<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 85) Тогожде преподобнаго и Богоноснаго отца нашего марка полвижника послание в николаю иноку. Превожделенному чаду николаю. Понеже прежде много пеклся еси о спасении своем, и многое имел попечение о жизни, яже по Бозе, предложил еси нам о себе поведая, яковыми труды, и стремлением горящим прилепитися хотел еси ко Господу опасным жительством и воздержанием, и всяким злостраданием, бдением же многим, и крепкою молитвою подвизаяся: и яковы брани и множество плотских страстей в телеснем воздвизаются естестве, и на душу востают от греховнаго закона противувоюющаго закону ума нашего. Плакался же, яко излишнее стужаешися от страсти гнева и похоти, и способа некоего и словесна совета искал еси, яковы труды и подвиги употребив, победити предреченныя губительныя страсти возможеши. И во оно время, елико бе мощно, в лице любви твоей советовахом, душеполезная разумения и мудрования предлагающе и показующе, яковыми труды и усилиями постническими с разумом и просвещенным ведением словесным, по евангелию, жительствовавши душа верою помоществуема благодатию, может одолети внутрь злобы истекающая злая, паче же предреченныя (с. 86) страсти. От коих бо страстей по предприятию наипаче и привычке как бы образ восприяла душа, множае от оных будучи привлекаема: противу сих тщательнейший и непрестанный подвиг восприяти должна есть, дондеже покорит плотския и безсловесныя действия сердца, имже первее покаряшеся, и имиже привлекашеся, и частым помысл воспоминанием, и поучением злым по внутреннему мыслей сложению пленницею отводяшеся. Понеже убо телесне вмале отстоим от тебе лицем, а не сердцем, в пустыню ушедше к истинным делателем и подвижником Христовым, яко да и мы хотя мало некако подвизавшеся, и сподвизающеся со братиею подвизающеюся противу сопротивных действий, и страстем доблественне сопротивляющеюся, леность отложим, уныние оттрясем, нерадение от нас отвергнем, и всякое тщание и прилежание восприимем, благоугодити Богови тщащеся. Темже малый совет и учение полезное возусердствовахом писмены начертати искренности твоей, да о нихже в лице тебе глаголах, сия вкратце в малом советования нашего писмени прочитая прилежно, яко присутствующим нам духовныя пользы насладишися. Начало убо пользы твоея, яже по Бозе, _о чадо, отсюду творити должен еси. Незабвенно и приснопамятно в непрестанном поучении помышляти тебе подобает о всех смотрениях, и благодеяниях человеколюбиваго Бога бывших к тебе, и бывающих ко спасению души твоея: а не забвением злобы покрываему, или по причине уныния не поминати многая и великая его благодеяния, и сего ради безполезно и неблагодарно, преходити прочее время. Таковая бо непрестанная память, якоже некий остен прободающи сердце, подвижит оное всегда ко исповеданию, ко смирению, ко благодарению с сокрушенною душею, ко всякому тщанию благу, к воздаянию нравов, и обычаев благих и всякия по Бозе добродетели, сердце приснополучающееся с благосовестною мыслию сему пророческому словеси: Что воздам Господеви о всех, (с. 87) яже воздаде ми?{Псал. 115, ст. 3.} Егда бо помыслит душа о благодеяниях человеколюбиваго Бога, яже от рождения, или от коликих бед множицею избавлена бысть, или коликим злым подпадши, и в прегрешения множицею волею поползнувшися, не предана бысть праведно прельстившим духовом в погибель и смерть: но долготерпеливне человеколюбивый Владыка презирая согрешения, ожидая обращения ея, и врагом и лукавым духом вольне страстьми работавшую, той питаше, покрывая и всячески промышляя, и напоследок благим манием на путь спасения настави, и любовь к подвижническому житию в сердце вложи, и с радостию мир, и всякую его прелесть плотских сластей оставити укрепи, и ангельским образом постническаго чина украси, и удобь прияту быти от святых мужей в собрание братства устрои. Кто же благосовестную имея мысль, и сия помышляя, не всегда в сокрушении будет сердца, имея толикая обручения предварительных благодеяний, ни едино благо первее сам сотворив? Не всегда ли твердую надежду восприял бы, сие разсмотрев, яко аще и ни едино благо мне сотворшу, но и много пред ним согрешившу, в нечистотах плотских и во иных многих злобах пожившу, не по грехом моим сотворил есть, ниже по беззакониям моим воздал есть, но толикия дары и благодати во спасение устрои. Аще всеконечне предам себе прочее работати ему во всяком непорочном пребывании и добродетелей исправлении: то коликих благ, и духовных дарований сподобит, на всякое дело благое укрепляя, исправляя и наставляя? Темже имеяй всегда таковый помысл, и не забываяй Божиих благодеяний, преклоняет себе и управляет и понуждает ко всякому обучению добродетели благому, и ко всякому деланию правды, всегда усерден, всегда готов сый, во еже творити волю Божию. Сего ради, _о чадо возлюбленное! имеяй благодатию Христовою (с. 88) естественный разум, сие всегдашнее размышление, и поучение благое всегда в себе храни, не от забвения губительнаго покрываемь, ниже возбраняемь от уныния творящаго ум суетным, и уклоняющаго от жизни или от невежества, вины всех зол помыслом помрачаемь, или от нерадения всезлобнаго прельщаемь, ни от сласти плотския отвлекаемь, ни от чревобесия побеждаемь, ни от похоти умом пленяемь, и сосложением помысл блудных осквернение в себе производя, ни от гнева раждающаго братоненавидение побеждаемь, и милосердия ради и под предлогом окаянным опечалуя, и опечалуемь, и приводя на память лукавыя помыслы на ближняго, от чистыя ко Богу молитвы уклоняяся, и умом пленяемь, и зверским помыслом единодушнаго брата подзирая, и безсловесным плотскаго мудрования нравом в совести связуемь, и лукавым духам, имже повинулся, в наказание предаемь до времене, дондеже отвсюду вознедоумев ум, и от печали и уныния поглощен быв, и предспеяние, еже по Бозе предварительными вины погубив, паки начнет восприимати со многим смирением начало пути спасения: и много потрудився в молитвах и всенощных бдениях, разрешив вины смирением и исповеданием Богу и ближнему, тако начинает паки истрезвлятися, и просвещением разума евангельскаго, Божиею Благодатию просвещаемь, познает, что не предавый себе совершенне на крест мудрованием смиренным и уничиженным, и не повергий себе под всеми, еже попиратися и уничижатися и презиратися, и обидиму быти, и осмеваему и поругаему, и сия вся с радостию Господа ради терпети, не отмщевающий отнюд человеческой славе, или чести, или похвале, или сласти ястия или пития, или одеяния, христианин истинен быти не может. Темже таковым предлежащим нам подвигом и почестем, и венцем, доколе мы от притворнаго благочестиваго виду поругаеми будем, с ухищрением Господеви работающе, ино от человек почитаеми, а ино видими суще от ведущаго тайная? (с. 89) святии бо от многих почитаеми, свирепых еще нравов есмы, воистинну образ благочестия имуще, силы же его пред Богом не стяжавше,{2 Тим. гл. 3, ст. 5.} девственниками и чистыми от многих почитаеми, и пред ведущим тайная нечистыми сложении помысл блудных внутрьуду оскверняющеся, и действиями страстей окаляющеся, и ради притворнаго еще подвижничества нашего, и от похвал человеческих поницающе, и умом ослепляющеся. Доколе убо в суете ума ходим, за евангельское мудрование не емлющеся, и жительство по совести не познаваем, да со тщанием сие поженем, яко да и в совести дерзновение обрящем: но еще на мнимой внешняго человека правде единой утверждаемся, лишения ради истиннаго разума, и внешними точию обучении себе прельщаем, человеком угождати хотяще, и славы от них, и чести и похвал ищя? Приидет воистинну тайная тьмы открываяй, и обявляяй советы сердечныя:{1 Коринф. глава 4, стих 5.} необольстимый судия, ни богатаго срамляяйся, ни нищаго милуяй, образ внешний отемляй, и истину внутрьуду сокровенную обявляяй, по совести жительствующих истинных подвижников и страдальцев в присутствии ангел пред своим отцем венчаяй: а притворных и образом благочестия одеянных, и видимое точию житие человеком показующих, и на сем суетне утверждающихся, и умом прельщающих себе, пред вышнею церковию святых, и пред всем небесным воинством из_обличаяй, и тако люте стыдящихся во тьму кромешную посылаяй, по образу юродивых дев, яже внешнее девство сохраниша: нимало бо за сие не поречени быша, но и елей от части в сосудех имеяху, то есть, добродетелей неких и исправлений внешних, и дарований неких причастницы бяху. Темже и светильницы их до некоего времени горяху: по нерадению же и невежеству, и унынию, промышления не сотвориша, и кроющееся внутрьуду (с. 90) множество страстей от лукавых духов действуемое известно не познаша: но от сопротивных действ разумы их истлеваху, сосложением помыслов приобщающеся с ними, и прельщаеми тайно, и побеждаеми завистию злобнейшею, ревностию доброненавистною, распрею, любопрением, ненавистию, гневом, горестию, памятозлобием, лицемерием, яростию, гордынею, тщеславием, человекоугодием, самоугодием, сребролюбием, унынием, похотию плотскою, помыслы сладострастие содевающими, неверием, безстрашием, боязнию, печалию, прекословием, слабостию, сном, высокомыслием, оправданием, возношением, кичением, несытством, невоздержностию, лихоимством, отчаянием всего лютейшим, и тонкими злобы действии: яже, девы, и добрых делание, или житие честное, еже мняху пред человеки творити, и для получения от них похвал, аще и неких дарований причастницы бяху, духовом тщеславия и человекоугодия продаваху оная, и прочим страстем приобщающеся, смешаваху добрая обучения с лукавыми и плотскими мудрованиями. Темже неприятными и нечистыми оная соделоваху, якоже каинову жертву, жениховы радости лишившеся, и чертога небеснаго вне затворени бывше. Сия убо помышляюще и разсуждающе, и искушающе, познаим и уразумеим, в киих делех есмы: да доколе еще время покаяния и обращения имамы, себе исправим, яко да добрая наша дела чисте совершаема, истинна и добра будут, с плотским мудрованием не смешиваема да не отвержена будут яко жертва порочна, за безстрашие и нерадение, и истиннаго разума оскудение: да не како и труд девства, и воздержания, и бдения, и поста и страннолюбия претерпим, и дни иждивем, и за предреченныя страстей вины, мнимыя наши оправдания жертвою порочною обретшеся, неприятны будут небесному священнику, Христу. О ведении убо, _о чадо! и разуме предварительно тщатися подобает хотящему крест взяти, и последовати с непрестанным в себе испытанием помыслов своих, и многим (с. 91) попечением о спасении и разуме, и многим к Богу тщанием, и вопрошением единодушных и единомудренных рабов Божиих, и тем же подвигом подвизающихся, да не неведый, где и како ходит, во тьме без света светильнична шествует: иже бо самочинне, без евангельскаго разума и наставления коего шествует, много претыкается, и во многия ямы и сети лукаваго впадает, и много заблуждает, и во многи впадает беды, и не весть, каков конец получает. Мнози бо многими труды, и постничеством, и злостраданием проидоша, и труды многи Бога ради претерпеша: но самочиние, и неразсуждение, и нетребование от ближняго пользы, таковыя труды их нетвердыми и суетными соделаша. Ты убо, _о чадо возлюбленное! в начале увещания слова, бывшия к тебе покланяемаго и человеколюбиваго Бога благодеяния не забывай, отвлекаемь крадением злобы и уныния, но яже от начала рождения твоего даже до ныне, или телесная или духовная благодеяния пред очами полагая, размышляй об оных, и присно поучайся, по реченному: Не забывай всех воздаяний его,{Псал. 102, ст. 2.} да удобно ко страху Божию и любви сердце движется, еже исполнити по силе житие опасно, жительство добродетельно, совесть благочестиву, слово благослично, веру праву, мудрование смиренно, и просте рещи: всего себе Богу возложити, убеждаяся памятию благодеяний его, яже приял еси от благаго и человеколюбиваго Бога, яко да самим о себе, неким образом, таковою благодеяний памятию, паче же содействующей ти и свыше помощи, в любовь и желание уязвляется сердце твое: зане яже инем много лучшим тебе, не сотворил есть чудная, неизреченным своим человеколюбием тебе сотворил есть. Вся убо бывшая ти от Бога благая в памяти непрестанней содержати потщися. Особенно же оную великую и дивную благодать и благодеяние (с. 92) непрестанно поминай, юже отплывшу тебе купно с материю твоею от святых мест к константину граду, подаде тебе, якоже нам поведал еси: егда страшная оная и неудержимая буря, и волнение в нощи воздвижеся, и вси бывшии в корабли купно с корабленниками, и с самою материю твоею погибоша во глубине, и преславною Божественною силою един ты со двема инема извержени бывше спасостеся, и како устрои приити тебе во агкиру, и отеческими утробами от некоего щедролюбца прияту быти тебе, и любовию сопряжену быти с благоговейнейшим чадом епифанием, да оба наставльшеся преподобным мужем, приити на путь спасения, и от святых рабов Божиих, яко чада искренняя прияты быти. О сих убо всех от Бога тебе бывших благодеяниях, что достойно имаши воздати призвавшему душу твою в живот вечный? Себе бо прочее праведне не ктому жити должен еси, но за тя умершему и воскресшему Христу во всякой добродетели, правде, во всяком исправлении заповедей, ищя присно, что есть воля Божия, благая и совершенная, и угодная,{Римл. гл. 12, ст. 2.} и сие всею мощию тщатися постигати. Обаче юность твою, чадо, тако покори слову Божию, якоже само ти слово истязует, представити тело жертву живу, святу, благоугодну Богови, словесное служение,{Римл. гл. 12, ст. 1.} и всяку мокроту похоти плотския малотребованием, и малопитием, и всенощными бдении изсякнути сотвори и изсуши, да и сам от завещания речеши: Бых яко мех на слане, оправданий твоих не забых:{Псал. 118, ст. 83.} и познав, яко Христов еси, плоть свою распни, по апостольскому гласу, со страстьми и похотьми:{Галат. гл. 5, ст. 24.} и уды, яже на земли, умертви, не точию деяние блуда, но и действуемую от лукавых духов во плоти нечистоту. И не точию до сего поставляет подвиг истиннаго и несквернаго и всесовершеннаго девства венца ожидаяй, но последствуя апостольскому учению, и самыя тоя страсти (с. 93) явление и движение умерщвляти подвизается: и ниже тако еще извествуемь бывает зельным рачениям, ангельское и пречистое девство во свое тело вселити чая, но и самому воспоминанию тонкия похоти в едином помысле без движения и действа телесныя страсти, яко во время развеяния ума восходящему истребитися молится. Сему же помощию свыше, и силою и подаянием Духа единым исправитися мощно. Суть ли убо нецыи благодати сея сподобляющиися? Тако чистаго, и невещественнаго, и несквернаго девства венца ожидаяй, распинает постническими труды плоть, умерщвляет уды, яже на земли, продолжительным и непрестанным воздержанием, истлевая внешняго человека, и истончавая его, и обетшавая, и изсохшим соделовая, да верою, и подвиги, и действием благодати внутренний человек обновляется день от дне, на лучшее предуспевая, любовию растый, кротостию украшаяся, радованием духа веселяся, миром Христовым любодарствуемь, благодатию водимь, благостынею стрегомь, страхом Божиим обдержимь, разумом и ведением освещаемь, премудростию просвещаемь, смиренномудрием наставляемь. Сими и сим подобными добродетельми обновляемь, ум от Духа, Боговиднаго образа начертание в себе познавает, и владычняго подобия мысленную и неизреченную доброту усмотревает, и самонаученныя и саморазумныя премудрости завещательнаго закона богатство постизает. Истончи убо, _о чадо! юношескую плоть, и предреченными утучни безсмертную душу: предреченными добродетельми обнови ум содействием Духа. Юностная бо плоть, утучненная различными брашны и винопитием, есть яко вепрь готовый на заколение, егоже раждежением телесных сластей душа закалается, и распалением злыя похоти ум пленяется, противлятися сластем плотским не могий. Втечение бо крове, отхождение Духа соделовает. Особенно же причащения вина ниже да обоняет юность: да не сугубым пожаром являющимся во внутреннем действе (с. 94) страсти, и отвне винопитием обливаемь, имиже сласть плотская паче возгарается, духовную сладость болезненнаго умиления от нея отженет, и слияние и нечувствие в сердце сотворит: но желания ради Духовнаго, и воды в сытость юношество да не приемлет: зело бо к содействию целомудрия помоществует скудость воды. И сие делом искусив, самем тем искусом извествование приимеши. Не бо яко ярем нужды тебе наложити хотяще, сие законополагаем или повелеваем, но яко умышлению и художеству благу к содейству истиннаго девства, и известнаго целомудрия любезне поучаем и советуем, самовластному твоему произволению оставляюще творити, еже хощет. Прочее прииди, и о безсловесной страсти гнева мало разсудим, всякую душу опустошающей, и смущающей, и помрачающей, и зверем подобна человека показующей во время движения и действия своего, наипаче же удобопоползновеннаго и быстропреклоннаго к ней. Страсть сия особенно гордостию утверждается, и укрепляется, и не разорима бывает, дондеже напляемо бывает сие диавольское древо, горести и гнева и ярости, злою гордости водою, благоцветущо и благорастущо мног плод беззакония приносит. И тако неразоримо бывает в души здание лукавых, имущо утверждение и укрепление основания гордости. Аще убо хощеши древу сему беззакония, страсти, глаголю, горести, и гнева, и ярости в тебе изсушитися, и безплодну быти, да секира Духа пришедши посечет е, и во огнь ввержет, по евангельскому гласу, и потребит со всякою злобою: и аще хощеши дому сему беззакония, егоже лукавый зиждет зле в души присно, яко камение, вины различныя благословныя, или безсловесныя собирая, дела вещества или глаголы в помыслех, и здание злобы в души сооружая, в утверждение и укрепление помыслы гордости подлагая: аще глаголю, хощеши сему дому разоритися и раскопатися: то имей смирение Господне незабвенно в сердце твоем, (с. 95) кто сый, и что бысть нас ради, и от яковыя высоты света Божества откровеннаго, по силе горних существ, и на небесех славимаго от всего словеснаго естества ангел, архагг~л, престол, Господьствий, начал, властей, херувим и серафим, и не именуемых умных сил, ихже не достигоша к нам имена, по пророчеству апостола, в якову глубину смирения человеческаго по неизреченной благости сниде по всему уподоблься нам, во тьме и сени смертней седящим, и адамовым преступлением пленником бывшим, и действием страстей от врага обладаемым. В таковем убо пленении люте сущим нам, и обладаемым от невидимыя и горькия смерти, не постыдеся Владыка всея твари видимыя и невидимыя: но смирив себе, и восприемь от страстей безчестия, и запрещения, и владычняго изречения осужденнаго человека, по всему подобен нам бысть кроме греха, то есть кроме страстей безчестия. Наведенная бо греха ради преступления от владычняго изречения человеку в наказание, сиречь смерть, труд, алчбу, жажду, и таковая вся восприят, быв еже мы есмы: да будем, еже он есть, слово плоть бысть, да плоть будет слово: богат сый обнища нас ради, да мы нищетою онаго обогатимся: уподобися многаго ради человеколюбия нам, да всякою добродетелию уподобимся мы ему. Отнележе бо прииде Христос, воистинну по образу и по подобию новый человек благодатию Духа и силою обновляется, в меру совершенныя любве достизающи, вон изгоняющия страх, не ктому под падением быти могущия: любы бо никогдаже падает.{1 Иоан. гл. 4, ст. 16.} Бог бо, глаголет иоанн, любы есть, и пребываяй в любви, в Бозе пребывает. Сея меры сподобившеся апостоли, и подобне тем добродетели обучившиися, и совершенных себе Господеви представльшии, и совершенным желанием во всей жизни своей Христу последовавшии. Таковое убо смирение, еже любве ради к нам неизреченным (с. 96) человеколюбием восприят Господь, аще всегда незабвенно разсмотреваеши, то есть, в ложеснах Бога слова вселение, восприятие человека, рождение от жены, телеснаго возраста по части растение, безчестие, досады, поношения, поругания, укорения, биения, оплевания, насмеяние, наругание, червленную хламиду, терновый венец, князей на него изречение, беззаконных иудей единоплеменных сущих на него вопитие: Возми, возми, распни его:{Иоан. 19, ст. 16.} Крест, гвоздие, копие, напаяние оцтом и желчем, торжествование языков, насмеяние тех, иже хождаху и глаголаху: аще Сын еси Божий, сниди со креста, и веруем в тя:{Матф. 27, ст. 21} и прочия страсти, яже нас ради претерпе: распятие, смерть, тридневное во гробе погребение, во ад сошествие, таже страстей приплодия яковы и кия? то есть, из мертвых воскресение, ада и смерти пленение, шедших с Господем душ на небеса вознесение, одесную отца седение, превыше всякаго начальства и власти, и всякаго имене именуемаго, честь и славу, всех ангел поклонение первенцу мертвых, вины ради страстей,{Ефес. 1, ст. 21.} по апостольскому слову глаголющему: Сие да мудрствуется в вас, еже и во Христе Иисусе, иже во образе Божии сый, не восхищением непщева быти равен Богу, но себе умалил, зрак раба приим, в подобии человечестем быв, и образом обретеся, якоже человек, смирил себе, послушлив быв даже до смерти, смерти же Крестныя. Темже и Бог его превознесе, и дарова ему имя, еже паче всякаго имене: да о имени Иисус Христове всяко колено поклонится небесных и земных, и преисподних, и прочая.{Филип. 2, ст. 5, и след.} Се предреченных вины по правде Божией, в какове славу и высоту Господня человека возведоша! Темже аще любовию и желанием незабвенно памятовати сия будеши в сердце твоем, не имать обладати тобою страсть горести гнева и ярости. Основанием бо страсти гордости, смирением Христовым, еже разсмотреваеши, на верх изшедшим, все здание беззакония, (с. 97) ярости, гнева и печали удобне и само о себе разоряется. Кое бо жестокое и каменное сердце, аще имать во уме присно толикое единороднаго Божество, нас ради смирившееся, и исчисленных предреченных страстей память не сокрушится, не умилится, не смирится? не земля ли и пепел, и попрание от всех человек вольне, по писанию, будет? такоже смиряемей и сокрушаемей душе, на смирение Христово смотряющей, кая ярость ею воз_обладати возможет? кий гнев? кая горесть одолети? Но якоже мнится, забвение пользующих сих, и животворящих ны помыслов, и сестра его уныние, и сим содействующее и единонравное неведение, тяжчайшия внутреннейшия души страсти, неудобообретаемыя, и неудобоисправляемыя любопытством лютым душу покрывающе и помрачающе, прочим злобы страстем действовати и крытися в ней сотворяют: зане безстрашие и нерадение о добрых делех влагают, входити же и действовати каждой страсти дерзостне удобь попущают. Покровенней бо души от всезлаго забвения, и губительнаго уныния, и всех зол матере и питательницы неведения, к коемуждо от видимых, или разумеваемых, или слышимых удобь привязуется окаянный и слепотствующий ум: сиречь, аще доброту увидит жены, абие уязвляется плотскою похотию. И тако прочее преемстовавше памяти встраственне, и сладце виденное, или слышанное, или осязанное воображением мыслей, и злым поучением внутрь образы живонаписуют. И тако остраственный еще и окаянный оскверняют ум действием блудных духов. Прочее бо и плоть, аще будет тучна, или юнейша, или мокротнейша, таковыми воспоминаниями удобь возбуждаема, страстию действует своя си, к похоти движущися, или овогда во сне, или яве ничистоту делающи, аще во видимых жене и не приобщился есть. Целомудрым, и девственником, и чистым от многих почитаемый, аще и свята мнит себя, пред тайная же назирающим сквернен, и блудник, и прелюбодей судится (с. 98) быти, и праведне во он день осуждается, аще не плачет, и рыдает, и пощеньми и бдении, и молитвами непрестанными плоть истаяв, и ум воспоминаньми и поучении слова Божия исцелив, и исправив, достойное покаяние Богови не принесет, пред нимже злая помыслил есть, или сотворил. Неложен бо есть живый глас рекший: Аз же глаголю вам: всяк, иже воззрит на жену, ко еже вожделети ея, уже любодействова с нею в сердце своем.{Матф. гл. 5, ст. 28.} Сего ради полезно есть юным наипаче, еже отнюд, аще мощно есть, не беседовати со женами, аще и святы быти мнятся: аще ли же мощно, и вне человек пребывати, легчайшу брань совершает, и яснее разумеет свое предспеяние: паче же, аще опасне внимает себе, и с малотребованием, и малопитием воды, и бдением многим в молитве пребывает, подвизаяся и с Духовными искусными отцы сообращатися и сопребывати, и наставлятися от них тщася. Бедственно бо наедине, и самочинно и несвидетельствованно, и с неискусными Духовныя брани вкупе жити: инеми бо образы браней таковии емлеми бывают. Зане многия суть злобы козни, и подсады сокровенны, и различныя сети вражия отвсюду водружени суть. Сего ради, аще мощно есть, вкупе ходити, сиречь часто приходити к разумным мужам тщатися подобает, и подвизатися, яко да аще сам и не имать светильника истинна разума, за несовершенность еще умнаго возраста, и младенчество: то со имущим вкупе шествуя, не ходит во тьме, не бедствует от тенет и сетей, и в мысленныя не падает звери, во тьме пасущияся, и в ней без умнаго светильника Божественнаго слова ходящих похищающия и убивающия. Аще убо хощеши, чадо, светильник свой умнаго света и разума Духовнаго внутрь уду имети, да не преткновенно во глубочайшей нощи века сего ходити возможеши, и от Господа стопы твоя направятся,{Псал. 118, ст. 131.} (с. 99) яко да пути евангелиа восхощеши зело, по пророческому словеси, то есть, с верою горячайшею совершеннейшия евангельския заповеди проходити, и страстей Господних желанием и молитвою причастник быти: показую тебе художество дивное, и умышление нрава духовнаго, не телеснаго труда, или подвига требующее, но душевнаго труда, и ума настоятельства, и внимательныя мысли требующее. страхом и любовию Божиею поспешествуемое, имже умышлением полк вражеский удобь победити возможеши, по примеру блаженнаго давида, убившаго единаго исполина от иноплеменник верою и упованием на Бога, и тако тьмы врагов удобь со своими людьми победившаго. Содержание же нашего слова трех сильных и крепких иноплеменничих исполинов зрит, на нихже утверждается вся мысленнаго олоферна сопротивная сила: имже низложенным и умерщвленным бывшим, удобь прочее во убиении всякая лукавых духов изнеможет сила. Суть же исполини лукаваго, мнящиися крепцы, три уже предреченнии: неведение, мати всех зол: забвение, сестра сего, и содейственница, и помощница: и уныние, темную чернаго облака одежду, и покрывало души соткавающее, и первыя оба утверждающее и укрепляющее, и составление сим подающее, и в нерадивейшей душе зло всажденным и твердым соделовающее. От уныния бо, забвения же и неведения, прочих страстей подтверждения укрепляются и увеличиваются. Помощницы бо друг другу суще, и едино без другаго составитися не могуще, крепкими сопротивнаго силами показуются, и крепкими лукаваго князи, имиже все воинство духов лукавствия обращается и подтверждается, и помышления совершати возмогает, без нихже составитися предреченная не могут. Аще убо хощеши над страстьми предреченными победу одержати, и полк мысленных иноплеменник удобь победити, молитвою и содейством Божиим в себе пришед, и во глубину сердца входя, изследуй трех сих сильных диавола исполинов: забвение, глаголю, и уныние, и неведение, (с. 100) подтверждение мысленных иноплеменник, имиже прочия злобы страсти обращающеся действуют и живут, и возмогают в сердцах сластолюбцев, и в душах ненаказанных. И многим вниманием, и ума настоятельством с помощию, яже свыше, обрет прочим неведомая, и ниже быти непщуемая, губительнейшая же прочих суща злая, оружии правды сопротивными онем, памятию благою, глаголю, виною, всех благих, и разумом просвещенным, имже бодрствующи душа тьму неведения отгоняет от себе, и усердием изряднейшим ко спасению уготовляющим, и возбуждающим душу: в сия добродетели оружия облекшися, силою Духа святаго, всякою молитвою и молением доблествене и мужественне победиши мысленныя иноплеменники, предреченныя три исполины, изряднейшую памятию Бога: елика суть истинна, елика честна, елика праведна, елика пречиста, елика доброхвальна, аще кая добродетель, и аще кая похвала, всегда помышляя,{Филип. гл. 4, ст. 8.} всезлейшее забвение от себе отгоняя: просвещенным же и Небесным разумом губительное неведение тьмы истребляя: вседобродетельным же и добрейшим усердием безбожное уныние, соделовающее зло в душе всажденным изгоняя. Сия же добродетели не простым единем произволением, но силою Божиею и содейством Духа святаго со многим вниманием и молитвою стяжав, тако возможеши избавитися предреченных крепких триех исполинов лукаваго. Разума бо истиннаго, и памяти словес Божиих, и благаго усердия согласием, благодатию действенною в душе составитися нудящимся, и прилежно хранящимся: забвения и неведения, и уныния след в ней потребляется, и в не сущее превращается, благодати прочее царствующей в ней, о Христе Иисусе где нашем, емуже слава и держава во веки веков, аминь.