<::лат> OCR: <::рус> Библиотека святоотеческой литературы <::лат> http://orthlиb.ru <::слав> (л. 61) Знаменания петровы епистолии первыя. [1] О пакибытии о Христе, и о терпении напасти, и о спасении, вере проповеданней пророки. [2] О уповании, и святыни, и о должном к Сыноположению, и крепком жительстве. [3] О еже достойно сыновлению о Христе жительствовати, в славу Богу, и пользу внешних. [4] О еже к начальствующим повиновании, и о братолюбии, и Благочестии. [1] В немже о покорении раб, и незлоиметельне терпении Христа ради. [2] О покорении жен, и сочетании к мужем, и спасении Духовнем во образ саррин. [3] О помогании мужей к женам. [4] О послушании и незлобии ко всем, егоже образ человеколюбие Божие, еже при нои, на нас же милость есть крещением Христовым. [5] О отложении злых деяний, и восприятии Духовных плодов, по различию даров. [6] Яко сообщением еже во Христа, одолети подобает страстем. [1] Учение пресвитером, о блюдении стада. [2] В немже о общении и смиреномудрии ко всякому, на победу диавола. [3] Молитва о совершении верующих. (л. 61 об.) Сказание перваго послания святаго апостола петра. Сие пишет Блаженный петр послание учительно сущим в разсеянии иудеем, и бывшим христианом: понеже бо от иудей вероваша, утверждает их. И первее убо поведует и сказует, яко яже во Христа вера от пророк возвестися, и теми изяснися, еже кровию его избавление: и яко теми и языком благовестишася вся, в няже желают ангели приникнути. Таже совещав достойно звавшему жительствовати, повелевает и Царя почитати: женам же и мужем единомыслие завещавает. И о нравех наказав мало, поведует, яко и во аде бысть от Господа проповедь спасения и воскресения, да и прежде умершии воскреснут, и судятся убо с плотию: благодатию же воскресения пребудут, и яко кончина всех уже приближися: и подобает всем готовым быти, яко слово отдати судии. и тако скончавает послание. (л. 62) СОБОРНОЕ ПОСЛАНИЕ ПЕРВОЕ СВЯТАГО АПОСТОЛА ПЕТРА. Глава первая. (за\ч 58) с\х 1 Петр апостол*{В пяток 32-я недели: Петр апостол*} Иисус Христов, избранным пришельцем разсеяния, понта, галатии, каппадокии, асии и вифинии, 2 По прозрению Бога отца, во святыню Духа, в послушание и кропление крове Иисус Христовы благодать вам и мир да умножится. Преступи пятку. (за\ч) [1] 3 Блг\свен Бог**{Паремиа первая на память святых апостол петра и павла: Братие, Благословен Бог**} и отец Господа нашего Иисус Христа, иже по мнозей своей милости порождей нас во упование живо, воскресением Иисус Христовым от мертвых, 4 В наследие нетленно, и нескверно, и неувядаемо, соблюдено на Небесех вас ради: 5 Иже силою Божиею соблюдени верою, во спасение готовое явитися во (л. 62 об.) время последнее. 6 О немже радуйтеся, мало ныне, аще лепо есть, прискорбни бывше в различных напастех: 7 Да искушение вашея веры, многочестнейше злата гибнуща, огнем же искушена, обрящется в похвалу и честь и славу, во откровении Иисус Христове. 8 Егоже не видевше любите, и на негоже ныне не зряще, верующе же, радуетеся радостию неизглаголаиною и прославленною: 9 Приемлюще кончину вере вашей, спасение душам. Конец паремии первыя. Чти пятку: 10 О немже спасении взыскаша и испыташа Пророцы, иже о вашей Благодати прорекоша: 11 Испытающе, в каково или в кое время являше в них Дух Христов, прежде свидетельствуя о Христовых страстех, и яже по сих славах. 12 Имже открыся, яко не им самем, но нам служаху сия, яже ныне возвестишася вам благовествовавшими вам Духом святым, посланным с Небесе, в няже желают ангели приникнути. Преступи пятку. (за\ч) [2] 13 Темже возлюбленнии препоясавше*{Паремиа 2-я: Возлюбленнии, препоясавше*} чресла помышления вашего, трезвящеся, совершенне уповайте на приносимую вам благодать, откровением Иисус Христовым: 14 Яко чада послушания, не преобразующеся первыми неведения вашего похотении: 15 Но по звавшему вы святому, и сами святи во (л. 63) всем житии будите. 16 Зане писано есть: святи будите, яко аз свят есмь. 17 И аще отца называете нелицемерно судяща комуждо по делу, со страхом жития вашего время жительствуйте: 18 Ведяще, яко не истленным сребром, или златом избавистеся от суетнаго вашего жития отцы преданнаго: 19 Но честною кровию, яко агнца непорочна, и пречиста Христа. Конец паремии вторыя. 20 Предуведена убо прежде сложения мира, явльшася же в последняя лета вас ради, 21 Иже его ради веруете в Бога, воздвигшаго его из мертвых, и славу ему давша, яко да вера ваша, и упование будет на Бога. 22 Души ваша очистивше в послушание истины Духом, в братолюбие нелицемерно, от чиста сердца другдруга любите прилежно. 23 Порождени не от семене истленна, но неистленна, словом живаго Бога, и пребывающа во веки. 24 Зане всяка плоть яко трава, и всяка слава человеча яко цвет травный. изсше трава, и цвет ея отпаде: 25 Глагол же Господень пребывает во веки: се же есть глагол Благовествованный в вас. Глава вторая. [3] с\х 1 Отложше убо всяку злобу, и всяку лесть, и лицемерие, и зависть, и вся клеветы, 2 Яко новорождени младенцы, словесное и нелестное млеко возлюбите, яко да о нем возрастете во спасение. 3 Понеже вкусисте, яко Благ (л. 63 об.) Господь. 4 К немуже приходяще, камени живу, от человек убо уничижену, от Бога же избранну, честну: 5 И сами яко камение живо зиждитеся во храм духовен, святительство свято, возносити жертвы духовны, благоприятны Богови Иисус Христом. Чти пятку: 6 Зане писано есть в писании: се полагаю в сионе камень краеуголен, избран, честен: и веруяй вонь, не постыдится. 7 Вам убо честь верующим: а противящимся камень, егоже небрегоша зиждущии, сей бысть во главу угла, и камень претыкания, и камень соблазна: 8 О немже и претыкаются, слову противляющиися, на неже и положени быша. 9 Вы же род избран, цр\ское священие язык свят, людие обновления: яко да добродетели возвестите, из тмы вас призвавшаго в чудный его свет: 10 Иже иногда не людие, ныне же людие Божии: иже не помиловани, ныне же помиловани бысте. Конец пятку. (за\ч) 11 Возлюбленнии, молю*{Паремиа 3-я: Возлюбленнии, молю*} яко пришельцы и странники, огребатися от плотских похотей, яже воюют на душу: (вто\р) 12 Житие ваше имуще добро бо языцех: да о немже клевещут вас, аки злодеев, от добрых дел видевше, прославят Бога (л. 64) в день посещения. [4] 13 Повинитеся убо всякому человечу @созданию@{@начальству@}, Господа ради: аще царю, яко преобладающу: 14 Аще ли же князем, яко от него посланным, во отмщение убо злодеем, в похвалу же Благотворцем. 15 Яко тако есть воля Божия, Благотворящим обуздовати безумных человек невежство: 16 Яко свободни, а не яко прикровение имуще злобы свободу, но яко раби Божии. 17 Всех почитайте: братство возлюбите: Бога бойтеся: царя чтите. [1] 18 Раби, повинуйтеся во всяком страсе владыкам, не токмо благим и кротким, но и строптивым. 19 Се бо есть угодно пред Богом, аще совести ради Божия терпит кто скорби, стражда без правды. 20 Кая бо похвала, аще согрешающе мучими терпите? но аще добро творяще, и страждуще терпите, сие угодно пред Богом: 22 На сие бо и звани бысте. (за\ч 59) Зане и Христос*{В понедельник 33-я недели: Возлюбленнии, Христос*} пострада по нас, нам оставль образ, да последуем стопам его. 22 Иже греха не сотвори, ни обретеся лесть во устех его: 23 Иже укоряемь, противу не укоряше: стражда не прещаше: предаяше же судящему праведно. 24 Иже грехи наша сам вознесе на теле своем на древо: да от грех избывше, правдою поживем: Конец паремии 3-я. (л. 64 об.) егоже язвою исцелесте. 25 Бесте бо яко овцы заблуждшия, не имущя пастыря: но возвратистеся ныне к пастырю и посетителю душ ваших. Глава третия. [2] с\х 1 Такожде же и жены, повинующяся своим мужем, да и аще нецыи не повинуются слову, женским житием без слова пленени будут: 2 Видевше еже со страхом чисто житие ваше, 3 Имже да есть не внешняя плетения влас, и обложения злата, или одеяния риз лепота. 4 Но потаеный сердца человек, в неистлении кроткаго и молчаливаго Духа, еже есть пред Богом многоценно. 5 Тако бо иногда и святыя жены, уповающия на Бога, украшаху себе, повинующяся своим мужем: 6 Якоже сарра послушаше авраама, господина того зовущи: еяже бысте чада, благотворящя, и не боящяся ни единаго страха. [3] 7 Мужие такожде, вкупе живуще с своими женами по разуму, яко немощнейшу сосуду женскому воздающе честь, яко и снаследницы Благодатныя жизни, во еже не прекращатися молитвам вашим. [4] 8 Конец же, вси единомудрени будите, милостиви, братолюбцы, милосерди, благоутробни, мудролюбцы, смиреномудри: 9 Не воздающе зла за зло, или досаждения за досаждение, сопротивное же благословяще: ведяще, яко на се звани бысте, да благословение наследите. Конец понедельнику. (л. 65) (за\ч 60) 10 Хотяй бо*{Во вторник 33-я недели: Возлюбленнии, хотяй*} живот любити, и видети дни благи, да удержит язык свой от зла, и устне свои еже не глаголати льсти: 11 Да уклонится от зла, и да сотворит благо, да взыщет мира, и да держится его: 12 Зане очи Господни на праведныя, и уши его в молитву их: лице же Господне на творящия злая, еже потребити их от земли. 13 И кто озлобит вас, аще благому подобницы будете? 14 Но аще и страждете правды ради, блажени есте: страха же их не убойтеся, ниже смущайтеся. 15 Господа же Бога освятите в сердцах ваших: готови же присно ко ответу всякому вопрошающему вы слово о вашем уповании, 16 С кротостию и страхом, совесть имуще благу: да о немже клевещут вас аки злодеев, постыдятся злословящии ваше благое о Христе житие. 17 Лучше бо есть благое творящим, [аще хощет воля Божия,] пострадати, нежели зло творящим. 18 Зане и Христос единою о гресех наших пострада, Праведник за неправедники, да приведет ны Богови: умерщвлен убо быв плотию, ожив же Духом: 19 О немже и сущим в темнице духовом сошед проповеда, 20 Противльшимся иногда, егда ожидаше Божие долготерпение, во дни ноевы делаему ковчегу, в немже мало, сиречь осмь душ, спасошася от воды. 21 Егоже воображение ныне и нас спасает крещение, (л. 65 об.) не плотския отложение скверны, но совести благи вопрошение у Бога, воскресением Иисус Христовым: 22 Иже есть одесную Бога, возшед на Небо, покоршимся ему ангелом, и властем и силам. Конец вторнику. Глава четвертая. (за\ч 61) [5] с\х 1 Хр\сту*{В среду 33-я недели: Возлюбленнии, Христу*} убо пострадавшу за ны плотию, и вы в ту же мысль вооружитеся: зане пострадавый плотию, преста от греха, 2 Во еже не ктому в человеческия похоти, но в волю Божию прочее во плоти жити время. 3 Довлеет бо вам мимошедшее время жития, волю языческую творившим, хождшим в нечистотах, в похотех, в скотоложстве, в помыслех, в пиянстве, в козлогласованиих, в лихоиманиих, и Богомерзских идолослужениих. 4 О немже дивятся, не сходящимся вам в то же блуда разлияние, хуляще: 5 Иже воздадят слово готову сущему судити живым и мертвым. 6 На се бо и мертвым благовестися, да суд убо приимут по человеку плотию, поживут же по Бозе Духом. 8 Всем же кончина приближися. уцеломудритеся убо, и трезвитеся в молитвах. 8 Прежде же всех друг ко другу любовь прилежну имейте: зане любовь покрывает множество грехов. 9 Страннолюбцы (л. 66) друг ко другу, без роптаний. 10 Кождо якоже прият дарование, между себе сим служаще, яко добрии строителие различныя благодати Божия. 11 Аще кто глаголет, яко словеса Божия: аще кто служит, яко от крепости, юже подает Бог: да о всем славится Бог Иисус Христом, емуже есть слава и держава во веки веков, аминь. Конец среде. (за\ч 62) [6] 12 Возлюбленнии, не дивитеся*{В четверток 33-я недели: Возлюбленнии, не дивитеся*} еже в вас раждежению, ко искушению вам бываему, яко чужду вам случающуся. 13 Но понеже приобщаетеся Христовым страстем, радуйтеся, яко да и в явление славы его возрадуетеся веселящеся. 14 Аще укоряеми бываете о имени Христове, блажени есте: яко славы, и Божий Дух на вас почивает: онеми убо хулится, а вами прославляется. 15 Да не кто убо от вас постраждет яко убийца, или яко тать, или яко злодей, или яко чуждь посетитель. 16 Аще ли же яко христианин, да не стыдится: да прославляет же Бога в части сей. 17 Яко время начати суд от дому Божия: аще ли прежде от вас, кая кончина противящимся Божию евангелию? 18 И аще праведник едва спасется, нечестивый и грешный где явится? 19 Темже и страждущии по воли Божией, яко верну зиждителю, да предадят души своя во благотворение. (л. 66 об.) Глава пятая. [1] с\х 1 Старцы яже в вас молю, яко старец сый и свидетель Христовым страстем, иже и хотящей славе явитися общник: 2 Пасите еже в вас стадо Божие, посещающе не нуждею, но волею, и по Бозе: ниже неправедными прибытки, но усердно: 3 Ни яко обладающе причту, но образи бывайте стаду. 4 И явльшуся пастыреначальнику, приимете неувядаемый славы венец. [2] 5 Такоже юнии повинитеся старцем: вси же другдругу повинующеся, смиреномудрие стяжите: зане Бог гордым противится, смиренным же дает Благодать. Конец четвертку. (за\ч 63) (ср\де) 6 Смиритеся убо*{Ев\глисту марку: Братие, смиритеся*} под крепкую руку Божию, да вы вознесет во время: 7 Всю печаль вашу возвергше нань, яко той печется о вас. 8 Трезвитеся, бодрствуйте, зане супостат ваш диавол, яко лев рыкая ходит, иский кого поглотити: 9 Емуже противитеся тверди верою ведуще, яко теже страсти случаются вашему братству, еже в мире. [3] 10 Бог же всякия Благодати, призвавый вас в вечную свою славу о Христе Иисусе, мало пострадавшия, той да совершит вы, да утвердит, да укрепит, да оснует. 11 Тому слава и держава, во веки веков, аминь. 12 Силуаном вам верным братом. (л. 67) яко непщую, вмале написах, моля и засвидетельствуя, сей быти истинней благодати Божией, в нейже стоите. 13 Целует вы яже в вавилоне соизбранная, и марко сын мой. 14 Целуйте другдруга лобзанием любве: мир вам всем о Христе Иисусе. аминь. Конец апостолу марку. Конец соборнаго послания перваго святаго апостола петра, еже писа от рима: имущаго в себе глав 5: зачал Церковных 6: стихов 105: знаменаний черных 6: последующих же им червленых 7.