<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 61) Тогожде о мнящихся от дел оправдатися, 226 глав. 1. Зловерие внешних в последующем писании обличится от твердо верующих, и познавших истину. 2. Господь всякую заповедь показати хотя должною, сыноположение же человеком своею кровию дарованным, глаголет: Егда вся сотворите повеленная вам, тогда рцыте, яко раби неключими есмы, и еже должни бехом сотворити, сотворихом.{Луки гл. 17, ст. 10.} Сего ради несть мзда дел Царствие небесное, но благодать Владыки, верным рабом уготованная. 3. Не требует раб свободы, яко мзды, но Благоугождает, яко должник, и по благодати ожидает. 4. Христос умре, по писанию, грех ради наших, и благоработающим ему свободу дарует.{1 Корин. гл. 15, ст. 3.} Глаголет бо: Добре, рабе благий и верный, о мале был еси верен, над многими тя поставлю: вниди в радость Господа твоего.{Матф. гл. 25, ст. 23.} 5. Не у верен есть раб, на простом разуме утверждаяйся, но послушанием заповедавшему Христу веруяй. 6. Почитаяй Владыку творит повелеваемая: согрешивый же или преслушавый терпит находящая, яко своя. 7. Любоучен сый, буди и трудолюбив: простый бо разум напыщает человека. 8. Нечаянно случающияся нам искушения смотрительне нас трудолюбивыми научают быти, и не хотящих к покаянию влекут. (с. 62) 9. Находящия скорби человеком, порождения суть собственных их зол. Аще же оныя посредством молитвы терпим, обретаем паки благих вещей наведение. 10. Нецыи за добродетель похвалени бывше, усладишася, и сласть тщеславия своего возмнеша быти утешение. И инии, о гресе обличени бывше, поболеша, и полезную болезнь почтоша быти действом злобы. 11. Елицы под предлогом подвигов пред нерадивейшими возносятся, сии от дел телесных оправдитися мнят: елицы же утверждающеся на простом разуме, неведящих охуждаем, много безумнейши оных бываем. 12. Не у известен разум без дел по нему, аще и истинен есть: занеже всякой вещи, дело есть извещение. 13. Множицею от нерадения о деянии и разум помрачается. Иже бо делания совсем пренебрегоша, сих и память помалу потребится. 14. Писание сего ради в разуме ведети Бога советует, да право ему делы работаем. 15. Егда явне совершаем заповеди, свойственная убо от Господа по мере приемлем, пользуемся же по намерению произволения. 16. Хотяй что содеяти, и не могий, яко сотворивый есть пред сердцеведцем Богом. Сие же и о благих, и о злых делах разумети подобает. 17. Ум кроме тела, благая и злая совершает многая. Тело же кроме ума, ничтоже от сих совершити может: занеже закон свободы прежде деяния чтется. 18. Нецыи не творяще заповеди право веровати мнят, нецыи же творяще, яко мзды должныя, Царствия ожидают. Обои же от истины погрешают. 19. От Владыки мзда рабам не по долгу бывает, ниже паки получают свободу не работающии право. 20. Аще Христос за ны умре, по писанием, и не живем мы себе, но умершему за ны, и воскресшему: яве, яко (с. 63) работати ему до смерти одолжихомся. Како убо должным быти сыноположение возмним? 21. Аще Христос Владыка есть по существу, и Владыка по смотрению: зане и не сущия сотвори, и грехом умершия своею кровию искупи, и тако верующих благодать дарова. 22. Егда услышиши писание глаголющее, яко воздает комуждо по делом его: то да не разумееши, яко дела достойна суть геенны, или царствия, но воздает Христос комуждо по делом неверия в него, или веры, не яко примиритель вещей, но яко Бог, создатель и искупитель наш. 23. Елицы бани пакибытия сподобихомся, благая дела не воздаяния ради приносим, но хранения ради данныя нам чистоты. 24. Всякое дело благое, еже естеством нашим делаем, удаляет нас от врага, приложения же освящения без благодати сотворити не можем. 25. Воздержный удаляется чревобесия, нестяжательный лихоимства, безмолвный многословия, чистый любосластия, честный блуда, самодовольный сребролюбия, кроткий смущения. смиренномудрый тщеславия, послушливый любопрения, обличительный лицемерия: подобне и моляйся удаляется безнадеждия, нищии многоимения, исповедник отвержения, мученик идолослужения. Видиши ли, како всякая добродетель до смерти совершаемая, не иное что есть, точию от греха удаление? от греха же удаление есть дело естества, а не мзда царствия. 26. Человек едва хранит, яже естественна ему: Христос же крестом сыноположение дарует. 27. Иная заповедь есть частная, и иная обдержащая. Негде бо частне повелевает подавати неимущему, негде же заповедает всего отрещися имения. 28. Иное действие есть благодати, младенцу неведомое, и иное злобы, истине уподобляемое. Добро же есть на таковая не взирати прелести ради, ниже проклинати истины (с. 64) ради: но вся упованием приносити Богови: той бо весть обоюполезное. 29. Хотяй преплыти мысленное море, долготерпит, смиренномудрствует, бдит, воздерживается. Кроме же четырех сих аще внити понудится, возмущает сердце, прейти же не может. 30. Безмолвие есть отсечение зол. Аще же и четыре добродетели сии к молитве приемлет, ближайшия помощи ниединыя несть ему к безстрастию. 31. Невозможно есть безмолвствовати умом кроме тела, ниже разорити средостение сих без безмолвия и молитвы. 32. Плоть похотствует на духа, и дух на плоть, духом же ходящии похоти плотския не имут совершати.{Галат. гл. 5, ст. 17.} 33. Несть совершенна молитва без мысленнаго призывания: безмолвно же вопиющую мысль услышит Господь. 34. Ум неразвлеченне моляйся утесняет сердце. Сердце же сокрушенно и смиренно Бог не уничижит. 35. И молитва добродетелию глаголется, аще и матерь оных есть: раждает бо оная от соединения со Христом. 36. Еже аще содеем без молитвы и благия надежды, послежде привредно и несовершенно бывает. 37. Егда услышиши, что будут последнии перви, и первии последни,{Матф. гл. 19, ст. 30.} разумевай причастников добродетелей, и причастников любви. Любовь бо последняя из добродетелей есть по чину, первая же обретается всех по достоинству, прежде себе бывшия последними показующи. 38. Аще уныеши моляся, или от злобы многообразне оскорбляемь: помяни исход и лютыя муки. Лучше же есть прилеплятися Богови молитвою и упованием, нежели памятовати внешняя, аще и полезна суть. (с. 65) 39. Ни единая же от добродетелей сама собою точию отверзает естественную нашу дверь, аще не все едина от другия последовательно зависят. 40. Несть воздержник питаяйся помыслы, аще бо и полезны суть: не суть бо полезнейшии надежды. 41. Всякий грех непокаянный есть к смерти, о немже аще бы и святый за другаго помолился, не услышимь бывает. 42. Каяйся право не равный древним грехам вменяет труд, но тем Бога умилостивляет. 43. Елика аще имать естество наше добрая, по всяк день творити я должни есмы. Что убо за прежде бывшая злая Богови воздадим? 44. Елико приумножение добродетели днесь ни сотворим, обличение есть прешедшаго нерадения, а не воздаяние. 45. Утесняяйся умне, и упокоиваяйся телесне, подобен есть телесне утесняющемуся, и умне веселящемуся. 46. Вольная от обою скорбь содействует взаимно, мысленная плотской, и плотская мысленной. Сложность бо их горшею бывает. 47. Велия есть добродетель терпети находящая и любити ближняго ненавидяща, по слову Господню. 48. Любве нелицемерныя знамение есть обид прощение. Тако бо и Господь мир сей возлюби. 49. Невозможно есть от сердца простити некая прегрешения без истиннаго разума. Той бо особь комуждо находящая показует. 50. Ничтоже погубиши от тех, яже оставил еси Господа ради, во свое бо время множайше приидет. 51. Егда ум забудет цель благочестия, тогда и явственное дело добродетели безполезно бывает. 52. Аще всякому человеку вреден есть злый совет, много паче опасную жизнь восприявшим. (с. 66) 53. Делом любомудрствуй о совете человечестем, и воздаянии Божии: несть бо слово мудрее или полезнее делания. 54. По трудех о благочестии последствует заступление. Сие же ведети подобает от закона Божия и совести. 55. Един прият мудрование, и без разсмотрения удержа: другий же прият, и со истиною сравни. Взыскати подобает, кто из них благочестивее сотвори? 56. Истинный разум есть терпение скорбей, и не обвиняти людей в своих бедствиях. 57. Творяй благое, и ищай воздаяния, не работает Богу, но своей воли. 58. Невозможно есть согрешившему воздаяния избегнути, точию покаянием приличествующим согрешению. 59. Нецыи глаголют: не можем сотворити благое, аще не действенне приимем благодать Духа. 60. Присно пребывающии произволением во сластех, еже по силе оставляют, яко безпомощное. 61. Благодать во Христа крестившимся таинственне даровася. Действует же по мере делания заповедей, и отай благодать помоществовати нам не престает, в нашей же власти есть творити, или не творити благое по силе. 62. Первее Боголепно возбуждает совесть, отонудуже и злотворцы покаявшеся Богови благоугодиша. 63. Паки во учении ближняго сокровена есть. Овогда же и во чтении мысли последствует, и естественным последованием научает ум истине своей. Аще убо от частнаго сего последования не сокрыем талант, в радость Господню действенне внидем. 64. Прежде делания заповедей, действий духа взыскуяй, подобен есть рабу, среброкуплену, иже отнележе куплен бысть, с ценою и свободе написанной быти ищет. 65. Внешняя наведения правдою Божиею приходящая обретый, сей ища Господа, обрете разум с правдою. (с. 67) 66. Аще разумети будеши, по писанию, яко по всей земли судьбы Господни, будет ти всякий случай, Богоразумия учитель. 67. По коегождо мысли, сретается должное: различие же наведения приличнаго един Бог весть. 68. Егда безчестие некое от человек постраждеши, абие разумей сие наведением славы от Бога, и в безчестие безпечален, и без смущения будеши, в славе же, егда приидет, верен и неосужден будеши. 69. Похваляемь от многих по благоволению Божию, ничтоже самохвальное да примесиши смотрению Господню, да не паки от премены в противное впадеши. 70. Сеяние не возрастет без земли и воды: и не получит пользы человек без вольных трудов и Божественнаго заступления. 71. Невозможно есть без облака излиятися дождю, ниже без совести благия благоугодити Богу. 72. Не отрекайся научатися, аще и зело мудр еси. Смотрение бо Божие полезнейше есть нашея мудрости. 73. Егда от сласти некия сердце предвигнется с места трудолюбия: тогда, якоже камень тяжчайший на нисхождение поползнувшийся, неудободержимо бывает. 74. Якоже телец неискусен на траву течя упадает от обоюду в стремнину: тако обретается душа помалу от помыслов прельщаемая. 75. Егда ум мужествовав о Господе, отвлекает душу от долговременнаго предприятия: тогда сердце, яко от спекулаторов мучится, от ума и страсти, тяжущих ю сюду и сюду. 76. Якоже пловущии в мори, во уповании приобретения, приятне терпят солнечный зной: тако ненавидящии злобу любят обличение, занеже сопротивляется ов ветром, ов же страстем. 77. Якоже бегство в зиме, или в субботу болезнь бывает плоти, и осквернение душе: тако востание страстей [тяжущих] в старостне теле и душе освященней. (с. 67) 78. Никтоже тако благ и щедр, якоже Господь: не кающемуся же ниже той отпущает. 79. Мнози печалуем о гресех: вины же их приятне приемлем. 80. Крот под землею ползающий, слеп сый, звезд увидети не может: и неверуяй привременным, ниже вечным веровати может. 81. Истинный разум благодать прежде благодати даровася людем от Бога, научающий причастников своих прежде всего даровавшему веровати. 82. Егда греховная душа находящия скорби не приемлет, тогда ангели о ней глаголют: целихом вавилон, и не исцеле. 83. Ум, забывающий истинный разум, за противная, яко полезная, с человеки ратуется. 84. Якоже в воде огнь укоснети не может: тако ниже помысл скверный в Боголюбиве сердце. Занеже всяк Боголюбив есть и трудолюбив. Вольный же труд враг есть сласти по естеству. 85. Страсть самым делом пажить удержавши добровольно, послежди и не хотящу причастнику, насильне нань возносится. 86. Невольных помыслов вины любим, и сего ради они находят: вольных же яве, яко и дела любим. 87. Мнение и кичение виновны суть хулы, сребролюбие же и тщеславие немилосердия и лицемерия. 88. Егда увидит диавол, яко ум от сердца помолися: тогда велия и злохудожная искушения наносит. Малыя бо добродетели великими наведеньми потребляти хощет. 89. Помысл укосневая, являет пристрастие человека: скоро же истребляемь, знаменует брань и сопротивление. 90. Три суть мысленныя места, в няже ум от пременения входит: естественное, пачеестественное и противуестественное: и егда в место естественное внидет, обретает (с. 69) себя виновным лукавых помыслов, и исповедует Богови грехи, познавая вины страстей. Егда же в противуестественном месте будет, забывает правду Божию, и с человеки ратуется яко с обидящими его, егда же в пачеестественное приведен будет, обретают плоды святаго Духа, иже нарече апостол, любовь, радость, мир, и прочая. И весть, яко аще предызбирает телесная попечения, внутрь пребывати тамо не может: и отходяй от места онаго, впадает в грех и в последующия тому лютыя случаи, аще и не вскоре, но во свое время, якоже весть правда Божия. 91. Толико разум коегождо истинен есть, елико кротость, смирение и любы его утверждают. 92. Всяк крестивыйся православно, прият таинственно всякую благодать. Извествуется же прочее, по деланию заповедей. 93. Заповедь Христова, по совести совершаемая, по множеству болезней сердца, дарует утешение, обаче коеждо из оных во свое время приходит. 94. Имей непрерывное моление во всякой вещи, якоже ничтоже совершати без помощи Божия. 95. Ничтоже молитвы сильнее в действе, и к благоугождению Божию ничтоже оныя полезнее. 96. Всякое делание заповедей в ней обдержится: любве бо к Богу ничтоже есть вышше. 97. Молитва непарительная есть знамение Боголюбия пребывающаго в оной, нерадении же о ней, и парение, есть знамение сластолюбия. 98. Безскорбно бдяй и долготерпяй, и моляйся, Духа святаго действенне причастник есть. Стужающий от сих и хотением терпяй, и сей скоро получает заступление. 99. Заповедь заповеди показуется вышшею: сице и вера веры известнейшая обретается. (с. 70) 100. Есть вера от слуха{Рим. гл. 10, ст. 17.}, по слову апостола: и есть вера уповаемых извещение{Евр. гл. 11, ст. 1.}. 101. Добро словесы пользовати вопрошающия, лучше же молитвою и добродетелию содействовати онем. Сими бо себе приносяй Богови, помоществует и ближнему своим помоществованием. 102. Аще хощеши кратким словом воспользовати ученолюбиваго, покажи ему молитву, и веру правую, и находящих терпение. Вся бо прочее добрая сими обретаются. 103. В немже кто упова на Бога, не ктому о том с ближним ратуется. 104. Аще всякое невольное от вольных имать вину. по писанию, то никтоже тако враг есть человеку, якоже сам он себе. 105. Всех зол предваряет неведение, второе же сего есть неверие. 106. Бегай искушения терпением и молением: аще же без сих сопротивляешися, множае находит. 107. Кроткий по Бозе премудрых есть премудрейший, и смиренный сердцем сильных сильнейший. Понеже иго Христово в разуме носят. 108. Елика без молитвы или глаголем, или содеваем, послежде или погрешна, или вредна суть, и нас неведомо делы обличают. 109. От дел и словес, и мысли, праведник един: от веры же и благодати и покаяния, мнози праведницы. 110. Якоже кающемуся высокомудрствовати есть чуждо: тако волею согрешающему смиренномудрствовати невозможно. 111. Смиренномудрие несть совести зазрение, но благодать Божия, и познание милосердия. 112. Еже есть чувственный дом общему воздуху, сие словесный ум Божественней благодати. И елико аще извергнеши (с. 71) вещество, толико сама собою приидет, и елико аще вложиши, толико отидет. 113. Вещество домашнее есть сосуды и брашна: вещество же ума тщеславие и сласть. 114. Пространство сердца есть упование на Бога, теснота же его попечение телесное. 115. Едина и неизменна есть благодать Духа, действует же в коемждо особь, якоже хощет. 116. Якоже дождь излившися на землю, произрастениям приличное подает качество, сладким сладость, крепким же крепость: тако и благодать, в сердца верных непреложне входящая, приличествующия добродетелем действия дарует. 117. Алчущему Христа ради бывает пища, жаждущему сладчайшее питие, зябнущему одежда, труждающемуся покой, молящемуся извествование, и плачущему утешение. 118. Егда убо услышиши писание глаголющее о святем Дусе, яко седе на едином коемждо от апостолов, или нападе на пророка, или действует, или оскорбляемь есть, или угашаемь, или раздражаемь: и паки, овех убо начаток имущих, овех же исполнь сущих Духа свята: то не сечение, или преложение, или изменение некое да разумееши о Дусе, но веруй, имже образом предрекохом, непреложна, неизменна и всесильна его быти. Темже и в действиях пребывает, еже есть, и комуждо подобающее хранит Боголепне. Той бо, якоже солнце, на крестившияся совершенне излияся: кийждо же от нас по колику помрачающия страсти возненавидев отемлет, по мере сей просвещается: а по колику любя тыя помышляет о них, подобне помрачается. 119. Ненавидяй страсти, отемлет сих вины: в винах же оных пребываяй, от страстей и не хотя ратуемь бывает. 120. Егда лукавыя помыслы в нас действуют, самих себе, а не отеческий грех да обвиняем. (с. 72) 121. Корения помыслов суть явственныя злобы, яже руками, и ногами, и усты защищаем выну. 122. Невозможно приобщатися страсти в мысли, нелюбящему вин сея. 123. Кто бо стыд презирая, тщеславию приобщается? или кто уничижение любя, безчестием смущается? кто же сердце сокрушенно и смиренно имея, сласть плотскую приемлет? или кто Христу веруя, печется о привременных, или ратуется? 124. Отметаемый от некоего, и ниже словом, ниже мыслию со отмещущим нелюбопрящийся, разум истинный стяжа, и веру твердую показует владыце. 125. Лживи сынове человечестии в мерилех, еже неправдовати{Псал. 61, ст. 10.}, для коегождо праведное Богови хранящу. 126. Аще ниже обидящу есть избыточествие, ниже обидимому лишение: образом убо ходит человек, обаче всуе мятется{Псал. 38, ст. 7.}. 127. Егда увидиши кого во многих безчестиях болезнующа, веждь, яко помыслы тщеславия насытився, неприятне сердечных семен жнет рукояти. 128. Телесными сластьми паче подобающаго насладивыйся, сторичными болезньми вознаградит избыточествие. 129. Начальник послушнику должен есть глаголати должное: егда же преслушает его, наведение зол предвозвещати. 130. Обидимый от некоего, и не изыскуяй от обидящаго, сею частию верует Христови, и сторицею приемлет в веце сем, и живот вечный наследствует. 131. Память Божия есть болезнь сердца, о благочестии бываема: всяк же забываяй Бога, сладостраствует и безболезнен бывает. 132. Не глаголи, яко безстрастный скорбети не может: аще бо не о себе, но о ближнем сие творити должен есть. (с. 73) 133. Егда враг бывших в забвении согрешений многая удержит рукописания: тогда и в памяти таяжде творити должника понуждает, закон греховный благословне во зло употребляя. 134. Аще хощеши выну поминати Бога, не отрини наведения, яко неправедныя, но яко праведно находящия терпи. Терпение бо каждым случаем память возбуждает, оставление же умаляет умное сердца мудрование, и отрадою забвение производит. 135. Аще хощеши от Господа покрытися грехом твоим, да не яве сотвориши человеком, аще имаши добродетель. Еже бо аще содеваем в сих, сие и во онех Бог делает. 136. Сокрыв добродетель, не возносися, яко правду совершаяй. Правда бо есть не точию сокрывати добрая, но и ни о чем же от запрещенных не помышляти. 137. Не радуйся, егда благосотвориши кому, но егда непамятозлобне претерпиши последствующее сопротивление. Имже бо образом нощи дни, тако злобы благотворения преемствуют. 138. Тщеславие, сребролюбие и сласть, нескверно благотворение пребыти не оставляют, аще не первее сия страхом Божиим низпадут. 139. В невольных болезнех милость Божия сокровена есть, терпящаго к покаянию влекущая, и избавляющая от вечныя муки. 140. Нецыи творяще заповеди, на весах противу грехов извесити оныя ожидают: нецыи же теми умершаго о гресех наших умилостивляют. Взыскати подобает, кто о них имать правое мудрование. 141. Страх геенны, и любовь царствия подают терпение скорбей, и сие не от себе, но от ведущаго помышления наша. 142. Веруяй будущим. здешних сладостей неистязательне удаляется: неверуяй же, сладостен и безболезнен бывает. (с. 74) 143. Да не речеши, како сладостраствовати будет убогий, не имея виновных сего: может бо иный и помыслами окаяннее сладостраствовати. 144. Иное есть разум вещей, и иное разум истины. Елико разнствует от луны солнце, толико второе перваго полезнейше есть. 145. Разум вещей по мере делания заповедей прибывает: разум же истины, по мере надежды на Христа. 146. Аще хощеши спастися, и в разум истины приити, покушайся всегда превосходити чувственная, и единою надеждою прилеплятися Богу. Тако бо неволею уклоняяся, обрящеши начала и власти, прилогами брань творяща с тобою. Сия же молитвою побеждая, и пребывая благонадежен, имети будеши благодать Божию, от будущаго гнева избавляющую тя. 147. Разумеяй таинственне реченное от святаго павла, глаголавшаго, брани быти к духовом злобы, увесть и притчу Господню, юже глаголаше о том, яко подобает всегда молитися, и не стужати си. 148. Закон образне шесть дней делати, в седмый же праздновати повелевает. Занеже души есть дело благотворение имением, сиречь делы: упражднение же ея и покой, продати вся и дати нищим, по словеси Господню, и от нестяжания почившу во умнем пребывати уповании. В сей убо покой и павел со тщанием нас внити поощряет, глаголя: Потщимся внити во оный покой{Евр. гл. 11, ст. 1.}. 149. Сия же рехом не заключающе будущая, ниже зде всеобщему воздаянию быти определяюще: но яко подобает первее в сердце имети действующую благодать святаго Духа, и тако по мере внити в царствие Небесное. Сие обявляя и Господь глагола: царствие небесное внутрь вас есть{Лук. гл. 17, ст. 21.}. Сие и апостол глагола: есть вера уповаемых извещение{Евр. гл. 11, ст. 1.}. И паки: тако тецыте, да (с. 75) постигнете{1 Кор. гл. 6, ст. 24.}. И паки: Искушайте себе, аще есте в вере: или не знаете, яко Иисус Христос живет в вас, разве точию чим неискусни есте{1 Кор. гл. 13, ст. 5.}. 150. Познавый истину, скорбным наведениям не сопротивляется: весть бо, яко ко страху Божию наставляют человека. 151. Древнии греси по виду воспомянувшеся вредят благонадежнаго. С печалию бо произшедше, от упования отлучают, безпечальне же из_образившеся, древнюю внутрь скверну влагают. 152. Егда ум отвержением самаго себе, удержит единомысленную надежду: тогда враг под предлогом исповедания прежде бывшая злая из_ображает, да благодатию Божиею забвенныя страсти воздвигнет, и отай обидит человека. Тогда бо и крепкий и страстоненавистный по нужде помрачится, смутився о содеянных. И аще мрачен еще и сластолюбив есть, всяко укоснит, и встраственне беседовати имать с прилоги, якоже предприятию обрестися таковой памяти, а не исповеданию. 153. Аще хощеши Богу приносити исповедание неосужденное, не поминай по виду прилоги, но терпи доблественне наведение сих. 154. Печали за преждебывшия грехи находят, принося сродное всякому прегрешению. 155. Разумный, и ведущий истину, не памятию содеянных, но терпение находящих исповедается Богу. 156. Отвергши болезнь и безчестие, не обещавайся иными добродетелями каятися. Тщеславие бо и непоболение, работати греху, и правыми [делами] навыкоша. 157. Якоже бо добродетель болезни и безчестия раждати обыкоша, тако и злобу сласти и тщеславия. (с. 76) 158. Всякая телесная сласть от предварительныя есть отрады: отраду же раждает неверие. 159. Сый под грехом, не может един одолети плотское мудрование: занеже раждежение непрестанное и лежащее во удесех имать. 160. Страстным сущим молитися подобает и повиноватися. Едва бо возможно есть с помощию брань сотворити с предприятиями. 161. С повиновением и молитвою подвизаяйся волею, подвижник есть благохудожен, мысленную борьбу удалением от чувственных явственне показуя. 162. Не примиряяй с Богом свою волю, запинается во своих начинаниях, и подручник супостатом бывает. 163. Егда увидиши двоих злых имущих друг ко другу любовь, веждь, яко един другому содействует в воли. 164. Высокомудрый и тщеславный приятне друг с другом примиряются: той бо тщеславнаго рабски подпадающа похваляет, сей же высокомудраго часте похваляема величает. 165. Боголюбивый слышатель от обоих получает пользу. Во благих свидетельствуемь, усерднейшим бывает, во злых же обличаемь, каятися понуждается. Подобает же нам по преуспеянию и житие имети, и по житию должни есмы Богови молитвы возносити. 166. Добро есть главнейшую содержати заповедь, и ни о чемже по виду пещися, ниже по виду молитися, но токмо искати Царствия и слова Божия. Аще же о коейждо потребе еще печемся, должни есмы и о коейждо молитися. Без молитвы бо что творяй или пекийся, неблагоуспешен бывает к концу дела. И сие есть, еже рече Господь: не можете без мене творити ничесоже{Иоан. гл. 15, ст. 5.}. (с. 77) 167. Пренебрегающаго заповедь о молитве, безместнейшая преслушания постигают, едино ко другому пресылающе его, якоже узника. 168. Настоящия скорби чаянием будущих благ приемляй, разум истины обрете, и гнева и печали удобне избавится. 169. Озлобление и безчестие за истину приемляй, апостольским путем шествует, взяв крест, и веригами облагаяся. Без сих же сердцу внимати покушаяйся, скитается умом, и впадает во искушения и сети диавольския. 170. Ни злыя помыслы без вин, ни вины без помыслов не возможно есть ратующему победити николиже: егда бо едино часне отмещем, не по мнозе другим во обоих содержимы бываем. 171. От страха злострадания и поношения с человеки ратуяйся, или зде наведеньми излишно злостраждет, или в будущем веце немилостивно мучится. 172. Всякое злое наведение возбранити хотяй, должен есть молитвою примирити с Богом дела, и имети умне упование на него, попечение же о чувственных по силе пренебрегати. 173. Егда обрящет диавол без нужды человека в телесных делех упражняющася, первее похищает корысти разума его, потом упование на Бога, яко главу отсецает. 174. Аще когда постигнеши крепкое место чистыя молитвы, то разумение вещей, приносимое от врага, во время оно не приемли, да не большее погубиши. Лучше бо стрелами молитвы стреляти в него, долу негде заключенна, нежели беседовати с ним злая приносящим, и отвлекати нас от моления нань ухищряющимся. 175. Разумение вещей во время искушения и уныния, пользует человеку, во время же молитвы повреждати навыче. (с. 78) 176. Получив жребий учити о Господе, и преслушаемь скорби умственне, и не смущайся явственне: скорбя бо не будеши осужден со преслушающим: смущаяся же в тойжде вещи, искушен будеши. 177. Во время истолкования да не сокрыеши приличествующая присутствующим, благолепная яснее, жестокая же гадательне поведая. 178. Не сущему в повиновении твоем да не представиши согрешение пред лицем. Сие бо власти есть паче, нежели совета. 179. Множественне глаголемая бывают всем полезна. Зане каждому своя в совести изявляются. 180. Глаголяй право, должен есть и сам, яко от Бога приимати глаголы. Истина бо не глаголющаго есть, но действующаго Бога. 181. Не имей прения с противляющимися истине, иже не признаются тебе послушными, да не ненависть возбудиши, по писанию. 182. Послушнику противоглаголати, идеже не подобает, попущаяй, прельщает его во оной вещи, и обеты повиновения отвергати сотворяет. 183. Со страхом Божиим научаяй, и наказуяй согрешающаго, сопротивляющуюся согрешению добродетель себе стяжевает: злопомняй же и зловольне поношаяй, в подобную страсть по духовному впадает закону. 184. Добре научивыйся закону, боится законоположника, и бояся его, уклоняется от всякаго зла. 185. Не бывай двоязычен, инако словом: инако совестию будучи расположен: таковаго бо писание под клятвою поставляет. 186. Иный истину глаголет, и от безумных ненавидимь бывает, по слову апостола: а иный лицемерствует, и за сие любимь бывает. Обаче ни то, ни другое от воздаяний сих (с. 79) долговременно не бывает: занеже Господь во свое время комуждо подобающее воздаст. 187. Будущая злая потребляти хотяй, настоящая сладце должен есть сносити. Тако бо умне пременяя одну вещь на другую, малыми болезньми великих избежит мучений. 188. Затвори ум от самохваления, и помысл от высокомыслия, да не попущен будеши, и содееши противная: не бо от человека единаго совершается благое, но от всевидца Бога. 189. Всевидец Бог якоже делом нашим достойная наведения определяет: сице и помыслом и вольным разумениям. 190. Невольные помыслы от предварительнаго греха произрастают, вольные же от самовластныя воли. Темже вторые виновны обретаются первых. 191. Злым противу намерения прилучающимся мыслем печаль последует: темже и скоро они потребляются, сущим же по изволению, радость: темже и неудобопременяемы бывают. 192. Сластолюбивый печалится о поречениях и злостраданиях: Боголюбивый же о похвалениях и лихоимстве. 193. Не познаваяй судеб Божиих, окрест стремнинный путь преходит умом, и от всякаго ветра удобь низвращается: похваляемь возносится, и порицаемь огорчевается, пиршествуя блудствует, и злострадая плачет, разумея показыватися хощет таковым, и не разумея притворяется разумеющим, богатея кичится, и убожествуя лицемерствует, насытився дерзок бывает, и постяся тщеславится, со обличающими любит претися, и прощение ему подающим, яко несмысленным внимает. 194. Аще кто убо Благодатию Христовою разума истины и страха Божия не стяжет, то не точию от страстей, но и от приключений люте уязвляемь бывает. (с. 80) 195. Егда разрешити хощеши вещь неудобопостигаемую, ищи о ней, что Богови угодно, и обрящеши решение тоя полезное. 196. О нихже аще вещех Благоволит Бог, сими и всяка тварь служит: а от нихже той отвращается, подобне и тварь сим сопротивляется. 197. Сопротивляяйся печальным наведениям, противуратует, якоже не весть, повелению Божию: приемляй же тая с разумом истинным, сей, по писанию, терпит Господа. 198. Искушению нашедшу, не ищи, почто или чрез что прииде, но яко да оное Благодарне и безпечальне, и непамятозлобне претерпиши. 199. Чуждое зло не прилагает греха, аще не приимем мы оное злыми мысльми. 200. Аще несть удобно обрести благоугодивша без искушений, то благодарити подобает Бога о всяком приключении. 201. Аще не бы нощную ловитву оставил петр, не бы дневную получил: и аще не бы чувственне ослепл павел, не бы мысленне прозрел: и аще не бы яко хульник оклеветан был стефан, не бы отверзшимся ему небесем увидел Бога. 202. Якоже делание по Бозе, добродетель глаголется: тако и нечаянная скорбь, искушение именуется. 203. Бог авраама искушаше, то есть на пользу оскорбляше, не да уразумеет, каков есть: ведяше бо его ведяй вся прежде бытия: но яко да вину подаст к совершенной вере. 204. Всякая скорбь обличает уклонение воли: аще ли на десная преклоняется, или на шуяя. Сего ради случайною скорбию искушение именуется, причастнику подающи искус сокровенных желаний. 205. Страх Божий понуждает нас брань творити со злобою: нам же ратующим, Благодать Божия ратует на ню. (с. 81) 206. Премудрость есть, не точию естественным порядком уведети истину, но и сносити лукавство обидящих, яко свое. Зане в первой пребывающии к гордости возвышаются, до второй же достигшии смиренномудрие стяжевают. 207. Аще хощеши не стужаемь быти от лукавых помысл, уничижение души, и скорбь плоти приемли, и сие не частне, но во всяком времени, месте и вещи. 208. В скорбных вольне наказуемый, от невольных помысл не обладан будет: не приемляй же первых, от вторых, и не хотя пленяемь бывает. 209. Егда обидиму тебе ожесточится утроба и сердце, не печалься, яко смотрительне подвижеся внутри преждележавшее: но радуяся низвращай привозникшия помыслы, ведый, яко сим от прилога истребляемым, и злое по движении вкупе истреблятися обыче. Помыслом же учащающим, и оное ужножение приимати обыче. 210. Без сокрушения сердца невозможно есть совсем избавитися от злобы. Сокрушает же сердце тричастное воздержание, от сна, глаголю, и пищи, и телесныя отрады: излишество бо сих сладострастие влагает, сладострастие же приемлет лукавыя помыслы, и сопротивляется молитве, и приличествующему служению. 211. Повелевати братиею жребий приявший, храни чин твой, и да не прекословящих ради преумолчиши подобающая. В нихже они повинуются, мзду имети будеши ты за добродетель оных: а в нихже преслушают, совсем да отпустиши им, и приимеши равная от рекшаго: отпустите, и отпустится вам{Луки гл. 6, ст. 37.}. 212. Торговли подобен есть всякий случай: ведый куплю содеяти, приобретет многая, неведый же урон терпит. (с. 82) 213. Неслушающагося от единаго слова, не нуди с любопрением, но приобретение, еже отверже он, ты стяжи себе. Множае бо исправления онаго воспользует тебя незлобие. 214. Егда вред единаго ко многим относится: тогда не подобает долготерпети, ниже искати своея пользы, но многих, да спасутся. Занеже многочастная добродетель единочастныя полезнее есть. 215. Аще кто впадет в коелибо согрешение, и не будет печалитися по мере согрешения, удобь паки в туюжде впадает мрежу. 216. Якоже львица к юнице любовне не приступает: тако безстудие не приемлет приязненне по Бозе печаль. 217. Якоже с волком овца не сходится к чадородию: тако ниже с сытостию болезнь сердечная к зачатию добродетелей. 218. Никтоже может болезнь и печаль имети по Бозе, аще не первее вины сих возлюбит. 219. Страх Божий и обличение внутрь вмещают печаль: воздержание же и бдение приобщаются болезни. 220. Писательными заповедьми и учении не наказуемый, бичем конским и рожном ослиным погнан будет. Аще же и сия отринет, броздою и уздою по челюстем, приведен будет. 221. От малых удобь побеждаемый, и великими по нужде порабощен будет: презираяй же сия, великим о Господе сопротивустанет. 222. Не покушайся обличеньми пользовати хвалящемуся добродетелями. Зане тойжде и любопоказателен и истиннолюбец быти не может. 223. Всякий глагол Христов милость, и правду, и премудрость являет Божию, и силу сих посредством слуха влагает в слушающих сладце: темже и немилостивии, и неправедницы не сладостне слушая, премудрость Божию познати не (с. 83) возмогоша, но и учащаго оной распяша. И мы убо да смотрим, сладце ли его слушаем. Той бо рече: Любяй мя, заповеди моя соблюдет: и возлюблен будет отцем моим, и аз возлюблю его, и явлюся ему сам{Иоан. гл. 14, ст. 15 и 21.}. Видиши ли, како явление свое в заповедех сокрыл есть? все убо заповеди обдержит любовь к Богу и ближнему, яже от удаления веществ, и от безмолвия помыслов составляется. 224. Сие ведый Господь заповедует нам, глаголя: Не пецытеся о утреннем{Матф. 6, ст. 34.}: да и праведно. От веществ бо и попечения о них не избавивыйся, лукавых помысл како избавится? помыслы же содержимый, како увидит под сими кроющийся грех вещественный, иже есть тьма и мгла души, от лукавых мыслей и деяний приемляй начало? диаволу прилогом не нудительным искушающу, и начало показующу, человеку же сластолюбием и тщеславием сладце приобщившуся, аще по разсуждению и не хотяше, но по действу услаждашеся и приемляше. Сего же обдержительнаго греха не уведевый, когда помолився о нем очистится? Не очистивыйся же, како обрящет место чистаго естества{Иезек. гл. 37, ст. 27.}? Сего же не обретый, како увидит внутренний дом Христов{Захар. гл. 2, ст.10. Иоан. гл. 14, ст. 23. 1 Кор. гл. 3, ст. 16.}? Понеже дом есмы Божий, по пророческому и евангельскому и апостольскому словеси. 225. Подобает убо предреченным порядком искати, дабы обрести дом сей, и молитвою неотступно толцати, яко да или зде, или во исходе отверзет нам Владыка, и да не вознерадевшим речет: Не вем вас, откуду есте{Луки гл. 13, ст. 25.}. Не точию же должни есмы просити и прияти, но и данное сохранити. Суть бо нецыи, иже и по приятии погубиша. Темже предреченных вещей простое разумение, или случательный искус, может быть, и позде наченшии учитися, и юнии имеют: продолжительное же с терпением делание едва и благоговейнии от (с. 84) старцев имеют, и многоискуснии множицею оное невниманием погубльшии, и вольными труды паки взыскавшии, и обретшии. Сие убо и мы творити не престанем, дондеже оное не отемлемо стяжем. 226. Сия духовнаго закона оправдания, из многих немногая познахом, имже и великий _псалмопевец непрестанно советует научатися, и творити оная часто поющим о Господе Иисусе. Тому слава и держава, и поклонение подобает ныне, и во веки, аминь.