<::лат> OCR: <::рус> Библиотека святоотеческой литературы <::лат> http://orthlиb.ru <::слав> (л. 55) Знаменания иаковля послания. [1] О терпении и вере несумненней, и о смиренней мудрости к богатым. [1] В немже о раждежении сущем в нас, и страстех яже от него, яко не от Бога вина, но еже во благо что нам от него. [2] О кротости и чистоте тела, и деянии блазе поданне на блаженство, и о мудрости, и мирне словеси. [3] О любви сущей комуждо нелицемерне по закону. яко не от веры токмо, ни от дел единых, но от обою купно оправдается человек. [4] Яко дерз и безчинен язык, умерщвляет имущаго и: егоже держати потреба на похвалу и славу Божию. [1] В немже о блазем житии, и несварливем в себе от славохотия, сущаго от премудрости человеческия. [2] О Божией премудрости, яже свыше. [3] Яко от уныния и сластолюбия, рать и нестроение, и вражда на Бога бывает. [4] О покаянии на спасение и не осуждати искренняго. [6] Яко не о человеце, но о Бозе ступания мужеви управляются. [1] В немже о лихоимании богатых, и о пищи их яже в мире, и о праведнем суде Божии. [2] В долготерпении и о претерпении страстей, и о истине. [3] Поучение комуждо подобно суще с верою. [4] Яко служити подобает спасению искренняго. (л. 55 об.) Сказание иаковля соборнаго послания (нд\ля) Понеже сам иаков сие пишет, сущим от обоюнадесяте колену разсеявшимся, и веровавшим в Господа нашего Иисуса Христа. Пишет же учительное послание, учя о различных искушениих: кое убо есть от Бога, кое же от своего сердца человеком: и яко не словом токмо, но и делом показати веру подобает: яко не слышателие закона, но творцы оправдаются. О богатых же завещавает, да не лучше творятся богатии нищих в церквах, но паче и уязвляются яко презориви. И в конец утешая обидимыя, и предповелевая им долготерпети до пришествия Христова. И научив о терпении, от иовлева благаго терпения, повелевает призвати священники к болящим, и тщатися обращати заблуждшия ко истине: быти бо о сем возмездию от Господа, оставления грехов. И сице скончавает послание. (л. 56) СОБОРНОЕ ПОСЛАНИЕ ИАКОВЛЕ. Глава первая. (за\ч 50) [1] с\х 1 Иаков,{В среду 31- я недели:} Богу и Господу Иисусу Христу раб, обеманадесяте коленома, иже в разсеянии, радоватися. 2 Всяку радость имейте братие моя, егда во искушения впадаете различна, 3 Ведяще, яко искушение вашея веры соделовает терпение: 4 Терпение же дело совершено да имать, яко да будете совершени и всецели, ни в чем же лишени. 5 Аще же кто от вас лишен есть премудрости, да просит от дающаго Бога всем вкупе, и не поношающаго: и дастся ему. 7 Да просит же верою, ничтоже сумняся: сумняй бо ся уподобися волнению морскому, ветры возметаему и развеваему. 7 Да не мнит человек он, яко приимет что от Бога. 8 Муж двоедушен, неустроен во всех путех своих. 9 Да хвалится же брат смиренный в (л. 56 об.) высоте своей. 10 Богатый же во смирении своем: зане якоже цвет травный мимо идет. 11 Возсия бо солнце со зноем, и изсуши траву, и цвет ея отпаде, и благолепие лица ея погибе: сице и богатый в хождении своем увядает. 12 Блажен муж, иже претерпит искушение, зане искусен быв, приимет венец жизни, егоже обеща Бог любящим его. [1] 13 Никтоже искушаемь да глаголет, яко от Бога искушаемь есмь: Бог бо несть @искуситель злым@{@искушаемь злыми@}, не искушает же той никогоже. 14 Кождо же искушается, от своея похоти влекомь и прельщаемь. 15 Таже похоть заченши раждает грех: грех же содеян раждает смерть. 16 Не льститеся братие моя возлюбленная: 17 Всяко даяние благо, и всяк дар совершен свыше есть, сходяй от отца светов, у негоже несть пременения, или преложения стень. 18 Восхотев бо породи нас словом истины, во еже быти нам начаток некий созданием его. Конец среде. (за\ч 51) [2] 19 Темже братие моя возлюбленная,*{В четверток 31-я недели: Братие моя возлюбленная,*} да будет всяк человек скор услышати, и косен глаголати, косен во гнев. 20 Гнев бо мужа, правды Божия не соделовает. 21 Сего ради отложше всяку скверну, и избыток злобы, в кротости приимите всажденное слово, могущее спасти души ваша. (л. 57) 22 Бывайте же творцы слова, а не точию слышатели, прельщающе себе самех. 23 Зане аще кто есть слышатель слова, а не творец, таковый уподобися мужу смотряющу лице бытия своего в зерцале: 24 Усмотри бо себе, и отиде, и абие забы, каков бе. 25 Приникий же в закон совершен свободы, и пребыв: сей не слышатель забытлив быв, но творец дела, сей блажен в делании своем будет. 26 Аще кто мнится верен быти в вас, и не обуздовает языка своего, но льстит сердце свое, сего суетна есть вера. 27 Вера бо чиста и нескверна пред Богом и отцем сия есть, еже посещати сирых и вдовиц в скорбех их, и нескверна себе блюсти от мира. Конец четвертку. Глава вторая. (за\ч 52) [3] с\х 1 Братие моя, не на лица*{В пяток 31-я недели: Братие, не на лица*} зряще имейте веру Господа нашего Иисуса Христа славы. 2 Аще бо внидет в сонмище ваше муж, злат перстень нося, в ризе светле, внидет же и нищ в худе одежде: 3 И воззрите на носящаго ризу светлу, и речете ему, ты сяди зде добре: и нищему речете, ты стани тамо, или сяди зде на подножии моем: 4 И не разсмотристе в себе, и бысте судии помышлений злых. 5 Слышите, братие моя(л. 57 об.) возлюбленная, не Бог ли избра нищия мира сего богаты в вере, и наследники царствия, еже обеща любящим его? 6 Вы же укористе нищаго. не богатии ли насилуют вам, и тии влекут вы на судища? 7 Не тии ли хулят доброе имя нареченное на вас? 8 Аще убо закон совершаете царский, по писанию: возлюбиши искренняго своего якоже себе самаго: добре творите. 9 Аще ли на лица зрите, то грех содеваете, обличаеми от закона якоже преступницы. 10 Иже бо весь закон соблюдет, согрешит же во едином, бысть всем повинен. 11 Рекий бо, не прелюбы сотвориши: рекл есть, и не убиеши. аще ли не прелюбы сотвориши, убиеши же, бысть преступник закона. 12 Тако глаголите, и тако творите, яко законом свободным хотяще суд прияти. 13 Суд бо без милости не сотворшему милости: и хвалится милость на суде. Конец пятку. (за\ч 53) [4] 14 Кая польза братие моя,*{В понедельник 32-я недели: Братие, кая польза есть,*} аще веру глаголет кто имети, дел же не имать? еда может вера спасти его? 15 Аще же брат или сестра нага будета, и лишена будета дневныя пищи: 16 Речет же има кто от вас: идита с миром, грейтася и насыщайтася, не даст же има требования телеснаго, кая польза? 17 Такожде и вера, аще дел не имать, мертва есть о себе. 18 Но речет кто: ты (л. 58) веру имаши, аз же дела имам: покажи ми веру твою от дел твоих, и аз тебе покажу от дел моих веру мою. 19 Ты веруеши, яко Бог един есть, добре твориши: и беси веруют, и трепещут. 20 Хощеши же ли разумети, _о человече суетне, яко вера без дел мертва есть? 21 Авраам отец наш не от дел ли оправдася, вознес исаака сына своего на жертвенник? 22 Видиши ли, яко вера поспешествоваше делом его, и от дел совершися вера? 23 И совершися писание глаголющее: верова же авраам Богови, и вменися ему в правду, и друг Божий наречеся. 24 Зрите ли убо, яко от дел оправдается человек, а не от веры единыя? 25 Такожде же и раав блудница не от дел ли оправдася, приемши сходники, и иным путем изведши их? 26 Якоже бо тело без духа мертво есть, тако и вера без дел мертва есть. Конец понедельнику. Глава третия. (за\ч 54) [5] с\х 1 Не мнози учители бывайте, братие моя,*{Во вторник 32-я недели: Братие, не мнози учители бывайте,*} ведяще, яко большее осуждение приимем: 2 Много бо согрешаем вси. аще кто в слове не согрешает, сей совершен муж, силен обуздати и все тело. 3 Се бо и конем узды во уста влагаем, да повинуются нам, и все тело (л. 58 об.) их обращаем. 4 Се и корабли велицы суще, и от жестоких ветров заточаеми, обращаются малым кормильцем, аможе стремление правящаго хощет. 5 Такожде же и язык мал уд есть, и вельми хвалится: се мал огнь, и коль велики вещи сожигает. 6 И язык огнь, лепота неправды: сице и язык водворяется во удех наших, скверня все тело, и паля коло рождения нашего, и опаляяся от геенны. 7 Всяко бо естество зверей же и птиц, гад же и рыб, укрочается, и укротится естеством человеческим: 8 Языка же никтоже может от человек укротити, неудержимо бо зло, исполнь яда смертоносна. 9 Тем благословляем Бога и отца, и тем кленем человеки, бывшия по подобию Божию: 10 От тех же уст исходит благословение и клятва. не подобает братие моя возлюбленная, сим тако бывати. Конец вторнику. (за\ч 55) 11 Еда убо источник*{В среду 32-я недели: Братие, еда источник*} от единаго устия источает сладкое и горькое? 12 Еда может, братие моя, смоковница маслины творити, или виноградная лоза смоквы? такоже ни един источник слану и сладку творит воду. [1] 13 Кто премудр и худог в вас, да покажет от добраго жития дела своя, в кротости и премудрости. 14 Аще же зависть горьку имате и рвение в сердцах ваших, (л. 59) не хвалитеся, ни лжите на истину. 15 Несть сия премудрость свыше низходящи, но земна, душевна, бесовска. 16 Идеже бо зависть и рвение, ту нестроение и всяка зла вещь. [2] 17 А яже свыше премудрость, первее убо чиста есть, потом же мирна, кротка, благопокорлива, исполнь милости и плодов благих, несумненна, и нелицемерна. 18 Плод же правды в мире сеется творящим мир. Глава четвертая. [3] с\х 1 Откуду брани и свары в вас? не отсюду ли, от сластей ваших воюющих во удех ваших? 2 Желаете, и не имате: убиваете и завидите, и не можете улучити: сваряетеся и борете, и не имате, зане не просите. 3 Просите, и не приемлете, зане зле просите, да в сластех ваших иждивете. 4 Прелюбодеи и прелюбодейцы, не весте ли, яко любы мира сего вражда Богу есть? иже бо восхощет друг быти миру, враг Божий бывает. (пн\де) 5 Или мните, яко всуе писание глаголет: к зависти желает дух, иже вселися в ны? 6 Большую же дает благодать. темже глаголет: Господь гордым противится, смиренным же дает благодать. Конец среде. (за\ч 56) [4] 7 Повинитеся убо*{В четверток 32-я недели: Возлюбленнии, повинитеся*} Богу, противитеся же диаволу, и бежит от вас. 8 Приближитеся Богу, и (л. 59 об.) приближится вам: очистите руце грешницы, исправите сердца ваша двоедушнии. 9 Постраждите, и слезите и плачитеся: смех ваш в плачь да обратится, и радость в сетование. 10 Смиритеся пред Господем, и вознесет вы. 11 Не оклеветайте другдруга братие: оклеветаяй бо брата, или осуждаяй брата своего, оклеветает закон, и осуждает закон. аще ли закон осуждаеши, неси творец закона, но судия. 12 Един есть законоположник и судия, могий спасти и погубити: ты же кто еси осуждаяй друга? [6] 13 Слышите ныне глаголющии: днесь или утре пойдем во он град, и сотворим ту лето едино, и куплю деем, и приобретение: 14 Иже не весте, что утре случится. кая бо жизнь ваша? пара бо есть, яже вмале является, потом же исчезает. 15 Вместо еже бы глаголати вам: аще Господь восхощет, и живи будем, и сотворим сие или оно. 16 Ныне же хвалитеся в гордынях ваших: всяка хвала такова зла есть. 17 Ведущему убо добро творити, и не творящему, грех ему есть. Глава пятая. [1] с\х 1 Приидите ныне богатии, плачитеся и рыдайте о лютых скорбех ваших грядущих на вы. 2 Богатство ваше изгни, и ризы ваша молие поядоша. 3 Злато ваше и сребро изоржаве, и ржа их в послушество на вас будет, и снесть плоти ваша аки огнь, егоже (л. 60) снискасте в последния дни. 4 Се мзда делателей делавших нивы ваша, удержаная от вас, вопиет: и вопиения жавших во уши Господа саваофа внидоша. 5 Возвеселистеся на земли, и насладистеся упитасте сердца ваша аки в день заколения. 6 Осудисте, убисте праведнаго, не противится вам. 7 Долготерпите убо братие моя, до пришествия Господня: се земледелец ждет честнаго плода от земли, долготерпя о нем, дондеже приимет дождь ран и позден. 8 Долготерпите убо и вы, утвердите сердца ваша, яко пришествие Господне приближися. 9 Не воздыхайте друг на друга братие, да не осуждени будете: се судия пред дверьми стоит. Конец четвертку. (за\ч 57) [2] 10 Образ приимите, братие моя,*{Иулиа 20, пророку илии: Братие, образ приимите* Сие же и над болящим, и о бездождии.} злострадания и долготерпения, пророки, иже глаголаша именем Господним. 11 Се блажим терпящия: терпение иовле слышасте, и кончину Господню видесте, яко многомилостив есть Господь, и щедр. 12 Прежде же всех братие моя, не кленитеся ни Небом, ни землею: ни иною коею клятвою: буди же вам, еже ей, ей: и еже ни, ни: да не в лицемерие впадете. 13 Злостраждет ли кто в вас: да молитву деет. благодушствует ли кто: да поет. 14 Болит ли кто в вас: да призовет пресвитеры Церковныя, (л. 60 об.) и да молитву сотворят над ним, помазавше его елеем во имя Господне: 15 И молитва веры спасет болящаго, и воздвигнет его Господь: и аще грехи будет сотворил, отпустятся ему. [3] 16 Исповедайте убо друг другу согрешения, и молитеся друг за друга, яко да исцелеете: много бо может молитва праведнаго поспешествуема. Конец над болящим. Чти пророку, и бездождию: 17 Илиа человек бе подобострастен нам, и молитвою помолися, да не будет дождь: и не одожди по земли лета три и месяц шесть. 18 И паки помолися, и Небо дождь даде, и земля прозябе плод свой. [4] 19 Братие, аще кто в вас заблудит от пути истины, и обратит кто его: 20 Да весть, яко обративый грешника от заблуждения пути его, спасет душу от смерти, и покрыет множество грехов. Конец пророку илии, и бездождию. Конец иаковля соборнаго послания. имущаго в себе глав 5: зачал Церковных 8: стихов 108: знаменаний черных 6: последующих же им червленых 9.