<::лат> OCR: <::рус> Библиотека святоотеческой литературы <::лат> http://orthlиb.ru <::слав> (л. 190) Знаменания к титу епистолии [1] О учителех ключимых на службу, и на обличение противных. [2] На велящих плотская очищения творити, и о духовной добродетели. [3] О учении, имже подобает учити везде комуждо. [4] О рабех, да и тии Христове Благодати достойно работают. [5] О послушании власти во Христово подобие. [6] О учении, яко подобает уклонятися от еретических учений. (л. 190 об.) Сказание к титу послания святаго апостола павла. Сие посылает от никополя, тамо бо озиме. Вина же посланию сия: в крите остави тита, да устроит по градом клирики, многим же сущим тамо начинающим, изветом закона, прельщати люди. Сие уведев павел, пишет к титу, и первее убо Благодаря Бога за его Благоговеинство, сказует яже о Христе вере не новей быти, но от века уготованне, и обетованне ей бывши от Бога. Таже о поставлении клириков, и сего учит, како, и каковым им быти подобает: и запрещати повелевает ему противящимся здравей вере, и наипаче сущим от обрезания. Ведети же критян, яко праздни суть, и требуют прещения. И вся научив, брашна чиста быти чистым: и каковым быти подобает пресвитером самым, должным сущим уцеломудряти юныя: сказует, како подобает рабом служити своим владыкам. И вкратце рещи, воспомянув, яко Спасова Благодать не от дел нас оправда, но своим человеколюбием. И завещав законных сваров отвращатися, аки неполезных сущих, сказует ему по еже послати к нему артему, да и сам приидет к нему, и повелевает ему, да учит и своих добрым делом прилежати. И тако скончавает послание. (л. 191) К ТИТУ ПОСЛАНИЕ СВЯТАГО АПОСТОЛА ПАВЛА. Глава первая. (за\ч 300) с\х 1 Павел*{Августа 25: Павел*} раб Божий, апостол же Иисус Христов, по вере избранных Божиих, и разуму истины, яже по благочестию: 2 О уповании жизни вечныя, юже обетова неложный Бог, прежде лет вечных: 3 Яви же во времена своя слово свое проповеданием, еже мне поручено бысть, по повелению Спасителя нашего Бога: 4 Титу присному чаду по общей вере, благодать, милость, мир от Бога отца, и Господа Иисуса Христа, Спаса нашего. Преступи апостолу, в зачало 302. (за\ч) [1] 5 Сего ради**{В четверток 28 недели: Чадо тите, сего ради**} оставих тя в крите, да недокончанная исправиши, и устроиши по всем градом пресвитеры, якоже тебе аз повелех. 6 Аще кто есть непорочен, единыя жены муж, чада имый верна, не во укорении блуда, или непокорива. 7 Подобает бо епискпу без порока быти (л. 191 об.) якоже Божию строителю: не себе угождающу, не дерзу, не напрасливу, не гневливу, не пиянице, не бийце, не скверностяжательну: 8 Но страннолюбиву, благолюбцу, целомудренну, праведну, преподобну, воздержательну: 9 Держащемуся вернаго словесе по учению, да силен будет и утешати во здравем учении, и противящияся обличати. [2] 10 Суть бо мнози непокориви, суесловцы, и умом прельщени, и наипаче сущии от обрезания: 11 Ихже подобает уста заграждати: иже вся домы развращают, учаще яже не подобает, сквернаго ради прибытка. 12 Рече же некто от них свой им пророк: критяне присно лживи, злии зверие, утробы праздныя. 13 Свидетельство сие истинно есть. еяже ради вины обличай их нещадно, да здрави будут в вере: 14 Не внимающе иудейским баснем, ни заповедем человек, отвращающихся от истины. (за\ч 301) 15 Вся убо чиста*{В пяток 28 недели: Чадо тите, вся чиста*} чистым: оскверненым же и неверным ничтоже чисто: но осквернися их и ум и совесть. 16 Бога исповедуют ведети, а делы отмещутся его, мерзцы суще, и непокориви, и на всяко дело благое неискусни. Глава вторая. с\х 1 Ты же глаголи, яже подобает здравому учению. Конец четвертку. (л. 192) 2 Старцем трезвеным быти, честным, целомудренным, здравствующим верою, любовию, терпением. 3 Старицам такоже во украшении святолепным, не клеветивым, не вину многу порабощенным, доброучительным: 4 Яко да уцеломудрят юныя, мужелюбицам быти, чадолюбицам, 5 Целомудренным, чистым, домы добре правящим, благим, покаряющимся своим мужем, да не слово Божие хулится. 6 Юноши такожде моли целомудрствовати. 7 О всем же сам себе подавая образ добрых дел, во учении @независтное@{@целость@}, честность, нетление, 8 Слово здравое, незазорное, да противный посрамится, ничтоже имея глаголати о нас укорно. [4] Рабы, своим господем повиноватися, во всем благоугодным быти, не прекословным, 10 Не крадущим: но веру всяку являющим благу, да учение Спасителя нашего Бога украшают во всем. Конец пятку. (за\ч 302) 11 Явися бо*{На крещение Господне: Чадо тите, явися*} Благодать Божия Спасительная всем человеком, 12 Наказующи нас, да отвергшеся нечестия и мирских похотей, целомудренно и праведно, и благочестно поживем в нынешнем веце. 13 Ждуще блаженнаго упования, и явления славы великаго Бога и Спаса нашего Иисуса Христа. 14 Иже дал есть себе за ны, да избавит ны от всякаго беззакония, и очистит себе люди избранны, ревнители добрым делом. (л. 192 об.) Преступи крещению. Чти титу: 15 Сия глаголи, и моли, и обличай со всяким повелением, да никтоже тя @преобидит@{@презирает@}. Глава третия. [5] с\х 1 Воспоминай тем, начальствующим и владеющим, повиноватися и покорятися, и ко всякому делу благу готовым быти: 2 Ни единаго хулити, не сварливым быти, но тихим, всяку являющим кротость ко всем человеком. 3 Бехом бо иногда и мы несмысленни, и непокориви, и прельщени, работающе похотем, и сластем различным, в злобе и зависти живуще, мерзцы суще, и ненавидяще другдруга. Преступи титу. Чти крещению: 4 Егда же Благодать и человеколюбие явися Спаса нашего Бога: 5 Не от дел праведных, ихже сотворихом мы, но по своей его милости, спасе нас банею пакибытия, и обновлением Духа святаго, 6 Егоже излия на нас обильно Иисус Христом, Спасителем нашим: 7 Да оправдившеся благодатию его, наследницы будем по упованию жизни вечныя. Конец крещению. (за\ч) 8 Чадо тите,*{В память 5-го собора: Чадо тите,*} верно слово, и о сих хощу тя *извещати*{*утвердити*}, да пекутся добрым делом прилежати веровавшии Богу: сия суть полезна (л. 193) человеком и добра. 9 Буих же стязаний и родословий и рвений, и сваров законных отступай: суть бо неполезны и суетны. [6] 10 Еретика человека, по первом и втором наказании отрицайся: 11 Ведый, яко развратися таковый, и согрешает и есть самоосужден. Чти титу: 12 Егда послю артему к тебе, или тихика, потщися приити ко мне в никополь: ту бо судих озимети. 13 Зину законника и аполлоса, скоро предпосли, и да ничтоже има скудно будет. Преступи титу. 14 Да учатся же и наши добрым делом прилежати в нужная требования, да не будут безплодни. Чти титу: 15 Целуют тя со мною сущии вси, целуй любящия ны в вере: Благодать со всеми вами. аминь. Конец титу, и собору. Конец послания, еже к титу, критския Церкве прежде епископу священну бывшу: написано бысть от никополя македонскаго: имать в себе главы 3: зачал Церковных 4: стихов, 46: знаменаний черных 6: без червленых.