<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 529) ДОБРОТОЛЮБИЕ, ИЛИ СЛОВЕСА И ГЛАВИЗНЫ СВЯЩЕННАГО ТРЕЗВЕНИЯ. Часть третия. (с. 530) По Благословению святейшаго правительствующаго синода. (с. 533) Преподобный отец наш исаиа отшельник живяше в лето триста седмьдесятое по Рождестве Христове, современен быв авве макарию великому. Днем же и нощию в Божественном поучався писании, и обильныя струи духовныя мудрости из источников Спасения почерпнувши, многих и прекрасных словес был творцем, содержащих различныя душеполезныя вещи, яко целая книга из сих составляется. От нихже и книжицу сию отделивши, желающим соблюсти свой ум, предложихом. Учит бо вкратце, како подобает прилоги помыслов отражати и незазорную совесть имети и тайно поучатися, и в безмятежии всяком разумно сохраняти тречастие души. (с. 534) СВЯТАГО ИСАИИ ОТШЕЛЬНИКА. О блюдении ума, 27 глав. 1. Ума есть гнев по естеству над страстьми, и без гнева ниже чистота в человеке бывает, аще не будет гневатися на вся всеваемая в него от врага. Егда убо обрете сего иов, поноси врагом своим, глаголя им: Безчестнии и похуленнии, скудни всякаго блага, ихже не вменях достойными быти псов моих стад.{Иова гл. 1, ст. 1 и 4.} Хотящий же приити во естественный гнев, отсекает вся хотения своя, дондеже не поставит себя в сущем по естеству состоянии ума. 2. Аще будеши противлятися вражде, и узриши, яко она изнемогши от тебя вспять бежит, да не возрадуется твое сердце. Понеже злоба духов созади их есть. Уготовляют бо рать злейшую первыя, и оставляют ю созади града, и заповедают оной не двигнутися. И аще противитися будеши, противу идя им, бегут от лица твоего от немощи: аще же возвысится сердце твое, яко прогна их, и оставиши град, ови востают созади, ови же становятся (с. 535) впреди, и оставляют окаянную душу посреде себя, не имущую уже убежища. Град есть молитва: настояние же противоглаголание о Христе Иисусе, шествие же ярость. 3. Станем убо, возлюбленнии, в страсе Божии, храняще и блюдуще деятельную силу добродетелей, не дающе претыкания совести нашей, но внемлюще себе в страсе Божии, дондеже и она свободит себя с нами, да будет между нами и ею единение. И сице да будет она страж наш, показующий нам все, о немже претыкаемся. Аще же не послушаем ея, отступит от нас, и оставит нас, и впадаем в руки врагов наших, иже не к тому оставляют нас, якоже научи нас Владыка наш, глаголя: Познай соперника твоего, дондеже еси на пути с ним{Матф. гл. 5, ст. 25.} и прочая. Глаголют совесть соперника быти, яко противляется человеку хотящему сотворити волю плоти своея: и аще не послушает ея человек, предает его врагом. 4. Аще узрит Бог, яко повинуся ему ум всею силою, и не имать иныя помощи, кроме его единаго, укрепляет его, глаголя: не бойся отроча мое, иакове, малый израилю. И паки: не бойся, яко избавих тя, и прозвах тя именем моим: мой еси ты.{Исаии гл. 43, ст. 1 и след.} И аще преходиши сквозе воду, с тобою есмь, и реки не покрыют тебе: и аще пройдеши сквозе огнь, не сожжешися, и пламень не опалит тебе, яко аз Господь Бог твой, святый израилев, Спасаяй тя. 5. Аще убо услышит ум дерзновение сие, дерзает сопротив вражды, глаголя: кто есть ратуяй со мною? да противостанет мне: и кто судяйся со мною? да приближится ко мне. Се Господь помощник мне: кто озлобит мя? се вси вы, яко одежда обветшаете от моли. (с. 536) 6. Аще сердце твое естеством грех возненавиде, победило и отвратилося от раждающих грех, и предложило тебе муку: веси, яко помощник твой пребывает с тобою: и ты ни в чем не оскорбляя его, но плачя пред ним глаголи, внимая сердцу твоему: твоя есть милость, избавити мя, Господи. Несилен бо есмь аз избегнути рук вражиих без твоея помощи. И той тя сохранит от всякаго зла. 7. Должен есть инок заключити все двери души своея, сиречь, чувства, дабы чрез оныя не пасти. И аще узрит ум себя ни от чего необладаемым, уготовляется к безсмертию, собирая чувства свои во едино, и творя их едино тело. 8. Аще свободится ум от всякия надежды на видимыя мирския вещи: сие есть знамение, яко умре в тебе грех. 9. Аще свободится ум: средина (средостение) еже он имать между собою и Богом, преходит. 10. Аще свободится ум от всех врагов своих, и субботствовати, (покоитися) будет: в другом есть веке новом, новая мыслящи и нетленная. Идеже убо труп, тамо соберутся и орли.{Матф. гл. 24, ст. 28.} 11. Являют демоны себя коварно на время, негли человек оставит свое сердце, мня, яко упокоися, и внезапу входят в окаянную душу, и восхищают ее, яко птицу: и аще они державнее тоя будут, низвергают ее немилостивно во всякое согрешение лютейшее первых согрешений, о нихже моляшеся прощенной быти. Станем убо во страсе Божии, и сохраним сердце, совершая деятельную силу нашу, храня добродетели, яже возбраняют злобе врагов. (с. 537) 12. Учитель наш Иисус Христос, ведый велие врагов немилосердие, и ущедрив род человеческий, заповеда в крепости сердца, глаголя: будите готови на всяк час, яко не весте, в кий час тать приидет, да не когда приидет, и обрящет нас спящих.{Матф. гл. 24, ст. 43.} И паки: зрите, да не отягчают сердца ваша обядением и пиянством, и печальми житейскими, и найдет на вы внезапу час той.{Луки гл. 21, ст. 34.} Стани убо в сердце твоем, внимая чувством твоим, и аще умирится с тобою память Божия, постигнеши разбойники окрадующия ее. Извествующийся бо в помыслех, познает хотящих внити и осквернити его. Смущают бо ум, яко да будет возвышен и празден. Познающии же злобу их, несмущенни пребывают, молящеся Господу. 13. Аще не возненавидит человек всякое деяние мира сего, не может служити Богу. Служение убо Божие что есть, аще не сие, еже ничтоже имети нам чуждаго во уме, внегда молитися ему: ниже сласти, внегда благословляти его: ниже злобы, внегда пети ему: ниже ненависти, внегда предсудити ему: ниже возбраняющия нам лукавыя ревности, внегда поучатися ему, и памятовати его. Вся бо сия мрачныя стены суть, обдержащия окаянную душу, и не может она непорочно служити Богу, имеющи в себе сия. Удерживают бо ее на воздусе, и не попускают ей срести Бога, и втайне благословити его, и помолитися ему во сладости сердца, да просветится от него. Сего ради помрачается ум всегда, и не может успети по Бозе, яко не печется пресещи сия в разуме. 14. Егда спасет ум чувства душевныя от хотений плотских, и проведет их в безстрастии, и отлучит душу от хотений плотских: тогда Бог, аще узрит безстудныя страсти, яко устремляются они на душу удержати чувства во грехе, (с. 538) и будет вопити ум в тайне к Богу непрестанно, посылает помощь свою, и все (оныя) единою решит. 15. Молю тя, доколе еси в телеси, да не оставиши хранити твое сердце. Якоже бо человек земледелец не может надеятися на некий плод свой восходящий на поле его: не весть бо, что ему случится, прежде нежели включен будет в сокровищницы его: сице человек не может оставити сердце, доколе имеет дыхание в ноздрех своих. И якоже человек не весть, кая страсть сретит его до последняго издыхания: сице не возможно человеку оставити свое сердце, доколе имеет дыхание: но подобает ему всегда вопити к Богу о помощи и милости его. 16. Не обретаяй помощи во время брани, ниже мира надеятися может. 17. Егда убо кто отлучит себя от шуих, и познает известно вся согрешения, яже сотвори пред Богом: понеже не видит грехов, аще не отлучится от них отлучением горестным: достигши сея меры, обретает плачь и моление, еже срамлятися пред Богом, памятуя лукавое дружество страстей. Подвизаимся убо, братие, по силе нашей, и содействовати будет нам Бог, по множеству милости своея: и аще не сохранихом сердца нашего, якоже отцы наши, хотя потщимся сохранити телеса наша, якоже требует Бог, безгрешна: и веруим, яко во время глада постигающаго нас, сотворит и с нами милость, якоже со святыми своими. 18. Предавый сердце свое искати Бога во благочестии, поистинне не может помышляти, яко угоди Богу. Елико бо обличает его совесть в чемлибо чрезестественном, чуждь есть свободы. Елико бо есть обличаяй, есть и оглаголуяй: а во елико время есть оглаголание, несть свободы. Егда убо моляся узриши себе, яко отнюд ничтоже от злобы оглаголует (с. 539) тя: то сице свободен еси, и вшел еси во святый его покой, по воли его. Аще узриши, яко добрый плод укрепися, и не подавляют уже его плевелы вражия, и не от себе отступиша ратницы уповавшии на лукавство, от брани со чувствы твоими: и аще облак осени над скиниею, и солнце не ожже тя во дни, ниже луна нощию: аще обретеся в тебе все уготовление скинии, еже поставити и сохранити ее по воли Божией: то бысть ти победа Богом. И тогда прочее и сам он осенит над скиниею, яко его есть. Доколе же есть брань, под страхом и трепетом есть человек, или победити днесь, или побежденну быти, или побежденну быти заутра, или победити. Подвиг бо стесняет сердце, безстрастие же не ратуемо есть. Прият бо почесть, и не печется о трех частех разделенных, яко достигли оне Богом едина со другою мирны быти. Суть же трие: душа, тело и дух. Егда убо трие едино будут действом святаго Духа, то не могут уже разлучитися. Не вменяй убо себе, яко умерл еси греху, доколе насилуешися от враг твоих, аще во бдении, аще во сне: доколе бо есть окаянный человек в позорищи, не имать дерзновения. 19. Аще ум укрепится, и уготовит себя последовати любви погашающей все страсти телесныя, и не даст чемулибо чрезестественному обладати сердцем силою его: то противляется он чрезестественной силе, дондеже не отлучит ее от естества. 20. Испытуй себя брате, во всяк день, разумевая сердце твое, что есть в нем страстнаго пред Богом, и отвергни то от сердца твоего, да не изречение злое приидет на тя. 21. Внемли убо сердцу твоему, брате, и бодрствуй от враг твоих. Коварни бо суть во своей злобе, и извещен да будеши в сердце твоем о словеси сем, яко не возможно человеку творити добрая, творящему злая. Сего ради научи (с. 540) нас Спаситель наш бдети, глаголя: яко узкая врата, и прискорбен путь вводящий в жизнь, и мало их есть, иже обретают его.{Матф. гл. 7, ст. 14.} 22. Внимай убо себе, да не како нечто погибельное отлучит тя от любве Божия, и удерживай сердце твое, и не унывай глаголя: яко, како оное сохраню грешен сый человек? Егда бо оставит человек грехи своя, и обратится к Богу, покаяние его отраждает его, и всего новым творит. 23. Всюду Божественное писание ветхое и новое о хранении сердца глаголет. Во первых песнопевец Давид вопиет: сынове человечестии, доколе тяжкосердии{Псал. 4, ст. 3.} и паки: сердце их суетно.{Псал. 5, ст. 3.} О мыслящих же суетная: Рече бо в сердце своем, не подвигнуся.{Псал. 9, ст. 27.} и паки: рече бо в сердце своем, забы Бог{Псал. 9, ст. 32.} и ина многая таковая. Долженствует бо инок разумети конец писания, к кому оно глаголет, и когда, и содержати безпрестанно подвиг постничества, и внимати прилогом противоборника, и яко кормчий управляемый благодатию, волны преходити, не совращаяся с пути, и себе единому внимая, в безмолвии беседовати с Богом, неразсеянным помыслом и нелюбопытным умом. 24. Время истязует от нас молитву, якоже от кормчаго ветры, и треволнения, и бури воздушныя. Способны бо есмы к приятию прилога помыслов, и добродетели, и злобы: и владыка страстей глаголется быти благочестивый и Боголюбивый помысл. Подобает бо нам безмолвникам разумно и трезвенно добродетели и пороки разсуждати и разлучати, какой добродетели прилежати в присутствии братий и отцев, и какия творити сущим наедине: и кая есть первая добродетель, и кая вторая, и кая третия? и кая страсть есть душевная, (с. 541) и кая телесная? и кая добродетель душевная, и кая телесная? и от какия добродетели гордость поражает ум? и от какия тщеславие приходит? и от какия ярость приближается и от какия чревобесие приходит? Долженствуем бо помыслы низлагати, и всяко возношение взимающееся на разум Божий.{2 Кор. гл. 10, ст. 5.} 25. Первая добродетель, есть безпопечительность, сиречь, умерщвление внешняго человека, и дел его. От сея убо раждается желание к Богу, оное же раждает гнев по естеству, иже противляется всему всеваемому от врага. Тогда страх Божий обретает обитель в человеке, и страхом любовь является. 26. Подобает прилог помысла отвращати от сердца благочестивым противоглаголанием, во время молитвы, да не когда обрящемся, устнами с Богом беседующии, сердцем же безместная помышляющии. Не приемлет бо Бог от безмолвника молитвы смущенныя и нерадивыя. Всюду бо писание свидетельствует, яко подобает хранити чувства души. Аще бо повинется воля инока закону Божию, и по закону его ум управляти будет послушная ему, все, глаголю, душевныя движения, паче же ярость и похотение, сия бо послушна уму: то добродетель соделахом, и правду исполнихом: похотение, сиречь, к Богу и хранению воли его, ярость же на диавола, и грех. Что убо требуется? тайное поучение. 27. Аще студныя помыслы всеваются в сердце твое, седящу ти в келлии, виждь, противостани злобе. да не когда возначальствует тобою. Потщися помянути Бога, яко внемлет ти, и яже помышляеши в сердце твоем, откровенна суть пред ним. Рцы убо души твоей: аще боишися грешников подобных тебе, дабы не видели они грех твоих, (с. 542) много паче Бога внемлющаго всему. И от совета сего открывается страх Божий души твоей, и аще пребудеши с ним, неподвижимь пребудеши во страстех якоже писано есть: надеющиися на Господа, яко гора сион: не подвижится во век живый во иерусалиме:{Псал. 124, ст. 1.} и во всяком деле, еже твориши, имей Бога, яко видит всякий помысл твой, и не согрешиши николиже: емуже слава во веки. Аминь.