<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 3 Глава осмая О еже не лениву быти, ни унывати, но всегда, день и нощь усердствовати и пещися о себе. Усердствуй, человече, усердствуй день и нощь: к Богу вопий во дни и в нощи, непрестанное попечение о себе имей: днесь бо имаши время, днесь имаши час, инаго посем имети не будеши, аще и хотел бы еси. Не изнуряй всуе времене даннаго ти на стяжание вечных благ: время бо мало, дел же без числа. Торжище расходящееся, купля же притрудна: тщися, трезвися, непрестанно о сем попечение имей, да не наг в день страшнаго суда обрящешися. Днесь сие исправи, утро же ино, и тако никогдаже в деле преставай, никогдаже празден буди. Помяни, яко ради временныя славы, ради тленнаго богатства, ради вещей суетных, колико страждут, колико труждаются, колико тщатся: ты же о толиких вечных благих, како не тщишися? како не усердствуеши, но ленишися и почиваеши? Глаголю ти: усердствуй, трудися, тщися, дондеже имаши время, дондеже есть час, да не погубиши всуе времене даннаго ти на стяжание вечныя жизни. [2] На пути еси века сего, шествуй: на леде еси весенном, не буди безпечален: на брани еси сего мира, борися: на торжищи еси временном, купуй: блюди, да не тощ и наг в дом свой вечный возвратишися: видиши бо, яко инии непрестанно отсюду отходят, и ты не вдолзе пойдеши: непрестанно умирают, и ты не вдолзе умреши: ниже паки веси коего времене, коего часа, днесь ли, или утро: рано ли, или в вечер: в полудни, или в полунощи: сего ради никогдаже буди безбоязнен: не малая бо ти предлежит вещь, но великая: не временная, но вечная. Сего ради подвизайся усердне, не ленися, не унывай, настоит бо ти подвиг, предлежит ти победа, подвигоположник зрит, венцы уготовани, почесть предлежит, слава и наслаждение непременно: лицы ангельстии, и архангельстии, и всех небесных сил, зрят и чудятся: всех святых собори ожидают, со зельным желанием прияти тя надеющеся. [3] Усердствуй убо, человече, ко Господу тепле, не ленися, яко да вся будут ти спешна и радостна: да вся будут ти желательна и любима: днесь бо ты сего ради ленишися и унываеши, понеже всем сердцем своим Господа не любиши: тесен бо и прискорбен мнится быти путь вводящий в живот не любящим Бога: аще же кто его истинно возлюбит, ни единаго к тому труда имети будет, но вся ему радостна и желательна будут: святии бо, иже истинно и прилежно Бога возлюбиша, всяк труд им был безтруден, печаль без печаль, скорбь без скорби: нецыи бо разжегшеся Божественною любовию, ниже в сонном спании возмогли утолити к Богу своего желания, тако якоже и самую пищу и питие презирати им: не возмогли насытитися пресвятаго его имени, пречистых его Божественных словес. Сице возжгоша души своя Божественною любовию, якоже забывати им, аще в теле, или кроме тела суть: и с радостию Христа ради предавали себе на смерть. Сице нецыи разжегошася Божественною любовию, яко аки в чуждых телесех подвизахуся, в посте и молитве, и бдении: предаваху себе на раны и убиение, и не чуша болезни от зельныя их к Богу любве: любимаго бо ради вся любима и желательна суть. Мы же, понеже Господа своего истинно не любим: сего ради нетрудное дело мнится быти трудно: и нетяжкое тяжко мнится, и удобное неудобно. Возлюбим убо истинно Господа, да вся будут нам спешна и угодна, да вся будут нам радостна и любезна: любящему бо Бога, вся поспешествуют во благое, глаголет апостол (Рим: за\ч 98). [4] Восходи день от дне к горним степенем: преуспевай в добродетелех и подвизех: не ленися, не не чувствуй, не даждь себе покоя, не даждь ослабы, не даждь опочивания: не покоя бо днесь время, не почивания, но подвига и тщания: беси бо не почивают, но ретятся, и уготовляют непрестанно сети и тенета по всем стезям твоего шествия: назирают, смотрят твоея кончины, ожидают от плоти твоего разлучения, ухищряют различне препяти и яти тя чим хотяще, яко да сетей их не угонзнеши. Не мни, яко мир и покой в веце сем есть, но рать и борба. Сего ради бодрствуй всегда, и никогдаже почивай: почиеши тогда, егда победиши, егда сетей вражиих свободишися, егда всех козней превышше будеши, егда Богу соединившися, пресвятыя его любве исполниши свою душу. [5] Помяни убо, колико человецы ради тленных и мимотекущих вещей страждут и труждаются: нощи не досыпающе, никогда опочивания себе дающе, в купечестве, в художестве, в хлебном орудии, в воинстве, в морском плавании, в путешествии в дальныя страны, и во иных различных попечениях и трудех: ты же ради вечных и безсмертных благ ни мало потрудитися хощеши, но ленишися и не чувствуеши. Но убо тщися, трезвися, и воспряни о себе: почто ленишися? почто не чувствуеши? почто время свое праздне изнуряеши? или уже скончал еси? или уже победил еси? или уже без брани еси? или уже с Богом соединился еси? Что делаеши? что купуеши? Внемли себе: торжище расходящееся, солнце к вечеру приближается, суд при дверех ожидает, жатва приходит, жизнь твоя день по дню скончавается: ты же что седиши празден? что мятешися суетне? кто бо во время сеяния спяй, или седяй, потом наставшей жатве, недро исполни рукоятьми? Кто обымает виноград, от него не насажденный? Онех суть плоды, ихже и труды: честь и венцы победивших суть, якоже глаголет некто. [6] Почто не вопиеши тепле к Богу, отнюдуже весь еси? почто не трудишися: почто не делаеши? почто не собираеши, донележе есть время, донеле есть час? приидет безгодие, егда ничтоже делати возможеши: время жизни твоея, яко един день есть. Вопий к Богу: трудися, трезвися, купуй, делай, собирай, жни, донеле есть жатва, донеле есть погодное время, донеле не найдет нощь, донеле не приидет зима, в нейже аще и хотел бы еси что делати, не возможеши. Кто леняся и не пекийся снискивает временное богатство? кто не радя и не чувствуя, приемлет честь и славу? кто ничтоже делая приемлет возмездие? Никтоже. Аще же сия временная не дана бывают не тщащемуся и не пекущемуся, колико паче вечная: аще бо временная с трудом бывают, колико паче, яже пребывати имут во веки. [7] Век твой скончавается, смерть близ тебе есть, гроб и суд готов, беси ретятся: ты же что седиши празден? что глумишися суетне, и яко безсмертен пребываеши? Воспряни, воспряни истрезвися, отверзи очи, отверзи слух, разверзи память, прииди в чувство: воззри на солнце, воззри на луну, воззри на стихии Небесныя, яко непрестанно текут, умаление твоея жизни творяще, не опочивают никогдаже: ты же почто ленишися? почто опочиваеши? Помяни, како святии трудишася, какову ревность и желание к Богу имеша: помяни, колики подвиги и исправления показаша, и яко в чуждих телесех подвизашася: презреша славу, богатство, сласть тленную: презреша плоть, и самое то здравие. ничтоже в мире сем возлюбиша, ничтоже паче любве Христовы предпочтоша: ты же что тако студен еси и уныл? но убо воспряни, воспряни и непрестанное попечение о себе имей. Не днесь точию усердствуй, утро же престани: не днесь бодрствуй, утро же ленися: но всегда равне бодрствуй, равне трезвися, и никогдаже опочивай, яко да жизни вечныя сподобишися. [8] Усердно спеши ко Христу, ничимже временным запинающися: тепле тецы в след его: видиши бо, яко мир сей прелестен есть и превратен: видиши, яко ничтоже в нем есть постоянно и непременно: но вся яко в сонном мечтании изменяющаяся. Днесь тишина, утро смущение: днесь радость, утро плачь: днесь веселие, утро скорбь: днесь здравие, утро недуг: днесь живот, утро смерть: ничтоже в нем есть постоянно и непреложно. Кийждо день влечет с собою изменение: аще днесь радостен еси, утро ожидай печали: аще днесь здрав еси, утро надейся болезни: аще днесь жив еси, утро чай умрети. Не всегда бо сице будеши, якоже днесь еси: но на всяк день ожидай внезапнаго изменения. Сего ради усердне тецы ко Христу: в нем бо точию едином неотменная тишина и вечный покой: в нем точию едином непременная радость и присносущное наслаждение, инде же нигде: но все суета, все прелесть, ложь и непостоянство. [9] Буди яко на путь всегда готов, непрестанно о сем попечение имей. Кто на путь временный далекий шествовати хотя, не с прилежанием готовится? кто на куплю земную идый, не приготовляет потребных? ты же на путь неизбежный, на торжище вечное ити имый, не готовишися? почто о сем ленишися и унываеши? Действо есть твоего нечувствия: к безсмертию бо восходя ленишися: к вечной славе шествуя унываеши: ко присносущному наслаждению поспешая сетуеши. Кто ленится, на земное пиршество идый? кто скорбит, сего мира честь и славу прияти имый? кто опасается, временное богатство прияти желаяй? Никтоже: но паче вси ретятся, вси усердно о сем тщание и попечение творят. Но понеже се суетно и маловременно есть: сего ради ты всегда усердствуй в деле Божии, а не скорби и не унывай: веселися, а не буди смущен понеже за мал труд велие и вечное предлежит ти возмездие. [10] Темже готовися, человече, непрестанно к сретению Небеснаго жениха, пресладкаго Господа Иисуса: яко да усрести его с горящим сердца твоего светильником и теплою душею возможеши: се бо точию едино с тобою остати имать во веки. Воспаляй всегда светильник сердца твоего: блюди, да не когда в тебе угаснет, и во тме нечувствия и лености оставит тя: блюди, да не затворяттися милосердия Господня двери, и вне чертога Христова останеши. Готовися на приятие внутрь тебе Господа славы, разверзи сердце твое, разшири душу твою, приими при дверех сердца твоего стоящаго, и непрестанно до души твоей толкущаго и глаголющаго: се стою при дверех и толку: аще кто услышит глас мой, и отверзет двери сердца, вниду к нему, и вечеряю с ним, и той со мною, глаголет Господь (Апок. гл\ва 3). Емуже слава и честь да будет, ныне и присно, и во веки веков, аминь.