<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 3 Глава десятая О еже все желание свое имети к Богу и любовию к нему прилеплятися. Вопий всегда безпрестани ко Господу Богу твоему всем сердцем твоим, да с ним соединишися: все желание и намерение свое к нему имей, да его присно имаши с собою: день и нощь к нему воздыхай, да весь в любовь его углубишися. [2] Почто к Богу не вопиеши? почто к нему не желаеши? почто его всем сердцем не возлюбиши? почто всею душею своею и всею крепостию своею не прилепишися? той бо есть Бог твой, той твоя есть слава, той твое есть спасение, той есть вечный твой живот. [3] Припади любовию ко Господу Богу твоему тепле, прилепися к нему всем сердцем твоим, возлюби его от всея души твоея, и ничтоже предпочитай паче его любве: се бо ти есть вечный живот, да познаеши Господа Бога твоего, и возлюбиши его всем сердцем твоим, и прилепишися к нему всею душею твоею. [4] Горе к Богу имей сердце, дольняя вся яко неизвестная и ложная презирая: тамо сердце свое пригвожденно имей, идеже с ним имаши быти во веки: тамо лепися, отнюдуже начало и бытие свое имаши. [5] Возведи окрест очи твои и виждь, яко ничтоже в мире есть известно, точию еже быти всегда при Бозе и с ним наслаждатися Божественныя его славы, присно о нем веселящися: вся ина суетна суть, вся погибнут, точию сие едино останет во веки. [6] Не унывай человече, не унывай, ниже студен в Божественной Господней любви являйся, но присно ко онаго любви жегомь и палимь буди, присно разжизай свое сердце, присно вопий к нему, да не когда во тме нечувствия и окаменения останеши. [7] Восходи человече, восходи любовию ко Господу Богу твоему, восхождения преспеятельна на всяк день в сердце твоем полагай, да присно к нему день и нощь желанием и любовию восходиши, и всею душею своею к нему прилепишися. [8] Уязвенно сердце твое любовию к Богу имей, да присно сия рачительная словеса к нему глаголеши: уязвен есмь любовию и добротою твоею женише мой сладчайший, в след тебе теку, в воню мира твоего, егоже вожделе душа моя, егоже возлюби мое сердце (Песнь песней гл\ва 4). [9] Все желание и утешение свое в Бозе имей, да присно с Пророком к нему глаголеши: имже образом желает елень на источники водныя, сице желает душа моя к тебе Боже (Псалом 41). (и) Боже Боже мой, к тебе утренюю, возжада тебе душа моя, коль множицею тебе плоть моя (Псалом 62). [10] Цель твоя и намерение Господь един да будет, пристанище и упование пресвятая его любовь: желанием и любовию к нему пленен буди, яко да получиши искомаго, и дерзновенне речеши: приидите и увидите, яко получих искомаго, и обретох желаемаго, пресладкаго Господа Иисуса.