<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 114) Тогожде ведение известное. О безмолвии и молитве, еще же и о знамениях благодати и прелести: и кое есть различие теплоты и действа, и яко без наставника прелестию удобно побеждаемся, глав 10. 1. Подобаше убо нам рещи, по великому учителю, яко непотребна помощь от писаний или от инех отец. _о знаменоносне логгине! но сице быти Богонаученным: будут бо, глаголет писание, вси научени Богом{Иоан. гл. 6, ст. 45.}, яко от него и тем. ведети же и научатися полезная, не точию мы сподобихомся, но и кийждо от верных, яко закон Духа на скрижалех сердец наших начертан носити, и непосредственне и херувимски, еже удивления достойно, чистою в сердце молитвою беседовати со Иисусом. Но понеже младенцы есмы во время паки создания, ниже благодать разумеюще, ни обновления созирающе, ниже паче ведяще превосходящее величества, чести же и славы, ейже приобщихомся, и яко должни есмы заповедьми возраститися душевне и духовне, и увидети умне, еже прияхом: падаем мнозии в нечувство и помрачение небрежением и страстнейшим навыкновением. И ниже аще есть Бог, вемы, ниже что есмы, или каковы быхом сынове Божии, и сынове света, чада и уди Христовы. Аще же и мужи суще крещаемся, обаче в воде точию, а не и духом ощущаем. Аще же и духом обновляемся, веруем простою верою мертвою, а не действуемою, и во двоедушии (с. 115) бывати глаголем: и тако самою вещию плоть суще, и плотски живем и ходим. Аще же и каемся, телесне точию, а не духовне заповеди творим и познаваем. Аще же и многих ради трудов человеколюбне сподобит неких благодать явления, яко прелесть ту приемлем. Аще же и в других действуему благодать услышим, яко прелесть оную зависти ради вменяем. И тако мертви пребываем даже до смерти, не о Христе живя и не действуя, и еже имамы, по писанию, во время исхода или суда, неверия ради или отчаяния отимется о нас{Марка гл. 4, ст. 25.}, не разумевая, яко по отцу подобает и чадом бозем быти от Бога, и духовным от Духа, рожденное бо, глаголет писание, от духа, дух есть{Иоан. гл. 3, ст. 13.}: мы же плоть есмы, аще и верни и небесни бывше, сего ради Дух Божий не пребывает в нас. И сего ради попусти Господь наведения и пленения, и заколения умножи, отсещи хотя злобу, или спасти крепльшими врачевствами. 2. И первее убо рещи подобает, Богу дающу глагол благовествующим сицевая благая, како обрящет кто, паче же обретено бысть, еже имать, или прият Христа крещением в Дусе, по апостолу павлу: или не знаете себе, яко Иисус Христос живет в сердцах ваших?{2 Кор. гл. 13, ст. 5.} глаголет писание. Потом же и како предуспети, по сих же и како обретенное сохранити. Изящнейший бо и краткий образ, рещи о крайних со средою сокращенне, многую имущих широту. Зане мнози подвигом подвизашася, донележе обретоша искомое, и до сего желание свое простроша, в предняя же не идут, ниже пекутся о сих, довольни суще точию, еже в начале обретоша: запеншеся же и отай распутием шедше, добре шествовати мнят, и без приобретения водятся внеуду сего. Овии же достигше среды просвещения, к концу разленившеся ослабеша, или вспять нерадивым житием возвратившеся новоначальнии соделашася. (с. 216) Овии же достигше совершенства, невниманием падают от мнения, и вспять возвращаются, и делы и средним и новоначальным равни бывают. Новоначальных же и средних и совершенных есть, овех убо действо: овех же, просвещение: овех же, очищение души, или воскресение. О еже како обрести действо. 3. Двема образы приобретается действо Духа, еже в крещении таинственне прияхом. И вопервых обще рещи, деланием заповедей, многим трудом и временем дар сей открывается, якоже марк святый глаголет. И елико исполняем заповеди, потолику явленнее возсиявает нам своя зари. Второе, художественным и частым призыванием Господа Иисуса, сиречь памятию Божиею является в повиновении. И от перваго убо жительства коснее: от втораго же скорее, аще и навыкновением обрящет болезненне и терпеливне, копая землю и изыскуя злато. Аще убо хощем непрелестне обрести истину, и познати ю, потщимся сердечно точию имети действо, безвидно всячески, невоображенно, и ниже зрак или образ акибы святаго мечтательне созерцати, ниже светы зрети: обыче бо прелесть в начале паче прельщати ум неискусных таковыми ложными мечтаньми. Но точию действо молитвы в сердце действующее имети потщимся, согревающо ум и веселящо, и к неизреченней любви Божией и человечестей распаляющо душу. Темже и смирение и сокрушение немало тогда от молитвы бывает: понеже молитва в новоначальных есть приснодвижимое умное действо святаго Духа. В начале убо яко огнь веселия, от сердца прозябаемь: в конце же, якоже свет благоухающ действуемь. 4. В начале же знамения ищущим оную истину, а не яко искушающим суть такова, якоже сама премудрость вещает: Обретается не искушающим его: является же не (с. 217) неверующим ему.{Прем. Сол. гл. 1, ст. 2.} В инех убо яко свет возсиявает. в инех же радование трепетно: в других же радость, в инех же совокупне радость и страх: в инех же трепет и радость, в овех же, иногда и слезы и страх. Радуется убо душа посещению и милости Божией, боится же и трепещет пришествия его, яко повинна во гресех мнозех. У овых же паки в начале бывает сокрушение неизреченное, и болезнь души неизглаголанная: Болезнует бо яко раждающая и болящая, по писанию.{Сирах. гл. 48, ст. 21. Иоан. гл. 16, ст. 21.} Живо бо слово и действенно, сиречь Иисус проходит, якоже апостол глаголет, до разделения души же и духа, членов же и мозгов, яко да страстное истает всячески от всех частей души и тела.{Евр. гл. 4, ст. 12.} Во инех же любовь и мир ко всем нератуемый зрится: в других же радование, еже и взыграние многими образы отцы рекоша, духа сущи сила и сердца жива движение. Сие же и скакание и воздыхание Духа нарицается, неизглаголанне о нас ходатайствующаго к Богу. Волну же сие правды Божия исаиа именова, и бодение великий ефрем: Господь же источник воды текущия в живот вечный.{Иоан. гл. 4, ст. 14.} Воду же Дух именова скачущую в сердце? и кипящую силою зельною. 5. Ведети достоит, яко взыграние, сиречь возрадование, два различия имать. Едино есть тихообразное, еже и биение и воздыхание, и ходатайство Духа глаголется: и великое сердца, еже и взыграние и скакание глаголется, сердца жива к Божественному воздуху воспротяженное летение. От Божественнаго бо Духа воскриляема рачением, и от уз страстей освобождаемая душа, к горним и прежде исхода возлетети тщится, желая тяготы разрешитися. Сие же и возмущение Духа, или воскипение и движение глаголется, по еже: Иисус же возмутися Духом, подвигся силою, и рече: где положисте его?{Иоан. гл. 11, ст. 34.} (с. 118) 6. Подобает же ведати, яко Божественный страх трепета не имать. О трепете же глаголю, не иже от радости происходит, но иже от гнева, сиречь наказания и оставления: но трепетное радование, еже от молитвы, во огне Божественнаго страха приходящо. Страх же не трепетный, иже от гнева сиречь муки, но от премудрости, иже и начало премудрости глаголется.{Притч. гл. 1, ст. 7.} Разделяется же страх трояко, аще и двояко отцы рекоша: на страх вводный, совершенный, таже и гневный, егоже и трепет воистинну достоит звати, сиречь колебание и сокрушение. 7. Трепет же различия имать многообразна: ин есть гнева, ин радости, и ин ярости, и ин иже от старости, и другий, иже от греха, сиречь прелести. Обаче подвижника в начале ратует трепет, иже от радости, и иже от греха: но не всем же сице бывает. Знамения же обою суть: единаго убо трепетное радование во мнозе веселии и слезах, Благодать утешает душу. Другаго же нестройна теплота и кичение и жестокосердие распаляет душу, и разжизает сочетательныя уды, и к сплетению телеси и любви мечтанием внутрь в соизволении творит студодеяние. 8. Вемы сугубу быти действию всякому новоначальному, и сугубо действуему в сердце и несмесне. Ову убо от благодати, ову же от прелести, якоже свидетельствует великий марк подвижник, сице глаголя: Есть действо Духовное, и есть действо сатанино, младенцу неведомо. И паки вемы тройственной быти теплоте действа, в человецех воспаляемой: иной быти от Благодати, иной от прелести, сиречь греха, и иной от умножения крови, еже и растворение африканский нарече фалассий, и яко воздержанием умеренным укрощати сию и усмиряти подобает. 9. Действо Благодати есть сила огня Духовнаго: еже в радости и веселии сердечне движет, утверждает и согревает (с. 219) и очищает душу, и помыслы убо утоляет, яко на час: телесное же движение умерщвляет на время. Знамения же его и плоды, являющие истину, суть сия: слезы, сокрушение, смирение, воздержание, молчание, терпение, еже крытися, и елика суть таковая, имиже несумненне извещаемся. 10. Действо прелести есть, греха раждежение, еже в сласти распаляет душу, и к совокуплению телес неистово желание к телеснем движении воздвизает. Некачественно же есть все и нестройно, по святому диадоху: радость имать безсловесну, и мнение, и мятеж, и веселие некачественно. Или паче рещи, непитательно действует к похотной части в сласти растепленней, подая похоти вещество раждежения сласти, и несытну утробу содейственницею имущо. Отсюду бо приобщает и возжигает растворение плоти, приемля вину ко еже действовати и жещи душу, и ко еже привлещи ю к себе, яко да помалу отженет от себе человек благодать навыкновением сладострастия.