<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Стихословия пятая, прежелательнаго к Богу благодарения о благодеяниях его. Благодари Господа, яко сотворил тя есть. 1 Благодарю тебе Господа моего, благодателя прещедраго, яко сотворил мя еси по образу своему и по подобию, и от небытия в бытие привел мя еси, славою и честию венчал еси. Не сотворил мя еси зверем, ни скотом, ни инем коим животным, но человеком, разумною тварию: безсмертием и самовластием душу мою почтил еси. Аще бо и разлучаемся временно плотию, но на лучшее преселение преходим, душею же безсмертне пребываем во веки, не на тысящу лет, ни на две, или три тысящи, но во веки вечныя конца не имущия. Аще бо кто благодарен и виновен бывает врачем за малое точию некое недуга врачевание, колико аз паче, Господи, иже мя всего цела, действенна, жива, здрава от небытия в бытие привел еси, и во веки безконечныя устроил мя еси! Благодари Господа, яко вся тебе ради от небытия в бытие привел есть. [2] Благодарю тебе Господа моего, благодателя прещедраго, яко вся мене ради туне сотворил еси: мене ради Небо, земля, солнце, луна и все звездное небесное украшение: мене ради зверие, скоти, птицы пернаты, всякое животно: мене ради моря, реки, источники, езера, рыбы, киты превеликия: мене ради лесы, дубравы, пустыни различныя, древеса плодоносна: мене ради зелия, корения, семена, овощия различна: мене ради вся видимая и невидимая сотворена суть, _о Боже мой! Благодари Господа, яко вся тебе праведным судом устрои. [3] Благодарю тебе Господа моего, благодателя прещедраго, яко вся о мне праведне и милосердне устроил еси, и непрестанно промышляеши о души моей: защищаеши мя, сохраняеши мя, покрываеши, заступаеши душу мою, даруеши ми крепость, здравие, живиши мя, вразумляеши мя, и просвещаеши, пособствуеши, и наставляеши мя на всякая дела благая: вся праведне, милосердне и Благоутробне о мне устроил еси. Благодари Господа, яко тебе ради на землю сниде, и взят плоть нашу на ся. [4] Благодарю тебе Господа моего, благодателя прещедраго, яко ты Бог всесилен сый: мене ради человек был еси, да мене соединиши себе во едино: не возгнушался еси взяти наша на ся, яко да нам всего себе отдаси. Мене ради во яслех положен был еси: мене ради пеленами повит был еси, одеваяй Небо облаки: мене ради осмодневен обрезан был еси: мене ради бежал еси во египет: мене ради бо иордане Крестился еси: мене ради пречистую главу свою Предтечи приклонил еси, да мене вознесеши горе: не требуя крещения мене ради крестился еси, да мне очищение крещением подаси. Благодари Господа, яко тебе ради вся злая претерпе. [5] Благодарю тебе Господа моего, благодателя прещедраго, яко мене ради биен, безчестимь, оплеван, заушен, связан, терновым венцем увязен был еси: мене ради руце свои пригвоздил еси на Кресте, оцта и желчи вкусил еси, копием во пречистое ребро прободен был еси: мене ради кровь свою пречистую излиял еси: мене ради умерл еси плотию, да оживиши мя Духом, и жизнь вечную ми подаси: мене ради во гробе положен был еси: мене ради тридневно из гроба воскресл еси, да всем нам из гроба воскресение даруеши. Благодари Господа, яко всегда кающагося тя приемлет. [6] Благодарю тебе Господа моего, благодателя прещедраго, яко, аще и тмами тем пред тобою согрешаю, милостивне приемлеши мя кающагося. Колико аз пред тобою согрешаю? Ты же единаче мя не отметаеши. Колико пред тобою преступаю? Ты же не отвращаеши мя. Колико падаю? Ты же возставляеши мя, долготерпиши, не абие смерти мя предаеши, даже до последняго издыхания, даже до последния кончины. Когда обращуся к тебе, когда к тебе припаду каяся: ты же милостивне кающагося мя приемлеши. [7] Благодарю тебе Господа моего, благодателя прещедраго, яко дал еси закон твой пред очи мои, дал ми еси уведети волю твою святую, не отринул мя еси крещения, не оставил мя еси по иноверстве, или пагубной ереси погруженну быти, причастника мя пречистым твоим тайнам сотворил еси, кровию своею искупил еси, наследника мя Царствия Небеснаго соделал еси. [8] Благодарю тебе Господа моего, благодателя прещедраго, яко исторгнул мя еси от молв и мятеж мира сего, и привел мя еси во ограду словесных овец твоих, и избрал мя еси себе в служение, служителя мене себе соделал еси, аще и недостоин есмь: обильно благодать твою надо мною умножил еси, обильно благодать твою надо мною простерл еси, удобен путь ко спасению мне показал еси. Вся мне открыл еси, вся пред очи мои предложил еси, ничтоже от мене утаено оставил еси. [9] Благодарю тя Господа моего, благодателя прещедраго, яко ни в чемже мя скудна оставил еси, но во всем изобилую: не терплю глада и мраза: тленных ради вещей, не волнуюся ни потопляюся в реках, не претерпеваю бед на пути ради житейских вещей, не смущают мя великия долги, не налегают мя царския зельныя дани, не изгоняют мя на работу нужную, плавания нужная морская не предлежат мя, ничтоже от сих претерпеваю, якоже прочии человецы терпят, и тмами тем страждут, дани дающе многи, скорби и напасти терпяще: аз же всего сего есмь твоею пресвятою благодатию свободь. аще бо и потруждуся в чем, и претерплю что мало, но и се не ради тленных, но ради пребывающих во веки. ово глаголю удобен путь ми показал еси ко спасению, Господи, удобно царство небесное устроил еси: туне вся нам даровал еси. [10] Благодарю тебе Господа моего, благодателя прещедраго, яко малаго ради некоего благоугождения, жизнь вечную, царство Небесное дати ми обещал еси: сам сотворивый, сам создавый мя, и вся ко благоугождению давый, жизнь вечную туне даруеши, не на время некое мало, не на время некое кратко, не на сто лет, или на тысящу, или тысящи тысящей, но во веки вечныя, конца не имущия. Слава неисповедимому твоему милосердию, Господи! Слава пречудному устроению твоему, пресвятый Царю! Слава неизреченней и непостижимей твоей благостыни и премудрости, человеколюбче Господи! Яко тебе подобает всякая слава, честь и держава, со отцем, и с пресвятым, Благим и животворящим твоим Духом, ныне и присно, и во веки веков. Аминь.