<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 3 Глава девятая О еже возбуждати себе всегда ко усердствованию и теплоте Господней. Прииди, _о человече! и виждь: прииди, Господа своего прослави, прииди, Господа своего воспой, прииди, припади пред Господем, и восплачися пред сотворшим тя (Псалом 94): прииди, припади, и исповеждься пресвятому его имени: вкуси, и увеждь яко Благ Господь (Псалом 33), пой имени его, яко добро. [2] Прииди алчущий и жаждущий, насытися Божественныя пищи прииди омраченный, насладися присносущнаго света: прииди во узах сый, насладися свободы: прииди смертный, прилепися безсмертному, да вечныя смерти избудеши, и живота вечнаго сподобишися. [3] Прииди скорбный и печальный, насладися присносущныя радости: прииди унылый и окамененный, да разжешися яко огнь: прииди нищий, да обогатишися вечным богатством: прииди нагий, да облечешися безсмертною славою, и одеешися яко ризою светом благодати Господни. [4] Воспряни, воспряни, _о человече! и истрезвися, воспряни и припади ко Господу Богу сотворшему тя. возставляй своя чувства, и возжизай светильник сердца твоего, да не когда в тебе угаснет, и оставит тя во тме нечувствия. [5] Разверзи, разверзи, _о человече! душу на приятие Господа славы: се бо судия стоит при дверех твоего сердца, и толчет, яко да отверзеши ему, и внидет к тебе, и яст с тобою, и пребудет с душею твоею во веки веков, никогда от тебе отлучаяся. [6] Возставляй убо человече, возставляй вся своя чувства, воспряни не ленящися и не унывающи, не пощади плоти, не пощади души, да венцем нетления увязешися. Возводи очи твои к Богу, и увиждь его благость, и все еже о тебе таинство. [7] Не презирай даннаго ти времене на стяжание вечных благ: се бо грядет Господь скоро на облацех, со славою и силою многою, воздати комуждо по делом его, и узрит его всяко око, и иже его прободоша, и плачь сотворят на ся о нем вся колена земная: се приидет скоро (Апокал: гл\ва 1). Блажен соблюдаяй заповеди Господни, блажен храняй его заповеди: приидет бо, приидет и не умедлит. [8] Возводи, возводи умныя очи сердца твоего к Богу, _о человече и разжизай свое сердце к Божественной его любви, возбуждай свою душу к Божественному его желанию, вопий безпрестани к Богу, подобяся слепцу: Сыне Давидов, Сыне Божий помилуй мя, ущедри мя, вразуми мя, научи мя воли твоея святыя, заповедей твоих, и жив буду. [9] В Бозе все желание свое и похотение да имаши, в Бозе все упование и надежду да полагаеши, тамо весь да пасешися, тамо весь всегда да пребываеши, до негоже конца сотворен еси, тамо да спешишися день и нощь, ни мала дая себе покоя и опочивания, дондеже получиши искомое, дондеже обрящеши место Господеви, селение Богу иаковлю (Псалом 131). [10] Да ничтоже тя отторгнет, да ничтоже ти препнет, да ничтоже ти возбранит, да ничтоже тя отсечет от Господни любве и Божественнаго его желания, ни скорбь, ни теснота, ни глад, ни гонение, ни огнь, ни мечь: той бо есть твой живот. Той твое есть спасение, той твоя радость и веселие, и присносущное наслаждение и вечный покой.