<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 3 Глава четвертая О еже не зело скорбети в скорбных. Не скорби, человече, безсловесно о вещех мимотекущих, понеже все преходит, все мимоидет: несть ниединыя сицевыя вещи, о нейже безпамятно скорбети имел бы еси: не точию о вещех мимотекущих, но и о самех пред Богом велицех прегрешениих. Аще бы и всякое согрешение превзошел твой грех, обаче не зело отчаятельно и безпамятно скорбети должен еси: несть бо грех побеждающь милосердие Божие. Не соравняются греси наши пучине Божиих щедрот, иже туне нас милосердием своим спасает. [2] Бог всего мира грехи носит, и покаянием комуждо грехи отпущает: ты же мниши, яко тебе единаго человека грехов не понесет? О всем мире кровь свою излия, тебе ли единому оставления кровию своею не подаст? Точию ты престани от греха, точию ты покайся: рцы точию ты грехи своя, яко да оправдишися. Рцы: исповем на мя беззаконие мое Господеви, и абие оставит нечестие сердца твоего (Псалом 31). [3] Не на скорбь и печаль призывает тя к себе Господь, но на радость и веселие: радуйтеся, рече, о Господе вси правии сердцем, якоже и сам по востании своем из мертвых первейшее слово благовествова женам: радуйтеся (Матф. за\ч 115). Радоватися мироносицам повеле, а не скорбети: ибо он плачь прабабы евы устави воскресением своим, яко Бог. Того ради и ты радуйся о нем, а не скорби, веселися о Господе, а не буди смущен. Не скорби сам, ниже инех безсловесно оскорбляй, но к коемуждо буди кроток, долготерпелив. Другдругу бываим блази, милосерди, не самолюбствующе, но кийждо нас ближнему да угождает во благое, якоже глаголет апостол (Рим. за\ч 116). [4] Не скорби, аще что не по воли сердца твоего деется в мире: не бо могут вся деятися по мысли твоей, якоже ты хощеши: понеже не вся хотения твоя бывают блага, ниже вся получения полезна: но содеяся ли что по твоему хотению и желанию? добре: не содеяся ли? воли Господней оставляй. Аще тако содеяся что, якоже ты хотел еси, благодари: аще не тако, не скорби: не во веки бо бывают вся зде, но зело на малое время каяждо есть вещь в веце сем: тебе же едино точию предлежит, да не будеши чуждь Господа, и его пресвятыя благодати. Не усильно желай, да твоя желания всегда исполняются, да вся похотения твоя бывают: сия бо не в твоей власти суть, но в Божией: паче же ина воля Божия, ина же твоя, и судьбы его различны, ихже ты не веси, не бо вся разумети можеши. Сего ради не скорби ни о единой вещи, но на Господа вся возлагай: Возверзи, рече, на Господа печаль твою, и той тя препитает, не даст в век молвы праведнику (Псалом 54). [5] Не буди малодушен и нетерпелив, абие внезапу всему хотя по воли твоей содеятися: но благодушне и пождательне Богу молися, воли его во всем быти оставляя, долготерпеливне ожидай. Не зело желай, да вся желания твоя исполняются: не всяко бо желание твое есть благо, ниже всяко получение полезно: но яже суть по воли Господни, сия же искусити можеши долговременным пожданием, и протяженною к Богу молитвою. Аще будет по воли Господни, даст ти и поспешит: аще ли ни, препнет ти и возбранит, имиже весть судбами, к твоей пользе: ты же, даст ли, или не даст, вся в кротости сердца благодарне приемли. [6] Не наглодушне на куюлибо вещь нападай: но с велиим разсмотрением вся делай: всяка бо вещь с пожданием и разсмотрением полезнейша и твержайша быти обыче. Аще бо бы абие вся вещи по желанию сердца твоего возмогли совершатися, никогдаже свою немощь в чем познати возмогл бы еси, никогдаже бо что с пользу души своей приобрел еси, но вся сопротивная деял бы еси. Сего ради яко всевидец Господь, милуя и щадя свое создание, устрояя комуждо полезная, не всегда вся дает ти по воли твоей, но многажды и пресецает и возбраняет, якоже он сам весть, ко твоему вразумлению, яко да прознаваеши свою немощь, яко да пребудеши смирен, кроток, терпелив, а не малодушен, воли Господней вся да оставляеши. [7] Оттерзая бо и отлучая ум наш от земнаго безсловеснаго пристрастия Господь, яко истинный врачь врачуя душу нашу, часто пресецает желания и похотения наша, многажды прелагает в скорбь и горесть, яко да безсмертнаго и вечнаго утешения в Господе Бозе взыскуем, еже не отимется от нас во веки. Сия бо вся суть на мал час, на малое время, она же во веки вечныя конца не имуще пребывати имут. Кая бо тебе будет польза, аще и вся хотения твоя исполнятся, ты же Бога на час прогневаеши? Кое ти будет приобретение, аще и вся желания твоя сбудутся, ты же Господни благодати чуждь будеши? Никоеже. [8] Сего ради, елико благодарне претерпиши от Господа наносимыя непомысльныя скорби, толико посем утешение от него приимеши: по множеству бо, рече, болезней моих, в сердце моем утешения твоя возвеселиша душу мою (Псалом 93). Не скучай, грех ради, смотрительне от Бога попущаемою скорбию и препинанием, но благодарне яко некое велие души врачевание приемли. Лучше бо зде претерпевати временную скорбь, неже посем скорбети вечно: лучше зде, а не онамо: зело бо окаянен есть сей, иже много согрешаяй, не претерпевает о гресех зде благодарне скорбных, и непомысльных, но всегда хощет, да вся деются по воли сердца его. Веждь, яко скорбети имать во грядущей жизни и не хотящи. [9] Хотя Господь исцелити и очистити душу нашу от греха, различны скорби и печали зде многажды попущает на ны: яко да очищшеся, яко злато в горниле, светли явимся: и да зде утеснени бывше в скорбных, всегда усердне притекаем к нему, помощи его ищуще. Ко Господу внегда скорбети ми, воззвах, и услыша мя (Псалом 119). Умножишася немощи их, по сих ускориша, глаголет Пророк (Псалом 15). В скорби бо многажды к Богу прибегаем, в радости же забываем его: Бог же яко премудрый врачь, различне исцеляя нас, обоя наводит нам. Аще в радостных и помысльных не благодарим его, скорбная попущает на ны, яко да во обоих благоразумни, и искусни пребудем. [10] Бог различне милуя и щадя свое создание, лучшая о нас предзревый, не хощет зде дати на земли ни единаго пространства известнаго, покоя и утешения, но паче тесноту и скорбь. В мире бо, не радостни, но скорбни будете, глаголет Господь (Иоан. за\ч 55). Хощет нас в мире сем имети всегда во утеснении и скорби, а не в пространстве и благоденствии, да не разливаемся в земных прелестных сластех: да от здешняго утеснения и скорби усерднее и спешнее восходим к горнему и вечному о Господе пространству: и тамо во веки вечныя утешени, присно о нем радующеся и веселящеся, во веки безконечныя будем. Аминь.