<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Стихословия третия, рачительнаго к Богу вопиения. Усердне ко Христу вопий, глаголя: 1 Почто тебе Господа моего всем сердцем моим не люблю? Почто все желание мое, и хотение мое тебе не отдам? Почто всею душею моею и всем помышлением моим во твою пресвятую любовь не углублен есмь? Ты бо мя всего сотворил еси, и вся туне ми даровал еси: весь есмь от тебе, весь есмь твой, весь да буду в тебе. Почто отязаюся, и с зельным усердием к тебе не припаду? ты бо от небытия в бытие привел мя еси, и непрестанно печешися о души моей, _о Боже мой. Ты мя питаеши, живиши мя, защищаеши, сохраняеши, покрываеши душу мою, даруеши ми крепость, здравие, окормляеши, вразумляеши, просвещаеши, пособствуеши, руководствуеши, и наставляеши мя на всякая дела благая, вся благая и спасенная о мне дееши, _о Боже мой! Паки к Богу тепле вопий: [2] Како убо тебе аз любити не имам, Господи мой? како к тебе не имам прилеплятися? ты бо ми еси Бог един, источник жизни, и податель всех благ, творец мой и Господь. Вси удаляющиися от тебе погибнут, вси невзыскающии тебе не спасутся: потребил бо еси всякаго любодеющаго от тебе: вси богатии в плотских сластех, истинно невзыскающии тебе, обнищаша и взалкаша: взыскающии же тебе, не лишатся всякаго блага. Темже день и нощь к тебе да утреннюю, день и нощь да тебе жажду, _о Боже мой! и всем сердцем люблю тя: едино просих от тебе Господа моего, то да взыщу, еже жити ми в дому твоем вся дни живота моего, еже зрети ми красоты твоя, и посещати Церковь святую твою. Тебе рече сердце мое: Господа взыщу: взыска тебе лице мое, лица твоего Господи взыщу. Паки ко Христу усердне взывай: [3] Како тебе не имам любити Господа моего? Ты бо мой еси живот, ты еси мое спасение, ты еси моя слава и похвала, ты еси мое богатство и вечное сокровище, ты еси моя надежда и упование, ты еси мое радование и вечный покой. Лучше ли ми любити вещь суетную, вещь неизвестну, вещь превратну, вещь погибельну, ложну, неже тебе истиннаго живота моего? Сего ради всю надежду мою, все упование мое, все желание мое в тебе едином да полагаю, Господи: все сердце мое, всю душу мою, вся помышления моя в тебе едином да углубленна имам: вся внутренняя моя членове и мозги тебе единому да излию, да весь буду в тебе, ты же во мне: да увем и познаю тебе воистинну единаго истиннаго Бога и Господа, и егоже послал еси Иисуса Христа, и во свете твоем узрю свет благодати твоего пресвятаго Духа. Паки ко Господу немолчно восклицай: [4] Камо пойду от тебе Господа моего? и от лица твоего камо бежу? Аще взыду на Небо, ты тамо еси: аще сниду во ад, тамо еси: аще возму криле мои рано, и вселюся в последних моря, и тамо бо рука твоя наставит мя, и удержит мя десница твоя (Псалом 138). Камо пойду, и где обрящу инамо вечный живот, аще не в тебе создатели моем? Камо обрящу инамо утешение и радость, пристанище и покой души моей, аще не в тебе, Господи Боже мой? камо от тебе пойду? ты бо глаголы живота вечнаго имаши в себе. Ты еси источник живота, и податель всех благ. Возжада тебе душа моя, возжада тебе сердце мое, Боже живота моего. Да усладитмися твое пресвятое имя, пресладкаго Господа моего Иисуса, да уранена будет им душа моя, да уязвено будет мое сердце, да ничтоже имам любезнейше во всем житии моем, паче твоего пресвятаго имене: да будут сладчайша словеса твоя гортани моему, и устом моим паче меда, и оправдания твоя да вожделенна ми будут Господи, паче злата и камене честна многа, и слаждша паче меда и сота! Паки к Богу тепле вопий: [5] Что убо душа моя возлюбит в веце сем? что возжелает? о чесом восхощет утешитися, аще не о тебе едином Господе Бозе моем? Аще бо возлюбит пищу и питие, прельщается: временна бо и тленна суть: аще возлюбит славу, красоту и почитание мира сего, всуе мятется: преходит бо и погибает вскоре. Аще возлюбит злато и сребро, не весть кому собирает: вся бо зде на земли останут, в прах и пепел пременятся. Несть нигдеже в сих известнаго утешения и покоя: душа бо от свойственнаго свойства отторгшаяся, нигде имать мира и покоя, аще не к тебе Господу своему паки обратится, отнюдуже бытие свое имать: аще не тебе всем сердцем своим возлюбит, аще Благодати пресвятаго твоего Духа не будет причастна, ничимже возможет известно утешитися и увеселитися. Паки тепле ко Господу рцы: [6] Всуе мятется всяк человек живый (Псалом 38), не любяй тебе Господа своего: всуе труждается всяк земнородный, не прилепляяся к тебе всем сердцем своим, и не взыскуяй тебе день и нощь. Почто и живет человек? почто и родился есть в мир, аще вотще изнуряет дни своя? вотще бо и течение его есть. Всуе нарицает имя твое святое, не любяй тебе Господа своего, источника жизни и подателя всех благ! Уязви душу мою Божественною твоею любовию, _о создателю мой! урани сердце мое, содетелю всея твари: аще бо к тебе не прилеплюся Господу моему, что убо творити буду? аще к тебе не присоединен буду, что содею не ведя? аще от пути твоего праваго отвращуся, в последняя злая впаду: к тебе бо присоединение, живот есть: от тебе отчуждение, вечная смерть и погибель и безконечная мука. Присоедини мя ты сам, Господи, имиже веси судьбами, яко человеколюбец и прещедрый Господь. Паки к Богу тепле вопий: [7] Почто предпочитаю суету и сласть тленную? предпочитаю славу временную, красоту смрадную, богатство исчезновенное? предпочитаю всякую злую вещь, паче тебе Господа моего, Благодателя прещедраго? Кое мое безумие? кая моя слепота? увы мне грешному! увы мне окаянному! увы мне помраченному! но обаче даруй ми сие, _о Боже мой! яко да ничтоже возлюблю в веце сем, кроме тебе Господа моего. Да не возлюблю славы, богатства, сласти, красоты и тления: но да тебе точию единаго создателя моего всем сердцем моим, и всею душею моею возлюблю, и ничтоже предпочитаю паче твоея любве. Паки любезне к Богу глаголи: [8] Что убо ино любити имам, аще не тебе Господа моего, и создателя, иже мя всего сотворил еси, и всего мя манием своим содержиши, питаеши, живиши, и вся к полезному устрояеши, якоже сам веси, Господи? Или лучше ми любити вещь суетную, вещь превратную, нежели тебе Господа моего и создателя? или лучше ми любити тварь, неже тебе творца твари? создание, неже тебе создателя? Аще бо тебе Господа моего всем сердцем не возлюблю. что убо иное любити имам? ко иному ли чесому прилеплюся? или иною коею вещию порабощен буду? Паки к Богу усердне взывай: [9] Не лучше ли капли при источнице, розге при корени, уду при главе? ей, всяко лучше. Сице и при тебе Господе Бозе моем не лучше ли есть? ты бо ми еси Господь един, прибежище мое и утешение, ты ми еси едина надежда и упование: инаго пристанища и утешения не имам, иныя надежды и упования, разве тебе Бога моего не знаю. Ты еси мой заступник, и покровитель: ты еси моя слава и держава и присносущное радование. Паки прилежно Господа моли: [10] Но убо молю твое Благоутробие, _о создателю мой Господи! приими мя в любовь твою святую, просвети мою душу, уясни мой разум, _о Благодателю мой! да уранитмися твоею Божественною любовию душа, да уязвенно будет мое сердце, да свяжется ею крепце, и пленена будет вся в твое Божественное желание и любовь: да пронзет и проничет всю душу мою, всех частей да ни едина часть, ни едина клеть души моей останет кроме ея: да отверзеши вся заклепы души моея, да просветиши вся моя чувства, да утвердиши и упокоиши сия в души моей: да весь буду в тебе, ты же во мне: да твое пресвятое имя славлю, воспеваю и величаю, со безначальным твоим отцем, и с пресвятым и Благим и животворящим твоим Духом, всегда, ныне и присно, и во веки веков, аминь.