<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 847) Никита, преподобнейший пресвитер студийския обители, иже и стифат нарицаемый, бе в лето от Рождества Христова тысяща трех сотое, ученик сый симеона новаго Богослова ближайш. От негоже многим научен бе духовнаго любомудрия таинственным учениям, и толико того подража добродетелям, яко другому воистинну явитися учителя солнцу, всеми, яко да речем, лучезарными преломлении того даров и поучений в душе его возсиявшу. У негожде труды неутомимыми в Божественных любомудрствуя писаниях, премногая и изряднейшая мнения собрав, суть же яже и искусом и блаженным ревнованием не точию изучив, но и ощутив та, и яко сущий Божественных и преестественных мыслей свой разум от всех сих соделав: высокая и премудрейшая творения яви, яко мощно судити хотящим из предлежащих трех сотниц его. Ихже известно правило деяния и жизни Боголюбезнейшия совершение, и соборне рещи, хранилище богатейшее нравоучения, и иносказательна образа нарекий кто, всю речет истину. Тако бо суть высоки мыслями: такоже великосказательны благоречием словес, яко сумненну быти, от сущаго ли в них смысла, или от лепоты речение толику веселию раждатися в душе чтущаго. (с. 848) Смиреннаго никиты монаха и пресвитера святейшия обители стифата студийскаго, ученика симеона новаго Богослова. Первая деятельных глав сотница. 1. Четыре непщую вины быти в Троице совершенней добродетелей, подвижущая ко еже писати полезная, ныне среднее начала превозникшаго, и к Троице таинственнаго достигшаго Богословия. И первую убо быти свободу, само то глаголю безстрастие души от приболезненна деяния на естественное предуспевшее видение твари, и во мрак Богословия вшедшее отонуду. Вторую же, яже от слез и молитвы ума чистоту: от негоже слово раждается благодати, и струи истекают разумений. Третию, еже в нас святыя Троицы вселение: от негоже светолития Духа на пользу в коемждо очищаемых бывающая, явление таин царствия небеснаго, и откровение сокровенных в души сокровищ Божиих. Четвертую, належащую нужду всякому приемшему талант слова разума, прещения Божия, лукавый рабе, глаголющаго, и ленивый, подобаше тебе вдати сребро мое торжником: и аз пришед, истязал бых свое с лихвою{Матф. гл. 25, ст. 26 и 27.}. егоже ради убо и давид паче бояся, глаголаше: Се устнам моим не возбраню: Господи, ты разумел еси. Правду твою не (с. 849) скрых в сердце моем, истину твою и спасение твое рех, не скрых милость твою и истину твою от сонма многа {Псал. 39, ст. 10 и 12.}. 2. Начало еже по Бозе жития, совершенно мира бегство: се же есть отвержение волей души, и перстнаго мудрования преложение. Имже на Божественное восходяще мудрование, духовни от плотских бываем: умерщвляеми убо плоти и мирови, животворими же душею и Духом о Христе. 3. Ведение души о Бозе не ложно, и вера завещательна, презрением видимых, и деяние добродетелей, самолюбия всякаго отлученно, треплетена, по соломону, вервь{Екклес. гл. 4, ст. 12.}, яже скоро не расторгнется от духов лукавствия. 4. Верою возмездия трудов восприяти уповаем: темже и терпим труды удобне добродетелей, от Божественнаго извествуеми Духа любовию воскриляемся к Богу. 5. Не егда от помысл стужаеми есмы нечистых, уже и действующих злая, чисти бываем. Но егда от крепости своея ослабевши душа, и ум от вознераденна и невоздержна пребывания, смущенна имети будет и сеновна мечтания, и труды добродетели леностию прилежания и молитвы приоскудеют: тогда и не деющи злая, в стране в сластех волею блатоваляющихся вчинимся. 6. Разрешенным же бывшим броздам владычественнейших чувств, абие и страстей востание бывает, и раболепнейших чувств движется действо: обыче бо некако сих безсловесие, воздержания разрешившося уз, к винам прилагатися страстей, и якоже в смертных в тех пастися пажитех, и толико паче, елико и ослабение коснительнее протязается: не бо терпит, на няже естественне имать похотение, разрешившося брозд, приобщение отразити. 7. От чувств ова убо их словесна суть, зрение, слух, и иных любомудрейша же и владычественнейша: ова же безсловесна (с. 850) и скотна, вкус, обоняние, осязание, к послужению словесных: зрим бо первее и слышим, и тако словом движимся, прикасаемся же предлежащаго: и обоняюще вкушению даем. Темже и двою скотнейша суть три, и явственне раболепнейша. О нихже от паственных и зверей чревонеистовнейшая и сочетательнейшая трудятся паче: чрез весь бо день и нощь, или пищи несытне насыщеваются, или к сочетанием устремляются. 8. Иже действия внешних чувств ко внутренним преложивый чувствам, и зрение убо, ко уму зрящему свет живота прострый, слух же, к разуму души, вкус же, к разсуждению словесе, обоняние же к мысли ума, осязание же, к сердечной предвигнувый бодрости: ангельску жизнь на земли совершает, человек убо человеком и сый и видимь: Ангел же ангелом спребывая и разумеваемь. 9. Видящим убо умом свет Божественныя жизни, сокровенных таин Божиих разум приемлем: разумом же души, восхождения в сердце помысл располагаем с ведением, различающе от лучших горшия, разсуждением же слова, виды разумений вкушаем. И яже убо от горька израстающая корене, или претворяем на сладкое изварение души, или всячески отмещем, сущия же от былия прилична и злачна приемлем: всяко разумение пленяюще в послушание Христово. Мыслию же ума, мысленное миро духовныя благодати обоняем, веселия и радования сердечнаго исполняющеся. Бодрым же сердцем, орошающаго свыше Духа пламень желания нас добрых, или согревающаго изстудившияся силы наша хладом страстей, благоразумно ощущаем. 10. Якоже телеси нашему чувства суть пять: зрение, слух, вкус, обоняние, осязание: тако и душе по томужде числу пять чувств суть: ум, слово, чувство умно, разум, и вежество: в три же в душе действа сия собираются: во ум, в слово, в чувство. И умом убо размышления, (с. 851) словом же сказания, чувством же мечтания Божественнаго вежества и разума приемлем. 11. Иже ум имый размышления помыслов благоразсуждающ, и Божественная разумения чисте приемлющ, слово же истолкующо естественная движения видимаго всего создания, вины сиречь сущих уясняющо, умное же чувство, подемлющее небесныя премудрости и разума вежество, осияньми солнца правды, всяко прешед чувство, во еже паче чувства достиже, и невидимых наслаждается сладости. 12. Начальнейшия силы ума суть четыре: разум, остроумие, постизание, и твердомыслие. Иже бо сим присовокупивый первейшия души добродетели, и разуму убо ума целомудрие души приложивый, остроумию же мудрость, постизанию же правду: твердомыслию же мужество соединивый, колесницу пламенну и неботечну себе сугубо состави, на три первейшая начала и силы ополчения страстей: сребролюбия, сластолюбия, и славолюбия. 13. Иже сребролюбие постижением законныя правды, яже есть к тождеродному милостивно сострадание, победивый, сластолюбие же, благоразумным целомудрием, еже есть обдержительное воздержание, одолевый, славолюбие же остроумием и мудростию, еже есть благоразумное разсуждение Божественных и человеческих вещей, яко немощнейшее потребивый, и красными ногами яко перстно сие, и ничесомуже достойно поправый, перстное мудрование одоле плоти, и толико, яко закон духа жизни преложити то, и закона мучительствующия плоти, свободно соделати и рещи: Благодарю Бога, яко закон Духа жизни свободил мя есть от закона работы смерти{Римл. гл. 7, ст. 25. гл. 8, ст. 2.}. 14. Иже славу человеческу яко сущу, никакоже сущу усвояяй, и сластолюбие несытства ради души обемляй, и сребролюбия лихоимства ради держайся, или бесовствен мнением (с. 852) и гордынею сотворяется, или скотен сластьми чрева и подчревных соделовается, или зверствен бывает ближним, лихоимственным и безчеловечным сребролюбием. Отпадая убо от яже к Богу веры, за еже приимати славу от человек по словеси Господню, и уклоняяся от целомудрия и чистоты, за еже возжигати несытством подчревная, и безчинным покарятися стремлением, и уклоняяся от любве, за еже единому себе хранити и не даяти пенязи требующим ближним. И тако многообразен некий зверь от многих сложеных самем себе сопротивных таковый видимь есть, Богу и человеком и скотом непримирителен. 15. Ярость и желание и словество ума, аще убо по естеству в себе стоят и движутся, всего Божественна некоего и Боговидна человека соделовают, здраво сиречь движима, и никаколюбо от естественнаго стояния уклоняющася. Аще ли же противу естества от подобнаго превратятся, и от своего отдвигнутся естества многообразна некоего сего (человека), якоже речеся, и от многих самех себе сопротивляющихся сложенна показуют. 16. Ярость, междопределие есть желания и словества души, якоже оружие комуждо сущи во еже противу естества или и по естеству движении своем. Движиму бо желанию и словеству по естеству на Божественная, оружие есть ярость комуждо правды на единаго свирепеющаго и налогствующаго тем змия причащение сластей плоти, и славы человеческия наслаждение: превращающим же от еже по естеству движения, и прелагающим во еже противу естества силу, и от упразднения о Божественных вещех на человеческая преносимым: оружие есть неправды в грех, тою ратующим и нападающим на воспящающия стремления и похотения их. Яко отсюду или деятельну и зрительну и Богословеснейшу показатися человеку тому, посреде церкве верных, по естеству движиму, или скотну и зверственну и бесовственну, во еже противу естества прелагающуся. (с. 853) 17. Аще кто не первее силы души своея приболезненным покаянием и крепким прилежанием таковы обратив совершит, яковы нам от начала даде Бог, адама создав, и дыхание жизни вдунув вонь: ниже себе познати возможет когда, ниже помысла самодержца страстем, без кичения, не любопытна, не лукавна, проста, смиренномудра, зависти и клеветы чужда, стяжати: всяко разумение пленяюща в послушание Христово. Но ниже душу свою возжигаему, и воспаляему обрящет в любовь Божию, ниже пределы воздержания превосходящу, и довольну сущу предлежащими, и святых желающу упокоения. И аще не сице стяжет сия: ни сердце свое кротко, мирно, безгневно, благо, нератуемо, исполнено милости и тихости, стяжати когда возможет. Тако крамольствующей на себе души, и смущения ради сил, невмещательной пребывающей лучей духа. 18. Иже не сице древняго благородия восприемляй в себе благолетие, и начертания не воз_ображаяй присно образа, иже от начала того по подобно своему создавшаго, како мощно когда соединитися с тем, егоже разлучи себе, начертаний неподобием: и емуже свет воистинну угашен бысть, свету противное в себе приторже. Не соединився же с тем, от негоже начало имать состава, и от негоже от не сущих воззвася{в естество произведен бысть.}, и сущими обладает, сей убо посечен быв, яко не подобен сотворшему ввержен будет, вестно есть зрящим, аще и аз умолчу. 19. Дондеже убо вещества в себе имамы страстей и вины сих самохотне храним, оттрясти сих не произволяюще: возмогает тех на ны и сила, крепость приемлюще сиречь от нас. Повнегда же сия от себе отвержем, и сердце слезами покаяния очистим возненавидевше и видимых прелесть, тогда утешителева пришествия в причащении бываем: Бога зряще, в свете присносущне, и зрими от него. (с. 854) 20. Иже всемирнаго чувства разторгшии узы, в свободе всякия работы пребывают чувств, единому духови живуще, и тому собеседующе, яко от онаго движими. Имже и с соединосущныма отцем и словом соединятися некако обыкоша, и един дух, по павлу, совершатися. Иже и не точию не яти суть бесы, но и страшни, яко причастившеся Божественнаго огня, и огнь воистинну бывше. 21. Осязание, не от части что есть в телеси во единой части свое действо якоже прочая от чувств имущо, но обдержительно некое, и по всему телеси. Егда убо не по потребе прикоснется чесого, еще страждущо к гладкостем, колебатися уму от помысл встраственных, соделовает: егда же по потребе нуждней естеству, нежностей отречется, и чувство превозникнет, не обыче колебати душевная чувства. 22. Уму во яже паче естества пришедшу, чувства по естеству стояща, безстрастне с винами сообращаются: словеса токмо и естества их испытующа, и неложно разсуждающа действия сих вкупе и качества. Не пристраствующа, или усвоительне противу естества движима к ним. 23. Подвизи и труды духовнии раждают душе веселие, миру сиречь предварившу страсти. Еже убо сущим под чувством неудобно: сие душе труждающейся, и любовь от священных подвигов к Богу стяжавшей, и уязвленной Божественна разума рачением, удобное, и паче сладчайше. Онем бо убо труды и подвизи добродетели, аки покою тела и сластей наслаждению прилежащим неудобни суть, и зело мнятся быти жестоцы, не предпоучившимся сланость сластей потопити струями слез. Сей же возгнушавшейся сластей, виновных болезней, и благострастие оттрясшей, с самолюбием телесным, едино печально, ослаба трудов, и подвигов праздность. Еже убо виновно онем есть в веселие телесно, сие душе преложившей желания на Божественная, печали виновно: и еже сей веселия виновно духовна, онем воздыханий и болезни есть виновно. (с. 855) 24. Труды, мнятся убо от начал, болезней быти источницы всем вводимым в поты и подвиги духовны. тщащимся же к приумножению добродетели и к среде простирающимся тоя сладости некия и чудныя отрады. Внегда же мертвенное сие пожрется мудрование плоти от безсмертнаго живота прибывающаго пришествием духа в простирающихся воистинну к концем добродетелей трудами, радости неизреченныя и веселия: разширившуся тем сиречь источнику чистому слез, и сладкой струи свыше на ня одождившейся умиления. 25. Аще хощеши на пределы взыти добродетели, и к Богу ведущий путь обрести незаблудне, не даждь сна очима твоима, ни дремания веждома твоима, или покоя скраниама твоима, дондеже труды многими и слезами место безстрастия обрящеши удрученной души твоей, и внидеши во святилище разума Божия и впостасною премудростию его в последняя кончины человеческих вещей с разумом позриши, и долняя презрев, на высокия горы видения, якоже елень, и сам жажднейше востечеши. 26. Путь скор к вознесению добродетели, молчание есть новоначальным устен, и смежение очию, и ушию глухота: приемь бо отсюду ум сих праздность, внешния в себе затворив входы, смотрети себе начинает, и своя движения. И кая убо суть абие испытует яже в мысленнем мори помыслов плавающая помышления? Кая же яже в горнило мысли его влагаемая разумения? Чиста ли же и не примесна семен горьких, и от ангела света, или плевели примесни же и плевни и от сопротивных свету. И сице якоже некий владыка самодержец посреде стоя, мыслем судя, и разделяя лучшия помыслы от горших. И ова убо, от влагаемых приемля еже от него обучением и движением во умныя влагает житницы, огнем испекшася духа и воды Божественныя исполненна, от нихже и питаемь, возмогает и исполняется (с. 856) света: ова же отсылает во глубину забвения, горесть сих оттрясая. Се же единаго дело есть онаго умне коснувшагося ведущаго к небесем и Богу незаблудно, и плачевныя ризы темных совлекшагося страстей. 27. Душа яже единою отвергшая лукавство и любопытное мудрование злейшаго кичения, простым же и незлобивым сердцем от пришествия утешителя обогатевшая, абие в Бозе же и в себе бывает. И яже зрит и слышит, верна и истинна непщует несумненно, яко превозшедшая лютыя неверия пропасти, и выше ада зависти носимая. 28. Все добродетели предваряет извещенная вера, егда несумненен совет приносит душа, и всячески отмещет самолюбие. Ничтоже бо тако ино сильно есть ныне к подвигом совлекшагося возбраняти от делания заповедей, якоже всезлобнейшее самолюбие. Сие есть препятие предспеяния тщаливых. Сие недуги тем подмещет, и неудобоисцельны страсти тела, имиже теплоту души студену соделовает, и еже злопострадати о добродетели нудит оставляти яко навет благопокойныя жизни. Самолюбие же есть, безсловесное любление тела: еже и самолюбива сотворяющи инока, сиречь, душелюбива и телолюбива, удаляет его от Бога и царствия его, по преподобному словеси: иже любит душу свою, погубит ю{Иоан. гл. 12, ст. 25.}. 29. Иже болезненне наченший делание заповедей Божиих, и теплым рачением легкий ярем иночества на выю вземший, не щадит здравия телесна, ни в жестокости дел добродетели изнемогает, ни в трудех печалует, не зрит к иному кому уныло о подвизех и нерадиве мыслящу: но горящею любовию бразду сечет добродетелей во всяком злострадании, к себе токмо зря, и к Божиим заповедем: и на всяк день со слезами семена своя долу метает во стране живых, дондеже прозябнет тому злак безстрастия, и в стебль возрастет (с. 857) разума Божественна, и клас принесет зерно слова приносящь, и приидут жита правды его. 30. Ни откуду же тако мню предспеянию быти души скору и сокращенну, якоже от единыя веры, веры же, ни яже в Бога токмо, и в единороднаго его Сына, но и извещенныя: с неюже веруем истинна быти обетования Христова, яже обеща и уготова любящим его, и прещения и муки адовы уготованныя диаволу и делателем его. Сия вера извествует душу уповати в подвизе сущу получити устроение святых, блаженное их безстрастие, и востещи к высоте святыни их, и наследнице ей с ними быти царствия Божия. Сице же извествуема, рачительне к деланию заповедей устремляется, не сомнящися в себе, но подражающи трудам онех, и подобными подвиги гонящи постигнути совершенство их. 31. Соизменятися обыче внешнее лица устроение с внутренним души устроением, яково бо умное движение ея делание имать, таково и зрак лица зрящим изявляет свое расположение: с действующими бо помыслы созавещаваяйся и соизменяемь, овогда убо зрится светел, сердцу веселящуся, о восхождении благих помышлений и размышлений о Бозе: овогда же дряхл и мрачен, о помыслех безместия огорчаваемь. В нихже и утаитися несть возможно действуемому от имущих чувства души обученна: зане, или измена есть десницы вышняго: явна есть тем, яко знаема и любезна, еюже порождшеся от Духа свыше, свет и соль быша ближним. Или крамолы есть сил и смущения помыслов: явственно некое есть сим, сиречь, отмещущим то, и начертание образа Сына Божия на себе носящим светлейшо Божественными даровании. 32. Внутреннее делание, или венцев виновно бывает души, или томлений и мук: зане аще убо о Божественных вещех упражняется, и смиренномудрия любоудобряет места: имать напоение свыше слезное, и возделовает любовь яже к Богу, и веру, и еже к ближнему сострадание. Имиже душа воз_образующися (с. 858) в доброту образа Христова, свет бывает человеком, и лучами добродетелей привлачит к себе зрения их, и подвижит всех к славословию Божию. Аще же о дольных и человеческих, и ровенныя места возмущает и возжизает грех, снизу имущи злосмрадие и мрак: возделовает ненависть и отвращение благаго имже, перстным вообразующися и без_образным образом ветхаго, тьма всячески приближающимся бывает: и деланием злых, и беседою растлевает души нелестны и неутверждены, и подвижет на Бога хулу. И тако в нихже убо смертию постижена будет душа, и воздаяние по равенству обретает. 33. Возделователь злых мыслей, мрачны своя творит и дряхлы внешния зраки, и безгласен язык имать Божественных песней, и неудобосретен есть всем в беседу. Возделатель же благих и безсмертных садов сердца, радостовзорно и возрадованно имать лице, сладкопеснив же в моления язык свой, и всего себе в беседу сладчайша. Яко явленну быти и бывати зрящим отсюду добре и самому тому под работою еще нечистых сущему страстей, и под нуждою закона сущему земнаго мудрования: и свобождшемуся таковыя работы, законом духа, по премудрому соломону: сердцу веселящуся, цветет лице: в печалех же сущу, сетует{Притч. гл. 15, ст. 13.}. 34. Деятельне совершаемыя страсти, деятельне и исцеляются. Якоже бо невоздержание сласть, и обядение и житие нерадиво и разлиянно, остраственнейшее навыкновение совершают в души, и надеяния безместна ту ведут: тако утеснение и воздержание, труды и подвизи духовнии, безстрастие снабдевают ей, и от пристрастия в безстрастие ту приводят. 35. Егда, от приболезненна кто и крепка подвижничества, дарований великих от Бога смиренномудрием сподобится, таже низвлечен быв отонуду, страстем предан будет и бесом: (с. 859) наказателем да весть себе возвысившася, и велика о себе возмневша, и на инех вознесшася. Ни откуду же убо отинуду таковый обрящет исцеление и свобождение от содержащих живот его, разве точию о еже востещи ему покаянием в первое устроение, и употребити ходатая добре, смирение и познание своих мер: имиже всяк стояй добре на основании добродетелей, имать себе под всею тварию. 36. Равно зло есть пред Богом и человеки живущими по Бозе, еже и встраственну кому быти деянии произволения неудержанием, и возгордевшуся в добродетелех духом мнения. Имже бо образом перваго деятельне и отай бывающая срамно есть и глаголати: тако и втораго возвышения сердца, мерзости суть пред Богом. И якоже он ненавидимь есть Богу в покой, за еже быти ему плоть по Божественному словеси: тако и сей пред Господем нечист, за еже быти ему горду. 37. Не бо еже есть страсть, сие и деятелен грех, но ино сие, и другое оно. Прочее страсть убо есть, в души движимая: деяние же греха в телеси зримое. Сиречь, сластолюбие, сребролюбие и славолюбие, страсти люты суть души: блуд же и лихоимство и обида, деяния грешна плоти. Вожделение, ярость, и гордыня страсти суть души, вне естества силам ея движущимся: прелюбодеяние же, и убийство, и татьба, и пиянство, и аще что ино телом содеваемо, деяния грешна, и люта суть плоти. 38. Три суть первейшии всех страстей начальницы, и три яже на них ополчения, и три побеждающии же сих и низлагающии, новоначальный, средний, совершенный, сластолюбия, сребролюбия и славолюбия, треглавнаго змия. 39. Не един и тойжде подвиг трием над тремя началами и силами обладающаго духа, но ин, и ин. Инако воюему единому и единому сих началу, киимждо противно брани того стоящим и вооружающимся естественне праведною яростию. (с. 860) 40. Иже первее к подвигом благочестия совлекийся и вводимь сый ко ополчению на страсти, на духа сластолюбия всю вземлет брань свою, и сильне всяким злостраданием нань воюет. Плоть убо неядением истаевая, долу леганием, бдением, и всенощными моленми: душу же сокрушая памятию адовых томлений, и размышлением смерти, и сердце очищая от скверны и сочетаний и сосложений слезами покаяния. 41. Иже к среде, начала преложивый восхожение, и подвиги, иже на сластолюбиваго духа губою перваго безстрастия отерый, ныне же очима его откровено бысть, и естества зрети сущих начавый: на духа невернаго сребролюбия вземлет оружия веры. Ум бо возвышая свой получением Божественных вещей, словом же прикасаяся словесем твари, и во еже естества их сказовати уясняя: душу же возводя верою от видимых, на высоты невидимых, и веруя, самаго быти промышляюща о делех своих, иже от небытия в бытие вся приведшаго Бога, и всю надежду творя Божественныя жизни. 42. Иже среду видением и безстрастием прешедый, и прелестное возникий всемирнаго чувства, ныне же словом разума и впостасныя Божия премудрости, во мрак Богословия вшедый, на духа славолюбия вземлет силою смиренномудрия оружия. Душу священными откровенми умиляя, и слезы проливати неболезненни творя: мудрование же ея памятию низздагая человеческия немощи, и возвышая то Божественнаго разума разумений. 43. Пощенми убо и бденми и молитвами, долулеганми же и труды телесными, и отсечением волей во смирении души, недейственна содеваем духа сластолюбия. Емлем же его слезами покаяния, и ко узилищи ведуще воздержания, недвижна сего и недейственна совершаем, во тщаливых, сиречь, двизающихся стояще ополчении. 44. Веры оружием и мечем духовным, иже есть глагол Божий, духа среролюбия победивше, закалаем: ныне к (с. 861) видению сущих словом премудрости востекше, и превышше смирения бывше видимых словом разума, и в царских домех любве с многобогатными сокровищи надежды яже на Бога внутрь почивше. 45. Крилы безстрастия и смиренномудрия на воздусе таинтвеннаго Богословия плавающе, и в горнюю глубину разума таин Божиих с Божественным Духом входяще, молниями Божественных догмат и разумений, славолюбия попаляем духа. Тучами же слез и реками умиления на кончины человеческих вещей зряще, тристаты его потопляем бесы, мнением и тщеславием и гордынею на ны воюющия. 46. Иже похоть плотскую, и похоть очес, и гордость житейскую, мирския сия неправды, ихже люблением врази бываем Богу, от души возненавидевый, и сих отрекийся: миру себе распя, и той распяся ему, разорив бывшую между Богом и душею вражду во плоти своей, и сотворив во обоих мир: иже бо сим в совлечении плотскаго мудрования умертвивыйся, примирися с Богом, убив вражду мира умерщвлением сластей, распятою мирови жизнию, и любовь со Иисусом лобыза. Не ктому убо таковый враг, яко друг мирови, но друг Божий бывает, яко распяся мирови, и могий глаголати: мне мир распяся, а аз миру{Галат. гл. 6, ст. 14.}. 47. Всяко подвизающимся попущение сих ради бывати обыче: тщеславия ради, осуждения ради ко ближнему, и возношения ради еже о добродетелех. Аще убо что от сих в душах подвизающихся приближившися предварит, от Бога сим оставления виною бывает. И сего убо праведнаго о падениих не избежат суда, дондеже предварившую вину оставления отвергше, к храму смиренномудрия прибегнут. 48. Не бо еже не быти чисту от встраственных помышлений, сие есть точию сердца нечистота, и скверна души: но и (с. 862) еже о множестве исправлений возноситися, и еже о добродетелех кичитися, и еже велия мнети себе о премудрости и разуме Божии, и еже укоряти от братии ленивыя и нерадивыя: и оно убо явственно есть от фарисеевы и мытаревы притчи. 49. Не мни от страстей ослабу прияти, и бывших отонуду страстных помышлений скверны избежати, гордо еще имый мудрование и надмевающееся о добродетелех. Не бо узриши мира дом, во благостыни помыслов, ниже во храм любве внидеши с радостию во всякой благости и тишине сердца, дондеже на себе надеешися и на дела твоя. 50. Аще к благошарием телес привлекается душа твоя страстне, и акибы от раждающихся отонуду к тебе страстных помыслов мучительствуема есть, не мни сия быти вины сущаго в тебе смущения и пристрастнаго сия быти движения: но сокровенну веждь быти вину внутрь души твоея, якоже некий камень магнит, влекущу к себе силою навыкновения страстнаго и лукава обычая вред от лиц, якоже железо. Зане и создания Божия суть вся, и зело своим словом добра, ни едино же слово порицательно имуща на творение Божие. 51. Якоже преходящии море и блюющии, не от естества моря страждут сие, но от естества внутрьуду предхранимыя вины согнивших мокрот: тако и душа не от вины лиц, но от вины внутрь сокровеннаго еще навыкновения злаго, в себе пристрастнейшее терпит колебание и смущение. 52. Согласно внутреннему настроению души, изменятися обыче и самое естество вещей. Егда убо по естеству стоят в ней умная чувства, и ум о словесех бывших тварей незаблудно шествует, слово имея изясняющее естества и движения сих, по естеству зрятся ей и вещи и лица, и всяко естество вещественных телес, и неимуща некую тли или вреда внутрь сокровенную вину. Егда же противу естества тоя силы движутся сами на себе крамольствующе, противу естества той и сия зрятся: не естественною своею добротою (с. 863) к уразумению родосодетеля сию возводяща, но страственнейшим навыкновением ея во глубину погибели низводяща. 53. Аще пал еси оставлен быв падением плоти, или языка, или помысла, приболезненно влекий и жесточайше житие, да не странно и удивительно тебе явится: твое бо есть падение и от твоея вины. Аще бо не бы сам или ново что первее и надмения исполненно, якоже не должно бяше, возмнел еси о себе, или вознеслся еси на иного кичительным мудрованием, или осудил еси в немощи естества человеческа кого, не бы оставлен быв судом праведным Божиим, свою познал еси немощь. Познал же еси, да отсюду научишися не осуждати и не мудрствовати паче, еже подобает мудрствовати, ниже над кем возноситися. 54. Пад во глубины зол, никакоже воззвания да отчаешися, аще и во глубину низведен был еси последнюю ада злобы. Аще бо деятельными добродетельми предхранимо тепле основание имаши у тебе благочестия, аще и падение пострада поколебавшееся созданное сего жилище тобою от различных каменей добродетели, даже до помоста страственнейшия земли зол, но не забудет древних твоих трудов и подвигов Бог, аще сокрушенно о падениих твоих сердце имаши, поминающо дни древния и свое воззывающо падение с воздыхании пред ним. Призирая бо призрит скорее на тя трепещуща словес его, и прикоснется очию твоею невидимо печальнаго сердца, и на предположенном тобою основании добродетели с трудами поставит, и даст ти паче прежния крепости, лучшу же и совершеннейшу крепость, с теплотою горящаго духа, во еже паки возстяжати низложенная завистию лукаваго, с терпением дел добродетели, и воздвигнути в дусе смирения дом ея прежняго светлейший, в покой, по писанному, вечен его{Псал. 131, ст. 14.}. (с. 864) 55. Вся к безчестию нам приключающаяся, или от человек или от бесов, судом праведным Божиим по смотрению приключаются к смирению суетнаго дмения душ наших. Намерение бо есть Богови окормителю жизни нашея, еже присно смиренным нам быти, и не мудрствовати паче еже подобает мудрствовати{Рим. гл. 12, ст. 3.}, но мудрствовати в целомудрии. Ниже мнети велика о себе, но к нему взирати, и подражати того по возможности блаженному смирению. Понеже кроток бе и смирен сердцем, таковых и нас быти желает претерпевый за ны смерть неправедну же и безчестну. Ничтоже бо ино тако любезно тому и усвояемо во всяцей воистинну добродетели, и могущее от гноища страстей возвышати, якоже кротость и смирение и любовь ко ближнему. Сим же не сущим с нами делающими добродетели, все делание наше суетно, и весь труд подвижничества безполезен и неприятен. 56. Вводимым убо в добродетельное житие, страх мучений содействует к деланию заповедей, и уклонению от зол. Предуспевшим же добродетелию к видению славы Божия, ин подобне припоследствует страх, зело сый тем страшен от любве чистый, иже и содействует сим в пребывании непоколебимо стояти любве Божия, боящимся от сея страшнейшаго поползновения: онем убо падшим от сущаго в руце намерения, раскаявающимся и паки востающим, первый страх припоследствует со уповании благими. Сим же завистию супостата погрешившим падением, от высоты видения Божия, не абие вторый последует: но мгла некая и тьма осязаема тех преемлет, исполнь сущи печали и болезней и горести с первым мучений страхом. И аще не бы Господь саваоф дни оны пресекл несносныя сея болезни, не бы спаслся всяк испадаяй оттуду. (с. 865) 57. Внегда пребывательнаго страственных помысл стужения душа ослабу приимет, и пламень мучитель плоти увянет, буди тогда ведый наитию быти святаго Духа в ны, возвещающу оставление прежде согрешенных, и дарующу нам безстрастие. А донележе воню их частым стужением ощущает, и подчревная распаляются плоти, далече веждь, от сея быти благовонию святаго Духа, и всю под узами держиму быти нерешимыми страстей же и чувств. 58. Видех под солнцем, глаголет премудрый, мужа непщевавша себе мудра быти{Притч. гл. 26, ст. 12.}, егоже видех и аз в жизни человечестей уповающа на дела своя, и велия мудрствующа о человечестей премудрости и земной и душевной. И не точию сея ради над нелестными вземлющася: но и сущим в Божественном покои учителем Христовым подсмевающася же вкупе и ругающася за речения их грубообразность, и зане не восхотеша последовати избранием украшенных речений внешняго разума, ниже о благовчинении положения их потщашася в написанных учениих своих. Емуже яко не уведевшу яко убога, ни изобретатели речений, ни благогласность гласов, но благознаменительность предпочитательнейша есть и любезнейша разумений. Сию приреку притчу: пес живый, той благ паче льва мертваго{Екклес. гл. 9, ст. 4.}: и, благ отрок нищ и мудр, паче царя стара и безумна, иже не разуме внимати еще{Екклес. гл. 4, ст. 13.}. 59. Люта и неудобопобеждаема есть страсть хулы, имать же вины от гордыя мысли сатанины, яже и всем убо по Бозе живущим в добродетели стужает, многа же предуспевающим в молитву и в видение Божественных вещей, егоже ради подобает всяцем хранением чувства блюсти, и благоговеяти о всех страшных таин Божиих, и Священных изображений и словес, и внимати о нашествии духа сего: приседит бо молящимся и поющим нам, и отрыгает овогда устнами (с. 866) нашими не внимающим, клятвы на ны и хулы неподобны на Бога вышняго, стихом _псалмов и глаголом молитвы приводя тыя, но обращати подобает нань слово Христово, внегда таково что приносит во устне, или подсевает в мысли наша. И, иди за мною сатано, рцем к нему, всякаго злосмрадия исполненне и повинне огню вечному: на главу твою хула твоя да будет: и абие ум о иной коей вещи Божественной или человеческой ныне пленением упраздним, или и со слезами к небесем того, и к Богу возвысим: и тако, Богу помогающу нам, избавимся от тяготы хульныя. 60. Тлетворна есть страсть печаль в душе и теле, и самех касающаяся мозгов. Но яже есть мира сего привременных ради человеком прикасающаяся, яже множицею тем и смерти виновна бывает. Печаль же по Бозе, спасительна же вкупе, и зело полезна сущи, терпение в болезнех и искушениях соделовает, источник умиления разширяющи подвизающемуся, и жаждущему правды Божия, и питающи слезами сердце его, якоже исполнятися Давидову на онех словеси: Напитаеши нас, глаголет, хлебом слезным, и напоиши нас слезами в меру, вином умиления{Псал. 79, ст. 6.}. 61. Снизпадшия части души от злых делания, зело яже по Бозе печаль востяжавает, и во еже по естеству воззывает. Толико бо зиму страстей, и облаки греха истончавает слезами, и от мысленнаго души отгоняет воздуха, яко ведру в помыслех абие ума нашего бывати, и тишине в мори мысли, и веселию в сердцах наших, и изменению на явлении лица нашего: на неже добре зрящии, якоже зраки и завещания своя приупокояюще тако по Давиду взывают: сия измена десницы вышняго{Псал. 76, ст. 11.}. 62. Не приемли от мнений подвсеваемыя ти помыслы на ближняго: суть бо ложни и губительни, и всячески прельстительни. (с. 867) Веждь убо, яко сим намерением покушаются бесове в ров погибели вринути души творящих уже предспеяния в добродетелех: инаго бо во глубину осуждения и греха деятельна от подвизающихся кого воврещи не могут, аще не повинут того прияти подзревания лукавыя от внешних нравов же и устроений ближняго. Тако бо под судом и падением греха сего сотворше, соосудитися с миром делают, по преподобному словеси: аще бо быхом себе, глаголет писание, разсуждали, не быхом осуждени были: судими же от Господа наказуемся, да не с миром осудимся{1 Кор. гл. 11, ст. 31.}. 63. Егда от уныния место дадим бесовом глаголати во ухо наше, яже на братию нашу подозрения, не хранящеся сиречь о движениих очию, тогда и во еже осуждати поущаеми есмы от них, овогда и совершенных добродетелию. Аще бо радостовзорне зряй осклабляющимся лицем, и удобоприступный всем в беседу сосложителен к сластем и страстем тебе мнится, да будет ти всяк и сетованно зряй и дряхло, яростию дыхая и гордыни исполнен. Но не подобает человеческим внимати свойствам, погрешен бо есть всеми, иже о таковых суд. Суть бо человеком многа воистинну различия естеств и навыкновений и телесных положений, яже единем онем в лепоту суть под видением и судом истинным чисто стяжавшим умное око души многим умилением, и всельника имущим безконечный свет Божественныя жизни: имже и ведети дано есть тайны Царствия Божия. 64. Самоделателие злых дел бывающе плоти, сущему противу естества желанию и ярости душевней служим: плоть убо скверняще злыми течении греха, душу же горестию ярости помрачающе, и отчуждающеся Сына Божия. Подобает прочее скверну убо существеннаго от телесе течения, потоки существенных (с. 868) слез очищати. Да еже сласть течением естественным оскверни тело, сие болезнь печали течением паки слез естественным очищает. Мрак же души, иже от горести яростныя светом умиления и сладостию любве, яже по Бозе, отгоняти и соединятися паки с тем, от негоже первее онеми отчуждихомся. 65. Якоже скверна, яже от сласти сатанинское рачение предварившее имать во исполнение злобы: тако и очищение, еже от болезненныя печали, теплоту имать покаяния предваряющую во исполнение плача и слез. И сие смотрение есть, яже к нам Божия благости, да труды болезненными труд сласти, и течении слез течение студнейшее плоти отражающе же и очищающе, из_ображения злых от ума, и без_образныя образы от души безвестны сотворим, и светлейшу сию добротою естественною покажем. 66. Имже образом лукавым духом действуемь блудяй, мзду обемлет сласть плотскую, и конец тоя злых, скверна. Тако, иже Духом свыше действуемый святым, мзду обемлет радость душевную: и конец того добрых, еже от слез очищение и порождение, и еже к Богу соединение и сопряжение. 67. Двум сущим в нас, от тогожде существа, естественным течением семене и слез, имже на ризе душевней оскверняемся, и имиже паки на той очищаемся: нужда есть сущую от существа нашего скверну омыти движимыми от тогожде существа слезами: инако бо сущую от естества скверну очистити не возможно. 68. Всяко души согрешающия устроение, злобою движимо нравов, в сласти кратцей разоряет труд: всяка же очищаема душа злаго обычая и устроения, в долгу сласть веселия простирает труды. И чудо, како сласть, сласть укрощающи, раждаемую от сласти услаждает болезнь. 69. Овогда убо горесть и болезнь прибывает умному сердца чувству от течения слез, овогда же веселие и радование. Егда убо очищаемся покаянием ржи, и скверны греха теплотою (с. 869) огня, подобны имуще от сего слезы от Божественнаго огня разжигаеми, и акибы млаты тяжкими на помысле уязвляеми, возсылаеми из глубины воздыхании сердечными, горести и болезни умне же и чувственне ощущаем. Внегда же сицевыми довольне очищшеся слезами, в свободу достигнем страстей, тогда от Божественнаго утешаеми Духа, яко тихо и чисто сердце стяжавшии, сласти и радости неизреченныя исполняемся от радостотворных слез умиления. 70. Ины слезы суть, яже от покаяния, и ины яже от Божественна проливаемыя умиления. Зане ово убо яко река потопляющи и низвлачащи вся греха твердыни: овы же, яко туча на тростия приходят в душу, и яко иней на сено: клас разума воспитовающе, и плодовита сего, и плодоносна совершающе. 71. Не бо еже есть слеза, сие и умиление, но много посредство слез и умиления. Зане ова убо от раскаяния нравов, и памяти древних души падений приходит, яко от огня и горящия воды очищение сердца. Ово же, свыше от Божественныя росы духа, во утешение и прохлаждение сходит души, ново во глубину смиренномудрия тепле вшедшия, и наслаждающияся видений неприступнаго света, и к Богу сице вопиющия Давидски с радостию: проидохом сквозе огнь и воду, и извел ны еси в покой{Псал. 65, ст. 12.}. 72. Слышах глаголющих: не мощно кому в навыкновение приити добродетели без отшельствия далека, и бегства в пустыню, и удивихся, како неопределенное изволися тем в месте определяти. Аще бо навыкновение добродетели, возпоставление есть сил душевных в древнее благородство, и вкупе собрание первейших добродетелей в действо еже по естеству. Сия же от внеуду аки привводима, к нам прибывают, но суть с нами от содетельства Божественным и умным чувством: имиже и с ними же по естеству движими, (с. 870) входим в царствие небесное. Аще же внутрь нас есть по гласу Господню: убо излишняя вещь есть пустыня, входящим нам в не и без тоя покаянием и всяцем хранением заповедей Божиих. Еже и на всяком месте владычества его по Божественному Давиду может быти: Благослови бо, глаголет, душе моя, Господа на всяком месте владычества его{Псал. 102, ст. 22.}. 73. Иже посреде царскаго ополчения под воеводами и чиноначальники защищаемый же и вчиняемый, не возмогий во брани супостатов дерзновенно что, и храбро на супостаты показати, или поне единаго от сих победити, како единоратовати имать, и посреде многих тем врагов воеводственно некое дело покажет неискусен сый во брани? Аще же сие в человеческих не возможно есть: много паче в Божественных. Кто бо в пустыню бежав натечения бесов, и страстей нашествия, безвестная и проявленная познает: или нападение сотворит на тех, не первее добре обучився отсечения воли посреде собора братий, под искусным началовождем таковыя брани, невидимыя воистинну и мысленныя? Аще же сие не возможно есть, убо отнюд не возможно есть, яко да инех таковый победит, и инех научит на невидимыя враги победам. 74. Отими от себе понос нерадения, и уничижение презрения заповедей Божиих: отвержи самолюбие, и на плоть нещадно устремися: взыщи оправданий Господних и свидений его: пренебрези славу и безчестие: возненавиждь сластная похотения телесе: бежи сытости, еюже подчревная распаляются: лобжи убожество, злострадание: стани противу страстей: обрати чувства твоя ко внутренним души: воззри внутрь к деланию лучшаго: оглохни от человеческих вещей: истощи всю твою крепость на делание заповедей: плачи, долулегай, постися, злопостражди, безмолвствуй, увеждь конечное, не яже о тебе, но (с. 871) самаго себе: превышше смирения видимых буди: простри умное твое око к видению Божию, и виждь сладость Господню от доброты созданий. И оттуду сшед повеждь братии твоей, яже вечныя жизни, и тайны Царствия Божия. И се есть дело бегства от человек совершенным прилежанием, и конец еже в пустыни пребывания. 75. Аще хощеши увидети благая, яже уготова Бог любящим его, в пустыни буди отвержения своея воли и бежи мира. Котораго же сего? Похоти очес, плоти, гордости помыслов, и прелести видимых. Сего бо аще бежиши мира, рано возсияет на тя свет{Исаии гл. 58, ст. 8.}, узрением Божественныя жизни, и исцеления души твоея, глаголю же, слезы скоро возсияют, и изменением изменишися десницы вышняго, и рана оттоле страстей не приближится телеси твоему{Псал. 90, ст. 10.}. И тако посреде мира и людей пребывая, будеши яко в пустыни живущ, и человека не видя. Аще ли же сего не тако бежиши мира, ничтоже тебе от бегства единаго видимаго мира к совершенству добродетелей и соединению Божию прибудет. 76. Еже быти иноку, не еже вне человек и мира быти есть: но еже оставити себе, вне похотей плоти быти, и пойти в пустыню страстей. Аще бо и к великому оному речеся: бегай человек, и спасешися, но сим образом речеся: зане и по еже бежати оному, посреде человек водворяшеся, и в населенная приходя бе, и со ученики живяше: но мысленным бегством в чувственном спешно бежав, ничтоже от человеческаго сочетания повреждашеся: сие же и ин некто от великих вопияше от собрания исходя: бегайте братие, на уста показоваше, вопрошаемь вины. 77. Еже вкупе во общежитии житие, уединения есть утвержденнейше: зане о нужднем убо еже вкупе жития, свидетель есть священное слово Иисуса и Бога: идеже бо еста (с. 872) два или трие собрани, глаголет, во имя мое, ту есмь посреде их{Матф. гл. 18, ст. 20.}. О прибедственности же уединения соломон, горе единому, глаголет, яко, егда падет, несть воздвижай его{Екклес. гл. 4, ст. 10.}. Ибо в любви и единомыслии Бога поющих, и давид ублажает: блажени, вопия, людие ведущии воскликновение{Псал. 88, ст. 16.}. И еже вкупе житие похваляет, глаголя: се что добро, или что красно, но еже жити братии вкупе{Псал. 132, ст. 1.}? И во ученицех Господних, едина бе в них душа и сердце{Деян. гл. 4, ст. 32.}. Но и еже к нам Божие сошествие, не в пустыни бысть, но в населенных и посреде человек грешных. Нужно убо есть единомыслие, еже вкупе жизни: погрешно же уединение и прибедственно. 78. Нужда (есть) приити соблазном, глаголет Господь, но горе тому, имже соблазн приходит{Матф. гл. 18, ст. 7.}. Иже убо благоговение погубивый, и с пренебрежением и безстрашием Божиим посреде собора братий пребываяй, многим от простейших дает соблазны. Ово убо делы, и образы, и злейшими нравы: ово же словесы и беседою растленною, и растлевает души и нравы благи и добры. 79. Блюдый заповеди Божия, не камень соблазна бывает человеком, зане ниже соблазн есть в нем: мир бо мног любящим закон твой, и несть им соблазна{Псал. 118, ст. 165.}: но свет, и соль и жизнь, по Господню гласу: вы есте свет мира, и соль жизни{Матф. гл. 5, ст. 14.}. Свет убо, яко житием добродетелен, и светел словом, и премудр умом: соль же, яко в разуме Божественном мног, и силен в премудрости Божией. Жизнь же, яко глаголы беседы своея животворяй умерщвленных страстьми, и сих от ада возставляяй отчаяния, и светом убо дел своих правды сияяй пред человеки, и просвещаяй их. Сладостию же и терпкостию словес, востягаяй тех от разслабления, (с. 873) и избавляяй от согнития страстей: жизнию же глагол своих живот даяй умерщвленным от греха душам. 80. Страсть тщеславия треостен волчец есть, тщеславием и мнением и гордынею от бесов разжигаемь же и исковываемь: но водворяющимися в крове Бога небеснаго, видимь бывает, и остны сего сокрушаются, превозлетающими сиречь сия смирением, и в саде жизни внутрь почивающими. 81. Внегда нечистый сей и многокозненный бес прилогствует ти предспеяния творящу в добродетели, и предгадает ти престолов высоту, умышлении, в памятствование возводя и вознося делание твое, яко превышше лежащее прочих, но и души водити довольна тя советует быти: удержав его мысленно, не остави убегнути, аще убо силу приял еси с высоты тако творити. И поемь, пойди мыслию, и мнением к нечесому некогда содеянному тобою злу, и сие пред ним обнажив, рцы к нему: деющии таковая достойни ли суть на такову взыти председания высоту? и довольны ли тии мнятся быти водити души, и приводити спасены ко Христу? ты да речеши, аз бо молчу. Не имея убо он что отвещати тебе, яко дым от студа отидет, и не ктому с силою стужит ти. Аще ли же что содеянно, или глаголанно от злых несть в тебе, премирною жизнию твоею, то поне заповедьми себе и страстьми восприложи Господу: и толико себе обрящеши совершенства недостаточна суща, елико купель водную недостаточну сущу моря. Правда бо человеческая толико правды оскудевает Божия, елико к величеству земля небесе, и комар льва. 82. Иже во глубину уязвивыйся от любве Божия, оскудевающу имать предложения телесную силу: не бо есть сытость сего предложению в трудех и потех иночества. Подобно бо томимым жаждою сущу, разпаление к подвижничеству несть врачество в сытость, но чрез весь день же и нощь жаждет, еже трудитися, и силою телесе побеждается. Мню же, (с. 874) яко паче естественною сею страстию и мученицы Христовы обяти бывше, мук не ощущаху, и сытости не имеяху сим приобщающеся: но побеждаху сами себе распаленным к Богу рачением, и присно остающихся зряху от разжженнаго по еже пострадати предложения. 83. Иже себе по каковомулибо образу примеряяй от подвижничествующих, или пребывающих с ним братий, утаися умопрельщая себе и странным от Бога ходя путем: зане или себе таковый не позна, или уклонися от ведущаго к небесем. Имже тщаливии долуповерженным мудрованием текут, имже и сети превозлетающе врага, в мыслен воздух крилы безстрастия входят, и в светлых веснуют местех мерномудрием украшени. 84. Напыщенный и чрез возношение умом прельщаяйся, никогда же смирения во свете умиления получит благодать, еюже любодарствуется свет премудрости Божия сокрушенным сердцем, по писанному: Во свете твоем узрим свет: но нощь того покрыет страстей, в нейже вси зверие дубравнии человеческаго естества проходят, и скимни мнения, тщеславия, глаголю, и блуда бес, рыкающе ищут кого поглотити, и во чрево отчаяния воврещи. 85. Живущему по человеком и движимому духом мнения, море зол житие сие и настоящая жизнь бывает, поливающее умную часть души его сланостию сластей, и свирепыми волнами страстей тричастие его биющее, от духов сиречь лукавствия неистовствующееся, нань же лютое недоумение величайшия печали воспростирается, внегда ладия его и кормило душевное от сластей сокрушаются плоти, и кормчий ум под глубиною греха, и мысленною смертию бывает. Дондеже море убо зол, в бездну смирения и тишину ему укротит волны: сланость же сластей в тучи слез течения обратит, и в сладость преложит световидно умиления. 86. В сытость сластем тела и деянием того поработав, в сытость употреби и трудов постничества в потех (с. 875) злострадания: да сытость сытостию, и сласть болезнию, и ослаба труды телесными отразиттися, и сытость веселия и радования во упокоение обрящеши: тако бо и чистоты насладишися благоухания, и целомудрия, и сласти насладишися неизреченныя безсмертных плодов духовных. Понеже и очищающая былия по подобию обыкохом, на скверны риз, во очищение их налагати, внегда скверною во глубину онепотребствуются. 87. Полезни суть недузи вводимым еще к добродетельному житию, содействующе сим ко истаянию и смирению разжизаемыя плоти: сии бо силу убо плоти немощнейшу делают, перстное же мудрование души отончавают, саму же ту крепость ея, крепльшу же и сильнейшу по Божественному совершают апостолу: егда бо, глаголет немоществую, тогда силен есмь{2 Кор. гл. 12, ст. 10.}. Но елико сии сим суть полезни, толико привредни предуспевшим в трудех добродетелей, и ныне чувство превозникшим, и в небесная видения вшедшим: возбраняют бо тем от упражднения о Божественных, и одебеляют болезньми и обстоянии помысленное души их: и облаком печали возмущают то, и умиление сушею болезней изсушают. Еже павел ведый прилежя добре о себе, законом разсуждения глаголаше: умерщвляю тело мое подвигами трудов, порабощаю е послушаниям, да не како иным проповедуя, сам неключимь буду{1 Кор. гл. 9, ст. 27.}. 88. От нестройнаго и равности неимущаго устава пищи, множицею раждаются многим недузи: или к крайнему неядению тщаливому, или к трудом добродетелей безмерно и неразсудно простершуся, или к обядению и сытости уклоншуся естеству супостату. Нуждно убо и вводимым к добродетели есть воздержание, и вышше среды преложшим подвиги к совершеннейшему видения восхождению: мати бо здравия есть сие, друг чистоты, и смиренномудрия благ сожитель. (с. 876) 89. Сугубо быти безстрастие веждь, и сугубо во тщаливых паче бывати: и первее убо, от конца деятельнаго любомудрия первое бывает тщаливым безстрастие, еже от законнаго подвига труды многообразно предуспевшим, умерщвляти убо весть абие страсти, и стремления плоти недейственна поставляти, и двизатися ко еже по естеству душевным силам творит, и ум в поучении Божественных с разумом воспоставляет. Таже от начала естественнаго видения, второе и совершеннейшее премудре тем прибывает. Еже от умнаго безмолвия помыслов, в мирное ума возвысившося устроение, прозрительнейш же и предзрительнейш весть ум соделовати. Прозрительнейш убо, в вещех Божественных, и во видениих лучшаго, и в откровениих таин Божиих: презрительнейш же, в вещех человеческих, отдалече грядущих, и имущих бывати, в нихже един и тойжде дух действуяй есть, держай убо и содержай по первому безстрастию, отпущаяй же по второму в свободу вечныя жизни, якоже павел глаголет{Рим. гл. 6, ст. 2.}. 90. Иже безстрастия приближивыйся пределом, истинна убо о Бозе, и о естествах сущих, творя зрения, от доброты созданий по мере своея чистоты ко творцу востекая, приемлет светолития Духа: блага же мнения имея о всех, приснопомышляет о всех добрая: святыми же всех зрит и чистыми, и о Божественных и человеческих вещех суд прав износит: и рачительствует убо ничесогоже от яже о веществе мира и человеком тщимых. Изшед же умом всемирнаго чувства, к небесем и Богу востечет чист всякия тины, и всякия работы свободь, и весь бывает мысленных Божиих благих во едином Дусе, и Божественную доброту зрит и Боголепно пребывает в Божественных местех блаженныя Божия славы в неизреченнем молчании и радости: и чувствами (с. 877) всеми изменен быв, яко ангел в вещественнем теле невеществен с человеки сообращается. 91. Чувства весть слово пять и обучения: бдение, поучение, молитву, воздержание, и безмолвие. Сим чувства своя присовокупивый: зрение убо, бдению: слух же поучению: обоняние молитве: вкус, воздержанию: и осязание спрягий безмолвию, скоро очищает ум своея души, и отончив сими его, безстрастна и прозрительна его соделовает. 92. Ум безстрастен есть, своя победивый страсти, и превыше печали и радости бывый, иже ни о печалех, яже от нанесений, унывает, ни радостию яже от благодушия, разливается: но во скорбех убо радующуюся имея душу, во благодушиих же воздержающуюся, и не вне меры действующую. 93. Много на творящих в видение предспеяния неистовство бесов: подседают бо на тех нощь и день. И пребывающими убо с ними, искушения люта на ня воздвизают: собою же топоты творят в страхование, и на спящих сих наветуют, отраде их завидяще, и различно опечаляют их, аще и не могут обидети прилепленных сущих Богу. И аще не бы ангел Господа вседержителя храняй их был, не быша навета их и смертных сетей угонзнули. 94. Подвизаяйся в деятельнем любомудрии добродетели, внемли известно о наветех губительных бесов: елико бо восхождения предспеяний в высокия добродетели полагаеши, и свет умножаеттися Божественный в молитвах, и ко откровениям грядеши и видениям неизреченным, Духом: толико они, восходяща тя зряще на небо, скрежещут зубы, и злобы своея многоплетенныя мрежи по мысленному воздуху тщательно простирают. Не точию бо похотнии и яростнии и плотолюбивии же и зверстии на тя дхнут беси, но и хуления завистию горькою на тя востанут. И к сим явленно же и неявленно воздушнии и начала и власти летящии, по мечтанию единому в видах странных и страшных представляющиися, (с. 878) во озлобление твое, елико мощно есть тем, воздвигнутся. Но во умном делании молитвы бодрым оком ума упражняяся, и мыслями естественнаго умозрения в творениих Божиих поучаяся, не убоишися от стрелы их летящия во дни: ниже бо телеси твоему приближатися возмогут, от сущаго в тебе света яко тьма прогоняеми, и от Божественнаго огня пожигаеми. 95. Благодати Божественнаго Духа боятся зело лукавии дуси, и наипаче егда богатне найдет на ны очищающихся поучением и чистою молитвою: не дерзающе бо приближитися телеси осияваемых отонуду, единеми мечтании и страшными топоты, и безвестными гласы устрашати и смущати покушаются, и от дел отводити бдения и молитвы. Но и спящим тем на земли не щадят, и завидяще кратчайшему трудов их покою наветуют, и торгании некиими вземлют сон от веждей их, притруднейший сих живот и болезни исполнен творити таковыми умышляюще. 96. Отелесеватися мнятся тонце некако дуси тьмы, якоже слово от искуса мнети дает. Или сие мечтающи чувству подукрадуему, или в сие и осужденни бывше, от древняго отпадения. Но обаче сосражатися с подвижною устремляются душею, клонящуся тоя ко сну лестному телу, еже и искушение некое мнитмися быти души, ныне бывающия превышше смирения телесе, яко да яровидное тоя и мужественное, како есть, на таковых покажется, претящим той страшными с яростию и неистовством многим. Имиже в рачение уязвленна Божие, и обдержительными добродетельми обята душа, не точию праведною яростию сопротивляется, но и биет сих, аще кое тем есть чувство, якоже мнится, нещадно оземленившимся отпадением перваго и Божественнаго света. 97. Прежде сражения и победы множицею бесове чувство души смущают, и сон от веждей восхищают. Но дерзости и мужества от Духа святаго исполненная душа небрежет убо (с. 879) сих нахождения и горькаго неистовства: животворящим же точию воображением, и призыванием Иисуса и Бога, и мечтания их разрушает, и сих купно беглецы совершает. 98. Аще корысти пленити супостатных духов от деятельнаго изшел еси любомудрия, зри и внемли, оружии себе отвсюду духовными вооружив. Веси бо, киих сосуды расхитити возусердствовал еси. Супостат убо, но мысленных и безплотных, с телом еще цареви духов и Богу воинствуяй. Веждь бо, яко горчае, нежели первее воюют на тя, и мнози на тя приидут козньми: дондеже или утаившеся, внегда корысти припогубляти, с сими тя пленника восхитят и многия горести душу твою исполнят, или злым тя и болезненным подвергнут искушениям, во оскорбление плоти твоея и озлобление. 99. Не может источник благ, воды мутны и смрадны источати, веществом мирским смердящя: ниже сердце, вне царствия суще небеснаго, струи жизни когда Божественная источати, благоухание мира мысленна возсылающия. Еда ли бо, глаголет, источник от единаго устия источает сладкое и горькое{Иаков. гл. 3, ст. 11.}? Еда может купина маслины сотворити, или желуди маслина? Тако ниже источник един сердца, лукав и благ вкупе родити разум. Но благий убо человек от благаго сокровища сердца своего износит благая: лукавый же от лукаваго сокровища сердца своего износит лукава, по Господню гласу{Матф. гл. 12, ст. 35.}. 100. Якоже невозможно есть без елеа и огня светильнику горети, и светити сущим в храмине: тако и души не возможно есть без Божественна Духа и огня, Божественная явленнее вещати, и просвещати человеки: всяк бо дар совершен свыше есть от отца светов, разделяемь всякой Боголюбивой души: в немже несть, по словеси, изменения или преложения сень. (с. 880) Тогожде вторая естественных главизн сотница, о очищении ума. 1. Начало убо любве Божия, видимых и человеческих вещей презрение, среда же, сердца и ума очищение, от негоже умное мысленною очию откровение и познание сокровеннаго в нас Небеснаго Царствия: конец же, неудержимо рачение сущих паче естества Божиих даров, и естественно желание, еже с Богом соединения ея, (и) еже в нем упокоения. 2. Идеже рачение Божие, и мысленных вещей делание, и причастие неприступнаго света: тамо сил душевных мир, и ума очищение, и вселение святыя Троицы. Любяй бо мя, глаголет, слово мое соблюдет: и отец мой возлюбит его, и к нему приидем, и обитель у него сотворим{Иоан. гл. 14, ст. 23. }. 3. Три весть слово устроения жития: плотско, душевно, и духовно. От сих коеждо свое имать завещание жизни, разлученно к себе, и инем неподобно. 4. Плотское жития устроение, все всячески о сластех и наслаждениих настоящия жизни упражняется: ничтоже или от душевнаго устроения, или от духовнаго в себе имущо, или поне отнюд хотящо притяжати. Душевное же междопредельно некое сущо злобы и добродетели, к прилежанию тела и здравию зрит, и к похвале человечестей, равне и труды отмещущо добродетели, и деяний бегающо плоти, не прилежащо злобе или добродетели за яже в них сопротивныя (с. 881) вины: добродетели убо за жестокость сея вкупе и притрудность: злобе же, за еже не припогубити человеческих похвал. духовное же жития устроение, от сих убо ниже едино имети изволяет, ниже в сице злых упражнятися обоих, но все по всему свободно есть сего и онаго, крилома посребренема любве и безстрастия, прелетевши обоя: ни деюще что от возбраненных, и праздности отбегающи злых. 5. Иже плотски живущии, и много мудрование плоти належащее в себе имущии, плотни суще отнюд не могут угодити Богу: темни бо суть мудровании, и лучей Божественнаго света отнюд всяко непричастни. Належащия бо облаки страстей, якоже высоки стены остеняющя имуще лучи духовныя, непросвещенни пребывают. Слепы же чувствы суще своих душ, не могут к мысленным добротам Божиим возникнути, и свет увидети истинныя воистинну жизни, и превыше быти видимых смирения. Но якоже скотни сотворшеся, и чувство бывше мира, к чувственным и человеческим вещем словесе прилагают достоинство, и подвиг весь к видимым и тлеемым имут, друг со другом за сия сварящеся. И от таковых овогда и души своя полагающе, держащеся имений, славы и сластей плоти, и тщету велику лишение таковых вменяюще. К нимже праведно яко от лица Божия пророческое оно глаголется слово: Не имать Дух мой пребывати в человецех сих, зане суть плоть{Быт. гл. 6, ст. 3.}. 6. Душевне живущии, и сего ради нарицаеми душевнии получастни нецыи, и якоже разслаблени удесы суть: ни потрудитися когда о добродетели, и заповеди Божией усердствующе, и укоризненных деяний славы человеческия ради отбегающе. Самолюбием же, питателем пагубных страстей одержими, всяко врачевание здравия ради и наслаждения плоти усвояют, и всяку скорбь и всяку болезнь и всяко злострадание о добродетели (с. 882) оттрясают супостатное выше подобающаго греюще тело. Сице же житие и пребывание имуще, оземленяют ум страстьми одебелевш, и не приемлют мысленных и Божественных вещей, имиже душа от вещества восхищается, и вся в мысленных внутрь пребывает небесех. Се же страждут от вещественнаго еще содержими духа, яко своя любяще души, и творити воли своя произволяюще: тщи бо суще Духа свята, непричастни суть и дарований его. Темже ни плода Божественна мощно есть увидети в них, ни любве ко ближнему, или радости в нищете и скорбех, или мира души, или извещения веры, или обдержительна воздержания: но ниже умиления, или слезы, или смирения и милосердия, вся же напыщения гордости полна. Темже и погрузитися во глубины духа от себе силы скудни суть: ниже бо есть в них наставляяй свет, и отверзаяй ум, во еже разумети писания. Но убо ниже инем поведающим услышати сия терпят: воистинну убо и о сицевых апостол изрече: душевен же человек не приемлет яже духа, юродство бо ему есть{1 Кор. гл. 2, ст. 14.}. И не весть, яко закон духовен есть, и духовне востязуется{Римл. гл. 17, ст. 14.}. 7. Духом ходящии, и духовную восприемшии всегда жизнь, Богоугодни суть Богови, тому яко назореи привозложени суще: присно бо трудами своя очищают души, и заповеди Господни соблюдают, истощавающе крови своя за любовь его: очищают плоть пощеньми и бденьми: слезами дебелость отончавают сердца, злостраданьми умерщвляют уды, молитвою и поучением ум исполняют света, и светла того соделовают, отвержением волей, отлучают своя души от пристрастия телесе, и вси единаго духа бывают: Темже и духовни не точию познаваются, но и нарицаются от всех праведне. Сии к безстрастию, и любви грядуще, к видению воскриляются твари, и разум отонуду сущи премудростию приемлют сокровенною в (с. 883) Бозе, единем даемую превышше бывшим смирения телесе. Темже и всяко чувство мира прешедше, и мыслию просвещенною во еже паче чувства пришедше, изясняют слово. И посреде церкве Божия и собора многа верных, словеса блага от чиста сердца отрыгают, и бывают человеком соль и свет, якоже и Господь к ним провещавает: Вы есте свет мира, и соль земли{Матф. гл. 5. ст. 13 и 14.}. 8. Упразднитеся и разумейте, яко аз есмь Бог{Псал. 45, ст. 11.}: Божественнаго слова сей есть глас, и деятельне хотящими познавается. Полезно убо есть единою отрекшемуся многосмущенныя жития (сего) и лютыя суеты, вниманием многим себе и безмолвием внешних вещей прилежно посещати, и Бога в себе искати, и познати внутрь нас сущу Царствию его. Едва бо тако творя кто, многими прохожденьми времене, образы злобы изгладити от души возмогл бы и древнюю доброту давшему чисте сохранити. 9. Предсохранен быв яд в нас злобы, мног сущь, многа и огня воистинну чистительнаго слезами требует покаяния, и вольных подвижничества трудов: понеже или вольными труды очищаемся от скверн греха, или невольными поношеньми (лютых). Вольным бо предваряющим, не усретают невольная: онем же не действующим очищения внутренния сткляницы и блюда, сия зельнее действуют наше к древнему возустроение. Тако хитрецу учинившу{Исаии гл. 5, ст. 21.}. 10. Играют благочестием, и играеми суть от вещей, иже не по слову свое сотворшии отречение, ниже учителя имети и наставника восхотевшии от начаток, но своему разуму последовавшии, и явльшиися пред собою разумни. 11. Ниже телесных недугов недуготворящия вины может кто известно ведети и целения их без искуса многоврачебнаго художества, ниже душевных без многаго о сих обучения. Понеже якоже погрешно мнится им и малеми зело (с. 884) удоборазумеваемо телесных недугов разпознание, в немже врачей упражняется художество, тако погрешительнее, и много паче нежели оно, еже есть душевных. Елико бо душа от тела есть лучша, толико больши оныя и неудобопобеждаеми страсти, нежели видимаго всеми чувственне сего тела. 12. Естеством с человеки первейшия и начальствующия прочиими добродетели создашася, от нихже яко от четырех начал реки иных всех добродетелей наполняются вод, и напаяют град Божий, иже есть очищаемое сердце и утешаемое слезами. Сия соблюдший незыблемы от духов лукавствия, или вкупе падшия труды многими покаяния воздвигнувый, дом себе царск и палату воздвиже, в нейже обитель творит Царь всего, и высокия дары своя сице себе уготовавшим изобильно разделяет и дает. 13. Кратко есть сие житие, долг будущий век, и мало разстояние настоящия жизни. Человек же велие и малое сие животно, емуже тесно настоящее дадеся время, немощен есть. И оно убо есть тесно: сей же немощен, предлежащий же подвиг в возмездие трудов велик есть, безчисленны имея остны, и в кротчайшу бедствуя жизнь. 14. Не хощет тщаливых делание Бог не искушенно быти, но и зело искушено. Сего ради убо огнь на тех напущает искушений, и благодать сокрывает вмале даемую тем свыше, и помыслов тишине от духов лукавствия возволноватися на время попущает, да видит уклонение души, кому множайшее дарует. Самому ли творцу и благодетелю своему, или чувству мира и гладности сласти? И тако, или благодать усугубляет тем, предспеющу в любовь его: или уязвляет сих искушении и скорбми прилежащих вещем, дондеже ненависть приимут видимых нестоятельнаго обношения, и горесть сущих отонуду сластей слезами потопят. 15. Миру помыслов от духов лукавствия смутившуся абие и разжженныя стрелы похоти на быстро текущаго к (с. 885) высотам ума, от ловителей и плотолюбных бесов испущаются часто. Ум же от еже к горним движения отсекся, в нелепотна движения и смешена впадает: и тако безчинне плоть востание творити на дух начинает, скоктаньми ум и разженьми низвлекущи, и в рове сласти погребсти его желающи. И аще не бы саваоф прекратил дни оны, и силу терпения своим даровал рабом, не бы спаслася всяка плоть, от горшаго удержана бывши. 16. Бес блуда многоискусен и многокознен сый, овем убо падение и ров тимения бывает: овем же рана и жезл праведен: овем же искушение и души томление. От сих ово убо, о вводимых, еще ярем влекущих подвижничества слабе и лениве, зрится: ово же, о имущих среду предспеяния в добродетель, и коснее к ней простирающихся. Ово же, от иже к видению уже крило протягших ума, и ныне добре достигших к совершеннейшему безстрастию. Комуждо к полезным яве яко строиму свыше. 17. Падение и ров тимения во всяцем небрежении иноческое совершающим житие, блудный бывает бес: уды сих блуда пламенем и похотию распаляя, и различны козни подая им, во еже творити похоть плоти и без сочетания иныя плоти, о нихже срамно есть и глаголати. Сии и плоть, по рекшему, сквернят, и плоды снедают сланыя сласти, и мрака на зрацех исполняются, и лучших праведно лишаются. Имже цельба хотящим будет, покаяния теплота, и умиление от сего слезное, еже и уклонение от зла творит, и душу очищает от скверн, и наследницу ту милости Божия соделовает. Еже праведне и премудрый гадательствуя соломон, целение рече, утоляет грехи велики{Екклес. гл. 10, ст. 4.}. 18. Бичь и жезл бывает праведно сей дух в первом безстрастии совершаемым чрез деятельное любомудрие, и творящим (с. 886) ныне предспеяния в предняя и совершенная: внегда бо крепости держимаго подвижничества унынием послабят, и к неохраниму видения мирскаго чувства мало уклонятся, и человеческих вещей в желании будут: тогда и ураняяй сей на тя напущается от крайния Божия к ним благости, и бити словесно сие начинает, помыслы похоти плотския, яко да не терпяще, в свое стражбище паки востекут тщательне крепкаго делания и внимания, и усерднее спасающих их дел приболезнейшим пребыванием имутся. Не хощет бо Бог благолюбец сый в сие достигшей души всячески к чувству мира возвращатися, но ити в предняя присно, и совершеннейших дел рачительне касатися, да не рана злобы приближится сея телеси. 19. Искушение и остен и томление по смотрению онем сей дух бывает, имже первое ко второму безстрастию достиже: да сим стужаеми естественную поминают немощь, и не премножеством бывающих от видения откровений, по словеси, превозносятся. Но противовоюющий закон закону видяще ума своего, и тонкую оттрясают память греха: страхом еже не прияти чувства внутрь раждающагося вреда от памяти его и от высоты видения не ослабят зрительное ума своего. 20. Едини тонкия памяти греха ум свой без стужения соблюсти возмогоша, елицы животворящую Господню мертвость во удесех своих и разумениих свыше прияти духом сподобишася. И плоть убо мертву греху обносят, дух же жизнию правды ради яже о Христе Иисусе обогатиша. И елицем ум дадеся Христов словом премудрости, сим и нестужаемая животворящая мертвость в разуме обретеся Божии. 21. На очищаемыя ныне души обыче некако дух похоти и ярости находити. Киим образом? да плоды истрясет Духа святаго тяготеюща в них. А зане и радость свободы, разлияние некое делает в таковых душах, вся на пользу устрояющая премудрость, к себе присно хотящи своими (с. 887) даровании влещи их мысль, и пребывати тем в смиренномудрии непоколебимым, да не многою свободою и богатством дарований на инех вознесутся, или и возмнится своею силою и разумом, великую стяжати сию палату мира, дает сим место духовом нападати на ня в сопрятании ея: да страхом уязвляеми падения, в своем стоят хранении блаженнаго смиренномудрия, и да уразумевше, яко плоти и крови привязани суть, взыщут естественне своего стражбища, в немже безвредны могут сохранитися силою духа. 22. Ко обладающему страстей недугу, и внутрь лежащему в нас согнитию греха, (и) искушений нанесение бывает, и чаша пелыня судеб Божиих, или лютее растворяется нам, или милосерднее. Зане аще убо исцельно некое будет, и удововрачуемо внутрь лежащее в нас вещество греха, от помысл сиречь сластолюбивых, или жизнолюбивых, растворенна милосердием чаша искушений от врача душ наших дается, яко в человеческих истязуемых недузех, и еще человеческая страждущим. Аще ли же неудобоисцельно некое будет и лежащее во глубине, и еже к смерти соделовает согнитие от помысл кичения и гордости последния, нерастворена в лютости ярости дается: да огнем частых вкупе искушение истаяв и истончився недуг, смирением отидет от душ наших, и сланыя помыслы слезами потопим, и чисти явимся во свете смирения врачу душ наших 23. Несть мощно инако подвизающимся избегнути частости искушений, аще немощи своея не познают, и странных всякия правды себе не вменят, и всякаго утешения достойных, всякия чести, всякаго покоя: намерение бо есть Богу врачу душ наших, присно смиренным нам быти и сокрушенным, странным от всякаго человека, и подражателем того страданий: кроток бо бе и смирен сердцем, и кротостию и смирением сердца хощет нас тещи течением заповедей. (с. 888) 24. Смирение не сотрением выи, или брудными власы, или ризою пренебреженною и жесточайшею и худою исправляется, имже мнозии обдержительность добродетели приписуют: но сокрушенным сердцем и духом смирения, по давиду рекшему: Дух сокрушен, сердце сокрушенно и смиренно Бог не уничижит{Псал. 50, ст. 19.}. 25. Ино смиренословие, и ино смирение, ино смиреномудрие: зане смиренословие убо и смирение, всяцем злостраданием и внешними труды добродетели исправляются подвизающимися, о едином телесном делании и обучении собираемо имуще. Темже не сущей души многажды во устроении, искушению усретшу, смущается. Смиренномудрие же, Божественна некая вещь сущи и высока, от единаго прибывает среду прешедшим. Утешителева пришествия: и предшествовавшим, сиречь, всяцем смирением, путь жесточайший добродетели. 26. Смиреномудрие во глубины души вшедшо, и яко камень тяжек нападшо на ню, толико сию изгнетает и истисняет силою, якоже истощитися всей тоя крепости, неудержимым стремлением слез, и скверны всякия помыслов очиститися уму, и во видении быти, по исаии пророце Божии. И тако рещи действуему и тому: _о окаянный аз, яко умилихся яко человек сый, и нечисты устне имый, посреде людей нечистыя устне имущих аз живу, и Царя Господа саваофа видех очима моима{Исаии гл. 6, ст. 5.}. 27. Егда во глубину смиренословие тебе привнидет, тогда высокоречие отидет от тебе. Егда же во глубину смирение вкоренится сердца твоего, тогда и поверхнее или (и) во глубину смиренословие отразиттися. Внегда же свыше смиреномудрием обогатееши, тогда и само то внешнее смирение, и языка смиренословие совершенне тебе упразднится, по глаголющему тако павлу: Егда же приидет совершенное, еже от части упразднится{1 Кор. гл. 13, ст. 10.}. (с. 889) 28. Елико отстоят востоцы от запад, толико отстоит истинное смиренословие от истиннаго смирения. Елико же больше земли Небо, и душа тела, толико Духом святым даемое совершенным смиреномудрие, и совершеннейше и больше есть истиннаго смирения. 29. Ниже смиренная вещающаго образом и одеянием смирения, смирена быти сердцем удобь да вознепщуеши. Ниже того, иже высокая и возвышенная, кичения и гордости полна, кроме еже о сих истязания: от плод же их познаеши их. 30. Плод Духа святаго есть любы, радость, мир, милосердие, долготерпение, благость, вера, кротость, воздержание. Сопротивнаго же духа плод есть ненависть, печаль мирская, неустроение душевно, смущение сердца, лукавство, любопытно мудрование, пренемогание, гнев, неверие, зависть, обядение, пиянство, досаждение, осуждение, похоть очес, кичение и гордыня души. От таковых убо плодов древо да будет ти познаваемо, и сице всяко ведый будеши, коего духа есть беседуяй с тобою. Имаши бо знамения сих и от Господня гласа явственнее: благий, глаголет, человек, от благаго сокровища сердца своего износит благая: лукавый же от лукаваго сокровища сердца своего износит лукавая{Матф. гл. 12, ст. 35.}: понеже по древу и плод его. 31. В нихже убо суть и усматриваются, яже святаго Духа, в тех есть и вселение Божие. От сих и немутный источник слова с премудростию и разумом: аще смиренословяще слышими суть, аще высока глаголюще. А в нихже не усматриваются плоды и дарования сего, но яже суть сопротивнаго духа, в тех тьма есть неведения Бога, и собрание страстей, и вселение супостатных духов. Или смиренна вещающе и носяще зрятся, или высока со украшением различным и видимою честностию. (с. 890) 32. Не лицы или образы или словесы начертавается истина, ниже в сих Бог почивает, но в сердцах сокрушенных и дусех смирения, и душах просвещенных разумом Божиим. Овогда бо повинующася кого словесы видим вне, и смиренный по всему употребляюща глагол, похвалу уловляюща человеческую: внутрь же мнения полна суща лести и зависти, и к ближнему злопомнения. И овогда правды ради ратующася противу кого словесы высокими премудрости видим вне, и противу лжи, или преступлению Божественных законов стояща, и к единой зряща сиречь истине, и внутрь всякаго (исполнь) суща мерномудрия, смирения и любве к ближнему, овогда и хвалящася о Господе, по тако глаголющему павлу. и хвалящемуся о Господе: Похвалюся в немощех моих{2 Кор. гл. 12, ст. 9.}. 33. Не поверхность от нас глаголемых или содеваемых зрит Бог: но хотение душ и намерение, егоже ради или содеваем что от видимых, или глаголем что от разумеваемых. Якоже и силы словес и концы дел, разумом прочиих превосходящии зрят паче, и суды сих творят непогрешны. Якоже и человек убо на лице, Бог же на сердце зрит{1 Цар. гл. 16, ст. 7.}. 34. Еда ли не подобаше, дабы суждено было Богом в родех и родех. Пророком его и другом устроеваемым быти Духом, в совершение церкве его. Аще бо древний змий не остави влагати яд греха в слухи человеков, имже паки душевная приходит погибель: како создавый на едине сердца наша, убога от земли смирения не возставит, и от гноища страстей не воздвигнет нища, духовную приносяща силу, иже есть глагол Божий, в помощь достояния своего? Воистинну убо от смирения начинающе? на высоту востекают разума, и дается тем свыше глагол премудрости силою Божиею, яко благовествующим спасение церкви его. (с. 891) 35. Познай самаго себе: и се есть истинное воистинну смирение, смиренномудрствовати научающее, сокрушающее сердце, и само сие есть (еже) делати и хранити. Аще же не у познал еси себе: ниже что есть смирение, веси, ниже коснулся еси истиннаго делания и хранения: еже во себе познати, конец есть делания добродетелей. 36. Иже от чистоты в разум сущих достигнувый, позна себе, по реченному: познай себе. А иже не у в разум достигнувый, самех же (тех) словес твари, и Божественных и человеческих вещей: позна убо яже о себе, и яже вне себе, себе же никакоже. 37. Не еже есть аз, сие всяко и яже на мне: ни еже яже на мне, сие и яже о мне. Ни еже яже о мне, сие и яже вне мене: но ино сия, и ино и ино. Зане аз убо образ есмь Божий, в души умней же и безсмертней и словесней зримь, яко ум имый слово отца, и души неразделен же и единосущен. А яже на мне, царское есть, начальное, словесное же и самовластное. А яже о мне, елика от произволения изволительна: еже земледельцу быти, или купцу, или учительну, или любомудрцу. А яже вне мене, елика же о любочестии жития и дольнем благородстве: богатство, слава, честь, благоденство и высота санов, или сопротивное, убожество, безславие, безчестие и злополучие. 38. Всяк себе познавый, почи от всех дел своих, яже по Бозе, и вниде во святилище Божие, умную духа службу, и в пристанище Божественно безстрастия и смирения. А иже не у себе смиреномудрием и разумом познавый, в труде еще и поте в житии сем шествует. Сие бо и Давид гадательствуя глаголаше: Сие труд есть предо мною, дондеже вниду во святило Божие{Псал. 72, ст. 16.}. 39. Внегда познает кто себе, сие же многаго требует внешняго хранения, и от мирских вещей упразднения, и самаго (с. 892) (того) совести испытания: абие и Божественно некое внезапу душе смирение паче слова приходит, сокрушение приносящее сердцу, и слезы теплы умиления, якоже тогда вменяти от того действуемому землю себе, и пепел и червя, а не человека: и к тому ниже скотскаго сего живота достойна, за превосходность дара сего Божия. В немже укоснети сподобивыйся, пиянства инаго неизреченна исполняется умиления, и в глубину смиренномудрия входит: и изступив себе, вся презирает внешняя брашна, питие и одеяния, телесе не превосходя потребы яко изменився добрым изменением десницы вышняго. 40. Вещь величайша есть в добродетелех, смирение. Сие бо, в нихже аще внидет покаянием чистым, и молитву спутницу с воздержанием приимет, страстей убо абие работы свободны тех соделовает: мир же силам души их подает, и сердце очищает слезами, и исполняет е тишины пришествием Духа. И тако сим завещание возымевшим, уясняется слово отсюду тем разума Божия, и во видение приходят таин царствия небеснаго, и самых тех словес твари. Поелику же во глубины духа воглубляются, потолику и в смиреномудрия глубину погружаются: от сего же возрастает тем познание своих мер, познавается немощь человеческаго естества и любы Божия и ближних множится. яко освещение вменяти тем почерпати от единаго целования{поздравления.}, и сообращающихся приближения. 41. Ничтоже сице ино к рачению Божию и любви человечестей воскриляет душу, якоже смиреномудрие, умиление, и молитва чиста. Зане ово убо сокрушает дух, и слез источает капли, и человеческой назрением краткости ведущей своих мер уведети немощь научает: ово же, очищает от вещества ум, и просвещает сердечное око, и всесиятельну душу соделовает: ова же, совокупляет всего человека Богови, (с. 893) и сего ангелом творит вкупе пребывательна, и сладости вечных Божиих благ вкушати творит, и сокровища тому дает таинств великих, и распаляющи любовию, дерзати положити того повинует душу свою за други своя, яко превышше бывша предел смирения телесе. 42. Храни ми добрый залог Боготворнаго смирения, в немже любве сокровенная сокровища внутрь хранима суть, в немже умиления бисерие сокровенни суть, и Царь Христос Бог яко на Престоле почивает позлащенне, дары раздая святаго своего Духа питомцем его, и великая своя сим даруя достоинства: слово разума своего, премудрость свою неизреченную, Божественных вещей прозрение, человеческих вещей предзрение, животворящую безстрастием мертвость, и еже с ним соединение, во еже царствовати с ним в Царствии Бога и отца, якоже сам к нему моление творит, глаголя о нас: Оч~е! ихже дал еси мне, хощу, да идеже есмь аз, и тии будут{Иоан. гл. 17, ст. 24.}. 43. Егда деятельне трудяся кто в делании заповедей, внезапу в неизглаголанней и неизреченней радости будет, якоже изменитися ему странным и паче слова изменением, и тяжесть убо отложити телесную, забыти же пищи, сна, и иных естества нужд: да весть сию быти Божие пришествие к нему, творящее в подвизающихся животворящую мертвость, и дарующее тем отсюду уже безплотных устроение. Сея блаженныя жизни виновно есть смирение: питательница же и мати святое умиление: другиня же и сестра, Божественнаго света видение: престол, безстрастие: и конец, святая Троица Бог. 44. Иже сие постигий краеградие, не может под узами держатися чувства всех. Не зрит что от красных жития сего, не разделяет от непреподобнаго преподобнаго: но якоже Бог равно дождит и возсиявает солнце на праведныя и на неправедныя, на злыя же и благия: тако равно и той любви (с. 894) возсиявает и простирает ко всем лучи: и не утесняется утробою, всех внутрь чревонося любовию, и утесняется и насилуется не елико мощно благодетельствуя. От сего источник некий якоже из едема другий исходит умиления, в четыре разделяяся начала: в смиренномудрие, в чистоту, в безстрастие, и в высоту безмолвныя молитвы, и напаяет лице всея мысленныя твари Божия. 45. Не вкусившии сладости слез умиления, ниже ведущии, кая есть благодать того, и кое есть действо: ничимже от проливаемых над умершими слез сия разнствовати мнят, приназидающе себе, но некая уже от суетных изветов многа, и недоумений заключения. Сия же естественне в нас суть. И внегда гордость ныне ума к смирению преклоняется, смежит же душа и зрения своя от прелести видимых, и сия к единому видению невещественнаго и перваго света прострет, все отрясши мира сего чувство, и получит оно свыше духа утешение: абие слезы яко воды источника истекают из нея, и чувства сея услаждают, всякаго веселия исполняюще тоя мысль и Божественнаго света. Не точию (же) но убо сокрушают и сердце, и ум смиренномудр во видении лучшаго соделовают. Имже быти не возможно есть, во инако плачущих и рыдающих. 46. Не возможно есть инако источник слез разверсти кому, кроме глубочайша смиренномудрия: ниже напротив, смиренномудру быти, без внутрь бывающаго от пришествия духа умиления: умиление бо, смиренномудрие: и смиренномудрие умиление святым порождает Духом. Якоже во некая вервь друг друга сия держащася, и единою благодатию сосвязуема, не растерзаемь союз духа имут. 47. Иже от Божественнаго Духа внутрь бывающий свет в души, тихо отходити обыче от уныния и нерадения и от неразнства еже от словес и брашен. И брашен бо неразнство, и мокрость пищи, и сама та неудержность языка, и очию (с. 895) нехранительность прогоняти того от нея обыкоша и темных нас соделовати. Тьмы же исполнившимся нам, вси зверие сельнии сердца нашего, и скимни помыслы страстей абие проходят рыкающе в ней, взыскующе пищи встраствования, и восхитити хранимое в нас от Духа сокровище, но любезное воистинну воздержание, и агг~лотворная молитва, не точию ничесомуже от таковых попущает в души проити, но и сияние неугасимо духа во уме соблюдает, и сердце тихо совершает и чисто, источает Божественное умиление, и душу в любовь разширяет Божию, и всю ту всему веселием и девством сопрягает Христу. 48. Ничтоже тако ино свойственно есть слову, якоже чистота и целомудрие души. Сих же мати есть обдержительное и любезное воздержание: сего же отец есть страх. Сей же в любовь преложься, и желанию Божественных совокуплься вещей, небоязненну соделовает душу, и исполненну любве Божия, и Божественнаго слова родительницу. 49. Страх убо первее совокуплься души, непраздну словом суда ту покаянием творит: юже болезни адовы мук обходят абие, воздыхания же и болезни с сетованием сердца изнуряют, помышляющу будущее о злых воздаяние. Таже многими слезами и болезньми сия во чреве ума заченшися совершивши дух спасения на земли, раждает сердца своего, и болезней свобождшуся адовых, и воздыханий избавльшуся суда, желание и радость будущих благ ту приемлет и приусретает ту любимая с целомудрием чистота, и рачением ту присовокупляет Богу. Сему же душа совокупльшися, неизреченну сладость ощущает: яко отсюду изливати со сластию и сладостию слезы умиления, и вне бывати той всемирнаго чувства, и яко изступившей в след жениха тещи, и тако звати гласы неглагольними: В след тебе теку, в воню мира твоего. Возвести ми, егоже возлюби извествование мое, где пасеши? где почиваеши в полудне чистаго видения? да не когда буду яко (с. 896) облагающаяся над стады праведник{Песнь песн. гл. 1, ст. 3 и 6.}. Осияния суть у тебе таинств великих, юже введ жених в чертог сокровенных своих таин, зрительну ту словес твари с премудростию совершает. 50. Да не речеши в сердце твоем, чистоту девства не возможно ми есть прочее пристяжати, тлению и неистовству телесному различно подпадшу: идеже бо болезни покаяния со злостраданием, и теплотою души положены будут, и слез реки от умиления потекут: тамо все греха твердыни низвращаются и всяк пожар страстей угасает, и совершается еже свыше порождение пришествием утешителя, и паки чистоты и девства палата душа бывает. В нюже пачеестественный Бог сошед светом и радостию неизреченною, и яко на престоле славы, на высоте сед ума ея, дает мир яже в ней силам, тако глаголя: мир вам от супостатных страстей. Мир мой даю вам, во еже по естеству двизатися, мир мой оставляю вам, во еже паче естества совершитися. Тройственным убо мирнаго дарования, тричастие исцелив тоя и в троичное совершение возвед, и соединив ю себе, всю деву уже и добру и красну во благоухании мира чистоты паки разгревая совершает, и глаголет к ней: Востани, прииди ближняя моя, добрая моя, голубице моя, деятельным любомудрием. яко се зима страстей прейде, дождь сластолюбивых помысл отиде, отиде себе. Цвети добродетелей явишася со благоуханием разумений на земли сердца твоего. Востани, прииди ближняя моя, в разум естественна видения. И прииди ты голубице моя{Песнь песн. гл. 2, ст. 10, 11, и 13.} тем в покров и мрак тайнаго Богословия и веры твердаго во мне Бозе камене. 51. Блажен ми есть добраго ради изменения же и восхождения, иже деятельным любомудрием стену встраственнейшаго навыкновения превозшедый, и отонуду крилома безстрастия посребреныма разумом, в мысленный воздух видения (с. 897) сущих превознесыйся, и отсюду во мрак Богословия вшедый, и почивый от всех сих дел своих в Бозе блаженною жизнию: яко ангел земен и небесен человек совершився, прослави Бога в себе, и Бог прославит его. 52. Мир мног любящим закон Божий, и несть им соблазна{Псал. 118, ст. 165.}. Понеже не елика убо угодна суть человеком, сия и Богу: но елика мнятся убо не быти добра, суть же и зело естеством добра ведущему словеса сущих и бывших. 53. Добро есть умрети мирови, живу же быти Христови: инако бо не может кто свыше родитися по Господню гласу: Аще же не свыше родится, ниже в царствие может небесное внити. Сие же рождение, от повиновения отец духовных бывати обыче. Аще бо не первее семя слова учением отец во чреве приимем, и сынове сотворимся Богови теми, не можем свыше родитися. Тако бо дванадесять убо, от единаго Христа: седмьдесять же, от двоюнадесяте родишася, и усыновишася Богу и отцу по реченному от Господа: Вы есте сынове отца моего иже на небесех. Темже и к нам павел глаголет: Аще бо и многи пестуны имате, но не многи отцы: аз вы родих, подобни мне бывайте{1 Кор. гл. 4, ст. 15 и 16.}. 54. Еже не повинутися отцу духовну по подражанно, даже до смерти и Креста повинувшагося сына отцу, еже не родитися свыше есть. Не бывый же сын возлюблен отца блага, како отец убо не словом и духом родився свыше, сынов благих и той будет благ отец, и блага родит чада благости отца их сообразна. Аще же не тако, по древу есть и плод его. 55. Зло есть неверие, лукаваго сребролюбия и зависти лукавнейшее чревоношение. Аще же сие есть зло, кольми паче раждающее. Зане любовь злата, любве Христовы предпочтеннейшу в сынех человеческих делает, и содетеля меньша вещества (с. 898) своего вменяет, тому служити паче, неже Богу покаряет, твари паче творца служение отдающих, и Божию истину пременяющих во лжу. Аще же толико недуг сей есть зло, яко и втораго тому идолослужения жребием прияти имя, коея не превосходит злобы превосхождение недугующая сим волею душа. 56. Аще убо Христу друг быти любиши, возненавидиши убо злато, и сего несытую дружбу, яко мысль обращающую к себе любящаго, и оттерзающую ту от сладчайшия любве Иисусовы: яже не в виде слова видится мнитмися, но в виде деяния заповедей его. Аще ли же злата желаеши, увы! приобрящеши убо погребая то ныне, аще приобретение, а не тщету последнюю имаши того любление, предпочитая то паче Христа. Онаго же, веждь, оттщетишися, и припогубиши к тщете: и егоже имаши главу, Бога, без негоже несть человеком живота спасения. 57. Аще любиши злато, Христа не любиши. Аще же Христа не любиши, любиши же злато, зри, кому тя мучитель сей уподоблятися сотворяет: оному ученикови убо, но неверну: и другу, но наветнику явльшуся, и зле противу общему Владыце досадившу, и окаянне испадшу веры купно и любве, яже ко оному, и во глубину погрязшу отчаяния. Егоже ты убоявся примера бегай злата, мне повинуяся, и сего любве, да возможеши приобрести Христа, во еже любити тя тому. Аще ли убо ни, но веси место изпадшаго свойственное. 58. Да не златом или помощию человек и умолением получити председательство потщишися когда, аще и разсмотряеши себе могуща упользовати души без свышняго звания. Зане три сия приусрящут тя, и от сих едино сбудется: или во негодование от Бога на тя найдет, и гнев различными нанесеньми и обстояньми: возратуют бо на тя не человецы точию, но и тварь без мала вся, и будет ти многовоздыханен сей живот: или с многим безчестием отонуду извержен (с. 899) будеши превозмогшими на тя: или умреши не во время твое, отсечен быв настоящия жизни. 59. Несть мощно презрети славу и безчестие, и превышше быти болезни и сласти, аще кто не на кончины вещей зрети сподобится, внегда во всякия славы, и сласти, наслаждения, и богатства, и благоденства концы нивочтоже увидит приходяща, смерти сия приемлющей и растлевающей: тогда всех зазрев человеческих вещей явну суету, прелагает чувства своя к концем Божественных вещей. И сущих убо и никакоже растлитися могущих, держится: и сия усвояя, болезни и сласти превышше бывает: болезни убо, яко сластолюбивое и славолюбивое и сребролюбивое победив души: сласти же, яко мира сего оттряс чувство, темже и почитаемь и безчестимь тойжде есть. Болезньми же и отрадами низлагаемь тела, во всех благодарит Бога и не низвлекомь есть помыслом. 60. Мощно есть и от соний движения души и расположения разсмотревати тщаливому, и о состоянии прилежати своем: по расположению бо внутренняго человека и попечений его, суть и движения тела и ума мечтания. Аще убо кто веществолюбиву и сластолюбиву душу имать, стяжание вещей и пенязей изобилие мечтает, и зраки женския и сплетения встравственна, от нихже оскверненная тому риза и осквернение плоти прибывает. Аще же лихоимственну и сребролюбиву: злато видит по всему, и сего истязует, и умножает лихвами, и в сокровища отлагает, и яко немилосерд осуждается. Аще же яростну и завистну: зверьми и ядовитыми гонима есть пресмыкающимися, и страхованием и боязни подвергается. Аще же напыщенну суетною славою: благоречия, и приусретения людей, престолы, начальства и властительства мечтает: и о не у сущих ему яко о сущих, или всяко будущих, и бдя хотение имать. Аще же гордостну и кичения полну: на колесницах носима светлейших зрит себе, и крилома овогда на воздусе летающа, и всех превосхождения трепещущих власти (с. 900) его. Тако же и Боголюбив человек тщалив сый о делании добродетели, и праведен во благочестия подвизех, и чисту вещества нося душу: будущих вещей сбытия во снех зрит, и страшных видений откровения: и присно молящася себе со умилением и мирным устроением души же и тела от сна возбуждаяся разумевает, якоже быти убо на ланитех его слезам, во устну же, еже с Богом беседе. 61. От яже во снех мечтаемых, ова убо от них суть, сония: ова же, зрения: ова же, откровения. И сония убо суть, елика не пребывают в мечтательности ума неизменна: но смущенно и часто изменяемо от иныя вещи во ину не суть мечтание, от нихже ни едина мечтаемых прибывает польза. И само то мечтание по возбуждении от сна погибает, еже и презирати тщаливии должни суть. Зрения же суть, елика неизменна суть, и не от сего во ино преобразуются, но пребывают воображенни во уме на многа обхождения лет и незабытна. И елика будущих вещей сбытия показуют, и душевныя пользы от умиления виновна бывают, и страшных видений: посуплена же и трепетна зрящаго от зримых неизменнаго страшнаго видения сотворяют, ихже и за велику вещь вменяти подобает тщаливым видения. Откровения же суть, яже паче всякаго чувства бывающая видения чистейшия и просвещенныя души, яже странных неких Божественных вещей и разумений носят силу, и сокровенных таин Божиих тайно учение и сбытия величайших от нас дел, и обще пременение в мирских и человеческих вещех. 62. От реченных, ова (сония) убо суть дебелых и плотолюбивых мужей, ихже Бог чрево, и досада сытости: ихже мрачность ума есть, от жития нерадива и сотренна страстьми, ихже и мечтают же и наигрывают беси. Ова же (зрения) тщаливых и очищающих душевныя чувства, и зримыми благодеемых в Божественных вещей постизание, и в приумножении восхождения. Ова же (откровения) совершенных, Божественным (с. 901) действуемых Духом, и соединенных с Богом Богословною душею. 63. Не всех яже во снех зрения суть истинна, ниже во всех владычественнем ума вообразуются, но единех оных очищенных умом, и уясненных чувствы душевными, и к естественну востекших видению: имже ни едино есть попечение вещей житейских, ниже кое попечение настоящия жизни: ихже долгая безснедия во обдержительнем воздержании сташа, и иже по Бозе подвизи и труды, во святилищи Божии разум сущих обителище обретоша с премудростию лучшею, ихже житие ангельско и живот ныне в Бозе сокровен есть, и предспеяние от священнаго безмолвия на престол пророк церкве Божия взыде. О нихже и в моисеи глагола Бог: Аще будет пророк в вас, во сне явлюся ему, и во видении возглаголю к нему{4 Моис. гл. 12, ст. 6.}. И во иоили: и будет по сих, излию от Духа моего на всяку плоть, и прорекут сынове ваши, и дщери ваши и старцы ваши сиония узрят, и юноты ваши видения увидят{Иоиля гл. 2, ст. 28.}. 64. Безмолвие есть ума устроение нестужаемо, тишина свободная и радующияся души, сердца в Бозе стояние несмутно и невлаемо, видение света, разум Божиих таинств. слово премудрости от чистыя мысли, бездна разумений Божиих, восхищение ума, беседа Божия, неусыпно око, молитва умна, безтруден в трудех великих покой, и конец, соединение с Богом и совокупление. 65. Дондеже душа крамольствует в себе, безчинно движущимся ея силам, и не у вместительна бысть Божественных лучей, ниже свободы сподобися от работы мудрования плоти, ниже мира насладися ныне, преставшей той брани неудержимых страстей: многа требует молчания устен, якоже глаголати и той со Давидом: аз же яко глух не слышах, и (с. 902) яко нем не отверзаяй уст своих{Псал. 37, ст. 14.}. Присно же сетующей быти подобает, и сокрушенней ходити путем заповедей Христовых, внегда оскорблятися от врага, и чаяти пришествия утешителя, имже сей умиляемей и омываемей слезами истинная свобода даруется. 66. Внегда в безмолвии мед добродетелей делаяй, превышше смирения будет плоти от подвиг любомудрия, и во еже по естеству приидут яже сил души его от долу поверженна мудрования, и вместит лучи духа, слезами очистився сердцем, и животворящия мертвости Христовы в нетление облечется, и утешителя на горнице безмолвия седя, с огненным языком, той приимет: тогда глаголати с дерзновением величия Божия должен есть, и в церкви велицей правду его благовестити, яко посреде чрева приемь закон духа, да не яко лукавый раб он, талант своего сокрываяй Владыки, во огнь ввержется вечный. Тако бо и Давид грех омыв покаянием, и пророческое паки восприем дарование, яко не могий благодеяния сокрывати, глаголаше к Богу: Се устнам моим не возбраню, Господи, ты разумел еси. Правду твою не скрых в сердце моем, истину твою и спасение твое рех, не скрых милость твою и истину твою от сонма многа{Псал. 39, ст. 10 и 11.}. 67. Ум тимения всякаго очищен быв, небо звездно со светлым и светлейшими разумении бывает душе, солнца правды имея сияюща в себе, и светлы лучи Богословия в мире испущающа: слово же сему чисто бывшее от бездны премудрости, просты и несмесны отонуду возводит к себе виды вещей и откровения сокровенных изясненна: во еже ведети, кая есть глубина и высота и широта разума Божия. Сия же естественне он внедрив, изясняет глубины духа словом всем имущим Духа Божественна во утробе, и обявляет бесов лести, и тайны поведает царствия небеснаго. (с. 903) 68. Телесная убо похотения и взыграния плоти, утоляет воздержание и пощение и подвизи духовнии: разжжения же души, и надмения сердца, устужает Божественных писаний чтение, и смиряет непрестанная молитва, и аки елей умащает я умиление. 69. Ничтоже тако ино, якоже молитва чиста же и невещественна, собеседника Богови человека соделовает, и соединяти весть того слову, безмолвно с духом молящася. Внегда и слезами очищаему имать свою душу, и сладостию же услаждаему умиления, и светом просвещаему духа. 70. И количество в молитвенных пениих изящнейше есть, внегда сие пождание предваряет, и внимание. Но качество есть оживляющее душу, еже и виновно есть плода: качество же пения и молитвы есть, еже с духом молитися и умом. Молится же кто умом, егда моляся и поя, разсмотряет разум сущий в Божественнем писании, и приемлет восхождения отонуду разумений в сердце своем от Боголепных мыслей, имиже восхищаема умно душа в воздух света осиявается ясне, и очищается множае, и к небесем вся возвышена бывает, и отложенных святым благ созерцает доброты: ихже желанием возгараема плод абие молитвы испущает от очию, и струю слез источает от светотворящаго действа святаго Духа, ихже вкус толико есть сладок, яко и телесныя пищи овогда, в причастии сих бывшему, забывати. И сие есть плод молитвы, от качества пения бывающий в душах молящихся. 71. Идеже плод сей усматривается духа, тамо и качество есть молитвы: а идеже есть качество, тамо изящнейшее есть и количество пения: плоду же не видящуся, не влажно есть и качество. Аще же сие есть сухо, излишно есть количество: еже аще и телесно обучение приносит, но убо всячески многим без приобретения есть. 72. Зри лесть моляся и поя _псалмы Господеви. Или бо ина вместо иных бесове, чувство души подукрадающе, глаголати (с. 904) нас прельщевают, стихи в хулу прелагающе _псалмов, яко рещи нам усты яже не подобает: или начало _псалмов наченшим, на конце творят слово наше, яже посреде расточающе от ума. Или на тожде место един стих присно привоз_обращают, не оставляюще забвением приближность обрести _псалма: внезапу вземлют ума память всю от совокупленных стихов, яко ниже памятовати нам, кая во устех имамы от _псалмопения, ниже могущим обрести сия и повторити языком. Сие же творят, якоже ввергнути нас в малодушие и уныние, и да упразднят нашея молитвы плоды, коснение времене подмещуще. Но сопротив стани ты сильне, и _псалмов коснее имися, да пользу молитвы от стихов видением приимеши, и просвещением святаго Духа обогатееши, бывающим в душах молящихся. 73. Егда что сицево приключится тебе поющу разумно, да не малодушествовав уныеши, ниже покой тела паче душевныя пользы твоея предпочтеши, коснение времени смотряя: но идеже тя пленение ума постигнет, стани. Аще и на конце будет _псалма, ты к началу усердно востецы, и прием то, паки имися _псалма по пути, аще и многажды во един час пленение приусрящет: сие бо творящу тебе, не терпяще терпения, твоего пождания бесове, и крепости усердия твоего, студа исполнишеся, исчезнут от тебе. 74. Непрестанну молитву ону быти веждь утвержденно, непрестающую от души чрез весь день же и нощь. Яже не в протяжении рук, или предстоянии тела, и языка гласе зрящим видится: но в умнем поучении делания ума и Божия памяти пребывательным умилением разумевати ведущим разумеется. 75. Может присно внимати молитве, внегда кто своя помыслы собраны имать во владычестве ума с миром и благоговением многим глубины Божия копающа, и ищуща отонуду вкусити сладчайшую воду видения. Миру же такову (с. 905) отсутствующу, не может: емуже бо душевныя силы разумом примиришася, сему и всегдашняя молитва исправися. 76. Аще поеши песнь молитвы Богови, и брат предстанет толкий во двери келлии твоея, да не предпочтеши дела молитвы паче дела любве, и презриши толкуща брата твоего: се бо несть любезно Богу. Милости бо любве хощет, а не жертвы молитвы: но дар оставль молитвы, даждь беседу любве брату, упокоив его. И тогда возвратився, принеси дар твой отцу духовом со слезами, и сокрушенным сердцем, и дух прав обновится во утробе твоей. 77. Не во уставленне времени и месте таинство молитвы совершается. Аще во уставляеши яже молитвы в часех и временех и местех: убо время, еже вне сих, упражняется во иных вещех суетства. Предел бо молитвы сие есть, еже о Бозе приснодвижное ума. Дело же, еже в Божественных вещех обращатися души. Конец же, еже прилепитися Богу умом, и един дух с ним быти{1 Кор. гл. 6, ст. 17.}, по определению и слову апостолову. 78. Аще и удесы плотскими умертвился еси, и душею оживотворился еси духом, и преестественных дарований сподобился еси от Бога, но ты убо да не ослабно оставиши помысленное души твоея: обращатися же присно сие обучай в памяти некогда тобою согрешенных, и яже во аде томлений, яко осужденника умно себе смотряй. Сице же обращая в сих ум, и сице смотряя себе, сокрушен сохраниши дух, и источник источающ имети будеши умиления струи Божественныя благодати, и Бога зряща на тя, и дающа ти духа во утверждение сердца твоего. 79. Пощение с разсмотрением, бдение с поучением и молитвою приемшо спутника, скоро на пределы безстрастия взыти творит делателя своего, внегда сего и душу за превосхождение (с. 906) смирения омочаему имуща слезами имети будет, и от любве Божия воспаляему. В сие же пришедша, к миру того духовну приводит, всяк ум свободен преимущему, и любовию хвалит Бога. 80. Не тако царь о славе и царстве велемудрствует, и о державе похваляяся радуется, якоже инок о душевнем безстрастии и слезах умиления. Той убо соувядаемо имать с царством мудрование: сей же соотходящо тамо и пребывающо с веселием блаженное безстрастие в безконечны веки. Якоже бо коло посреде человек обращается в настоящей таковый жизни, мало убо к земли и сущим на ней приближаяся за нужду естества: весь же кругловидно на воздух носимь мысленно, воз_окружаемо в себе носит начало к концу, и виды дарований изваянны в венце смирения. Емуже исполнь есть трапеза видение сущих, питие же, чаша премудрости, и покой есть Бог 81. Иже трудом добродетелей себе волею предавый и подвига иноческаго течение тепле совершаяй, великих сподобляется от Бога даров. Отсюду же и к среде предуспевая, в Божественна откровения и видения приходит. И толико весь световиден и премудр бывает, елико и подвигов тем труд простирается. Елико же к высоте восходит видения, толико и зависть многу губительных демонов воздвижет на ся: ниже бо терпят зрети человека во ангелово естество прелагаема, егоже ради и отай острую возношения стрелу приустремляют нань. И аще убо лесть разумев, в твердыню прибегнет смирения зазрев себе: избегает погибели гордости, и в пристанище вводится спасения. Аще ли же ни, то оставлен быв свыше, духом испрошающим (его) предается в невольно наказание, зане вольным себе не искуси. Сии же суть сластолюбиви и плотолюбиви, лукави и яростни, иже и смиряют его нанесеньми люте, дондеже познает свою немощь, и плакав, отложит томление, и речет со давидом и той: благо мне, яко смирил мя еси, яко да научуся оправданием твоим{Псал. 118, ст. 71.}. (с. 907) 82. Бог не хощет нам быти страстьми присно смиренным, и от них гонимым, яко заяцем положити точию камень прибежище себе, зане не бы рекл: аз рех: бози есте, и сынове вышняго вси{Псал. 81, ст. 6.}: но и яко еленем на горы высокия заповедей его востекати, и жажднейшим бывати животворящих вод духа. Да якоже они естеством змии ядуще, горячестию, яже от многаго течения, ядовитое естество змиев во вкус преславно, якоже глаголют, претворяют, ничтоже отонуду вредящеся: тако и мы всяк помысл встрастия во чреве мысли приемлюще, разжженным течением заповедей Божиих и силою духа претворяем пленением в благовонно и спасительно деяние добродетели: да всяк разум пленяти явимся деянием в послушание Христово{2 Кор. гл. 10, ст. 5.}. Горний бо мир не перстными и несовершенными мужи, но духовными и совершенными, и в мужа совершенна востекшими исполнения Христова{Ефес. гл. 4, ст. 13.}, исполнитися требует. 83. Иже присно в томжде обращаяся, а не далечае двигнутися хотя мску окрест машины в томжде месте движиму уподобися. Иже бо присно ратуяйся с плотию, и во едином обучении телесном упражняяйся всяцем злостраданием: не уразуме себе в величайших оттщетеваяся, яко не постиг разума Божественнаго хотения: телесное бо обучение, по павлу, вмале есть полезно{1 Тим. гл. 4, ст. 8.}: дондеже перстное мудрование пожерто будет плоти, струями слез покаяния, и животворное духовное умерщвление телеси прибудет, и закон духа воцарится в мертвенней плоти нашей: благочестие же души, разумом сущих, и безсмертными сады Божественными помышленьми, глаголю, зримое якоже древо жизни во умнем ума делании, везде и во всех полезно есть: яко чистоту сердца делающее, яко мир творящее в силах ея: ума просвещение, чистоту тела, целомудрие, обдержительно воздержание, смиренномудрие, (с. 908) умиление, любовь, освящение, разум небесен, премудрость слова, и видение Божие. Иже убо от многа обучения востече в таковое совершенство благочестия: чермное страстей прешед море, в землю обетования вниде, из неяже течет млеко и мед разума Божия, неиждиваемое святых наслаждение. 84. Иже убо не произволяяй от частных и вмале полезных, взыти к совершенне полезным, еще отрубянный хлеб яст в поте лица своего, по сущему от начала изречению Божию: темже и непожелательну имать душу мысленныя манны, и самаго того меда, истекшаго от разседшагося камене Израилю{Иоан. гл. 14, ст. 16.}. Слышавый же, востаните, идем отсюду, и от учителева гласа востав от приболезненнаго делания, и ясти хлеб болезни оставль, чувство оттрясе, и от чаши премудрости Божия вкуси: сей позна, яко благ Господь, яко исполнивый убо закон заповедей служением слова, возшед же на горницу пришествия ожидая утешителева. 85. Чины и степеньми влюбомудренныя жизни, подобает всяко нам шествовати в предняя, и к вышележащему рачительне востекати: яко приснодвижимым сущим о Бозе, и стояния неведящим когда добраго. Отсюду, и от деятельнаго убо обучения, на естественное видение твари: от сего же, на таинственное слово Богословие восходити подобает, и успокоятися в том от всех дел телеснаго обучения, яко превышше бывшим смирения телесе, и истиннаго разсуждения разум приемшим благоразсудный. Аще ли же не у сего разсуждения прияхом разум, ниже сице шествовати в предняя, и к совершеннейшему вемы простиратися: горши еще от сущих в мире есмы, иже предела не ведят предспеяния сущаго достоинства, ниже стояния возхождения, дондеже к превышележащему иных достоинств взыдут, и еже о сем желание в том упокоят. (с. 909) 86. Крепце теплотою очищаемая душа трудами обучения, озаряется от Божественнаго света, и зрети помалу начинает естественне данную себе доброту с начала от Бога, и пространятися в любовь сотворшаго ю. Поелику же уясняются ей от очищения лучи солнца правды, и естественная та доброта явственна бывает ей и познавается, потолику и труды обучения и та умножает во множайшее очищение свое: да чисте, егоже сподобися дара, уразумеет славу, и древнее благородие восприимет, и образ чист и непримесен вещества принесет сотворшему, и никакоже от прилога трудов послабляет, дондеже нечистоты всякия и скверны себе очистит, и достойну в видение и беседу Божию соделает. 87. Открый очи мои, и уразумею чудеса от закона твоего{Псал. 118, ст. 18.}, от мглы еще земленаго мудрования покрываемый, вопиет к Богу. Неведение бо перстнаго ума, мгла сущи и мрак глубок, видения души покрывающи, темну ту и мрачну во еже разумети Божественная же и человеческая соделовает, не могущу к лучам Божественнаго света взирати, или в наслаждении бывати благ оных, ихже око не виде, и ухо не слыша, и на сердце человеку не взыдоша{1 Кор. гл. 2, ст. 9. }: сия же, открываема сущи покаянием, очима зрит чисте, слышит в разуме, и разумеет разумно. Не точию же, но и восхождения о сих полагает разумений в сердце своем. Отсюду же и вкусивши сладости тех, уясняет разумом, и словом премудрости Божия поведает всем чудеса Божия: благая, яже уготова Бог любящим его, и всех в причастие таковых подвизает многими подвиги и слезами приити. 88. Седми дарованием сущим Духа, свыше слово начинающо от премудрости счисляет та, и низводит конец на Божественный страх Духа: Дух, глаголя, премудрости и разума, Дух совета и крепости, Дух ведения и благочестия, Дух страха Божия{Исаии гл. 11, ст. 2 и 3.}. Нам (с. 910) же подобает от страха очищающаго начинати, иже есть мук: да сим добре первее удаление от злаго сотворше, и покаянием пред_очистившеся от скверн греха, ко страху духа чистому достигнем сему, по пути грядуще к нему, и упокояюще в нем всяко делание добродетели. 89. Иже от страха суда начавый, и в чистоту сердца слезами предуспеваяй покаяния, исполняется, первее премудрости, понеже и начало сея страх по реченному есть. Таже разума, купно и с советом, имже себе полезная советовати любит, и искати царствия Божия и правды его. В сие же предуспев деланием заповедей, в разум сущих восходит, и приемлет Божественных и человеческих вещей известнейшее ведение. Отсюду же весь благочестия быв жилище, на любве верхоградие возшед совершен бывает, и абие чистый духа страх приемлет его, во еже хранити внутрь отложенное в нем сокровище царствия небеснаго. Сей страх зело спасителен, на верх любве возвышеннаго трепетна творит и пристрашна, страхом еже не отпасти таковыя высоты любве Божия, и паки во страх отвержену быти страшныя муки. 90. Инако вводимым в житие благочестия писаний чтение бывает, и инако к среде предуспевшим, и инако к совершенству востекающим. Зане овем убо, хлеб бывает трапезы Божия укрепляющ сердца их во священных подвизех добродетели, иже и силу крепости подает тем к сражению с действующими страсти, духи, и ратоборцы мужественны на бесы тех совершает, якоже глаголати тем: Уготовал еси предо мною трапезу сопротив стужающим мне{Псал. 22, ст. 5.}. Овем же, вино чаши Божия веселящее сердца их, и ужасающее тех силою разумений, и ум вземлющее их от писмене убивающаго, и во глубины духа испытательне вводящее, и всего раждательна же и из_обретательна разумений соделовая, (с. 911) якоже и тем свойственно глаголати: И чаша твоя упоявающи мя яко державна{Псал. 22, ст. 5.}. Овем же, елей Божественнаго духа умащающ их душу, и укрощающ и смиряющ ю превосхождением Божественных осияний, и всю превышше творящ смирения тела, якоже и той хвалящейся воспети: Умастил еси елеом главу мою, и милость твоя поженет мя вся дни живота моего{Псал. 22, ст. 5 и 6.}. 91. Дондеже притрудно деятельным любомудрием в поте лица исправляемся ко Богу, страсти плотския умаляюще, насущным хлебом возделоваемым возделанием добродетелей, и сердца человек укрепляющим, питается Господь с нами на трапезе дарований своих. Егда же безстрастием освятится в нас имя его, и сам воЦарится во всех наших силах душевных, покорив и умирив разстоящая, глаголю же, горшее лучшему помыслу, и воля его будет яко на небеси и в нас: тогда пиво ново паче слова премудрости словесе, черпаемо во умилении и разуме таин великих, пиет с нами в царствии своем в нас сущем. В причастии же Духа бывающим нам святаго, и добрым изменяемым нам изменением во обновлении ума нашего: тогда Бог сый, с боги будет с нами, яко безсмертно творя приятие. 92. Егда неудержимая вода встраственных ума помысл пришествием удержана будет святаго Духа, и сланая неподобных мыслей же и помышлений бездна воздержанием и размышлением смерти обуздается: тогда веет Божественный дух покаяния, исходят умиления воды, яже Бог и Владыка во умывальницу влияв покаяния, мысленныя наши очищает ноги, и ходити достойны я творит во дворе царствия своего. 93. Слово Божие бывши плоть, и наше естество в себе составльши, и человек совершен бывше кроме греха яко Бог совершен, сие возсоздавши, обожи. Слово же сущи перваго (с. 912) ума и Бога, словеству сего соединися, и сие Божественная мудрствовати и помышляти на высоту воскрили. Но и огнь сущи, огнем существенным и Божественным, яростное сего на сопротивоборныя страсти и бесы быстре наостри. Желание же сущи всякаго словесна естества, и покой желания, желательное сего, в причастие благ оных вечныя жизни с завещательною любовию разшири. И тако всего человека в себе воз_обновльши, нова от ветха содела, ниедино оглаголания слово на содетеля слова о возсоздании наносяща. 94. Священнодействовавши слово в себе наше возсоздание, само за ны себе крестом и смертию жертву сотвори, и жретися присно дает пречистое свое тело, и в душепитательно все пиршество предлагает то на всяк день нам: яко да сие ядуще, и пиюще честную его кровь, в чувстве души будем причащением лучши, нежели еже есмы, растворяеми сими и претворяеми на большее от меньшаго, и едино творими с сугубым словом сугубо, телом и душею словесною, яко с воплощенным Богом, и нам по плоти единосущным. Якоже не своим быти, но едино сотворшаго на ны с собою безсмертною трапезою, и сие сотворшаго быти положением, еже то по естеству есть. 95. Аще убо искушенни трудами добродетелей, и пред_очищенни слезами, приступающе ямы от хлеба сего и от сея чаши пием, двема естественными силами, сугубо слово кротостию с нами растворяется, всяко претворяющи нас самех с собою, яко воплощшееся, и нам по человечеству единосущное, и всех Боготворящее словом разума, и себе ны аки сообразны и братию усвояющее яко Бог, и отцу единосущное. Аще же смешени с веществом страстей, и оскверненни скверною греха приступаем: естественным огнем потребительным злобы, приближающися к нам пожигает и попаляет всех нас, и яже жизни подсецает нашея, не своея благости волею, но пренебрежением нечувствия нашего понуждаемо сущи. (с. 913) 96. Ко всем по деятельному любомудрию путь наченшим ходити заповедей Христовых, Господь невидимо приближаяся, несовершенно имущим еще мудрование, и сумнящуюся душу о словеси добродетели, идет с ними. Ихже убо праведно и очи душевнии держатся ныне, еже не познати свое предспеяние, внегда ити с ними Господу, и содействовати убо во избавление от страстей, подавати же руку помощи во исправление всякия добродетели. Творящим же предспеяние в подвиги благочестия, и к безстрастию смирением грядущим тем, не хощет слово, даже до сего стати тем утружденным трудами добродетелей: но далечае ити, и к видению возводитися, отонуду же и напитав их в меру хлеба довольна слез, светом умиления благословляет, и ум их отверзает во еже разумети глубину Божественных писаний, и отонуду естества и словеса узрети сущих: и сопрятает абие от них себе бо еже востати тем, и рачительнее взыскати научитися, кий есть разум сущих, и кое есть еже от сего возвышение. Иже и тщательно взыскавше, на вышшее восходят слова служение, и проповедают всем еже от деяния и видения слова воскресение. 97. Праведне слово косность поношает коснящим в трудех деятельнаго обучения, и не хотящим преложитися отонуду, и к вышшему взыти видения восхождению, глаголя им: _о несмысленнии и коснии сердцем, еже не веровати на могущее открыти слово, естественнаго видения ходящим по духу глубины духа. Еже бо не хотети от вводительнейших подвиг на совершеннейшия преходити, и от глагола телесе Божественнаго писания, на ум и разум слова приходити: знамение есть души унылыя и не ощущающия духовныя пользы, и завидящия люте своему предспеянию. Ейже не точию речется, яко угашен носящей свой светильник: иди, купи елей от продающих, но к сему еже затворитися ей чертогу, и отиди, не вем тя, откуду еси. (с. 914) 98. Егда слово Божие в падшую душу, якоже во град приидет Вифанию, умерший от греха ум ея и погребенный тлею страстей воскрешая: тогда мудрость и правда печалию погруженне о умерщвлении ума, якоже плачуще усретают его, и глаголют: аще бы еси зде был в нас, блюдомь же и хранимь, не бы брат наш ум умерл от греха. Отсюду правда убо напитати слово многим попечением и деланием тщится добродетелей, и трапезу тому различну и многовидну злострадания предложити любочествуется: мудрость же иных всех небрегши попечений, и притруднаго злострадания, при умном делании, и умных движениях слова, и разумений видения его слышании приседети избра. Темже и ту убо приемлет добре подвизающуся слово, напитати то трапезою любочестне многовиднаго и деятельнаго любомудрия: но о мнозех пекущуся видев злострадания, и о вмале полезном упражняющуся присно порицает, едину сущу искомому на потребу и послужение слова: еже лучшему помыслу покорити горшее, и перстное мудрование души преложити в духовны подвиги добродетели. Сию же и припохваляет, и естественно усвояет, яко избравшу благую часть духовнаго разума, имже человеческия превозлетающи вещи, в Божественныя глубины входит Божия, и бисер отонуду слова добре приобретает: и на сокровенная сокровища взирает духа, и несказанная ей радость прибывает, яже не отимется от нея. 99. Ум умертвивыйся страстьми, и пришествием оживотворивыйся слова Божия, камень нечувствия отложив, разрешается плениц греха и тлетворных помысл от слуг слова: страха, глаголю, муки, и трудов добродетели, и света будущия насладився жизни, отпущается в безстрастие. И отонуду на престоле сед чувств, и священнодействовав чисте видения таинство, соснедник бывает слову, и соотшед с ним от земли на небеса, царствует со Христом в царствии Бога и отца, упокоив желания своя вся. (с. 915) 100. По разрешении телесе тамошнее возустроение комуждо от тщаливых законно подвизающуся и к среде предспеющу, и совершаему в меру возраста исполнения Христова, ясно и явственно бывает извествованием и действованием Духа. Радость же вечна есть во свете присносущнем, блаженство онаго покоя. Радость же непрестанна обемлет сердца подвизающихся законно зде, и лобзает тех веселие святаго Духа, еже, по словеси Господню, не отимется от них. Сподобивыйся убо пришествия утешителева отсюду, и плодов насладивыйся его возделанием добродетелей, и обогатевый Божественными его даровании, радости исполнь сый и всякия любве, страху всякому сиречь бежавшу, с радостию уз телесных разрешается, и с радостию отходит от видимых, ихже и жив сый чувства прежде забы, и в радости неизглаголанней почивает света, идеже всех веселящихся жилище, аще тело множицею и болезнь в разрешении и сечении соединения в неких страждет, якоже неудобораждающия жены. (с. 916) Третия сотница главизн о любви и совершенстве жития, тогожде. 1. Ум безстрастен есть Бог, паче всякаго ума и всякаго безстрастия свет, и источник света блага: премудрость, слово и разум, и премудрости слова и разума податель. Имже убо дашася сия чистоты ради, и в нихже усмотреваются богатне, сими воспасошася, и еже по образу соблюдеся, якоже быти тем отсюду сыном Божиим водимым, по реченному, от Духа: Елицы Духом Божиим водятся, сии суть сынове Божии{Рим. гл. 8, ст. 14.}. 2. Елицы труды обучения чистых себе соделаша от всякия скверны плоти и духа, приятелища безсмертнаго быша естества дарований Духа. Доспевшии же в сие, света суть блага исполненни, от негоже тишины в мире сердцем исполняеми, отрыгают словеса блага, и премудрость Божия истекает от устен их с разумом Божественных и человеческих вещей, и слово их не мутно глубины Духа сказующо: На таковых несть закона{Галат. гл. 5, ст. 23.} единою соединившихся Богови, и добрым изменившихся изменением. 3. Иже усердным тщанием к Богу исправляяйся притрудно, из_ображение образа онаго добродетельми души и тела бывает: той убо в Бозе, и Бог в нем почивая по растворению. Якоже быти и видетися тому убо отсюду, образу Божественнаго блаженства в богатстве дарований Духа, и положением Богу: Богу же тайноначальнику совершенства его. (с. 917) 4. Не от членовнаго телесе положения невежеством водимь да речет кто, по образу Божию быти человеку, но от умнаго естества ума, не описуемаго от тяготеющаго долу тела. Якоже бо Божественное естество вне всякия твари и дебельства суще не описуется, безпредельно и безтелесно суще, и паче существа и слова всякаго некачественно, неприкосновенно, неколичественно, невидимо, безсмертно, непостижимо, неразумеваемо отнюд от нас: тако и данное от него нам умное естество неописанно суще и кроме дебельства сего безтелесно есть, невидимо, неприкосновенно, непостижимо, и образ безсмертныя и присносущныя славы его. 5. Ум первый сый Бог, яко царь всего, единосущное в себе имать слово и со Духом соприсносущное. Ниже без слова и Духа сый когда за естества нераздельное, ниже сливаемь с ними, за неслиянное разнства сущих в нем впостасей. Темже и слово от существа своего естественне раждая, сам себе разделяется, неразделен сый себе. Имать же соестественнаго, собезначальнаго своего Духа от отца исходящаго предвечне соприсносущное слово, и рождшаго не отсецается: едино бо есть обоим естество и нераздельно, аще и разнством впостасей, разделяется на лица, и троичне воспевается отец, Сын и святый Дух. И никогдаже сия яко едино естество, и Бог един соприсносущнаго разделяются существа и естества. Сего убо триипостаснаго и единственнаго естества образ ми виждь, по разумеваемому созданнаго от него человека, а не по видимому по безсмертному и присно такожде сущему, а не по мертвенному и разрешаемому. 6. Якоже ум сый и превышше премудростию тем содетельствованных созданий Бог раждая нетечно слово, к сих пребыванию, и к силе их испущая, якоже писано есть, пресвятаго Духа, вне есть и внутрь всего: тако и Божественнаго его естества причастник человек, образ сый его по разумеваемому умныя и безтелесныя и безсмертныя души, и ум (с. 918) имея естественне слово раждающ от существа своего, имиже вся сила соблюдается телесе, вне есть и внутрь вещества и видимых сих. И якоже создавый его неразделен есть своих впостасей, слова глаголю и Духа: тако и той по души неразделен есть ума и слова единаго естества и существа, неописаннаго телом. 7. Триипостасно есть Божество во отце и Сыне и святем Дусе покланяемое. Во триех зрится разделениих и созданный от него образ, человек в души, уме и слове, покланяяйся самому от не сущих вся сотворшему Богу: яже убо Богу по естеству соприсносущна же суть и единосущна, сия и образу его по естеству соестественна же суть и единосущна, от нихже еже по образу в нас зрится, и имиже образ есмь Божий, аще и брению и праху смешаюся. 8. Ино есть образ Божий, а ино видимая на образе. Образ бо Божий есть, душа умна, ум и слово, единое и нераздельное естество: видимая же на образе, начальственное есть и царское и самовластное. Сице и слава, ино есть ума, ино же достоинство: и ино же по образу Божию, и ино еже по подобию. И слава убо ума есть: гореносное, приснодвижное к горним, острое, чистое, разумное, премудрое, безсмертное. Достоинство же словесное: царское, начальственное же и самовластное. А еже по образу Божию есть, еже о души и уме и слове тождеипостасное же и единосущное, нераздельное же и неразлучное: души бо есть ум и слово безплотныя и безсмертныя, и Божественныя, и умныя, яже и единосущна суть и соприсносущна, несекома никогдаже от себе, или разлучитися могуща. А еже по подобию есть: праведное, истинное, благоутробное, милосердое и человеколюбивое. В нихже убо сия действуются и хранятся, в тех зрится ясно и еже по образу и по подобию. По естеству убо яственно движимых: по достоинству же, паче иных вышше лежащих. 9. Словесней души в три разделяемей, и во двою зримей: ово убо ея словесно есть, ово же страдательно. И (с. 919) словесное убо ея по образу создавшаго ю суще, неудержимо есть и невидимо, и неопределенно чувствами, яко вне и внутрь суще их. Сим сприобщающися умным и Божественным силам по естеству, к Богу яко к первообразию священным разумом сущих востекает, и Божественнаго его в наслаждении бывает естества: страдательное же ея разделяется чувствами, страстем и отрадам подлежаще. Сим чувствительному питательному же и растительному сприобщающися естеству, воздух приемлет, хлад же и теплоту, и пищи в пребывание, в живот, ращение и здравие. Темже и сим соизменяемо, овогда убо желает безсловесно похоти, от еже по естеству движения предвигшеся, овогда же раздражается, и безсловесною яростию носится: алкати же творит и жаждати, опечалятися, болезновати, и напротив услаждатися. Яко отрадами убо услаждаемо, скорбьми же мучимо: еже и страдательна часть ея праведне нарицается, яко истязаема страстьми. Егда убо мертвенное сие пожерто будет слова животом, лучшему победившу: тогда и живот Иисусов явится в мертвенней плоти нашей{2 Кор. гл. 4, ст. 11.}, животворную мертвость в нас творя безстрастия и нетление безсмертия подая, пришествием Духа. 10. Якоже содетель всего и прежде неже вся от не сущих сотворити, разум, естества, и словеса всех сущих имеяше яко Царь веков и провидец в себе: тако и по образу своему созданнаго в царя твари человека, всех имети сотвори сущих словеса, естества, и разум в себе. Темже и сухое убо и хладное влаги от земли имать по созданию своему: теплое же крове и влажное от воздуха и от огня: влажное же флегмы и хладное от воды, и от садов убо растительное: от животносадовных же, питательное: от безсловесных же животных, страдательное: от ангелов, умное же и словесное: (с. 920) от Бога же дыхание: саму ту невещественную, безтелесную и безсмертную душу во уме и слове зримую, и силою Духа свята в существе и жизни. 11. По подобию есмы Бога, создавшаго ны по образу своему и по подобию, добродетелию и разумом: покры бо небеса добродетель его, и хваления его исполнь земля{Аввак. гл. 3, ст. 3.}. Добродетель же Божия есть, правда, и преподобие, и истина, якоже глаголет давид: силен еси Господи, и истина твоя окрест тебе{Псал. 88, ст. 9.}. И паки: Праведен и преподобен Господь. Правостию и благостию: благ бо и прав Господь, словом премудрости и словом ведения: в том бо суть сия, и премудрость и слово нарицается. Святынею и совершенством, якоже сам глаголет: Будите совершени, якоже отец ваш небесный совершен есть{Матф. гл. 5, ст. 48.}. Будите святи, якоже аз свят есмь. Смирением и кротостию: Научитеся от мене, глаголет, яко кроток есмь и смирен сердцем: и обрящете покой душам вашим{Матф. гл. 11, ст. 29.}. 12. Образ Божий ум наш свойственное в себе имать, егда во своих пребывает и не далече достоинства своего движится, в Бозе пребывати и тому соединятися ищет, от негоже начало имать, имже и движится, к немуже и востекает естественными свойствы, и того подражати желает человеколюбием, кротостию и простотою. Темже и сам слово раждая, яко ина небеса души паки созидает единоплеменных человек, и крепки тыя терпением деятельных совершает добродетелей, и животворит сия Духом уст своих, силу на губительныя страсти подая в ня. И тако видимь есть содетель и той мысленныя твари, и великаго мира, своего подражая влепоту Бога, и слышит ясне свыше: изводяй достойна от недостойных, яко уста моя будет. 13. Иже в тех яже по естеству движениих ума и достоинстве пребываяй слова, чист от вещества соблюдается, и (с. 921) украшается кротостию. смиренномудрием, любовию и милосердием, и осиянии святаго просвещается Духа. На высока же видения взирая, в разуме бывает сокровенных Божиих таинств. И словом премудрости, могущим слышати сия, благолюбиво служит: не себе точию многоумножая талант, но и ближним сего преподая наслаждение. 14. Иже едино паче двоицы превозвысивый, и от сея свободно соделавый сего благородие, невещественно обрете между невещественными духи жительство, дух и сам мыслен быв, аще и посреде видимь есть инех человек сообращаяся телом. 15. Иже единаго достоинству и естеству двоицы покоривый работу, всю тварь Богови покори, во едино разстоящаяся совокупив, и умиротворив всяческая. 16. Дондеже против себе естество сущих в нас сил безчинствует, и во многа иначевства расточается: непричастни есмы и преестественных даров Божиих. Сих же суще непричастни, далече негде, и таинственнаго Священнодейства Небеснаго жертвенника в мысленном ума делании совершаемаго, стоим. Повнегда же многим тщанием Священных подвиг от привещественныя злобы очистимся, и во едино иначевства наша силою духа присоберем: тогда и неизреченных благ Божиих в причастии бываем, и Божественная таинства, таинственнаго Священнодейства ума на пренебесный и мысленный Божий жертвенник достойно слову и Богу возносим: яко зрители и священницы безсмертных таин его. 17. Плоть похотствует на духа, и дух на плоть{Галат. гл. 5, ст. 17.}. Рать некая есть во обоих непримирительна: како едино на другое победительная имети будет, и под свою державу приведет. Сие иначевство в нас глаголется и крамола, и преклонение, и мерило, и обоюдна брань, имже душа разделяется, гделибо преклонение ум даст в вещь и страсть человеческу. (с. 922) 18. Дондеже нестоятельными помыслы разделяемся, и закон плоти в нас держится и блюдется: во многия же части расточаемся, и от Божественныя единицы измещеми есмы, яко не обогатевше сея единством. Внегда же мертвенное сие пожерто будет единотворною силою и преестественным безпопечением, и ум самаго себе будет, премудротворными осиянии и разумении озарен быв: сплетаема в единицу Боговидне душа, едино вместо многих иначевств бывает, и Божественней совокупльшися единице, простотою Богоподражательне соединяется. И се есть еже во древнее души паки устроение, и еже на лучшее наше обновление. 19. Люто есть невежество, и паче лютых, самою вещию тьма сущи осязаема, и души, в нихже ни будет, мрачны сотворяющо, и на многа помысленное разделяющо, и от еже с Богом соединения душу отсецающо. Сего все собираемое, безсловесие есть: безсловесна бо и нечувственна всего соделовает человека. И имже образом невежество в дебелость возлиявшися многу, глубина адова бывает сим покрываемой души, в нейже всяко томление и болезнь, печаль и воздыхание есть: тако и Божественный разум светел некако и безмерен в светолияние сый, световидны души, в нихже чрез чистоту ни будет, Боголепно соделовает, и исполняет сия мира, тишины, радости, премудрости неизреченныя, и совершенныя любве. 20. Пришествие Божественнаго света просто и единственно сущи, к себе собирает причастницы своя души, и к себе обращает, и соединяет я своему единству, и совершает своим совершенством, и к глубинам Божиим возводит зрительное ума их, и таин великих зрительницы и таинницы и тайноводительницы тыя соделовает. Очиститися убо восхощи труды вконец, и узриши глаголемых в тебе явственно любезное Богу действо. 21. Приходящая разумом ко очищенным душам осияния перваго света, не точию тыя благи сотворяют и световидны (с. 923) соделовают: но и возводят естественным видением на мысленная небеса. И ни сице сим яже Божественнаго стоят действа: но даже дотоле тамо совершаются, дондеже с единем премудростию и разумом неизреченных соединятся, едино вместо многих в нем будут 22. Первее убо непримесным и немутным нам подобает быти очистительным чином от привещественныя злобы мысленных. Таже просвещенным и присносиятельным, иным чином просветительным умными очесы, иже таинственною совершается и в Бозе сокровенною премудростию. И тако востещи во священных разумов ведение новая и ветхая словом имущим уши служащее, и преподательным быти сокровенных того таинственных разумений, в нескверныя та яве яко преводящим слухи, и от несовершеннейших сокрывающим, да не святая даются псом, ниже бисер слова помещется во свинственныя души непотребен творящия его. 23. Егда кто горячесть души своея в залогственной вере зрит разширяему, и Божию любовь: тогда Христа носити да весть в себе, еже от земли и видимых действующа возвышение души его, и на небесех жилище уготовляюща ей. Егда же радости исполнятися сердце свое усмотревает, и в желании быти неизреченных Божиих благ со умилением: тогда ведый да будет от Божественна действуема себе духа. Егда же света неизреченна исполняемь ощутит свой ум, и разумений премудрости лучшия: тогда да весть пришествию быти и бывати утешителя в души своей, в явление сокровенных в нем сокровищ царствия небеснаго. И якоже палату Божию и жилище Духа, известно себе да хранит. 24. Хранение сокровенных духа сокровищ, упразднение от человеческих вещей есть: еже воистинну и безмолвие слово нарицает. Сие же рачение любве Божия от чистоты сердца и сладости умиления зельнее возжигающи, разрешает душу от уз чувств, и свободу нравов покаряет лобызати. Силы (с. 924) же тоя преложши, ко еже по естеству воззывает, и древнее тем паки устроение дает, во еже не быти злобы коему поречению на содетеля добрых от еже на горшее образа превращения и движения. 25. Во священное сие и Божественное совершенство, благословное возводит и художное светле безмолвие, обучаемо сиречь и проходимо законне. Аще же не в толице возвышение имать и совершенство мняйся безмолвствовати: убо мысленным еще и совершенным не безмолвствова безмолвием, но ниже безмолвствует от внутренния бури неудержимых страстей, дондеже на сию востечет высоту, но точию тело стенами определяемо или пропастьми и вертепы имети будет, умом безчинным и скитающимся изнуряемо. 26. Души на верх чистоты достигшия, и на высоту востекшия велию премудрости и разума херувимом подобны суть, несредственне некако ведением своим ко источнику приближающеся добрых. И отонуду праваго видения изявление чисте внутрь приемлюще, аще и едины херувимов силы несредственне от Богоначалия самаго осияваются много, якоже рече некто от Божественных зритель, по превысочайшу возпростертию. 27. Якоже первыя горния силы, овы убо от них теплейпии суть и быстрейши о Божественных, и непрестанну о сих приснодвижность имуще: овы же Боговиднейши, разумны и премудрейши. И сия вещь Божественное навыкновение есть, еже тем о сих двизатися присно. Тако и сицевыя души теплейши суть о Божественных, и зело быстрейши, премудры же и разумны, таинственными видении возпростертейши. Имже свойственно есть по силе и Божественну навыкновению, яже к Богу приснодвижность и неуклонно водружение и пребывание. И к сим, преимательное осияний навыкновение, с нимже сущаго причастницы бывают, и препосылают ко инем изобильно словом светолияния сего и благодати. (с. 925) 28. Ум есть Бог, и вина приснодвижности всего. И вси умове в самом том первом уме и стояние имут пребывательно, и движение непрестанно. Сие же страждут, елицы не привещественно некое движение и примесно, но немутно священными имут подвиги, страждут же сие по рачению Божественну приобщающе друг другу и сами себе от Богоначалия испущаемая благодательне осияния, и сокровенную в сих премудрость таин Божиих, и инем благолюбиво преподающе во хваление непрестанно любве Божия. 29. Стоят и движутся окрест в Бозе души, елики помысленное легко от вещества соделаша, и ратующуюся с тобою по всему двоицу, колесницу сим благоуправляему текущу на небеса составиша. И окрест убо непрестанно движутся в Бозе якоже при остне, и движения круга виновнем: стоят же пребывательне и неуклонне яко в крузе, расточитися не могуще от своего в томжде месте содержания к чувству и дольней прелести человеческих вещей. Сей убо есть совершенный конец безмолвия, в сие ведущ безмолвствующих воистинну: якоже движимым стояти, и пребывательне стоящим двизатися о Божественных. И дондеже убо сие не будет, мнимым нашим безмолвием, не возможно есть вне вещества и прелести быти нашему уму. 30. Внегда ко древней доброте слова всяким прилежанием же и тщанием приидем, и свыше даемыя нам премудрости и разума пришествием духа благую часть получим: тогда первый источник и вина всех произведения премудра и добра нами могущим зрети естественне познавается: ничтоже порицательно на себе в нас носящи от пришедшия злобы созданию, превращением на горшая. Внегда ово убо и отторгшися превознесеся, и от древния доброты истекши, отпаде обожения: ово же на сие нашедши, безсловесный того зрак внутрь сотвори. 31. Един и первый степень простирающихся в предспеяния есть разум сущих от деятельнаго прибываяй тем (с. 926) любомудрия. Вторый сокровенных таин Божиих познание от естественнаго видения тайноучимо им. И третий с первым светом совокупление и растворение, в немже всякаго предспеяния любомудрена и видения покой. 32. Вси умове сами же в себе и к себе и к воистинну сущему треми единовидне носими собираются, и ближних просвещающе тайнонаучают Божественным, и совершают яко очищенни дуси небесною премудростию, тех с собою и с единицею единотворяще. 33. Обожение есть в житии, умное и Божественное воистинну священнодейство, в немже священнодействуется слово неизреченныя премудрости, и уготовльшим себе, елико мощно, преподается. Сие благолепно Бог словесному естеству свыше дарова во единство веры. Да ови убо, елицы за чистоту достоинства того разумом Божественных в причастии быша, уподобляются Богу, сообразни образу Сына его бывше, высокими и умными своими о Божественных движенми. И тако положением бози будут инем человеком на земли: ови же очищением чрез Божественное их слово и священное сочетание совершаются к добродетели, и по мере своего предспеяния и очищения в причастии обожения сих бывают, и приобщаются с ними в Бозе соединения: яко да вси во едино соединяеми же и сообемлеми единством любве с единем Богом соединятся непрестанно: и будет Бог посреде богов благих дел виновен, иже естеством, сущих положением, ничтоже порицательно на себе нося от создания. 34. Еже к Богу уподобление, елико нам мощно достигнути, не возможно есть получити тщаливому, аще не первее надлежащаго злых тимения слезами теплыми без_образие отложит, и священнодействия коснется священных Христовых заповедей: инако бо в причащении неизреченных Божиих благ быти сему не возможно. Желаяй бо вкусити Божественныя умне умных сладости же и сласти, всякаго отходит мирскаго по (с. 927) всему чувства, и желанием отложенных святым благ в видении сущих присно поучающуся имать свою душу. 35. Еже Боговидное уподобление неизменное самем себе соблюсти, от крайнейшаго прибывающее очищения многия любве Божия, единаго есть к Богу приснаго горе зрения, и воспротяжения зрительнейшаго ума. Еже прибывати обыче души от пребывательнаго добродетелей безмолвия, от невещественныя и непарительныя и всегдашния молитвы, от обдержительнаго воздержания и частаго писаний чтения. 36. Не еже в мир точию приити сущих в нас сил тщатися подобает: но еже и в желание достигнути умнаго покоя, иже всяко весть о благих желание тишиною упокоевати помыслов, и с небесе сходящею Божественною росою уязвленное исцеляти и прохлаждати сердце, от огня свыше ввергаемаго и возгарающагося от Духа. 37. Не может во глубину уязвленна бывши душа рачением Божиим, по вкусе мысленных сладости его даров, отнюд в себе стояти, или пребывати в томжде, а не в предняя тех яже на небеса восхождений возпростиратися. Елико бо восхождения своя проходит духом, и во глубины приходит Божия: толико воспаляется огнем желания, и еще глубочайших его таин величие испытует, и приближитися блаженному свету поспешает, идеже всяко ума изступление стоит, да своих течений престатие в веселии упокоит сердца. 38. Внегда будет кто в причащении святаго Духа, и наитие сего неким неизреченным в себе познает действом и благоуханием, якоже протещи благоуханию его и на поверхность тела: тогда пребывати таковый в пределех естества прочее не терпит, но добрым изменением десницы вышняго изменився, забывает пищу, сон, презирает телесная, небрежет о покои, и весь день в трудех сый и потех иноческих, труда коего, или естественныя нужды не ощущает, алчбы, или жажды, или сна, или иных естества нужд: излияся бо (с. 928) невидимо любы Божия с радостию неизреченною в сердце его, и всю нощь в просвещении огня претерпевая, умное в телеснем обучении делание делает, и безсмертнаго наслаждается всепиршества, безсмертных мысленнаго рая садов, воньже и павел восхищен быв, слыша неизреченныя глаголы, ихже не леть есть человеку услышати, к чувству видимых пристрастие имущу. 39. Единою тело разжено огнем подвижничества, и водою орошенно слез, не ктому трудами немощнейше бывает от многих преставши потов, яко вышше деятельнаго бывши сиречь тщания: но тишину и молчание мира приемши внутрь уду, исполнь наипаче иныя силы бывает, инаго благомощия, иныя крепости духа. Таковым же содействующим душа обогатевши телом, и вышше телеснаго обучения обретши сего устроение, в мысленныя подвиги естественная пременяет движения, и умное делание быстре делающи, хранит безсмертных садов себе плоды в мысленном раи: отонудуже источник Боголепных разумений, якоже река истекает: в немже и сад разума Божия стоит, принося премудрости плоды, радости, мира, благости, милосердия, долготерпения и любве неизреченныя. Тако же тщаливо делающи, и тако хранящи, исходит от телесе, и в мрак входит Богословия, изступает всего яко ничимже держима видимых, и Богу соединившися, трудов престает и желания. 40. Что от сущих в нас есть вышше, слово глаголет нам тщаливым, видимое ли, или мысленное. Аще убо видимое: то ничтоже убо паче тлимых будет нам предпочитательно или и любимо, ниже лучша паче тела душа. Аще же мысленное: то Дух есть Бог, и иже кланяется ему, Духом и истиною достоит кланятися{Иоан. гл. 4, ст. 24.}. И тако, излишне есть телесное обучение, внегда здравствует умное души делание, тяготеющее (с. 929) долу облегчавающо, и все его соделовающо духовно соединением лучшаго. 41. Три суть чини между творящими предспеяния совершенотворных восхождений: чистителен, просветителен, таинствен, иже есть и совершенотворен. И ов убо есть вводимых, ов же средних, ов же совершенных. Треми бо сими по чину восходя тщаливый, растет иже ко Христу возрастом, и приходит в мужа совершенна, в меру возраста исполнения Христова. 42. Чистительный, к подвигом уже священным вводимых есть. И свойственно убо есть тем, отложение зрака перстнаго человека, избавление всякия привещественныя злобы, и одеяние новаго человека Духом обновляемаго святым. Дело же, ненависть вещества, истаяние плоти, и уклонение от всякия вины поощряющия к страсти, помысленное раскаяния о содеянных: к сему же, еже слезами потопити сланость греха, еже нравы благостию устроити духа, и внутреннее сткляницы, сиречь ум, умилением очистити от всякия скверны, плоти же и духа: и тако вино слова влияти вонь веселящаго сердце человека очищаема, и принести Цареви Духов на вкушение. Конец же, еже разжещися деятельне огнем постничества, и трудами подвигов всякий яд отринути греха: и укрепитися добре, и напоитися водою умиления, и мечь совершитися посецающ страсти и бесы, елико по силе. Иже в сие достигий многими подвиги постничества, угаси силу естественнаго огня: загради уста львов, свирепых страстей: возможе Духом от немощи, бысть крепок, и якоже ин некий авситидитянин одоления терпение постави, победив искушающаго. 43. Просветительный, священными подвиги предуспевших есть в первое безстрастие. И свойственно убо есть тем разум сущих, видение словес твари, и причастие святаго Духа: дело же, очищение ума огнем бывающее Божественным, умное (с. 930) очию сердца откровение, и слова рождение с высокими помышлении разума. Конец же, уясняющее слово премудрости естества сущих: познание Божественных и человеческих вещей, и откровение таин царствия небеснаго. Иже в сие достигий умным ума деланием, на колеснице огненней носимь есть четверицею добродетелей, якоже аще кто ин фесвитянин. И еще жив сый, на воздух мысленный вземлется, и обходит небесная, превыше смирения телесе быв. 44. Таинственный и совершенотворный чин, вся уже претекших есть, и в меру возраста пришедших Христова. И свойственно убо есть тем, еже пресещи воздух, и всего превозникнути, еже в горних чинех быти небесных, и первому свету приближитися, и глубины Божия испытати Духом. Дело же, еже исполнити зрителя таковых ума словесы, яже о промысле, яже о правде и истине, яже о разрешении гаданий и притч и темных словес Божественнаго писания. Конец же, еже тайнонаучити тако совершеннаго сокровенным тайнам Божиим: еже премудрости того неизреченныя исполнити сочетанием святаго Духа, и премудра Богослова посреде церкве великия Божия показати, словом Богословия человеки просвещающа. Иже в сие достигий глубочайшим смиренномудрием и умилением, на третие небо взят бысть Богословия, якоже аще кто ин павел, и глаголы услыша неизреченныя, ихже не леть есть человеку под чувством сущу услышати, и неизреченных благ, ихже око не виде, и ухо не слыша, вкуси, и служитель бысть таин Божиих, уста быв того, служа сия человеком словом, и почивая в сем блаженным покоем, совершен в совершенном Бозе: совокуплься с Богословы превысочайшим силам херувимов же и серафимов, ихже и слово премудрости есть вкупе и разума. 45. На два разделяемо человеческое житие, в три чины имать концы собираемы сего, и ово убо его общительно есть и мирско: ово же необщительно и премирно. И общительное (с. 931) убо, в целомудрие разделяется, и несытство: необщительное же, в любомудрие, в естественно бежество, и в паче естества действо. От сих ово убо, или правде совокупляется по естеству грядущо: или неправде, и в неправду отходит, заблуждшо от еже по естеству движения: ово же, аще убо к намерению тещи будет правилом исправляемо, в безконечно скончавающося естество, паче естества совершившося будет. Аще же по любочестию обучающося намерения погрешит, в неискусен скончавается ум, и яко не совершенно, в лепоту измещется совершеннаго. 46. Свет и живот и мир есть Дух. От Божественнаго убо просвещаемый Духа, тиху мирствуя совершает жизнь. Отсюду же разум тому сущих, и премудрость слова истекает. Сей весть тайны царствия, во глубины входит Божия, и день дни отрыгает словеса жизни от невлаема и просвещенна сердца блага человеком: понеже благ есть Благаго имея, глаголюща в себе новая же и ветхая. 47. Премудрость есть Бог, и словом и премудростию ходящих, разумом небесных Боготворя, соединяет тех себе светом, и положением боги соделовает. И якоже сам от не сущаго премудростию вся сотворив, премудростию сущая в мире наставляет, и управляет и спасение всех приближающихся ему обращением, такожде присно премудростию делает: тако и сподобивыйся горнейшия быти премудрости чистотою причастник, присно яко образ Божий, и той премудростию творит и делает, яже суть Божественныя воли. Собирая же всегда и воспростирая помысленное свое разумом неизреченных ко ангельскому воистинну животу, и единовидну, елико достигнути мощно, жизнь свою делая, соединяет горним силам себе, единственне о Бозе движимым, и теми к первому началу и вине яко благими вождьми возводится. 48. Иже премудростию лучшею себе соединивый горним силам, и сего ради Богови соединивыйся, по подобию сый Божию, (с. 932) со всеми словом и сочетанием любопремудростне беседуя, отсецает хотящих Божественною силою навыкновения, от внешних и разделенных, и к единовидной жизни, якоже себе, яко Божий подражатель и тех собирая духом, возводит премудростию и разумом, и сокровенных осиянием к видению славы единаго и перваго света: и соединив тех, яже о Бозе существом и чином, в единство приводит Божие всесиятельны бывша осиянием Духа. 49. Четверице добродетелей осмерица споследствует естественных же и первейших добродетелей, к единой от сих коейждо от единыя и другия страны двема привозсиявающема: якоже и той коейждо бывати в Троицу. Мудрости убо, разум привозсиявает и премудрости видение, правде разсуждение и благосострадателен совет: мужеству, терпение и сопротивление крепко: целомудрию, чистота и девство. Сея троичныя дванадесятницы, якоже некий зиждитель и тайноводитель Бог, премудростию превышше седит на Престоле ума, слово посылая, в содетельство мира добродетелей, еже и приемлющо от подлежащих начал, вещество от единыя и другия реченных, мысленный благочестия мир содетельствует в души. И якоже убо небо простирает в ней мудрость, всю звездну во всесиятельну жизнь: в нейже якоже два светила велика, Божественный разум и естественное видение сияти и просвещати сию творит, и якоже землю основывает правду в ней, во всепиршество неиждиваемо: и якоже воздух простирает целомудрие, в прохлаждение и росу чистейшия жизни: и якоже море мужество определяет в немощи естества, на разорение твердем и возношением сопротивнаго. Сей убо тако мир слово созидая, силу влагает в ню Дух, в движение убо мысленно и приснодвижно, и в содержание нерасточаемо же и пребывательно, по реченному Божественным давидом словом Господним небеса утвердишася, и Духом уст его вся сила их{Псал. 32, ст. 6.}. (с. 933) 50. С духовными превозрастии тщаливых совозрастати обыче и Господь наш Иисус Христос. И егда убо младенцы суть требующе млека, ссати глаголется млеко вводительных добродетелей обучения телеснаго: егоже полезное, вмале есть возрастающим добродетелию, и помалу отлагающим младенчество. Егда же в юноши взыдут, и твердою пищею питаются видения сущих, яко обученни душевными чувствы: преспевати, глаголется, возрастом и благодатию, и посреде старец седети, и открывати тем глубокая от тьмы. Егда же в мужа совершенна в меру возраста совершатся исполнения Христова: проповедати, глаголется, слово всем покаяния, и учити людей, яже о Царствии Небеснем, и ко еже пострадати спешитися: сей бо есть конец всякаго совершившагося в добродетелех, да вся прошед возрасты Христовы, ко страсти достигнет искушений по Кресту онаго. 51. Дондеже под стихиами обучения есмы, охраняеми касатися брашен, или приближатися осязанию, или взирати на красоты, или песни слышати, или миры обоняти, под повелители есмы и приставники яко еще младенцы, аще и наследницы есмы, и господие всех отчих. Егда же приидет кончина времене того (обучения), и безстрастием исполнится: тогда раждается слово в нас от чистыя мысли, и бывает под законом духа, да под законом ны плотскаго мудрования сущия искупит, и сыноположение нам дарует. Сему же бывшу, тогда вопиет Дух в сердцах наших: авва отче! показуя, и явлено творя нам сыновство, и еже ко отцу и Богу дерзновение, и якоже с сыны и наследники Божиими Христом, с нами пребывает и беседует, недержимыми работою чувств. 52. Предуспевшим в вере якоже петр, и якоже иаков в надежду возшедшим, и якоже иоанн в любви совершенным бывшим, преобразуется, на гору высоку возшед Богословия Господь. И просвещается убо тем, явлением и начертанием чистаго слова яко солнце: разумении же неизреченныя премудрости бывает светел (с. 934) светел яко свет: и зрится слово между сими, посреде стоя закона и пророчества: ова убо законополагая и учя, ова же и открывая от глубоких и сокровенных сокровищ премудрости. Овогда же и предвидя и предглаголя, ихже и яко облак светел осени Дух, и глас таинственнаго Богословия отонуду к ним приходит, учащ их таинству триипостаснаго Божества и тако глаголющ: сей есть возлюбленный мой предел слова совершенства, о немже благоволих: будите мне в совершенны сыны в совершенне Дусе. 53. Душа долу ревнуемая вся пренебрегши, и всяко рачением уязвившися Божиим, изступление некое странно и Божественно подемлет. По еже во увидети ясно естества сущих, и словеса их, и концы человеческих постигнути вещей, внутрь не терпит всего оттоле быти, и обдержащим описоватися: но своих предел изступльши, и узы умучительствовавши чувства, естества всех прешедши, во мрак Богословия с неизреченным молчанием входит, и доброту смотряет сущаго во свете разумений несказанныя премудрости, елико той по благодати отонуду дастся. Боголепно же разумении во видение его воглубляющися, наслаждается безсмертных садов плодами, любве страхом Божественных мыслей, глаголю, разумений, ихже никогдаже сопрятующися к себе может совершенне сказати великолепное же и славное. Но якоже действуема странно от Духа, похвальную убо страсть в неизреченней весть радости и молчании: а еже како действуется, или что есть движущее и зримое, и глаголющее той таинственно неизреченная, не возмогает исповедати. 54. Сеяй себе во правду слезы умиления, обирает в плод жизни радость неизглаголанную: взыскуяй же и терпяй Господа, дондеже приидут жита правды его, сей пожнет многоплоден клас разума Божия, и свет премудрости того просветит, и светильник света присносущна будет, во еже просвещати вся человеки. И не будет завидети себе и (с. 935) ближним, под спудом зависти покрывая данный себе свет премудрости: но в церкви верных отрыгнет словеса блага на пользу многих, и провещает ганания исперва: елика же слыша свыше Божественным оглашаемь Духом, и елика позна во видении сущих упражняяся, и отцы его поведаша ему. 55. Будет всякому тщаливу в день совершенства его в добродетели, искаплют ему горы делания заповедей Божиих сладость веселия, царствующу в сионе в чистом уме, и холми словеса добродетелей источат млеко, пищу тому, почивающу на ложи безстрастия, приносяще, и вси источницы иудины, веры же его глаголю, и разума источат воды, веления сиречь и притчи и гадания Божественных вещей: и источник премудрости неизреченныя от сердца его, яко от дому Господня изыдет, и напоит поток зимний{Иоиля, гл. 3, ст. 18.}, самыя тыя сиречь сушею и зноем страстей изсохшия человеки. И тогда уразумеет истинное сбытие в себе словес Господних, глаголет бо: веруяй в мя, реки от чрева его истекут воды живы{Иоан. гл. 7, ст. 38.}. 56. Возсияет в боящихся мене, глаголет Бог, солнце правды, и исцеление в деяниих их: и из темницы страстей изыдут, и взыграются якоже тельцы от уз греха разрешени: и поперут беззаконных мужей и бесов под ногами своими аки пепел в день паки устроения своего, воньже аз сотворю, глаголет Господь вседержитель{Малах. гл. 4, ст. 2 и 3.}. Внегда всеми вознесутся добродетельми яве, яко и совершени будут премудростию и разумом в причастии духа. 57. Егда на горе равне мира сего церкви Христовой разума новаго свыше возмеши знамение, и возвысиши глас свой, по рекшему, данныя тебе премудрости от Бога: побуждая словом, и учя братию твою отверзая тем разум Божественнаго писания во уразумение дивных даров Божиих, и увещевая тех на делание заповедей его{Исаии гл. 58, ст. 1.}: да не убоишися от завидящих (с. 936) силе словес твоих, и развращающих все Божественно писание, тщих сущих и неключимых и готовых в жилище диаволу. Вчинит бо яже устен твоих Бог в книзе живых, и не будет ти вреда, от таковых, якоже ни петру от симона. Речеши же паче и сам со пророком в день он, воньже сотворяющих видиши таковых на тя соблазны стези: Се Бог мой, Спас мой Господь, и уповая буду на него, и спасуся им и не убоюся: зане слава моя, и хваление мое Господь, и бысть мне Спаситель, и не престану возвещати славная его по всей земли. 58. Аще познал еси, яко стремление действия страстей есть в тебе недеятельно, и умиление от смиренномудрия истекает от очию твоею, разумей, яко прииде царствие Божие в тебе, и исполнен был еси святаго Духа. Аще же и действующа движима же и глаголюща Духа разумееши во утробе твоей, и возбуждающа тя глаголати в церкви велицей спасение и истину Божию, да не возбраниши устнам твоим зависти ради иудеемудренных мужей: но сед, напиши на дщице{Исаии гл. 30, ст. 8.}, якоже глаголет исаиа, яже Дух тебе глаголет: яко будут сия во дни времен, и даже до века, по тако рекшему: завистию бо чревоболящии людие непокориви суть, сынове лживии, имже несть веры: иже не хотят слышати, яко еще евангелие действует, и други Божия и пророки сотворяет: но глаголют пророком и учителем церкве, не поведайте нам премудрости Божия, и видения естественнаго видения видящим, не глаголите нам: но глаголите и возвещайте нам иное прельщение, еже мир любит, и отимите от нас суд израилев. Да не убо вонмеши зависти и словесем их: услышат бо оглашаемая тебе к пользе многих свыше, глуси в конец, и иже во тьме жития сего, и иже во мгле греха очи слепых, узрят словес твоих свет{Исаии гл. 35, ст. 5.}: и возрадуются о них нищии духом, и отчаяннии человецы исполнятся веселия, и уразумеют прельщаемии (с. 937) духом разум во словесех твоих, и ропщущии на тя научатся послушати словес духа, и языки коснящии, глаголати мир, научатся. 59. Блажен, иже имать в сионе в церкви Божией семя учительства словес твоих{Глава 31, ст. 9.}, глаголет исаиа, и сыны своя с собою и духом в вышнем первородных иерусалиме. Будет бо человек он сокрывая во время{Тамже гл. 32, ст. 2.}, глаголет, словеса своя, и скрыется, аки от воды носимыя: и напоследок явится в сионе, в церкви верных, яко река текущая славна в земли жаждущей струями премудрости своея. И к сему не будут от завидящих, низлагаемии уповающе на ня, но уши своя вдадят на слышание словес человека онаго, и сердце душею изнемогших вонмет послушати. И к сему не рекут слуги зависти, молчи, понеже благочестив сый, смысленне совеща, а не якоже юродивии мира мудрецы, юродивая глагола, ниже сердце его уразуме суетная, еже совершати беззаконная, и глаголати на Бога прелесть, яко да расточит души алчныя, и души жаждущия тщи сотворит. Сего ради словеса его пребудут на пользу многих, аще и неугодно есть завидящим. 60. В высоце пещере камене крепкаго{Исаии гл. 33, ст. 16 и далее.} вселяющемуся хлеб в насыщение дастся разума, и чаша премудрости в пиянство, и тако будет верна вода его. Царя со славою узрит, и очи его землю издалеча узрят, душа его поучится премудрости, и возвестит всем место вечное, егоже пределов вне ничтоже есть. 61. Аще убо наказание Господне отверзает уши{Исаии гл. 50, ст. 5.} всякаго боящагося его, и прилагает ухо ему, еже слышати, и язык дает научения, еже разумети, егда подобает рещи слово: кто есть ин отвращаяй разумных и мудрых мира сего вспять, и премудрость их обуеваяй, поставляяй же точию глаголы рабов своих, разве точию сам творяй новая и преславная во славу (с. 938) свою? творяй в пустом и сухом сердце путь смирения и кротости, и в невлажном и безводном уме реки премудрости неизреченныя: во еже напоити род его избранный, люди яже снабде, добродетели его поведати{Исаии гл. 43, ст. 19 и след.}. Пред любящими бо и боящимися его ходит, и горы страстей уравняет, и врата медяная неведения сокрушает, и отверзает разума своего двери, и открывает тем сокровища его темна, сокровенна же и невидима: да уведят, яко той есть Господь Бог прозываяй имя их израиль{Исаии гл. 45, ст. 2 и 3.}. 62. Кто есть смущаяй море страстей, и утоляяй волны его, избавляяй любящия его от беды греха, и бурю помыслов в тишину творяй? Господь саваоф, словеса своя положивый во уста их, и покрываяй тех под сению руку своею, еюже состави небо, и землю основа. Той боящимся его дает язык научения, и ухо разума, во еже слышати свыше глас его, и возвещати в дому иаковли в церкви верных повеления его. А имже несть очесе, во еже видети лучи солнца правды, и уха, во еже слышати славная Божия: тьма есть участие неведения, и надежда со словесы суетна. От сих никтоже глаголет праведная, ниже есть суд в них истины: уповают бо на суетная, и глаголют тщетная: чревоносят зависть, и раждают клевету. Зане не обрезана суть ушеса их, и не могут слышати: и сего ради бысть им слово разума Божия в поношение, и не восхотят его услышати{Иерем. гл. 6, ст. 10.}. 63. Премудрость кая есть во чревоболящих завистию на ближняго? како бо рекут завистницы, глаголет иеремиа, яко премудри есмы мы, и закон Господень с нами есть, егда истаявают рвением на приемшия благодать Духа премудростию и разумом Божиим, но всуе бысть разум ложен книгочиям и премудрым мира, истиннаго погрешившим разума. Сего ради постыдешася мудрецы, испадше от премудрости утешителевы, сию в сынех (с. 939) ловец умножаему видяще, и убояшася силы словес их, и яти быша мрежами разумений своих. Понеже истинную премудрость и разум Господень отвергоша. 64. Почто рвением истаяша завистницы на обогатевших благодатию Духа, на приемших язык огнен яко трость книжника скорописца, источник оставльше премудрости Божия? аще бо быша путем Божиим ходили, пожили убо быша в мире безстрастия во вечное время: уразумели быша, где есть мудрость, где есть крепость, где есть разум и познание сущих, где есть долгожитие и живот, где есть свет очию, и премудрость с миром. Уразумели быша, кто обретает место ея, и кто в сокровища ея входит. И како заповедает Бог чрез пророка таинником слова, глаголя: пророк, иже имать сновидение откровения, да вещает сновидения видения своего. И иже имать слово мое к нему, да глаголет слово мое во истине. И паки: напиши себе вся словеса, яже соглаголах к тебе в книгу: и никогдаже завистию на таковых истаявали быша. 65. Аще пременит ефиоплянин кожу свою, и рысь пестроты своя{Иерем. гл. 13, ст. 23.}, и завистницы возмогут благо рещи, и советовати поучившеся злым: запинанием бо запинают ближних своих, понеже льстивно ходят, и ругаются другом своим, истины не глаголюще: занеже научися язык их глаголати суетна и ложна. Разумей убо иже разума ради Божия и слова от них завидимый же и ругаемый, и прилежно помолися, якоже иеремиа, и рцы: Господи воспомяни мя, и посети мя, и защити мя от гонящих мя завистных мужей, не в долготерпение твое положи мя, искусити мя хотя на мнозе: веждь, яко приях наругание от отвергающих разум твой: Скончай их во рвении их, и будет слово мне разума твоего в радость и в веселие сердца моего{Иерем. гл. 15, ст. 15 и 16.}: ниже бо седох в (с. 940) сонме с ругающимися разуму твоему, но бояхся от лица руки твоея: и седя наедине, яко горести от зависти их исполнихся. И услышиши, добре вем: аще обратиши заблуждша от пути его, возставлю тя между други моими, пред лицем моим станеши: и аще изведеши честное от недостойнаго, яко уста моя будеши: и избавлю тя от руки завистных губителей, глаголет Господь Бог Израилев{Иерем. гл. 15, ст. 19.}. 66. Конец слова, все завистнии мудрецы да слышат: очистишася назореи Божии трудами паче снега, просветишася житием паче млека, паче камене сапфира вид премудрости их{Плачь иерем. гл. 4, ст. 7.}, и паче бисера чиста начертание словес их. Ядущии же сладостное мирскаго разума, погибоша во исходех духа. Питаемии на багрянице премудростию еллинскою, в гной неразумия одеяшася. И даны быша на мя узы, и связашася ими: связася бо язык их в гортани их, и оглохнуша: понеже истинную премудрость и разум Божественнаго отвергоша Духа, трудами сей прияти не восхотевше. 67. Бог смиряяй древо высокое, и возносяй древо смиренное, и изсушаяй древо зеленое, и проращаяй древо сухое{Иезек. гл. 17, ст. 24.}: той есть даяй уста отверста посреде сонма многа рабом своим, и глагол благовествующим силою многою. Яко премудрость разум и крепость того есть, и той изменяет якоже времена и лета, тако и души ищущия и желающия его. Поставляет над страстьми цари, и преставляет от живота в живот, дая премудрость премудрым духом, и мудрость ведущим разум. Той открывает глубоки и сокровенны испытующим глубины Божия, и ведети дает тем, яже во тьме гаданий: яко свет премудрости и разума с ним есть, и емуже хощет, дает его. 68. Всякому по терпению делающему заповеди{Рим. гл. 2, ст. 7.} по внешнему и внутреннему человеку, и к единой взирающему славе (с. 941) Божией, честь дается разума небеснаго, мир души и нетление, яко не слышателю, но творцу закона благодати. Егоже и разум свидетельствован сущ от дел не безчествует Бог: но спрославляет со словесы разума, премудростию его просиявших в церкви верных: понеже на лица зрения несть у него: а иже по рвению подвизающемуся, и противляющемуся убо словесем водимым Духом, повинующемуся же своему разуму, и прельстительным словесем облагаемых образом единем благочестия, и водимых славолюбивым и сластолюбивым духом: скорбь и теснота дается, зависть и ярость и гнев. Ныне убо в возмездие прелести его, наконец же в порицание, между собою осуждающим или отвещающим его помыслом, в день, воньже судити имать Бог тайная человеком, и воздаст комуждо по делом его{Рим. гл. 2, ст. 6.}. 69. Якоже несть иудей иже яве, по рекшему, ни еже яве во плоти обрезание: но еже в тайне иудей, и обрезание сердца духом, а не писменем: тако ниже совершен есть муж разумом и премудростию, иже явленным точию и глаголемым словом есть силен{Рим. гл. 2, ст. 28 и 29.}. Ниже тщалив совершенне, иже в телеснем и явленнем есть обучении трудов: но иже в тайнем и умнем делании есть тщалив, и иже от чиста и блага сердца Духом Богу глаголяй, а не писмены есть премудр в разуме и совершен: емуже и похвала не от человек, но от Бога. Яко не ведому убо, или и завидиму человеки, единому же Богу, и движимым темже Духом, любиму же и знаему. 70. Аще от дел закона не оправдится всяка плоть пред Богом{Рим. гл. 3, ст. 20.}, по рекшему: кто от подвиг и трудов обучения точию совершен будет пред Богом? деянием бо в навыкновение добродетели приходим, и престати творим действу страстей: а не убо и совершени бываем единем тем во исполнении (с. 942) Христове. Что убо есть возводящее ны в совершенство? Взалогственная к Богу вера, яже есть уповаемых извещение{Евр. гл. 11, ст. 1.}, еюже авель множайшую жертву паче каина принесе Богу, и свидетельствован бысть быти праведник. И авраам зовом послуша изыти, и приити на землю обетования. Сия возводит воистинну тщащихся во упования велика высоких Божиих даров, и отонуду в разум сущих, и дает им сокровища неистощима в сердце духовная во еже износити отонуду новая и ветхая таинства Божия и даяти требующим. Сию убо благополучивый взыде и совершися любовию в разум Божий, и вниде в покой его почив и сам от всех дел своих, якоже и от своих Бог.{Евр. гл. 4, ст. 10.} 71. Аще противльшимся клялся Бог древле не внити в покой его, темже ниже возмогоша за неверствие внити: како убо нецыи единем обучением телесным без веры возмогут внити в безстрастия покой, и разума совершенство, внегда многих видим не возмогших тако внити, и внутрь почити от всех трудов своих? Смотрети убо комуждо подобает, да не когда есть в нем сердце лукаво исполнено неверия, и сего ради лишается, во мнозех трудех сый, покоя и совершенства его: егоже ради и присно делы труждается деятельныя [добродетели] и хлеб болезни яст, аще и оставлено есть и еще субботство ему, потщатися внити верою в безстрастия покой, и в совершенство разума: да не в ветхую притчу противления впадет, и таяжде со древле противльшимися постраждет. 72. Чувствени суще, словесни же и мыслени, десятину некую и мы от себе должни есмы приносити Богу. И якоже убо чувственни, добре чуствовати чувственныя вещи, и добротою таковых востекати, и возводити сих непогрешный разум к содетелю. А якоже словесни, благо глаголати о Божественных (с. 943) и человеческих вещех. А якоже мыслени: непогрешно разумети о Бозе, о жизни вечней, о небеснем царстве, и о сокровенных в нем таинствах Духа. Да и еже чувствовати, и еже глаголати, и еже разумети здраво и непорочно, по Бозе истяжется, яже есть истинна воистинну и Божественна мера, и священно Богови приношение. 73. Десятина воистинну есть к Богу, душевная пасха: сиречь пришествие всякаго встравственна навыкновения, и всякаго безсловеснаго чувства. В нейже жрется убо слово, видением сущих: ястся же тожде в хлебе разума, и пиется честная его кровь в чаши неизреченныя премудрости. Сию убо ядшии и пасховствовавый пасху, пожре себе агнца, вземлющаго грех мира. И ктому не умрет, но, по гласу Господню, жив будет во век. 74. Воставый от мертвых дел, со Христом воскресе. Аще же со Христом воскресе разумом, Христос же ктому не умирает, ниже тем смерть неразумия обладати имать{Римл. гл. 6, ст. 4.}. Еже бо умре древле грехом, предвигнувся от еже по естеству движения, умре единою: а еже ныне живет, живет Богови свободою святаго Духа, воздвигшаго его от мертвых дел греха, якоже не ктому живет той плоти и мирови, умертвився удесем тела своего, и вещем жития сего: но живет в нем Христос, яко под благодатию бывшем Духа свята, и не сущем под законом плоти: оружия правды уды своя яве яко приносящем Богу и отцу. 75. Иже от работы страстей свободивый уды своя, и работе правды представивый я, ко освящению Духа свята приближися, вышше закона плоти быв: и ктому грех не имать обладати им, в свободе и законе пребывающим Духа. Не бо якоже кончины работы страстей, тако и кончины работы правды: зане оны убо в мысленну погибель обыкоша окончаватися (с. 944) души: сия же в жизнь вечну скончаваются сокровенную во Христе Иисусе Господе нашем{Рим. гл. 6, ст. 7 и 13.}. 76. Закон плоти, во елико время живет человек плотски, обладает над ним: аще же умрет и умертвится мирови, разрешается от закона ея. инако же умертвитися мирови, несть возможно, аще не удесем умертвимся тела. Умерщвляемся же сим, егда причастницы святаго Духа будем. Духа же святаго тогда быти познаваемся причастницы, егда плоды достойны духа приносим Богови: любовь к Богу от всея души, и к ближнему от завещания, радость сердца от чистыя совести, мир души от безстрастия и смирения. Милосердие помыслов ума, долготерпение в скорбех и искушениих, благость во украшении нравов, веру извещенну к Богу, и несумнящуся о чесом, кротость от смиренномудрия и умиления, и обдержительно воздержание чувств. Егда тако плодопринесем Богови, вне закона есмы плоти. И не ктому на ны будет закон мучащ ны за плоды, ихже еще живуще плоти, принесохом смерти: упразднихомбося от закона ея, яко от мертвых дел воскреснувше со Христом свободою духа. 77. Начаток духа паки бытием бани имущии и соблюдшии той неугасимь, тии тяготою плоти отягчаеми, сами в себе воздыхают, всыновления исполнения утешителева чающе, да избавление своему их телу от работы истления увидят{Рим. гл. 8, ст. 23.}. Способствует бо тем в естественных их немощех дух, и ходатайствует о них воздыхании неизглаголанными: зане по Бозе есть мудрование их, и упование их откровение чает увидети в мертвенней своей их плоти сынов Божиих: еже есть животворная Иисусова мертвость. Да сынове Божии яко Духом святым водими будут и тии, и свободятся от работы плоти, и достигнут в свободу славы чад Божиих: имже яко любящим Бога, вся поспешествуют во благое. (с. 945) 78. Духовне постизаемому Божественному писанию, и духовным открываемым яже в нем сокровищам Духом святым: не может душевен человек откровение сих прияти множае последования своих помысл{1 Кор. гл. 2, ст. 13 и 14.}, не приемля ино что разумети, или услышати от иного глаголемо. Ниже бо имать Духа Божия в себе испытующаго глубины Божия, и ведущаго Божия: но духа мира, (сего) вещественнаго рвения и зависти полнаго, при же и распри исполненнаго: егоже ради и юродство ему есть, еже разум испытовати, и ум изследовати письмене. Разумети же не могий, яко духовне востязуются вся яже Божественнаго писания: противу Божественным и человеческим вещем, ругается сразсуждающим сия духовне, и не духовны, ниже Божественным Духом водимы, но возводительны таковых нарицая. Елико ему мощно развращая и низвращая, якоже димас он словеса их и Божественная разумения. Духовный же не тако: но востязует убо вся, Божественным действуемь Духом, а сам той ни от единаго востязатися может: понеже ум есть в нем Христов, егоже никтоже изяснити возможет. 79. Огнем открывающуся последнему дню, и огнем тогда искушаему когождо деянию{1 Кор. гл. 3, ст. 13.}, глаголет павел яве, яко егоже дело нетленнаго существа есть, еже себе ко зданию внутрь отложи: пребудет посреде огня нетленно, и не точию не сгорит, но и просветится, и малаго негли очищаемо всеконечне тимения. А егоже дело тлеемаго вещества есть, еже себе во время связа: возжегшося сгорит, и тща того посреде огня оставит. Дело же нетленно и пребывающо есть: слезы покаяния, милостыня, милосердие, молитва, смирение, вера, надежда, любы, и чтолибо ино разумом благочестия содевается: яже и живущу человеку вкупе зиждутся во храм Божий, и умирающу соотходят, и спребывают нетленна во веки. Огнем (с. 946) же онем истлеваемое дело, явственно всем есть: сластолюбие, славолюбие, сребролюбие, ненависть, зависть, татьба, пиянство, досаждение, осуждение, и коелибо зло телом по похоти или ярости действуется. Сия и живущу человеку срастлеваются, возжизающуся огнем похоти, и отторгающуся тела сооходят, не спребывают же: но погубльши делателя своего, посреде огня оставляют во веки веков безсмертно мучима. 80. Познание Бога, еже познану быти от Бога, знаменает создавшемуся на сем (познании) смиренномудрием и молитвою, и разумом неложным обогатети от Бога вышеестественных его таин{1 Кор. гл. 13, ст. 12.}. Аще же напыщение видится в нем, не создася сими на том, но духом мира сего вещественным водится: сего ради и ведети что мнится таковый, ничтоже ведый от Божественных вещей, якоже ведети подобает. Бога же любяй, и ничтоже вменяяй предпочитательнейше паче любве его, и ближняго он уведе и глубины Божия, и тайны царствия его, якоже подобает ведети Божественным движимому Духом, и познан бысть от Бога делатель истинен рая церкве его, иже делает любовию волю Божию: обращая сиречь души, и достойных изводя от недостойных словом данным ему Духом святым, и хранит дело его смиренномудрием и умилением некрадомо. 81. Вси во Христа крестихомся водою и Духом святым, и вси тожде брашно духовное ямы, и вси тожде пиво духовное пием, сия же суть Христос{1 Кор. гл. 10, ст. 1.}. Но не во множайших нас благоволит Бог. Мнози бо от верных и тщаливых многими труды иночества и обучения телеснаго своя удручиша и утончиша телеса, но за еже не имети тем умиления от сокрушенны и благолюбивы мысли, и милосердия от любве ко ближним и к себе: тщи исполнения святаго Духа оставлени быша, и далече от разума Божия быша, ложесна мысли неплодна имуще, и слово безсольно и непросвещенно. (с. 947) 82. Не еже взыти на синайску деянием гору, есть искомое назореем от слова{2 Моис. гл. 19.}. Ни еже очиститися прежде возшествия, и ризы испрати, и не снитися с женою: но и еже узрети, не задняя Божия{2 Моис. гл. 33, ст. 23.}, но самаго Бога во славе его, благоволяща о них, и скрижали сим дающа разума, и посылающа их на созидание людей своих. 83. Не вся слуги своя и ученики слово в сокровенных и больших таин своих откровению с собою приводит: но некия, и еликим приложися ухо, и отверзеся око видения, и язык тощь уяснися. При сих еще приемь и отлучив от прочиих. И тем такожде учеником сущим, на фаворскую видения восходит гору, и преобразуется пред ними. Не ктому тайноуча их тем яже царствия Небеснаго: но показуя тем Божества славу же и светлость. И образу убо жития и слова их сияти от себе дает, якоже солнцу посреде церкве верных: разумения же их претворяет в белость и чистоту света пресветла. И ум свой в них влагает, и вносити оставляет усты новая же и ветхая в созидание церкве его. 84. Мнози нивы своя с прилежанием многим возделаша, и семя чисто в ня повергоша, терния предпосекше, и волчцы огнем покаяния пожегше: но за еже не одождити на ня Божественному дождю Духа свята от умиления, ничтоже отонуду пожаша, сушею бо изсхоша, и клас многоплодный не принесоша себе разума Божия. Темже аще и не гладом слова Божия, но убози суще разума Божия, и тщи руками издхоша: малеми некими в пропитание от пира напутьствовавше себе. 85. Всяк износяй словеса пользы усты к созиданию ближняго, от сокровищ сердца благих износит я, благ сый по гласу Господню. Но никтоже может в Богословие двигнутися, и рещи яже о Бозе, точию Духом святым. И никтоже (с. 948) Духом Божиим глаголя, глаголет противная вере яже во Христа: но елика созидают, елика к Богу возводят и Царствию его, и во древнее благородство паки устрояют, и совокупляют с Богом от спасающихся некия. Аще же и явление Духа комуждо дается на пользу: убо словом обогатевый премудрости Божия, и слово разума благополучивый, Божественным Духом действуемь есть, и дом есть неистощаваемых сокровищ Божиих. 86. Непричастен быти не оставляется благодати всяк во Христа крестивыйся, и веровавый: аще негде изданна себе во всяко действо сопротивнаго предаде духа, и веру делы оскверни, или со унынием и нерадением живет. Зане соблюдшему начаток святаго Духа неугасимь егоже крещения прият, или угашен возжегшему делы правды: не ктому мощно есть и исполнения того свыше не прияти. Или бо добре подвизаяся, слова премудрости Божия исполнением сподобляется Духа во учительство церкве: или слова разума таин Божиих, о томже дусе{1 Кор. гл. 12, ст. 8.}, во еже ведети тайны Царствия Небеснаго: или завещательныя веры темже духом, во еже веровати обетованиям Божиим, по аврааму: или дарования исцелений, о томже Дусе, во еже исцеляти недуги: или действия сил, во еже бесы изгоняти, и знамения творити: или пророчества, во еже прозирати и предглаголати будущая: или разсуждения духовом, во еже разсуждати, кто духом Божиим глаголет, и кто ни: или сказания различных языков, или заступление насилуемых, или правления стад Божиих и людей: или любве яже ко всем, и дарований ея, долготерпения, благости, и прочиих вкупе. Аще же от всех сих непричастен обрящется кто, не имам како реку таковаго верна, или от числа облеченных во Христа Божественным крещением. 87. Имеяй любовь, не весть рвения ради зависти, не превозносится яко превознесен и продерзок, не гордится на (с. 949) кого, не безчинствует, неподобная противу ближнему творя, не ищет своих си полезных точию{1 Кор. гл. 13, ст. 4 и 5.}, но и яже ближняго, не раздражается скоро на опечаляющия, не мыслит зла, аще постраждет когда что зло, не радуется о неправде другов, радуется же о истине правды их, вся любит находящая нань печальная, всему от простоты, и незлобия веру емлет, вся обетованная нам от Бога уповает восприяти, вся терпит яже искушений, не воздая зла за зло. И николиже от любве ближняго отпадает делатель любве. 88. О сподобльшихся яже свыше благодати святаго Духа различными дарованьми, ови убо суть еще младенцы и несовершенни в Божественных дарованиих: ови же, мужи и совершенни во исполнении сих{1 Кор. гл. 13, ст. 11.}. И ови убо к деланию Божественных простирающеся заповедей, и возрастают в сих, и исполняющеся больших даров Духа, упраздняют задняя младенчества дарования: ови же, вконец достигше любве Божия и разума, престают от прочиих яже от части дарований: аще пророчествия суть, якоже слово глаголет: аще разсуждения духовом, аще заступления, аще правления, и прочая. Вшедый бо в чертог любве, не ктому от части разумеет Бога любовь, но лицем к лицу беседуя с ним, познавает его, якоже и той от него познан бысть. 89. Иже от ревности духовных дарований любовь погнавый и постигий, не терпит единому себе глаголати молитвою и чтением к созиданию{1 Кор. гл. 14, ст. 4.}. Глаголяй бо языком точию Богу молитвою и пением, себе зиждет, якоже глаголет павел. Но и пророчествовати потому тщится к созиданию церкве Божия: сиречь учити ближних деланию заповедей Божиих, и како подобает тщатися, во еже благоугодити Богу. Чим бо использовати некия возмогл предстоятель, себе и Богу единому глаголяй молитвою и пением присно аще не будет глаголати и сущим (с. 950) под собою, или во откровении Духа свята, или в разуме таин Божиих, или в прозрительном даровании пророчествия, или в научении слова премудрости Божия: кто бо от послушников уготовится на брань противу страстей и бесов, аще не благознаменательно учительства слово даст написанне, или и живым гласом. Воистинну аще не к созиданию стада своего ищет пастырь, да избыточествует словом учительства и разумом духа: не ктому ревнитель есть Божиих дарований. От еже бо точию молитися и пети языком много: Духом, сиречь душею моляся себе созидает, а ум его без плода есть: не пророчествуя учительства словом, и не созидая церковь Божию. Аще же павел иже паче всех человек наипаче молитвою совокупляяся бе Богови, пять словес плодовитым умом своим паче восхоте рещи в церкви, да и ины пользует, нежели тьмы словес пения языком: убо заблудиша от любве над инеми начальствующии, и пением единем со чтением предавшии пастырское достоинство. 90. Иже еже быти давый нам от подлежаща вещества и умна существа, и во едино противная естеством сама с собою преславно сочетавый и составивый: и благо быти даде словом премудрости своея, и словом разума. Да ово убо, увемы разумом духа, дарованная нам сокровенная у него сокровища Царствия Небеснаго: ово же и скажем ближним премудростию слова, благости его богатство, и благая вечныя жизни, яже уготова в наслаждение любящим его. 91. Иже вышше прещений и обетований триех бывый законов, в неподлежащую закону жизнь вниде: закон быв церкве, а не начальствуемь от закона. Аще же свободна есть неподлежащая закону жизнь, убо всякия естественныя нужды и превращения превышше есть, и вшедый в ню свободен бысть: яко вне плоти и огнь быв причастием духа, по всему и сам с превышшим всякаго естества соединися Христом, упразднившуся в нем тому еже от части. (с. 951) 92. Иже перваго ума разум приемый, иже есть всех начало и конец, и безпределен по себе, и иных всех есть внутрь и вне: весть и един уединятися, и посреде единых уединятися. Яко ни еже едину быти совершенства тщету терпети: ни еже со мноземи уединения. Но быти томужде везде и во всех едину: яко началу убо ко еже уединятися инем сущу движения: концу же предлежащу добродетели совершеннейшу. 93. Неслиянное соединение и совокупление души и тела согласующее в себе, едино дело совершает, или вещества или естества. Несогласующо же, желание победы воздвижет междуусобно, но слово пришедшо и область приемшо, решит убо абие рвение: исходатайствовавшо же согласие, все дела естеству и духови раздает. 94. Трием сущим в нас господственнейшим, ово убо от них начальствует, не начальствуемо же есть, ово же начальствует, и начальствуемо же есть: ово же не начальствует, начальствуемо же есть. Егда убо начальствующее под иным будет от начальствуемых начальством: работно еже естеством свободное сущим естеством рабом зрится, и своего изступает начальства же и естества, и крамола в сих велика есть. Крамоле же таковой в сих сущей, не у вся покорена видим слову. Внегда же начальствующее над инеми обладати будет, и под своим начальством и владычеством водити будет сия: тогда во едино стекшася разстоящаяся и единогласна бывша, мир имут в тех, яже ко Богу, и всем покорившимся слову, предается царство от него Богу и отцу. 95. Четырем началом первейших добродетелей пятерица чувств повинувшися, и сохранши та благопокорение от четырех стихий созданное естество тела, несмущенно двизатися окрест кола жития сотворяет. Тако же движиму тому, силы к себе не крамольствуют: но страдательной части желания и ярости со словесною совокупльшейся, восприемь естественную (с. 952) державу ум, колесницу убо себе добродетели творит, сиречь начала, престол же работную пятерицу. И мучительне обладающую покорив плоть, четвероконен на небеса восхищаемь вземлется. И Царю представ веков, венчается победы венцем, и в нем упокояет все течение свое. 96. Совершенным бывающим во время видения, и на столпех утверждающимся Духа, чаша растворяется, и хлеб от царскаго предлагается всепиршества: престол во упокоение, и в богатство сребро: и сокровище бисерей и каменей драгих при дверех обретается, и богатство тем неисчетно в руки дается. Сия прозрительны мужи деяние совершивше, скорейшим сущим на дела пред царем, а не пред мужи леностными предстати сотворяет. 97. Царствие небесное зде ли уже всем дается тщаливым, или по разрешении от тела? аще убо зде, то победа есть непоборима, радость неизглаголанна, и восход наш к раю свободен: стоит бо сый на Божественных несредственне востоцех. Аще ли же по смерти и разрешении: взыскати подобает, без страха ли исход он бывает, и что есть царство Небесное и царство Божие, и рай, научимся. И чим от единаго разнствует другое, и кое время сих коегождо, и во обою ли бываем, и како, и когда, и по колице времени. Иже бо внутрь перваго достигий, еще жив сый и плоть нося, другим несть погрешил. 98. Вышний мир несовершен еще сый, ждет исполнения, во еже прияти свое устроение первородными Израилевыми зрящими Бога: от востекающих бо в разум Божий исполняемь совершается, и совершен быв, дольный мир верных и неверных, определяя кончины, един в себе творит собор, определяя комуждо свой степень, и разделяя едино от других несобираемая с собою. И яже убо от него инех начала и концы, ведет к себе, и яко предел сый безпределен определяет сия: сам же от иного начала ниже водится, но ниже определяется (с. 953) яко носимь: свойственно бо приснодвижное имать. Яко ниже сопрятатися сему в себе, ниже паче своих предел простиратися: но быти прочиих субботству и покою всякаго начала и движения. 99. Девятица вышних сил, яко песнопевица и песней начальница сущи, тройчески творит ликостоящии чины, и тройчески Троице предстоящи, со страхом служащи привозносит песнь. От сих, овы убо под началом и всех виною простираются, от негоже начальствуемы суть, елицы ближни суть и над песими начальствующе: Престоли, херувими, серафими, сия именем, имже свойственно есть, огньственная премудрость, и разум небесных, и конец, Боголепная песнь: гел, по еврейскому гласу. Овы же посреде сих и припоследствующих чина окрест Бога стоят: власти, Господьства и силы, имже свойственно есть великих вещей управления, чудес действа, и знамений чудодействия, и конец, трисвятая песнь: свят, свят, свят! Овы же к нам достизающе, превышше убо от нас, низши же суще горних, окрест Бога стоят: начала, архангели, ангели, имже свойственно есть служительное в службах, и конец, Священная песнь: аллилуиа! Сим словесное человеков естество всякою добродетелию совершаемо, и всяким разумом и премудростию возвышаемо Духа и Божественнаго огня, усвояется Божественными даровании, яко свойственное чистотою приемлющо всех. Зане овым убо, службою и служением заповедей Божиих: овым же милосердием и предстательством единоплеменных, еще же великих и Божественных вещей строением и действы Духа: овым же огньственною премудростию слова и разумом Божественных и человеческих вещей сприобщается: тако совершаемо и дары воздающо естественныя десятице Богу сими совокупляется, яко начаток десятины той принесши от себе. 100. Бог единица и Троица от единицы начинаемь в себе аки десятица окружне оканчивается. Сей всех начала и концы внутрь имать: есть же всех вне, яко превышше сый всех. (с. 954) Сего внутрь бывый, внутрь словеса и разум сущих прият: и вне всех стоя, внутрь всех водворяется, начала ведый и концы сих, яко со отцем, словом совокупление умно приемый, и совершен быв Духом, самей всесовершенней и нераздельней Троице и единосущней, во отце и Сыне и святем Дусе покланяемей, и во едином славимей естестве и царстве и силе Божества да будет держава во веки, аминь.