<::лат> OCR: <::рус> Библиотека святоотеческой литературы <::лат> http://orthlиb.ru <::слав> (с. 10) Великий отец наш антоний, верховный лика подвижников, процветаше в пустыни, в царствование константина великаго, около трех сот тридесятаго лета от Рождества Бога слова: современен же был великому афанасию, описавшему пространно и житие его. На верх же добродетели и безстрастия достигши, аще и простолюдин и некнижен, учителя свыше имеяше, вразумляющую рыбари и младенцы премудрость Духа: от неяже и умом просвещаяся, многия и другия священныя и духовныя учения, различным вещам подобающия издаде, и премудрыя ответы к вопрошающим, исполненныя душевныя пользы, якоже во многих местах из старческих писаний усматривается. Кроме сих и содержащияся в настоящей книге сто седмьдесять глав, сей препрославленный отец нам оставил. А что оныя суть истинное порождение Боговиднаго ума его, то сверх прочих, и преподобномученик петр дамаскин утверждает. Да и самый слог речи отемлет всякий случай сомнения, и едва гласа не издает тщательно чтущим, яко оныя современны суть древности оной священной. Не дивно убо, аще он к простейшей беседе, и древнеобразной и небрегомой, слог речи склонил: но то дивно, яко от толикия простоты толикое Спасение и польза чтущим бывает. Коликое бо в оных обретается уверение! коликая от оных истекает сладость! и вообще, колико источается благий нрав и совершенство евангельскаго жительства! Уведят конечно сладость сию имущии вкусити меда сего мысленною гортанию ума. (с. 11) Иже во святых отца нашего антониа великаго увещания, о нравах человеческих и благом житии, во 170 главах [состоящия]. 1. Люди словесными злоупотребительне глаголются. Не суть же словеснии, изучившиися наукам и книгам древних мудрецов, но словесную имущии душу, и могущии разсуждати, что есть добро, и что есть зло, и лукавых и душевредных убегающии, благим же и душеполезным тщательно поучающиися, и сия творящии со многим благодарением Богу. Сии едини словесными людьми воистинну долженствуют нарицатися. 2. Истинно словесный человек о едином тщится, сиречь, еже повиноватися и угождати Богу всех, и сему точию поучати душу свою, яко да Благоугодит Богу, Благодаря за таковый и толикий промысл его, и управление всех тварей, во всяком приключении житейском. Безместно бо врачам благодарити о здравии тела, подающим нам и горькия и неугодныя врачевства: Богу же о мнимых нам скорбях не благодарити и не разумети, яко вся достодолжно, и в пользу нам по промыслу его бывают: познание бо и вера в Бога, спасение и совершенство есть души. (с. 12) 3. Воздержание, незлобие, целомудрие, крепость и терпение, и подобныя сим великия и добродетельныя силы получихом от Бога, противляющияся, и противостоящия, и вспомоществующия в прискорбностех оных: каковыя силы аще обучаем и готовыя имеем, ничто уже лютым, или болезненным, или несносным мним нам быти, помышляюще, яко вся суть человеческая, и побеждаются от добродетелей, яже в нас. Сего не мыслят безумнии душею: не помышляют бо, яко вся добре и достодолжно бывают в пользу нашу, да возсияют добродетели, и увенчаемся от Бога. 4. Стяжание имений и богатое оных употребление, мечтанием единым маловременным почитая, и ведая, яко добродетельное и Богоугодное житие лучше есть богатства: сему твердо поучаяся, и сие в памяти содержя, не возстенеши, не возрыдаеши, не укориши никогоже, но о всем будеши благодарити Богу, видя хуждших себя, и в слове и богатстве утверждающихся. Злая бо страсть есть души, похоть, и слава, и неведение. 5. Словесный человек, самаго себя разсматривая, искушает подобающая и полезная себе, и что собственно есть душе, и полезно, и что чуждо ея. И тако убегает повреждающих душу, яко чуждых, и отлучающих его от безсмертия. 6. Елико кто умереннейшее имеет житие, толико есть благополучнейший, яко не печется о многом: о рабах, земледельцах и стяжании скотов. Сим бо сами себе пригвождающе, и от сих случающимся горестям подпадающе, укоряем Бога. От самопроизвольныя же похоти нашея смерть усиливается, и пребываем во тьме жития греховнаго, прельщаеми, не познающе самих себе. 7. Не долженствует ктолибо глаголати, яко не возможно человеку добродетельное житие имети: но яко не удобно, ниже простым удобопостижимо есть сие. Добродетельнаго же (с. 13) жития приобщаются, елицы суть в людех Благочестивы, и Боголюбивый имут ум: общий бо ум есть мирский и превратный, помышления подающий благая и злая, пременяющийся естеством, и в вещество изменяющийся. Боголюбивый же ум мститель есть злобы, самопроизвольно бывающия в людех от лености. 8. Ненаказаннии и невежды, смешным делом почитают науки, и не желают оным внимати, понеже обличается их ненаказанность, и желают всем подобными себе быти: тем же образом и невоздержнии житием и нравами, тщатся, да будут все хуждшими их, невинность себе от множества зол снискати мняще. Погибает и смущается безсильная душа от злобы, имущия в себе блуд, гордость, ненасытимость, гнев, продерзость, неистовство, убийство, вопль, зависть, лихоимство, хищение, труд, ложь, сласть, леность, печаль, страх, болезнь, ненависть, укорение, безсилие, лесть, неведение, прелесть, забвение Бога. Сими и сим подобными мучится окаянная душа, отлучающая себя от Бога. 9. Добродетельное и благочестивое и славное житие провождати хотящии, не по притворному нраву, или ложному житию, должны судитися: но якоже художники, живописцы и болванодели, от самых дел показуют они добродетельное и Боголюбезное житие, и якоже сетей, сице всех лукавых сластей отвращаются. 10. Богатый и благородный без просвещения душевнаго, и всякия добродетели житейския, мудрствующими добрее познается злощастен: якоже убогий, и участию раб, учением и добродетельным житием украшенный, благополучен есть. Но якоже странники на путех заблуждают: сице и добродетельному житию не прилежащии, похотию прельщаеми, погибают. 11. Человекотворным долженствует глаголатися, ненаказанных укротити могущий, да возлюбят науки и учение: тем же образом и пременяющии невоздержных житием (с. 14) к добродетельному и Богоугодному житию, человекотворными долженствуют глаголатися, яко человеков претворяющии: кротость бо и воздержание благополучие есть, и надежда благая душам человеческим. 12. Подобает людем, поистинне, нравы и житие свое достодолжно устрояти: сему бо исправившуся, удобь познается Бог. От всего бо сердца и веры чтущий Бога, промышляемь бывает от него, удерживати ярость и похоть: зане всех зол вина есть похоть и ярость. 13. Человек глаголется или словесный, или исправитися хотящий. Неисправленный бо не человеком нарицается: яко сие не человеческое есть дело, и бегати подобает таковых. Живущим бо со злобою не леть есть в числе безсмертных быти когдалибо. 14. Словесность нам поистинне соприсутствуя, достойными нас творит, да именуемся человеки. Отметающеся же словесности, единым расположением членов, и гласом от безсловесных разнствуем. Да познает убо умный человек себе самаго безсмертным, и да возненавидит всякую срамную похоть, виною смерти бывающую людем. 15. Якоже коеждо художество, подлежащия себе вещества украшая, добродетель свою показует, яко то древоделатель, медник, златарь и сребреник: тако и мы благое житие и добродетельное и Богоугодное жительствование слыша, долженствуем являтися, яко люди воистинну словеснии есмы душею, а не из_ображением тела. Словесная же поистинне, и Боголюбивая душа абие житейская вся познает, и Бога умилостивляет любезне, и благодарит ему во истине, к нему имея стремление и мысль всю. 16. Якоже кормчие к цели корабль управляют, да не к подводному или видимому камню приразят оный: тако и добродетельному житию ревнующии прилежно да разсматривают, что подобает им творити, и чего убегати: и истинныя (с. 15) и Божественныя законы да почитают полезными себе, лукавыя помышления от души отсекая. 17. Якоже кормчие и уздодержатели упражднением и прилежанием исправляют то, о немже тщатся: тако подобает и к правому и добродетельному житию прилежащим поучатися и пещися, яко да достодолжно и Богоугодно поживут: хотящий бо и помысливый, яко может, веруя, к безсмертию преходит. 18. Свободными да мнятся ти, не по состоянию свободные, но житием и нравами свободные. Не подобает бо нарицати свободными воистинну князей злых сущих, или невоздержных: раби во суть страстей вещественных. Свобода же и благополучие души есть искренняя чистота, и привременных презрение. 19. Напоминай себе, яко непрестанно показоватися подобает благим житием, и делами самыми. Тако бо и болящии врачей не от слов, но от дел спасителями и благодетелями находят и признают. 20. Знамение словесныя и добродетельныя души есть взор, поступка, глас, смех, обхождение и разговоры: вся бо изменяются, и пременяются в благообразнейшее. Боголюбивый бо ум словесных людей, сый вратарь трезвый, заключает вход злым и срамным помышлениям. 21. Бог душу свободною и самовластною содела в делании добра или зла. 22. Словесная душа тщится избавитися безпутства, гордости, кичения, прелести, убийства, хищения, и подобных, елика дела суть демонов и лукаваго произволения. Вся же тщанием и навыкновением постоянным исправляет человек, имущий желание не стремящееся к злым сластем. 23. Провождающии малое и несовершенное житие, и бед избавляются, и стрегущих не требуют: побеждая же похоть во всем, путь к Богу удобь обретают. (с. 16) 24. Словесным людем не подобает многим беседам внимати, но полезным, имиже управляет воля Божия. Тако бо к животу и свету вечному возвращаются люди. 25. Подобает добродетельнаго и Боголюбиваго ищущим жития избыти от многомыслия о себе, и всякия тщетныя и ложныя славы, и пещися о благом исправлении жития и мысли: Боголюбивый бо и неизменный ум, возведение и путь есть к Богу. 26. Ни единыя же несть пользы учитися наукам, аще не будет благоугоднаго и Богоугоднаго жития души: вина же всех зол заблуждение, прелесть и неведение Бога. 27. Поучение доброму житию, и тщание о душе, благих и Боголюбивых мужей соделовает. Ищущий бо Бога обретает его, побеждая похоть во всем, от молитвы не отступая: таковый бо бесов не боится. 28. Житейскими надеждами прельщаемии, словесно точию ведущии, яже по изящному житию подобает творити, подобное нечто претерпевают стяжавшим врачевства, и орудия врачебныя, употребляти же оныя ниже ведущим, ниже пекущимся. Темже учиненных нами грехов да не поставляем виною николиже рождение, или другаго некоего, но самих себе. Аще бо сама душа восхощет ленитися, непобедима быти не может. 29. Неведущему разсуждати, что есть благо, и что есть зло, не леть есть судити благих и злых. Человек бо ведущий Бога, есть благий: аще же кто несть благ, сей ничтоже весть, ниже увесться когдалибо: зане способ уразумети Бога, есть благость. 30. Благие и Боголюбивые мужи присутствующих пред лицем людей во зле обличают, неприсутствующих же не укоряют, и ниже предприемлющим оным глаголати что позволяют. 31. В беседах ни единыя строптивости да не будет: словесных бо людей стыд и целомудрие, паче неже дев, украшати (с. 17) весть. боголюбивый бо ум свет есть, осиявающий душу, якоже солнце тело. 32. При всех прилучающихся тебе душевных страстех, помни, яко право мыслящим и хотящим в подобающее и безопасное провести положение дом свой. не тленное стяжание богатства сладостно им является, но правыя и истинныя почести: сии их благополучными соделовают. Богатство бо и крадется, и от сильнейших похищается: добродетель же души есть единое стяжание и безопасное и некрадомое, и по смерти спасающее стяжавших оное. Тако бо мыслящих не восхищает мечтание богатства и прочих сластей. 33. Не подобает непостоянным и ненаученным испытовати словесных мужей. Словесный же муж есть богоугодный, иже о многом молчит, или мало и о нужном и богоугодном разсуждает. 34. Добродетельному и боголюбезному житию последующий, добродетелем души прилежат яко собственному их стяжанию, и вечному наслаждению сущу. Привременными же наслаждаются, елико вместительно, и елико Бог дает, и хощет, со всяким веселием и благодарением соделовающе себе пользу, аще бы и вельми была умеренна. Многоценныя бо яства телеса питают, яко вещественныя: познание же Бога, и воздержание, и благость, и благотворение, и благочестие, и кротость душу обоготворяют. 35. Произволением словесный человек обладает о создавшем Бозе, иже всякия нужды и всякия силы есть креплий. 36. Нещастием почитающии лишение богатства, или чад, или рабов, или другаго имения, да ведят, яко первее довольствоватися подобает подаемыми от Бога, и яко подобает отдавати оная охотно и благомысленно, ни мало не оскорбляяся лишением сего, паче же рещи возвращением: попользовавшеся бо несобственным, паки оное отдаем. (с. 18) 37. Дело благаго человека есть, не продавати свободное произволение, внимая приятию богатства, аще вы и вельми много было подаемо. Сну бо подобна суть житейская, и безвестная и маловременная имать мечтания богатство. 38. Иже воистинну суть человецы, толико да тщатся боголюбезно и добродетельно жительствовати, яко да просиявает добродетельное житие их между другими людьми, якоже порфира малая надетая на белыя одежды, украшающая оныя, просиявает и является. Тако бо тверже добродетелем души прилежати будут. 39. Разумным людем подобает разсматривати свою силу, и приуготовление сущия в них душевныя добродетели, и тако приуготовлятися, и противлятися сретающимся страстем, по сущей в них силе добродетели, дарованной им, по естеству от Бога. Есть же противу красоты и всякия похоти душевредныя, воздержание: против трудов и скудости, крепость, а противу досаждения и ярости, незлобие и подобная сим. 40. Человеку благим и мудрым скороспешно соделатися не можно, но трудолюбным поучением, и изучением и искусом, со временем и подвигом, и желанием благаго дела. Благий же и боголюбивый человек, воистинну ведущий Бога, не престает независтно творити вся богоугодная. Редки же таковые мужи обретаются. 41. Не подобает несродным по естеству людям, отчаяваяся в себе, ослабевати в боголюбезном и добродетельном житии, и презирати оное, яко неприступное и непостижимое им, но подобает поучатися им по силе, и прилежати себе самим. Аще бо и не могут совершенно стяжати добродетель и спасение: обаче от поучения, и желания, или лучшими бывают, или не хуждшими, что не малая есть польза душе. 42. Человек по уму с неизреченною оною и божественною силою совокупляется: по телу же имеет сродство с животными. И не мнози, елицы точию суть совершенные люди, и (с. 19) словесные, к Богу Спасителю мысль, и с ним сродство имети тщатся: и сие делами и добродетельным житием показуют, множайшии же от людей, безумнии душею, Божественное оное и безсмертное сыноположение оставивше, к мертвому, и бедственному, и маловременному сродству телесному уклонившеся, яко безсловеснии, мудрствуя плотская, и от сластей разжизаяся, отлучают сами себе от Бога, и низводят душу с Небес в пропасть от Небесных ея желаний. 43. Словесный муж спребывание с Божеством, и союз помышляя, николиже ничего земнаго, или униженнаго не возлюбит: но к небесным и вечным имать ум, и разумеет, яко воля Божия сия есть, дабы спасся человек, яко она есть вина всякаго добра, и источник вечных благ людем. 44. Егда обрящеши некоего любопрющася и борющася с тобою против истины, явно преставши от любопрения, уступи таковому всяко окаменевшему умом. Якоже бо добротные вины худейшая вода непотребными творит: тем же образом и добродетельных житием и мыслию, злыя беседы растлевают. 45. Аще все тщание и искусство употребляем для избежания телеснаго умерщвления: много паче тщатися долженствуем о избежании душевнаго умерщвления. Хотящему во спастися ни единаго нет препятствия, разве точию нерадение, и уныние души. 46. Елицы стужают мыслити полезная, и добром глаголемая, сии злощастными быти мнятся. Елицы же разумевая истину, безстудно любопрятся, сих разумение умертвися, и зверским учинися нрав их, и не ведят Бога, ниже просветися душа их. 47. Роды животных Бог ко взаимной нужде произведе словом своим, иныя для употребления в пищу, иныя для служения: человека же сотвори зрителем оных, и дел их, (с. 20) и благодарным истолкователем. Темже подобает тщатися людем, да не како невидевшими и неразумевшими Бога, и дел его, умрут яко звери безсловеснии. Ведети же подобает человеку, яко Бог вся может, и ничтоже есть противно вся могущему: но из не сущаго вся, яже восхоте, сотвори, и творит словом своим во спасение человеком. 48. Сущая на небеси безсмертна суть, по благости сущей в оных: сущая же на земли смертна, по существующей в оных самопроизвольной злобе, яже прилучается безумным от лености их, и неведения Бога. 49. Смерть разумеваема людьми, безсмертие есть: не разумеваема же невеждами, смерть есть. И сея смерти не подобает боятися, но пагубы душевныя, яже есть неведение Бога. Сие бо люто есть душе. 50. Злоба, страсть вещества есть. Темже не возможно телу без злобы быти. Словесная же душа помышляя сие, сотрясает вещества тяжесть, яже есть злоба, и от таковыя тяжести возникая, познает Бога всех, и якоже врагу, и ратаю внемлет телу, не повинующися ему. И тако увенчавается душа от Бога, яко страсти злобы, и вещества победившая. 51. Злоба познана душею ненавидима бывает, яко зверь зловоннейший: не познанна же, любима бывает от неведущаго ее, и порабощая любителя своего, имеет его пленником. И тако злощастный и окаянный человек ниже зрит полезное себе, ниже разумеет, но мнит украшатися от злобы, и веселится. 52. Чистая душа, блага сущи, просвещается, и осиявается от Бога, и тогда ум благая мыслит, и словеса боголюбивая раждает. Егда же злобою осквернится душа, Богу отвращающуся ея, паче же душе отлучающей себя от Бога, лукавые бесы вшедше в помысл, на неправедныя деяния подущают душу: на прелюбодеяния, убийства, хищения, святотатства, и подобная, елика дела бесовская суть. (с. 21) 53. Ведящии Бога исполняются всякия благия мысли, и небесных желающе, житейская презирают. Таковыи же ни многим угождают, ни многим угодны бывают, так что за сие не токмо ненавидимы бывают, но и посмеваемы многими от безумных. Вся же терпети от убожества изволяют, ведяще, яко многим являющаяся злом, оным суть благо. Разумевающий бо небесная, верует Богу, ведая, яко вся творения зависят от воли онаго: не разумевающий же не верует николиже, яко мир есть дело Божие: и для спасения человека сотворен бысть. 54. Исполненнии злобы, и невежеством упивающиися, не разумеют Бога, не трезвятся душею: Бог бо разумеваемь есть, а не видимь, вельми же явен в видимых тварех, якоже душа в теле: и якоже телу без души не возможно состояти, тако и всему видимому и сущему без Бога состояти не возможно. 55. Чесо ради создан человек? Да творения Божия разумевая, узрит его, и прославит создавшаго оныя для человека. Ум же боговозлюбленный невидимое есть благо, даруемый от Бога достойным по благому житию. 56. Свободный есть, не работающий сластем, но от мудрости и целомудрия обладающий телом, и довольствующийся со многим благодарением подаемым ему от Бога, аще бы и вельми было мало. боголюбивый бо ум и душа, аще согласны будут, мирно бывает все тело, и не хотящи. Душе бо хотящей, всякое телесное движение погашается. 57. Не довольствующиися сущим у себя имением, но большаго желающии, порабощают себя страстем мятущим душу, и влагающим в оную помыслы и мечтания, яко сии таяжде злая суть. И якоже безмерныя одежды подвизающимся в течении препятствуют: тем же образом и желание чрезмернаго имения, душам подвизатися или спастися не попускает. (с. 22) 58. В чем ктолибо принужден и неволен, сие темница есть ему и мука. Люби убо прилучающаяся ти, да не будеши неблагодарно снося, себе самаго нечувствительно мучити. Един же путь есть к сему, презрение житейских. 59. Якоже видение имамы от Бога для познания являемых вещей, что бело, и что цвету чернаго: тако и словесность дарована нам от Бога, во еже разсуждати полезная душе. Похоть же от разсудка отторгаяся, сласть раждает, и душе спастися или с Богом соединитися не попускает. 60. Не по естеству бывающая, суть грехи, но по произволению лукавая. Ниже ясти есть грех, но неблагодарно, и не благолепно, и невоздержно ясти: понеже тело существует в жизни без всякаго лукаваго помышления. Ниже просто зрети есть грех, но завистно и горделивно, и ненасытно зрети: и несть грех слушати мирно, но гневливо: и несть грех обуздывати язык ко благодарению и молитве, но ко оклеветанию: и несть грех простирати руки к милостыне, но к убийствам и хищениям. И тако каждый член грешит, лукавая вместо благих, против воли Божией, самопроизвольно делающий. 61. Аще сомневаешися, яко каждое дело назирается от Бога, разсуди, что ты человек сый, и прах, можеши вкупе и в одно время о всяких местах разсуждати и помышляти: много паче Бог, все видящий, яко зерно горушное, все оживотворяющий и питающий, якоже хощет. 62. Егда заключиши двери храмины, и един будеши, знай, что соприсутствует ти определенный от Бога каждому человеку ангел, егоже еллины домовым бесом нарицают. Сей, неусыпаемь и непрельщаемь будучи, всегда соприсутствует ти, все видит, и мраком не возбраняется. Вкупе с сим признавай и Бога, во всяком месте сущаго. Ибо нет места, или вещи некия, в нейже бы не был Бог, яко всех больший, и всех содержащи в руце своей. (с. 23) 63. Аще воины верность к кесарю хранят, потому что подается от него пища: много паче долженствуем мы благодарити безпрестанно немолчными усты, и угождати Богу, вся создавшему для человека. 64. К Богу благодарность, и благое жительство, человеческий плод есть Богоугодный. Плоды же земныя не в один час созревают, но по времени, от дождей, и прилежания: тем же образом и плоды человеческия, подвигом, и поучением, со временем, крепостию, и воздержанием, и терпением освещаются. Аще же от сих покажешься некоторым когдалибо благочестив, не верь самому себе, дондеже в телеси, и ничтоже от твоих мни угодным быти Богу. Ибо знай, что не удобно человеку до конца сохранити безгрешность. 65. Слова у людей ничтоже есть честнейше. Так сильно есть слово, что словом и благодарением Бога чтим: непотребное же и безчестное слово употребляя, осуждаем нашу душу. Нечувствительнаго убо человека есть дело, рождение свое или другаго некоего обвиняти в том, что он грешит, употребляя самовластно или слово или дело лукавое. 66. Аще болезни телесныя целити тщимся за осмеяние сретающихся: много паче потребно тщатися болезни душевныя целити, яко пред лицем Божиим имеем судими быти, да не безчестными обрящемся, или посмеяния достойными. Имея бо самовластие, аще восхощем, похотствуя к лукавым деяниям, не имети оных, сие сотворити можем, и в нашей власти есть Богоугодно пожити: и никтоже нас принудит когда, против воли сотворити что лукавое. Тако бо подвизающеся, будем достойнии человецы Божии, и яко ангели на небесех жительствующии. 67. Аще хощеши, раб быти можеши страстей: аще хощеши, свободен быти, можеши, и не преклонишися к страстем. Бог бо тя самовластным сотвори. Побеждаяй страсти плотския, увенчавается нетлением. Аще бо не бы были страсти, (с. 24) не бы были добродетели, ниже венцы даруемыя от Бога достойным от человек. 68. Невидящии пользы своея, и блага неведящии слепотствуют душею, и разсудок их ослепися. Темже не подобает к сим обращати мысль, да не томужде по нужде подпадем и мы, не предусмотрев, яко слепые. 69. На согрешающих не подобает гневатися, аще бы и вины, учиненныя ими, мучения достойны были: но по самой правде, обращати оных долженствуем, и мучити, аще тако случится, или чрез себя самих, или чрез других. Гневатися же или яритися не подобает. Зане гнев по страсти творит точию, а не по суду и правде. Темже ниже сверх должнаго милующих похвалити подобает. По самому добру, и правде подобает наказывати лукавых, а не по собственной страсти гнева. 70. Стяжание душевное едино есть безопасно и некрадомо. Есть же оно добродетельное и Богоугодное житие, и разумение, и творение благих дел. Богатство во слепый есть путеводитель, и советник безумный, и погубляет нечувствительную душу, зле и избыточно богатство употреблявший. 71. Подобает людем, или ничего лишше не стяжевати, или имея, сие ведети твердо, яко вся житейская, по естеству тленна и удобоотемлема суть, отметна и преломляема: и приключшееся презирати не долженствуют. 72. Телесныя болезни, знай, что естественно телу свойственны суть, яко тленному и вещественному. Подобает убо наказанной душе в таковых страстех, крепость и терпение, благодарно показывати, а не укоряти Бога, почто он сотвори тело. 73. Подвизающиися на олимпийских играх, не за первую, или вторую, или третию победу увенчаваются: но егда всех с ними подвизающихся победят. Тако убо подобает каждому хотящему от Бога увенчатися, обучати душу свою (с. 25) целомудрию, не точию в разсуждении тела, но и в прибытках, и хищениях, и зависти, и в пище, и тщетной славе, и укорениях, и смерти, и елика таковая суть. 74. Не человеческия ради похвалы о благом и боголюбезном житии потщимся, но спасения ради души, добродетельную жизнь изберем. Смерть бо по всяк день пред очами нашими есть видима, а человеческия почести безвестны. 75. В нашей власти есть, целомудренно пожити: богатитися же несть в нашей власти. Что убо? не подобает ли осуждати нам душу свою за маловременное мечтание богатства, еже стяжати власти не имамы, но желаем точию онаго? _о коль несмысленно течем, не ведяще, что превыше всех добродетелей есть смиренномудрие, якоже превыше всех страстей есть чревобесие и похоть житейская! 76. Памятовати подобает непрестанно разумным, яко малыя и маловременныя труды снося в жизни, величайшия сладости и веселия вечнаго наслаждаемся по смерти. Темже борющийся со страстьми, и желающий увенчатися от Бога, аще падет, да не возмалодушествует, и пребудет во грехе, отчаяваяся в себе: но воставши паки да поборется, и попечется увенчатися, даже до последняго воздыхания востая от случающагося падения. Телесные бо труды орудия суть добродетелей, и спасительны бывают душе. 77. Житейския злоключения, мужей и подвижников достойными творят увенчатися от Бога. Умертвити убо подобает в жизни своей уды от всего житейскаго: мертвый бо николиже будет пещися о чемлибо житейском. 78. Не подобает словесной и подвизающейся душе, абие устрашатися и боятися прилучающихся страданий, да не посмеяна будет яко боязливая. От житейских бо мечтаний смущаемая душа выйдет из благочиния. К вечным благим ведут душевныя добродетели наши, мучений же виновны бывают самопроизвольныя злобы человеческия. (с. 26) 79. Словесный человек, от словесных своих чувств, чрез страсти душевныя ратуемь бывает. Чувства же телесныя суть пять: зрение, обоняние, слух, вкус и осязание. Чрез сии пять чувств, четырем страстем собственным подпадая окаянная душа, пленяется. Страсти же душевныя суть четыре: тщеславие, радость, ярость и страх. Егда убо мудростию и разсуждением, добре воинствовавший человек, одержит и победит страсти: тогда уже не ратуемь бывает, но мир имать в душе, и увенчавается от Бога, яко победивший. 80. Ови из находящихся в гостинницах, постели получают: ови же не имея одра, но на земли спя ни мало не менее, как и спящие на одре, храпят, и конца ночи дождавшеся, за утра постели оставивше в гостиннице, все вкупе исходят, собственное точию неся. Тем же образом, и вси ходящии в жизни, и посредственно, и в славе, и в богатстве жившии, якоже из гостинницы из жизни исходят, ничтоже от сладости житейския и богатства взимая с собою, кроме единых собственных дел, или добрых, или злых, учиненных ими в жизни их. 81. В преимущественной будучи власти, да не скоро воспретиши комулибо смертию, ведящи, яко по естеству и ты смерти подлежиши, и яко душа облекается телом, якоже мертвенною одеждою. Сие ясно ведящи, кротости поучися и благотворя благодари Бога выну: не милуяй бо не имать добродетели в себе. 82. Смерти избежати невозможно и неудобно. Сие ведяще словеснии поистинне человецы, и обучении добродетелем, и Боголюбезному помыслу, приемлют смерть без стенаний, страха и плача, неизбежность ея и избавление от житейских зол помышляя. 83. Забывших благое жительство, и Богоугодное, и не мудрствующих правые и Боголюбезные догматы, ненавидети не подобает, сожалети же паче яко о лишенных разсудка, (с. 27) и слепых сердцем и мыслию. Зло бо яко добро приемше, от неведения погибают, и не ведят Бога треокаяннии и немысленнии душею. 84. О благочестии и благожитии со многими разглагольствовати отрицайся: не зависти ради глаголю, но яко несмысленным, посмеяния, мню, достойным покажешися. Подобный бо подобнаго любит: таковыя же словеса не многих имеют слушателей, и может быть вельми редких. Лучше же не глаголати: яко не сего хощет Бог ко Спасению человека. 85. Душа состраждет телу, тело же не состраждет душе: якоже телу секому, состраждет и душа, могущу же и здравствующу телу, страсти душевныя соуслаждаются. Душе же помышляющей, не помышляет уже тело, но пребывает само по себе особь. Помышление бо страсть есть душевная: якоже неведение, гордыня, неверие, лихоимание, ненависть, зависть, гнев, нерадение, тщеславие, честь, несогласие, нечувствие блага. Сия бо душею действуются. 86. Помышляя о Боге, благочестив буди, независтен, благ, целомудр, кроток, даровит по силе, общителен, неспорлив, и прочая. Сие бо есть некрадомое стяжание души, еже угождати Богу сими, и никогоже не судити, и не глаголати ни о комже, яко таковыйто зол есть, и согрешил: но лучше испытовати своя злая, и смотрити на самаго себя, на свое житие, угодно ли оно есть Богу. Что бо нам нужды, аще другий есть лукав? 87. Истинный человек тщится благочестив быти: благочестивый же есть нежелающий чуждых: а чуждо есть человека все созданное. Вся убо презирай ты, яко образ Божий. Образом же Божиим бывает человек, егда право и Богоугодно жительствует. Но сему иначе не возможно быти, аще не отступит человек от житейских. Имущий же ум Боголюбезный, всякую душевную пользу и всякое Благоговеинство от него бывающее весть. Боголюбивый муж никого другаго не укоряет (с. 28) в чем сам согрешает: а сие спасающияся души есть знамение. 88. Елицы привременное стяжание насильственно имети тщатся, и похотение дел злобы любят, не ведяще смерти, и пагубы своея души, и не смотрят окаяннии на пользу свою: таковыи не мыслят, елико страждут по смерти люди от злобы. 89. Злоба страсть вещества есть. Бог же злобы невиновен: но разумение, знамение, и силу ума, разделяющую добро от зла, и самовластие даде людем. Страсти же злобы раждает нерадение, и леность человеческая: невинен бо есть Бог всесовершенно. От разделения же мысли соделашася беси лукавии, якоже и множайшии от людей. 90. Со Благочестием живущий человек злобе внити в душу не попущает. Злобе же не сущей, безбедственно и невредимо бывает душе: таковыми бо ни демон злый, ни прилучай не управляет. Бог бо избавляет их от зол, и живут невредимыми сохраняеми равнобожны. Аще бы кто таковаго мужа и похвалил, он смеется в себе самем похваляющим его: аще бы и безчестил, не отвещает противу укоряющим, ниже бо негодует на словеса их. 91. Зло естеству последует, якоже ржа к меди, и нечистота к телам. Но ниже ржавость делатель меди сотворил, ниже нечистоту родившии: тако ниже злобу Бог сотвори. Но даде и разумение и разсуждение человеку, да избежит зла, яко ведящий, что повреждается от онаго и мучится. Блюди убо сохранно, да некогда видев некоего благополучна, в силе и богатстве, ублажиши его, от мечтания демонскаго. Но смерть да будет ти абие пред очами, и николиже ничесого злаго, или житейскаго да не пожелаеши. 92. Бог наш сущим на Небесех безсмертие дарова: сущим же на земли премену даде, всему же живот, и движение дарова: и все для человека. Да не совосхищает убо тебя житейское (с. 29) мечтание демона, подущающаго на лукавыя помыслы душу, но Небесная благая помышляя сам в себе, глаголи: аще хощу: в моей власти есть победити и сей подвиг страсти: не побежду же, аще восхощу получити свое желание. В сем убо подвиге подвизайся, могущем спасти душу твою. 93. Жизнь есть соединение и совокупление ума, души и тела: смерть же несть погибель совокупленных, но разрешение знания оных. Богом бо вся сохраняются и по разрушении. 94. Ум несть душа, но дар Божий, спасающий душу, и предтечет и советует душе ум Богоугодный, презрети привременная, вещественная и тленная, возлюбити же вечная, нетленная и невещественная благая, и ходити в теле человеку, Небесная и Божия, и вся вкупе умом помышляющу и видящу. И тако Боголюбивый ум есть благодетель, и спасение человеческия души. 95. Душа, будучи в теле, абие от печали и сласти помрачается и погибает. Печаль и сласть, якоже мокроты телу суть. Боголюбивый же ум противляяся, оскорбляет тело, и спасает душу: яко враг секущий или жгущий телеса. 96. Елицы души разумом не обуздываются и не управляются умом, так чтобы сей удерживал и управлял их страсти, сиречь, печаль и сласть: сии души, яко безсловесныя животныя, погибают, отвлекающуся разуму от страстей, яко уздодержателю побежденну от коней. 97. Велия болезнь души, погибель и пагуба есть, не ведети Бога, вся сотворившаго для человека, и даровавшаго ему ум и слово, имиже возлетая человек, с Богом совокупляется, разумевая и прославляя Бога. 98. Душа есть в теле, в душе же есть ум, в уме же есть слово, имиже Бог разумеваемь, и прославляемь безсмертною творит душу, нетление ей и сладость вечную даруя. Бог бо всему сущему бытие по единой благости дарова. (с. 30) 99. Бог самовластным сотворивши человека, яко независтный и благий, даде ему и возможность, аще хощет, угождати ему. Угождает же человек Богу, егда несть в нем злобы. Аще бо у людей похваляются добрыя дела, и добродетели преподобныя и Боголюбивыя души, осуждаются же срамныя и лукавыя деяния: много паче у Бога, хотящаго спастися человеку. 100. Благая от Бога, яко благаго, приемлет человек: сего бо ради и сотворен от Бога. Злая же себе привлекает человек, от себя и своея злобы, и похоти, и нечувственности. 101. Несмысленная душа безсмертна сущи и владычица тела раболепствует телу сластьми, не помышляя, яко сласть телесная есть вред ея: не чувствуя же и юродствуя, печется о сласти телесной. 102. Бог есть благ, человек же зол. Ничего злаго нет на небеси: ничего благаго на земли. Словесный же человек лучшая избирает, и весть Бога всех. и благодарит и воспевает его: и прежде смерти мерзит телом, и лукавым чувствиям не позволяет совершитися, ведая их пагубу и силу. 103. Лукавый человек лихоимание любит, правду же презирает, ниже неизвестность, и непостоянство, и маловременность жития помышляя, ниже недароприемность, и неизбежность смерти памятуя. Аще же стар есть срамен и безумен: то, якоже согнившее древо, ко всякому употреблению есть недействителен. 104. Якоже удовольствия и радость чувствуем тогда, егда искус приемлем печалющих [вещей]: ниже бо сладце пиет не жаждавший, ниже сладце яст не алкавший, ниже сладце спит не вельми дремавший, ниже чувствие радости приемлет не оскорбленный прежде: тако ниже вечных благ насладимся, аще не презрим маловременная. 105. Слово ума служитель есть: еже бо хощет ум, сие слово сказует. (с. 31) 106. Ум вся видит, и сущая на Небесех: и ничтоже оный помрачает, разве точию грех. Чистому уму ничего нет непостижимаго, якоже слову ничего неизглаголаннаго. 107. По телу человек смертен, по уму же и слову безсмертен. Молчя мыслиши, помысливши глаголеши: в молчании бо ум раждает слово. Благодарное же слово, Богу приносимое, есть спасение человеку. 108. Глаголющий несмысленная, ума не имать: ничтоже бо мысля глаголет. Но разсмотри, что пользует ти творити ко спасению души. 109. Слово умное и душеполезное, Божий дар есть: якоже и слово, буесловия исполненное, и изыскивающее меру, и разстояние небеси и земли, и величину солнца и звезд: человека всуе труждающагося из_обретение есть. Ни мало бо неполезных всуе хваляся ищет, яко решетом воду хотящий черпати. Сего бо людем не возможно обрести. 110. Никто неба не видит, и сущих в нем разумети не может, разве един человек, добродетельному житию прилежащий, и разумевающий, и прославляющий сотворшаго его во Спасение, и живот ему даровавшаго. Весть бо несомненно Боголюбивый и таковый муж, яко без Бога ничтоже есть, но везде есть Бог, и во всех, яко неопределимый. 111. Якоже из матерняго чрева исходит человек: тако из тела душа нага исходит, иная чиста: иная светла: иная же скверны имея греховныя, другая же черна от многих прегрешений. Темже словесная и Боголюбивая душа, памятующи и помышляющи злая по смерти, благочестиво жительствует, да не по томужде осудившися подпадет. Неверующии бо, несмысленнии душею, нечествуют и согрешают, вечное презирающе. 112. Якоже изшедши из чрева, бывших во чреве не помниши: тако и из тела изшедши, не помянеши бывших теле. (с. 32) 113. Якоже изшедши из чрева, лучше и больше делаешися телом: тако и из тела чистым и нескверным изшедши, лучшим будеши, и нетленным на небесех пребывая. 114. Якоже во чреве телу совершившуся подобает родитися: тако душе, в теле определенный от Бога предел исполнившей, подобает изыти из тела. 115. Аще како содержати будеши душу сущую в теле, тако и она изшедши из тела содержати будет тебя. Ибо добре и пространно тело здесь содержавший, зле сам обретается по смерти: осуди бо душу свою яко безумный. 116. Якоже тело, из матерняго чрева изшедши несовершенным, обратитися не может: тако и душа, изшедши из тела и ведение Бога благим житием не исправившая: спастися или с Богом соединитися не может. 117. Тело, соединяяся с душею, из тьмы чрева во свет исходит: душа же, соединяяся с телом, во мрак тела заключается. Темже подобает ненавидети и наказывати{Здесь разуметь должно воздержание тела от страстных деяний и сластей оскорбляющих душу. Просто бо, никтоже, когда свою плоть возненавиде, но питает и греет ю. Ефес. 5, ст. 29.} тело, яко врага и противника суща душе. Множество бо снедей и сладкоястия возбуждают в людех злыя страсти: воздержание же чрева усмиряет страсти, и спасает душу. 118. Телесное зрение, суть очи: душевное же зрение, есть ум. И якоже тело, очей не имущее, есть слепо, и солнца, всю землю просвещающаго, и море не видит, ниже света насладитися может: тако и душа добраго и благаго жития не имущая, слепа есть, и Бога творца и благодетеля всех не разумевает, ниже прославляет, и нетления своего, и вечных благ насладитися не может. 119. Нечувствие и юродство души, есть неведение Бога. Зло бо от неведения раждается: благо же от ведения Бога прилучается людем, и спасает душу. Аще убо хотения твоя (с. 33) не творити тщишися, трезвен сый, и ведый Бога, мыслиши о добродетелех. Аще же хотения твоя лукавыя сласти ради тщишися творити: неведением Бога упиваяся, погибаеши, яко безсловесныя животныя, не помышляя имущая тебе случитися по смерти злая. 120. Промысла есть дело, бывающая по пределу Божественному, якоже по всяк день восходити и заходити солнцу, и плодоносити земле: тако и законом глаголется бывающее по нужде человечестей: вся же человека ради бывают. 121. Елика Бог творит, яко благий, для человека творит: елика же человек творит, себе самому творит, и добрая и злая. Да не дивишися же благополучию злых. Разумей, что якоже грады содержат мучителей, не похваляюще злое их произволение, но чрез сих достойных мучаще: тем же образом и Бог лукавым житейская под властию имети попущает, дабы чрез оных наказывалися нечувствующие: напоследок же и сих предает суду. Понеже не яко Богу служаще, но своему лукавству работающе, лютая людем сотвориша. 122. Почитающии идолов, аще бы разумели, и видели сердцем, что почитают они, то не заблуждали бы окаяннии от благочестия: но видя благоукрашение, чин и промысл бывших, и бывающих от Бога, познали бы сотворшаго оная для человека. 123. Человек, яко злый и неправедный, убити может: Бог же живот даровати и недостойным не престает. Яко бо независтный и благий по естеству, восхоте быти миру, и бысть, и служит человеку ко спасению его. 124. Словесный человек есть тот, иже уразуме тело, что оно есть, яко тленно есть и маловременно. Таковый бо и душу разумеет, яко Божественна есть и безсмертна, и вдохновение Божие сущи, для искушения и оБоготворения связася с телом. Уразумевшии же душу, право и Богоугодно (с. 34) жительствует, телу не повинуяся: но зрит Бога умом своим, и даруемая душе от Бога вечная благая видит умне. 125. Благ и независтен сый присно Бог, власть даде человеку в добре и зле, разум ему даровавши, дабы видя мир, и сущая в нем, познал сотворшаго вся для человека. Неправедному же мощно хотети и не разумети: мощно бо ему и не веровати и бедствовати, и противная истине мыслити. Толикую имать человек власть и в добре и зле. 126. Повеление есть Божие, да растущу телу, душа исполняется ума, да человек от добра и зла угодное себе изберет. Душа же не избирающая добра, ума не имать. Темже все тела душу имут: но не всякая душа глаголется ум имети. Боголюбивый бо ум бывает в целомудренных, и преподобных, и праведных, и непорочных, и благих, и милостивых, и благочестивых. Присутствие ума бывает человеку помощь к разумению Бога. 127. Едино точию не возможно человеку, сиречь, еже быти безсмертным{Конечно по телу сие разумей, а не по душе, но и оное по воскресении безсмертно учинится.}. С Богом соединитися возможно ему, аще помыслит, яко может. Хотящий бо, разумевающий, верующий, и любящий человек, чрез благое житие Богу сообщник бывает. 128. Око являемая видит, ум же невидимая разумевает. Боголюбивый бо ум свет есть души. Имущий ум Боголюбивый сердцем просветися, и зрит Бога умом своим. 129. Ни един благий несть срамен: недобрый же конечно зол и телолюбив есть. Первая же добродетель человеческая есть, презрение плоти. От привременных бо, и тленных, и вещественных отлучение произвольное, а не по убожеству, вечных и нетленных благих наследниками нас творит. (с. 35) 130. Имущий ум весть себя, что он есть, яко тленный есть человек: ведый же себя, вся весть, яко творения Божия суть, и для спасения человеческаго создашася: Вся бо разумети, и верити право, во власти человеческой есть. Весть же подлинно таковый муж, яко житейская презирающии, труд наималейший имут, сладость же и покой вечный получают от Бога по смерти. 131. Якоже тело без души мертво есть: тако и душа без ума праздна есть, и царствия Божия наследити не может. 132. Единаго человека Бог слушает: единому человеку Бог является. Человеколюбив есть Бог, идеже бы аще был человек, тамо есть и Бог. Един человек достойный есть поклонник Бога. Человека ради Бог преобразуется. 133. Бог для человека все сотворил, небо, и украсил оное звездами, для человека сотворил землю. Люди возделывают землю для себя. Нечувствующии толикаго Божия промысла, безумни суть душею. 134. Добро не явно есть, якоже не явна сущая на небеси: зло явно есть, якоже явна сущая на земли. Добро не имать сравнения. Имущий же ум человек лучшее избирает. Единому бо человеку Бог и творения его вразумительна суть. 135. Ум в душе является, а естество в теле: и ум душевный обожение есть, естество же тела, разлитие есть. Во всяком теле естество есть, но не во всякой душе ум есть. Темже и не всякая душа спасается. 136. Душа в мире есть, яко рожденная: ум же и превыше мира, яко нерожденный. Разумевающая же мир, и хотящая спастися душа, по всяк час имать закон непреступным, помышляя в себе, яко днесь подвиг и испытание, и не можно удержати [ умолити] судию, и яко погибает и хранится душа от малыя и срамныя сласти. 137. На земли создася от Бога геенна и смерть, на небеси же промысл и неизменяемость. Вся же для человека и спасения (с. 36) его сотворишася. Бог, не требуяй никаких благ, для человека сотворил небо, и землю, и стихии, чрез сии всякое наслаждение благ даруя ему. 138. Смертное безсмертным подлежит, безсмертное же смертным:{Безсмертное здесь за долговременное и долгопребывающее берется.} служат, сиречь, стихии человеку, по человеколюбию, и врожденной в них благости создавшаго Бога. 139. Убогий, и вред причинити не могущий, во благочестивых деянием не вменяется, но могущий вред причинити, и силу свою во зло не употребляющий, щадящий же смиренных за благочестие к Богу: сей благия мзды стяжевает и по смерти. 140. По человеколюбию создавшаго нас Бога вельми многия суть людем ко спасению пути, обращающия души, и возводящия их на Небеса. Получают бо души человеческия за добродетель возмездия, за преступления же наказания. 141. Сын во отце, и Дух в Сыне, отец же во обоих есть. Верою вся невидимая и разумеваемая познает человек. Вера же есть произвольное души согласие. 142. Якоже по некиим требам или обстоятельствам, в величайших реках плавати принуждающиися, естьли трезвы суть, то сохраняются, аще бы и сильныя были струи, мало поколебавшися сохраняются, естьли что от бывающих обыкновенно при брегах изловляют. Елицы же пияни обрящутся, аще бы и тьмократно на край плыти старалися, но вином побеждаемы, во струях потопляются. Темже образом умерщвляется и душа, в нечистоты и развлечение волн житейских впадая, аще от злобы вещества возникнувши, не познает себя, яко Божественна будучи, и безсмертна со маловременным, многострастным, и смертным веществом искушения ради связася, еже привлекатися от телесных сластей в пагубу: презирая себя, и неведением упиваяся, и не восприемля (с. 37) попечение о себе погибает, и вне живущих обретается. На подобие бо реки часто привлекает нас тело к нелепым сластем. 143. Словесная душа в добром произволении неподвижима стоя, обуздывает якоже коня, ярость и похоть, безсловесныя свои страсти, и побеждая, и укрощая, и превосходя оныя, увенчавается и небеснаго сподобляется жития, сию мзду за победу и труды приемля от создавшаго ее Бога. 144. Словесная поистинне душа видя благополучие лукавых, и благоденствие недостойных, не смущается представляя их в жизни сей наслаждение, якоже несмысленные люди. Весть бо подлинно и щастия непостоянство, и жития неизвестность, и жизни маловременность, и суда недароприемность, и верует таковая душа, яко Бог о нужной пищи для нея печется. 145. Жизнь телесная, и в богатстве многом, и силе жития сего наслаждение, смерть бывает души. Труд же и терпение, и убожество со благодарением, и умерщвление тела, живот есть и сладость вечная души. 146. Словесная душа вещественное создание, и маловременную жизнь презирая избирает небесную сладость, и вечную жизнь, благим житием от Бога сию получая. 147. Имущии очерненную грязию одежду, оскверняют одежду прикасающихся к ним. Тем же образом и злые произволением, и житием неправые со простейшими обращаяся, глаголя с ними неподобающая, наподобие тины чрез слух оскверняют душу. 148. Начало греха есть похоть, от неяже погибает словесная душа. Начало же спасения и царствия небеснаго бывает душе любовь. 149. Якоже медь небрегомая, и подобающаго прилежания не удостоиваемая, от раждающияся ржавости, от долговременнаго связания, и неупотребления, согнивает, и непотребною и недобротною делается: тем же образом и душа праздная, (с. 38) и не пекущаяся о благом житии и обращении к Богу, отлучающая себя чрез лукавыя деяния от покрова Божия, по злобе раждающейся от лености, веществом тела, яко медь от ржавщины потребляется, и недобротною и непотребною обретается. 150. Бог есть благ, безстрастен и непременен. Аще же кто за благословное почитает и истинное, яко Бог не пременяется, но недоумевает, како благими он увеселяется, злых же отвращается, и на согрешающих гневается, почитаемь же милосерд бывает: подобает рещи, яко ниже радуется Бог, ниже гневается: радость бо и печаль суть страсти: ниже дарами угождается: сластию бо побеждался бы. Не лепо есть, от человеческих дел благим или худым быти Богу. Но он благ есть, и пользует точию, а николиже вредит, тойжде и единаков сый. Мы же благими пребывая по подобию с Богом соединяемся: злы же будучи по несходству, отлучаемся от Бога. И добродетельно живя держимся Бога: злы же будучи, врагом нам творим онаго, не всуе гневающимся, но на грехи, непопущающия Богу в нас возсияти, со демонами же мучительными соединяющия. Аще же молитвами и благотворениями разрешение грехов обретаем, не чтим Бога, и не пременяем, но делами, и обращением к Богу, злобу нашу исцеляя, паки Божия благости причащаемся. Темже Бог такожде отвращается злых, якоже и солнце от лишенных зрения сокрывается. 151. Благочестивая душа весть Бога всяческих. Благочестие бо не что иное есть, разве творение воли Божия, в чем состоит ведение Бога, сиречь: еже независтным быти, целомудренным, кротким, благодатным по силе, общительным, несварливым, и творити, елика суть угодна воли Божией. 152. Ведение Бога, и страх его, исцеление есть страстей вещественных. Неведению бо Божию, душе соприсутствующу, пребывающия неисцельныя страсти согноивают душу, якоже (с. 39) от долговременнаго гноя согнивающей ей от злобы, еяже невинен Бог, знание и разум низпославший людем. 153. Человека познания и разума исполнил Бог, страсти и самопроизвольную злобу очистити тщася, и смертное к безсмертию, по своей благости, преложити хотя. 154. Ум, сущий в чистой и боголюбивой душе, воистинну зрит Бога нерожденнаго, и невидимаго, и неизглаголаннаго, единаго чистаго для чистых сердцем. 155. Венец нетления, и добродетель, и спасение человека есть, благодушно и благодарно сносити злоключения: удерживати же ярость, язык, чрево и сласти, велия есть помощь душе. 156. Содержит мир промысл Божий, и нет места ниединаго, не имущаго промысла. Промысл же есть самоконечное слово Божие, из_образующее грядущее в мир вещество, и творец и художник всего бывающаго. Ниже бо возможно веществу украситися без разсуждающия силы слова, еже есть образ и ум и премудрость, и промысл Божий. 157. Сущая о помышления похоть, корень есть страстей сродных тьме: и душа сущая в помышлении похоти, не весть себя, яко Божие вдуновение есть, и тако несется ко греху, не помышляя безумная о злых, по смерти имеющих быти. 158. Велия и неисцельная болезнь души и погибель, есть безбожие и славолюбие. Похотение бо зла, лишение есть блага. Благо же есть еже независтно добрая вся творити, елика угодна суть Богу всех. 159. Человек един богоприемлющь есть. С сим бо единем животным беседует Бог, нощию чрез сновидения, днем же чрез ум: и чрез вся достойным своим людем предглаголет, и предзнаменует будущая благая. 160. Ничтоже неудобно есть верующему, и желающему разумети Бога. Аще же хощеши его и зрети, виждь благоукрашение (с. 40) и промысл всего бывшаго, и бывающаго словом его. Вся же для человека. 161. Святым именуется чистый от злобы и грехов.Темже и велие есть души исправление, и угодно Богу, егда несть злобы в человеке. 162. Имя есть знаменование единаго от многих. Темже безумно мыслити, яко Бог, един будучи и единаков, иное имать имя. Имя бо сие, Бог, знаменует безначальнаго, вся сотворшаго для человека. 163. Аще сведущ ты в себе о деяниях лукавых, отсецы оныя от души твоея чаянием добрым. Праведен бо Бог и человеколюбив. 164. Познает Бога человек, и познается от Бога тщащийся выну неразлучен быти с Богом. Неразлучен же с Богом бывает человек благий во всем, и всякую побеждающий сласть, не по скудости подаяния оных, но по изволению и воздержанию своему. 165. Благотвори обидящему тя, и другом имети будеши Бога. Ни пред кем не оклеветывай врага твоего: имей любовь, целомудрие, терпение, воздержание, и подобная. Сие бо есть ведение Бога, сиречь, смиренномудрием и таковыми делами последование Богу. Дела же сия суть не простых людей, но разумныя души. 166. О нечестиво дерзающих называти одушевленными прозябения и зелия, написах главу простейшим для сведения. Травы жизнь имеют естественную, души же не имеют. Словесным же животным человек глаголется, яко ум имать, и науки вмещает. Другия животныя земныя и воздушныя глас в себе имеют, яко дух в них есть и душа: и все животныя суть растущия и уменьшающияся, яко живут и растут, но не все имеют душу. Различия же четыре суть животных. Иныя бо из оных безсмертны суть и одушевленны, как-то ангели: иныя же ум, душу и дух имеют, как-то люди: иныя же дух имеют и душу, как-то животныя: иныя же токмо жизнь имеют, как-то прозябения: (с. 41) точию жизнь в прозябениях, без души, и духа, и ума, и безсмертия состоит. И вся прочая без жизни не могут быти. Всякая же душа, сиречь человеческая, всегда движится с одного места на другое. 167. Егда сласти некия мечтание восприимеши, блюди себе, да не абие совосхищен будеши от онаго: но мало отложивши, помяни смерть, и помысли, како лучше есть сведети в себе, что сию прелесть сласти победившу. 168. Якоже в самом рождении есть страсть, бывающее бо в жизни и растлевается: тако и в страсти есть злоба. Да не речеши убо, не мог Бог злобу отсещи: сие бо глаголющии, и безчувственно и безумно глаголют. Не подобаше Богу отсещи вещество: вещества бо суть сии страсти. Бог же пользы ради отсече злобу от людей, ум, знание и разум, и разсуждение добра даровавши им, да видяще злобу, яко повреждаемся ею, бежим от нея. Безумный же человек последует злобе, и хвалится ею, и якоже во мрежу попадшися, ратуемь бывает от нея, в ней повит будучи, и николиже отрещися можя, и видети, и познати Бога, вся сотворшаго во спасение и обожение человека. 169. Смертное само себя ненавидит, что предузнает свою смерть. И безсмертное, зане есть благо, прилучается преподобной душе: смертное же, зане есть зло, прилучается безумной и окаянной душе. 170. Егда со благодарением на свое ложе обратишися, благодеяния и толикий промысл Божий о себе помышляя, исполнившися благия мысли, паче да веселишися, и будет ти сон телесный, трезвение души, и смежение очей твоих, истинное видение Бога, и молчание твое, исполнено будучи блага, воздаст от всея души и силы воспаряющую, ощутительную славу Богу всех. злобе бо не сущей от человека и благодарение единое, паче всякия многоценныя жертвы, угодно Богу, емуже слава во веки веков, аминь.