<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 220) Тогожде о безмолвии, и о дву образех молитвы, в 15 главах. Глава 1. Два образа суть соединения: паче же входы от обою страну умныя молитвы, действуемыя духом в сердце, имиже ум или предваряет сию, тамо прилепляяйся Господеви,{Псал. 72, ст. 28.} по писанию: или движущуся действу по предшествию огнем веселия привлекает ум, или привязует его к призыванию и соединению Господа Иисуса. Аще бо дух и особь коемуждо действует, якоже хощет,{1 Кор. гл. 12, ст. 11.} по апостольскому словеси, но овогда в некиих едино другаго предваряет по предреченным образом. И овогда убо действо движется в сердце, страстем сиречь умаляющимся частым призыванием Иисуса Христа, явльшейся Божественней теплоте: Бог бо наш огнь есть поядающь страсти, глаголет писание.{Евр. гл. 12, ст. 29.} Овогда же Дух привлачит к себе ум, водружая его во глубину сердца, и от обычнаго скитания удерживая. И тогда не ктому пленник во ассирианы ведомь от Иерусалима, но от вавилона в сион преселение творит лучшее, якоже и ему с пророком вещати: Тебе подобает песнь Боже в сионе, и тебе воздастся молитва во иерусалиме.{Псал. 64, ст. 2.} И паки: Внегда возвратити Господу плен сионь.{Псал. 125, ст. 1.} И еже: возрадуется иаков, и возвеселится Израиль:{Псал. 13, ст. 8.} сиречь деятельный и зрительный ум, иже деянием страсти побеждает с помощию Божиею и (с. 221) видением зрит его, елико достижно. Тогда бо ум яко на трапезу обильнейшу призван, пищею Божественною веселяся поет: Уготовал еси предо мною трапезу, прямо стужающим ми, бесовом же и страстем. {Псал. 22, ст. 5.} Глава 2. О еже како подобает действовати молитву. В заутрии сей, глаголет соломон, семя твое, сиречь молитвы, и в вечер да не оставляет рука твоя.{Екклес. гл. 11, ст. 6.} Да не разстоянием времени всегдашность молитвы лишится того часа, воньже бы услышана была: яко не веси, глаголет соломон, кое произыдет, сие или оно. {Тамже.} И от утра убо седя на седалищи единыя пяди, низведи ум от владычественнаго в сердце, и держи его в нем, болезненне же преклонься и персьми, рамены же и выею зело боля, непрестанно зови умне или душевне: Господи Иисусе Христе, помилуй мя! Таже тесноты ради и приболезненности, и частости ради негли и прискорбне имея. Еже есть ради единыя снеди триименнаго, часто ядомыя: ядущии бо мя, глаголет, еще взалчут. {Сирах. гл. 24, ст. 23.} Пременяя ум во другую половину, глаголи: Сыне Божий, помилуй мя! И многократне глаголя половину сию, не должен еси часто от лености оная пременяти: не укореняются бо садове часто пресаждаеми. Удерживай же и отдыхание легкаго, да не дерзостне дышеши: ибо дохновение духов, от сердца восходящо, помрачает ум и развевает мысль. Оттуду воспящая его, или пленника забвению предает, или вместо того другому поучатися устрояет, нечувственне во яже не подобает обретающася. Аще же увидиши нечистоты лукавых духов, сиречь помыслы возницаемы или преобразующияся во уме твоем, (с. 222) не ужаснися, аще и благая разумения вещей некиих являются ти, не внимай им: но держя дыхание, якоже ти мощно, и ум в сердце заключая, и призывание Господа Иисуса часто и пребывательне действуяй, скоро сокрушиши и истребиши оныя, язвя их невидимо Божественным именем. Глаголет бо лествичник: Иисусовым именем бий ратники, несть бо ниединаго крепчайша оружия на Небеси и на земли. Глава 3. О дыхании. Якоже должен еси держати дыхание, свидетель исаиа отшельник, о сем глаголяй, и инии мнози. Ов убо, держи ум неудержимый, сиречь пореваемь и разсеваемь от сопротивныя силы, возвратившияся паки по крещении небрежения ради, со иными лукавнейшими духи в леностную душу, якоже глаголет Господь: И последняя сотворишася горша первых. {Матф. гл. 12, ст. 45.} Ов же яко должен есть инок имети память Божию вместо дыхания. Ин же любовь Божию предваряющу того дыхание. И новый Богослов глаголет: помалу удерживай и ноздренное влечение, да не дерзостне дышеши. {Сим означается обуздание гордыни духа, паче же и приведение сего в соединение с Духом Божиим, а не чтолибо чувственное.} И лествичник: Иисусова память да соединится с дыханием твоим, и тогда уразумееши безмолвия пользу. И апостол: не той, но Христос в нем живяше действуя, {Галат. гл. 2, ст. 2.} и живот Божественный вдыхая. И Господь: Дух, идеже хощет, дышет, {Иоан. гл. 3, ст. 8.} глаголет, прияв пример от дыхания чувственнаго ветра. Понеже чисти бывше крещением, приемше Христа обучением Духа, и яко семя всажденное слово, по Богобрату иакову, прияхом, {Иаков. гл. 1, ст. 21.} еже насаждено бывше, и яко соединившеся в причастии непричастном и несмесном, обожает (с. 223) нас некиим образом, преисполненно сущи за благость, мы же яко о хранительных заповедех благодати вознерадивше: падохом паки в страсти лености ради, и вместо дыхания Духа святаго, дыхания духов лукавых исполнихомся. Стяжавый бо Духа, и тем очищен быв, разгревается от него и Божественным вдыхается животом, и глаголет, и разумевает, и движется, по Господнему гласу: Яко не вы бо будете глаголющии, но Дух отца вашего глаголяй, рече, в вас. {Матф. гл. 10, ст. 20.} Подобне паки: иже сопротивнаго имеяй, и от того обладан быв, сопротивная делает и глаголет. {Разумей оное о преестественном даре Божии, свойственном святым апостолом Христовым.} Глава 4. О еже како пети подобает. Утрудився, глаголет лествичник, востав помолися, и паки сед, первейшаго делания мужественне имися. Аще бо и о уме рече: егда достигнет сердечное блюдение, сия творити должни суть, но не неприличне и о _псалмопении рече то. Глаголется бо, яко вопрошен бысть о пении великий варсонофий, сиречь, како подобает пети? и отвеща старец: часы и песни суть предания церкви, и добре согласия ради дана быша. Скитяне же ниже часы поют, ниже песни имут: но рукоделие, и наедине поучение, и помалу молитву. Стоя же на молитве, должен еси глаголати Трисвятое, и Оч~е наш. Молити же и Бога, о еже ветхаго избавитися человека, и во оной не коснети, весь бо день ум твой в молитве да будет. И сие яви старец, яко наедине поучение, есть сердечная молитва: помалу же молитва, стояние есть пения. Яве же глаголет и великий иоанн лествичник: дело безмолвия, (с. 224) безпопечение о всех и неленостна молитва есть стояние, и третие делание сердца некрадомо. Сие есть седалище молитвы, сиречь безмолвия. Глава 5. О различии поющих. Кое различие, яко ови убо много пети учат, овии же мало, друзии же никакоже отнюд, но едину молитву и труд, рукоделие негли или метания, или ино некое притрудно делание? Решение же сего есть сицево: елицы деянием, многими труды и леты обретоша благодать, якоже навыкоша, сице и других поучают. Не покаряются же неприемлющии художественне в то доспевшим милостию Бога, вскоре теплою верою, якоже глаголет святый исаак. Темже и порицают таковых, от неразумия и мнения крадоми, и иных извествуют, яко аще есть инако, прелесть есть, а не благодати действо. И не ведят, яко удобно пред очима Божиима, по писанию, внезапу обогатити нища. {Сирах. 11, ст. 21.} И, начало премудрости, стяжати премудрость, благодать, {Притч. гл. 4, ст. 7.} глаголет притча. Укоряет же и апостол тогдашния ученики неведущия благодати, глаголя: Или не знаете себе, яко Иисус Христос в вас есть? разве точию чим неискусни есте,{2 Кор. 13, ст. 5.} сиесть за леность вашу не предспеятельни. Темже ради неверия и высокомудрия, и дивныя в некиих молитвы свойства от Духа, особенным образом действуема, не приемлют. Глава 6. Противоречие тогожде. Рцы ми, таковая глаголяй: аще кто постится, воздержится, бдит, стоит, метания творит, плачет, не стяжательствует, (с. 225) несть ли сие делание? Како убо глаголении кроме деяния, пение точию предлагая, не мощно удержати молитву? Сия не делания ли суть? Решение. Аще кто усты молится, а ум парит, кая польза? Един зиждя, а другий разоряя, ничтоже разве труды. Но якоже телом делает человек, сице должен творити и умом, да не телом убо обрящется праведен, в сердце же всякаго уныния и нечистоты исполнен. Сие бо и апостол извествует, глаголя: Аще бо молюся языком, сиречь, усты, Дух мой молится или глас мой, а ум мой без плода есть. Помолюся убо Духом, помолюся же и умом. И хощу рещи пять словес, и прочая. {1 Кор. 14, ст. 14, 15 и 19.} Свидетель же, яко о сем глаголет и лествичник, глаголющий в слове о молитве: великий великия и совершенныя молитвы делатель сице глаголет: хощу рещи пять словес умом моим, и прочая. Делания же суть многа, по частна суть: сердечная же молитва есть делание велико и обдержительно, яко источник добродетелей, по словеси лествичника, еюже всякое приобретается благо. Несть, глаголет святый ма_ксим, страшнее мысли смертныя, ниже памяти Божия велелепнее, являя превосходство дела. Нецыи же ниже, аще есть благодать, в нынешнее время слышати хотят, от многаго нечувствия и неразумения омрачени суще и маловерни. Глава 7. Мало же поющии, добре, мню, творят, соразмерность почтивше: всякая бо мера добра есть, по словеси премудрых, да не всю силу душевную в деяние истощающе, ум будет мало радетелен в молитве, и изнеможет к ней: но да (с. 226) от части поюще, множае в молитву прострутся. Праведно же есть, егда умным и частым воплем и пождательным водружением стужив ум, причащается малыя отрады во еже попустити его в пространство пения от стеснения безмолвнаго. Сей чин зело добр есть, и учение мужей премудрых. Глава 8. А иже отнюд непоющии, такожде добре творят, аще суть в предуспеянии: сии бо не требуют глаголати _псалмы, но молчание и непрестанную молитву и видение, аще доспеша в просвещение с Богом бо соединени суть, и не должни сицевии отвлещи от него ум свой, и вдати его в смущение. Падение убо, {от 27 степени.} глаголет лествичник, послушнику своя воля, безмолвнику же молитвы оставление: прелюбы бо деет таковых ум, егда отступит от памяти Божия яко от жениха, и за малейшия дела любительне емлется. Научити же и других томужде чину, не во всех есть возможно, простых убо послушников сущих и некнижных тако: зане послушание от всякия добродетели смирения ради причаствует: непокоривым же не дается, да не удобь прельстятся, груби и люборазумични суще. Занеже самочинник не может избегнути мнения, имже прелесть последовати обыче, якоже глаголет святый исаак. Инии же не помышляюще о имущем быти вреде, за еже обыкнути глаголют и возлюбити уму память Божию, прилучающихся сию едину действовати учат, еже не мощно есть, наипаче же своечинником сущим. Еще бо уму их нечисту сущу, ради небрежения и высокомудрия, иже слезами не пред_очистивыйся, кумиры паче скверны помысл, а не молитву созерцает, в сердце нечистым духовом смутившимся от страшилищнаго духа, и убити скрежещущим ранящаго. Аще же услышит или научен будет самочинник о сем делании, (с. 227) и хощет то удержати, едино от двою имать пострадати: аще убо нудится, прельщается, и неисцелен пребывает: аще ли небрежет, без предуспеяния во всем животе своем бывает. Глава 9. Реку же и аз, яко от искуса мало познав. Егда будеши сидети во дни, или в нощи безмолвствуя, часте моляся Богови кроме помысл во смирении, и убо изнеможет ум зовый, и возболезнует тело и сердце зельным водружением частаго Иисусова призывания, и не ктому согреваемь или возвеселяемь, имиже усердие и терпение раждается подвижнику: тогда востав, стани и пой наедине, или с сущим с тобою учеником, или упражняйся в поучении некоего глагола, или в памяти смерти, или в рукоделии и прочем, или чтению паче стоя внемли, да труд телеси сотвориши. И егда убо стоиши наедине поя, глаголи Трисвятое, и посем молитву душевне или умне, внимая умом сердцу. Аще ли же ти належит уныние, глаголи и _псалмы два или три, и тропари умилительны без гласа, яко не воспоют сицевии, глаголет лествичник. Довлеет бо тем во веселие болезнь сердечная, о благочестии бываема, якоже рече святый марк, и теплота Духа, к радости и веселию тем даруема. Глаголи же по всяком _псалме и молитву умне, или душевне, непарительне, и аллилуиа. Таков бо есть чин святых отец, варсонофиа и диадоха, и прочих. И якоже глаголет Божественный василий, подобает на всяк день _псалмы пременяти, за еже к усердию поощряют, и да не глаголет, выну таяжде поя, ум несладостне обращается, но свободу тому даяти подобает, да и еще паче на усердие укрепится. Аще же со учеником верным стоиши поя: он убо _псалмы да глаголет, ты же сердцу тайне внемля и моляся: блюди себе, и вся разумения, или чувственна или умна, от сердца исходяща презирай, молитве (с. 228) содействующей. Безмолвие бо есть, отложение до времени разумений, еже не от Духа суть Божественнейша, да не внемля сим, яко добрым, большая погубиши. Глава 10. О прелести. Внемли убо опасно, рачителю Божий, в разуме, внегда делая дело, узриши свет, или огнь извнеуду, или внутрь, или образ некий, сиречь Христа, или ангела или инаго кого, не приемли того, да не вред претерпиши: ниже ты сам от себе образне внемля, попустиши уму из_ображати таковая: вся бо сия извнеуду безвременне преобразуема, ко еже прельстити душу бывают. Начало бо молитвы истинное, есть теплота сердечная, попаляющая страсти, и тихость и радость в душе известною любовию творящая, и сердце несомненным извещением утверждающая. Все бо приходящее к души, глаголют отцы, аще чувственно, аще умно, и усумнится о сем сердце, не приемлющи того, несть от Бога, но от сопротивника прииде. И аще увидиши ум отвнеуду, или свыше влекомь некоею невидимою силою, не веруй сему, ниже попусти ему влекому быти: но понуди того абие в дело его: яже Божия, глаголет святый исаак от себе приходят, неведущу ти времени. Аще враг внутрь естественных чресл и преобразует Духовная, якоже хощет, мечтательне иная вместо других: и вместо теплоты свое нестройное наводя жжение, якоже отягчатися тогда душе в таковой прелести, вместо же веселия радость безсловесну и сладость мокротну сотворяя, и мнению от сих и киченно видетися раждаему, скрывает же себе от неискусных, и якоже Благодать действующу, свою прелесть непщевати нудится. Но убо время, и искус и чувство, явленна того творити обыче, не зело невидящим того злоухищрения. (с. 229) Гортань бо, глаголет писание, брашна различает, сиречь вкус духовен, явленна вся, яковаже суть, непрелестне показует. Глава 11. О чтении. Да будут тебе, делателю сущу, глаголет лествичник, прочитываемая деятельна: сих бо деяние, излишно соделовает прочиих чтение. Прочитывай же присно яже о безмолвии и молитве, сиречь в лествице, во святом исааке, яже святаго ма_ксима, яже новаго Богослова и ученика его стифата, яже исихиа, яже филофеа синаита и прочих таковых, елика сицева суть. Прочая же остави до времени, не яко отверженна, но яко не приличествующая намерению, и ум теми повествованиями от молитвы отводящая. Да будет же ти чтение на едине, и не во гласе кичения величающася, ни во тщании благоязычия украшенно, или доброглаголании слова, или песненныя сладости, или отсутствующ яко присутствующ страстне крадомь ко угождению некиих, ниже паки ненасытне. Яко всяка мера добра есть, ниже борзостне, ниже леностне и небрежне, но целомудренно, кротко, постоянно, разумно, благочинне, умне же и душевне, или и словесне. В сих бо укрепляемь ум, силу в навыкновении приемлет, во еже крепце молитися. В предреченных же сопротивных сим, помрачение ум стяжавает: слабость же и изступление, якоже болети и владычественному в мозге, и в молитве изнемогати. Глава 12. Внемли же и предложению на всяк час, известно то испытуя, камо клонится, и аще по Бозе самаго ради добра, и душевныя пользы седиши безмолвствуя, или поя, или прочитывая, (с. 230) или моляся, или куюлибо творя добродетель, да не окрадешися неведоме: да не како обрящешися образом убо делатель, нравом же и умом человеком, а не Богу угодити хотяй: многи бо суть подсады льстиваго, и вельми хитростне зрит уклонение намерения, якоже многим неуведомь бывает, и присно хощет красти дело неведоме, да не по Бозе деемое будет. Аще убо и неослабно ратует, и безстудно приступает, но ты твердое намерение к Богу имея, не окрадешися часто, аще и невольне от онаго уклонение воли парити нудится. И негли и от немощи побеждается кто невольне, но абие прощается и похваляется от ведящаго намерения и сердца. Сия страсть, тщеславия глаголю, не попущает иноку предуспети в добродетели: но труды убо сицевый претерпевает, и в старости безплоден обретается. Ибо и трием посмевается присно, и делания добродетелей обнажает: новоначальну, глаголю, и средню, и совершенну. Глава 13. Се же навык, глаголю, яко кроме добродетелей сих инок никогдаже предуспеет, сиречь, пощения, воздержания, бдения, терпения, мужества, безмолвия, молитвы, молчания, плача и смирения. Суть бо добродетели сии раждательни едина другой, и хранительни. От часта бо пощения увядаемо желание раждает воздержание: воздержание, бдение: бдение, терпение: терпение, мужество: мужество, безмолвие: безмолвие, молитву: молитва, молчание: молчание, плачь: плачь, смирение: смирение воз_обратне, плачь. И паки вспять дщери матерей како раждают, воз_обратне обрящеши. Сего убо взаимна другородстводейства, большаго в добродетелех несть. Противная же сих, всем суть явленна. Глава 14. Подобает же и о трудех и болезнех делания зде рещи, и како должно есть проходити коеждо делание, ясне (с. 231) показати, да не неболезненне кто шествуя по слуху, и неприяв плода, нас или некия обвинит, яко несть сице, якоже рекохом: болезнь бо сердечная, и телесный труд, весть дело истины творити, из нихже действо Духа святаго является, святым крещением тебе и всякому верну даемое, еже заповедей небрежением страстьми спогребается, и покаяния паки нашего за неизреченную милость ожидает. Да не в конец за безплодие наше услышим: Возмите от него талант, и еже мнится имети, возмется от него{Матф. гл. 25, ст. 28. Луки гл. 8, ст. 18.}, и в муку послет нас, вечно в геенне болящих, яко приобщения того не приемлющих, или приемших и от небрежения отвергших. Всяко бо делание телесное же и духовное, не имущее болезни или труда, никогдаже приносит плод то проходящему: яко нуждно есть царствие небесное, глаголет Господь, и нуждницы восхищают е.{Матф. гл. 11, ст. 12.} Нужду разумей телесное во всем{Зри: зде отец попечительный, беседуя о нужде или приболезненном чувстве, подобающем подвижнику, никакоже учит да христианин, неприявший духа работы в боязнь, но приявший Духа сыноположения, да сице свободный нудит себе и мучит свое тело, но выводит умне воина Христова на подвиг, да верою, терпением, смирением и всяцем образом воздержания же и безпристрастия, паче же добродетелию и исправлением Иисуса Христа по святому златоусту, вооружився ратуит, и аки крепость некую, Царство Небесное да восхитит, аще бы и неприступно нам было по нас самих.} приболезненно чувство. Понеже мнози убо многа негли лета неболезненно делаша, или делают, и за еже не с болезнию в теплом усердии сердца труды творят, тщи чистоты, и Духа святаго не причастни быша, лютости болезней отвергше. В небрежении бо и слабости делающии, трудятся убо негли, якоже мнят, много: но никогда не пожинают плода за безболезненность, всячески безболезненни суще. И свидетель глаголяй: Аще и вся жительства наша велика имамы, сердца же болезненна не имамы, неистинна сия и безполезна суть: может же быти, егда и не неболезненне шествуем, но от уныния в попечения споревающеся (с. 232) неполезная, помрачаемся{Лествич. от 7 степ.}. Мняще бо в сих ослабу обрести, еже несть возможно. Но пленицами нерешимыми невидимо связуеми, недвижни и недейственни во всяко дело бываем, слабости в нас умножившейся, паче же новоначальным сущим: совершенным бо вся в меру полезна суть. Сие свидетельствует и великий ефрем, глаголя: трудяся трудися притрудне, да мимо прейдеши суетных трудов труды. Аще, не по пророку, чресла наша исчезнут от слабости постным трудом изнемогша, и болезни страдании зачнем, яко раждающая младенца болезненным сердца водружением, и не имамы родити духа спасения на земли сердечней{Исаии гл. 21, ст. 3.}, якоже слышал еси. Но леты точию, и пустынею безполезною, и слабостным безмолвием нечто быти мнящеся хвалимся. Во время же исхода несомненно весь плод вси познаем. Глава 15. Немощно же собою самем кому добродетелей художеству навыкнути, аще и нецыи, якоже учителя, искус свой употребиша. Еже бо от себе самаго, а не по совету предуспевших творим, мнение имать, паче же раждати обыче. Аще бо Сын ничесоже от себе творит, но якоже научи его отец, сице творит: и Дух не бо глаголати имать от себе. Кто есть сей, к толикой добродетели высоте достигший, яко не требуяй иного кого тайноводящаго его? гордыню паче, неже добродетель непщует имети: прельстился есть. Темже покарятися подобает ведущим труды деятельныя добродетели, и тако проходити: сиречь пост алкателен, воздержание несладостно, бдение пождательно, коленопреклонение притрудно, стояние неподвижне приболезненно, молитву пребывательну, смирение нелицемерно, сокрушение и воздыхание непрестанно, молчание благословно, (с. 233) и яко солию растворенно, во всем терпение. Не бо подобает всегда в покои пребывати, ниже в седалищи точию всегда прежде времене, или старости, или немощи потерпевати. Зане труды, глаголет писание, добродетелей твоих снеси{Псал. 127, ст. 2.}, и нудящихся есть царствие небесное{Матф. гл. 11, ст. 12.}. Предреченная убо делания тщайся на всяк день болезненне, сиречь подвижно, усильно совершати, и плод с Богом во время сих пожнет.