<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 337) Феолипт, великое воистинну филаделфийское светило, возрасте во время андроника втораго из палеологов, около тысячи трех сот двадесять пятаго лета. Во святей же горе первее подвизався во отшельническом житии, и отонуду потом председательство в филаделфии восприемши, был наставник и тайноучитель добротнейших учений святому григорию фессалонийскому. Священному бо трезвению и умной молитве онаго тайнонаучил, еще в мире бывша, якоже в житии тогож Григориа, от филофеа патриарха списанном содержится. Настоящее же трудолюбне написанное им слово, образ сый изряднейший, и правило известное сокровеннаго во Христе поучения, с последующими оному главами, разумом Божественным и чистотою глаголания изряднейше сложенными, зде с прочиими совокупишася. Полезна бо паче, нежели ино что, и достославна суть вкратце собрати тщащимся духовнаго любомудрия Богопремудрое учение. (с. 338) Феолипта митрополита филаделфийскаго слово, сокровенное во Христе делание изясняющее, и показующее вкратце труд монашескаго чина. Монашеский чин, древо есть высоколиственное и плодовитейшее, егоже корень есть, от всех телесных отчуждение, ветви же безпристрастие души, и еже ни едино имети усвоение вещей, ихже отбеже. Плод же, добродетелей стяжание, и Боготворящая любовь, и непресецаемое от сих веселие. Плод бо глаголет апостол, духовный есть любы, радость, мир, и прочая.{Галат. гл. 5, ст. 22.} Удаление от мира, ко Христу прибежище дарует. Мир же глаголю, любление чувственных вещей и плоти. Отчуждаваяйся от сих в познании истины, усвояется Христу, стяжавая любовь его, еяже ради отринув вся мира сего, купил есть многоценный бисер Христа. Облеклся еси во Христа Спасительным крещением: отвергл еси скверну Божественною банею: приял еси светлость духовныя благодати и благородство создания. Но что бысть? паче же, что пострада человек от безсоветия: люблением мира изменил есть Божественная начертания: состраданием к плоти непотребным содела образ: мрак встраственных помыслов помрачи зерцало души, имже является внутрь мысленное солнце Христос. Ты страху Божию душу пригвоздил еси. Познал еси помрачение мирскаго нестроения. Уразумел еси от молв собираемое во уме расточение. Увидел еси от многомятежнаго жития сретающее людей суетное попечение. Уязвился еси (с. 339) стрелою рачения безмолвия. Взыскал еси мира помыслов. Научился бо еси сему: взыщи мира, и пожени и:{Псал. 33, ст. 15.} Вожделел еси тамошняго покоя, понеже слышал еси: обратися душе моя в покой твой.{Псал. 114, ст. 6.} Сих убо ради и воспомянул еси благородство, еже приял еси в крещении по благодати, отвергл же еси по произволению страстьми в мире, воззвати прочее тим произволением, еже и в дело извел еси, пришед во священное училище, и оболкся в честная одеяния покаяния, даже до смерти в монастыре пребывати благодушне обещавый. Вторый уже ко Богу завет сотворил еси. Первый, входя в настоящее житие: вторый, спеша к концу настоящаго жития. Тогда благочестия ради прият Христом был еси, ныне присовокупился еси Христу покаянием. Тамо благодать обрел еси, зде долг исповедал еси. Тогда младенец сый, данное ти достоинство не ощутил еси, аще и послежде возрастши, величество сего дара познал еси, и узду на устех носиши: ныне, в совершенне сый мудровании, познаваеши силу обета сего. Виждь, да не презрев и сие обещание, яко некий сосуд сокрушенный, всесовершенне отвержен будеши во тьму кромешную, идеже будет плачь и скрежет зубом. кроме бо пути покаяния, несть иныя стези возвращающия ко спасению. Услыши, что Давид тебе обещавает: вышняго положил еси прибежище твое.{Псал. 90, ст. 9.} И аще тесный по Христе избрал еси живот, то не приидут к тебе злая, от мирскаго жития прибывшая тебе. Не имать последовати тебе изволяющу каятися, рачение пенязей, наслаждение, честь, украшение, неудержание чувств. Не пребудут законопреступницы пред тобою,{Псал. 5, ст. 6.} парения мысли, пленение ума, ослабление частых помысл, и ино всякое вольное уклонение и смущение. Ниже срящет тя любление родителей, братий, сродников, другов и сонравных. Ниже приселится к тебе безвременное и неполезное (с. 340) с сими сретение и беседование. Аще возлюбиши от сих отречение телом и душею: то рана болезни не приближится к души твоей, и печали стрела не уязвит сердце твое, ниже опечалит лице твое. Вслаственный бо обычай оставляющии и ко всем реченным пристрастие отринувшии, остроту печали притупляют. Христос бо в подвизающейся душе является, и радость неизглаголанную подает сердцу, и духовную радость ничтоже из сладких, или лютых вещей мира, взимати когда может. Размышления бо благая, и памятования спасительныя, и разумевания Божественная, и словеса премудрости служаще подвижнику, сохраняют его во всех путех дел его, яже по Бозе. Темже и наступает на всякую безсловесную похоть, и продерзливую ярость, яко на аспида и василиска, и попирает гнев яко льва, и сласть яко змия. Вина же сего, яко всю свою надежду от человек и реченных вещей отложив, к Богу обратил ю есть, и разумом Божиим из_обилует, и Бога присно умне на помощь свою призывает. Яко на мя, глаголет Господь, упова, и избавлю и, покрыю и, яко позна имя мое. Воззовет ко мне, и услышу его: и не точию от оскорбляющих избавлю, но и прославлю его.{Псал. 90, ст. 14 и 15.} Зриши ли подвизающихся по Бозе подвиги, и яже отвсюду почести? Потщися убо звание сие сотворити деянием. И якоже уединился еси телом, отвергая и вещей разумения, пременил еси одежду: то и странна сотвори себе, и словес отвержися, и по родству сродников. Аще бо не престанеши от окрест скитания внешних, то не возстанеши на внутрь подседающих. Аще не победиши яве ратующих, то не сокрушиши неявных наветников. Егда же внешния молвы упраздниши, и внутренния помыслы оставиши, воздвижется тогда ум в делех и словесех духа. И вместо обращения со сродники и други, совершаеши образы добродетелей: и вместо суетных (с. 341) словес раждающихся от мирския беседы, просвещает и вразумляет душу явление Божественных словес, в мысли движимых. Разрешение чувств, узы бывают душе: а узы чувств, свободу даруют душе. Солнца запад, нощь творит: и Христу от души отходящу, обемлет оную страстей помрачение, и мысленнии звери растерзывают ю. Возсия чувственное солнце, и звери собираются в пещеры своя. Возсиявает и Христос на тверди молящияся мысли, и всякий мира сего обычай отходит, и любление плоти преходит, и ум исходит на дело свое, сиречь на поучение Божественно до вечера, не временным разстоянием определяя делание духовнаго закона, и в меру сие творя: но и дондеже настоящую жизнь конец постигши, исход души от тела соделает. Еже убо являя и пророк глаголет: коль возлюбих закон твой Господи, весь день поучение мое есть,{Псал. 118, ст. 97.} день нарицая всетечение настоящия жизни коегождо. Воздержися убо от внешних бесед, и подвигнися на внутренния помыслы, дондеже обрящеши место чистыя молитвы, и дом, в немже Христос живет, просвещаяй и услаждаяй тя познанием и посещением своим, и сотворит скорби, яже за него, мнети радость, мирския же сласти, якоже некий пелынь, не приимати. Ветры воздвигают волны морския, и аще не престанут ветры, не утихают волны, и не укрощается море, и дуси лукавствия в души нерадиваго воздвигают память родителей, братий, сродников, другов, пирований, торжеств, позорищ, и иных всех сласти мечтаний: и собеседование подущают творити зрением, и языком, и телом, да суетне изнуряется и настоящее время, и последующее, внегда же един пребываеши внутрь келлии, иждивается в памятех виденных и глаголанных вещей. И тако житие монаха безполезно бывает, зане таковии на мирская делания памяти своя изваяют мысли, якоже нозе человека на снезе ходяща своя следы. Аще (с. 342) брашно зверем подаем, когда оных уморим: и аще в делех и в помыслех безсловесному дружеству и обычаю присно поучаемся, когда умертвим плоти мудрование? когда житием по Христе, имже обещахомся, поживем? образ ног на снезе, или возсиявшу солнцу разрушается, или разседшейся воде исчезает. И памяти состоящия в мысли из сластолюбивыя склонности и деяний, от возсиявающаго в сердце молитвою Христа, и благоумильнаго дождя слез, уничтожаются. Не по разуму убо творяй монах, когда изгладит предприятия в мысли? Совершается деяние добродетелей в теле, аще оставиши мира сего обычай. Образуются памяти благия, и любопребывают в души Божественная словеса, аще частыми молитвами с горячим умилением, совершаемыми в мысли, памяти первейших деяний изгладиши. Просвещение бо памяти Божия с верою и сокрушение сердца, аки бритва, лукавыя изглаждают памяти. Подражай премудрости пчел: они бо ведуще рой ос, окрест их летание творящих внутрь улия пребывают, и вреда от наветников сих избегают. Осы разумевай быти собеседования мирская, сих бегая многим тщанием, пребывай в келлии монастырстей. И отсюду покушайся паки входити во внутреннейшее души стражбище, еже дом Христов есть, в немже мир и радость, и тишина известно зрится, мысленному солнцу Христу дары сия, яко некия лучи от себе испущающу, и яко некую мзду подающу, приемлющей его души с верою и добротолюбием. Седя убо в келлии, памятуй Бога, возводя ум от всех, и ко Богу невещательне привергая, все расположение сердца пред ним изливай, и любовию к нему прилепляйся. Память бо Бога, видение Бога есть, влекущаго зрение и желание ума к себе, и светом от себе озаряющаго оной. Обращаяся бо ум ко Богу, внегда преставати всем видотворным сущим мыслем, зрит безвидне, и превосходящим неведением неприступныя ради оныя славы, воззрение свое просвещает. И не познавая за непостижимость (с. 343) видимаго, познавает истины ради свойственне сущаго, и единаго могущаго превыше быти: и богатством источающияся отонуду благости питая свое рачение, и свое быстроумие извествуя, сподобляется непрестаннаго и блаженнаго покоя. Сия убо суть знамения рачительныя памяти. Молитва же есть беседа мысли ко Господу, совершающая глаголы моления с совершенным ума ко Богу взиранием. Мысли бо часте глаголющей имя Господне, и уму ясне внимающу призыванию Божественнаго имене, разума Божия свет аки облак светел всю осеняет душу. Последует же прилежней памяти Бога, любы и радость. Помянух бо, глаголет пророк Давид, Бога, и возвеселихся.{Псал. 76, ст. 4.} Чистей же молитве, разум и умиление. Воньже бо аще день, глаголет тойже, призову тя: се познах, яко Бог мой еси ты.{Псал. 55, ст. 10.} И паки: жертва Богу дух сокрушен.{Псал. 50, ст. 19.} Уму бо и мысли предстоящим Богови действенным взиранием и горячим молением, последует и душевное умиление. Уму же, и слову, и духу припадающим Богови, овому убо вниманием, овому же призыванием, овому же умилением, и любовию весь внутренний человек служит Господеви: возлюбиши бо, глаголет воплощенная истина, Господа Бога твоего от всего сердца твоего.{Луки гл. 10, ст. 27.} Обаче ведети тебе и сие хощу: да не како мня молитися, далече от молитвы ходиши, и трудишися без приобретения, и вотще течеши. Еже во устнем _псалмопении совершается, ум же инде носится, разделяяся во страсти и вещи, яко от сея вины повреждатися и разуму _псалмопения: сие бывает и в мысли. Множицею бо ей глаголющей словеса молитвы, ум не сопутствует, ко Богу не взирает, к немуже и молитвою беседа бывает, но уклоняется отай от мыслей некиих. И мысль убо глаголет обычне словеса, ум же разума Божия отбегает. Темже является тогда душа и неуразумеваема и неустроена, яко уму расточающуся в некая (с. 342) мечтания, и парящу или к тем, имиже бывает крадом, или к тем, яже хощет. Молитвенному бо разуму не присутствующу, ниже молящемуся предстоящу, побуждающему молитися, како усладится душа? како сердце возвеселится притворяющееся молитися, а не истинну молитву стяжавающее? возвеселится сердце ищущих Господа. Ищет же Господа, иже всею мыслию и усердием горячим ко Богу припадаяй, и всяк разум мира сего отражаяй, ради разума Божия и любве, источающихся от частыя и чистыя молитвы. Аз же, ради изяснения разсмотрительства во уме Божественныя памяти, и достоинства в мысли чистыя молитвы, во образ предлагаю телесное око и язык: еже бо есть зеница очеси, и языку произношение слова, сие есть уму память, и мысли молитва. Якоже бо око зрительным чувством емшися за предлежащее видимое, ни единаго гласа не творит, но искусом зрения приемлет познание видимаго: тако и ум, памятию рачительне к Богу предыдущий, прилеплением горячайшия любви и молчанием простейшаго разумения, от Божественнаго озаряется осияния, приемлет обручение будущия светлости. И якоже паки язык произнося глаголы слова, являет слышащему неявную волю ума: тако и мысль краткосложныя глаголы молитвы часте и тепле глаголющи, открывает прошение души вся ведущему Богу: и молитвенным приседением, и пребывательным сердца сокрушением, богатое спасение внутрь приемлет, и сокрушение то отверзает утробу милосердаго Бога. Сердце бо, глаголет, сокрушенно и смиренно Бог не уничижит.{Псал. 50, ст. 16.} Научит тя чистей молитве, и еже совершается пред царем земным: егда бо к царю приступиши, то и телом предстоиши, и языком молишися, и оком к нему взираеши, и тако царскую приязнь к себе привлекаеши. Сие и ты совершай, и в собрании церковнем, и во уединении келейнем. Собираяся бо о Господе (с. 345) с братиею, якоже телом предстояние твориши, и языком _псалмопение ему приносиши: тако имей и ум внимающ словесем, и Богови, и ведущ, кому беседует и молится. Крепце и чисте мысли в молитве пребывающей, сподобляется сердце радости неотемлемы и мира неизглаголанна. Наедине же паки в келлии приседя, в мысли молитвы держися, трезвящимся умом и сокрушенным духом: и видение осенит тя трезвением, и разум в тя вселится молитвою, и премудрость возляжет в тебе умилением, безсловесную сласть изгоняющи, и Божественную любовь вселяющи. Веруй ми, истину глаголющему, аще во всяком твоем делании неотлучну имети будеши от себе матерь добрых молитву, то не воздремлет она, дондеже укажет ти чертог оный, и внутрь поведет тя, и неизреченныя славы и веселия исполнит тя. Понеже вся препятствия отемлющи, стезю добродетели углаждает, и удобну ищущему сотворяет. Виждь же образ в мысли молитвы. Беседа сия убивает встраственныя помыслы. Смотрение сие ума ко Богу прогоняет помышления мира сего. Умиление сие души отгоняет любление плоти. И молитва сия, от еже глаголати немолчне Божественное имя, зрится согласием и соединением быти ума, и слова, и души. Идеже бо, глаголет Христос, еста два, или трие собрани во имя мое, ту есмь посреде их.{Матф. гл. 18, ст. 20} Тако убо молитва сия душевныя силы от разделения страстей воззывающи, и к друг другу, и к себе тричастную душу связующи, усвояет в триех впостасех единому Богу. Первее бо чрез образы добродетелей, студ греха от души изгладивши: таже доброту Божественных начертаний, сущим в себе святым разумом возживонаписавши, представляет душу Богови: сия же абие познавает творца своего. Воньже бо, глаголет, день призову тя, се познах, яко Бог мой еси ты.{Псал. 55, ст. 10.} И познавается от него: позна бо глаголет, Господь сущия своя.{2 Тим. гл. 2, ст. 19.} Познает чистоты (с. 346) ради образа: всяк бо образ к первообразию имать отношение. Познавается подобия ради, еже по добродетелем: имиже и познание имать Бога, и от Бога познавается. Моляйся получити царскую приязнь, трегуб образ употребляет: или гласы моляся, или молчя предстоит, или пред ногами могущаго помощи повергает себе. И чистая молитва, ум, и слово, и дух к себе совокупляющи, словом имя, умом же к Богу молимому взирает без парения, Духом же умиление, смирение и любовь внутрь являет. И тако умоляет безначальную Троицу, отца, и Сына, и святаго Духа, единаго Бога. Якоже различие снедей возбуждает желание к снедению их, тако различнии виды добродетелей возбуждают быстроусердие ума. Сего ради шествуя путем мысленным, чти глаголы молитвы, и беседуй Господни присно вопия и не унывая: часте моляся, и безстудию подражай оныя вдовицы умолившия неукротимаго судию. Тогда Духом ходиши, и плотским похотем не внимаеши, и помыслы мирскими частость молитвы не пресецаеши: но храм Божий еси, безмолвне Бога воспевая. Тако в мысли моляся, сподобляешися преходити и в память Божию, и входити в невходная ума, и взирати таинственными видении невидимаго, и единственне разумевательными и любительными излиянии, един наедине служя единому Богу. Егда убо себе увидиши в молитве ослабляющася, возми в руце книгу: и чтению внимая, разум внутрь приемли, не мимоходительне словеса преходя, но разсмотревая сия разумне, и разум сокровиществуя. Таже размышляй прочтенная, да от разумевания сего услаждается мысль твоя, и незабвенна пребывают чтения: и от сея вины привозжигается горячесть твоя в Божественных разумениих. В поучении бо моем, глаголет _псаломник, разгорится огнь.{Псал. 38, ст. 4.} Якоже бо брашно услаждает вкус, зубами раздробляемо: тако и Божественная словеса в (с. 347) души обращающася утучняют мысль и увеселяют. Коль бо сладка, глаголет порфирородный пророк, гортани моему словеса твоя.{Псал. 118, ст. 103.} Глаголи из уст и словеса евангельская, и блаженных отец провещания, и жития их испытуй, да имаши сия размышлением в нощех: яко да мысль от молитвы унывшую, чтением и размышлением Божественных словес обновляеши, и усерднейшу на молитву сотворяеши. Псалмопение усты совершай: обаче безмолвным зело гласом, и с настоятельством ума, не терпя оставити неразумеваемо что из глаголемых: но аще когда что избежит от ума, то паки начни оный стих, елижды ни случается, дондеже ум имети будеши последствующь глаголемым. Может бо ум и усты пети, и Бога памятовати. И сие уразумевай от естественнаго искуса. Якоже бо сретаяйся с неким и беседуяй, на сего и очима внемлет: тако и устнама пояй, и ко Богу памятию взирати может. Коленопреклонений не оставляй: коленопреклонением бо образуется падение греха, изявляющее исповедание. А от воставания ознаменовывается покаяние, обет жития, еже по добродетели, предпоказующее. Коеждо же коленопреклонение да совершается со умным Христа призыванием, да припадая душею и телом ко Господу душ и телес, Бога удобопримиряема соделаеши. Аще ли же и дело безмятежное рукама сотвориши с молитвою в мысли, во еже отражати сон и уныние: то и сие монашеский подвиг составляет. Вся бо явленная делания, с молитвою совершаемая, из_ощряют ум, уныние изгоняют, юностнейшу сотворяют душу, и быстрейшим и горячайшим ум ко упражнению в мысленном делании творят. Ударившу билу, исходи из келлии, телесныма очима зря на землю, мысль же к памяти Божией устремляя. Вшед во храм и лик соисполняя, ниже языком празднослови с сущим близ монахом, ниже умом пари на суетствия: (с. 348) но язык единем _псалмопением, мысль же молитвою утверждай. Отпуску бывшу, иди в келлию твою, и уставленное тебе правило начинай. На трапезу шед, не обсматривай части братния, ниже разделяй душу твою недобрыми подзираньми: но предлежащая пред тобою зря, и тех прикасаяся, телу давай пищу, слуху же слышание чтения, души же молитву, да телом и духом питаяся, всесовершенне восхвалиши исполняющаго во благих желание твое. Отонуду востав, с скромностью и молчанием входи в келлию твою, и яко трудолюбива пчела, со усердием твори добродетели. Егда совершаеши с братиею службу, то руце да делают, устне да молчат, и ум да памятует Бога: и аще бы некогда кто подвигнулся празднословити, ко пресечению безчиния, востая твори поклон. Помыслы отвращай, и не попущай сим протекати сердце, и в нем укосневати. Коснение бо встраственных помыслов страсти живит, ум же умерщвляет: но приражающияся оныя абие от первомыслия спеши стрелою молитвы убивати: аще ли же бы пребывали ударяти, и мысль смущати, и овогда уступающе, овогда же находяще, то веждь, яко укрепляемы суть от предварившия воли. Сего ради право имуще на душу за побеждение произволения, стужают и смущают ю: подобает убо изявляти оныя исповеданием, позорствуеми бо лукавии помыслы, прогоняеми бывают. Якоже бо свету сияющу тьма уступает, тако и свет исповеди потребляет помыслы страстей, яко и сии тьма суть: понеже тщеславие и отрада, в нихже имеяху место помыслы, низвратишася от срама исповедания и злострадания епитимии. Темже и мысль обретающе свободившуся уже от страстей частою и благоумильною молитвою, убегают со срамом. Егда бо подвижник покушается посецати молитвою смущающия его помыслы, посецает на мало время, и возбраняет многомыслие их, якоже боряся и пряся, но не избавляется вовсе: понеже вины стужающих помыслов любит, покой плоти и мирское любочестие, (с. 349) ихже ради и к исповеданию не устремляется. Темже и мира не имать, зане вины, еже ратовати супостатом, содержит. Кто же содержа чужды сосуды, от господей их не истязуем бывает в сих? Кто же истязуемь, и не оставляя оныя, яже содержит зле, избавляется от соперников своих? Егда же подвизающийся, памятию Божиею возмогши возлюбит уничижение и озлобление плоти, и непостыдне сотворит исповедание помыслов: то абие супостаты отходят, мысль же свободна сущи, частость молитвы и Божественных размышление непресецаемо имать. Всякое подозрение, движимое в сердце на кого, отвергай всесовершенне, яко разоряющее любовь и мир. Всякое же злоключение, извнеуду находящее, доблественне приемли, яко спасительнаго терпения виновно бывающее, терпения обитель и покой дарующаго на небесех. Тако дни совершая, с благодушием поживеши в настоящей жизни, веселяся блаженною надеждою, во исходе же с дерзновением от здешняго света преставишися, и вместо упокоения, яже уготова ти Господь, мзду за здешния труды воздая тебе, пойдеши с ним соцарствовати. Емуже подобает всякая слава, честь и поклонение, купно со безначальным его отцем, и всесвятым, и благим, и животворящим его Духом, ныне и присно, и во веки веков, аминь. Тогожде феолипта филаделфийскаго. 1. Ум, удаляяся внешних и собираяся во внутренняя, возвращается к себе, сиречь соединяется с сущим в мысли естественне своим словом: и чрез сущее с ним существенне слово совокупляется с молитвою: и молитвою восходит в разум Божий со всею любительною силою и усердием. Тогда похоть плоти погибает: и всякое вслаственное чувство праздно бывает, и красоты земныя являются неприятны. Созади бо себе положши душа вся телесная, и яже окрест тела суть, (с. 350) ходит в след красоты Христовы, тому последующи с делы честными и с чистотою мысли, и поющи: Приведутся Царю девы в след его,{Псал. 44, ст. 15.} Христа воображающи и предзрящи, и глаголющи: предзрех Господа предо мною выну, яко одесную мене есть.{Псал. 15, ст. 8.} Ко Христу любовию прилепляющися и взывающи: Господи, пред тобою все желание мое.{Псал. 37, ст. 10.} На Христа выну взирающи и вопиющи: очи мои выну ко Господу.{Псал. 24, ст. 15.} Ко Христу беседующи чистою молитвою, и услаждая его, веселящися: Да усладится ему беседа моя, аз же возвеселюся о Господе.{Псал. 103, ст. 34.} Приемля бо Бог беседу от молитвы, и яко любимь, и яко именуемь, и яко на помощь взыскуемь, молящейся души неизреченную дарует радость. Поминая бо Бога беседою молитвы, увеселяема бывает от Господа: помянух бо, глаголет пророк Давид, Бога, и возвеселихся.{Псал. 76, ст. 4.} 2. Бегай чувств, и сотвориши недейственну чувственных сласть. Бегай и мысленных мечтаний сладких, и сотвориши недейственно сладострастие помыслов. Ум же безмечтателен пребывая, яко неприемлющ, ниже от образов сласти, ниже от помыслов похоти образоватися и означатися, в простоте обретается. И быв превыше всех чувственных и мысленных вещей, возводит мысль к Богу: ничтоже ино, разве точию имя Господне частою памятию глубоце изглашая, яко младенец отца своего. Воззову бо, глаголет, именем моим, Господь пред тобою.{Исход. гл. 33, ст. 19.} И якоже адам, рукою Божиею создан быв от персти, бысть в душу живу дуновением Божественным: тако и ум, добродетельми образован быв, частым призыванием от чистыя мысли и теплаго усердия отай поющим, Божественным изменением изменяется, оживотворяемь и Боготворимь, от еже познавати и любити Бога. 3. Аще отступиши от похоти земных вещей частою и чистою молитвою, и вместо сна почиеши от всякия мысли, яже по Бозе, и утвердишися совершенне во единей памяти Божией: (с. 351) то созиждется в тебе, аки иная помощница, любы Божия. От молитвы бо усердное вопитие источает Божественную любовь, и Божественная любы возбуждает ум к явлению сокровенных. Тогда ум, с любовию совокуплен быв, премудрость плодоприобретает и премудростию неизреченная возвещает. Бог бо слово в молитве вопитием, по усердию именуемь, вземлет помышление ума якоже ребро, и дарует разум: и вместо его, исполняя благое расположение, дарствует добродетель: созидает светотворящую любовь: и приводит ко изступившему уму, и спящу и почивающу от всякия земныя похоти. Любы же, ина обретается помощница почившаго ума от безсловеснаго к чувственным вещем пристрастия. Темже и возбуждает ум яко чистый во глаголы премудрости. Тогда к ней зря ум, и услаждаяся, тайныя добродетелей расположения, и невидимыя действия разума изявляет протяжением словес. 4. Отступи от всех, яже по чувству, и остави закон плоти, и духовный закон напишется в мысли твоей. Якоже бо духом ходяй, похоти плотския не совершает,{Галат. гл. 5, ст. 16.} по слову апостола: тако и отступаяй от чувств и чувственных вещей, плоти сиречь и мира, ко еже духом ходити, и яже духа мудрствовати приходит. И о сем научися от тех, яже Бог на адаме прежде преслушания содела. 5. Подвизающагося в хранении заповедей, и в раю молитвы пребывающаго, и Богови приседящаго частою памятию, Бог оставляет от сластолюбивых плоти действий, и от всех яже по чувству движений, и от всех яже по мысли образов, и мертва содевая страстем и греху, Божественныя жизни причастника сотворяет. Якоже бо спяй и мертву уподобляется, и жив есть: то по действу тела, сие же по содейству души: тако и в дусе пребываяй, плоти и миру умерщвляется, живет же мудрованием духа. (с. 352) 6. Аще знаеши, яже поеши, то познание приемлеши. От познания стяжаваеши разум, от разума прозябает деяние уведенных, от деяния разум по навыкновению плодоприобретаеши, разум же, иже во искусе, истинное видение открывает: от сего премудрость возсиявает светозарными благодати словесы, исполняющи воздух мысли, и внешними изясняющи сокровенная. 7. Первее ум ищет и обретает: таже соединяется со обретшимся. И искание творит словом, соединение же любовию. И искание, еже словом, бывает истины ради, соединение же любве блага ради. 8. Скоротечное настоящих вещей естество превосходящий, и похоть преходящих претекающий, не зрит на дольняя, не вожделевает красот земных: но горняя видения отверзаема имать, и на доброты, яже на небесех, взирает, и нетленных усматривает блаженство. Якоже бо зияющему на вещества земли, и ко сластем плоти поницающему, затворена суть небеса, яко имущему умная очеса помрачена: тако презираяй дольняя, и отвращаяйся от них, возвышен имать ум, и славу присносущных зрит, и отложенную святым разумевает светлость. Сей и любовь Божию, свыше сходящу на него, приемлет, и храм святаго Духа бывает, и Божественных велений вожделевает, и Духом Божиим водится, и сыноположения сподобляется, и Бога имать благоволяща о нем и угождаема. Елицы бо Духом Божиим водятся, сии суть сынове Божии.{Римл. гл. 8, ст. 14.} 9. Немощи ради да не оставиши молитву ни в какой и ни во единый день, дондеже воздышеши, слыша глаголющаго: Еда немощствую, тогда силен есмь.{2 Кор. гл. 12, ст. 10.} Сие бо творя, более воспользуешися, и оная вскоре тя возставит по действующей благодати: идеже бо утешение духа, ту немощь или уныние не пребывает.