<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 2 Глава десятая О еже яко несть ни во единой мира сего вещи покоя, точию во едином Господе Бозе вечный есть покой. В мире сем временном покоя и утешения не ищи, никогдаже бо его обрящеши: аще и все ухищрение покажеши, тишины и известнаго утешения в веце сем не насладишися: не бо может сие тленное и временное устроение даровати мир и покой душе, аще не Господь сам Благодатию своею упокоит, и мир ей дарует, якоже сам рече: мир мой даю вам: мир мой оставляю вам (Иоан. за\ч 48). Во мне мир имейте и покой, а не в чесом ином. [2] Внемли, аще где мир и покой в чесом найдеши? аще где тишину и известное утешение получиши? в славе ли мира сего? в богатстве ли временном? в пищи ли и питии? в сластех ли и похотех плотских? во сне или лености? в красоте ли и любви плотстей? или в чесом ином? но несть нигдеже от сих ни единаго мира и покоя, точию непрестанное души томление и мятеж. [3] Но убо внемли, аще есть во славе и почитании сего мира покой и тишина? несть воистинну: слава бо мира сего вскоре изменяется, паче же смешенна есть с безчестием и оболганием. Днесь многажды человецы почитают, утро же безчестят: днесь добрая вещают, утро же злая: едини славят и почитают, друзии же безчестят и хулят. Днесь некто славим и почитаем бе, утро же внезапу обезчестится. Не пребывает слава мира сего никогдаже отвсюду равне во единой мере стояща, но всегда яко луна непрестанно изменяется. [4] Но в богатстве ли и имении есть покой и тишина? Ни убо: богатство бо вскоре исчезаемо и погибаемо бывает, и со зельным попечением и молвою бывати обыче, и никогдаже мира и покоя человеку дарует. Елико вящшее богатство, толико множайшия молвы и попечения. Аще кто и всего мира богатство стяжет, всяко от молв и от желания никогдаже престанет: не удовлевается сим, но вящшаго еще требует: сам себе веры не емлет, всегда в болезни и страсе есть, да от чесого не оскудеет. От всех имать зависти, от всех имать рвения, никогдаже мирну душу во дни и в нощи быти оставляет. [5] Но в пищи ли и питии и сластех плотских есть покой? Никакоже: что бо за покой есть обядшемуся и упившемуся? точию дмение, рыгание, хрехотание, сирища отягчение, чреву разседание: сим усладися, сим же огорчися: опившемуся же такожде главоболение, рукам трясение, разума помрачение, изменение зрака, к молитвам окаменение, и отчуждение Господни Благодати, последи же скорбь и зельная печаль, паче же и самая та пища и питие со зельною молвою и попечением бывати обыче. [6] Но во сне ли и лености есть покой и тишина? Несть тако: ниже в сих известный покой и тишина, но паче разслабление, нечувствие, уныние, тма, помрачение, тягота, безнадеждие, тщета: оснуша бо, рече сном своим, и ничтоже обретоша (Псалом 75). И самое то плотское опочивание на мнозе приемлемо, тяжесть, нездравие и разслабление приносит: и паче во сне несть известнаго покоя, но мечтания нощная помраченная, мечтания ложна, прелестна, бесовская, ино ничтоже. [7] Но в любви ли плотской и сладострастном безсловесном похотении есть покой? Несть убо ни в сем покоя: любовь бо плотская, несть истинная любовь, но ложная, лицемерная, прелестная, недоуменная, дотоле, донеле вся по воли и по страсти суть. Елико наипаче кого плотски возлюбиши, толико наипаче безсловесно тому поработишися: толико наипаче любимый лукавствует, ухищряет, растлевается, развращается: пред очима сице, за очима инако, гордится, самолюбствует. И тако совершенныя истинныя тишины и покоя в любви плотской никогдаже обрящеши, точию молву и смущение, прелесть же и безсловесное связание, и от Бога отчуждение. [8] Темже всуе мятется всяк человек живый, всуе мятется всяк земнородный, убо образом ходит человек, обаче всуе мятется, глаголет Пророк (Псалом 38). Всуе воистинну мятется всяк человек живый, ища в земных и тлеющих вещех покоя: но никогдаже обрящет его. Сего ради милуя и щадя Господь свое создание, лучшая о нас предзревши, умысленно сократи сию жизнь нашу. да не на мнозе всуе труждаемся и безсловесно о мимотекущих вещех печемся: якоже и сам Господь к марфе многопекущейся глаголаше: марфо, рече, марфо, печешися, и молвиши о мнозе, едино же есть на потребу. Мариа же немногопечальна, Благую часть избра Господа, яже не отимется от нея во веки (Луки за\ч 54). Показует Господь, яко елико аще человек, наипаче всуе мятется, сокровищствует, но не весть кому собирает. Несть убо ни единаго в мире сем известнаго, ни во единой вещи покоя и тишины, точию непрестанный мятеж и зельное души томление. [9] В Бозе же точию едином, и в Благодати Духа пресвятаго мир, тишина и вечный покой: тамо радость, тамо веселие, тамо безпечалие, безсмертие, безбоязнство: тамо мир нератен, покой непременен: радость некончаемая, присносущное наслаждение, присно наслаждающее человека. Возлюби точию истинно всем сердцем Господа, и вкусивши, известне познаеши, яко благ есть Господь, и сам разлучения от тела, и с Господем всегдашняго пребывания зело возжелаеши. Он бо есть щедр и милостив, Благоутробен, отец щедрот, и Бог всякия утехи. Он есть вечный покой, един точию он сам душу нашу упокоит и утешит, и речет ей: прииди вся добрая ближняя моя, и порока несть в тебе: гряди от ливана, невесто, гряди от ливана: усердны нас сотвори сестро наша невесто, якоже глаголет соломон (Песнь песней гл\ва 4). и тако всех благ наследницу ю себе сотворит. [10] Сего ради Бога единаго взыскуй, Бога единаго всем сердцем возлюби, да покой вечный и тихое пристанище души своей обрящеши, и присносущнаго наслаждения сподобишися. любовь бо Божия есть присносущна, желание его неисповедимо, и утешение его никогдаже престаемо, присно увеселяющее душу человечу: всяку любовь плотскую, всяко желание земное, тмами тем превосходящее. любовь Божия ненасытима есть, желание его непрестаемо, всю душу светлу, зрачну, просвещенну, радостну, веселу, безстрастну, безпечальну, неленостну, неунылу творит, не сотренну, ниже скучаему, не алчну, не жаждну, но присно всех благ преисполняему и насыщаему устроит. Отрет Господь всяку слезу от очию всем сердцем его возлюбивших, и отимет всякое воздыхание (Апокал. гл\ва 7). _О Божественныя любве! _О Божественнаго желания! _О Божественныя сладости и утешения! Блажен есть, иже сего сподобится: Блажен есть, иже сие приимет о Христе Иисусе Господе нашем!