение, и ничтоже мнее и пребывательнейше. Елико бо ум собранное хранит и неразлиянное каковымлибо образом, толико обращение его еже к Божественному соединению скорее бывает, и светлейшим соединяется светлостем: еще же и благоплоднее частому отнюд к Божественным навыкновению. 63. Внегда к Божественному единовидному изявлению от умна взирания ум пристражда изменися, и недоразумеваемым озаряется превышшим всякаго разума, и неразделен бывает, и прост и безпределен, аки от мрака единственне осияваемь: доброту неописанну зря за простоты превосхождение: безвидну, за всякаго вида преимущество: безначальну, за превышеположение всякаго начала каковымлибо образом: саму убо необятну: всех же пределы и каковолибо обдержание (и) единство в себе (обдержащу:) вся исполняющу яко преисполнену: саму же безконечну сущу: и вкратце рещи, внегда за всех сущих презрение взиранием единаго вся узрит неизреченным (с. 1002) словом силы умственныя превыше помышления: тогда время еже молчати и таинственно и премирно, и да тако реку безочесно и неглагольно единовиднаго наслаждатися Божественнейшим тайноучением истины наслаждения. Внегда же реченная отступают от ума и окрест его зрится разделение: тогда время еже глаголати обаче глаголати достойна возвождения к молчанию: лучше бо многим превосхождением еже паче слова благовременное могло бы глаголатися и зело влепоту молчание слова всякаго. Якоже и соломон дивный предучинив сие: время молчати, таже время глаголати{Екклес. гл. 3, ст. 7.}, глаголет: добрейше убо есть и первыя воистинну части, молчание водити благовременно: аще ли же не у присутствует сие, ниже убо во яже паче слова ум единовидне могл бы взирати: то убо еже глаголати благовременно да будет второе: и да сродно будет глаголание, и к молчанию ближнее, якоже молчание, так и глаголание благовременно да совершается: и к неглаголанию приити да достигнет{тщится.}, сим еже Божественная глаголати и размышляти выну, и зрети тварь. И творца ея аки в зерцале зрети елика сила поведающая о нем. И се есть еже благовременно глаголати. Подобает же якоже мнится и тако некако обемшу приназнаменати. 64. Внегда вся ум прешед здешняя, и превозшед естественным образом радостне молчит, тогда время наслаждатися премирными и неизглаголанными: время осияния и света умна, соединения же ума и видения простоты, безпределия же и безконечия, и пресветла разума: и в краткости рещи, время восприятия и причащения премудрости духовныя, еюже ум совершен бывает во упразднении и молчании, несказанное приемь во ужасе радование. 65. Егда душа истины чувством себе чашею благодати яко державною упоеваему ощущает{Псал. 22.}, и безумну бывающу, яве яко тогда время есть молчати. (с. 1003) 66. Егда внутренняго человека завещание хощет вопити, Господи, что ся умножиша стужающии ми? мнози востают на мя{Псал. 3, ст. 2.}: время есть глаголати: глаголати же якоже подобает, не суетная на враги, обаче мерна и приличествующа, якоже подобает. 67. Егда свет лица Господня знаменася{Псал. 4, ст. 7.} на души, якоже отсюду удобрятися и просвещатися, и возлиянию Божественна веселия возливатися на ню: тогда воистинну время есть молчати. 68. Егда востающих зрела бы на ню неправедных свидетелей, и яже не весть вопрошающих ю и смущающих{Псал. 34, ст. 11.}: тогда время есть воистинну глаголати, еще же убо и противу вещати. 69. Верховнейше, и якоже рещи, крайнейше, прочее и вышнее добро еще же и благо есть Бог, во всех сущих и разумеваемых: во всех же видимых многим посредством лучшее естеством есть человек, и изряднейш увещательне без сравнения: благодатию же воистинну и всех ангелов превышший. Премногими убо ум зрительне яже между Богом и человеком к сущему превыше мысли приближаяся ужасен бывает, внегда еще изобильны просветительныя благодати не прият искуса: еяже действенною в сердце духовною силою вкусив, рекл бых, негли: к крайнейшему восходит добру и благу, (сиречь) к Богу, и вонь по дару Божественнейшу входит, и зрит единовидне, и ужасается во глубине яже паче ума водворяяся в молчании. И сие есть воистинну перваго субботства, якоже бы именовал кто негли залог, егоже образ создания сущих субботство есть Божие: другаго же (егоже неложен есть приуказ, оставленное субботство людем Божиим) больша и инаго субботства проявленно наслаждается, в себе обращаяся от Бога: и себе познав яко образ по первообразии, и отнюд посредняя Бога и человек, какова бы ни были, не токмо во яже паче ума и мысли преходит (с. 1004) образом приличным с чудным ужасом: но и радость, не якоже бы могл кто рещи, имать, и духовна исполняется радования, радуяся воистинну в молчании о Богозрительных на себе осияниих и Богодействех, и соединяемь сим образом Божественнаго и преестественнаго Божества единице о Христе Иисусе. 70. Внегда всех винословне бывших творит отятие, яко не сущим сущим, сущее воистинну тогда неизреченне мечтает паче умна действа же и соединения ум зря истиною и духом превосхождением безчисленным Божественных окрест, сущих, некаковым образом зримых, и бывает единовиден, или едино, да тако реку, неглаголанием содержимь, исполнь любве, исполнь радости, обаче не просте, но сущия от действа Духа: равнаго ангелов наслаждения. 71. Якоже весьма никакоже отнюд Господи еси существом постижимь никиимже неким каковымлибо естеством словесным же и умным, или отнюд, разумом зданным, ни поне херувимским, но превыше отстоиши безконечнократне безконечно всякаго разума: тако Владыко и яже окрест тебе отнюд безконечна и безпредельна. Абие убо суща и глаголюща самаго тебе превосходящим попечением законоположнику ветхаго завета моисею проповедати повелел еси: но и тако ты паки неложнейший, едина крайняя истина, рекл еси о некиих твоих, егда явился еси им: обаче имене твоего не открыл еси: есть бо паче всякаго без сравнения имене, не токмо от тех, елика на земли, но и от тех елика суть на небеси: существо бо тя представляют полни сущии света твоего, но без вподлежащаго: воистинну да сице последовано пресуществен явишися, и помышление не имущее отнюд, нечто подлежащее, да преявленно и паче помышления, и всех разуметися силу имущих безконечнократне недоразумеваемь, и превышший познаваешися: времене совершенно зришися вышший, безначален, саможивот сый, и безконечен. Местна всесовершенне отай (с. 1005) избегаеши разумения, везде внезапу сый и превыше всего, яко всего вкупе собрания творец и един: аще и умных естеств обдержание и место сый непроходно, ума скорость превосходящ предпостизающих его умышление, аки превыше всего и рука вседержительна всего обретающься образом неисповеданным: еще же ниже естества, и по прилучаю пределом подлежиши: ибо безпределен ты еси, не токмо естеством преестественне неподвижимь, но и яже окрест тебе естественными, яко премудрость превыше премудрости, и сила превыше силы, и любы и благость превыше всякия мысли и любве и благости. Что бы кто нарекл тя? Не свет ли глаголемь неприступен? темже воистинну превыше света еси. Что, судию ли? не вся ли ведуща и прежде бытия? Где суть сия судии? темже воистинну паче судии многим посредством. Какова же тя содетеля и наречет? мгновением воли самим зиждуща, паче же единем, многа и различна вещественная? В невещественных же, _оле глубины превосхождения! да тако реку, единем мгновением мания яже единаго естества. Духовна бо суть, многа же и премнога завещаний, аще ли же хощеши, и лиц различию, чудное отнюд и всякия помышляющаго по превосхождению избегающо мысли. Убо ли сия суть содетеля? Никакоже. Темже воистинну паче содетеля создатель именуешися, и художник проповедуешися: и который здатель без основания на ни едином стоянии зиждет поне и малейшее, якоже ты Владыко толикую же землю, с толикими же горами ея, и камении, и лесы многоразличными, основая ю на ничесом, паче же толико утвержденне? Или кий художник от нигдеже никакоже сущих производит, паче же во мгновении по слову, какова толь ухудожественная, якоже производиши ты? Убо ли здателева или художникова суть твоя: кто рек подобающая речет? Отнюд никакоже воистинну: темже паче здателя и художника мнозем безконечием еси Боже. Каков вид любве когда, или уведети кто могл бы, или (с. 1006) услышати, или поне како либо возмечтати, яков всечудная твоя благость со зело крепкими завещании показа нам в приятии еже по нам зело человеколюбне коль паче всех надежд, еже воистинну зряще, имже зрети мощно есть благодатию, в простерту входят яве любве и промысла страннообразна пучину: и воистинну вне себе бывают, с лютейшими раченьми приличне, и яже смотрения свойственне наименовати сего воистинну не ведят: превосходят бо от множайша превосхождения и ум, и слово, и всяк слух, и мысль, завещания вочеловечения твоего Боже преблаже. Оц~ всех еси, и нарицаешися: но неизреченне отечество каковолибо превосходиши, и виною, и властию, и промыслом, и содержанием. Царь именуешися: но никакоже в настоящем множае, мнее же в будущем: ниже убо каколибо по прешедшему. Но како? Чуден отрешенно и просто: царство бо твое, царство всех веков, единем гласом равне настоящаго, прешедшаго и будущаго, и владычество твое во всяком роде и роде. Тако во всех отнюд по всему безконечными мерами превыше еси, просто и отрешенно всякаго частнаго разума, да реку вкратце подобне, зело и безконечне превознесен, и ты непостижиме Господи, и яже окрест тебе, яже мечтая некако ум, утешение имать о достижнем по силе твоем зрении, и весь соДухновением нань Духа быв, яко во мрак входит таинственно, ниже совершенне могий зрети тя за славы безконечное и неприступное, имже образом премирным покоем упокояеши неизреченно зрящия и любящия тя чудно, ниже всесовершенно без еже зрети тя сый: темже упокоением Божественным и преестественным паки упокояеши их, неизреченне, недомысленне, неописанне, необятне, и вкратце рещи, всебезконечне, существом яве яко и действом, аминь. 72. Егда ум далече от многоумия, иначевства и многочастны мысли оттряс, превыше обретается умнаго расточения Духновением нань и причастием святаго Духа, соединяющаго и, и (с. 1007) на сердце выну и присноточне дышущаго и в Божественных местех часте любопребывая, яже о Бозе мечтании аки вкачествится, яко единым взиранием умным, внезапу толь велика, елика окрест Бога единовидне аки в зерцале зрети, и неизреченне рачительне: тогда Божественнаго покоя достизает преявленно, помощи и Божественна мира наслаждаяся, и сердечна свята безмолвна множицею покоя, о Христе Иисусе Господе нашем. 73. Егда ум беседует Богу, и молится яко некий сын чадолюбивейшему отцу завещании, и свет Иисусов зря, неизреченне веселится удивляяся зело рачительне, рачение яве Божественно и преестественно действо святаго Духа поразумевая в сердце своем, и превыше Божественных явлений и совершенств превозлетати хощет таинственно и премирно, тогда воистинну почивает от всех дел своих, превыше еже помышляти по еже помышляти бывая, и чудне наслаждаяся, и воистинну почивая в мире животворящаго Духа Христова. 74. Почи Бог от всех дел, яже начат творити{Быт. гл. 2, ст. 2.}: но по исполнении словом и духом бывших. Равным образом и Богоподобен ум почивает от всех дел своих, яже начат в началех творити в соисполнении мира, иже по добродетели мысленнаго, но по еже возразсмотрети и аки возсоделати словом Божиим и Духом животворящим вкупе весь мир, и яже в нем мысленная довольно: и от сих взыти паки словом Божиим и духом в реченная от неких, мета та физика, сиречь, во яже по естественных, и превозникнути в простая и отрешенная Богословия таинственная чудеса: тогда в почитии, покоя же и мира умною истиною зело многа наслаждается, еще же и обнажается светом разума и Духа животворяща причастием, о Христе Иисусе Господе нашем. 75. Якоже почив Бог, никакоже от всех дел своих почи, но точию, яже начат творити. Обаче от безначальных (с. 1008) и незданных, и аки естественных сущих ему дел не преста: тако сравна Богоподражанне ум, словом Божественным и Духом животворящим испытав, и прешед видимую тварь, никакоже от дел естественне сущих ему и ниже наченшихся, ниже убо престающих почивает отнюд, но от видимых дел почивает, начинающихся же и престающих. От сея вины и телесному почитию по недвижению припоследствующу упокоившему, небесному последует ума устроению. Аще бо приснодвижен бы не был духновением нань животворящим Духа присным во взирании видимым разуметельнем, ниже аще есть умно почитие увесть, приснодвижне окрест единаго Бога единовидне обращаемо, и обожающо своего причастника упокоением еже о Христе несказанным же и неизреченным. 76. Не скор буди, глаголет соломон, износити слово пред лицем Господним{Екклес. гл. 3, ст. 1 и след.}: яко Бог на Небеси горе, ты же на земли долу, коль зело ясне и право предает же и изясняет, кое есть время молчати глаголет бо яве: понеже ты долу сый на земли пред лицем Господа сущаго на небесех горе еси, и толикия сподобился еси благодати, яко дольный горняя мудрствовати и обзирати, и умне взирая стояти пред лицем Господним: не скор буди изнести слово, время во молчати. Не хощи сиречь, изнести слово умне действуемь от истины и единовидне и Боговидне: (сие бо есть пред лицем Господним быти) егда многая окрест Бога сущая единовидне ум зрит простым и единственным взиранием в Бозе. Не убо сие стражда и пред лицем Господним предстоя слово произносити скор буди. Или якоже бы приключилося себе невежественне волею умалити и изнести, ускорял бы еси. Воистинну же и тако рещи мощно бы было глагола сего сказующим разумение: бе, егда бе человеческое естество неврежденно, и сего ради праведне далече от зол, близ суще Бога, Бога же зряще, (с. 1009) доброту лица его во адаме праотце, наслаждающося с радостию с чудесем невещественна наслаждения, Умна, небесна, нетленна. Ибо многа убо благодать в души перваго человека изливашеся, многими же Боговидный ум онаго обливашеся разуметельными видении и горе простертии ко Богу, в чувственне раи, наслаждение имевшаго мысленне, и да сице наименую блаженну жизнь: с самем собою воистинну соединенна и с Богом, в себе же пребывающа и в Бозе, якоже подобает единовиднаго держащася устроения и Боговиднаго воистинну: и зело влепоту, яко по образу Божию бысть. Но сия убо тако о нас, да якоже вкратце рещи, от Бога благая: враждующему же благожребию, и славе нашей нечестивому бесу уязвенну завистию, стерпимо сие не бе, како бо? и убо много всегубительный сей бысть прельщая и повещая надежду нашу, благословными аки бы советы, и воздвизая желание к вышнему, нежели еже имеяхом, обожению, заповеди Божия, перводетель злобы, оболгав правое. От негоже воистинну погибель прелести окаянне пострадахом, и Бога, и Божественна наслаждения изгнани быхом, и единовидныя умныя духовныя жизни, и от еже зрети мощи лице Божие, и прославлятися измененным лучею Божественныя доброты окаянне отпадохом, и обретохомся, якоже не подобаше, разделенни и раздранни на некая многа, и о раздельных жизнех же и иначевствах, якоже не подобаше, радующеся, якоже и многи боги, и разстоящя вместо единаго почитати триипостаснаго Божества, воистинну не сущия боги, но прелестны бесы, и тлительны и враждебны, погубихом единое и истинное (едину же) и единственную жизнь и чин, и раздрахомся на многа и различна, и крепость наша умная и сила, или паче горе простертие рещи свойственнее исчезе, не нелепотне, и во глубину приидохом, никакоже измерна зла, и долняя образы Божии, и горняго обитания, и небеснаго недостойни, безумно мудрствовати произволихом. А понеже не непреложно, ниже убо (с. 1010) непреклонно есть наше, мощно есть отнюд, и сие благословне, якоже от премногия славы оныя в далечайшее безславие окаянне поползохомся паки возвратитися и возникнути, и паки увидети честнейшее Божие лице, не убо якоже прежде толико ближайше: обаче далечае, и увидети и доброты его пострадати светлость. Темже и моисей Божественнейший, и все коелибо пророков число, и еще же и отцы, иже прежде сих, авраам яве яко и подобнии ему, видеша сие якоже достигнути мощно бе и зело ясне, и светлости яже от оныя доброты насладишася довольне: еще же, и ужасшеся о неприступней славе его, ови убо себе окаяша, ови же землю себе и пепел вмениша и нарекоша: инии же ни поне зинути возмогоша, о превосхождении славы увиденнаго, егоже ради убо худогласию и косноязычию зазреша своему. И ины некия светлостию сущаго превыше доброты видения онаго, похвальны зело и блаженны страсти пострадаша славно, от сего воистинну и давид Божественный, желая светлости доброты лица Господня, вопиет к Богу моляся: Когда прииду и явлюся лицу Бога моего{Псал. 41, ст. 3.}: и еще же устроение души, в немже увидеся лице Господне показати восхотев: Вселятся правии, глаголет ко Богу, с лицем твоим{Псал. 139, ст. 14.}: и крепость же елику души подает лице Божие зримое, разумне показуя: отвратил еси, глаголет, лице твое, и бых смущен{Псал. 29, ст. 8.}. Аще же отвращением Божественнаго лица случается смущение, убо присутствием сего и призрением мир последствует духовен души, дар толико величайш сый, якоже по Божественней любви и радости являтися Духовным или дарования подобает глаголати или поне плоды: и свято же живущия и праведно, во свете лица Господня являет ходити: Господи, глаголя, во свете лица твоего пойдут: и о имени твоем возрадуются весь день{Псал. 88, ст. 17 и 18.}, духовный он яве яко, поелику посылает внутреннему человеку мысленное и неизреченное (с. 1011) солнце пречистыя и животворящия лучи своя, и просвещается во уме премирных чувство: в неже время вземлется от земли, и на Небо прелагается вся душевная память, и человек той радуется и взыгравается, и песни якоже подобает, поставляет, и веселится радованием и красованием и душевною сладостию, коликою кто бы возмогл рещи, светяся и просвещаяся светлостию лица Господня. Темже инде молит Бога: Не отврати, глаголя, лица твоего от мене, и уподоблюся низходящим в ров{Псал. 142, ст. 7.}. Тьмы бо вина есть отвращение лица Господня: обращение же всякаго умнаго света, темже влепоту, и радости Духовныя якоже и о себе глаголет: знаменася на мя свет лица твоего: и снаводит: дал еси веселие в сердце моем{Псал. 4, ст. 7.}. Паки от просвещения лица Господня Духовный Божественныя благодати быти в себе свидетельствует дар. И кии бы убо были пред лицем Господним стоящии, и ему молящиися, глаголет, яко суть мысленне людей Божиих богатии. Святи бо убо воистинну, и человецы Божии мнози суть: обаче не всем вообще Божие зрети мощно есть лице, и жити житие ангельско, на земли еще живущим, никакоже. Единех бо есть сие иже с премудростию Божественною и разумом служима быти Бога непщующих, и покланяема истиною и Духом: иже воистинну и богатии людстии глаголалися бы влепоту Божии, многих зрений внутрь озарившеся таинствы, и многия премудрости и разума, иже по павлу никакоже всех есть, Божественна и духовна глубина имущ богатства. Темже лицу твоему, чудный глаголет ко Богу, якоже речеся, давид, помолятся богатии людстии{Псал. 44, ст. 13.}. Сего ради сия паче всех ведый, яко паче всех Божественныя премудрости исполнен соломон зельный, благоприличне зело уча глаголет: не скор буди износити слово пред лицем Господним: яко Бог на небеси горе, ты же на земли долу. Внегда по Божественну дару пришел бы (с. 1012) еси пред лице Господне, в Божественно и единовидно мечтание возшедшу яве яко видению ума: (тогда) время есть молчати. Да не убо произносити слово ни поне едино скор буди, суетне глаголательну обычаю последствуя: яко не время тогда глаголати: бог бо бываеши и ты, на земли еще сый, Бога сущаго на небесех зря агг~лоподражательне лице. Ибо и ангели, якоже Спаситель рече, выну видят лице небеснаго вашего отца{Матф. гл. 18, ст. 10.}. Темже егда и во ином месте глаголюща слышиши соломона, свет праведным выну, от светлолияния лица Господня сей страдати им влепоту да не вознепщуеши смотряя, агг~ловидне Божественною Благодатию выну видящим лице Господне. От негоже источательный изливается свет: ангел бо ин, да не глаголю бог, человек той бывает и есть на земли. Темже и на смотрительный благодати Господня дар возвращаешися, бывая еже Бог горе, сие ты на земли долу, бог сиречь, еже есть чудно: не происходя словом, ниже помышлением преходя и двизая свое помысленное, аки умне разделяяся, но единовидне взирая, и аки бог зря безочесне, и недвижне по просту и единственну взиранию, еще же и наслаждаяся от лица Господня изскачущею светлейшею лучею и неприступною. Сие убо есть верховное и блаженное умоимцем ума к Богу устроение, якоже рещи цвет умныя чистоты, вожделенное единство веры, совершаемо в приобщении Духа, Божественныя и Боготворящия премудрости благославный плод, основание духовнаго мира, обиталище безмечтанныя радости, любве Божия дверь, отрасль просвещения, вина источания от сердца неистощаваемых вод Духа, образныя некогда манны воистинну нища же и наслаждение души, и ращение и изменение Божественных и неизглаголанных таин, и откровений начало. Единыя и первыя истины заключение, киихлибо помысл потребление, всех помышлений престатие, настоятельство превыше еже помышляти, вина ужаса. (с. 1013) К простому и безпредельному и необыменному, безвидному же и без_образному, некачественному, неяковственному, неколичественному, неприкосновенному и премирному, ума претворение паче ума и изменение, и отнюд к Боговидному возустроение. Никакоже убо от невежества, в сие пришед устроение, и образом неким Богодействуемь человеколюбием благодати, скор буди изнести слово поне едино пред лицем Господним: яко тому единая и простая слава есть, и во веки будет. 77. Ум зрети хотя яже превыше себе мысленная, аще и не Божественною благодатию содействующе к сему имел бы и свое сердце, недейственна и непросвещенна и слиянна зрит, сего ради и своея сладости свойственнейшия оскудевает. Аще неведения ради и мнится услаждатися, аки не у вкусивый сея. Якоже убо мнится некако услаждатися и ячменный ядый хлеб, аще и премного хлебныя сладости оскудевающ: обаче за неведение вкуса семидальнаго хлеба. 78. По умном сердца Благодатию соединении, незаблудне во свете духовне ум зрит, и простирается к своему желанию, еже есть Бог: вне отнюд быв чувства, безшарен яве, яко и некачествен, и безмечтанен паки быв мечтаний чувственных. 79. Ум от благодати ко еже зрети наставляемь, воистинну манну выну яст духовну. Чувственная во манна юже израиль ядяше, имеяше убо сластну достославну силу тело питающу: что же существом она бе, неведомо бе: темже и манна нарицашеся, являющу речению незнаемое. Что бо есть сие? речение являет: и юже зряху ядуще существа сея не уведевше, недоуметельне, что есть сие, глаголаху? Выну убо и зрительный удивляется во уме, и к себе, что есть сие? глаголет, еже веселит убо зримо, и утучняет ум духовне ядомо: превосходит же от еже разуметися о себе, яко Божественно суще и преестественно: и питающе чудно, и напояюще ум постижения ума отай избегает, не токмо яко непостижимо (с. 1014) непостижимо существом, но и яко безконечно и безпредельно. 80. Три суть свидетельствующая истине, рекл бых и аз влепоту: тварь, писание, в дусе: от писания бо и твари духовне зримых, зрится единая простая истина, и от сея сложная. И реченными треми пришед в следующая два, и стоя в них ум незаблуден, обрете Христовою благодатию путь. Получи бо от простыя убо истины высоту мысленну, и глубину, еще же и широту безконечну: ихже ради и во ужасе быв, пристрашен сый поет. От сложныя же к реченным, и сердечен обрете мир и любовь и радость. Темже ужасен сый поет любительне. Требует же человек временна многа разстояния, и труда и терпения, яко да чувства образом неким отлагая, и умом расторг чувственная, станет в мысленных: по нихже видение истины возсиявает в души. Не убо истину глаголю требовати в свое из_обретение таковых, сиречь временнаго ко еже постигнутися разстояния, или труда и терпения, но человека требовати сих рекох. Понеже истина убо едино есть и просто, аще и сугубо видима показуется, и мало не отвсюду вопиет себе видети хотящим свидетельствующи: человек же сложен сый, и с чувствы сплетен, еще же (и) изменением подлежащ и прелогу, исходит овогда из себе: и образом неким и сам противу себе якоже не весть бывает, от мнения лукавнуя и неверием недугуя: и треми убо сими, мнением, глаголю, лукавством же и неверием, свидетельствуемыя от триех онех истины, от писания и твари и духа сиречь, окаянне отпадает. Темже и требует ко отвержению лютаго мнения, и иных ихже требовати рех, (и) яко да смирився ум веровати имать простотою: и потом сице купно абие писанием и тварию в дусе, да увесть ясне не токмо простейшую истину, но и сложную от нея: еще же что и возбраняющее его бе и истиннаго видения, приложил же бых, яко и наслаждения разставляющее. (с. 1015) Едино убо есть и единственно естеством просто первая истина: по нейже и яже от сея нас ради сложных сложная. И сие есть ума нашего последнее и изряднейшее прямо лежащее: к нему же тщится всяко жительство и постничество водимых по разуму духа, яко да ум наг, елико мощно, увидит и насладится светлости яже от первыя и единыя (истины,) и сложныя из нея образом чудным: еже не бы когда инако могло быти, токмо смирением и простотою с верою свидетельством писания и твари в дусе. Внегда же истину ум в триех своих силах, якоже рех, яко в зерцале узрит свидетельством вышереченных триех, тогда паки аки от сего возвращаяся сам в себе бывает мнозем смиреннейш и простейш и утвержденне верен: и от сего радостною ногою еже убо глаголется к видению истины восходит, лучами оныя внутрь озаряемь светлее: имже обращаяся в себе за величество славы увиденное от него, сходит на смиреннейшее, и простейшее, и ужасается верою обдержимь быв, и тако аки некий Божественный круг воз_окружая и обходя смирением, простотою же и верою восходя и зря истину, и светлостию истины к смирению водимь многшу, и простейш в вере наипаче бывая, непрестает совершая течение сие, дондеже бы глаголалося сие: днесь со смирением и простотою и верою, свидетельством писания и твари, в дусе зря истину, и паки возвращаяся на та, отонудуже подвижеся: и тако обожаемь всегда благодатию, и теми яже паче ума осияваемь, и живот живый исполнь всякия радости о Христе Иисусе Господе нашем, яко в обручении вкушает наслаждения будущих вечных благ. 81. Зрительное житие треми сими составлятися преестественне обыче, чисто же и незазорно, глаголю же верою, причастием явственным животворящаго Духа, и ведением премудрости. Видение бо есть, якоже в пределе рещи, разум мысленных в чувственных овогда же и тонких мысленных (с. 1016) разлученных чувства, в пришедших в предспеяния. От сея убо вины требе есть веры: аще бо не уверите, глаголет, ниже имате уразумети. Такожде потреба есть и духа, понеже дух вся испытует, и глубины Божия{1 Кор. гл. 2, ст. 10.}. Темже Божественный рече иов: дыхание вседержителево есть научающее мя{Иова гл. 32, ст. 8.}. Таже естественне сего в сердце яве воскипевающее, или, да тако реку, живущее и по последованию оживляющее, премирне Божественное действо к себе сплетает, неизреченне собирающо ум, и от всякаго парения возбраняет его, и подает с тишиною и многою душевною сладостию и утешением, еще же и Божественною любовию удобнейше Божественная зрети, и окрест их обращатися, и Бога мечтати новообразне, и по равности о сем веселитися, с большими нестерпимыми рачении, и приличным радованием. Требует же и премудрости, якоже рех: яко премудрость, глаголет писание, просветит лице человека: просветит, ко еже от чувства прейти в разумение удобь, и от чувственных в мысленная и Божественная зрительства взыти, и во откровении умнем неизреченна увидети: просветит, ко еже узрети зрительне, и единовидне возмечтати Бога пресущественна. Воистинну блажен человек, егоже аще накажеши Господи, и от закона твоего научиши его{Псал. 93, ст. 12.}: яко сей есть воистинну премудрый, наказанием в веру пришедый, и учением духа научаемый неизреченным Божиим. Велия вещь есть, воистинну премудрый, верою ходяй в соединении и приобщении преестественнем духа! И воистинну три суть, по рекшему оному, неудержима, Бог, и ангел, и человек любомудр: ангел ин на земли страннообразен назиратель воистинну видимыя твари, и искренен таинник Божественных Божиих незданных происхождений, или убо даров хотел бы кто глаголати. Емляся некако и самаго невидимаго всяцем образом, по внезапну взиранию агг~лоподражательне познания (с. 1017) Бога. Таков есть, якоже и в сенописании рещи, верою и святым и животворящим Духом премудрый, и сице блажен. Аще и довольно бяше несомненно, яже лука в евангелии поведает рекшу мне о Иисусе Господе, избавишися трудов, яко исповести премудрости и благодати силу и похвалы: тако бо сей на месте полагает, пиша яко Иисус преспеваше премудростию, и возрастом, и благодатию. И паки, яко растяше и крепляшеся Духом, исполняяся премудрости{Луки гл. 20, ст. 22 и 40.}: ныне же явственнее о предлежащих рещи, устремляющуся предлагаю, и еже глаголет священный соломон к Богу: яже на небесех кто изследи? волю же твою кто позна, аще бы не ты дал еси премудрость, и послал еси Духа святаго твоего от высоты? И тако исправишася стези сущих на земли, и яже тебе угодна, научишася человецы, и премудростию твоею спасошася{Сол. гл. 9, ст. 17, 18 и 19.}. Зриши ли? Премудрость с причастием Духа на елику достизает силу, и како далече от спасения течет, премудрости и Духа от Бога не имый, и ниже от премудра и причастника Духа наставляемый? Аще о Спасители, в немже поживе всяко исполнение Божества, такова писана быша, последованно сообятне и всего вкупе человеческаго рода разумети не отстоит: коль премудрость с пособием Духа есть нужна, и елику милостию силу и предспеяние получи от душелюбца Бога духовный мудрец, яже на небесех изследуя, и приходя к разуму совета вышняго, вещь ужасная! И сия убо тако: но понеже толика же ныне проидохом о зрительнем, подобало бы рещи и не ленитися поне неколико и о видении сказати, и от части подвигнути, и помысленное иже с любовию слышателя некако напитати. Сие бо отнюд повелевает Бог словесным преподавати: яве яко независтно нижшим, и от вышних с благоговением причащатися достигнутися мощным Божественнаго просвещения и вещей мысленных. Обаче к тождечинным, приобщительне и нелюбопоказательне (с. 1018) сретения творити, и беседы яже о мысленных и о Бозе. Тако бо не токмо правое же и непогрешное в церкви Бога жива просияло бы зело светле, но и преподобное любве и предобротнейшее лице, познавательство учеников Христовых, просветилося бы выну в сердцах наших, святым Духом в ны излиющимся в совершенну и просту любовь Бога и человек. И тако пожили быхом на земли житие агг~ловидно и воистинну блаженно, и ничимже мнее и предсладчайше, яко от Божественныя, на нейже висят весь закон и пророцы, и Боготворныя дворасленныя любве зависяще: еяже ничтоже каковолибо душе слаждше, и паче же егда от Божия и Божественных видения и разума, тожде же рещи просветительныя благодати близ имать происхождение. Темже иже по намерению взыти благо и добре дело полагаяй к Богу, якоже соединитися с ним и воистинну обожитися, равне же рещи, спастися: понеже без еже уму обожитися, спастися человеку не возможно есть по Богоглаголивых изявлению, с достижным заповедей Господних деянием, к сущих и видимых приходит видению возможному, ни деяние имея слепо аки видения уединенно, ниже убо видение бездушно имея аки воистинну без деяния. Отсюду сице с сущею по слову и уму премудростию, и писательным священным ведением, благим движением, еже глаголется, взирати праволучне начинает в мир со словом чувственных, явлением безконечносильна и безконечнопремудра содетеля, и последованно к безконечным силою же и всем различием елико по взиранию достизает, и наслаждается и питается подобне умом в тайне тайными. И времени же предыдущу, и безмятежным житием пожив безмолвне, и в Божественных единех любомудрствуя писанием и видимыми, подвизается, якоже есть мощно согласну узрети Духовне писанию тварь: и истинне знамения единственнейшим видением. Емуже бывшу, ум отсюду с любовию поклоннаго Духа, и действием ея, возводится в видение же и познание (с. 1019) священныя истины, якоже великий глаголет дионисий, на степень священный видения, родне рещи вторый, то есть в Божественная зрения и помышления, без покровов и образов. Отсюду прочее аки наг ум к мысленным взирая нагим, и Божественная явления в себе множайша любя, своею чистотою и к Богу горе протяжением, носит в себе яко в светлейшем зерцале некоем солнечныя пресияющия лучи, и от благодати по пути паки напитан быв, яже по силе достижными приличными, приходит аки к третиему степени ко многим оным видениям блаженным: (и) Божественная происхождения единовиднее и собранне от многих иначевств в неизреченное непреложныя и тайныя единицы возводя благовзирательне неизреченно рачение, со всем вкупе умным чувством, аки преобразуемь зрительный от просвещающаго Духа истиною и воспоминанием, во огнь и сердечно Божие Богодейно рачение: и солнце есть, по великому паки дионисию, единовиднаго совершения Божественное причастие самого единаго, елико мощно достигнути. На таковы убо степени триипостаснаго тайнаго единовиднаго причастия, треблаженне Богоносный и Богомудренный ум возлетая, и нестерпимых остен Божественна упоения и неистовных его рачений яве и пресветле наслаждаяся, и уязвлена любовию, и аки возгараема себе разумевая преявленне от истиннаго завещания, Богодухновенне действуемь есть и воистинну изступает, вшед во изявительныя Богословия светлым лицем тайны. Учреждаяся безочесными взиранми, безконечным и безначальным, необятным же и всемственне несказанным, и отнюд недомысленным, и мечтая Божию аки некую пучину существа безконечну и непроходну, всяку превосходящу мысль и времене и естества, по Богослову рекшему{Слово на Рождество Христово.}. И сие есть, якоже еще священный глаголет дионисий, пирование взирания питающо мысленне и обожающо всякаго к нему (с. 1020) горе простирающагося, начинающаго обаче от видения сущих и разума: якоже онамо сей Священных таин явитель глаголет, идеже Священная нашего Священноначальства изясняет знамения. Якоже убо и великий василий поведает глаголя: внегда кто зрителен юже в видимых доброту превозшед самому предстанет Богови, егоже видение в единых чистых сердцах являтися обыче, тогда к вышшим Богословия предуспев, и зрителен быти может. И паки, на глагол он: заутра предстану ти, и узрю, глаголющаго Духом давида, великий сей глаголет: внегда предстану ти, и к самому о тебе видению умом приближуся, тогда зрительное действо просвещением разума восприиму. Мощно же есть услышати подобне глаголюща таковая ма_ксима Священнаго, и показующа яве, коль велика есть вещь предспеяние видения и разум Божий, писанием и и тварию, и яко просвещение разума отсюду бывати обыче, имже по взиранию блаженное (бывает) обожение: вещь аще и некогда, (то паче) и ныне редка и неудобь обретаема в безмолвницех, скудости ради того, иже от содержания благодати искусом возмогл бы научити, якоже крайний безмолвия учитель глаголет сирин святый исаак в слове, в немже о Духовнем чувстве начинает абие глаголати и силе зрительней. Глаголет убо ма_ксим Священный: <((>Богодейственны светы глаголем, учения святых, яко свет разума сотворяющая и обожающая повинующихся:<))> согласуя яве всесвященному дионисию глаголющему: <((>елики ины Богодейственны светы словесем последованно тайное Божественных наших наставник предание изявительне нам дарова, сим и мы тайнонаучихомся<))>. И инде глаголет: <((>Божественный разум, к нему якоже мощно есть горе зрящия, по мере их горе простирает и единотворит по простирательному своему соединению<))>. И паки: <((>всяко от отца движима светоявления происхождение в ны благодаятельне приходяще, паки яко единотворна сила возводительне нас возводит и обращает к собирателя отца единству, и (с. 1021) Боготворной простоте: из того бо и в нем всяческая<))>{Рим. гл. 11. ст. 36.}. Разумееши ли, како возводительне по обращению, сиречь Божественну взиранию к Богу премудре простревыйся: или от сущих, Бога горе простираяся видит, или от писания, или знаменательна, или каковымлибо образом Божественна, соединяется с Богом и Боготворимь есть, не токмо же, но и бог речеся по имени таковый? елицы бо, глаголет, умных и словесных к Богоначальнаго сокровенства соединению, елика сила по всему обратишася, и к Божественным его осияниям елико достигнути мощно, непрестанно горе простираются, еже по силе аще леть есть рещи Богоподражанием, и Божескаго тождеименства сподобишася. Якоже и григориа зельнаго Богословный язык глаголет яве: животное зде устрояемо, и инамо преставляемо, о человеце глаголющ, и конец тайны, к Богу манием обожаемо{В слове на Рождество Христово, лист 181.}. И Священный ма_ксим, мысленный Божественнаго писания, глаголет, вид, премудростию разумевательная преображает ко обожению, от еже в них преображения словесства, откровенным лицем славу Господню взирающия. Тако житие зрительное требует триех, яже предрекох, веры, и Духовна причастия и ведения премудрости, о Христе Иисусе Господе нашем. 82. Зрительное с животворящим Духом житие, многих некиих и досточудных видений мысленных зрителя исполняет втайне, ниже тождечастне, ниже убо внезапно: но временем и долгим любомудрием, такожде и по чину, и аки по лествице. И овогда убо сего услышал бы еси глаголюща зряща превосходством безмолвия, и отбегства всех, кроме Бога един есмь аз, дондеже прейду{Псал. 140, ст. 10.}. Иногда же паки разумевательнаго ради еже к сущим обращения: яко возвеличишася дела твоя, Господи? вся премудростию сотворил еси{Псал. 103, ст. 24.}. И сие: воня риз твоих{Песн. песн. гл. 4, ст. 10.}, яко воня нивы исполнены, юже (с. 1022) благословил еси Господи{Быт. гл. 27, ст. 27.}. Овогда возводительнее взирати творящо, и в мысленная входити восхождения внутрь действующо, повинует глаголати: в воню мвр твоих в след тещи имам ко Богу{Песн. песн. гл. 1, ст. 3.}. И сие: вознесу тя, Боже мой, Царю мой, и благословлю имя твое в век и в век века. Велий Господь и хвален зело, и величию его несть конца{Псал. 144, ст. 1 и 3.}. Удивися разум твой от мене: утвердися, не возмогу к нему{Псал. 138, ст. 6.}. Во иных же еще: ты же вышний во век Господи{Псал. 91, ст. 9.}, и память твоя в род и род{Псал. 101, ст. 13.}: зело превознеслся еси над всеми боги{Псал. 96, ст. 9.}: о пресущественном зрении пети уготовляет горе простирающияся зрители. Иногда же во изречение подвизает преявственно зовущия: несть подобен тебе в бозех Господи, и несть по делом твоим{Псал. 85, ст. 8.}. Еще же гору разумну, и место Бога свята Духовне зрящим показует, на нюже восходят, и на немже стоят неповиннии рукама и чистии сердцем. Не точию же, но и восхождения сице до небес, и низхождения до бездн высоких и глубоких, сиречь, тайн Духа подает видети. И овогда убо к видению личнаго в Троице зрительства приводит чудне: овогда же в видение Иисуса, и смотрения его еже во плоти, и последствующих ему таин преестественных со ужасом взирати обучает. И тогда отнюд по многих и Блаженных видениих, никакоже оставляет зрящаго, аще не и в самая недра Божия невообразне, _оле благодати! введет просвещеннаго во истинен покой несказанен, и наслаждение Духовно преестественно. Да не в пиянство глаголю добрых Божиих и Божественнейшее изступление, в недра она преблагословенна: многу глубину имуща Божественных таин, и довольне ко ощущению пресущества Божия приближающася. Яже недра наследие от начала име и авраам, внегда и сам Бог жребий бысть авраамов, по еже: аз есмь Бог авраамов{Матф. гл. 22, ст. 32.}. Бог убо (с. 1023) изрядне авраамов сый Бог, последованно и Божия недра, недра авраамова суть. И в недра убо Божия, или недра авраамля хотел бы кто глаголати возводя, вводит со всякою простотою, с презело любительным веселием, (и) обожает воистинну, и блаженна возустрояет с душевною сладостию и зельным красованием неизреченным, житие зрительное в Дусе, ум премудрости приемшаго и поучение зело творящаго горе зрети, о Христе Иисусе Господе нашем, аминь. 83. Понеже и тварь и писание Божиим словом прострошася, и Духовне зрима, ум и вся силы его утверждают к Божию взиранию, и разумению, прежде действуему сердцу и предподвижену Духовне: премудре зело глаголет учя Священный Давид, когда словом Господним утверждаются умове, ихже ныне небеса нарицает, и вся сила их Духом уст его. Когда убо? внегда является исполнь мысленная земля, сиречь сердце наше милости Господни, Духодвижныя сиречь силы и действа и движения благоощутительне и яве. Прежде же даже действо и силу и движение в сердце ум не ощутит, не токмо не будет имети крепости от еже тварь и Божественное писание зрительне и Духовне разсмотревати, и совокупляти во един разум яже в них, но и страх зело множайш излишше бывает, да не когда погибнет зле возмечтав. Темже убо аще что хотели быхом восприлежати еже Бога от писания зрети и твари, единовидне же и единственновидне многия вины сущих и зрительства в един разум и Дух собирающе, единовидно и просто безвидно видение зряще с безпределием и безконечием и безначалием: еже внутрь сердца нашего первее обрести взыщем сокровище, и помолим Бога свята, исполнити землю нашу милости своея: и тогда аще бы была кая сила горе, оставим свободне ум к Божию разумению единовидну, якоже речеся и единственновидну, просту, безвидну, присносущну, безконечну и безпредельну, видением и помощию слова же и Духа. (с. 1024) 84. Внегда чувствами и простыми завещании души, еже по заповедем течение добродетельми с мудрованием смиренным, в терпении и уповании, сущем верою совершающу человеку, животворящая и присноисточающаяся святаго Духа сила, негли и действо в сердце приидет просвещающи воистинну силы душевныя, естественне движима преявленно и подвизающи к себе призывает, иже действом ум зело скорейше, и неизреченно соединяется с ним, якоже быти воистинну уму и благодати тогда безпрекословно во един дух: тогда воистинну, тогда ум сам о себе приходит Духновением нань благодати помоществуемь ко еже зрети, став яве яко несказанно от здешняго обношения и окрест скитания действием и светом животворящаго и святаго Духа: и во откровения приходит таин Божественных мысленных, и молчанием всячески и безмолвным своим естественным взором входити достизает в преестественна неизреченна: и толико паче зрит, и Богоемлемь бывает, и ко еже Бога, елико мощно, зрети горе простирается с вежеством Божественных, от Священных собранных чтений, елико по сравнению безмолвствует смиряяся и моляся действуемый от Бога святым Духом. Тогда убо ни от еже Богословити есть кроме, но купно абие есть самою вещию Богослов, и не Богословити не терпит, и выну. Без дара же небесна реченнаго, и без Духа яве приснодвижне дышущаго в сердце, _оле! елико ум зрит, мечтания сего суть: и елика Богословит, словеса суетне суть на воздух проливаема, чувство души не возбуждающа якоже подобает, и от слуха действуемь есть, и словес приходящих отвнеуду: отонудуже вселютая прелесть мысленных и самаго Богословия презело зле прият вход, не в сердце действуема от просвещающаго Духа, отонудуже мысленных единовидная и Богословия непреложная есть истина. Ибо в немже, соборне рещи, сердце не присутствует яве причастнику животворящая и просветительная Духа сила, и действом присноистекательне или дышущи, (с. 1025) хотел бы кто глаголати, или текущи: соединения несть тамо мысленна, но паче разделение, ни сила и стояние, но немощь и прелог: ниже убо подобне свет и зрение истины, но паче тьма и мечтания суетное воображение, и отнюд безсловесия и прелести путь. Ибо в триех чинех, или путех, по отцем, проходити могий ум, естественне сиречь, превышеестественне, и противу естеству: егда в подлежащем нечто мысленно ум видит, по естеству зрит, обаче с действом превышеестественным Духа: егда же впостасне зрит, а не в подлежащем, беса негли, или ангела, аще убо соединен бысть ум в мире, и просвещение Духа возжигается зельнее, преестественне зрит, яве же яко и непрелестне. Аще же зримая зря, разделяется и помрачается ум, и сила животворящая угашается, противу естества зрит, и прелесть есть оно зрение. Сего ради горе простиратися уму к зрению Духовну впостасне не подобает, ниже зрению веровати и киимлибо образом, не действуему по предлежащим сердцу, и не движиму от силы святаго Духа, аще хотели быхом здравствующа быти ума и целомудренна. 85. Нецыи небесною росою благодати распаление своих страстей презело добре творяще исцеляти покушаются. О нихже воистинну писано есть: роса, яже от тебе, исцеление нам будет{Исаии гл. 26, ст. 19.}. Некиим же сия реченная роса, большим некако заступлением Божественным соединися, и в манну претворися, и аки некако от некия пшеницы хлеботворися сокрушением сердечнаго смирения, и водою слез, и огнем Духовна разума: достойне сие и зело влепоту пострадавши, и в снедь агг~ловидну приличествующу бывши. О нихже благословно яко наимножайше речеся: хлеб ангельский яде человек{Псал. 77, ст. 25.}. Суть имже по предспеянию вышшим некиим образом, бысть и видится свое их естество манна яве. О нихже евангелие глаголет: (с. 1026) рожденное от Духа Дух есть{Иоан. гл. 3, ст. 6.}. Первый чин есть безмолвник премудрых: (а) иже по нем, и молчанию прилежащих с Божественным разумом: третий же, простертых по всему и измененных о Христе Иисусе Господе нашем. 86. Избег благодатию, якоже подобает, фараона и египта, и тамошних лютых и притрудных мысленне ум еще же и влающаго волны страстны горести, и сланыя злобы плотскаго жития: и в мысленную пустыню пришед, яве яко в навыкновение избавльшееся фараонит мысленных: и сообятне рещи, приключающаяся тогда евреем по чувству лютая мысленне и пострадав и избавлься, манну по последованию яст мысленну чувством души твердо, еяже образ древле ядяше исраиль чувственно. И в началех убо овогда воспомянув желает мысленных, якоже чувственных они мяс, жертв египетских, прибедственно яко наимножайше, и ничтоже мнее и погрешительно, и Божественна убо искус приемлет отвращения, дондеже бы мольбою пакиобратнаго покаяния Бога приличне умилостивил. И прочее убо аще манны частее насыщается с безмолвием, времени предыдущу и благодати ему приложшей пособие же и силу, мысленную плоть свою в естество манны образом сим преложшуюся, якоже бы кто рекл, яве зрит зело ясне. Суть же таковому ядущему манну, весы духовны, имиже приемля мерою манну, множае никакоже собирает дневныя своея пищи: да не возчервившися, яко превыше умеренности, вся погубит: и спогибает с нею безпищием, умеренности не блюдый ум. Явлен же убо был бы манну ядый ум, зане ничтоже каковолибо ино ядый, жизнь живет проявленне лучшу, всякаго чтолибо и каковолибо ядущаго, глаголю же мысленне. Обаче якоже преложися некако и той навыкновением питания в качество якоже рещи манны, знамение есть непохотение каковыхлибо (с. 1027) чуждих, ихже бе желая первее, и егда везде манну ясти может, и младенец будет Богочестию прилепився. Обаче же не чудно преложитися кому в качество (того), егоже часте кушает, и временем насыщается долгим: ниже в качество манны ума претворение каколибо паче подобающаго могло бы быти. Естественне бо часто приемлемая пища, прелагати обыче к себе питаемое. Тогда же не токмо ангела чин содержит ум яве, но и Божественнаго сыноположения причастник бывает, достоверно от славы духовныя в славу приводимь. Не токмо к единому взирая, но и сам к себе бывая едино, и в сем живый и премирне наслаждаяся. И да сице реку наслаждаяся таинственных неизглаголанных Боговидне и Боголюбне во святем Дусе. И убо некако по видимым и поемым воистинну бывая, якоже и в качестве манны зрети себе. Обаче сей чин вышший есть и честнейший много, познавшаго себе манну убо ядуща, не убо же и в качество некое манны себе преложенна. Зане первое убо мощно есть негли пострадати в началех в себе мысленным соединением уму собравшуся: второе же явственнейша соединения, и разумных таин откровение, и крайня отрешения еже от всех, и препростерта умствования явление есть ясно. 87. Прост есть естеством ум, зане и то, егоже есть образ, просто есть, яве же яко Божественное. Сый убо таков, просто и действовати любит. Всяко бо, тожде естеством, любит. Различен же обаче бывает не себе ради, но чувств ради и чувственных, имиже сему суть мысленных преемства. Внегда же слово свое между собою и чувствами с чувственными поставит истязующе и судяще разумне, елико мощно, ниже чувства немощнейша приличествующаго поставляюще ниже доброты чувственных, или помрачающе уныло, или предпочитающе недобльственно, и ума державу сим долу подмещуще, разделяюще же целомудренно приличествующее комуждо: тогда абие ум самаго себе бывает единствен и (с. 1028) прост, якоже есть естеством, паки бывая, и раздельных отстоя, и паки естественне начинает любити единое и простое и единственне и просто действовати: еже убо любя, ищет: и ища, летание свое превыше всякаго сотворяет сложения, дондеже бы обрел воистинну и свойственне единое и простое, еже есть Бог: егда воистинну и под единема сего крылома ныне убо покрываемь, овогда же возвышаемь веселится, якоже подобает веселитися Богострегому и Богоносиму уму. 88. На разсмотрительное души аки мрачна некая дебелость нападши яже от страстей, ина зрети вместо сущаго сотвори: егда же частою молитвою и исполнением заповедей, и горе протяжением к видению Божию благодатию ум разделит реченную мрачну дебелость от себе, яве зрит яко зрит Бога, сказателя никакоже о сем требуя, якоже не требует имущаго научити зрящий чувственно, аще стужающия и осеняющия вещи не имать на зенице очесе. Якоже бо приусвояются чувственная чувствам здравым сущим, сице мысленная помышлением усвояются, чистым сущим от облака страстей: и якоже от чувствительна понятия чувственных есть постижение, тако от мысленнаго взирания мысленных зрение бывати обыче: по нихже безвидное благодатию и некачественное и безмечтанное и простое видение: еже удержанна имуще ума, всех чувственных же и мысленных каковыхлибо отрешенна творит. В безконечия необятия же и безпределия глубину его со ужасом и удивлением, якоже не возможно есть сказатися словом, заключающе. 89. _О Владыко всех видимых и разумеваемых сый начало, вседержителю! начало имея безначальность несозданне, и определение безпредельность безконечне, и естество преестественность необяте, и существо пресущественность необышне, и вид убо безвидие невидиме, и свойство присносущность нетленне, и образ необразие неизследне, и место неописанность безпредельне, постижение же непостижность неиспытанне, и разум (с. 1029) и видение, невидимость же и несказанность неприступне и необмысленне, и слово невещанность неисповедиме, и сказание несказанность неизглаголанне, и недомысленность разумение недомысленне, и отнюд положение еже паче всех отятие. _о преблаже! весь еси чудо и тихость и дерзновение и любы, и сладость и душевеселие, и упование вкупе во всех и воистинну безпопечение и радость воипостасная едина слава, и царство и премудрость и сила сего ради изступление от всех видимых, и покой от всех разумеваемых естественне неизреченно еси, и упокоение к тебе чудно зрящим тя с причастием святаго твоего Духа. _о несказанне Боже! 90. Чудимо же, Божественное сиречь, любится вящше: любимое же, очищает, глаголет Богословный григориа глас: очищающее же, Боговидны содевает: таковым же бывшим, яко своим уже прибеседует. Но не токмо сице Бог, но и очищшиися отнюд, яко своим духом и истиною Божественным и Богу собеседуют. Темже и Богослов наводит: Бог богом соединяяся же и познаваяся. Зриши ли чудное соединения? Бог бо, глаголет, богом соединяяся. Аще же техжде некако есть соединение, яве яко и соединения завещания и наслаждения подобне суть таяжде. Темже глаголет, и познаваяся. Такожде убо и Боговиднии и бози благодатию, яко своим Божественным и к Богу беседуют и познавают, якоже Бог образом равным зрит, и прибеседует, и соединяется, по реченному, Боговидным сущим и богом от сея вины великий прилагает, и не нелепотно, в явление: и толико негли знаемь Бог чистыми и боги сими, елико уже знает их равным образом, иже естеством, сущия положение боги. Колико убо уподобил бы еси, подобие помышляя? Много воистинну блажени суть к Божиим зрением и видением приличне горе простирающиися со всею крепостию души и ведением духовным внегда зриши непостижностию Бога, за еже окрест его безначалие и необятие и неописанность, и отнюд (с. 1030) присносущие и безконечие вся чудесе еже в Бозе бывша пречудна и елика (и) якова ужаса: оттоле душа их рачительне в след прилепляется Бога, и желание зело нестерпимо, внегда видети Божественное лице, и доброту его Боголепотную, истаявше и блаженно страждут. И тогда прочее последованно сице очищаются и Богодействия и Боговидни бывают и бози, и с Богом воистинну соединяются. Иже воистинну и превосхождением увиденных, и последованием преестественнаго их дара обожения и Божественнаго соединения знаемь быв, чудне свосхищает предобротою, сих всяко умное чувство, и всяко желание, и окрест себе услаждающихся имать, яко инех ангеел неизбежно поющих и зело влепоту: Бог ста в сонме богов, посреде же боги разсудит{Псал. 81, ст. 1.}. И сие: Бог богов Господи глагола, и призва землю, то есть земнородныя, от восток солнца до запад{Псал. 49, ст. 1.}: темже и князи людстии собрашася с Богом авраамлим{Псал. 46, ст. 10.}, и по последованию сташа окрест Бога, якоже серафими стояху окрест его, Божественна осияния премирных таин приемлюще, и держащеся неотторжне Бога, всех безконечнократне изята суща безконечне. Аще убо чистии сердцем, по Божию изречению, блажени, яко тии Бога узрят: како не преявленно блажени зрительнии, очищаеми еже от Божия разума удивлением, и к Божию достоинству предспеянием восходяще? подобает убо желающим блаженства, пострадати и обожение, и тако недвижно стати херувимски окрест Бога, (и,) зрительнаго держатися всем тщанием и вежества и деяния о Христе Иисусе Господе. 91. Увидети тя и зело хощу, и последованно прочее воспети животворящих животе, зрящих тя некако Господи Боже мой. Но (и) хотя не могу, якоже есть достойно, да реку, и недоумею воистинну и сетую. Како усвояется ум тебе, Владыко творче всепремудре! и тя единаго зря, мира наслаждается (с. 1031) и покоя ему прилична. Ибо желает естественне, яко ум сый, внешняго и видимаго обношения свобождься и упразднився, о себе помышляти, и паче же размышляти единственною скоростию вышшая, и прилагатися воистинну сущаго в себе невеществия тоншим. Темже словом естественным сам о себе аки востекает к всех превышшему, и всякаго невеществия вышшему яве яко к тебе: и наипаче же Духа свята пособием верою якоже лепо есть помоществуемь, и сице прочее горе простираяйся, или паче воистинну яко ум сый, от мысленных, сущих окрест тебе аки от неких сродных горе влекомь, желает тя и зело увидети со всяцем усердием душевным. Какова же страждет чудна и блаженна естественно! ибо понеже естество ему, якоже рех, умно суще, и всех создании наипаче парительно есть и скоро, и желание приличне имать мысленная сиречь помышляти, якоже животна чувственная ясти. Сие бо образом равным есть еже помышляти уму, (якоже) еже ясти животным чувствительным. От еже бо помышляти и жити свойственне, и расти, и наслаждатися и веселитися бывает уму, якоже и чувствительным животным есть от еже ясти. Такова же страждет воистинну от еже действовати, сиречь, от еже помышляти: и превосходительне наипаче, внегда достигнет духовною твоею благостию несказанно, в тебе быв во услаждение неизреченныя славы твоея смесившееся желание его. Имущее бо к нечему желание свойственно, что бы могло и сотворити, влепоту, достигше к привлачительному чесому, и паче же таковому, яков ты, да еще и промысла твоего к толь великому, якоже ты, желаемому? Ты бо Царю всепремудре, всесильне, преблагий Господи, создав животное мысленно ум, таков зиждеши, яковому о твоих превеселитися естественне есть, и неизреченно во удержании Божественнаго твоего быти со изступлением речения, и аки неистовне некако завещание имети к тебе от подобна пиянства Божественна вдохновения. (с. 1032) И ум убо тако добротолюбиб крайне создан быв, обретается: и за еже добротолюбив быти зело, по естеству от промысла, добрейшая последованне помышляти желание имать, и присно вышших и предних желати, и прирадоватися воистинну от лучших. Каков же ты сему являешися, и како свосхищаеши его премудре, наипаче рачением твоего видения услаждаема, и всех вкупе отнюд кроме единаго тебе изступающа со всяким завещанием души! Ниже различен токмо зришися, сладчайший, ниже прост: ниже обят, ни не обят: ниже страшен ни кроток: не ныне убо сие, ныне же оно: да сице воистинну отсюду, (и) отонуду, движение ума еще же и прелог, ничимже может уклонятися к единому чесому от сущих вне тебе за различие акибы, или за простоту: за непостижения желание или постижения: за страшность или кротость: и отнюд едино благо и добро обятельне сый, и всех благих и добрых творительно начало преблаго и предобро, ни в чесом ином мощно есть воистинну уму зрети и пребывати, и различне и многообразне веселитися, точию в тебе. Ты бо всяческая винословне имаши в себе, и превыше всех обретаешися, аки содетель предобр безконечнократне безконечно. От сея вины един сый Боже по существу, различен зришися действы за множество их, и паки за величие их мног. Ибо еже есть чуднейшее и ужасное, яко аще и бываеши яве постижимь: отсюду паки непостижимь образом сим бываеши. Иже бо по существу ты необятен отнюд, и по действу, и к сему (и) по силе не обемлешися некако. Меру бо силы твоея кто обрете? Премудрость же твою, кто уведе? Благости же твоея пучину кто изследова? И отнюд твоих чесого кто крайне чувство прият? аще по сим инем образом и постижимь сый некако. Темже прочее ум зрети от мысленных яже в видимых начиная, шед восходит последованно ко еже окрест тебе, Спасе единственному, и непостижному: и за сладкое и зело веселое (с. 1033) постижнаго, и за еже добротолюбен быти, тщится всем тщанием, и любопрится некако еще восходити, елико есть мощно высочае: а понеже не доволен есть достигнути далечае, разсмотряя, якоже подобает, избегающее несумненно яко превышележащее, и лучшее, многа некако удержан последованно раченоятия бывает, и равне неистовне изнеистовляется к тебе, и желания воздувает разжженна в души, поджог Божественныя любве постижное непостижнаго творя: и недоумение, приобретение рачений вменяя: не паче услаждающу еже окрест тебе всепремудре постижному, нежели возжигающу пробегающему, и недостижным разума и чудиму быти зело и желатися устрояющу. Не токмо бо что ты еси по существу, сие бо всякому, и отнюд, и каковымлибо образом по преизлишеству недоуменно: но (и) существенныя Божественныя силы и действа, и отнюд зримых окрест тебе Боже мысленных и Богословимых, непостижное есть: безконечным якоже речеся, за величие, и неиспытанным сущим за множество. Ибо сим, аще и отнюд в конец постигнутися не возможно есть аки безконечным, но мощно еже чрез очищение приближением к тебе, и взиранием доброты твоея, к светлейшим и прозарнейшим зрением сущих окрест тебе приходити и обожатися приличне. Темже и опаляеши уязвлением рачительным приседяща тебе ума пристойно, озаряя паче и паче его, и воистинну вводя в некая в невходна тайна видения пренебесна. _о единице препетая, и Троице пречестная, силы и премудрости бездонная глубино! како от самаго или начала хотел бы кто глаголати, или убо черты в Божественнейший твой вводити мрак очищенна законно ума: преводящи сего от славы в славу, множицею обаче и внутрь пребывающа пресветлаго мрака, не вем, якоже ты веси, или воньже введен бысть моисей древле, или яко сей онаго образ, или убо сего он: обаче яко сей преявленно мыслен мрак есть, и яко в нем совершаются Божественне и преестественне в (с. 1034) тайнем души неизреченно Духовнаго соединения и любве таинства: вводимии со осиянием просвещающаго Духа зело светле видят. 92. Кто тя любовне Господи Троице зря не радуется, Царя и непрестанна управителя и раздаятеля всякаго коеголибо дара и блага, и источательна всех сих сущаго? И кто о видении вседержительнаго владычества твоего радоватися не может радостию истинною? Яве яко никтоже никакоже. Разве сего ради воистинну блажени чистии сердцем, яко тии тя зрят оком души, радость самовещне сущаго изрядне Духовну. И радуются воистинну с радостию и многою душесладостию, и несносных рачений исполняются множицею, (аще) и с телесными борющеся обстояньми, и бесовская нашествия страждуще. Духовный бо свет доброты лица твоего Господи, безконечнократне безконечно преизят есть, еже и каколибо к печали приступати мирской, емуже осияватися в них бывает благодатию. Сего ради сладость вся предходит со всем вожделением, и святое желание, и неизреченное рачение. От сея вины любы твоя нестерпимыми преестественными остны уязвлены сотворяет зрящия тя по некоему тонку помышлению: от сея вины в воню мир твоих в след тебе идуще текут зельною и неослабною крепостию души тех, от нихже зришися неизреченный Боже, и в самыя себе привлекати тя всяким покушаются ухищрением, побеждены отнюд и истаявше желанием твоим чудне. Темже незабвенне имут тя во уме, зависяще от доброты твоея преестественныя. Паче же убо выну и Духовне первее содержиши сердца их и нощию воистинну и во дни, и сон отлете от веждей их.