<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 755) ДОБРОТОЛЮБИЕ, ИЛИ СЛОВЕСА И ГЛАВИЗНЫ СВЯЩЕННАГО ТРЕЗВЕНИЯ. Часть четвертая. (с. 755) (с. 757) О иже во святых отце нашем иоанне карпафийском, кто оный бе, в кое процветаше время, и где течение подвижничества совершаше, и прочая, яже о нем, неявленна суть. Сие же точию свидетельствует фотий, (в отделении 271, на странице 266). Он же (сиречь диадох) следует много и иоанну карпафийскому, иже и дает надписание свое труду его, писанному утешительным словом пришедшим иноком, иже от индии, еже сей в сотнице главизн глагол свой скончавает, в нихже много отечески чтущих увещавает благодушествовати в скорбех, и терпение имети в находящих искушениях. (с. 758) Преподобнаго отца нашего ИОАННА, епископа карпафийскаго, ко иноком иже во индии, писавшим ему. Утешительныя главы 100. Сущим на земли царем весенны цветы приносяще нецыи просители, не токмо отвержени не быша множицею, но и некия восприимаху дары. И аз убо от вас повелен быв, едину сотницу отнекуду заимствовав, и принося словес добрых вам, жительство на небесех имущим, благоприятен же да буду, и молитв дар от вас да восприиму. 1. Елико присный есть Царь всех, ни начала, ни конца царствию своему имея, толико о немже и о добродетелех трудитися произволяющим приобретншу быти случися тщанию: чести бо настоящаго жития, аще и зело суть светлый, с настоящим житием разоряются всяко: разделяемыя же от Бога достойным аки с нетлением даемы, отнюд{присно.} пребывают. 2. Блаженный давид песнь от всея делая твари Богови, воспомяну ангелы и невидимыя силы вся: сниде же даже и до земли, якоже ни зверей, ни скотов, ни птиц, ни гадов удалятися, понеже сотворшему покланятися, и от сих пению (с. 759) мнящеся, яко хотя все бывшее от него подобное совершати вношение{дань} и како убо инок вкупе приносимый со златом, иже от сапфира, не чувствовати когда, или ленитися претерпит к песнопению. 3. Якоже купину огнь обдержаше, не опаляше же ю: тако и приемших дарование безстрастия, аще и тяжко и зело теплейше носят тело, ничтоже плоти или уму стужает или вредит теплота тела: глас бо Господень пресече пламень естества, занеже хотение Божие и слово соединенная по естеству разставило есть. 4. Луна, растущи и паки умаляющися, являет человека устроение: ныне убо добрая делающаго, ныне же согрешающаго, таже покаянием паки текущаго к жизни добродетельной. Темже не погибе ум согрешившаго, якоже нецыи у вас мнят, якоже и луны тело не умалися, но свет. Возстяжавает убо человек паки свою светлость покаянием, якоже и луна по еже умалитися, от себе светом одевается: веруяй бо во Христа, аще и умрет, жив будет: и увесть, рече, яко аз Господь глаголах, и сотворю{Иезек. гл. 37, ст. 14.}. 5. Аще воставшу на тя в мысли множеству вражиих воображений, послабив{вмале уступив.} победишися, веждь себе, яко разлучился еси на время от Божественныя Благодати. Темже и предан был еси в руце падения твоего, по праведному суду. Сего ради подвизайся никогдаже нерадением оставлен быти от благодати, ниже к черте времене. Аще же возможеши, лучший поползновения быв, превзыти стену страстных помысл, и частыя скверныя прилоги многоумия врагов. да не не разумееши дар свыше данный тебе. Глаголет бо апостол: Не аз же, но благодать Божия, яже со мною, таково содела знамение победы{1 Кор. гл. 15, ст. 10.}, и от востающих на мя скверных помышлений вознесе мя: и от мужа неправедна, сиречь диавола, и ветхаго человека (с. 760) избави мя. Темже крилом духа возвысився, и отпущен быв от тела, возмогох полетети верху ловящих бесов, емлющих человеческий ум сладострастием, еже понудительне и нуждне поощряюще предлагают. Изведый мя убо от земли египетския, сиречь от душепогибели мирския, сей тайною рукою о мне ратуя, порази амалика, и подаде ми уповати, яко и прочия скверных страстей языки потребит Господь от лица нашего{Исаии гл. 17, ст. 8.}. Сей Бог наш даст премудрость и силу: нецыи бо премудрость убо прияша, не у же и силу Духа, во еже победити враги. Сей вознесет главу твою на врага твоего, и даст ти криле яко голубине, и полетев почиеши у Бога{Псал. 54, ст. 7.}. Положит Господь лук медян мышцы твоя, тверда и скора и крепка показуя тя на супостата, испиная под тя вся противящияся тебе{Псал. 17, ст. 35.}. Воздаждь убо Господеви благодарение о чистоте, яко не затвори тя в руках похотей плоти твоея и крове, и упраждняющихся в сих тлетворных и нечистых духов, но утверди тя десницею своею: созижди ему олтарь, якоже и моисей по еже победити амалика{Исход. гл. 17, ст. 15.}. Сего ради исповемся, и восхвалю тя Господи, и имени твоему воспою, величая силы твоя{Псал. 17, ст. 8. }, яко избавил еси от тли живот мой, и исхитил мя еси от сетей и ловлений удобообстоятельныя и многообразныя и утренния злобы. 6. Возжигают в нас скверныя страсти, и обновляют, и возвышают, и умножают лукавии беси: посещения же Божественнаго слова, и паче же лиянием слез бывающая мертвотворят{умерщвляют.} страсти, аще и многовременны суть, и разоряют, и помалу малу в небытие превращают губительная души и тела согрешательная действия: точию мы да не уныем, еже молитвою и упованием неослабным и безстудным приседети Господеви. 7. Почто из уст злобою младенчествующих верных, Христос совершает хвалу? Точию воистинну, да песнопением (с. 761) разрушит врага и местника, мучительствующа вельми: врага убо добродетелей, местника{защитника.} же злобы диавола. Темже и мы Владыку простотою сердца поюще, сокрушаем же и разрушаем козни вражия: множеством бо славы твоея стерл еси супостатов и сопротивных, ратующих ны. 8. Аще кто есть по виду изверг, пол глаголется ныне от плотских поядати, другую же пол в будущем веце: пути бо своего плоды кийждо познает. 9. Добрейшее пощение, и не прельщатися страстьми, произволяти должен есть инок, и велико безмолвие возделовати выну. 10. Ненавидящии души наша беси советуют некиим, яко студену некую похвалу нам даровати, таже о сем возвеселитися нас подущают. Аще убо разслабившеся мнением, дамы место и тщеславию, не утомляются прочее врази наши пленити нас. 11. Приими паче ругающагося тебе, нежели похваляющаго, иже ничтоже разнствует кленущаго, писано есть. 12. Егда о постней потщався добродетели, немощи ради погрешаеши ея, и сокрушив сердце, на благодарение прилагаешися всех промысленника и судии. Аще сего ради смиренна выну показуеши себе Господеви, и ни на единаго когда человека вознесешися. 13. Ведая враг молитву нам убо сущу поборну, тому же наветну, и отторгнути нас от сея тщася, в желание нас влагает еллинских словес, от нихже отступихом, и о сем упражнятися подущает: емуже да не повинемся, да не от осей своего земледельства заблуждше, вместо смокв и гроздия, терние и волчцы оберем: премудрость бо мира сего, буйство у Бога вменися{1 Кор. гл. 3, ст. 19.}. 14. Радость, глаголет, велию благовествую вам, яже будет всем людем{Луки гл. 2, ст. 3.}, не части людей. И, вся земля да поклонится (с. 762) тебе, и поет тебе{Псал. 68, ст. 4.}: не бо подобает части земли. Пение же несть со слезами молящихся, но радующихся. Аще убо сия тако суть, никогдаже да отчаемся, но благодушни настоящее да прейдем житие, отсюду оныя радости и благодушия приемлюще мысль: обаче Божественным страхом веселие растворим, якоже глаголет: радуйтеся Господни с трепетом{Псал. 2, ст. 11.}. Ибо яже о марии со страхом и радостию велиею бежаша от гроба: негли и нас некогда связует и радость, от мысленнаго устремимся гроба. Удивляюся бо, аще без страха, занеже никтоже безгрешен, аще бы и моисей, аще бы и петр апостол был: но обаче в таковых Божественная любы победивши, вон изгонит страх во время исхода{1 Иоан. гл. 4, ст. 18.}. 15. Яко аще встрастен веровав всесердечне, и смирився, приемлет дарование безстрастия, имаши свидетельствующее писание: днесь бо глаголет, со мною будеши в раи{Луки гл. 23, ст. 43.}: и, вера твоя спасе тя, иди в мир блаженнейшаго безстрастия{Матф. гл. 9, ст. 22.}. И, елика таковообразна, и в семени созреет грозд: и, по вере ваю буди вама{Матф. гл. 9, ст. 29.}. 16. Егда приболезненне противу страстем обретающеся, зельнее студными помышленми от бесов стужаеми есмы, тогда наипаче в вере Господней утверждаимся, и известншу от обетованных вечных благих показуим надежду, еяже лишитися нам врази, и отчуждитися завистию тщатся. Аще бо не зело велика быша были она благая, не быша толикою завистию на ны бесове возжегшеся, скверными помыслы часте стреляти: поне сим неистовство свое известно творити мняще, и ко отчаянию нас споревати непщующе, несносным и многим стужением. 17. Разум истиннейш нецыи быти деяние определяют. Тщится убо наипаче делы и веру и разум показовати: о (с. 763) разуме бо единем воскичавыйся, услышит, яко Бога исповедуют ведати, а делы отмещутся его. 18. Яко наимножайше во время праздников и святых собраний, и паче же егда имать кто к тайней трапезе приступати, тогда скверными мечтании и течением семене постника бесове осквернити тщатся: но ниже сим да сокрушат, или разслабят вся терпеливне и доблественне носити обученнаго: ниже да хвалятся на ны деворастлители, яко прави. 19. Нраву и усердию врази отмщевают, различными и неизреченными искушеньми душу заушающе: от скорбей же многих и неисповедимых венец тебе плетется, и в немощех же совершается сила Христова{2 Кор. гл. 12, ст. 9.}, и в печальнших устроениих процветати обыче благодать Духа: возсия бо во тьме свет правым{Псал. 111, ст. 2.}, аще убо дерзновение и похвалу упования даже до конца известну удержим. 20. Ничтоже тако истребляти добродетель обыче, якоже кощуны, и еже играти, и празднословие. И напротив ничтоже тако обетшавшую обновляет душу, и приближитися к Богови устрояет, якоже страх Божий, и доброе внимание, и еже поучатися непрестанно словесем Божиим, и молитвою себе вооружати, и бдения приобретение изследовати. 21. Приличнейше купно и полезно души, еже тверде носити всяку скорбь, или от человек, и от бесов наводиму, и ведети известно, яко должницы есмы удручения. И никогоже иного, точию единаго себе всегда порицати: иного бо о своих скорбных порицаяй, поползеся от праведнаго приличности суда. 22. Овогда от деснаго человек отдвижится{удаляется.} стояния, аще бы и тщалив был, умножившимся искушениям, изступая от своего чина: за еже всей его, якоже глаголет писание, поглощенней быти мудрости же и художеству{Псал. 106, ст. 27.}. Яко да не уповающе (с. 764) будем на ся, и да не похвалится Израиль глаголя: рука моя спасе мя{Судей гл. 7, ст. 2.}. Но уповай паки устроитися в прежнем красном устроении, отпадшу от тебе Божественным велением, и отгнану бывшу лукавому, иже вся убо страстне и видети и слышати подущает, и ко греху побуждает: одебелив же ум якоже облаком густым, творит и плоть ощущати неизреченну тяготу же и бремя: и всажденный помысл прост некий сущ и непритворен, по подобию новорожденных младенцев, различен показует, и зело многоискусен всяческаго греха, обаяв и превратив сего к нечистоте приклонением. 23. Велика некая вещь человек, растый внутрь, и величаемь добродетельми: но обаче сей великий боится греха, якоже мыши слон, да не како иным проповедуя, сам неключимь будет{1 Кор. гл. 9, ст. 27.}. 24. Не точию близ скончания мира диавол словеса возглаголет на вышняго{Даниил. гл. 7, ст. 25.}, якоже глаголет даниил: но убо и ныне некогда тяжкия чрез помыслы наша до самаго того небесе возсылает хулы: и на самаго хуля вышняго, и на создания его, и на святыя Христовы тайны. Но мы водружени суще на камени разума, да не убоимся о сих, ни да удивимся о дерзости нечестиваго: веру же и молитву теплшу употребляюще, и свышнее пособие получивше отмщеваем врагу. 25. Ратуя и поношая с дерзостию находит враг на душу изшедшую от тела, клеветник быв горек же и страшен о согрешенных. Но возможно есть видети тогда боголюбивую и вернейшую душу, аще и множицею уязвлена бысть грехами, не ужасающуюся онаго стремлений же и прещений: но паче укрепляему о Господе, и воскриляему радостию, и дерзотвориму наставляющими святыми силами, и остеняему светом веры, и противовзывающу со многим дерзновением лукавому диаволу: что тебе и нам, чуждый Бога? что тебе и нам, бежателю (с. 765) небесных и рабе лукавый? не имаши ты власти над нами: Христос бо Сын Божий, над нами же и над всеми власть имать: тому согрешихом, тому и ответствовати будем, обручение{залог.} имуще еже к нам милосердия и спасения, крест сего честный. Ты же бежи далече от нас губителю, ничтоже тебе и рабом Христовым. Сия глаголющей души с дерзостию, плещи прочее дает диавол, и вопиет плачася: не возмог противостати имени Христову. Превышше же сущи душа, парит верху врага, заушающи его, якоже глаголемый борзокрил врана. И по сих радующися от Божественных ангел преносится в места определенная ей по устроению ея. 26. Яко и малым неким искушением по попущению возбраняемь есть предуспети тщаливый, да уверяет тя, ехенние{корабледержица.}, малейшая рыбица, тьмами обременен корабль прикосновением единем упраздняющая, и предыти возбраняющая, и помяни всяко глаголющаго: яко аз толикий павел единою и дважды восхотех приити к вам, и возбрани нам сатана{1 Сол. гл. 20, ст. 18.}. Но не сего ради да смятешися, противоподвизайся же паче терпением, и получиши благодать. 27. Иже добродетельми зело из_обилуяй, аще унынием уклонится от подобающаго, восходят на него сынове злых восток от амалика, и паче же мадиам{Судей гл. 6.}, блудолюбивая сила, с велблюды своими, сиречь со страстными памятьми, имже несть числа, и разоряют вся плоды земныя, сиречь изряднейшаго деяния же и обычая. И тогда прочее обнищавает Израиль, и зело малодушествует, и понуждаемь есть возопити ко Господу. И тако посылается с небесе помысл благ, гедеону подражающ многою верою и смиренномудрием: тысяща бо моя, рече, хуждша в манассии, яко ополчитися на толикая множества, треми сты немощными человеки, и знамения победы преславно поставити на сопротивныя споборством благодати. (с. 766) 28. Не убо возможеши на аспида и василиска наступити, и прочая, аще не многою мольбою Бога умолив приимеши поборников ангел облегчавающих тя своими руками, и горе тя творящих тименнаго произволения. 29. Егда кто подвизаяся крепко побежден вы был, никтоже да печалует, ниже да утомляется: но глаголы исаии да исправится, да благодушествует такова напевая: Могущии покаряйтеся! _о лукавии беси, аще бо и паки возможете, паки побеждени будете. И иже аще совет совещавасте, разорит Господь, яко с нами Бог есть, Бог низверженныя возставляяй, и устрояяй враги наша плакати, внегда быхом каялися. 30. Невозможно есть без печали прейти наказуемому во искушениих: и посем многия радости исполняются таковии, и слез сладких, и разумений Божественных, елицы возделаша болезнь и скорбь в сердцах своих. 31. Аще хотя исаак: и течя некогда исав к желанию благословения погрешиста{Рим. гл. 9, ст. 16.}: милующаго Бога и Благословящаго Духом помазующаго. Не егоже мы всяко восхотехом, но егоже Бог, прежде неже создати предустави в служение. Никакоже да смятемся ниже убо завидети да имамы, егда увидим братию некую умильну и малейшу в добродетели предуспевшую. Слышал еси и Господа глаголющаго: Даждь сему место, якоже сести выше{Луки гл. 14, ст. 9.}. Удивляемся же паче о сих судии премудре и неизреченно судившу, оному убо малейшему и последнему первенствовати и наставляти: нам же последним быти, постничеством и временем паче онаго первенствующим. Коемуждо бо человеку, якоже раздели Господь, тако и ходити да имамы: Аще духом живем, духом и да ходим{Галат. гл. 5, ст. 25.}, по писанному. 32. Никогдаже приемли сущаго в повиновении твоем, даждь ми, глаголюща тебе, власть некое время на добродетель, (с. 767) сию, или сию вещь искусити, и тако исправити: тако бо глаголяй, яве есть, яко свою совершаяй волю и добрейшаго повиновения слоги{обеты.} отмещет. 33. Страсти убо плоти и души, якоже узриши, временем, и Божественным манием{хотением.} потребятся, аще и приращены{умножены.} суть: милость же Христова никогдаже разорится: милость бо Господня, от века сего и до века будущаго на боящихся его{Псал. 102, ст. 17.}. 34. Сокровища царска умножатся злата, и умове сущих воистинну инок исполнятся разума. 35. Овогда учитель в безчестие предается за духовне пользовавшихся искушения терпя: мы бо глаголет, безчестни и безчестими пакостником и немощни: вы же славни и крепцы о Христе есте{1 Кор. гл. 4, ст. 10.}. 36. Источник и подлог{вина.}, еже плотию тления страстный помысл, егоже покаянием изпределяет{изгонит.} от души, трезвен бывый по падении: добре бо плакасте паче, да измется от среды вас подустивый дело сие содеяти лукавый и неподобный помысл{1 Кор. гл. 5, ст. 2.}. Темже плачь сопротивляется духу тления. 37. Кто возвестит изгнетенному безславием и безсилием добродетелей, яко узрит Иисуса не точию в будущем, но и зде уже с силою и славою великою грядуща к нему безстрастием. Якоже рещи яко сарра души в неплодстве состаревшейся, и паче чаяния рождшей сына правды, яко смех мне сотвори Бог: сиречь, величайшу радость дарова множайшими леты опечаленному многострастием. Или якоже ин толкователь издаде: младость мне сотвори Бог: сиречь, обновися яко орля юность моя{Псал. 102, ст. 5.}, обетшавшая прежде во гресех и страстех безчестия: ныне бо паки родихся, и паки юн есмь и мягок ожесточенный прежде веществом, и гладце вижду ныне прочее яже в мире вещи: приемь еже по естеству простое неразличное здраву бывшу уму многомилосердием (с. 768) Божиим. И бысть плоть моя якоже неемана сирианина, якоже младенцев, за еже измытися ми во иордане разума, и есмь единомыслен благодатию Божиею, избавлен совета змиева и полка, ихже противу естеству стяжав первее многоискусных же и многовещественных помысл злобы. 38. Вмени к тебе глаголати Господу, яко во время некое отях от тебе сие и сие дарование, о нихже непщевал еси ум твой извествовати и почивати: дах же тебе вместо сих ино равноважно дарование сие и сие. Ты же отятая убо помышляя: данная же паче онех не созирая, дряхлуеши и болезнуеши и печалию уязвляешися. Но веселиши мя, приемля скорбь от мене{2 Корин. гл. 2, ст. 2.}: скорбь бо творю аз на пользу, спасти паче, а не погубити устрояя вмененнаго ми сына. 39. Заповеждь себе и узакони не ясти рыбы, и назирай по сих, яко к желанию рыбы неослабно враг поревает тя, и ты паки подобне к наслаждению невольнаго тебе неистовно тщишися, яко да научаешися о адамлих образне случаях: слышав бо он, да не яси от сея единыя вещи, на сию паче со многим желанием едину отреченную{возбраненную.} потече. 40. Инаго убо разумом Бог спасает, а инаго простотою и незлобием: ведети бо должен еси, яко не отринет Бог незлобиваго. 41. Елицы молитву зельнее употребляют, сии от страшных и свирепых искушений пленяеми суть. 42. Аще в безстрастие произволил еси одеятися, не без попечения буди, но и елика сила, тщися сие получити: воздыхаем бо, в жилище наше небесное облещися желающе. Да пожерто будет не точию телесне по скончании века, но и зде уже мысленне во обручении мертвенное животом{2 Кор. гл. 5, ст. 2 и 4.}: пожерта бо бысть смерть победою{1 Кор. гл. 15, ст. 54.}, и пожерты будут вси (с. 769) египтяне оскорбляющии нас и гонящии в след нас, волнами с небесе нам низпосланныя силы. 43. Аще забудеши рекшаго: яко боюся, да не како иным проповедуя, сам неключимь буду{1 Кор. гл. 9, ст. 27.}: и мняйся стояти, да блюдется да не падет: и, ты духовный, блюдый себе, да не и ты искушен будеши{1 Кор. гл. 10, ст. 12.}: и аще забудеши соломоново по толицей благодати уклонение и беззаконие: и аще забвению предаси нечаянное великаго петра отвержение{Галат. гл. 6, ст. 1.}: возуповай на разум твой, и велехвалися о жительстве, и времени многаго постничества твоего велемудрствуй, и даси место гордости. Но никакоже взнак да возлягнеши, _о брате, бойся же паче, донележе дыхаеши, аще и в число достигл еси моисеевых лет, и молися, глаголя: Господи, не отвержи мене во время старости моея, внегда оскудевати крепости моей, не остави мене Боже Спасителю мой{Псал. 70, ст. 9.}. О тебе пение мое выну{Псал. 70, ст. 6.}. 44. Глаголет тебе Господь, якоже матфею, по мне гряди. Ты убо твоего многовожделеннаго усердием в след теча Владыки, аще на пути житейстем преткнеши о камень страстен ногу твою, и падеши во грех нечаянно: или множицею тименным обретающимся местом, якоже не хотел еси, поползнулся еси и пал, елижды аще случится пасти же и помучити тело, толикожды востав, темже усердием в след тецы своего Господа, дондеже постигнеши его. Тако во святем помышлении явихся тебе, видети спасающую мя силу и славу, и о имени твоем Господи воздежу руце мои{Псал. 62, ст. 5.}. И возмню и вознепщую тука и масти исполнятися, и возрадуются устне мои поюще тебе. Велие бо ми есть, яко прозвахся христианин, якоже глаголет ми Господь исаием: Велие ти есть, еже назватися тебе рабом моим{Исаии гл. 49, ст. 6.}. 45. Негде убо глаголет, яко даст блага отец просящим у него{Матф. гл. 7, ст 11.}: негде же, яко даст Духа святаго молящимся. (с. 770) Имиже глаголы разумеем не токмо прегрешений оставление, но и Небесных дарований подаяние получати молебником Божиим, укрепляющимся таковою мыслию: яко не праведником, но грешником такова блага обещавает Господь: аще бо вы, глаголет, зли суще, умеете даяния блага даяти чадом вашим, кольми паче отец ваш небесный даст просящим у него Духа святаго{Луки гл. 11, ст. 13.}. Проси убо неослабно, и несумненным произволением, аще и худ еси в добродетельном жительстве, и зело безсилен, и паче достоинства, и приимеши великая. 46. Како бы могл веровати неверный или маловерный, яко мравий воскриляется, и червь некий птица бывает, и яко ина множайша преславно бывают во твари: да поне тако отложив неверия недуг и безнадежия, криле израстит прочее, и проращает яко древо всехвальный разум{Иезек. гл. 17, ст. 24.}. Аз бо есмь, глаголет, древо сухое, проращаяй и оживотворяяй изсохшия кости{Иезек. гл. 37.}. 47. Никакоже потребы ради телесе попечении восхощим таяти, всею же душею уверим Богови: якоже некий некогда глагола муж благ: Уверите Богови, и уверено будет вам. И якоже пишет блаженный петр апостол: Уцеломудритеся и трезвитеся в молитвах{1 Петра гл. 4, ст. 7.}: и, всю вашу печаль на Бога возвергше, яко той печется о вас{1 Петра гл. 5, ст. 7.}. Аще же еще сумнишися и не веруеши, яко отнюд печется той о тебе, во еже пропитати тя, воззри на паука, и разсмотряй, колико человек паука разнствует, паука глаголю, егоже ничтоже немощнейше, ниже безсильнейше: сей во ни стяжания имея, ни чрезморная отшествия творя, ни судяся, ни гневаяся, ни житницы имея, во всеконечней кротости и целомудрии, и крайнем безмолвии свое подызводя житие: отнюд ни яже ближних любопытствовав, едина же своя действуя, делом своим тихо некое и немятежно употребляет устроение: точию и глас не испущая (с. 771) честолюбивым о праздности, яко всяк человек празден быти хотяй, ниже ясти да восхощет{должен.}. Толико же молчит, якоже пифагора превосходительно победити, емуже еллини паче всех любомудрцев удивляются, за еже воздержанию языка изучитися. Пифагор убо прочее не со всеми глаголаше, но убо с возлюбленнейшими ему человеки беседоваше отай временем, и волам же множицею и орлам провеща любочестне блядения некая и безумствования. Вина же отнюд удаляяся, воду употребляше. Сей же преимуществующим и крайним безгласием превзыде пифагорово языка воздержание, заплева же с винопитием и водопитие. В таковом же убо устроении безмолвне пребывающу немощному и смиренному пауку, и нигдеже вне терпящу ходити, ниже окрест скитатися зде и онде мечтательне, ниже трудитися и злострадати безконечно, иже на высоких живый, и на смиренная призираяй Господь, (ничтоже бо паука есть смиреншее), и даже до того простирая промысл: посылает сему на всяк день пищу, близ скинийцы его устрояя впадати во мрежы сего, яже к потребе малая животна. 48. Но негли речет кто от гортанобесием порабощенных, яко аз зело много ям, и понеже много иждивителен есмь, нужда ми есть безчисленными житейскими куплями обязоватися. Но и сей да смотряет киты великия во атлантийстей пасущияся пучине от Бога изобильно питаемыя, и никогдаже глада искус приемшия. Толико во кийждо от тех зверь поглощает рыбы, елико ниже град некий многочеловечен на всяк день иждити может. Вся к тебе чают, дати пищу им во благо время{Псал. 103, ст. 27.}. Темже и многоядущаго, и малопищнаго Бог есть питаяй. Сия слышав и сам широкое и пространное имый чрево, Богови и вере прочее всего себе возложи, всяческое оттряс мирское попечение, и ум многопопечителен, и не буди не верен, но верен. (с. 772) 49. Аще хощем воистинну благоугодити Богу, и блаженнейшим возлюблени быти люблением, наг ум наш Богови представим, ничимже привлачимь присущаго века, ни художеством, ни разумом, ни измудрствованием, ни словооправданием, аще и всей наказани будем премудрости мира. Отвращается бо Бог с мнетельным нравом приступающих к нему, и тщеславием упитаваемых и надменных: добре бо нецыи от сказателей, упитательство и дмение, суетное издадоша мнение. 50. Како возмогли быхом борением победити предудержавший грех? нужды потреба: муж бо, глаголет, во трудех трудится, и понуждается погибель свою любопряся всегда возревати к святыне своих помысл. Нуждою же нужду решити не отречено есть законы. Прочее аще убо и вносим нужду некоего тщательства, аще и немощнейшу, ожидаем же прочее имущия найти на ны с высоты силы, седяще во иерусалимех{Луки гл. 24, ст. 41.}, сиречь в непрестанней молитве и инех добродетелех: когда приидет к нам нуждою крепкою, ниже бо немощнейшею, по нашей нужде делающею, но нуждою некоею изглаголатися не могущею плотскима устнама: побеждающею многою державою{крепостию.} и одолевающею злейший же нрав и бесовское озлобление: побеждающею же и к горшему уклонение душ наших, побеждающею же и неподобная телесе движения. Бысть бо, глаголет, шум с небесе яко носиму дыханию бурну{Деян. гл. 3, ст. 2.}: да извержет злобу присно на горшее нудящую нас. 51. Ловит враг, яко лев во ограде своей{Псал. 9, ст. 30.}, и крыет нам сети и мрежи помысл нечистых и нечестивых: но и мы аще не спим, возможем больши и лютейши тому поставляти сети и мрежи и подсады: молитва бо и _псалом, бдение же и смиренномудрие, и еже к ближним служение, и милость, и благодарение, и Божественных словес слышание, (с. 773) подсада врагу и сеть и яма и раны и удава и мрежы бывают. 52. Во мнозе{многим временем.} зело возрастом предуспев Божественный давид, благодаря избравшему и Богу, глаголет о конечных благословения: яко ныне обрете раб твой сердце свое помолитися молитвою сею. Сие же речеся, да мы уразумеем, яко многа подвига и времене потреба в молитвах. Яко да едва обрящем нестужаемое ума устроение, ино некое сердечно небо, идеже живет Христос, якоже глаголет апостол: Или не знаете, яко Иисус Христос живет в вас{2 Кор. гл. 13, ст. 5.}? 53. Аще Христос нам бысть правда и премудрость, и прочая: яве, яко и покой{1 Кор. гл. 1, ст 30.}. Приидите бо, глаголет, ко мне вси труждающиися и обремененнии, и аз упокою вы{Матф. гл. 11, ст. 28.}. Добре убо речеся, яко суббота, сиречь покой, человека ради бысть: в самом бо едином Христе покой получит человеческий род. 54. Якоже есть чаша падения и чаша ярости, тако есть и немощи чаша, юже вземь от нас Господь в приличествующее время, дает в руки враг наших: да прочее не ктому мы, но беси изнемогают и падают. 55. Якоже во внешних вещех суть торжницы{пеняжницы.} ткатели, ловцы, ратницы, сооружители: тако и во внутренних разумевай, яко суть и в помышлениих, которницы, обаватели, морстии разбойницы, ловители, сквернители, убийцы, и прочая: ихже подобает скоро предзатворяти{предвозбраняти.} вне благочестивым сопротиворечием и молитвою, и паче же сквернителей: да не осквернят святое место, и да не осквернят человека Божия. 56. Не токмо языком разбойничествуемь есть Господь, ко еже спасти, якоже на разбойнице бысть, иже вопияше от креста, но и помыслом: глаголаше бо, рече, в себе кровоточивая, (с. 774) аще прикоснуся воскрилию риз его, спасена буду. И раб авраамов о ревекке глаголя Богови во уме{Быт. гл. 24, ст. 15.}. 57. Ясне самой той грех к Богу приводит раскаявающагося, чувство приемлющаго злосмрадия и тяжести и неистовства его: не хотящаго же к покаянию преклонитися, не приводит к Богу: у себе же паче держа, узами нерешимыми связует, крепльша и лютейша прочее желания погибели делая. 58. Внемли себе от чаров иезавелиных{4 Цар. гл. 9, ст. 22.}, яже паче суть помыслы, кичения и суетныя славы. Возможеши же сия одолети благодатию Божиею, уничижая душу, и охуждая ту, и повергая себе пред Господем, и призывая его, во еже помощи тебе, и ведая, яко небесна суть дарования. Темже глаголет: никтоже может приимати ничесоже, аще не будет дано ему с небесе{Иоан. гл. 3, ст. 27.}. 59. Глаголет закон: аще же будут свидетельствовавше ему, и не потребит его, да отдаст. Овогда на учреждении предскачет тщеславный помысл возглаголати хотя вне времене: засвидетельствуют же тебе ангельстии помыслы потребити блядолюбивый и безвременный помысл. Аще убо не потребиши его благим молчанием, но попустиши ему произыти на внешнее, напыщен быв кичением, тогда прочее воздаси долг, или греху велику судом предан быв, или тяжким неким болезнем телесным: или частым братий приражениям: или еже в будущем веце мучению: ибо и о праздне и тщеславне слове слово воздамы за языка ненаказание: темже подобает язык наш трезвенне хранити. 60. Елицы сластьми искушаеми суть и яростьми и славолюбием и прочими, сии глаголются солнцем убо во дни ожигатися, нощию же луною{Псал. 120, ст. 6.}. Помолися убо Божественным покровен быти росоиспущающим облаком, яко да зноя врагов убежиши. (с. 774) 61. Никакоже на тя дерзновение даждь пиянства защитником и рабом безчинныя трапезы, ниже с безстудием глаголати с тобою хотящим, аще бы и седы лицем были, аще бы и много время имели во иночестем житии, да не по писанию, гнилость покрыет тя, и нечистыми и сердцем необрезанными сведен будеши. 62. Прежде вручишася петру ключи, таже попущен бысть пасти во отвержение, якоже уцеломудритися падением мудрованию. И ты убо, аще разумения ключь приемь. и в различны помыслы впадаеши, не ужасайся: слави же единаго премудраго нашего Господа, падении обуздающаго мнение восходящее на Божественший разум, искушения бо узда суть обуздовати могуща человеческое дмение промыслом Божиим. 63. Аще добрая множицею от нас отемлет Господь якоже богатство иовле: Господь бо даде, Господь взят{Иова гл. 1, ст. 21.}: всяко негде и злая, яже нам наведе вечный, от руки нашея возмет: благая бо, глаголет, и злая от Господа. И наводяй на ны злая, той наведет на ны и вечное веселие со славою вечною. Якоже бо бдех, глаголет Господь, во еже низвратити, и зло сотворити вам, и паки созижду, и не низложу, и насажду и не исторгну. Да молчит убо народная глаголющи притча: отнележе зле, несть добре. На горшее бо изменивый вещи Господь, может всяко сия паки на светлейшее нечаянно прелагати. 64. Иже на бесы или воздержанием, или молитвою, и всякою добродетелию зельнее и ретительнее находяй, глубши от них раны восприимет, дондеже и в безнадежие приити: осуждение мысленныя смерти усмотревая в своей души, якоже приходити глаголати ему: кто мя избавит от тела смерти сея{Рим. 7, ст. 24.}? понуждаемь бо есмь невольно повиноватися законом супостата. 65. Не просте преднаписано бысть, яко нецыи к себе глаголаху: востаните, и приидем к людем уповающим надеждею (с. 776) и молчащим{Судей гл. 18, ст. 9.}. И паки: Приидите возшедше собеседуим с ними языком умным лестным, и отвратим я к нам от истины{Исаии гл. 7, ст. 6.}. Лютии бо бесове обыкоша чрез всю жизнь на произволивших безмолвное житие из_ощряти мечи искушений, и неистовнее наипаче на благоговейнейшия же и благочестивейшия воинство устремляти самим тем делом в грех реюще сих ратьми несносными. Да негли поне тако возмогут от яже во Христа веры и молитвы и благонадежия оставити ратованныя. Но мы, якоже глаголет Давид, не отступим от тебе, дондеже ущедриши ны, и удалятся от нас поглощающии ны{Псал. 79, ст. 19.}. Не отступим от тебе, дондеже повелиши отити от нас искушающим ны, и оживем терпением и крепким безстрастием. Занеже искушение есть житие человеку, и во время учиненно множицею под ноги чуждых падати уготовляется от подвигоположника. Великодушныя же души и доблественныя свойственно есть не отчаяватися в напастех. 66. Аще толико может бес, яко и не хотящу человеку престрояти сего, и преводити к своему стремлению, от еже по естеству изступльша благаго устроения: колико может ангел во определенное время повеление Божие приемь, все на лучшее превести человече завещание{залог.}: Аще всехладный север толико возможе, яко в каменную жестокость претворити мягчайшее воды естество: что убо сотворит теплейший юг? Аще воздух зело охлажден, вся себе повинути творит: кто бо постоит противу лица мраза{Псал. 147.}: како убо к себе теплота вся не прелагает: кто бо постоит противу лица теплоты? веруим убо, хладный же и черный угль ума нашего позде некогда, или скорее, горящь же и световиден быти прилогом Божественнейшаго огня. 67. Есть некое и в настоящем устроение, свидетельство и знамение нашему втайне иосифу полагаемо безстрастия едино (с. 777) есмы, имже ум изшед от египта, отемлется убо страстных бремен, и яко в нощи студнейшия работы, языка же, егоже не ведяше, слышит, не ктому языка бесов скверна и тлительна праваго разума{ума.}, но языка свята светоносных ангел, преображающих ум от тела на безтелесное, языка просветительна приемлющия души. 68. Слышах некиих братий недугующих телом неослабно, и не могущих употребити пощения, рекших ко мне: како можем без пощения избавитися диавола и страстей? К нимже глаголати подобает, яко не токмо ошаянием снедных, но и воплем сердца потребити и изгнати возможете злая же и злых подметники: Воззваша бо, глаголет, ко Господу, внегда скорбети им, и избави их{Псал. 106, ст. 6.}, и паки писано есть: Из чрева адова вопль мой, услышал еси глас мой: и да взыдет из истления живот мой{Иова гл. 3, ст. 3 и 7.}. Темже, дондеже прейдет беззаконие, сиречь стужение греха, воззову, глаголет, к Богу вышнему{Псал. 56, ст. 2 и 3.}, яко да величайшее благодеяние даруя, и самый той прилог греха истребит своею властию, и страстнаго ума идолы изгладит, и безидольны{безстрастны.} покажет, яже у нас полны идол{мечтаний.} немощи. Аще убо не приял еси дарования воздержания, веждь, яко молитвою и упованием хощет тя Господь услышати молящася. Познав убо Владычнюю судьбу, не печалуй о постничества изнеможении: паче же потщися избыти от врага молитвою и терпением Благодарным. Аще убо гонят вы помыслы немощи и злострадания от града постническа, бегайте в другий, сиречь, в молитву и благодарение. 69. Глагола фараон моляся, да отимет Бог от мене смерть сию, и услышан бысть: подобне же и веси, молившии Господа, да не во глубину послани будут, получиша прошение: кольми паче услышан будет христианин человек, моляйся свободу получити от мысленныя смерти. (с. 778) 70. Иже время некое от Божественныя просвещаемый и упокоеваемый бе благодати, по спрятании же сея, в парения и скверны впадаяй, и ропщай сего ради, и не мужаяйся молением паки воззвати спасительное оно извествование, но негодуяй: подобен есть нищу приемшу милостыню от палаты, и неудобь терпящу, занеже не вниде внутрь спообедати цареви{пообедати с царем.}. 71. Блажени не видевшии мя, и веровавше{Иоан. гл. 20, ст. 29.}, якоже блажени иже в спрятании Благодати не обретающии утешения в себе, паче же протяжение видящии скорбных и тьму тяжку, и не отчаявающиися: но верою укрепляющиися, внегда непщевати видети невидимаго, и терпети доблественне. 72. Еже благодатию во свое время по мнозех подвизех и печали и слезах даемое с небесе ищущим сего смиренномудрие, крепльше по превосхождению и большее есть смирения отпадших от добродетели: егоже сподобльшиися, совершенни воистинну суть мужие и нестужаеми. 73. Егда остави диавол Господа, тогда приидоша ангели, и служаху ему{Матф. гл. 4, ст. 33.}: подобает убо ведети, зане якоже не писано есть, внегда искушаемь бяше той, яко приступиша ангели: тако и нам искушаемым, во время некое отходят не далече ангели Божии, таже по отшествии искушающих, приходят к нам, представляюще Божественная разумения: утверждение, просвещение, умиление, утешение, терпение, услаждение, и елика спасают, укрепляют, и возстяжавают душу утружденну, речеся бо нафанаилу: яко узриши ангелы восходящия и нисходящия над Сына человеческаго{Иоан. гл. 1, ст. 51.}, сиречь, на род человеческий служение ангелов и помощь богатне излиется. 74. Помяни архиереа онаго, егоже одесную ста диавол противитися ему{Захар. гл. 3, ст. 1.}, всякому, сиречь, десному помышлению и слову и делу, яко да не ужаснешися о случающихся. (с. 779) 75. Ведати приличествует иноку, что убо есть немощь? якоже еже, помилуй мя, яко немощен есмь. Что же отступление от Бога, иже недуг есть диаволь и аггелов его? 76. Имже образом железо неприкосновенно творит огня совокупление: тако частыя молитвы крепльшь устрояют ум на брань вражию. темже всею силою леность нам сотворяти тщатся о молитвы приседении, ведяще сию, себе убо наветну, уму же поборну. 77. Прият давид усердие соизшедших с ним от секелага на иноплеменники, аще изнемогше и осташася на потоце восорове: возвратився бо к ним с победою, яже на варвары, и слышав глаголющих, яко не подобает датися части от плена, седевшим от разслабления на потоце: и тем стыдящимся и ничтоже глаголющим. ответствует о них блаженнейший давид, глаголя: яко при сосудех посаждени быша блюдуще, темже и равную тем даде часть с данною мужественным и благодушным ратником{1 Цар. гл. 30.}. Смотри убо, дабы и о брате некоем, начало убо тепло показавшем, послежде же вмале обленившемся, сосуди спасения разумелися, вера и раскаяние, смирение и плачь, терпение и упование, и долготерпение, и прочая, в нихже кто немощен нравом приседев, и потерпев, еже о Христе чаянием: якоже лепо есть, получает некий вечен дар. 78. Левиты убо и священницы нарекошася, иже всех отнюд себе Богови возложившии и деянием и видением: скоти же левитстии нарицаются, иже не могущии убо (не) ходити в след страстей: желающии же добродетели, и о сей по вместному усердствующии, и сея желающии всегда, аще и погрешают множицею, за еже от злобы изжиленным быти. подобает же во время приличествующее, и сим дарование прияти безстрастия, единем человеколюбием Божиим: желание бо убогих услыша Господь. (с. 780) 79. Язвы, яже наводит на ны враг или яве видимо, множицею разумеем и видим: мучения же и болезни, яже от нас терпит, исправляющим нам овогда добродетели, или раскаявающимся о прегрешениих, или долгодушествующим, и терпящим о приключениих, или молящимся, и прочая ухищряющим, о нихже той разпыхается и мучится, и плачет и рыдает: сия вся мы по смотрению не видим, да не како ослабеем: праведно бо, глаголет, у Бога воздати скорбь оскорбляющим нас. 80. Аще состаревшийся на земли и на камени пень, от вони водныя проращает яко навосажденный: влепоту есть и нам возбуждающимся силою святаго Духа, возрастити нетление, еже по естеству прияхом, и сотворити жатву яко новосаждение, аще и в ветхаго низпадохом человека. 81. Ко отчаявшей себе за прехождение искушений и грехов множество души, и глаголющей: Погибе надежда наша, убиены быхом, речено бысть от неотчаявающаго спасение наше, Бога, еже живи будите, и увесте, яко аз есмь Господь{Иезек. гл. 37, ст. 1.}: к недоумевающей же души, како убо возможет великими добродетельми родити Христа? глаголано бысть: Дух святый найдет на тя{Луки гл. 1, ст. 35.}: а идеже есть Духа свята пришествие, да не взыщеши прочее естества и обычая последования, и закона: всесилен бо есть поклонный и святый Дух, и не сущая в естество производит тебе, яко да удивишися: но и победителя ныне показует ума, иже прежде побеждашеся. Свыше бо грядый на ны за благоутробие утешитель, над всеми есть: над всеми бо тя поставляет естественными движенми и бесовскими страстьми. 82. Подвизайся во владычественнем твоем светозарие хранити невредимо. Аще начнеши по страсти зрети, омрачи тя Господь, и посла узду лицу твоему, и свет очию твоею несть с тобою{Псал. 37, ст. 11.}, но аще сия и тако суть, да не утомишися, (с. 781) ниже ослабееши моляся со святым давидом: Посли свет твой и истину твою, мне дряхлующу, спасение лица моего, и Бог мой{Псал. 42, ст. 3 и 5.}: Послеши бо Духа твоего, и созиждутся, и обновиши лице земли{Псал. 103, ст. 30.}. 83. Блажен иже несытно имать ясти и пити молитвы и _псалмы зде нощь и день, и укрепит себе славным писания чтением: таковое бо причащение израстит души неувядаемо веселие в будущем веце. 84. Всею силою утверждайся не падати: падати бо, не подобает крепкому подвижнику: аще же случится пасти, абие возскочи, и стани паки в добром подвизе. Аще и тморицею сие случится спрятанием благодати, тморицею и оно да будет, сиречь еже востания, и до скончания твоего. Писано бо есть: яко аще седмерицею падет праведник, сиречь чрез все житие, седмерицею и востанет{Матф. гл. 18, ст. 21 и 22.}. Донележе держиши оружие святаго образа, со слезами и молением еже к Богу, в стоящих вменяешися, аще и множицею пал еси: донележе пребываеши со иноки, яко мужествен воин на предних приемлеши язвы, имиже и похвален будеши паче, яко ниже уязвляемь претерпел еси предати или отступити. Аще же отступиши от иноков: по плещам уязвляешися прочее яко бегун и боязлив и чинооставитель и бездерзновенен. 85. Лютее, от еже согрешати, есть, еже отчаяватися: иуда бо предатель малодушен бе и неискусобранен, и сего ради на отчаявшася того притек враг, сило возложи: Петр же камень твердый страшным падением низведен быв, яко искусобранен не ослабе ниже отчаяся печален быв, но возскочив принесе горчайша слезы от сердца скорбяща и смиренна: и абие супостат наш видев сия яко пламенми зельнейшими на зрацех палимь, отскочи бежа далече, и люте плачевопльствуя. (с. 782) 86. Противу сим трием наипаче иночествуяй, брань имети должен есть непримирительну: противу чревонеистовству, и противу безприобретенной славе, и противу пенязолюбию{сребролюбию.}, еже есть идолослужение. 87. Царь некий исраильтянин, троглодитян язык и иныя варвары, _псалмы и пении и песньми духовными победи, во словесех и органех давидовых{2 Парал. гл. 12, ст. 3. и глава 20, ст. 22.}: имаши и ты варвары троглодитяны, в чувства твоя и удеса входящия бесы, и плоть мучащия раждежением, и устрояющия тя страстно зрети же и слышати, и обонявати, и глаголати неподобны глаголы, и очи полны имети прелюбодеяния, и смущатися внутрь и вне яко вавилонская пещь. Попецыся убо и сам верою велиею и _псалмы и пении и песньми духовными, действующих злая троглодитян внезапу истребити. 88. Якоже человеку чрез человека спасатися хощет Господь, тако и человеку чрез человека погибнути тщится сатана. Темже не подобает прилеплятися мужу презрителю и лукаву{злоумну.}, и не хранящу языка, да не с ним в муку отидеши: едва бо кто праведному приближаяся спасение получает. Аще же кто с лукавнующим сообращатися будет, не наблюдая ся, яко губительство и проказу готово обрящет истопление{кораблекрушение.}: и кто прочее помилует, радостне приближающагося ко змию? Бегай убо ненаказанных языком и ратосразителей, и смущаемых внутренними и внешними удесы. 89. Кто мудр, и разумен, и друг Божий нарещися хотя, да душу свою потщится представити Господеви такову, якову ту прият от него чисту и неуязвлену, и всю непорочну, и сего ради да увенчается на небесех, и от ангел ублажен да будет. 90. Един глагол благ сквернаго некогда онаго разбойника, чиста и свята содела, и в рай введе, и един глагол неподобен, возбрани моисеови землю обетования, да не убо (с. 783) мал недуг языковолие вменим: досадолюбцы бо и блядословцы затворяют себе царствие небесное: занеже муж язычен аще бы и зде исправил, но тамо не исправится, паче же запнется, и злая уловят и во истление{Псал. 139, ст. 12.]. Добре убо глаголаше премудр некий муж: яко лучше есть пасти от высоты на землю, нежели от языка. Веровати убо подобает иакову апостолу пишущему: Да будет всяк человек скор услышати, и косен глаголати{Иаков. гл. 1, ст. 19.}. 91. Яко да не парим прельщаеми от чувств о суете, добро внимати глаголющему: Идите людие мои, внидите в храмину сердца вашего, сокровенную всякому чувственному помышлению, в безвидную ону обитель, просвещаемую безстрастием же и осенением святыя благодати: затворите двери своя всем видимым: укрыйтеся мало елико елико: мала бо есть вся человеческая жизнь. И посем глаголет: Дондеже мимоидет гнев Господень{Исаии гл. 26, ст. 20.}. Якоже ин глагола: Дондеже прейдет беззаконие{Псал. 56, ст. 2.}: гнев бо Господень есть и беззаконие, негли убо бесове и страсти и грехи, якоже глаголет ко Богу исаиа: Се ты разгневался еси, и мы согрешихом{Исаии гл. 64, ст. 5.}. Убегает же гнева сего человек, внегда внимая сердцу молитвою, и внутрь быти невходных любопряся: привлецы бо, глаголет, премудрость паче внутреннейших: занеже вся слава дщере царевы внутрь{Псал. 44, гл. 14.}. Труждаюся же, дондеже вниду во святило Божие{Псал. 72, ст. 17.}, и в гору достояния, глаголет, в готовое жилище, еже соделал еси Господи, святыню, юже уготовасте руце твои. 92. Хотяй воистинну отрещися, блаженному да подражает пророку елиссею, ни едину себе оставль вещь мнозем и огнепламенным еже к Богу рачением. Вся убо имения своя да раздаст требующим, и тако понес Крест Господень предложением, да понуждается на вольную смерть виновну бывающу вечнаго царствия. (с. 784) 93. Егда достигнеши уразумети, яко аморрей возмогает в тебе яко дуб: помолися Господеви прилежно, да изсушит плод его{Аморреев.} сверху, сиречь деятельный грех: и корения его отисподу, сиречь нечистыя помыслы. И да отимет Господи аморреа от лица твоего. 94. Не подобает ужасатися, внегда аще видите посмевающихся безмолвию нашему, немогущих безмолвствовати: паче же пойте на ня, обаче не злопомняще, и еже к Богу повиновение ваше зелнше противо поставите им, вопиюще внегда пети: обаче Богови повинися душе моя{Псал. 61, ст. 6.}: вместо бо еже любити мя, оболгаху мя, аз же моляхся{Псал. 108, ст. 4.}, о моем же и онех исцелении. 95. Не дхнувшу на море ветру жестоку, не убо увидится волна, и не нашедшу на ны бесу, не имать обуреватися страстьми душа ниже тело. 96. Аще согреваешися присно молитвою и Божественною благодатию, глаголет к тебе Божественное писание, яко ко облеченному во оружия света: твое же одеяние тепло: врази бо твои якоже в сугубо одеяние, в студ одеяшася и дрожание. 97. Память приемля прегрешений твоих, не ленися бити перси, яко да таковыми уязвленми каменносещи имаши окамененное сердце: и обрящеши крушец мытареваго злата, и возрадуешися о богатстве тайнем. 98. Огнь молений о лучших, и святаго поучения словес Духа, да горит выну на жертвеннице души твоея{Левит. гл. 6, ст. 12.}. 99. Аще присно тщишися обути нозе во уготование благовествования мира{Ефес. гл. 6, ст. 15.}, созиждеши всяко и свой си дом и ближняго твоего: аще же уныеши, оплеван будеши невидимо, и по закону наследиши имя изутаго из сапога{Втор. гл. 25, ст. 9 и 10.}. (с. 785) 100. Аще по иоанну, Бог любы есть: любяй в Бозе пребывает, и Бог в нем{Иоан. гл. 4, ст. 8 и 16.}. Ненавидяй же ближняго в любве распряжении, яве, яко ненависть составляет. Ненавидяй убо тождероднаго в разстоянии от Бога есть, понеже Бог любы есть, и пребываяй в любви, в Бозе пребывает, и Бог в нем. Тому слава и держава, ныне и присно, и во веки веков, аминь. Конец главам книги.