<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Стихословия первая, любезнаго к Богу взывания. Возлюблю тя, Господи, крепосте моя: Господь утверждение мое, и прибежище мое, и избавитель мой, Бог мой, помощник мой, и уповаю на него: защититель мой, и рог спасения моего, и заступник мой. Хваля призову Господа, и от враг моих спасуся (Псалом 17). [2] Коль возлюбленна селения твоя, Господи сил? Желает и скончавается душа моя во дворы Господни: сердце мое и плоть моя возрадовася о Бозе живе (Псалом 83). Блажени живущии в дому твоем: в веки веков восхвалят тя. Лучше день един во дворех твоих, Господи, паче тысящ: изволих приметатися в дому Бога моего паче, неже жити ми в селениих грешничих (Псалом 83). [3] Коль возлюбих закон твой, Господи? весь день поучение мое есть. Коль сладка гортани моему словеса твоя, паче меда устом моим? сего ради возненавидех всяк путь неправды. Светильник ногама моима закон твой, и свет стезям моим. Оправдания твоя вожделенна суть, Господи, паче злата и камене честна многа, и слаждша паче меда и сота (Псалом 118). [4] Коль благ Бог Израилев, правым сердцем (Псалом 72)? Коль многое множество благости твоея Господи, юже скрыл еси боящимся тебе? соделал еси уповающим на тя пред сыны человеческими? Скрыеши их в тайне лица твоего от мятежа человеческа (Псалом 30). Обаче Богови повинися, душе моя, яко от того терпение мое: ибо той Бог мой и Спас мой, заступник мой: не подвижуся во век (Псалом 61). [5] О Бозе спасение мое, и слава моя. Бог помощи моея, и упование мое на Бога. Уповайте на него весь сонм людей: излияйте пред ним сердца ваша: яко Бог помощник наш есть. Не уповайте на неправду, и на восхищение не желайте: богатство аще течет, не прилагайте сердца. Единою глагола Бог, двоя сия слышах, зане держава Божия, и твоя, Господи, милость: яко ты воздаси комуждо по делом его (Псалом 61). [6] Боже, Боже мой, к тебе утренюю: возжада тебе душа моя, коль множицею тебе плоть моя, в земли пусте и непроходне и безводне: тако во святем явихся тебе, видети силу твою и славу твою. Яко лучши милость твоя паче живот: устне мои похвалите тя, тако благословлю тя в животе моем: о имени твоем воздежу руце мои. Прильпе душа моя по тебе, мене же прият десница твоя (Псалом 62). [7] Имже образом желает елень на источники водныя, сице желает душа моя к тебе, Боже. Возжада душа моя к Богу крепкому живому: когда прииду и явлюся лицу Божию? молитва Богу живота моего. Реку Богу: заступник мой еси, почто мя забыл еси? и вскую сетуя хожду, внегда оскорбляет враг (Псалом 41)? [8] Господь просвещение мое и Спаситель мой, кого убоюся? Господь защититель живота моего, от кого устрашуся? Едино просих от Господа, то взыщу: еже жити ми в дому Господни вся дни живота моего, зрети ми красоту Господню, и посещати храм святый его. Взыска тебе лице мое, лица твоего Господи взыщу (Псалом 26). [9] Готово сердце мое, Боже, готово сердце мое: воспою и пою во славе моей. Востани слава моя, востани _псалтирю и гусли, востану рано. Исповемся тебе в людех Господи, пою тебе во языцех. Яко велия верху Небес милость твоя, и до облак истина твоя. Вознесися на Небеса, Боже, и по всей земли слава твоя (Псалом 107). [10] Ты еси Боже, держава моя, разжзи утробы моя и сердце мое. Яко милость твоя пред очима моима есть (Псалом 25). Посли свет твой и истину твою, та мя настависта, и введоста мя в гору святую твою, и в селения твоя. И вниду к жертвеннику Божию, к Богу веселящему юность мою: исповемся тебе в гуслех Боже, Боже мой. Вскую прискорбна еси душе моя? и вскую смущаеши мя? уповай на Бога, яко исповемся ему, спасение лица моего, и Бог мой (Псалом 42).