<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Стихословия вторая, любезнаго к Богу беседования. Усердне ко Христу возопий глаголя: [1] Уязвенно и ураненно сердце мое твоею Божественною любовию всегда да будет Господи: да с Пророком присно сия рачительная словеса глаголю: уязвен есмь добротою твоею, женише мой сладчайший, в след тебе теку, в воню мира твоего, егоже вожделе душа моя (Песнь песней гл\ва 1). Где пасеши? и где почиваеши в полудни? где возсияваеши свет? где просвещаеши тму? где утешаеши любимыя? где рачители твоя упокояеши, и исполняеши их Божественное желание? Паки к Богу любезне глаголи: [2] _О превожделеннейший Господи господей! _О пресладчайший в сладостех премирных! _О прелюбезнейший в любезных, всяк ум, всяку мысль превосходящий! _О любы, ктож тя достойне возлюбит? кто достойне к тебе всем сердцем прилепится? кто тя достойне до сердца своего приимет? _О Божественнаго твоего желания! _О Божественныя славы присносущнаго твоего осеяния! Паки к Богу тепле вопий: [3] Что ми есть на Небеси? и что вящше от тебе восхотех на земли (Псалом 72), _о Боже мой! точию еже жити ми в Божественном твоем желании? Сие точию едино да будет ми сокровище и вечное богатство: сие точию едино да будет ми пища и питие, и присносущное наслаждение: сие точию едино да будет ми слава и похвала, велелепие же, и одеяние светло: да совлекшися плоти, не наг в день страшнаго твоего суда обрящуся: но с тобою, Господем моим Богом во веки вечныя пребуду, никогдаже отлучаяся. Паки усердне к Богу взывай: [4] Все желание мое, и воздыхание мое в тебе да будет, Господи: все желание мое, и рачение мое в тебе едином да будет, спасителю мой: все изволение мое, и помышление мое в тебе да углубится, и вся кости моя да рекут: Господи, Господи, кто подобен тебе? кто соравнится силе, Благодати и премудрости твоей? вся бо премудре, и праведне, и Благоутробне о нас устроил еси. Паки прилежно Господа моли: [5] Разжзи утробы моя и сердце мое, яко милость твоя пред очима моима есть (Псалом 25). Разжзи утробы моя и сердце мое, Боже живота моего: разжзи и умягчи душу мою, яко да вся истает, и излиется пред тобою Господи, да весь буду в тебе, ты же во мне, Благодателю мой. Да сице с тобою Богом моим соединен быв, никогдаже от тебе и Божественныя твоея любве устраняюся. [6] Где бо моей души имать быти непременное опочивание? где уму пристанище? где сердцу непреложная тишина и покой, аще не в тебе, Господи, аще не ты сам душу мою упокоиши, и присносущное утешение даруеши? Всяка бо мира сего радость, плачь есть: всяко утешение его, скорбь и печаль: всяко наслаждение земное, горесть и тяжесть души: всяка любовь плотская, ложь есть и лицемерие: несть свойственна и известна души моей ниедина мира сего сладость: но ты един да будеши ми радость и веселие, и вечное присносущное наслаждение. Паки к Богу мольбу сотвори: [7] Да не любодействую в сердце моем от тебе Господа моего с тварию, но да всем сердцем моим прилепляюся тебе, всю тварь сотворшему. Да ничтоже предпочитаю паче тебе: да ничтоже возлюблю кроме тебе Господа моего, источника жизни: да не возлюблю славы мира сего, и богатства исчезновеннаго, ни красоты тленныя, ни наслаждения плотскаго временнаго: но ты един да будеши моя слава и похвала, богатство и сокровище, пища и питие, и присносущное утешение. Паки тепле ко Господу рцы: [8] Како тебе не имам любити Господа моего, иже мя всего создал еси, _о Боже мой? како не имам к тебе прилеплятися, иже мя всего сотворил еси? како не имам к тебе присоединитися, иже мя всего содержиши, живиши, питаеши, насыщаеши, печешися и промышляеши, вся Благая и спасенная о мне дееши, и манием своим, якоже веси, устрояеши мне вся к полезному? како не распадетмися окаянное сердце? како не разжжетмися мрачная душа? како вся внутренняя моя не распалятся к Божественному твоему желанию и любви? Паки к Богу немолчно восклицай: [9] Како же убо трава сый присоединен буду Божественному ти огню, _о Боже мой? Како тление временное соединюся тебе всегда присносущному? Како, мрачен сый, прилеплюся невечернему свету? Како смертен, присоединен буду безсмертному? Присоедини мя ты сам, Господи, якоже веси, Благодателю мой: просвети, научи мя воли твоея святыя: распали, разжзи душу мою Божественною твоею любовию, да ничтоже ино возлюблю, токмо тебе единаго источника жизни и безсмертия. Паки к Богу прилежно мольбу сотвори: [10] Возсияй ми свет твоего разума, _о Боже мой! Просвети мрачную ми душу, распали и разжзи сердце мое, и утробы моя, яко огнь, к Божественной твоей любви, _о создателю мой! да выну славлю, величаю и воспеваю твое пресвятое имя, и неизреченное человеколюбие: яко ты нас присно милуеши, ущедряеши, и защищаеши уповающих и надеющихся на тя. Яко тебе подобает всякая слава, честь и поклонение со безначальным ти отцем, и пресвятым, и благим, и животворящим твоим Духом, ныне и присно, и во веки веков, аминь.