<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 543) Преподобный отец наш петр, нареченный епискп дамаска, бе в царствование константина копронима, в лето седмь сот седмьдесят пятое. Сей убо первее уединенную и отшельническую проходя жизнь, в толицем нестяжании поживе, яко ниже книги своея име, якоже сам о себе свидетельствует: от других же приемляй книги, ветхаго, глаголю, и новаго писания, великих церковных учителей, и других всяких вообще трезвенных и Богоносных отец, толико трудолюбив бе, яко день и нощь поучаяся в законе Господни, и животочными упояемь быв струями, явися поистинне древо, по _псаломнику, высокое и Небесное, при самех исходищах вод Духа насажденное. Обаче то во едино время дает плод свой: а сие не тако, но во всяко время неоскудно и невредне присно цветуще пребывая, Духовныя плоды произрасти добры виду, сладки вкусу, Благовонны обонянию, и всяко чувство тела и души питающи точащимися от них безсмертными и Благовонными сладостями: многия бо в житии и великия подвижническими своими трудами плоды принесе, множайшая же и большая во смерти, восприявый мученичеством венец: обличающ бо зломысленную аравийскую и манихейскую ересь, от уалида, сына аравийскаго начальника исима, языкоурезан быв, в блаженную аравию заточается: идеже и чисте глаголяй и священнодействуяй, скончася. Множайшая же и большая по преизбытку по смерти приносит нам, оставляя яко некое отеческое и неотемлемое наследие, предобрую поистинне и предобродетельную книгу сию, тщательне, и с еликою, не могу рещи, благодатию, им сочиненную, общее и душеспасительное всех добродетелей любочествование, умозрений сокровищехранителище: Духовных (с. 544) дарований собрание, высоту Божественных блаженств, жертвенник телесных деяний, тончайшее разсечение страстей: рог подвижническия егиды, вместилище разума и премудрости Божественныя, и да вкратце реку, оглавление священнаго трезвения. Сие убо и мы сродство с настоящею книгою, попремногу способствующее предлежащему нашему намерению, ведяще, судихом за нужное соединити с оною. И может ктолибо лепо рещи, яко круг со кругом, и добротолюбие с добротолюбием, великое с большим. Ибо нетерпимо явися нам толику, якоже рекохом, цепь духовных плодов, собрание священных Божественнаго лика воздержников разделити. (И оная бо книга много нас в маломыслии обличила бы не терпящи разделения своего от разумных и любящих ю отец, ниже что и да не будет.) умалим в сей части куплю, по необходимости требующу и сего прибавления. К сему же да не лишим толикия пользы и братию нашу. Присно бо умножение добрых, сугубо обыче и благотворение деяти. Аще же кто желание имеет восприяти, от Давида искомыя повсегда, но необретенныя, сугубыя духовнаго голубя крыле: трудолюбиво оную да прочитывает: обрящет бо чудесне в оной едино деяний все посребренное, а другое умозрений все златовидное, и обоими возвышаяся от всех земных, к небесной возлетит высоте, и в горних местех, яко благая, возгнездившись голубица, в небесном успокоится блаженстве. (с. 545) НАЧАЛО С БОГОМ содержания настоящия книги преподобнаго и Богоноснаго отца нашего священномученика петра дамаскина. Многих и великих благодатию сподобився от Бога даров окаянный аз, и ничтоже благо сотворивый, убояхся, да не како праздностию и унынием в забвение прииду о таковых дарех, и толицех благодеяниях Божиих, и о моих прегрешениях, и не явлюся поне благоразумен и Благодарен ко Благодетелю. Сего ради написав, во обличение окаянныя души моея, наставление сие, и по имени положих вся та писания, жития и словеса святых отец, яже прочтох, да имам сия к воспоминанию словес их, хотя от части. Понеже отнюд ни единыя книги своея имех, ниже стяжах николиже, но от христолюбивцов взимах, якоже и телесныя вся потребы любви ради Божией. И сия прочитывая со всяким тщанием, возвращах паки темже, яже суть сия: ветхаго завета и новаго. И ветхаго же исход, четвероцарствие, паралипомена, _псалтирь, пророчествия, святая евангелиа, деяния апостольская, и всех реченных толкования. Отеческия и учительныя вся великих отец, якоже: дионисиа, афанасиа, василиа, григориа Богослова, златоуста, григориа нисскаго, антониа, арсениа, макариа, нила, ефрема, исаака, марка, дамаскина, иоанна лествичника, ма_ксима, дорофеа, филимона и всех святых, жития и словеса. И сподобився недостойный испытати вся со всяким упованием и тщанием, ища начала спасения, и погибели человеческия: и всякое ли начинание, (с. 546) или дело спасает его, или ни? И что есть искомое всеми? И како древнии и новии Богу угодиша, в богатстве и убожестве, посреди многих грешник, и в пустыне, в супружестве и девстве? И вкратце, како во всяком месте и начинании обретаем живот и смерть, спасение и погибель: и не точию, но и в нас монасех различныя обретаем устроения? Глаголю же повиновение отцу, телом же и душею: безмолвие очищающее душу, духовный совет вместо повиновения, игуменство, и архиерейство. И из всех обретаем спасаемых и погибающих. И не сему точию удивляхся, но и древнему ангелу на небеси, иже невещественнаго быв естества, в премудрости и всякой добродетели, внезапу соделался диаволом, тьмою, и неразумием, и началом, и концем всякия злобы и лукавства. Таже адаму в толицей чести и наслаждении благих, и сожительстве бывшу с Богом, украшену и премудростию и добродетелию внутрь рая, единому с евою, иже внезапу бысть изгнан, страстен, и смертен, в труде и тяготе делаше, и в поте и скорби мнозей. От негоже каин со авелем едини братия на всей земли. Како победи единаго из них зависть, и коварство, и произведе убийство, проклятие и трясение. Потом сущим от них, ихже множества ради согрешений, потоп бысть. Но Бог по человеколюбию спасе бывшия в ковчеге, от нихже един ханаан, сын согрешившаго хама, проклят бысть. Да не убо превратит праведный ной Благословения Божия, сына вместо отца прокля. По сихже бывшим при столпе содомляном, исраильтянам, соломону, ниневитянам, гиезии, иуде и всем во благих бывшим, и во злобу уклонившимся. И како Бог всеблагий и многоблагоутробный, благ сый, попусти быти многим, и многоразличным в мире скорбем и искушениям. Овых убо хощет по попущению, яко трудов покаяния, глаголю же жажды, алкания, плача, лишения нужных вещей, воздержания от сладких, измождения тела в подвигах, (с. 547) бдения, трудов, болезней, многих и горьких слез, стенаний, страха смерти, испытания, словоистязания, обитания с демонами во аде, страшнаго онаго дня суднаго, студа имеющаго быти пред всею тварию, трепета, горькаго обличения, дел, словес, и помышлений, прещения и гнева, многоразличных и вечных мук: безполезнаго рыдания, непрестанных слез, неосвещаемой тьмы, страха, страдания, отпадения, печали, тесноты и мучения души, в нынешнем веце и будущем, с сущими в мире бедами, кораблекрушений, многоразличных болезней, молний, громов, града, землетрясений, гладов, потопов: безвременных смертей, и кратко, всех зол по попущению, невольне нам приключающихся. Оваго же не хощет Бог, но мы и демони, якоже браней, страстей, многоразличных грехов, ихже имена покажет следующее слово: от безумия даже до отчаяния и совершенныя погибели, нашествия демонов, браней, мучительства страстей, оставлений, мятежей, и премен жития, гневов, клевет и всякаго оскорбления, еже мы сами себе и друг другу вольне причиняем, Богу не хотящу. И паки, како посреде толиких зол, мнозии спасошася, ничесомуже воспятити могущу, и овии погибоша, Богу не изволившу. Сия вся и другая множайшая с трудом из Божественнаго писания уразумевая, сокрушихся душею, и яко вода разлиявся, многажды во ослабление приходих: аще и попремногу не имеях в чувствии глаголемых. Аще бо возымел бых, не бы возмог пребыти в жизни сей исполненной злобы и преслушания к Богу, имже вся и настоящая, и грядущая лютая соделашася, обаче же прияв от благодати желание изысканий, разсуждения святых отец обретох сицевая: яко начало всякаго блага есть, даемый человеку Богом естественный разум, или из писаний чрез человека, или чрез ангела, или яко чрез даемаго от Божественнаго крещения хранителя, на соблюдение коегождо вернаго души, и совестию глаголемаго, и воспоминанием Божественных Христовых заповедей, имиже сохраняется благодать святаго (с. 548) святаго Духа крещаемому, аще соблюсти я восхощет. По разуме же человеческое произволение. Оно есть начало спасения, сиречь, да оставит человек своя хотения и разумения, сотворит же Божия хотения и разумения. И аще возможет сия сотворити: не обрящется во всей твари вещь или начинание, или место могущее воспятити ему быти, якоже Бог от начала восхоте, по образу и подобию его, и положением, яко Бог, по благодати, безстрастну, праведну, благу и премудру, и в богатстве и в убожестве, и в девстве и супружестве, и в начальствии и свободе, и в повиновении и рабстве, и вкратце, во всякое время, и на всяком месте же и вещи. Посему и прежде закона, и в законе, и во благодати мнозии праведнии обретаются: зане предпочтиша разум Божий, и волю его паче своих разумений и хотений: и паки многих во оных же временех и начинаниих обретаем погибшими. Понеже своя разумения и хотения предпочтоша паче Божиих. И сия суть тако. Имут же различия места же и начинания: и должен есть кийждо стяжати разсуждение или смиренномудрием, от Бога даруемым, или вопрошением имеющих дары разсуждения. Понеже без сего не суть добра чинимая нами, аще по неведению и помышляем, яко добра суть. От разсуждения же человек, о своей силе уразумев, к какову стремится начинанию, тако начинает делы своими Богу благоугождати. Обаче, якоже речеся, во всем подобает отрещися своих хотений, да постигнет Божие намерение: сиречь, каковыя хощет Бог проходити нам делания: аще же не тако, не может спастися ни о чесомже. Зане по преступлении адамлем, страстни вси возрастаем, и от навыкновения страстей, не хощем благаго с радостию, ниже разума Божия делаем, ниже из любви творим сие, якоже безстрастнии. Но паче страсти и лукавствия любим, благаго же никакоже хощем разве по нужде страха ради мук: и сия крепкою верою и произволением приемлющии слово Господне: прочии же ниже тако хотят. Но и скорби жизни сея и будущия (с. 549) муки ни вочтоже вменяюще, всею душею страстем работаем: нецыи же ниже чувствуя сих горести, по нужде и не хотя труды добродетелей проходят, и достойная ненависти соделашася нам вожделенна по безумию. Якоже бо болящии требуют резания и жжения здравия ради, егоже лишишася: тако и нам потребны искушения, и труд покаяния, и страх смерти и мук: да возвратим первозданное здравие души, и недуг, егоже безумие наше нам нанесе, отвергнем, и паче же елико дарует врачь душ наших, вольный или невольный труд: толико благодарити его человеколюбию должни есмы, и принимати его с радостию. Благодетельствуя бо нам, умножи скорби вольне чрез покаяние, и невольне чрез искушения и муки, да хотящии пострадати вольне, избавляются недуга и будущих, а может быть, и настоящих мук: неразумнии же хотя страха ради мук, и многоразличных искушений исцелятся благодатию врача. И тако любящии недуг, и пребывающии в нем достойне сами себе виновни бывают вечныя муки, уподобльшеся демоном, и праведне с ними претерпевати будут вечныя муки, уготованныя демоном: зане восхотеша быти с ними, неблагодарни суще к своему благодетелю. Понеже не вси равне приемлем благодеяния: но овии, огнь Господень, сиречь: слово его, и деланием бывают, яко воск, мягки сердцем: овии же праздностию, яко земля тверды паче и окамененнии являемся. И внегда не приимати, никогоже из нас нудит Господь. Но якоже солнце низпускает лучи, и освещает весь мир: и хотяй зрети его, видимь бывает от него, а не хотяй зрети его, не нудится к тому от него, и никтоже виновен лишения света, разве сам той, не хотяй имети его. Бог бо сотвори солнце, и око, человек же имеет власть. Тако и зде, Бог просвещает всех разумом, яко лучами, а по разуме дарова и веру, аки око. И тако произволяяй верою прияти истинный разум, делы сохраняет память, емуже и дарует Бог вящшее усердие, разум же и (с. 550) силу. Из естественнаго бо разума раждается усердие, предызбравшему оное, от усердия же сила делати, и деланием сохраняется память, и от памяти бывает вящшее делание, сего ради даруется вящший разум: и от сего разума, мудростию именуемаго, раждается воздержание страстей, и терпение скорбей от нихже труды по Бозе, и познание даров Божиих, и своих согрешений, от нихже благоразумие, имже и страх Божий: от сего хранение заповедей, сиречь, плачь, кротость, смиренномудрие, от нихже раждается разсуждение, а от сего предзрение, сиречь, еже предвидети будущая согрешения, и отсекати оныя прежде времени, от искуса и памяти соделанных чистотою ума, и настоящих, и тайно бывающих. И от сих надежда, от неяже безпристрастие и совершенная любовь. Таковый убо тогда никакоже чего хощет кроме воли Божией, но и самую сию привременную жизнь с радостию оставляет, любви ради Божией и ближняго: премудростию и вселением святаго Духа, и сыноположением, да сораспнется, и спогребется, совоскреснет же и совознесется со Христом умне, подражанием ему, сиречь, житием в мире. И просто приемлет залог будущаго блаженства, якоже глаголет Богослов в слове о осми помыслех: безстрастен, праведен, благ и премудр быв, имея Бога в себе самом, якоже сам Христос рече, соблюдением его заповедей{Иоан. гл. 14, ст. 21.} поряду от первой и прочих, о нихже по сих реку, како должно есть быти делание заповедей. Но понеже о разуме добродетелей речеся, то скажем и о страстех. Разум озаряет нас, якоже солнце, и безумный самопроизвольне смежает очи, сиречь, произволение неверием и леностию, и абие разум предает забвению, праздностию от уныния раждающеюся. От безумия бо бывает уныние, от онаго праздность, от сея же забвение: а от сего самолюбие, сиречь, еже любление своея воли и разумений, сластолюбием и славолюбием именуемое. (с. 551) От нихже сребролюбие, корень всех зол, от сего же попечение о житейских, от негоже совершенное неведение даров Божиих, и своих согрешений, от негоже водворение прочих осмиглавных страстей, глаголю же: чревобесия, от негоже блуд: имиже сребролюбие, от негоже гнев, егда кто не улучит желаемаго, сиречь, своей воли. От сего печаль, имже уныние. Потом тщеславие, от негоже гордость. И от сих осми всякая злоба, страсть же и грех. Имже приходит во отчаяние, и совершенную погибель, и отпадение от Бога, и уподобляется бесом, якоже речеся. Посреди же двух сих путей стоит человек, сиречь, правды и греха, и в каковый хощет, течение творит, и его проходит: путь же приемший его, и по нем ведущие его, или ангели и по Бозе человецы, или демони и лукавии человецы отводят его до конца пути сего и не хотяща{Зри: зде речеся, яко демоны отводят человека до конца пути и не хотяща, сиречь, самого его связавша благое произволение в себе, яко сему слабу и бездейственну быти, злей же воле всем человеком преобладати.}. Блазии убо к Богу, и в царство небесное: а грешнии ко диаволу, и в вечную муку. Но никтоже есть виновен погибели, разве своя воля: спасения же Бог даровавый по бытии простом и благобытие, разум же и силу. Сего не может имети человек без благодати Божией. Но ниже диавол может что соделати в нашу погибель, якоже произволение противное, или изнеможение и непроизвольное неведение, или ино что отнюд, дабы понудити человека, точию едино воспоминание зла влагает. Делаяй убо благое, должен благодарение восписывати Богу, яко даровавшему нам вся с бытием. Предызбираяй же и творяй противная, сам себя точию да обвиняет. Зане никтоже силою привлещи его не может: яко самовластна сотвори его Бог, да сподобит его похвал, зря его предпочитати имуща благое, а не по принуждению естества, якоже безсловеснии и бездушнии участвовати благаго, но якоже прилично есть, словесному, якоже почте его Бог. Мы же вольным советом злое произволяем (с. 552) творити, научившеся сему от из_обретателя злобы. И не нудит ны всеблагий Бог, да не нудими преслушествуя вящшее осуждение имамы, ниже самовластие отемлет от нас, еже добре дарова нам. Но хотяй творити благое, да просит молитвою Бога, и абие дается ему разум и сила, да явится праведне благодать низпосланная Богом. Аще же и без молитвы даровал бы он, якоже и по молитве: но якоже не имать похвалы приемляй воздух жизни ради, ведяй, яко без него не может жити: но паче должен есть много благодарити сотворшему его, и даровавшему дохновение и здравие, для принятия его и жизни. Тако и мы должни есмы паче благодарити Богу, яко и молитву, и разум, и силу, и добродетели, и нас, и вся о нас сотвори по благодати. Не точию же, но и не престает всячески пещися, во еже победити злобу нашу, и врагов наших, демонов. Понеже и сам диавол лишившися разума, Богом дарованнаго, неразумием и гордостию невольне соделася несмыслен, и сего ради сам собою не может ведати, что подобает творити, но взирает, что творит Бог нашего ради Спасения, и от сего научается лукавствуя, и подобне творити кознствует к погибели нашей. Почему ненавидит Бога, и не могий ратовать противу его, противу нас сущих по образу его ратует, мняйся сим мстити Богу. И обретает нас послушными воли своей, якоже глаголет златоуст. Видит бо, яко Бог сотвори еву на вспомоществование адаму, содела ю споспешницею к преступлению и преслушанию. Бог даде заповедь, да сохранив ю адам, соблюдет память толиких даров, и благоразумен будет ко благодетелю. Диавол же содела заповедь оную виною преслушания и смерти, и вместо пророков лжепророков, вместо апостолов лжеапостолов, вместо закона беззаконие, вместо добродетелей злобы, вместо заповедей преступления, вместо всякия правды всяк грех, и вместо правых догмат мерзостныя ереси. И паки видя Христа, крайнею благостию снизходящаго ко святым мученикам, (с. 553) и преподобным отцем, или собою, или чрез ангелов, или иным некиим неизглаголанным смотрением являющагося, якоже рече, нача и диавол являти некиим прелести многия в погибель. Сего ради написаша разсудительнии отцы, яко таковая не подобает приимати, или под некиими образами, или светом, или огнем, или иныя некия прелести. Ухищряется бо прельстити поне сим во сновидениях, или чувственне. Аще же ниже сие приемлем: творит ум от мнения и крайняго неразумия, мечтати некия образы, или виды, во еже возмнети, яко явление Божие сие есть, или ангелово. Многажды же показует и демоны в сновидениях, и чувственне, якобы побеждаемы, и просте, всяку кознь строит к нашей погибели, в покаряющихся ему. Егда же сия сотворив не улучит своея надежды: понеже глаголют святии отцы, яко во время молитвы должни есмы имети ум безвиден, невообразителен, необразовиден, и никакоже что приемлющий, ни света, ни огня, ни другаго чеголибо, но подобает в единех чтомых глаголех мысль заключати. Зане молящийся единеми токмо усты, воздуху молится, а не Богу: Бог бо внемлет уму, а не глаголам, якоже человецы. Духом, глаголет Христос, и истиною Богу достоит кланятися{Иоан. гл. 4, ст. 24.}. И, хощу пять словес рещи умом, нежели тьмы языком{1 Корин. гл. 14, ст. 19.}: тогда убо недоумевая о всех сих диавол, влагает в нас помысл отчаяния, яко ина времена она беша, и инии человецы, в нихже Бог яви чудеса веры ради. Ныне же несть время потребы творити сия. Се вси есмы христиане, и крещение носим: Иже веру имет, глаголет писание, и крестится, спасен будет{Марк. гл. 16, ст. 16.}. Что лишшее требуем? Мы же аще сему повинемся, и тако пребудем, совершенне лишенни будем всего, имуще едино точию имя христианина: не разумеюще, яко уверовавый, и крестивыйся, должен есть хранити вся заповеди Христовы, и (с. 554) егда вся исполнит, глаголати: Раб неключимь есмь{Луки гл. 17, ст. 10.}. Якоже Господь ко апостолом рече: учаще я блюсти вся, елика заповедах вам{Матф. гл. 28, ст. 20.}. Всяк бо крещаемый отрицается, глаголя: отрицаюся сатаны, и всех дел его: сочетаваюся Христу и всем заповедем его. Где же есть отрицание наше, аще не всяку страсть, и всяк грех, егоже хощет диавол, оставим? Паче же возненавидим от всея души, и возлюбим Христа, соблюдением заповедей его. Како же сохраним заповеди его, аще не отвержемся всякаго хотения своего, и всякаго разумения? хотений же, и разумений тех, иже глаголятся противна быти заповедем Божиим. Понеже множицею бывают нецыи таковии, или от естественнаго сложения, или от навыкновения благое в некиих делех любят, злое же ненавидят: суть и благия разумения, яко и от Божественных писаний свидетельство имущия, требуют же от искусных разсуждения. Понеже без разсуждения ниже та, яже благими почитаем, суть добра, или зане не благовременне, или зане не нужне, сиречь недостойне, или неразумне разумеем глаголемая. Яко не точию писание, но и прилучившийся вопрос, аще не внемлют ему оба, вопрошающий и вопрошаемый, далече отходит от разума глаголемых, и неминуемый наносит вред. Ибо и аз множицею пострадах вопрошаяй, и вопрошаемый: егда же, якоже подобает, разумевах глаголемая, послежде уразумев сие удивляхся: како подобна суть словеса, разумения же далече друг от друга отстоят. Тако и в прочих всех разсуждения требуем, како должни есмы творити, да соделаем волю Божию. Зане той весть естество наше известно, яко творец всяческих, и полезная нам устрои, и узаконоположи, не чуждая естества нашего, но свойственная сему, и точию к совершенству служащая хотящим вольне к нему вышеестественно взыти: сиречь, девство, нестяжание и смиренномудрие, а не благоразумие: (с. 555) сие бо естественно есть. Смиренномудрие же вышеестественно: зане всяку добродетель совершает смиренномудрый, и ничим должен сый, должника себя, и меньша всех вменяет. Благоразумный же должен сый, долг исповедует: якоже и благотворяй, от техже, еже имать, благотворит, и несть паче естества, якоже нестяжательный. Ниже вступивый в супружество, якоже девственник: вышеестественно бо есть сие дарование. Тако убо ов спасается, аще оставль своя хотения, исполняет Божия: ов же получит от Бога венец терпения и славу, яко не точию законами возбраненная оставль, но с ними и свое естество победив, Богу содействующу, вышеестественно Бога возлюби от всея души, и по силе подражав его безстрастию. Но понеже не разумеем мы не точию нас самих, и ради нас бываемых, но и намерения их, и искомаго от всех: сего ради писания Божественныя и словеса святых древних мужей, пророков глаголю, и праведных и новых святых отец, являются нам несогласна, и ныне хотящии спастися несогласни друг со другом, еже быти не может. Се малеми словесы и от естества вещей, вемы, яко, аще всяк человек восхощет спастися, ничтоже может ему воспятити, ни время, ни место, ни начинание. Точию да не без пользы вещь, юже хощет творити, совершает, но якоже подобает, с разсуждением, к Божию намерению обращая всяко разумение. Понеже не творимая суть нужна, но то, чего ради творима бывают, ниже невольне согрешаем, аще не с помыслом первее вольне сослагаемся, и в пленение впадаем. И тогда той плененнаго невольне, и не хотяща, к падению приводит. Подобне же, и по неведению бываемая согрешения, бывают от сущих по ведению. Аще бо кто не упиется или вином, или похотию, не невежствует. От упивания же начинает помрачатися ум, от сего согрешати, а от онаго умирати: темже не неведомо смерть прииде, но пиянство ведомое введе смерть неведомую. И много обрящет всяк наипаче (с. 556) же в разумениях, яко от вольных в невольная, и от ведомых в неведомая впадаем. Но понеже являются нам первая легка и сладка, сего ради во вторая приходим невольне и неведоме. Аще бо от начала восхотели быхом заповеди сохранити, и пребывати таковыми, якоже крестихомся: не бы пришли в сия злая, и требовали быхом трудов и болезней покаяния. Обаче и паки аще хощем, вторая Божия благодать, сиречь, покаяние может к первой возвести нас доброте. Аще же ниже о сей тщимся, нуждею, якоже и нераскаяннии демони, отидем с ними в вечную муку, аще хощем, аще не хощем. Не бо ради гнева сотвори нас Бог, но ради снабдения, да насладившеся благих его, благодарни и благомысленни пребудем ко благодетелю. Но нерадение наше о разуме даров его, в уныние нас приведе. А сие забвению подверже, от негоже неведение в нас воцарися. Егда же хощем положити начало, во еже обратитися, отнюдуже испадохом, многаго требуем труда: зане не хощем оставити хотений наших: но мним, яко с Божиими, и наше творити можем, еже не возможно есть. Сам бо Господь рече: не да творю волю мою, но волю пославшаго мя отца{Иоан. глава 6, ст. 38.}, хотя и едина воля есть отца, и Сына, и Духа, яко едина естества суть нераздельне. Но нас ради сие речеся, и по хотению плоти. Аще бо не умерщвлена будет плоть, и человек не будет весь водимь Духом Божиим: не может творити воли Божией без понуждения. Егда же воцарится в нас Благодать Духа: тогда не ктому свою имамы: но аще что будет. воля Божия есть. Тогда мир имамы, и сынове Божии нарекутся таковии, яко волю отчую любят, якоже и Сын Божий, и Бог. А сего не возможно никомуже обрести без соблюдения заповедей, имиже всякия сласти, сиречь, хотения своя отсецает, и всякия болезни о сем бывающия терпит. От безумия бо сласть и болезнь раждаются, якоже речеся прежде, и от сих всяка (с. 557) злоба, зане безумный самолюбив бывает, и не может быти братолюбив, ни Боголюбив, ниже имать воздержания от страстей, сиречь, хотений угодных сущих ему, ниже терпения скорбей. Но овогда достигшу ему воли своея, умножается в нем сласть и надмение: овогда же не достигнув, и болезнующ о сем, приходит в малодушие, и душевное удавление, еже есть предначинание геенны. От разума же, сиречь, мудрости, бывает воздержание и терпение. Понеже мудрый удерживает хотение свое, и терпит о сем болезнь, и почитая себя сластей недостойным, бывает благоразумен, и благодарен ко благодетелю, бояся, да не како ради многих благих, ихже дарова ему Бог в нынешнем веце, оттщетится в будущем. И тако водержанием, и в прочих добродетелях труждается, во всем должника себя вменяя. Ниже мало что обретает воздати своему благодетелю, но и самыя добродетели почитает вящшим долгом: приемлет бо, а не отдает. Сие же, яко сподобися возблагодарити Богу, и Бог приемлет благодарение его, почитает он вящшим долгом и присно благодарит, творя всякое благо, и всегда смиренномудрствуя, и вменяет себя вящшаго должника, и меньша всех. Радуяся о Бозе благодеющем ему, и веселяся со трепетом, и к Божественной неизменяемой любви теча смиренномудрием, скорбная приемлет, аки достоин. Паче же и большаго прилучающихся ему достойна себя быти вменяет, и радуется, яко сподобися мало пострадати в нынешнем веце, и облегчения прияти многих мучений, яже предуготова себе в будущем. И яко в сем познает немощь свою, и не возносится. А зане сподобися сия ведети, и претерпети по благодати Божией, в Божественное приходит желание. Смиренномудрие бо есть порождение разума, разум же порождение искушений. Уведевшему себе, дается разум всех. И повинуяйся Богу, покаряет себе всяко мудрование плоти, и по сих повинутся ему вся, егда воцарится смирение в членех его. (с. 558) Познаваяй бо себя, якоже глаголют святии, василий и григорий, находится посреде величия и смирения, яко умную имый душу, и яко мертвенное и земное тело никогдаже возносится, и не отчаявается: но стыдяся умнаго души, всех студных отвращается, и позная немощь свою, убегает всякаго возношения. Уразумевший убо немощь свою, от многих искушений телесных же и душевных страстей, познает безконечное Божие могущество, како он смиренных, вопиющих к нему приболезненною от сердца молитвою, избавляет. И таковому прочее сладостна молитва бывает. Ведый, яко без Бога ничтоже может сотворити, и страшася пасти, подвизается прилеплятися Богу, удивляется же помышляя, како избави его Бог от таковых искушений и страстей, и благодарит могущаго избавити его, и со благодарением смирение и любовь приемлет, и отнюд никогоже судити дерзает, ведяй, яко, како поможе ему Бог, тако и всем помощи, аще благоизволит, может, якоже глаголет святый ма_ксим. Может быть, что и возможет ктолибо братися со многими страстьми, и побеждати, себе же немощна суща почитает. И сего ради Бог вскоре поможе ему, да не погибнет совершенне душа его. И ина большая познаваяй, и немощи своя помышляя, пребывает непадателен. Невозможно же ктому достигнути сего, аще не претерпит многих искушений, душевных же и телесных. И силою Божиею, терпением подкрепляемь, навыкает искусу. Таковый же отнюдь не дерзает свое творити хотение без вопроса искусных, ниже свои разумения составити. Зане кая тому потреба, иже хощет чтолибо сотворити, или помыслити, не для жизни телесной, или Спасения душевнаго? Аще же кто не весть, кое хотение, и кое разумение должно есть оставити, да испытует всяку вещь и всяко разумение удалением от сего и воздержанием: и кое приносит стужение, и бываемо убо сласть, возбраняемо же болезнь, зло есть. И сие надлежит презрети, прежде нежели (с. 559) укоснит, и должно есть подвизатися победити то, внегда ощутит вред его. Сие же глаголю о всякой вещи и разумении, без негоже не можем живи быти телесне, и благоугодити Богу. Зане коснящееся обыкновение приемлет крепость естества, егда же не попустиши ему, ослабевает, и помалу истребляется: благий убо обычай и злый время питает тако, якоже дрова питают огнь. Сего ради подобает нам благому всею силою поучатися, и творити е, да приидет навыкновение, и самодвижне обычай творит, прилучившееся без труда, якоже отцы малыми победиша великая. Не хотяй бо имети нужней потребы телесней, но отвергаяй оную, да тесным и прискорбным путем шествует, когда в любостяжание приидет: не точию бо многое стяжание есть любостяжание, но и аще кто чтолибо имать пристрастне, или без потребы, или паче потребы. Понеже мнозии древнии отцы, аще и многое имеяху стяжание, якоже авраам, иов и давид, и инии мнози: но не бе в них пристрастия: вещи же имеяху, яко Божия, и онеми паче явишася благоугодити Богу. Господь же пресовершен сый, и единая самопремудрость, корень сего отсече: не точию бо имения и стяжания, последующим ему подражанием высочайшия добродетели, но ниже души, сиречь воли, и разумения своего имети повеле. И сие ведяще отцы убегаша мира, яко препинающа к совершенству, и не точию же сего, но и воли: никтоже бо из них когдалибо собственную волю сотвори. Но овии в повиновении телеснем, да имут вместо Христа, отца духовнаго на всяко разумение. Ови же в пустыни, и совершеннем удалении от людей, самого Бога имеяху учителем, за негоже произвольне и смерть претерпети восхотеша: овии же царский удержаша путь, сиречь, с единем или с двема добре безмолвствия, имеяху ко благоугождению Богу, друг друга советники благи. Нецыи же после повиновения повелением отца начальствовати иною братиею поставлени бывше, яко в повиновении живяху, сохраняя предания (с. 560) техже отец, и бысть всякое начинание благо. Ныне же, понеже не хощем ни в повиновении сущии, ни в начальствии, оставити своя хотения, сего ради никтоже в предспеяние приходит. Прочее пребысть, якоже и есть, удаление от людей и вещей житейских, во еже царским путем шествовати, и безмолвствовати с единем, или двема, и заповедем Христовым и всякому писанию поучатися день и нощь: да поне от онаго и от совести обличаемь быв, и внимательным чтением и молитвою достигнет ктолибо в первую заповедь, сиречь, страх Божий, бываемый от веры, и поучения в Божественных писаниях. И чрез сие в плачь да приидет, чрез негоже и в прочия заповеди, ихже нарече апостол, верою, надеждою, любовию: веруяй бо Господеви, боится муки, и бояйся муки, сохраняет заповеди, и храняй заповеди, терпит скорби, терпяй же скорби, стяжит надежду на Бога: надежда же отлучает ум от всякаго пристрастия: и отлученный от сего возымеет к Богу любовь. Сия идеже восхощет кто творити, спасется. Безмолвствие же, яко начало сущее очищения души, кроме труда вся заповеди устрояет произволяющему. Бежи, якоже речено бе некоему отцу, молчи, и безмолвствуй: сии бо суть корени безгрешия{В минеи чет. маиа 8, в житии арсениа великаго.}. И паки: бегай от человек, и спасешися: зане беседы не попущают уму видети ни согрешений своих, ни коварств демонов, да блюдет человек самого себя, ниже паки благодеяний и смотрений Божиих, да стяжет от сих разум Божий и смирение. Сего ради хотяй шествовати кратким путем ко Христу, сиречь, безстрастием и разумом, и с радостию достигнути совершенства, должен не инуду, сиречь, не десную, или шуюю страну, но во всем своем пребывании тщательне царским путем шествовати, крепко удаляяся приумножений же и оскудений, яко обоя сласти производят, и ниже излишеством брашен (с. 561) и бесед ум помрачати, и ослепляти его попечениями. Ниже паки продолжительным постом и бдением мысль возмущати. Но седмь виды, телесныя, глаголю, деяния добре с терпением делаяй, да восходит яко по лествице, непрестанно единою содержа сия седмь, и шествуя ко нравственному деянию, имже верующему даруются благодатию Божиею умозрения, якоже глаголет Господь: яко всяко писание Богодухновенно, и полезно есть{2 Тим. глава 3, ст. 16,}, и яко ничтоже может воспятити хотящаго спастися, ниже имать ин над нами власть, разве единаго сотворшаго нас Бога, иже и готов есть в помощь и в соблюдение от всякаго искушения, вопиющим к нему, и хотящим творити святую его волю. Без него бо никтоже может благое творити, ниже зло невольне терпети, аще не попустит он в наказание прегрешающаго, и во спасение души его. И яко лукавая дела от нас суть, и происходят от нашей лености и содействия демонов. Всяк же разум, добродетель же и крепость, благодать Божия есть, якоже и вся прочая. И яко по благодати даде нам область чадом Божиим быти{Иоан. глава 1, ст. 12.}, соблюдением заповедей его. И яко заповеди сии паче сохраняют нас, и благодать Божия суть. Понеже без благодати его, ниже их блюсти можем. И ничего не можем воздати ему, точию едину веру и произволение. И вкратце, вся правыя догматы от твердыя веры и слуха содержя, надлежит начинати делание по ряду, якоже учения во училищах, и тако тщательне предреченныя седмь деяния самым делом навыкати. Иже суть сия: %(Нужное и изрядное показание седми телесных деяний.%) Первое есть безмолвие, сиречь, безпопечительное жительство, отстоящее от всякаго житейскаго попечения, да возможет человек удалением от людей и попечений, убегати мятежа, (с. 562) и яко льва рыкающаго, ходяща и ищуща кого поглотити беседами и попечениями житейскими. И да едино попечение имать, како угодити Богови, и предуготовити душу неосужденну в час смертный, и со всяким тщанием, да познаем крадения демонов, и своя согрешения, паче песка морскаго сущая, яко прах тонкостию многим недоведомая. И присно плача сетует о естестве человеческом, утешаемь же бывает от Бога, яко благоразумный, и услаждается, яко достиже видети, яже не надеяшеся узрети, пребывая некогда вне своея келлии. И познав свою немощь и силу Божию, страшится и уповает, да ни дерзая падет от неразумия, ниже человеколюбие Божие забыв, приидет в отчаяние, аще чтолибо приключится ему. Второе, умеренный пост, сиречь, еже единожды ясти в день, и не насыщатися. Из простых брашен единаго роду, обретаемых безпопечительно, ихже не хощет душа, кроме аще где несть другаго, да победит чревобесие, гортанобесие, похоть, и пребудет безпристрастна, купно же да не от чего отнюд удаляется, зле отметая та, яже Бог сотвори добра зело. Ниже да вся вдруг пожрет невоздержне и сластолюбиве, но да ядый с воздержанием единожды на всяк день, употребляет вся во славу Божию, ни от чего не удаляясь, якоже зле творят проклятии еретицы. Вино же полезно есть во свое время: в старости бо и немощи, и в охладевшем сложении зело полезно есть: обаче и тогда мало. В юности же и теплоте естественней и здравии вода лучша есть. Обаче и сию зело мало: жажда бо есть лучша всех телесных деяний. Третие, умеренное бдение, сиречь половину нощи употребляти на сон, и половину на _псалмопение, молитву, стенания и слезы. Да умеренным постом и бдением, тело будет душе благопокоренно, здраво, и на всякое дело благое готово. Душа же да стяжет мужество, и просвещение во еже зрети и творити подобающая. (с. 563) Четвертое: _псалмопение, сиречь, телесная молитва, _псалмы и коленопреклонении совершаемая, да удручится тело, и смирится душа, и убежат врази наши демони, и приидут поборницы наши ангели, и да познает, кто откуду приемлет помощь. Да не како не ведый вознесется, мня яко собственныя его суть делания, и оставлен будет от Бога, ко еже познати свою немощь. Пятое: духовная молитва умом бываемая, отстоящая от всяких мыслей, в немже ум в глаголемых пребываяй, и с неисповедимыми сокрушениями припадаяй к Богу: того единаго просит, да будет воля Божия во всех своих начинаниях и разумениях, никакоже приемля помысл, или образ, или вид, или огнь, или свет, или ино что отнюд. Но яко от Бога зримь, и с ним единем беседуяй безвиден, необразовиден и невообразителен бывает. Сия бо есть чистая молитва, подобающая еще деятельному, умозрительному же иная большая сих предлежат. Шестое: чтение словес и житий отеческих, никакоже внемля странным, или другим какимлибо, паче же еретическим, догматом. Да уразумеет из Божественных писаний, и из разсуждения отец, како побеждати страсти, и стяжати добродетели, и да исполнится ум его словес Духа святаго: и да забудет прежняя неподобная словеса и разумения, яже слыша вне келлии быв, и да многим беседованием молитвы, и чтением приидет в мысли благи. Молитве бо вспомоществует чтение в безмолвии, и чтению чистая молитва, егда кто внемлет глаголемым, и неленостно чтет или поет, хотя и никакоже может уразумети, якоже подобает силу сих от помрачения страстей, аще и множицею от мнения прельщаемся. Паче же мнящии себе, яко имут мудрость мира сего, не ведяще же, яко деятельный разум потребен нам, да уразумеем сия, а не единем слышанием хотящему подобает уразумети разум Божий. Зане ино есть слышание, ино же деяние. Якоже бо от единаго слышания (с. 564) никтоже может соделатися художником, но от еже видети и творити, и много погрешати, и исправляему быти искусными, и терпением и отсечением своих хотений, и многодействием приходит в навыкновение художества: тако и духовный разум не раждается от единаго поучения, но от Бога даруется по благодати смиренномудрым. Ничтоже бо чудно есть, что чтущий писания, по крайней мере от части мнит ведети, паче же аще деятелен есть. Но не и разум Божий имеет таковый, но словеса имущих разум слыша. Яко мнозии писавшии имеяху разум Божий, якоже пророцы: но сей не у. Подобне и аз собрав из Божественных писаний, а не от Духа сподоблься слышати, но от слышавших от него услышах, якоже нецыи о некоем граде или человеце, от ведущих сия слышат. Седьмое: вопрошение искусных о всяком словеси и начинании, да не от неискусства, или самоугодия, иное вместо подобающаго разумея и творя, кто часто прельщается, и во мнение впадает, мняйся ведети, но не у что уразуме, по апостолу, якоже подобает{1 Кор. гл. 8, ст. 2.}. По сих седьми деяниях телесных, подобает имети терпение во всех приключающихся, яже попустит Бог к познанию, искусу и уведению нашея немощи: и ниже дерзати, ниже отчаяватися, аще чтолибо приключится ему благое, или злое. Всякаго же сновидения и всякаго слова и дела празднаго присно подобает отвращатися, поучатися же имени Божию, паче дыхания, во всяком времени, месте же и вещи, и припадати к нему от души, отвлекая ум от всех мира помыслов, и точию ищя, еже быти воли Божией. И тогда начинает ум зрети согрешения своя, яко песок морский. И сие есть начало просвещения души, и знак здравия ея. И кратце, бывает душа сокрушенна, и сердце смиренно, и меньшу всех (с. 565) вменяет себе воистинну, и начинает разумевати благодеяния Божия, особная, и общая, в Божественных писаниях обретаемыя, и наши прегрешения. Сохраняет же и заповеди в разуме от первыя до последния. Понеже Господь, яко на лествице положи их, и никто не может, преступив едину, достигнути когдалибо другия. Но якоже по степенем, тако от первыя приходит ко второй, от оной к третией, дондеже сотворят человека Богом, по благодати даровавшаго тыя произволяющим. %(О том, яко хотящий хранити заповеди. от страха Божия начинати должен есть, да не в пропасть поползнется.%) Аще же кто хощет преуспети, да паче на онех заповедех явит тщание, а не отинуде. Кроме же сея в стремнину, паче же в пропасть низпадет. Якоже бо в седми дарех Духа, никтоже может достигнути прочих, аще не начнет от страха: тако и в блаженствах Господних. Начало во премудрости, глаголет Давид, есть страх Господень{Псал. 110, ст. 10.}. Другий же пророк свыше о сем изрекши, рече: дух премудрости и разума, дух совета и крепости, дух ведения и благочестия, дух страха Божия{Исаии гл. 11, ст. 2 и 3.}. Да и Господь о страсе первее нача учити, глаголет бо: Блажени нищии духом{Матф. гл. 5, ст. 3.}, сиречь да будет всяк пронзен страхом Божиим, имея неисповедимое душевное сокрушение. Занеже Господь, яко основание положи заповедь сию, ведый яко без сея, аще бы кто и на Небеси жительствовал, не воспользуется, имея гордыню, еюже диавол, и адам, и инии мнозии падоша. И сего ради хотяй соблюсти первую заповедь, сиречь страх, якоже речеся, должен есть со многим тщанием размышляти прежденаписанныя приключения жизни, и безмерныя и неизследимыя Божия благодеяния: и вся, елика сотвори, и творит нас ради видимыми и невидимыми, заповедьми и догматы, прещении же (с. 566) и обетовании, храня, питая, промышляя, животворя, избавляя от видимых и невидимых врагов, молитвами и ходатайством святых его врачуя болезни, яже безчиние наше наносит нам, долготерпя присно о наших беззакониях, нечестиях и гресех, и о всех, елика сотворихом и творим, и елика имамы сотворити, от нихже да избавит нас Благодать его, и елико прогневляем его словом, делом и помышлением. И не точию терпит нам, но и вящше благотворит собою, ангелы, писанием, праведными, пророки, апостолы, мученики, учители и преподобными отцы. И разсмотряя овех страдания, овех же и подвиги, посем удивляяся снисхождению Господа нашего Иисуса Христа, житию его в мире сем, пречистым страстям его, кресту, смерти, погребению, воскресению, вознесению, пришествию святаго Духа, неизреченным чудесем, присно и на всяк день бываемым, раю, венцем, сыноположению, егоже сподоби ны, и всему, еже обдержит Божественное писание, и большая помышляя ужасается, разсмотряя человеколюбие Божие, трепещет и удивляется долготерпению, и снисхождению его к нам, и сетует о тщете, юже пострада естество наше: глаголю же о агг~ловидном безстрастии, о раи, и о всех благих, из нихже испадохом, и о всех злых, в нихже впадохом, глаголю же о демонех, о страстех и гресе: и сокрушается душею, размышляя, колико зол произыде от злобы нашея и коваства демонов. %(О второй заповеди, и о том, яко страх раждает плачь.%) И тако дарует ему Бог блаженный плачь, сиречь вторую заповедь. Блажени, глаголет Спаситель, плачущии{Матф. гл. 5, ст. 4.}, сиречь, о себе самех и о ближнем, от любви и сострадания. И плачет, яко над мертвым, от страшных разумений бываемых по (с. 567) смерти, и прежде смерти: плачет же со стенании из глубины сердца, и многими горькими и приболезненными слезы, и неисповедимыми рыдании. И ниже о чести, ни о безчестии печется: но и самую жизнь презирает, и многажды от болезни сердечныя и непрестанных плачей забывает и пищу. И тако благодать Божия, и общая всех мати дарует ему кротость, и начало подражания Иисусу Христу, сиречь, третию заповедь, якоже глаголет Господь: Блажени кротцыи{Матф. гл. 5, ст. 5.}. И бывает яко камень утвержденный, и никакоже колебимь ветром, или волнами житейскими: но единаков присно пребывает, во обилии и скудости, в благополучии и злоключении, в чести и безчестии, и кратце, во всякое время и при всякой вещи весть разсуждением, яко вся преходят, сладкая же и прискорбная, и яко житие сие есть путь к будущему веку, и яко аще и не хощем мы, бываемая прилучатся нам, и всуе смущаемся, и венец терпения погубляем, и Богу противляющимися являемся. Занеже вся елика творит Бог, суть добра зело: и мы не вемы. Наставит бо, глаголет писание, кроткия на суд{Псал. 24, ст. 9.}, паче же на разсуждение вещей. Но ниже во время преогорчения отнюд смущается таковый, но паче радуется, яко обрете время пользы и любомудрия, помышляя, яко кроме вины не бысть искушение. Но или Бога, или брата своего, или инаго кого оскорбил есть в неведении, или в ведении, и яко паче обретеся вина прощения его, да поне терпением приимет прощение многих зол своих, и яко аще не оставит брату своему долгов его, ни отец Небесный оставит ему долгов его, и яко несть кратшия добродетели сея, сиречь заповеди ко оставлению грехов. Оставите бо глаголет писание, и оставится вам{Матф. гл. 6, ст. 15 и след.}. И яко сподобися сия познати и творити подражанием Христу, кроток соделався благодатию заповеди. Сетует же о брате, яко ради грехов своих искушается брат от общаго (с. 568) врага, во уврачевание немощи его. Понеже всяко искушение, яко врачевство от Бога попускается для исцеления немощствующия души. Ибо дарует и преждебывших и настоящих оставление, и будущих зол возбранение. Не имать же похвалы ни диавол, ни искушаяй, ни искушаемый. Понеже диавол достоин есть ненависти, яко злотворец: не бо печася творит сие. Искушаяй же достоин есть помилования от искушаемаго, не яко любовию творяй, но яко наругаемь есть и удручаемь. Искушаемый же за своя согрешения, а не за другаго, терпит скорби, да имать похвалу. Ниже бо безгрешен есть: аще же и есть, еже есть невозможно, но терпит упованием мздовоздаяния, и страхом мук. И сии убо тако: Бог же богат сый, и всем полезная устрояяй, достоин есть Благодарения, яко и диавола и злобы человеческия долготерпеливо сносит, вознаграждая всякое благо, и прежде греха, и по гресе кающимся. Всякое убо разсуждение уразумев, сподобивыйся хранитель быти третия заповеди, да не како наругаемь будет в разуме, или неведении, но приемь дар смирения, вменяет себя ничтоже суща: кротость бо есть начало смирения, сия же дверь есть безстрастия, и сим неотпадаемую и совершенную любовь стяжет познавый естество свое, что бе прежде рождения, и что по смерти будет. Ибо человек ничто иное есть, как малое и вскоре исчезающее зловоние, и хуждший есть всей твари. Занеже никакая иная тварь бездушная, и одушевленная, никогдаже не преврати совета Божия, но якоже человеческое естество, много убо благодетельствуемо, много же Бога присно преогорчевающее. И тако сподобляется четвертыя заповеди, сиречь, желания к стяжанию добродетелей. Блажени, глаголет писание, алчущии и жаждущии правды{Матф. гл. 5, ст. 6.}, и бывает якоже жаждаяй и алкаяй всякия правды, сиречь добродетели телесныя и нравственныя, сиречь душевныя. Егда бо кто не вкусит (с. 569) чего, не весть чего лишается, глаголет великий василий. Но вкусивый, зело желает. Тако и вкусивый сладости заповедей, и ведый, что вмале приводят его заповеди к подражанию Христу, зело желает стяжати прочия, яко их ради и смерть многажды презирает. Ощутив же мало нечто от сокровенных в Божественных писаниях таин Божиих, зело жаждет уразумети их, и елико приемлет разум: множае жаждет и воспаляется. якоже пияй пламень: занеже непостижимо всем Божественное, сего ради присно пребывает жаждаяй. И яко убо здравие и болезнь для тела, тако добродетель и злоба для души, и разум и неразумие для ума: и елико кто тщится о благочестии, сиречь, о деянии, толико ум просвещается в разуме, и тако сподобляется милости пятою заповедию, якоже глаголет Господь: блажени милостивии{Матф. гл. 5, ст. 7.}. Милостивый же есть милуяй ближняго от тех, яже сам приял есть от Бога, аще стяжания, аще брашна, аще крепость, аще слово на пользу, аще молитву, и аще имать силу помиловати молящаго его, вменяя себя должника быти: зане прият большая того, еже истязуется от него: и яко сподобися, якоже Бог, милостивым нарицатися, таже и от Христа, в нынешнем и будущем веце, пред всею тварию. И яко чрез брата Бог требует у него, и должник ему бывает: и яко убо кроме просимаго от него, может убогий жив быти, кроме же еже миловати по возможности своей, не может той жив быти, или спастися: зане аще не хощет ущедрити естества своего, како Бога молит ущедрити его? И тако и иная многа помышляя, сподоблься заповедей, дает не точию своя, но и душу свою за ближняго. Сие бо есть совершенная милостыня, якоже и Христос смерть нас ради претерпе, всем показав образ и пример, да друг за друга умираем: не точию же за другов, но и за врагов, времени требующу. (с. 570) Несть же нуждно имети вещь, сиречь, ко еже миловати, сие паче великая немощь есть, но да и отнюд не имеяй чим миловати, благоутробие ко всем имать, егоже стяжав, может помощи требующим, безпристрастен убо быв к вещам житейским, к человеком же имый сострадание. Но ниже учити подобает тщеславия ради, не показав первее делом, да врачуяй немощствующих души, не явится сам немощнейший паче требующих врачеватися. Понеже всякая вещь требует времени и разсуждения, да не безвременне, или кроме потребы что будет. Немощному бо лучше есть удаление от всех, и нестяжание много лучше есть милостыни. Безпристрастия же ради сподобляется шестыя заповеди, якоже глаголет Господь: Блажени чистии сердцем{Матф. гл. 5, ст. 8.}, сиречь, всяку добродетель совершившии святыми помыслы, и доспевшии во еже видети вещи по естеству их: и тако мира помыслов достигает таковый. Блажени, глаголет писание, миротворцы{Матф. гл. 5, ст. 9.}, сиречь, умиротворяющие душу и тело, да покорят плоть духу, да не ктому пожелает плоть на духа, но благодать святаго Духа да царствует в душе, и да руководствует ю, якоже хощет, даровавши Божественный разум, имже может таковый претерпевати гонение, поношение и озлобление правды ради, и радоватися, яко мзда его многа на небесех. Вся бо блаженства Бога, по благодати творят человека соделавшася кротким, жаждущим всякия правды, милостивым, безстрастным, миротворцем, терпящим всяку болезнь с радостию любве ради Божия и ближняго. Темже сия дары суть Божия, и мы должни есмы зело благодарити ему сих ради, и о предложенных возмездиях, сиречь, Царствии небесном в будущем, и о утешении зде, и исполнении всякаго блага и щедрот от Бога, и о явлении Божии, умозрением сокровенных таин в Божественных писаниях, и во всех тварях его, и о мнозей мзде (с. 571) на Небеси, подражание быв Христу на земли и блаженство коейждо заповеди сиречь, верховнейшее благо, и конец желаний. Понеже, по апостолу, сам Бог един есть блажен, во свете живяй неприступнем{1 Тим. гл. 6, ст. 16.}. Но аще и долг имамы хранити, паче же сохранены быти от заповедей: человеколюбивый же Бог дарствует возмездия, и зде и тамо, от заповеди верующему ему. Всех же сих ради, от блаженнаго плача бываемых, ум приемлет облегчение страстей, примиряяся с Богом о гресех своих, горькими и многими слезами: сраспинается убо умне Христу, нравственным деланием сиречь, соблюдением заповедей якоже речеся, и хранением пяти чувств, да ничтоже отнюд сотворят вне потребы. Ум же, удерживая безсловесная стремления, начинает обуздывати сущия о нем страсти, глаголю же, ярость и желание. И овогда свирепеющую ярость утоляет мягкостию желания, овогда же жестокостию ярости утоляет желание. И пришед в себе ум, познает свое достоинство, яко самодержец есть, и приемлет зрение вещей по естеству их. Отверзается бо ему левое око, еже ослепи диавол обладанием страстей, и сподобляется человек спогребстися Христу умне от вещей мира, и не ктому крадомь бывает внешним благообразием, но взирает на злато и сребро, драгое камение, и познает, яко от земли суть, якоже и прочая бездушная, камение же и древеса. Подобне и человека, аки тление, и малу персть во гробе по смерти суща, и вся сладкая жития нивочтоже вменяя, видит присно изменения их со многим советом от разума бывающим. И соделовается мертвым мирови, и с радостию мир умерщвляется ему, и не ктому имать понуждение, но паче покой и безпристрастие. И тако чистотою души сподобляется умне воскреснути со Христом, и приемлет крепость видети безстрастне внешняя (с. 572) благолепия вещей, и прославляет ими сотворшаго вся, и зря в чувственных тварях силу и промысл Божий, благость же и премудрость, по апостолу, и зря сокровенная в Божественных писаниях тайны, ум сподобляется вознесения со Христом видением мысленных тварей, сиречь, разумом умных сил, и разумевая от многих слез разума и радости, от видимых невидимая, от привременных вечная умствует. Понеже аще привременный, мир сей, именуемый изгнанием и осуждением преступивших заповедь Божию, толико прекрасен есть, кольми паче вечная и недоразумеваемая благая, яже Бог уготова любящим его. И аще оная благая неудоборазумеема суть, по превосходству своему: кольми паче Бог вся сия из ничего сотворивый. Аще бо кто упразднится от всех, и печется о телесных и душевных деяниях, нарицаемых от отец благочестием: не доверяет же всякому сонию, и своему уразумению не имущу свидетельства от писания и всякия праздныя беседы убегает, да совершенно не слышит, или не чтет чеголибо празднаго, паче же о ереси: умножатся в нем разума и радости слезы, тако, яко пити я от множества их: и приходит в другую молитву чистую, подобающую умозрительному. Якоже бо ина чтения тогда подобает имети, и ины слезы: тако и ныне, понеже ум достиже духовных видений, сего ради отныне должен есть чести вся Божественная писания, яко не бояся неудобопостижимых глагол писания, якоже деятельнии еще и немощнии неведения ради. Укоснением бо и подвигами, в телесных и нравственных деяниях сораспятся Христу и спогребеся разумом вещей, естеством же и изменением: совоскресе же безстрастием и разумом Божественных таин, в чувственных его творениях сущих, от негоже с ним в премирная взыде, разумом мысленных и сокровенных в Божественных писаниях таин. От страха во Благочестие: от негоже ведение, имже совет, (с. 573) сиречь, разсуждение: от негоже крепость, от сея разум, и приходит в премудрость. Всеми бо реченными деяниями и видениями сподобляется чистыя и совершенныя молитвы, бываемыя от мира и любве Божия, и вселения святаго Духа. И сие есть глаголемое, стяжи Бога в себе, и явление и вселение Божие, якоже рече златоуст, да будут тело и душа по возможности, якоже Христовы, безгрешны, и да имамы ум о Христе разумевающ Духа благодатию и премудростию, еже есть разум Божественных и человеческих вещей. %(О четырех добродетелех души.%) Виды же премудрости суть четыре: мудрость, сиречь, разум, яже творити и не творити подобает, и бодрость ума. Целомудрие, сиречь, еже целу быти мудрованию, яко да возможет удерживати себе вне дела, слова же и помышления неугоднаго Богу. Мужество, сиречь, крепость, и терпение в трудех сущих по Бозе, и искушениях. Правда, сиречь, разделение, подающа всем сим равное. Сия же четыре главныя добродетели раждаются от трех душевных сил, сице: от словесныя убо части, сиречь, ума, две, мудрость и правда, сиесть, разсуждение: от желательныя же, целомудрие: от яростныя же, мужество: каждая же стоит среди двою страстей вне естества. Мудрость, горе убо от еже презирати, долу же от безумия: целомудрие, горе убо от окаменения, долу же от блуда: мужество, горе убо от дерзости, долу же от боязни: правда, горе убо от малостяжания, долу же от лихоимства. И сии четыре суть образ небеснаго, осмь же земнаго. Вся же сия известне убо весть Бог, якоже преждебывшая, настоящая же и грядущая: от части же, иже по благодати Божией делом научися от него, и сподобися быти по образу и по подобию его. Глаголяй бо ведети, якоже подобает от единаго слуха, прельстися. Зане человечь ум без руководителя не может взыти на небо когда, ниже паки, не возшед и (с. 574) увидев, рещи что, еже не весть: но аще что от писания слыша, сие точию подобает от слышания глаголати со благоразумием, и исповедати отца слова, якоже рече василий великий. И мнящийся разум имети, пребывает хуждший невежды. Мнение бо не попускает быти мнимому, глаголет святый ма_ксим. Похвально же бывает неведение, якоже глаголет златоуст, аще кто в разуме весть, яко не весть. Есть же невежество, паче всякаго невежества, егда ниже весть кто, яко не весть. Бывает убо и разум ложен, аще кто мнит ведети, ничтоже ведый по апостолу{1 Кор. гл. 8, ст. 2.}. %(О деятельном разуме.%) Есть же разум истинный, и есть неведение совершенное, лучше же всех разум деятельный: зане кая польза человеку, аще всяк разум имый, паче же приемый от Бога по благодати, якоже соломон? яко не возможно есть такову другому быти когда, и в вечное мучение отити, не приемь извещения от дел и твердыя веры свидетельством совести, яко свобождается будущия муки, внегда не зазирати себе самаго, яко вознераде о чемлибо из должнаго по возможности его, якоже глаголет святый иоанн Богослов: Аще сердце наше не зазрит нам, дерзновение имамы к Богу{1 Иоан. гл. 3, ст. 21.}. Но обаче, якоже глаголет святый нил, яко и сама совесть прельстися, омрачением страстей быв поругана, якоже глаголет лествичник. Аще бо единая злоба помрачати ум обыче, глаголет великий василий, и мнение творит слепа, и не попускает быти мнящемуся: что прочее убо речем о работающих страстем? мнят ли себе имети чисту совесть, и паче же видяще апостола павла, имуща в себе Христа, словом и делом глаголавша, яко ничтоже себе свем согрешающа, сиречь, но не о сем оправдаюся{1 Кор. гл. 4, ст. 4.}? мнозии бо от великаго нечувствия мним, яко есмы что, (с. 575) ничтоже суще. Но егда, глаголет апостол, рекут имети мир, тогда грядет к ним погибель{1 Солун. гл. 5, ст. 3.} занеже не имеяху мира, но глаголаша мняще мир имети, якоже глаголет златоустый, от многаго нечувствия. И якоже глаголет святый иаков брат Божий о таковых, яко забытливи бывающе о своих согрешениях{Иаков. гл. 1, ст. 25.}. Забыша себе мнозии от гордых, глаголет лествичник, мнящеся безстрастие имети. И аз убо триех исполинов диаволих трепеща, о нихже написа святый марк постник, сиречь, уныния, забвения и неведения, яко присно от них обдержимый, и бояся, да не како забыв свою меру, обрящуся вне праваго пути, якоже глаголет святый исаак, написах настоящее собрание. Ненавидяй бо обличения являет, яко страсть гордости ознаменова его, глаголет лествичник: притекаяй же, разрешается от уз. И соломон, несмысленному вопросившу о мудрости, мудрость вменится{Притч. гл. 17, ст. 28.}, рече. Сего ради и имена книг и святых в начале положих, да не како глаголя о коемждо, чие есть, продолжится слово. Ибо и святии отцы словеса Божественных писаний, часто писаху тако, якоже находятся: якоже григорий Богослов соломонова, и прочии. И якоже словописатель симеон метафраст рече о златоусте, яко не право есть оставляти словеса его, глаголати же моя, аще бы и могл: от тогожде бо Духа святаго вси прияша. Но ова нарицают, чие есть речение, яко тем красящеся смирения ради, предпочитающе словеса писаний: ова же безыменна оставляют множества ради, да не продолжится слово в долготу многую. %(О том, яко телесныя добродетели суть орудия душевных.%) Понеже лучше есть частшее воспоминание, сего ради множайшая реченных глаголати начну. И яко не моя суть сия, (с. 576) но Божественных писаний, и святых мужей словеса и разсуждения. Глаголет бо дамаскин, яко телесныя добродетели, паче же орудия добродетелей потребни суть, егда кто во смирении, и разумом духовным сия проходит: зане кроме сих ниже душевныя добродетели бывают. Аще же не тако, но сами о себе: ничтоже пользуют, якоже растения без плодов: ниже без упражнения и воли может кто научитися когда добре и тверде художеству. Сего ради по деянии требуем и разума, и всеми упражнения по Бозе от всех, и тщания о Божественных писаниях, без негоже никтоже может когда стяжати добродетель. И сподобивыйся убо совершенне и присно упражняющийся, верховнейшее приемлет благо. А иже не тако, поне от части да не вознерадит. Но блажени суть совершенно упражняющиися или в повиновении комулибо деятельному и безмолвствующу по разуму, или в безмолвии и безпопечении от всех повинуяся воли Божией, со извеством и советом искусных во всяком начинании словес и разумений, хотящии паче без труда достигнути безстрастия и разума духовнаго совершенным по Бозе упражнением, якоже сам он чрез пророка рече: упразднитеся и разумейте, яко аз есмь Бог{Псал. 45, ст. 11.}. Но житейстии человецы, иже, глаголю, в мире, и наипаче монаси, хотя от части упразднимся, якоже древнии праведницы, испытовати окаянную душу прежде смерти, и да приобрящем ей исправление, или смирение, а не конечную погибель совершенным неразумием, и в ведении и неведении бываемых согрешений. Давид бо царь бяше, на всяку нощь омочаше слезами постелю свою{Псал. 6, ст. 7.}, от чувства Божественнаго страха, якоже глаголет иов: ужасошася власи мои, и прочее. И мы убо хотя часть некую дни и нощи? якоже житейстии человецы, упразднимся, и увемы, что имамы отвещавати праведному судии в страшный день суда. И о сем паче попечемся, яко о нужнем, страха ради (с. 577) вечныя муки, неже како жити имут убозии, и обогащатися сребролюбцы: и да не все наше попечение о житейских делех имамы безумне, якоже глаголет Божественный златоуст, яко делати убо подобает, но не пещися и молвити о мнозе, якоже рече Господь марфе{Луки гл. 10, ст. 41.}. Понеже попечение житейское не попущает пещися о своей душе, и ведети, в немже есть устроении, якоже весть упраждняяйся и внимающий себе самому, якоже глаголется в законе: Внемли себе и прочая{Второзак. гл. 15, ст. 9.}. И о сем убо глаголе великий василий написа досточудное и всякия премудрости исполненное слово. %(О том, яко невозможно иначе спастися, точию трезвенным вниманием и блюдением ума.%) Кроме же внимания и бодрости ума не возможно спастися нам, избавитися от диавола, яко льва рыкающа, ходяща и ищуща поглотити кого, якоже глаголет дамаскин. Сего ради множицею ученикам своим глаголет Господь: Бдите и молитеся, яко не весте, и прочая{Марка гл. 13, ст. 33.}. Предвозвещаяй сим всем о памяти смерти, да будем готови ко ответу приятну, сущу от дел и внимания. Понеже демони, якоже глаголет святый иларион, суть невещественнии, безсоннии, и всякое попечение имут во еже ратовати ны, и погубити души наша словом, делом же и помыслы, мы же не тако: но овогда о наслаждениях печемся, и преходящей славе, овогда же о житейских вещех, и о других многих присно: и никаковой части не хощем имети на испытание нашего жития, да возможет ум от сего прияти навыкновение, и без упражнения множицею внимати себе, якоже глаголет соломон: Якоже посреди сетей многих ходиши. О нихже писа златоуст, со многим извеством и совершенною премудростию изясняя: что суть сия: Господь же, всяко попечение отсещи хотяй, повеле нам презирати (с. 578) и самую пищу и одежду, да едино попечение имамы, како спастися, яко серна от ловитвы, и аки птица от сетей, и да достигнем острозрения сего животнаго, и высокопарения птичияго безпопечением. И сие чудно есть, яко соломон царь быв изрече сия, и отец его такожде глаголал есть и творил. И с толицем вниманием, и многими подвиги во всякой премудрости и добродетели суще, с толикими дарами и явлением Божиим, увы! от греха побеждени быша, яко ов вкупе, и прелюбодеяние и убийство оплакивал{2 Цар. гл. 11, ст. 4 и 15.}, ов же в толикая лютая впаде{3 Цар. гл. 11, ст. 30.}. Несть ли сие исполнено трепета и ужаса имущим ум, якоже глаголет лествичник и филимон постник? Како убо не ужасаемся и не бегаем попечения житейскаго, за немощь нашу, ничтоже сущии, но якоже безсловесная, нечувственни есмы. И _о да бых, якоже безсловесная, окаянный аз естество мое сохранил, яко пес лучший мене есть, и прочая. %(О том яко хотящии видети себе самих, в коем нраве суть, не инако, точию удалением своих хотений, и повиновением, и безмолвием: паче же от страстей обладаемии.%) Аще бо хощем видети себе самих, в коем смертоноснем нраве есмы, да бежим своих хотений и житейских вещей, и удалением от всего да пребываем притрудне в блаженнем и по Бозе сущем упражнении, ищя койждо своея души поучением в Божественных писаниях, или в совершеннем повиновении души же и тела, или в приснопесненнем пребывании ангельстем, безмолвии: паче же страстнии и неудержнии суще в своих похотениях, малых и великих же. Седи в келлии твоей, и та всему тя научит. и паки: безмолвие есть начало очищения души, якоже глаголет великий (с. 579) василий. И соломон, попечение лукаво даде Бог сыновом человеческим{Еккл. гл. 1, ст. 13.}, глаголет, пещися о суетных, да не от безсловесныя и страстныя праздности уклонятся в горшая яве. Избавивыйся же благодатию Божиею от обоих стремнин, и монах сподобивыйся быти, носяй же агг~ловидный и иноческий образ, да явится сим подражание единому Богу, по возможности делом и словом, якоже глаголет великий дионисий. Како не должен есть упражнятися присно, и внимати уму во всяком деле, и имети непрестанное некое поучение по Бозе о устроении, в неже достиже: якоже к новоначальным глаголют святии отцы, ефрем и прочии. Ов убо должен есть _псалом имети во устех, ов же стих, и друзии умом во _псалмех и тропарех внимати, глаголюще: яко не у сподобишася еще приити в видение некое, сиречь, разум, да никакоже обрящется кто, или делаяй, или путешествуяй, или возлегаяй почити вне некоего поучения. Исполнив же определенное ему правило, абие ум в некоем поучении заключити должен есть, да не обрет его враг праздна от памяти Божия, приложит таяжде злая. И сия убо ко всем рекошася. Егда же кто многими подвиги, телесными, глаголю, добродетелями и душевными в духовное, сиречь, мысленное делание, благодатию Христовою умне взыти возможет, сиречь, в плачь о душе своей: тому подобает мысль, приносящую приболезненныя слезы, яко зеницу ока хранити, якоже глаголет лествичник, дондеже огнь и вода смотрительне не отидут, сиречь, за возношение. Огнь убо есть сердечная болезнь, и теплая вера: а вода, слезы. Не всем же даются сия, глаголет великий афанасий, но сподобившимся прежде смерти, и по смерти сущая лютая зрети непрестанною о них памятию в безмолвии, якоже глаголет исаиа: Ухо безмолвствующаго слышит дивная. И паки: Упразднитеся и разумейте. Сие бо (с. 580) едино разум Божий раждати обыче, яко паче могущее помощи и зело страстным и немощным, чрез безпопечительное пребывание и удаление от людей, и помрачающих ум бесед, и попечений не точию житейских, но и ничтожных, и мнящихся безгрешными быти, якоже глаголет лествичник: Малый влас смути око, и проч.: и святый исаак: не мни, яко имети злато или сребро, сребролюбие сие точию есть, но и к чемулибо прилежит помысл. И Господь глаголет: Идеже сокровище ваше, ту и сердце ваше будет{Матф. гл. 6, ст. 21}, аще в Божественных, аще в земных вещех и помышлениях. Сего ради всем приличествует безпопечение, и еже упражнятися по Бозе, да аще от части житейстии суть, якоже речеся, по малу приидут в мудрость и разум духовный, или аще могут совершенне упражнятися, и всяко имети попечение, во еже благоугодити Богу, да узрит Бог произволение их, и дарует им покой духовным разумом, достигнути их, и сотворит поучения в первом видении, ко еже стяжати неизглаголанное сокрушение души, и быти нищими духом. И тако по малу в прочия видения возводя, сподобит их соблюдения блаженств, дондеже достигнут мира помыслов, иже есть место Божие, якоже глаголет святый нил, прием употребление из _псалтири. И бысть, глаголет, в мире место его{Псал. 75, ст. 3.}. %(О осми умных видениях.%) Духовная же видения, якоже мню, осмь суть, и седмь нынешняго века, осмое же есть, делание будущаго, якоже глаголет святый исаак. Первое убо есть разум, якоже глаголет святый дорофей, скорбей и искушений жития сего, и сетует о всякой тщете, юже претерпе естество человече от греха. Второе, разум своих согрешений, и благодеяний Божиих, якоже глаголет лествичник, святый исаак, и другие мнозии из отец. (с. 581) Третие, разум лютых сущих прежде смерти, и по смерти, якоже в Божественных писаниях обретается. Четвертое, уразумение о житии Господа нашего Иисуса Христа в мире сем, и учеников его, и прочих святых, мучеников же и преподобных отец дела и словеса. Пятое, разум естества, и изменения вещей, якоже глаголют святии отцы, григорий и дамаскин. Шестое, видение сущих, сиречь, разум и уразумение чувственных созданий Божиих. Седмое, уразумение умных созданий Божиих. Осмое, разум о Бозе, глаголемое Богословие. Из сих убо осми видений три убо подобают деятельному, да многими и горькими слезами возможет очистити душу свою от всех страстей, и приимет от Бога по благодати, и прочая. Пять же умозрительному, сиречь, разумительному: за еже добре хранити, и присно творити деяния телесная, и нравственная, сиречь, душевная. От нихже сподобляется явне, и умне чувства сих. От перваго бо приемлет начало деятельный разум: и елико по сему прилежит к деланию, и поучается в даемых ему разумениях, и предуспевает в них, дондеже в навыкновение сих приидет. И тако сам по себе ин разум приходит во ум, якоже и прочия. По да будет ясно глаголемое, от части реку, аще и не могу глаголати, о коемждо видении. И что суть разумеваемая и глаголемая: Да обрящем вину уразумети себе, како должни есмы творити, егда благодать начнет отверзати очи души, во еже разумевати, и ужасатися от разумений, и глаголати могущим вселити в нас страх, якоже речеся, сиречь, сокрушение души. (с. 582) %(Нужное показание о первом разуме, и о том, како подобает начинати оный.%) Первый разум есть, егоже ради даруются прочия произволяющему. Сподобивыйся убо приити во оный, сице должен есть творити. Сести к востоком, якоже некогда адам, и размышляти тако: седе адам тогда, и плакася прямо сладости рая, рукама бия лице, и глаголаше: Милостиве! помилуй мя падшаго. Такожде и ин икос: видя адам ангела изринувша, и затворивша Божественнаго вертограда дверь, воздохну вельми, и глагола: Милостиве! помилуй мя падшаго. Потом разсмотряя бывающая, тогда начинает плачь сице, воздыхая от всея души, и колебля главою своею, глаголет с болезнию сердца: Увы мне грешному! что пострадах? увы мне! что бех, и что соделахся? увы мне, что погубих, и что обретох? Вместо рая, тленный сей мир: вместо Бога и пребывания со ангелы, диавола и нечистых демонов: вместо покоя, труд: вместо наслаждения и радости, скорбь мира и печаль: вместо мира и непрестаннаго веселия, страх и приболезненныя слезы: вместо добродетелей и правды, неправду и грехи: вместо благости и безстрастия, лукавство и страсти: вместо премудрости и усвоения к Богу, неразумие и изгнание: вместо безпопечительности и свободы, многопопечительную жизнь, и горчайшее рабство. Увы, увы! како царь сотворен бых, и раб страстем безумием моим соделахся? Увы мне окаянному! како преслушанием вместо жизни, смерть привлекох? Увы мне! увы мне! что претерпех окаянный от безумия моего? что сотворю? Отсюду рати, и отсюду смущения. Отсюду болезни, и отсюду искушения. Отсюду беды, и отсюду кораблекрушения. Отсюду страси, и отсюду печали. Отсюду страсти, и отсюду греси. Отсюду горести, и отсюду теснота. Увы мне окаянному! что сотворю? камо бежу? Тесна ми вся, якоже глаголет сусанна{Даниил. гл. 13, ст. 22.}. Не вем, чего (с. 583) искати ми. Аще бо жизни просити буду, боюся искушений жития, и премен его, и приключений. Вижду ангела, сатану, аки денницу прежде возсиявша, и диаволом соделавшася, и глаголемаго. Первозданнаго изгнанна: каина братоубийцу: ханаана проклята: содомлян огнесожженных: исава отпадша, Израильтян под гневом сущих: гиезиа и иуду апостола отпадших, недуговавших сребролюбием: великаго пророка и царя, о двою гресех плачуща: соломона с толикою премудростию отпадша: сущих от седми диаконов и четыредесяти мучеников испадших, якоже глаголет великий василий: радуяся злоначальник восхити от двоюнадесяти окаяннаго иуду, из едема человека, и от четыредесяти мученик отпадшаго: егоже оплакивая, паки тойже глаголет: суемудрый и достойный плача, иже обоего живота лишися, огнем бо растая, и ко огню отиде неугасимому. И мнози ины падша, ихже несть числа, не точию же неверных, но и многих от отец по многих трудех. Кто бо есмь аз хуждший, и нечувственнейший и немощнейший всех? что убо реку о себе самом? Понеже авраам нарицает себя землею и пеплом{Быт. гл. 18, ст. 27.}: давид псом умершим, и блохою во Израили{1 Цар. гл. 24, ст. 15.}: соломон отроком малым неведущим деснаго и шуяго{3 Цар. 3, ст. 7.}: трие отроцы, студ и поношение быхом{Даниил. гл. 3, ст. 33.}, глаголют: пророк исаиа, окаянен есмь аз{Исаии гл. 6, ст. 5.}, глаголет: пророк аввакум, и аз есмь юнший, глаголет. Первый апостол нарицает себя грешника, и прочии вси глаголют ничтоже быти себе. Что убо сотворю аз? где сокрыюся от многих ми зол? что буду, ничтоже сый и хуждший ничтожества? Ибо ничтожество не погреши, ниже облагодетельствовано бысть, якоже аз. Увы! како имам совершити прочее время жизни моея? или како возмогу убежати сетей диавольских? бесове безсонни и невещественнии: смерть же близ есть, и аз немощен. Господи, помози ми. Не остави созданию твоему погибнути, яко ты печешися (с. 584) о мне окаяннем. Скажи ми, Господи, путь, в оньже пойду, яко к тебе взях душу мою{Псал. 142, ст. 8.}. Не остави мене, Господи Боже мой, не отступи от мене: Вонми в помощь мою, Господи спасения моего{Псал. 37, ст. 22 и 23.}. И сице сокрушится душа в таковых глаголех, аще хотя от части чувство имать. Пребывающу же ему в сих, и навыкшу страху Божию, начинает ум разумевати и разсмотряти словеса втораго видения, иже суть сия. %(О втором видении.%) Увы мне окаянному! что сотворю? что буду? Много согреших: много облагодетельствован бых: много немощствую. Искушения многа, уныние обдержит мя. Забвение помрачает мя, и не попускает мя зрети себе, и множество зол моих. Неведение зло, преступление в разуме горше. Добродетель неудобьсовершаема. Страсти мнози, демони лукави, грех удобен, смерть близ, словоиспытание горько. Увы ми! что сотворю? камо бежу от себе? Понеже аз есмь вина погибели моея: самовластием бо почтен бых, и никтоже мя может нудити. Аз убо согреших, и присно согрешаю, и нерадею о всяком деле блазе, нудящаго же не обретается: кого убо имам обвинити? Бог благ и человеколюбив, желая присно моего к нему обращения и покаяния. Ангели любят мя, и хранят. Человецы такожде предспеяния моего хотят: демони не могут нудити никогоже не хотяща погибнути, или нерадением, или отчаянием. Кто убо виновен есть, точию сам аз окаянный? Се мало познах, яко погибает душа моя: и не хощу начала благочестию положити. Чесо ради душа моя нерадиши о себе? чесо ради не срамляешися пред Богом и ангелами его согрешающи, якоже стыдишися человеков? Увы ми окаянному, увы мне, увы мне! Зане ни якоже человека стыждуся творца моего и владыки. Пред единем бо (с. 585) человеком не могу согрешати, но всяку хитрость творю, да покажу себя праводеющим. Но стоя пред Богом, лукавая помышляю, и глаголати многажды не стыждуся. _О безумия моего! злое творяй Бога видящаго е, не боюся: и не могу единому человеку глаголати яже о мне ко исправлению. Увы мне! Увы мне! яко муку вем, каятися же не хощу. Небесное царствие люблю, а добродетели не стяжах: Бога быти верую, а заповеди его присно преступаю: диавола ненавижу, а угодная ему творити не престаю. Аще молюся, нерадею, и яко нечувственный пребываю. Аще пощуся, возношуся, и более осуждаюся. Аще бдю, мнюся нечто творити, да ниже сие полезно будет. Аще чту, едино от двою зол творя нечувственный пребываю. Или многоучения ради и тщеславия сие творю, и более помрачаюся, или ведый, и не творяй более, осуждаюся. Аще же действом по благодати Божией согрешати и престаю, но словом согрешати присно не престаю: аще же и от сего благодать покрыет мя, помыслы Бога всегда прогневляю окаянный. Увы! Увы! Что сотворю? Камо ни гряду, грехи обретаю. Повсюду демони. Отчаяние горше всего: аз Бога прогневах, ангелы такожде опечалих, человеки многажды повредих и соблазних. Хотех слезами отмыти рукописание согрешений моих, Господи, и прочее живота моего покаянием Благоугодити тебе, но враг мя искушает, и борет душу мою: Господи, прежде даже до конца не погибну, спаси мя. Согреших тебе, Спасе, якоже блудный сын, приими отче кающагося, и помилуй мя Боже. Вопию ти, Христе Спасе, мытаревым гласом: очисти мя, якоже онаго, и помилуй мя Боже. Что убо будет в последния, или что будущее? Увы ми окаянному, увы мне! Кто даст главе моей воду? или очима моима источник слез? кто мя оплакати возможет достойно? Понеже аз сего сотворити не могу. Приидите горы, покрыйте мя окаяннаго. Горе, горе! что имам рещи? _о коликая (с. 586) блага сотвори ми Бог, яже он един весть, и коликая зла неразумие мое показа! Словом, делом и мыслию всегда прогневляю моего Благодетеля. И колико он долготерпит, толико я нерадею окаянный, и нечувственнейший сый бездушных каменей. Обаче не отчаяваюся, но познаю твое человеколюбие. Покаяния не стяжах, но ниже паки слез: сего ради молю тя, Спасе, прежде конца обратити, и дати ми покаяние, яко да избавлюся от муки. Господи Боже мой! не остави мене: ничтоже бо есмь пред тобою, но грешен весь, и где убо обрящу чувство многих моих зол? само бо сие, еже не творити ми, велие есть осуждение. Мене ради небо и земля, мене ради четыре стихии, и из них бывающая, якоже глаголет Богослов. Прочая же умолчу, яко несмь достоин глаголати что, от множества зол моих. Безмерная бо мне бывшая благодеяния, кто может уразумети, аще и ангельский ум имети сподобится? Но за непокаянный мой нрав, от всех имам испасти окаянный. И тако сия размышляя, приходит по некоем времени в третий разум, и присно плачя глаголет. %(О третием видении.%) Увы мне! яков подвиг имать душа, разлучающися от телеси! Увы, тогда колико слезит, и никтоже милуяй ю! ко ангелом очи возводящи, тщетно молится, к человеком руце простирающи, не имать помогающаго. Плачу и рыдаю, егда помышляю смерть, и вижду во гробех лежащую, по образу Божию созданную нашу красоту, без_образну, безславну, не имущую вида. _О чудесе! что сие еже о нас бысть таинство? како предахомся тлению? како сопрягохомся смерти? Воистинну Бога повелением, якоже писано есть. Увы! Увы! что убо имам творити всеокаянный во время смерти, егда демони окружат окаянную мою душу, (с. 587) держаще написанне содеянная мною злая, в ведении и не в ведении, словом, делом и помышлением, истязующе от мене ответа во всех сих? Но увы мне! яко и кроме греха, вельми осужден есмь за заповеди, ихже не сохраних, и достойне. _О окаянная душе моя! рцы ми ныне, где суть обеты крещения? где сочетание со Христом, и отрицание сатаны? где хранение заповедей Божиих? где подражание Христу телесными и душевными добродетели, ихже ради христианином нарекохся, и обещание иноческаго образа? Аще же немощию телесною оправдаешися: где вера, всякое попечение на Бога возлагающая, еюже и горы преставляти возмогла бы еси, аще яко зерно горушно стяжала бы ю? где совершенное покаяние, удаляющееся от всякаго дела и слова лукава? Где сокрушение души, и совершеннейший плачь, кротость, милость, чистота сердца от лукавых помыслов? Совершенное воздержание, удерживающее всяк уд телеси, и всяко разумение, и хотение недвижимо, кроме нужнаго употребления ко спасению души или телесней жизни? где терпение сносящее многоразличныя скорби, царствия ради небеснаго, еже о всем благодарение? непрестанная молитва? попечение о смерти? слезы сетования, аще в любовныя не достигла еси? мудрость по Бозе, хранящая душу от сетей вражиих и супостат? целомудрие, удаляющееся от всего, не по Бозе бываемаго, или волею помышляемаго? мужество претерпевающее злая, и дерзающее противу врагов упованием? правда, воздающая коемуждо равное? смиренномудрие, ведающее свою немощь, и неразумие, и Божие человеколюбие, имже избавитися возмогла бы еси от всех козней вражиих? где, безстрастие и совершенна любы? мир, превосходящ всяк ум, егоже ради сыном Божиим нарекся бых? Сия во вся и без телесныя крепости, хотящий имети может от единаго произволения. Что убо имам рещи на сие? что имам сотворити окаянный? Зане вмале страшуся за неизвещение: зане совершенне вознерадех (с. 588) о должных от мене по возможности сотворитися, во аде имам быти, якоже глаголет великий афанасий. _Оле окаянства моего! что себе самому нанесох, не точию теми, яже согреших, но паче теми, о нихже покаятися не восхотех. Аще бы бо раскаялся бых, якоже блудный, приял бы мое обращение чадолюбивый отец: и аще бы благоразумен соделался бых, якоже мытарь, себе единаго, а не инаго кого осуждая: и аз бы оставление грехов от Бога приял бых. Паче же, аще бы от всея души, якоже оный помолился бых. Ныне же, зане не у такова созерцаю себе: сего ради страшуся во аде с демонами пребывания, и будущаго суда. Яко тамо есть река огненная, престоли же, и книги разверсты: ангели предшествуют, всяко естество человече предстоит, вся нага и явленна пред страшным и праведным судиею. Увы мне! како стерпети имам обличение и негодование страшнаго и неумытнаго судии, стечение безчисленных ангел, и истязание с страшным прещением, изречение не имущее премены, непрестанный плачь, безполезныя слезы, неосвящаемую тьму, и неусыпный червь, неугасимый огнь, и многоразличныя муки, отпадение от царствия, и разлучение со святыми, удаление от ангел, и отчуждение Бога, малодушие, и вечную смерть: страх, болезнь, печаль и студ, и мучение совести? Увы мне грешному! что пострадах? чесо ради зле погибаю? Имам еще время покаяния. Владыко призывает мя, и аз ли отметаюся? Доколе душа моя пребываеши в согрешениях? доколе приемлеши отложение покаяния? приими во ум будущий суд. Возопий ко Христу Богу: Сердцеведче! согреших, прежде даже не осудиши мене, помилуй мя. На страшнем, Христе, твоем пришествии, да не услышим: не вем вас. Упование бо на тя, Спасе, возложихом: аще заповеди твоя и не творим нерадением нашим. Но молим помиловати души наша. Увы ми, Господи! яко опечалих тя, и не возчувствовах. Но се благодать твоя сотвори мя ощутити мало, темже и недоумеваю окаянный. (с. 589) Вострепета бо окаянная душа моя. Но убо имам ли пожити мало, во еже плакати горько, и омыти оскверненную плоть мою и душу? Или паки един час плакав, абие престану не чувствуя якоже и присно, что убо сотворив обрящу непрестанну болезнь души? Поститися ли имам и бдети? Но без смирения ничтоже пользуюся. Пою ли единеми усты, или чту? Но страсти помрачиша ми ум, и не могу постигнути силы глаголемых. Припадаю ли прилежно к тебе, подателю благ? Но не имам дерзновения. Отчаянна ми есть жизнь, погубих душу мою. Господи! помози ми: и яко мытаря приими мя. Якоже бо блудный согреших на небо и пред тобою, и якоже блудница плачущая, о нейже речеся: отчаянная жития ради, и уведенная нрава ради, мира носящая приступи к тебе, вопиющи: не отвержи мене блудную, рождейся от Девы: не презри слез моих, радосте ангелов, но приими мя кающуюся, юже не отринул еси, Господи, великия ради твоея милости. Зане и аз окаянный отчаян есмь многих ради грехов моих, познан же быв неизреченнаго ради человеколюбия твоего, и неизмеримыя пучины щедрот твоих, в нюже повергл еси отчаяние души моея, дерзаю собирати ум мой во святую память твою, и востая поне едино моление со страхом и трепетом многим сотворю, да сподоблюся и аз недостойный раб твой быти, и имети по благодати ум безвиден, невообразителен, и необразовиден, и невеществен, тебе единому Богу, и творцу всяческих припадати, якоже некогда даниил пред ангелом твоим на колену и дланех рук{Даниил. гл. 10, ст. 10.}: и первее благодарение, потом исповедание приносити пред тобою, и тако всесвятую твою волю просити начинаю окаянный аз, благодарение тебе воздая о всех благих, ихже сподобил мя еси, персть, прах, пепел. И яко умом единем сподобихся предстати тебе земный весь, и якоже мняся видимь быти тобою, от (с. 590) всея души вопию и глаголю: Владыко многомилостиве! благодарю тя, славлю тя, пою тя, и поклоняюся тебе, яко сподобил мя еси недостойнаго в час сей благодарити тебе, всячески слух имети о некиих чудесех и благодеяниях твоих, яже сотворил еси и твориши нас ради по благодати, душевная же и телесная, безконечная же и неизследимая, явне и неизвестне, яже вемы, и яже невемы. Исповедаю благодать, не скрываю благодеяний, проповедаю милости. Исповемся тебе, Господи, всем сердцем моим, и прославлю имя твое во веки, яко милость твоя велия на мне, и неизреченно снисхождение и долготерпение о множестве беззаконий и согрешений моих, нечестий и лукавствий, яже сотворих, и творю присно, и яже имел бых сотворити. От нихже мя избавила есть благодать твоя, о сущих в ведении и не в ведении, словом, и делом и помышлением, яже веси сердцеведче Господи, от рождения моего, до конца жизни моея, о нихже дерзаю всеокаянный исповедание сотворити пред тобою. Согреших, беззаконновах, нечествовах, и лукавое пред тобою сотворих, и несмь достоин воззрети, и видети высоту небесную: но дерзая на неизреченное твое человеколюбие: и паче ума благость и милосердие твое, припадая молюся ти: помилуй мя, Господи, яко немощен есмь, и прости ми множество зол моих, и не попусти мене ктому согрешати, или заблуждати от праваго пути твоего, ниже оскорбити, или опечалити кого: но обуздай всяку мою злобу, и лукавый обычай, и безсловесное стремление души и тела, и ярости, и похотения, и научи мя творити волю твою. Помилуй братию и отцы моя, и вся повсюду иноки же и иереи, родители моя: братию же и сродники: служащия нам, и служившия, молящияся, и заповедавшия нам молитися о них: ненавидящия и любящия нас, ихже оскорбих, или опечалих, сия ми некогда сотворившия: или сотворити имущия, и всех верующих в тя. И прости нам всяко согрешение, вольное же и невольное, и соблюди нашу жизнь и исход (с. 591) из мира сего от нечистых духов, и от всякаго искушения, и всякаго греха и лукавства, мнения же и отчаяния, неверия же и безумия, возношения и боязни, прелести и мучительства, крадения же и сети диавольстей. И даруй полезная душам нашим в нынешнем веце и будущем, якоже благоволит человеколюбие твое. И упокой прежде отшедшия отцы и братию нашу, и молитвами всех ущедри окаянство мое, умилосердися о моей погибели. Виждь во всем соболезнование мое: исправи житие мое, управи жизнь мою и конец в мире: и сотвори мя, якова хощеши, и якоже хощеши, аще хощу: аще не хощу, точию да не отлучен буду стояния одесную тебе в день судный, Господи Иисусе Христе Боже мой, аще и последний есмь из всех спасающихся раб твоих. И умири мир твой, и помилуй всех, якоже веси. И сподоби мя причащения пречистаго твоего тела и честныя крове твоея, во оставление грехов, в приобщение святаго Духа, во обручение, яже в тебе жизни вечныя со избранными твоими, молитвами всепречистыя твоея Матере, святых твоих и небесных сил, и всех святых твоих, яко благословен еси во веки веков, аминь. Пресвятая Владычице Богородице, вся небесная силы святых ангел и архагг~л, и вси святии молите о мне грешнем. Владыко Боже отче вседержителю, Господи Сыне единородный, Иисусе Христе, и святый Душе, и проч. И абие к своим помыслам глаголет: Приидите поклонимся, и припадем Цареви нашему Богу, трижды. И начинает _псалмы творяй, на кийждо антифон, трисвятое, ум же в глаголемых заключая: по конце же, Господи помилуй, 40. При каждом антифоне творяй молитву, глаголет в себе покланяяся: согреших, Господи, прости мя, единою: востав же и воздевая руце, Боже очисти мя грешнаго, единою. И егда помолится, должен есть глаголати вторую молитву: Приидите поклонимся, трижды: и другий антифон такожде. Обаче, елижды благодать умиляет его сердце, подобает ему паче в разумениях (с. 592) умиления имети ум свой: аще праздна будут уста от пения, и пленена будет мысль пленением благим, якоже глаголет святый исаак: тогда бо настоит время обирати, а не время садити. И сего ради подобает пребывати в таковых разумениях, да множае умилится сердце, и даст плод, сиречь по Бозе слезы. Умиляемь, рече лествичник, во едином глаголе, пребывай в нем. Понеже всякое действие телесное, пост, глаголю, и бдение, пение же и чтение, безмолвие же и прочия, очищения ради ума бывают. Ум же кроме плача очиститися не может, да соединяется с Богом чистою молитвою, восхищающею его от всех помышлений, и творящею и безвидна и невообразительна. Понеже вся убо из сих добра суща добре бывают, якоже и сопротивное. Ибо всякая вещь требует разсуждения, да добре соделается: и кроме онаго разсуждения, не познаем мы естества вещей. И может быть, мнози соблазняемся, егда разгласующа видим глаголемая и деемая святыми отцы. Сиречь, церковь убо восприя пети тропари со песньми многими и пениями. Лествичник же, восхваляя по Бозе плачущия, глаголет: яко таковии не воскликнут к себе самем в песнех. И святый исаак о чисте молящихся глаголет, яко множицею обретается ктолибо собираяй ум свой в молитве, и абие припадает без понуждения на землю на колене, якоже иногда пророк даниил, и имать руце простерте, и очи его взирают на крест Христов: помыслы же его изменяются, и уди его разрешаются от новых помышлений, самодейственне во ум приходящих. И паки подобне мнози от святых отец о некиих таковых пишут, яко нецыи не точию песни и _псалмопения превзыдоша ужасом ума, но и самый той ум забыша, якоже глаголет святый нил. Церковь убо добре и Богоугодне песни и прочия тропари прият, немощи ради ума нашего, да сладостию песнопения поем Бога неразумнии, яко не хотяще. Имущии же разум в разсмотрении реченных (с.593 ) словес, приходят во умиление: и яко по лествице восходим в мысли благи, якоже глаголет дамаскин. И елико преуспеваем в навыкновении сущих по Бозе мыслей, толико и Божественное желание влечет нас достигнути, разумевати и кланятися отцу духом и истиною{Иоан. гл. 4, ст. 24.}, якоже глаголет Господь. И по апостолу: Пять словес хощу глаголати умом, нежели тьмы языком{1 Кор. гл. 14, ст. 19.}. И паки: хощу, да молитвы мужие творят на всяком месте, воздеюще преподобныя руки без гнева и размышления{1 Тим. гл. 2, ст. 8.}. Понеже ова суть врачества немощи, ова же совершенства ума. И сие есть решение таковых взысканий. Занеже вся добра суть, во время свое: не во время же вся несогласна видятся неведящим времене коегождо, якоже глаголет соломон: время всякой вещи{Екклес. гл. 3, ст. 1.}. Обаче, егда достигнет кто в мысли благи, опасно подобает внимати, да будут в нем таковая видения, да не како нерадением, или возношением лишится Благодати, якоже глаголет святый исаак. Зане аще умножаются в душе человечестей яже по Бозе мысли, и приводят его ко умилению и вящшему смирению, подобает благодарити присно, и исповедывати благодать Божию, яко сподобися ведети таковая, недостойным себя самаго почитая: аще же престанут, и помрачается паки мысль, и погубляет страх и плачь, много подобает сетовати, и смиряти себе словом и делом, яко уже остави его благодать, да познает немощь свою, и смирение стяжет, и да прилежит о исправлении, якоже глаголет великий василий. Зане аще не вознерадел бы кто о сущем по Бозе плаче, не бы слез лишился, егда бы восхотел. Сего ради подобает нам присно ведети немощь свою, и благодать Божию, и ниже отчаяватися, аще чтолибо случится нам: ниже паки отнюд дерзати, яко есмы что, но паче уповати присно на Бога со смирением. И сия убо слезы приличествуют много ищущему (с. 594) словом и делом, занеже таковыя благодати сподобися, и не сохрани предуведения Божия, предварившим настоящим, или будущим нерадением, или возношением, якоже речеся. Волею же оставльшему таковыя дарования, сиречь, плачь, слезы и светосиятельныя мысли, что иное приличествует, разве увы? Понеже не имать весь мир таковаго безумнейша, яко сподоблься вне естественнаго, имже имеяше по благодати достигнути вышеестественнаго, глаголю же в разуме и любви слез, и чрез ничтожныя некия вещи, или странныя помыслы, и своими хотениями в скотское неразумие обращается, якоже пес на свою блевотину. Обаче аще восхощет паки по Бозе упразднитися в чтении Божественных писаний, со вниманием и попечением о смерти, и в молитве ум, елико возможет, соблюдет от суетных помыслов, обрести имать яже погуби. И паче, аще никогда ни на когоже опечаливается, аще и величайшая злая от него терпит множицею, и никогоже оставляет, да опечалится нань, но всею силою врачует его, словом же и делом: тогда вящше веселится ум, избавляемь от смущения ярости. И навыкает никогдаже нерадети о душе своей, бояся, да не како паки оставлен будет, и от страха пребывает непадателен, имея присно слезы покаяния и плача, дондеже возведен будет в любовныя и радостныя слезы, от нихже в мир помыслов приидет благодатию Христовою. И сия убо суть тако. Мы же еще страстнии и тяжкосерднии суще, должни есмы присно поучатися словесем плача, и испытовати себе на всяк день прежде уставленнаго правила, и среди его, и по конце. Или делающе, немощнейшии еще в сущей по Бозе праздности, и от всех упразднению, якоже глаголет святый исаак. Или празднии для сего единаго седяще, имуще недремлющия очи, и трезвящуюся мысль, якоже глаголет лествичник: взирай, каковый успех твой будет: да сокрушится душа твоя, и начнет слезити, якоже глаголет святый дорофей. И сия убо речена суть о преждереченных в трех видениях, (с. 595) да сподобимся приити в прочия видения, от нихже четвертое. %(О четвертом видении.%) Сие есть уразумение сладчайшаго спаса нашего Иисуса Христа снизхождения, пребывания в мире. И помале забываем и самую пищу, якоже глаголет великий василий. И якоже о блаженном Давиде слышахом, яко забы снести хлеб свой{Псал. 101, ст. 5.} внегда восхититися мысли его, глаголет лествичник, к чудесем Божиим во ужасе мнозе, и недоумении о воздаянии, якоже глаголет небоявленный василий: что воздамы Господеви за вся, яже воздаде нам? Нас ради Бог в человецех, истлевшаго ради естества, слово плоть бысть, и вселися в ны. Благодетель к неблагодарным, и избавитель к пленным, ко иже во тьме седящим солнце правды, на Кресте безстрастен, во аде свет, в смерти живот, востание падших ради, к немуже возопиим: Боже наш, слава тебе. И иже от дамаска иоанн: ужасеся о сем небо, и земли удивишася концы, яко Бог явися человеком плотски, и чрево твое бысть пространнейшее небес: тем тя Богородицу, ангелов и человек чиноначалия величают. И паки: устрашися всяк слух неизреченна Божия снизхождения, яко вышний волею сниде даже и до плоти, от девическаго чрева быв человек: темже пречистую Богородицу вернии величаем. Приидите, покоритеся ми людие: возшедше на гору святую, пренебесную, невещественно станем во граде Бога жива, и узрим умом Божество невещественное отца и Духа, во единороднем Сыне блистающее. Усладил мя еси любовию Христе, и изменил мя еси Божественным твоим рачением: но попали огнем невещественным грехи моя, и насытитися в тебе наслаждения сподоби, да ликуя возвеличаю Блаже, два пришествия твоя. Весь еси, спасе, сладость, весь еси желание и любовь воистинну (с. 596) ненасытная, весь еси красота неизреченная. Приявый убо разум таковых телесными и душевными добродетелями, и сокровенных таин в словесех святых мужей, и Божественных писаниях, паче же святых евангелий, не престает ктому от желания и многих слез, присно бывающих ему без понуждения. Мы же от единех писаний слышаще, должни есмы присно упражнятися и поучатися, да многим временем впечатлеется в сердце нашем желание Божие, якоже глаголет святый ма_ксим, и якоже твориша отцы, прежде приятия самодействующаго разума. Все желание мучеников простреся к единому Владыце, любовию с тем соединяемо, и пояше. И якоже дамаскин рече о триех отроцех: За законы отеческия блаженнии в вавилоне юноши предбедствующе, царюющаго оплеваша повеление безумное, и совокуплени, имже не сваришася огнем, державствующему достойную воспеваху песнь. И праведне. Егда уразумеет кто чудеса Божия, весь изступает, и самую привременную забывает жизнь, от разумения Божественных писаний, глаголет святый исаак. А не якоже мы негли умиляемся мало от писаний, и от уныния, забвения и неведения паки помрачаемся, и нечувственнии от страстей бываем: Очистивый бо себе плачем от страстей, познает таинства сокровенная во всех писаниях, и от всех ужасается: паче же от святаго евангелиа, от дел же и словес. И како премудрость Божия неудобная удобными содела, яко помалу Богом творит человека блага, яко и врагов любити могуща{Матф. гл. 5, ст. 44.}: милосерда, якоже отец небесный милосерд есть{Матф. гл. 5, ст. 43.}: безстрастна, якоже безстрастен Бог: всяку добродетель имуща, и совершенна, якоже отец совершен есть. И вкратце, священная сия книга научает тому человека, елика Богу подобает, да положением Бог будет. И кто не удивится действию святаго евангелиа, яко от единаго произволения всяк покой и в нынешнем и в (с. 597) будущем веце дарует со многою честию, якоже глаголет Господь: Смиряяй себе вознесется{Луки гл. 18, ст. 14.}. И здесь свидетельствует петр, оставль мрежи, и прием ключи небесныя, и прочии апостоли, кийждо малое нечто, еже име, оставив, весь мир покориша в нынешнем и будущем веце, яже око не виде, и ухо не слыша, и на сердце человеку не взыдоша. И не точию на апостолех сия быша, но и на всех произволяющих я бывают даже до ныне, якоже глаголет некто от отец, яко аще и труждахуся в пустыни, но мног убо покой имеяху. Сие же рече о несмущенной и безпопечительной жизни. И кто убо мнится нам вящший покой и честь имети? упражняяйся ли по Бозе, и творяй своя, или в смущениях и судилищах пребываяй и попечениях житейских? присно беседуяй с Богом поучением Божественных писаний, и неразвлеченною молитвою и слезами, или труждающийся и бдяй в татьбах и беззаконных деяниях? ихже не улучив, единый точию труд и сугубую смерть, может быть, получит. Се убо и смерть претерпеваем с великим трудом и безчестием без приобретения. Паче же и величайший вред душевный множицею нецыи подяша ради погибели. Разбойницы, глаголю, и потопители, блудники, и сварливии, иже не восхотеша с покоем, честию и приобретением спастися. Но, _оле слепоты! смерть погибели ради претерпеваем, спасения же ради ниже самую жизнь любим. Аще же и смерть предлежит царствия ради небеснаго, что вящшее, разбойника творим, и гробокопателя или воина, иже хлеба единаго ради имеющую быти смерть с настоящею многажды претерпеша? Разве точию егда Христа ради, первое будет намерение, егоже ради дается царствие Небесное произволяющим в настоящем веце умне, внегда презирати вся, и покоренна имети себе, царствовати же не точию над вещами, но и над телом презрением его, и над (с. 598) смертию Благодерзновением веры: в будущем же со Христом вечно царствовати с телом, благодатию общаго воскресения. Смерть убо равно грешника и праведнаго бывает, различие же много: и якоже смертнии, оба умирают, и не чудне. Но ов убо безвозмезден, и осужден может быть: ов же блажен в нынешнем и в будущем веце. Что же велие есть, точию оставляти имения, ихже невольне оставити имеяше мнящийся имети, не точию во время смерти, но и прежде оныя со многим студом, трудом же и болезнию? Негли же и смерть нецыи претерпеша сих ради, по безчисленных искушениях богатства, с боязнию, глаголю, попечением, и присною печалию и смущением вольне и невольне. Божия же заповедь от всех сих человека избавляет, и всяко безпопечение и безбоязненность ему дарует, множицею же веселие неизглаголанное, наипаче же предпочитающим волею нестяжание. Что убо сладчае того, еже быти кому безстрастну, отнюд не обдержиму от ярости, или коего желания мирских вещей, но многим вожделенная ни вочтоже вменяя, и вышше всех быв, яко в раи, паче же на небеси пребывати, и вышше всякия нужды безпопечением и упражнением по Бозе? Внегда бо претерпевати находящая с радостию, все, еже что бывает, упокоевает его. И внегда любити всех, от всех любимь бывает: и внегда презирати вся, вышше всех бывает, и внегда не хотети имети что, о немже сварится ин: и печалует не улучив, овогда же и получив желаемое осужден бывает: не желаяй же что, избавляется сам заповедию всех сущих в нынешнем веце и будущем лютых. Зане еже не хотети имети что: еже не стяжа, есть вышше всякаго покоя и богатства: якоже и желаяй, еже не имать, есть величайшее мучение прежде вечныя муки. И таковый раб есть, хотя и царь быти мнится, и богат. Кую же тяжесть возвещают заповеди Господни, яже не творим окаяннии безмездно со многим усердием? (с. 599) Возмогий убо благодать святаго евангелиа, и яже в нем предложеная, разумети от части, глаголю же деяния и учения Господня, заповеди его и догматы, прещения и обетования, той весть, кая неоскудная сокровища обрете: аще и не может о таковых исповести, якоже подобает: зане неизреченна суть небесная. Христос бо во евангелии сокровен есть: и хотяй обрести его, должен есть прежде продати вся имения своя, и купити евангелие: да не точию возможет обрести его негли чтением, но и прияти в себе подражанием пребывания его в мире: зане ищущему Христа, глаголет святый ма_ксим, подобает искати его не вне, но внутрь себе, сиречь, быти телом и душею, якоже Христос, безгрешну по возможности человеку, и всею силою хранити свидетельство совести, да воцарится над всею своею волею, и победит ю презрением, аще в мире и убог есть и безроден. Зане кую пользу имать мняйся быти царь, а от ярости и желания терзаемь есть в сем веце, в будущем же вечную муку обретает, аще не восхощет сохранити заповеди Божия: но, _о безумия! како не хощем малыми и привременными великая и вечная прияти благая? но благая убо отмещем, противных же желаем. Что же есть хуждше чаши студены воды, или даяния укруха хлеба, или удержания воли, и малаго своего разумения, ихже ради царствие небесное предлежит нам благодатию рекшаго? Се бо царствие Божие внутрь вас есть{Луки гл. 17, ст. 21.}: не бо далече отстоит, глаголет дамаскин, ниже вне, но внутрь. Точию возжелай победити страсти, и се имаши его в себе Богоугодным житием. Аще же не хощеши, ничтоже имаши: зане царствие Божие, глаголют отцы, нарицается ,Богоугодное житие, и первое пришествие Господне, и второе. И о втором преднаписася во глаголех плача. Первое же уразумевый от благодати в чувстве души с великим ужасом должен есть глаголати: Велий еси Господи, и чудна дела твоя, и (с. 600) ни единоже слово довольно будет к пению чудес твоих. Се, сладчайший мой Владыко! раб твой безгласен и празден пред тобою стоя, ожидаю от тебе просвещения разума. Ты бо рекл еси, Господи: Яко без мене не можете творити ничесоже{Иоан. гл. 15, ст. 5.}. Ты убо научи мя, яже о тебе. Сего ради дерзнух при пречистою твоею ногу, якоже сестра лазаря друга твоего, сести, да услышу и аз нечто умне, аще и не о непостижимом твоем Божестве: но убо о телеснем в мире пребывании. Яко да малое некое чувство прииму рекомых во святем евангелии благодати твоея. И како пребывал еси с нами кроток и смирен сердцем, якоже рекоша пресвятая твоя уста, во еже научитися нам от тебе сему. И в толицем убожестве богат сый в милостях, в труде и жажде вольне, воду живую подаяй самаряныне, якоже рекл еси, Господи: Жаждай да грядет ко мне и пиет{Иоан. гл. 7, ст. 37.}: ты бо еси источник исцелений. И кто может воспети твое в мире пребывание? Но понеже сподобил мя еси землю, пепел, прах, преступника, самоубийцу, много тебе согрешивша, и присно согрешающа, разумети совершенне нечто от твоих деяний и словес, и дерзнути вопросити тя о сих, яко от веры мняся видети тя невидимаго всей твари. Прости ми дерзновение мое: ты бо веси, Господи сердцеведче, яко не от любопытства вопрошаю, но ищу научитися, веруя, яко сподоблюся от тебе сущаго разума, якоже и любящим тя, даровати ми имаши человеколюбче, и еже по силе делание, да подражаю твоему во плоти пребыванию, о немже по благодати христианин нарекохся. Аще и никтоже может, якоже ученицы твоя претерпевати смерть за врагов, и ниже твою и их нищету и добродетель стяжати: но от части кийждо от нас по произволению своему: Аще бо кто и всякий час за тя умирати будет, ниже тако от долга своего освободитися может. Зане ты Господи, Бог совершен (с. 601) сый, и человек совершен, безгрешне пожил еси в мире сем, и за всех вся претерпел еси. Мы же аще негли и потерпим что о себе, и за грехи своя страждем. И кто не удивится разсмотряя твое неизреченное снисхождение? Яко Бог сый непостижимый, всесильный, и вся содержащий, седящий на херувимех, глаголемых, обильная премудрость, нас ради много тя прогневляющих от начала и свыше смирил еси себе, якоже восприял еси Рождество и воспитание, гонения же и каменометания, насмеяния, поругания, заушения, биения, студ и заплевания. Таже Крест, гвоздия, губу, трость, оцет и желчь, и елика не есмь достоин слышати. К сим нетленное твое ребро прободено бысть, из негоже источил еси нам вечную жизнь, честную твою кровь и воду. Воспеваю твое Рождество, и рождшую тя, юже сохранил еси Девою и по Рождестве, якоже прежде Рождества. Покланяюся тебе в вертепе и яслех пеленами повиту. Славлю тя, во египет с Девою пречистою Материю твоею отходяща, и в назарете живша, и повиновавшася по плоти родителям, мнимому отцу, и истинней Матери. Воспеваю тя, во иордане от предтечи твоего крещающася Господи, и свидетельствовавша о тебе отца, и явивша тя святаго Духа, и крещение твое, и Крестителя иоанна, пророка и раба твоего. Прославляю тя постившагося нас ради, и искушаема вольне, и победивша врага в телеси, еже приял еси от нас, и даровавшаго нам победу над ним неизреченною твоею премудростию: сопребывша же со ученики твоими, и прокаженных очистивша, хромых исправивша, и слепым свет даровавша, глухим и немым глаголание и слышание подавша, благословляюща хлебы, и по морю, яко по суху ходяща, и народы учаща о деяниях же и видениях, о отце и святем Дусе возвещающа, и о будущих прещениях же и обетованиях предрекша, и о всех ко спасению нашему служащих: врага же предупреждающа, и совершенне страсти исторгающа всепремудрым учением, и буия умудряюща, коварных же немудрых сотворяюща безконечною (с. 602) твоею премудростию: мертвых воскрешающа неизглаголанным твоим могуществом, и со властию изгоняюща демонов, яко Бог всяческих, и не точию сия собою творяща, но и рабом твоим власть давша творити большая, да вящше дивимся, якоже рекл еси Господи, велие имя твое, яко тобою вся бывают чудеса от святых твоих. Владыко Господи, Иисусе Христе, Сыне и слове Божий, сладчайшее имя спасения нашего! Велия слава твоя, велия дела твоя, чудна словеса твоя, и слаждша паче меда и сота. Слава тебе, Господи, слава тебе, и кто может славити и пети твое снисхождение, благость, силу, премудрость, в мире пребывание и учение? И како естественне святыя твоя заповеди со удобием добродетельному учат житию, якоже рекл еси Господи: Оставите, и оставится вам: и паки: Ищите, и обрящете, толцыте, и отверзется вам: и елика хощете да творят вам человецы, и вы творите им такожде{Матф. гл. 7, ст. 7, 8 и 12.}. И кто убо чувство прием заповедей твоих, и прочих словес, не удивится разсмотряя безконечную твою премудрость? Премудросте Божия, животе всяческих: радосте ангелов, неизглаголанный свете, воскресение мертвых, пастырю добрый, положивший душу за овцы своя! Воспеваю твое преображение, распятие, погребение и воскресение, вознесение и седение одесную Бога отца, сошествие святаго Духа, и второе твое пришествие с силою и славою многою, и недоразумеваемою. Изнемогох, Господи мой, зря чудеса твоя, и к молчанию от недоумения прибегнути хощу. Но что творити, не вем. Яко аще умолчу, ужасаюся: аще же дерзну рещи нечто, недоумеваю и во изступление прихожду. Недостойна себя почитаю неба и земли, и достойна всякия муки. Не точию за тая, в нихже согреших: не много паче, имиже облагодетельствован бых, неблагодарный сый и окаянный: исполнил бо еси душу мою всякаго блага, преблагий Господи: уразумех (с. 603) от части дела твоя, и изступи мысль моя. В ничтоже отнюд бых, едина твоя видяй, Владыко: обаче не мой разум, ни делание, но твоя благодать. Сего ради полагаю руку мою на устех моих, якоже некогда иов, и ко святым от недоумения прибегаю окаянный. Благая Владычице мира! ты веси, яко не имамы грешнии дерзновения к Богу, егоже родила еси: но на тя надеющеся раби твои, припадаем ко Владыце тобою, яко имаши дерзновение к нему, яко к Сыну твоему и Богу нашему. На сие и аз недостойный уповая, молю тя, Владычице, да дарствуется ми чувство даров твоих и прочих святых. И како толикия добродетели явили есте. И тебе сие убо точию, яко родила еси Сына Божия: вышше всех сущих показа: обрете бо тя приятелище достойно своего вселения, ведый вся прежде бытия, яко творец всяческих. И никтоже может о твоих сущих паче естества, ума же и мысли вопрошати. Воистинну Богородицу тя исповедуем, спасеннии тобою, Дева чистая, с безплотными лики тя величающе. Занеже Бога человеком невозможно видети: на негоже не смеют чини ангельстии взирати: тобою же всечистая, явися человеком слово воплощенно, егоже величающе с небесными вои тя ублажаем. И, что тя наречем, _о благодатная: небо, яко, и проч: Богородице! ты еси лоза истинная, возрастившая нам плод живота, тебе молимся: молися Владычице со святыми апостолы и всеми святыми помиловатися душам нашим, православно Богородицу исповедающих и ублажающих тя присноблаженную, якоже предрекла еси Владычице. Ибо вси роди блажим тя единую Богородицу, честнейшую херувим, и славнейшую без сравнения, и проч: Но не могий твоя разумети о тех, яже суть прочих святых, дивяся реку: како пребывал еси Креститель и Предтеча Господень в пустыни? И что тя наречем? Пророка ли, ангела ли, апостола, или мученика? ангела, зане яко безплотен жил еси: апостола, яко языки уловил еси: мученика, яко глава твоя Христа ради усечена бысть, егоже (с. 604) моли спастися душам нашим. Глаголет убо соломон: Память праведнаго с похвалами: тебе же довлеет свидетельство Господне, предтече: показалбося еси воистинну, и проч: Святии апостоли и ученицы Спасовы, таин самовидцы бывше, невидимаго и начала неимущаго проповедали есте, глаголюще: В начале бе слово. Не создани бысте прежде ангелов, не научистеся от человек, но от горней премудрости: темже дерзновение имуще, молитеся о душах наших, молимся. Дивлюся же вашему Боголюбию, якоже речеся в древних тропарех. Господи! Тебе чисте на земли апостоли возлюбивше, уметы вмениша вся, да тебе единаго приобрящут, и за тя ранам телеса предаша: сего ради прославлени бывше, молятся о душах наших. И како человецы суще, якоже и мы, и бренную плоть носяще, толикия показасте добродетели, яко за убивающих вы смерть претерпели есте? И како мали суще, весь мир победили есте? И сия сотвористе безоружнии и нази: и онеми невидимых демонов, нищии и немощию плоти обложеннии. И что убо бысть сила сия, паче же вера, еюже силу святаго Духа прияли есте? вы же святии мученицы добре страдальчествовавшии и венчавшиися, молитеся ко Господу помиловатися душам нашим. Апостоли, мученицы, и пророцы, святителие, преподобнии, и проч: и кто не удивится зря: святии мученицы, добрый подвиг, имже подвизастеся? Како в телеси суще, безтелеснаго врага победили есте, Христа исповедающе и Крестом вооружившеся? Сего ради достойне явистеся демонов прогонители, и сопротивным противоборницы, непрестанно молитеся, спастися душам нашим. Якоже бо прежде вас трие отроцы, не надеждею воздаяний подвиги претерпесте, но любви ради Божия, якоже сами рекосте: аще и не избавит ны, ниже тако его отвержемся, яко не избавляюща. Дивлюся же крайнему смирению вашему святии трие отроцы, яко недоумети о благодарении посреди огня суще, рекосте: И несть во время сие ни начальника, ни пророка, ни вождя, и проч: но душею сокрушенною, (с. 605) и духом смиренным. Дивлюся же и силе Божией бывшей в вас, и во илии пророце, якоже глаголет дамаскин: Из пламене преподобным росу источил еси, праведнаго же жертву водою попалил еси: вся бо твориши Христе, токмо еже хотети. Но кая, разсмотрю прежде? Святаго ли евангелиа писание, или святых апостол деяния? святых мучеников страдания, или святых отец подвиги? древних или новых святых мужей и жен? всех жития и словеса, или толкования и разсуждения их? Недоумеваю и во изступление прихожду. Но молюся ти, человеколюбче Господи, не попусти сие на осуждение мне быти, за недостоинство мое, и неблагодарный мой нрав, внегда разсмотряти ми толикия тайны, яже святым твоим открыл еси, и онеми мне грешному и недостойному рабу твоему. Се бо Владыко, раб твой празден сый от всего пред тобою, и безгласен, мертвеца образ имея, не дерзает ино что рещи, или безстудно разсмотрети, но обычне припадаю, из глубины души зовый и глаголя: Владыко многомилостиве, и прочия молитвы глаголы. О другой же молитве и _псалмех прилежати подобает в блюдении нравов души и тела, да приидет в навыкновение Божественных уразумений, да вся находящияся в Божественных писаниях тайны и дивныя вещи в чувстве мнози уразумети может, и дивяся Божественным даром, достигнет во еже любити его единаго, и с радостию за него пострадати, якоже и вси святии. Ибо всякаго ужаса исполнена суть Божественная писания, якоже глаголет соломон. С прочими же чудесы дивлюся и силе манны Божия, яко тойже вид не соблюдашеся до утрия, но возсмердеваше, и обреташеся полн червей{Исход. гл. 16, ст. 20.}, да не пекутся невернии о утрии, но в стамне, сущей в скинии, присно пребываше невредимь. И паки огнем убо пекома, пребываше несгараема, от малыя же лучи солнечныя растаяваше, да ненасытнии не (с. 606)собирают более нужныя потребы{Исход. гл. 16, ст. 21.}. _о чудесе! како везде Бог соделовает человече спасение, якоже глаголет Господь о Божии промысле: отец мой доселе делает, и аз делаю{Иоан. гл. 15, ст. 17.}. Иже упраждняяйся о Бозе в сем, научается от Божественных писаний чувственне, от промысла же Божия умне. Начинает же зрети вещи по естеству, якоже глаголют григорий нисский и дамаскин, и не ктому крадомь бывает от внешней красоты вещей мира сего, глаголю же доброты, богатства, преходящей славы, и подобных, ниже прельщается от сущей на них тени, якоже еще страстнии. %(О пятом разуме.%) От сего бо пятаго разума, глаголемаго совета, по пророку, познавает кто, якоже речеся на конце блаженств, естество и премену чувственных творений, яко от земли суть, и паки в землю возвращаются, по речению екклесиастову: Суета суетствий, всяческая суета. И дамаскин тожде: Вся суета человеческая{Еклес. гл. 1, ст. 2.}, елика не пребывают по смерти. не пребывает богатство, не сопутствует слава: нашедшей бо смерти, сия вся потребляются. И паки: Воистинну суета всяческая, житие же сень и соние есть: ибо всуе мятется всяк земнородный, якоже глаголет писание: Егда мир приобрящем, тогда во гроб вселимся, идеже вкупе царие и нищии. %(О шестом разуме.%) И внегда быти ему в навыкновении безпристрастия, даруется ему шестый разум, глаголемый крепость{Псал. 28, ст. 11.}, и начинает безстрастно видети доброту чувственных тварей. Занеже трех устроений суть все помыслы{Исаии гл. 11, ст. 2.}: ин человеческий, ин бесовский, и ин ангельский. Человеческий убо есть, егда взыдет на сердце (с. 607) мысль тонкая некая от созданий, сиречь, муж, злато или ино чтолибо от чувственных тварей. Бесовский же бывает сложен от мысли и страсти, сиречь, побуждает человека или к безсловесной дружбе, то есть, люблению не Бога ради бываему к другу, или к блудодеянию, или паки к безразсудной ненависти, то есть злопомнению, или порицанию кого. Злато же подобне к сребролюбию, или хищению и граблению, или к чемулибо от таковых, или к ненависти и хуле на дела Божия, да от обою погибель соделает. Понеже аще, не якоже подобает, вещи любим, и оныя паче любви Божией предпочитаем, ничимже от идолослужителей различествуем, глаголет святый ма_ксим. И паки: аще ненавидим та, яко не зело добра суща, Бога прогневляем. Ангельский же есть, безстрастное видение вещей, сиречь, истинный разум, иже есть среда обоих стремнин, хранящ ум, и отлучающ правое намерение от окружающих его шести сетей диавольских. Глаголю же, от горняго и дольняго, от еже одесную и ошуюю, от внутрьуду сущаго и внеуду праваго намерения: то есть, истинный разум, якоже столп стоящий среди реченных шести сетей, емуже от ангел научаются умертвившии себе мирови, да будет ум безстрастен, во еже видети вещи, якоже подобает: и ниже горе праваго намерения да превзыдет возношением, мняйся что постизати своею мудростию: ниже паки долу да сходит, неразумием, яко не могущий достигнути совершенства: ниже одесную уклонится, отвращением от вещей и ненавистию, ниже ошуюю безсловесным люблением, сиречь, пристрастием. Ниже паки пребудет внутрьуду праваго намерения совершенным невежеством и леностию: ниже внеуду многоиспытанием и безсловесным тщанием от нерадения или лукавства. Но разум с терпением и смиренномудрием и благим упованием от извествованныя да приемлет веры, да тем, еже уразуме что от части, к Божественному рачению возводится, и за еже не ведети в разуме от недоумения, смиренномудрие стяжет, и (с. 608) пребывательною надеждою и верою намерение получит искомой вещи. И ниже что отнюд ненавидя, яко зло, ниже напротив безсловесне любяй, но человека разсмотряет ко еже удивлятися, како ум есть безпределен образ Бога невидимаго, аще и телом обдержится, глаголет великий василий. И како достизает даже до конец воображения, якоже Бог промышляяй о мире. Ибо ум во всяку вещь преобразуется, и начертавается, по виду восприемлемой от него вещи. Егда же сподобится быти в невоображенном и безвидном Бозе, тогда бывает необразен и безвиден. Посем дивится, како всяку мысль хранити может тойже, и ниже последняя разумения изменити первая могут, ниже паки первыя мысли отнюд повредити последняя: но якоже сокровище, мысль все содержит без забвения. И како восхотев ум языком изявляет помышляемая, не точию новая, но и прежде много усокровиществованная. И како паки присно исходят словеса, ум же неоскуден обретается. И паки разсмотряя тело, како очи, ушеса же и язык приемлют от внеуду употребление по хотению души: овии убо светом, овии же воздухом, и никоеже чувство воспящает другому, или творити может что вне намерения души. И како бездушное тело повелением Божиим соединися со умною и словесною душею, яже от святаго Духа содетельствована есть, якоже глаголет дамаскин, вдохновением? аще нецыи и не ведят его, мняще, яко от пресущественнаго Божества есть, еже есть невозможно. Глаголет бо златоуст: да не возмнит человеческий ум себе быти Бога, вложи Бог забвение и неведение в онь, да от сего смирение стяжет. И паки: хотящу творцу естественное сие смешение разделено сотворити, и словесная убо душа, якоже глаголет лествичник, или горе, сиречь на небо, или, увы! долу во ад отходит: земное же тело в землю, от неяже взято есть, возвращается. И паки: благодатию Спаса нашего Иисуса Христа разделенная на втором его пришествии соединятся, (с. 609) да восприимет кийждо от нас по делом своим. _О чудесе! кто тайну сию мало ощутив не ужаснется? Яко человека воздвизает паки от земли по толицех злых, яже содея, презрев его заповеди, и безсмертие дарует, еже прежде име, и не сохрани заповедь сохраняющую его от смерти и тления: но возгордевся смерть на ся навлече. Дивяся убо всем сим о человеце и другим многим, движением ангелов умне учимый человек ужасается, и паки зрит злата доброту и употребление, и дивится, како от земли таково бысть нас ради, да не мощнии убо милостынею иждивают стяжание: не восхотевшии же сего раздаяти, искушениями невольне вспомоществуеми будут во еже спастися, аще со благодарением терпят находящая, и спасаются обои. Нестяжание же предпочитающии, увенчаются, яко вышеестественная творящии, якоже и о девстве подвизающиеся, и яко убо тленну и земну вещь не предпочитают паче заповеди Божией. Но яко творение Божие, и потребное к телесней жизни и спасению, не ненависти достойну, по воздержания и любве: и вкратце, доброту всякия вещи и употребление безпристрастне зря просвещаемый, любит творца, и разсмотряя вся чувственная, горняя и дольняя создания, глаголю же, небо, солнце, луну, звезды, облака, тучи, дожди, снег, град: и како при толицей теплоте смерзается вода, по сих гром, молнию, ветры, воздух, и премену сих, времена, лета, дни, нощи, часы, мгновения, землю, море, неисчетныя скоты, четвероногая животная, звери и пресмыкающаяся, многие роды птиц, источники и реки, безчисленныя роды растений и трав, садовыя и дивия. Зрит бо во всех чин, устроение, величество, доброты, число составления, соединение, согласие, употребление, сходство, многоразличие, красоту, положение, движение, цветы, образы, виды, возвращение паки в таже, пребывание в тленных, и просте вся чувственная создания приводя в ум, ужасается дивяся создателю, како от не сущих единем повелением (с. 610) изведе четыре стихии, сиречь, землю, воду, огнь, и воздух: и како противныя суще, премудростию Божиею друг от друга не повреждаются: и како из сих вся нас ради сотвори, и сия мала суща противу снизхождения Христова по Богослову, и противу будущих благ. Разсмотряя же сокровенную в тварях благость Божию и премудрость, силу же и промысл, якоже сам он рече к иову о художествах: таже сущую в словесех и писаниях, како малым сим и бездушным чернилом таковыя и толикия тайны откры нам чрез Божественная писания{Иова, 38.}? Дивно же есть, яко святии убо пророцы и апостоли со многим трудом и любовию к Богу толикая получиша благая, мы же от единаго чтения учими есмы. Якоже бо словесная писания глаголют нам преславнейшая, и сия ведяй верует, яко несть ничтоже в творении непотребно, ниже зло, но и вне воли Божией бывающа, во благая претворяет Бог чудесне. Якоже падение диавола, не бе воли Божией, но се на пользу спасаемых бысть. Попущает бо во еже искушати произволяющих, по силе каждаго, якоже глаголет святый исаак, да посрамлен будет от равноангельных человек, и побеждается Божием содействием не точию от мужей, но и от премногих жен, терпением же и верою к подвигоположнику, от негоже и нетления венцы приемлют, Благодатию его и человеколюбием: зане той есть победивый и побеждаяй безстуднаго змия и человекоубийцу. И ов убо приемь дар разума духовнаго, весть, яко вся суть добра зело: ов же еще начало имый Богоразумия, должен есть ведети во смирении, яко не весть, о всякой вещи глаголя: не вем, якоже глаголет златоуст. Рече бо, аще кто речет о высоте небесней, яко толика есть, и аз рекл бых, не вем, всяко аз истину рех: аще он и прельщается, мняйся ведети, еже не весть, якоже подобает{1 Кор. гл. 8, ст. 2.}, по апостолу. Сего ради должни есмы извествованною (с. 611) верою и вопрошением искусных приимати догматы Церкви, и разсуждения учителей о Божественном писании, и о чувственных и мысленных созданиях, да не утверждаяся на своем разуме падем скоро, якоже рече святый дорофей: но во всех должни есмы обретати свое невежество, да ищай кто и не веруяй своим разумениям, восхощет научитися, и недоумев о мнозем разуме, увесть свое невежество от безконечныя Божия премудрости. Ум бо умный умно всячески чувство приемлет, егда очистит себе Богови, якоже глаголет Богослов: обаче должни есмы разум имети к вящшему страху: да не како обрящется един догмат сокровенный в душе лукав, могий погубити ю кроме инаго греха, глаголет великий василий. Сего ради не подобает нам от лености или тщеславнаго усердия в сие видение прежде времени тещи, но по ряду заповеди Христовы и предреченная видения творити без возношения. И егда терпением и слезами многими страха и плача омыем душу свою, и приидем во еже видети по естеству, и в навыкновении сих будем, тогда в сие видение ум самодвижне приидет, умне от ангелов наставляемь. Аще же кто дерзостнейший обрящется: и прежде первых во вторая внити восхощет, да весть, яко не точию не может улучити намерения Богоугоднаго, но и многи воздвижет на ся брани, паче же от видения о человеце, якоже слышахом о адаме. Ни мало же не пользует страстным сущим творити дела, или мыслити разумения безстрастных, якоже ни мало не пользует младенцем твердая пища, аще и зело полезна есть совершенным. Но с разсуждением должен есть хотети, и уклонятися яко недостойный. И ниже от отчаяния и уныния отвращатися благодати, егда приидет, ниже паки от дерзости искати чего прежде времени, да не ищуше яже времени прежде времени, якоже глаголет лествичник, ниже во время получим сия. Но прельстившеся негли ни исправление обрящем от коеголибо человека, или писания. Аще бо имать кто по (с. 612) Бозе намерение, да во смирении и терпении находящих ему искушений поищет вещи от недоумения, и негли прельстится в той, имать обрести от Бога решение. И тако со многим студом и радостию возвращается вспять ищай пути отец. Зане по Бозе бывающая, а не по иному чесомуже, глаголет лествичник, во благое вменяется нам от благодати, аще и зело будет не добро бываемое. Аще же не тако, ниже имать терпения и смирения, многа имать пострадати, яже мнозии пострадаша и погибоша безумием своим, верующе своим разумениям, и возмнеша добре шествовати без наставника, или искуса от терпения и смирения бывающа: искус бо не имать скорби, ниже искушения, негли же и брани. Аще же попущено будет мало ратуему быти, многия радости и пользы виною будет сие искушение искусному: зане во еже научитися искусу, и прияти мужество на враги попущается от Бога. Знамения же сего суть слезы и сокрушение души пред Богом, и еже прибегати к безмолвию и Богу с терпением, и еже притрудне испытовати писание, и с верою желати намерения Божия. Перваго же знамение есть сие, еже сомнетися о помощи Божией, стыдетися вопрошати со смирением, и удалятися от безмолвия и чтения, любити же попечение и беседы, мня от сих покой улучити, еже есть не возможно: но паче в таковое время вкореняются страсти, и крепльша бывают искушения, и умножается малодушие, неблагодарность же и уныние от многаго неразумия. Зане ина суть искушения сынов, к наказанию и учению прилучившагося учительства, и ина врагов к погибели. Паче же егда от гордости кто поругаемь бывает: яко Бог гордым противится, смиренным же дает благодать{Притч. гл. 3, ст. 34.}. Всяка убо скорбь, терпение имущая, добра есть и полезна: не имущая же сего, есть отвращение Божие, и безполезна, аще кто смиреномудрием не уврачует ю, инаго бо врачевства несть. (с. 613) Зане смиреномудрый себя порицает и обвиняет, внегда оскорблен будет, а не другаго кого. И сего ради терпит, ища от Бога решения, и обрет радуется, и со благодарением терпит, и во искусе таковых быв приемлет разум. И познавая свою немощь и невежество, притрудне ищет врача, и ищай обретает исцеление{Матф. гл. 7, ст. 8.}, якоже сам рече Христос, и получив сие любит, и любяй более любимь есть, и очищая себе по возможности, место сотворити любимому подвизается. И сей обрет место, обитает, якоже глаголет в старчестве, и обитая сохраняет дом свой, и просвещатися начинает. Просвещаемый же разумевает, и разумеваяй разумеется, якоже глаголет дамаскин. Сия убо и яже прежде реченная, по ряду подобает хранити всякому, и елика еще постигнет, делати подобает. Елико же не возможет постигнути, с молчанием благодарити долженствует, якоже глаголет святый исаак, и да не безстудно внити помыслит. Глаголет бо он же, из сираха взяв словеса: егда обрящеши мед, яждь умеренно, да не како пресыщен изблюеши{Притч. гл. 25, ст. 16.}. И якоже глаголет Богослов: видение бо необузданно, негли и в стремнины пореет, сиречь, еже искати вышемернаго, и не хотети рещи, яко Бог весть сия, аз же кто есмь? и веровати, яко сотворивый горы, и великия киты, той и жало пчелы утончи, якоже глаголет великий василий. Достигший убо от крепости в разум, разумевает от чувственных мысленная, и от временных и видимых невидимая и вечная. И разумевает по благодати, яже о горних силах, яко единаго праведника несть достоин весь мир. И внемли, глаголет златоуст, толиких народов и язык: ихже праведник больший есть. Ангел же всячески человека болий есть. И довлеет видение единою ко всякому ужасу. И паки, что понесе равноангельный даниил, видя ангела{Даниил. гл. 8, ст. 17.}. (с. 614) %(О седьмом разуме.%) Сподобивыйся седьмаго разума, удивляется множеству безплотных сил, властей, престолов, господствий, серафимов, херувимов, девяти чинов, обретающихся во всех Божественных писаниях: ихже удивляется естеству, крепости, и прочим благам, яже о них зрима суть, Богу и творцу их ведомым: и како по чину стоят. И инная достоинства имут горняя воинства, о нихже глаголет златоуст, яко Господь саваоф, Господь воинств, сил, толкуется, и како друг другу преподают просвещение. Ангели убо, глаголет, нас человеков просвещают, тии же просвещение приемлют от архагг~л, а сии от начал, и тако кийждо чин от другаго просвещение и разум приемлет. И паки, како человеческий род едину овцу быти глаголют, юже не Бог погуби, но сама себе погубила есть: ангелов же девятьдесять девять. И разсмотряя премудрость творца и силу, како толикая множества единем сотвори повелением? Вопервых убо, глаголет Богослов, разумевает ангельския силы и прочая: и вшед умне внутрь храма, сиречь, завесы, бывает невеществен, якоже глаголет святый исаак: прообразует же внешний храм мир сей, завеса же, сиречь, дверь дома, твердь небесную, святая же святых, премирных, идеже безплотнии и невещественнии непрестанно воспевают Бога, и о нас молят его, по великому афанасию. И тако приходит в мир помыслов, и сын Божий по благодати бывает, познавая сокровенныя в Божественных писаниях тайны, якоже глаголет дамаскин. Раздрася храма Божественная завеса, на Кресте содетеля сокровенную в писании являющи верным истину, Благословен еси, зовущим, Боже отец наших: и якоже глаголет святый косма песнопевец: От древа вкусив первый в человецех, тлению поработися, отвержением бо жизни безчестнейшим осудився, всему роду, яко телотленен, некий вред недуга преподаде, но обретше земнороднии (с. 615) воззвание крестным древом, зовем: препетый отцев Боже, и прочее. %(О осьмом разуме.%) От сего же седьмаго разума возводится в видение о Бозе второю и чистою молитвою, подобающею умозрительному, якоже в самом оном устремлении молитвы восхищается ум от Божественныя любве, и не ктому весть что отнюд мира сего, якоже глаголет ма_ксим и дамаскин. И не точию ум вся забывает, но и себе самаго: глаголет бо святый нил, яко аще себе ум весть, несть во едином Бозе, но и в себе. Тогда бо приемлет, глаголет святый ма_ксим, о Бозе евангелиа, и Богослов бывает, сподоблься нашествия святаго Духа. О Бозе же слышай, да не мнит от неразумения кто быти самаго Бога, яже о нем видимая, сиречь, благостыню, благодать, правду, освящение, свет, огнь, существо, естество, силу, премудрость, и подобная, глаголет великий дионисий. Но ниже елика ум определити может: безпредельно бо есть и неописанно Божество, и не о том, еже в нем, но еже о нем Богословствуется, якоже глаголет великий дионисий к святому тимофею, привед свидетельство святаго иерофеа. Паче же справедливее рещи, непостижимо, неизследимо, неиспытно, и елика несть мощно определити: паче бо ума есть и мысли, и единому себе ведом, единый Бог триипостасный, безначальный, безконечный, преблагий, препетый. И глаголемая о нем от Божественнаго писания, от недоумения глаголются, да увемы, яко есть Бог, а не что есть, зане непостижимь есть всему словесному и умному естеству. Подобне же и воплощению Сына Божия, и по впостаси соединению, якоже глаголет святый кирилл, подобает дивитися, и како в Божестве его состоит плоть, юже прият от нас, по великому василию. Зане якоже железо и огнь: тако есть и соединение, да единаго Христа во двою естеству увемы, якоже рече дамаскин к Богородице: Едину убо (с. 616) впостась во двою же естеству родила еси Бога воплощенна, емуже вси поем: Боже благословен еси. И паки: Безпредельный пребысть непременен, плоти по впостаси соединился есть, яко благоутробен в тебе пресвятая, единый благословенный. %(Яко не имут разногласия Божественная писания.%) И вкратце, всяко чтение или _псалмопение разсмотряя вмале просветивыйся, видение обретает и Богословие, и коеждо писание свидетельствуемо от другаго писания. Имеяй же ум еще непросвещен, мнит, яко Божественная писания имут разногласие, но не в Божественных писаниях сия: да не будет. Зане Божественная писания ова убо свидетельство имут от других писаний, ова же имут время вину, или лице, и сего ради всяко речение писания непогрешительно есть: вне же сих образов сущее дело есть нашего неразумия. И никтоже должен есть порицати писания, но всею силою оная соблюдати, якоже находятся, а не якоже той хощет, якоже еллини и иудеи творяху, не хотяще глаголати, не вем что есть: но от мнения и самоугодия, писания и естество вещей порицаху, и якоже им мняшеся, разумеша, а не по воли Божией: сего ради прельстишася, и во всяку злобу уклонишася. Всяк бо ищай намерения писания, не составит никогдаже своего разумения, или благаго или злаго: но, якоже изрекоша великий василий и златоуст, Божественное писание имать наставника, а не мира сего учения: да аще что Бог вложит в чистое сердце кроме разсмотрения, оно приемлет, аще с ним и свидетельство обрящется от Божественных писаний, якоже глаголет великий антоний. Входящия бо мысли самодейственне во ум безмолвствующих о Бозе, кроме разсмотрения, приемлемы суть, глаголет святый исаак. Испытовати же и разсмотряти кому, своя есть воля, и ведение телесно, паче же аще понуждает яко тать писание ко иносказанию, глаголет златоуст, (с. 617) а не дверию смиренномудрия входит, но прелазя инуде. Зане, аще кто понуждает намерение писания, или порицает, во еже составити свой разум, паче же неразумие, сего несть на земли безумнейша. Кое убо сие есть ведение, да яковоже хощет кто, намерение писания творит, и речения дерзает пременяти. Оный же искусен есть, иже речения непоколебима зрит, и премудростию духа сокровенныя тайны из_обретает, свидетельствуемы от Божественных писаний, и паче три великия светила суть сии, василий, златоуст и григорий, глаголю, или от тогоже речения свидетельство обретающе, или от инаго речения писания. И не имать противоглаголати хотяй что рещи, яко не отвнеуду приводят свидетельство, да речет кто, свое есть разумение: но от самыя предлежащия вины, или другаго писания о сем являюща. И воистинну: от святаго бо Духа имут еже разумети и глаголати, яко достойни. Всяку убо вещь не имущу свидетельства, яко добра есть, но сомнение, не подобает творити, или снисходити помыслу. Кая во потреба есть, оставляти вещь явную и свидетельствуему, яко добра есть и Богоугодна, творити же ину, добра ли она, или несть, разве точию по страсти есть: и сия убо тако. %(Разделение молитвы всех разумов.%) О осми же разумех ведети нам подобает, яко в четырех убо преднаписанная в коемждо глаголати подобает, в прочих же выну, Господи помилуй, якоже речеся о святем филимоне, и имети ум выну изступающь от разумений: тако бо подобает быти пребывание тщательнаго. Овогда убо ум имети в видении чувственных, овогда же в разуме мысленных и в безвиднем. И паки, в мысли некоего писания, или в чистей молитве. Тело же овогда во чтении, овогда в молитве, овогда же в слезах о себе, или о другом коем от сострадания по Бозе. Овогда в делании помощи некоему (с. 618) немощствующему душевне, или телесне, да всячески выну творит дела святых ангел, отнюд не печася ни о чесом мира сего. И Бог избравый его и отделивый, да собеседник ему будет, и даровавый ему пребывание сие и безпопечение, сам о нем попечется и препитает душевно же и телесно. Возверзи, глаголет писание, на Господа печаль твою, и той тя препитает{Псал. 54, ст. 23.}. И елико той надежду нань возлагает. во всех яже о себе душею же и телом, толико обретает его промышляюща о нем: темже вменяет себе хуждша всей твари от многих даров Божиих, явных и неявных, душевных же и телесных, яко много должен сый, отнюд не может возноситися о какойлибо вещи от стыдения, зря Благодеяния Божия. И елико благодарит его, и подвизается понудити себе за любовь его: толико и Бог приближается к нему дарами своими, и желает успокоити его, и соделати предпочитати безмолвие и нестяжание паче всех царствий земных и кроме возмездия в будущем. Ибо святии мученицы страдаху уязвляеми от врагов, но вожделение царствия и любовь Божия побеждаше болезни, и сие самое, еже прияти силу побеждати врагов, вменяху в велико утешение и долг, яко сподобишася за Христа смерть претерпети, якоже от сего многажды и нечувственни бываху. Подобне и святии отцы много понуждаху себе в начале многообразными подвиги и браньми бываемыми от лукавства духов. Но желание и надежда безстрастия побеждаху. Зане по труде безпопечительный бывает безстрастен яко победивый страсти. Мнится бо добре обретатися и страстный, но от слепоты. Единый же глаголемый подвижник имать подвиг и брань, от еже хотети победити страсти и немощи: попущается бо овогда таковому побеждену быти от ратующих его, да смирение стяжет. И сего ради подобает уведети свою немощь, и крепко удалятися вредящих себе, да забудет (с. 619) первый свой обычай. Яко, аще не удаляется кто первее попечения, и не стяжет совершеннаго безмолвия, не может приити, во еже имети что безстрастне, или глаголати присно добра, и вкратце, во всякой вещи приличествует вопервых совершенное попечения бегство, да не привлекаемь будет кто первым обычаем. Обаче никтоже от неразумения, слышай о смиренномудрии, безпристрастии же и таковых, да мнит имети сия. Но коеяждо вещи знамение искати должен есть и обретати в себе. %(О смиренномудрии.%) Знамения смиренномудрия суть сии, да имый всяку добродетель телесную и душевную вменяет себе вящше должна быти Богу, яко многа приемь благодатию, недостоин сый. И аще прилучится ему коелибо искушение от бесов или от людей, достойна вменяет себя таковых, и иных вящших, да поне мало освободится от долга, и облегчение обрящет на суде ожидаемых ему мук. И егда убо сего не понесет, много скорбит и тужит, ищай в чем понудити себе. Егда же сие улучит паки, яко дар от Бога прием, смиряется, и не могий обрести что воздати Благодетелеви, пребывает делаяй присно, и наипаче должника себе вменяя. %(О безстрастии.%) Безстрастия же есть знамение сие, еже несмущенну, и без страха быти во всех, яко получившу от благодати Божией вся мощи{Филип. гл. 2, ст. 13.}, по апостолу, во еже никако попечение имети о теле, но елико нудитися имать и достигнет в покой навыкновения, и благодаря паки иное начинает понуждение, да обрящется присно ратуемь, и побеждаяй со смирением. И сие есть предуспеяние человека. Бывающая бо без понуждения не суть дела, (с. 620) якоже глаголет святый исаак, но паче дары. Аще же от перваго труда бысть покой, победы возмездие есть, а не похвалы достоин: не бо приемлющии мзду похваляеми суть, но нудящиися в делании и ничтоже приемлющии. И что имамы рещи? елика аще творим, и елико благодарим благодетелеви, толико должни есмы, и много вящше. Зане он неоскуден есть и ничесогоже требует: мы же без него не можем что благо сотворити. Сподобивыйся во пети Бога, той приобретает паче, яко велий и досточудный дар приемый. И елико поет, толико множае должник бывает, и конца или отсечения разума Божия, или благодарения, или смирения, или любви не обретает. Не суть бо сии от века сего, да конец имут, но от безконечнаго онаго века конца не имущаго, но паче возращение разумов и дарований, и сподобивыйся убо сего делом и словом, свобождается от всех страстей. Хотяй же сие получити, должен есть пребывати при Бозе, и отнюд не имети попечения о веце сем, ниже боятися коего искушения: зане чрез сие в вящшее предуспеяние и на вышший степень возводимь быти имать. И ниже от сновидений злых или акибы добрых, или от помышления коего лукава, или блага, ниже от печали, или акибы радости, ниже от мнения, или отчаяния, или высоты, или глубины, или оставления, или содействия коего и крепости, ниже от нерадения, или предуспеяния, ниже от уныния, или усердия, или видимаго безстрастия, или многаго пристрастия. Но безмолвное житие и безпопечительное хранити со смирением, веруя, яко никтоже может нам зло сотворити, не хотящим нам, сие же попущается за возношение точию, и яко не присно притекаем к Богу, сиречь, не повергаем себе пред ним, прося, да будет во всем воля его, глаголя ко всякому помыслу приходящу к себе: не вем кто еси, Бог весть, добр ли еси, или ни: аз бо в руце его повергохся и повергаюся, и он печется о мне. Якоже бо от ничего мя сотвори, тако благодатию и спасти мя имать, (с. 621) аще угодно ему будет: точию святая его воля да будет в нынешнем веце, и в будущем, якоже хощет, и егда же хощет. Аз бо воли не имам, едино вем, яко много согреших, много и облагодетельствован есмь: и ниже поне по возможному делом, или словом благодарю его благости. Но во всех сих может и хощет всех спасти, а со всеми и мене, якоже хощет. Откуду бо вем, человек сый, тако ли хощет ми быти, или тако? аз убо страха ради согрешения избегох, и приидох зде, и ради многих грехов моих, и многих немощей сежу празден в келлии, якоже держимый во узилище, ожидая изречения владычня. И аще праздна узрит себе и погибша, да не боится: в сокрушение бо души и в приболезненныя слезы приити имать, аще не изыдет из келлии. И аще паки великое усердие на всяко духовно делание и слезы имать, да не радость сие вменяет, но крадение и уготовление брани. И вкратце, всяку добру вещь, или сопротивну должен есть презирати, да пребудет несмущен во всем безмолствуяй, и по силе подвизаяйся, творя елика прият, аще имать кого советника: аще ли же ни, убо Христа должен есть имети, да о всяком начинании и помысле вопрошает его чистою молитвою от сердца со смирением, отнюд не дерзая, яко искусен бысть монах, дондеже Христа усрящет в будущем, якоже глаголет лествичник, и авва агафон. И аще всяко намерение имать угодити Богови, сам он учит его воле своей, или умне извествует и, или некиим человеком, или писанием. И аще отсекает его ради хотения своя, сам с радостию неизглаголанною сотворит и достигнути совершенства, якоже не весть той. И сие видев много дивится, како отвсюду начинает истекати радость и разум, и от всякия вещи пользу обретает и царствует в нем Бог, яко не имущем своея воли, зане покаряется святой его воли. И бывает яко царь, и аще чтолибо помыслит, без труда и готово бывает ему от Бога, творящаго о нем попечение. И (с. 622) сия есть вера: о нейже рече Господь: Аще имате веру{Матф. гл. 17, ст. 20.}, и проч: и на сей вере назидаются прочия добродетели, по апостолу{Иуд. гл. 1, ст. 20.}. Сего ради враг всяку кознь строит, да от безмолвия отлучится человек, и впадет в пристрастие, и некиим образом неверен обрящется, уповая на свою крепость и мудрость, или совершенне или от части. И от сего вину приемлет враг, во еже победити его и пленника соделати окаяннаго. Сие же познавый всяку мира сладость и покой оставль, яко весть ничтоже сущя, тщится о безпопечительстве: или в повиновении, имея наставника вместо Христа, и возлагает нань всякое разумение словом и делом, да никакоже имать что: или в безмолвии от извещенныя веры всего бегает, и имать вместо всех Христа, и той бывает ему вся, якоже глаголет златоуст и дамаскин, в нынешнем веце и в будущем, питая, одевая, радостотворя, утешая, веселя, упокояя, учя, просвещая, и вкратце, якоже о ученицех своих, тако и о сем имать попечение, аще и не тако, якоже сии, труждатися имать: но убо веру имать извещенну, еяже ради не творит попечения о себе, якоже прочии человецы. Но страха ради духов, якоже апостоли страха ради иудейска, седит в келлии ожидая своего учителя, да истинным видением, сиречь, разумом тварей его, совоздвигнет мысленне от страстей, и мир дарует, якоже апостолам, дверем заключенным, глаголет святый ма_ксим. %(Изрядное распознание о седьми телесных деяниях.%) Писанная же первее в начале слова о седьми деяниях телесных и нравственных, присно хранити подобает, и ниже уменьшати умалением, ниже умножати превосхождением, кроме аще есть когда время брани телесной юности ради, или крепости превосходящия, еяже ради потребен есть превосходный (с. 623) подвиг, или паки немощи ради, еяже ради мало покоя требе есть: обаче не по разрешению совершенну: сие бо и безстрастных повредити может, якоже глаголет святый исаак, но по нужде да будет покой, аки врачевство недуга. И да не вину обретши душа, крепость ослабляти восхощет. Сие бо есть ослабление, егда кто всею душею восхощет покоя: покой же, глаголют святии, юныя и здравыя вредити обыче. Зане глаголют святии отцы, василий и ма_ксим, яко для утоления алкания или жажды хлеб точию и вода потребны: здравия же ради и крепости тела прочая от Бога человеколюбне нам дарована суть. И да не един вид присно ядомый в безсладостие приведет немощствующаго, но един по единому, якоже предречеся полезна суть. Ибо удаление от пищи, и неумеренность приносят недуги: воздержание же и пременение на всяк день брашен, здравия бывают виною, да тело соблюдется безсладострастно и безнедужно, и будет содейственно к стяжанию добродетелей. И сия убо к подвизающимся речена быша: безстрастнии же младенчеством о Христе множицею чрез многи дни не ядят, забывающе тело, якоже святый сисой, иже по ядении искаше причаститися пречистых таин от Божественнаго изступления. Якоже глаголет апостол на пользу многим: аще бо изумихомся, Богови: аще ли целомудрствуем, вам{2 Кор. гл. 5, ст. 13.}: и якоже великий василий о некиих, и инии нецыи: Ниже паки с некиими ядуще таковии от многих ястий имеяху чувство таковых, но яко ничтоже ядуще бяху. Ум бо таковых несть в теле, да ощутит покой его, или болезнь. И сие показася от многих отец и святых мученик, яве же бысть и от святаго онаго, о немже написа святый нил: яко бе некий старец, глаголет, в пустыни моляся умне, егоже попущением Божиим на пользу его и других многих, за руце и нозе бесове емляху, и на высоте потрясаху. И паки, да не (с. 624) повреждено будет тело его, внегда падаше с толикия высоты, на рогозину приемляху. И сие на долзе творяще, искушаху, аще снидет ум его с Небеси, и не возмогоша сего совершити. Таковый ли убо ощутит когда ястие или питие, или что от телесных? И паки, святый ефрем, победив вся душевныя же и телесныя страсти, благодатию Христовою, да не празден от браней врага обрящется, и сего ради осужден будет, якоже мнеся ему от неизреченнаго смирения, искаше, да благодать безстрастия возмется от него. О немже иоанн лествичник удивився написа, яко суть нецыи безстрастнейшии, якоже он сирин, глаголет, и проч. %(О разсуждении.%) Сего ради во всякой вещи требуем разсуждения, да во время судим всяко начинание. Разсуждение бо свет есть, показующий имущему е время, начинание, дело, состояние человека, крепость, разум, возраст, силу, немощь, произволение, усердие, сокрушение, навыкновение, невежество, силу телесе, сложение, здравие же и злострадание, нрав, место, житие, воспитание, веру, расположение, намерение, пребывание, отраду, вежество, естественную мудрость, тщание, бодрость, медление, и подобная. Таже вещей естество, употребление, количество, виды, намерение Божие, в Божественных писаниях находящееся, разум коегождо речения, якоже глаголемое речение во евангелии от иоанна, егда приидоша еллини ищуще видети Господа, и абие рече им: Прииде час{Иоан. гл. 12, ст. 23.} и проч: являя, яко приспе звание языков: начася бо время страсти, и сие яко знамение полагает. Ибо разсуждение сия вся изясняет: не точию же, но и намерения толкования отец. Яко не бывающая вещь есть искомое, но егоже ради бывает, глаголет святый нил. И творяй что кроме разума реченных, аще и много трудится, но ничтоже совершити (с. 625) может, якоже глаголет великий антоний и святый исаак, о подвизающихся в телесных добродетелях, нерадящих же о делании ума, аще и сие есть паче искомое, якоже глаголет святый ма_ксим: даждь телеси делание по силе, и весь подвиг твой ко уму обрати. Телесне бо, глаголет, делаяй, овогда побеждается чревобесием и многосонием, пристрастием и многоглаголанием, и сими помрачает ум: овогда же продолжительным постом, бдением же и превосхождением трудов возмущает мысль. Но о уме тщайся, умозрит, молится, Богословствует, и всяку добродетель совершити может. Зане мудрый человек искусне подвизается творити, елико может, малыя потребы телесныя, да от сего будет малопопечителен, или и безпопечителен, во еже хранити заповеди. Якоже глаголет Господь: Не пецытеся{Матф. гл. 6, ст. 25, и 34.}, и проч: во многопопечении же ни самаго себе кто видети может, и како уже прежде времени уготованныя врагов сети зрети может: зане враг не всегда явну брань творити обыче, якоже глаголет златоуст. Аще бо бы сие было, не бо удобно в сети его мнозии впадали быхом, да малии спасающиися обрящутся, якоже глаголет Господь{Луки гл. 13, ст. 23.}. Но егда в великая воврещи кого восхощет, небрещи побуждает его первее малая и тайная, и прежде прелюбодеяния частое и сладострастное воззрение, и прежде убийства малую ярость, и прежде помрачения мысли малое пристрастие, и прежде сего паки нужную телеси потребу. Сего ради Господь, яко вся предведый, яко премудрость отча сый, предваряя диаволя коварства, повелевает человеком прежде времени отсецати вины ко греху, да не мняще удобопростительна быти малая, впадем бедне в лютая и великая согрешения. И глаголет: Речено древним{Матф. гл. 5, ст. 21 и 27.}, бывшим сиречь в законе, сия и сия: аз же глаголю вам, и проч: Научивыйбося от святаго евангелиа, должен есть внимати и творити, яже учит Спаситель, (с. 626) да избавится от сетей вражиих, и имети заповеди, яко щедроты и благодеяния велика, яко с премудростию великою могут спасти душу: заповеди бо суть Божий дар. И воистинну всяко даяние благо, и всяк дар совершен свыше есть{Иаков. гл. 1, ст. 17.}, якоже глаголет брат Божий. Якоже глаголет и дамаскин: Положил еси нам непостыдну ходатаицу рождшую тя, Христе, еяже заступлением подавай нам Духа преподательна благости, от отца тобою происходяща. Приемый бо дарование внимания Божественных писаний, якоже глаголют отцы, всяко благо обретает сокровенно во всех писаниях, якоже глаголет Господь: Научивыйся же царствию небесному, и проч.:{Матф. гл. 13, ст. 52.} Сиречь в сущем по Бозе упражднении и чтении Божественных писаний: понеже иное лице являет писание прочим человеком, аще и мнятся ведети, и ино являет отлучившему себе, во еже непрестанно молитися, сиречь, еже имети мысль Божию, вместо дыхания во всем, аще в мире и невежда есть и ненаучен человеческим учениям, якоже глаголет великий василий. Простоте же наипаче и смирению Бог является, якоже глаголет лествичник, а не трудов ради и тщетныя премудрости. Отвращается же паче Бог ея, аще не имать смирения: Лучше бо есть кто невежда словом, но не разумом{2 Кор. гл. 11, ст. 6.}, по апостолу: зане духовный разум дар есть, искуство же слова учение есть человеческое, якоже и прочая учения мира сего, и не споспешествует кому во спасение души. И сие явно есть от еллин. Чтение же памяти ради ведящим реченная от искуса, неискусным же научения ради бывает. Егда, глаголет великий василий, обрящет Господь чисто сердце от всех мирских вещей и учений: тогда аки на книжице ненаписанной написует на нем, догматы своя. Сие же глаголю, да не чтет кто не служащая ко угождению Божию: но аще и не ведяй сие прочтет некогда, да подвизается (с. 627) скоро изгладити память сего духовным чтением Божественных писаний, и паче служащих ему ко спасению души по состоянию, в неже достиже. Аще убо еще деятелен есть в житиях и словесех отец, аще же в Божественный разум благодать возведе и, да чтет во всех Божественных писаниях, яко могущее, по апостолу, низложити всяко возношение, взимающееся на разум Божий{2 Кор. гл. 10, ст. 5.}, и отмщевати всяко преслушание и преступление деянием и истинным разумом Божественных заповедей и догматов Христовых: вне же сих никакоже да чтет. Кая бо потреба есть прияти духа нечиста вместо Духа святаго? зане в коем слове упражняется кто, таково свойство слова имети хощет, аще и не видится ему неудобна вещь, якоже искусным. %(О чтении по Бозе.%) Да будет убо чтение по Бозе, во еже не скитатися уму, яко то есть начало спасения. Ненавидит, глаголет соломон, гласа утверждения{Прит. гл. 11, ст. 15.}, сиречь враг, якоже и парение мысли, начало есть, еже согрешати, якоже глаголет святый исаак. Хотяй же сего избежати совершенне, должен есть в келлии много упражднятися. Аще убо унынием отягощен есть, да делает мало, якоже и безстрастный и разумный к пользе многих, и в помощь некиим немощствующим, якоже велицыи от отец творяху снисходяще, и уподобляхуся страстным смиренномудрия ради: яко могущий везде Бога имети в себе, и во видении о Бозе упражднятися, и в рукоделии, и на торжищи, якоже глаголет великий василий, к совершенным зело, яко и во множестве народа, глаголет, якоже едини в себе, и в Бозе присно суть. Не имый же еще сего, но уныние отгнати хотящий, всякую беседу человеков и излишний сон должен есть отвергнути от себе, и оставити е измождати (с. 628) тело свое и душу, дондеже уныв отидет, видя его терпение в безпрестаннем упражднении о Бозе и во чтении и чистей молитве. Всяк во враг, аще видит себе совершити что могуща, пребывает ратующий: аще ли же ни, отходит или совершенне, или на время. Сего ради хотяй победити врагов, должен есть всяко терпение имети. Претерпевый же до конца, той спасен будет{Матф. гл. 10, ст. 22.}. Праведно есть, глаголет апостол, дати скорбь опечаляющим ны, нам же оскорбляемым отраду{2 Солун. гл. 1, ст. 6 и 7.}. Несть же зла никая вещь бываемая по Бозе со смирением: обаче имут различие вещи и начинания. Все убо, еже бывает кроме нужной потребы, препоною бывает хотящему спастися, сиречь, все еже не служит ко спасению души, или к телесной жизни: зане не брашна, но чревобесие есть зло: ниже имения, но пристрастия: ниже глаголы, но празднословие: ниже сладкая мира, но невоздержание: ниже любы ко своим си, но сущее от сего нерадение о благоугождении Божием: ниже одежды для прикрытия точию и избежания мраза и зноя, но излишния и многоценныя: ниже храмины для избежания точию с реченными и наветников, зверей же и человек, но двокровныя и трекровныя, великия же и многоиждивенныя: и не еже имети кому вещь, но еже имети не в нужную потребу: ниже книги имети нестяжательным, зло есть: но еже не имети я чтения ради по Бозе: ни еже имети други, но имети не сущих к пользе души: ниже жена зло есть, но любодеяние: ниже богатство, но сребролюбие: ниже вино, но пиянство: ниже естественная ярость, данная мучения ради греха, но егда употребляем ю противу подобных человеков: ниже начальствие, но любоначалие: ниже слава, но славолюбие, и горшее сего тщеславие: ни еже добродетель стяжати, но еже мнетися имети ю: ниже разум, но мнетися быти разумным, и горшее сего еже не ведети своего неразумия: ниже истинный (с. 629) разум, но лжеименный: ниже мир есть зол, но страсти: ниже естество, но чрезестественная: ниже единодушие: но на злотворение и не ко спасению души бывающее: ниже уди телеснии, но сих злоупотребление, ниже бо да похотствуем, яже не подобает, бысть зрение, но да зряще создания, прославим от них творца, во еже шествовати добре на полезная душам и телесем: ниже ушеса для приятия клеветы и буесловия, но слышания ради слова Божия и всякаго гласа, егоже слышим от человек, птиц и других, и сих ради прославляти творца: ниже обоняние разслабления ради души: и ослабления крепости ея благовонием, якоже глаголет Богослов, но для дыхания и приятия дарованнаго нам от Бога воздуха, и прославления его сего ради: без сего никтоже может жити телесне, ни человек, ни скот. И дивлюся премудрости благодетеля, како нужнейшия вещи удобно всеми обретаются, глаголю же воздух, огнь, вода и земля. Не точию же сия, но и могущая спасти душу удобнейшая иных вещей сотвори, погибель же ей наносящая неудобнейша суть. Якоже убожество паче спасати обыче душу, богатство же препятием к сему многим бывает. И то убо всякий обретает: сие же несть в нашей воли. Таже безчестие, смирение, терпение, послушание, повиновение, воздержание, пощение, бдение, отсечение своея воли, телесныя немощи, благодарение во всех сих, искушения, тщеты, лишение нужных, удаление от сладких, нагота, долготерпение и вкратце, вся Бога ради бывающая начинания удобосовершима и невозбранна суть, и никтоже о сих сварится, но паче попущает произволяющим имети я, или вольне, или невольне находящая. К погибели же побуждающая, неудобообретаема суть, якоже богатство, слава, гордость, недесноприятие, презрение власти, начальство, невоздержание, многоядение, многословие, самовольное творение, здравие и крепость тела, безвредное житие, приобретения, стяжание всего, елика желаем, и наслаждение сладких, стяжание одежд и покрывал многих и многоценных, и (с. 630) подобная, о нихже многий бывает подвиг, мало же приобретение, и привременна польза, и многа убо скорбь, кратко же наслаждение. Занеже не точию имущим та и не имущим, но и имети желающим всякия скорби виновна бывают, аще и несть зло ничтоже, но сих злоупотребление, якоже речеся. Ниже бо да крадем и похищаем, и руки друг на друга зле простираем, имамы руце и нозе, но да сия на всяко о Бозе делание употребляем, на милостыню же нищим, к совершенству немощнейшим душею, и на помощь требующим: сильнейшии же душею и телом нестяжания ради, или подражания Христу, и святым его учеником, и ко еже прославляти Бога, и дивитися сокровенней его премудрости во удесех наших: и како руце сии и малии персты на всяко художество и делание, писание же и начинание бывают готови Божиим промыслом, от негоже разум безчисленных художеств и писаний, премудрости же и целительных врачевств, язык же и различных писмен. И вкратце, вся прежде бывшая, бывающая и быти имущая крайния ради благости нам дарована быша, и присно даруются, для жизни телесныя и спасения душевнаго, аще по Божию намерению употребляти будем вся сущая, и сих ради прославим его со всяким благоразумием. Аще же ни, отпадаем и погибаем, и вся сущая в скорбь нашу в нынешнем веце бывают, и не точию, но и в будущем в вечную муку, якоже предречеся. %(О истиннем разсуждении.%) Приемый убо благодатию Божиею дар разсуждения от многосмиренномудрия должен есть хранити всею силою дар сей, отнюд не творя ничтоже безразсудне, да не согрешая в ведении от нерадения, большаго осуждения виновен себе бывает. Не приемый же еще дара сего, отнюд не должен есть составляти разумения своего, или слова, или дела кроме вопрошения, (с. 631) и извещенныя веры, и чистыя молитвы, без нихже в разсуждение истины взыти не может. Сие раждается от смиренномудрия: имущему же е раждает прозрение якоже глаголют моисей и лествичник, да имеяй предвидит сокровенныя, вражия козни, и отсецает прежде времени вины их, по давиду: и на враги моя воззре око мое{Псал. 53, ст. 9.}. Знамения же разсуждения суть, познание неложно добрых и сопротивных, таже ведение Божественныя воли во всех начинаниях: прозрения же, познание своих грехопадений, прежде даже в дело не приидут, и яже по крадению от демонов бывающая: по сих и сокровенных в Божественных писаниях таин, и в чувственных творениях. Имать же и сих мати смирение знамения, якоже предречеся о нем, познается же и от сего: аще бо кто есть смиренномудр, должен есть всяку добродетель имети, и яко вящше должен сый, хуждша себе всей твари быти, воистинну верует. Аще же не таков бывает, сие самое извещение есть, яко хуждший есть всей твари, аще и равноангельное житие имети мнится: зане и истинный ангел не возможе по толиких добродетелех и премудростех угодити творцу без смирения. Что прочее имать рещи мняйся быти ангел, кроме смирения, вины всех сущих и быти имущих благ? от негоже раждается разсуждение просвещающее концы, а без него вся суть мрачна. Свет бо есть и глаголется, и сего ради прежде всякаго слова и начинания требуем сего света: да прочая зряще дивимся. Дивимся же и Богу, како в первый и господственный день, первее свет сотвори, да не пребывает невидима бывающая по сем, яко не сущая, глаголет дамаскин. Свет убо, якоже предречеся, есть разсуждение, нужднейшее же всех даров есть, рождшееся от сего прозрение. Что бо нужднейше есть паче, еже видети кому крадения бесов, и соблюдати душу свою, благодати содействующей? Нужднейша же паки есть (с. 632) всех деланий, чистота совести, якоже глаголет святый исаак, и освящение тела, без негоже никтоже узрит Господа{Евр. гл. 12, ст. 14.}, якоже глаголет апостол. %(Яко не подобает отчаяватися, аще и много кто согрешит.%) Обаче не подобает нам отчаяватися, не сущим якоже быти подобает. Зло убо сие, яко согрешил еси человече. Что же Бога прогневляеши, и от неразумия немощна вменяеши его? Еда ли не может спасти души твоея сотворивый толикий, егоже видиши, тебе ради мир? Аще же глаголеши, яко и сие паче осуждение ми есть, якоже и его снисхождение: покайся, и приимет покаяние твое, якоже блуднаго и блудницы. Аще ли же ни сие можеши, но по навыкновению согрешаеши, в нихже бы и не хотел еси, имей смирение якоже мытарь{Луки гл. 18, ст. 13.}, и довлеет ти во спасение: ибо непокаянне согрешаяй, и не отчаяваяйся, по нужде хуждша всей твари имать себе, и не дерзает осудити или укорити коего человека? но паче дивится человеколюбию Божию, и благодарен ко благодетелю обретается, и ина многая благая имети может. Аще и диаволу в согрешении повинуся, но паки страха ради Божия преслушает врага, понуждающа его ко отчаянию. И от сего часть Божия есть, имеяй благоразумие, благодарение, терпение, страх Божий, еже не судити, да не осужден будет, яже всячески нужна суть, якоже глаголет златоуст о геенне, яко яве благодетельствует нам, и паче царствия небеснаго, яко сею мнозии в царствие небесное входят, царствием же не мнози, но человеколюбием Божиим: та убо нудит страхом, сие же приемлет: и обоими спасаемся благодатию Христовою. Якоже бо ратуемии от многих душевных и телесных страстей, аще претерпевают, и ниже самовластие (с. 633) свое от нерадения предают, ниже отчаяваются, венчаеми бывают: тако и безстрастие обретый с покоем и легкостию, абие отпадает, аще не исповедует благодати присно никакоже кого осуждая: аще же дерзнет сотворити сие, являет, яко своею силою богатство себе приобрете, глаголет святый ма_ксим. И яко велико бедствие имать страстный еще и непричастный просвещения разума, аще и начальствует некиими, глаголет дамаскин, тако и приемый безстрастие от Бога, и духовный разум, аще и другия не будет пользовати души. Ничтоже бо ино пользует немощному, якоже удаление в безмолвие: ниже страстному и невежде, якоже повиновение в нем: ниже что лучше, якоже уведети немощь свою и неразумие: ниже горше что, еже не ведети сие: ниже тако ненавистна другая страсть, якоже гордость: ниже насмеяния достойнейша, якоже сребролюбие: сие есть корень всех зол. Зане человецы соделавшии с великим трудом от металла земнаго сребренницы, паки их праздных в землю полагают. Сего ради глаголет Господь: Не скрывайте себе сокровищ на земли{Матф. гл. 6, ст. 19 и 21.}, и прочая. И паки: Идеже бо сокровище ваше, ту будет и сердце ваше. Зане человеческий ум, в нихже укосневает, желанием привлекается от навыкновения или к земным вещем, или к страстем, или к небесным и вечным благим: навыкновение же укосневшее крепость естества приимати обыче, глаголет василий великий. Аще же недугует кто, тогда паче подобает внимати свидетельству совести, да от всякаго осуждения освободит душу свою, да не како приспеет конец жизни, и имать раскаяватися безполезно, и плакати вечно. Не могий убо за Христа чувственну якоже он претерпети смерть, поне произволением должен есть терпети мысленне, и будет мученик совестию, внегда не покорятися борющим его демоном, или хотениям, но побеждати их, якоже святии мученицы и преподобнии (с. 634) отцы: из нихже ови чувственне, ови же мысленне мученицы быша. Мало убо понудивый себе, победи врага, или мало вознерадевый и омрачен быв погибе. %(Краткое учение о стяжании добродетелей, и удалении страстей.%) Ничтоже тако, глаголет великий василий, обыче помрачати мысль, якоже лукавствие: ниже просвещати ум, якоже чтение в безмолвии. Ничтоже толь скорую причиняет болезнь души, якоже мысль о смерти: ниже невидимое предспеяние, якоже самоукорение, и отсечение своих хотений: ниже невидимую погибель, якоже мнение и самоугодие: ниже виновно отвращения Божия, и наказания человеча, якоже роптание: ниже удобее приводит к согрешению, якоже смущение и многоглаголание: ниже благопоспешнее к стяжанию добродетели, якоже уединение и сетование: ниже ко благоразумию и благодарению, якоже размышление даров Божиих, и наших зол: ниже к возращению благодеянии, якоже сих благохваления: ниже невольное спасение подавати обыче якоже искушения: ниже ближайший путь ко Христу, сиречь к безстрастию и премудрости Духа, якоже путь царский уклоняющийся во всем превосхождений и оскудений: ниже ина добродетель может постигнути волю Божию якоже смиренномудрие, и еже оставити всяко разумение и волю свою: ниже содействовати во всяко дело благо, якоже чистая молитва: ниже возбраняет стяжание добродетелей, якоже пристрастие и возношение мысли, аще и зело мало будет. Елику бо чистоту кто имать, толико много является согрешати умозрением: и елико много согрешает, помрачается, аще и мнится имети чистоту. И паки: елик разум мнится имети, толико является неразумен: и елико не весть кто своего неразумия, и от части духовнаго разума, толико мнится разумен быти: и елико терпит подвижник (с. 635) скорби, толико победит врага: и елико подвизается кто сотворити что благо во един день, толико должен есть во вся дни живота своего, глаголет святый марк, аще, сиречь, будет его сила и усердие: аще же благодать есть Божия, и ея ради егда прииде благодать, тогда возможе, кую таковый имать похвалу? зане мнит, яко может нечто благое от себе творити, и не могущих осуждает неправедно. Истязуяй бо что от ближняго, от себе паче истязовати должен есть праведнее. Якоже бо согрешающии должни суть, яко прогневляющии Бога, тако и покровеннии Благодатию его, немощи ради своея и близости ко отчаянию, должни паче трепетати, якоже много должни суще, и яко велика стремнина есть неведение писаний, глаголет святый епифаний, тако вящшее есть зло еже в разуме преступление, и большее есть благотворение души словом, нежели молитвою. И егда терпит кто ближняго, да не оскорбится обидяй его, но яко да упокоит волю его во время смущения его, глаголет святый дорофей, творит милость с душею его нося тяготу его, и молится о нем, желая спасения его, и всего, что благо есть телесно же и душевно. И сие есть чистое незлобие очищающее душу, и возводящее ю к Богу. Зане врачевание человека лучше есть всех деланий и добродетелей. Ничтоже бо более и совершеннейшее есть в добродетелех, паче любви ближняго, знамение же сея не точию не имети никаковыя вещи, юже ин требует, но и смерть его ради да с радостию претерпит, по заповеди Господни, и сия аки долг вменяти, и достойне, должен бо есть не точию ближняго до смерти любити по естеству, но и за излиянную за ны пречистую кровь заповедавшаго нам{Иоан. гл. 15, ст. 3.} Христа. Не буди самолюбив, глаголет святый ма_ксим, и будеши Боголюбив, не буди самоугодник и будеши братолюбив. Сие бо от надежды раждается: надежда же есть несомненная вера от всея мысли, яко всячески (с. 636) получим надеемое. И сия паки от извещенныя веры бывает, яко никакоже попечение творити о своей жизни или смерти, но все попечение Богу предати якоже предречеся о желающем получити знамения безстрастия, ихже основание есть вера, юже имый должен есть помышляти, яко Бог, якоже вся, и нас со всеми от не сущих крайния ради благости сотвори, тако всяко и душу и тело устроити имать, якоже сам весть. %(О еже, како может кто стяжати истинную веру.%) Обаче хотяй стяжания ея, яже есть основание всех благих и дверь таин Божиих, и на враги безтрудная победа, и нужднейша всякия добродетели, и крило молитвы, и вселение Божие в душе: должен есть претерпети всяк искус, имже имать искушен быти от врагов и многих и различных помыслов, ихже никтоже может разумети, ниже глаголати что о них, или обрести, точию из_обретатель злобы диавол. Но да дерзает таковый, яко аще победит находящия ему искушения со многим усилием, и удержит ум свой, от еже не послабити сего помыслом, раждающимся в сердце его, победити имать единою вся страсти, зане не он есть победивый, но пришедый в онь верою Христос. О сих глаголет Господь: Аще имате веру яко зерно горушно, и проч.{Матф. гл. 17, ст. 20.} Но аще помысл изнемогши и попустит мало, да не страшится, ниже отчаявается, ниже да приписует своей душе глаголемая от злоначальника: но с терпением по силе делание добродетелей и хранение заповедей тщательне да творит в безмолвии и упражднении по Бозе о всех волею помышляемых: да всяко ухищрение и мечтание в нощи и во дни сотворив враг, ниже обрет его попечение творяща о бываемых от него игралищех и образех, со всеми разумениями имиже устрашаше, сиречь аки истину являя лжи исполненная игралища, (с. 637) уныв отидет. И делатель прием искус от заповедей Христовых, немощи вражия ктому ни от каковаго его ухищрения не ужасается: но с радостию вся, яже хощет и произволяет, о Бозе невозбранно творит, укрепляемый и вспомоществуемый верою от Бога, в негоже уверова, якоже сам Господи глаголет: Вся возможна верующему.{Марка гл. 9, ст. 23.} Зане не он творит брань со врагом, но Бог промышляяй о нем веры ради, глаголет пророк: Вышняго положил еси прибежище твое,{Псал. 90, ст. 9.} и проч.: и таковый совершенно не творит попечения ни о чесомже, ведый, яко конь уготовляется ко брани, от Бога же спасение его,{Притч. гл. 21, ст. 31.} глаголет соломон. И сего ради на вся дерзает, якоже глаголет святый исаак: Стяжи веру в себе, да попереши враги твоя. Ниже бо яко самовластен пребывает, но якоже скот водимый волею Божиею, якоже глаголет пророк: Скотен бых у тебе: и аз выну с тобою.{Псал. 72, ст. 22 и 23.} Волиши ли мя упокоити разумом твоим, не противоглаголю. Хощеши ли паки смирения ради попустити искушения имети ми, такожде есмь с тобою, не имам отнюд что творити от себе, кроме бо тебе не бых от не сущаго, ниже жити и спастися могу: чтолибо хощеши, твори с твоим созданием. Верую же, яко благ сый, благая ми устроити имаши, аще на пользу и не познаваю сия: но ниже достоин есмь знати, ниже прошу уразумети я, да покой имам, аще негли не на пользу ми суть, ниже облегчения брани коея просити смею, аще и немощен, и во всех удручаемь есмь, яко не вем, что полезно есть. Ты веси вся, и якоже веси, сотвори: точию да не погрешу, аще чтолибо будет: но аще хощу, аще не хощу, спаси мя, и сие аще угодно тебе. Аз убо вещи не имам. Пред тобою есмь, яко кий бездушен: душу мою предаю в пречистыя твоя руце в нынешнем веце и в будущем. Ты убо вся можеши, и вся веси, и всякаго блага всем хощеши, и (с. 638) желаеши присно спасения моего. Сие явлено есть от всех Благодеяний, яже сотворил еси: и твориши присно нам по благодати явленне и неявленне, яже вемы, и яже не вемы, и от единаго сущаго паче ума снисхождения твоего к нам, Сыне и слове Божий. Аз же кто есмь, яко дерзаю возвещати тебе сердцеведче: но да себе ведомо сотворю и врагом, яко к тебе прибегая, пристанищу спасения моего, сия глаголю. Се бо познах от благодати твоея, яко Бог мой еси ты, и не к тому дерзаю много глаголати, но точию ум празден, глух же и нем представити пред тобою хощу. Не аз же, но Благодать твоя вся содевает: не вем бо себе благо когда творяща, но присно множество зол: о нихже рабий зрак, припадая к тебе, являю, яко каятися мя сподобил еси, и яко раб твой есмь и сын рабыни твоея. Но да не оставиши мя, Господи мой, Господи, Иисусе Христе Боже мой, творити или глаголати, или помыслити, яже не хощеши. Довлеет бо ми множество толиких преждебывших моих грехов, но якоже хощеши, помилуй мя. Согреших, помилуй мя, якоже веси. Верую, Господи, яко внемлеши моему умильному сему гласу: помози моему неверию, даровавый ми, по еже быти и еже быти ми христианину. Велико ми есть, глаголет иоанн карпафийский, яко нарекохся инок и христианин. Якоже рекл еси Господи к некоему от раб твоих, яко велико ти есть, яко наречеся на тебе имя мое. Большее же ми есть сие, паче всех Царствий земли и небесе, точию да не отлучен буду от наречения сладчайшаго имени твоего. Владыко многомилостиве, благодарю ти, и проч.: якоже преднаписася. Якоже бо ина чтения приличествуют деятельному, и ина словеса, и слезы и молитва: тако и ина вера сия, паче первыя раждающия безмолвие. Она убо вера есть слуха, сия же видения якоже глаголет святый исаак: видение же слуха извещеннейше есть. От естественнаго бо разума раждается первая и общая православных вера, от неяже раждается по Бозе упразднение, якоже речеся, пост, бдение, чтение, (с. 639) _псалмопение, молитва, вопрошение искусных. И от всех сих раждаются добродетели душевныя, сиречь, блюдение заповедей, и нравов хранение и устроение, от нихже великая вера, надежда, и совершенна любы, восхищающая ум к Богу, якоже речеся, в молитве, егда кто умне с Богом соединяется, якоже глаголет святый нил. Словеса же молитвы единою написашася, да присно тоюжде молитвою молится хотяй ум свой недвижимь представити пред святую и живоначальную Троицу, яко видяй, аще и ничтоже лишшее отнюд видети возможно: но безвиден, невообразителен, необразовиден, несмущен, безпристрастен, недвижимь, невеществен, ни о чесомже от сущих во всей твари помышляющь и разсмотряющь: но в мире глубоцем, и совершенней тишине беседовати с Богом, и токмо едину святую его память имети, дондеже достигнет в восхищение ума, по еже сподобитися ему глаголати, якоже подобает, молитву Господню, сиречь: Оч~е наш, якоже святый филимон с святыми апостолы, мученики же и преподобными реша. Вне же сих сущее прелесть есть от мнения бывающа: безпредельно бо есть Божественное и неописанно, и бывый в себе ум тако должен есть быти, да сподобится по благодати нашествия святаго Духа. Верою, а не видением ходим,{2 Кор. гл. 5, ст. 7.} глаголет апостол. Сего ради на долзе пребывати должни есмы в подвизе, да многим временем ум от навыкновения рачением к Божественным влечется. Яко аще и не обрящет ум ино что большее чувственных вещей, не устремляет на сие хотения, и оставляет, яже многим временем навыче. Якоже убо человеколюбивии и безстрастнии не помногу вредими бывают от вещей житейских, зане добре сия устрояют: тако и имущии великия дары, зане Богу приписуют совершения. (с. 640) %(О еже страстным наипаче полезну быти безмолвию.%) Всем убо полезно есть безмолвие и удаление вещей и человек: паче же страстным и немощным. Ибо не может ум от единаго внешняго делания быти безстрастен, аще не приимет многих и духовных видений: ниже попечение и начальствие без вреда преходит кого, аще первее не стяжет безстрастия от удаления. Попечение же житейское и мятеж и совершенных обыче вредити и безстрастных: никая бо польза есть, глаголет златоуст, от делания человеча без вышняго приклонения, ниже вышнее приклонение приходит паки на непроизволяющаго: но обоя потребна нам, и Божия и человеческая, и делание, и разум, и страх и надежда, и плачь, и утешение, и боязнь, и смирение, и разсуждение, и любовь: зане, глаголет, вся жизненная сугуба суть, день и нощь, свет и мрак, здравие и недуг, добродетель и злоба, благополучие и злоключение, живот и смерть, да овеми убо, немощни суще, Бога возлюбим, овеми же бежим греха страхом искушений: сильни же суще всеми да возлюбим Бога, якоже отца, ведяще, яко вся блага зело суть, и полезне я Бог устрояет и от сладких убо воздерживаемся, трудная же желаем, ведяще, яко онех ради телеса жива бывают во славу творца: сими же души ко спасению вспомоществуеми бывают неизреченною милостию Божиею. Трех бо суть человецы устроений: раби, наемницы и сыны: и раби убо не любят благаго, но страхом мук от злаго удаляются: и есть убо сие, глаголет святый дорофей, благо, но не у благоугодно. Наемницы же любят благое, и ненавидят лукавое: но ради надежды воздаяния. Сынове же, яко совершенни суще, ниже страхом мук удаляются от лукавых, но крепце оная ненавидят: ниже паки благое надеждою воздаяния творят, но яко долг сие вменяют: и безстрастие любят яко подражание Богу, и вину его вселения, имже от всякия злобы удаляются, аще и прещение не предлежит. Зане (с. 641) аще кто безстрастен не будет: преблагий Бог не низпосылает на него всесвятаго Духа: да не от навыкновения влекомь еще к страстем обрящется, и бывает повинен нашествию святаго Духа, и большее осуждение имать. Но егда от навыкновения добродетели никакоже дружество имать со врагами, ниже от обычая страстнаго влекомь будет: тогда приемлет благодать, и тако не осужден пребывает в приятии дарования. Сего ради, глаголет лествичник, не открывает нам Бог воли своея, да не сию уразумевше, преслушаем его, и паче осуждени будем. Аще же и яко младенцы не вемы безпредельнаго его благоутробия к нам неблагодарным: Божию бо, глаголет, волю уразумети хотяй, должен есть умрети всему миру и своей воли во всем: сего ради всяку вещь имущу сомнение не должен есть кто творити ю, или составити, яко благу, аще не может пожити, или спастися без нея. И тако потребно ему вопрошати искусных: тогда от извещенныя веры и молитвы бывает таковое извещение прежде совершеннаго безстрастия, творящаго ум непреоборимь и непобедимь во всяком деле блазе, яко аще и велика брань есть, но человек пребывает невредимь: сила бо моя в немощи совершается,{2 Кор. гл. 12, ст. 10.} якоже рече Господь ко апостолу: и той глаголет: Егда немощствую, тогда силен есмь. Несть добро быти кому безстрастну: зане отходят многажды демони, глаголет лествичник, многими образы, или подсады ради, или мнения ради, оставляюще, или возвышения, или другаго ради коего зла, довольни суще в сем, яко могущим наполнити место других страстей. Сего ради овии отцы, глаголет от старчества, соблюдаша заповеди, овии же по них написаша сия, мы же написанная на оконцех положихом: аще ли же и прочести восхощем, не упраждняемся поне в том самом, еже разумети глаголемая, и творити я: но или яко не нужно что прочитываем, или мнимся (с. 642) велико нечто творити, и возносимся не ведяще, яко паче осуждение имамы, аще не творим, якоже глаголет златоуст. Ведый, глаголет Господь, волю господина своего,{Луки гл. 12, ст. 47.} и проч: Темже Благо убо есть чтение и разум, но егда к большему смирению приводят: такожде и совет, егда кто не испытует жития учителя, якоже глаголет Богослов: Не ищи удостоверения учащаго тя, или проповедающаго ти: и якоже глаголет Господь: елика аще рекут вам,{Матф. гл. 23, ст. 3.} и проч: Никоегоже вреда не бывает вопрошающему от дел учащаго и, но ниже паки пользы, аще не творит сам: занеже кийждо воздаст о себе слово:{Матф. гл. 12, ст. 36.} учитель убо о словеси своем, учимый же о сущем от дел послушании своем: сущая же внеуду сих, противу естества суть, и осуждения достойна. Зане, глаголет святый евстратий, благ есть и праведен Бог, и по благости всяко благо нам дарствует, егда по благоразумию имамы е со благодарением, яко от праведна приобретения. Но аще неблагодарнии являемся, лишаемся благаго правосудием Божиим: темже благость Божия и правда его подают нам всякое благо по естеству, за злоупотребление же вечную муку. %(О еже, яко велие благо есть истинное покаяние.%) Обаче, егда кто восхощет, паки полагает начало покаянием. Пал ли еси, глаголет: востани: и паки пал ли еси, паки востани, не отчаяваяся отнюд о своем спасении, аще чтолибо и будет: ниже волею предавай себе врагу, и довлеет ти терпение сие с самоукорением во спасение. Бехом, глаголет апостол, и мы некогда несмысленни, ходяще во своих похотех,{Тита гл. 3, ст. 3.} и проч: Ты убо отнюд да не отчаешися, не ведя Божией помощи, может бо елика хощет сотворити: но уповай на него, и едино от сих имать сотворити, или яко некиими (с. 643) искушениями, или другими образы, имиже он весть, устроит твое исправление, или приимет твое терпение и смирение вместо делания: или инем образом, егоже не веси, по упованию соделает человеколюбно, во еже спасти бездерзновенную твою душу: точию да не оставляеши врача, зане люте терпети имаши сугубую смерть за неведение сокровеннаго Божия намерения, якоже речеся о разуме, и ныне речется о делании: яко посреди шести сетей есть всяко телесное и душевное делание, одесную, глаголю, и ошуюю, сиречь, превосхождением трудов и оскудением: горе и долу, сиречь, возношением и отчаянием: внутрь и внеуду, сиречь, боязнию и дерзостию, о нейже глаголет Богослов, яко далече по превосходству отстоит от дерзновения, аще именем и подобна есть: посреде же сих шести сетей умеренное делание во смирении и терпении. Дивитися подобает уму человечу, како прелагает вся сущая в нем, якоже хощет, аще и непреложна суть, и в других тако пребывают. И сего ради не вси едино намерение о сущих имамы: но кийждо, якоже хощет, употребляет вещи или добре, или зле: чувственная убо делом, мысленная же словом и помышлением. Четырех, якоже ми мнится, видений по Богослову и устроений вси человецы: овии убо добре зде и в будущем, якоже вси святии и безстрастнии бывшии: овии же зде точию добре, яко благодетельствуемии недостойне душевне или телесне, за еже не имети благодарения ко благодетелю, якоже оный богатый, и таковии: инии паки зде точию мучатся, якоже долгим недугом обдержимии, якоже оный разслабленный, и искушаемии благодарне от своея мысли. Инии же паки и зде и тамо мучатся, якоже искушаемии от своих хотений, якоже иуда и подобнии. И паки четыре имут намерения о чувственных вещех. Овии во ненавидят дела Божия, якоже демони, и от злаго произволения злобствуют: овии же яко добра любят, обаче страстно, якоже безсловесная животная, ничтоже о (с. 644) естественном видении и благодарении пекущеся: а инии, якоже человецы естественно с духовным разумом и благодарением, употребляюще вся с воздержанием: инии же паки вышеестественне, якоже ангели, зрят вся во славу творца ничтоже от сих употребляюще, разве точию потребная к житию по апостолу.{1 Тим. гл. 6, ст. 8.} %(О общих и особенных дарех Божиих.%) Сего ради должни есмы вси человецы присно Благодарити Богу о общих же и особенных благодеяниях душевных же и телесных. Общия убо суть четыри стихии, и вся от них бывающая, и вся в Божественных писаниях предложенная дивная и ужасная дела Божия. Особенная же, елика Бог коемуждо человеку даде, или богатство милостыни ради, или убожество благодарнаго ради терпения, или власть правосудия ради и утверждения добродетели, или покорение и рабство готоваго ради спасения души, или здравие вспоможения ради требующим и делания по Бозе, или болезнь венца ради терпения, или разум и крепость стяжания ради добродетели, или безсилие и невежество повиновения ради в безмолвии со смирением и удаления вещей, или невольное лишение вещей вольнаго ради спасения и помощи не могущим приити в совершенство нестяжания, или поне к милостыни, или покою и благоденствию ко еже волею подвизатися и трудитися в добродетелях, якоже безстрастным быти, и иныя спасти души: или искушение и злоключение ко еже невольне спасенным быти немогущих отсещи своих хотений, или паки совершенства ради могущих претерпети с радостию. Вся убо реченная аще и противна друг другу суть, обаче в потребе вся суть добра зело: кроме же потребы не суть добра, но паче вредна душе и телу: лучше же всех реченных есть терпение скорбных. (с. 645) И сподобивыйся великаго дара сего должен есть благодарити Бога, яко облагодетельствован быв вящшими. Бысть бо подражание Христу и святым его апостолам, мученикам же и преподобным. Зане многу силу и разум от Бога прият ко еже волею сладких удалятися, и желати паче скорбных отсечением своих хотений, и отвержением не по Бозе сущих разумений, да творит и помышляет присно угодная Богу. Сподобившиися убо употребляти вещи по потребе, должни суть много благодарити Бога со смирением многим, яко свободишася благодатию Божиею от сущих противу естества и преступления заповедей. Мы же еще страстнии суще и во зло употребляющии вещи, яко противу естества, должни есмы трепетати и много благодарити благодетелю со всяким благоразумием дивящеся неизреченному его долготерпению, яко и преслушающим нам его заповеди, и во зло употребляющим вещи, и отвращающимся его даров, терпит безумию нашему, и не престает благотворити нам ожидая обращения и покаяния нашего до последняго издыхания. Тако должни есмы вси человецы благодарити его, якоже речеся: о всем благодарите: от сего другий глагол апостолов, якоже рече: непрестанно молитеся,{1 Сол. гл. 5, ст. 17 и 18.} сиречь, еже имети память Божию во всяком времени, месте же и вещи: яко аще кто чтолибо творит, должен имети память творца прилучившияся вещи, сиречь, аще видиши свет, не забуди даровавшаго его ти: аще видиши небо и землю, море и вся сущая, удивися и прославляй создавшаго: аще в ризу облекаешися, познавай, чий дар есть, и воспевай промышляющаго о жизни твоей. И вкратце: всяко движение да будет тебе вина к славе Божией, и се непрестанно молишися. И от сих всегда радуется душа{1 Сол. гл. 5, ст. 16.} по апостолу: память бо Божия веселит ю, глаголет святый дорофей, приводя свидетеля Давида: помянух, глаголет сей, Бога, и возвеселихся.{Псал. 76, ст. 4.} (с. 646) %(Яко вся к пользе нашей сотворил есть Бог.%) Понеже вся сущая к пользе нашей Бог сотвори: от ангел убо блюдомы есмы и научаеми, от демонов же искушаеми, да смиримся и прибегнем к Богу, имиже спасаемся и избавляемся от возношения и нерадения страхом искушений. И паки: от сладких убо мира, здравия, глаголю, благоденствия, крепости, покоя, радости, света, разума, богатства, во всем предспеяния, мирнаго устроения, наслаждения, чести, власти, обилия, и всех мнимых благих в житии сем возводимся к благодарению и благоразумию ко благодетелю, и ко еже любити его, и творити еже по силе благое, яко долг имуще естественный, за дары благоделанием воздати мняще, аще и несть мощно сие: но вящший долг есть. От мнимых же бедствий, недуга, злоключения, труда, немощи, невольныя печали, мрака, неразумия, убожества, злополучия во всем, боязни, лишения, безчестия, удручения, скудости и всех сопротивных предреченным приходим в терпение: смирение же, и благое упование в будущем, не точию же, но и в нынешнем веце великих утешений нам бывают сия виновна. Темже вся добра Бог нам устрои чудне неизреченною благостию. И хотяй убо сия разумети, якоже подобает, да подвизается о стяжании добродетелей: да вся реченная приемлет со благодарением, добрая же и являющаяся сопротивна, и во всем обретается без смущения: и не точию в сих, но и егда гордый помысл во еже возвысити его демони предложат: тогда воспоминает яже прежде глаголанная от них скареднейшая, и низлагает его, и ко смирению приходит. И егда паки мерзкое что предложат, воспомянув гордый оный помысл, низлагает сие: темже творит их низлагати друг друга, содействием благодати, памятию, да ниже в отчаяние скареднейшими, ниже в гордость мнения ради приидет когда. Но егда вознесут ум его врази, прибегает к смирению: и егда смирят ум его, (с. 647) к Богу возносится упованием, да никогда же дерзнувый падет, ниже паки убоявыйся отчается до последняго издыхания. И сие есть великое инока делание, якоже глаголет от старчества: но егда предлагают сие врази, он иное предполагает: и егда они другое, он сие на среду приводит, ведый, яко ничтоже есть в житии сем отнюд неизменно. Но претерпевый до конца, той спасен будет,{Матф. гл. 10, ст. 22.} хотяй же быти вещем, якоже хощет, не весть, камо идет. Но яко слепый колеблемый всяким ветром, аще чтолибо ему приидет, совершенно весь оному предается, и яко раб боится печальных, и яко пленник мнению порабощается, мняйся от безсловесныя радости ведети, яже никогдаже веде что, и откуду суть. Аще же глаголет ведети, тогда паче ослепляется. Сие бо бывает, егда не укоряет себе, еже глаголется самоугодие и безвестна погибель, якоже глаголет святый макарий во главизнах о погибшем иноце, внегда узрети ему горний иерусалим, молящуся с некоею братиею и восхитившуся уму его: зане достигнути возмнеся нечто, а не вящший долг имети. Якоже убо зело страстнии ниже явная многим ведят от мглы страстей: тако и безстрастнии, многим недоведомая, ведят от чистоты ума. %(Яко слово Божие не есть благочестие.%) Слово бо Божие, глаголет святый ма_ксим, несть многословие. Но егда вси человецы много глаголем: тогда единаго словеси не исполнихом, сиречь, рече Бог: Возлюбиши Господа Бога твоего всею душею твоею{Матф. гл. 22, ст. 37.} и проч: колико убо рекоша отцы, колико написаша, и еще глаголют и пишут, и не исполниша единаго сего словеси. От всея бо души, глаголет великий василий, есть отнюд не любити что с Богом: зане аще кто свою душу любит, Бога не любит от всея (с. 648) души, но от полу. Егда же и себе самих и другая безчисленная любим, како Бога любити можем, или дерзнем сие глаголати? Такожде и о любви ближняго: аще привременную жизнь, негли же и будущую за любовь ближняго не отвергнем, яко моисей и апостол, како глаголем любити его? Зане ов рече о народе к Богу: аще убо оставиши им грех их, остави: аще же ни, изглади и мене из книги твоея, в нюже вписал еси.{Исход. гл. 32, ст. 32.} Апостол же глаголет, анафема быти себе от Христа, и проч.: Молилбыхбося сам отлучен быти от Христа по братии своей, паче же ищущих убити его, иже суть Израильтяне. {Римл. гл. 9, ст. 3 и 4.} Таковы суть души святых: сии врагов паче себе любят. Темже в нынешнем веце и в будущем во всем ближняго предпочитают, аще и враг им злаго ради произволения будет, не ищуще воздаяния от любимых ими, но яко приемлющии радуются, внегда даяти другим вся своя, да благодетелю угодят, и по силе подражают его человеколюбию, яко благ есть на неблагодарныя и грешныя. Наипаче же елико кто таковыя дарования сподобится имети, толико должника себе должен есть таковый вменяти вознесшему его от земли Богу, и сподобльшему персть подражати от части творцу и Богу. Еже бо претерпевати обиды с радостию и незлобиво, благотворити врагом, и полагати свою душу за ближняго, суть дары Божия, даруемыя произволяющим сия прияти от него тщанием, во еже делати и хранити, {Быт. гл. 2, ст. 15.} якоже речеся ко адаму, да пребывают дары благодарением ко благодетелю. Зане ни едино благо николиже свое имамы, но вся благая от Бога нам даровашася по благодати, якоже от не сущаго бывают сущая. Что бо имаши, егоже неси приял{1 Кор. гл. 4, ст. 7.}, глаголет апостол, туне, сиречь, от Бога: аще же и приял еси, что хвалишися, яко не приявый, но сам собою творяй? еже не возможно Господу глаголющу: Без мене не можете творити ничесоже{Иоан. гл. 15, ст. 5.}. (с. 649) %(Яко без смиренномудрия не возможно спастися.%) Не вем, аще от многаго омрачения страстей в толико безумие кто прииде, яко негли мнит себе быти равна ангелом, паче же и больша, яко мнит спастися без смиренномудрия, егоже лишився прежде денница кроме инаго греха тьма бысть. Темже что убо имать претерпети не имый смирения, мертвенный и персть, да не реку грешник? негли слеп сый не верует, яко грешен есть? Всею нуждею, глаголет златоуст, совершен человек будет равноангелен, якоже глаголет Господь, сиречь в воскресение мертвых, а не в нынешнем веце. Но и ни тогда ангели, но равноангельни суть, рече: не бо могут, глаголет, человецы оставляти свое естество: но якоже они неизменни по благодати, и всякия нужды свобождени, самопроизвольну имут власть и непрестанно веселие, и любовь к Богу, яже око не виде, и проч. Зде же никомуже возможно совершенну быти, но яко залог обетованных благ приемлет. Якоже бо непричастнии дарований, должни суть смирятися, яко нищии, тако и имущии сия, яко приемшии от Бога, да не осудятся за неразумие. И якоже богатии, должни суть благодарити Бога за дары его: много вящше и богатящияся в добродетелех, яко должни суть, и нищии благодарити Бога, и любити благотворящих богатых, за еже облаготворятися о них: тако много паче и богатии, зане и в нынешнем и в будущем веце спасаются промыслом Божиим, милостыни ради: яко без нищих не имут спасения души, но ниже искушений богатства избежати могут. И якоже ученицы учителей, тако и учители учеников должни суть любити, и друг за друга благодарити Бога, даровавшаго всем разум и всякое благо, о нихже подобает присно благодарити его, паче же приемлющим силу возставити святое крещение покаянием, егоже кроме никтоже может спастися. Зане, рече Господь: (с. 650) Что мя зовете, Господи, Господи, и не творите, яже глаголю{Луки гл. 6, ст. 46.}? Но да никтоже безумен сия и толикая слыша возмнит, яко аще Господа призывати не будет, неповинен будет, паче же более осужден бысть, якоже рече Господь: Аще в сурове древе сия творят, в сусе что будет{Луки гл. 23, ст. 31.}? И аще праведный едва спасается, глаголет соломон, нечестивый же и грешный где явится{Притч. гл. 11, ст. 31.}. И паки отвсюду утесняема зря себе от Божественных заповедей, да не отчаявается, яко и самоубийцы горше осудится, но паче удивлятися должен есть Божественным писаниям и заповедям, яко зде и тамо человека к совершенству побуждают, да не обрящет камо бежати от благаго, во еже обрести послабление в горшее. Но купно егда сотворити нечто таковое восхощет, вся злая пред собою обретая, обращается к благому Богу, человеколюбне устрояющу досточудная, да всяк человек совершен будет некиим образом и не хотя, аще и власть имать в себе. Благоразумнии же паче стыдящеся от благодеяний подвизаются, якоже прешедшии реку спяще, якоже рече святый ефрем{Слово его о сем в прологе ноября 1.}. Сего ради, глаголет святый исаак, умножи Бог искушения, да страхом сих прибегаем к нему. Сего же не разумеяй, но таковый дар порицаяй от сластолюбия, сам себе уби, и погуби, прием оружия противу врагов, употреби оная к своему убийству. Якоже бо глаголет великий василий, Бог благ сый, всех благими сотворити хощет: тако и диавол лукав сый, всех во свою злобу вовлещи желает, аще и не может. И яко чадолюбивии родители с прещением чада своя безумно творящая обращают любовию побуждаеми: тако и Бог искушения попускает, яко жезл обращающий достойных от диавольскаго злосоветия. Щадяй жезл свой, ненавидит своего сына, любяй же наказует прилежно{Притч. гл. 13, ст. 25.}. Но понеже нам сластолюбивым и самолюбивым отвсюду предлежит бедствие, аще Боголюбивым наипаче и спасение есть, искушения, (с. 651) глаголю, Богу попущающу, и отпадение к погибели от гордости, и от еже не пребывати при Бозе: сего ради яко сыном наказуемым, но не умерщвляемым, легчайшее избрати нам подобает. Лучше бо терпением находящих прибегати к Богу, нежели страхом бед отпадение претерпевати, и в руце диаволи впасти, и вечное отпадение паче же муку с ним навлещи на себе. Зане едино от двою предлежит нам, или да претерпим первая и привременная, или вторая и вечная. Праведных же ничтоже отнюд от обоих бед касается, занеже с радостию злоключительная нам являющаяся любят, и яко время приобретения обретше искушения лобызают, и пребывают неуязвленни от них. Не бо обыче умирати приемляй стрелу, и непораженный от нея, но приемый смертную от сея язву, погибает. Повредила ли иова язва, и не паче ли увенча? или ужасила ли апостолов и мучеников когда? Радовашася, глаголет, яко за имя его сподобишася безчестие прияти{Деян. гл. 5, ст. 41.}. И елико победитель боримь бывает, толико увенчавается, и от сего велию радость имать: егда услышит глас трубы, не яко заклание возвещающия боится таковый, но яко о предвещании венца воздаяния веселится паче: ничтоже бо тако без труда совершати обыче победу, якоже благодерзновение со извещенною верою: ниже побеждение, якоже самолюбие, и яже от неверия боязнь обыче творити: ниже к мужеству руководитель ин, якоже рачение и искус вещи: ниже к тонкости помыслов, якоже чтение в безмолвии: ниже ино что виновно забвения, якоже праздность: ниже ко оставлению грехов благопоспешительнее, якоже незлобие: ниже примирения о гресех виновно, якоже покаяние и отсечение зла: ниже предспеяния души кратче, якоже отсечение своих хотений и разумений: ниже больше что есть, якоже кому повергати себе пред Богом день и нощь, и молити его, да будет во всем воля его: (с. 652) ниже горше, якоже любити вольность и парение души или тела. Зане нам страхом еще мук и искушений любящим благое, отнюд не на пользу есть вольность, но блюдение себе и удаление вещей: да поне удалением вредящих немощь нашу, возможем боротися с помыслы. Начальственных бо духов начальницы безстрастнии побеждают, яко уже победившии студнейшия страсти, сущии же в повиновении отца, начальствуемыя. Зане глаголют святый макарий и авва кроний, начальницы суть и начальствуемые демони. Начальственныя же, тщеславие, мнение, и подобныя: начальствуемыя же, чревобесие, блуд и таковыя. Достигшии бо в совершенную любовь обладают ими, яко без понуждения творят благое, и радуются, внегда творити е, никогдаже оставити е хотяще. Но егда негли будет им воспящение не вольне, яко мучительствуеми обретаются. И влекоми Божественною любовию, абие убегают в безмолвие и делание, яко наслаждение и свойственный обычай. К сим бо, глаголют отцы, мало молися, мало чти, мало поучаяйся, мало делай, мало блюди ум, и тако проходи время. Сия же глаголют, зане сами собою обладают безстрастнии, и не пленяются ни от коегоже хотения вне подобающаго: но идеже хотят, ум имут, и телу яко рабу повелевают. Мы же должни есмы быти под законом и правилом, да невольне и не хотяще, якоже от долга понуждаеми, творим благое. Зане еще страсти и сласти паче любим, сиречь, покой тела и своя хотения, и камо хощет враг, водит ум наш: тако и тело, безчинна имущи стремления, аще чтолибо хощет, яко безсловесно творит. И воистинну, идеже несть управления ума, вся безсловесно и вне естества бывают: и не яко истиннии исраильтяне, якоже глаголет Господь о зилоте симоне кананите: се воистинну Израильтянин, в немже льсти несть{Иоан. гл. 1, ст. 41.}, проповедуя добродетель его. Нафанаил (с. 653) бо ревность Божия толкуется: и собственное его имя симон бе, кананит же, зане бысть от каны галилейския: и нафанаил паки за его добродетель, якоже и Израильтянин, то есть, ум зряй Бога, кроме всякия лести. Обычай бо есть, глаголет великий василий, Божественному писанию паче нарицати от добродетели человека, нежели от рождения. Ибо и верховнии апостоли петр и павел, ов симон нарицашеся, и петром твердости его ради Господь нарече: ов же савл, сиречь смущение, и во павла премени, то есть, покоище, или покой. И воистинну: колико бо возмущаше первее верных, толико послежде упокои всех души делом и словом, якоже глаголет о нем златоуст: зри благоговение апостола, помянув бо Бога, не учаше, дондеже бы должное благодарение и моление воздал Богови, являя, яко от него имать разум и крепость. И воистинну, глаголет с молитвою учение. И Божественный лука недокончанна остави деяния апостольская, не от нерадения, или другия некия нужды, но зане к Богу отиде: мы же, егда неокончанну вещь или начинание оставляем, от нерадения или небрежения сие творим. Зане не зиждем дел Божиих прилежно, и не яко воистинну дело любим, но презираем яко ненужное и тяжкое: и сего ради не предспеятельни пребываем, или обращаемся многажды и вспять, якоже обратившиеся некогда вспять, и ктому не хождаху со Иисусом{Иоан. гл. 6, ст. 66.}. Аще, глаголет златоуст, и не бе слово жестоко, якоже мнеша: но о догматех бе речено им тогда: но идеже несть произволения, ниже рачения, и легкая обретаются трудна, якоже и сопротивная. %(О назидании души добродетельми.%) Требует бо всякий человек прежде всех терпения, глаголет великий василий, якоже земля дождя, да основание, якоже глаголет апостол{Евр. гл. 6, ст. 7.}, сиречь веру положит на нем, (с. 654) и помалу зиждет разсуждение, яко искусный домостроитель дом души. Присно бо полагает брение от земли смирения. да соединит камень с каменем, сиречь добродетель с добродетелию, дондеже возложится кров, сиречь совершенная любы. И тако дому Владыка входит, и обитает в душе, аще вратари имать добры, присно держащя оружия, сиречь, мысли светлы, и Боголепная делания, могущая невозмущенна сотворити царя, а не жену вратницу, и сию рукоделие держащу, якоже глаголет святый нил, толкуя ветхия повести. Сего ради, глаголет, не постави патриарх авраам жену вратницу, но паче мужественный некий и жестокий помысл, и сей оружия носящь, якоже глаголет апостол с прочими: И мечь духовный, иже есть глагол Божий{Ефес. гл. 6, ст. 17.}, да входящия к нему или убивает, или отгоняет. Зане недремлющь есть и стоящь, убивая чуждыя помыслы сопротивляющимся деланием и противоречущим словом: отражает же все, чтолибо вне Божияго намерения входящее в сердце, презрением сего и отвержением, во еже никакоже от видения о Бозе и Божественных мыслей праздность да имать просвещенный ум. Дело безмолвия глаголет, есть глаголемое. Якоже инде обретается святый нил, приводя Божественное писание, и изясняя, яко пристрастие есть вина помрачения ума. Да и воистинну. Аще во не бы держимь был ум отвсюду, якоже в трубе вода, не бы могла мысль собратися к себе, да и к Богу взыдет: не возшед же кто умне, и не вкусивый чесого от горних, како возможет удобно дольная презирати? Темже верою должни есмы тещи, по апостолу, с терпением, дело имуще само сие, еже благоугодити Богови. И времени зовущу добре текущии, ведети сие и от части постигнути могут. И по сих все в будущем, разрешившимся зерцалом тленныя сея жизни, идеже не ктому, душа похотствует на (с. 655) плоть, и плоть на дух{Галат. гл. 5, ст. 17.}: ниже уныние забвение, и забвение неведение нанести могут: якоже ныне страждем мнози, якоже и написати к воспоминанию потребно есть. Ибо многажды мысль некая самодвижне прииде, и писание предаде ю памяти ради. Имех же ю во время брани виновну сущу помощи, или облегчения, или благодарения, егда от Божественнаго писания свидетельство име. Аще же бы вознерадех о таковых, не бы ктому обреташеся, егда бы возтребовах ю, и лишился бы пользы ея от всезлобнейшаго забвения. Сего ради должни есмы делом научитися добродетелем, да навыкновением сих соблюдется память благаго, а не словом токмо: не в словеси бо глаголет апостол, царствие Божие, но в силе{1 Кор. гл. 4, ст. 20.}. Ищай бо делом, сей весть тщету и приобретение тоя, в нейже проходит вещи, глаголет святый исаак: и сей может дати другим совет, яко пострадав множицею, и уразумев искусом. Зане суть вещи, добры являющияся, глаголет, имут же неизбежную сокрыту в себе тщету: и суть другия являющияся лукавы, имут же внутрьуду великое приобретение. Сего ради глаголет: Несть всякий человек верен дати совет ищущим. Но кто от Бога прием дар разсуждения, и от многаго пребывания в подвижничестве стяжа ум прозрителен, якоже глаголет святый ма_ксим. И сие с великим смирением советовати не всем, но волею ищущим, и непринужденне вопрошающим его, и якоже в чине учащагося, да смирением и вольным прошением вопрошающаго вообразится слово в душе слушающаго. И согреется сей от веры, зря благаго советника, якоже чуднаго онаго советника, о немже рече пророк исаиа: Бога крепкаго, властителя{Исаии гл. 9, ст. 6.}, и проч: глаголю же Господа нашего Иисуса Христа, рекшаго ко оному злоречущему: Кто мя постави судию или делителя над вами{Луки гл. 12, ст. 14.}? аще, глаголет, и весь суд даде Сынови отец{Иоан. гл. 5, ст. 22.}: но являя нам якоже и (с. 656) во всех, и в сем путь спасения святым своим смирением, яко не нудит: но аще кто хощет по мне ити: да отвержется себе, и последует ми{Матф. гл. 16, ст. 24.}, глаголет: то есть, да никакоже о своей жизни попечение творит: но якоже аз творю, и претерпеваю чувственную и вольную смерть за всех, тако и той делом и словом да последует, якоже апостоли и мученицы: аще ли же ни, хотя по произволению сущую смерть да претерпит. И паки к богатому оному глаголет: Аще хощеши совершен быти, иди, продаждь имение{Матф. гл. 19, ст. 21.}, и проч: о немже глаголет великий василий, солга рекий, яко сохрани заповеди сиречь. Аще бо бы соблюдал, не бы многая имения стяжал, закону рекшу во первых: Возлюбиши Господа Бога твоего от всея души твоея{Втор. гл. 6, ст. 5.}. Речение бо, от всея, не попущает любящему Бога ино что любити, печалуяйся же о чемлибо обретается во отвержении онаго. Паки: Возлюбиши ближняго твоего, яко сам себе{Левит. гл. 19, ст. 18.}, сиречь всякаго человека. И како сих хранитель есть многим другим требующим дневныя пищи, сам имый стяжания многа: паче же пристрастно? Аще во имел бы якоже авраам, иов же и прочии праведницы, яко Божия стяжания, не бы отшел скорбя. Подобно и святый златоуст глаголет: Уверова, яко реченная к нему от Господа истинна суть: сего ради и скорбя отиде, немоществоваше же к деланию. Суть бо мнозии верующии словесем писания, изнемогают же во исполнении писанных. %(Яко велие благо есть любы и совет со смирением.%) Сия убо и ина большая сих обретается, Господь советуяй, подобне и апостоли пишуще, молим вас возлюбленнии сия и сия творити. Мы же не приемлем утешити ищущих от нас совета, да егда узрят нас смирившихся и почитающих (с. 657) их с радостию услышат, и извещение приимут, яко с великою любовию и смирением глаголем слово святаго писания. И почести ради и любви, юже имут от нас, потщатся, и с сими трудная приимут, и сия яко легкая им от любви явятся, якоже святый апостол петр о Кресте и смерти слыша многажды, радовашеся, и якоже ничтоже таково слышати являшеся от любви, юже стяжа ко учителю. И о чудесех никоегоже име попечения, якоже невернии: но глаголы живота вечнаго, глаголет, имаши, и проч: {Иоан. гл. 6, ст. 68.}. не такожде иуда дважды умерый, удавися, и не умре, но пожив нераскаянне, и вознедуговав люте проседеся посреде {Деян. гл. 1, ст. 18.}, якоже глаголет апостол петр, в деяниях апостольских. И паки святый апостол павел к братии пиша овогда глаголет: желающе благоволихом подати вам не точию благовествование Божие, но и души своя{1 Сол. гл. 2, ст. 8.}. Овогда же: Быхом раби ваши Иисуса Господа ради{2 Кор. гл. 4, ст. 5.}: и паки к тимофею пиша глаголет, имети старцев якоже отцев, юноши яко братию{1 Тим. гл. 5, ст. 1.}. И кто доволен есть уразумети смирение святых, и горячайшую любовь, юже имеша к Богу и ближнему? Не точию убо сим должни есмы внимати, но и к немуже глаголем или пишем: хотяй бо научити, или совет дати кому, паче же напоминание, якоже глаголет лествичник, должен есть очиститися первее от страстей, да уразумеет неложно намерение Божие и состояние требующаго от него словеси. Зане не всем едино врачевство приличествует, аще негли и едина немощь будет. Потом известитися от просящаго совета, или от повинующагося ему единою душею же и телом, или самопроизвольне прося с теплою верою, и ищай слова без вопроса учителева, или другой какойлибо потребе понуждающей его лицемерствовати, яко акибы хощет слышати слово, да не оба во лжу впадут и многоглаголание, лукавствие же и другая многая. И ов убо понуждаемь якобы (с. 658) от учащаго его глаголати кроме произволения, и лжет стыдяся и лицемерствует, яко благое творити хощет: ов же лукавствует и ласкает учимаго, да сокровенная, сиречь, в мысли его постигнет, и вкратце всяко ухищрение подвизая и многоглаголание, и якоже глаголет соломон: От многословия не избежит греха{Притч. гл. 10, ст. 19.}. Написа же и великий василий, кая суть согрешения сего: не рекошася же сия, да не под власть и со извещенною верою приходящих учити отвержемся, и паче безстрастне пребывающии, но да не дерзостне, ниже от дел, ниже от теплыя веры хотящих слышати, от тщеславия учим, сами суще еще страстнии, ниже властительски сие да творим: но якоже отцы глаголаху, яко кроме вопрошения братий не подобает глаголати кому, сиречь пользы ради, да от произволения будет благое якоже глаголют апостоли, не яко обладающе причту, но образи бывающе стада, и проч: {1 Петра гл. 5, ст. 3.} И к святому тимофею апостол рече: Делателю прежде подобает от плода вкусити{2 Тим. гл. 2, ст. 6.}, о делании сиречь тому, емуже подобает учити глаголя. И паки: Никтоже о юности твоей да нерадит{1 Тим. гл. 4, ст. 12.}: сиречь, отнюд да не сотвориши что юношеское, но яко совершен во Христе буди. Подобне и в старчестве глаголет, яко без вопрошения братии не глаголаша отцы ко спасению души, но вменяху сие празднословие. И воистинну: ибо внегда мним мы разум имети паче инаго, слово подвижем сами от себе. Ибо елико повинни есмы, толико мнимся свободу имети. Якоже святии елико приближаются к Богу, толико видят себе грешны, якоже глаголет святый дорофей: получившии во о Бозе разум ужасаются и в недоумение приходят. Подобно и ангели от безконечнаго веселия и ужаса не имут насыщения славословия: и яко сподобишася толикаго пети Владыку, непрестанно поют дивящеся от него бываемым, якоже глаголет златоуст, и преуспевающе в вящший разум якоже (с. 659) глаголет Богослов, подобне и вси святии в нынешнем веце и в будущем: и якоже умнии силы преподают просвещение друг другу, тако и словеснии друг от друга научаются: овии убо от Божественных писании искус приемлюще нижших учат, овии же умне от святаго Духа учими, другим откровенныя им тайны писанием явленны творят. Сего ради всем потребно есть смирятися пред Богом, и друг другом, яко бытие и вся прочая от Бога приемшим, и тем друг от друга разум. Имеяй убо смирение паче просвещается, не хотяй же смиритися во тьме пребывает, якоже прежде денница и послежде диавол: зане первее бе от вышшаго чина умных сил, сиречь, десятаго от горнейшаго чина предстоящаго страшному престолу, перваго же от земли: но за возношение не точию девяти чинов, но и нас земных нижше бысть с послушавшими его, но и под преисподняя в тартар низвержен бысть за неразумие. Сего ради многажды речеся, яко кроме другаго греха едина гордость может погубити душу: имеяй во своя согрешения мала, попущается впасти в большая, глаголет святый исаак. И приемый от Бога дар, и неблагодарен быв, лишается его: зане недостойна себе сотвори дара Божия, якоже глаголет великий василий: благодарение бо о нас умоляет. Обаче да не будет благодарение якоже онаго фарисеа, других осуждающее, себе же оправдающее: но паче яко множае всех должно сущее, и от недоумения благодарящее, и со ужасом разсмотряющее неизреченное долготерпение Божие: не точию же, но и дивитися подобает, како препетый Бог не оскуден сый, приемлет от нас благодарение, паче же раздражающих и огорчающих его присно при толиких и таковых благодеяниях его, общих и особенных, о нихже писа григорий Богослов и прочии отцы, не точию телесных, но и душевных, многими образы, ихже несть числа. От нихже и сие есть, яко ова суть явленна и удопостижна в Божественных писаниях: ова же некиим неявна и неудобопостижна, да (с. 660) теми убо нерадивых привлечет к вере, и изысканию оскудевающих, и да не впадем от непостижения в отчаяние и в неверие. Сими же да не большее осуждение имамы, презирающе разумеваемый глагол, но да трудящиися вольне, хотяще делом испытывати безвестная, могут от сего похвалу имети, якоже глаголет златоуст. %(Яко частое напоминание Божественнаго писания не есть многословие.%) И паки тойжде глагол многажды обдержит Божественное писание, и не многоглаголание есть, но да частым воспоминанием и зело унылых в слушании к памяти и разумению глаголемых приведет чудне и человеколюбне и не минет ушес слово скоростию и малостию прилучившагося речения, наипаче же, егда упражняемся в житейских вещех, ничтоже поне от части ведуще. Зане глаголет златоуст: Еже от части, несть цела часть, но часть части. Упразднится же, да не истребится и ни во чтоже приидет. Зане аще бы разума не быхом имели, ниже бы человецы были: но упразднится убо еже от части, яко лицем к лицу, якоже возраст младенца от того, егда соделается муж, якоже сам апостол рече, толкуя глагол свой притчею младенца{1 Кор. 13, ст. 10 и 11.}: сиречь, якоже паки глаголет златоуст: Ныне вемы небо, яко есть, а не вемы, что есть: тогда же упразднится меньшее от большаго, то есть разум наш, и еже что есть, темже растет паче разум. Ибо многия суть сокровенны в Божественных писаниях тайны, и мы не вемы намерения Божия во глаголемых: но да не вознесешися по неразумию, глаголет Богослов, порицая речения исповедающих нас благоразумие: безсловесно бо и безумно есть не силе намерения внимати, но речениям, глаголет великий дионисий. Егда же кто блаженным плачем взыщет, тогда обретает: (с. 661) сие бо есть делание страха, имже откровение таин бывает. Се убо пророк исаиа глаголет: Мертвии же живота не имут видети{Исаии гл. 26, ст. 14.}: и паки: Воскреснут мертвии: но сие несть разногласие, якоже мнят неведящии намерения, якоже речеся от видения Божественнаго писания. Яко ради идол убо языческих речеся: живота не имут видети зане бездушни суть. А о общем воскресении, и веселии праведных, сие: воскреснут мертвии: не точию же, но и о востании усопших с Спасом нашим Иисус Христом пророчествуя. Такожде и во святем евангелии о преображении самаго Господа глаголют евангелисты: Ов убо и по шести днех, ов же и по осми, сиречь, с предварившим чудотворением и учением Господним{Марк. гл. 9, ст. 2.}. Но ов глаголет, первый и последний день проходя, средину онех шесть рече: ов же и тот и сей совокупив, глаголет осмь {Луки гл. 9, ст. 28.}. И паки Богослов иоанн во святем своем евангелии в двою местех глаголет, в первем убо: Многа же и ина знамения сотвори Иисус пред ученики своими, яже не суть писана в книзех сих, и проч: {Иоан. гл. 20, ст. 30.}. в другом: Суть же и ина многа, яже сотвори Иисус{Тамже гл. 21, ст. 25.}, и не глаголет, пред ученики своими. О нихже писа святый прохор написавый обоя: яко то о чудесех, и о прочем, яже сотвори Господь, глаголет евангелист, яже не написа сам Богослов, зане прежде написана быша от других евангелистов, темже и пред ученики своими приложи: другое же речение о сотворении мира, егда безтелесно бе слово Божие, с нимже вся отец от несущих созда глаголя: Да будет сие, и бысть{Бытия 1.}. Яже, аще бы по единому писана быша, глаголет Богослов, и прочая{Иоан. гл. 21, ст. 25.}. И просте, всяко писание, и всяко слово Божие, или святаго некоего, или чувственных, или мысленных тварей, намерение имать в себе сокровенно: не точию же другая, но и всяк человеческий глагол. И никтоже весть разума прилучившагося речения, точию (с. 662) по откровению, якоже глаголет Господь о ветре: Яко Дух, идеже хощет, дышет, и проч: {Иоан. гл. 3, ст. 8.}. о немже рече златоуст, не яко власть имать воздух, рече Христос, идеже хощет, но снисходя немощи никодима, положи Господь ветр, да уразумеет глаголемое ему. И воздух притчею святаго Духа нарече, сиречь слово, еже к нему рече и к другим некиим, яко, яже глаголю вам, Дух суть, сиречь, духовна, а не якоже вы мните: не бо о телесных вещах глаголю, да яко телеснии суще разумеете. Сего ради глаголет дамаскин, яко аще не услышит кто от онаго, егоже есть слово, о намерении его не может рещи, вем намерение глаголемое от него. И како смеет кто глаголати, яко вем намерение Божие в святых писаниях сокровенно без откровения Сына его? якоже сам Христос рече: И емуже аще волит Сын открыти{Матф. гл. 11, ст. 27.}. Сиречь, аще произволение имать прияти от него умне блюдением Божественных его заповедей, ихже кроме глаголяй ведети, прельстися: гадательне бо глаголет, а не воистинну от Бога разумев, глаголет лествичник, аще от мнения и в безмерная хвалится: к немуже глаголет Богослов, овогда _о любомудрейший ты, и проч: овогда: _о книжниче ты, поношая возношение, от негоже неразумно таковый мнит имети что. Еже и само то, еже мнится имети, взято будет от него, зане не восхоте рещи, не вем, якоже и вси святии, да смирением дано будет ему, и преизбудет, якоже и онем, иже и ведяще, глаголаша ничтоже ведети, якоже глаголет златоуст. Яко не рече апостол, не у что весть{1 Кор. гл. 8, ст. 2.}, но ни якоже подобает ведети, что весть. Темже аще и веде, но не якоже подобает. %(Показание о лжеименном разуме.%) Сей есть лжеименный разум зане мнит ведети, яже николиже веде. И сей горший есть совершеннаго неразумия, (с. 663) глаголет златоуст, яко неприемлющь исправления от некоего учителя: зане всезлобнейшее неразумие мнит добре себе быти. Сего ради глаголют отцы яко предложенная в писаниях, должни есмы испытовати притрудне со смирением, и советом искусных, и паче делом нежели словом научатися: умолчанная же Божественными писании никакоже испытовати. Безумно бо есть сие, якоже глаголет великий антоний, о ищущих предуведети будущая, а не паче отрицатися сего, яко недостойни. аще негли и от Божияго промысла бывает, якоже на навуходоносоре{Даниил. 4.} и древнем валааме{Числ. 22.} бысть ко общей пользе, аще и недостойни быша, а не от демонов, и паче же егда бывает от сновидений и некиих мечтаний: не речеся же сие, да телесными деяниями и нравственными испытуем писания, по заповеди Господней, и живот вечный обрящем{Иоан. гл. 5, ст. 39.}. И да не словом точию ищем, и от мнения мняще что уразумети: и паче же сокровенная от нас к большему смирению, и да не осудимся, яко в разуме преступившии. Зане ум сподобивыйся разум стяжати, в поучении же Божественных писаний, и дарованных ему разумов во упражнении мнозе и внимании со смирением и страхом Божиим не подвизается, яко недостойный дарованных ему от него, с прещением бывает лишаемь разума, якоже саул царствия, глаголет святый ма_ксим. Упраждняяйся же и подвизаяйся, глаголет, должен есть, якоже давид, молитися присно{1 Цар. 13.}, и глаголати: Сердце чисто созижди во мне Боже, и Дух прав обнови во утробе моей{Псал. 50, ст. 12.}, да будет достоин нашествия его, якоже некогда апостоли прияша благодать в третий час, якоже глаголется в деяниях{Деян. гл. 2, ст. 15.}: есть бо час третий дне, день же недельный, якоже глаголет Божественный лука. Пятдесятница бо есть седьмая неделя, от недели, в нейже бывает глаголемая иудейским языком фаска, гречески же толкуется прехождение, свобода. И (с. 664) неделя сущая по пятидесяти днех глаголется пятдесятница, яко исполнение в средине сущих дней, и пасха пятидесяти дней по закону. Якоже иоанн Богослов в своем евангелии глаголет: В последний день великий праздника, зане бе тогда отдание праздника пасхи. Тройствен убо от часов благонаследствова благодать, якоже глаголет дамаскин, и проч: то есть, в третий убо час, но в едином глаголет Господе дней, яко да научит три впостаси почитати в простоте власти, сиречь, единаго Божества, едина бо неделя седмицы, а не первая глаголется, рече златоуст. Зане разделяют ю Божественное писание: ветхое бо пророчествуя о ней, не по счислению нарицает ю якоже вторую и прочия. Аще бо не разделяшеся, первая бы глаголалася, но сего ради нарицается единою от суббот, сиречь седмицы, в новой же благодати святая неделя сия и нареченный день именуется, зане в ней особеннейшия и владычния дела быша: якоже благовещение и рождество Господне и воскресение его, и общее воскресение мертвых имать быти. В сию бо, глаголет дамаскин, сотворися чувственный свет от Бога, и паки в ней пришествие Господне имать быти, да в безконечныя веки пребудет день един оный и осмый: яко вне сущий седми веков сих имущих дни и нощи. Но понеже сподобихомся от святых уведети намерение таковых дел: уразумеем убо намерение и коеждо начинание настоящаго слова от начала и свыше. Еже убо единою имена книг, и святых глаголются, сего ради есть, да присно словеса их поминаем к ревности жития их, якоже глаголет великий василий. И к разуму не ведящим сих. Ведый убо, да воспоминает, не ведый же сего ко взысканию приидет прилучившияся книги. Таже название на месте святаго, или прилучившееся писание положишася, частшия ради памяти, да малеми глаголы дела их и словеса поминаем, и к уразумению прочаго в каждом речении Божественнаго писания или учителя разсуждения же и совета блага. И яко не моя суть глаголемая, (с. 665) но Божественных писаний, и ко еже удивлятися и разсмотряти неизглаголанное человеколюбие Божие, како хартиею и чернилы устрои спасение душ наших, и дарова нам толикая, писания же и учителей православныя веры. И како невежда сый аз и унылый, сподобихся толика писания проити, никакоже име свою книгу, или ино что отнюд, но странен и убог сый присно и во всяком покои и безпопечении пребывая, со многим наслаждением телесным. А яко осташася некая безыменна: сия от нерадения моего суть, и да не продолжится слово. Вопрошения же и решения общих вещей разума ради положишася, и благодарения даровавшему святым своим отцем нашим разум же и разсуждение, и ими нам недостойным, и к зазрению нас немощных и неразумных. Речеся же и о спасшихся древле праведных в велицем богатстве, и среди грешников и неверных человек. Аще и тогожде естества быша человецы, якоже и мы, не хотящии достигнути в меру совершенства, аще и многий искус и разум благаго и злаго прияхом, яко сущая их уразумевше, и яко большия благодати сподобльшеся, и толикаго разума писаний. Паки же делания наша иноческа да вемы, яко всюду спастися можем, аще и своя хотения оставим. И аще не тако сотворим, не можем имети покоя: но ниже можем имети разум и деяние Божественныя воли. Зане наша воля есть преграда, разлучающая нас от Бога. И аще не разрушится преграда, не можем уразумети и творити, яже суть Божия, но внеуду его обретаемся, и от врагов насильствуеми бываем невольне и не хотяще: и яко безмолвие вящше всех есть, и кроме его не можем очиститися, и разумети немощь нашу, и козни демонов. Но ниже силу и промысл Божий постигнути возможем от Божественных словес воспеваемых же и чтомых: зане вси человецы требуем таковаго упражднения или от части или совершенне, и кроме сего не возможно никомуже в разум духовен и смиренномудрие приити, имже сокровенныя (с. 666) тайны в Божественных писаниях, и во всех творениях разумевает произволяяй. И яко не подобает употребляти вещь, или слово, или начинание, или разумения кроме нуждныя потребы, душевныя же и спасительныя, и живота телеснаго. И яко кроме разсуждения, ниже мнящаяся добра приятна суть Богу. Но ниже без праваго намерения Благое делание может воспользовати кого. Преднаписанныя же тропари ради уразумения их, и прочиих писаний, и во еже умилятися тем, иже имут немощен еще ум, якоже глаголет лествичник. Песнь бо, глаголет великий василий, привлекает мысль человечу, к немуже хощет, или в плачь, или в любовь, или в печаль, или в веселие. И яко должни есмы испытовати писания по заповеди Господней, да обрящем в них живот вечный{Иоан. гл. 5, ст. 39.}, и внимати разуму _псалмов и тропарей, и яко да увемы в разуме мнозе, яже не вемы. Аще бо, глаголет великий василий, не приимет кто разума, не весть коликих лишается. Рождения же добродетелей и страстей искуса ради и разума написашася, да весть кто сия, и о раждающих их да подвизается, овех стяжати, овех оставити, овех же побеждати противным деланием. И яко телесная деяния, якоже растения должни есмы блюсти присно совершенным деланием: душевным же добродетелям должни есмы присно внимати и поучатися, како стяжати куюждо добродетель. И от Божественных писаний и святых мужей о сем научатися и сохраняти сие опасно с болезнию души, яко сокровище деланием, дондеже в навыкновение приидем прилучившияся добродетели. И тако прилежно вторую начинаем, якоже глаголет великий василий, да не вдруг ко всем устремляющеся, негли изнеможем. Но от терпения находящих да начинаем, и тако на прочия благомощно пойдем со всяким рачением имуще намерение Благоугодити Богови. Вси бо должни есмы заповеди (с. 667) хранити, яко христиане, зане не телесный труд потребен нам есть в стяжании душевных добродетелей, но точию произволение и усердие к приятию дара, якоже глаголет великий василий и григорий Богослов и другия. Обаче телесными деяньми бывают сия удобнее, паче же безмолвствующим безпристрастным пребыванием и безпопечением о всех: занеже не может кто нравы своя видети и исправляти, аще не будет в свободе и попечении таковых. Темже должен есть кто во первых безстрастие стяжати удалением вещей и людей, и тогда времени зовущу начальствовати другими, и устрояти вещи неосужденно и безвредно от навыкновения безпристрастия в совершенное пришед безстрастие. Паче же аще от Бога звание прият, глаголет дамаскин, якоже моисей, самуил же, и прочии пророцы и святии апостоли ко спасению многих. Не точию же глаголет сие, но и отрицатися подобает якоже моисей, аввакум, григорий Богослов и другие. И якоже рече святый прохор о святом иоанне Богослове, яко не восхоте оставити любезное ему безмолвие, аще и долг имый не безмолствовати, но, яко апостол, проповедывати. И ниже яко страстный убеже в безмолвие безстрастнейший сый: да не будет: но яко не хотя отлучатися видения о Бозе, и сладости безмолвия лишитися когда. Друзии же паки от смиренномудрия безстрастни суще, бежаша во внутренния пустыни, бояшася молвы, якоже великий сисой, зван быв к покою от ученика своего, не покорися, но глагола: идеже не суть человецы, тамо идем, аще и в толикое безстрастие достиже, яко пленник бысть от любви Божией, и от сея нечувствен не ведя, яде ли, или ни. И вкратце, вси отсецаху своя хотения во всяком безмолвии, и тако яко ученицы от учителя рукоположишася нецыи, во еже учити инех, и приимати помыслы, и начальствовати другими, или архиерейством, или игуменством от святаго Духа умным чувством, печать приемлюще нашествием его, якоже святии апостоли и сущии прежде их аарон, мелхиседек и прочии. Дамаскин (с. 668) же глаголет: иже дерзостне взыти покушаяйся на таковый степень осужден есть. Аще бо без царскаго повеления саны безстудно проходящии, великое претерпевают осуждение: колико паче осуждаются на Божия дарования дерзающии без его повеления. И наипаче аще от неразумия и возношения мнят неосужденну быти страшному сему начинанию, или к чести же и покою проходити сие мняще, а не паче яко бездне смирения и смерти, за други, и враги времени зовущу, предаятися, якоже святии апостоли твориша внегда учити других, и паче же безстрастнии, и мудрии суще по превосходству. Аще же не всего сего вемы, яко немощнии и недовольнии есмы: что подобает и глаголати? возношение бо и неразумие слепы творит не хотящия в упразднении зрети немощь свою и неразумие, якоже глаголет в старчестве. Яко келлиа инока есть пещь вавилонская, в нейже трие отроцы Сына Божия обретоша. И паки: Седи, глаголет в келлии своей, и всему тя научит. И Господь, идеже, глаголет, два или трие собрани во имя мое, ту есмь посреде их{Матф. гл. 18, ст. 20.}. И лествичник, не уклонися, глаголет соломон, ни на десно, ни на шуе, но путем царским шествуй{Притч. гл. 4, ст. 27.}, сиречь, с единем или двема безмолвствуя. И ниже един в пустыни, ниже в обществе мнозем: средний во обою, глаголет, мнозем полезен бысть. И паки, пост смиряет тело, бдение просвещает ум, безмолвие приносит плачь, и паче очищает человека, и омывает душу, и творит ю безгрешну. Сего ради написашася при конце имена всех яве добродетелей и страстей, да увемы, колики добродетели должни есмы стяжати, и колика оплакивати злая. Зане кроме плача очищение не бывает: плача же во всегдашнем попечении несть. И без очищения души извещение не бывает, кроме же извещения разлучение души от тела бедственно есть: безвестно бо, глаголет лествичник, негли (с. 669) же и неверно есть. Преждереченная же осмь видения, не суть наша делания, но возмездия наших добродетелей, и не должни есмы от чтения точию стяжати я, аще и тщимся от гордостнаго усердия, якоже глаголет лествичник, о совершеннейших, сиречь, о четырех последних, зане небесна суть, и нечистый ум не вмещает таковая. Но все наше тщание о телесных и душевных добродетелях имети должни есмы, и тако раждается в нас первая заповедь, сиречь страх Божий. И егда пребываем в нем, раждается плачь, и елико в навыкновении единаго видения будем, толико благодать Божия, общая всех мати, якоже глаголет святый исаак, дарует нам вышшая сего, дондеже седмь разумов стяжем в себе, и осьмаго, иже есть делание будущаго, сподобит прилежно добродетели творящих с правым намерением благоугождати Богу. Мы же, егда самодвижне от Бога мысль приидет, или первая, или какова есть внезапу нам неведущим, должни есмы абие всякое житейское попечение и самое правило оставляти множицею, и прилучившийся духовен разум и умиление, яко зеницу ока блюсти, дондеже смотрительне отидет. И тогда написанным глаголам страха и плача поучатися присно и прежде правила и после его. И егда свободу имамы день и нощь, или рукоделие держаще, еще немощнии суще, ко сну и унынию удобопреклоннии, или праздни, могущии в непрестаннем плаче быти, и пленятися во глаголемых от них речениях, и бывающих слезах. Сего бо ради написашася, да и неискуснии в таковых, якоже и аз, чрез реченная уныние ума воздвигнем, поучением сих и вниманием. Имущии бо рачение и искус от навыкновения в делании добродетелей, много больше глаголемых ведят: паче же во время самодвижнаго умиления. Зане многу крепость стяжа час сей, паче нежели умиление от нашего делания. Обаче да не мнит кто быти делатель толиких даров, но паче яко вышше своего достоинства приявый, много благодарити должен (с. 670) есть, и страшитися, да не како большее осуждение имать сих ради, яко ничтоже потрудився имать сподобитися делания ангельскаго. К побуждению бо ума дается разум, и крепость во еже хранити заповеди, и делати добродетели, и да увемы, како и чесо ради творим сия и что подобает убо творити, чесо же удалятися, да не осуждени будем, и да от разума воскриляеми с радостию делаем, и больший разум приемлем, и крепость к деланию и радование. И сему бывающу благодарити даровавшему сия сподобимся, ведуще, откуду прияхом таковая благая. Благодаримый же большая нам благая дарует, и приимше дары паче возлюбим его, и любовию в премудрость Божию достигнем, еяже начало есть страх Господень{Псал. 110, ст. 10.}. И делание убо страха покаяние есть, глаголет святый исаак, имже бывает откровение таин. Разумениям же страха поучатися подобает тако{Притч. гл. 1, ст. 7.}: по вечернем последовании должен есть глаголати кто: Верую: Оч~е наш: и Господи помилуй, частше, и тако седит к востоком, якоже плачущии над мертвецем, колебля главою своею с болезнию души, и стенанием сердца, глаголет прилучившагося разума предписанныя речения, начен от перваго, дондеже достигнет молитвы, и тако падает на лице пред Богом с трепетом неисповедимым, и молится. Первее благодарением, посем исповеданием, и прочими глаголы молитвы, якоже предречеся. Глаголет бо святый афанасий: исповедатися должни есмы о сущих в неведении согрешениях, и о тех, яже согрешити имели быхом, от нихже благодать Божия нас избави, да не в час смерти истязани будем о них: и друг о друзе паки, по заповеди Господней и апостольстей: Намерение глаголемых в молитве сие есть: благодарение о сущем в час сей благодарствии, недовольное к благодарению исповедует. И нерадение в другия времена, и яко час сей благодать Божия есть: исповедание же проповедует (с. 671) дарованная, яко безконечна суть, и яко не возмогох вся постигнути, но ниже ведети, точию един слух имети, и сей токмо о некиих, а не о всех. И яко явленне и неявленне присно облаготворяемся, и яко неизреченно есть терпение его о множестве наших согрешений. И яко недостоин есмь и самаго того, еже воззрети горе, якоже мытарь сотвори, и яко не на ино что дерзая, разве на неизреченное человеколюбие Божие, припадаю, якоже даниил пред ангелом Божиим, и якоже апостоли и прочии отцы от всея души, и сия дерзновенне, зане недостоин есмь творити. И еже исповести виды согрешений моих: вкратце, ко еже поминати сия и плакати о сих. Исповедати же свою немощь, да приидет на мя сила Христова, по апостолу{1 Кор. гл. 12, ст. 9.}, и да простится ми множество зол моих, яко не смея о всех просити, но о множестве зол моих. И еже обуздатися всякой злобе моей, и лукаву обычаю, яко не могу противу стати, молю всемогущаго, уставити стремление страстей, и не попустити мя согрешати пред ним, или пред некиим человеком, да поне от сего улучу спасение по благодати. И да от памяти болезнь души стяжу и еже о иных молитися, по апостолу{Иаков. гл. 5, ст. 16.}, и любовь ко всем, и виды страстей исчисляти, яко от них насилуемь, прибегати ко Владыце и ко умилению. И молитися о тех, ихже оскорбих, и о оскорбивших мя, и сетовати о будущих, яко отнюд следа злопомнения имети не хотящу, и страшащуся в тогдашнее время своея немощи, да не како не возмогу с незлобием претерпети, или, молитися о них, по заповеди Господней{Матф. гл. 5, ст. 44. Луки гл. 6, ст. 28.}. И сего ради предваряя время, якоже глаголет святый исаак, прежде недуга взыщи врача, и прежде искушения молися, и еже о прежде отшедших, да спасение получат: и да смерть помяну, и показание любви есть еже о всех молитися, требуя и сам молитвы всех, и еже управляему быти от Бога, и быти якоже (с. 672) хощет, и соединятися со инеми, да молитвами их помилован буду, яко имея их во всем превосходнее себе, всякаго же согрешения ныне не смею отпущения просити, да не якоже себя умаляя, инех недостойных помилования вменю. И яко не ведый и немогий что творити, прибегаю и прошу, якоже благоволит человеколюбие его быти, страшася правосудия яко грешный, и глаголати ми точию, да не лишуся стояния одесную тебе, поне последнейший всех спасаемых, да обрящуся, яко ниже сих достоин сый. И еже молитися ми о всем мире, якоже прияхом от церкви, и ко еже о сподобитися ми Божественнаго причащения, якоже подобает: и да прежде сего моляся обрящу готова помощника, егда восхощу причаститися, и да воспомяну пречистыя страсти Спаса нашего, и прииду в любовь памяти сего: и да будет причащение во общение святаго Духа. Яко сам утешитель утешает плачущих по Бозе в нынешнем веце и будущем, и от всея души со многими слезами молящия его и глаголющия: Царю Небесный, и проч: и да будет во обручение сущия о Христе жизни вечныя причащение пречистых таин, молитвами всепречистыя его Матере и всех святых: таже припадая ко всем святым, моля их о мне сотворити моление, яко могущих приносити Владыце мольбу. И тако по обычаю, начинаю молитву великаго василиа, яко имущу чудное Богословие, и просити точию единыя воли Божия, и благословляти его. И по сих абие к своим помыслом со многою силою и вниманием: Приидите, поклонимся: трижды, и прочая, якоже предписася, да сердечною молитвою и поучением Божественных писаний очистится ум, и начнет видети сокровенныя в Божественных писаниях тайны. Обаче да будет душа кроме всякия злобы, паче же злопомнения, якоже глаголет Господь, во время молитвы{Марка гл. 11, ст. 25. Ефес. гл. 4, ст. 31. Тим. гл. 2, ст. 8.}. Сего ради и великий василий, исправляя прекословие яко родителя сего, (с. 673) глаголет ко игумену дати прекословящему ему поклонов много, до тысящи. Являя же число, рече, или тысящу, или един: то есть, или тысящу поклонов должен есть прекословящий творити к Богу, или един настоятелю, сиречь, прости мя отче. И решение уз приемлет единем точию сущим воистинну поклоном, и отсечением прекословия страсти. Несть прекословие, глаголет святый исаак, жития христианскаго, приемь речение от апостола, глаголет бо: Аще ли кто мнится спорлив быти, мы такова обычая не имамы, и да не возмнит кто, яко собою точию отвергает прекословяща, прилагает, ниже церкви Божия{1 Кор. гл. 11, ст. 16.}, да всяк увесть, яко он вне есть всех церквей и Бога, егда прекословит: и требует чуднаго онаго единаго поклона, егоже не сотворивпиа, ниже тысяща пользовати могут, имуща непокаянен нрав. Покаяние бо есть отсечение зла, рече златоуст, глаголемии же поклоны, коленопреклонения суть паче. и образ рабский имети являют припадающа без возношения к Богу и человеком, егда преткнется в чесовом, да место прикословия обрящет, аще и совершенне не противоречит, ниже оправдати себе покусится, якоже оный фарисей: но паче мытарю да подражает, внегда вменяти себе хуждша всех, и недостойна воззрети горе. Зане аще мнится покаяние имети, и прекословити покушается судящему его благословно, или безсловно, несть достоин сущаго по благодати прощения, яко судилища ищай и оправданий и яко правою мня стезею что сотворити. Таковое начинание чуждо есть заповедей Господних. И воистинну: идеже словооправдания: тамо и правосудие взыскуется, а не человеколюбие: и не действует убо благодать оправдывающая нечестиваго, кроме дел правды, единем благоразумием и терпением укорений со благодарением от обличающих со всяким незлобием, да чиста молитва его будет и действительно (с. 674) покаяние. Елико бо молится кто о оклеветающих его и оболгающих, толико Бог являет враждующия на него, и покой ему дарует чистою и непрестанною молитвою. И не яко сердцеведцу Богу воспоминающе глаголем просимыя подробно, но да от сих мы умилимся. И яко хотящии наипаче пребыти с ним, тщанием словеса умножаем, благодаряще и исповедающеся ему о толиких его благодеяниях, по силе, якоже глаголет златоуст о блаженном давиде. Яко не многоглаголание, или иноглаголание есть, глаголати многажды тожде речение, или подобное сему. Но любовию подвизаемь пророк, и да впечатлеется слово молитвы во уме молящагося, или чтущаго. Бог бо вся весть прежде деяния, и не имать нужды слышати разглагольствие. Но мы сего требуем, во еже ведети, чесого просим, и о чем молимся: Яко да благоразумие стяжем, и к нему прошении прилепимся, и да не обуреваеми от помыслов, побеждени будем от врагов, яко суще вне Божия памяти: но да вспомоществуеми от молитвы и поучения в Божественных писаниях получим стяжание добродетели, о нихже святии отцы ин инде писаша благодатию святаго Духа. От нихже и аз уразумев реку имена их, якоже вместити могу, аще и не всех оскудения ради разума. %(Изявление добродетелей.%) Мудрость, целомудрие, мужество, правда, вера, надежда, любы, страх, благочестие, ведение, совет, крепость, разум, премудрость, сокрушение, плачь, кротость, испытание Божественных писаний, милостыня, чистота сердца, мир, терпение, воздержание, претерпение, благое произволение, намерение, чувство, прилежание, Божественное утверждение, горячесть, бодрость теплота Духа, поучение, тщание, трезвение, память, разсмотрение, благоговение, стыдение, усрамление, раскаяние, удаление от злых, покаяние, обращение к Богу, сочетавание Христу, отрицание (с. 675) диавола, блюдение заповедей, хранение души, чистота совести, память смерти, болезнь души, делание добрых, труд, подвиг, пребывание в жестоких, пост, бдение, алкание, жажда, малотребование, самодовольствие, благочиние, благообразие, честность, бездерзостие, презрение имений, несребролюбие, отвержение житейских, подчинение, повиновение, благопослушание, нищета, нестяжание, удаление от мира, отсечение воли, отвержение себе самаго, советование, великодушие, упражднение по Бозе, безмолвие, наказание, долулегание, неумовение, предстояние, внимание, сухоядение, нагота, измождение тела, уединение, пустынножитие, тишина, благодушие, дерзновение, благодерзновение, Божественная ревность, горение, предспеяние, юродство Христа ради, блюдение ума, устроение нравов, преподобие, девство, освящение, чистота тела, чтение Христа ради, Божественное попечение, познание, обучение, истина, нелюбопытствие, неосуждение, оставление долгов, домостроение, десноприятие, остроумие, мерность, правое употребление вещей, вежество, быстроумие, искусство, _псалмопение, молитва, благодарение, исповедание, мольба, коленопреклонение, молебствие, моление, прошение, заступление, песнопение, славословие, исповедь, скорбь, сетование, рыдание, стенание, плакание, приболезненныя слезы, умиление, молчание, Божественное взыскание, плачевный вопль, безпопечение о всем, незлобие, нетщеславие, неславолюбие, простота души, сострадание, нелюбопоказание, благонравие, дела по естеству, выше естества, братолюбие, единомыслие, общение по Бозе, сладость, духовное устроение, тихость, правость, непорочность, простота, благохваление, благоглаголание, благоделие, предпочитание ближняго, любы по Бозе, добродетельное навыкновение, частость, вкачествование, благоразумие, смирение, безпристрастие, велелепие, долготерпение, благость, благостыня, разсуждение, удобоприступность, удобоприветствие, несмущение, видение, наставление, водружение, прозрение, безстрастие, духовная радость, опасение, слезы разума, душевная слеза, Божественное желание, щедрота, благоутробие, человеколюбие, чистота (с. 676) души, чистота ума, прозорливость, чистая молитва, неплененный помысл, твердость, укрепление души и тела, просвещение, востязание души, ненавидение жизни, учение подобающее, благое желание смерти, младенчество во Христе, утверждение, убеждение, увещание соразмерное и непонужденное, изменение похвальное, ужас по Бозе, совершенство во Христе, неложное просияние, Божественное рачение, восхищение ума, Божие вселение, Боголюбие, внутреннее любомудрие, Богословие, исповедничество, презрение смерти, святыня, исправление, совершенное здравие души, похвала от Бога, благодать, Царство, сыноположение, и всеми вкупе 228{Псал. 81, ст. 6. Иоан. гл. 10, ст. 30.}. Положением же Богу быти человеку, благодатию даровавшаго нам победу на страсти, ихже имена суть сия, якоже мню. %(Изявление страстей.%) Лютость, коварство, лукавство, зломудрование, безсловесие, развращение, прельщение, грубость, невежество, праздность, хладность, окаменение, ласкательство, буйство, безчинный глас, изступление смыслов, изумление. неучтивство, дерзость, боязнь, ожесточение, праздность благих, согрешение, лихоимство, меншеимство, неведение, безумие, лжеименный разум, забвение, неразсуждение, нечувство, неправда, злое произволение, безсовестная душа, медление, блядоловие, отметание, прегрешение, грех, беззаконие, законопреступление, страсть, пленение, лукавое сложение, безсловесное сочетание, бесовский прилог, закоснение, телесный покой вне подобающаго, злоба, падение, недуг души, безсилие, немощь ума, нестарание, леность, порочная печаль, презрение Бога, превращение, преступление, неверие, неудобоверие, зловерие, маловерие, ересь, соединение с ересию, многобожие, идолопоклонство, неведение Бога, нечестие, волшебство, назирание, очарование, обаяние, отвержение, идолонеистовство, невоздержание, (с. 677) пространнопитание, славолюбие, нерадение, самолюбие, невнимание, неуспеяние, прелесть, заблуждение, напраснство, отравление, скверность, скверноядение, наслаждение, нецеломудрие, чревобесие, сиречь чревообядение, блуд, сребролюбие, гнев, скука, уныние, тщеславие, гордость, мнение, возношение, кичение, обезумление, студ, сытость, мягкость, помрачение главы от вина, сласть, несытость, гортанобесие, ненасыщение, тайноядение, обядение, уединенноядение, небрежение, удобство, самосоветие, безсоветие, самоугодие, человекоугодие, неискусство благаго, ненаказание, необучение, легкость разумения, простачество, нелюдимость, прекословие, любопрение, злословие, вопль, смущение, рать, ярость, безсловесная похоть, разярение, раздражение, соблазн, вражда, многопытство, клевета, горесть, оглаголание, порицание, оболгание, осуждение, обвинение, ненависть, укоризна, досаждение, безчестие, свирепство, неистовство, жестокость, злесплетение, клятвопреступление, клянение, немилостыня, братоненавидение, неравность, отцеубийство, матереубийство, разрешение, разслабление, дароприятие, татьба, хищение, рвение, безобразие, зависть, пря, посрамление, ругание, поношение, подражнение, насмеяние, накупльство, насилие, презрение ближняго, жезлобиение, поругание, удавление, задушение, нелюбление, непримирение, несогласие, безразсудность, суровость, безстудие, нестыдливость, пленение помыслов, омрачение, слепота, ослепление, пристрастие ко временным, остраствование, суета, непокорение, отягчение главы, дремание души, многосоние, мечтание, многопитие, пиянство, непотребство, ослабление, безсловесная услаждения, сластолюбие, блудство, сквернословие, женство, разжжение, малакия, женопрельщение на блуд, прелюбодейство, мужеложство, скотосмешение, порочность, блуждение, нечистота души, кровосмешение, нечистота, осквернение, частное дружество, смех, играние, плясание, плескание, неподобныя песни, ликования, свиряние, смелость, многочиние, неподчинение, непостоянство, порочное согласие, навет, брань, убийство, разбойничество, святотатство, скверноприбыточество, лихва, лесть, гробокопание, жестокосердие, (с. 678) злослытие, роптание, хула, неблагодарение, злосоветие, пренемогание, малодушие, слияние, ложь, языкоболие, суесловие, безсловесная радость, парение, безсловесное дружество, злонравие, пустословие, буесловие, многословие, благаго порицание, скупость, злость, неблагоприятствие, негодование, многостяжание, злопомнение, злоупотребление, злонавыкновение, жизнолюбие, продерзость, надмение, любоначальствие, лицемерие, подсмеяние, пронырство, смехотворство, побеждение, рачение сатанино, любопытство, приражение, безстрашие Божие, непослушание, неразумие, высокоумие, хваление, напыщение, уничижение ближняго, немилосердие, непоболение, нерачение, безнадеждие, Богоненавистие, отчаяние, самоубийство, и всеми отпадение от Бога и совершенная погибель: вкупе сия 298. Сия убо страсти нарицаемыя в Божественных писаниях обретох, и вкупе положих, якоже и книги в начале слова: по чину же ниже возмогох, ниже покусихся расположити, яко паче мене суща, по словеси лествичника: поищеши в злых ведения, глаголет, и не обрящеши, яко безчинна суть вся бесовская, едино и тожде намерение имут, в немже и равнии суть неравнии и непреподобнии, во еже погубити души приемлющих злейший их совет. Аще другим некиим человеком бывают и венцев виновни, внегда побеждаеми бывают верою и терпением уповающих на Господа, и деланием добрых и сопротивлением помыслов, противоборющихся и молящихся на них. %(О различии помыслов и прилогов.%) Понеже помыслы различия имут во всем, и овии убо безгрешнии суть, овии же не у, якоже нарицаемый прилог, сиречь помышление добраго или злаго, ниже воздаяния, ниже осуждения имать. Посем глаголемое сочетание, то есть беседование помысла или к согласию, или к отвержению: имать убо и похвалу, аще Богоугодно будет, но малу аки и укоризну, (с. 679)егда лукаво будет. Потом глаголемое борение, или побеждающее, или от ума побеждаемое, и венца или муки виновно бывающее, егда на дело достигнет. Подобне же и сосложение, еже есть сластное приклонение души к явльшемуся, от негоже бывает пленение, отводящее нуждею и невольне сердце к деянию. Внегда же надолзе страстный помысл укосневает в сердце, бывает глаголемая страсть, якоже навыком к себе самопроизвольно влекуща душу: и свойственне пребегающу к деянию соделовает. Таковая страсть несомненно во всем, или соразмерну покаянию, или будущей муке подлежит, глаголет лествичник, сиречь непокаяния ради, а не брани: аще бо бы сие было, не бы без совершеннаго безстрастия отпущение мнози прияти возмогли. Якоже тойже рече лествичник, яко не всем убо безстрастным быти мощно: всем же спастися и с Богом примиритися не невозможно. Разумный бо матерозлобный и лукавый прилог отмещет, да вся от него лютая единою отсечет благий же прилог присно делание имать готово, да тело и душа в навыкновении добродетели будут, и от страстей избавятся благодатию Христовою: зане отнюд не имамы что, еже не прияхом от него, ниже что принести ему можем, разве точию произволение, егоже не имуще, ниже разум, ниже силу к деланию благаго обретаем. И сие человеколюбия Божия есть дело, да не осудимся яко праздни: праздность бо есть начало всякия злобы{Сирах. гл. 33, ст. 28.}. Не точию же, но и само то делание Благаго, глаголет в старчестве, требует разсуждения. Ибо дева постящаяся седмиц шесть, и присно ветхому и новому писаниям поучающаяся, не име подобне скорбных и сладостных дел, аще и подобаше ей от толиких трудов безстрастия плоды собрати: но не бе: зане благое не есть благо, аще не по Божию хотению имать намерение. Понеже обретается в Божественном писании многажды о некиих делах негодуяй (с. 680) Бог на творящаго дело, всем являющееся благо, и напротив приемлющий иного видящася злотворца. И свидетель сему оный пророк, иже искаше от некоего биен быти, и како, глаголет, преслушавый, яко благое, сиречь, творяй, зверем снеден бысть{3 Цар. гл. 8, ст. 35 и 36.}. И петр мняйся нечто благо сотворити, отрицаяся умовен быти, возбранен бысть{Иоан. гл. 13, ст. 8.}. Темже всею силою должни есмы искати и творити Божественную волю, аще и не мнится нам добра быти. Сего ради ниже без труда бывает делание благаго, да не оттщетимся и сущия с самопроизволением похвалы понуждения. И вратце вся, елика строит Бог, чудесна суть паче ума же и мысли: яко не точию подобает дивитися уму, совершаемым в церкви православных, но и символам их. Како святым крещением сыны бываем по благодати{Иоан. гл. 1, ст. 12. Гал. гл. 3, ст. 26.}, ничтоже прежде сего соделавше, ниже паки посем. точию блюдение заповедей. И како страшныя оныя вещи, глаголю же святое крещение и святое причащение, без священства не бывают, глаголет Божественный златоуст. В сем бо является данная верховному от апостол петру власть. Зане аще не отверзутся врата Царствия небеснаго священнодействием, никтоже может внити, якоже глаголет Господь: аще кто не родится водою и Духом{Иоан. гл. 3, ст. 5.}. И паки: аще не снесте плоти Сына человеческаго, ни пиете крове его, живота не имате в себе{Иоан. гл. 6, ст. 53}. И како бо ветхий храм внеуду образ мира сего, в немже жертвы совершаху священницы, внутрь же уду святая святых, идеже приношашеся кадило от четырех видов, ливана, глаголю, смирны, стакти и касии. От нихже являются четыре главныя добродетели. Вне бо бываемая, снисхождение Божие бе тогда, да не песньми и наслаждением уклонятся младенцемудреннии иудеи ко идолом. Новая же церковь есть образ будущих: сего ради и совершаемая в ней небесна суть и духовна. Зане якоже девять чинов суть на Небеси, тако и в церкви, сиречь, патриарси, (с. 681) митрополити, епископы, священницы, диаконы, вподиаконы, чтецы, певцы и монаси. И како паки начертанием честнаго и животворящаго Креста прогоняются демони и многоразличныя недуги. Вещь ради всех неиждивна же и беструдна: похвалы его кто может исчислити? Вся убо реченная от начала слова без правыя веры ничтоже пользуют, но ниже бывают. Якоже ни вера без дел. И о вере убо и делех написаша мнозии от святых отец, аз же к воспоминанию реку вкратце, яко дела убо должни есмы имети написана кийждо в своем чине: православную же веру, юже прияхом от преднаписанных святых, да с ними улучим вечная благая благодатию и человеколюбием Господа нашего Иисуса Христа, емуже подобает всякая слава, честь и поклонение, со безначальным его отцем, и с пресвятым и Благим и животвотворящим его Духом, ныне и присно, и во веки веков, аминь.