<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 303) Филофей преподобный отец наш, бывый игумен словесныя паствы иноков, яже в синаи, и сего ради синаит нарицаемый, в кои процвете времена, и скончася, безвестно. Настоящую же сию книгу, на четыредесять глав разделенную, яко преизрядне им сочиненную, и множайшия, юже немощно изрещи, Духовныя премудрости и душевныя пользы исполненную, к лику прочих глав о трезвении присоединити не бе угодно праведнику. Многаго же и требует. Правилом бо оную известным трезвения, и хранения ума, и чистоты сердечныя нарещи мощно непогрешительно в истине. (с. 304) Преподобнаго отца нашего ФИЛОФЕА СИНАЙСКАГО, главизны о трезвении, 40. 1. Есть в нас мысленная брань, чувственныя лютейшая: и подобает делателю благочестия тещи, и к намерению следовати умне, еже совершенне память Божию в сердце якоже бисер, или камень честен стяжати: и подобает вся оставити, и тело, и самую настоящую жизнь презирати, да Бога единаго в сердце имеем. Довлеет бо: рече Божественный златоуст, Боговидение умное погубити лукавыя супостаты. (В маргарите лист 504). 2. Всею убо силою должни суть мысленне подвизающиися духовная делания из Божественных писаний избирати, и ко уму, якоже цельбоносныя пластыри прилагати: и от утра, глаголет, с опасною памятию Божиею, и непрестанною в души Иисуса Христа молитвою, мужественно и строго стояти во вратех сердца, и убивати мысленною стражею вся грешныя земли, и восторгом и протяжением верныя памяти Божия посецати главы сильных о Господе, и начала ратных помыслов. Понеже вемы и в мысленных подвизех Божественное некое делание и чин. И сице подобает нудящимся творити, дондеже настанет снедения время: потом же благодарившим Господеви, единаго ради человеколюбия сугубо насыщающему нас (с. 305) пищею, и духовне и телесне, памятию смерти и поучением подобает изнуряти себе, и в наступающий день паки утренняго дела крепко держатися. Едва бо сице на всяк день творяще, избегнути возможем о Господе мрежей мысленнаго врага, яже укосневая в нас раждают три сия: веру, надежду и любовь. И вера воистинну устрояет нас боятися Бога: надежда же, преходя рабский страх, с любовию Божиею соединяет человека, зане упование не посрамит: понеже раждати весть сугубую любовь, еюже закон и пророцы висят. Любы же николиже отпадает с тем, егоже виною бывает и в сем веце причастнику своему, исполняющему Божественныя законоположения, и в будущем. 3. Редко же есть зело обрести умом безмолвствующия. И онех точию есть сие, иже Божественную благодать, и утешение сею вещию приближити к себе ухищряются. Аще убо любомудрие о Христе, во блюдении ума и трезвении умное оное делание проходити хощем, воздержанием многих ястий уже путь сей начнем, мерою ястия и пития по силе приемлюще. Глаголется бо трезвение праведно, путь в царствие ведущий, и в сущее внутрь нас и в будущее. Умное же делание яко соделовающее и убеляющее нравы ума, и от страстнаго в безстрастное прелагающее, оконцу светлому Уподобляется, имже Бог приникши является уму. 4. А идеже смирение и память Божия, из трезвения и внимания состоящая, и частая молитва противу врагов воздвизаемая, тамо есть место Божие, или сердечное небо, в немже бесовский полк страшится пребывати, обитающаго ради в оном месте Бога. 5. Ничтоже многословия есть смутительнее, и языка невоздержнаго злее, и ничтоже паче может состояние души потребити. Яже бо на всяк день назидаем, оно разрушает, и яже трудом собираем, языкоболием душа расточает. Что бо онаго горше: неудержимо зло. Подобает убо оному часть (с. 306) предел положити, и нужду наложити и подавити оной, и да сице реку, еже на потребу точию служити. И кто изрещи может всю от языка бывающую душевную тщету? 6. Первая дверь, вводящая в мысленный иерусалим, во внимание ума, есть молчание уст в разуме, аще и не безмолвствует еще ум. Вторая же, от брашен и питий воздержание умеренное. Третия, ум и тело очищающая, смерти непрестанная память и поучение. Сея аз красоту единою узрев, и духом, а не оком уязвлен и услажден быв, супругу мне в сем житии восхотех стяжати, рачитель быв благолепия тоя и честности. Како есть она смиренна, радостопечальна, разсмотрительна, пристрашна будущаго праведнаго истязания, боящася отлагательства жития: и от чувственных очес воду животну целительну обыче источати, от мысленных же очес источник испускающий премудрейшия мысли, иже течя и скача веселит смысл. Сию, якоже рех, дщерь адамову, память, глаголю, смерти, жаждах присно сожительницею имети, и с нею спати, и с нею беседовати, и что имать быти по отложении сего телесе, соистязовати: но не позволяло многащи скверное забвение, омраченная диаволя дщерь. 7. Есть брань, втайне от духов лукавствия чрез помыслы с душею сражающаяся. Невидимей бо ей сущей и зложелательныя силы оныя, подобне ея существу, невидимою бранию к ней приходят. И мощно видети между оными и сею, и оружия, и ополчение и лестныя прельщения, и брань страшну, и сражение ратническо, и победы и побеждения от обою страну. Единем же не достаточествует сия мысленная брань: ейже поучаем, пред чувственною бранию, временем предуставления рати. Чувственная бо брань навыче и время себе, и чин определяти: оная же безвестно предлагает, внезапу от самыя среды сердца подседая, душу умерщвляет грехом. Чесого ради, и почто подвиг сей и брань составляется на ны? Да (с. 307) не будет исполняема нами воля Божия, о нейже молимся глаголюще: да будет в нас воля твоя.{Луки гл. 11, ст. 2.} Воля же сия суть заповеди Божия. И аще кто о Господе ум свой вельми трезвенне поставив от прелести бесов, входы их и приплетения, от мечтаний составляемыя, тщательне усматривати будет, обрящет их искусом. Темже и Господь, противу скверных бесов намерение протязая, яко Бог, помышления их предвидя, сопротиву их намерения заповеди своя, с прещением преступающим, положи. 8. Егда в навыкновении некоем бываем, воздержания глаголю, и удаления от являющихся зол, пятьми чувствы производимых, после сего возможем и сердце блюсти со Иисусом, и от него сердцем просвещатися, и со желанием некиим теплым благостыни его умом вкушати. Понеже не иного ради чесого очищати сердце закон прияхом, но яко да облаком лукавствий, изшедшим от воздуха сердечнаго, и расточившимся частым вниманием, яко во ведренный день чисте видети возможем солнце правды, Иисуса, и от части просветитися во уме словесы величествия его. Понеже не всем являтися обыкоша, но точию очищающим смысл. 9. Сице себе на всяк день подобает совершати, яковым подобает явитися пред Богом. Глаголет бо пророк осиа: Милость и суд храни, и приближайся к Богу твоему выну.{Осии гл. 12, ст. 6.} И паки малахиа от лица Божия глаголет: Сын славит отца, и раб господина своего убоится: и аще отец есмь аз, то где слава моя? и аще Господь есмь аз, то где есть страх мой? глаголет Господь вседержитель.{Малах. гл. 1, ст. 6.} И апостол: Очистим себе, глаголет, от всякия скверны плоти и духа.{2 Кор. гл. 7, ст. 1.} И премудрость паки: Всяцем хранением блюди твое сердце: от сих бо исход живота.{Прит. гл. 4, ст. 23.} И Господь Иисус Христос глаголет: очисти внутреннее сткляницы, да будет и внешнее чисто.{Матф. гл. 23, ст. 26.} (с. 308) 10. Безвременныя беседы овогда ненависть в слушателех к нам раждают, овогда же укоризны и посмеяния в зазирающих безумие глаголов: иныя же осквернение совести, иныя осуждение от Бога, и печаль Духа святаго. Еже и есть ужаснейшее всего иного. 11. Очищаяй сердце свое, и из корене исторгаяй о Господе грех, и трудяйся разума ради Божественнейша, и умом видяй многим невидимая, не должен есть сего ради на некоего взиматися. Ничтоже бо чистейше есть в созданиях безплотнаго, ничтоже ангела разумнейше. Но вознесшийся диавол яко молния с небесе низвержен бысть, сице высокомудрие его в нечистоту пред Богом вменено бысть. Явлени же суть злато ископавающии. 12. Глаголет апостол: подвизаяйся, от всех воздержится:{1 Кор. гл. 9, ст. 25.} яко несть мощно с насыщением брашен,{1 Тим. гл. 4, ст. 3.} противу начал и властей невидимых, и зложелательных лукавых сил, ополчатися плотию сею злострадательною связанным, и присно похотствующею на дух. Не бо есть царствие Божие брашно и питие.{Рим. гл. 14, ст. 17.} Мудрование плотское, вражда есть на Бога: закону бо Божию не покаряется, ниже во может,{Рим. гл. 8, ст. 7.} глаголет. Яве, яко сего ради не может, понеже землено суще, со желчию, и кровию мокротою смешенно, и присно долу стремящееся, присно пристраствует к земным, и услаждается погибающими сладостьми настоящаго века. Мудрование бо плотское, смерть есть: сущии же во плоти, Богу угодити не могут.{Рим. гл. 8, ст. 6, 8.} 13. Многое же смирение нам потребно прилежащим к хранению ума о Господе, первее пред Богом и людьми. Многообразне же всегда должни есмы сокрушати сердце, всему смиряющему обучающеся. Сокрушати же и смиряти весть сердце память древняго нашего в мире жития, аще совершенне мы памятуем, и память согрешений всех от младенчества, по (с. 309) виду умом разсматриваемых, кроме плотских, сих бо воспоминание вредно есть: и смиряти весть, и слезы раждати, и ко благодарению Божию всесердечне нас подвизати, якоже и всегдашняя и явственная память смерти. Сия бо и плачь раждает со сладостию некоею и радостию, и трезвение ума. Крепце же смиряет мудрование превознесенно взирати на землю, и память страстей Господа нашего Иисуса Христа, по виду и сим памятию собираемым и воспоминаемым. Слезы же и сия подают. И сверх сего смиряют душу и многая благодеяния Божия, яже к нам, по виду исчисляемыя и разсматриваемыя, понеже к гордым бесом брань имамы. 14. Не отрицайся ты по самолюбию сицевых спасительных врачеваний души. Зане неси прочее Христов ученик, и ниже павлов подражатель, иже несмь доволен, глаголет, нарещися апостол.{1 Кор. гл. 15, ст. 9.} И паки: сущаго первее хульника и гонителя и досадителя, зриши ли, горделиве, святаго, яко не забываше первейшее житие. и вси же святии от начала создания мира даже до ныне, в сию облачахуся последнейшую Божию одежду. Зане и сам Господь наш Иисус Христос Бог сый непостижим и недоведом, и неизглаголан, хотя показати путь вечныя жизни и святости во смирение облечен бе во все свое житие во плоти. Сице убо святое смирение Божественною добродетелию праведно достоит нарицатися, и Владычнею заповедию и утварию: и ангели, и все светлыя и Божественныя оныя силы сей добродетели изучаются, и хранят ведяще, каковым падением паде разгордевыйся сатана, и во образ того, яко страшитися подобает падения ангелом и человеком, лежит лукавый в бездне, всякия иныя твари безчестнейшим пред Богом, своея ради гордыни показався. Вемы же, киим падением и адам от гордыни паде. Толики убо имуще образы высокотворныя добродетели, всячески присно да смиряемся, елико мощно, (с. 310) сии употребляюще. Смиримся душею и телом, и мудрованием, и хотением, и глаголы, и помышленьми и образом, и внеуду и внутрьуду, еже наипаче искати подобает, да сущаго по нас Иисуса Христа Сына Божия и Бога, противу нас имети не будем. Господь бо гордым противится, смиренным же дает благодать.{Прит. гл. 3, ст. 34.} И: Нечист пред Господем всяк высокосерд.{Прит. гл. 16, ст. 5.} И: смиряяй себе, вознесется.{Луки гл. 18, ст. 14.} И: научитеся от мене, яко кроток есмь и смирен сердцем.{Матф. гл. 11, ст. 29.} Темже внимати подобает. 15. Зрите, глаголет Спаситель, да не отягчают сердца ваша,{Луки гл. 21, ст. 34.} и прочая. Подвизаяйся же, от всех воздержится.{1 Кор. гл. 9, ст. 25.} Вся убо сия к нам от Божественнаго писания реченная ведяще, воздержне житие да проведем. Прежде всех от многих брашен отвращатися чином и обычаем добродетельным тело обучим, мерою пищу оному подающе. Сице бо взыграния и самыя похотныя части удобнее утоляются и покаряются владыце, сиречь словесной части, и аще подобает рещи вероятно и истинно, и движения ярости. Но и прочих согрешений удобь да удаляемся. Зане и сие добродетель судится быти, искус добродетели приимшим, еже совершенно воздерживатися, сиречь от всякаго вида лукава удалятися. Вина бо чистоты предварительне есть Бог, иже всех добрых вина и податель: потомже и от брашен многих равное на всяк день и умеренное воздержание. 16. Якоже сатана сопротивляется Богови, во еже не быти воли Божией: яже суть заповеди имиже покушается воспретити ю нами, ратует на Бога: сице паки нами хощет Бог совершатися всесвятой его воли, яже суть, якоже рекох, Божественныя и животворныя заповеди, низлагая нами, и своею помощию пагубное намерение лукаваго. Вражие бо несмысленное хотение, еже мнится Богу сопротивлятися, имиже нарушает он заповеди (с. 311) его, сам напротив Бог человеческою немощию низвращает: и зри, аще не тако есть. Вся убо Божественнаго евангелиа заповеди, тричастности души мнятся законополагати, и здраву оную творити теми, яже повелевают: паче же не точию мнятся, но и истинно оную здраву творят. Противу сея убо тричастности души, видится и диавол нощию и днем ратовати. Аще с тричастностию ратует сатана, яве, яко и со заповедьми Христовыми ратует. Христос бо тричастности души заповеди законополагает, яже суть: яростная, желательная и словесная. И смотри: гневаяйся на брата своего всуе, повинен есть суду,{Матф. гл. 5, ст. 22.} и прочая его заповедания: се цельбы ярости. Враг же паки заповедь сию, и яже о ней, покушается низвратити внутрь помыслы любопрений, злопомнения и зависти. Весть бо и сам супостат, яко яростныя части наставник есть словесная, и на сию якоже рекох, помыслы стреляя мнениями зависти, любопрения, распри, лести, тщеславия, склоняет словесную часть оставити свое начальство, и вдати ярости узду, и неуправляемую оную оставити. Ярость же якоже кормчаго отвергши износит словесы чрез уста предлежавшая в сердце, яже помыслы вражиими и нерадением ума в сердце быша сокровена, и сердца вместо Божественнаго Духа, и Божественных мыслей, тогда злобы суще исполнено видети мощно, якоже рече Господь: от избытка сердца глаголют уста.{Луки гл. 6, ст. 46.} Аще бо во глаголы внутрь поучаемая лукавый извести возможет: ят бывый не рака брату токмо речет, и юрод, но и досадительныя глаголы, и во убийство многажды впадет. Сия убо лукавый употребляет, ради Бога давшаго заповедь, еже не гневатися всуе. Яже можаху не произыти в глаголы досадительны, и сим последующая, аще бы в начале прилога абие отгнашася от сердца молитвою и вниманием внутренним. Тако всегубитель получает свое намерение, (с. 312) аще вложенными в сердце помыслы обрящет себе Божественную заповедь разрущающа. 17. Кая же и желательной части от Божественной заповеди Владычней заповедашася? воззревый на жену, ко еже вожделети ея, уже любодействова с нею в сердце своем.{Матф. гл. 5, ст. 28.} И сию данну бывшу видев злодей, яковы плетет на заповедь мрежи: далече бо удаливши от раздражающаго сего вещества, брань внутрь поставляет: и мощно видети живонаписуемыя от него во уме образы, и из_ображения блудныя, и мощно словеса слышати возбуждающия к страсти, и ина, яже ведят ума искус имущии. 18. Кая же убо есть и словесной части советующая заповедь? аз же глаголю вам: не клятися всяко. Буди же слово ваше: ей, и ни.{Матф. гл. 5, ст. 34.} И: не отрекийся всех и последуяй мне, несть мене достоин. И: Внидите узкими враты:{Матф. гл. 7, ст. 13.} сия заповедания словесной части. Паки убо супостат, якоже некоего храбраго воеводу победити хотя, иже есть словесная часть, помыслы чревобесия и нерадения оную от смысла уклонив, над владычествием ея, яко пияну воеводе наругався и изгнав, ярость и похоть служителей своих хотений сей змий употребляет. Силы же сия, желательная, глаголю, и яростная часть, оставлены суще от словесныя, пять наша чувства служителями употребляют, во еже согрешати яве. И сия суть согрешения. Тогда убо и очи любопытни суть, не имуще ума, во внутренность их заключающа, и слух слышати суетна любящ, и осязание разслабляемо, и уста неудержима, и руце, яже не подобает, касающияся. Имже последует вместо правды, неправда: вместо мудрости, безумие: вместо целомудрия, блуд: вместо мужества, боязливость. Сия бо суть главныя четыре добродетели, сиречь: правда, мудрость, целомудрие и мужество крепкое тричастность управляют. Тричастность (с. 313) же добре управляема, чувства от безместных удерживает. И тогда убо ум тишину имея, силам же его Божественне управляемым и послушным сущим, удобее в мысленной брани воинствует. Аще же невниманием смущает своя силы, побеждаемь от прилогов вражеских, Божественныя заповеди преступает: преступлению же всячески последует или покаяние равное оному, или мука в будущем веце. Добро убо уму присно трезвитися, еюже вещию став по естеству, бывает Божественных заповедей истинен хранитель. 19. Душа от духов лукавствия стеною окружена и ограждена, и связася веригами мрака, не могуща сущия ради окрест себе тьмы, якоже хощет, помолитися, втайне бо связуется, слепотствующи внутреннима очима. Егда убо начало приимет молитися Богови, и трезвитися молитвою, тогда она от тьмы молитвою разрешится: инако бо разрешитися не возможно есть. Тогда бо познати может душа, яко внутрь сердца есть ино борение, и ино тайно сопротивление, и ина брань помыслов духов лукавых, якоже и святое писание свидетельствует. Глаголет бо: аще дух владеющаго взыдет на тя, места твоего не остави.{Еккл. гл. 10, ст. 4.} Место же его есть, ума крепкое стояние в добродетели, и трезвение: стояние бо есть и при добродетели, и при злобе. Глаголет бо: Блажен муж, иже не иде на совет нечестивых, и на пути грешных не ста.{Псал. 1, ст. 1.} И апостол: станите убо препоясани чресла ваша истиною.{Ефес. гл. 6, ст. 14.} 20. Держим Христа зело крепце, подвизающихся ради непрестанно от души пояти того, да не уклонится Иисус народу сущу помыслов, на месте души. Егоже несть возможно, кроме труда душевнаго, крепце держати. Коснемся во плоти его жития, да наше со смирением препровождаем. И держимся его страстей, да скорбная претерпеваем, тому ревнующе. Вкушаим (с. 314) неизреченное и снисходительное его о нас смотрение, да от вкушения души сладкаго познаваем, яко благ Господь. Кроме же всех сих, или и прежде всех, несумненно ему веруим, о нихже глаголет. И промысла его, о нас бывающаго, на всяк день ожидаим. И якоже убо прилучится, благодарне и с целованием, и усердне приемлим. Да навыкнем к Богу точию зрети, иже вся управляет Божественными словесы премудрости. И егда вся сия сотворим, тогда не далече негде от Бога есмы. Благочестие бо есть несовершенное совершенство, якоже рече некто от Богоносных мужей и совершенных духом. 21. Искупуяй бо свою жизнь добре, и в помышлении непрестанно и памяти смертной пребываяй, и премудре от страстей ум сею вещию отвлекаяй, сей и повсечастная пришествия бесовских прилогов всяко быстрее зрети обыче того, иже кроме памяти смертныя житие провождати восхоте, единаго ради разума сердце очищая, а не плачевну и печальну всегда соблюдая мысль: сей мняся быстроумием вся побеждати губительныя страсти, единою связан есть, якоже не весть горшею всех, и падает множицею высокомудрием вне Бога. Сему подобает зело трезвитися, яко да не воскичився погубит смысл. Навыкоша бо, якоже павел глаголет, души отсюду и отинуду собирающия, кичитися на меньших, яковыми сии кажутся:{1 Корин. гл. 8, ст. 1.} в нихже искры, якоже мню, назидающия любве несть. А иже имать память смерти, по всяк вечер нашествия бесов быстрее видя, паче другаго, прогоняя низлагает. 22. Обыче сладостная Божия память, сиесть Иисус, с яростию сердечною и горестию спасительною разрушати помыслов вся козни: разумения, словеса, мечтания, воображения темная. И вкратце рещи, вся имиже ополчается и дерзает всегубительный (с. 315) враг, ищай поглотити души. Призываемь же Иисус вся удобно попаляет, ни во едином бо ином наше есть спасение, точию во Христе Иисусе. Еже и сам рече Спаситель: без мене не можете творити ничесоже.{Иоан. гл. 15, ст. 5.} 21. Со всяким убо хранением сердце наше на всяк час и мгновение соблюдем от помыслов, помрачающих душевное зерцало. В немже воображатися и светле написыватися обыче Иисус Христос, Бога отца премудрость и сила: и внутрь сердца непрестанно ищем царствие Божие, зерно, и бисер, и квас, и иная вся таинства обрящем, внутрь нас самех, аще око ума очистим. Сего ради и Господь наш Иисус Христос рече: царствие Божие внутрь вас есть,{Луки гл. 17, ст. 21.} являя пребывающее внутрь сердца Божество. 24. Трезвение убо светлостне очищает совесть: сей же очищшейся, яко свету покрываему, абие возсиявша велию отгоняет тьму. Сей же отгнанней частым трезвением истинным, таящаяся дела паки совесть показует, и чрез ум научает трезвением невидимому борению и словесной брани, и како подобает метати копия в единоборстве, и метати благометаемыми в цель копиями помыслов, не быти же низлагаему уму крыющуся у Христа, вместо вредныя тьмы желающу света, егоже вкусивый разумеет, еже глаголю, гладом мучит паче душу питаему, и никогдаже насыщаему, но елико ядущу, еще паче алчущу. Свет привлекаяй ум якоже солнце око, иже несказанен сый, не словом сказуемь, но искусом пострадавшаго, или уязвившагося истиннее рещи, молчати ми заповедует, аще и хощет ум всегда наслаждатися словесы оными, яже глаголет: Мир имейте и святыню со всеми, ихже кроме никтоже узрит Господа:{Евр. гл. 12, ст. 14.} стяжания во ради любве и чистоты, сия суть мир и освящение. 25. Ярость подобает вооружати противу единых бесов, помыслы на ны враждующих и ярящихся. Образ же (с. 316) сущия в нас повсечастныя брани слыши и сотвори: трезвению совокупи молитву, трезвение бо молитву очищает, сия же очищающее (оное трезвение). Трезвение бо непрестанно зряще, разумеет входящих: возбранивши же мало оным входити, в помощь призывает Господа нашего Иисуса Христа, отгнати лукавыя. Внимание же сопротивоглаголюще возбраняет им. Призываемь же Иисус, отгоняет бесы с мечтаньми их. 26. Зело опасне блюди твой ум. Внегда убо разумееши, помысл, вопреки ему глаголи, абие же вскоре во отмщение призови Христа. Сладкий же Иисус, еще тебе глаголющу, речет: се приидох, подати ти заступление. Ты же, сим врагом совершенно молитвою утишившимся, паки внемли уму. Се паки волны множае прежних, едина за другой стремящияся, от нихже погружается душа: но се паки Иисус возбуждаемь от ученика, и лукавым ветром запрещая яко Бог.{Матф. гл. 8, ст. 25 и 26.} Упраздняся же от сих час негли, или мгновение, слави спасшаго тя, и помышляй о смерти. 27. Со всяким вниманием сердца, в чувствии души да течем. Внимание бо и молитва, на всяк день сопрягаемы, подобны суть огненосной илиине колеснице, яже на высоту небесную причастника своего возвышают. И что глаголю? трезвение бо исправляющему, или исправити тщащемуся, сердце чисто, с солнцем, и луною, и звездами, небо мысленно соделася: Бога же невместимаго бывает вместилище, по таинственному видению и восхождению. Иже убо имать любовь к Божественной добродетели, да искушается произносити во всякое мгновение имя Господа, и со усердием словеса производити в дела. И иже пять чувств, от нихже душа весть повреждатися, нуждею некоею удерживает, легчайшим уму своему, сердечный подвиг и брань всячески соделовает. Возбраняй убо всем внешним вымышленьми некиими, и борися с раждаемыми от (с. 317) них внутрь безплотными помыслы, Божественными ухищреньми. Трудом бдений сласти отгоняй, и в ястии и питии воздержанен буди: и тело довольне истончевай, да легкою сердечную брань удобне себе соделаеши: благодетельствуя себе, а не иному. И помышлением смерти душу мучи, Иисуса Христа памятию собирай расточенный свой ум. В нощи бо паче обыче ум ясен быти от светлых видений Бога и Божественных. 28. Не отрицаимся трудов и телесных обучений: от земли бо пшеница, от таковых же радость духовная и искус благих произрастает. Ниже совесть прельщаем беседующую с нами о спасительных и деятельных, подобающих и должных, глаголющую непрестанно, и наипаче, аще случится действенным и деятельным и тонким ума трезвением очищаема. Приличный бо тогда и несомненный скорый суд обыче производити ради чистоты своея. Темже не подобает сих ради прельщати ю: житие бо угодное Богу, внутрь возвещает, и душу жестоко обличающи, грехми некогда обагрившу смысл, согрешения паки показует исправление, советующи сердцу согрешившему каятися, показующи цельбу сладостным беседованием. 29. Дым, от древа восходя, тяжек бывает очам, но послежде показует оным свет, и услаждает, ихже первее опечаляше: и внимание непрестанно зрящее наносит тяжесть. Пришедый же Иисус призываемь молитвою просвещает сердце: память бо его вкупе со осиянием подает наилучшая благая. 30. Обыкл некако враг ум наш возмущати, и персть ясти и нам с собою желает, и сущим по образу Божию на чреве ходити. Сего ради глаголет Бог: вражду положу между тобою и тем.{Быт. гл. 3, ст. 15.} Сего ради подобает нам присно к Богу воздыхати, да сим неуязвлени от диавольских раждеженных стрел на всяк день пребываем. Покрыю и, глаголет, яко позна имя мое.{Псал. 90, ст. 14.} И: обаче близ боящихся его спасение его.{Псал. 84, ст. 10.} (с. 318) 31. Блаженный апостол, сосуд избранный, о Христе глаголяй, искус многий внутренния и в нас самех сущия невидимыя и мысленныя брани имый, ко ефесеем пишет, глаголя: Несть наша брань к крови и плоти, но к началом, и ко властем, и к миродержителем тьмы века сего, к духовом злобы поднебесным.{Ефес. гл. 6, ст. 12.} Петр же глаголет: Трезвитеся, бодрствуйте, зане супостат наш диавол, яко лев рыкая ходит, иский кого поглотити, емуже противитеся тверди верою.{1 Петр. гл. 5, ст. 8 и 9.} Господь же наш Иисус Христос, беседуя о различных произволениях слышащих евангельская словеса, рече: Потом же приходит диавол, и вземлет слово от сердца, сиречь, забвением лукавым крадьбу соделовая, да не веровавше спасутся.{Луки гл. 8, ст. 12.} И паки апостол: соуслаждаюся бо закону Божию по внутреннему человеку: виждуже ин закон во удех моих противувоюющ закону ума моего, и пленяющ мя.{Римл. гл. 7, ст. 22 и 23.} Реша же сия учаще нас, и сокрытое от нас явленным творяще. 32. Обыкл разум некако кичитися, мняся быти паче многих, аще лишится самоукорения и смирения, от нихже бывает познание своея немощи. Сие мудрствуем, слышаще глаголющаго: Братие, аз себе не у помышляю достигша: едино же, задняя убо забывая, в предняя же простираяся, со усердием гоню, к почести вышняго звания Христова.{Филип. гл. 3, ст. 13 и 14.} И паки: аз тако теку, не яко безвестно, тако подвизаюся, не яко воздух бияй: но умерщвляю тело и порабощаю, да не како, иным проповедуя, сам неключимь буду.{1 Кор. гл. 9, ст. 26 и 27.} Видел ли еси смирение, елико вкупе и течение к добродетели? зриши ли, каково есть святаго павла толикаго и таковаго мужа смирение: Христос, глаголет, прииде в мир грешники спасти, от нихже первый есмь аз. Темже нужда нам смирятися, аще худость естества имамы. Что бо брения хуждше? и Бога поминати нам подобает, (с. 319) зане сего ради и сотворени есмы. Но и воздержанию подобает обучатися, да легцы течем о Господе нашем. 31. Не возможно лукавым помыслом себе предавшу чисту быти в внешнем человеце от грех, и несть возможно неискореняемым от сердца лукавым помыслом не произноситися в дела лукавая. И зрения прелюбодейнаго, и помрачения виновно то, что внутреннее око прежде прелюбы сотвори. Желания слышати студная виновно то, что слушаем душевными ушесы, якобы внутрь сущих студных бесов, и вне, якова на нас шепчут. Должни убо есмы о Господе очищати себе внутрь и вне, блюсти же должен есть кийждо от нас своя чувства, и очищати на всяк день от страстных действ греховных. И якоже первее от неразумия в мире обращающеся в суете ума нашего, поработихомся всем умом и чувствы прелести греховней: тако паки подобает нам прешедшим к житию по Бозе, работати всем умом и чувствы Богу живу и истинну, и Божией правде и хотению. 34. Первее есть прилог, потом сочетание, таже сосложение, потом пленение, таже страсть, частотою и навыкновением укрепившаяся. Се убо сущия на ны брани победа: сице бо и от святых отец определяется. 35. И прилог глаголют быти, помысл простый, или, вещи образ якоже прилучися новоявленне в сердце представившийся и уму являющийся. Сочетание же, еже собеседовати по страсти, или безстрастно с явльшимся. Сосложение же, приклонение души со услаждением к явльшемуся бывающее. Пленение же, нуждное и невольное сердца отведение, и надолзе пребывающее, и благаго нашего состояния со прилучившимся смешение пагубное. Страсть же, собственне глаголют, долговременне страстне в души гнездящееся. От всех сих первое есть безгрешно: второе же, не всяко: третие же, по состоянию подвизающагося: брани же или венцев или мучений виновна. (с. 320) 36. Пленение бо инако бывает во время молитвы: и инако не во время молитвы. Страсть же несумненно подлежит или равномерному покаянию, или будущей муце. Первому убо сопротивляяйся, или безстрастно помышляяй, сиречь прилогу, вся студная единою отсекает. Сия брань лукавых бесов ко иноком и не иноком, и победа бывает и побеждение, якоже рехом: и от победы или венцы, или муки согрешившим и не покаявшимся. Подвизаимся убо противу оных мысленне, да не лукавая их советования в греховная чувственная дела произведем: но отсецающе от сердца грех, сущее внутрь себе царствие Божие обрящем, чистоту же нашего сердца и умиление навсегда к Богу сохраним сицевым вельми добрым деланием. 37. Мнози от инок не ведят прелести ума, юже претерпевают от бесов: прилежат же к деянию, не пекущеся о уме, прости суще, и непритворни препровождают житие. Мню, яко не вкусивше сердечныя чистоты, отнюд внутренних страстей тьмы не ведят. Елицы убо не ведят брани, о нейже глаголет павел, ниже в добром, может быть, от искуса укрепившеся, действенныя грехи падениями судят токмо: сущия же в мысли побеждения и победы не помышляюще. Понеже ни зрение сия обыче видети, сущия неизреченны, и единому подвигоположнику Богу, и подвизающагося совести ведомы. Имже, мню, речеся от писаний сие: и рех, глаголет, мир, но не бе мир. О сущих убо братиях от простоты сицевыми, молитися подобает, и научати их, елико мощно, да злых по действу деяний удаляются. А иже Божественное имут желание, еже зрению душевному очиститися, для сих ино есть деяние Христово, и ино таинство. 38. Обдержит в себе воистинну многия добродетели явственная смерти память: она родительница есть плача, побуждение от всех воздержатися, воспоминание геенны, мати молитвы и слез, хранение сердца, безстрастие брения яко бренна, (с. 321) источник быстроумия с разсуждением: ихже чада сугубый страх Божий, и очищение от сердца страстных помысл, еже обдержит многия Владычни заповеди. В ней зрится повсечасный подвиг неудобопобедимейший, и о немже мнози пекутся от подвижников Христовых. 39. От нечаяннаго нашедшее приключение, или напасть не мало растлевает внимание мысли, и ум отторгши от лучшаго изволения, и от добродетельнаго и добраго устроения греховно уклоняет к любопрениям и распри. Виновно же сея пагубы нашея то, что всяко без попечения о искушениях обретаемся. 40. Ничтоже нас повредит, ниже опечалит от приключающихся нам на всяк день прискорбностей единою сие уведевших, и поучающихся выну. Темже глаголет Божественный апостол: Благоволю в немощех, в досаждениих, в нуждах. И: вси хотящии благочестно жити о Христе Иисусе, гоними будут.{2 Тим. гл. 3, ст. 12.} Тому слава во веки веков, аминь.