<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 43) Преподобный отец наш марк подвижник процвете около четыреста тридесятаго лета по Рождестве Христове: ученик бе святаго иоанна златоустаго, по свидетельству никифора каллиста в томе 2, книге 14, главе 53, современен быв святому нилу и исидору пилусиотскому, славным подвижникам. Трудолюбив же сый, и предався изучению Божественнаго писания, многия написал словеса, всякаго наставления и пользы исполненныя: из них же о тридесяти двух упоминается у никифора каллиста, изучающих всякому пути подвижническаго жития, яже ныне не обретаются. Хранятся же другия словеса его осмь точию, о нихже и каллист оный упоминает, и критик [испытатель писаний] фотий в чтении 200, стран. 268. Из сих словес первое о законе духовнем, и третие о мнящихся от дел оправдатися, на ясныя главы разделенныя, и осмое к николаю иноку, здесь положены, яко прочих полезнейшия. Упоминает же о сочинениях его и преподобномученик петр дамаскин, и святый григорий фессалонитский, и григорий синаит, и каллист святейший патриарх, и павел благодетельный, и другие многие из отцев, которые прочитав оныя и нас к чтению оных увещавают. Сего и святая Церковь Божия чествуя, 5 марта память его творит, постнические его подвиги, и в словесех мудрость, и свыше данную ему благодать чудес проповедуя. (с. 44) Преподобнаго и Богоноснаго отца нашего марка подвижника, о законе духовнем 200 глав. 1. Понеже вы множицею хотесте уведети, како закон духовен есть по слову апостола, и какое имут разумение и делание хотящии хранити его: сего ради по силе речем. 2. Первее вемы, яко Бог всякаго блага начало есть, и средина, и конец. Благое же не может быти веруемо или действуемо, точию о Христе Иисусе, и святом Дусе. 3. Всякое благо смотрительне от Господа даровася, и тако веруяй не погубит оное. 4. Известная вера столп есть крепкий, Христос же вся верующему бывает. 5. Да предначинает тебе во всяком твоем начинании Бог, предначинающий всякое благо, яко да по Бозе будет предлежащее [дело]. 6. Смиреномудрый, и дело имый духовно, чтя Божественныя писания, вся к себе отнесет, а не ко иным. 7. Призывай Бога, да отверзет очи сердца твоего, и узриши пользу молитвы и чтения, искусом разумеваемаго. 8. Имеющий дарование некое духовное, и состраждущий неимущим, состраданием хранит дар. Кичливый же погубит е, помыслы кичения окрест биемь. (с. 45) 9. Уста смиренномудраго глаголют истину: противу глаголяй же сей, подобен есть слузе оному, в ланиту Господа ударившему. 10. Не бывай ученик хвалящаго себя самаго, да не вместо смиренномудрия, гордости научишися. 11. Не возносися в сердце твоем разумением писаний, да не в дух хулы умом впадеши. 12. Не покушайся вещь неудобну разрешити любопрением, но имиже духовный закон повелевает, сиречь терпением и молитвою, и единомысленною надеждою. 13. Слеп есть вопияй и глаголяй: Сыне Давидов, помилуй мя! моляйся телесне, и не у имый духовнаго разума. 14. Слепый некогда прозрев, и видев Господа, не ктому его Сына Давидова, но Сына Божия исповедав, поклонися. 15. Да не вознесешися изливая слезы в молитве твоей: Христос бо коснуся очию твоею, и умне прозрел еси. 16. По примеру слепаго, отвергий ризы, и приближивыйся ко Господу, последователь ему, и проповедник бывает совершеннейших учений.{Марк. гл. 10, ст. 8.} 17. Злоба, в помыслех размышляема, дерзостным творит сердце: истребляема же воздержанием и надеждою сокрушает оное. 18. Сокрушение сердца одно есть мягкое и полезное ко умилению его: другое же жестокое и привредное, к запрещению его служащее. 19. Бдение и молитва, и находящих терпение, сокрушение есть безвредное и полезное сердцу, точию аще лихоимством не отсечем их срастворение. Сия бо терпяй, и в прочих вспомоществуемь будет: нерадяй же и ослабляяйся, при кончине нестерпимую болезнь имети будет. (с. 46) 20. Сластолюбивое сердце темницею и узами бывает душе во время исхода: трудолюбивое же, дверь есть отверстая. 21. Жестокое сердце есть, железныя врата во град вводящия: злостраждущему же и оскорбленному сами собою отверзутся оныя якоже и петрови. 22. Многие суть образы молитвы, един от другаго различествующие. Обаче ни един образ молитвы несть вреден, разве что несть молитва, но делание сатанинское. 23. Человек, зло сотворити хотяй, первее молится мыслию по обычаю, и смотрительне возбранен будучи, послежде много благодарит. 24. Давид, убити хотяй навала кармильскаго, воспоминанием Божественнаго воздаяния отвращен быв от начинания онаго, много возблагодарил. Вемы же паки, якова сотворил он забыв Бога, и не престаяше, дондеже нафан пророк приведе его в воспоминание Бога. 25. Во время памяти Божия умножи моление, да егда забудеши, Господь воспомянет тя. 26. Читая Божественное писание, разумевай сокровенная в нем. Елика бо преднаписана быша, глаголет, вся в наше наказание преднаписашася{Рим. гл. 15, ст. 4.}. 27. Веру писание нарицает уповаемых извещением{Евр. гл. 11.}: и не познавающих вселения Христова, неискусными именует{2 Корин. гл. 13, ст.5.}. 28. Якоже от дел и словес является мысль, тако и от сердечных действий будущее воздаяние. 29. Щедрое сердце яве, яко ущедрится: противная же последствие провозглашает. 30. Закон свободы учит всякой истине, и мнози читают его по разумению, но мали разумеют его по мере заповедей делания. (с. 47) 31. Не ищи совершенства его в добродетелях человеческих. Совершенный бо в оных не обретается: зане совершенство его во Кресте Христове сокровено есть. 32. Закон свободы разумением истинным чтется, деланием же заповедей разумеется: исполняется же щедротами Христовыми. 33. Егда ко всем заповедем Божиим совестию направлятися понудимся: тогда уразумеем, яко закон Господень непорочен в наших делех добрых хранится, а совершитися кроме щедрот Божиих в человецех не может. 34. Елицы всякия заповеди Христовы должниками себе быти не вмениша, сии закон Божий телесне чтут не разумеюще, ни яже глаголют, ни о нихже утверждаются: тем же и мнят исполняти его делами. 35. Иная вещь есть явно добрая в совершении, а намерение совершающаго оную несть во благое: иная же совершается аки лукавая, а намерение совершающаго оную есть во благое. Не точию же дела творят нецыи, но и словеса глаголют предреченным образом. Зане ови пременяют вещь по неискуству или неведению, ови же по предложению лукавства, инии же по благочестию. 36. Сокрываяй в покрове похвал клевету и порицание, не удобообретаемь есть простейшим: подобен же сему есть и тщеславствуяй во смиреннем образе: иже на мнозе прехищряюще истину лжею, попущени бывше, послежде делы обличаются. 37. Иный творит вещь некую явно яко добрую. отмщевая ближнему: другий же не сотворивши тоя, воспользуется во уме. 38. Иное обличение есть по злобе и отмщению, а иное есть по страху Божию и истине. 39. Преставшаго от греха, и уже кающагося не ктому обличай. Аще же глаголеши, яко по Бозе обличаеши его, первее своя злая явными сотвори. (с. 48) 40. Всякою добродетелию начальствует Бог, якоже и дневным светом солнце. 41. Сотворив добродетель, помяни рекшаго, яко без мене не можете творити ничесоже{Иоан. гл. 15, ст. 5.}. 42. Скорби ради благая человеком уготована суть: подобне же и злая тщеславия ради и сласти. 43. Избегает греха обидимый от человек, и равное скорби обретает заступление. 44. Веруяй Христу о воздаянии, всякую обиду усердно терпит по мере веры. 45. Моляйся о человецех обидящих, сокрушает бесы: сопротивляяйся же первым, от вторых уязвляется. 46. Лучше прегрешения человеческая, нежели бесовская: благоугождаяй же Господеви, обоих побеждает. 47. Всякое благо от Господа смотрительне приходит: отходит же тайне от неблагодарных, неразумных и праздных. 48. Всякая возбраненная злоба оканчивается сластию, и всякая добродетель духовным утешением. И якоже первая державствуя, поощряет своя, сице и вторая подобне сродная ей. 49. Поношение человеческое скорбь наводит сердцу, чистоты же бывает виновно терпящему. 50. Неведение, вопреки глаголати полезным творит, и дерзостно бывая, возращает предлежащая злобе. 51. Ничимже отщетеваемь, скорбная приемли: и яко слово воздати имея, лихоимство отвергни. 52. Согрешив втай, не покушайся утаити. Вся бо нага и обявлена пред очима Господа, к немуже нам слово{Евр. гл. 4, ст. 13.}. 53. Умственне показуй себя Владыце: человек бо на лице, Бог же на сердце зрит{1 Цар. гл. 16, ст. 7.}. (с. 49) 54. Ничтоже помышляй или содевай без намерения, еже по Бозе. Безразсудно бо путешествуяй, суетно трудитися имать. 55. Без нужды согрешающему неудобно каятися бывает: занеже утаитися не можно от Божия правды. 56. Случай болезненный память Божию подает разумному, оскорбляя по равенству забывающаго о Боге. 57. Всякая невольная болезнь да научает тя памятовати Бога: и не оскудеет ти вина к покаянию. 58. Забвение само по себе ни едину имать силу, но от нашего нерадения по мере укрепляется. 59. Не глаголи, что сотворю, яко не хощу, и приходит: занеже помня, пренебрегл еси должное. 60. Еже помниши благо, сотвори: и еже не помниши, откроется ти: и не предаждь безразсудному забвению мысль. 61. Писание глаголет: ад и пагуба явна пред Господем{Притч. гл. 15, ст. 11.}. Сия же о сердечном неведении и забвении глаголет. 62. Ад бо есть неведение: обоя бо суть не явна [не сущая]: пагуба же есть забвение: занеже от сущих погибоша. 63. Своя испытуй злая, а не ближняго, и не окрадено будет умное твое делателище. 64. О всех посильных добродетелях неудобопростительно нерадение. Милостыня же и молитва возставляет нерадевших. 65. Всякая скорбь по Бозе существенное дело есть благочестия. Истинная бо любовь противными искушается. 66. Не глаголи, стяжати добродетель без скорби: неискусен бо есть отраду имущий. 67. Конец всякия невольныя скорби разсуждай, и обрящеши в нем истребление греха. (с. 50) 68. Многие советы ближняго на пользу бывают: комуждо же своего совета ничтоже есть приличнее. 69. Ищя врачевания, пекися о совести, и елика глаголет ти, сотвори, и обрящеши пользу. 70. Тайная коегождо Бог весть, и совесть, и от сих самых да приемлет кийждо исправление. 71. Человек, елико может, обучается по своей воли: Бог же событие сего творит по правде. 72. Аще хощеши неосужденно похвалу от человек приимати, первее о гресех твоих возлюби обличение. 73. Елик срам аще кто приимет за истину Христову, сторицею от многих прославится. Лучше же всякое благо творити будущих ради. 74. Егда человек человека воспользует словесы, или делы, Божию быти благодать да разумеют оба. Не разумеяй же сего, от разумеющаго обладан будет. 75. Похваляяй ближняго по некоему лицемерию, уничижит его во время, и сам посрамится. 76. Не ведый подсады супостатов, удобь закалается: и не ведый вины страстей, низпадает удобне. 77. От сластолюбия нерадение, а от нерадения забвение приходит. Полезнаго бо разумение Бог всем дарова. 78. Человек советует ближнему, якоже весть: Бог же действует в слышащем, якоже верова. 79. Видех невежд, делом смиренномудрствовавших, и быша премудрых премудрейшии. 80. Другий невежда, слышав оных похваляемых, смиренномудрию их не подражает, но невежеством тщеславяся, гордыню приемлет. 81. Уничижаяй разум, и невежеством хваляйся, не словом токмо есть невежда, но и разумом. 82. Якоже бо иное есть премудрость в слове, и иное мудрость: сице иное есть невежество в слове, и иное безумие. (с. 51) 83. Ни мало не повредит неискусство в речениях благоговейнейшаго, якоже ни премудрость в словесех смиренномудраго. 84. Не глаголи, яко не вем подобающаго, и неизвинителен есмь, не творя онаго. Аще бо творил бы еси добрая, елика веси, и прочая быти поряду открылися, едино чрез другое уразумеваема. Не пользует ти прежде делания первых, уведети вторая. Разум бо кичит о праздности, а любы созидает{1 Коринф. гл. 8, ст. 1.}, занеже вся терпит. 85. Божественнаго писания глаголы деяньми читай, а не многословь, кичася простыми понятиями. 86. Оставивый деяние, и на простом разуме утверждаяйся, вместо обоюду остра меча, тростян жезл держит, иже во время брани, по писанию, пронзет руку его, и внидет в ню, яд кичения прежде супостатов влагая. 87. Меру имать и весы пред Богом всякая мысль. Мощно бо есть тожде или встрастне, или единообразне помыслити. 88. Сотворивый заповедь, да ожидает о ней искушения. Любовь бо ко Христу противными искушается. 89. Да не помыслиши когда нерадети о помыслех. Неутаема бо есть от Бога всякая мысль. 90. Егда увидиши помысл, человеческую ти славу предлагающ, познай ясно, яко студ ти устрояет. 91. Весть враг духовнаго закона праведность, и ищет точию сложение ума. Тако бо или покаяния трудами повинна сотворит подвластнаго, или некающася невольными наведеньми болезнь причинит ему. Овогда же и противу неведений ратовати подущает, да и зде болезни умножит, и во исходе нетерпения ради покажет неверна. (с. 52) 92. Противу находящим мнози много воспротивишася: но без молитвы и покаяния никтоже лютых избеже. 93. Злая едино чрез единое приемлют силу, якоже и благая друг от друга возрастают, и своего причастника на предняя более возбуждают. 94. Малая согрешения уменьшает диавол. Инако бо на большая злая привести не может. 95. Корень студныя похоти есть человеческая похвала, якоже и целомудрия обличение о злобе, не егда слышим точию, но егда и приемлем оное. 96. Никоеяже не получает пользы отрекийся, и сладостраствуяй. Еже бо творяше стяжанием, сие и ничегоже имея, делает. 97. Паки воздержник, аще стяжавает пенязи, брат есть первому помышлением, от матере тояжде, умныя ради сласти, от отца же другаго, по причине пременения страсти. 98. Иный отсецает страсть большаго ради сладострастия, и от неведящих его намерения славимь есть: может же быть и сам он себе не весть трудяся безполезно. 99. Вина всякия злобы есть тщеславие и сласть. Невозненавидевый же сия, не истребляет страсть. 100. Корень всем злым, речено есть, сребролюбие{1 Тим. гл. 6, ст. 10.}. Но сие явно оными составляется. 101. Ослепляется ум сими тремя страстьми: сребролюбием, глаголю, тщеславием и сластию. 102. Сии три дщери суть пиявицы{Притч. гл. 30, ст. 15.}, по писанию, от матере безумия любовию возлюбленны. 103. Разум и вера, естества нашего совоспитанники, ни от чего иного, точию от оных притупистася. 104. Ярость, и гнев, и брани, и убийства, и вся прочая злая поряду, от оных в человецех зело укрепишася. (с. 53) 105. Тако подобает возненавидети сребролюбие, тщеславие и сласть, яко матерей зол, и мачих добродетелей. 106. Сих ради не любити мира, ни яже в мире, повелено нам, не да создания Божия безразсудно возненавидим, но яко да триех оных страстей вины отсечем. 107. Никтоже, глаголет писание, воин бывая, обязуется куплями житейскими{2 Тим. гл. 2, ст. 4.}. Хотяй бо с соплетением страсти победити, подобен есть со плевелы угашающему запаление. 108. За пенязи, или за славу, или за сласть гневаяйся на ближняго, не у позна, яко праведно управляет Бог тварьми. 109. Егда услышиши Господа глаголюща, яко аще кто не отречется всего имения своего, несть мене достоин{Луки гл. 14, ст. 33.}, не точию о имении разумей реченное, но и о всех действиях злобы. 110. Не разумеяй истины, ниже истинно веровати может. Разум бо по естеству предваряет веру. 111. Якоже каждой видимой вещи определил есть Бог сродное качество, сице и человеческим помыслам, аще хощем, и не хощем. 112. Аще кто явне согрешая, и не каяся, ничтоже пострада даже до исхода своего, да мниши, яко сего немилостив постигнет суд. 113. Моляйся разумне, терпит находящая: злопамятуяй же, не у чисте помолися. 114. Обидимь, или поношен, или изгнан быв от кого, не о настоящем помышляй, но будущаго ожидай: и обрящеши, яко той многих ти благ бысть виновен, не точию в настоящем, но и в будущем веце. 115. Якоже злопищныя пользует горькая пелынь: тако злонравным пользует злая страдати. Зане овех здравыми быти, овех же каятися врачевства соделовают. (с. 54) 116. Аще не хощеши злострадати, ниже злотворити желай. Понеже то за сим непреступно последствует. Еже бо аще сеет кийждо, тожде и пожнет{Галат. гл. 6, ст 7.}. 117. Волею злая сеюще, и неволею оная жнуще, правде Божией дивитися должни есмы. 118. Понеже время некое между сеянием и жатвою определися, сего ради не веруем о воздаянии. 119. Согрешивши не обвиняй деяние, но мысль. Аще бо не бы ум предтекл, то не бы тело припоследовало. 120. Тайный злодетель лукавнейший есть явне обидящих. Темже той и злее мучится. 121. Коварства соплетаяй, и сокровенне злотворяй, змий есть, по писанию, седяй на пути, и угрызаяй пяту конску{Бытия гл. 49, ст. 17.}. 122. Иже вкупе в чемнибудь похваляет, и в чемнибудь порицает ближняго, сей тщеславием и завистию одержимь есть: и похвалами сокрывати покушается зависть, поречениями же себя благоискуснейшим онаго поставляет. 123. Якоже несть мощно вкупе и овцы пасти, и волки: тако не возможет получити милость, иже зло творит ближнему. 124. Примешаяй к заповеди отай свою волю, прелюбодей есть, якоже в премудрости показася, и за скудость ума болезни и безчестия понесет.{Притч. гл. 6, ст. 32 и 33.} 125. Якоже воды и огня совокупление противно: тако сопротивляются друг другу словооправдание и смирение. 126. Ищай отпущения грехов, любит смиренномудрие: осуждаяй же другаго, запечатлевает своя злая. 127. Да не оставиши неизглажденным грех, аще и малейший есть, да не послежде на большая злая привлечет тя. (с. 55) 128. Аще хощеши спастися, истинное слово возлюби, и никогдаже безразсудно обличения да отвратишися. 129. Слово истины премени порождения ехидныя, и сказа им бежати от будущаго гнева. 130. Приемляй словеса истины, приемлет Бога слова. Глаголет бо Христос: приемляй вас, мене приемлет.{Матф. гл. 10, ст. 40.} 131. Разслабленный свешенный сквозе крова, есть грешник от верных по Бозе обличаемый, и веры ради онех приемляй отпущение.{Луки гл. 5, ст. 19.} 132. Лучше есть с благоговением молитися о ближнем, нежели обличати его о всяком согрешении. 133. Каяйся право, от безумных поругаемь бывает. Сие же ему есть знамение благоугождения. 134. Подвизаяйся от всех воздержится,{1 Корин. гл.9, ст. 23.} и не престает творити сие, дондеже потребит Господь семя от вавилона. 135. Помысли, яко дванадесять есть страстей безчестных. Аще едину о тех волею возлюбиши, оная исполнит место единонадесяти. 136. Огнь есть горящий грех. Колико убо отсечеши вещество, толико угаснет, и колико аще приложиши, по мере возгорится. 137. Возвысився похвалами, ожидай безчестия. Глаголет бо: Возносяйся, смирится.{Матф. гл. 23, ст. 12.} 138. Егда всякую вольную злобу от мысли отвергнем: тогда паки брань сотворим с сущими страстьми по предприятию. 139. Предприятие есть прежних зол невольное воспоминание в подвижнике произыти в страсть возбраняемое, в победителе же до прилога низвращаемое. 140. Прилог есть безвидное движение сердца, по подобию замка от искусных предудерживаемый. (с. 56) 141. Идеже суть образи помысла, тамо сложение бывает. Движение бо безвидное, безвиновный есть прилог. И иный о сих отбегает, яко головня от огня: иный же не возвращается, дондеже возжет пламень. 142. Не глаголи, яко не хощу, и приходит: конечно бо аще и не тожде самое, но вины любиши вещи тоя. 143. Ищай похвалы, обретается во страсти, и о скорби нашедшей плачущий, любит сласть. 144. Якоже на весах, непостоянен есть сладостраствующаго помысл: овогда плачет и плачется грехов ради, овогда же ратует, и противоглаголет ближнему, отгоняя сласти. 145. Вся искушаяй, и доброе содержай, последовательно от всякаго зла удалится. 146. Долготерпелив муж мног в разуме: подобне и словесем премудрости прилагай ухо свое. 147. Без памяти Божией разум истинный быти не может. Без перваго бо вторый ложен есть. 148. Жестокосердаго пользует тончайшаго разума слово: понеже без страха, трудов покаяния не приемлет. 149. Кроткому человеку вернословие приличествует: понеже не искушает Божия долготерпения, и не побеждается частым преступлением. 150. Мужа сильна да не обличиши о тщеславии, но покажи ему имеющее нанестися безчестие. Сим бо образом разумный сладце обличаемь бывает. 151. Ненавидяй обличения, по умышлению лежит [погрязает] во страсти. Любяй же [оное] яве, яко предприятием ходит. 152. Не желай слышати чуждая лукавствования: в таковой бо воли и черты лукавствований написуются. 153. Злым словесем научився, на себя гневайся, а не на глаголавшаго. Лукаваго бо слуха, лукав и отвещаватель. (с. 57) 154. Аще кто с суесловными человеки беседовати будет, повинна себе да вменяет таковых глагол, аще и не вскоре после того, но от древняго долгу. 155. Аще увидиши кого лицемерно хваляща тя, во свое время от онаго поречения ожидай. 156. Настоящия скорби пременяй на будущая благая: и никогдаже нерадение разслабит подвиг твой. 157. Аще за телесное подаяние похвалиши человека, яко благаго, кроме Бога, после тойжде лукав тебе явится. 158. Всякое благо от Господа смотрительне приходит: и носящие оная, суть служители благ. 159. Сплетения благ и зол равным помыслом приемли: и тако пременяет Бог неравность вещей. 160. Неравность помыслов наносит особныя премены: зане Бог невольное вольному сродне приложил. 161. Чувственная, умных суть порождения, носящая подобающее по определению Божию. 162. Сердцу сладостраствующу, помыслы и словеса пагубныя прозябают: и от дыма внутрь лежащее вещество познаваем. 163. Пребывай в разуме, и не утрудишися во искушениях: отонудуже отходя терпи находящая. 164. Молися, да не приидет ти искушение: пришедшее же приими яко твое, а не чуждее. 165. Отврати мысль от всякаго лихоимства, и тогда возможеши увидети козни диавольския. 166. Глаголяй вся видети козни диавольския, якоже не весть себе, совершенна себе являет. 167. Егда изыдет ум от телесных попечений, видит по мере ухищрения врагов. 168. Совосхищаемый помыслы ослепляется от них, и действия греха видит, вины же действий увидети не может. 169. Иный творит явне заповедь, работая страсти, и лукавыми помыслы благое деяние потребляя. (с. 58) 170. Вводимь в начало зла, не глаголи, яко не победит мя. Поколику бо вводишися, потолику уже побежден еси. 171. Коеждо бывающее от мала начинается, и почастно питаемо, возрастает. 172. Мрежа многоплетенна есть кознь злобы, и часте запутавыйся, аще вознерадит, отвсюду обемлется. 173. Не желай слышати злополучия враждебных человек. Слышащии бо таковыя глаголы, плоды вземлют своего произволения. 174. Не всяку скорбь находити человеком за грехи мни: суть бо нецыи благоугождающии, и искушаемии. Писано бо есть: нечестивии и беззаконницы изженутся.{Псал. 36, ст. 28.} Подобне, и хотящии благочестно жити о Христе, гоними будут.{2 Тим. гл. 3, ст. 12.} 175. Во время скорби виждь прилог сласти: понеже бо утешает скорбь, благоприятен [нам] бывает. 176. Нецыи мудрыми глаголют удоборазсуждающих о чувственных вещах: мудри же суть обладающии своими хотениями. 177. Прежде истребления зол, да не повинешися сердцу твоему: какова бо вложения имать, таковых и приложений взыскует. 178. Якоже суть змии сретающиися в пещерах, и суть инии крыющиися во храминах: тако суть страсти, мысленне воображаемыя, и суть иныя деятельне действуемыя, аще и от единых в другия образы преображаются. 179. Егда увидиши внутрь лежащая сильне движима, и к страсти призывающа безмолвствующий ум: веждь, яко ум некогда сия предварил, и в деяние сие приведе, и в сердце вложи. 180. Не составляется облако без дыхания ветра, и не раждается страсть без мысли. (с. 59) 181. Егда не ктому творим похоти плотския, по писанию, удобь о Господе престанут внутрь предлежащая. 182. Образы мечтания ума лукавнейшия суть и крепльшия: помысленныя же сих виновни и предварительны суть. 183. Есть злоба, в сердце содержащаяся, давняго ради предприятия, и есть злоба, помыслы ратующая, повседневными вещьми. 184. Бог деяния и намерения вменяет. Даст ти, глаголет бо, Господь по сердцу твоему.{Псал. 19, ст. 5.} 185. В разсматривании совести не пребывающий, ниже телесныя труды о благочестии приемлет. 186. Совесть есть естественная книга. Деятельне читающий оную, искусом познает Божественное заступление. 187. Не приемляй вольных трудов о истине, от невольных лютее наказуемь бывает. 188. Познавый волю Божию, и по силе творяй оную, малеми труды великих избежит. 189. Кроме молитвы и терпения хотяй победити искушения, не отринет я, но множае оплетется оными. 190. Господи сокровен есть во своих заповедех, и ищущим его по мере обретается. 191. Да не речеши: сотворих заповеди, и не обретох Господа. Разум бо с правдою, по писанию, множицею обрел еси, право же ищущии его, обрящут мир. 192. Мир есть страстей избавление, еже без действия святаго Духа не обретается. 193. Иное есть делание заповеди, а иное добродетель, аще и друг от друга вины благоприемлют. 194. Делание заповеди глаголется, внегда содеяхом повеленное, добродетель же, внегда соделанное угодно есть воистинну. (с. 60) 195. Якоже едино есть чувственное богатство, по стяжанию же многочастно: тако едина есть добродетель, многообразная же имеет действия. 196. Кроме дела ухищряяйся и глаголяй словеса, богатеет от неправды, и труды его, по писанию в домы чужды входят. 197. Вся повинутся злату, глаголет писание, и благодатию Божиею мысленная управлена будут. 198. Совесть благая молитвою обретается, и молитва чистая совестию. Едино бо другое по естеству приемлет. 199. Иаков иосифови ризу пестру сотвори и Господь кроткому разум истины дарует, якоже писано есть: яко научит Господь кроткия путем своим.{Псал. 24, ст. 9.} 200. Всегда делай благое по силе, и во время большаго не обращайся на меньшее: обративыйся бо вспять, глаголет, несть управлен в Царствии Божии.{Луки гл. 9, ст. 62.}