<::лат> OCR: <::рус> Библиотека святоотеческой литературы <::лат> http://orthlиb.ru <::слав> По Благословению Святейшаго Патриарха Московскаго и всея Руси Пимена (л. 1) Сказание святаго епифаниа, епискпа кипрскаго, о двунадесяти святых апостолех, где кийждо их проповеда, и како скончася, и святая их телеса где положена суть. [1] Ст~ый петр, брат андреа первозваннаго, от града неславна и худа, именем вифсаиды, сын ионин, от племене симеоня, иже убо есть ныне первый и верховный апостолом, и преизящный Христов рачитель, яко является епистолиами своими. И проповеда первее во иудеи, таже во антиохии, и в понте, и в галатии, и каппадокии, во асии же и в вифинии, и во италии, и во иллирице, евангелие Господа нашего Иисуса Христа: сниде же и до рима, и симону волхву обещавшу пред царем обличити петра, не сущу поистинне служит Богу: глаголаше бо в мале на Небеса взыти, и яве пред всеми низложити петра. И дню нареченну, и державному нерону на таковое позорище со многими пришедшу: симон же оглавие дафиново на главе своей положи, и строении бесовскими и песньми себе оградив, восхищен идяше к воздуху. Святый же петр, протяг Преподобнии свои руце, помолися, и рече: Господи, прослави имя твое святое, и бесовская мечтания да растаются. И к симону воззрев, велиим гласом рече: Пред лицем всех на земли зрящих, ты пад разсядися. И абие словом того, бесове яко от огня отбегоша, и апостоловым гласом на землю его пустиша, и пад весь сокрушися. Последи же в риме святый петр при нероне царе пропят бысть стремглав, самому тако извольшу: и погребен бысть в томже риме, месяца иуниа в 29 день. (л. 1 об.) [2] Андрей первозванный, брат петров, проповеда евангелие Христово вифинии, понту и армении, скифом, и согдаем, и горсином: проповеда же и в севастополи велицем, идеже есть полк ассирийск, и а_ксарови, и сулимини, и фарсиси, идеже живут мури, и сшед даже до еллады, и в патрех ахайских на Кресте распят бысть от егеата царя тирска, и скончася тамо, и погребен бысть. [3] Иаков зеведеов, брат иоанна евангелиста, обеманадесяте коленома разсеянома проповеда евангелие Христово: от ирода же тетрарха иудейска, благодерзнутия ради, убиен бысть мечем, и ту погребен бысть во иудеи. [4] Иоанн Благовестник и Богослов, брат иаковль, возлегий на персех Христовых, во асии проповеда евангелие Христово, от траиана же царя римска в заточение послан бысть в патомский остров, словесе ради Господня: и ту написа евангелие, и вдаде е гаию странноприимцу. по скончании же траиана возвратися от острова во ефес, и ту жива себе погребе, сый лет ста и двадесяти, Божиею волею. [5] Филипп же апостол, сей бе от вифсаиды, веси петровы и андреевы, в горней же фригии проповеда евангелие Христово: во иераполи же распят бысть стремглав при дометиане, и ту погребен бысть славно своими ему. [6] Варфоломей же от галаады, индианом проповеда евангелие Христово: еже от матфеа святое Благовествование даде им, в свой им язык написав: во алфенийстем же граде, в велицей армении, распят бысть стремглав, и ту погребен бысть, во алване великих рамен. [7] Фома же апостол, [якоже предание пишет,] бе от панеада града галилейска, парфом же и мидом проповеда евангелие Христово, персом же и германом, и врканом и индианом, и вактром и маргом: и от них копии прободен скончася, и погребен бысть во граде каламийстем славно. (л. 2) [8] Матфей же евангелист бяше от Иерусалима, и ту написа евангелие Христово еврейским языком, и преложи е иоанн Богослов от еврейска языка в греческий язык: во иераполи же партии мечем прободен скончася, и погребен бысть славно. написа житие свое, яко бысть старей мытарем, а во избрании апостол бысть, и первый писец святым тайнам Господа нашего Иисуса Христа. [9] Иаков алфеов, иже и брат матфеев, купно бо алфеа имуще отца, той языком Христа проповедав, семя Божественно именованием обогатися: и яко к проповеданию подвижеся, и ненаказанныя соборы крепко обличая, на Кресте повешен, Богу Дух предаде. [10] Иуда иаковль, иже в лукине благовестии, и в деяниих иуда, матфеем же и марком фаддей и левей нареченный, брат по плоти явлься Господа нашего Иисуса Христа: той в месопотамии проповедав благовестие, последи от неверных повешен на древе, и от них сострелян скончася. [11] Симон зилот, иже от каны галилейския, иже во иоаннове благовествовании нафанаил, той всю мавританию и африкийскую страну прошед, таже во вританию дошед, и Христа проповедав, распят скончася. [12] Матфий же, един сый от седмидесятих ученик, егоже яви Господь наш по воскресении из мертвых, иже причтен бысть к единонадесятим апостолом, во иуды место искариотскаго, проповеда евангелие Господа нашего Иисуса Христа во внешней ефиопии, и ту муку прият от ефиоплян, на Иисусове пристанищи. Павел же, повнегда прияти ему власть от архиереа, идущу ему в дамаск, погублению предати вся нарицающия имя Иисус Христово, и приближающуся ему к дамаску, и абие светом Небесным облистаемь, и слыша глас глаголющ ему, яко невозможно есть ему, человеку сущу, одолети силе Божией. и тамо речено ему, да идет в дамаск, ко ученику (л. 2 об.) Христову анании, иже и крести его: и от того часа вниде во апостольство, и бысть Христу сосуд избранный, и яко некоторый крилат, всю вселенную обтек улови: начен же от Иерусалима, дойде до иллирика, и италии, и испании, проповеда евангелие Христово. И посем пришед в рим, и мнозех поучив тамо, и повелением кесаревым усечен бысть вне града. Тако скончася Блаженный павел: и на едином месте с петром, положена быша обою телеса.