<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 3 Глава третия О еже не гневатися, и не памятозлобствовати ни на когоже. Всяк гневаяйся на брата своего всуе, повинен есть суду, глаголет Господь (Матф. за\ч 12). Не гневайся ни на единаго человека, аще и зело от кого оскорблен будеши: гнев бо мужа правды Божия не соделовает, глаголет апостол (Иак. за\ч 51). Солнце да не зайдет во гневе вашем: всяка горесть, и гнев, и ярость, и хула да возмется от вас во всякою злобою: бывайте же другдругу блази, милосерди, прощающе другдругу, якоже и Бог во Христе простил есть вам, глаголет апостол (Ефе\с. за\ч 227). [2] Блюдися и благословна гнева, да не смутиши яростию душевнаго своего ока: смятеся бо, рече, от ярости око мое, обетшах во всех вразех моих (Псалом 6), ни о чемже отнюд ни на кого гневатися должен еси, точию аще кто от Бога и любве его отлучал бы тя. Аще же не отлучает тя никтоже, всуе гнееваешися: обаче, никтоже никогоже от Бога и от любве его, не точию человек, но ниже огнь, ни мечь отлучити возможет, глаголет апостол (Рим. за\ч 99). [3] Сего ради престани от гнева, и остави ярость: не ревнуй еже лукавновати, яко лукавнующии потребятся, терпящии же Господа, тии наследят землю, глаголет Пророк (Псалом 36). Несть в мире ниединыя сицевыя вещи, о нейже благословне раздражатися, и оскорблятися безпамятно на кого имел бы еси, аще и зело мниши быти нужно и потребно, но не обрящеши, точию о славе Божией, и о презрении его заповедей: обаче и сие с разумом, да не како исправляя иных, самаго себе повредиши. [4] Нигдеже слышим Господа ярящася, и зельне гневающася на согрешающих, но кротка и долготерпелива. Научитеся, рече, от мене, не ярости, ни гнева, но яко кроток есмь и смирен сердцем, и обрящете покой душам вашим (Матф. за\ч 43). И егда ученицы гневающеся на согрешающих, глаголаху: Господи, хощеши ли, речема, да огнь снидет с Небесе, и потребит их? Он же запрети има, рек: не веста, коего Духа еста (Луки за\ч 48). И нас наказуя глаголаше: аще отпущаете человеком согрешения их, отпустит и вам отец ваш Небесный: аще ли не отпущаете человеком согрешений их, ни отец ваш Небесный отпустит вам согрешений ваших (Матф. за\ч 17). [5] Но убо речеши: обидел ми он, злословил мя, безчестил мя пред всеми, злая ми мыслит, злая ми творит, велико ми зло содела: кто убо вящше обиден бысть паче Бога? кто злословимь, безчестимь, хулимь бысть паче Господа? яко биен заушен, оплеван бысть, распят, и копием в ребра прободен бысть: обаче не памятозлобствоваше, и не гневашеся, но и на Кресте умирая моляшеся за согрешающих, глаголя: отче, отпусти им, не ведят бо, что творят (Луки за\ч 140). [6] Кто памятозлобствуя, и безпамятне гневаяся, что благо исправи? кто не имеяй кротости и долготерпения, кую совершенну добродетель, или победу показа? Никтоже. Апостоли бо, аще бы безсловесно ярилися, и гневалися на согрешающих, ниединаго бы на путь спасения наставили, ниединаго бы ко Христу привлекли. Аще некогда и ожесточахуся на согрешающих, обаче не ярящеся и без памяти гневающеся, но благоразумно с долготерпением, Богу о согрешающих молящеся, исправляху и наказоваху их. [7] Смотрительне от Бога устроена есть мати пчелам, не имети в себе жала: аще бо имела бы, всех бы умерщвляла своим угрызением. Се образ есть старейшинам: старейшине бо всяко отречено есть имети в себе забвенный гнев и ярость, да не всех повинующихся умерщвляет своим яростным нападением. Буди убо ты побеждаяй благим злое, а не злое злым: огнем бо огня не угасиши, но водою: ниже ярости яростию победиши, но кротостию и долготерпением. [8] Лучше кого исправиши кротостию, неже яряся: лучше милостию, неже гневом: лучше есть, да паче любят тя повинующиися, неже боятся: от боязни бо раждается ложь и лицемерие: от любве же истина и усердие. Аще бо с яростию и гневом исправляеши кого, не точию не исправиши, но и себе и онаго повредиши: яряйся бо и безпамятно гневаяйся, ничимже разнствует от пиянаго: ибо ярость и гнев, изступление ума творят, всего изменена человека соделовают: гнев бо и ярость, сия суть мерзость, глаголет иисус сирахов (Сира\х. гл\ва 27). [9] Яряйся, и безпамятно гневаяйся на кого, не весть что глаголет: аще бо с яростию и гневом когда изречет что, посем разсмотрев со стыдением вспять возвращает своя словеса. Мнози, иже с яростию и гневом когда содеяша что, посем зело о сих раскаяшася: ибо ярость попущенная помрачает разум, опечаляет душу, погубляет разсуждение и память: и что посем быти имать, ведети не попущает. Яряйся и безпамятно гневаяйся, во всем слеп есть: удержаваяй же гнев и ярость, удобне удержит вся злая. [10] Темже аще случится ти когда раздражитися, и разгневатися на кого, тогда наипаче ничтоже глаголи, но или отиди, или затвори уста своя, да не изскочит яростный пламень, и опалит душу, и сущим с тобою сотворит напрасен мятеж: но егда угаснет яростный пламень, и мирно будет сердце, тогда по сем яже ко исправлению мирно глаголи: благоприятнейшее твое слово будет в кротости едино, неже в ярости глаголемых тысяща. Много лучше исправиши кротостию, неже яряся и раздражаяся: и онаго бо благоразумне вразумиши, и себе самаго пользуеши.