<::лат> OCR: <::рус> Библиотека святоотеческой литературы <::лат> http://orthlиb.ru <::слав> (л. 106) Знаменания перваго послания к коринфяном. [1] О еже не быти распре другу со другом от славолюбия, еже о человечестей мудрости. [1] В немже о Божией премудрости. [2] О служениих. [3] О еже не достоит судити учителей. [4] О еже не достоит гордитися. [2] О блудницех и о блуде, и о сообщающихся им. [3] О еже не подобает претися пред неверными. [1] В немже, яко не подобает блуда творити. [4] О женитве, и вдовстве, и безбрачии. [1] В немже, яко не подобает разлучатися мужем от жен, и женам от мужей, аще и неверни суть. [2] О чистоте и двоебрачии. [5] О различии брашен, и о отступлении бесовскаго чтилища. [1] В немже о схождении. [2] О еже его многообразнем схождении. [3] О еже не сообщатися демоном. [6] О Благообразии мужей и жен в молитвах и Пророчествах. [7] О сообщении Боголепном. [8] О различии дарований и строений. [1] В немже о любви великом даровании. [2] О пророчестве. [9] О соборнем воскресении телес. [1] В немже о Христове исправлении и строении. [2] О подобии востающих растущих семен. [3] О изменении в славу и силу. (л. 106 об.) Сказание к коринфяном перваго послания святаго апостола павла. Сие посылает от ефеса асийскаго, видев уже их и научив, и воспоминает им посланием сим. Извет же послания сей есть: коринфяне от любопрения водими, разделяхуся разумы, и беша прочия в них расколы: и сущим расколом, презираху поемшаго мачеху свою. Инии же хотяху оставляти жены своя, изветом воздержания. Нецыи же в требищах идольских ядяху, яко неповинным сущим идоложертвенным. Инии же иных убо уничижаху, а глаголющих различными языки хваляху, и конечне прельщахуся: и о таинстве воскресния, глаголюще не востати плоти сей. Сим всем в коринфе движимым, пишут людие ко апостолу, и прочее противу всех тех восписует. И первее убо свидетельствует им, яко и мудри и разумни суть, не хвалит же их творящих расколы, и советует не в слове, но в деле и силе добродетель мнети быти. Таже запретив поимшему мачеху, и поучив не имети тяжбы друг ко другу, отвещавает прочее о нихже писаша, о женитве убо учя, не распряжну быти спряжению, и на время точию воздержатися молитвы ради. А за еже любити им воздержание, пишет о девстве, яко не по нужди, но по изволению сему быти подобает. Таже о идоложертвенных завещавает, да не надымаются разумом, но любовию и смиреномудрием да жительствуют. Возбраняет же в требищах идольских пировати, да не соблазняются малии. Таже о (л. 107) Духовных дарованиих, да не разнствуют в дарованиих, ниже да предпочитают имущаго дарование сие, от имущаго оно: всем бо тогоже Духа быти глаголет. И прочее о воскреснии учит, яко плоть востает: умирающи бо тленна, востающи же нетленна по Благодати Господни. Воскресение же составляет тем, яко и Христос воскресе. И конец, учительна словеса ко исправлению нравов пишет: и о милостыни еже ко святым завещавает, и сице скончавает послание. (л. 107 об.) К КОРИНФЯНОМ ПЕРВОЕ ПОСЛАНИЕ СВЯТАГО АПОСТОЛА ПАВЛА. Глава первая. (за\ч 122) с\х 1 Павел зван*{Во вторник 6 недели: Павел зван*} апостол Иисус Христов, волею Божиею, и сосфен брат: 2 Церкви Божией сущей в коринфе, освященным о Христе Иисусе, званным святым, со всеми призывающими имя Господа нашего Иисуса Христа, во всяком месте, тех же и нашем. (за\ч 123) 3 Бл~годать вам**{Суббота 11: Братие, Благодать вам**} и мир от Бога отца нашего, и Господа Иисуса Христа. 4 Благодарю Бога моего всегда о вас, о Благодати Божией данней вам о Христе Иисусе: 5 Яко во всем обогатистеся о нем, во всяком слове, и всяком разуме, 6 Якоже свидетельство Христово известися в вас: 7 Яко вам не лишитися ни во едином даровании, чающим откровения Господа нашего Иисуса Христа: 8 Иже и утвердит вас даже до конца неповинны, в день Господа нашего (л. 108) Иисуса Христа. 9 Верен Бог, имже звани бысте во общение Сына его Иисуса Христа Господа нашего. Конец вторнику, и субботе. (за\ч 124) [1] 10 Молю же вы братие, именем*{Неделя 8: Братие, молю вы именем*} Господа нашего Иисуса Христа, да тожде глаголете вси, и да не суть в вас распри: да есте же утверждени в томже разумении, и в тойже мысли. 11 Возвестися бо ми о вас, братие моя, @посланными от хлоиса@{@от домашних хлоиса@}, яко рвения в вас суть. 12 Глаголю же се, яко койждо вас глаголет: аз убо есмь павлов, аз же аполлосов, аз же кифин, аз же Христов. 13 Еда разделися Христос? еда павел распятся по вас? или во имя павлово Крестистеся? 14 Благодарю Бога, яко ни единаго от вас Крестих, точию криспа и гаиа: 15 Да никтоже речет, яко в мое имя Крестих. 16 Крестих же и стефанинов дом: прочее не вем, аще кого инаго Крестих. 17 Не посла бо мене Христос Крестити, но Благовестити: не в премудрости слова, да не испразднится Крест Христов. (за\ч 125) [1] 18 Слово бо Крестное,**{В пяток великий: Братие, слово крестное,** Сие же и на воздвижение Креста.} погибающим убо юродство есть, а спасаемым нам сила Божия есть. Конец недели. 19 Писано бо есть: погублю премудрость премудрых, и разум разумных отвергу. 20 Где премудр? где (л. 108 об.) книжник? где совопросник века сего? не обуи ли Бог премудрость мира сего? 21 Понеже бо в премудрости Божией не разуме мир премудростию Бога, Благоизволил Бог буйством проповеди спасти верующих. 22 Понеже и иудее знамения просят и еллини премудрости ищут: 23 Мы же проповедуем Христа распята, иудеем убо соблазн, еллином же безумие: 24 Самем же званным, иудеем же и еллином, Христа, Божию силу и Божию премудрость. Конец Кресту. 25 Зане буее Божие, премудрее человек есть: и немощное Божие, крепчае человек есть. (за\ч) 26 Видите бо звание ваше братие,*{В субботу 12: Братие, видите звание ваше,* Сие же и суббота по воздвижении.} яко не мнози ли премудри по плоти? не мнози ли сильни? не мнози ли Благородни? (су\б) 27 Но буяя мира избра Бог, да премудрыя посрамит: и немощная мира избра Бог, да посрамит крепкая: 28 И худородная мира, и уничиженная избра Бог, и не сущая, да сущая упразднит: 29 Яко да не похвалится всяка плоть пред Богом. Конец субботе. 30 Из негоже вы есте о Христе Иисусе, иже бысть нам премудрость от Бога, правда же и освящение, и избавление: 31 Да, якоже пишется, хваляйся, о Господе да хвалится. (л. 109) Глава вторая. с\х 1 И аз пришед к вам братие, приидох не по превосходному словеси, или премудрости, возвещая вам свидетельство Божие. 2 Не судих бо ведети что в вас, точию Иисуса Христа, и сего распята. Конец великому пятку. 3 И аз в немощи, и страсе, и трепете мнозе бых в вас: 4 И слово мое, и проповедь моя не в препретельных человеческия премудрости словесех, но в явлении Духа и силы: 5 Да вера ваша не в мудрости человечестей, но в силе Божией будет. (за\ч 126) 6 Премудрость же*{В субботу 13: Братие, премудрость* Сие же и суббота пред воздвижением.} глаголем в совершенных: премудрость же не века сего, ни князей века сего престающих: 7 Но глаголем премудрость Божию в тайне сокровенную, иже предустави Бог прежде век в славу нашу: 8 Юже никтоже от князей века сего разуме. аще бо быша разумели, не быша Господа славы распяли. 9 Но якоже есть писано: (за\ч 127) Ихже око не виде,**{В среду 6 недели: Братие, ихже око не виде**} и ухо не слыша, и на сердце, человеку не взыдоша, яже уготова Бог любящим его. Конец субботе. 10 Нам же Бог открыл есть Духом своим: Дух бо вся испытует, и глубины Божия. 11 Кто бо весть от человек, яже в человеце, точию Дух человека живущий в нем? такоже и Божия никтоже весть, точию Дух Божий. 12 Мы же не дух мира сего прияхом, но Дух иже от Бога, да вемы яже от Бога дарованная нам. 13 Яже и глаголем, не в наученых человеческия премудрости словесех, но в наученых Духа святаго, духовная духовными сразсуждающе. 14 Душевен же человек не приемлет яже Духа Божия: юродство бо ему есть, и не может разумети, зане духовне востязуется. 15 Духовный же востязует убо вся, а сам той ни от единаго востязуется. 16 Кто бо разуме ум Господень, иже изяснит и? мы же ум Христов имамы. Глава третия. с\х 1 И аз братие, не могох вам глаголати яко духовным, но яко плотяным, яко младенцем о Христе. 2 Млеком вы напоих, а не брашном: не убо можасте, но ни еще можете ныне: 3 Еще бо плотстии есте. идеже бо в вас зависти, и рвения, и распри, не плотстии ли есте, и по человеку ходите? 4 Егда бо глаголет кто: аз убо есмь павлов: другий же, аз аполлосов: не плотстии ли есте? [2] 5 Кто убо есть павел? кто же ли аполлос? но точию служителе, имиже веровасте, и комуждо якоже Господь даде. 6 Аз насадих, аполлос напои: Бог же возрасти. (л. 110) 7 Темже ни насаждаяй есть что, ни напаяяй, но возращаяй Бог. 8 Насаждаяй же и напаяяй, едино еста, кийждо же свою мзду приимет по своему труду. Конец среде. (за\ч 128) 9 Бг~у бо есмы*{Неделя 9: Братие, Богу есмы*} поспешницы: Божие тяжание, Божие здание есте. 10 По благодати Божией данней мне, яко премудр архитектон основание положих, ин же назидает: кийждо же да блюдет, како назидает. 11 Основания бо инаго никтоже может положити паче лежащаго, еже есть Иисус Христос. 12 Аще ли кто назидает на основании сем, злато, сребро, камение честное: дрова, сено, тростие: 13 Когождо дело явлено будет, день бо явит, зане огнем открывается, и когождо дело яковоже есть, огнь искусит. 14 И егоже аще дело пребудет, егоже назда, мзду приимет. 15 А егоже дело сгорит, оттщетится: сам же спасется, такожде якоже огнем. 16 Не весте ли, яко храм Божий есте, и Дух Божий живет в вас? 17 Аще кто Божий храм растлит, растлит сего Бог: храм бо Божий свят есть, иже есте вы. Конец недели. (за\ч 129) 18 Никтоже себе**{В четверток 6-я недели: Братие, никтоже себе**} да прельщает. аще кто мнится мудр быти в вас в веце сем, буй да (л. 110 об.) бывает, яко да премудр будет. 19 Премудрость бо мира сего, буйство у Бога есть. писано бо есть: запинаяй премудрым в коварстве их. 20 И паки: Господь весть помышления @человеческа@{@мудрых@}, яко суть суетна. 21 Темже никтоже да хвалится в человецех: вся бо ваша суть. 22 Аще павел, или аполлос, или кифа, или мир, или живот, или смерть, или настоящая, или будущая, вся ваша суть. 23 Вы же Христовы, Христос же Божий. Конец четвертку. Глава четвертая. (за\ч 130) [3] с\х 1 Тако нас*{В субботу 14: Братие, тако нас*} да непщует человек, яко слуги Христовы, и строители тайнам Божиим. 2 А еже прочее ищется в строителех, да верен кто обрящется. 3 Мне же не велико есть, да от вас истяжуся, или от человеческаго *дне*{*суда*}: но ни сам себе востязую. 4 Ничесоже бо себе свем: но ни о сем оправдаюся: востязуяй же мя Господь есть (за\ч) 5 Темже прежде времене**{В пяток 6-я недели: Братие, прежде времене**} ничтоже судите, дондеже приидет Господь, иже во свете приведет тайная тмы, и обявит советы сердечныя: и тогда похвала будет комуждо от Бога. Конец субботе. (л. 111) [4] 6 Сия же братие моя, преобразих на себе и аполлоса, вас ради: да от наю научитеся, не паче написанных мудрствовати, да не един по единому гордитеся на другаго. 7 Кто бо тя разсуждает? что же имаши, егоже неси приял? аще же и приял еси, что хвалишися яко не прием? 8 Се сыти есте, се обогатистеся, без нас царствовасте: и еще убо да воцаритеся, да и мы быхом с вами царствовали. Конец пятку. (за\ч 131) 9 Мню бо, яко Бог ны*{Неделя 10: Братие, Бог ны* Сие же и апостолом.} посланники последния яви яко насмертники: зане позор быхом миру, и ангелом, и человеком. 10 Мы убо буи Христа ради, вы же мудри о Христе: мы немощни, вы же крепцы: вы славни, мы же безчестни. 11 До нынешняго часа и алчем, и жаждем, и наготуем, и страждем, и скитаемся, 12 И труждаемся, делающе своими руками: укоряеми, Благословляем: гоними, терпим: 13 Хулими, @утешаемся@{@молим@}: якоже отреби миру быхом, всем попрание доселе. 14 Не срамляя вас сия пишу, но якоже чада моя возлюбленная наказую. 15 Аще бо и многи пестуны имате о Христе, но не многи отцы: о Христе бо Иисусе благовествованием аз вы родих. 16 Молю же вас: подобни мне бывайте, якоже аз Христу. Конец недели, и апостолом. (л. 111 об.) (за\ч 132) 17 Сего ради послах*{Суббота 15: Братие, послах*} к вам тимофеа, иже ми есть чадо возлюблено и верно о Господе: иже вам воспомянет пути моя, яже о Христе Иисусе, якоже везде и во всякой Церкви учу. 18 Яко не грядущу ми к вам, разгордешася нецыи. 19 Прииду же скоро к вам, аще Господь восхощет, и уразумею не слово разгордевшихся, но силу. 20 Не в словеси бо Царство Божие, но в силе. [2] 21 Что хощете? с палицею ли прииду к вам, или с любовию, и Духом кротости? Глава пятая. с\х 1 Отнюд слышится в вас блужение: и таково блужение, яково же ни во языцех именуется, яко некоему имети жену отчую. 2 И вы разгордесте, и не паче плакасте, да измется от среды вас содеявый дело сие. 3 Аз убо яко не у вас сый телом, ту же живый Духом, уже судих яко тамо сый, содеявшаго сице сие, 4 О имени Господа нашего Иисуса Христа, собравшимся вам и моему Духу, с силою Господа нашего Иисуса Христа, 5 Предати таковаго сатане во измождение плоти, да дух спасется в день Господа нашего Иисуса Христа Конец субботе. 6 Не добра похвала ваша. (л. 112) (за\ч 133) Не весте ли, яко мал квас*{Во святую и великую субботу на утрени: Братие, мал квас*} все смешение квасит? 7 Очистите убо ветхий квас, да будете ново смешение, якоже есте безквасни: ибо пасха наша за ны пожрен бысть Христос. 8 Темже да празднуем, не в квасе ветсе, ни в квасе злобы и лукавства, но в безквасиих чистоты и истины. Преступи великой субботе, в зачала 206: Христос ны искупи: (за\ч 134) 9 Писах вам**{В понедельник 7-я недели: Братие, писах вам**} в послании, не примешатися блудником. 10 И не всяко блудником мира сего, или лихоимцем, или хищником, или идолослужителем: понеже убо должни есте от мира сего изыти. (нл\дя) 11 Ныне же писах вам, не примешатися: аще некий брат именуемь будет блудник, или лихоимец, или идолослужитель, или досадитель, или пияница, или хищник: с таковым ниже ясти. 12 Что бо ми и внешних судити? не внутренним ли бы судите? Внешним же Бог судит: и измите злаго от вас самех. Глава шестая. [3] с\х 1 Смеет ли кто от вас, вещь имея ко иному, судитися от неправедных, а не от святых? 2 Не весте ли, яко святии мирови (л. 112 об.) хотят судити? и аще вами суд приимет мир, недостойни есте судищем худым: 3 Не весте ли, яко аггелом судити хощем, а не точию житейским? 4 Житейская бо судища аще имате, уничиженых в Церкви, сих посаждайте. 5 К сраму вам глаголю: тако ли несть в вас мудр ни един, иже может разсудити между братий своих? 6 Но брат с братом судится, и то пред неверными. 7 Уже убо отнюд вам срам есть, яко тяжбы имате между собою. почто не паче обидими есте? почто не паче лишени бываете? 8 Но вы сами обидите, и лишаете, да еще братию. 9 Или не весте, яко неправедницы Царствия Божия не наследят? не льстите себе, ни блудницы, ни идолослужители, ни прелюбодеи, ни сквернители, ни малакии, ни мужеложницы, 10 Ни лихоимцы, ни татие, ни пияницы, ни досадители, ни хищницы Царствия Божия не наследят. 11 И сими убо нецыи бесте: но омыстеся, но освятистеся, но оправдистеся именем Господа нашего Иисуса Христа, и Духом Бога нашего. Конец понедельнику. (за\ч 135) 12 Вся ми*{Неделя 34 о блудном: Братие, вся ми*} леть суть, но не вся на пользу: вся ми леть суть, но не аз обладан буду от кого. 13 Брашна чреву, и чрево брашном: Бог же и сие и сия да упразднит: тело же не блужению, (л. 113) но Господеви, и Господь телу. 14 Бог же и Господа воздвиже, и нас воздвигнет силою своею. 15 Не весте ли, яко телеса ваша удове Христовы суть? взем ли убо уды Христовы, сотворю уды блудничи? да не будет. [1] 16 Или не весте, яко прилепляяйся сквернодейце, едино тело есть [с блудодейцею]? будета бо, рече, оба в плоть едину. 17 Прилепляяйся же Господеви, един Дух есть с Господем. 18 Бегайте блудодеяния: всяк бо грех, егоже аще сотворит человек, кроме тела есть: а блудяй, во свое тело согрешает. 19 Или не весте, яко телеса ваша храм живущаго в вас святаго Духа суть, егоже имате от Бога, и несте свои? 20 Куплени бо есте ценою. (за\ч 136) Прославите убо Бога*{Во вторник 7-я недели: Братие, прославите Бога*} в телесех ваших, и в душах ваших, яже суть Божия. Конец недели. Глава седмая. [4] с\х 1 А о нихже писасте ми, добро человеку жене не прикасатися. 2 Но блудодеяния ради, кийждо свою жену да имать, и каяждо жена своего мужа да имать. 3 Жене муж должную любовь да воздает, такожде и жена мужу. 4 Жена своим телом не владеет, но муж: такожде и муж своим телом не владеет, но жена. 5 Не лишайте себе другдруга, точию по согласию ко (л. 113) времени, да пребываете в посте и молитве: и паки вкупе собирайтеся, да не искушает вас сатана невоздержанием вашим. 6 Сие же глаголю по совету, а не по повелению. 7 Хощу бо, да вси человецы будут якоже и аз: но кождо свое дарование имать от Бога, ов убо сице, ов же сице. 8 Глаголю же безбрачным и вдовицам: добро им есть, аще пребудут якоже и аз. 9 Аще ли не удержатся, да посягают: лучше бо есть женитися, нежели разжизатися. [1] 10 А оженившимся завещаваю, не аз, но Господь: жене от мужа не разлучатися. 11 Аще ли же и разлучится, да пребывает безбрачна, или да смирится с мужем своим: и мужу жены не отпущати. 12 Прочим же аз глаголю, а не Господь: (за\ч 137) Аще*{В среду 7-я недели: Братие, аще*} который брат жену имать неверну, и та благоволит жити с ним, да не оставляет ея. Конец вторнику. 13 И жена аще имать мужа неверна, и той благоволит жити с нею, да не оставляет его. 14 Святится бо муж неверен, о жене верне, и святится жена неверна, о мужи верне: иначе бо чада ваша нечиста были бы, ныне же свята суть. 15 Аще ли неверный отлучается, да разлучится: не поработися бо брат или сестра в таковых: в мир бо призва нас Господь Бог. 16 Что бо веси, жено, (л. 114) аще мужа спасеши? или что веси, мужу, аще жену спасеши? 17 Точию коемуждо якоже разделил есть Бог, кийждо якоже призван бысть Господем, тако да ходит: и тако во всех Церквах повелеваю. 18 Во обрезании ли кто призван бысть? @да не отторгнется@{@да не творит себе необрезания @}: в необрезании ли кто призван бысть? да не обрезуется. 19 Обрезание ничтоже есть, и необрезание ничтоже есть: но соблюдение заповедей Божиих. 20 Кийждо в звании, в немже призван бысть, в том да пребывает. 21 Раб ли призван был еси? *да не нерадиши*{*да не печалишися*}: но аще и можеши свободен быти, больши поработи себе. 22 Призванный бо о Господе раб, свободник Господень есть: такожде и призванный свободник, раб есть Христов. 23 Ценою куплени есте: не будите раби человеком. (за\ч 138) [2] 24 Кийждо в немже призван бысть братие,*{В четверток 7-я недели: Братие, кийждо в немже призван бысть,*} в том да пребывает пред Богом. Конец среде. 25 О девах же повеления Господня не имам: совет же даю, яко помилован от Господа верен быти. 26 Мню убо сие добро быти за настоящую нужду: яко добро человеку тако быти. 27 Привязал ли ся еси жене? не ищи разрешения: отрешил ли ся еси жены? не ищи жены. 28 Аще ли же и оженишися, не согрешил еси: и аще посягнет дева, не (л. 114 об.) согрешила есть. скорбь же плоти имети будут таковии, аз же вы щажду. 29 Сие же глаголю братие, яко время прекращено есть прочее, да и имущии жены, якоже не имущии будут. 30 И плачущиися, якоже не плачущии, и радующиися, якоже не радующеся: и купующии, яко не содержаще. 31 И требующии мира сего, яко не требующе: преходит бо образ мира сего. 32 Хощу же вас безпечальны быти. не оженивыйся печется о Господних, како угодити Господеви: 33 А оженивыйся печется о мирских, како угодити жене. разделися жена и дева. 34 Не посягшая печется о Господних, да есть свята и телом и Духом: а посягшая печется о мирских, како угодити мужу. (за\ч 139) 35 Сие же на пользу*{В пяток 7 недели: Братие, к пользе*} вам самем глаголю, не да сило вам наложу, но к Благообразию и Благоприступанию Господеви безмолвну. Конец четвертку. 36 Аще ли же кто без_образити о деве своей непщует, аще есть превозрастна, и тако должна есть быти: еже хощет да творит, не согрешает, аще посягнет. 37 А иже стоит твердо сердцем, не имый нужды, власть же имать о своей воли, и се разсудил есть в сердце своем блюсти деву свою, добре творит. 38 Темже и вдаяй браку свою деву, добре творит: и не (л. 115) вдаяй, лучше творит. 39 Жена привязана есть законом, в елико время живет муж ея. аще же умрет муж ея, свободна есть за негоже хощет посягнути, точию о Господе. 40 Блаженнейша же есть, аще тако пребудет, по моему совету: мню бо ся и аз Духа Божия имети. Глава осмая. [5] с\х 1 О идоложертвенных же вемы, яко вси разум имамы: разум убо кичит, а любы созидает. 2 Аще ли кто мнится ведети что, не у что разуме, якоже подобает разумети. 3 Аще же кто любит Бога, сей познан бысть от него. 4 О ядении же идоложертвенных вемы, яко идол ничтоже есть в мире, и яко никтоже Бог ин, токмо един. 5 Аще бо и суть глаголемии бози или на Небеси, или на земли, [якоже суть бози мнози, и господие мнози:] 6 Но нам един Бог отец, из негоже вся, и мы у него: и един Господь Иисус Христос, имже вся, и мы тем. (пн\де) 7 Но не во всех разум: нецыи же совестию идольскою, даже доселе якоже идоложертвенное ядят, и совесть их немощна сущи, сквернится. Конец пятку. (за\ч 140) 8 Брашно же*{Неделя 35, мясопустная: Братие, брашно*} нас не поставит пред Богом: ниже бо аще ямы, избыточествуем, ниже аще не (л. 115 об.) ямы, лишаемся. 9 Блюдите же, да не како власть ваша сия преткновение будет немощным. 10 Аще бо кто видит тя имуща разум, в требищи возлежаща, не совесть ли его немощна сущи созиждется идоложертвенная ясти? 11 И погибнет немощный брат в твоем разуме, егоже ради Христос умре. 12 Такоже согрешающе в братию, и биюще их совесть немощну сущу, во Христа согрешаете. 13 Темже аще брашно соблазняет брата моего, не имам ясти мяса во веки, да не соблазню брата моего. Глава девятая. с\х 1 Несмь ли апостол? несмь ли свободь? не Иисуса Христа ли Господа нашего видех? не дело ли мое вы есте о Господе? 2 Аще убо иным несмь апостол, но убо вам есмь. (за\ч 141) Печать бо моего*{Неделя 11: Братие, печать моего*} апостольства, вы есте о Господе. Конец недели мясопустной. [1] 3 Мой ответ востязующим мене, сей есть: 4 Еда не имамы власти, ясти и пити? 5 Еда не имам власти, сестру жену водити, яко и прочии апостоли и братия Господня, и кифа? 6 Или един аз и варнава не имамы власти еже не делати? 7 Кто воинствует своими оброки когда? или кто насаждает (л. 116) виноград, и от плода его не яст? или кто пасет стадо, и от млека стада не яст? 8 Еда по человеку сия глаголю? не и закон ли сия глаголет? 9 В моисеове бо законе пишет: да не заградиши устну вола молотяща. еда о воловех радит Бог? 10 Или нас ради, всяко глаголет? нас бо ради вписася, яко о надежди должен есть оряй орати: и молотяй, с надеждею своего упования причащатися. 11 Аще мы духовная сеяхом вам: велико ли, аще мы ваша телесная пожнем? 12 Аще инии власти вашея причащаются, не паче ли мы? но не сотворихом по области сей, но вся терпим, да не прекращение кое дамы Благовествованию Христову. Конец недели. (за\ч 142) 13 Не весте ли,*{В понедельник 8 недели: Братие, не весте ли,*} яко делающии священная, от святилища ядят, и служащии олтарю, со олтарем сделяются? 14 Тако и Господь повеле проповедающим Благовестие, от Благовестия жити. 15 Аз же ни едино сотворих от сих: не писах же сия, да тако будет о мне: добрее бо мне паче умрети, нежели похвалу мою кто да испразднит. 16 Аще бо Благовествую, несть ми похвалы: нужда бо ми належит. горе же мне есть, аще не Благовествую. 17 Аще убо волею сие творю, мзду имам: аще ли неволею, строение ми есть предано. 18 Кая (л. 116 об.) убо ми есть мзда? да благовествуяй без мзды положу благовестие Христово, во еже не творити ми по области моей в благовествовании. Конец понедельнику. (за\ч 143) [2] 19 Свободен бо сый от всех,*{В навечерии просвещения: Братие, свободен сый от всех,*} всем себе поработих, да множайшия приобрящу. 20 Бых иудеем, яко иудей, да иудеи приобрящу: подзаконным, яко подзаконен, да подзаконныя приобрящу. 21 Беззаконным, яко беззаконен, [не сый беззаконник Богу, но законник Христу,] да приобрящу беззаконныя. 22 Бых немощным яко немощен, да немощныя приобрящу: всем бых вся, да всяко некия спасу. 23 Сие же творю за благовестие, да сообщник ему буду. 24 Не весте ли, яко текущии в позорищи, вси убо текут, един же приемлет почесть? тако тецыте, да постигнете. 25 Всяк же подвизаяйся, от всех воздержится: и они убо да истленен венец приимут, мы же неистленен. 26 Аз убо тако теку, не яко безвестно: тако подвизаюся, не яко воздух бияй: 27 Но умерщвляю тело мое и порабощаю, да не како иным проповедуя, сам неключимь буду. Конец навечерию, егда пост есть. (л. 117) Глава десятая. (за\ч) с\х 1 Не хощу же вас не ведети, братие,*{На освящение воды: Братие, не хощу вас не ведети,*} яко отцы наши вси под облаком быша, и вси сквозе море проидоша: 2 И вси в моисеа крестишася во облаце и в мори: 3 И вси тожде брашно духовное ядоша: 4 И вси тожде пиво духовное пиша: пияху бо от духовнаго последующаго камене, камень же бе Христос. Конец навечерию, егда несть пост, и освящению воды. (за\ч 144) 5 Но не во множайших**{Во вторник 8 недели: Братие, не во множайших**} их благоволи Бог: поражени бо быша в пустыни. 6 Сия же образы нам быша, яко не быти нам похотником злых, якоже и они похотеша. 7 Ни идолослужители бывайте, якоже нецыи от них, якоже есть писано: седоша людие ясти и пити, и восташа играти. 8 Ниже соблудим, якоже нецыи от них соблудиша, и падоша во един день двадесять три тысящи. 9 Ни да искушаим Христа, якоже нецыи от них искусиша, и от змий погибоша. 10 Ни ропщите, якоже нецыи от них ропташа, и погибоша от всегубителя. 11 Сия же вся образи прилучахуся онем: писана же быша в научение наше, в нихже концы век достигоша. (л. 117 об.) (за\ч 145) 12 Темже мняйся*{В среду 8-я недели: Братие, мняйся*} стояти, да блюдется, да не падет. Конец вторнику. 13 Искушение вас не достиже, точию человеческое: верен же Бог, иже не оставит вас искуситися паче, еже можете, но сотворит со искушением и избытие, яко возмощи вам понести. [3] 4 Темже братие моя возлюбленная, бегайте от идолослужения. 15 Яко мудрым глаголю: судите бы, еже глаголю. 16 Чаша благословения, юже благословляем, не общение ли крове Христовы есть? хлеб, егоже ломим, не общение ли тела Христова есть? 17 Яко един хлеб, едино тело есмы мнози: вси бо от единаго хлеба причащаемся. 18 Видите Израиля по плоти: не ядущии ли жертвы, общницы олтареви суть? 19 Что убо глаголю? яко идол что есть? или идоложертвенное что есть? 20 Но зане яже жрут языцы, бесом жрут, а не Богови: не хощу же вас общников быти бесом. 21 Не можете чашу Господню пити, и чашу бесовскую: не можете трапезе Господней причащатися, и трапезе бесовстей. 22 Или раздражаем Господа? еда крепчайши его есмы? Конец среде. (за\ч 146) 23 Вся ми**{Суббота 16- я: Братие, вся ми** Сие же и суббота мясопустная.} леть суть, но не вся на пользу: вся ми леть суть, но не вся назидают. 24 Никтоже (л. 118) своего си да ищет, но еже ближняго койждо. 25 Все, еже на торжищи продаемое, ядите, ничтоже сумнящеся за совесть. 26 Господня бо земля, и исполнение ея. 27 Аще ли кто от неверных призывает вы, и хощете ити, все предлагаемое вам ядите, ничтоже сумнящеся за совесть. (за\ч 147) 28 Аще ли же кто вам*{В четверток 8-я недели: Братие, аще кто вам*} речет: сие идоложертвенно есть: не ядите, за оного поведавшаго и совесть: Господня бо земля, и исполнение ея. Конец субботе. 29 Совесть же глаголю не свою, но другаго: вскую бо свобода моя судится от иныя совести? 30 Аще аз Благодатию причащаюся, почто хулу приемлю, о немже аз благодарю? 31 Аще убо ясте, аще ли пиете, аще ли ино что творите, вся в славу Божию творите. 32 Безпреткновени бывайте иудеем, и еллином, и церкви Божией. 33 Якоже и аз во всем всем угождаю, не иский своея пользы, но многих, да спасутся. Глава перваянадесять. с\х 1 Подражатели мне бывайте, якоже и аз Христу. [6] 2 Хвалю же вы братие, яко вся моя помните, и якоже предах вам, предания держите. 3 Хощу же вас ведети, яко всякому мужу глава, Христос есть: глава же жене, муж: (л. 118 об.) глава же Христу, Бог. 4 Всяк муж молитву деяй, или пророчествуяй покрытою главою, срамляет главу свою. 5 И всяка жена молитву деющая, или пророчествующая откровенною главою, срамляет главу свою: едино бо есть и тожде @ @{@еже быти@} остриженней. 6 Аще убо не покрывается жена, да стрижется: аще ли же срам жене стрищися или бритися, да покрывается. 7 Муж бо не должен есть покрывати главу, образ и слава Божия сый: жена же слава мужу есть. Конец четвертку. (за\ч 148) 8 Несть бо муж*{В пяток 8-я недели: Братие, несть муж*} от жены, но жена от мужа: 9 Ибо не создан бысть муж жены ради, но жена мужа ради. 10 Сего ради должна есть жена власть имети на главе, ангел ради. 11 Обаче ни муж без жены, ни жена без мужа о Господе. 12 Якоже бо жена от мужа, сице и муж женою: вся же от Бога. 13 В вас самех судите: лепо ли есть жене откровенне Богу молитися? 14 Или и не самое естество учит вы, яко муж убо аще власы растит, безчестие ему есть. 15 Жена же аще власы растит, слава ей есть: зане растение власов, вместо одеяния дано бысть ей. 16 Аще ли кто мнится спорлив быти, мы таковаго обычая не имамы, ниже Церкви Божия. [7] 17 Сие же завещавая, не хвалю, яко не на лучшее, но на худшее сбираетеся. (л. 119) 18 Первое убо, сходящимся вам в Церковь, слышу в вас распри сущя, и часть некую сих верую. 19 Подобает бо и ересем в вас быти, да искуснии явлени бывают в вас. 20 Сходящимся убо вам вкупе, несть господскую вечерю ясти: 21 Кождо бо свою вечерю предваряет в снедение: и ов убо алчет, ов же упивается. (вто\р) 22 Еда бо домов не имате, во еже ясти и пити? или о Церкви Божией нерадите, и срамляете не имущия? что вам реку? похвалю ли вы о сем? не похвалю. Конец пятку. (за\ч 149) 23 Аз бо приях*{В четверток великий: Братие, аз приях*} от Господа, еже и предах вам: яко Господь Иисус, в нощь, в нюже предан бываше, прием хлеб, 24 И благодарив, преломи, и рече: приимите, ядите: сие есть тело мое, еже за вы ломимое: сие творите в мое воспоминание. 25 Такожде и чашу по вечери, глаголя: сия чаша новый завет есть в моей крови: сие творите, елижды аще пиете, в мое воспоминание. 26 Елижды бо аще ясте хлеб сей, и чашу сию пиете, смерть Господню возвещаете, дондеже убо приидет. 27 Темже иже аще яст хлеб сей, или пиет чашу Господню недостойне, повинен будет телу и крови Господни. 28 Да искушает же человек себе, и тако от хлеба да яст, и от чаши да пиет. 29 Ядый бо и пияй недостойне, суд себе яст и пиет, не разсуждая (л. 119 об.) тела Господня. 30 Сего ради в вас мнози немощни и недужливи и @спят@{@усыпают@} довольни. (за\ч 150) 31 Аще бо быхом*{В понедельник 9 недели: Братие, аще быхом сами*} себе разсуждали, не быхом осуждени были. 32 Судими же от Господа, наказуемся, да не с миром осудимся. Конец великому четвертку. 33 Темже братие моя, сходящеся ясти, другдруга ждите. 34 Аще ли кто алчет, в дому да яст, да не в грех сходитеся. о прочих же, егда прииду, устрою. Глава втораянадесять. [8] с\х 1 О духовных же братие, не хощу вас не ведети. 2 Весте, яко егда неверни бесте, ко идолом безгласным яко ведоми ведостеся. 3 Темже сказую вам, яко никтоже Духом Божиим глаголяй, речет анафема Иисуса: и никтоже может рещи Господа Иисуса, точию Духом святым. 4 Разделения же дарований суть, а тойжде Дух: 5 И разделения служений суть, а тойжде Господь: 6 И разделения действ суть, а тойжде есть Бог, действуяй вся во всех. Конец понедельнику. (за\ч 151) 7 Комуждо же**{Ноемвриа 17, святому григорию: Братие, комуждо**} дается явление Духа на пользу. 8 Овому бо Духом дается слово премудрости: (л. 120) иному же слово разума, о томже Дусе: 9 Другому же вера, темже Духом: иному же дарования исцелений, о томже Дусе. 10 Другому же действия сил, иному же Пророчество, другому же разсуждения духовом, иному же роди языков, другому же сказания языков. 11 Вся же сия действует един и тойжде Дух, разделяя властию коемуждо, якоже хощет. Конец святому. (за\ч 152) 12 Якоже бо тело*{Во вторник 9 недели: Братие, якоже тело*} едино есть, и уды имать многи: вси же уды единаго тела, мнози суще, едино суть тело, тако и Христос. 13 Ибо единем Духом мы вси во едино тело Крестихомся, аще иудеи, аще еллини, или раби, или свободни: и вси единем Духом напоихомся. 14 Ибо тело несть един уд, но мнози. 15 Аще речет нога, яко несмь рука, несмь от тела: еда сего ради несть от тела? 16 И аще речет ухо, яко несмь око, несмь от тела: еда сего ради несть от тела? аще все тело око, где слух? 17 Аще же все слух, где ухание? 18 Ныне же положи Бог уды, единаго коегождо их в телеси, якоже изволи. 19 Аще ли быша вси един уд, где тело? 20 Ныне же мнози убо удове, едино же тело. 21 Не может же око рещи руце: не требе ми еси. или паки глава ногама, не требе ми есте. 22 Но много (л. 120 об.) паче мнящиися уди тела немощнейши быти, нужнейши суть: 23 И ихже мним безчестнейших быти тела, сим честь множайшую прилагаем: 24 И неблагообразнии наши, благообразие множайше имут: а благообразнии наши, не требе имут. но Бог раствори тело, худейшему большу дав честь: 25 Да не будет распри в телеси. но @да тожде в себе@{@ да равно един о другом@} пекутся уди. 26 И аще страждет един уд, с ним страждут вси уди: аще ли же славится един уд, с ним радуются вси уди. Конец вторнику. (за\ч 153) 27 Вы же есте*{Святым безсребреником: Братие, вы есте*} тело Христово, и уди от части. 28 И овы убо положи Бог в Церкви, первее апостолы, второе Пророки, третие учители: потомже силы, таже дарования исцелений, заступления, правления, роди языков: 29 Еда вси апостоли? еда вси Пророцы? еда вси учители? еда вси силы? 30 Еда вси дарования имут исцелений? еда вси языки глаголют? еда вси сказуют? 31 Ревнуйте же дарований больших: и еще по превосхождению путь вам показую. Глава третиянадесять. [1] с\х 1 Аще языки человеческими глаголю и ангельскими, любве же не имам, бых [яко] медь звенящи, или кимвал звяцаяй. 2 И аще имам пророчество, и вем тайны вся, и (л. 121) весь разум: и аще имам всю веру, яко и горы преставляти, любве же не имам, ничтоже есмь. 3 И аще раздам вся имения моя, и аще предам тело мое во еже сжещи е, любве же не имам, никая польза ми есть. (за\ч 154) 4 Любы*{В среду 9-я недели: Братие, любы*} долготерпит, милосердствует: любы не завидит: любы не превозносится, не гордится: 5 Ни безчинствует, не ищет своя си, не раздражается, не мыслит зла: 6 Не радуется о неправде, радуется же о истине: 7 Вся @любит@{@ покрывает @}, всему веру емлет, вся уповает, вся терпит: 8 Любы николиже отпадает, Конец святым. аще же пророчествия упразднятся, аще ли языцы умолкнут, аще разум испразднится. 9 Отчасти бо разумеваем, и от части пророчествуем. 10 Егда же приидет совершенное, тогда еже от части, упразднится. (за\ч) 11 Егда бех**{Кирику и иулитте: Братие, егда бех**} мл\днец, яко мл\днец глаголах, яко младенец мудрствовах, яко младенец смышлях: егда же бых муж, отвергох мл\днческая. 12 Видим бо ныне якоже зерцалом в гадании тогда же лицем к лицу: ныне разумею от части тогда же познаю, якоже и познан бых. 13 Ныне же пребывают вера, надежда, любы, три сия: больши же сих, любы. (л. 121 об.) Глава четвертаянадесять. с\х 1 Держитеся любве: ревнуйте же духовным, паче же да пророчествуете. 2 Глаголяй бо языки, не человеком глаголет, но Богу: никтоже бо слышит, Духом же глаголет тайны. 3 Пророчествуяй же, человеком глаголет созидание, и утешение, и утверждение. [2] 4 Глаголяй бо языки, себе зиждет: а пророчествуяй, Церковь зиждет. 5 Хощу же всех вас глаголати языки, паче же да прорицаете: болий бо пророчествуяй, нежели глаголяй языки, разве аще кто сказует, да Церковь созидание приемлет. Конец среде и кирику. (за\ч 155) 6 Ныне же братие, аще*{В четверток 9-я недели: Братие, аще*} прииду к вам языки глаголя, кую вам пользу сотворю, аще вам не глаголю или во откровении, или в разуме, или в пророчествии, или в научении? 7 Обаче бездушная глас дающая, аще сопель, аще гусли, аще разнствия писканием не дадят, како разумно будет пискание, или гудение? 8 Ибо аще безвестен глас труба даст, кто уготовится на брань? 9 Тако и вы аще неблагоразумно слово дадите языком, како уразумеется глаголемое, будете бо в воздух глаголюще. 10 Толики убо, аще ключится, роди гласов суть в мире, и ни един их (л. 122) безгласен. 11 Аще убо не увем силы гласа, буду глаголющему иноязычник: и глаголющий, мне иноязычник. 12 Тако и вы, понеже ревнители есте Духовом, яже к созданию Церкве @просите@{@ ищите @}, да избыточествуете. 13 Темже глаголяй языком, да молится, да сказует. 14 Аще бо молюся языком, Дух мой молится, а ум мой без плода есть. 15 Что убо есть? помолюся Духом, помолюся же и умом: воспою Духом, воспою же и умом. 16 Понеже аще Благословиши Духом, исполняяй место невежды, како речет, аминь, по твоему благодарению: понеже не весть, что глаголеши. 17 Ты убо добре Благодариши: но другий не созидается. 18 Благодарю Бога моего, паче всех вас языки глаголя: 19 Но в Церкви хощу пять словес умом моим глаголати, да и ины пользую, нежели тмы словес языком. Конец четвертку. (за\ч 156) 20 Братие, не дети*{В субботу 17-ю: Братие, не дети*} бывайте умы, но злобою младенствуйте, умы же совершени бывайте. 21 В законе пишет: яко иными языки, и устны иными возглаголю людем сим: и ни тако послушают мене, глаголет Господь. 22 Темже языцы в знамение суть, не верующим, но неверным: а пророчество, не неверным, но верующим. 23 Аще убо снидется Церковь вся вкупе, и вси языки глаголют: внидут же и неразумивии, или (л. 122) невернии, не рекут ли, яко беснуетеся: 24 Аще же вси пророчествуют, внидет же некий неверен, или невежда: обличается всеми, и истязуется от всех. (ср\де) 25 И сице тайная сердца его явлена бывают: и тако пад ниц, поклонится Богови, возвещая, яко воистинну Бог с вами есть. Конец субботе. (за\ч 157) 26 Что убо есть братие? егда сходитеся,*{В пяток 9-я недели: Братие, егда сходитеся,*} кождо вас _псалом имать, учение имать, язык имать, откровение имать, сказание имать: вся же к созданию да бывают. 27 Аще языком кто глаголет, по двема, или множае по трием, и по части, и един да сказует. 28 Аще ли не будет сказатель, да молчит в Церкви, себе же да глаголет и Богови. 29 Пророцы же два или трие да глаголют, и друзии да разсуждают. 30 Аще ли иному открыется седящу, первый да молчит. 31 Можете бо вси по единому пророчествовати, да вси учатся, и вси утешаются. 32 И дуси пророчестии, пророком повинуются. 33 Несть бо нестроения Бог, но мира, яко во всех Церквах святых. 34 Жены ваша в Церквах да молчат, не повелеся бо им глаголати, но повиноватися, якоже и закон глаголет. 35 Аще ли чесому научитися хотят, в дому своих мужей да вопрошают: срамно бо есть жене в Церкви глаголати. 36 Или от вас слово Божие (л. 123) изыде? или в вас единых достиже? 37 Аще кто мнится пророк быти или духовен, да разумеет, яже пишу вам, зане Господни суть заповеди. 38 Аще ли кто не разумеет, да не разумевает. 39 Темже, братие моя, ревнуйте еже пророчествовати: и еже глаголати языки не возбраняйте. 40 Вся же благообразно и по чину да бывают. Конец пятку. Глава пятаянадесять. (за\ч 158) [9] с\х 1 Сказую же вам братие,*{Неделя 12: Братие, сказую вам*} благовествование, еже благовестих вам, еже и приясте, в немже и стоите: 2 Имже и спасаетеся, кацем словом благовестих вам, аще содержите, разве аще не всуе веровасте. 3 Предах бо вам исперва, еже и приях, яко Христос умре грех наших ради, по писанием, 4 И яко погребен бысть, и яко воста в третий день, по писанием. 5 И яко явися кифе, таже единонадесятим. 6 Потом же явися боле пяти сот братиям единою, от нихже множайшии пребывают доселе, нецыи же и почиша. 7 Потом же явися иакову: таже апостолом всем. 8 Последи же всех, яко некоему извергу, явися и мне. 9 Аз бо есмь мний апостолов, иже несмь достоин нарещися апостол, зане гоних Церковь Божию. 10 Благодатию же (л. 123 об.) Божиею есмь, еже есмь, и Благодать его, яже во мне, не тща бысть, но паче всех их потрудихся: не аз же, но благодать Божия, яже со мною. 11 Аще убо аз, аще ли они, тако проповедуем, и тако веровасте. Конец недели. (за\ч 159) [1] 12 Аще же Христос*{В понедельник 10-я недели: Братие, аще Христос*} проповедуется, яко из мертвых воста, како глаголют нецыи в вас, яко воскресния мертвых несть? 13 И аще воскресния мертвых несть, то ни Христос воста. 14 Аще же Христос не воста, тще убо проповедание наше, тща же и вера ваша. 15 Обретаемся же и лжесвидетеле Божии, яко послушествовахом на Бога, яко воскреси Христа, егоже не воскреси, аще убо мертвии не востают: 16 Аще бо мертвии не востают, то ни Христос воста. 17 Аще же Христос не воста, суетна вера ваша, еще есте во гресех ваших. 18 Убо и умершии о Христе, погибоша. 19 И аще в животе сем уповающе есмы во Христа точию, окаяннейши всех человек есмы. Конец понедельнику. (за\ч 160) 20 Ныне же Христос**{В память умерших: Братие, Христос**} воста от мертвых, начаток умершим бысть: 21 Понеже бо человеком смерть бысть, и человеком воскресение мертвых. 22 Якоже бо о адаме вси умирают, такожде и о Христе вси оживут. 23 Кождо же во своем чину: (л. 124) начаток Христос, потом же Христу веровавшии, в пришествии его. 24 Таже кончина, егда предаст Царство Богу и отцу: егда испразднит всяко начальство, и всяку власть и силу. 25 Подобает бо ему царствовати, дондеже положит вся враги под ногама своима. 26 Последний же враг испразднится смерть: 27 Вся бо покори под нозе его, внегда же рещи, яко вся покорена суть ему, яве яко разве покоршаго ему вся. 28 Егда же покорит ему всяческая, тогда и сам Сын покорится покоршему ему всяческая, да будет Бог всяческая во всех. Конец мертвым. 29 Понеже (за\ч 161) Что сотворят*{Во вторник 10-я недели: Братие, что сотворят*} крестящиися мертвых ради? аще отнюд мертвии не востают, что и крещаются мертвых ради? 30 Почто же и мы беды приемлем на всяк час? 31 По вся дни умираю, тако ми ваша похвала братие, юже имам о Христе Иисусе Господе нашем. 32 Аще бо по человеку со зверем боряхся в ефесе, кая ми польза, аще мертвии не востают? да ямы и пием, утре бо умрем. 33 Не льститеся: тлят обычаи благи беседы злы. 34 Истрезвитеся праведно, и не согрешайте: неведение бо Божие нецыи имут: к сраму вам глаголю. [2] 35 Но речет некто: како востанут мертвии? коим же телом приидут? 36 Безумне, (л. 124 об.) ты еже сееши, не оживет, аще не умрет. 37 И еже сееши, не тело будущее сееши, но голо зерно, аще случится, пшеницы или иного от прочих: 38 Бог же дает ему тело, якоже восхощет, и коемуждо семени свое тело. Конец вторнику. (за\ч 162) 39 Не всяка плоть,*{В субботу 18-ю: Братие, не всяка плоть*} та же плоть: но ина убо плоть человеком, ина же плоть скотом, ина же рыбам, ина же птицам. 40 И телеса Небесная, и телеса земная: но ина убо Небесным слава, и ина земным. 41 Ина слава солнцу, и ина слава луне, и ина слава звездам: звезда бо от звезды разнствует во славе. 42 Такожде и воскресение мертвых: сеется в тление, востает в нетлении: 43 Сеется не в честь, востает в славе: сеется в немощи, востает в силе: 44 Сеется тело душевное, востает тело Духовное: есть тело душевное, и есть тело Духовное. 45 Тако и писано есть: бысть первый человек адам в душу живу, последний адам, в Дух животворящ. Конец субботе. 46 Но не прежде Духовный, но душевный: потом же Духовный. (за\ч 163) 47 Первый**{В память умерших: Братие, первый**} человек от земли перстен, вторый человек Господь с Небесе. 48 Яков перстный, такови и перстнии: и яков Небесный, тацы же и Небеснии. (л. 125) 49 И якоже облекохомся во образ перстнаго, да облечемся и во образ Небеснаго. 50 Сие же глаголю, братие, яко плоть и кровь Царствия Божия наследити не могут, ниже тление нетления наследствует. [3] 51 Се тайну вам глаголю: вси бо не успнем, вси же изменимся, 52 Вскоре, во мгновении ока, в последней трубе: вострубит бо, и мертвии востанут нетленни, и мы изменимся. 53 Подобает бо тленному сему облещися в нетление, и мертвенному сему облещися в безсмертие. 54 Егда же тленное сие облечется в нетление, и смертное сие облечется в безсмертие, тогда будет слово написанное: пожерта бысть смерть победою. (че\к) 55 Где ти смерте, жало? где ти аде, победа? 56 Жало же смерти, грех: сила же греха, закон. 57 Богу же благодарение, давшему нам победу Господем нашим Иисус Христом. Конец мертвым. (за\ч 164) 58 Темже, братие моя возлюбленная, тверди бывайте,*{В субботу 19- ю: Братие, тверди бывайте,*} непоступни, избыточествующе в деле Господни всегда: ведяще, яко труд ваш несть тощ пред Господем. Глава шестаянадесять. с\х 1 О милостыни же, яже ко святым, якоже устроих Церквам галатийским, тако и вы сотворяйте. 2 По единей от суббот (л. 125 об.) кождо вас да полагает у себе, сохраняя еже аще что Благо поспешится: да не егда прииду, тогда собрания бывают. 3 Егда же прииду, ихже аще искусите посланьми, сих послю отнести благодать вашу во иерусалим. Конец субботе. (за\ч 165) 4 Аще же*{В среду 10- я недели: Братие, аще*} достойно будет и мне ити, со мною пойдут. 5 Прииду же к вам, егда македонию прейду: [македонию бо прохожду.] 6 У вас же, аще случится мне, пребуду, или и озимею, да вы мя проводите, аможе аще поиду. 7 Не хощу бо вас ныне в мимохождении видети: уповаю же время некое пребыти у вас, аще Господь повелит. 8 Пребуду же во ефесе до пентикостии: 9 Дверь бо ми отверзся велика и поспешна, и сопротивнии мнози. 10 Аще же приидет тимофей, блюдите, да без страха будет у вас: дело бо Господне делает, якоже и аз. 11 Да никтоже убо его уничижит: проводите же его с миром, да приидет ко мне: жду бо его с братиею. 12 О аполлосе же брате, много молих его, да приидет к вам с братиею: и всяко не бе воля, да ныне приидет: приидет же, егда упразднится. Конец среде. (за\ч 166) 13 Бодрствуйте,**{Неделя 13: Братие, бодрствуйте,**} стойте в вере, мужайтеся утверждайтеся. 14 Вся вам любовию да бывают. (л. 126) 15 Молю же вы братие: весте дом стефанинов, яко есть начаток ахаии, и в служение святым учиниша себе: 16 Да и вы повинуйтеся таковым, и всякому споспешствующу и труждающуся. 17 Возрадовахся же о пришествии стефанинове, и фуртунатове, и ахаикове, яко ваше лишение сии исполниша. 18 Покоиша бо мой дух и ваш: познавайте убо таковыя. 19 Целуют вы Церкви асийския. целуют вы о Господе много акила и прискилла, с домашнею их Церковию. 20 Целуют вы братия вся. целуйте другдруга лобзанием святым. 21 Целование моею рукою павлею. 22 Аще кто не любит Господа Иисуса Христа, да будет проклят: @маран афа@{@Господь наш прииде@ [сирский глас].}. 23 Благодать Господа нашего Иисуса Христа с вами: 24 И любы моя со всеми вами, о Христе Иисусе, аминь. Конец недели. Конец перваго послания к коринфяном, еже написася от филипп, стефанином, и фуртунатом, и ахаиком, и тимофеем: имать в себе глав, 16: зачал Церковных 47: стихов 437: знаменаний черных, 9: последующих же им червленых, 15.