<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 169) Иже во святых отец наших григорий на синайстей горе во инока бысть пострижен, и сего ради синаит наречеся, процвете же во время царствования андроника, около тысящи триста тридесятаго года, во афон же гору пришед, и тамошния обшед обители и безмолвничества: многих убо обрете смыслом и нравов чистотою украшенных, и о деянии точию тщаливых, блюдению же ума и безмолвия, опасству и видению толико ненаученных, яко ниже по имени та, якова же суть, разумети. Единем точию трем прилучися в ските магула лежащем противу филофеа [исаиа, корнилий и макарий тем имена] мало и о видении труждатися. Сего ради ревностию Божиею распаляемь, не точию особь безмолвствующих, но и в общежитиях всех, трезвению и блюдению ума и умней молитве учаше. Не точию же, но и по предмориям македонским три лавры велия устроив, и места множайша и области прешед, всех обще о делании умныя и непрестанныя молитвы, Божественными своими ученьми наставляше. И многих тем грешников обратив, и достойных из недостойных показав, спасаемых части тем удостоитися виновен бысть. тоже и жизнь каллист святейший патриарх, и ученик его, извествовавший, пространне написа. Но яко бо в жизни своей, славен общий учитель священнаго трезвения явися, сице по смерти, к томужде настоящими своими списаньми путеведет. Умныя бо и сердечныя молитвы деятельный способ изряднейше и совершеннейше наставляет, и о нравственных добродетелех и страстех изучает, и иныя убо знамения прелести, ина же благодати в сих яви. И всяко преполезное есть сие творение равне новоначальным, средним же и совершенным: сокровенное же в них духовно богатство, яково и колико есть, неленостне прочтый обрящет, и радостию воистинну неизреченною возрадуется о обретении того. (с. 170) Иже во святых отца нашего ГРИГОРИА СИНАИТА. Главы, краегранесием в греческом писании расположенныя, зело полезныя. Словеса различная о заповедех, догматех, муках, и обетованиях: еще же о помыслех, страстех, добродетелех, безмолвии и молитве. 1. Словесну убо быти, или соделатися кому по естеству, якоже бе прежде в чистоте и нетлении, невозможно. Тою бо чувственное безсловесия навыкновение, сею же тленное плоти состояние облада. 2. По естеству словесными едини точию чистотою святии явишася: слова бо чиста никтоже от мудрых в слове име, от начала словесность помыслы растливших. Вещественный бо и многоглагольный премудрости мира сего дух, словеса убо на многоведение, помыслы же на дичайшее наводя, водворяется в них, лишив их воипостасныя премудрости и видения нераздельнаго и единственнаго разума. 3. Разум истины, чувство благодати собственно быти разумей, прочия же разумения, помышлений явления и вещей доказания, нарицати подобает. (с. 171) 4. Елицы благодати не получают, ради неверия и нерадения сие страждут: и елицы паки обретают верою и тщанием. Сих убо ради в предняя присно простираются, сопротивных же ради, вспять совершенне обращаются. 5. Равно есть и мертву и нечувственну быти, и умом слепу, и телесне не зрети. Ов бо лишися убо живыя и действующия силы: ов же лишися, не видя Божественнаго света, творящаго зрети и зретися. 6. Силу и премудрость, обоя от Бога мали приемлют: она бо есть Божественных причащательна благ: сия же изявительна, восприимати же ее и преподаяти, Божественный воистинну дар и выше человека. 7. Светилище истинно и прежде будущаго жития есть, еже без помысл сердце действуемо Духом: вся бо тамо совершаются и глаголются Духовне. И не стяжавый сие отсюду, камень есть ради инех добродетелей, потребен в назидание Божественнаго храма, а не храм и священнодействитель Духа. 8. Нетленен человек создан бысть кроме мокрот, яков же и воскреснет. Не непременен же, ниже паки пременен. Силу имея вольнаго хотения преложитися, или ни: совершеннаго бо непреложения не творит к естеству хотение, то бо есть почесть будущаго непреложнаго обожения. 9. Тление бо плоти рождение, ясти же и излишество изпрометати, и свирепети и спати, естественная зверей и скотов свойства, по нимже преслушания ради скотом уподобльшеся, отпадохом своих и Богоданных благ, и скотни от словесных, и зверсти от Божественных соделавшеся. 10. Рай сугуб есть: чувственный и умный, сиречь во едеме, и благодатный. 11. Преходяща, сиречь, тленна тварь не бысть первее, сказуют, сотворена: послежде же растлившися, и тлению подпадши, и суете, по писанию, повинуся, сиречь, человеку, не (с. 172) волею, и не хотящи, но за повинувшаго ю, на уповании{Рим. гл. 8, ст. 20.} обновления истлевшаго адама. Обновивый того и освятивый, аще и тленно носит той тело, временныя ради жизни, и сию обнови, но не у от тления свободив. От тления же избавление твари, инии глаголют, быти на лучшее пременение, друзии же, совершенное чувственных преложение. Обычай бо есть писанию, о недоумеваемых доселе творити сказание просто и немногопытне. 12. Благодать приемлющии якоже в зачатии, и непраздни суще Духом, или чрез падения Божественное отметают семя, или вдовствут от Бога, приобщением врага крыющагося в них. И оставление убо благодати, действа ради страстей, совершенное же лишение, греховнаго ради деяния бывает. Душа бо страстолюбивая и грехолюбивая, лишена и отвержена сущи благодати и вдовствующа, жилище будет страстем, да не реку бесом, ныне и в будущем веце. 13. Ярость тихою и кроткою ничтоже ино творит, якоже мужество и милость: ова убо внешния: ова же внутренния, якоже градоемнии хитрости сокрушающи. 14. Мнози заповеди делающе, мнят шествовати, не у града достигше внеуду пребывают. Исхождение бо царских правых путей, сиречь подобныя добродетелям злобы отай вземше неуспешно шествуют. Заповеди бо требуют ниже умаления, ниже превосхождения, но и намерения Богоугодна, и Божественныя точию ищуще воли. Аще ли не тако, всуе труд, правы, по писанию, не творити стези Божия: во всяком бо деле, намерение взыскуется вещи. 15. В пути, сиречь заповедьми в сердце, взыскуй Господа. Егда бо слышиши иоанна вопиюща, и повелевающа всем уготовати путь Господень: правы творити стези{Марка гл. 1, ст. 3.} веляща, заповеди, и сердца и деяния быти непщуй. Не возможно бо (с. 173) сотворити путь прав заповедей и деяние непогрешно, аще не сердечну правоту сотвориши. 16. Жезл и палицу,{Псал. 22, ст. 4.} егда услышиши по пророческому словеси писание глаголющее, суд и промысл быти непщуй: по нравственному же слову пение и молитву. Судими бо от Господа жезлом наказания, ко обращению наказуемся: наказующе же востающия на ны жезлом мужественнаго пения, молитвою утверждаемся. Имуще убо жезл и палицу в руце деяния ума, не престанем наказовати и наказоватися, дондеже под промыслом суще, совершенне избегнем суда нынешняго и будущаго. 17. Свойственно есть заповедем, еже предпочитати приснообдержную заповедь, Божию память, глаголющую: помяни Господа Бога твоего выну,{5 Моис. гл. 8, ст. 18.} еюже бо погибоша, сею и сохранитися могут. Забвение бо погуби Божию изначала память, заповеди помрачивши, и тако нага человека от всякаго блага содела. 18. Двема заповедьми подвижники паки древняго достоинства достизают: послушанием и постом. От несохранения бо сих всякая злоба роду человеческому привниде. И иже послушанием убо хранящии заповеди, поспешнее к Богу восходят, а иже постом и молитвою, коснительнее. И послушание убо новоначальным приличествует: пост же средним, и разумным, и мужественным. Еже бо соблюсти заповедьми нелестное послушание Богу, зело малех есть, и самем тем мужественным притрудно. 19. Закон Духа жизни, по апостолу,{Рим. гл. 8, ст. 2.} есть, иже в сердце действуяй и глаголяй, якоже и письменный во плоти действуемый. Той бо убо свобождает ум от закона греховнаго и смерти: сей же отай фарисеа соделовает, телесне закон творяща, и помышляюща, и во еже видену быти заповеди делающа. (с. 174) 20. Составление всех заповедей, слагаемых и сооружаемых духом, человека совершенна глаголют быти, или несовершенна по предспеянию бываема. И заповеди убо, якоже тело, добродетели же аки кости качеств навыкновения благодать же, яко душу живу сущую, и движущуся и действующу, якоже тело всех заповедей деяния. Нерадение бо и тщание к превозращениям Христовым, показуют человека, младенца или совершенна, ныне же и в будущем веце. 21. Хотяй тело заповедей возрастити, словеснаго чистаго млека матерния благодати желати да тщится. Оттуду бо млекопитается всяк, о Христе ищущий и хотящий возращением возраститися. Млеко бо к возращению премудрость от своих сосец о Христе младенцем теплоту подает: мед же пищный совершенным веселие свое ко очищению дает. Мед, глаголет, и млеко под языком твоим.{Песнь пес. 4, ст. 11.} Млеку убо имети питательную и возрастительную, меду же очистительную духа силу, соломон рече. Великий же апостол, различие действ назнаменуя, глагола: яко младенцев, млеком вы напоих, а не брашном.{1 Кор. 3, ст. 1 и 2.} 22. Словес заповедей, кроме заповедей взыскуяй, и учением или чтением обрести желаяй, подобен есть воображающему себе сень вместо истины. Словеса во истины в причастницех истине причаствуеми суть. Истины бо непричастнии и неведущии, взыскуя словес, обретают я от обюродевшия премудрости, ихже и душевными нарекл апостол, Духа не имущих, аще и истиною негли величаются. 23. Якоже чувственное око взирает на писмя, и от писмене чувственная приемлет разумения: сице и ум, егда очистится, и в первобытное достигнет достоинство, на Бога зрит, и от него приемлет Божественная разумения, и вместо убо книги имать Духа, вместо же трости писательныя, смысл и язык. Язык мой, глаголет, трость:{Псал. 44, ст. 2.} свет же вместо (с. 175) чернила. Погружая убо мысль во свете, и свет совершая, начертавает словеса духом в чистых сердцах послушающих. Тогда познает реченное, како будут вернии научени Богом, и како учит Бог человека разуму, по пророчеству, Духом.{Иоан. 6, ст. 45. Псал. 93, ст. 10.} 24. Закон заповедей, сердечно действуемую веру непосредственно быти разумей. От нея бо всяка заповедь источается, и душам просвещение действует, ихже плоды истинныя и действуемыя веры суть: воздержание и любовь, и конец Богодарное смирение, любве начало и утверждение. 25. Слава существующих неложна, есть истинный разум видимых и невидимых. Видимых убо, чувственных: невидимых же, мысленных и словесных, и умных и Божественных. 26. Пределы православия суть два веры догмата от чистоты ведети, и познати от себе, Троицу глаголю и двоицу. Троицу убо в единице, неслитне и несекоме зрети и познавати: двоицу же Христовых естеств во единой впостаси, сиречь единаго Сына и прежде воплощения, и по воплощении во двою естеству исповедовати, и ведети, во двою хотению Божественнаго же и человеческаго, неслитно славима. 27. Рождение, и нерождение, и исхождение, три недвижима и непреложна свойства пресвятыя Троицы, потребно исповедовати благочестно. Оц~а убо, нерождение и безначалие: Сына же, рождение и собезначалие: Духа же святаго, исхождение от отца, Сыном же, якоже рече дамаскин, соприсносущним подаваема. 28. Едина бы благодати вера довлела ко спасению, заповедьми действуема духом, аще бы хранили, а не мертву и недейственну паче живой и действуемой о Христе предпочетше. Довлеет бо верному воображение и жизнь о Христе действуемыя веры. Вере бо в слове мертвой и нечувственной невежество, а не ейже во благодати вере, благочестивых ныне научило есть. (с. 176) 29. Простая единица есть Троица, понеже некачественна и несложна Троица во единице. Триипостасен бо есть Бог, неслитно имея еже друг друга вмещение всячески. 30. Троичне во всем Бог познавается же и глаголется: неописан бо. Всех бо есть содержитель и промыслитель чрез Сына, о святом Дусе: и несть един вне, или без других лиц глаголемь и разумеваемь, идеже аще именуется. 31. Якоже в человеке есть ум, и слово и дух, и ниже ум без слова, ниже слово без духа, и друг в друзе суща, и о себе. Ум бо словом глаголет, и слово духом является. По примеру сему, темен образ безыменныя и началообразныя Троицы носит человек: еже по образу сущее вкратце и о сем являя. 32. Ум убо отец, слово же Сын, Дух же святый, воистинну Дух, Богоноснии отцы приточне учат, пресущную святую и преестественную догматствующе Троицу. единаго Бога в триех впостасех, нам веру истинную и котву надежды оставльше. Еже бо ведети единаго, по писанию, Бога, есть корень безсмертия, и ведети державу триипостасныя единицы всецелая правда. Или паки, потребно евангельски реченное сице разумети: Се же есть живот вечный, да знают тебе единаго истиннаго Бога в триех впостасех, и егоже послал еси Иисуса Христа,{Иоан. 17, ст. 3.} во двою естеству и хотению. 33. Муки различни суть, якоже и благих возмездия. Вся же муки под адом, по писанию глаголющему: в земли темной и мрачной, в земли тьмы вечныя,{Иова 10, ст. 22.} идеже грешницы и прежде живут суда, и изречением паки в ню возвращаются. Еже бо: да возвратятся грешницы во ад:{Псал. 9, ст. 18.} и, смерть упасет их,{Псал. 48, ст. 15.} что ино есть, точию конечный ответ и осуждение вечно? (с. 177) 34. Огнь, и тьма, и червь, и тартар есть всякое сладострастие, и всеобщее тьмы неразумие, и еже во всех движение любосластия, и трепет, и смрад зловонный греха. Яже убо обручение и начатки мук, уже отсюду в душах грешничих действуя, навыкновением являются 35. Навыкновения страстей суть обручения мучений, якоже и Царствия Небеснаго действа добродетелей. Потребно же разумети и нарицати заповеди убо действа: добродетели же навыкновения, якоже и злобы, по учащению навыкновениями нарицают. 36. Равна возмездий воздаяния, от многих неравна видимая суть. Сим убо вечную жизнь, темже вечную муку Божественная правда воздает. Обои же, нынешний век добре или зле прешедше, по делом воздаяния имети будут. Количество же и качество причастия, по страстей или добродетелей навыкновением и действу восприимут. 37. Езера огненна суть сладостраствующия души, в нихже якоже тимение смердящее, есть смрад страстей. Неусыпающаго червия питает блуда похотное плоти неудержание, и змий, и жаб, и пиявиц, похотей лукавых, скверных и ядовитых помыслов же и бесов. Сицевое состояние отсюду приемлет обручение тамошния муки. 38. Якоже мук начатки в душах грешных сокровенни суть: сице и благих обручения в сердцах праведных, и действуют духом и причаствуются. Царствие бо небесное есть добродетельное житие, якоже и мука страстей навыкновение. 39. Нощь грядущая есть, по словеси Господню, совершенное неделание будущия тьмы.{Иоан. 9, ст. 4.} Или по другому образу антихрист, нощь и тьма, и есть и нарицается. Или паки по нравственному слову, коегождо дня нерадение, еже яко тьма умерщвляет душу сном нечувствия. Якоже бо нощь усыпляет всех, и образ есть смерти по умерщвлению: сице и нощь будущия (с. 178) тьмы соделовает грешников мертвыми нечувственным пиянством болезней. 40. Суд мира сего есть, по евангельскому словеси, неверие нечестивых, по сему: Не веруяй уже осужден есть:{Иоан. 3, ст. 18.} и судительная промысла к воспящению, или ко обращению приведения, и предложений наших во благих или злых уклонение по действу, по сему: очуждени быша грешницы от ложесн:{Псал. 57, ст. 4.} к неверию бо и наказанию и деянию, праведный Божий суд тогда является. Овех убо наказуя, овех же милуя, овем же венцы или муку дая. Первии бо суть всячески нечестиви: втории же, аще и вернии, но нерадиви: сего ради и человеколюбне наказуются. Совершеннии же, или в добродетелех или злых падениях бывше, воздаяния имети будут. 41. Аще не соблюдется нескверно, или не очистится, якоже бе естество духом, невозможно быти во едино тело и Дух о Христе, ныне же и в будущее сочетание. Рубище бо ветхости страстей, к новой ризе благодати к восполнению, содержительная и соединительная Духа сила прилагати не обыче. 42. Равночестие к сущему о Христе образу имети будет, обновление Духа приявый туне, и сохранивый, преестественное обожение, тогда стражда неизреченно: един бо о Христе, или уд Христов не будет, не содеявыйся отсюду благодати причастник, образа разума и истины, но апостолу, не имущ в себе.{Рим. 2, ст. 20.} 43. Уподобися царствие небесное скинии Богосооруженней, по моисеевой во двою завесу, уставления будущаго века имущее. И в первую убо скинию вси, елицы священницы благодати внидут: во вторую же, яко умную, елицы отсюду во мраке Богословия Священноначальне в совершенстве троичне служившии, Иисуса службоначальника и священноначальника перваго (с. 179) в Троице имуще ходатая, в скинию, юже водрузи. входяще, и светлее зарями того осияваеми. 44. Многи обители нарече Спаситель,{Иоан. 14, ст. 2} различная восхождения и преспеяния тамошняго состояния. Едино убо есть царствие, многа же внутрь различия имать: яко быти небесным и земным, по добродетели же и разуму количество обожения имущим. Ина бо слава солнцу, и ина луне, и ина звездам, и звезда от звезды разнствует во славе,{1 Кор. 15, ст. 41.} якоже глаголет Божественный апостол: аще и вси на единой Божественной тверди сияют. 45. Вмале человек неединожителен ангелом бывает, и аки безплотен нетленен, иже ум слезами очистивый, душу же отсюду воскресивый Духом: плоть же разуму и покоривый и повинувый, световиден же и огнен образ Божественныя красоты сотворивый естеством бренное человекоподобие свое. Понеже нетление телес есть, мокрот оскудение и дебельства. 46. Землено будет тело нетления, не имущее мокрот и дебелости, претворяемо неизреченно из душевнаго в духовно тело, яко и перстну быти ему и небесну тонкостию Боговидения. Яково бо создано бе от начала, таково и воскреснет: яко да сообразно будет образу Сына Божия, по всецелому обожения причастию. 47. Земля кротких есть царствие небесное, или Богомужное Сына Божия жительство, в неже взыдохом, или восходим, от негоже и наздани быхом, еже бо благодати рождение сыноположения, и воскресением обновление приявше, или паки: земля святая есть, обожившееся естество, или негли и очищаяся земля сия, у земленых по достоинству сицевых: или по другому умышлению: земля наследствуемая есть воистинну святыми, безволненная еже сущаго паче ума мира Божественная (с. 180) тишина, в нюже род правых вселится, нечесому же от яже в сущих окрест шумящу или смущающу их. 48. Обетования земля есть безстрастие, в немже истекает, яко мед и млеко, веселие духа. 49. Внутреннее слово святии друг в друзе в будущем веце вещают тайно, Духом святым изглашаемо. 50. Аще не увемы, яковых нас сотвори Бог, не познаем, яковых нас сотвори грех. 51. Равни возрастом суть в Дусе, елицы исполнение Христова совершенства отсюду восприяша. 52. Ихже труды, сих и воздаяния. Количество же или качество, сиречь меру, якова есть, чин и состояние, тамо причастием являют. 53. Умы, сиречь равноангели, глаголет писание, будут сынове воскресения Христова,{Луки 20, ст. 36.} нетлением и обожением святии. 54. В будущем веце ангели и святии, глаголют, преуспевающе в приложении дарований никогдаже престанут или ослабеют в желании благих. Умаления бо или изменения от добродетели на злобу оный век не имать. 55. Совершенна мужа непщуй быти ныне, иже подобие Христовых превозращений прия в себе, яко во обручении: в будущем же веце совершенным показует обожения сила. 56. Равно имать единовидных и достоинство и обожение в будущем веце, по добродетели отсюду к превозращениям духовным соделавшийся совершен. 57. Слава истинна есть разум или Боголепное зрение духовно, или догматов извествованное ведение, и веры истинныя познание. 58. Ужас есть, еже к уразуменным же и соединенным великолепныя славы душевных сил совершенное возвышение. Или паки: ужас есть чистое и всецелое к сущей (с. 181) во свете безконечней силе простертие: изступление же не точию душевных сил к Небеси восхищение, но и самаго чувства всячески по всему изступление: рачение же сугубое есть желания подвижное Духовное пиянство. 59. Воистинну два суть о Дусе изступительная рачения: сердечное и изступительное. Оно убо еще просвещаемых есть: сие же в любви усовершившихся: обоя же действуемый ум от чувства изгоняют. Зане рачение Божественно есть, пиянство духа к лучшему естественных смыслов, имже пиянство и чувство отемлется от одержаний. 60. Начало помыслов и вина есть раздельшаяся преступлением человека единовидная простая память, еюже и Божественную погуби, соделавшися своими силами сложна из простой, и различна от единовидной погибе. 61. Исцеление есть началобытныя памяти, от лукавыя помыслов пагубородныя памяти, к древней простоте ея возвращение: орудие бо злобы преслушание, не точию души ко благому простую память погуби, но и все ея силы растли, естественныя желания к добродетели омрачившо. Исцеляет же память воистинну Божественная утвердившаяся пребывательная молитвою память от еже по естеству сущаго ко еже выше естества сущему растворившися Духом. 62. Страстем убо вины суть греховная деяния, помыслом же страсти, мечтаниям же помыслы, мыслем же память, памяти же забвение, забвение же раждает невежество: невежеству же вина разленение, разленение же раждает похоти вожделение, вожделений же мати превращения движение, движения же действо деяния, деяние же есть зла безсловесное желание и прилепление к чувственным и к чувствам. 63. Во словеснем убо помыслы, в яростнем же зверския страсти, в желательнем же память скотскаго похотения, во уме же мечтательная воображения, в размышлении же мысли действуют и возсиявают. (с. 182) 64. Течение речное есть нашествие помыслов лукавых, в нихже прилог, с прилогом же сосложение греха, якоже наводнение волнуемо бывает, покрывающо сердце. 65. Тимение глубины, мокротную разумей сласть, или блудную нечистоту, или и вещественных стяжаний обременение: имиже отягощаемь встрастный ум во глубину отчаяния помыслами себе погружает. 66. Помыслами множицею и словеса вещей писание нарицает, якоже и помышления словесами, и словеса противообратне помышлениями. Сие же бывает, понеже движение таковых само о себе невещественно есть: вещами же воображается в вид, и претворяется: и сим образом прилог являемый познавается и глаголется. 67. Помыслы, словеса бесов суть и страстей предтечи, якоже и дел словеса и помышления: невозможно бо есть, благо или зло содеяти, не прияв первее своего помысла. Понеже помысл есть, безвиднаго прилога движение яковых либо вещей. 68. Вещество вещей раждает простыя помыслы, бесовский же прилог лукавыми соделывает. Различие убо имут естественнии словеса и помыслы от чрезестественных и вышеестественных по сравнению. 69. Помыслы равное имут действо по сущему во мгновении изменению, естественнии убо к чрезестественным, чрезестественнии же к вышеестественным абие обращаеми: виновни же суть помыслы сущему друг в друзе превращению и рождению, иже от вещества, на бесовския превращающеся: а иже от прилога помыслы на вещественные: якоже и естественнии помыслы Божественни, Божественнии же вышеестественни раждают: коеждо бо к сродному себе свое движительное изменение имать по четверично разделенней вине и рождению. 70. Веждь яко вины предположени суть помыслом, помыслы же мечтаниям, мечтания же страстем, страсти же (с. 183) бесовом, якоже цепь некая и чин в безчинных дусех, лукавне, и едина другия держащися связани суть. Обаче странное и несродное человеку, ничтоже действует само о себе, но от бесов действуемо есть: ниже бо помысл прилогствует когда, ниже мечтание идолотворится, ниже страсть действует, кроме отай сокровенныя бесовския силы. Аще бо и паде сатана сокрушився, но множае крепится нашею леностию, кичася о нас. 71. Воображают ум наш, паче же воображаются от нас самих, и прилогствуют по навыкновению, обладающия и действующия в душе страсти: вину бо к идолотворению страстное навыкновение бесове имут. Имать же вину мечтание тройственне, изменяющую зраки духов, по причастному души свойству: якоже и мечтанию тройственну быти во птицах, зверех, скотех, к желательной, яростной и словесной душевным силам. Трии бо начальнии страсти, на триех присно вооружаются, и в нейже душа укачествися страсти, к той по сродству воображаются нам и приходят. 72. Яко огнь убо многажды и яко углие, бесове сластей приходят. Зане сластолюбнии дуси желательное разжизают, яростное возмущают, словесное же смущающе помрачают душу: разжжения бо, смущения и тьмы вина начальнейшая из страстей сласть. 73. Нощь страстей, неразумия тьма есть. Или паки: нощь есть, родительное страстей державствование, в немже царствует тьмы начальник. 74. Во время действа страстей овии помыслы предыдут, овии же последуют. Предыдут убо помыслы мечтаний, мечтаниям же последуют страсти, страсти убо бесов предваряют, бесове же последуют страстем. 75. Начало страстей и вина, есть злоупотребление: злоупотребления же, превращение: превращения же, преклонение вольнаго навыкновения: хотения же искус есть прилог: прилога же (с. 184) бесове, промыслом попущаеми показовати, каково наше есть самовластие. 76. Яд жала греховнаго, приводящаго к смерти, есть страстное навыкновение души: неподвижен бо имать и непреложен нрав, иже страстьми укачествовавыйся вольне. 77. Страсти глаголются многообразне: разделяются же на телесныя и душевныя. Телесныя разделяются на болезненныя и согрешительныя: болезненныя разделяются на недужныя и наказательныя: душевныя же паки делятся на яростныя, похотныя и словесныя: словесныя разделяются на мечтательныя и размыслительныя. Из сих убо овии суть по злоупотреблению вольни, овии же по нужде невольни, и яко незазорны страсти быти глаголются, яже и припоследования, и естественна свойства отцы нарекоша. 78. Ины суть телесныя страсти, и ины душевныя, желательныя ины, и яростныя ины, другия суть страсти словесности, и ины ума и мысли: приобщаются же друг другу, и содействуют едины другим. Телесныя убо желательным, душевныя же яростным. И паки помысленныя ко умным, и умныя к мысленным и памятным страданиям. 79. Яростныя убо части страсти суть: гнев, горесть, вопль, острожелчие, дерзость, кичение, надменность, и аще что другое. Желательныя части: лихоимство, нечистота, необуздание, неудержание, ненасыщение, сластолюбие, сребролюбие, самолюбие, еже всех страстей лютейшее. Плотския же: блуд, прелюбодеяние, нечистота, студодеяние, неправда, чревобесие, уныние, превозношение, любоукрашение, и аще что другое. Словесныя же части суть: неверие, хула, лукавство, коварство, многопытство, двоедушие, укоризна, клевета, осуждение, уничижение, кощунство, лицемерие, лжа, сквернословие, буесловие, лесть, наругание, являтельство, человекоугодие, вышение, клятвопреступление, празднословие, и прочая. Умныя же: мнение, возношение, велехваление, распря, рвение, самоугодие, пререкание, непослушание, мечтания, (с. 185) примышления, любопоказания, славолюбие, гордыня, первое и последнее из всех зол. Мысленныя же суть сия: парения, глумления, пленения, помрачение, ослепление, отведения, прилози, сосложения, уклонения, превращения, препарения, и подобная сим. И кратко рещи: вся, яже вне естества, злая трием силам душевным сопримесишася, якоже и благая в них вся совокупне бывают по естеству. 80. _О Давидова к Богу со ужасом восклицания! Удивися, глаголюща, разум твой от мене.{Псал. 138, ст. 6.} Не возмогаю бо к нему крепчайшу сущу и непостижну, паче моего немощнаго разума и силы сущия во мне, како и плоть сия непостижна есть по сложению создания. 81. Законы естества суть качественная действуемых удов сложения, еже и различия слово нарече, аки многочастия своих свойств. Или паки: закон естественный есть, коегождо вида и уда действо в силе. Якоже бо Бог всею тварию, сице и душа телесными уды и действует и движет кийждо ко своему действу. Зде вопросити потребно, киим образом ярость и вожделение Богоноснии мужи, овогда плотскими силы нарицают, овогда же душевными? глаголем: яко ни коегождо имут разногласия словеса святых во известно ведящих я, но обоя истинствуют, и по приличию наречения пременяют зело премудре: неизреченнаго ради обою бытия, во еже быти по вкупе бытия образу. Яко быти совершенней убо отсюду душе, телу же несовершенну питательнаго ради возращения. Душа бо сама о себе имать силу и желательна хотения, и яростну к мужеству рачения движительну, от создания ея, словесней и умней созданней бывшей. Не бысть бо создана вкупе с нею ярость безсловесна и безумно желание, якоже ниже бе во плоти первее: но созданно нетленно бе кроме мокрот, от нихже последова желание и ярость зверская. По (с. 186) преслушании бо, падшу человеку во тлю и дебельство безсловесных, по нужде и ярость и вожделение в нем возниче. Сего бо ради и сопротивляется хотению душевному по ярости же и желанию, егда обладает. Внегда же покорится мертвенное словесному, последует душе ко действу благих. Егда бо смесишася и совокупна быша плотская приведенная с душею свойства: тогда уподобися скотом, повинувся закону греха, естественныя ради нужды, скот от словеснаго и зверь от человека быв. 82. Якоже душа вдуновением сотворена словесною, и умною жизненным вдохновением, ярость и похоть скотску не созда с нею Бог, но желания силу вожделетельну и к ней любления рачительно мужество. Сице ниже телеси созданну ярость и похоть безсловесну в начале вложи, последи бо сия преслушания ради прия мертвенно и тленно и скотско, имже и уподобися, бывшо. Тело бо, якоже глаголют Богословы, нетленно создано бысть, яковоже и воскреснет, якоже и душа безстрастна, аще и приятно тления. Растлешася же обоя, и срастворишася ради естественнаго закона вмещения друг в друга и преподаяния, сиречь душа и тело. Она убо страстьми, паче же бесы укачествовавшися: сие же безсловесным скотом уподобляяся, состояния действом и обладанием тления, и к единому обоих силам устремленным сущим: един скот безсловесен и безумен яростию и похотию быв совершися. И сице приложися скотом, по писанию, и уподобися им,{Псал. 48, ст. 13.} по всякому образу. 83. Начало добродетелей и источник есть благое предложение, сиречь желание добра. Якоже Бог есть вина и источник всякаго блага, добра же начало вера, паче же Христос камень веры, егоже начало и основание имамы всех добродетелей: о немже стоим, и зиждем всякое дело благо. Сей есть камень (с. 187) краеугольный, связуяй нас с собою, и многоценный бисер, егоже ища, во глубину безмолвия входящий инок, вся хотения своя продает послушанием заповедей, яко да стяжет его отсюду. 84. Добродетели имут между собою равность, и вся во едино соединяются, и един устав и вид добродетели исполняют. Суть бо добродетели, и добродетелей большия добродетели, яко обдержительныя и содержительныя множайших, или и всех: яко Божественныя любы и смирение, и Божественное терпение. Глаголет бо о нем Господь: в терпении вашем стяжите души ваша{Луки 21, ст. 19.}: и не рече, в посте вашем, или бдении вашем. О терпении же глаголю, по Богу бываемом, начале добродетелей, основании мужедоблестий. Оно бо есть самое, во бранех мир, в бури тишина, и во исправльших оное столп непревратноводруженный: егоже о Христе Иисусе стяжавша ни оружия, ни луцы, ни копия, ни воинства попущаема, ни самое бесов ополчение, ни темнии сопротивных полцы вредити возмогут. 85. Добродетели, аще и едины другия раждают, но от триех душевных сил бытие имут, кроме Божественных. Вина бо и начало четырем первейшим во естественных и Божественным добродетелем, от нихже и имиже прочия составляются: мудрости же и мужества, целомудрия же и правды есть Божественная Богословов Духодвижная премудрость, во уме четверично движимая: Не вся же купно действует, но особь куюждо во время ея, якоже хощет: и ову убо, яко свет: ову же, яко силу остру и приснодвижно вдохновение: ову же, яко освятительну силу и чистительну: ову же, яко росу чистоты веселительну, и зной страстей прохлаждающу. Куюждо комуждо, якоже предречено бысть, совершенному совершенное и действо по преспеянию дарует. (с. 188) 86. Силы совершенной душе не даруют от своего тщания добродетелей начинания, аще не существенне в навыкновении Благодатию приидут. Каяждо бо имать дарование свойственно, действо о себе, яко мощи и нехотящих привлачати причастников своих к себе, навыкновением и естеством благаго. И егда нам дастся дар сей, непременен и непреложен оттоле соблюдается: живу бо, якоже душу, еже действовати оныя во удесех своих, имут Благодать Духа. Темже и мертв добродетелей собор без оныя бывает. И мнящимся совершенне имети, или исполняти я, едины суть сени и образы добра, а не истины начертания. 87. Суть убо четыре начальныя добродетели: мужество, мудрость, целомудрие и правда. Осмь же, по преумножению и оскудению оных близпоследующия: злобы убо от нас, добродетели же от сущих в мире и нарицаемы и разумеваемы. Мужества убо, дерзость и страхование: мудрости же, лукавство и неразумие, целомудрия же, невоздержание и окаменение: правды же, лишшеимство и неправда, сиречь меньшеимство. Среди бо сих суть добродетели, не точию начальныя и естественныя, и всякаго приумножения и оскудения превышшия, но и деятельны суть. И овы убо добродетели произволение совета нравостию. овы же превращение и мнение содейственно стяжаша. О тех бо, яко среди суть добродетели правости, свидетельствует притча, сице глаголющи: и исправиши вся оси благи. Вся убо в триех силах душевных состоят и раждаются и зиждутся, якоже бо основание своего здания четыре начальныя добродетели, паче же Христа имут, да естественныя деятельными воз_очищаются: Божественныя же и паче естества Благостию Духа даруются. 88. Добродетели овы суть деятельны, овы же естественны, овыя Божественны и духовны. И деятельныя убо суть произволения, естественныя же сложения, Божественныя же благодати. (с. 189) 89. Якоже добродетелей рождение имать душа, сице и страстей. Но тыя убо по естеству: сия же вне естества раждати обыче. Вину бо к рождению добраго или злаго душа имать преклонение хотения, якоже остен некий к чертам, или возложение чеголибо на весы, аможе аще преклонится, то к содействию и приемлет и действует. Подлежаще бо есть обема действам предложение: понеже и сия и оная в себе содержит. Ту убо рождением: сию же самопроизвольным преклонением хотения. 90. Отроковицами писание нарицает добродетели{Песнь песн. гл. 1, ст. 2.}, растворительнаго ради их с душею соединения бывающаго, и занеже им во един дух и тело с нею видитися. Любви бо знамение отроковицы вид, и чистоты и освящение свидетельство, образ священных сих дев. Обыче бо Божественная преображати благодать, к немуже укачествишася, и к сродному непрелестне в могущих видотворити. 91. Осмь убо суть яко первейшия всех страстей, три убо велицыи, яже суть: чревобесие, сребролюбие и тщеславие. Пять же сим последующия: блуд и гнев, печаль, и уныние, и гордость. Сице же суть и противныя сим три обдержныя добродетели: нестяжание, воздержание и смирение. С ними же и тем последующия: чистота, и кротость, радость, и мужество, и уничижение, и все добродетелей последование. Силу же и действо и ухание свойственно коейждо добродетели или злобе навыкнути и познати ту, не всякаго хотящаго есть, но творящаго и подвизающася делом и словом, и от Духа дар ведения и разсуждения приемшаго. 92. Добродетели, овы убо действуют, овы же действуеми суть, и действуют убо сия в нас приходяще, егда подобает, и внегда, и елико хотят, и якоже. Мы действуем (с. 190) тыя по произволению и нравственному навыкновению нашего обучения. Но оныя убо существенне, мы же образне по праву воображаеми: зане образ есть всех наших деланий способ к тамошнему началообразному. Малеми бо зело существенно мысленная причаствуются, прежде будущаго непреложнаго наслаждения. Труды бо зде и образы, а не самыя добродетели воистинну действуем и приемлем. 93. Священнодействует евангелие по павлу, иже причащатися и преподаяти могий действом, и другим просвещение Христово, якоже некое семя Божественно сеет слово, в душевных слушателей нивах. Слово ваше, глаголет писание, да бывает всегда во благодати, солию растворено Божественныя Благости{Колос. гл. 4, ст. 6.}, яко да даст Благодать верою слышащим{Ефес. гл. 4, ст. 29.}. Земледелатели же паки, и земледеланием, учителей и учимых нарек, зело мудре являет. Овых убо, яко оратаев и сеятелей Божественнаго слова: овых же яко землю добродетелей плодоносну, тучну и благокласну. Священнодейство бо извещенно, не точию Божественных есть действо, но и причастие благих и преподаяние. 94. Различно есть произношением к поучению происходящее слово, и различне от многих образов собирается, от четырех видов. Ово убо бывает от учения, ово от чтения: ино от деяния, и ино от благодати. И якоже вода едина есть естеством, претворяется же и пременяется во свое качество по различию подлежащаго перстнаго вещества, яко и вкусом познавается. Ова убо горька, ова же сладка, и ина слана и смрадна: сице и по нравственному навыкновению коегождо происходящее слово изменяемо, действом познавается и пользу приносит. 95. Понеже слово в наслаждение дано бысть всякаго словеснаго естества, и якоже ястия некая многая и различна (с. 191) душа приемлющи, сладость их различне ощущает. Художественное бо слово имать яко пестуна, ко нраву воображающи. Читаемое же, яко воду успокоения дающе деятельное же, яко место злачно тучнящее. Благодати же, яко чашу упоящую и веселящую. Неизреченное же тоя радование, яко елей умащающий лице, и светло соделовающий. 96. Воистинну, не точию яко живот в себе душа сия имать, но егда и от инех послушает та ко учению, ощущает: внегда предваряет обою любы и вера. И сей убо верою слыша, тойже любовию наказуя, кроме кичения и славы словеса добродетелей творя. Еже убо от учения слово, яко пестуна приемлет: а еже от чтения, яко питателя: еже от деяния, яко залог, яко невестокрасителя сладчайшаго: а еже от Духа просвещение, яко женихово слово соединяющее и веселящее. Всяк бо глагол исходящ от уст Божиих есть, или яже Духом от уст святых произшедшая словеса, или сладчайшее действом Духа вдохновение, но едини святии. И понеже наслаждение словеснии имут в слове, зде убо Духом действенно веселящиися, зело мали суть: образы бо точию духовных словес мнози памятию ведят, и причащаются им, хлеба истиннаго будущаго [века], в чувстве Бога слова не у причастившеся. Един бо той тамо предлежит во всяку достойным довольне. сладость, ниже иждиваемь, или изядаемь когда. 97. Кроме умнаго чувства, невозможно вкусити в чувстве сладости Божественныя. Якоже бо чувства притупивый, недейственна та к чувственным содела, и ниже зрит, ниже слышит, ниже обоняет, разслаблен сый, паче же полумертв: сице и душевныя по естеству силы умертвивый страстьми, нечувственны сотвори к действу и причастию таинств Духа. Не зряй и не слышай и не ощущаяй Духовне, мертв есть: не живет бо в нем Христос, ниже сам о нем движется и действует. (с. 192) 98. Равно и тожде само, да не реку, едино действо имут чувства к душевным силам, и паче же егда здрава суть: ими бо сия и живут и действуют, и овоим живительный срастворися дух. Недугует бо воистинну человек, егда соборную страстей в немощь в себе носит, в больнице лености присно лежя. Чувства убо чувственная, оныя же душевныя силы, мысленная ясне зрят: и паче егда несть в них киялибо сатанинныя рати, закону ума и духа сопротивляющейся. Егда же во едино совокупятся Духом, единовидны бывше: тогда Божественная и человеческая непосредственне и существенне, якоже суть, естества ведят, и словеса их явственне видят, и единую вину всяческих Троицу, якоже мощно, чисте зрят. 99. Безмолвствующему убо первее должно имети, яко основание, сии пять добродетелей, на немже и делания созидати: сиречь, молчание, воздержание, бдение, смирение и терпение. Деланий же Богоугодных три: _псалмопение, молитву, и чтение, и рукоделие, аще есть немощен. Предреченныя бо добродетели не точию все прочия в себе обдержат, но и едина другую составляют. И от утра убо пребывати в памяти Божией молитвою и безмолвием сердечным, терпеливне молитися час первый: потом вторый чести: третий пети: четвертый молитися: пятый чести: шестый пети: седьмый молитися: осьмый чести, девятый пети: десятый ясти: единонадесятый спати, аще потребу имать: дванадесятый пети вечерняя. И тако добре преходя дневное поприще, угождает Богу. 100. От всех добродетелей яко пчеле, полезнейшая собирати подобает, и тако причащаяся от всех помалу, великое добродетелей делания творити сложение: от нихже мед премудрости приобретается к благорадованию душевному. 101. Аще хощеши удобее и нощное разстояние прейти, внемли, яко три жительства имать бдение нощное новоначальных, средних и совершенных. И первое убо жительство есть (с. 193) сие: полнощи спати, и полнощи бдети, или от вечера до полунощи, или от полунощи даже до утра. Второе же жительство есть сие: бдети от вечера час един или два, таже спати часов четыре, возставати же на утреню, поя и моляся часов шесть, даже до утра. Таже пети первый час, и седети безмолвствуя, якоже предречеся, или уставы деланий хранити часами, или частость, сиречь, молитву неразлучну соблюдати, еюже навыкновение бывает по жительству. Третие же жительство, всенощное имать стояние и бодрствование. 102. Се убо и о снеди речем, яко литра хлеба довлеет всякому подвизающемуся о безмолвии, и вина нерастворенна две чаши испивати, воды же три, и от обретающихся брашен снедати, не елико естество ищет желательне, но елико промысл устрояет, употребляти с воздержанием. Изряднейшее же и кратчайшее ведение о трезвенне жительствовати хотящих, есть хранение трех добродетелей, яже и прочия в себе обдержат: пост, глаголю, бдение и молитву, извествующия державнейшее всех добродетелей утверждение. 103. Безмолвие паче всего веры и терпения требует, любве же и надежды, и яже от всего сердца, и крепости и силы. Веруяй бо аще зде искомое и не получит нерадения ради может быть, или иныя некия вины, но во исходе всячески невозможно есть не прияти извещения о плоде веры и подвига, и не узрети свободы, иже есть Иисус Христос, душ искупление и спасение, Богочеловек слово. Не веруяй же всяко осужден будет во исходе, но уже и осужден есть{Марка гл. 16, ст. 16.}, по глаголу Господню. Сластем бо работаяй, и славу от человек взыскуяй,{Иоан. гл. 5, ст. 44.} а не от Бога, неверен есть, глаголет, аще словом верен быти мнится: простым исповеданием и верою таковый отай прельсти самаго себе. Услышит бо, яко зане не приял мя еси в сердце твоем, но отвергл мя еси вспять (с. 194) хребта твоего, и аз отрину тя: верну бо, Благонадежну подобает быти, и веровати Божией истине, свидетельствуемой во всех писаниях. Исповедати свою немощь, да не сугубо возымеет осуждение и неизбежное. 104. Ничтоже тако творит сердце сокрушенно и душу смиренну, яко еже уединятися в разуме, и от всех молчание. Не ино бо воистинну есть что губящее устроение безмолвия, и Божественную от него отемлет силу, якоже сии шесть обдержныя страсти: дерзновение, чревобесие, многословесие же и молва: надмение, и владычица страстей мнение, в нихже со усердием навыкнувый совершенне, и по преспеянии паче омрачается, и нечувствен бывает. И аще убо возникнет паки начало положити с верою и усердием, паки обрящет искомое, паче же смиряяся и ищя. Аще ли же что от предреченных и едино нерадением воцарится в нем, тогда всех зол собор с пагубным неверствием ополчившись, пусту добродетелей душу и исполненну страстей соделовает: яко ин некий вавилонский град бесовскими опустевший молвами и мятежми, яко быти последним горшим первых: и врагу яровидну и клеветнику, на безмолвствующих бываему, и языку яко стреле, и яко мечу обоюду остру на ня из_ощрятися. 105. Воды страстей, имиже мутное и возмущенное безмолвия море наводняет душу, несть возможно инако прейти, аще не на корабли празднем и легцем обдержащаго нестяжания и воздержания: от невоздержания бо и веществолюбия, страстей потоцы землю сердца потопляют, и всякую нечистоту, и вещество помыслов внесше в ню, смущение убо уму, мятеж мысли, тягость телеси творят, и леность и мрак и нечувствие в душе и сердце содевают, и свойственное по естеству навыкновение и чувство истребляют. 106. Ничтоже ино тако слабу, нерадиву и безумну душу подвизающихся творит, якоже самолюбие, сие бо воистинну (с. 195) страстей питательница. Внегда бо телесное успокоение предпочитает паче сущих о добродетели трудов и предусмотрительну разуму то восписует, еже не трудитися в делех волею, паче же удобных и малех потех заповедей, тогда слабу творит душу к прохождению безмолвнаго поприща, и безсилие в делех крепко и непреоборимо соделовает. 107. Изряднейший и первый врачь ради немощствующих к заповедем, и мутное потемнение удобно изблевати хотящим, ничтоже ино есть, яко неразсудное и с верою во всем послушание. Врачевство бо есть живительно многосложно от добродетелей пиющим, и нож, знамения язвенныя единою очищающь, еже послушание с верою и простотою предпочтивый паче всех действовати, вся страсти единою отсече: и не точию безмолвия достиг, но уже то и послушанием соверши, обрет Христа, и подражатель его и раб, и быв и глаголемь. 108. Кроме плачевнаго делания и жительства, невозможно есть претерпети безмолвия вара. Плачущий бо и размышляющий о яже прежде смерти и по смерти лютых, прежде неже сами о себе приидут, и терпение имети будет и смирение, два оная безмолвию основания. Кроме же предреченных безмолвствуяй, сообщника имать присно, нерадению мнение: от нихже пленения и парения умножаются, и к слабости нас споревают. Отсюду разленения источник невоздержание, слабо убо и немощно соделовает тело, ум же помрачен и ожесточен творит. Тогда же и Иисус уклоняется, народу сущу помышлений и помыслов на умнем месте. 109. Совести мучения нынешния или будущия вкусити в чувстве всем невозможно. Единем бо тем свойственне бывает, имже слава и любы зде или тамо оскудевает. Якоже бо мучитель некий страшен, повинных многообразне мучя, и ревность или обличение, яко мечь остр мучительски обнажая присно является. Треобразно убо двизатися к сопротивным (с. 196) и естеству и душе, дана бысть совесть, глаголемая ревность, от инех же естественная ярость: юже ярость, яко мечь лютый на враги из_ощряти нам повелевает, и аще убо победивши покорит два та единому, устав мужества тогда претворяемь к Богу бывает. Аще же покорится двема сима душа, греху, глаголю, и плоти, наконец тамо мука ей немилостива бывает, яко поработившейся самоизвольным разумением сопротивным. Зде содевающи студнейшая, и яко добродетельное устроение погубльши отпадает, отлучившися от Бога. 110. Воистинну, из всех страстей две суть жестоцы и тяжчайшия страсти: блуд и уныние, иже обладая окаянною душею, разслабляют ю. Общее имут между собою едина другой содержание и сопряжение друг со другом, неудобопреоборимы и неодолеемы суть, и совершенне от нас непобедими. И иная убо умножается в похоти, обдержит же вещество естеством нераздельне обоих, души, глаголю, и тела, растворенну имея всю во всех удех сласть свою. Иная же, свыше владычественное держа всю душу и плоть якоже смила_кс, отвсюду обемлющи, косно и безсильно и разслабленно естество творит. Изгоняются же, а не совершенне побеждаются, прежде блаженнаго безстрастия, внегда душа приемши молитвою Духа святаго силу, творящую ей отраду и крепость, и мир глубокий в сердце безмолвием веселится. Сия есть начало и царица, и госпожа, и обдержащая прочия сласти, сласть, и другиня ея разленение тристаты фараоновы, наводящая непоборимую колесницу: имиже вины страстей житию окаянным нам привнидоша. 111. Начало умныя молитвы есть действо, сиречь чистительная Духа сила, и тайное ума Священнодействие: якоже начало безмолвия, безпопечение. Средина же, просветительная сила и видение. Конец же, изступление и восхищение ума ко Богу. (с. 197) 112. Святилище духовное есть, прежде будущаго паче ума наслаждения, умное действо ума священнодействующаго и причащающагося тайно на душевнем жертвеннице агнца во обручении Божии. Ясти же агнца на умнем души жертвеннице, не точию есть, еже уразумети или причаститися, но и еже быти якоже агнец по образованию в будущем. Зде убо словеса, дела же таин тамо восприяти уповаем. 113. В новоначальных убо молитва есть, яко огнь веселия от сердца издаваемь: в совершенных же, яко свет благоухающий действуемь. Или паки: молитва есть, апостолов проповедание, веры действие, паче же непосредственная вера, уповаемых составление, действуемая любы, ангельское движение, сила безплотных, дело и веселие их, благовествование Божие, извещение сердца, спасения надежда, освящения знамение, святости образование, Божие познание, крещения явление, бани очищение, Духа святаго обручение, Иисусово радование, веселие души, милость Божия, примирения знамение, Христова печать, лучь мысленнаго солнца, денница сердец, христианства утверждение, примирения Божия явление, благодать Божия, премудрость Божия, паче же самопремудрости начало, Божие явление, иноков дело, безмолвствующих жительство, безмолвия вина, ангельскаго жительства знамение. И что множайше глаголати? Молитва есть Бог, действуяй вся во всех, за еже едину быти отца, и Сына, и святаго Духа действу, действующаго вся о Христе Иисусе. 114. Аще моисей не бы приял от Бога жезла силы, не бы Бог фараона убо и египта им поразил: и ум аще не силу молитвенну в руце имети будет, грех и сопротивныя силы сокрушити не возможет. 115. Глаголющии или творящии что кроме смирения, уподобишася зиждущему храмину в зиме, или без брения. Искусом же и разумом обрести и познати смирение, зело малех есть: словом бо о нем поведающии подобни суть измеревающим бездну. Мы же слепии, отрочески о велицем сем (с. 198) свете мало мечтающе, глаголем: смирение воистинну ни смиреннословие имать, ни смиреннообразие являет, ниже мудрствовати смиренная нудится, ниже себе укоряет смиряяся, аще и сия вины и образы смирения суть, якоже различнии способы, но благодать есть сие и дар свыше. Два же суть, якоже глаголют отцы, смирения: еже непщевати себе меньша всех, и еже Богу приписывати исправления своя. И первое убо начало, второе же конец. Взыскующим же смирения, с разумом подобает имети и помышляти три сия в себе: еже паче всех человек грешна быти, и паче всех тварей студна, яко вне естества суща, и паче бесов окаяннейша, яко раба суща бесовом. Глаголати же сице достоит: где бо вем аз известно человеческия грехи, каковы суть и колицы? превосходят ли или равны суть моим беззакониям? И невежества ради, _о душе! меньшии паче всех человек есмы, яко земля и пепел, и под ногами их. Како же и не мнети себе сквернейша всех тварей, во еже по естеству сущих, якоже быша, аз же ради безмерных беззаконий, во еже вне естества? Воистинну бо и зверие и скоти чистейши мене грешнаго суть: и сего ради есмь меньши всех, яко во ад и прежде смерти низведыйся, низлежу. Кто же не весть в чувстве, яко и бесов горший есть грешный, яко раб их, и тех послушающий, и отсюду с ними во тьме бездны заключен? Воистинну горший и бесов есть, от них обладаемый: и сего ради с ними бездну, душе, наследовала еси окаянная. В земле же и аде и бездне прежде смерти обитая, како себе праведна нарицая прельщаешися умом, грешна сотворив себе и скверна и беса злыми делы? Увы прельщения твоего и заблуждения, _о злобесне! псе нечисте же и всескверне, во огнь и тьму сих ради отсылаемь! 116. Премудрость духодвижна есть, по разсуждению Богословов, сила умныя и чистыя и ангельския молитвы, еяже знамение есть, еже внегда молитися, уму безвидну всячески зретися, (с. 199) и ниже себе ни ино что в дебельстве видети, но и чувством многажды от света онаго сокрываемым: ум бо невеществен и световиден тогда бывает, Богу неизреченно во един дух прилепляемь. 117. Седмь суть различнии образы привводящии и путеводствующии в то Богоданное смирение, составляющии друг друга и раждающии: молчание, смиренномудрие, смиреннословие, смиренноодеяние, самоукорение, сокрушение, последность. И молчание убо в разуме раждает смиренномудрие, от смиренномудрия же раждаются три образы смирения: смиренна вещати, смиренна и худа носити, и себе всегда укоряти. Сии же три образы раждают сокрушение, от попущения искушений бываемое, еже и смотрительное наказание глаголют, и от бесов смирение. Сокрушение же удобь делом творит душу меньшу всех быти и последнейшу, яко от всех обладаему. Два же сии образы, совершенное и Богодарное приносят смирение, еже силу, совершенство всех добродетелей нарицают: и то Богу приписует исправления. Первое всем и основание есть молчание, от негоже раждается смиренномудрие: сие же раждает три образы смирения: трие же раждают един сокрушения: а образ сокрушения раждает седьмый, меньший всех перваго смирения образ, егоже и смотрительно смирение глаголют. Смотрительное же приносит Богодарное и совершенное и безвидное и истинное смирение. И первое убо бывает сице: аще человек не будет оставлен, и побежден, и обладан, поработившись всякой страсти и помыслу, и духом побеждаемь, и ни от дел отнюд помощи не обретая, ни от Бога, ни от инаго кого, яко мало и не во отчаяние приити искушаему во всех, не может сокрушитися, и имети себе меньша всех, и последнейша и раба всех, и самых бесов неключимейша, яко мучима и побеждаема. И сие есть смотрительное промысла наказательно смирение, имже второе и высокое от Бога дается, еже есть Божественная сила действующая и творящая вся (с. 200) тем: орудие то себе видящи выну, и тем чудеса Божия деющи. 118. Впостасное света духовное видение, ум безмечтателен и не высящийся, действо молитвы истинное, и от среды сердца приснотекущее, души воскресение и воспростертие, ужас Божественный, и в горняя шествие от сих всех, изступление мысли в дусе совершенно от чувств, восхищение ума от своих сил, души ангельское движение Богодвижное, к безконечному же и гореносному движимо, в роде нашем обрести невозможно, страстей мучительству нами обладающу ныне, многих ради искушений. Обыче бо ум в легчайших паче, и прежде времени сия мечтати, яко да и данное ему от Бога малое устроение погубит, и мертв от всех будет. Темже подобает со многим разсуждением, ни яже времени прежде времене искати, ни яже в руку отвергати, ина и мечтати. Естеством бо ум вышереченных удобь мечты творит и преображает, и во яже не предуспе. Сего ради немал страх есть, яко да не и данных таковый лишится, и смысл многажды погубит прельстився, быв мечтатель, а не безмолвник. 119. Благодать несть вера точию, но и действуемая молитва: любовию бо действуемая духом, веру истинну имущую, живот Иисусов являемь показует. Темже веру имать сопротивну и мертву и неживотну, не имый ту действующу в себе, но ниже верен воистинну глаголется, иже словом точию единем верует, а не действуему ту заповедьми или духом имать. Достоит убо ту являти преспеяниями дел, или делы действуему во свете, и сияющу имети, якоже рече Божественный апостол: покажи ми веру твою от дел твоих, и аз тебе покажу от дел моих веру мою{Иаков. 2, ст. 18.}. Являя сим, яко дела заповедей показуют благодатную веру, якоже действуеми суть заповеди сущею во благодати верою, и сияют. Корень бо заповедей есть вера, паче же источник к (с. 201) возращению напаяющ сия заповедей, разделяяся на двое: на исповедание и благодать, аще и нераздельна естеством есть. 120. Малая и великая и сокращенная повинующихся лествица пять имать степений, к совершенству ведущих: первый, отвержение: вторый, повиновение: третий, послушание: четвертый, смирение: пятый, Божественная любы, яже есть Бог. И отвержение убо от ада возводит лежащаго, и порабощеннаго от вещества свобождает: повиновение же Христа обретает, и тому служит, якоже сам глаголет: аще кто мне служит, мне да последствует: и идеже есмь аз, ту и слуга мой будет{Иоан. 12, ст. 26.}. Где же есть Христос? на Небесех седит одесную отца. Темже тамо подобает быти и слузе, идеже и служимый, возводящий ногу к восхождению, или и прежде восхождения онеми образы, со Христом восходящу и совозыдущу. Послушание же, действуемо заповедьми, всяко зиждет лествицу от различных добродетелей, и сия добродетели, яко восхождения в душе полагает: от негоже послушания высокотворное раждается смирение, ту обемля, и горе вознося к небеси, царице добродетелей любви предает, и ко Христу приводя, представляет. И тако сокращенною лествицею во истине повинуяйся, удобь на небо восходит. 121. Несть инаго кратчайшаго пути, к вышним чертогам малою лествицею добродетелей ведущаго, якоже умерщвление пяти послушанию сопротивляющихся страстей: преслушания глаголю, и прекословия, самоугодия же и оправдания, и пагубнаго мнения. Сия бо суть уди и части непокориваго беса, поглощающаго прелюбодейчищных послушников, и отсылающаго ко змию в бездну. И преслушание убо есть, адская уста: прекословия же, язык его яко мечь остр: самоугодие же, из_ощреннии его зубы: оправдание же, гортань его: отдыхание же всепожирающаго чрева его есть мнение сопровождающее (с. 202) ко аду. Иже убо первое послушанием побеждаяй, прочая единою отсекает, и на Небеса единем степенем быстре востекает! Чудо же воистинну, и от неизреченных сущее и непостижимое, егоже и человеколюбец наш сотвори Господи, дабы единою добродетелию, или паче заповедию, некосненно востещи на Небеса, якоже и единым преслушанием снидохом, и низходим во ад. 122. Якоже ин некий сугубый мир есть человек, и нов именуется по Божественному апостолу, сице рекшему: аще кая о Христе, нова тварь{2 Корин. гл. 5, ст. 17.}. Ибо и ибо и земля, и вся, елика суть мир, человек же по добродетели бывает и именуется: о немже всяко слово и всяко таинство, якоже Богослов рече. Понеже бо брани нашей быти не к крови и плоти, но к началом и ко властем тьмы века сего, к духовом злобы о Небесных князя, воздушнаго{Ефес. гл. 6, ст. 12.}, апостолу глаголавшу. Приличествует, яко во ином мире велице естества душ наших сил, быти сопротивоборющимся тайно с нами, и на триех трие князи подвижников противовостающе, воев уготовляют, и в немже кто предуспе, и в немже делает, сими боримь бывает. Змий убо князь бездны, противусердечне внимающих воюя, противоборствует яко к чреслу похоти и пупа, имать крепость, и сластным исполином забвения палительныя раждеженных стрел пущает на ня силы, якоже ино море и бездну имея похоть, заходит, пресмыкается, возмущает ту похоть, и распеняет, и возжизает, и ко смешениям воспаляет, и сластей потоками наводняет ту, и яко ненасытну не насыщает. Князь же мира сего, к проходящим деятельную добродетель, сопротивляется, и к яростной части борьбу имея, лености исполином, всяческая страстей злохитрства яко в ином мире, или позорище же и поприще борение умне творит, побеждает присно с ним мужественно (с. 203) борющихся, или побеждается, и венцев или студа пред ангелы тем виновен бывает, и полки своя на ны выну вооружая, с ними ратуется. Князь же воздуха, на тщащихся мыслию к прению находит: мечтаниями видение ума испытует, к словесной и умной части приближаяся с воздушными духи лукавствия, и неразумия исполином, возницательную мысль яко иное словесное небо возмущает: мечтательныя же являя мгляныя духов образы и преображения прелестне, якоже молнии и громы, бури и звуки, страхование наводит. Кийждо комуждо, сиречь треми к тричастному души приражаяся, сопротивляется, и к коей части брань имать, к той и подвиг стяжавает. 123. Умы бо некогда сущии и тии, и безвеществия онаго и тонкости отпадше, вещественную некую дебелость кийждо имать, по чину или действу втелесеваемь, по немуже действу укачествися: понеже бо и тии, подобне человеку, ангельскую сладость погубльше, наслаждения Божественнаго лишишася, и в персти, якоже и мы, наслаждение имут, вещественни некако и тии бывше вещественных страстей навыкновеньми. И чудитися не достоит, понеже и наша душа, создана бывши по образу Божию, словесна же и умна, не познавши же Бога, скотна соделася и нечувственна, и мало небезумна вещественных дел наслажденьми: обыче бо навыкновение претворяти естество, и изменяти действо к произволению. Инии же легцы и тонцы, яко воздушнии дуси суще, зрение души развлекают ветры некия бурны и мечтания наводя, овогда и во ангелы преобразуются, прельщают душу, памяти видотворят, знаемых некиих преобразуя и превращая всякое духовное видение, паче же в подвизающихся еще прежде чистоты и разсуждения духовнаго. Ничтоже бо есть духовно, в неже не преобразуются отай, якоже по мечтанию. И тии бо вооружаются противу устроения и меры предспеяния, прелесть вместо истины, и мечтания вместо видения приводяще вносят. (с. 204) 124. Востание страстей и воздвизающаяся плотская брань на душу, пятьми образы в нас приходит. Овогда убо плоть злоупотребляющи сущая, овогда же внеестественная, яко по естеству, взыскует деяти: овогда же и от бесов вооружается на душу, яко сладце содружествуя сим: иногда же душа от сладострастия преднавыкновеннаго и сама о себе безчинствует, яко вкачествившаяся страстьми: последи же бывает брань и от зависти бесов, по попущению сопротивляющихся нам смирения ради, егда не успеют во всех предреченных. 125. Первейшия же вины брани три суть, от всех и всеми нам пребывающия: злоупотребление сущих, зависть и брань бесов, яже по попущению. А еже воставати, и вожделети плоти на душу, и душе на плоть, тойжде образ по навыкновению и действу имут плотския на душу страсти, и душевныя противу плоти борения. И сам же супостат иногда без разсмотрения и вины, яко безстуден, дерзая противу нас ратует. Не даждь убо, _о друже, пиявице яко кроворадующейся изсысати кровныя жилы, и не имать блевати кровь: ниже персти попускай в сытость змию и дракону, и удобь попереши гордыню льва и змия. Воздыхай, дондеже совлекшися облечешися в вышнее жительство, и образования по образу создавшаго тя, Иисуса Христа. 126. Воистинну, иже самым делом плоть сущии и самолюбием влекоми, сласти и тщеславию присно работают, в нихже зависть укоренися: печалию бо тая, и ближняго благополучием огорчаяся, облыгают добрая яко злая, и прелести сущая порождения, ни яже суть Духа, приемлют или веруют, ни Бога уведети или познати маловерием своим могут. Таковии, по ослеплению своему и маловерию, вправду тамо услышат: еже не вем вас{Матф. гл. 25, ст. 12.}. Верному бо вопрошающему (с. 205) подобает или веровати, яже не ведяше, слыша или учитися, имже верует, или учити, яже уведе, и умножати независтне в восприемлющих верне талант. Аще ли же не верует, яже не весть, и уничижает, яже не уведе, и учит, имже не научися, клевеща на учащих сим деятельне, будет часть его всяко со имущими желчь горести в наказание. 127. Ветий есть, по мнению истинно премудрых, иже кратко общим вежеством сущая обемлет, и яко едино тело и разделяет та и совокупляет, являя сия яко единосильна принятая в инаком и том же смысле: или иже поистинне доказателен глаголется. Или паки, ветий есть воистинну духовен, иже разделенная соборная сущих общая свойства, яже вочеловечившееся слово совокупило, разделяет и соединяет обятным словом качественнаго гласа: яко ветий не точию обемлет все единым доказательным словом, по внешности показуя инем та, но от являющихся ему духом сущих видений и других просветити может. Истинный же любомудрец есть, иже от сущих вину сущих ведый, или от вины сущая познаваяй, по соединению выше ума и непосредственней вере бысть любомудр, не точию навык Божественным, но и прияв та. Или паки: истинный любомудрец есть, действующий и зрительне жительствующий ум. Совершенне же ум любомудрый есть, иже нравственное и естественное и Богословное исправи любомудрие, паче же Боголюбие, и нравственнаго убо любомудрия деяниям, естественнаго же словесем, Богословскаго же видения и догматов правоте от Бога изучился есть. Или паки: в Божественных Божественный ветий есть, иже истинно сущая от сущих или от не сущих разделяет, и словеса убо онех от сих показует, и от сих онех обоженнейше зрит словеса: и о мысленном убо мире и невидимом, от чувственнаго и видимаго, о чувственном же и видимом, от невидимаго и мысленнаго сказует, (с. 206) о видимом яко образе невидимаго, о невидимом же яко первообразном видимаго. Предположися бо, глаголет, невоображенных образы, образования необразуемых, яко о нем сему, и сим о нем являтися Духовне, и яве одному другаго друг в друзе зрети, и явленна истины словом творити, не возводящими или иносказательными словесы назидати, подобне солнцу сияющий разум истины, но ведением и силою Духовною изяснити, показовая явленнейше истины словеса обоих миров. Яко сему убо пестуном нашим быти, оному же вечным Божественным домом нас ради явственне бывшу. Любомудрец же Божественный есть, иже деянием и видением несредственне соединивыйся Богу, и друг тому есть и глаголется, яко первую и творческую и истинную премудрость возлюбив, паче всякаго инаго дружества и премудрости и разума. Любословец же есть, а не истинно любомудрец, аще и слава любомудрия имя отай усвои, якоже рече великий григорий. Иже премудрость творения Божия и любит и испытует, по последнему изглашению: но обучается любомудрию сему не похвалы и славы ради человеческия показательне, яко да невеществолюбец будет и не любомудрец естествословныя Божия премудрости. Книжник же есть, иже в царствии Божии научивыйся, всяк, иже деянием в видении о Бозе труждается, и в безмолвии претерпевает, иже износит от сердечнаго своего сокровища новая и ветхая, сиречь евангельская и пророческая, или от новаго и ветхаго завета, или поучительная и деятельная, или законная и апостольская. Сия бо суть новая и ветхая таинства, яже деятельный книжник износит, в Богоугодном научився жительстве. Книжник паки есть, всяк деятельный, еще телесне в деланиях упражняяся. Ветий же Божественный есть, иже естественне среди стоит к разумам и словесем сущих и доказует вся в дусе разделительною слова силою. Любомудрец же истинный есть, иже преестественное Божие соединение ведоме и непосредственне в себе имать. (с. 207) 128. Иже кроме Духа пишуще же и глаголюще, и церковь созидати хотяще, суть душевни, яко иже негде глаголет Божественный апостол, Духа не имуще{Иуд. гл. 1, ст. 19.}. Таковии бо повинни суть клятве глаголющей: горе, иже мудри в себе самих, и пред собою разумни! от себе бо глаголют, а не Дух Божий в них есть глаголяй{Исаии гл. 5, ст. 21.}, по Господню словеси. От своих бо помысл прежде чистоты глаголющии прельстишася духом мнения. О сем бо притча глаголет: видех мужа непщевавша себе мудра быти, упование же имать безумный паче его{Притч. гл. 26, ст. 12.}. И еже: не бывайте мудри о себе{Рим. гл. 12, ст. 16.}. Премудрость нам заповедает. Но и сам исполненный Духа Божественный апостол исповедует, глаголя: Не бо довольни есмы от себе помыслити что, яко от себе, но довольство наше от Бога{2 Кор. гл. 3, ст. 5.}. И еже: но яко от Бога пред Богом, о Христе глаголем{2 Кор. гл. 12, ст. 11.}. Таковых бо словеса несладостны и непросвещенны, не от живаго бо источника Духа приемлюще глаголют, но яко от некоего езера тименна, от сердца имущаго и питающаго пиявиц и змий, и жаб похотей и кичения, и невоздержания, и вода разума их смердяща, мутна же и теплохладна, от неяже пиющии на недугование и гнусность и блевание пременяеми обращаются. 129. Тело Христово мы есмы, глаголет Божественный апостол, и уди от части{1 Кор. гл. 12, ст. 27.}. И паки: едино тело, един Дух есть, якоже и звани бысте{Ефес. гл. 4, ст. 4.}. Якоже бо тело без духа мертво есть{Иаков. гл. 2, ст. 26.} и нечувственно, сице умертвивыйся страстьми заповедей небрежением по крещении, недействен бывает, и непросвещен святым Духом, и Благодатию Христовою. Имать убо духа верою и паки рождением, недейственна и недвижительна ради душевныя мертвенности. Якоже бо и душа едина есть, уди же телесни мнози, и вся та душа держит, и животворит и (с. 208) движет приемлющее жизнь: а яже по некоей случайной немощи увядшия уди, яко мертвы и неподвижны, аще и носит в себе, обаче неживотны и нечувственны. Сице весь во всех несмешанне Христовых удесех есть Христов Дух, действуяй и животворяй причащатися живота могущия, но и не могущия причащатися немощныя, человеколюбне яко своя обдержит. Темже и всяк верный причастен убо есть верою сыноположения Духовнаго, недействен же бывает и непросвещен, мертвостию страстей и небрежением и неверием, лишаемь света и жизни Иисусовы. Яко всяк верный есть уд Христов, и Духа Христова имать. Недействен же и неподвижен ко причастию благодати, неключимь. 130. Осмь соборных видений глаголем быти: первое, еже Бога безвидна и безначальна, и несозданна, и всех вины, Троицы единыя, и пресущественна Божества. Второе, умных сил чина и устроения. Третие, сущих составления. Четвертое, смотрительнаго слова снисхождения. Пятое, всеобщаго воскресения. Шестое, страшнаго и втораго Христова пришествия. Седьмое, вечнаго мучения. Осьмое, Царствия Небеснаго. И четыре убо прешедших и бывших суть, четыре же будущих, и не у являющихся: видима же сия суть явне, и обретаются у стяжавших Благодатию многую ума чистоту. Кроме же света к сим приступаяй да весть, мечтания воображати, а не видения, мечтательным духом мечтаемь и мечтая. 131. Се и о прелести нужно по силе рещи, яко сущей мнозем, по многокозненной и многообразней ея подсаде, неудобьразумеваемой, и вмале непостижней. Прелесть, глаголется, во двою образу является, или паче находит и прибывает по мечтанию и действу, аще и от единыя гордости начало имать и вину. И первая убо начало вторыя: вторая же, начало, яже по изступлению, третия есть. Начало бо сущаго по мечтанию видения, мнение, еже Божественное яко образ некий мечтатися творит, от негоже мнения последует яже по (с. 209) мечтанию к заблуждению прелесть, еюже хуление раждается, с нимиже по мечтанию бывающая прелесть раждает страхование безместных мечт, и во бдении и во сне, еже трепет и колебание души нарицают. Гордости во последует прелесть, прелести хула, хуле страхование, страхованию трепет, трепету же изступление по естеству сущаго смысла. Сей есть, еже по мечтанию, прелести первый образ, по действу же вторый. Начало бо имать чрез сладострастие, от естественнаго похотения раждаемо. От сласти бо раждается неудержание неизглаголанных нечистот: разгревая бо то все естество, и возмутив владычественное привидений сочетанием, во изступление ум приводит, пиянством палительнаго действа к безумию его приводя, и прорицати творит лжепророчествие, прорицающее аки видения святых некиих, и словеса онех чрез него открывающее, упившася творит омрачением страсти, и нрав пременен и бесноват. Коварством прелести водимии, в мире таковых душицы нарицают, иже приседят и пребывают во храме святых некиих. И яко сиречь духи обдержими, и от самих их действуеми и мучими, и чрез них людям провозглашают: ихже беснующимися паче и заблуждшими, и прелести порабощенными нарицати достоит, а не пророки и предглаголющими настоящая и будущая. Сам бо блудный бес, помрачив их ум сластным огнем, во изступление приводит смыслов, являя им в мечтании святых некиих, и беседы и видения показуя. Иногда же и сами онии бесове являются, страхованием смутити тех. Игом бо велиаровым отягчив тех, ко греху, иже по действу, нудя поревает, и яко рабов имать преданных даже до смерти, в муку имый препослати. 132. Подобает ведати, яко прелесть три первоначальныя вины имать, имиже находит на человеки: от гордости, от зависти бесовския, и от наказательнаго попущения. Сих же вины суть: гордости убо легкость, преспеянию же зависть: наказательному же попущению, греховное житие. И от зависти (с. 210) убо, и единаго мнения скорое имать исцеление, паче же егда смирится человек. А еже от наказания греха ради сатане предание, множицею даже до смерти Бог попущает оное своим оставлением. Иногда и неповинным мучитися ко спасению попущает. Ведати же подобает, яко и сам той мнения бес предглаголет в невнимающих добре своему сердцу. 133. Вси благочестивии Священницы и царие истиною помазуются во обновлении, якоже и древнии тогда по прообразованию. Образы бо оныя быша нашей истине не от части, но вси нас всех назнаменоваху. Не бо по онем образованиям наше царство и Священство подобообразно есть и единовидно, аще и суть тииже образы: ниже распределяет нами естество различия помазанных, или благодать и звание к помазанию, но единое и тожде звание и веру и помазание и образование имамы. Показует же и являет по слову истины чистое и безстрастное, и всего оСвященна быти Богу, ныне же и в будущем веце. 134. Тогда глаголет усты премудрость и поучением сердца разум, иже Бога слова, и отца впостасную премудрость ясно от сущих являет, яко словеса первообразных в сущих начертавающия имый, и действом живущаго слова, премудрость от премудрости усты глаголет: сердцем же осияваем силою претворительнаго разума, поучаемаго духом, творити и просвещати может разум верно слышащия. 135. Великая истине противоборница и к погибели влекущая днесь человеки прелесть, еюже неразумие тьмы, в душах леностных воцарися, отчуждивши их от Бога. И убо неведущии быти Бога, породившаго ны и просветившаго, или словом единем точию веруема и познаваема, а не делом, или древним единем являема, а не и нам, и свидетельства о Бозе писаний инем, а не изрекшим восписует, и славу, якоже глаголет писание, о Бозе, хулят{2 Петр. гл. 2, ст. 10.}. Познание же благочестия (с. 211) всяко отметая, и телесне точию, да не реку иудейски, чтут писания, или и познавают: воскресения же ради души отсюду востание отмещуще, присно во гробех вселятися неразумне желают. Три сия страсти суть: неверие, лукавство и разленение: раждают же и содержат друг друга. Неверие бо лукавствию учитель, лукавство же сопутник разленению, егоже совершенная леность есть знамение. Или паки: разленение лукавства родитель, якоже рече Господь: лукавый рабе и ленивый{Матф. гл. 25, ст. 26.}! лукавство же отец неверию, всяк во лукавый неверен. Неверуяй же и неБогобоязлив есть: от негоже разленение раждается, мати презрению, имже всякое благое небрежется, и всякое зло содевается. 136. Истинная о Бозе слава, и разум сущих неложен, совершенное догматов православие составляют. Темже и славословити таковый сице должен есть: слава тебе, Христе Боже наш, слава тебе! яко нас ради вочеловечился еси, Бог слово пресущественное. Сего ради велико есть таинство смотрения твоего, Спасе наш, слава тебе! 137. Списуемых убо словес, по великому ма_ксиму, суть три различнии образы, незазорные же и ниже осуждения достойны. Первый, памяти ради своея: вторый, пользы ради других: третий, послушания ради пишемый, имже и премногая от писаний сложишася ради смиренне взыскующих слово. Аще же кто угождения ради и славы, и показания ради добродетелей списует, отстоит, глаголет, мзды своея, никоея зде имея пользы, или мзды в будущем веце, но яко человекоугодник и льстец корчемствуя слово Божие, осужден будет.