<::лат>  OCR:

<::рус>  Библиотека святоотеческой литературы

<::лат>  http://orthlиb.ru

<::слав> 



(с. 357)



Каллист святейший патриарх константинопольский, 
наименование имый _ксанфопула, процвете при 
андронике втором из палеологов, в тысяща триста 
шестьдесятое лето. Изучившися же у святаго 
григориа синаита, егоже и житие послежде 
пространно написа, подвижничествова во святоименней 
горе афонстей, в ските магула, противу обители 
филофеа лежащем. Живяше же с сотаинственником своим 
марком целыя двадесять осмь лет. И игнатию 
такожде _ксанфопулу толико бе дружествен, якоже 
единей душе мнетися быти обоим в двух 
телесех. Патриаршествовавши же напоследок, и в 
сербию отшедши с клиром, мирнаго ради соединения 
тамошния церкви, чрез святую гору прейде: и оттуду 
приятным ма_ксима нарицаемаго ка_псокаливита 
проречением глаголющим: сей старец паствы своей 
лишился, предпослан быв, поющему созади и 
надгробную песнь: Блажени непорочнии в путь: 
едваже приспе в сербию, тамо тленное житие на 
нетленное премени. 

Глаголет же негде о сих двух и симеон 
фессалонийский, идеже о Боготворной молитве сей: 
Господи Иисусе Христе Сыне Божий, есть у него речь 
слово в слово сице: 

Глава 295, стр. 210. цеп. 5. 

Изряднее же во дни сия наша, о сей, сиречь 
молитве, написаша Духом, якоже и сами от Бога 
сущии, Богоглаголивии и Богоноснии и Христоноснии и 
Божественнии воистинну, иже во святых отец наш 
каллист, царствующаго новаго рима от Бога патриарх, 
и содушный ему соподвижник преподобный игнатий. И 
в книзе своей сложенней от них, духовно и 
Богомудренно, и зело высоко любомудрствоваша, во сто 
главах. в совершенном числе совершенный о сей 
разум изложивше. Иже и царствующаго сего града 
бывше отрасли, вся вкупе оставльше и девственно, 
и иночески в повиновении прежде жительствовавше, и 
после вкупе подвижнически, и небесно и нераздельно 
поживше, и единство во Христе, о немже (с. 358) 
сам Христос ко отцу о всех нас молился 
есть, изрядно в себе сохранивше, якоже 
светила, по павлу, придержаще слово животно в мире 
явишася. Паче бо всех почти от освященных 
соединение во Христе, и любовь исправиша, яко 
ниже подозреватися когда разнству некоему в них, 
даже и по воззрению и по нраву, или печали некоей 
во мгновении: еже в человецех почти невозможно 
есть. 

И сего ради ангельстии бывше и мир Божий, якоже 
молился есть Христос, соблюдше, и стяжавше в 
себе, иже есть Иисус Христос, мир наш, павел 
рече, сотворивый обоя едино, егоже мир и 
всяк ум преимеет, преставльшеся мирно, ныне 
высочайшею наслаждаются тишиною, ныне чисте Иисуса 
видят, егоже от души возлюбиша, и егоже 
воистинну взыскаша: и едино суть с ним, и 
сладчайшаго его света и Божественнаго, ненасытне 
причащаются: егоже обручения и зде прияша, 
очищени бывше видением и деяньми, и Божественное 
осияние на горе, якоже и апостоли, получиша. И сие 
многим яве показася во свидетельство, яко 
лицем блистающимися по образу стефана, видени бяху, 
не в сердце точию, но и на лице сих излившейся 
благодати. Темже, якоже и великий оный моисей, 
явистася, якоже свидетельствоваша видевшии, 
блистающеся солнцевидне лицем. Иже и яко 
блаженную сию страсть добре пострадавшии, и 
искусом познавшии, ясне сказуют и о 
Божественнем свете естественнаго Божия действа и 
благодати, и свидетелей приводят святых, якоже и 
о священней молитве. 

(с. 359)

Иже во иноцех

КАЛЛИСТА И ИГНАТИЯ КСАНФОПУЛОВ,

Художество и правило, с Божиею помощию совершенное, и 
от святых свидетельства имущее, о изволяющих 
безмолвно и иночески пожити, о пребывании и 
жительстве, и пищи их, и еликих и коликих 
благ безмолвие виновно бывает разумно проходящим 
е. 

Разделися же настоящее сего слова сочинение на сто 
глав. 

Глава 1.

Предисловие сего слова, еже и первыя главы число 
имать, о сущем в верных от Духа святаго 
Божественнем и преестественнем даре же и 
благодати. 

Подобаше нам Богонаученым сущим, по Божественным 
рещи глаголом, яко новый закон неизреченно в 
сердце написан, носящим пламене светлейший, и 
благим и правым Духом управляемым, яко 
чадом и наследником Божиим, снаследником же 
Христу, агг~лоподражательне жительствовати, и 
никакоже требовати имущаго научити сему: познай 
Господа.{Иерем. гл. 31, ст. 34.} Ныне же от юнаго 
нашего возраста от блага заблуждение, и на горшее 
преложение, еще же и лютаго велиара прелесть, и 
непримирительное на ны мучительство, далече тещи от 
спасительных (с. 360) и Богодейных заповедей нас 
злобнейше сотвори, по стремнинам душегубным 
носитися, и, что жалостнее, противу самих себе и 
мудрствовати и деяти подвиже. Темже и по словеси 
Божественному: несть разумеваяй, несть взыскаяй 
Бога: купно бо вси праваго пути уклонишася, 
неключими быхом.{Псал. 13, ст. 2.} И сего ради 
совершенне плотяни суще, и светоносныя и 
Божественныя благодати лишающеся, требуем друг от 
друга к добрым делом споспешествования же и 
помощи. 

Глава 2.

Яко ради вопрошения некоего брата по намерению 
его, еще же и ради соблюдения отеческия 
заповеди сице простреся настоящее слова сего 
содержание. 

А понеже ты, желая по словеси Господню испытовати 
Божественная и животворная писания, и тайнонаучатися 
непогрешительно, множицею просил еси от нас 
неключимых слова и правила написана. пользы ради 
твоея, а может быть, и других, якоже сам 
глаголеши: аще и не прежде, но хотя ныне судихом, 
яко подобает, с Божиею помощию исполнити 
похвальное твое желание, забывше спитомное нам 
уныние, любве ради и пользы твоея: тебе же, 
духовное чадо, и зело любезнейшее, за тщание к 
благим делом, и продолжительное люботрудие зело 
похваляюще, паче же сих боящеся от Бога осуждения, 
имже скрывающему талант угрожается страшно, 
сверх же реченных, и отеческую исполняюще 
заповедь, юже заповедаша нам отцы наши, и 
духовнии учители, яко да и других Боголюбивых 
во учении онех уверим. Бог же отец любве, 
и всех обще благих независтноподательный 
раздаятель, да даст нам косным и худогласным 
слово благовременно во отверзение уст (с. 360) 
наших, иже множицею и безсловесным животным 
слово вдохнувый, пользы ради слышащих.{4 Моис. гл. 
22.} Тебе же и всем чтущим сия да приложит 
ухо, еже премудре и разумне сия слышати,{2 
Петр. гл. 2.} и якоже ему угодно, непреклонно 
жительствовати: зане без него, якоже писано 
есть, не можем творити ничесоже,{Иоан. гл. 15, 
ст. 5.} от полезных и спасительных: и яко, аще 
не Господь созиждет дом, всуе трудишася 
зиждущии.{Псал. 126, ст. 1.} И сия убо сице 
суть. 

Глава 3.

Яко всякое дело намерение предваряет. Намерение 
убо настоящаго сочинения есть сие, дабы 
научитися, кое есть основание духовнаго о Христе 
здания. 

А понеже намерение предваряет всякое дело: 
намерение же обоих нас, наше по силе изрещи 
служащая к духовному твоему возращению, твое же, дабы 
по реченным искренне пожити: подобает прежде 
всего иного испытати, к каковому исполнению здания 
по Христе взирающе, и начало основания полезное 
положим, потом времени побуждающу, паче же свыше 
помощь богатно получивше, и покров на началоздание 
архитектонством духа устроим.

Глава 4.

Яко всякаго по Бозе делания начало есть, 
жительствование по заповедем Спасителя: конец же, 
еже возвратитися к дарованней нам исперва в 
Божественном крещении, совершенней благодати 
всесвятаго и живоначальнаго Духа. 

Начало убо всякаго по Бозе делания, вкратце 
рещи, есть сие, дабы тщатися нам всяцем 
образом, и всею силою жительствовати (с. 362) по 
законоположению всех Боготворных заповедей 
спасителевых: конец же, дабы возвратитися блюдением 
сих к туне данному нам свыше от самаго начала, 
от Священныя купели, совершенному духовному благодати 
воз_ображению и назданию, или аще угодно ти, 
сицевой дар возвратити, и ветхаго адама с деяньми 
и похотьми отложше, в новаго и духовнаго облещися, 
иже есть Господь Иисус Христос. Якоже глаголет 
Божественнейший павел: чадца моя, имиже паки 
болезную, дондеже вообразится Христос в 
вас.{Галат. гл. 4, ст. 19} И, елицы во Христа 
крестистеся, во Христа облекостеся.{Галат. гл. 3, ст. 
27.} 

Глава 5. 

О том, кая есть благодать сия, и како бы мощно 
было нам получити ю, и кая суть возмущающая, и 
кая паки воз_очищающая ю. 

Но кая есть благодать сия, и како бы мощно было 
нам получити ю, и кая суть возмущающая ю, кая же 
паки воз_очищающая, сие светлейший всякаго злата 
душею и языком, покажет ти святый златоуст, сице 
глаголя: что же есть, славу Господню яко в зерцале 
взирающе, в тойже образ преобразуемся?{2 Корин. гл. 
3, ст. 18.} Яснее сие показывашеся, егда 
знамений дарования действоваху: обаче и ныне 
несть не удобно узрети сие имущему очеса 
верныя. Егда бо крещаемся, тогда и душа паче 
солнца сияет, Духом очищаема, и не точию зрим 
славу Божию, но и оттуду приемлем некое сияние. 
Якоже бо сребро чистое, противу лучей солнечных 
лежащее, и само лучи испущает, не от своего точию 
естества, но и от сияния солнечнаго: сице и душа 
очищаема, и всякаго сребра светлейшею бывая, 
приемлет лучу от славы Духа, в славу внутрь 
бываемую, и таковую, яковой (с. 363) быти подобает 
от Господа Духа. И по малех словесех: хощеши ли, 
покажу ти сие и от апостол ощутительнее? помысли 
о павле, егоже ризы действоваху? о петре, 
егоже и сень имеяше силу. Зане аще не бы 
царский образ носили, не бы неприступно было сияние 
их, не быша толико ризы их и сень действоваху: 
царския бо ризы и разбойником суть страшны. Хощеши 
ли видети сей образ и в теле сияющь? 
воззревше, глаголет, на лице стефаново, видеша лице 
его яко лице ангела.{Деян. гл. 6, ст. 15.} Но 
сие есть ничто пред славою отвнутрь сияющею. 
Еже бо моисей на лице некогда имеяше, то сии 
в душе обношаху, и еще много вящше: моисеово бо 
чувственное бе, а сие безплотно. И якоже 
огнезрачныя лучи от светлых телес на ближния 
телеса истекающе, и оным преподают от своего 
света: сице и с верными приключается. Сего ради 
от земли свобождаются ощущающии сие, и сущая на 
небесех яко во уме мечтают, но, увы мне 
добро бо зде и постенати горце, яко толиким 
могуще наслаждатися благородством, ниже глаголемая 
вемы, зане сии погубляем, и чувственным вещем 
удивляемся. Сия бо слава неизреченная и страшная на 
един, или два дни в нас пребывает: потом 
погашаем ю, наводяще бурю житейских вещей, и 
густыми облаки лучи отражающе. И паки инде: 
телеса благоугодивших Богу, в толику облекутся 
славу, елику ниже видети мощно сими очами. И 
сего нам знамения некая и неясныя следы, и в 
ветхом, и в новом завете дати благоволи Бог. В 
ветхом бо лице моисеово толикою сияше славою, яко 
неприступно бе очам исраильтян: В новом же 
много паче сего возсия лице Христово. Услышал ли 
еси глаголы духовныя? уразумел ли еси силу 
тайны? познал ли еси, каковы суть болезни 
совершеннаго от священныя купели, духовнаго 
отрождения нашего? каковы же суть приплодия, и 
исполнение и победныя почести? и како во власти 
нашей есть, (с. 364) сию преестественную благодать и 
растити и умаляти, сиречь являти и помрачати, 
елико нам мощно? помрачающая же суть сия: вихрь 
житейских вещей, и тьма раждающаяся от самых 
страстей, яже, аки буря, или свирепый поток, на 
ны натекающи, и душу потопляющи, ниже отдохнути, 
ниже воззрети ей попущают к истинному и 
блаженному добру, егоже ради и сотворися: но всю 
ее от возмущения и дыма сластей поколебавшуся и 
олютевшу помрачают и потопляют: якоже паки сим 
противная, сиречь от заповедей Господних раждающаяся, 
не по плоти, но по духу ходящим: Духом бо, глаголет, 
ходите, и похоти плотския не совершайте,{Галат. гл. 
5, ст. 16.} полезна суть и спасительна, и на 
подобие лествицы возводят их на самый верх, на 
высочайшую из степеней любовь, яже есть Бог.

Глава 6. 

Яко во святем крещении туне Божественную благодать 
приемлем, и сию страстьми сокрывше, паки 
исполнением заповедей воз_очищаем. 

Но тогда в Божественных ложеснах, сиречь во 
священней купели, всяко туне приемлем совершенную 
Божественную благодать. Аще же некако напоследок 
привременных злоупотреблением, и о житейских вещех 
попечением и мглою страстей, _о дабы не было! 
сокрыем ю: мощно нам и сице покаянием, и 
Богодейных заповедей исполнением, паки восприяти 
и стяжати таковую преестественную светлость, и 
явление ея увидети пресветло. Обаче по 
мере коегождо в вере прилежания и явление 
ея бывает, а наипаче помощию и Благоволением 
Господа Иисуса Христа. Якоже глаголет святый марко: 
Христос совершен Бог сый, совершенную крестившимся 
благодать святаго (с. 365) Духа дарова, приложения от 
нас не приемлющую, открывающуюся же нам, и 
являющуюся по мере делания заповедей, и 
приумножение веры нам подающую, дондеже достигнем 
вси в соединение веры, в меру возраста исполнения 
Христова.{Ефес. гл. 4, ст. 13.} Аще убо что 
приносим, паки в нем отродившеся, и сие уже 
от него, и тем бе в нас сокровенно.

Глава 7.

Яко подобает жительствующему по Бозе вся заповеди 
проходити: большую же часть делания уделяти на 
соблюдение первых заповедей, и якобы раждающих 
другия.

Понеже убо начало и корень всякаго, якоже 
рехом, сицеваго делания, есть сие, дабы 
жительствовати по спасительным заповедем: конец же, 
и плод, дабы паки возвратитися к дарованней нам 
исперва крещением совершенней благодати Духа, в 
нас сущей: нераскаянна бо, глаголет, Божия дарования, 
но спогребенней страстьми, открываемей же деланием 
Богодейных заповедей. Подобает по силе 
исполнением всех таковых заповедей, сущее в 
нас явление Духа тщатися всяцем образом 
воз_очистити, дабы яснейше узрети. Светильник 
бо, глаголет к Богу блаженный давид, ногама моима 
закон твой, и свет стезям моим.{Псал. 118, ст. 
105.} И, заповедь Господня просвещающая очи.{Псал. 
18, ст. 9.} И, ко всем заповедем твоим 
направляхся.{Псал. 118, ст. 128.} И, наперсник 
иоанн: соблюдаяй заповеди его, в нем 
пребывает, и той в нем.{1 Иоан. гл. 3, ст. 24.} 
И, заповеди его тяжки не суть.{Иоан. гл. 5, ст. 
3.} Спаситель же: имеяй заповеди моя, и соблюдаяй 
их, той есть любяй мя: а любяй мя, возлюблен 
будет отцем (с. 366) моим, и аз возлюблю 
его, и явлюся ему сам. И, аще кто любит 
мя, слово мое соблюдет, и отец мой возлюбит 
его, и к нему приидем, и обитель у него 
сотворим. И, не любяй мя, словес моих не 
соблюдает.{Иоан. гл. 14, ст. 21, и след.} Паче же 
на первыя сих заповедей и главнейшия, и яко 
матери прочиих большую часть делания уделяти 
подобает. Тако бо с Богом, непогрешительно и 
предлежащее намерение, сиречь самое благое начало, 
и конец желания поучити возможем, сиречь явление 
Духа.

Глава 8. 

Яко начало всякаго Боголюбезнаго делания есть 
призывание с верою имене Господа нашего Иисуса Христа, 
и вкупе с сим, прозябающий от сего мир и любы. 

Начало всякаго Боголюбезнаго делания есть 
призывание с верою Спасительнаго имене Господа нашего 
Иисуса Христа, яко той рече: без мене не можете 
творити ничесоже.{Иоан. гл. 15, ст. 5.} И с сим 
призыванием прозябает мир: подобает бо, глаголет, 
молитися без гнева и размышления:{1 Тим. гл. 2, ст. 
8.} и посем любы. Бог любы есть, и пребываяй в 
любви, в Бозе пребывает, и Бог в нем.{1 Иоан. 
гл. 4, ст. 16.} Сей же мир и любы не токмо 
Благоприятною творят молитву, но и от самыя еще 
молитвы раждаются и возсиявают яко Божественныя 
совокупныя лучи, и возрастают, и совершенны 
бывают.

Глава 9.

Яко чрез каждое из сих трех особь, и 
вкупе, обилие всех благ подается нам. 

От сих трех, паче же от каждаго из сих 
особь, и вкупе, обилие всех благ подается и 
изливается. Призыванием бо с (с. 367) верою имене 
Господа нашего Иисуса Христа, милость и истинный живот 
в нем сокровенный известно уповаем прияти, 
внутрь сердца чисте призываемому имени Господа Иисуса 
Христа источающу сия, яко другому источнику 
Божественному приснотекущему: преимущим же всяк 
ум, и ни единаго предела имущим миром, 
примирения с Богом и друг со другом сподобляемся: 
любовию же, еяже слава несравненна, яко она 
есть конец и глава закона и пророков, и яко 
любы Бог именуется, всяко с Богом соединяемся, 
упраздняему греху нашему правдою Божиею, и 
преславне действуемым в нас любви ради 
сыноположением благодати. Любы бо, глаголет, 
покрывает множество грехов.{1 Петр. гл. 4, ст. 8.} 
Любы вся покрывает, всему веру емлет, вся 
уповает, вся терпит, любы николиже отпадает.{1 
Кор. гл. 13, ст. 7.}

Глава 10.

Яко и Господь наш Иисус Христос во время 
спасительныя страсти, сия учеником своим, яко 
исходныя некия заповеди, и наследие Божественное 
остави: такожде и по воскресении. 

Темже и сам преблагий и сладчайший наш Иисус 
Христос, и егда на вольную за ны страсть свою 
прииде, и егда по воскресении апостолом явися, 
еще же и внегда ко своему по естеству отцу, и 
нашему по Благодати, имеяше восходити, аки отец 
искренний и чадолюбивый, сия яко некия исходныя 
заповеди, и утешения любезныя, и сладчайшия, и 
известныя, якоже рещи, залоги, паче же наследие 
Богоподательное неотемлемое, всем своим остави: и 
ово являет сими яже глаголет ко учеником, 
наставшей спасительной страсти, тако: аще чесо 
просите (с. 368) во имя мое, аз сотворю.{Иоан. гл. 
14, ст. 14.} И, аминь, аминь, глаголю вам, 
яко елика аще чесо просите от отца во имя 
мое, даст вам.{Глава 16, ст. 23, 24, 26.} 
Доселе ничесоже просисте во имя мое: просите и 
приимете, да радость ваша исполнена будет. И, в 
той день во имя мое воспросите. И паки по 
воскресении: знамения верующим сия последуют: 
именем моим бесы ижденут, языки возглаголют 
новы, и прочая.{Марка гл. 16, ст. 17.} Последуя 
сим, глаголет и наперсник: многа же и ина 
знамения сотвори Иисус пред ученики своими, 
яже не суть писана в книзе сей. Сия же писана 
быша, да веруете, яко Иисус есть Христос Сын 
Божий, и да верующе, живот имате во имя 
его.{Иоан. гл. 20, ст. 30 и 31.} И Божественный 
павел: о имени Иисусове всяко колено поклонится, 
и прочая.{Филип. гл. 20, ст. 10.} И во апостольских 
деяниях сице написано есть: тогда петр 
исполнився Духа свята, рече: разумно буди всем вам, 
и всем людем Израилевым, яко во имя Иисуса 
назореа, егоже вы распясте, егоже Бог воскреси 
от мертвых, о сем сей стоит пред вами здрав. 
И по малех: И несть ни о едином же ином 
спасения: несть бо иного имене под небесем 
даннаго в человецех, о немже подобает спастися 
нам.{Деян. глава 4, ст. 8, 10, 11 и 12.} И 
паки спаситель: дадеся ми всяка власть на небеси и 
на земли.{Матф. гл. 28, ст. 18.} Ово же паки 
явствует из сих, яже Богочеловек Господь рече 
ко апостолом прежде Креста: мир оставляю вам, 
мир мой даю вам.{Иоан. гл. 14, ст. 27.} И, сия 
глаголю, да во мне мир имате.{Глава 16, ст. 33.} 
И, сия есть заповедь моя, да любите друг 
друга.{Глава 15, ст. 12.} И, о сем разумеют 
вси, яко мои ученицы есте, аще любовь имате 
между собою.{Глава 13, ст. 35.} И, якоже возлюби 
мя отец, и аз возлюбих вас: пребудите в любви 
моей.{Глава 15, ст. 9.} Аще заповеди моя 
соблюдете, пребудете в любви моей: якоже аз 
заповеди отца моего соблюдох, и пребываю в его 
любви.{Гл. 15. ст. 10.} И паки по воскресении в 
различная времена множицею даваше мир, являяся (с. 
369) своим, и глаголя: мир вам.{Иоан. глава 20, 
ст. 21.} И к петру, емуже и первенство над 
ученики ввери, показуя, яко попечение паствы 
его есть воздаяние некое за горячайшую его 
любовь к самому Господу Иисусу Христу, тако глаголет 
трижды: аще любиши мя, петре, паче инех, паси 
овцы моя.{Иоан. глава 29, ст. 17.} Можно 
согласно с намерением рещи и сие, яко от 
показанных сих трех предивных деланий, раждаются 
нам иная некая изрядна три, сия же суть: 
очищение души, просвещение и совершение. 

Глава 11. 

Яко из сих трех соткаваются вся добродетели. 

Аще же кто совершенно восхотел бы яве испытати, 
таковый на сей треплетенней и нерасторженней верви 
обрящет повешену и сотканну всякую добродетелей 
богатую и Богосоделанную порфиру. Ибо жительство по 
Бозе есть, яко некая честная верига и цепь 
златоиспещреная, имущая едину от другия 
добродетель свято зависящу, и вся во едино 
составлены. Ибо и едино дело многия совершают, 
еже есть искренне с ними живущему человеку 
обожитися, богатети же яко союзами некиими и 
кольцами, спасительным оным с верою призыванием: 
аще же хощеши, надеждою и смирением, любезнейшаго 
имене Господа Иисуса Христа. Миром же купно и любовию, 
яже суть Богонасажденное воистинну тристебельное и 
живоподательное древо, егоже во время касаяйся, и 
якоже подобает причащаяйся, не смерть, якоже 
первосозданный человек, но живот негиблющий и 
вечный приемлет. 

(с. 370)

Глава 12.

Яко дар и пришествие святаго Духа от Бога отца 
верным о Христе Иисусе, и о святем его имени 
дается. 

Еще же дар и пришествие святаго Духа дается от Бога 
отца верным о Христе Иисусе, и о святем его 
имени, якоже глаголет сам преБожественный и 
душелюбивый Господь Иисус Христос ко апостолом: Яко 
уне есть вам, да аз иду. Аще бо не иду 
аз, утешитель не приидет к вам: аще ли же 
иду, послю его к вам.{Иоан. глава 16, ст. 7.} 
И, егда же приидет утешитель, егоже аз 
послю вам от отца, Дух истины, иже от отца 
исходит.{Иоан. гл. 15, ст. 26.} И паки: 
утешитель же Дух святый, егоже послет отец во 
имя мое.{Иоан. глава 14, ст. 26.}

Глава 13. 

Яко праведне уставиша святии отцы наши, и со 
живущим в них святым Духом молитися нам в Господе 
нашем Иисусе Христе, и от него просити милости. 

Сих ради убо и славни наставницы наши и 
учители, и со живущим в них всесвятым Духом, 
зело премудре всех научают, прежде всякаго 
иного добраго делания и поучения: паче же в 
поприщи Боготворнаго безмолвия себе вдати хотящим, и 
посвятити себя Богу, и отторгнутися мира, и умом 
безмолвствовати, в Господе молитися, и от него милости 
просити без сумнения, и всесвятое и сладчайшее 
его имя, непрестанно имети делом же и 
поучением, и сие в сердце, и во уме, и во 
устнах выну обносити, и в нем, и с ним и 
воздыхати, и жити и спати, и бодрствовати, и 
движитися, и ясти, (с. 371) и пити, и вкратце 
рещи, понуждатися вся подобне творити. Якоже бо 
сему отсутствующу всяко лютое вкупе стекается, паче 
же ничтоже бывает в нас от полезных: тако сему в 
нас присутствующу, все сопротивное отгоняется, и 
ничтоже от благих оскудевает нам, и ко 
исправлению ничтоже есть невозможно. Якоже и 
сам Господь наш глаголет: Яко иже будет во мне, 
и аз в нем, той сотворит плод мног: яко 
без мене не можете творити ничесоже.{Иоан. глава 
15, ст. 5.} Темже сие дело и имя всякому 
созданию страшное и честное, еже паче всякаго 
дела и имене, и мы недостойнии с верою 
призвавше, и на нем ветрила настоящаго слова 
всеобразне распростерше, сице глаголати, и на 
предняя простиратися начинаем. 

Глава 14. 

Яко подобает безпогрешно ходити хотящему по Господе 
течение безмолвия, прежде всех избрати с 
совершенным отречением и повиновение совершенное. 

О имени великаго Бога и Спаса нашего Иисуса Христа, 
рекшаго: аз есмь свет, и живот и истина, 
путь и дверь к Богу отцу:{Иоан. глава 8, ст. 
12.} и, мною аще кто внидет, спасется, и 
внидет, и изыдет, и пажить обрящет, сиречь 
спасительную.{Глава 14, ст. 6. Глава 10, ст. 9.} 
Вонми тем, яже глаголем: и искренне тебе 
советуем. Прежде всех избери себе с 
совершенным, по священному тайноучению, отречением, 
и повиновение непритворное и совершенное, сиречь 
потщися обрести наставника и учителя непрелестна, 
непрелестность же сего да будет в том, чтобы 
представляти свидетельство, о нихже глаголет, от 
священных писаний, и духоносных мужей словесем 
имуща жительство согласно, высока разумом, смиренна 
же мудрованием, и инеми нравы блага, и якова 
глаголют (с. 372) быти Богопреданная словеса, по 
Христе учителя. И обрет, оному яко отцу 
родному сын отцелюбивый прилепився, весь телом 
и духом пребывай от того времене, ходя по 
повелением онаго, взирая на него, яко на самаго 
Христа, а не яко на человека, всякое неверие и 
сумнение далече от себе повергши, еще же и 
мудрование, и волю с хотением. Сице буди прост и 
нелюбопытлив, ходя в след учителя, яко некое 
зерцало имея совесть свою, во извествование 
ясное несумненнаго и совершеннаго к тайноучителю 
послушания. Аще же когда и всевает нечто от 
сопротивных отай в твою мысль враждуяй на благая 
диавол, яко от блуда и огня отскочи к самому 
себе и к подмещущему прелестнику премудре 
противовещая: яко не наставляемый наставляющаго, но 
наставляющий наставляемаго наставляет, и не аз 
начальствующаго, но он мой суд восприят, и не 
аз оному, но той судия мне бысть по слову 
лествичника, и сим подобная (от 4 степени). 
Ничтоже бо паче таковаго пребывания, сиречь 
повиновения, искреннейше есть изволившему 
безпрекословно раздрати рукописания своих согрешений, 
вписану же быти в Божественную книгу спасаемых. Аще 
бо: по блаженному павлу, Сын Божий, и Бог наш Господь 
Иисус, по нам нас ради быв, и отеческое 
благоволение зело премудре строя, таковым, якоже 
видимо бысть, течаше путем, имже и за 
благоугождение по человечеству отеческаго сподобися 
возвещения: смирил бо, глаголет, себе, послушлив 
быв даже до смерти, смерти же крестныя.{Филип. глава 
2, ст. 8 и 9.} Темже и Бог его превознесе, и 
дарова ему имя, еже паче всякаго имене, и 
прочая. Ктож убо дерзостне надеется, да не реку 
несмысленне, получити славу Господа и Бога и Спаса 
Иисуса Христа, и отеческия почести не избрав 
тоюжде стезею ходити с наставником и учителем 
нашим Иисус Христом: подобает бо и ученику, 
аще печется сей быти яко учитель, яко на 
из_ображение и началообразие наилучшее, (с. 373) тако 
всею силою души, взирати неуклонно на житие 
пестуново, и обучения его, и тщатися ему по 
всяк день ревновати. Таже, и о самем Господе 
Иисусе Христе писано есть сие: И бе повинуяся 
отцу и матери своей.{Луки глава 2, ст. 51.} И 
сам Спаситель глаголет: Не приидох, да послужат 
мне, но послужити.{Матф. глава 8, ст. 28.} Иже 
хощет жити инако, сиречь самоугодне и 
самовластне, и без наставника, таковый мнится ли, 
яко может он ходити, по слову, Божественным 
житием? Никако отнюд якоже чрез копанныя места 
скачай. И глаголет лествичник: якоже не имый 
наставника, удобь в пути заблуждает, тако и 
самовластне иноческим путем ходяй удобь 
погибает, аще и всяку премудрость мира сего 
весть. Сего ради и мнозии, да не речем вси 
неповинующиися, и не с советом ходящии, с трудом 
и потом сновидяще сеют множайшая, истиною же 
жнут вельми малейшая: нецыи же и вместо пшеницы 
собирают, увы! плевелы, якоже ходящии, по 
глаголу, своечинием и самоугодным мудрованием, 
егоже ничтоже есть горше, и сему свидетель 
лествичник, тако пиша: Елицы к поприщу умнаго 
исповедания совлещися восприясте: елицы иго 
Христово на выю свою взяти хощете: елицы бремя 
свое на выю иного возложити тщитеся: елицы самих 
себе в неволю предати спешите, да вместо оныя 
свободу приимете: елицы руками других возвышаеми, 
и пловуще великую сию преплаваете пучину, 
уведите, яко кратким неким и жестоким 
путем ходити восприясте, едину токмо прелесть на 
себе имущим, сия же нарицается своечиние (от 4 
степени). Сего бо во всем отвергийся, яже возмнит 
быти благая, и духовная, и Богоугодная, в сия 
прежде даже не пойде, достиже: послушание бо есть, 
еже не веровати себе во всех благих, до конца 
живота. Темже и ты, сия с разумом познав, и 
благой и неотемлемой части, в небеси путеводящаго 
безмолвия обучатися желая, последуй (с. 374) добре 
постановленным, якоже тебе показася, законом: и 
первее с радостию возлюби послушание, таже 
безмолвие. Якоже бо деяние восхождение есть к 
видению, тако и послушание к безмолвию. И, не 
прелагай пределы, якоже писано есть, яже 
положиша отцы.{Притч. глава 22, ст. 28.} И, горе 
же единому.{Екклес. глава 4, ст. 10.} Сим бо 
образом доброе основания начало положив, времени 
продолжающуся, и покров благославнейший возложиши на 
началоздание духа. Якоже бо егоже начало, по 
рекшему, есть неискусно, то и все отвержено: тако 
напротив, егоже начало искусно, то и все 
благолепно есть, еще же и благочинно, аще и 
сопротивное некогда случается. Обаче и сие от 
нашего предложения и произволения обыче прибывати.

Глава 15.

Кая суть знамения истиннаго повиновения, яже 
содержя истинный послушник, могл бы быти без 
погрешения повинующься. 

По понеже о таковом житии многое есть слово и 
неудобь сказуемо, темже и проходящии сие, различне 
проходят: подобает и об оном малая некая 
аки знамения показати тебе, яже и содержа, 
яко правило и вервь древодельну непогрешну, 
непорочне будеши жительствовати. И убо глаголем 
сия: подобает истинному послушнику, якоже нам 
мнится, хранити пять сии добродетели по всяцей 
нужде: и первее веру, сиречь, имети ему 
чисту и нелестну веру к настоятелю своему, до 
толика, яко мнети самаго видети Христа, и 
повиноватися, якоже глаголет Господь Иисус: слушаяй 
вас, мене слушает: и отметаяйся вас, мене 
отметается: отметаяйся же мене, отметается 
пославшаго мя.{Луки глава 10, ст. 12.} И всяко, 
еже не от веры, грех есть.{Рим. глава 14, 
ст. 23.} Вторую (с. 375) добродетель истину, сиречь, 
истинствовати ему в деле и слове и 
совершеннем исповедании помыслов: начало бо, 
писано есть, словес твоих истина: и истины 
взыскует Господь.{Псал. 118, ст. 160, _псал. 30.} 
Христос же глаголет: аз есмь истина:{Иоан. 
глава 14. ст. 6.} но убо и самоистина наречеся. 
Третию добродетель, еже не творити своея воли: 
тщета бо есть, глаголет послушнику, еже творити 
свою волю: но присно отсекати ю вольне, сиречь, 
не понуждаему от своего отца. Четвертую 
добродетель, еже отнюд не прекословити и 
любопретися, понеже прекословие и любопрение несть 
дело благочестивых: пишет во священнейший павел: 
аще ли кто мнится спорлив быти, мы таковаго 
обычая не имамы, ниже церкви Божия.{1 Корин. глава 
11, ст. 16.} Аще ли же сице просте, и обще 
всем христианом возбраняются таковая, много паче 
иноком, да еще Господа ради обещающимся 
повиноватися совершенне: прекословие бо и любопрение 
бывает от разсуждения с неверием и высокомудрием 
живуща, якоже речеся: высокомудр инок 
прекословит сильне: якоже и напротив, сиречь 
еже не прекословити и не любопретися, происходит 
от верна и смиреномудра завещания. И пятую же 
добродетель подобает хранити сему, еже имети 
совершенное и чистое к предстоятелю исповедание, 
якоже и на пострижении яко пред страшным 
предстояще престолом Христовым, пред Богом и 
святыми ангелы дахом обещание, еже имети нам 
начало и конец со инеми нашими ко Господу обеты и 
согласии, и исповедание тайных сердца. Рече и 
блаженный давид: рех, исповем на мя беззаконие 
мое Господеви: и ты оставил еси нечестие сердца 
моего.{Псал. 31, ст. 5.} И лествичник: язвы 
являемы не предуспеют на горшее, но исцелеют 
(от 4 степени). Сие пятеричное показанных 
добродетелей исчисление премудре и разумне 
соблюдаяй, несумненно да весть, яко отсюду 
получит праведных, яко по обручению, блаженство. 
И сия убо суть достопамятнаго послушания свойства, 
и аки (с. 376) корень и основание: услыши же, и 
яковы суть ветвие, и плод, и покров. От 
послушания, паки глаголет лествичник, смирение, от 
смирения разсуждение, от разсуждения разсмотрение, от 
сего же прозрение, еже есть дело единаго Бога, 
и дар даруемый от него изряднейший и 
преестественнейший от него блаженне 
Богодействуемым [от тогож степени]. Сверх 
реченных же да будет ти явственно и сие, яко по 
твоему известноиспытанному повиновению источается в 
тебе и смирение, и паки по смирении разсуждение, 
також по чину и прочая. И подвизайся, елико ти 
мощно, непогрешне тещи путем послушания: тако бо и 
на предняя без погрешения взыдеши. Аще ли же в 
начале повиновения некако храмлеши, веждь, яко не 
добре окончиши прочее течение предлежащаго начала, 
еже глаголем, по Христе жительство, ниже 
увенчаешися даруемым победителям венцем. Сего 
ради послушание, и яже предрекохом свойства 
онаго, яко некий наставник да будет тебе, 
якоже от кораблеников назираемо к блюдению 
незаблуждения, да неуклонно на оное взирая, преплыти 
возможеши великую добродетелей пучину, и сице 
неволнуемаго пристанища безстрастия достигнеши. Аще ли 
и буря некая и волнение на тя найдет, и сие 
прилучится во твоем повиновении: истиннаго бо 
послушника, ниже сам диавол по слову отцев, 
повредити может. Но да тебе и честную пречуднаго 
послушания высоту, елика есть, вкратце покажем, 
единое еще изречение святаго отца воспомянем. 
Глаголет убо паки светлейший жительства по 
Христе светильник, и новый веселеил небесныя 
лествицы: _псалмопение отцы поставляют быти 
оружие, молитву же стену, слезы же непорочныя 
умовение: блаженное же послушание, судиша 
исповедничество быти, без негоже никтоже от 
страстных узрит Господа [от 4 степени]. Довольна 
убо и сия суть, якоже нам мнится, к 
яснейшему явлению и похвале неподражаемаго 
образа треблаженнаго послушания: еще же возможем 
искусом сия уразумети и познати, аще к 
свышетекущему (с. 377) воззрим и соразсмотрим. Что 
убо сокрушения и мертвости бысть нам виновно, в 
началех не таковым бывшим сотворенным? что же 
обновления и безсмертия напротив виновно? 
Обретаем убо перваго виновно, сиречь тли, 
своеверие перваго адама, и своечиние, и 
непокорение, имиже отвержение и преступление бысть 
Божественныя заповеди: втораго же, сиречь нетления 
подаятельно втораго адама, и Бога и Спаса нашего 
Иисуса Христа ко отцу единохотение и повиновение, 
от нихже заповеди его есть соблюдение. Аз бо, 
глаголет Спаситель, о себе не глаголах: но пославый 
мя отец, той мне заповедь даде, что реку, и что 
возглаголю: и вем, яко заповедь его живот 
вечный есть. Яже убо аз глаголю, якоже 
рече мне отец, тако глаголю.{Иоан. гл. 12, ст. 
49 и 8.} Якоже убо в праотце, и сущих по 
нем, корень всем печальным и мати есть 
возношение: тако в новем Богочеловеце Иисусе 
Христе, и желающих по нему жити, начало и 
источник и основание всех благих есть 
смирение. Таково стояние и чин видим, яко 
соблюдает и горнейшее паче нас сущее чиноположение 
Священное всех Боговидных ангел, еще же и наша 
земная церковь. А напротив таковаго законоположения 
уклоняющимся, и строптиво, да не глаголем 
дерзостне жити хотящим, от Бога и небеснаго 
светлаго наследия, и соборныя апостольския церкве 
отторгатися и отлучатися, и во тьму и огнь 
геенский отсылатися, тайнонаучаемся и веруем. Еже 
лукавым денницы злоделателем, и во все времена 
бывшим буесловцем, злославным еретиком 
пострадати глаголем, якоже Богописанная 
представляют словеса, иже за самоугодие и гордость, 
Божественныя, якоже речеся, славы и наслаждения, и 
Священнаго собрания окаянне отвержени быша. Рекоша 
же нецыи от премудрых, яко противныя противным 
суть цельбы. Понеже убо печальных всех есть 
виновно непокорение и кичение, радостных же 
повиновение и сокрушение: (с. 378) подобает воистинну 
без погрешения жити желающему, в повиновении 
искуснаго отца и непрелестнаго преживати, времене 
косностию и ведением Божественных деланий державу 
носящаго, и в житии украшена ликом добродетелей, 
и повеление сего и совет вменяти, яко Божия 
гласы и совет: спасение бо есть, глаголет, во 
мнозе совете. И муж без совета сам противу 
себе есть супостат.{Притч. гл. 11, ст. 14.} Аще 
же и без таковаго в повиновении обучения некиим 
от славных отец случися Боготворное безмолвие и 
по Бозе совершенство получити: но по откровению 
Божественному, и редце. Писано есть, яко 
редкое несть закон церкве, якоже ниже едина 
ластовица весну творит. Но ты, яко некое 
предводительное ведение вседобротнаго безмолвия 
истинное повиновение быти веруя, остави единою 
смотрительне бывшая, и ходи по обще положенным 
преданиям Божественными отцы: тако бо и почестей 
законне живущих сподобишися. Что же, восхощет ли 
кто прилучившагося пути коснутися без наставника 
непрелестна, не у познав онаго? еще же и 
пучины морския без искуснаго кормчаго, подобне же 
и каковыя-либо хитрости и художества без учителя 
непогрешна: хитрости же хитростей, и художества 
художеств, и ко Богу ведущия стези и безмерныя 
мысленныя пучины, сиречь, иноческаго жительства, 
еже уподобися ангельскому житию, смеет ли кто 
начинати обучатися, и конец сего верует ли себе 
получити без наставника и кормчаго, и искуснаго и 
истиннаго учителя? Таковый воистинну, каков бы ни 
был, умом себе прельщает, и прежде, еже 
положити начало, прельстися, яко не по закону 
обучаяйся, якоже и напротив отеческим 
повинуяйся положениям, прежде даже не пойде, конца 
достиже. Откуду бо инуду можем уведети, или 
на плоть, якоже подобает, воевати, или на страсти 
и бесы вооружатися? добродетелем бо, якоже писано 
есть, злобы приводружаются, (с. 379) и суть некако 
соседни. Откуду же наказывати телесная чувства, и 
душевныя силы яко в гуслех соглашати? паче же, 
како мощно будет нам разсудити Божественныя гласы 
и откровения, и утешения, и видения 
Божественная, еще же и лести, и подсады, и 
прелести, и мечтания бесовския? И да вкратце 
речем: како в соединения Божия, и Богодейныя 
тайносовершения и таинства предспети сподобимся 
без тайноучения тайноучителя истиннаго и 
просвещеннаго? Не возможно есть воистинну, 
невозможно. Внегда и сосуда избраннаго, 
блаженнейшаго павла увидим, таинника 
неизреченных, уста Христовы, свет мира, общее 
солнце, всея вселенныя учителя, вкупе со апостолы 
движима, и соразсмотревающа благовествование, и 
почто, да не како вотще теку, или текох.{Галат. гл. 
2, ст. 2.} Еще же и самую ту премудрость, Господа 
нашего Иисуса Христа, о себе вещающа, яко снидох 
с небесе, не да творю волю мою, но волю пославшаго 
мя отца:{Иоан. гл. 6, ст. 38.} о пресвятем же и 
животворящем Дусе, яко не от себе глаголати 
имать, но елика аще услышит, глаголати 
имать.{Иоан. гл. 16, ст. 13.} Пользы ради чина, 
иже содержит небесная и земная, трепетом и 
ужасом, и страхом, содержими есмы о нашей 
немощи и унынии, и о избирающих грубо и 
прибедственно от безумия и возношения своечинно 
жительствовати и без повиновения. Воистинну бо 
таковый подвиг страшен, и неисчетны татие, и 
подсады морских разбойник безчисленны, еще же и 
кораблекрушения меры не имут: темже и от многих 
зело мало есть спасаемых. Но сии убо, якоже 
хотят, и да ходят:{1 Корин. гл. 3, ст. 13.} 
коегождо бо, якоже писано есть, дело огнь 
искусит: и, тако ты воздаси комуждо по делом 
его.{Псал. 61, ст. 13.} Паче же не тако просте, 
якоже хотят, но якоже подобает и хотети, и 
пожити, да даст Господь всем разум. Ты же и всяк 
по Бозе пожити хотяй, от таковых глагол, яко от 
некоего риз воскрилия, (с. 380) весь злат и 
духовен состав разумев блаженнаго послушания, 
потщися, якоже предпоказася, обрести непрелестна и 
совершенна учителя. Совершенных же есть, по слову 
Христоноснаго павла, твердая пища, имущих чувствия 
обучена долгим учением в разсуждение добра же 
и зла.{Евр. гл. 5, ст. 14.} И сим образом 
ища притрудне и с верою, от предлежащаго 
намерения не погрешиши. Всяк бо, глаголет 
Божественное писание, просяй приемлет, и ищай 
обретает, и толкущему отверзется.{Матф. гл. 7, ст. 
8.} И той тя по порядку и чину всем подобающим 
и Боголюбезным тайнонаучит: еще же паче к 
Богоугодным и духовнейшим, и многим недоведомым 
руководити имать, зря тя от души радующася о 
умеренности и простоте и худости, во брашнех же 
и питиих, и покрывалех и одеяниих, и 
довольствующася потребными и приличными и нуждными, а 
не излишними и мягкотными, имиже величаются со 
украшением и блистанием безумно живущии, и сами 
на себе и на свое спасение мечь движут. Глаголет бо 
великий апостол павел: Имуще пищу и одеяние, сими 
довольни будем.{1 Тим. гл. 6, ст. 8.} Но ты ищеши, 
и научится желаеши, и написанне от нас услышати 
приличная началу же, и среде, и концу жительства по 
Христе: но аще и похвален есть сей вопрос, но 
неудобен есть внезапный ответ. Обаче Христу 
десницу подающу на твое взыскание, потщимся и сие 
сотворити, яко на утвержденнем и незыблемем 
основании назидающе, на пречестнем, совершеннем 
послушании дом многословутый всякаго духовнаго 
здания, Боготворное глаголем безмолвие. И глаголем 
убо сице, на отеческих и духовещанных 
изречениих, яко на столпех незыблемых 
утверждающеся. 

(с. 381)

Глава 16. 

%(Яко с православною верою прилежати подобает, 
быти полну и благих дел искренне и по Бозе 
безмолвствовати хотящему: и яко сугуба есть 
вера: и яко с сею подобает паки быти 
безмолвствующему, мирну, немятежну, непечальну, 
сиречь, безпопечительну, молчаливу, безмолвну, о 
всем благодарну, и познавательну своея немощи, и 
доблественне терпети искушения, и на Бога 
надеятися и от него пользы ожидати.%) 

1. Глаголет спаситель: не всяк глаголяй ми, Господи, 
Господи, внидет в царствие небесное, но творяй волю 
отца моего, иже есть на Небесех.{Матф. гл. 7, 
ст. 21.} И ты убо возлюбленне, аще не едиными 
словесы рачительствуеши о Боготворном безмолвии, 
еже виновно бывает, яко отселе внутрь себе 
светле приемлют явления царствия небеснаго и 
божия, истинне сие проходящии, в будущем же 
обемлют совершеннее по всему: но рачительствуй 
истиною и вещию: прилежи с православною верою 
исполнен быти и благих дел: таже со всеми 
мирен буди, елико от твоея страны мощно, 
немятежен, непечален, сиречь, но всему 
безпопечителен, молчалив, безмолвен, во всем 
благодарен и познавателен своея немощи, и око 
совершенне блюди бодренно и трезвенно против 
приключающихся тебе на всяк день различных и 
многовидных искушений, боряся терпением противу 
всякаго треволнения и скорби, како-либо находящей на 
тя. Зане о первем убо и втором, (с. 382) 
сиречь, с православною верою украшатися и 
благими делы, явственный тебе учитель есть 
славный Богобрат, тако глаголя: Вера без дел 
мертва есть, якоже и дела без веры. И, 
покажи ми веру твою от дел твоих.{Иаков. гл. 2, 
ст. 26, и 18.} И прежде же сего наставник всех 
и учитель, Господь наш Иисус Христос, глаголя ко 
учеником: шедше научите вся языки, крестяще 
их во имя отца, и Сына, и святаго Духа: Учаще 
их блюсти вся, елика заповедах вам.{Матф. гл. 
28, ст. 19 и 20.} И Богослов же глаголет: яко 
триех сих ищет Бог от всякаго человека, 
имущаго крещение, веры правыя от души, целомудрия 
от тела, и истины от языка.

%(Яко вера есть сугуба.%)

2. Ведати же подобает, яко вера, по словесем 
Богопреданным, сугуба есть: едина убо 
соборная всех православных христиан, в нейже 
сначала крестихомся, и с нею наконец, _о да 
соотидем! другая же, редких и онех, иже 
исполнением всех Боготворных заповедей, во еже 
по образу и по подобию паки востекших, и тако 
обогатевших Божественным Благодати светом, 
утвердити всю свою надежду ко Господу, и толико, _о 
достоинства! яко никакоже, по Господню словеси, 
усомневатися сим во время молитвы, в прошениях 
яже к Богу, но с верою искати, и тако удобь 
приимати полезная: по чесому и известну веру от 
дел истинных блаженнии сии приобретают, яко 
всяк разум, и разсуждение, и сумнение, и 
попечение от себе отвергшии, и вси совершенне 
Божественным упоением к Богу веры, и надежды, и 
любве исполнившеся, еще же изменившиися лучшим и 
блаженным десницы вышняго, по Божественному давиду, 
изменением. Но пространне глаголати о первей 
вере, несть настоящаго времене: а о второй, 
яже, яко некий Божественный плод, от первыя (с. 
383) процветает и отраждается, зело благовременно. 
Вера бо сия, яко некий корень и глава есть 
именитаго Боготворнаго безмолвия. Аще бо не будеши 
имети веры, глаголет лествичник, како имаши 
безмолвствовати [от 27 степени]? Глаголет убо 
Божественный давид: Веровах, темже 
возглаголах.{Псал. 115, ст. 1.} И великий 
апостол павел: есть вера уповаемых 
извещение, вещей обличение невидимых:{Евр. гл. 
11, ст. 1.} и, праведный от веры жив будет, и 
прочая.{Глава 10, ст. 38.} И спаситель же к 
вопросившим его учеником, приложити им веру, 
тако глаголет: аще бысте имели веру яко зерно 
горушно, глаголали бысте убо ягодичине сей: 
восторгнися и всадися в море, и послушала бы 
вас.{Луки гл. 17, ст. 6.} И, аще имате веру, и 
не усумнитеся, не токмо смоковничное сотворите, но 
аще и горе сей речете: двигнися и верзися в 
море, будет. И вся, елика аще воспросите в 
молитве верующе, приимете.{Матф. гл. 21, ст. 21 и 
22.} Пишет же и святый исаак: вера тончайша 
есть разума, якоже разум вещей чувственных 
[Слово 28]. Вси бо святии жительство сие обрести 
сподобишася, еже есть ужас ко Богу, силою 
веры пребывают в наслаждении жительства онаго, 
еже паче естества. Веру же глаголем не ону, 
еюже верует кто в различие покланяемых 
впостасей и Божественных, и во изящное и 
свойственное естество самаго Божества, и в 
смотрение дивное, еже в человечестве, в 
восприятие естества нашего, аще и сия высока 
есть зело: но веру от света благодати 
возсиявающую в души, свидетельством ума 
утверждающу сердце несумненно быти во извещении 
упования, отстоящем от всякаго мнения, и не 
приложении слуха ушес себе показует, но в 
духовных очесех сокровенная в души таинства, и 
тайное и Божественное богатство, сокровенное от 
очес сынов плоти, и открываемое Духом, 
питающимся на трапезе Христове в присном поучении 
законов его, якоже (с. 384) рече: аще соблюдете 
заповеди моя, послю вам утешителя, Духа истины, 
егоже мир не может прияти, и он научит вас 
всякой истине, и прочая.{Иоан. гл. 14, ст. 15.} 
И паки: дондеже приидет той, иже есть совершение 
таин, и сподобимся явленне откровения оных. 
Вера сия совершает посреде Бога и святых 
неизреченна таинства, ихже да сподобимся благодатию 
самаго Христа зде, яко во обручении, тамо же в 
существе истины: в царствии небеснем с любящими 
его.

%(Яко подобает мирну тебе быти.%)

3. О третием же, сиречь, еже мирну быти тебе со 
всеми, явственный ти есть совет, изречение 
Блаженнаго Давида, еще же и Христоноснаго павла: 
велегласнее трубы вопиющее. Онаго убо: Мир 
мног любящим закон твой, и несть им 
соблазна.{Псал. 118, ст. 165.} И, с ненавидящими 
мира бех мирен.{Псал. 119, ст. 6.} И, взыщи 
мира, и пожени и.{Псал. 33, ст. 15.} Сего же: 
мир имейте и святыню со всеми, ихже кроме 
никтоже узрит Господа.{Евр. гл. 12, ст. 14.} И 
аще возможно, еже от вас, со всеми мир 
имейте.{Рим. гл. 12, ст. 18.} 

%(Яко подобает немятежну быти тебе.%)

4. О четвертом же, сиречь, еже немятежну тебе 
быти, преподобный исаак покажет ти, глаголя: Яко 
аще желание, порождение чувств есть: да 
умолчат убо, с попечением хранити мир ума 
исповедающии, и с мятежствующими да не имаши 
обращения. 

%(Яко непечальну и безпопечительну подобает быти 
тебе. %)

5. О пятом же, сиречь, еже непечальну и 
безпопечительну от благословных и неблагословных 
вещей быти тебе, (с. 385) училище ти есть, 
еже во евангелиих глаголет Господь: сего ради глаголю 
вам: не пецытеся душею вашею, что ясте, ниже 
телом вашим, во что облечетеся: не душа ли больше 
есть пищи, и тело одежди?{Матф. гл. 6, ст. 25 
и 26.} Воззрите на птицы небесныя, яко не сеют, 
ни жнут, ни собирают в житницы, и отец ваш 
небесный питает их: не вы ли паче лучше их 
есте [ст. 27]? Кто же от вас пекийся может 
приложити возрасту своему лакоть един? и о 
одежди что печетеся [ст. 28]? и по малех: Не 
пецытеся убо, глаголюще: что ямы, или что 
пием, или чим одеждемся [ст. 31]? Всех бо сих 
языцы ищут: весть бо отец ваш небесный, яко 
требуете сих всех [ст. 32]. Ищите же прежде 
царствия Божия и правды его, и сия вся приложатся 
вам [ст. 33]. Не пецытеся убо на утрей, 
утрений бо о своих си печется: довлеет дневи 
злоба его [ст. 34]. Глаголет же и святый исаак: 
кроме безпопечения света в души твоей да не 
взыщеши, ниже тишины и безмолвия во ослаблении 
чувств твоих [от 69 слова]. И лествичник: 
Един влас смущает око, и мало попечение 
истребляет безмолвие: безмолвие бо есть отложение 
разумений, и отвержение от благословных попечений 
[от 27 степени]. Иже воистинну безмолвия достиже, 
ниже о своей попечется плоти: неложен бо есть 
обещавый.

%(Яко молчаливу подобает быти тебе. %)

6. Еще о шестом, сиречь еже молчати, порядок 
слова сего нас рещи понуждает. Глаголет убо и 
о сем святый исаак: возбраняяй уста своя от 
клеветы, хранит сердце свое от страстей, и на всяк 
час зрит Господа [от начала 8 слова]. И, егда вся 
дела жительства сего на едину страну положиши, и 
молчание на другую, на мериле обрящеши оное 
превосходящее [от 41 слова]. И, паче всех молчание 
возлюби, яко к плоду (с. 386) приближает тя: 
язык бо изнемогает ко сказанию его. Первее 
убо понудиш себе молчати, и тогда от молчания 
раждается в нас нечто наставляющее нас в само то 
молчание. Да даст ти Бог ощутити от молчания 
нечто раждаемо. Аще ли же сим жительствовати 
начнеши, не вем аз, колик свет возсияет ти 
отсюду. И паки: молчание таинство есть будущаго 
века, словеса же орудие суть мира сего [от 42 
слова]. И святому же арсению Божественный глас, 
второе узаконил есть сице: арсение бежи, 
молчи, безмолвствуй, и спасешися.{В четьей минеи 
маиа 8, лист 358 на обор.} 

%(Яко безмолвну быти подобает тебе. %)

7. Такожде и о седьмом, сиречь еже безмолвне 
пожити тебе, достоверни суть к представлению, 
великий василий и святый паки исаак. Той убо 
рек: безмолвие начало есть очищения душе: другий 
же, предел безмолвия есть молчание от всех [от 
14 слова]. Той, сего начало: сей же, конец сими 
словесы вкратце назнаменавше. И в ветсем же 
писании тако речеся: согрешил еси, 
умолкни.{Быт. гл. 4, ст. 7.} И, упразднитеся и 
разумейте, яко аз есмь Бог.{Псал. 45, ст. 
11.} Глаголет же и лествичник: дело безмолвия 
предварительное есть безпопечение о всех вещех 
благословных или неблагословных [от 27 степени]. 
Иже бо первым вход отверзает, во вторая всяко 
впадет: молитва безленостна: и третие, делание 
сердца не окрадаемо, не возможно есть письмен 
ненаучившемуся, естественне в книгах поучатися: 
невозможнее же не стяжавшим перваго, обоя сия по 
разуму пройти. И паки святый исаак: вожделение 
безмолвия есть чаяние всегдашнее смерти [от 41 
слова]. Иже без сего поучения в безмолвие входит, 
не может понести, яже должни есмы терпети и 
сносити всяцем образом. 

(с. 387)

%(Яко о всем благодарити подобает. %)

8. Подобне и о осьмом, сиречь о всем 
благодарити тебе, да будет доволен учитель 
Божественный апостол павел, повелевающ: о всем 
благодарите.{1 Сол. гл. 5, ст. 18.} И преподобный 
исаак: Благодарение приемлющаго, поощряет дающаго 
дати большая дарования первейших [от начала 2 
слова]. Неблагодаряй о меньших, и о больших лжец 
есть и неправеден: путеводит же дарования Божия к 
человеку, сердце движимое к непрестанну благодарению. 
И искушение души наводит мысль роптания, присно в 
сердце движимая: и уста выну Благодарящая 
Благословена от Бога будут. И сердце, во 
благодарении пребывающее, благодать приимет.

%(Яко подобает ведати свою немощь.%)

9. Коль же великую обретает пользу достигший к 
познанию своея немощи, еже и девятое есть 
числом. Внявши шестому _псалму Божественнаго Давида, 
уразумееши, в нихже глаголет: Помилуй мя, Господи, 
яко немощен есмь.{Псал. 6, ст. 3.} И инде: 
аз есмь червь, а не человек, поношение 
человеков и уничижение людей.{Псал. 21, ст. 7.} 
И святый исаак: блажен человек познаваяй свою 
немощь: занеже сие познание бывает ему основание 
и корень, и начало всякия благостыни. Егда бо 
уразумеет кто, и воистинну ощутит свою немощь: 
тогда востягивает душу свою от слабости помрачающия 
познание оно, и сокровиществует себе охранение. 
И, человек достигший к познанию меры немощи 
своея, достиже совершенства смирения. 

(с. 388)

%(Яко доблественне подобает терпети искушения. 
%)

10. Остальная же слова сего глава, яже 
соисполняет и сложенное нами десятое число, есть, 
еже доблественне терпети и сопротив стояти с 
терпением и благодушием ко имущим тебе 
приключатися различным и многовидным искушениям. 
Слыши убо, какова и о сем в Священнем писании 
написана суть. Ибо Христоносный павел глаголет: 
Братие! несть наша брань к крови и плоти, но к 
началом, и ко властем, и к миродержителем тьмы 
века сего, к духовом злобы поднебесным.{Ефес. 
гл. 6, ст. 12.} И, аще без наказания есте, 
емуже причастницы быша вси, убо прелюбодейчищи 
есте, а не сынове.{Евр. гл. 12, ст. 8.} И, 
егоже Господь любит, наказует: биет же всякаго 
сына, егоже приемлет [ст. 6]. И, Богобрат: Муж 
неискушен, неискусен.{Иаков. гл. 1.} И святый илиа 
екдик: достоит всякому христианину правоверующему 
в Бога, не быти без попечения, но всегда чаяти и 
ожидати искушения, да егда приидет не 
ужасается, ниже смущается, но благодарне терпети 
труд скорби, и разумети, что поя с пророком 
глаголет: искуси мя, Господи, и испытай мя.{Псал. 
25, ст. 2.} И не рече, яко наказание твое 
низврати мя, но исправи мя в конец. Ниже убо 
ищи вин искушений, откуду находят, но точию 
молися Богови благодарне сносити я, якоже 
глаголет святый марко: яко искушению нашедшу, не 
ищи чесо ради, или чрез кого прииде: но яко да 
благодарне е и непамятозлобне терпиши. И паки: 
аще несть удобно обрести благоугодившаго без 
искушений, о всяком случаи благодарити подобает 
Богови. И всякая скорбь обличает преклонность воли: 
на десно ли преклоняется, или на лево. Сего ради 
приключающаяся скорбь, искушение именуется, подающи 
причастнику искус сокровенных желаний. И святый же 
исаак, со многими иными словесы, и сия (с. 389) 
глаголет: Всякому человеку на пользу есть 
искушение: аще бо павла пользует. то всякая 
уста заградятся, и повинен да будет весь мир 
Богови [от 37 слова]. Подвижницы искушаются, да 
приложат богатству своему: слабии да от вредящих 
сохранят себе, и спящии да уготовятся на 
возбуждение: и далече сущии, ко Богу ближатся: свои 
же, да со дерзновением вселятся. Всяк сын необученый 
не приемлет богатства дому отца своего, во еже 
помощь имети от него. И сего убо ради первее 
искушает Бог и томит, таже показует дарование. 
Слава Владыце, горькими врачевствами наслаждение 
здравия нам приносящему. Несть, иже во время 
обучения не скорбит, и несть ктолибо, емуже 
негорько время то является, в неже ядом 
напляемь бывает искушений. Без сих бо несть 
возможно растворение приобрести крепко: но и еже 
претерпети, не наше есть. Откуду бо может 
скудель, иже от брения, претерпети течение воды, 
аще не бы огнь Божеский утвердил его. Аще 
повинемся просяще в смирении со желанием 
непрестанным в терпении, вся приемлем о Христе 
Иисусе Господе нашем. Речеся же и в премудрости 
сираховой: чадо! аще приступаеши работати Господу Богу 
твоему, уготови сердце твое во искушение, и 
потерпи, и не скор буди во время наведения.{Сирах. 
гл. 2, ст. 1 и 2.}

%(Яко подобает на Бога надеятися, и от него 
пользы ожидати. %)

Котву надежды на Бога спасти могущаго утверждаяй, 
от него и избытия искушении полезне да ожидает. 
Благословен бо, глаголет, Бог, иже не оставит 
нас искуситися паче, еже можем, но со искушеним 
сотворит избытие.{1 Кор. гл. 10, ст. 13.} И, яко 
скорбь терпение соделовает, терпение же искусство, 
искусство же упование, упование же не 
посрамит.{Рим. гл. 5, ст. 3, 4, 5.} И, 
претерпевый до (с. 390) конца, той спасется.{Матф. гл. 
24, ст. 13.} И, в терпении вашем стяжите души 
ваша.{Луки 21, ст. 19.} И Богобрат же тако 
глаголет: всяку радость имейте, братие моя, егда 
во искушения впадаете различна, ведяще. яко 
искушение вашея веры соделовает терпение: 
терпение же дело совершенно да имать, яко да 
будете совершенни и всецели, ни в чем же лишени. 
И, блажен муж, иже претерпит искушение, зане 
искусен быв, приимет венец жизни, егоже 
обеща Бог любящим его.{Иак. гл. 1, ст. 2, 3, 
4 и 12.} И недостойны страсти нынешняго времене к 
хотящей славе явитися в нас.{Рим. гл. 8, ст. 
18.} И, терпя потерпех Господа, и внят ми, и 
услыша молитву мою. И, возведе мя от рова 
страстей, и от брения тины, и постави на камени 
нозе мои, и исправи стопы моя: и вложи во уста 
моя песнь нову, пение Богу нашему.{Псал. 31, ст. 1 
и след.} Пишет же и блаженный симеон метафраст: 
душа ята бывши узами рачения к Богу, ни вочто же 
вменяет, еже страдати, но болезньми наслаждается, 
и в злострадании цветет. И егда ничтоже от 
печальных рачимаго ради страждет, тогда паче мнит 
страдати, и отбегает отрады, яко муки. 

Глава 17.

%(О страсе Божии, яко оный сугуб есть: 
един новоначальных, другий же совершенных.%)

Не подобает же ленитися ныне воспомянути и о 
сугубом по Бозе страсе, аще некако изволения 
ради нашего по конце означенныя нами десятницы 
реченных глав, помянути о совершеннем страсе, 
чин перваго страха и прервахом: по вере бо страх 
сей Божественнии отцы учиниша. 

(с. 391)

%(О первом или новоначальных страсе.%)

Веждь убо, возлюбленнейше, яко страх по Бозе 
сугуб есть: един новоначальных, другий же 
совершенных. И о первем убо тако писано 
есть: начало премудрости страх Господень.{Псал. 110, 
ст. _и} И, приидите чада, послушайте мене, страху 
Господню научу вас.{Псал. 33, ст. 12.} И, яко 
страхом Господним уклоняется всяк от зла: и 
идеже страх, ту заповедей соблюдение. Глаголет же 
и преподобный исаак: страх Божий начало есть 
добродетели (от 1 слова). Глаголется же быти 
рождение веры, и сеется в сердце, егда 
отлучится ум от попечения мира сего, еже 
собрати своя помышления скитающаяся от парения, в 
присное поучение будущаго возустроения. Начало 
истинныя жизни человека есть страх Божий, и сей 
с парением неких в души пребыти не повинуется. 
Упремудрися убо, во еже положити основание в 
путешествии твоем, страх Божий и в малех днех 
устроишися во вратех Царствия, кроме обхождения 
многаго пути. 

%(О втором и совершеннем Божественнем страсе. %)

О втором же, сиречь, совершеннем Божественнем 
страсе, тако речеся: Блажен муж бояйся Господа, в 
заповедех его восхощет зело.{Псал. 111.} И, 
Блажени вси боящиися Господа, ходящии в путех 
его.{Псал. 127.} И, бойтеся Господа вси святии его, 
яко несть лишения боящимся его.{Псал. 33, ст. 
_и} И, се тако благословится человек бояйся 
Господа.{Псал. 127, ст. 5.} И, страх Господень чист, 
пребываяй в век века.{Псал. 18, ст. 10.} Пишет 
и святый петр дамаскин: знамение перваго страха 
есть, еже возненавидети и гневатися на грех, 
якоже гневается уязвленный от зверя: 
совершеннаго же, еже любити добродетель и боятися 
премены (2 книги, 3 слова) И, яко никтоже (с. 
392) непременен, и во всякой вещи, в сем житии 
должни есмы присно падения боятися. Темже и ты 
сия разумно слыша, потщися со всеми предреченными и 
первый совершенно страх в себе непрестанно имети. 
Зане той, якоже сокровищное хранилище, твердейший 
есть всякаго благаго деяния. Тако бо обретаяся, 
будеши исправляемы имети стопы твоя к деланию 
всех заповедей Господа нашего Иисуса Христа. Путем же 
предыдый, обрящеши совершенный и чистый страх, 
желанием добродетелей и милостию благаго Бога 
нашего. 

Глава 18.

%(Яко за заповеди, и за веру, яже по онем 
Господа нашего Иисуса Христа, времени побуждающу, должни 
есмы ниже самаго живота нашего пощадети.%)

Сверх реченных же и сие подобает ведети тебе, 
яко за живоподательныя заповеди и за веру, яже 
по онем Господа Иисуса Христа, времени побуждающу, 
должни есмы и самую душу погубити с радостию, 
сиречь, ниже самаго живота нашего пощадети, якоже 
о сем сам Господь Иисус Христос глаголет: яко, 
иже погубит душу свою мене ради и евангелиа, той 
спасет ю,{Марка гл. 8, ст. 35.} без сумнения 
веруя, и не разсуждая, яко и воскрешение, и 
живот, и всяко чтолибо спасительно, сам есть 
Богочеловек Иисус Спаситель, якоже сам рече: 
яко аз есмь воскрешение, и живот: веруяй в 
мя, аще и умрет, оживет.{Иоан. гл. 11, ст. 
25 и 26.} И, всяк живый, и веруяй в мя, не 
умрет во веки.{Глава 3, ст. 16.} И, тако 
возлюби Бог мир, яко и Сына своего единороднаго 
дал есть, да всяк веруяй в онь, не погибнет, 
но имать живот вечный. И, аз приидох, да живот 
имут, и лишше имут.{Глава 10, ст. 10.} Тако 
убо обретаяся, присно же задняя (с. 393) забывая, 
в предняя же простираяся, якоже речеся: тецы со 
Христом Иисусом Господем нашим невозвратно твоим 
течением тако.{Филип. гл. 3, ст. 13.} Добро же 
есть, якоже нам мнится, и зело прилично, 
первее изложити блаженнейшаго никифора предивнаго, 
о входе чрез вдыхание ноздренное внутрь сердца, 
естественное некое художество, и к собранию мысли 
некако приличествующее, да тако, по чину, с помощию 
Божиею настоящее спасение благорасположительне 
предыдет. Глаголет убо Божественный оный 
муж, со многими иными утверждение имущими от 
написанных свидетельств святых отцев, и сия.

Глава 19.

%(Художество естественное о внутрь сердца чрез 
вдыхание ноздренное входоисходе, и о действуемой со 
оным о нас молитве, яже есть сия: Господи 
Иисусе Христе Сыне Божий, помилуй мя! Таковое 
художество приличествует некако и к собранию мысли. 
%)

Веси ли, брате, яко дыхание сие, имже воздышем, 
воздух сей есть: вдышем же сей, не иного ради 
чего, точию сердца ради? сие бо жизни есть 
виновно, и теплоты телу. Привлекает убо сердце 
дух, да свою теплоту вон издыханием испустит, 
себе же благорастворение подаст: виновно же таковаго 
строения, или паче служитель, есть легкое, еже 
редко создано бывши, яко некий мех безтяжестно 
вводит и изводит обдержащий дух. Тако убо 
сердце хладное духа влекущи, теплое же изпущающи, 
чин, егоже ради бысть устроено к составлению 
животнаго, соблюдает непреступно. Ты убо сед в 
келлии безмолвне, и собрав ум твой, введи 
оной в ноздреный путь, идеже дух сей входит в 
сердце, и порей подвижи его, и принуди вкупе 
снити со вдыхаемым (с. 394) духом в сердце: вшедшу 
же ему тамо, не ктому не весела, ниже не радостна 
будет ти, яже по сих, но якоже некий муж, от 
дому своего быв отшелец, по внегда возвратится, не 
весть что и сотворится от радости, яко сподобися 
к чадом и к жене приити: тако и ум, по 
внегда с душею соединится, исполняется неизреченныя 
сладости и веселия. Темже, брате, обыкнути сотвори 
ум не скоро отонуду исходити: вельми бо в 
начале унывает от созатворения и утеснения 
внутренних: по внегда же обыкнет, не ктому во 
внешних ститаниих пребывает: царствие бо Божие 
внутрь нас есть, еже тамо обзирающему, и 
чистою молитвою сего взыскующему, вся внешняя мерзка 
быти мнятся и ненавистна. И по малех: подобает же 
тебе сие уразумети, яко тамо уму твоему 
сущу не достоит молчати, и праздну быти, но даждь 
ему сие: Господи Иисусе Христе Сыне Божий, помилуй мя! 
и да непрестанно дело имать и поучение, и 
никогдаже от сего да престает. Сие бо нерасточен 
содержа ум, неята показует его, и 
неприкосновенна вражиими прилоги, и в Божественное 
желание и любовь на всяк день возводит. И сия 
убо блаженный сей отец, намерение имея 
предваряющее, да некако действуему сему 
естественному художеству, возвратится ум от 
обычнаго обхождения и пленения и скитания ко 
вниманию, и вниманием возвратится к себе, и тако 
с молитвою соединится, и да оттоле в сердце 
сходит с самою тою, сиречь, молитвою, и в нем 
пребывает. Якоже и ин некто от Богомудрых, 
аки приистолкуя предызложенное употребление, 
яко во искусе таковаго Священнаго делания быв, 
сия глаголет. 

Глава 20. 

%(О естественнем чрез вдыхание ноздренуое 
художестве, и с ним Господа Иисуса Христа призывании. 
%)

Подобает и сие ученолюбивому явно сотворити, 
яко аще ум наш во входе духа, вкупе с 
ним сходити изучим: (с. 395) тогда совершенно 
уразумеем, яко сходя ум, не первее сие 
начинает, прежде даже всякий отвергнет помысл, и 
единствен и наг будет, ни единыя иныя памяти 
емляся, точию призывания Господа нашего Иисуса Христа. 
Напротив же, отонуду исходя и на внешняя идый, 
и не хотя разделяется на многочастную память. 

Глава 21. 

%(Яко и Божественный златоуст, якоже и инии от 
древних святых отец, во Христе Иисусе Господе 
нашем молитися определяет внутрь сердца, и сию 
глаголати молитву: Господи Иисусе Христе Сыне Божий, 
помилуй мя!%)

Глаголет же и великий златоуст: молю вас братие, 
правило молитвы сея никогдаже престати да сотворите, 
или презрите. И помале: должен есть инок, 
аще яст, аще пиет, аще седит, аще служит, 
аще путешествует, аще ино что творит: 
непрестанно вопити то: Господи Иисусе Христе Сыне Божий, 
помилуй мя! И помале: да имя Господа Иисуса, сходящее 
во глубину сердца, смирит змия содержащаго пажити, 
душу же спасет и оживотворит. Непрестанно убо 
пребуди во имени Господа Иисуса, яко да поглотит 
сердце Господа, и Господь сердце, и да будета два сия во 
едино. И паки: не отлучайте от Бога сердца вашего, 
но потерпевайте и храните е всегда с памятию Господа 
нашего Иисуса Христа, дондеже внутрь в сердце 
водрузится имя Господне, и ничтоже ино помышляйте, 
точию яко да возвеличится в вас Христос.

Глава 22.

%(Еще о памяти Иисусовой, чрез вдыхание ноздренное, 
со вниманием внутрь сердца. %)

Пишет же и лествичник: Иисусова память да соединится 
с дыханием твоим, и тогда познаеши безмолвия 
пользу (от 27 степени). И святый исихий: аще 
убо воистинну одеяти (с. 396) в студ помыслы 
хощеши, и безмолствовати благодушно, и со 
удобностию трезвитися сердцем: Иисусова молитва да 
соединится в дыхание твое и в ноздри, и в малех 
днех совершающееся сие узриши (глава 182).

Глава 23. 

%(Яко хотящему умне трезвитися, и паче же 
новоначальному подобает сидети, во время молитвы, в 
безмолвней и несветлей храмине, за еже сице 
уму и мысли естественне некако от части 
собиратися. %)

Темже к показанным, якоже свыше сущим, и от 
великих святых отец предузаконенным по 
простертым нами свидетельствам, о еже чрез 
вдыхание ноздренное, и внутрь сердца в Господе нашем 
Иисусе Христе Сыне Божии, и во святем его и 
Спасительном имени молитися, поучатися и трезвитися, 
и от него искати нам милости, прилагается и сие: 
еже в безмолвне, и присно, паче же во 
уставленное время молитвы, еще же и в несветле 
угле сидети прилежащему трезвитися умне в 
сердце, и паче же новоначальному, якоже бывшии во 
искусе таковаго всеблаженнейшаго делания 
Божественнии отцы и учителие тайно научают и 
заповедают. Зане видение и зрение очес на 
зримая и видимая виновна бывают естественне 
развлечения и разделения мысли, и еже стужаемей 
быти ей и расточатися: затворенней же и ей 
бывшей, якоже глаголася, в безмолвней и темней 
храмине, и та от парения и от того, елико от 
зрения и видения различествовати, престает: тако 
убо и ум, хотя и не хотя от части 
утишатися, и к себе собиратися обыче, якоже 
глаголет великий василий: ум не расточаемь на 
внешняя, ниже от чувств на мир разливаемь, к 
себе возвращается.

(с. 397)

Глава 24. 

%(Яко прежде всех непарение даруется уму 
Господем нашим Иисусом Христом, и святаго его 
имене с верою в сердце призыванием: помоществует 
же некако и естественное художество в сердце 
чрез вдыхание ноздренное, и сидение в безмолвне и 
несветле месте, и подобная. %)

И прежде убо сих, паче же прежде всех таковый 
умом исправляется подвиг приходящею помощию 
Божественныя благодати от единопомысленнаго, 
сердечнаго, чистаго и непарительнаго с верою Господа 
нашего Иисуса Христа призывания, а не простым 
единым предызложенным естественным 
художеством, чрез ноздренное вдыхание, или в 
безмолвне и темне месте сидение, да не будет. 
Таковая бо Божественными отцы из_обретошася, не 
иного ради чего, разве точию, яко некая пособия 
к собранию мысли, и от обычнаго парения к самой 
себе возвращению и вниманию, якоже предрекохом. 
От нихже раждается, и еже выну и чисте и 
непарительне уму молитися, якоже глаголет святый 
нил: яко внимание молитвы ищя, молитву обрящет: 
молитва бо вниманию последует множае, ниже ино 
что, о немже тщатися подобает. И о сем речеся 
доселе. Ты же чадо, хотяй живот, и любяй дни 
видети благи, и жити в теле яко безтелесен, 
под правилом и весом живи таковым. 

Глава 25. 

%(Како подобает преходити разстояние от вечера до 
утрени безмолвствующему, и начало пространнейшаго 
учения. %)

Солнцу заходящу, призвав в помощь преблагаго и 
всесильнаго Господа Иисуса Христа, сяди на стульце в 
келлии безмолвней (с. 398) и несветлей, и собрав 
ум твой от внешняго обычнаго обхождения, и 
окрест скитания, и внутрь сердца пореяв тихо 
чрез вдыхание ноздренное, держи молитву, сиречь: 
Господи Иисусе Христе Сыне Божий, помилуй мя! купно с 
дыханием совводя соединенне некако и глаголы 
молитвы, якоже глаголет святый исихий: со 
вдыханием твоим ноздренным трезвение соедини, и 
Иисусово имя, и незабвенное поучение смерти, и 
смирение: обоя бо пользовати ведят (глава 159.) С 
молитвою же и иными тебе реченными имей и память 
суда, и воздаяния благих и злых деяний, и 
совершенне от души вменяй себе паче всех 
человек грешнейша, и самых бесов сквернейша, 
потом и яко имаши вечне мучитися: и в 
каковом либо помысле от сказанных приидет ти 
умиление и плачь, и слезы, во онем прочее и 
пребывай, дондеже сами сии прейдут. Аще же еще не 
сподобился еси дарования слез, подвигнися и 
помолися смиренным мудрованием, да стяжеши сия: сими 
бо от страстей и скверн очищаемся, благих же и 
спасительных причастницы бываем, якоже лествичник 
глаголет: якоже огнь потребляет тростие, тако 
чистая слеза всякия скверны видимыя и помышляемыя 
(от 7 степени). И ин отец: хотяй погубити 
злобы, плачем погубляет я: и хотяй стяжати 
добродетели, плачем стяжевает я. И аще не 
имаши умиления, веждь, яко тщеславие имаши: 
сие бо не оставляет душу умилитися. Аще же бы не 
пришли слезы, седи внимая в сих помыслех, и с 
молитвою час един: таже востав, пой со 
вниманием малое повечерие: и паки сед держи 
молитву, елика ти есть сила, чисте и 
непарительне, сиречь, кроме попечения и помысла 
каковаголибо и яковаголибо мечтания со многим 
трезвением полчаса, по реченному: кроме неподобнаго 
дыхания и пищи, вне иных помысл, в молитве 
буди, аще хощеши с единым быти умом. Таже 
знаменав себе знамением честнаго и животворящаго 
Креста, подобне и твой одр, и на нем сед, и 
в мысль твою пришед о будущих наслаждениих,(с. 
399) глаголем, и мучениих: о прехождении же и 
прелести привременных, еще же и о внезапнем и 
общем долзе, сиречь о смерти, и о еже по 
кончине, и прежде кончины страшнем словоистязании, 
и о согрешенных тобою по всему, якоже мощно 
вкратце воспомянув, и о сих отпущения тепле 
просив, со известноиспытанием себе словоистязав, 
како прешедший день прешел еси, возлег, держа и 
молитву по глаголу: Иисусова память вкупе да спит с 
тобою: усни часов пять или шесть, паче же по 
разстоянию нощи усни и ты умеренно.

Глава 26.

Како подобает время от утрени даже утрия 
преходити. 

От сна же возбудившися, и Бога славословив, и паки 
того на твое заступление призвав, начни первее 
дело первое, сиречь, молитися в сердце чисто и 
непарительно до часа единаго: тогда бо наимножайше 
некаго ум есть тих и немятежен. Сего ради 
нам и заповедано есть, первая и изрядная в 
жертву приносити Богови, сиречь первомыслие, елико 
мощно, возводити неуклонно сердечною чистою молитвою 
к Господу нашему Иисусу Христу. Глаголет бо святый нил: 
сей молитву навершает, иже присно совершенно свое 
первомыслие Богови плодоносит (гл. 126). По сих же 
пой полунощницу. Аще же еще в совершеннейшем 
безмолвии неутвержден сый, и сего ради не можеши, 
якоже рекохом, начати е, или может быть и 
иныя ради вины, якоже множицею обыче приключатися 
еще в таковом делании сущим новоначальным, 
еще же аще редце и предуспевающим, и не у 
совершенства достигшим: совершеннии бо вся могут о 
укрепляющем их Христе. Обаче ты востав от 
сна, и елико имаши силу, трезвенно пой первее 
полунощницу со всяким вниманием и разумом. Таже 
сед помолися (с. 400) чисте и непарительне в 
сердце, якоже показася, час един, паче же 
якоже податель благих тебе подаст. Глаголет бо 
лествичник: нощию убо наимножайше вдавай себе 
молитве, мало же _псалмопению: во дни же паки 
уготовляйся по твоей силе (от 27 степени). Аще 
же и сице подвизався еще нерадиши и унываеши, и 
ум возмущаемь имаши от случая некоего, востав 
побуждайся, якоже веси, держася молитвы: таже 
сед, потщися помолитися, якоже преднаписася, 
присно прилежа, да чистою молитвою с чистым Богом 
беседуеши. Таже востав пой разумно шесто_псалмие, 
пятдесятый _псалом и канон, яков хощеши. Таже 
сед и бодрствуя, чисте помолися полчаса: и паки 
востав, пой хвалитны, обычное славословие, первый 
час, и по сих сотвори отпуст: на толикую же 
высоту да произносятся глаголемая устнама твоима, 
яко точию быти слышна твоима ушима, зане плоды 
устен Богу приносити повелено нам есть от 
всея души и мысли, благодаря человеколюбивому и 
попечителю премудрому, Богу нашему, по безконечной 
своей милости нас сподобльшему удобь прейти 
пучину прешедшия нощи, и увидети настоящаго дне 
светлое поприще: и тепле такожде умоляя, да 
дарует нам претещи неволнуемо бесов и страстей 
мрачную и свирепую бурю, и помиловати нас. 

Глава 27.

%(Како подобает жительствовати от утрия до 
обеда. %)

Паки же от утрия до обеда, по возможности твоей, 
весь всего себе возложив всему Богу, и сему 
помолився в сердце сокрушенне и смиренне помощи 
тебе немощну, и унылу, и безпроизвольну сущу, 
прейди в молитве чисте, сердечне и непарительне, 
и во чтении. Стоя убо чтый уставленное тебе 
от _псалтиря, апостола и святаго евангелиа, подобне 
твори (с. 401) и в молитвах, яже ко Господу нашему 
Иисусу Христу, и яже ко пресвятей Богородице: седя же на 
прочиих чтениих святых писаний. По сих же пой 
разумно обычныя часы, иже от учителей церкве 
вельми премудре уставишася, всею силою души 
отмещя праздность, яко учительницу всякия злобы, 
и со страстьми и вины их, аще мнятся и малыя 
некия быти, и невредительны видятся.

Глава 28.

%(О сохранении от праздности, и яко церковное 
предание нужно есть блюсти и безмолвствующему. %)

Якоже святый исаак глаголет: охраняйтеся, _о 
возлюбленнии! от праздности: занеже сокровенна есть 
в ней уведена смерть: понеже без тоя в руки 
тщащихся пленити инока впадати несть возможно (от 
71 слова). Не о _псалмех в день он оскудит 
нас Бог, ниже о праздности молитвы, но зане сих 
оставлением вход бывает бесовом. Внегда бо 
обрящут место и внидут, и затворят двери 
очес наших, тогда исполнят на нас делателех 
своих мучительски и нечисте со отмщением 
лютейшим они, яже под Божественным 
изречением содержат. И бываем подвластни 
оставления ради малых сих, яже Христа ради 
попечения сподобляются, якоже писано есть от 
премудрейших: не повинуяй воли своея Богу, повинется 
сопернику своему. Темже сия мала тебе мнимая быти, 
возмнятся быти противу пленяющих нас, аки стены 
тебе: ихже совершение внутрь келлии держащими чин 
церкве премудре уставися духом откровения к 
хранению нашего живота: ихже оставление от 
немудрых за мало вменяется, и тщету происходящую от 
оставления оных, не вменяющих. Сих же и начало 
пути и среда, вольность есть ненаказанна, яже 
есть мати страстей. Лучше бо есть подвизатися не 
(с. 402) оставити малая сия, нежели в распространении 
их место дати греху. Рабство бо сея безвременныя 
свободы, есть жестокий конец. И паки: _о коль 
вины страстей суть сладки! зане страсти убо 
овогда может кто отсещи, и во удалении от 
них утишавается, и веселится, внегда преставати 
им: обаче вин их оставити не может. Сего 
ради и не хотяще искушаеми бываем. И о страстех 
убо скорбим: винам же пребывати в нас любим. 
Грехов не желаем, вины же, приносящия нам тыя, со 
сладостию приемлем. Сего ради действа первых 
виновны бывают вторыя. Любяй вины страстей, 
подвластен есть неволею, и не хотя поработися 
страстем. Ненавидяй своя грехи, престанет от них: 
и исповедуяй тыя, получит оставление. Не мощно же 
кому навыкновение оставити греха, прежде даже не 
стяжет с ним вражду, и оставление получити, 
прежде исповедания согрешений: зане оно убо 
смирения истинна есть виновно, сие же умиления, 
от срама последующаго сердцу. И паки: несть грех 
непрощаемь, точию непокаянный (от 2 слова) Но о сих 
убо довольне. Ты же, по пении реченных часов, 
яждь, держа и молитву во время пищи, да сице 
творя, приидеши в навыкновение, силою благодати 
молитися непрестанно, по заповеди. Но слово о пищи, 
содержащей тело неизреченною премудростию создавшаго, 
мало да пождет: слово же о пищи, составляющей и 
животворящей душу, да предначнется, яже есть, по 
слову святых отец, священная и Боготворная 
молитва. И вельми праведне: зане душа честнейша 
есть телесе.

Глава 29. 

%(Еще о молитве, и яко подобает молитися 
присно.%)

Якоже сие тело наше, не присутствующей души, 
мертво

есть и злосмрадно: тако и душа не подвижущи себе 
на молитву, (с. 403) мертва есть и окаянна, и 
злосмрадна. И яко горчайше всякия смерти вменяти 
подобает то, еже лишитися молитвы, учит нас 
добре великий даниил пророк, умрети паче 
произволяя, нежели во мгновении часа лишитися молитвы 
(глава 9). Еще учит нас добре Божественный 
златоуст: всяк моляйся, с Богом беседует. Коль же 
велие есть человеку сущу, с Богом беседовати, 
всяк знает: честь же представити никто не возможет: 
сия бо честь великолепие и ангелов превосходит. 
Еще: молитва есть общее дело ангел вкупе. 
и человек, и несть среднее ничтоже между 
единым и другим естеством елико к молитве. 
Сия тя разделяет от безсловесных, сия тя 
совокупляет ангелом. И скоро всяк преселится в 
жительство онех, в житие же и пребывание, и 
честь, и благородие, и премудрость, и разум, тщайся 
упражнятися во всем житии в молитвах и службе 
Божии. Еще: егда увидит диавол душу 
огражденну добродетельми, не смеет приити близ 
ея, бояся крепости и силы, юже подают молитвы, 
множае питающе душу, нежели тело брашна. Еще: 
жилы душевныя суть молитвы: якоже бо тело жилами 
содержится, и вкупе движится, и стоит, и живет, 
и утвержденно есть: аще же сия кто изсечет, 
все составление телесе разрушает: тако и души 
святыми молитвами утверждаются и стоят, и 
подвигом благочестия удобь текут. Аще же молитвы 
лишиши себе, тожде твориши, якоже бы рыбу из 
воды изнесл еси. Якоже бо оней живот есть 
вода, тако тебе молитва. Сею мощно есть сквозе 
воздух, яко сквозе воду, возлетети, и на небеса 
взыти, и близ Бога быти. Еще: молитва и моление 
храмы Божия, человеки соделовает. И якоже злато 
и камения многоценны и мармари творят домы 
царския, тако и молитва человеки, храмы Христовы. Кая 
убо могла бы быти больша похвала молитвы, точно 
яко храмы соделовает Божия, и егоже не вмещают 
небеса, сей в душу входит живущую в молитвах. 
Еще: и отонуду возможет всяк уведети силу 
святых молитв, (с. 404) яко павел сквозе всю 
вселенную, яко крылат текий, и во узилищи 
живяй, и биения терпя, и нося веригу, и живяй в 
крови и бедах, и бесы изгоняя, и мертвых 
воскрешая, и утоляя недуги, ни на едино от сих 
надеяся о спасении человек, но молитвами ограждаше 
душу, и по знамениих и воскрешении мертвых, на 
молитвы течаше, якоже некий подвижник на борьбу 
венца. Ибо и воскрешения мертвых, и иных всех 
молитва бе подательница. Юже бо в древесех 
крепость имут воды, сию в житии святых, молитвы. 
Еще: молитва есть вина спасения, безсмертия 
виновна, церкве стена тверда, стражбище некрадомо, 
страшное бесовом, спасительное же нам 
благочестивым. Еще: якоже некоей царице вшедшей 
в некий град, всякому богатству споследовати 
должно: тако убо и молитве в душу вшедшей, 
всяка добродетель совходит. Еще: еже есть 
основание в дому, сие в души молитва: и подобает 
сию первую, якоже основание и корень в души 
водрузившим, приназидати тщательне и целомудрие, и 
промышление о нищих, и вся законы Христовы. Еще: 
свет ума и души есть молитва, яже со 
тщанием, свет неугасимь и всегдашний. Сего ради 
безчисленныя плевелы помыслов вмещет в помышления 
наша лукавый, и яже никогдаже помыслихом, сия 
собирая во время молитвы, лиет на душу нашу. Еще: 
велико оружие есть молитва, велико утверждение. 
И Богослов: подобает поминати Бога множае, нежели 
воздышествовати. И паки: частее помышляй Бога, нежели 
воздыши. И святый исаак: без молитвы непрестанныя 
приближитися к Богу не можеши, и по труде 
молитвеннем сотворити уму ино попечение, 
расточение мысли соделовает. И: всяка молитва, в 
нейже не утрудится тело, и в нейже не 
утеснится сердце, изверг вменяется: без души 
бо есть оная молитва (от 28 степени). И 
лествичник: молитва есть, по качеству своему, 
сопребывание и соединение человека с Богом: по 
действу же, мира состояние, Божие примирение, слез 
мати и паки дщерь, грехов (с. 405) очищение, 
искушений мост, скорбей средостение, браней 
сокрушение, ангельское дело, безплотных всех 
пища, будущее веселие, безконечное делание, 
добродетелей источник, дарований вина, 
предуспеяние невидимое, пища души, ума 
просвещение, отчаянию секира, упования 
утверждение, печали избавление, богатство иноков, 
безмолвников сокровище, ярости умаление, зерцало 
предуспеяния, умеренности явление, устроения 
показание, будущих откровение, славы знамение. 
Молитва есть истинно молящемуся судилище и 
истязалище, и судище Господне прежде будущаго судища, 
и паки: ничтоже ино есть молитва, разве точию 
мира видимаго и невидимаго отчуждение. И святый 
нил: аще помолитися желаеши, отрекися всех, да 
все наследиши. Еще: молитва есть восхождение 
ума ко Богу. Еще: молитва есть беседа ума 
ко Богу. Еще: якоже хлеб пища есть телеси, и 
добродетель души: сице и духовная молитва пища 
есть уму. И сия убо сице изложихом. 
Благовременно же есть ныне и о телеснем 
уставопищии, по мере, количеству и качеству сего, 
изложити вкратце по силе. 

Глава 30.

%(О телеснем уставопищии, сиречь како 
безмолвствующему подобает питатися. %)

Писано есть: сыне человечь, весом хлеб твой 
снеси, и воду мерою пити будеши.{Иезек. гл. 4, ст. 
10 и 11.} Яко сими довольне подвизающийся по 
Бозе может преживати. Аще бо не даси, по глаголющему 
из отцев, кровь, не приимеши Духа. Глаголет же 
и великий павел: умерщвляю тело мое и 
порабощаю, да не како иным проповедуя, сам 
неключимь буду.{1 Кор. гл. 9, ст. 27.} И Божественный 
давид: колена моя изнемогоста от поста, и плоть 
моя изменися елеа (с. 406) ради.{Псал. 108, ст. 
24.} И Богослов: ничимже тако от всех, яко 
злостраданием Бог почитаемь бывает, и слезам 
человеколюбие воздается. И святый исаак: Якоже 
мати печется о чаде: тако и Христос печется о 
теле злостраждущаго, и близ есть телеси его 
выну. И паки: во чреве насыщенне, разума таин 
Божиих несть (от 58 слова). И якоже последуют 
слезами сеющим рукояти радования: тако последует 
радость Бога ради злостраданию. И: блажен заградивый 
себе от всякаго сладострастия, разлучающаго его от 
создавшаго и (от начала 75 слова). И паки: во 
мнозе времени искушаемь десными и шуиими, и сам 
себе искусив двема сима образы множицею, и 
приемь от сопротивных раны безчисленны, и 
сподобився великих заступлений сокровенно, приях в 
себе искус от долгих лет времени, и искусом 
и благодатию Божиею сия уразумех, яко 
основание всех благих, и воззвание души от 
пленения вражия, и путь к свету оному и животу 
ведущий, суть два образа: еже собрати себе во 
едино место, и еже присно поститися, сиречь, 
правило уставити себе в воздержании чрева 
премудре и разумне, в недвижне седалищи и 
непрестанне упражнении, и поучении Божии. Отсюду 
бывает повиновение чувств, отсюду трезвение 
ума, отсюду свирепыя страсти укрощаются, 
движимыя в телеси, отсюду кротость помыслов, 
отсюду светлая мысли движения, отсюду тщание к 
Божественным делом добродетели, отсюду высокая 
разумения и тонкая, отсюду безмерныя слезы, во 
всяко время бывающия, и смерти память, отсюду 
целомудрие оно чистое, совершенне отстоящее от 
всякаго мечтания искушающаго мысль, отсюду 
быстрозрение, и острота уразумения далече 
сущих, отсюду глубочайшая таинственная разумения, 
яже мысль постизает силою Божественных словес, и 
внутреннейшая движения бывающая в души, и 
различие, и разсуждение духов от святых сил, и 
истинных зрений от суетных мечтаний. Отсюду 
страх (с. 407) он путей и стезь, иже в пучине 
мысли, отсецающий уныние и нерадение, и пламень 
ревности, попирающий всяку беду, и преходящий всяк 
страх, и горячесть она презирающая всяку похоть, 
и от мысли та изглаждающая, и забвение сотворяющая 
всякия памяти преходящих со иными: и да вкратце 
реку, отсюду свобода истиннаго человека, и радость 
души и воскресение, и со Христом упокоение в 
царствии небеснем. Аще ли же кто вознерадит о 
двою сею: то да весть, яко не точию от всех 
сих предреченных оттщетевает себе, но и 
основание всех добродетелей колеблет презрением 
двух сих добродетелей. И якоже суть сия начало 
и глава Божественнаго делания в души, и дверь и 
путь ко Христу, аще кто удержит тыя, и в них 
претерпит: тако аще кто и отидет от них, и 
отскочит от них, к сима двема сопротивныма сим 
достизает: глаголю же, еже парити телом, и 
чревобеситися беззаконно, и прочая. И во иных: 
(святаго исаака от 60 слова) и иже убо в 
началех своих уныли и слаби суть, не токмо от 
подвиг сих и таковых, но и от шума листвия 
древеснаго страшатся и смущаются, и от малыя нужды, 
яже от потребы глада, и от малыя немощи 
побеждаются, и отметаются, и вспять возвращаются: 
истиннии же и искуснии ниже от травы зелий 
насыщаются, ниже питающеся кореньми былий сухих, 
прежде узаконеннаго часа пищи приемлют чесого 
вкусити: но и низу возлегают, во изнеможении суще и 
подвизе телесе, и тупо зрят очи их от 
зельнаго озлобления телесе: аще ли же от таковыя 
нужды приближатся и к изшествию от тела, ниже 
тако согласуются побеждени быти, и пасти от 
крепкаго их произволения. Вожделевают бо и 
желают, еже понудити себе любви ради Божия, и 
трудитися о добродетели изволяют, нежели 
привременную жизнь имети, и всякий покой сущий в 
ней. И егда найдут на них искушения, паче 
веселятся, зане теми совершени бывают. И ниже от 
злострадательных трудов, бывающих в них, 
сумневаются в любви Божией: но дондеже отидут (с. 
408) от жизни, усердствуют доблественне прияти 
стужения, и не отступают, зане теми совершени 
бывают. В сих и таковых убо и мы ходяще, 
еще же и повелевающему, путем царским ходи, да не 
уклоняешися на десно, или на лево, повинующеся, и 
устав излагаем тебе, и правило средства, иже 
прочее сей имать и предел. 

Глава 31. 

%(Како подобает в понедельник, среду и пяток, 
питатися подвизающемуся.%)

В три дни седмицы, сиречь, понедельник, среду и 
пяток, твори всегда девятицу, сиречь, яждь 
единою днем, причащаяся хлеба онгий шесть [три 
осмухи фунта] и от (с. 409) сухия пищи с 
воздержанием от довольства, и воды до триех или 
четырех чаш, аще хощеши, последуя шестьдесят 
девятому правилу святых апостол, узаконяющему: 
аще который епискп или пресвитер, или диакон, 
или чтец и певец, святую четыредесятницу пасхи не 
постится, или среду и пяток, да извергается, 
разве аще бы немощию телесною возбраняемь был. 
Аще же простолюдин будет, да отлучается (правило 
святых апостол 69). Понедельник же послежде 
Божественными отцы правильне уставися. 

Глава 32.

%(Како подобает питатися во вторник и четверток.%)

В два же паки дни, сиречь, во вторник и 
четверток, дважды яждь днем: во время убо 
обеда питаяся от хлеба шестьми онгиями, от 
варения с воздержанием, и ничесого от сухия пищи 
причащаяся, и вина смешена с водою аще требуеши, 
до триех чаш или четырех: в вечер же вкушая 
хлеба онгий три, и ничесого от сухия пищи, или 
некоего овощия, вина же с водою едину чашу, 
или много две, жажде мнозей одержащей тя. Зело 
бо содействует жажда и во слезах, сожителя имуща 
и бдение, якоже глаголет лествичник: жажда и 
бдение согнетоша сердце, сердцу же угнетену 
бывшу, истекоша воды. И святый исаак: Бога ради 
вжажди, да тя наполнит любве своея. Аще же и во 
два сия дни произволяеши единою ясти, добрейше 
содееши. Понеже воздержание есть первое, мати, и 
корень, и источник, и основание всех добрых. 
Глаголет же некто и от внешних: избери житие 
добрейше, сладким же оное навыкновение сотворит. 
И великий василий: идеже есть произволение, тамо 
возбраняющее ничтоже есть. И ин от Богоносных: 
начало плодоносия цвет, и начало деятельныя 
добродетели воздержание. Но сия убо, может быть, 
и сим последующая возмнятся некиим неудобна, 
еще же, может быть, и невозможна. Разсмотреваяй же 
процветающее от сих приплодие, и коль велику славу 
израждати обыкоша, взираяй, удобна сия судити 
имать, и помощию Господа нашего Иисуса Христа, и 
своим по силе тщанием, удобнейша и словесы и 
делы проповесть, и утверждение сих запечатлети 
имать. Глаголет бо святый исаак: хлеб простый от 
трапезы чистаго, очищает душу ядущаго от всякия 
страсти: и от трапезы постящихся и бдящих и 
трудящихся о Господе, приими себе врачьбу жизни, и 
воздвигни души твоея умерщвление: зане возлюбленный 
возлеже посреде их, освящая брашна, и горесть 
озлобления их прелагает в сладость свою 
неисповедимую, духовнии же и небеснии служители его 
осеняют их (от 8 слова). И, брашна их свята, 
и воня подвижника сладчайша, и сретение его 
веселит сердца разсудительных. И, прелюбезно Богу 
пребывание воздержника. 

(с. 410) 

Глава 33. 

%(Како подобает питатися в субботу, и о бдениих, 
и како подобает ясти во время оных. %)

Во всякую же субботу, кроме великия, подобает ти 
дважды ясти, якоже предуставися во вторник и 
четверток, и по пределу священных правил, и зане 
подобает тебе во всех всего лета неделях, 
кроме сырныя, имети бдения. Аще ли прилучается 
некое бдение Владычних великих праздник, или 
некоего от великих святых, да сотворив оно, 
оставиши недельное. Обаче аще и сице есть, 
дважды яждь в субботы. Полезно же есть присно 
понуждатися тебе на делание нощнаго бдения. Темже 
и с нашедшим по случаю между седмицею бдением, 
полезнейше ти есть, творити и недельное, и велие 
тебе приобретение последовати имать скорейше: 
паче же сице разверзется рано свет твой, по 
реченному, и исцеления твоя скоро 
возсияют.{Исаии гл. 58, ст. 8.} Глаголет же и 
святый исаак: коемуждо подвигу противу греха и 
похоти, начало есть труд бдения и поста, и паче 
же противоподвизающемуся к сущему внутрь нас греху. 
И знамение ненависти греха и похоти его от сего 
зрится в сопротивоподвизающихся к невидимой рати сей: 
и все почти прилоги страстей уменьшатися постом 
начинают. И посем бдение нощное споспешествует к 
подвигу. Иже во всем животе своем сочетание 
супружества сего любит, сей друг целомудрию 
бывает. Якоже покой чрева начало всех зол, и 
разслабление сна возжизающее похоть блуда: тако пост 
и бдение и бодрость в службе Божией, есть путь 
Божий святый, и всякия добродетели основание. И 
паки: душе облиставшейся памятию Божиею, и 
неусыпным бдением нощь и день, тамо (с. 411) 
созидает Господь на тверди ея облак покрывающ ю 
во дни, и светом огненным озарит нощь, и 
извнутрь мрака ея свет возсияет. Еще: избери 
себе делание наслаждения бдение всегдашнее, еже 
в нощех, имже совлекошася вси отцы ветхаго 
человека, и сподобишася обновления ума. В 
часех сих ощущает душа живот оный 
безсмертный, и во ощущении онаго совлекается тьмы 
страстей, и приемлет Духа святаго. И паки: почти 
делание бдения, да обрящеши утешение в души 
твоей. Еще: да не возмниши, _о человече, яко во 
всяком делании иночестем есть некое пребывание 
больше нощнаго бдения. И инока пребывающа во 
бдении, с разсуждением ума, сего да не зриши 
яко плотоносна: чина бо ангельскаго, яко 
воистинну есть дело сие. Еще: душа, в сем 
ангельстем пребывании бдения трудящаяся, очи 
херувимсте имети будет, еже выну зрети и 
смотрети небесное видение. Сия же, сиречь, бдения 
да совершаеши в молитве, пении и чтении чисте и 
непарительне, и со умилением, един или с 
любезным и единомысленным братством. Твори же и 
по всяком бдении твоем малое утешение труда 
ради, от бдения бывшаго, во брашнех же и питиих 
на вечери: сиречь, яждь хлеб онгий три, и 
предложение некое сухопищно, елико ти довольно 
есть. Пий и вина с водою чаши три. Зри же, да не 
како в день девятицы имея бдение, ради бдения 
может быть разрешиши девятицу. Ибо сие подобает 
сотворити, и оно не оставляти: утешение бо по 
совершении бдения устави слово сие, творити 
тебе. 

Глава 34. 

Како подобает ясти в недели, и о иных 
некиих: еще же о труде и смирении.

Подобне же и во вся недели дважды яждь днем, 
якоже и в субботы. Сие же установление сице 
цело да блюдется (с. 412) кроме немощи, еще же и 
во дни аки позволенныя и разрешенныя Божественными 
отцы от долговременнаго навыкновения, и неких 
новейших вин, Божественных глаголем, или и 
сопротивных. В сия бо ниже единою ямы, ниже 
сухую пищу ямы, но от всех потребных и 
незазорных, яко зелий вкушаем, обаче с 
воздержанием и со уставленным количеством. Присно 
бо добрейше есть, еже во всех воздержаватися. В 
телесных же немощех, якоже рехом, без 
стыдения подобает причащатися от всех потребных 
и законных составляющих тело: страстоубийцами бо, а 
не телоубийцами быти Божественнии отцы научиша ны. 
Такожде подобает ти и от всех уставленных, 
сиречь, елика позволена суть чину иноческому, 
мало вкушати во славу и благодарение Божие, и ради 
некичения. Отвращайся же и излишних: скудость бо 
вещей, якоже глаголет святый исаак, учит 
человека воздержанию не хотяща и неизволяюща. Понеже 
егда изобилие и отраду приимем сих, не 
можем себе удержавати. Телесна покоя да не 
возлюбиши: душа бо любящая Бога, по преподобному паки 
исааку, в Бозе едином покой имать. Паче же с 
трудом и злостраданием, и смиренность избирай: 
труд бо и смирение, пишет некто от святых, 
стяжавают Иисуса.

Глава 35.

%(Како подобает питатися и во святыя посты, и паче 
же в великий. %)

О уставопищии же равне и о жительстве во святыя 
посты, излишно мним быти, тонкочастне и особне 
сказовати. Якоже бо пред_определися совершати тебе 
во дни, в няже твориши девятицы, тако праведно 
есть и во святыя посты делати, кроме суббот и 
недель. Паче же, аще мощно есть, и опаснее и 
трезвеннее: и наипаче же во святую и великую 
четыредесятницу, (с. 413) яко одесятствование сущую 
всего лета, и почести подвигов Владычним. и 
Божественным и светоносным днем, победителем о 
Христе Иисусе подающую. 

Глава 36.

%(О разсуждении, яко в части, и яко 
умеренному деланию цены несть, и о 
повиновении. %)

Обаче и сия и сим подобная подобает проходити 
тебе со опасным разсуждением, к согласию сугубаго 
живота и мирному устроению. С премудростию бо, 
глаголет, зиждется дом, и с разумом исполняются 
сокровища от всякаго богатства честнаго и 
добраго.{Прит. гл. 24, ст. 3 и 4.} Пишет же и 
Божественный фалассий: благоразсудная с разумом 
скудость и теснота, есть царский путь: темже 
безразсудное удручение или безсловесное 
снисхождение безполезна суть, яко обоя вне 
разума бывают. И преподобный исаак: последует 
ослабе удес помыслов изступление и смешение, 
и безмерному деланию уныние, и унынию 
изступление. Разнствует же изступление от 
изступления: зане первому изступлению последует 
брань блуда. Второму же своего безмолвия оставление, 
и от места на место прехождение: умеренному же 
и притрудне пребывающему деланию цены несть. Сих 
же уменьшение умножает сласть: безмерие же, 
изступление (от 71 слова). И великий ма_ксим: не 
все попечение твое о плоти имей, но определи 
ей по силе обучение. и весь ум на внутренняя 
преложи (4 сотни 63 глава). Телесное бо обучение 
вмале есть полезно, а благочестие на все, и 
прочая.{1 Тим. гл. 4, ст. 8.} Аще же некако чашица 
весовая плоти противовлечет и мучительствует, и 
отягчавает чашицу душевную, к преклонениям и 
движениям безчинным и душетлительным низвлекающи, 
якоже писано есть: плоть похотствует (с. 414) на 
духа, дух же на плоть:{Галат. гл. 5, ст. 17.} 
обаче ты сею броздою воздержания обуздав, 
умертви, донележе и не хотящи удобоуправляема 
будет, и повинется лучшему, помянув великаго павла 
глаголющаго: елико внешний наш человек тлеет, 
толико внутренний обновляется по вся дни.{2 Кор. гл. 
4, ст. 16.} И святаго исаака: давай сам себе 
умрети в подвизех, а не жити в нерадении. Не 
точию бо за веру, яже во Христа, приемшии смерть, 
суть мученицы, но и за соблюдение заповедей его 
умирающии. И, лучше есть нам смерть в 
подвизе, нежели пожити в прегрешении. И, прежде же 
всех с советом и вопрошением твори вся 
духовнаго твоего отца о Господе: тако бо Христовою 
благодатию и тяжелоносная и гореносная, легка, и 
яко по долу простирающемуся полю возмнятся ти 
носитися. Но возвратитися подобает, отонудуже 
изыдохом. 

Глава 37.

%(Како подобает подвизающемуся преходити, по вкушении, 
разстояние до запада солнца: и яко подобает 
веровати, по труде и мере делания нашего, 
раздаянию Божественных дарований подаваему быти нам. 
%)

И по обеде, якоже подобает подвизающемуся, по 
Божественному павлу повелевающему: яко подвизаяйся 
от всех воздержится,{1 Кор. гл. 9, ст. 25.} чти 
седя трезвительныя, наипаче отеческия списания 
довольно. И оттоле поспи час един, аще суть 
дние велицы: таже востав мало порукодельствуй, 
держя и молитву. По сих же помолися, якоже 
предуказася, почти, поучися и потщися, да смиришися, 
и да имаши себе меньша всех человек. Возносяй 
бо, глаголет, себе, смирится: смиряяй же себе, (с. 
415) вознесется.{Луки гл. 18, ст. 14.} И, мняйся 
стояти, да блюдется, да не падет.{1 Кор. гл. 10, ст. 
12.} И, Господь гордым противится, смиренным же 
дает благодать. И, начало гордости, еже не 
ведети Господа.{Прит. гл. 3, ст. 34.} И, гордии 
законопреступоваху до зела.{Псал. 118, ст. 51.} И, 
не высокая мудрствующе, но со смиренными ходяще.{Рим. 
гл. 12, ст. 16.} Глаголет же и Божественный 
златоуст: Сей наипаче есть ведый себе, иже 
ничтоже себе быти вменяет: ничтоже бо тако Богу 
любезно, яко еже с последними себе числити. И 
святый исаак: смиренномудрым открываются таинства. 
И, идеже источается смирение, тамо слава Божия 
источается. И, яко пред благодатию течет 
смирение, и пред наказанием течет возношение. И 
святый варсонофий: аще воистинну спастися хощеши, 
услыши делом: воздвигни нозе твои от земли, и 
возведи на небо ум твой, и тамо да будет 
поучение твое нощь и день, и елику имаши силу, 
презрися, подвизаяся видети себе меньша всякаго 
человека. Сей есть истинный путь, кроме сего 
инаго несть хотящему спастися о укрепляющем 
его Христе. Хотяй да течет, яко да постигнет. 
Свидетельствую пред Богом живым и хотящим жизнь 
вечную даровати всякому хотящему. И лествичник: не 
постихся, не бдех, не на земли лежах, но смирихся, 
и спасе мя Господь вскоре (от 25 степени), держя 
прежде всего инаго и невменяемость, якоже 
глаголет святый варсонофий: яко еже без 
попечения быти о всякия вещи, сотворит приближитися 
ко граду, и еже не вменитися в человецех, 
сотворит тя вселитися во граде: и еже умрети 
от всякаго человека, сотворит тя наследствовати 
град и сокровища. И аще спастися хощеши, 
невменность держи, и тецы к предлежащему. Есть же 
паки невменность, по слову ученика сего святаго 
преподобнаго иоанна, еже не сравнити себе с 
некиим, и еже не рещи о добре деле, яко и 
аз сие сотворих. Таже паки сед помолися чисте 
и непарительне, дондеже постигнет вечер, и тако 
пой обычную (с. 416) вечерню, и сотвори отпуст, 
от чиста сердца веруя, по труду и болезни, яже 
о добродетели, и по мере делания нашего, и 
раздаянию даров и почестей, и возпроповеданию и 
утешению от Бога подаятися нам, якоже глаголет 
Божественный _псалмопевец: по множеству болезней 
моих в сердце моем, утешения твоя возвеселиша 
душу мою.{Псал. 93, ст. 19.} И спаситель: приидите 
ко мне вси труждающиися и обременеинии, и аз 
упокою вы.{Матф. гл. 11, ст. 28.} И великий 
павел: понеже со Христом страждем, да и с ним 
прославимся. Непщую бо, яко недостойны страсти 
нынешняго времене к хотящей славе явитися в 
нас.{Рим. гл. 8, ст. 17 и 18.} Глаголет же и 
премудрый в Божественных ма_ксим: вина быти 
глаголется раздаяния Божественных благ мера веры 
когождо. Якоже бо веруем, таково и подаяние 
усердия к деланию имамы. Делаяй убо по 
равенству деяния, показует меру веры, приемля, 
якоже верова, меру благодати: не делаяй же по 
равенству недеяния, показует меру неверия, 
приемля, якоже не верова, лишение благодати. Темже 
зле творит завистный, завидя исправляющим, в 
его власти яве, а не во иного сущу избранию 
того, еже веровати и деяти, и по мере веры 
грядущую внутрь прияти благодать. И от души прося 
пребыти прочиему времени нашему, и самой же кончине 
живота христианстей, безболезненной, непостыдной, 
мирной, и к сим воздати нам добрый ответ, 
стоящим на страшнем судищи Господа и Бога и Спаса 
нашего Иисуса Христа. 

Глава 38.

%(Яко чистая молитва больша всякаго делания 
есть.%)

При показанном же и сие веждь, брате, яко всякое 
художество и всякое правило, аще же хощеши, и 
деяние различно, (с. 417) за еже немощи нам еще 
в сердце чисте и непарительне молитися, тако 
из_образися, и правильне уставися. Понеже сему, 
благоволением и благодатию Господа нашего Иисуса Христа, 
совершившуся, многая и различная, и разделяющая 
оставльше с единым и единственным и 
соединительным непосредственно паче слова соединяемся, 
якоже речеся славным Богословом: Бог богом 
соединяемь же и познаваемь, еже есть существенное 
святым Духом в сердце осияние, еже раждается, 
якоже речеся, от помянутыя чистыя и непарительныя 
сердечныя молитвы. Редко же есть сие, и едва 
един от тысящи есть сподобивыйся Христовою 
благодатию предуспети в сие устроение. А еже 
и сие преплыти, и духовныя сподобитися молитвы, и 
получити откровение таинств будущаго века, зело 
малех есть, и едва в родех и родех 
обретающихся, благоволением благодати, якоже 
пишет святый исаак: Якоже едва от тем 
человек един обретается исполнивый заповеди и 
законная неколико недостаточне, и достигший в 
чистоту души: тако един от тысящи обретается 
сподобивыйся доспети со многим охранением в чистую 
молитву, и расторгнути сей предел, и получити 
оное таинство. Понеже мнози чистыя молитвы никакоже 
сподобишася, но мали: к таинству же оному, еже по 
оней, и превыше доспевый, едва обретается в 
роде и роде, благодатию Христовою. И по малех: и 
аще с чистотою едва кто молится, что речем о 
духовней молитве? всякая же духовная молитва, по 
слову его паки, движения свободися, а 
преклоняющаяся под духовною есть. Темже и ты, 
аще хощеши таковых новых таинств делом и 
вещию, сиречь, самем тем искусом о Христе 
Иисусе сподобитися, во всяком времени и во всяком 
часе и делании твоем тщися достигнути, во еже 
молитися в сердце чисто и непарительно: да тако, 
яко от младенца ссуща, предуспееши в мужа 
совершенна, в меру возраста исполнения Христова, и 
с верным строителем и мудрым, блаженство и 
воспроповедание получиши, яко устроевая (с. 418) 
на суде словеса твоя, сиречь по разуму жительствуя, 
темже и не подвижешися в век.{Псал. 111, ст. 
5.} Якоже о сем пишет святый филимон сице: 
брате, аще в нощи, аще во дни сподобит тя Бог 
чисте умом помолитися наразвлеченно, да не вонмеши 
правилу своему: но елика ти есть сила, 
простирайся прилеплятися Богови, и той просветит 
сердце твое в делании духовнем. И некто от 
Богомудрых: Аще хощеши в теле, яко безтелесен 
Богу служити, молитву непрестанну стяжи тайно в 
сердце твоем, и бывает прежде смерти душа твоя 
яко ангел. Сим согласна пишет и святый исаак: 
Вопрошен бо быв от некоего, что обдержит все 
труды дела сего, сиречь безмолвия, да достигший в 
оное уразумеет, яко совершенства жительства 
достиже? отвеща сице: егда кто сподобится 
пребывания молитвы. Егда бо достигнет сего, к 
концу всех добродетелей доспе, и прочее жилище 
святаго Духа бысть. Аще бо кто благодати 
утешителевы известно не прият, пребывание сея 
молитвы совершити со отрадою не может: дух бо, 
глаголет, егда вселится в кого от человек, не 
престает от молитвы: сам бо дух присно молится. 
Тогда, ниже внегда спати ему, ниже во бдении, 
молитва сия от души сего пресецается. Но аще 
яст, аще пиет, аще и спит, аще что и 
делает, даже и во глубоце сне, благовония и пары 
молитвенныя в сердце его восходят без труда. И 
разлучения тогда молитва сия не имать: но во вся 
часы его, аще и умолкнет она внеуду его, 
но убо паки таяжде служит в нем тайно. Молчание 
бо чистых, молитву глаголет некто от Христоносных, 
понеже помыслы их Божественная движения суть, 
движения же чистаго сердца и мысли, суть гласи 
кротцы, имиже тайно тайному поют. И ини мнози от 
Богоносных от благодати самым искусом 
тайнонаучаеми суще, множайшая таковая чудесе достойная 
изложиша, яже долготы ради слова оставихом. 

(с. 419) 

Глава 39.

%(О количестве коленопреклонений в нощеденствии. %)

О количестве же коленопреклонений, триста вемы быти 
числом уставленных Божественными отцы нашими, 
яже должни есмы и творити в коеждо нощеденство 
пяти дней седмицы. Ибо во всякую субботу и всякую 
неделю, еще и во иныя от обычая означенныя 
дни, ктомуже и седмицы по неким таинственным и 
сокровенным винам престатие от сих имети 
повелено есть нам. Обаче суть нецыи 
превосходящии сие число, нецыи же и оскудевающии, 
каждый, якоже имать силу и произволение. И ты 
убо, еже по силе твори. Темже блажен 
воистинну, и блажен множицею, иже на вся, яже по 
Богу, всегда понуждает себе. Нуждно бо есть 
царствие небесное, и нуждницы восхищают е.{Матф. 
гл. 11, ст. 12.}

Глава 40.

%(Яко не токмо, якоже предречеся, по подвигу и 
мере делания нашего раздаяние Божественных даров 
подавается, но и по нраву, и приличности, и вере, 
и сущему в нас устроению естественному.%)

И сие убо ведети подобает, яко не токмо, 
якоже предрекохом, по подвигу и мере делания 
нашего раздаяние Божественных даров подавается нам, 
но и по навыкновению жительства сего, и приличности, 
еще же и по вере нашей к предлежащим, и 
приличне сущему в нас устроению естетвенному. 
И глаголет святый ма_ксим: ум, премудрости 
есть (с. 420) орудие: словесность, разума: 
естественное во обою извещение, составляемыя во 
обою веры: дарования же исцелений, естественное 
человеколюбие. Всяко бо Божественное дарование 
прилично в нас имать, и присвояемо, якоже силу, 
или навыкновение, или устроение, орудие 
приятельное. Сиречь: иже ум всяких чувственных 
мечтаний чист сотворивый, приемлет премудрость: 
словесность же, врожденных страстей, ярости, 
глаголю, и похоти, владыкою поставивый, приемлет 
разум: непоколебимое же во уме и словесности о 
Бозе извещение имеяй, приемлет веру, вся 
могущую: естественное же исправивый человеколюбие, 
по совершеннем убиении самолюбия, дарования 
исцелений приемлет, и сия убо сице. Зри же, да 
никтоже весть дело твое кроме настоятеля и 
наставляющаго тебе, моляся и о нас недостойных, 
глаголющих убо, не творящих же что благо, да 
сподобимся творити первее Богоугодная, таже и 
другим глаголати и советовати. Иже бо сотворит и 
научит, по Божественному словеси, сей велий 
наречется.{Матф. гл. 5, ст. 19.} Тебе же паки 
вседержитель, и всещедрый Господь да укрепит и 
благопоспешит, сия слышати разумно, и творити я со 
всяким желанием. Не слышателие бо закона праведни 
пред Богом, по Божественному павлу, но творцы.{Рим. 
гл. 2, ст. 13.} И да наставит на всяко дело благое 
и спасительное, и на предлежащее умное, и 
священное делание рукоповедет Духом, молитвами 
святых, аминь. Но понеже предглаголася нами о 
разсуждении мало нечто деятельнем, благовременно 
есть ныне и о всеобщем и совершеннем 
разсуждении, по силе вкратце предложити. Понеже сие 
и больше есть всех добродетелей, по 
свидетельству славных наших отцев. 

(с. 421)

Глава 41.

%(О всеобщем и совершеннейшем разсуждении, и кто 
есть противу естества, и плотски живяй: и кто по 
естеству и душевне: и кто превышше естества и 
духовне жительствуяй.%)

Плотски и противу естества живяй и жительствуяй, 
сей свою разсудительность всеконечно погуби, а иже 
злых удаление сотворивый, начало же положивый, 
еже творити благое, якоже писано есть: 
Уклонися от зла, и сотвори благо,{Псал. 33, ст. 
15.} сей яко новоначальный, и ухо прилагаяй ко 
учению, мало некако приницает к чувству некоему 
разсуждения, и новоначальну подобающему. А иже по 
естеству и душевне, яко мыслию действуяй, и по 
разуму пожив, иже и среден нарицается, сей по 
мере своей зрит и разсуждает яже о себе, и 
яже подобных себе. Превышше же естества и 
духовне жительствуяй, сей яко превозшедый 
встраственный и новоначальный и средний предел, и 
Христовою благодатию предуспевый в совершенство, 
сиречь в существенное просвещение, и совершеннейшее 
разсуждение: зрит себе и разсуждает яснейше: 
темже и всех зрит, и разсуждает чисте, а сам 
той ни от единаго, аще и зрится, зримь и 
разсуждаемь, еще же и востязуемь, яко духовен 
сый воистинну, и нарицаемь, не хартиею и чернилом, 
но деянием и благодатию, якоже глаголет 
Божественный апостол: яко Духовный востязует убо 
вся, а сам той ни от единаго востязуется.{1 Кор. 
гл. 2, ст. 15.} 

(с. 422)

Глава 42.

%(Еще о разсуждении, яко во образе.%)

От сих ов убо подобен есть, яко в нощи 
глубоцей и сумрачнем темномесячии ходящему. Темже 
и во осязаемей тьме окрест заблуждая и 
помрачаяся, не токмо самого себе не зрит и не 
разсуждает, но ниже камо идет и ходит, якоже 
глаголет Спаситель: ходяй во тьме не весть, камо 
идет.{Иоан. гл. 12, ст. 35.} Ов же подобен 
есть ходящему в нощи ведренней, звездами 
озаряемей: темже и звездными блистаниями мало 
некако озаряемь, помалу ступает, претыкая нозе 
множицею о камение неразсуждения, и терпя 
приражения. Сей убо мало нечто и самаго себе 
зрит и разсуждает, аки в сени, якоже писано 
есть: востани спяй, и воскресни от мертвых, и 
осветит тя Христос.{Ефес. гл. 5, ст. 14.} 
Ов же подобен есть ходящему в нощи вселунней 
и тихой, темже и лунным светом управляемь, 
незаблуднее шествует, и на предняя грядет: зрит 
же самаго себе, яко в зерцале, и разсуждает, и 
подобне вкупе шествующия с ним, якоже речеся: 
Добре творите, закону, сиречь, внимающе, якоже 
светилу сияющу в темнем месте, дондеже день 
озарит, и денница возсияет в сердцах ваших.{2 
Петр. гл. 1, ст. 19.} Ов же подобен есть 
ходящему в полудни постояннем и чистейшем, 
солнечными лучами ясными просвещаемем. Темже 
таковый и самого себе чисте зрит при солнечном 
свете и разсуждает, и многих востязует, паче же 
и всех, по Божественному апостолу:{2 Кор. гл. 2, ст. 
15.} еще же и вся приключающаяся в себе зрит 
яве каковалибо и каколибо, не заблудно и сам 
шествуя, и последующия ему без претыкания 
путеводя ко истинному свету, и животу, и истине, 
о нихже писано есть: (с. 423) Вы есте свет 
мира.{Матф. гл. 5, ст. 14.} Глаголет и Божественный 
павел: Бог рекий из тьмы свету возсияти, иже 
возсия в сердцах наших, к просвещению разума 
славы Божия о лице Иисус Христове.{2 Кор. гл. 4, 
ст. 6.} И блаженный давид: знаменася на нас свет 
лица твоего, Господи.{Псал. 4, ст. 7.} И, во свете 
твоем узрим свет.{Псал. 35, ст. 10.} И, 
Господь: аз есмь свет миру, ходяй по мне, не 
имать ходити во тьме, но имать свет 
животный.{Иоан. гл. 8, ст. 12.}

Глава 43.

О прелозе и изменении, еже в коемждо 
человеце, и о превосходящей славе смирения. 

Ведети тебе и сие хощем, яко и иже в 
совершенство очищением и просвещением, якоже 
имут силу, достигшии. Не бо есть совершенно 
совершение в несовершеннем веце сем, но паче не 
могущее совершено быти совершенство. И таковии убо 
не всегда с собою имут неизменность, за немощь 
естественную и за приползающее овогда возношение, 
но убо изменения и крадения ко искушению 
терпят овогда, и паки же заступления внутрь 
приемлют больша, а сопротивное же сим, часть 
волков отцы быти определяют. Непреложность бо и 
неизменность в веце будущем соблюдена есть: в 
настоящем же овогда убо чистоты, мира же и 
утешения Божественнаго есть время: овогда же 
смешения, и бури, и дряхлости. И сие же по мере 
жительства коегождо и предспеяния, и имиже весть 
Бог судьбами: еще же, да от сих и немощь нашу 
примечаем. Блажен бо, глаголет, познаваяй немощь 
свою, да не надеющеся будем на ся, по павлу, но на 
Бога возставляющаго мертвыя:{2 Кор. гл. 1, ст. 9.} и 
тако всегда со смирением и (с. 424) покаянием и 
исповеданием ко Богу возвращаемся. Глаголет бо святый 
исаак: но единой, и единой крате, коликащи 
преступают нецыи, и покаянием врачуют души своя, 
и благодать приемлет их [от 46 слова]. Во всяком 
бо словеснем естестве премена безпредельне 
проходит, и изменения преходят на всякаго 
человека, во всех его часех: от нихже многих 
обретает разсудительный, разумети сие. Но искусы, 
иже с ним, на всяк день могут паче 
упремудрити его в сих, аще трезвится: да и 
наблюдает себе во уме, и уразумеет, колико 
изменение кротости и тихости приемлет мысль на 
всяк день, и како от мира того внезапу в смущение 
обращается, егда вины некия от места несть 
ему, и како в беде велицей и неизреченней 
бывает. И сие есть, еже блаженный макарий 
написа, яве многим промыслом и тщанием, в 
память братии и учение, еже не уклонитися во 
время изменения сопротивлений во отчаяние, зане и 
в чине чистоты стоящим присно приключаются 
падения, якоже случается воздуху студеность, и 
кроме еже быти им в небрежении или в 
разрешении, не точию же, но внегда и по чину их 
шествуют, приключаются им падения сопротивляющаяся 
намерению их хотения. И ниже: что убо есть 
ныне? изменения, рече, бывают в коемждо, якоже 
и в воздусе. Разумей оно, еже есть в 
коемждо: зане и естество едино есть. Да не 
возмниши бо, яко о низших и малейших точию 
рече, а совершеннии свободни изменения, и яко в 
едином чине неуклонно стоят сии, кроме 
встрастных помысл, якоже и евхити глаголют. 
Сего ради положи сие, в коемждо. Како убо сие, 
_о макарие! обаче ты глаголеши: мраз, и помале 
зной, и подобне град, и помале ведро: и во 
обучении нашем сице бывает: рать, и заступление 
благодати, и в некое время бывает душа в бури, и 
востают на ню волны жестоки: и паки изменение 
посещающей благодати, и исполняющей сердце его 
радости и мира, иже от Бога, и помыслов (с. 425) 
целомудренных и мирных. Сия помыслы целомудрия 
изявляет зде, показуя прежде сих бывшия сущия 
скотски и нечисты, и советует глаголя: Аще убо 
по сих помыслех целомудренных и кротких 
последует нашествие, да не опечалимся и отчаемся, 
и во время покоя благодати да не похвалимся паки: но 
во время радости возчаем скорби. И проходя далее, 
глаголет: разумей, яко вси святии в сем деле 
быша. Елико есмы в мире сем, и утешение 
излишнее с сими бывает нам втайне. Занеже на 
всяк день и на всяк час, взыскуется от нас 
искус любве нашея, яже ко Богу, в борении и 
подвизе ко искушениям. И сие есть, еже не 
опечалитися нам, ни унывати в подвизе, и сице 
исправляется путь наш. Хотяй же от сих совратитися 
или уклонитися, сей часть волков есть. _о чудо 
от сего святаго! Како малым словом извествова 
употребление сие, и показа оное исполнено 
разума, и изят сумнение совершенне от мысли 
прочитающаго. Он же, глаголет, уклоняяйся от 
сих, и часть волков сый, не путем хощет 
шествовати. И сие положи в мысли своей стяжати, и 
стезею особною, непроложенною от отец шествовати 
хощет. И помале: смирение и без дел многа 
прощает согрешения: сия же кроме его, напротив 
безполезна суть. И помале: якоже соль во всякой 
пищи, тако и смирение во всякой добродетели, и 
крепость многих согрешений то может стерти. 
Прочее о сем потреба непрестанно скорбети мыслию во 
смирении и в печали разсуждения: и сие аще 
стяжем, сыны нас творит Божия, и без дел 
благих представляет Богу: занеже без сего вся 
дела наша, и вся добродетели, и вся делания 
суетна суть. Прочее, изменения мысли хощет Бог, 
и мыслию лучши бываем. Самодовольно есть сие 
едино безпомощне стояти пред Богом, и глаголати 
о нас. Еще глаголет: рече некто от святых 
егда приидет тебе помысл гордыни, глаголя тебе: 
помяни добродетели твоя, рцы: старче, зри блуд 
твой! 

(с. 426) 

Глава 44. 

%(О покаянии, чистоте и совершенстве. %)

Совершенство всякаго течения во триех сих есть: в 
покаянии, и чистоте, и совершенстве. Что же есть 
покаяние? Оставити первейшая, и печалитися о них. 
И что есть чистота вкратце? Сердце милостиво о 
всяком созданнем естестве. И что есть 
совершенство? Глубина смирения, еже есть 
оставление видимых же всех и невидимых: видимых 
убо, всех чувственных: невидимых же, мысленных, 
кроме попечения о них. Еще: покаяние есть 
сугубо умерщвление от всех волею. Сердце 
милостиво есть, горение сердца о всякой твари, о 
человецех, и птицах, и животных, и бесех, и 
о всяком создании. И паки: елико есмы в мире 
сем, и во плоти оставлени, аще даже до круга 
небеснаго вознесемся, кроме дел и труда быти 
нам, в безпопечении быти не можем: сие есть 
совершенство, прости мя. Множайшее сего есть 
поучение, сиречь без помышления. И святый ма_ксим: 
любомудрие по добродетели, произволения безстрастие, а 
не естества делати обыче: по немуже, сиречь 
безстрастию произволения, умная Божественныя 
сладости приходит благодать. И паки: иже печали и 
сласти плотския искус прият, могл бы глаголатися 
искусен, яко удобность и неудобность сущих 
дел плоти искусивый. Совершен же, иже сласть 
плоти и болезнь, силою словесства победи: всецел 
же, иже навыкновения по деянию и видению 
непреложна соблюде с крепким к Богу простертием. 
Сих убо ради, разсуждение и больше всех 
добродетелей быти определися. Яко в нихже бы 
пришло благоволением Божиим, мощно Божественным 
светом озаряемым, и Божественныя и человеческия 
разсуждати со известноиспытанием вещи, и 
таинственная и тайная видения. И сия убо (с. 
427) сице. Время же по чину мало некако, елико 
постигнути мощно, художне расположити тебе и 
пред_обещаннаго и Боготворнаго безмолвия начало, 
аки изяснительнее. Бог же да наставляет и на 
имущая отселе рещися. 

Глава 45. 

%(О пятих деланиих перваго, и аки вводительнаго 
новоначальных безмолвия, сиречь, о молитве, пении, 
чтении, поучении и рукоделии. %)

Пятьми делании, имиже Бог служимь бывает, должен 
есть в безмолвии новоначальный проходити 
нощеденствие, то есть, в молитве, сиречь в памяти 
Господа Иисуса Христа, непрестанне вводимой, якоже 
предречеся, дыханием ноздренным в сердце тихо, и 
паки сице изводимою смеженным сущим устнам, 
без иныя каковыялибо мысли и мечтания, яже 
воздержанием обдержительным чрева, глаголем, сна же 
и иных чувств, внутрь келлии со смирением 
истинным исправляется. В пении, чтении от 
Священнаго _псалтира и Божественнаго апостола, и святых 
евангелий, и писаний Богомудрых, и святых отец, 
и паче же от глав, яже о внимании, и молитве, 
и трезвении, еще же и о прочиих Божественных 
словес Духа, с приболезненною сердечною памятию 
согрешений, и размышлением суда Божия, или смерти, 
или муки, или наслаждения вечных благ, и 
подобных: и в рукоделии малом, воспящающем 
унынию, и паки возвращатися на молитву, аще и 
нужду имать дело сие, дондеже обыкнет ум 
парение свое удобь отлагати совершенным 
поучением ко Господу Иисусу Христу, и памятию 
всегдашнею, и частым приникнутием ко внутренней 
клети, сиречь, к сокровенному сердца месту, и 
укорением водруженным. Пишет бо святый исаак: 
Потщися внити в клеть, яже внутрьуду тебе, и 
узриши клеть небесную. Едина бо есть сия и 
она и обе единым (с. 428) входом узриши. 
И святый ма_ксим: сердце владычествует всем 
органом, и повнегда одержит пажити сердца 
благодать царствует над всеми помыслы и удесы: 
тамо бо есть ум и вси помыслы душевнии. Тамо 
убо подобает смотрети, аще написа благодать 
законы всесвятаго Духа. Тамо. Где? на владычественнем 
органе, на престоле благодати, идеже ум и 
вси помыслы душевнии, сиречь, на сердце. 

Глава 46. 

%(Откуду начинати подобает хотящим по разуму 
безмолвствовати, и кое есть начало, и ращение, и 
предспеяние, и совершение. %)

Сие есть делание новоначальных инок, первое и 
вводительное изволяющих по разуму безмолвствовати: 
начинающих убо от страха Божия, и исполнения по 
силе всех Боготворящих заповедей, и без 
попечения от Благословных и безсловесных дел: и 
прежде же всех от веры и всеконечнаго удаления 
от сопротивных, и к сущему воистинну чистаго 
завещания, якоже предречеся. Растущим же 
непостыдною надеждою, и предыдущим в меру 
возраста исполнения Христова, бывающим в них от 
сердечныя, чистыя и непарительныя молитвы всецелым 
Божественным и горящим рачением, и сице 
совершенным бывающим: недвижною и неуклонною 
духовною молитвою, и от совершенныя любве 
источающимся к единому единым непосредственным 
изступлением, восхищением же и соединением крайняго 
желания, еже есть непогрешительное, деянием к 
видению предспеяние и воспростертие. Еже 
восприявый и Богоотец Давид, и изменився 
Божественным воистинну изменением, вельми возопи: 
аз рех во изступлении моем: всяк человек 
ложь:{Псал. 115, ст. 2.} и ин от просиявших в 
новом завете: (с. 429) око не виде, и ухо не 
слыша, и на сердце человеку не взыдоша, яже 
уготова Бог любящим его.{1 Кор. гл. 2, ст. 9 и 
_и.} И сие заключая, наводит сие: нам же открыл 
есть Духом своим: Дух бо вся испытует, и 
глубины Божия.

Глава 47. 

%(О чине безмолвия новоначальных. %)

Новоначальный убо, якоже предрекохом, должен 
есть не часто исходити от келлии своея, беседы же 
и видения всех удалятися, разве точию за 
многую нужду, и тогда со вниманием и 
утверждением, и редце, якоже глаголет 
Божественный исаак: о всякой вещи сия память да 
пребудет в тебе, яко лучши есть помощь сия, 
яже от охранения, паче помощи тоя, яже от 
дел. И яко не токмо новоначальным: но и самым 
уже предуспевающим таковая виновна бывают 
расточения и разорения, якоже тойжде паки святый 
исаак глаголет: яко покой юныя токмо 
повреждает, разрешение же и юныя и старцы. И, 
безмолвие внешняя чувства умерщвляет, а 
внутренняя движения воздвизает: внешнее же 
сообращение сопротивная сим творит, сиречь внешняя 
чувства воздвизает, а внутренняя движения 
умерщвляет. И сей убо деяние, еще же 
иблаго содевати путь безмолвия. тако рекши, отай 
изявляет: лествичник же [от 27 степени], на 
стези благо деющаго и ходящаго следующими отай 
назнаменует, пиша: безмолвник есть, иже 
безтелесное в телеснем дому ограничивати 
любопрится, еже преславно есть. Безмолвник есть 
оный рекий: аз сплю, а сердце мое бдит.{Песнь 
пес. гл. 5, ст. 2.} Затворяй убо дверь келлии, 
телеси: и дверь языка глаголанию: и внутренюю 
дверь, лукавствию духов. 

(с. 430)

Глава 48.

%(О молитве сердечней, и ея делание чрез 
внимание и трезвение. %)

Молитва со вниманием и трезвением бывающи внутрь 
сердца, якоже речеся, без иныя мысли, сиречь, и 
мечтания каковаголибо. Сим убо: Господи Иисусе Христе 
Сыне Божий, к самому поминаемому Господу Иисусу Христу 
невещественне и неглагольне, совершенне ум 
воспростирается: сим же: помилуй мя, обращается и 
движится к себе, не терпя о себе не молитися: к 
любви же предуспев искусом единственне, 
совершенне к самому Господу Иисусу Христу горе 
воспростирается, о втором, сиречь о помиловании, 
извествование явственно приемь. 

Глава 49. 

%(Како молитву Божественнии отцы предаша нам 
глаголати, и яко различне, и кая есть молитва 
сия. %)

Темже не всегда молитву целу Божественнии отцы 
предающе видятся: но ов убо целу: ов же 
половину: ов же от части, и другий инако, 
противу молящагося негли силы и устроения. И 
Божественный убо златоуст целу ту предает, тако 
пиша: молю вас братие, правило молитвы никогдаже да 
да поперете или презрите. Слышах бо некогда отцы 
глаголющия, яко каков есть он инок, аще 
правило сие презрит, или поперет: но должен 
есть, аще яст, аще пиет, аще седит, аще 
служит, аще путешествует, аще ино что творит, 
непрестанно вопити сие: Господи Иисусе Христе Сыне Божий, 
помилуй мя: да память сия имене Господа нашего Иисуса 
Христа, раздражит на брань врага. Вся бо памятию 
может обрести нудящаяся (с. 431) душа, аще 
лукавая, аще благая: первее же злая может 
увидети внутрьуду в сердце своем, и тогда 
благая. Память бо сия может подвигнути змия, и 
память сия может смирити его: память сия может 
обличити живущий в нас грех, и память сия 
может его потребити: память сия может подвигнути 
всю силу вражию в сердце, и память сия может ю 
победити и изкоренити помалу, яко да имя Господа 
Иисуса сходящо во глубину сердца, змия убо 
держащаго пажити, смирит, душу же спасет и 
оживотворит. Непрестанно убо пребуди во имени 
Господа Иисуса, яко да поглотит сердце Господа, и Господь 
сердце: и будета два сия во едино. Обаче дело 
сие несть единаго дне или двою, но лета многа 
и времене: многа бо подвига и времене потреба, яко 
да изгнан будет враг, и вселится Христос. И 
паки: подобает утверждати и управляти ум, 
и обуздати его, и всяк помысл, и всяко 
лукаваго действо низлагати призыванием Господа нашего 
Иисуса Христа: и идеже тело стоит, тамо да будет 
и ум: да посреде Бога и сердца ничтоже ино 
обретается, яко средостение или преграждение 
приосеняющее сердце, и разлучающее ум от Бога. 
Аще же некогда и восхищает ум, не подобает в 
помыслех коснети, да не сосложение помыслов, в 
деяние тебе вменится в день суда пред Господем, 
егда судити имать Бог тайная человеков. 
Упразднитеся убо выну, и пребудите в Господе 
Бозе нашем, дондеже ущедрит вы. И ничесогоже 
иного ищите, разве точию милости от Господа славы: 
ищуще же милости, со смиренным и умиленным 
сердцем ищите, и вопийте от утра до вечера, 
аще возможно и всю нощь сие: Господи Иисусе Христе 
Сыне Божий, помилуй мя. И понудите ум ваш на сие 
дело даже до смерти: многаго бо подвига требует 
дело сие, зане узкая врата и тесный путь 
вводяй в живот, и нуждницы восхищают его:{Матф. 
гл. 7, ст. 14. и глава 11, ст. 12.} нудящихся бо 
есть царствие небесное. Молю (с. 432) убо вас, 
не отлучайте сердец ваших от Бога, но приседите и 
храните я с памятию Господа нашего Иисуса Христа 
всегда, дондеже водрузится имя Господне внутрь в 
сердце, и ничтоже ино помышляет, точию яко до 
возвеличится Христос в вас. Прежде же сего 
златоуста, пиша великий павел глаголет: Аще 
исповеси усты твоими Господа Иисуса, и веруеши в 
сердце твоем, яко Бог того воздвиже из 
мертвых, спасешися: сердцем бо веруется в правду, 
усты же исповедуется во спасение.{Рим. гл. 10, ст. 
9 и _и.} И паки: Никтоже глаголет Господа Иисуса, 
точию Духом святым,{1 Кор. гл. 12, ст. 3.} то 
есть, егда действо Духа святаго приимет сердце, 
имже и молится, еже есть предуспевших, и в 
себе яве внутрь живуща Христа стяжавших. 
Последуя сему, и святый диадох [глава 59], 
глаголет: Всяко истязует от нас ум, егда 
вся его исхождения заградим памятию Божиею, дела 
должна, еже известным творити его скоротечение. 
Подобает убо даяти ему сие: Господи Иисусе, точию 
во всецелоделание мысли. Никтоже бо, рече, глаголет 
Господа Иисуса, точию Духом святым. Самый убо тесне 
сей глагол присно в хранилищах своих да зрит, 
яко да не в мечтания уклонится некая. Елицы бо 
преславному сему и многовожделенному имени 
непрестанно во глубине сердца поучаются, сии и 
свет своего ума могут некогда зрети. Тесным 
бо попечением от мысли держиму всяку возницающую 
скверну на души, в чувстве довольне попаляет. Ибо 
Бог наш, глаголет, огнь поядаяй злобу.{Евр. гл. 
12, ст. 29.} Темже и в любовь прочее многую славы 
своея, душу призывает Господь. Закосневающи бо славное 
сие и многовожделенное имя памятию ума в 
теплоте сердца, навыкновение в нас всяко творит 
любити благость его, ничесомуже сущу прочее 
воспящающу. Сей бо есть бисер многоценный, егоже 
продав некто, все свое имение стяжати может, и 
имети неизглаголанную о обретении его радость. 
Святый же исихий Христа Иисуса, (с. 433) тако пиша, 
излагает: Возлетевши душа по смерти на воздух во 
врата небесная, с собою о себе имущи Иисуса 
[глава 149], ниже тамо врагов усрамится, но с 
дерзновением, якоже ныне, и тогда возглаголет к 
ним во вратех. Точию до исхода своего да не 
уныет вопити ко Христу Иисусу день и нощь, и той 
творя сотворит отмщение ея вскоре, по неложному 
своему и Божественному обещанию, еже рече о 
судии неправеднем. Ей, глаголю вам, сотворит и 
в жизни сей настоящей, и по исходе ея от тела. 
Лествичник же Иисуса точию глаголя [от 21 степени]: 
Иисусовым именем бий супостаты: несть бо на небеси 
и на земли крепльша оружия. И ничтоже ино 
прилагает. И паки же глаголет [от 27 степени]: 
Иисусова память да соединится с дыханием твоим, и 
тогда познаеши безмолвия пользу.

Глава 50.

%(Еще, яко не точию от реченных святых отец, 
но и самых верховных апостол. петра и павла и 
иоанна обретошася тайнонаучени некако духом 
глаголы Священныя и Боготворныя молитвы. %)

Не точию же от сих реченных Богомудрых отец, и 
подобных им обрящет кто таковыя Священныя и 
Боготворныя молитвы, глаголы некако тайнонаучены, но 
и прежде сих, от самых первоверховных апостол с 
петром, глаголем, павла же и иоанна. Един 
убо глаголет, якоже предрекохом: никтоже может 
рещи Господа Иисуса, точию Духом святым.{1 Корин. гл. 
12, ст. 3.} Другий же: благодать и истина Иисус 
Христом бысть.{Иоан. гл. 1, ст. 17.} И, всяк 
Дух, иже исповедует Иисуса Христа во плоти 
пришедша, от Бога есть.{Иоан. гл. 4, ст. 2.} 
Предызбранный же от Христовых ученик на 
вопрошение сие Спаса (с. 434) и учителя к самым 
апостолом: кого мя глаголют человецы быти? 
блаженнейшее противонаводя исповедание, отвеща: ты 
еси Христос Сын Бога живаго.{Матф. гл. 16, ст. 13 
и 16.} Сего ради и сущии по них, наши же славнии 
наставницы, паче же иже безсупружным и пустынным и 
безмолвным житием шествовавшии, таковая речения 
яко разсеянно и по части треми сими столпами 
святыя церкви предвозвещенныя, яко Божественныя 
гласы, по откровению Духом святым предузаконенныя, 
еще же и треми достоверными множицею 
свидетельствованныя: треми же, глаголет, свидетельми 
станет всяк глагол. Сии небомудреннии во едино 
собравше, изряднейше и со живущим в них святым 
Духом составивше, столп молитвы нарекоша, и сущим 
потом предаша, по образу подобному держати же и 
хранити его. Зри убо и чин и последование, 
имущее презельную дивность со премудростию, яже 
свыше. Зане ов убо глаголет Господа Иисуса: ов 
же Иисуса Христа: ов же Христа, Сына Божия, аки 
некако последуя един другому, и близ друг 
друга грядуще согласием и союзом таковых 
Богодейных глагол. Видети бо мощно ти есть от 
сих коеждо сущее на конце единаго, яко начало 
другаго приемлюща, и тако сие предыдет даже до 
триех. Тожде же и в приложении знамения Духа 
узрети имать. Рекшу бо блаженному павлу сие: 
никтоже может рещи Господа Иисуса, точию Духом святым. 
Сие убо лежащее на конце, Духа святаго глаголем, 
начало употребил есть громогласный иоанн, 
рекий: Всяк Дух, иже исповедует Иисуса Христа во 
плоти пришедша, от Бога есть.{ 1 Иоан. гл. 4, ст. 
2.} Сия же предложиша всем, не собою и от себе, но 
дланию движими пресвятаго Духа. Ибо и 
Божественнейшаго петра по откровению исповедание, 
Духом святым есть действуемо. Вся бо, глаголет, 
действует един и тойжде Дух, разделяя особно 
коемуждо, якоже хощет,{1 Кор. гл. 12, ст. 11.} и 
сице убо аки треплетена и нерасторжна вервь 
Боготворныя молитвы, зело премудре и (с. 435) 
разумне исткана же и сшита, и составлена, и на 
последующих нам преходит равным образом 
блюдома. Обаче речения сего, помилуй мя, приложение 
последствующии Божественнии отцы с сими 
спасительными молитвы глаголы, сиречь: Господи Иисусе 
Христе Сыне Божий, составиша и сочиниша, наипаче же 
младенственнейших ради по добродетели, сиречь, 
новоначальных и несовершенных. Предуспевшии бо и 
совершеннии о Христе единым киимждо таковых 
Божественных глагол, сиречь, сим: Господи Иисусе, 
Иисусе Христе, Христе Сыне Божий! еще же и единым, 
Иисусе, наречением довольни суть, и яко всецело 
делание молитвы, сей глагол обемлют и 
лобызают: яко сим неизреченныя и всяк ум, и 
всяко видение, и слух препобеждающия сладости и 
радости исполняеми. И сице убо вне плоти и 
мира бывающе треблаженнии, смежавающе чувства 
вселяющимся в них Божественным даром же и 
благодатию, изступительно и блаженно рачением 
емлеми, очищаются, и просвещаются, и совершаются, 
яко преестественную пресущественнаго Божества, и 
безначальную и несозданную благодать отселе, яко 
в части обручения, яко в зерцале взирающии 
неявно, и единою памятию и поучением, якоже 
речеся, единаго коегождо от сказанных наречений 
Богочеловека слова довольствующиися, и сею в 
восхищения, и соединения, и откровения, и 
соединения, и откровения неизглаголанна 
превозносими, и духом сподобляеми неизреченне. В 
явственное извествование сих и уверение 
яснейшее, сладчайший и душелюбивый Господь наш Иисус 
Христос Сын Божий, егоже словеса суть дела, и 
глаголы по нему Дух суть и живот, изрече зело 
яве: яко без мене не можете творити 
ничесоже.{Иоан. гл. 17, ст. 5.} И аще что 
просите в имя мое, аз сотворю. И паки: еже 
аще что просите во имя мое, то сотворю, и прочая, 
по предреченному нами.{Глава 14 , ст. 13 и 14.} 

(с. 436) 

Глава 51. 

%(Яко мощно есть и новоначальным, овогда 
убо всеми молитвы глаголы, овогда же частию сея 
молитися, обаче внутрь сердца, и присно: и о 
еже не пременяти часте глаголы. %)

Мощно же есть и новоначальным, овогда убо 
всеми молитвы глаголы, овогда же частию сея 
молитися, обаче внутрь сердца, и присно. По святому 
же диадоху:{Глава 57.} входяй выну в сердце свое, 
отходит всяко от красот житейских: духом бо 
ходя, похоти плотския ведети не может,{Галат. гл. 
5. ст. 16.} зане прочее в стражбище добродетелей 
сицевый ходит, самыя добродетели, якоже 
привратники имея града чистоты: темже и 
недействительни прочее козни на него бесов тогда 
бывают. Пишет же и святый исаак (от 50 слова): 
посещающаго душу свою на всяк час, веселится 
сердце во окровениих. И, собираяй видение ума 
своего, внутрьуду в себе зрит зарю духовную. Иже 
возгнушася всякаго парения, зрит владыку своего 
внутрьуду сердца своего. Ниже часте пременяти 
речения молитвы, да не частым пременением, 
преношением, аки некоему нестоянию и уклонению 
обыкши ум, неводружен и безплоден пребудет, 
якоже часто предвижимая и пресаждаемая древеса. 

Глава 52.

%(Яко плод молитвы, внутрь сердца молитися, и 
времени долгаго требует, и подвига, и понуждения, и 
вообще всяко благо многим трудом и временем 
исправляется. %)

И сие, еже присно внутрь сердца молитися: подобне 
же и вышшая сего, не просте, и якоже бы 
приключилося, и малым (с. 437) трудом и временем 
исправляется, аще убо и сие редце в некиих 
по неизреченному смотрению обретеся: но и времене 
долга, и труда, и подвига телесна же и душевна не 
мала, и понуждения многа и продолжительна ко 
исправлению требует. По превосходней бо мере дара 
и благодати, еяже надеемся в причастии быти, 
равны по силе подобает и подвиги о ней имети, и 
часы по мере определяти. Сия же есть, по 
священноучителем, еже изгнану быти от пажитей 
сердца врагу, и вселитися в него яве Христу. 
Глаголет бо святый исаак (от 50 слова): хотяй 
увидети Господа, художествует очистити сердце свое 
непрестанною памятию Божиею, и тако светлостию мысли 
своея на всяк час зрети имать Господа. И святый 
варсонофий: аще не внутреннее делание с Богом 
поможет человеку, всуе по внешнему труждается. 
Внутреннейшее бо делание с болезнию сердца 
приносит чистоту: чистота же истинное сердца 
безмолвие: безмолвие же сие смирение: смирение же, 
жилищем Божиим творит человека: от вселения же 
сего, со страстьми бесове изгоняеми бывают: и сице 
бывает человек храм Божий, исполненный освящения, 
исполненный просвещения, чистоты же и благодати. 
Блажен убо есть оный, иже Господа своего во 
внутреннейших сердца, яко в зерцале зрит, 
изливая моление свое с плачем пред благостию 
его. И преподобный иоанн епископ карпафийский: 
многаго времене и подвига потреба к молитвам, яко 
да обрящем в нестужаемем ума устроении иное 
некое сердечное небо, идеже живет Христос, 
якоже глаголет апостол: или не знаете, яко Иисус 
Христос живет в вас, разве точию чим убо 
неискусни есте.{2 Кор. гл. 13, ст. 5.} И великий 
златоуст (в слове ко игумену): непрестанно пребуди 
во имени Господа Иисуса, яко да поглотит сердце Господа, 
и Господь сердце, и будета два во едино. Обаче 
дело сие несть единаго дне, или двою, но лета 
многа и времене: многа бо подвига и времене потреба, 
(с. 438) яко да изгнан будет враг, и вселится 
Христос. И сия убо доселе, слово же да 
возвращается на прележащая поряду. 

Глава 53.

%(О молитве сердечней нечистей, и како приходит 
кто в чистую и непарительную молитву. %)

От еже пребывати в реченнем художестве сердечныя 
чистыя и непарительныя, аще и нечистыя негли 
инако, и непарительныя молитвы, яве яко от 
бывающих на возбранение сей предприятий и помыслов, 
приходит подвизающийся в навыкновение без 
понуждения, и непарительно и чисто и истинно 
молитися, сиречь во еже пребывати в сердце 
уму, а не с понуждением малодушне вдыханием 
вводиму быти, и паки отскакати: но самому присно к 
себе обращающуся, с любовию пребывати в сем 
сердце, и непрестанно тако молитися. Глаголет бо 
святый исихий: не имеяй молитвы чисты от помысл, 
оружия не имать на брань (глава 21). Молитву же 
глаголю, непрестанно действуемую во внутренности души, 
да Иисуса Христа призыванием, тайно ратуяй супостат 
поражается и опаляется. И паки: блажен воистинну, 
иже сице прилепися ко Иисусу молитвою во уме, и 
гласит его непрестанно в сердце, якоже воздух 
присоединяется телесем нашим, или пламень свеще 
(глава 196). И паки: и преходящее убо солнце 
над землею, творит день: святое же и честное имя 
Господа Иисуса, в уме сияющее частостию, раждает 
безчисленныя солнцесветовидныя мысли. 

Глава 54.

%(О непарительней и чистей сердечней молитве, и 
раждаемей от нея теплоте.%)

И сие есть, и именуется молитва сердечная, чистая 
и непарительная, якоже речеся, от неяже раждается 
некая теплота (с. 439) в сердце, по сему: согреяся 
сердце мое во мне, и в поучении моем разгорится 
огнь.{Псал. 38, ст. 4.} Огнь, егоже Господь Иисус 
Христос воврещи прииде в землю сердец наших, 
прежде убо сущия терноносныя благодати, ныне же 
духоносныя благодати, якоже глаголет сам Господь 
наш Иисус Христос: огня приидох воврещи на 
землю, и что хотел бых, аще бы ныне 
возгорелся.{Луки гл. 12, ст. 49.} Сия и бывших с 
клеопою некогда согреявши и разжегши, 
удивительне друг ко другу вопити сотвори сие: не 
сердце ли наше горя бе в нас, егда глаголаше 
нама на пути?{Луки гл. 24, ст. 32.} Глаголет же и 
иоанн дамаскин дивный, в некоем тропари песней 
своих ко пресвятей Богородице: влечет мя к песнопению 
любве девическия огнь сердечный. Пишет и святый 
исаак: от делания нужднаго раждается теплота 
безмерная, разгараемая в сердце от теплых 
помышлений нововселяющихся в ум. Сие же делание 
и хранение истончевают ум в теплоте их 
помышлений, и подают ему зрение (от 59 слова). 
И продолжая далее: и от теплоты сея последующия 
от благодати видения, раждается частое течение 
слез. И помале: и от непрестанных слез, 
приемлет душа мир помыслов, и возвышается в 
чистоту ума: чистотою же ума приходит 
человек, во еже зрети тайны Божия. И помале: по 
сих же достизает ум видети откровения и 
знамения, якоже виде иезекииль пророк. Еще 
(от 69 слова): Слезы и биение главы на молитве, 
и еже валятися с теплостию возбуждают теплоту 
сладости своея внутрь сердца, и с похваляемым 
изступлением летает сердце к Богу, и вопиет: 
возжада душа моя к тебе, Богу крепкому живому: 
когда прииду и явлюся лицу твоему, Господи?{Псал. 
41, ст. 3.} и прочая. И лествичник: огнь убо 
Божественный пришед в сердце, молитву возстави: сей 
же воставшей и на небо вознесшейся, огня в горнице 
души схождение бысть (от 28 степени). Еще: кто 
убо верный и мудрый инок, иже теплоту свою 
сохрани неугасаему, и даже (с. 440) до исхода своего 
на всяк день прилагати огнь огню, и теплоту 
теплоте, и желание желанию, и тщание тщанию не 
преста? И святый илиа екдик: внегда от внешних 
упразднившися душа соединится с молитвою, тогда 
сия аки некий пламень окруживши ю, якоже 
огнь железо, разжженну всю творит. И есть душа 
убо таяжде, но не ктому прикасаема, якоже бо 
разжженное железо внешними прикосновеньми неосязаемо 
(глава 105). Еще: блажен, иже в житии сем тако 
сподобивыйся зрети себе и свое естеством бренное 
человекоподобие, благодатию огненно увиде (глава 
106).

Глава 55.

%(Яко и теплота сия различне имать рождение: 
истиннее же, яже от чистыя сердечныя молитвы. %)

Веждь же, яко и таковая теплота различне и 
многообразне имать в нас самех рождение и 
бытие, и сие яве есть от изложенных глагол 
святых, не смеем же рещи, и от самаго деяния. 
Свойственнейшая же от сих теплота некако есть 
сия, яже от чистыя сердечныя молитвы происходит, 
и с нею выну приходит и возрастает, и в 
просвещении существеннем субботствует, сиречь, 
существенне просвещенна соделовает: по 
свидетельству отцев, сице сущаго человека. 

Глава 56.

%(Кое есть близкое дело сердечныя теплоты.%)

Яже теплота внимательне отгоняет возбраняющая 
первейшей чистей совершенне совершатися молитве. 
Огнь бо есть Бог наш, и огнь поядающ злобу 
бесов и страстей наших. Глаголет бо святый диадох 
(глава 97): егда с горящею (с. 441) некоею 
болезнию сердце внутрь приемлет стрелы бесовския, 
якоже ратуемый самыя тыя стрелы мнится терпети, 
ненавидит с болезнию душа страсти, яко в начале 
сущи очищения. Аще бо не поболит вельми о 
безстудстве греха, не возможет богатне 
возрадоватися о благости правосудия. Хотяй убо 
очистити сердце свое, выну памятию Господа Иисуса да 
разжизает то, сие точию непрестанно поучение и 
дело имея. Не бо, овогда убо молитися 
подобает, овогда же ни, гнилость свою отвергнути 
хотящим: но присно в молитве упражнятися 
блюдением ума, аще бы и вне негде пребывали 
молитвенных храмов. Имже бо образом хотяй 
очистити злато, аще и вмале огню попустит не 
быти в горниле, жестоту паки в чистящемся веществе 
производит: тако и овогда убо поминаяй Бога, 
овогда же ни, еже мнит стяжати молитвою, сие 
праздностию погубляет. Мужу же любодобродетельному 
свойственно есть, присно памятию Божиею земленность 
сердца истребляти, да сице злу помалу от огня 
памяти благаго потребляему, совершенне душа в 
естественную свою светлость со множайшею 
возвратится. И сице убо ум пребывая в 
сердце, чисте и непрелестне молится, по томужде 
святому глаголющему: Тогда есть истинная и 
непрелестная молитва,егда сердце блюдет ум, 
внегда молится. Пишет же святый исихий: сей 
истинен есть трезвенник, иже в сердце есть 
инок (глава 159). 

Глава 57.

%(О раждаемем от теплоты, внимания же и молитвы, 
желании и рачении. %)

Таковою же теплотою и со вниманием молитвою, сиречь, 
чистою молитвою, к поминаемому присно Господу Иисусу 
Христу желание, и Божественное рачение и любы в 
сердце раждается, якоже (с. 442) писано есть: 
отроковицы возлюбиша тя, привлекоша тя. И, яко 
уязвлена есмь любовию аз.{Песнь пес. гл. 1, 
ст. 2 и 3.} Глаголет же и святый ма_ксим: вся 
убо добродетели содействуют уму к 
Божественному рачению, множае же всех чистая молитва: 
сею бо к Богу воскриляемь, вне бывает всех (глава 
2, ст. 5). 

Глава 58.

%(О слезах сердечных, и еще о Божественнем 
желании и рачении. %)

От котораго сердца и слеза наимножайшая истекает 
очищающи и утучняющи, от любви сими 
обогатевшаго, а не истаевающи и измождавающи. И 
сие бо от Божественнаго желания, и оно от 
Божественнаго рачения, зельным и неудержимым 
желанием и рачением поминаемаго Господа Иисуса Христа 
аще и иступающо, вопиет: усладил мя еси 
желанием, Христе, и изменил еси Божественным 
твоим рачением. И весь еси, Спасе, сладость, весь 
еси вожделение и желание, весь ненасытин, весь 
еси доброта недоуменная. И с павлом вопиет 
Христопроповедником: любы Божия содержит ны. И, кто 
ны разлучит от любве Божия? скорбь ли, или теснота, 
или гонение, или глад, или нагота, или беда, 
или мечь?{Рим. гл. 8, ст. 35.} И паки: 
известихся, яко ни смерть, ни живот, ни ангели, 
ни начала, ни власти, ни силы, ни настоящая, ни 
грядущая, ни высота, ни глубина, ни ина тварь 
возможет нас разлучити от любве Божия, яже о 
Христе Иисусе Господе нашем (ст. 38 и 39).

Глава 59. 

%(Советование о еже не искати, яже выше меры, 
и еще побуждение к присной памяти, яже в 
сердце, Господа нашего Иисуса Христа. %)

Да убо сподобится кто сих, и всех, яже по 
сих, о нихже несть ныне глаголати благовременно: 
не ищи бо, глаголет, (с. 443) прежде времени, яже 
свое имут время. И, благое несть добро, егда не 
добре будет. И по святому марку: неполезно есть 
прежде делания первейших, ведети вторая. Разум 
бо кичит за праздность, а любы созидает, за еже 
вся терпит.{1 Кор. гл. 8, ст. 1.} Подобает тщатися, 
и присно подвизатися, якоже речеся, память Господа 
Иисуса Христа внутрь глубины сердца присно имети, а 
не вне и по верху, якоже и о сем тойже 
блаженный марко глаголет: яко не начальнейшим и 
умным упование отверзется внутреннейшее и 
тайное и чистое сердца нашего вместилище, не мощно 
есть известно познати внутрь живущаго, ниже 
ведети, прияты ли быша словесныя жертвы наша, 
или ни. 

Глава 60.

%(О теплей ревности и Божественнем в нас 
явлении, и существеннем благодати просвещении. %)

Тако бо удобь уклонится, не дел лукавых 
точию, но и встрастных помысл и неподобных 
мечтаний, якоже писано есть: Духом ходите, и 
похоти плотския не совершайте.{Галат. гл. 5, ст. 
16.} Паче же от всякаго помысла и всякаго мечтания 
отступит, яко горящею своею о добродетели 
ревностию попаляяй и потребляяй всякое лукавое 
действо, чувственне и мысленне действовавшее в 
нем с начальники их о зле радующимися бесы, 
якоже глаголет святый исаак (от 8 слова) 
страшен есть бесовом, и вожделенен Богови, и 
ангелом его, с теплою ревностию искореняяй от 
врага возрастающее в нем терние. И в предспеяние 
приидет прияти отсюду извещение любве, яже к 
нему, и явственнаго явления, и вселения 
существеннаго, и Божественнейшаго просвещения 
благодати. Аще же хощеши рещи, зело радостне паки 
востечет ко прежнему благодатию и святым (с. 444) 
крещением совершенносодеянному нам Благородию и 
сыноположению духовну. И паки глаголет святый 
исаак: (в томже слове): сей есть иерусалим, и 
царствие Божие внутрь нас сокровенное, по словеси 
Господню: сия страна, облак есть славы Божия, 
воньже едини чистии сердцем внидут, еже видети 
лице своего Владыки. Точию сам да не ищет в себе 
явления Божия, да не приимет того, иже воистинну 
тьма есть, а свет быти лицемерится. 

Глава 61.

%(О действе Божественнем и сопротивнем.%)

Егда же ум, не ищущу ему, свет зрит, да не 
приемлет сего, ниже убо да упраздняет, якоже 
глаголет преподобный марко: яко есть действо 
благодати, и есть действо сатанино, младенцу 
неведомо. Добро же есть, таковая не зрети яко в 
зерцале, прелести ради, ниже проклинати, истины 
ради, но вся упованием приносити Богови: той бо 
весть обоих полезное. Обаче да вопрошает 
имущаго благодать и силу от Бога научити и 
разсудити. 

Глава 62.

%(О учители просвещеннем и непрелестнем.%)

И аще убо обрел бы имущаго научити, не 
якоже точию от разума Божественнаго писания, но 
якоже Богу благодарение, и сам он блаженно 
восприя Божественное просвещение: аще же ни, то 
лучше не прияти, но со смирением ко Богу прибегнути, 
недостойна себе от чиста сердца вменяя и нарицая 
таковаго достоинства и видения, якоже убо сему, 
и елика рекошася, еще же и рекутся, 
тайнонаучихомся благодатию Христовою, и от язык 
неложных, Духом святым движимых и вещавших, и 
Богодухновенных писаний, и от частаго искуса. 

(с. 445)

Глава 63.

%(О просвещении истиннем и ложнем, сиречь, 
свете Божественнем, и лукавем. %)

Аще бо в неких своих списаниях славнии отцы 
наши знамения непрелестнаго и ложнаго просвещения 
некако изявляют: якоже убо и треблаженный 
павел латрийский сотвори, рек к вопросившему его 
о сем ученику своему: яко свет убо 
сопротивныя силы огневиден есть и дымоват, и 
чувственному сему огню подобен, и повнегда той 
страстоумеренная душа и очищенная увидит, 
несладостне обретается к нему, и гнушается: 
благаго же благий есть обрадованнейший и 
чистейший: и пришед освещает, света же и 
радости и веселия исполняет душу, и кротку оную 
и человеколюбиву соделовает: и ини же такожде. Но 
обаче, якоже предреченная живым гласом слышал 
еси, тако и о сем во время услышиши, ныне бо 
не время. 

Глава 64.

%(О мечтании неподобнем же и како подобает 
изследовати я. %)

А понеже вмале прежде о мечтании помянухом, и 
мечтании неподобающем, полезнейше есть, якоже 
нам мнится, вкратце и о том, паче же о всяком 
мечтании, якоже мощно рещи: зело бо сопротивляется 
проклятое чистей сердечней молитве, и 
единственному и простому ума деланию. Темже и 
Божественнии отцы многообразне о нем и на оное 
провещавают. Сие убо различнообразное, якоже 
баснословимый дедал, и многоглавное, якоже вдра, 
мечтание, яко некий мост (с. 446) бесовский, 
святыми предречеся: тем бо проходяще и преходяще 
нечестивии убийцы, приобщаются некако и 
смешиваются с душею, пчельник трутнев сию 
соделовающе и мыслей жилище безплодных и 
встраственных. Еже убо мечтание отметати 
подобает совершенне, точию аще не хощеши покаяния 
ради сокрушения, плачя же и смиреномудрия, к сим же 
и поучения сущих и видения, еще же и неподобнаго 
ради мечтания, приравнити и равноизвесити 
благоподобное мечтание, и с сим оное смесив, и 
противу воевав, и яко щитоповергающая безчестное и 
безстудное крепце низложив, тако противу онаго 
прияти победительная. Ибо тако творя, не токмо не 
тщеты, но и приобретения себе виновен могл бы 
еси быти, яко на суде безпогрешне дела своя 
управляяй, и яко мечтание неподобно, мечтанием 
благоподобным упраздняяй, и оружиями сопротивных 
сих подсопротивных смертне уязвляяй, или 
убиваяй, якоже древле голиафа Божественный 
Давид.{1 Цар. 17, ст. 49.}

Глава 65.

Яко не токмо неподобное мечтание, но и благоподобное 
отвержено святыми в чистей молитве и в простем 
и единственнем делании ума. 

Сей же подвиг еще младенцев, сиречь, 
новоначальных есть. Временем бо предуспевшии, 
совершенне неподобное мечтание с благоподобным 
отмещут и безвестно соделовают, яко воск 
тающ от лица огня испепеляюще и разоряюще чистыя 
ради молитвы, и необразнаго ради отвержения и 
обнажения от всех ума, простаго ради к Богу 
устремления, аще ли же хощеши, и приятия, и 
невоображеннаго и единственнаго (с. 447) соединения. 
Глаголет бо святый исихий: всяк помысл мечтание 
есть во уме чувственныя некия вещи: ум бо 
сый ассирий, не инако прельщати может, аще не 
употребит чувственная наша и обычная (глава 
180). И паки: понеже всякий помысл мечтанием 
чувственных некиих входит в сердце: тогда сияет 
в нем блаженный свет Божества, егда совершенно 
упразднится от всех, и не воображен от сих 
будет: понеже светлость оная по лишению всех 
помышлений в чистем уме является (глава 89). 
И великий василий: якоже не в рукотворенных 
храмех живет Господь, тако ниже во из_ображениих 
неких и воображениих мысленных: предстоят бо сия 
остеняюща растленную душу, немогущую чисте ко 
истине взирати, но еще зерцала держащуюся и 
гадания. И Божественный евагрий: тамо седети Бог 
глаголется, идеже есть знаемь: темже и престол 
глаголется Божий, ум чист. Разум убо Божий не 
в помышлениих обрящется воображающих ум, но в 
помышлениих невоображающих: темже молящемуся 
подобает совершенне отлучатися помышлений ум, и 
инако образован будет ум зря себя самаго: 
инако же устроение имети будет, зря словесство 
свое. Отсюду научаемся, како разум духовный 
отлучает ум от помышлений воображающих его, 
без_образно же обучающи представляет пред Богом. И 
святый ма_ксим в толкованиях великаго дионисиа: ино 
есть мечтание, а ино помышление, сиречь мысль: и 
от различных бо сил бывают, и свойством движения: 
помышление бо, действо есть и творение: мечтание 
же, страсть и воображение возвещающее чувственно 
нечто, или яко чувственно нечто: и чувство 
убо емлется сущих по внезапному воображению: 
ум же прикасается, то есть, емлется сущих 
инем образом, а не яковым чувство: прочее в 
теле убо или в дусе, в немже и чувства быти 
первее рекохом, страдательное и вообразительное 
движение, судительное же и разуметельное души и 
уму давати подобает. Сею убо разуметельною 
души частию, и (с. 448) мечтательную удерживати 
подобает: разделяется бо мечтательная сила на три 
части: первая убо на образовательную постижений, к 
творящим постижение чувственным: вторая же на 
вообразительную о пребывающих остатков от сих, не 
имущую образы утвержденны на нечесом, юже и 
свойственне силу мечтательну нарицают: третия, в 
нейже всяка сласть и мечтание мнящагося блага или 
зла, печалию составляется. Ни едино убо, якоже 
речеся, мечтание место имать в Бозе: всех бо 
отнюд паче мысли есть и превыше есть. И паки 
великий василий: ум нерасточаемь на внешняя, ниже 
от чувств в мир разливаемь, возвращается убо к 
себе, собою же в разум Божий восходит, и оною 
добротою осияваемь и просвещаемь, и самое сие 
естество забывает (в 3 книге, послание 2). Сия 
убо и ты ведый, понуждайся на всяк час с 
Богом безмечтанно, необразно, невоображенно, 
совершенне всем умом чистым, и душею чистою, 
и сердцем чистым молитися всяцем образом, 
якоже глаголет святый ма_ксим. 

Глава 66. 

%(О уме, душе, и сердце чисте и совершенне. 

О уме чисте. %)

Ум чист есть, отлучивыйся неразумия, от 
Божественнаго света осияваемый. 

%(О душе чистей. %)

Душа чистая есть, свободившаяся страстей, и от 
Божественныя любве непрестанно веселящаяся.

%(О сердце чисте.%)

Сердце чисто есть, совершенне безвидну Богови и 
невоображенну представившее память, и единеми 
образы его готову (с. 449) назнаменатися, имиже 
явлен бывати в ней обыче: сим последовательно 
и сия да приложатся. 

%(О совершенне уме.%)

Ум совершенный есть, иже верою истинною 
недоведомаго предуведевый, и создания его 
совершенне увиде, и обемлющь разум промысла 
и суда о тех от Бога прият, яко человек же, 
глаголю. 

%(О душе совершенней. %)

Душа совершенна есть, еяже страдательная сила 
воззре всесовершенно к Богу.

%(О сердце совершенне.%)

Сердце совершенно негли то глаголется, еже ниедино 
имать естественно по каковому либо образу к чесому 
либо движение, на немже яко на дщице углажденне 
добре, крайния ради простоты приходя Бог, законы 
своя написует. 

%(О уме чисте. %)

Еще, ум очистити, по святому диадоху, единаго 
святаго Духа есть. Еще, ум удержати от 
парения, по лествичнику, единаго святаго Духа есть. 
Еще глаголет святый нил: аще бы кто хотел 
увидети устроение ума своего, да лишит себе 
всех помышлений, и тогда узрит его подобна 
сапфиру, или небесну шару (глава 58). И паки: 
ума устроение есть, высота мысленна небесну 
шару подобна, в оньже и свет святыя Троицы во 
время молитвы приходит. И святый исаак: егда 
ум совлечется ветхаго человека, и облечется в 
новаго благодати, тогда чистоту свою узрит 
подобну небесному шару, яже Божие место от 
старчества сынов исраилевых именовася, внегда 
явися им на (с. 450) горе (в конце 16 слова). 
Ибо тако творя, якоже предречеся, сиречь чисто, 
и немечтанно, и невоображенно моляся, в след 
будеши шествовати святым: аще ли же ни, то мечтатель 
будеши вместо безмолвника, и вместо гроздия 
обереши терние, еже ти, _о дабы не случилося!

Глава 67.

%(Како Пророцы видяху видения. %)

Аще же нецыи видения пророков, воображения же и 
откровения, мечтанием и порядком естественным 
быти мнят, сия да ведят, яко далече от праваго 
разума и истины бывают. Пророцы бо, и нынешнии 
священнотаинницы наши, не по естественному 
последованию некоему и чину, еще же и мечтанию 
видяху и мечтаху, яже видяху и мечтаху, но 
Божественне, и паче естества уму неизреченною 
силою и благодатию святаго Духа воображающу и 
мечтающу, якоже глаголет великий василий, яко 
неизреченною некоею силою мечтающу уму, безмолвна 
его и чиста имущии, аки гласящо в себе имут 
слово Божие. И паки: Видяху пророцы, воображаемой 
им Духом владычественней части (от слова на 
пятдесятницу, лист 207 на обороте). И Богослов 
григорий: Сей, сиречь Дух святый, действоваше 
первее во ангельских и небесных силах. И 
помале: Таже во отцех и в пророцех, ихже 
ови убо видеша Бога, или разумеша: ови же 
будущее проразумеша, воображаемой им Духом 
владычественней части, и яко настоящим 
соприсутствующе будущим.

Глава 68.

%(Еще о мечтаниих и многих и различных 
видениях.%)

Аще ли же нецыи усумневаются еще, яко 
мечтания приемлющии и многая и различная видения, и 
сопротивляются (с. 451) нам, аки некако святым 
мнящеся последовати, сим глаголем от словес 
Богослова: Умом единем Бог сеннопишемь 
есть, не от тех, яже в нем, но от тех, 
яже окрест его, единому мечтанию от другаго 
собираему во един некий истины образ, и 
прочая. (Слово на Рождество Христово). Божественнаго же 
ма_ксима: не мощно уму безстрастну быти от 
единаго деяния, аще не приемлют его многая и 
различная видения. Подобне и инем святым равная 
сим глаголющим. Таковии да ведят, яко оные 
блаженные не о делании онамо еже по приятию, и 
благодати разуметельней, глаголем, и зрительней, и 
самым искусом соединяющей человека с Богом, 
словеса сия сказаша: но о видении по взиранию, 
сиречь, о собираемем от премудрости и равности 
сущих и согласия, и в помышление о Бозе не ясне 
некако приницающем, еже и многим, паче же всем 
конечне мощно есть употребляти и размышляти, 
якоже разумне таковыя святых глаголы испытавый, 
яве увесть, якоже писано есть: От 
величества бо красоты созданий, сравнительно 
рододелатель познавается,{Премудр. Сол. гл. 13, ст. 
5.} а не от мирскаго бо и внешняго многосуесловнаго 
и суетнаго художнаго учения: сие бо, яко 
безчестная рабыня о вежестве и софистичестве и 
доказательстве мнением кичащися, а не верою 
евангельскою и смирением, и истинным согласием 
наставляемо, далече от священных преддверий 
изгоняется. Нам же ныне слово есть о сиянии 
совершеннем и существеннем, еже и возшедшии со 
Иисусом на гору фаворскую избраннии от апостол, 
неизреченно благим и воистинну Блаженным 
изменившеся изменением, восприяша, и невидимое 
царство и Божество чувственныма очима претворенными 
на Божественнейшее, сиречь, бывшими Духовными 
десницею пресвятаго Духа увидети сподобишася. По 
елику же отстоят востоцы от запад, и небо от 
земли, и душа превосходит тело, по толику и (с. 
452) делание по приятию, и благодать превосходит 
видение по взиранию: зане оное убо видение, 
сиречь, еже по взиранию якоже рекохом 
извнеуду, и Благочинным сущих движением, чином 
же и собранием, единому от другаго мечтанию 
собираему во един некий истинный образ 
предуспевати имать, и горе к Богу верою 
простиратися: сие же, сиречь, еже по приятию, 
внутрь сердца непосредственно от самого Бога 
существенне обыче бывати, овогда и извне, и 
яве телу преподающе паче смысла от своего 
сияния, и Божественнейшаго просвещения, 
преестественне страждущу сердцу, по премудрейшему 
ма_ксиму, не творящу небытное обожение. Глаголет бо 
сей святый: Небытное, глаголю, обожение, еже по 
виду существенное Божества сияние, еже не имать 
бытия, но недомысленное в достойных явление. 
Согласная реченным глаголет и великий дионисий: 
Подобает ведети, яко ум наш едину убо 
силу имать, во еже помышляти, еюже мысленная 
видит: другую же, еюже видит соединение 
превосходящее естество ума, имже совокупляется с 
превышшими себе. И святый исаак: Два ока имамы 
душевныя, якоже глаголют отцы, и не таяжде 
потреба есть видения в коемждо (от 82 слова) 
Единым бо оком зрим сокровенная в 
естествах, сиречь, силу Божию, и премудрость 
его, и промысл его о нас, постизаемый от 
величества окормления его нас: а другим оком 
зрим славу естества его святаго, егда 
возблаговолит Бог ввести нас в таинства духовная. 
И Божественный диадох: Единаго убо святаго Духа 
суть дары, премудрость и разум, якоже и вся 
Божественная дарования: коеждо же от них 
свойственное действие имать.{Премудр. Сол. гл. 9, ст. 
8.} Темже овому убо дается премудрость, иному 
же разум о томже Дусе,{1 Кор. 12, ст. 8.} 
свидетельствует апостол. Разум бо самым искусом 
соединяет человека с Богом, в словеса вещей душу 
не движущи. Темже нецыи и от любомудрствующих 
иноческое житие, просвещаются от онаго (с. 453) 
разума в чувстве, в разум же Божественных словес 
не приходят: премудрость же аще с сим разумом во 
страсе дается кому, редко же обаче сие, являет 
самыя оныя действа разума в любви. Понеже ов 
убо разум действием, ова же премудрость 
словом просвещати обыче. Но разум убо подает 
молитва, и многое безмолвие в безпопечении 
всесовершенном: премудрость же, не тщеславное поучение 
словес Духа, и первее есть благодать дающаго Бога. 
К сим же и святый глаголет ма_ксим в толкованиих: 
Студенец иаковль есть писание, вода же есть 
разум, иже в писании: глубина же, неудобь сказуемое 
видение писательных гаданий: почерпало же есть, 
письмены Божественнаго слова научение, еже не 
имеяше Господь, сам сый слово, и не от научения и 
поучения разум даяй верующим, но от приснотекущия 
благодати духовныя приснотекущую премудрость, и 
никогдаже престающую достойным даруя. Почерпало бо 
оное, то есть научение, малейшую часть разума 
приемлющи, все оставляет, ниединем словом 
держимо: разум же, иже по благодати, всю имать и 
без поучения удобопостижимую человеком 
премудрость, по потребам различне источающ. И паки 
святый диадох: Ум наш многая в молитве убо 
неудобь терпит велия ради тесноты и собрания в 
сердце молитвенныя добродетели: в Богословие же 
радуяся вдает себе пространства ради и свободности 
Божественных зрительств.{Гл. 68, ст. 8.} Яко да 
не свободу убо ему дадим многая хотети 
глаголати, и паче меры радостию воскрилятися 
попустим его, в молитве множайше, и 
_псалмопении, и чтении святых писаний упразднимся. 
Ниже любословесных мужей зрительства презрим, ихже 
вера словесы познается: ниже бо сие творяще, 
устроим примешаватися своим глаголом к 
словесем благодати, ниже попустим его развлеченна 
многою радостию и многоглаголанием от тщеславия 
прельститися. Но и кроме всякаго мечтания во время 
(с. 454) видения соблюдем его, и слезны вмале не 
вся мысли от сего ему стяжем. Покояся бо во 
времена безмолвия, и услаждаяся наипаче сладостию 
молитвы, не точию кроме предреченных вин бывает, 
но паче множае обновляется, во еже скоро и без 
труда в Божественная прилагатися зрительства, и 
вкупе предуспевати ему в разум разсуждения со 
многим смирением. Обаче ведети подобает, яко 
молитва есть превыше всякаго пространства, сия же 
онех точию есть, иже во всяком чувстве и 
извещении исполнены святыя благодати. Слышал ли 
еси? Молитва есть, глаголет, превыше всякаго 
пространства, яже единех онех есть, иже 
во всяком чувстве и извещении, сиречь, внутрь 
сердца существенне преестественно исполнены 
Божественнейшаго просвещения благодати. Сию и святый 
исаак память неназнаменанну нарицает, сиречь, 
невоображенну, безвидну, и просту, и ини инако от 
святых отец. 

Глава 69.

%(О пятих душевных силах, подобне же и о 
мечтаниих свойственных души и уму. И яко 
подобает совершенно бегати мечтания, и образований, 
и из_ображений, и воображений в чистей молитве, 
и простом и единственном делании ума.%)

По понеже, якоже сказася, не точию от бесов, но и 
самая душа от себе естественне имать еже 
мечтати: зане пять сил имать, сиречь, ум, 
мысль, мнение, мечтание и чувство: якоже убо и 
тело пять чувств, зрение, обоняние, слух, вкус 
и осязание. Едино же есть, якоже рекохом, от 
сил душевных мечтание, имже душа мечтает: 
подобает сей, добре силы своя хотящей устроевати 
и благорасположити наипаче соединяющия ю с Богом 
силы своя, и в настоящем (с. 455) веце и в 
будущем воскриляти, и к Богу возводити совершенно 
тщатися: о прочиих же по приличеству пещися, и 
употребляти, и творити. Испытати убо подобает, 
якова о сих отцы глаголют, и приличное 
хранити. Глаголет бо святый ма_ксим: Понеже душа 
сама по себе, сиречь, по своему существу, есть 
словесна и умна, и самоипостасна всяко: аще же 
самоипостасна, то себе ради естеством, и сама о 
себе, и с телом действовати имать, помышляющи по 
естеству и разсмотряющи, и никогдаже престающи от 
сущих. естественне оной умных сил. 
Присутствующая бо естеством в каковомлибо сущем, 
дондеже сие есть и существует, неотемлема суть. 
Душа убо присно же сущи, отнележе бысть, и сущи 
во впостаси, ради создавшаго ю тако Бога, присно 
помышляет, и разсмотряет, и познает, и сама о 
себе, и с телом себе ради и своего ради 
естества. Ни едино убо обрящется слово, душу 
от присутствующих сей естественне, а не тела 
ради, по разрешении от сего отчуждити могущее. 
Понеже убо познаваем, и от святых тайнонаучаемся, 
уму и мысли в нынешнем веце и в будущем, 
окрест Бога двизатися и действовати, иныя же силы 
в настоящем точию веце, яко свойственныя ему: 
подобает и души, яко благохудожней 
управительнице, и власть над сими естественне 
имущей, и не в настоящем произволившей токмо 
действовати, но в будущем веце наипаче ум и 
мысль всяцем образом тщатися горе простирати к 
Богу, и двизати и совокупляти во время чистыя молитвы, 
и умнаго и единственнаго и простаго делания: 
от мечтания же и иных сил всячески оной 
отлучати. По святому бо нилу: Устроение молитвы 
есть навыкновение безстрастно, крайнейшим рачением 
на высоту мысленну восхищающее любомудрый и духовный 
ум. Ибо деющи душа подобающее ей и честное 
достоинство сохранит.{Гл. 52, ст. 8.}

(с. 456)

Глава 70.

%(Еще о уме.%)

Такожде же подобает и самому уму, яко 
неразделительну, и просту, и самосовершенну сущу 
существу чисту и световидну, себе блюсти и хранити 
непричастна и разделенна от сего, сиречь от 
мечтания: яко и самому от себе силу естественную 
имущу на сие, и во еже неудержиму самому к себе 
возвращатися и обращатися, и двизатися. Сие бо 
есть стояние ума, еже от Божественныя в нем 
бывает благодати, по лествичнику глаголющему: Еже 
удержати ум, единаго святаго Духа есть. Аще 
бо ум, яко и сила сый души, и от нея движимь 
есть и начальствуемь есть некако, но убо и 
око ея есть и именуется: еще же и 
свойственною некоею силою естественною простою и 
всецелою, якоже рекохом, из_обилует. Сего ради 
и внегда по естеству усвоительне к души же и 
ея силам пребывает расположен, тогда воистинну и 
силою ум есть, еже и душевен человек 
наречеся: повнегда же свое естественное, и простое 
существенное паки приемлет достоинство и светлость, 
не частную и всецелую и самовладычнюю, сиречь 
избавится телесных же и душевных естественных 
усвоений и движений, и от того еже силою 
уму быти, во еже действом уму быти 
сподобится, сиречь в вышеестественнаго и духовнаго 
предуспеет человека: тогда воистинну присно к 
себе неуклонно возвращается, и собою в разум Божий 
невоображенный и безвидный и простый неудержимо 
восходит совершенно и отрешенно, якоже глаголет 
великий василий: Ум не расточаемь на внешняя, 
ниже от чувств в мир разливаемь, возвращается к 
себе, собою же в разум Божий восходит, и оною 
добротою осияваемь и просвещаемь, (с. 457) и самое 
сие естество забывает.{В 3 кн, посл. 2.} И тако 
убо и еже по образу и подобию Божию ум 
паки приемлет и хранит, ум сый, и собою 
непосредственно умне с Божественным умом, 
сиречь, с Богом соединяяся и сочетаваяся. Сие же 
делание есть окружное движение, сиречь к самому 
уму возвращение его и обращение и соединение 
собою к Богу, еже и едино есть и воистинну 
непрелестное и непогрешное, яко неодержимо суще и 
непосредственно, и паче разума соединение, и паче 
видения видение. Глаголет бо великий дионисий: 
Движение души есть, окружное убо, в самую 
себе вход от внешних и умных ея сил 
единовидное вкупе обращение, яко в некоем 
крузе незаблудность ей дарующее, и от многих 
внешних ю обращающее и собирающее, первее саму 
к себе, таже яко единовидну бывшу соединяющее 
единственне с соединенными силами, и тако к добру 
и благу руководящее, еже паче всех сущих 
единому и томужде и безначальному и 
безконечному.{О Божественных именех глава 4, 
статия 8.} Обратовидне же душа движется, поелику 
свойственне себе Божественными разумы осияваема 
есть, не умне и единственне, но словесне и 
преходительне, и аки смесными и преходительными 
действы. Движением же прямым, егда не в самую 
себе входит, и единственною мысленностию движится, 
сие бо, якоже рекох, есть еже по кругу: но на 
сия, яже окрест себе происходящи, и от 
внешних яко от неких знамений 
уразличествованных и умноженных на простыя и 
соединенныя возводится видения. И святый ма_ксим: 
Ум непосредственное приемь соединение с Богом, ту 
силу, еже помышляти и разумевати, по естеству 
всеконечне, имать праздну: егда убо сие 
соединение разрешит, нечто помыслив от тех, 
яже по Бозе разделися, пресекши паче помышления 
соединение, по немуже дондеже есть с Богом 
соединен, яко паче естества и причастием Бог 
быв, якоже гору недвижиму, естественный (с. 458) 
свой прелагает закон. И паки: Ум чистый, 
соединением к вине усвоение прият паче 
помышления, имже удержав многоразличное к тем, 
яже по вине, естественное свое движение и 
усвоение, единаго неведоме держится, в 
неизглаголанное престание достигши преблаженнаго паче 
помышления молчания, еже сказати отнюд не может 
слово или помышление: но един по причастию искус 
сподобльшихся паче помышления наслаждения, егоже 
знамение есть удобопознаваемо, и всем 
явственно, сиречь, по завещанию к веку сему 
всеконечное нечувствие души, и разстояние. В сем 
убо несодействуемь ум от души, сиречь, еже 
к Богу присно движитися, ниже сам от себе 
исправляя и действуя свойственное, сиречь, еже к 
себе возвращатися, и тако неодержимо в мысль, яже 
о Бозе, восходити, паче же сего от обою не 
плодоприемля, но с мечтанием соединяяся, уже 
прочее и различен бывает, и далече отстоит от 
Бога. 

Глава 71.

%(Еще о чистей молитве.%)

Глаголет бо святый нил: Подвизайся устроити ум 
твой во время молитвы, глух и нем, и сице 
возможеши помолитися.{Гл. 11, ст. 8.} Еще: Аз 
мое возглаголю, еже и юнейшим рекох: Блажен 
есть ум, иже во время молитвы совершенную 
невоображенность стяжа.{Гл. 117, ст. 8.} И святый 
филофей: Редко мощно обрести словесною частию 
безмолвствующия, и онех точию есть, иже 
Божественную радость и утешение сею вещию в 
себе выну имети ухищряются.{Гл. 3, ст. 8.} И 
великий василий: Молитва благая, яже явствен 
сотворяет душе Божий разум, и сие есть Божие 
вселение, еже памятию водруженна имети в себе 
Бога егда попеченми (с. 459) земными непрестанная 
память не пресецается, ниже нечаянными страстьми 
ум смущается: но от всех уклоняяся, 
Боголюбец к Богу возвращается.{В 3 кн. посл. 2, 
лист. 55 на обор.}

Глава 72.

%(Яко ино есть безстрастие ума, а ино 
молитва истинна, еже и больше есть. %)

Ведати убо подобает и сие, яко аще, по 
святому ма_ксиму, и не может ум от единаго 
деяния безстрастен быти, аще не приемлют его 
многая и различная видения: но убо напротив, по 
Божественнейшему нилу, мощно есть и безстрастну 
бывшу, не молитися истинно, но различну быти, и 
далече отстояти от Бога. Глаголет бо сей святый 
отец о таковом сице: Аще и выше телеснаго 
видения ум будет, не у совершенное место 
Божие виде, может бо в разуме. помышлений быти, и 
различен в нем быти.{Гл. 57, ст. 8.} Еще: Не 
иже получивый безстрастие, уже и молится 
истинно, может бо в простых помышлениях быти, и 
в повестех их упражнятися и далече отстояти 
от Бога.{Гл. 55, ст. 8.} Еще: Не яко убо не 
коснит ум в простых помышлениях вещей, уже 
и молитвы места достиже: может бо в видении быти 
вещей, и в помыслех их часто поучатися, яже 
аще и малы глаголы суть, но яко вещей суща 
зрительства, воображают ум, и далече отводят 
от Бога.{Гл. 56, ст. 8.} Глаголет же и лествичник: 
Ихже ум научися воистинну молитися, сии Господу 
воистинну лицем к лицу глаголют, якоже иже ко 
ушесам царевым. От сих убо и таковых 
можеши совершенно уразумети обоих жительств 
различие, и безсравнительное сравнение того, еже по 
приятию, (с. 460) и сего, еже по взиранию. Зане 
сего убо дело, поучения и многая и различная 
видения: тогоже делание есть, истинная молитва. 
К сим же, и яко ино есть, ума безстрастие, 
а ино молитва истинная. Еще же, яко имеяй 
истинную молитву, по свидетельству святых, по всякой 
нужде и ум безстрастен имети обыче. Но 
имеяй точию ум безстрастен, не может имети 
и истинную молитву. И сия убо сице: слово же да 
возвращается на предлежащая. Понеже убо не токмо 
предреченная, но и самая тая память благих же и 
сопротивных воображати внезапу ум, и к мечтанию 
приводити обыче некако: подобает и о сем мало 
рещи.

Глава 73. 

%(Еще о мечтаниих и из_ображениих ума, и 
знамениих прелести, и истины. И кая суть знамения 
прелести. %)

Безмолвствуя, и един хотя быти с единем 
Богом, никогдаже да приимеши, аще видел бы еси 
чтолибо чувственно, или умно, внутрьуду тебе, 
или внеуду, аще и вид аки Христов, или 
ангела, или святаго зрак, или света 
из_ображение мечтаемо во уме: но пребывай 
неверуя и негодуя о сем, аще бы и благо было, 
прежде вопроса, якоже рекохом, искусных: сие бо 
есть полезнейше, и Богу любезнейше и благоприятно: 
буди же присно блюдя ум твой необразен, 
невоображен, безвиден, необразован, некачествен, 
неколичествен и единым молитвы глаголом внимая, 
и поучаяся и размышляя внутрь, в сердечнем 
движении, по лествичнику глаголющему: Начало убо 
молитвы суть прилози, единомысленне в начале 
самем отгоняемии: среда же, еже во глаголемых 
или помышляемых единех быти уму: совершенство 
же сея, восхищение ко Господу (от 28 степени) И святый 
нил тако глаголет: Есть убо превосходная (с. 
461) совершенных молитва, восхищение некое ума и 
от сущих по чувству изступление совершенно, 
воздыхании неизглаголанными. Духу ходатайствующу Богови, 
видящему завещание сердца отверзаемо, якоже 
написанную книгу. И образы неизглаголанными хотение 
свое изявляющо (от слова к диакониссе агкирстей 
глава 27 и 28). Тако до третияго небесе восхищен 
бысть павел, аще в теле бе, или кроме тела, 
не ведя:{2 Кор. гл. 12, ст. 2.} тако петр возшед 
на горницу, еже помолитися, видение плащаницы 
виде.{Деян. гл. 10, ст. 9.} Вторая же по первей 
молитва есть, еже глаголати глаголы 
припоследствующу уму со умилением, и ведущу 
емуже приносит моление: посреде же пресецающаяся 
молитва, и смесившаяся с попечениями телесными, от 
устроения молящагося удаляется. Пребывая убо 
в сих, иных не приемли до времене мира страстей и 
вопроса, якоже предглаголася, искусных. И сия 
убо, яже предрекохом, и сим подобная, суть 
знамения прелести вкратце. 

%(Зри же, кая суть и истины знамения. %)

Истины же и благаго и животворящаго Духа знамения 
суть: любы, радость, мир, долготерпение, благость, 
милосердие, вера, кротость, воздержание,{Галат. гл. 
5, ст. 22.} и прочая, якоже глаголет Божественный 
апостол, тая нарицая плоды Божественнаго Духа. 
Глаголет же и паки: Якоже чада света ходите: 
плод бо Духовный есть во всякой Благостыни и 
правде и истине:{Ефес. гл. 5, ст. 9.} имже 
сопротивное все прелесть имать. Глаголет же и 
некто от Богомудрых, вопрошен быв от некоего, 
сице: В незаблудней стези спасения, якоже рекл 
еси, возлюбленне, многи суть пути ведущии к 
животу, и многи, иже к смерти. И продолжая далее: 
Имаши един путь ведущий к животу, заповедей 
Христовых соблюдение: в сих заповедех обрящеши 
(с. 462) всяк добродетели вид, изряднее же три 
сия, смирение, любовь и милость: без сих никтоже 
узрит Господа. И по малех: Сия три суть 
непобедимая оружия на диавола, яже святая Троица 
нам дарова: смирение, глаголю, любовь и милость, на 
няже ниже противовоззрети может все бесов 
множество: несть бо в сих следа смирения, иже за 
гордость помрачишася, и огнь им уготовася 
вечный. Где в сих любве, или милости сень, 
иже к роду человеческому непримирительну стяжаша 
вражду, и присно ратовати не престают. Сими прочее 
оружии вооружимся, яже обносяй, не ят бывает 
супостаты. И по малех: Сию треплетенную вервь, юже 
святая Троица изтка и сплете, зрим убо и три 
сущу, и едино: три убо имены, аще ли же 
хощеши, и впостасьми: едино же силою и действом, 
и к Богу приближением и зрением, и усвоением. 
О сих Владыка рече: яко иго мое благо, и бремя 
мое легко.{Мат. гл. 11, ст. 30.} И возлюбленный 
ученик: Заповеди его тяжки не суть.{1 Иоан 
гл. 5, ст. 3.} И по неколиких словесех: Сего 
ради душа, соединивниися с Богом чистотою жития и 
хранением заповедей, и треми сими оружии, яже 
суть сам Бог, в Бога самаго облечеся, и бысть 
положением Бог по смирению, милости и любви: и 
вещественную двоицу прешед, и превышше восшед на 
главу закона, на любовь, глаголю пресущественней и 
живоначальней Троице соединися, беседуя 
непосредственно светом свет приемля, и веселяся 
благодатию безпреемственною и вечною. Но довлеет 
и о сих. Подобает же, якоже убо о знамениих 
и плодах прелести и истины воспомянухом, яко от 
части, отонудуже и от них, сиречь от плодов, по 
Божественному павлу, познаем некако действуемых, 
коего духа суть: тако и о сущем от обою 
утешений, Божественныя, глаголем, и истинныя 
благодати, и от притворныя и сопротивныя реченьми 
отеческими подобает мало нечто сказати. Глаголет 
убо о сем тако Божественный диадох.

(с. 463)

Глава 74. 

%(О утешении Божественнем и притворнем. %)

Егда ум наш начнет ощущати утешение 
святаго Духа, тогда и сатана сладкоявленным неким 
чувством в нощных безмолвиях, егда кто якоже 
в преклонение сна некоего тончайша приходит, душу 
утешает.{Бл. диадох, гл. 31.} Аще убо в 
теплей зело обрящется памяти ум держа имя 
Господа. Иисуса, и якоже оружие употребляет 
противу прелести святое оное и преславное имя, 
отходит убо льстец оный от лести, прочее же 
на рать существенну возгарается противу души: темже 
познавая ум опасне прелесть лукаваго, множае во 
искус разсуждения преспевает. И паки: благое 
утешение бдящу телу бывает, или в знамении 
сна некоему имущу приходити, егда кто теплою 
памятию Бога, к любви его аки прилепился есть: 
прелестное же в тонкий некий присно, якоже рех, 
сон пришедшу подвижнику с среднею памятию Божиею 
[глава 32]. Ово убо, яко от Бога сущее, 
яве души подвижников Благочестия многою радостию 
душевною преклоняти к любви его хощет: ово же, 
яко ветром неким прелести развевати душу 
обыче, украдати сном телесным искус чувствия 
здраваго ума покушается, егда наипаче в памяти 
Божией тепл есть. Аще убо обрящется ум, 
якоже рех, поминаяй внимательне Господа Иисуса 
Христа, расточает убо дыхание оное сладковидное 
вражие: радуяся же, на брань противу его 
возбуждается, яко оружие второе имея прочее 
полезное по благодати, похвалу от искуса. И паки: 
Аще несомнительным и немечтательным движением душа 
возжизается к любви Божией, аки и тело влекущи во 
глубину оныя неизреченныя любве, бдящу, или имже 
рекох образом, в сон приходящу от святыя 
благодати действуему, ничтоже ино тогда отнюд 
помышляющи, точию сие, (с. 464) в неже движится: 
ведети подобает, яко есть святаго Духа действо: 
услаждаема бо вся от оныя неизреченныя сладости, 
ничтоже ино может помышляти, понеже неослабною 
тогда веселится радостию [глава 33]. Аще ли же 
сомнение всяко, или нечистую некую мысль ум 
приимет, внегда действуему быти, аще и святое 
употребляет имя ко отражению зла, а не паче к 
любви точию движится Божией, разумети подобает, 
яко от прелестника есть оное утешение 
притворством радости: радость же оная некачественна 
есть, и безчинна вся, хотящу врагу, да 
прелюбодействует душа: егда бо узрит ум 
искусом своего чувствия известне хвалящься, тогда 
утешеньми некиими, якоже рех, благоявленными 
привлекает душу, яко да развлекаемей ей о 
разслабленныя оныя и влажныя сладости, не познаваемо 
ей будет примешение льстиваго. От сего убо 
познаем Духа истины, и духа лестча. Обаче не 
возможно есть, или Божественныя Благодати в 
разуме вкусити кому, или горести бесовския 
чувственне искус прияти, аще неизвещенна кто 
себе сотворит, яко благодать во глубину ума 
вселися, лукавии же дуси при удесех сердца 
пребывают: чесому никогдаже хощут бесове, да 
человецы уверуют, да не ум, сие уведев 
совершенно, памятию Божиею на них вооружается. Имаши 
уже и о сем довольное, и доволен буди: зане 
обон-пол гадиров непроходно есть, и мед мало 
яждь, да не пресытився изблюеши его.{Притч. гл. 
25, ст. 16.}

Глава 75.

%(О сладости Божественней, точащейся из сердца. %)

Паче же благовременно есть свойственнее рещи, кто 
возвестит сладость меда не у вкусившим? и много 
паче без (с. 465) сравнения сладость Божественну и 
веселие преестественно и жизноточно, от сердечныя 
чистыя и истинныя молитвы точащееся, и текущее 
приснотечне, якоже глаголет Богочеловек Иисус: 
Иже пиет от воды, юже аз дам ему, будет в 
нем источник воды текущия в живот 
вечный.{Иоан. гл. 4, ст. 14.} И паки: аще кто 
жаждет, да приидет ко мне и пиет: веруяй в мя, 
якоже рече писание, реки от чрева его истекут 
воды живы{Иоан. гл. 7, ст. 37 и след.}. Сие же 
рече о Дусе, глаголет наперсник, егоже имеяху 
приимати верующии в него. И великий павел: посла 
Бог Духа Сына своего в сердца наша, вопиюща: авва 
отче.{Галат. гл. 4, ст. 6.}

Глава 76.

%(Яко духовная сия сладость и многознаменна есть 
и безыменна. %)

Яже сладость духовная преестественна и жизноточна, 
и существенно сияние, паче света же мрак и доброта 
недоуменна, и желание крайнейшее, зрение же и 
Боговидение, и обожение предречеся таинственне: 
несказанно пребывающее, и повнегда сказатися каколибо, 
и недоведомо по еже уведатися, и по еже 
недоразумеваемо уразуметися. Глаголет бо великий 
дионисий: в сей превышний света мрак приити мы 
молимся, и невидением и неразумением увидети 
и разумети сущаго паче видения и разума, самым 
тем, еже не увидети, ниже разумети: се бо 
есть, еже воистинну увидети и разумети, и 
пресущественнаго пресущественне воспети, отятием 
всех сущих. Еще: Божественный мрак есть 
неприступный свет, в немже жити Бог глаголется, и 
в невидимем сущем, за превосходящую светлость, и 
неприступнем, за превосхождение пресущественна 
светолияния. В сей приходит всяк, Бога разумети и 
увидети (с. 466) сподобляяйся, самым сим, еже 
не видети, ниже разумевати, воистинну в том, иже 
паче видения и разума бывая, сие самое разумевая, 
яко превыше всех есть чувственных и умных. 
И великий василий: неизреченны суть всеконечне, и 
неисповеданны сияния Божественныя доброты: не 
представляет слово, не приемлет слух: аще и 
денницы зарю речеши, аще и луны светлость, аще и 
солнца свет, вся хуждша подобия славы, и множае 
недостаточествующа к сравнению истиннаго света, 
нежели елико глубокая нощь и мрачная тьма, ко 
сравнению полудне чистейша. Сия доброта плотскима 
убо очима невидима есть: душею же единою и 
мыслию постизаема, и аще неких от святых осия, 
нестерпимое жало любве в них остави. Иже сетующе 
о здешнем животе глаголаху: увы мне, яко 
пришельствие мое продолжися!{Псал. 119, ст. 5.} И, 
возжада душа моя к Богу крепкому, живому: когда 
прииду и явлюся лицу Бога моего?{Псал. 41, ст. 3.} 
И, еже разрешитися и со Христом быти, много паче 
лучше.{Филип. гл. 1, ст. 23.} И, ныне отпущаеши 
раба твоего, Владыко, с миром,{Луки гл. 2, ст. 29.} 
яко узилище здешний вменяюще живот. Иже, 
зане не насыщаются видения Божественныя доброты, 
моляхуся со всем вечным животом продолжатися 
видению светлости Господни. И Богослов: Идеже 
есть страх, ту заповедей соблюдение: а идеже 
заповедей соблюдение, ту плоти очищение от 
осеняющаго душу облака, и не оставляющаго чисте 
увидети Божественную лучу: а идеже очищение, 
ту осияние: осияние же, исполнение желаний 
величайших, или величайшаго, или превышше великаго 
желающим. И Божественный григорий нисский: аще 
очистиши прилежанием жития сотворшуюся на сердце 
твоем скверну, паки возсияет ти Боговидная доброта, 
якоже на железе бывати обыче. Егда бо 
оселком ржавщины обнажится, бывши вмале прежде 
черное, сияния некия из себе прямо солнцу 
испущая, светлости издает: тако и внутренний 
человек, егоже сердцем именует Господь, повнегда 
(с. 467) соскоблит ржавую нечистоту, процветшую 
лукавою и согнившею влагою на зраце паки восприимет 
к началообразию подобие, и благ будет: благому бо 
подобное тому благо всяко последствует. И святый 
нил: блажен постигший неразумие неразлучное от 
молитвы. И лествичник: бездна плача, утешение 
узре: чистота же сердца, прият просвещение: 
просвещение есть неизреченно действо, видимое 
невидимо, и разумеваемое недоведомо [от 27 
степени]. Сего ради и треблажени суть, по образу 
древней марии, благую сию часть и жительство 
избравшии духовное и неотемлемое: и таковаго 
благаго Богоподобнаго жребия сподобляющиися, яко со 
многою и изступительною радостию с Божественным 
павлом мощи им яве ужасатися, купно и 
вопити сие: егда благодать и человеколюбие явися 
Спаса нашего Бога, не от дел праведных, ихже 
сотворихом мы, но по своей его милости, спасе нас 
банею пакибытия и обновлением Духа святаго, егоже 
излия на нас обильно, Иисус Христом Спасителем 
нашим: да оправдившеся благодатию его, наследницы 
будем по упованию жизни вечныя.{Тит. гл. 3, ст. 
4. и след.} И паки: помазав нас и запечатлев, 
и дав обручение Духа в сердца наша.{2 Кор. гл. 1, 
ст. 21.} И, имамы же сокровище сие в скудельных 
сосудех, да премножество силы будет Божия, а не от 
нас.{2 Кор. гл. 4, ст. 7.} И они убо сице: 
буди же и нам, Богоуветливыми онех ко Господу 
молитвами, от части подобными онем быти, милостию 
и благодатию. 

Глава 77.

%(Яко подобает по всяцей нужде кротку быти 
сердцем, хотящему опасне безмолвствовати. %)

Тебе же, _о чадо! сие ныне благовременно прежде 
иных, и со иными подобает разумети. Якоже 
хотяй научитися (с. 468) добре стреляти, не без 
знамений лук напрягает: тако хотяй научитися 
безмолвствовати, яко знамение да имать, еже 
присно кротку быти сердцем. Глаголет бо святый 
исидор: не довлеет к добродетели обучение, но 
подобает и кротку быти с обучением. Аще бо 
подвиг кротости проходяще, разумением смутительным 
оный пресечем, ничтоже ино есть, точию хотети 
убо спасение получити, не хотети же творити 
приличествующая к оному. И прежде же сего святаго, 
Божественнейший давид: наставит кроткия на суд, 
научит кроткия путем своим.{Псал. 24, ст. 9.} И 
сирах: кротким открываются тайны.{Сирах. гл. 3, ст. 
9.} И сладчайший Иисус: научитеся от мене, яко 
кроток есмь и смирен сердцем, и обрящете покой 
душам вашим.{Матф. гл. 11, ст. 29.} И, на кого 
воззрю, точию на кроткаго и молчаливаго и трепещущаго 
словес моих.{Исаии гл. 66, ст. 2.} И, Блажени 
кротцыи, яко тии наследят землю,{Матф. гл. 5, ст. 
5.} сиречь, сердце плодоносящее благодатию на 
тридесять, и шестьдесят, и сто, по чину 
новоначальных, средних и совершенных. Никакоже ни в 
чесом смущая, или смущаяся, аще где не о 
благочестии будет слово. 

Глава 78. 

%(Како бы могла исправитися нами кротость, и о 
тричастности души: яростной, желательной и 
словественной. %)

Сие же удобно бы исправил еси, вся уклоняя 
от тебе купно, и к любви душу подвизая, множайше же 
молча, и умеренно питаяся, и присно моляся, 
якоже рекоша отцы: яростную часть души любовию 
обуздай: и желательную ея воздержанием увяди: 
и словесною ея молитвою воскрили, и свет (с. ) 
ума не помрачается никогдаже. И, ярости убо 
узда есть благовременное молчание: безсловесныя же 
похоти умеренная снедь: неудободержимаго же 
помысла единопомысленная молитва. И паки: три суть 
добродетели, яже подают свет уму выну: 
еже не ведети лукавства коего человека: еже 
терпети находящая без смущения: и еже 
благотворити злотворящим. Три сии добродетели 
раждают ины три добродетели большия их: еже 
не ведети лукавства человеча, раждает любовь: и 
еже претерпети находящая без смущения, раждает 
кротость: и еже благосотворити злотворящим, 
стяжавает мир. И паки: три суть нравственныя 
устроения, главнейшия во иноцех: и первое 
убо есть, еже ничтоже согрешати по деянию: 
второе же, еже не укосневати в души встрастным 
помыслом: и третие, еже на лицы жен, и 
опечаливших безстрастно зрети в мысли. 

Глава 79.

%(Яко скоро подобает каятися о уклонениих, 
яже по приключению, и тако в последующем 
премудре утверждатися.%)

Аще же бы в нечесомлибо случилося когда смутитися 
тебе, или в некое поползнутися приключение, и от 
подобающаго погрешити, абие должно примиритися со 
опечалившим или опечаленным, и каятися от души, 
плакати же и слезити и себе укоряти, и тако 
последующему внимати и утверждатися. Зело 
премудре, якоже учит Господь Иисус: яко аще 
принесеши дар твой ко олтарю, и ту помянеши, 
яко брат твой имать нечто на тя: остави ту 
дар твой пред олтарем, и шед прежде смирися с 
братом твоим, и тогда (с. 470) пришед принеси дар 
твой.{Матф. гл. 5, ст. 23 и 24.} И апостол: Всяка 
горесть, и гнев, и ярость, и кличь и хула да 
возмется от вас со всякою злобою. Бывайте же друг 
ко другу блази, милосерди, прощающе друг другу, 
якоже и Бог во Христе простил есть 
вам.{Ефес. гл. 4, ст. 31 и 32.} И, гневайтеся, и 
не согрешайте: солнце да не зайдет во гневе 
вашем.{Там же, ст. 26.} И, не отмщающе себе, 
возлюбленнии, но дадите место гневу. И не побежден 
бывай от зла, но побеждай благим злое.{Рим. гл. 
12, ст. 19 и 21.} И сие убо речеся о 
примирении, еже друг ко другу. 

Глава 80.

%(О поползновении и покаянии. %)

О поползновении же глаголет святый исаак: не егда 
в чесом поползнемся, тогда да опечалимся, но егда 
пребудем в том: поползновение бо множицею случается 
и совершенным [от 90 слова] А еже в нем 
пребыти, умерщвление есть совершенно. Печаль же, 
еюже печалуем о своих поползновениях, вместо 
делания чистаго вменяется нам от благодати. Иже 
упованием покаяния поползаяйся вторицею, сей 
коварно ходит с Богом. На сего неведоме нападает 
смерть, и не достизает времене упования своего, 
исполнити дела добродетели. Еще: подобает, 
глаголет, ведети нам на всяк час, яко в сих 
двадесяти четырех часех нощи и дне покаяния 
требуем [от 87 слова]. Разум же имене покаяния, 
якоже о истиннаго образа вещей уведехом, 
сей есть моление прилежно на всяк час, с 
молитвою исполненною умиления, приближающуся Богу о 
оставлении прошедших, и печаль о хранении будущих. 
И паки: благодать по благодати покаяние дадеся 
человеком [от 83 слова]. Покаяние бо есть 
порождение второе (с. 471)	от Бога. И еже от веры 
обручение прияхом, покаянием дарования онаго 
чаем. Покаяния есть дверь милости отверстая 
держащимся ея, дверию сею входим к Божественной 
милости. И кроме сего входа не обрящем милости: 
занеже вси согрешиша, по Божественному писанию, 
оправдаеми туне благодатию его.{Рим. гл. 3, ст. 23 
и 24.} Покаяние есть благодать вторая, и раждается 
в сердце от веры и страха: страх же есть жезл 
отеческий управляющий нас, дондеже достигнем в 
рай духовный. И егда тамо достигнем, оставляет 
нас, и возвращается. Рай есть любы Божия, в нейже 
наслаждение всех блаженств [в томже слове]. И 
паки: якоже невозможно есть прейти море великое 
без ладии и корабля, сице не может ктолибо без 
страха прейти к любви. Море смердящее положенное 
посреде нас и умнаго рая, кораблем покаяния 
прейти можем, имущим гребцы страха. Аще ли же сии 
гребцы страха не управляют корабля сего покаяния, 
имже преходим море мира сего к Богу, потопляемся в 
смердящем мори. 

Глава 81.

%(Еще о покаянии, страсе, любви, плачи, слезах и 
самоукорении.%)

Покаяние есть корабль: страх, кормчий его: любы, 
пристанище Божественное [исаака 83 слово]. Посаждает 
убо нас страх в корабли покаяния, и превозит 
нас чрез море житейское смердящее, и ко пристанищу 
Божественному, еже есть любы, наставляет нас: в 
неже преходят вси труждающиися и обремененнии 
покаянием. И егда достигнем любве, достигохом к 
Богу, и путь наш совершися, и преидохом ко 
острову, далече от мира сущему: идеже есть 
отец, Сын и святый Дух. О (с. 472) плачи же по Бозе 
тако глаголет Спаситель: блажени плачущии, яко тии 
утешатся.{Матф. гл. 5, ст. 4.} Еще о слезах 
тойжде пишет преподобный исаак: слезы, яже в 
молитве, знамение суть милости Божия, еяже сподобися 
душа в своем покаянии: и яко прията бысть, и 
начат входити в поле чистоты слезами [от 30 слова]. 
Аще бо не возмутся помышления преходящих, и 
отвергнут от себе упование мира, и подвигнется 
от них презрение его, и не начнут благая 
напутия исхода своего уготовляти, и не начнут в 
души помыслы движитися неких сущих тамо, не могут 
очи слезы испускати. Слезы бо от чистаго 
приснопоучения и непарительнаго, и помыслов многих 
и частых, и неуклонно бывающих, и от памяти 
нечесого тонка бывающаго в мысли, и опечаляюща 
сердце памятию своею, и от сих умножаются, и 
наипаче возрастают. И лествичник: якоже огнь 
потребляет тростие, тако слеза чистая всяку видимую 
и разумеваемую скверну [от 7 степени]. Еще: 
чистыя и нелестныя слезы чрез воспоминание 
разрешения нашего от тела себе стяжим: несть бо 
в них крадения, или возношения, но паче очищение, 
и любве, яже к Богу, предуспеяние, и греха 
отмытие, и безстрастие. Еще: не веруй сим 
источником слез, прежде совершенна очищения: не 
надеждно бо вино, абие от точил заключенное. Еще: 
яже убо от страха слезы, сами в себе хранение 
имут: а яже от любве, негли удобь окрадаеми 
в неких бывают, аще оный приснопамятный огнь 
во время действия зело сердце не возжегл бы. И 
чудно есть, како смиреннейшее тверже есть во 
время свое. Еще: слезы исхода раждают страх: 
страху же рождшу безстрашие, бывает радость: радости 
же непостижимой преставшей, преподобныя любве цвет 
прозябает [в томже степени].

(с. 473)

%(О самоукорении, из великаго антониа. %)

О самоукорении же глаголет великий антоний: сие 
есть великое делание человека, да согрешение свое 
верху себе положит пред Богом, и возчает 
искушения до последняго издыхания [в патер. скит. о 
смиренномудрии]. И ин отец святый вопрошен 
быв, что множае обрел еси, отче, на пути 
сем? отвещав рече: еже во всем себе 
укоряти. Еже и вопросивый похвали, и глаголет 
ему: иного пути несть кроме сего. И авва 
пимен: со стенанием вся добродетели в мир сей 
внидоша: возми едину добродетель, и без нея с 
трудом состоит человек. И вопросиша его, кая 
есть сия? и глаголет: да человек присно себе 
укоряет. Рече паки: укоряяй себе, аще чтолибо 
прилучится ему, или тщета, или безчестие, или 
каковалибо скорбь, предварив имать себе достойна, и 
николиже смущается [в книге аввы дорофеа лист 
52]. 

Глава 82.

%(О внимании, и о еже премудре утверждатися.%)

Подобне же и о внимании и утверждении пишет 
Божественный павел: блюдите, како опасно ходите: не 
якоже не мудри, но якоже премудри, искупующе 
время, яко дние лукави суть.{Ефес. гл. 5, ст. 
15 и 16.} И святый исаак: _о премудросте, колико 
дивна еси, и како предвидиши вся издалеча! 
Блажен есть обретый тя: от уныния бо юности 
свободися [от 75 слова]. Аще кто куплю деет 
малою куплею, сиречь стяжанием, врачевание великих 
страстей добре творит. Сие бо есть любомудрие, да 
кто и в малейших и малых бываемых от него 
присно трезвится: (с. 474) упокоения бо великая 
сокровиществует себе, и не спит, да не приключится 
ему что сопротивно: но вины отсекает прежде 
времене, и малейшими вещьми терпит малую печаль, 
потребляя сею великую. И ниже: темже и глаголет 
премудрый: буди бодр и трезвен о животе твоем: 
сроден бо есть сон сей уму, и образ 
истинныя смерти [тамже]. Глаголет и Священноучитель 
василий: иже в малых своих ленив есть, не 
веруй ему в великих просияти.

Глава 83.

%(Яко о всех реченных тщатися подобает: прежде 
же всех, еже безмолвну и кротку быти, и чисте 
тщатися призывати безмолвствующему Господа Иисуса Христа 
внутрь сердца.%)

Сих же ради, о всех убо реченных тщися: 
прежде же всех, да безмолвне и кротце, и с 
чистою совестию Господа Иисуса Христа внутрь глубины 
сердца призываеши, якоже рекохом. Сице бо 
Божественную его благодать, путем предыдый, 
почивающу имаши в души. Глаголет бо и лествичник: 
никтоже от ярости и возношения, лицемерия же и 
памятозлобия стуждаемь, след безмолвия увидети да 
дерзнет когда: да не како изступление отсюду 
приобрящет [от 27 степени]. Аще ли же кто от сих 
есть чист, той прочее познает полезное, мню же, 
яко ни той. И убо не точию почивающу имети 
будеши благодать во твоей души, но и упокояющу 
совершенне душу от преждестужавших ей бесов и 
страстей. Аще бо и паки стужают, но не действуют, 
зане не прилагается к ним, ни сласти, яже от 
них, желает. 

(с. 475)

Глава 84.

%(О добрем изступительнем рачении, и Божественной 
доброте.%)

Все бо желание таковаго, и сердечное и 
изступительное рачение, и совершенное его 
завещание к превышшедобротней и блаженнейшей 
доброте зрит, яже отцы и желаний крайнейшим 
нарекоша. Глаголет бо великий василий: егда рачение 
Благочестия душу предудержит, всякий ей вид 
браней посмеятелен, и вси ю за желаемое биющии 
услаждают паче, нежели уязвляют. И паки: что 
Божественныя доброты чуднейшее? Кая мысль 
великолепия Божия радостнейшая? Кое желание души 
тако люто и нестерпимо? якоже еже от Бога 
бывает во очищенней от всякия злобы души, и от 
истиннаго завещания глаголющей: Уязвлена есмь 
любовию аз.{Песни песн. гл. 2, ст. 5.}

Глава 85.

%(О брани, и наказательнем попущении, и по 
отвращению оставлении.%)

Ратуемь же бывает прочее по попущению наказательну, а 
не по отвращению оставления. Чесо ради? яко да не 
вознесется ум его блага ради, еже обрете, 
но ратуемь же и наказуемь приемлет смирение присно, 
имже единем не токмо побеждает гордо ратующих 
его: но и даров больших выну сподобляется, 
предуспевая елико мощно есть достигнути 
человеческому естеству, веригами неизбежными, и 
тяжестию плоти связан и угнетаемь, и шествуя к 
совершенству о Христе и (с. 476) безстрастию. 
Глаголет бо святый диадох: сам Господь глаголет, 
яко сатана с Небесе яко молния спаде, да не 
взирает зловидный в селения святых ангел.{Глава 
56. Луки гл. 10, ст. 18.} Како убо не 
сподобивыйся причастия благих рабов с Богом общее 
может имети жилище человеческий ум? Но аще и 
рекут, яко по попущению бывает сие, и множае 
ничтоже рекут: зане наказательное убо попущение 
никакоже лишает душу Божественнаго света: скрывает 
же точию, якоже уже рекох, множицею от ума 
пришествие свое благодать, акибы да низвергает душу 
в горесть бесовскую, да со всяким страхом и 
многим смирением взыскует она помощи от Бога, 
познавающи помалу врага своего злобу: имже образом 
аще бы мати безчинствующаго своего по уставом 
млекопитания младенца, мало отревала от своих 
обятий, да ужасаяся от неких обстоящих его 
зловидных человек, или зверей яковыхлибо, со 
многим страхом и слезами к матерним паки 
возвратится недрам: по отвращению же бывающее 
попущение предает бесовом душу, аки узницу не 
хотящую имети Бога. Мы же несмы чада страха, да не 
будет: но младенцы истинныя Божия благодати быти 
веруем, малыми попущеньми, и частыми утешеньми 
млекопитаеми: да благостию Божиею сподобимся приити в 
мужа совершенна, в меру возраста исполнения 
Христова.{Ефес. гл. 4, ст. 13.} И паки: 
наказательное попущение приносит убо печаль многу 
и смирение, и отчаяние умеренное душе: яко да 
славолюбивая ея и небоязненная часть благолепне во 
смирение приходит. Абие же страх Божий и слезу 
исповедания приносит сердцу, и многое желание 
изряднейшаго молчания: по отвращению же Божию 
бывающее, отчаяния вкупе и неверия и гнева и 
кичения исполнятися душе попущает. Подобает убо 
нам ведети искус обоих попущений, и по 
коегождо образу приступати к Богу: тамо бо 
благодарение со исповеданием принести ему должни 
(с. 477) есмы, яко необузданность разума нашего 
отятием утешения наказующему, да различию 
добродетели и злобы, яко отец благий научает 
нас: зде же, непрестанно исповедание согрешений, 
и слезу неоскудну, и вящшее отшельничество, яко да 
сице возможем приложением трудов умолити 
когдалибо Бога, призрети, якоже и прежде, на сердца 
наша. Обаче подобает ведети, яко егда по 
существенну сражению душе и сатане рать бывает при 
наказательнем, глаголю, попущении: скрывает убо, 
якоже уже и рекох, себе благодать: недоведомою 
же содействует душе помощию, да победу души быти 
точию покажет врагом ея. И святый исаак: не 
мощно есть кроме искушений, яже по попущению, 
человеку упремудритися во бранех духовных, и 
познати своего промыслителя, и разумети Бога своего, 
и утвердитися в вере его сокровенне, точию 
силою искуса своего, егоже прият [от 49 слова]. 
И внегда увидит благодать, яко начася неколико 
в помысле его возношение, и нача помышляти велика 
о себе, абие попущает искушением на него 
укрепитися и утвердитися, дондеже уразумеет 
немощь свою, и бежит, и удержит Бога во 
смирении. И сими приходит человек в меры 
совершеннаго мужа верою и упованием Сына Божия, и 
возвышается в любви. Дивна бо познавается любы Божия 
к человеку, егда некогда посреде будет вещей 
пресецающих упование его: и тамо показует Бог 
силу свою во спасение, еже о нем. Никогдаже бо 
разумевает человек силу Божескую в покои и 
пространстве: и никогдаже показа Бог действие свое 
чувственне, точию во стране безмолвия, и в пустыни, 
и в местех лишенных сретений и смущения 
вселения, еже с человеки. 

(с. 478)

Глава 86.

%(О безстрастии, и о том, что есть человеческое 
безстрастие. %)

К сим убо подобает от части и безстрастия 
слово зде приложити, и совершенства, и сице помале 
окончати настоящее списание. Темже глаголет и 
великий василий: рачитель Бога бывый и безстрастия 
онаго, и малейшую часть удержати желаяй, и 
духовныя святыни, тихости же и несмущения и кротости 
и раждаемаго от сих веселия и радости желаяй 
вкусити: от всякия убо вещественныя страсти, 
возмущающия душу, далече помыслы отводити тщится, и 
чистым и неосененным оком Божественная 
обзирает, несытне тамошняго света насыщаяся. В 
таковое же навыкновение и устроение душу обучив, 
усвоевается по возможному подобию Богу, любезен и 
вожделеннейш ему бывает, яко великий подвиг 
и неудобосовершаемый претерпев, и от вещественнаго 
срастворения возмогий чистою и отлученною мыслию от 
примешения телесных страстей, некако беседовати с 
Богом. И сие убо есть о безстрастии. О сем 
же, что есть человеческое безстрастие, пишет сице 
святый исаак: безстрастие есть, не еже не 
ощутити страстей, но еже не прияти их: от 
многих бо и различных добродетелей, яже стяжаша 
явленных и тайных, и изнемогоша в них страсти, 
и не могут удобь возстати на душу, и мысль не 
требует всегда внимати им: зане во всяко время 
исполнена есть в помышлениях своих от поучения 
и беседы изряднейших образов, разумом движимых 
во уме [от 48 слова]. И егда начнут страсти 
двизатися и смущатися, внезапу восхищается мысль от 
приближения их в разум некий приникнувший во 
ум, и остаются в нем страсти праздны: якоже 
рече блаженный марко: ум от благодати (с. 479) 
Божия деяния добродетелей исполняя, и разуму 
приближився, мало ощущает от части злобы и 
неразумия души (в томже слове). Разум бо его 
восхищает его на высоту, и отчуждает его от 
всех, яже в мире, и за сущую в них чистоту, 
и тонкость, и легкость, и остроту ума их, и 
за прилежание паки их, очищается их ум, и 
прозрачен показуется, занеже плоть их изсохла от 
упражнения безмолвия, и многаго в нем пребывания: 
сего ради удобно и скоро прилагается коемуждо, и 
наставляет их видение сущее в них, ко ужасу 
еже в нем: и в сем паче умножаются видении, 
и ниже смысл их лишается вещества разума. И 
никогдаже кроме онех пребывают, яже сотворяют 
в них духовный плод. И обычаем многовременных 
изглаждаются памяти от сердца их, яже движут 
страсти в души, и крепость власти диаволи. Егда 
бо душа не будет кротка со страстьми, или не 
содружится в размышлении своем, еже о них, зане 
быти ей от инаго попечения непрестанно держимей, 
не может крепость ногтей страстных обладати 
чувствами ея духовными. И блаженный диадох: 
безстрастие есть, не еже не быти ратуемым о 
бесов (глава 98), занеже по апостолу, должни 
есмы изыти от мира:{1 Корин. гл. 5, ст. 10.} но 
еже ратуемым от них, непреоборимым пребывати: 
ибо железоноснии ратницы стреляеми бывают от 
супостат, и шум стреляния слышат, и самыя тыя 
пущаемыя на них вся стрелы яве видят: не 
уязвляеми же суть твердости ради ратных одеяний. 
Но они убо железом ограждаеми, внегда 
ратоватися, непобедими бывают: мы же светом святаго 
всеоружия, и шлемом спасительным, всеми благими 
делы вооруженни, темныя бесов разсечем полки. Не 
бо точию не ктому деяти злая чистоту приносит: но 
еже и прилежанием ко благим крепце отврещи 
злая. И святый ма_ксим четверообразне сие 
разделяет, тако глаголя: Первое (с. 480) безстрастие 
глаголю, неповинное движение ко греху телесе по 
действу. Второе безстрастие глаголю, в души 
встрастных помыслов совершенное отвержение, имже 
движение страстей увядает в первом безстрастии, 
неимущем возжизающия оное к действу встрастныя 
помыслы. Третие безстрастие глаголю, совершенное к 
страстем похоти недвижение, имже и второе быти 
обыче от чистоты помыслов составляемое. Четвертое 
безстрастие глаголю, совершенное отвержение во уме 
всех чувственных мечтаний, от негоже третие бытие 
приемлет, не имущее мечтаний чувственных 
видотворящих в оном страстей образы. Еще: 
безстрастие есть мирное устроение души, имже 
неудободвижима бывает к злобе. 

Глава 87.

%(Еще о безстрастии и совершенстве.%)

Еще же и святый ефрем о безстрастии же и 
совершенстве тако глаголет: безстрастнии, к крайнему 
желанию несытно простирающеся, несовершенное творят 
совершенство: занеже вечным благим несть конца. 
Совершенно убо есть, елико противу меры 
человеческия силы: несовершенно же, яко присно 
превосходящее себе повседневными прилоги и возвышаемое 
выну восхожденьми к Богу. Подобне же и святый нил 
тако о совершенстве глаголет: два совершенства 
разумети подобает: едино убо привременно, 
другое же вечно, о немже пишет павел: егда же 
приидет совершенное, тогда, еже от части, 
упразднится.{1 Кор. гл. 13, ст. 10.} Сие бо, егда 
приидет совершенное, знаменует, яко зде не можем 
и вместити Божественное совершенство. Еще: два 
совершенства павел Божественный весть, и весть 
тогожде человека совершенна, и несовершенна. Елико 
убо к настоящему (с. 781) житию, совершенна 
глаголема человека: елико же к совершенному 
воистинну, несовершенна. Темже глаголет: не зане 
достигох, уже совершихся. И по малех глаголет: 
елицы убо совершенни, сие да мудрствуем.{Филип. 
гл. 3, ст. 12 и 15.}

Глава 88.

%(О встрастии, сладострастии, пристрастии и 
безстрастии.%)

Глаголет и святый илиа екдик: вещество лукаво 
есть, тела убо встрастие: души же сладострастие: 
пристрастие же ума. Онаго убо порицается 
осязание, сего же прочая чувства: последняго же 
сопротивное расположение. Еще, сладострастный убо 
близ есть встрастнаго: пристрастный же 
сладострастнаго: далече же от обою безстрастный 
(главы 71 и 72).

Глава 89.

%(Что есть встрастный, сладострастный, пристрастный, 
и безстрастный, и о врачевании обоих.%)

Встрастный есть, иже согрешительное движение 
имать над словесностию превозмогающее, аще еще и 
не согрешает вне (глава 73). Сладострастный же, 
иже действо греха имать немощнейше словесства, 
аще и подвизается внутрь. Пристрастный же, иже в 
свободе паче, нежели в работе средних пребывает. 
Безстрастный же есть, иже всех сих разнствия не 
весть. Такожде убо и обоих врачеваний сия 
сказует: погибает от души, встрастие убо постом 
и молитвою: сладострастие же бдением и молчанием: 
пристрастие же безмолвием и вниманием: безстрастие же 
бывает от памяти Божия (глава 74).

(с. 482)

Глава 90.

О вере, надежде и любви.

По понеже всех благ начало и среда и конец, 
аще же хощеши рещи, и податель и управитель 
есть вера, надежда, любы, треплетенная вервь и 
Богоистканная, и паче же всех любы: зане Бог любы 
есть, и глаголется. Неправедно есть не исполнити 
и сими недостаток настоящаго списания. Паче же, 
понеже, и по святому исааку, совершенство многих 
плодов Духа тогда кто приемлет, егда сподобится 
совершенныя любве: гряди, и о той мало воспомянем. 
Пишет бо и лествичник: ныне же прочее по 
изяснении всех предреченных, остаются три сия, 
союз всех связующа и содержаща: вера, надежда, 
любы, больши же всех любы (от 30 степени). Бог бо 
ею именуется, обаче аз первую убо лучу 
зрю: вторую же свет, а третию круг: вся же 
едино сияние, и едину светлость. Зане ова 
убо вся может творити и сооружати: ову же 
милость Божия ограждает и непостыдною соделывает: 
ова же ниже падает, ниже тещи престает, ниже 
уязвленному прочее почивати от блаженнаго 
неистовства позволяет. Еще о любви слово: 
ангелом знаемо есть, и онем по действу 
осияния. Любы есть Бог, определити же сего 
словесы хотяй, слепотствуя во глубине песок 
меряет. Любы, по качеству убо, есть 
уподобление Богу, поелику человеком достигнути 
мощно: по действу же, упоение, пиянство души: по 
свойству же, источник веры, бездна долготерпения, 
море смирения. Любы есть свойственне отложение 
всяческаго сопротивна помышления, понеже любы не 
мыслит зла. Любы, и безстрастие, и сыноположение, 
имены единеми разделишася. Якоже свет, и 
огнь, и пламень, во едино стекаются действо, 
тако и о сих ми разумевай. И святый диадох: 
всякому духовному видению, братие, да предшествует 
(с. 483) вера, надежда, любы, паче же любы. Ове бо 
презирати видимая благая изучают: любы же самую 
душу соединяет с добродетельми Божиими, чувством 
умным невидимаго Бога познающи (глава 30). Еще: 
иная есть любы души естественная, а ина, яже 
от святаго Духа в ню приходящая (глава 34). Та бо от 
нашего хотения, егда хощем, умеренне 
движится, темже и удобь от лукавых духов 
расхищается, егда не нуждею обладаем своим 
произволением: сия же толико возжизает душу к любви 
Божией, яко всем частем души тогда прилеплятися 
неизглаголанной благости Божественнаго желания, в 
безмерной некоей простоте завещания. Тогда бо 
ум аки чревоносящ от духовнаго действия бывая, 
источник некий любви и радости источает. И 
святый исаак: любы от неких бывающая вещей, яко 
светильник есть малый, от елеа питаемый, и 
тако составляется свет его: или, и якоже 
поток текущий от дождя, егоже течение престает, 
составляющему того веществу оскудение приявшу (от 30 
слова). Любы же имущая Бога виновна себе, яко 
источник есть источающься, и никогдаже течения 
его пресецаются: той бо един есть любве 
источник, и неоскудное вещество тоя. И паки: 
вопрошен быв, кое есть совершение многих плодов 
духа? отвеща: егда кто сподобится совершенныя 
любве Божия. И паки: вопрошен быв, и откуду 
разумеет кто, яко доспе в сию: и рече: егда 
подвигнется память Божия во уме его, абие 
сердце его движется в любовь его, и очи его 
низпущают слезы богатно. Обычай бо имать любы от 
памяти возлюбленных возжизати слезы. И таков сый, 
никогдаже лишается слез. Занеже не оскудевает 
ему присно вещество ведущее его в память Божию. 
Темже и во сне своем собеседует с Богом: 
обычай бо имать любы содеяти таковая. И сие 
есть совершенство человеком в жизни их сей (от 
21 слова) Еще: любы Божия тепла есть 
естеством, и егда безмерно нападет на кого, 
творит оную душу изступительну (от 73 слова). 
Сего ради не может сердце ощутившаго (с. 484) 
вместити ю, и потерпети: но по мере качества, и 
нашедшия ему любве, зрится в нем изменение 
необычно. И сия суть знамения ея чувственная: 
бывает лице человеку румяно, обрадовано, и тело 
его разгорается, отступает от него страх и 
стыдение, и бывает яко изступителен, и сила, 
собирающая ум, бежит от него, и яко 
изумлен бывает. Страшную смерть вменяет за 
радость, и видение ума его пресечение некое 
от разсмотрения небесных николиже терпит, и 
отсутствуя, яко присутствуя беседует невидимь от 
коголибо разум, и видение его естественное 
мимоходит, и не ощущает чувственне движения 
своего, еже в вещех движится. Аще бо и 
действует что, несовершенне сие ощущает, яко 
ум имея в видении высоком, и смысл его 
присно аки со другим беседует. Сим духовным 
пиянством упишася некогда апостоли и мученицы: и 
ови убо весь мир проидоша трудящеся, и 
поношаеми суще: ови же на уды сосецаеми, 
излияша кровь свою аки воду, и лютейшая страждуще 
не возмалодушествоваша, но доблественно претерпеша, и 
суще премудри, яко безумни вменишася. И ини в 
пустынях скиташася, и горах, и в вертепах, и 
пропастех земных, в безчиниих благочинни суще. 
Сего безумия да сподобит нас Бог достигнути. 

Глава 91. 

%(О святем приобщении, и о том, еликих благ 
нам виновно есть частое с чистою совестию сего 
причащение и приобщение. %)

Ничтоже воистинну сице ко очищению души, и 
просвещению ума, и тела освящению, и обою к 
Божественнейшему

изменению и безсмертию, еще же и ко отвращению 
страстей и

бесов, или паче, свойственнее рещи, к соединению, 
и Божию (с. 485) Божественному и преестественному 
соединеннию и срастворению содействует и 
помоществует нам, якоже от чиста сердца и 
завещания, елико мощно есть человеку, частое 
причащение и приобщение святых, пречистых, 
безсмертных и животворящих тайн, самаго, глаголем, 
честнаго тела и крове Господа и Бога и Спаса нашего 
Иисуса Христа. Сего убо ради нуждно есть, 
елико мощно, и о сем от части рещи, и с 
таковым сочинити трудом, и тако окончати сие 
слово. И сие убо явственно есть не токмо от 
тех, яже святии вещают, но много паче от самых 
глагол саможивота и самоистины явственнейше, 
глаголет бо: аз есмь хлеб животный. И, сей 
есть хлеб сходяй с Небесе, да аще кто от него 
яст, не умрет. Аз есмь хлеб животный, 
сшедый с Небесе: аще кто снесть от хлеба сего, 
жив будет во веки: и хлеб же, егоже аз 
дам, плоть моя есть, юже аз дам за живот 
мира. И, аще не снесте плоти Сына человеческаго, ни 
пиете крове его, живота не имате в себе. Ядый 
мою плоть, и пияй мою кровь, во мне пребывает, и 
аз в нем. Якоже посла мя живый отец, и аз 
живу отца ради: и ядый мя, и той жив будет 
мене ради. Сей есть хлеб сшедый с Небесе: и 
ядый хлеб сей, жив будет во веки.{Иоан. гл. 
6, ст. 48 и след.} И Христоносец павел сия 
глаголет: братие, аз приях от Господа, еже и 
предах вам, яко Господь Иисус в нощь, в нюже 
предан бываше, прием хлеб, и благодарив преломи, 
и рече: приимите, ядите, сие есть тело мое, 
еже за вы ломимое: сие творите в мое воспоминание. 
Такожде и чашу по вечери, глаголя: сия чаша новый 
завет есть в моей крови: сие творите, елижды 
аще пиете, в мое воспоминание. Елижды бо аще 
ясте хлеб сей, и чашу сию пиете, смерть Господню 
возвещаете, дондеже убо приидет. Темже, иже 
аще яст хлеб сей, или пиет чашу Господню 
недостойне, повинен будет телу и крови Господни. Да 
искушает же человек себе, и тако от хлеба (с. 
486) да яст, и от чаши да пиет. Ядый бо и пияй 
недостойне, суд себе яст и пиет, не разсуждая 
тела Господня.{1 Кор. гл. 11, ст. 23 и след.} Сего 
ради в вас мнози немощни и недужливи, и спят 
довольни. Аще же быхом себе разсуждали, не быхом 
осуждени были. Судими же от Господа наказуемся, да не с 
миром осудимся. 

Глава 92. 

%(Яко нуждно есть научитися чудеси святых таин, 
и что суть, и чесо ради даны суть, и кая есть 
польза.%)

Пишет же и златоуст: нуждно есть научитися чудеси 
святых таин, что суть, и чесо ради преданы суть, 
и кая есть польза тайны сея. Едино тело 
есмы, и уди от плоти Господа нашего Иисуса Христа, 
и от костей его (в беседах на иоан. нравоуч. 
46). Тайнонаученнии же да внемлют глаголемым, да 
сице не токмо по любви сие будем, но и по самой той 
тайне со оною да соединимся плотию. Пищею сия 
бывает, юже дарова нам, хотя показати любовь, 
юже к нам имать. Сего ради смеси с нами себе, 
и возмеси тело свое в нас, да будем якоже 
тело со главою соединено: зело бо любящих есть 
сие. Сие бо и иов назнаменуя глагола о рабех, 
имиже бе по превосхождению любимь, они бо велию 
любовь к нему показуя, глаголали: кто убо дал бы 
нам от плотей его насытитися?{Иова гл. 31, ст. 
31.} темже убо и Христос то сотворил есть, 
в любовь ведый нас большу, и свою к нам любовь 
являя, не точию видети себе подая желающим, но и 
прикоснутися, и снести, и соединитися, и всяко 
желание исполнити. Еще: причащающиися пресвятаго 
тела и честныя крове, со ангелы и архангелы, и 
горними силами стоят, в самую Христову царскую (с. 
487) одеявшеся ризу, оружия имуще духовная. Но 
ничтоже великаго рекох еще: в самаго бо бывают 
облечени Царя (в томже 46 нравоуч). Но якоже 
есть велие и страшное и чудное таинство, тако 
аще с чистотою приступиши, во спасение приступил 
еси: аще ли же с лукавою совестию, в мучение и 
казнь: ядый бо, рече, и пияй недостойне, суд 
себе яст и пиет.{1 Кор. гл. 11, ст. 29.} Аще 
бо оскверняющии порфиру царскую, наказуеми бывают, 
подобне якоже и раздирающии: никоеже есть 
сомнение и нечистою мыслию приемлющим тело сие, 
туюжде пострадати муку, яковую и тии, иже 
гвоздьми оное уязвиша. Зри убо, коль страшно 
показа павел мучение, рекши: отверглся кто закона 
моисеова, без милосердия при двоих или триех 
свидетелех умирает. Колико, мните, горшия 
повинен будет муки, иже Сына Божия поправый, и 
кровь заветную скверну возмнив, еюже 
освятися.{Евр. гл. 10, ст. 28 и 29.} Елицы 
убо причащаемся сего тела, елицы крове вкушаем 
сея, помышляйте, яко онаго горе седящаго, от 
ангел покланяемаго, сущаго близ безплотныя силы, 
сего вкушаем. Увы мне! колицы ко спасению нам 
путие! тело ны свое сотворил есть, тело нам 
свое преподаде, и ничесоже сих отвращает нас от 
злых. _о безболезния! _о нечувствия (на посл. к 
ефес. нрав. 3, лист 194)! И паки: старец некий 
чуден поведа ми, каково нечто сподоблься 
увидети и услышати, яко имущия отсюду 
отходити, аще таин причастятся с чистою совестию, 
егда умрети имут, дориносяще ангели 
причащения ради онаго, отсюду возносят. И 
Божественный иоанн дамаскин: поелику сугубы и 
сложни есмы, подобает и рождению быти сугубу, 
подобне и ястию сложну. Рождение убо водою 
нам и Духом дается: ястие же есть самый хлеб 
животный, Господь наш Иисус Христос с Небесе сшедый. 
Якоже во крещении, понеже обыкновенно есть 
человеком водою мытися, и елеем мазатися, 
сопряже с елеем и водою благодать (с. 488) святаго 
Духа, и сотвори ю баню пакирождения: тако, зане 
обычай есть человеком хлеб ясти, воду же и 
вино пити, сопряже им свое Божество, и сотвори я 
тело и кровь свою, да обычными и по естеству в 
сущих паче естества будем. Тело, еже от святыя 
Девы, есть воистинну соединенное с Божеством, не 
яко вознесшееся тело с Небесе сходит: но яко 
самый хлеб и вино претворяются в тело и кровь 
Божию. Аще ли же образа взыскуеши, како бывает, 
довлеет ти услышати, яко Духом святым, якоже 
и от святыя Богородицы Духом святым себе самому и в 
себе самом Господь плоть состави: и множае ничтоже 
вемы, но точию яко слово Божие истинное есть, 
действительное и всемощное, образ же неиспытен. 
Бывает убо с верою достойне причащающимся во 
оставление грехов, и в жизнь вечную, и в 
хранение души и тела: с неверием же недостойне 
причащающимся, во осуждение и в мучение, якоже и 
Господня смерть. И несть хлеб сей и вино, образ 
тела и крове Христовы, да не будет: но самое то 
тело Христово обоженное, и самая та кровь. Плоть 
бо моя, глаголет, истинно есть брашно, и кровь 
моя истинно есть пиво. Тело и кровь Христова в 
растение души и телу нашему бывает, обаче не 
истощевается, ниже истлевает, ниже афедроном 
исходит, да не будет: но в существо наше и 
соблюдение, скверны всякия чистилище: ибо аще и 
злато приимет растленно, судительным разжжением 
очищает, да не в будущем веце с миром 
осудимся. Темже очистившеся соединяемся с телом 
Христовым, и Духом его, и бываем тело Христово. 
Хлеб сей есть начаток будущаго хлеба, иже 
есть насущный, насущность бо являет или будущий, 
сиесть в будущем веце нам блюдомый, или и к 
сохранению жития нашего приемлемый. Дух бо 
животворящий есть плоть Господня, занеже от 
животворящаго Духа зачася, рожденное бо от Духа дух 
есть. Сие же глаголю, не яко разоряя телесе 
естество, но животворящее и Божественное сие явити 
хотя. Сия убо местообразная будущих глаголются, 
не яко (с. 489) не сущая воистинну тело и кровь 
Христова: но яко ныне убо теми причащаемся 
Христову Божеству, тогда же умне единым 
видением. И Божественнейший марко: якоже вино 
сие во всех удесех пиющаго растворяется, и 
бывает вино в нем, и той в вине: тако и пияй 
кровь Христову. Духом Божества напояется и 
растворяется в совершенней души, и душа в нем, и 
тако освятившися достойна бывает Господа. Вси бо, 
глаголет, темжде Духом напоихомся, и евхаристиею 
хлеба воистинну причащающиися, Духа свята сподобляются 
причастницы быти, и тако могут достойныя души во 
веки живы быти. И якоже телу сему живот не от 
себе есть: но извнеуду его, то есть от земли: 
тако и души благоволи Бог не от своего ея 
естества, но от своего си Божества, и от своего 
Духа и света имети брашно, пиво, одежду, яже 
суть истинный живот души. Имать бо Божественное 
естество и хлеб жизни, рекший: аз есмь 
хлеб животный,{Иоан. гл. 6, ст. 48.} и вода жива, 
и вино веселящее, и елей радования. И святый 
исидор: приобщение наречеся причащение Божественных 
таин, за еже со Христом дарует нам соединение: 
и приобщники ны творят царствия его. И святый 
нил: не возможно есть инако спастися верному, и 
отпущение прегрешений прияти, и царство. небесное 
получити, аще не причащается со страхом и верою и 
любовию пречистых таин тела и крове. Подобне 
пишет и великий василий в послании, еже к 
благородной кесарии: и приобщатися же на всяк день, 
и причащатися святаго тела и крове Христовы благо и 
весьма полезно, (в третией книге послание 90), по 
ясному свидетельству Спасителя: ядый мою плоть и 
пияй мою кровь, имать живот вечный.{Иоан. гл. 6, 
ст. 54.} Кто бо усумневается, яко еже 
причащатися часте живота, ничтоже иное есть, 
разве точию живу быти множицею? мы четырижды на 
всяку седмицу приобщаемся: в неделю, в среду, в 
пяток и субботу, и в другия дни, аще будет 
память некоего святаго. (с. 490) В няже, мню, и 
литургисаше святый сей: не бо на всяк день можаше, 
от толиких попечений стужаемь. Рече же и авва 
аполлос: яко подобает иноку, аще мощно есть, 
на всяк день таин Христовых причащатися: удаляяй 
бо себе от сих, удаляется от Бога: часте же сие 
творяй, Спасителя часте приемлет. Спасительный бо 
глас глаголет: ядый мою плоть, и пияй мою 
кровь, во мне пребывает, и аз в нем.{Иоан. гл. 
6, ст. 56.} Сие убо на пользу есть иноком, 
воспоминание Спасительныя страсти часте творящим. На 
всяк день убо готову быти подобает, и 
уготовляти себе такова, яко достойну быти всегда 
к приятию святых таин, понеже и отпущения грехов 
сице сподобляемся. Глаголет же и лествичник: аще 
тело, телу прикасаяся, изменяется действом, како 
убо не изменится, иже Божию телу прикасается 
непорочныма рукама (от 28 степени) писано же есть 
и в старчестве: иоанн вострский, муж святый, и 
власть имый на дусех нечистых, вопроси бесов, 
иже беша живуще во отроковицах беснующихся и 
действуемых от них лукаво, рекши: киих ради 
вещей боитеся христиан? они же глаголаша: имате 
воистинну три вещи велики: едину убо, юже 
носите на выи вашей: и едину, еюже мыетеся в 
Церкви: и едину, юже ядите в собрании. 
Вопрошающе же паки: от сих триех коего множае 
боитеся? отвещаша: аще бысте сохраняли добре то, 
егоже причащаетеся, никтоже бы возмогл от нас 
оскорбити христианина. Ихже враждебнии множае иных 
боятся, суть: Крест, крещение и приобщение.

Глава 93.

%(Конец всех пространно изложенных вин, и 
частное советование к вопросившему. %)

Се убо, чадо любезнейшее, с помощию Божией 
скончася прошение твое. Аще убо по изволению 
твоему и предложению, (с. 491) совершенно не вемы: 
обаче по силе нашей, и Богу же возлюбленно, еже 
есть по силе. Зри убо, да не на сем 
остановишися от любоучения и трудолюбия, но да и 
делы явишися ученолюбив и тщалив: глаголет бо 
славный Богобрат: Братие мои возлюбленнии! бывайте 
творцы слова, а не точию слышатели, прельщающе себе 
самех. Зане аще кто есть слышатель закона, а не 
творец, таковый уподобися мужу смотряющу лице 
бытия своего в зерцале: усмотри бо себе, и 
отиде, и забы, каков бе. Приникий же в закон 
совершен свободы и пребыв, сей не слышатель 
забытлив быв, но творец дела, сей Блажен в 
делании своем будет.{Иак. гл. 1, ст. 22 и 
след.}

Глава 94.

%(Како подобает слышати и разумети Духовныя глаголы 
отец.%)

И прежде же сих, да верно и с приличествующим 
благоговением разумееши и слышиши Божественная и 
духовная узаконения отец, глаголет бо святый 
макарий: не прикасаема суть неискусным духовная. 
Души же святей и верней к постижению приходит 
приобщение святаго Духа, и небесная Духа сокровища, 
искусом приемшему единому бывают явственна: 
тайноненаученну же ниже уразумети отнюд можно. 
Благоговейно убо об оных слыши, дондеже бы и 
тебе мощно было верующу сподобитися сия получити. 
Тогда бо увеси самым искусом душевных очес, 
каковых благ и таин души христиан и зде 
приобщатися могут: тако бо обретаяся, скорейше и 
написанных и слышанных собереши приплодие и пользу, 
и от еже научатися и деяти предуспееши, во 
еже и инех наказовати и наставляти самым 
искусом (с. 492) на Божественнейшая, и многими 
тайнонаученная. Еже, и да будет ти на 
всесильнейшей Господа Иисуса Христа длани 
утверждающуся и исправляему, аминь. А понеже 
излишество слова противно слуху, якоже 
преумножаемая пища телесем, и всеумеренное есть 
изряднейше: подобает и нам, излишества 
бегающим, и умеренное лобызающим, яко 
изряднейшее, мало еще в словеси сем 
укосневшим, и аки некое краткое оглавление 
настоящаго сочинения описавшим, тако на оном 
котву слова сего утвердити. 

Глава 95.

%(Оглавление, и како подобает молитися, и о 
просвещении истиннем и Божественней силе.%)

Глаголют отцы: хотяй с разсуждением трезвитися, 
присно чрез вдыхание ноздренное внутрь сердца, 
сущаго под левым сосцем, да понуждается молитися 
чисте и непарительне, единым глаголом внимая 
молитвы, и поучаяся и размышляя, сиречь сие: Господи 
Иисусе Христе Сыне Божий, помилуй мя! даже до времене 
просвещения ума в сердце, якоже глаголет 
святый диадох: яко елицы славному Господа Иисуса и 
многовожделенному имени непрестанно во глубине 
сердца поучаются, сии могут и свет ума своего 
овогда зрети (глава 59). Сему же бывшу Божиею 
помощию. оттоле прочиим течением по Бозе 
жительства нашего яко во свете ходяще, паче же 
света сынове суще, незаблудно и непреткновенно 
шествовати имамы, якоже глаголет светоподатель 
Иисус: дондеже свет имате, веруйте во свет, да 
сынове света будете.{Иоан. гл. 12, ст. 36.} И 
яко: аз есмь свет миру: ходяй по мне, не 
имать ходити во тьме, но имать свет 
животный.{Глава 8, ст. 12.} И Давид же сия ко Господу 
вопиет: во свете твоем узрим (с. 493) 
свет.{Псал. 35, ст. 10.} И Божественнейший 
павел: Бог рекий из тьмы свету возсияти, иже 
возсия в сердцах наших.{2 Кор. гл. 4, ст. 6.} 
Тем бо яко светильником неугасаемым и 
всесветлым наставляются и взирают воистинну вернии 
на превышшая чувств, и отверзаются тем, яко 
чистым сердцем, небесная врата всякаго 
равноангельнаго и высокаго жительства и устроения, 
и паки тако якоже от солнечна круга возсиявает 
сим еже востязовати, еже разсуждати, еже 
прозирати, еже предвидети, и подобная. И вообще 
тем возсиявает таковым безвестных таин всякое 
явление же и откровение, и преестественныя и 
Божественныя силы Духом исполняются, и таковою же 
преестественною силою и персть их сия 
облегчаваема, или паче тягота плоти отончаваема и 
возвышаема, превозлетает. Сею во святем Дусе 
просветительною силою, еще с плотию суще нецыи 
от святых отец, яко невещественнии и 
безтелеснии, реки непроходимыя и моря кораблеходныя 
ногами немокренно проидоша, течения же долгая и 
многодневная во мгновении преидоша, и ина пречудна 
на небеси, на земли, в солнце, в мори, в пустынях, 
во градех, во всяком месте и стране, в зверех 
и гадех, в скотех и садех, и бездушном 
камении, вкратце, и во всякой твари, и всех 
стихиах соделаша, и всеми прославишася. И на 
молитвах сим стоящим, и святая и честная их 
телеса от земли яко крилата возвышахуся, и 
Божественным и невещественным огнем благодатным, 
телесную дебелость, еще же и тяготу испепеляюще, 
и легце возвышатися сотворяху действуеми, и аки 
некако, _о чудесе! престихийствуеми и прековываеми на 
Божественнейшее Богодейною дланию вселяющияся в них 
крепости и благодати: и по кончине неких и 
честная телеса нетление восприяша, явно показуя 
живущую в них и всех известноверных 
преестественную благодать и силу. И по общем 
убо и всемирном воскресении, самою яже (с. 494) 
в Дусе просветительною силою, аки некако 
окрилатевше, восхищени будут на облацех, в 
сретение Господне на воздусе, якоже глаголет 
таинник неизреченных Божественнейший павел, и тако 
всегда с Господем будут.{1 Сол. гл. 4, ст. 17.} К 
сим же убо и Духоглаголивый поет давид: Господи, 
во свете лица твоего пойдут, и о имени твоем 
возрадуются весь день, сиречь, вечный, и правдою 
твоею вознесутся. Яко похвала силы их ты еси, 
и во благоволении твоем вознесется рог наш.{Псал. 
88, ст. 16, 17 и 18.} И паки: державнии земли 
зело вознесошася.{Псал. 46, ст. 10.} И 
велегласнейший исаиа тако глаголет: терпящии Господа 
окрилатеют, изменят крепость свою.{Исаии гл. 
40, ст. 31.} И святый макарий: всяка душа, верою и 
всех добродетелей тщанием совершенне во Христа 
облещися отсюду в силе и извествовании 
сподобльшаяся, и с небесным нетленнаго образа 
светом соединившаяся, разум таин небесных в 
существе приимати всегда сподобляется: в день же 
воскресения темжде небесным образом славы тело с 
душею прославившися, и на небеса от Духа, по 
писанному, восхищено бывши в сретение Господне на 
воздусе, и сообразно телу славы его быти 
сподобившися, во веки купно с душею и телом 
царствовати имать. 

Глава 96.

%(Ино оглавление. %)

Сих новых и паче слова словес начало и 
родительница есть предпомянутое с совершенным 
безпопечением безмолвие, внимание же и молитва: яко 
основанием неким утвержденным, и забралом 
непобедимым, богатеюще исполнением по силе всех 
Боготворящих заповедей. От сих же, безпопечения 
глаголю, безмолвия, внимания и молитвы, бывает в 
сердце (с. 495) движение и теплота, страсти и бесы 
палящая, и сердце аки в горниле очищающая. От 
сея бывает ко Господу нашему Иисусу Христу желание, и 
непрестанное рачение: от сего же сладостное сердечных 
слез частое течение источникоподобне, имиже душа 
и тело якоже вссопом, покаянием, любовию и 
благодарением и исповедию очищается и тучнеет, 
от сих же тишина и мир помыслов, емуже несть 
предела, яко всяк ум преимущ: от сих же 
снегосиятельно светлое осияние и конец, еже по 
человеку безстрастие, и души воскресение прежде 
тела, и ктому, еже по образу и по подобию 
деянием и видением, верою и надеждою и любовию 
воз_ображение, и возвращение, и совершенное к Богу 
горе простертие, и непосредственное единение, 
изступление же и почитие, престание в настоящем 
убо, яко в зерцале, в гадании и обручении, в 
будущем же лицем к лицу, и совершенное совершенне 
Божие причастие, и присносущне наслаждение.

Глава 97.

%(Яко сие воистинну есть непрелестное и 
истинное, и отцы преданное, и по Бозе жительство, 
сиречь еже от послушания безмолвие, еже и во 
Христе сокровенный живот достойне святыми наречеся. 
%)

Самый сей путь, и по Бозе умное жительство, и 
Священное делание сущих воистинну христиан 
непрелестное, и истинное, и чистое, и преявственне 
же сокровенный есть во Христе живот. Сим 
шествовал, и сему тайнонаучил есть Богочеловек 
и сладчайший Иисус, проидоша же и Божественнии 
апостоли, припоследствоваша же сущии по них, якоже 
подобает последующе им, славнии наставницы наши и 
учители, иже от начала самаго на землю перваго 
Христова пришествия, и даже до днесь, яко светила 
(с. 496) в мире сияюще озареньми животных словес 
и преславными твореньми дел: иже даже и до сущих 
во время наше таковое доброе семя, священный квас, 
начаток святый, некрадомый залог, и благодать, 
яже с высоты силу, многоценный бисер, 
Божественный отеческий жребий, сокровенное на селе 
сокровище, обручение Духа, царское знамение, живую и 
текущую воду, Божественный огнь, честную соль, 
помазание, запечатление, свет, и подобная сим 
друг ко другу преподаша. Еже и будет наследно 
даемо, и в роды родов таинственне преходящо, даже 
и до самаго втораго паки на землю Христова 
пришествия. Неложен бо есть обещавый сие: и се 
аз с вами есмь во вся дни до скончания века, 
аминь.{Матф. гл. 28, ст. 20.}

Глава 98. 

%(Яко аще и ини суть пути спасительни, но сей 
есть избранный и царский, и к сыноположению 
приводящ. %)

Аще же и ини пути и жительства, аще ли же 
хощеши, и делания благая явишася ко спасению 
наставляющия и упокояющия проходящаго сия, якоже 
убо и суть, и к рабству, или наемничеству 
руководящия, и престающия, якоже и многи обители 
Спасителем у отца его быти рекошася: но убо 
сей есть царский, и избранный, и всех деланий, 
якоже душа тела, превыше лежит и превосходит, 
яко к сыноположению Божию обновляющ от земли и 
пепла, и Богом делающ преславно в дусе, 
проходящаго оным якоже подобает человека, 
якоже глаголет великий василий: Дух святый пришед 
в душу человечу, даде живот, даде же и безсмертие, 
воздвиже лежаща: подвигшееся (с. 497) же движением 
присносущным от Духа свята, животно бысть свято: и 
прият человек достоинство, Духу всельшуся вонь, 
пророка, апостола, ангела и Бога, сый прежде сего 
земля и пепел. 

Глава 99.

%(Яко за высоту делания и многоименно есть сие 
жительство. %)

Сего убо ради многими и различными и славными 
нареченьми Божественнии отцы величают оное. Путь 
бо разумеваемый нарекоша деяние похваляемо, и 
видение правоулучаемо, молитву выше всякаго 
пространства, трезвение ума, умное делание, 
дело будущаго века, ангельское жительство, небесное 
житие, Божественное пребывание, страну живых, 
таинственное взирание, духовное всепиршество, рай 
Богоделанный, небо, небесное Царство, Божие Царство, 
мрак превышший света, во Христе сокровенный живот, 
Боговидение и обожение, еже преестественнейше, и 
сим подобная, киим Божественным отцем и мы, 
брению и плинфоделанию, лукавым и нечистым 
помыслом, и словесем и делом соживущии, 
последующе, твое прошение возлюбленне, исполнити 
потщахомся. Воистинну, и якоже просил еси, и 
паче меры нашея рещи не обленихомся твоея ради, 
якоже в началех слова сего рекохом, любве и 
отеческия заповеди. Сего убо равноангельнаго 
жития начальник есть, новое и неизреченное слова 
и Сына Божия смотрение, и вочеловечение 
благоволением безначальнаго отца, и содействием 
святаго Духа. 

(с. 498)

Глава 100.

Нравоучение.

%(Яко с помощию и благодатию Божиею, подобает и 
нам, елико мощно, тщатися и подвизатися, да 
сподобимся от ныне, яко в части обручения 
таковых преестественных и величайших даров, и да 
не малаго ради уныния, сих, увы! не получим, 
еже да не будет.%)

Таковым убо и толиким благим нам предлежащим, 
возлюбленнии, не точию во упованиях и 
обетованиих, яже в будущем веце, но воистинну 
отселе и вещию потщимся, молим, дондеже время 
имамы, потецем, подвизаимся, да сих и мы малым и 
привременным тщанием и кратким трудом, паче же 
Божиим даром и благодатию сподобимся. Не бо достойны 
страсти нынешняго времене к хотящей славе явитися 
в нас.{Римл. гл 8, ст. 8.} Павла Божественнаго 
проповедника глаголюща услышим: паче же и от 
ныне тщащеся обрящем по свидетельству онаго, 
яко в части начатка и обручения.{Римл. гл. 8, ст. 
23. 2 Кор. гл. 1, ст. 22.} Аще бо царское сродство 
и приобщение от земнаго случая на себе преводящии 
вся деют, и делы и словесы и умышленьми и 
самых недостижных касающеся, еще же и самый 
живот сей множицею презирающе, за таковую славу и 
честь текущую и привременную, овогда и в погибель 
всесовершенну, а не в пользу достизающую. Колико 
убо нам подобает содеяти и потщатися, в 
приобщение и брак и соединение призываемым Бога, 
Царя всех царей, и содетеля, и единаго 
нетленна и присноприбывающаго, (с. 499) и славу и 
честь подающаго своим благославну и пребывательну? и 
не точию же сие, но и область приемшим чадом 
Божиим быти: елицы бо, глаголет, прияша его, 
даде им область чадом Божиим быти, верующим во 
имя его.{Иоан. гл. 1, ст. 12.} Дает область, 
не нуждею влечет, и противу предложения нашего 
понуждает. Присно бо мучительство на мучительствующаго 
мучительствуемаго вооружает, да злым злое исцелит, 
и сим почитая древнее наше самовластия достоинство, 
и яко да будет благое благоволением и благодатию 
его соделанно по всему, нашего же тщания и 
прилежания да вменяется быти исправление: и той 
убо, аще и Бог есть и Владыка, но все свое си 
сотворил. Всех бо подобне и создал, такожде за 
всех и умре, да равне спасет всех: в нас 
же остася еже приступити, еже уверовати, 
еже усвоитися, еже со страхом и тщанием и 
любовию служити тако возлюбившему ны человеколюбивому 
владыце и попечителю, яко и смерть восхотети 
претерпети волею за ны, и смерть поносну, да нас 
от мучительства диаволя и началозлобнаго врага 
избавит, и отцу и Богу примирит, и наследники 
убо Богу, снаследники же себе соделает, еже 
есть преславнейшее и блаженнейшее. Да не малым 
убо и кратким унынием и нерадением, и 
притворною сластию каковоюлибо толь великих 
удалим себе благ и честей и наслаждении: но вся 
да содеем и потрудимся, и самаго, аще бы потреба 
была, живота за него да не пощадим, якоже и той 
нас ради, аще и Бог сый, за ны сотвори: да тако 
и нынешних и будущих даров и венцев 
сподобимся. Яже да будет всем нам получити 
благоволением и благодатию самаго преблагаго и 
милосердаго Господа Бога и Спаса нашего Иисуса Христа, 
смирившаго себе толико за ны, и таковым смирением 
преестественную и Боготворящую свою благодать от 
ныне яве богатно подающаго. Яко тому подобает 
(с. 500) всяка слава и честь, и поклонение купно с 
безначальным и пречистым его отцем, и 
соприсносущным, и пресвятым, и благим, и 
животворящим его Духом, ныне и присно, и в 
безконечныя веки веков, аминь.