<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 3 Глава шестая О еже терпети вся находящая доблественно. В терпении вашем стяжите души ваша, глаголет Господь (Луки за\ч 106): претерпевый до конца, той спасен будет (Матф. за\ч 36). Муж терпелив, яко твердейший есть адамант, нетерпелив же, якоже трость, удобь от ветров движущаяся. Муж нетерпелив, двоедушен и наглодушен, неустроен во всех путех своих, глаголет апостол (Иак: за\ч 8): и никогдаже покажет кую победу претерпеваяй же удобь победит и приимет вся. Аще бы мученицы не имели терпения, не бы венчалися, не бы толику славу и честь получили. [2] Господь научи нас собою терпения, образ нам себе показав: неповинен бывши смерти, нас ради на Кресте умре, яко да и мы его ради вся с радостию претерпеваем: иже укоряемь, противу не укоряше, стражда не прещаше: иже грехи наша сам вознесе на теле своем на древо, да от грех избывше правдою поживем: егоже язвою мы вси исцелехом, якоже глаголет апостол (Петр: за\ч 59). Претерпи убо и ты с радостию вся, да услышиши глас глаголющь: понеже соблюл еси слово терпения моего, и аз тя соблюду от годины искушения, хотящаго приити на всю вселенную (Апокал: гл\ва 3). [3] Христос терпением на Кресте победи врага, терпением осуди смерть, терпением разори ада, тму прогна, спасение наше содея: и яже невоздержанием и нетерпением прадед наш адам погуби: сия Спаситель наш вкушением горестным, и крестным претерпением взыска. И понеже он нас ради толико пострада, понеже он толико нас ради претерпе: ты же ни мало его ради претерпиши? Не буди то. Сего ради мужественне претерпевай во временной сей жизни всякия от Бога наносимыя скорби, яко да во грядущем веце вечно о сем возрадуешися. Не претерпеваяй бо кто зде скорбных, радостных посем не приимет. [4] Блажен муж, иже претерпит искушение, зане искусен быв, приимет венец жизни, глаголет апостол (Иакова за\ч 50). Не име един от четыридесять мученик терпения, и абие яко вода в бани излияся: претерпевшии же нетленными венцы увязошася. Единою не претерпевый вся погуби: до конца же вмале претерпевшии, вечне венчашася. Нетерпеливый всегда яко изумлен есть: аще случится ему что сопротивно, не по воли сердца его, абие на всех наскакует, на всех ропщет, всех виновными творит, а не себе, себе же всяко оправдает. Но ты убо буди пригвожден всегда на Кресте терпения, с радостию вся претерпевай, аще и по вся дни глаголют ти беси: сниди со креста терпения и страдания, насладися ослабы, яко иудее ко Христу глаголаху: сниди, рекше, со Креста, и веруем в тя (Матф. за\ч 68). Ты же никогдаже ослабевай, ниже исходи, но пребуди всегда на Кресте терпения и мужества, якоже моисей, внегда име Крестообразно простерты руце, побеждаше амалика, егда же ослабляше, побежден бываше (Исхо\д: гл\ва 17): и ты убо егда пребудеши всегда в неизменном терпении и мужестве, преодолееши врага, мысленнаго амалика: аще же ослабееши, и разленишися, побежден будеши от него. [5] Терпя потерпех Господа, и внят ми, глаголет Пророк (Псалом 39): терпение убогих не погибнет до конца (Псалом 9). Внемлет Господь терпению, отвращается же наглодушия: терпеливии в след его шествоваху, нетерпеливии же наглодушнии, отвращахуся: мнози бо рече, возвращахуся, и ктому не хождаху со Иисусом, глаголюще: жестоко есть слово, кто может его послушати (Иоан. за\ч 24)? Горе вам погубившим терпение, и что сотворите, егда посетит Господь, глаголет сирах (Сира\х: гл\ва 2). Муж нетерпелив и наглодушен, подобен есть на леду или на песце, а не на камени терпения и упования храмину свою зиждущему, по притчи евангельской (Луки за\ч 28). [6] Елико, человече, злонравен еси, толико и страдати не отрицайся, да сим злостраданием злобы избудеши, глаголет некто. Елика язва, толико и врачевание: елико велик струп, толика имать быти и цельба: елико велик грех, толико имать быти и страдание. Сего ради памятствуя своя многая недостаточества, не отрицайся никогдаже цельбы терпения: яко да узрев свое душевное здравие, зело посем о цельбе терпения возрадуешися, и Богу благодарение о сем воздаси, яко исцели тя. [7] Претерпевай убо благодарне вся находящая: аще случиттися что от кого печально, не онаго виновна твори, но себе: не туне бо Бог на тя сие попусти, но имиже весть судьбами, к твоему исправлению: ничтоже бывает без Бога. Бог убо многажды врачуя тя, различна попущает искушения: ты же неблагодарне приемля, инаго виновна твориши, а не себе. Не твори убо ты никого виновна, но себе: яко по делом приял еси. Лучше муж долготерпелив, неже крепок: терпелив муж мног в мудрости, малодушен же крепок без ума (Притч: гл\ва 16). [8] Не скорби на оскорбляющаго тя, но паче благодарне претерпи: лучше бо есть оскорбляему быти от кого, неже кого оскорбити: лучше безчествуему быти, неже кого безчестити, укоряему быти, неже укоряти, обидиму, неже обидети. Не велие бо есть се, еже бы ты обидел кого, или безчестил: се же велие, еже от кого обидимь и безчествуемь бывши, благодарне претерпиши: за обидение бо и безчестие, казнь, за терпение же велие от Бога возмездие и почесть. [9] Кто хотя чесого научитися, и не претерпеваяй во учении, что навыкнет? кто не претерпеваяй лечбы, исцелит язву? кто терпеливно не носяй на плещу своею Креста терпения, в след Христа шествует? никтоже. Вси елицы в след его шествовати хотяху, уготовиша себе к терпению и искушению, по рекшему: аще приступаеши работати Господеви, уготови душу свою во искушение: управи сердце свое, и потерпи, глаголет сирах (Сирах: гл\ва 2). Скорбит и смущается отроча о своем учении: егда же извыкнет, зело посем радуется. Скорбит и вопиет недугуяй, не хотя претерпети горькаго к язвам приложения егда же оздравеет, зело посем благодарит врачующаго: сице и в сем есть. [10] Призываяй нас к себе Господь, к терпению и брани поощряет нас: аще кто, рече, хощет в след мене ити, да отвержется себе, сиречь, самолюбия воли своея, и возмет Крест свой, терпения и мужества и в след мене да идет (Матф. за\ч 69). не взимаяй же Креста терпения и мужества, ниже хотяй мало претерпети что, како в след его шествует? никакоже. Не прошедый бо кто сквозе огнь и воду терпения, како внидет в покой, по Пророку глаголющему? проидохом сквозе огнь и воду, и извел еси ны в покой (Псалом 65). Претерпи убо и ты доблественне вся находящая искушения, яко да внидеши в покой, и венцем нетления венчаешися. Пребуди всегда в неизменном терпении, мужестве же и воздержании, яко да умертвиши плотския похоти, яко да притупиши греховное оружие, да победиши ада, мысленнаго амалика: ничим бо тако победити его можеши, якоже терпением и воздержанием: тем проженеши бесы, угасиши геенский пламень, укротиши страсти всеконечно, муки и горести избудеши, и жизнь вечную получиши, ктому и присносущных благ сподобишися, о Христе Иисусе Господе нашем.