<::лат> OCR: <::рус> Библиотека святоотеческой литературы <::лат> http://orthlиb.ru <::слав> (л. 84 об.) Знаменания к римляном епистолии павловы. [1] Ев\гльское учение, о сущих вне Благодати Христовы, и о сущих во Благодати: и о уповании и житии Духовнем. [2] Первее убо по предписанию о суде сущем на языки, и не хранящих естественных. [3] О суде сущем на Израиля, не хранящем законных. [4] О предвладычестве Израилеве, не улучающем обетования. [5] О Благодати, еюже токмо человецы оправдани бывают: и не по роду различно, но по дару Божию, равночестно по авраамлю образу. [6] О уповании щадимем. [7] О ввождении сущем на спасение наше человека Иисуса Христа, за отпадшаго исперва земнаго адама. [8] О вере сущей должне, и о деянии блазе. [9] О совокуплении благодатне, и житии. [10] О законе осуждении греха ради. [11] О творящих похоти с человеческим естеством, и не сильное беззаконное снятие. [12] О совлечении плотских страстей, и согласии еже ко святому Духу. [13] О совокуплении и о соблюдаемеи славе святым. [14] О должней любви к Богу. [15] О отпадении Израиля отринутаго, и о звании истиннаго избраннаго, вкупе со языки. [16] Яко по неверствию отпадение, за оставление еже в невежствии, и о неключимем проповедании. (л. 85) [17] О разуме, имже отвержени быша, яко да последнии приидут ревностию предпочтеных язык, и соучиненых к верному Израилю. [18] Учение о добродетели, яже к Богу и человеком. [1] В немже и о единомыслии, еже к себе. [2] О службе Божии. [3] О незлобстве к противным. [4] О покорении владычествиям. [5] О целомудрии и кротости. [6] О несварне совести, брашен ради и дне. [7] О подобии Христова незлобия. [19] О службе его, бывшей на востоце и на западе. [1] В немже о милостыни начинает. Сказание, еже к римляном послания святаго апостола павла. (нл\дя) Сие посылает от коринфа, не у еще видев римляны слыша же о них, и желая видети их: и первее убо хвалит веру их, возвещаему видя всюду. Потом же сказует многажды себе восхотевша ити в рим, желанием еже научити и утвердити их: и убо не возможе ити. И тако прочее учительно послание творит о звании язык: и яко обрезание до времене бысть, и ныне преста: и яко Христом разрешися грехопадение адамово, сень закона прейде. И убо звание языков лепотно быти устрояет, сице сказав, всем человеком естеством всаждену быти закону: и всем без учения естества и от (л. 85 об.) самаго создания мощи познавати Бога. Темже и в лепоту виновны творит еллины, яко убо Богу обявльшу им от сотворения мира, еже о себе разум, и присносущныя силы своея, еже есть слово его: о немже и имже вся сотворил. Онех же не познавших его от тварей быти Бога сих содетеля, творения же его обоготворивша, и твари паче, нежели тому послуживша. Виновны же творит иудеи, яко не сохранивша закона, но и паче преступлением закона Бога безчествовавша. И тако обоим, иудеем же и еллином, большема заключает, и обличает о беззаконии, да покажет, яко равни бывше грешницы, равне вси, яко повинни, избавителю молитися. Егда же благодать и избавление равно иудеем бысть и языком, в лепоту и призвание бысть языков. Званию же языков бывшу, от нужди преста обрезание и законная сень. Аврам бо, рече, не во обрезании, но прежде обрезания оправдався, преименовася именем авраам, яко отец многих языков хотяше быти по вере, яже в необрезании. прият же по оправдании и обрезание плоти, да знамение будет раждаемым от него по плоти. Престати же обрезанию, егда языцы будут чада авраамля, начинающим ходити по вере авраамове, в нейже оправдася егда бе в необрезании: сих бо ради преименовася авраам. По нужди же пришедшим знаменаным, престати знаменаному. Аще убо языцы нудятся обрезатися, да престанут и от имене авраамова, и да именуется аврам. Аще ли же авраам от Бога преименовася, не подобает обрезатися языком, но ниже тем, иже еще по плоти иудеем, да будет имя известно, и отец многим языком зовется. Ибо не требе имать прочее кто обрезатися, доволен верою авраамлею, ниже иныя законныя сени: не от сих бо, но от веры оправдается всяк, якоже и авраам. Сия сице устроив, сказует паки, яко инако не будет избавления и (л. 86) Благодати Израилеви и языком, аще не разрешится древний грех адамов, иже на всех бывший: инем же сему не мощи очиститися, рече, точию Иисус Христом Сыном Божиим, имже и из начала клятва бысть: не бо мощно бяше иному разрьшити прегрешение. Таже пишет: яко инако сие не будет, аще не в тело облечется Сын Божий, и будет человек: да сие привнес за всех, вся свободит от смерти, и якоже единым человеком грех в мир вниде, такоже единым человеком Иисус Христом Благодать будет. И прочее яко добр строитель, иудеи убо утешает, яко не преступницы будете закона, аще во Христа веруете: сущим же от язык повелевает, не возвышатися на Израиля, но ведети, зане яко ветви на корени, сице на онех присадишася. По сих же утешительна словеса во обычаех наказав, скончавает послание. (л. 86 об.) К РИМЛЯНОМ ПОСЛАНИЕ СВЯТАГО АПОСТОЛА ПАВЛА. Глава первая. (за\ч 79) [1] с\х 1 Павел*{Во вторник 1 недели по 50-це: Павел*} раб Иисус Христов, зван апостол, избран в благовестие Божие, 2 Еже прежде обеща пророки своими в писаниих святых, 3 О Сыне своем, бывшем от семене Давидова по плоти, 4 Нареченнем Сыне Божии в силе, по Духу святыни, из воскресния от мертвых Иисуса Христа Господа нашего, 5 Имже прияхом Благодать и апостольство в послушание веры во всех языцех, о имени его: 6 В нихже есте и вы звани Иисусу Христу. 7 Всем сущим в риме, возлюбленным Богу, званным святым: (за\ч) Благодать**{В субботу 1 по 50- це: Братие, благодать**} вам и мир от Бога отца нашего, и Господа Иисуса Христа. (л. 87) Преступи вторнику. 8 Первое убо Благодарю Бога моего Иисусом Христом о всех вас, яко вера ваша возвещается во всем мире. 9 Свидетель бо ми есть Бог, емуже служу Духом моим, во благовествовании Сына его, яко безпрестани память о вас творю: 10 Всегда в молитвах моих моляся, аще убо когда поспешен буду волею Божиею приити к вам. 11 Желаю бо видети вас, да некое подам вам дарование Духовное ко утвержению вашему: 12 Сие же есть соутешитися в вас верою общею вашею же и моею. Конец субботе. Чти вторнику: 13 Не хощу же не ведети вам братие, яко множицею восхотех приити к вам, и возбранен бых доселе, да некий плод имею и в вас, якоже и в прочих языцех. 14 Еллином же и варваром, мудрым же и неразумным должен есмь. 15 Тако есть еже по моему усердию, и вам сущим в риме благовестити. 16 Не стыжуся бо Благовествованием Христовым: сила бо Божия есть во спасение всякому верующему, иудеови же прежде, и еллину. 17 Правда бо Божия в нем является от веры в веру, якоже есть писано: праведный же от веры жив будет. Конец вторнику. (за\ч 80) [2] 18 Открывается бо*{В среду 1 недели: Братие, открывается*} гнев Божий с Небесе, на всякое нечестие и неправду человеческую, содержащих (л. 87 об.) истину в неправде. 19 Занеже @разумное Божие@{@еже возможно разумети о Бозе@}, яве есть в них: Бог бо явил есть им. 20 Невидимая бо его, от создания мира, твореньми помышляема, видима суть, и присносущная сила его и Божество: во еже быти им безответным. 21 Занеже разумевше Бога, не яко Бога прославиша, или Благодариша: но осуетишася помышлении своими, и омрачися неразумное их сердце. 22 Глаголющеся быти мудры, обюродеша: 23 И измениша славу нетленнаго Бога, в подобие образа тленна человека, и птиц, и четвероног, и гад. 24 Темже и предаде их Бог в похотех сердец их в нечистоту, во еже сквернитися телесем их в себе самех. 25 Иже премениша истину Божию во лжу, и почтоша и послужиша твари паче творца, иже есть благословен во веки, аминь. 26 Сего ради предаде их Бог в страсти безчестия: и жены бо их измениша естественную подобу в презестественную. 27 Такожде и мужи, оставльше естественную подобу женска пола, разжегошася похотию своею друг на друга, мужи на мужех студ содевающе, и возмездие еже подобаше прелести их, в себе восприемлюще. Конец среде. (за\ч 81) 28 И якоже*{В четверток 1 недели: Братие, якоже*} не искусиша имети Бога в разуме, сего ради предаде я Бог в неискусен ум, творити неподобная: 29 Исполнены всякия неправды, (л. 88) блужения, лукавства, лихоимания, злобы: исполнены зависти, убийства, рвения, льсти, злонравия: шепотники, 30 Клеветники, богомерзски, досадители, величавы, горды, обретатели злых, родителем непокоривы, 31 Неразумны, непримирительны, нелюбовны, неклятвохранительны, немилостивны. 32 Нецыи же и оправдание Божие разумевше, яко таковая творящии достойни смерти суть, не точию сами творят, но и соизволяют творящим. Глава вторая. с\х 1 Сего ради безответен еси, _о человече, всяк судяй: имже бо судом судиши друга, себе осуждаеши: таяжде бо твориши судяй. 2 Вемы же, яко суд Божий есть поистинне на творящих таковая. 3 Помышляеши ли же сия, _о человече! судяй таковая творящим, и творя сам. таяжде, яко ты избежиши ли суда Божия? 4 Или о богатстве Благости его, и кротости и долготерпении нерадиши, неведый, яко Благость Божия на покаяние тя ведет? 5 По жестокости же твоей, и непокаянному сердцу, собираеши себе гнев в день гнева, и откровения праведнаго суда Божия. 6 Иже воздаст коемуждо по делом его: 7 Овым убо по терпению дела Благаго, славу и честь и нетление ищущим, живот вечный: 8 А иже по рвению противляющимся убо истине, повинующимся же неправде, ярость и гнев. (л. 88 об.) 9 Скорбь и теснота на всяку душу человека творящаго злое, иудеа же прежде и еллина. Конец четвертку. (за\ч) [3] 10 Слава же*{Неделя вторая: Братие, слава*} и честь и мир всякому делающему Благое, иудееви же прежде и еллину. 11 Несть бо на лица зрения у Бога. 12 Елицы бо @беззаконно@{@без закона@} согрешиша, @беззаконно@{@без закона@} и погибнут: и елицы в законе согрешиша, законом суд приимут. 13 Не слышателие бо закона праведни пред Богом, но творцы закона, сии оправдятся. (за\ч 82) 14 Егда бо**{В пяток 1 недели: Братие, егда**} языцы не имуще закона, естеством законная творят: сии закона не имуще, сами себе суть закон: 15 Иже являют дело законное написано в сердцах своих, спослушествующи им совести, и между собою помыслом, осуждающим или отвещающим, 16 В день егда судит Бог тайная человеком, по Благовестию моему, Иисусом Христом. Конец недели. 17 Се ты иудей именуешися, и почиваеши на законе, и хвалишися о Бозе: 18 И разумееши волю, и разсуждаеши лучшая, научаемь от закона. 19 Уповая же себе вожда быти слепым, света сущим во тме, 20 Наказателя безумным, учителя младенцем, имуща образ разума и истины в законе: (л. 89) 21 Научая убо инаго, себе ли не учиши? 22 Проповедая не красти, крадеши? глаголя не прелюбы творити, прелюбы твориши? гнушаяся идол, святая крадеши, 23 Иже в законе хвалишися, преступлением закона Бога безчествуеши. 24 Имя бо Божие вами хулится во языцех, якоже есть писано. 25 Обрезание убо пользует, аще закон твориши: аще же закона преступник еси, обрезание твое необрезание бысть. 26 Аще убо необрезание оправдание закона сохранит, не необрезание ли его во обрезание вменится, 27 И осудит еже от естества необрезание закон совершающее, тебе, иже писанием и обрезанием суща преступника закона. (за\ч 83) 28 Не бо иже*{В понедельник 2 недели: Братие, не иже*} яве иудей есть, ни еже яве во плоти, обрезание: 29 Но иже втайне иудей, и обрезание сердца Духом, а не писанием: емуже похвала не от человек, но от Бога. Конец пятку. Глава третия. [4] с\х 1 Что @убо лишше иудею@{@кое убо преимущество иудеа@}? или кая польза обрезания? 2 Много по всякому образу: *первее*{*наипаче*} убо, яко вверена быша им словеса Божия. 3 Что бо, аще не вероваша нецыи? еда убо неверствие их веру Божию упразднит? 4 Да не будет: да будет же Бог истинен, всяк же (л. 89 об.) человек лож, якоже есть писано: яко да оправдишися во словесех твоих, и победиши внегда судити ти. 5 Аще ли неправда наша Божию правду составляет, что речем? еда ли неправеден Бог, наносяй гнев? [по человеку глаголю,] 6 Да не будет: понеже како судити имать Бог миру? 7 Аще убо истина Божия в моей лжи избыточествова в славу его: что еще и аз яко грешник осуждаюся? 8 И не [якоже хулимся, и якоже глаголют нецыи нас глаголати:] яко сотворим злая, да приидут благая: ихже суд праведен есть. [5] 9 Что убо? преимеем ли? никакоже: @предукорихом бо@{@прежде бо обвинени есмы@} иудеи же и еллины *вся*{*вси*} под грехом быти, 10 Якоже есть писано: яко несть праведен никтоже. 11 Несть разумеваяй, и несть взыскаяй Бога. 12 Вси уклонишася, вкупе непотребни быша: несть творяй Благостыню, несть даже до единаго. 13 Гроб отверст гортань их, языки своими льщаху: яд аспиден под устнами их: 14 Ихже уста клятвы и горести полна суть. 15 Скоры ноги их пролияти кровь: 16 Сокрушение и озлобление на путех их: 17 И пути мирнаго не познаша. (пн\де) 18 Несть страха Божия пред очима их. Конец понедельнику. (за\ч 84) 19 Вемы же,*{В субботу 2-ю: Братие, вемы,*} яко елика закон глаголет, сущим в законе глаголет: да всяка уста заградятся, и повинен будет весь мир Богови. 20 Зане от дел (л. 90) закона не оправдится всяка плоть пред ним: законом бо познание греха. 21 Ныне же кроме закона правда Божия явися, свидетельствуема от закона и пророк: 22 Правда же Божия верою Иисус Христовою, во вся и на всех верующих. несть бо разнствия: 23 Вси бо согрешиша, и лишени суть славы Божия, 24 Оправдаеми туне Благодатию его, избавлением еже о Христе Иисусе. 25 Егоже предположи Бог очищение верою в крови его, в явление правды своея, за отпущение прежде бывших грехов: 26 В долготерпении Божии, и в показание правды его в нынешнее время, во еже быти ему праведну, и оправдающу сущаго от веры Иисусовы. Конец субботе. 27 Где убо похвала? отгнася. которым законом? делы ли? ни, но законом веры. (за\ч 85) 28 Мыслим убо*{В субботу 3-ю: Братие, мыслим*} верою оправдатися человеку, без дел закона. 29 Или иудеев Бог токмо, а не и языков? ей и языков. 30 Понеже един Бог, иже оправдит обрезание от веры, и необрезание верою. 31 Закон ли убо разоряем верою? да не будет: но закон утверждаем. Глава четвертая. с\х 1 Что убо речем, авраама отца нашего обрести по плоти? 2 Аще бо авраам от дел оправдася, имать похвалу, но не у Бога. (л. 90 об.) 3 Что бо писание глаголет? верова же авраам Богови, и вменися ему в правду. Конец субботе. (за\ч 86) 4 Делающему же*{Во вторник 2 недели: Братие, делающему*} мзда не вменяется по Благодати, но по долгу. 5 А не делающему, верующему же во оправдающаго нечестива, вменяется вера его в правду. 6 Якоже и Давид глаголет блаженство человека, емуже вменяет Бог правду без дел закона: 7 Блажени, ихже отпустишася беззакония, и ихже прикрышася греси. 8 Блажен муж, емуже не вменит Господь греха. 9 Блаженство убо сие, на обрезание ли, или на необрезание? глаголем бо: яко вменися аврааму вера в правду. 10 Како убо вменися ему? во обрезании ли сущу, или в необрезании? не во обрезании, но в необрезании. 11 И знамение прият обрезания, печать правды веры, яже в необрезании: яко быти ему отцу всех верующих в необрезании, во еже вменитися и тем в правду: 12 И отцу обрезания не сущим точию от обрезания, но и ходящим в стопах веры, яже в необрезании отца нашего авраама. Конец вторнику. (за\ч 87) 13 Не законом бо**{В среду 2 недели: Братие, не законом**} обетование аврааму, или семени его, еже быти ему наследнику мирови, (л. 91) но правдою веры. 14 Аще бо сущии от закона наследницы: испразднися вера, и разорися обетование. 15 Закон бо гнев соделовает: идеже бо несть закона, ту ни преступления. 16 Сего ради от веры, да по Благодати, во еже быти известну обетованию всему семени, не точию сущему от закона: но и сущему от веры авраамовы, иже есть отец всем нам. 17 Якоже есть писано: яко отца многим языком положих тя, прямо емуже верова Богу, животворящему мертвыя, и нарицающу не сущая яко сущая. 18 Иже паче упования во упование верова, во еже быти ему отцу многим языком, по реченному: тако будет семя твое. 19 И не изнемог верою, ни усмотре своея плоти уже умерщвленыя, столетен негде сый, и мертвости ложесн сарриных. 20 Во обетовании же Божии не усумнеся неверованием: но возможе верою, дав славу Богови. 21 И известен быв, яко еже обеща, силен есть и сотворити. 22 Темже и вменися ему в правду. 23 Не писано же бысть за того единаго точию, яко вменися ему: 24 Но и за ны, имже хощет вменитися, верующим во воскресившаго Иисуса Христа Господа нашего из мертвых, 25 Иже предан бысть за прегрешения наша, и воста за оправдание наше. Конец среде. (л. 91 об.) Глава пятая. (за\ч 88) [6] с\х 1 Оправдившеся убо*{Неделя 3: Братие, оправдившеся*} верою, мир имамы к Богу Господем нашим Иисус Христом. 2 Имже и приведение обретохом верою во благодать сию, в нейже стоим, и хвалимся упованием славы Божия. 3 Не точию же, но и хвалимся в скорбех, ведяще, яко скорбь терпение соделовает: 4 Терпение же искусство, искусство же упование: 5 Упование же не посрамит: яко любы Божия излияся в сердца наша, Духом святым данным нам. (за\ч) 6 Еще бо Христос**{В 3 час пятка великаго: Братие, Христос**} сущим нам немощным, по времени за нечестивых умре. 7 Едва бо за праведника кто умрет, за Благаго бо негли кто и дерзнет умрети. 8 Составляет же свою любовь в нас Бог, яко еще грешником сущим нам, Христос за ны умре: 9 Много же убо паче оправдани бывше ныне кровию его, спасемся им от гнева. (за\ч 89) 10 Аще бо***{В четверток 2 недели: Братие, аще***} врази бывше, примирихомся Богу смертию Сына его, множае паче примирившеся, спасемся в животе его. Конец недели. (л. 92) Не точию же, но и хвалимся о Бозе Господем нашим Иисус Христом, имже ныне примирение прияхом. Конец 3-му часу. [7] 12 Сего ради, якоже единем человеком грех в мир вниде, и грехом смерть: и тако смерть во вся человеки вниде, в немже вси согрешиша. 13 До закона бо грех бе в мире: грех же не вменяшеся, не сущу закону. 14 Но царствова смерть от адама даже до моисеа, и над несогрешшими, по подобию преступления адамова, иже есть образ будущаго. 15 Но не якоже прегрешение, тако и дар. аще бо прегрешением единаго мнози умроша: множае паче Благодать Божия и дар, благодатию единаго человека Иисуса Христа, во многих преизлишествова. 16 И не якоже единем согрешшим, дарование: грех бо из единаго во осуждение, дар же от многих прегрешений, во оправдание. Конец четвертку. (за\ч 90) 17 Аще бо единаго*{В пяток 2 недели: Братие, аще единаго*} прегрешением, смерть царствова единем: множае паче избыток благодати, и дар правды приемлюще, в жизни воцарятся единем Иисус Христом. 18 Темже убо якоже единаго прегрешением во вся человеки вниде осуждение: такоже и единаго оправданием во вся человеки вниде оправдание жизни. 19 Якоже бо ослушанием единаго человека грешни быша мнози: сице и (л. 92 об.) послушанием единаго праведни будут мнози. 20 Закон же привниде, да умножится прегрешение: идеже бо умножися грех, преизбыточьствова Благодать. 21 Да якоже царствова грех во смерть, такоже и Благодать воЦарится правдою, в жизнь вечную, Иисус Христом Господем нашим. Глава шестая. с\х 1 Что убо речем? пребудем ли во гресе, да благодать преумножится? да не будет. 2 Иже бо умрохом греху, @како паки оживем о нем@{@како еще жити будем в нем?@}? Конец пятку. (за\ч 91) [8] 3 Или не разумеете, яко елицы*{Во святую и великую субботу, вечер: Братие, елицы*} во Христа Иисуса Крестихомся, в смерть его Крестихомся? 4 Спогребохомся убо ему крещением в смерть: да якоже воста Христос от мертвых славою отчею, тако и мы во обновлении жизни *ходити начнем*{*да ходим*}. 5 Аще бо **сообразни**{**снасаждени**} быхом подобию смерти его, то и воскресению будем. 6 Сие ведяще, яко ветхий наш человек с ним распятся, да упразднится тело греховное, яко ктому не работати нам греху. 7 Умерый бо оправдися от греха. 8 Аще ли умрохом со Христом, веруем, яко и живи будем с ним: 9 Ведяще, яко Христос воста от мертвых, ктому уже не умирает, смерть ему (л. 93) ктому не обладает. 10 Еже бо умре, греху умре единою: а еже живет, Богови живет. (за\ч 92) 11 Такоже и вы помышляйте*{В субботу 4-ю: Братие, помышляйте*} себе, мертвым убо быти греху, живым же Богови, о Христе Иисусе Господе нашем. Конец великой субботе. 12 Да не царствует убо грех в мертвеннем вашем теле, во еже послушати его в похотех его: 13 Ниже представляйте уды ваша оружия неправды греху: но представляйте себе Богови, яко от мертвых живы, и уды ваша оружия правды Богови. 14 Грех бо вами да не обладает: несте бо под законом, но под благодатию. 15 Что убо? согрешим ли, зане несмы под законом, но под Благодатию? да не будет. 16 Не весте ли, яко емуже представляете себе рабы в послушание, раби есте, егоже послушаете, или греха в смерть, или послушания в правду? 17 Благодарим убо Бога, яко бесте раби греху, послушасте же от сердца, воньже и предастеся образ учения. Конец субботе. (за\ч 93) 18 Свобождшеся**{Неделя 4-я: Братие, свобождшеся**} же от греха, поработистеся правде. 19 Человеческо глаголю, за немощь плоти вашея: якоже убо представисте уды ваша рабы (л. 93 об.) нечистоте, и беззаконию в беззаконие: тако ныне представите уды ваша рабы правде во святыню. 20 Егда бо раби бесте греха, свободни бесте от правды. (вто\р) 21 Кий убо тогда иместе плод, о нихже ныне стыдитеся? кончина бо онех, смерть. 22 Ныне же свобождшеся от греха, порабощшеся же Богови, имате плод ваш во святыню, кончину же жизнь вечную. 23 Оброцы бо греха смерть: дарование же Божие, живот вечный, о Христе Иисусе Господе нашем. Конец недели. Глава седмая. (за\ч 94) [9] с\х 1 Или не разумеете братие, [ведущим бо*{В понедельник 3-я недели: Братие, ведущим*} закон глаголю,] яко закон обладает над человеком, во елико время живет? 2 Ибо мужатая жена живу мужу привязана есть законом: аще ли же умрет муж ея, разрешится от закона мужескаго. 3 Темже убо живу сущу мужу, прелюбодейца бывает, аще будет мужеви иному. аще ли умрет муж ея, свободна есть от закона, не быти ей прелюбодейце, бывшей мужу иному. 4 Темже братие моя, и вы умросте закону телом Христовым, во еже быти вам иному, воставшему из мертвых, да плод принесем Богови. 5 Егда бо бехом во плоти, страсти греховныя, яже законом, действоваху во удех (л. 94) наших, во еже плод творити смерти. 6 Ныне же упразднихомся от закона, умерше имже держими бехом: яко работати нам [Богови] во обновлении Духа, а не в ветхости писмене. [10] 7 Что убо речем? закон ли грех? да не будет. но греха не знах, точию законом: похоти же не ведах, аще не закон глаголаше: не похощеши. 8 Вину же прием грех заповедию, содела во мне всяку похоть: без закона бо грех мертв есть. 9 Аз же живях кроме закона иногда: пришедши же заповеди, грех убо оживе, 10 Аз же умрох: и обретеся ми заповедь, яже в живот, сия в смерть. 11 Грех бо вину прием заповедию, прельсти мя, и тою умертви мя. 12 Темже убо закон свят, и заповедь свята, и праведна и блага. 13 Благое ли убо бысть мне смерть? да не будет: но грех, да явится грех, Благим ми содевая смерть: да будет по премногу грешен грех заповедию. Конец понедельнику. (за\ч 95) 14 Вемы бо,*{Во вторник 3 недели: Братие, вемы,*} яко закон духовен есть: аз же плотян есмь, продан под грех. 15 Еже бо содеваю, не разумею: не еже бо хощу, сие творю: но еже ненавижду, то соделоваю. 16 Аще ли еже не хощу, сие творю, хвалю закон яко добр. [11] 17 Ныне же не ктому аз сие содеваю, но живый во мне грех. 18 Вем бо, яко не живет во мне, сиречь (л. 94 об.) в плоти моей, доброе: еже бо хотети, прилежит ми: а еже содеяти доброе, не обретаю. 19 Не еже бо хощу доброе, творю: но еже не хощу злое, сие содеваю. 20 Аще ли еже не хощу аз, сие творю: уже не аз сие творю, но живый во мне грех. 21 Обретаю убо закон, хотящу ми творити доброе, яко мне злое прилежит. 22 Соуслаждаюся бо закону Божию по внутреннему человеку. 23 Вижду же ин закон во удех моих, противу воюющ закону ума моего, и пленяющ мя законом греховным, сущим во удех моих. 24 Окаянен аз человек: кто мя избавит от тела смерти сея? 25 Благодарю Бога моего Иисус Христом Господем нашим. темже убо сам аз умом моим работаю закону Божию, плотию же закону греховному. Глава осмая. с\х 1 Ни едино убо ныне осуждение сущим о Христе Иисусе, не по плоти ходящим, но по духу. (за\ч 96) 2 Закон бо*{Среда 3 недели: Братие, закон*} Духа жизни о Христе Иисусе, свободил мя есть от закона греховнаго и смерти. Конец вторнику. (за\ч) [12] Немощное бо**{Декемвриа 28: Братие, немощное**} закона, в немже немоществоваше плотию, Бог Сына своего посла в подобии плоти (л. 95) греха, и о гресе осуди грех во плоти: 4 Да оправдание закона исполнится в нас, не по плоти ходящих, но по духу. 5 Сущии бо по плоти, плотская мудрствуют: а иже по духу, духовная. 6 Мудрование бо плотское, смерть есть: а мудрование духовное, живот и мир. 7 Зане мудрование плотское, вражда на Бога: закону бо Божию не покоряется, ниже бо может. (за\ч) 8 Сущии же во плоти*{Ианнуариа 4: Братие, сущии во плоти*} Богу угодити не могут. 9 Вы же несте во плоти, но в дусе: понеже Дух Божий живет в вас. Конец декемврию. аще ли кто Духа Христова не имать, сей несть егов. 10 Аще ли Христос в вас, плоть убо мертва греха ради: дух же живет правды ради. 11 Аще ли же Дух воскресившаго Иисуса от мертвых живет в вас, воздвигий Христа из мертвых, оживотворит и мертвенная телеса ваша, живущим Духом его в вас. 12 Темже убо братие, должни есмы не плоти, еже по плоти жити. 13 Аще бо по плоти живете, имате умрети: аще ли Духом деяния плотская умерщвляете, живи будете. Конец среде. (за\ч 97) 14 Елицы бо**{Суббота 5 недели: Братие, елицы**} Духом Божиим водятся, сии суть Сынове Божии. Конец ианнуарию. (л. 95 об.) 15 Не приясте бо Духа работы паки в боязнь: но приясте Дух сыноположения, о немже вопием: авва отче. 16 Самый Дух послушествует Духови нашему, яко есмы чада Божия. 17 Аще же чада, и наследницы: наследницы убо Богу, снаследницы же Христу: понеже с ним страждем, да и с ним прославимся. [13] 18 Непщую бо, яко недостойны страсти нынешняго времене к хотящей славе явитися в нас. 19 Чаяние бо твари, откровение Сынов Божиих чает. 20 Суете бо тварь повинуся не волею, но за повинувшаго ю на уповании, 21 Яко и сама тварь свободится от работы истления, в свободу славы чад Божиих. Конец субботе. (за\ч 98) 22 Вемы бо,*{В четверток 3 недели: Братие, вемы,*} яко вся тварь с нами совоздыхает, и сболезнует даже до ныне: 23 Не точию же, но и сами начаток Духа имуще, и мы сами в себе воздыхаем, всыновления чающе, избавления телу нашему. 24 Упованием бо спасохомся. упование же видимое, несть упование: еже бо видит кто, что и уповает? 25 Аще ли егоже не видим, надеемся, терпением ждем. 26 Сице же и Дух способствует нам в немощех наших: о чесом бо помолимся, якоже подобает, не вемы: но сам Дух ходатайствует о нас воздыхании неизглаголанными. 27 Испытаяй же сердца весть, что (л. 96) есть мудрование Духа, яко по Богу @приповедует@{@ходатайствует@} о святых. Конец четвертку. (за\ч 99) 28 Вемы же,*{Святым великомучеником: Братие, вемы,*} яко любящим Бога вся поспешествуют во благое, сущим по предуведению званным. 29 Ихже бо предуведе, [тех] и предустави сообразным быти образу Сына своего, яко быти ему первородну во многих братиях. 30 А ихже предустави, тех и призва: а ихже призва, сих и оправда: а ихже оправда, сих и прослави. 31 Что убо речем к сим? аще Бог по нас, кто на ны? 32 Иже убо своего Сына не пощаде, но за ны вся предал есть его: како убо не и с ним вся нам дарствует? 33 Кто поемлет на избранныя Божия? Бог оправдаяй: 34 Кто осуждаяй? Христос Иисус умерый, паче же и воскресый, иже и есть одесную Бога, иже и ходатайствует о нас: [14] 35 Кто ны разлучит от любве Божия? скорбь ли, или теснота, или гонение, или глад, или нагота, или беда, или мечь? якоже есть писано: 36 Яко тебе ради умерщвляеми есмы весь день, вменихомся якоже овцы заколения. 37 Но о сих всех препобеждаем за возлюбльшаго ны. 38 Известихся бо, яко ни смерть, ни живот, ни ангели, ни начала, ниже силы, ни настоящая, ни грядущая, 39 Ни высота, ни глубина, (л. 96 об.) ни ина тварь кая возможет нас разлучити от любве Божия, яже о Христе Иисусе Господе нашем. Конец великомучеником. Глава девятая. (за\ч 100) [15] с\х 1 Истину*{Суббота 6-я недели: Братие, истину*} глаголю о Христе, не лгу, послушествующи ми совести моей Духом святым, 2 Яко скорбь ми есть велия, и непрестающая болезнь сердцу моему. 3 Молил бых бо ся сам аз отлучен быти от Христа по братии моей, сродницех моих по плоти, 4 Иже суть Израильте, ихже (ср\де) всыновление, и слава, и завети, и законоположение, и служение, и обетования: 5 Ихже отцы, и от нихже Христос по плоти, сый над всеми Бог, Благословен во веки, аминь. Конец субботе. (за\ч 101) 6 Не такоже,**{Пяток 3-я недели: Братие, не такоже**} яко отпаде слово Божие: не вси бо сущии от Израиля, сии Израиль: 7 Ни зане суть семя авраамле, вси чада: но о исааце, рече, наречется ти семя. 8 Сиречь, не чада плотская, сия чада Божия, но чада обетования, причитаются в семя: 9 Обетования бо слово сие: на сие время прииду, и будет сарре сын. 10 Не точию же, но и ревекка от единаго ложа исаака отца нашего имущи. 11 Не убо (л. 97) рождшимся, ни сотворшим чесо благо или зло да по избранию предложение Божие пребудет, 12 Не от дел, но от призывающаго, речеся ей: яко болий поработает меньшему. 13 Якоже есть писано: иакова возлюбих, исава же возненавидех. 14 Что убо речем? еда неправда у Бога? да не будет. 15 Моисеови бо глаголет: помилую, егоже аще помилую: и ущедрю, егоже аще ущедрю. 16 Темже убо ни хотящаго, ни текущаго, но милующаго Бога. 17 Глаголет бо писание фараонови: яко на истое сие воздвигох тя, яко да покажу тобою силу мою: и яко да возвестится имя мое по всей земли. (за\ч 102) 18 Темже убо, егоже*{Понедельник 4 недели: Братие, Бог егоже*} хощет, милует: а егоже хощет, ожесточает. 19 Речеши же ми убо: чесо ради убо укоряет? воли бо его кто противитися может? Конец пятку. 20 Темже убо, _о человече! ты кто еси, против отвещаяй Богови? еда речет здание создавшему е: почто мя сотворил еси тако? 21 Или не имать власти скудельник на брении, от тогоже смешения сотворити, ов убо сосуд в честь, ов же не в честь? 22 Аще ли же хотя Бог показати гнев свой, и явити силу свою, пренесе во мнозе долготерпении сосуды гнева совершены в погибель: 23 И да скажет богатство славы своея на сосудех (л. 97 об.) милости, яже предуготова в славу: 24 Ихже и призва нас, не точию от иудей, но и от язык. 25 Якоже и во иосии глаголет: нареку не люди моя люди моя, и невозлюбленую возлюблену. 26 И будет на месте, идеже речеся им: не людие мои есте вы, тамо нарекутся сынове Бога живаго. 27 Исаиа же вопиет о Израили: аще будет число сынов Израилевых, яко песок морский, останок спасется. 28 Слово бо скончавая и сокращая в правде, яко слово сокращено сотворит Господь на земли. 29 И якоже прорече исаиа: аще не бы Господь саваоф оставил нам семене, якоже содом убо были быхом, и якоже гоморру уподобилися быхом. [16] 30 Что убо речем? яко языцы не гонящии правду, постигоша правду: правду же, яже от веры. 31 Израиль же гоня закон правды, в закон правды не постиже. 32 Чесо ради? зане не от веры, но от дел закона: преткнушася бо о камень претыкания. 33 Якоже есть писано: се полагаю в сионе камень претыкания, и камень соблазна: и всяк веруяй вонь, не постыдится. Конец понедельнику. Глава десятая. (за\ч 103) с\х 1 Братие, Благоволение убо*{Неделя пятая: Братие, благоволение*} моего сердца, и молитва яже к Богу, по Израили есть во спасение. 2 Свидетельствую бо им, яко ревность (л. 98) Божию имут, но не по разуму. 3 Не разумеюще бо Божия правды, и свою правду ищуще поставити, правде Божией не повинушася. 4 Кончина бо закона Христос, в правду всякому верующему. 5 Моисей бо пишет правду, юже от закона: яко сотворивый та человек, жив будет в них. 6 А яже от веры правда, сице глаголет: да не речеши в сердцы твоем: кто взыдет на Небо? сиречь Христа свести. 7 Или кто снидет в бездну? сиречь Христа от мертвых возвести. 8 Но что глаголет писание? близ ти глагол есть во устех твоих, и в сердце твоем: сиречь, глагол веры, егоже проповедаем. 9 Яко аще исповеси усты твоими Господа Иисуса, и веруеши в сердце твоем, яко Бог того воздвиже из мертвых, спасешися. 10 Сердцем бо веруется в правду: усты же исповедуется во спасение. Конец недели. (за\ч 104) 11 Глаголет бо*{Во вторник 4-я недели: Братие, глаголет*} писание: всяк веруяй вонь, не постыдится. 12 Несть бо разнствия иудееви же и еллину: той бо Бог всех, @богатяй@{@богат сый@} во всех призывающих его. 13 Всяк бо, иже аще призовет имя Господне, спасется. 14 Како убо призовут, в негоже не вероваша? како же уверуют, егоже не услышаша? како же услышат, без проповедающаго? 15 Како же проповедят, аще не послани (л. 98 об.) будут? якоже есть писано: коль красны ноги благовествующих мир, благовествующих Благая. 16 Но не вси послушаша Благовествования: исаиа бо глаголет: Господи, кто верова слуху нашему? 17 Темже убо вера от слуха: слух же глаголом Божиим. 18 Но глаголю, еда не слышаша? @темже убо@{@но паче@} во всю землю изыде вещание их, и в концы вселенныя глаголы их. 19 Но глаголю, еда не разуме Израиль? первый моисей глаголет: аз раздражу вы *не о языце, но о языце неразумне*{*о не языце, о языце неразумне*} прогневаю вас. 20 Исаиа же дерзает и глаголет: обретохся не ищущим мене, явлен бых не вопрошающим о мне. 21 Ко Израилю же глаголет: весь день воздех руце мои к людем непокоривым и пререкающим. Глава перваянадесять. [17] с\х 1 Глаголю убо: еда отрину Бог люди своя? да не будет: ибо и аз Израильтянин есмь, от семене авраамля, колена вениаминова. 2 Не отрину Бог людей своих, ихже прежде разуме. Конец вторнику. (за\ч 105) Или не весте*{В среду 4 недели: Братие, не весте ли*} о илии, что глаголет писание? яко **приповедует Богови на Израиля**{**вопиет к Богу на Израиля**}, глаголя: 3 Господи, пророки твоя избиша, и олтари твоя раскопаша: и аз остах един, и ищут душу (л. 99) мою [изяти]. 4 Но что глаголет ему Божественный ответ? оставих себе седмь тысящ мужей, иже не преклониша колена пред ваалом. 5 Тако убо и в нынешнее время, останок по избранию благодати бысть. 6 Аще ли по Благодати, то не от дел: зане Благодать, уже не бывает благодать. аще ли от дел, ктому несть благодать: зане бо дело, уже несть дело. 7 Что убо? егоже искаше Израиль, сего не получи, а избрание получи: прочии же ослепишася. 8 Якоже есть писано: @даде им Бог дух умиления@{@даде им Бог Духа нечувствия@}, очи не видети, и уши не слышати, даже до днешняго дне. 9 И Давид глаголет: да будет трапеза их в сеть и в лов и в соблазн, и в воздаяние им. 10 Да помрачатся очи их еже не видети, и хребет их выну сляцай. 11 Глаголю убо, еда согрешиша, да отпадут? да не будет: но тех падением, спасение языком, во еже раздражити их. 12 Аще ли же прегрешение их богатство миру, и отпадение их богатство языком: кольми паче исполнение их? Конец среде. (за\ч 106) 13 Вам бо*{В четверток 4-я недели: Братие, вам*} глаголю языком, понеже убо есмь аз языком апостол, службу мою прославляю: 14 Аще како раздражу мою плоть, и спасу некия от них. 15 Аще бо отложение их, примирение миру: что приятие, разве жизнь из мертвых? 16 Аще ли (л. 99 об.) начаток свят, то и примешение: и аще корень свят, то и ветви. 17 Аще ли нецыи от ветвей отломишася, ты же дивия маслина сый, прицепился еси в них, и причастник корене и масти маслинныя был еси. 18 Не хвалися на ветви. аще ли же хвалишися, не ты корень носиши, но корень тебе. 19 Речеши убо: отломишася ветви, да аз прицеплюся. 20 Добре: неверием отломишася, ты же верою стоиши. не высокомудрствуй, но бойся. 21 Аще бо Бог естественных ветвей не пощаде: да не како и тебе не пощадит. 22 Виждь убо Благость и непощадение Божие: на отпадших убо непощадение, а на тебе Благость Божия, аще пребудеши в Благости: аще ли же ни, то и ты отсечен будеши. 23 И они же, аще не пребудут в неверствии, прицепятся: силен бо есть Бог паки прицепити их. 24 Аще бо ты от естественныя отсечен дивия маслины, и чрез естество прицепился еси к добрей маслине: кольми паче сии, иже по естеству, прицепятся своей маслине. Конец четвертку. (за\ч 107) 25 Не бо хощу вас не ведети тайны сея, братие,*{В пяток 4-я недели: Братие, не хощу вас не ведети тайны сея*} [да не будете о себе мудри,] яко ослепление от части Израилеви бысть, дондеже исполнение языков внидет. 26 И тако весь Израиль спасется, якоже есть писано: приидет от сиона избавляяй, и (л. 100) отвратит нечестие от иакова. 27 И сей им от мене завет, егда отиму грехи их. 28 По благовествованию убо, врази вас ради: по избранию же, возлюблени отец ради. 29 Нераскаянна бо дарования, и звание Божие. 30 Якоже бо и вы иногда противистеся Богови, ныне же помиловани бысте @сих противлением@{@сих ради противления@}. 31 Такожде и сии ныне противишася *вашей милости*{*вашего ради помилования*}, да и тии помиловани будут. (че\к) 32 Затвори бо Бог всех в противление, да всех помилует. 33 _О глубина богатства, и премудрости, и разума Божия! яко неиспытани судове его, и неизследовани путие его. 34 Кто бо разуме ум Господень? или кто советник ему бысть? 35 Или кто прежде даде ему, и воздастся ему? 36 Яко из того, и тем, и в нем всяческая: тому слава во веки, аминь. Конец пятку. Глава втораянадесять. (за\ч 108) [18] с\х 1 Молю убо вас, братие,*{В субботу 7-ю: Братие, молю вас*} щедротами Божиими, представите телеса ваша жертву живу, святу, благоугодну Богови, словесное служение ваше: 2 И не сообразуйтеся веку сему, но преобразуйтеся обновлением ума вашего, во еже искушати вам, что есть воля Божия, Благая, и угодная, и совершенная? 3 Глаголю убо Благодатию давшеюся (л. 100 об.) мне, всякому сущему в вас, не мудрствовати паче, еже подобает мудрствовати: но мудрствовати в целомудрии, коемуждо якоже Бог разделил есть меру веры. Конец субботе. (за\ч 109) [1] 4 Якоже бо*{В понедельник 5-я недели: Братие, якоже*} во едином телеси, многи уды имамы, уды же вси не тожде имут делание: 5 Такожде мнози едино тело есмы о Христе, а по единому другдругу уди. Преступи понедельнику. (за\ч 110) 6 Имуще же**{Неделя 6: Братие, имуще**} дарования по Благодати данней нам различна: аще пророчество, по мере веры: 7 Аще ли служение, в служении: аще учяй, во учении: 8 Аще утешаяй, во утешении: подаваяй, в простоте: @предстояй@{@начальствуяй@}, со тщанием: милуяй, с добрым изволением. [2] 9 Любы нелицемерна, ненавидящи злое, прилепляющися Благому. 10 Братолюбием друг ко другу любезни, честию другдруга больша творяще. 11 Тщанием не лениви, Духом горяще, Господеви работающе. 12 Упованием радующеся, скорби терпяще, в молитве пребывающе. 13 Требованием святых приобщающеся, страннолюбия держащеся. 14 Благословляйте гонящия вы: благословите, а не клените. Конец недели. (л. 101) Чти понедельнику: 15 Радоватися с радующимися, и плакати с плачущими. 16 Тожде друг ко другу мудрствующе, не высокая мудрствующе, но смиренными ведущеся, не бывайте мудри о себе. [3] 17 Ни единому же зла за зло воздающе, промышляюще добрая пред всеми человеки. 18 Аще возможно, еже от вас, со всеми человеки мир имейте. 19 Не себе отмщающе возлюбленнии, но дадите место гневу: писано бо есть: мне отмщение, аз воздам, глаголет Господь. 20 Аще убо алчет враг твой, ухлеби его: аще ли жаждет, напой его. сие бо творя, углие огнено собираеши на главу его. 21 Не побежден бывай от зла, но побеждай благим злое. Конец понедельнику. Глава третиянадесять. (за\ч 111) [4] с\х 1 Всяка*{В субботу 8-ю: Братие, всяка*} душа властем предержащим да повинуется. несть бо власть аще не от Бога: сущия же власти от Бога учинены суть. 2 Темже противляяйся власти, Божию повелению противляется: противляющиися же, себе грех приемлют. 3 Князи бо не суть боязнь добрым делом, но злым. хощеши же ли не боятися власти? Благое твори, и имети будеши похвалу от него. 4 Божий бо слуга есть, тебе во благое. аще (л. 101 об.) ли злое твориши, бойся: не бо @без ума@{@всуе@} мечь носит: Божий бо слуга есть, отмститель в гнев злое творящему. 5 Темже потреба повиноватися не токмо за гнев, но и за совесть. 6 Сего бо ради и дани даете: служители бо Божии суть во истое сие пребывающе. 7 Воздадите убо всем должная: емуже убо урок, урок: а емуже дань, дань: а емуже страх, страх: и емуже честь, честь. 8 Ни единому же ничимже должни бывайте, точию еже любити другдруга: любяй бо друга, закон исполни. 9 Еже бо, не прелюбы сотвориши, не убиеши, не украдеши, не лжесвидетельствуеши, не похощеши: и аще кая ина заповедь, в сем словеси совершается: во еже возлюбиши искренняго твоего якоже сам себе. 10 Любы искреннему зла не творит: исполнение убо закона любы есть. Конец субботе. 11 И сие ведяще время, яко час уже нам от сна востати. (за\ч 112) [5] Ныне бо*{Неделя сыропустная: Братие, ныне* Сие же и Рождеству иоанна Предтечи.} ближайшее нам спасение, нежели егда веровахом. 12 Нощь убо прейде, а день приближися: отложим убо дела темная, и облечемся во оружие света. 13 Яко во дни Благообразно да ходим, не козлогласовании и пиянствы, не любодеянии и студодеянии, не рвением и завистию: (л. 102) 14 Но облецытеся Господем нашим Иисус Христом, и плоти угодия не творите в похоти. Глава четвертаянадесять. [6] с\х 1 Изнемогающаго же в вере приемлите, не в сомнение помышлений. 2 Ов бо верует ясти вся, а изнемогаяй зелия да яст. 3 Ядый не ядущаго да не укоряет: и не ядый ядущаго да не осуждает: Бог бо его прият. 4 Ты кто еси судяй чуждему рабу? своему Господеви стоит, или падает, станет же: силен бо есть Бог поставити его. Конец недели, и Рождеству иоанна. 5 Ов убо разсуждает день чрез день: ов же судит на всяк день. кийждо своею мыслию да извествуется. (за\ч 113) 6 Мудрствуяй*{Суббота 9: Братие, мудрствуяй* Сие же и за упокой в понедельник.} день, Господеви мудрствует: и не мудрствуяй день, Господеви не мудрствует. ядый, Господеви яст, благодарит бо Бога: и не ядый, Господеви не яст, и благодарит Бога. 7 Никтоже бо нас себе живет, и никтоже себе умирает. 8 Аще убо живем, Господеви живем: аще же умираем, Господеви умираем: аще убо живем, аще умираем, Господни есмы. (л. 102 об.) (за\ч 114) 9 На сие бо*{Во вторник недели: Братие, на сие.*} Христос и умре, и воскресе, и оживе, да и мертвыми и живыми обладает. Конец субботе, и за упокой. 10 Ты же почто осуждаеши брата твоего? или ты что уничижаеши брата твоего? вси бо предстанем судищу Христову. 11 Писано бо есть: живу аз, глаголет Господь, яко мне поклонится всяко колено, и всяк язык исповестся Богови. 12 Темже убо кийждо нас о себе слово даст Богу. 13 Не ктому убо другдруга осуждаем: но сие паче судите, еже не полагати претыкания брату, или соблазна. 14 Вем, и извещен есмь о Христе Иисусе, яко ничтоже скверно само собою, точию помышляющему что скверно быти, оному скверно есть. 15 Аще убо брашна ради брат твой скорбит, уже не по любви ходиши: не брашном твоим того погубляй, за негоже Христос умре. 16 Да не хулится убо ваше благое. 17 Несть бо Царство Божие брашно и питие, но правда, и мир, и радость о Дусе святе: 18 Иже бо сими служит Христови, Благоугоден есть Богови, и искусен человеком. Конец вторнику. (за\ч 115) 19 Темже убо мир**{В субботу сыропустную: Братие, мир**} возлюбим, и яже к созданию друг ко другу. 20 Не брашна ради разоряй (л. 103) дело Божие: вся бо чиста, но зло человеку претыканием ядущему. 21 Добро не ясти мяс, ниже пити вина, ни о немже брат твой претыкается, или соблазняется, или изнемогает. 22 Ты веру имаши, о себе сам имей пред Богом: блажен не осуждаяй себе, о немже искушается. 23 А сомняяйся, аще яст, осуждается, зане не от веры: всяко же, еже не от веры, грех есть. 24 Могущему же вас утвердити по Благовествованию моему, и проповеданию Иисус Христову, по откровению тайны, леты вечными умолчанныя, 25 Явльшияся же ныне писании пророческими, по повелению вечнаго Бога, в послушание веры, во всех языцех познавшияся, 26 Единому премудрому Богу, Иисус Христом, емуже слава во веки. аминь. Конец субботе. Глава пятаянадесять. (за\ч 116) [7] с\х 1 Должни есмы*{Неделя 7: Братие, должни есмы*} мы сильнии немощи немощных носити, и не себе угождати. 2 Кийждо же вас ближнему да угождает во благое к созданию. 3 Ибо и Христос не себе угоди, но якоже есть писано: поношения поносящих тебе, нападоша на мя. 4 Елика бо преднаписана быша, в наше наказание преднаписашася, да терпением и утешением писаний, упование имамы. 5 Бог же (л. 103 об.) терпения и утешения, да даст вам тожде мудрствовати друг ко другу, о Христе Иисусе: 6 Да единодушно едиными усты славите Бога, и отца Господа нашего Иисуса Христа. (за\ч 117) 7 Темже приемлите*{В среду 5 недели: Братие, приемлите*} другдруга, якоже и Христос прият вас во славу Божию. Конец недели. 8 Глаголю же, Христа Иисуса служителя бывша обрезания по истине Божией, во еже утвердити обетования отцев: 9 А языком по милости, прославити Бога, якоже есть писано: сего ради исповемся тебе во языцех Господи, и имени твоему пою. 10 И паки глаголет: возвеселитеся языцы с людьми его. 11 И паки: хвалите Господа вси языцы, и похвалите его вси людие. 12 И паки исаиа глаголет: будет корень иессеов, и востаяй владети над языки, на того языцы уповают. 13 Бог же упования, да исполнит вас всякия радости и мира в вере, избыточествовати вам во уповании, силою Духа святаго. 14 Извещен же есмь братие моя, и сам аз о вас, яко и сами вы полни есте благости, исполнени всякаго разума, могуще и иныя научити. [19] 15 Дерзее же писах вам братие моя, от части, яко воспоминая вам, за благодать данную ми от Бога: (пя\к) 16 Во еже быти ми служителю Иисус Христову во языцех, священнодействующу (л. 104) благовествование Божие, да будет приношение еже от язык благоприятно, и освященно Духом святым. Конец среде. (за\ч 118) 17 Имам убо похвалу*{В четверток 5 недели: Братие, имам похвалу*} о Христе Иисусе, яже к Богу. 18 Не смею бо глаголати что, ихже не содея Христос мною, в послушание языков, словом и делом, 19 В силе знамений и чудес, силою Духа Божия: якоже ми от иерусалима и окрест даже до иллирика исполнити благовествование Христово. 20 Сице же потщахся благовестити, не идеже именовася Христос, да не на чужем основании созижду: 21 Но якоже есть писано: имже не возвестися о нем, узрят: и иже не слышаша, уразумеют. 22 Темже и возбранен бых многажды приити к вам. 23 Ныне же ктому места не имый в странах сих, желание же имый приити к вам от многих лет: 24 Яко аще поиду во испанию, прииду к вам. уповаю бо мимо грядый видети вас, и вами проводитися тамо, аще вас прежде от части насыщуся. 25 Ныне же гряду во иерусалим, служяй святым. 26 Благоволиша бо македониа и ахаиа общение некое сотворити к нищим святым, живущим во иерусалиме. 27 Благоволиша бо, и должни им суть: аще бо в духовных их причастники быша языцы, должни суть и в плотских послужити им. 28 Сие убо скончав, и запечатлев им плод (л. 104 об.) сей, поиду вами во испанию. 29 Вем же, яко грядый к вам во исполнении благословения благовестия Христова прииду. Конец четвертку. (за\ч 119) 30 Молю же вы братие,*{В субботу 10: Братие, молю вы*} Господем нашим Иисус Христом, и любовию Духа, споспешствуйте ми в молитвах о мне к Богу: 31 Да избавлюся от противляющихся во иудеи, и да служба моя яже во иерусалиме благоприятна будет святым. 32 Да с радостию прииду к вам волею Божиею, и упокоюся с вами. 33 Бог же мира со всеми вами, аминь. Конец субботе. Глава шестаянадесять. (за\ч 120) [1] с\х 1 Вручаю же вам**{В пяток 5 недели: Братие, вручаю вам**} фиву сестру нашу, сущу служительницу церкве, яже в кегхреех: 2 Да приимете ю о Господе достойне святым, и споспешствуйте ей, о нейже аще от вас потребует вещи: ибо сия заступница многим бысть, и самому мне. 3 Целуйте прискиллу и акилу, споспешника моя о Христе Иисусе: 4 Иже по души моей своя выя положиша: ихже не аз един благодарю, но и вся церкви языческия: и домашнюю их церковь. 5 Целуйте епенета возлюбленнаго ми, (л. 105) иже есть начаток ахаии во Христа. 6 Целуйте мариам, яже много трудися о нас. 7 Целуйте андроника и иунию, сродники моя и спленники моя, иже суть нарочиты во апостолех, иже и прежде мене вероваша во Христа. 8 Целуйте амплиа возлюбленнаго ми о Господе. 9 Целуйте урвана, споспешника нашего о Христе, и стахиа возлюбленнаго ми. 10 Целуйте апеллиа искусна о Христе. целуйте сущия от аристовула. 11 Целуйте иродиона сродника моего. целуйте иже от наркисса, сущия о Господе. 12 Целуйте трифену и трифосу, труждающияся о Господе. целуйте персиду возлюбленную, яже много трудися о Господе. 13 Целуйте руфа избраннаго о Господе, и Матерь его и мою. 14 Целуйте асигкрита, флегонта, ерма, патрова, ермиа, и сущую с ними братию. 15 Целуйте филолога и иулию, ниреа и сестру его, и олимпана, и сущия с ними вся святыя. 16 Целуйте друг друга лобзанием святым. целуют вы вся Церкви Христовы. Конец пятку. (за\ч 121) 17 Молю же вы братие,*{В понедельник 6-я недели: Братие, молю вы*} блюдитеся от творящих распри и раздоры, кроме учения, емуже вы научистеся, и уклонитеся от них. 18 Таковии бо Господеви нашему Иисусу Христу не работают, но своему чреву: иже Благими словесы и Благословением прельщают сердца незлобивых. 19 Ваше бо послушание (л. 105 об.) ко всем достиже: радуюся же еже о вас. хощу же вас мудрым убо быти во благое, простым же в злое. 20 Бог же мира да сокрушит сатану под ноги ваша вскоре. благодать Господа нашего Иисуса Христа с вами, аминь. 21 Целует вас тимофей споспешник мой, и лукий, и иасон, и сосипатр, сродницы мои. 22 Целую вы и аз тертий, написавый послание сие о Господе. 23 Целует вы гаие странноприимец мой, и Церкве всея. целует вы ераст строитель градский, и куарт брат. 24 Благодать Господа нашего Иисуса Христа со всеми вами. аминь. Конец понедельнику. Конец послания к римляном, еже написася в коринфе, и послася фивою, диакониссою Церкве сущия в кегхреех: Имать в себе глав, 16: А зачал Церковных, 44: Стихов 433: Знаменаний черных, 19: последующих им червленых 8.