<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 3 Глава первая О еже не сребролюбствовати, но на Бога точию единаго имети упование. Богатство аще течет, не прилагайте сердца, глаголет Пророк (Псалом 61). Велие есть безумие прилагати сердце ко злату, и уповати на гибнущее лихоимание: не надейся убо на тленное богатство, ниже в след злата иди, (любяй, рече, злато, не оправдится:) но на Бога жива упование свое полагай, иже пребывает во веки, иже вся сотвори: злато бо и сребро дела суть рук человеческих: скорее оно погибнет, неже собрал еси. [2] Не буди скуп, связан сый сребролюбием, к подаянию требующим, да не неверием обладан будеши. Не бойся, да не оскудеет ти что в мире творящему Благое. Толико бо мир стоит, и ничтоже в нем еще доселе не оскудевает: ни солнце изменися, ни реки от течения престаша, ниже земля, яже потребная, раждати преста: еще бо злато и сребро раждает, ниже раждати когда престанет, донележе мир сей стоит. Едино бо в землю входит, другое же от нея раждается, якоже злато и сребро, сице и вся жизни нашей потребная. [3] Не бойся оскудения в чем: не имел бо еси прежде сих ничтоже, днесь же имаши: аще не имаши, имети будеши: не оскуде бо вся создавый, ниже когда оскудеет: сему крепко веруй, не оскуде вся от небытия в бытие приведый, даяй пищу алчушим, и насыщаяй всякое животно всего преизобилен есть. Не буди скуп в подаянии просящим, и не отвращайся, на егоже имя просит: дай вся ти дающему, да восприимеши от него сторицею. [4] Не лакомися на чуждыя вещи, и своя бо вся не в долзе оставиши: не лакомися на суетное лихоимание коихлибо вещей: егда бо отсюду отидеши, ничтоже с собою возмеши. Наг в мир пришел еси, наг отидеши: мнози бо многая имеяху, обаче все оставльше, тщима рукама, и нагою душею отсюду отидоша. Не желай, ниже надейся на многая собрания, да не уподобишися богатому, малую разоршему житницу, и большую создавшему, и глаголющему: душе, имаши многа блага лежащая на лета многа, почивай, яждь, пий, веселися, и слышавшему: безумне, в сию нощь истяжут душу твою от тебе, а яже уготовал еси, кому будут? глаголет Господь (Луки за\ч 66). [5] Не многая гони, но о малых благодарен буди. Вси бо многая гонят, вси многих взыскуют, вси о всем пекутся, обаче и малейшая вся оставльше, ничтоже отсюду с собою взяти могут. Лучше малая имети благодарне, неже безсловесно гонити великая: лучше малое праведнику паче богатства грешных многа, глаголет Пророк (Псалом 36). Вся бо, яже зде стяжеши, и яже приобрящеши, останут на земли: ты же вся оставльши, сам во гроб вселишися, и нагою душею тамо пойдеши. [6] Не прилагай сердца твоего ко злату и сребру, и всякому земному лихоиманию, да не и сам в подземная снидеши: идеже бо, рече, сокровище ваше, тамо и сердце ваше будет (Матф. за\ч 17). Не буди связан сребролюбием, да не от любве Божия отвержен будеши: не скупствуй в раздаянии требующим, да не исчезновение во своих си приимеши: не стесняй своих рук творити милостыни, да не милосердия Божия двери себе затвориши, и вне чертога Христова останеши. Блажен разумеваяй на нища и убога, в день лют избавит его Господь, глаголет Пророк (Псалом 40): и Блажени милостивии, яко тии помиловани будут, рече Господь (Матф. за\ч 10). [7] Не буди ят сребролюбием, да не яко идолослужитель у Бога вменишися: сребролюбие бо второе есть идолослужение, глаголет апостол. Сребролюбием и скупостию ят кто бывый, якоже ад ненасытимь есть, всегда от всех любит взимати, даяти же никому ничесоже: аще и всего мира богатство стяжал бы, не насыщается: очи глубочайшия имать пропастнаго удолия, никогдаже наполняемы и насыщаемы быти могущия. аще и многа имать человек, обаче еще больших хощет: сам себе веры не емлет, аще и безчисленное богатство приимет, обаче еще не наполняется, и никогдаже от желания престает, дондеже землею покровен будет. [8] Буди щедр и милостив, да милостива Господа в день суда душе своей обрящеши, почто имаши скупствовати всуе? ничтоже бо возмеши, но наг отсюду отидеши. Мнози многа и безчисленная сокровища, безчисленная богатства снискаша, обаче ничтоже с собою вземше, все сокровище свое, все богатство свое инем на земли оставиша, тщима же рукама и посрамленною душею отсюду отидоша: и сами во гробе истлеша, богатство же их без вести исчезе, и память их с шумом погибе. [9] Всуе мятется всяк человек живый, сокровищствует, и не весть кому соберет я, глаголет Пророк (Псалом 38). Воистинну всуе мятется, иже на земли сокровищствует, не весть бо кому тая оставит, не весть кто их наследник будет. Блажен человек есть той, иже все свое сокровище, все свое богатство, все свое упование на Бога возлагает, иже сокровищствует на Небеси, идеже ни червь, ни тля тлит, идеже татие не подкопывают, ни крадут: идеже бо сокровище ваше, тамо и сердце ваше будет, глаголет Господь (Матф. за\ч 17). [10] Темже не лакомися на многое собрание злата и сребра, дрождия земнаго: вся бо зде останут, ты же сам в землю обратишися, от неяже взят еси. Не лакомися на вещи мимотекущия: и сам бо невечен еси. не зело гони сия, яже и не хотя оставиши, не прилагай сердца твоего к настоящим вещем, ибо не вдолзе тыя от тебе отидут. Презирай долняя, яко да горними обогатишися: презирай мимотекущая, яко да вечная приимеши, и присносущных Благ сподобишися, о Христе Иисусе Господе нашем.