<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 3 Глава вторая О еже не завидети кому ни во единой вещи сего мира. Не завиди, человече, ниединому кому о благополучении сего века преходяща: трава бо есть и цвет сельный, всяка вещь в мире: не завиди богату и славну, ни в земных сластех гобзующему: но в добродетелех процветающему благоумен подражатель буди. Почто бо о настоящих благополучениих завидети имаши, понеже вся в мире сем временная и тленная суть? или богат, во веки ли тако пребудет? Аще кто в сласти и благополучении из_обилует, всегда ли? Но зело на мало время дана сия суть. [2] Не завиди убо ни единой вещи сего мира: не завиди имению, богатству же и славе, и всякому плотскому наслаждению: не завиди сану, чести, и всяким достоинствам: не завиди внешним жилищам и прекрасному зданию, или коему изобилию: вся бо сия временна и тленна суть: вся преходяща, и яко дым вскоре исчезающая. Вся зде останут, вся в прах и пепел пременятся, ничтоже бо есть вечно на земли: точию сим благоразумно завиди, аще кто присоединится Господеви, аще сподобится благодати Престаго Духа. Аще бо кто сию приимет, паче всех богатых и славных богатейший и славнейший будет. [3] Не завиди, аще кого почитают или славят, или в чем кто из_обилует паче тебе: но яко сонная мечтания сия быти вменяй. Не завиди земным тлеющим вещем, но к Небесным вечным сердце твое вперенно имей: не се бо есть Благодать Божия, еже обиловати в чем, или почитаему быти на земли, но еже пребыти всегда при Бозе. Велия есть боязнь и страх в земных благополучениях обилующему: внезапу бо приходити обыче тяжчайшее изменение, и отчуждение восприятых благих сих. Не много ли бе прежде славных, богатых, храбрых, премудрых? но днесь сех земля покры, и память их яко небывших погибе. Человек бо яко трава, дние его яко цвет сельный, тако оцветет: яко дух пройде в нем, и не будет, и не познает ктому места своего, глаголет Пророк (Псалом 102). [4] Веждь, яко не зело завидел бы еси, притворен вмале образ царский не себе носящему, или в сонном мечтании богатеющему: ниже сему завидел бы еси, аще бы кто на един день получил кую почесть, и посем надолзе безчествован был бы. Сего ради аще кто славится, да славится: аще кто богатеет, да богатеет: ты же себе внемли, хваляйся, о Господе точию да хвалится, богатеяй, о Господе да богатеет, глаголет ап\стол (Корин. за\ч 105). [5] Не завиди похваляемым, аще кого похваляют и славят человецы: но с похваляющими и ты благое похваляй, злое же молчанием преходи. Не завиди, аще кого блажат, и вси добре глаголют о нем: несть бо постоянно похваление человеческое, но зело превратно: овогда похваляют человецы, овогда же злая вещают: овии славят, овии же безчестят: овым угодно, другим же несть: днесь некто почтен бысть, утро же внезапу обезчестися. Не пребывает во единой мере, ни похвала, ниже безчестие человеческое, но вся вскоре изменяются. [6] Почто Богу в Божиих завидиши? почто Богу в Божиих возбраняеши? Не завиди убо ни единому человеку ни в чемже но достоин пред Богом быти потщися, да и ты приимеши по мере, егоже достоин будеши: несть бо лицемерия у Бога, но праведное комуждо по достоянию возмездие. Он бо всех человек правою мерою по возможному умери, и когождо своею честию почте, оваго сице, оваго же сице: но наипаче блажен сей человек, емуже Господь Бог его, глаголет Пророк (Псалом 32). [7] Почто завидети имаши всех чести и достоинствам? Понеже ты един сам вся обяти не можеши. Почто завидети имаши благополучению сего века преходяща? Понеже все вскоре преходит, все мимоидет. Мир сей прелестен есть, и вся в нем превратна: днесь почитание, утро же укорение: днесь слава, утро же безчестие: елико кто наипаче прославится, вознесется честию, толико посем наипаче обезчестится: зде ли, или онамо в грядущей жизни. [8] Не буди завистию снедаяй себе, видя инех, паче тебе почитаемых, славимых, и богатеющих. Бог бо весть своими судьбами како творит: кому что дарует, он лучше сам вся весть дати. Не леть ли господину сотворити во своих си, якоже хощет, овому сие, овому же оно? не завиди убо, да не услышиши осуждения гласа глаголюща: возми свое и иди: не леть ли ми в моих сотворити, якоже аз хощу, по евангельской притчи (Матф. за\ч 80)? Сего ради престани зависти, отвержи ненависть, да не вне чертога Христова останеши: завидяй бо яко убийца судится, глаголет некто. [9] Зависть всему злу есть вина, всему же благому супостат. Зависти ради каин авеля уби: исав иакова преследова, саул Давида гони: и тмами тем зависти ради деются злая в мире. Зависть и ненависть затворяют Небо, ослепляют разум, помрачают душу. отягчают совесть, опечаляют Бога, веселят бесы. Завидяй, и ненавидяй брата своего, во тме ходит, и не весть камо идет, глаголет апостол (Иоан. за\ч 70). Зависть не весть предпочитати полезная: идеже зависть и рвение, тамо нестроение, глаголет апостол (Иак. за\ч 55). [10] Темже во своем от Бога устроении благодарен пребуди: на сем преставай, еже ти Бог даде: вящшим же тебе в благополучении и чести не завиди: в неже зван еси и устроен, в том пребывай, вящшим же завистне не ревнуй. Предпочтенных от Бога и от человек и ты предпочитай, и ко отвещанию онем любезен и смирен буди. Емуже Бог что дарова, ты завистию не отемли: тебе же еже не дано бысть, гордостне себе не восхищай: никтоже бо собою прияти что может, аще не Бог кому дарует. Всяка власть и честь от Бога, якоже глаголет апостол (Рим. за\ч 111).