<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 2 Глава пятая О еже ни мало что о себе мнети. Не буди уловляемь самомнением и высокомудрием, мня от себе или собою сотворити что благо: от тебе бо ничтоже благо кроме помощи Божия происходити может, точию вся злая, всяк грех, понеже в беззаконии зачат еси, и во гресех роди тя мати в мир (Псалом 50). Ничтоже имаши от себе аще не от Господа: якоже сам от себе неси, сице ни от себе что благо имети можеши. сего ради не мни о себе ничтоже: мня бо себе быти что, ничтоже сый, себе льстит, глаголет апостол (Галат. за\ч 214). [2] Аще и предложение имети будеши благое, но греху кроме помощи Божия собою сопротив стати, и победити его не можеши: понеже преступления ради от рождения твоего подпал еси под иго и работу греха: того ради собою свободь его быти не можеши, аще не Господь поможет ти и укрепит тя. обаче ты от себе и предложения благаго имети не можеши, аще не Господь благодатию своею предварит е. якоже источницы воднии, аще не испустят воды, не востекут реки: сице и не поспешествующей Господни благодати, вся останут праздна. [3] Якоже ветви ничтоже от себе раждати могут кроме корене: сице ниже ты что благо изволиши или содееши кроме Божия благодати. Господь есть корень, ты же розга. Дотоле что Богоугодно творити можеши, донеле с Богом еси: егда же от Бога отлучишися, тогда во вся злая впадеши. Якоже розга не может плода сотворити о себе, аще не будет на лозе: тако и мы, аще в Господе не пребудем. Без мене бо не можете ничесоже творити, рече Господь (Иоан. за\ч 8): он бо есть корень и источник всякаго блага. [4] Како возможеши что Богоугодно сотворити, с Богом предолжением не соединяяся, ни в славу его что творя. Аще что и было бы мнимо благо, не с Богом же, несть сие благо, понеже не с Богом, ни во славу его. мнози от себе мнятся творити что Благо, но от Господа неприятно: понеже не с Богом, ни во славу Божию. всяко благое не может быти благим, аще не с Господем: ниже злое злым, аще не кроме Господа: он бо есть всему благому начало, и конец безконечный. [5] Никтоже в правду может творити, не точию благо, но ниже зло, кроме Божия попущения, и благому пособствования. Он бо вся сотвори, и во власти своей вся содержит. Но аще кто что зло творит, не помощию Божиею, ни благоволением его творит, но точию самовластием и попущением: Бог бо злу несть помогатель, но благому: обаче же, якоже злому в злых иногда содеяти что зло попущает, иногда же и возбраняет своим смотрением: сице и благому и препинает иногда, и пособствует, яко да обоих злых же и благих искусится самовластное предложение, и познается Божественная власть и держава. [6] Не всякое зло злый содеяти может кроме Божия попущения, ниже благий благое кроме помогания. Аще и самовластием кождо от Бога почтен есть, и не точию человецы, но и беси имут свое намерение, и предел своих прескакати не могут: но овому в злых, якоже весть, благословных ради вин многажды не попущает: овому же во благих не пособствует: яко да помощи его требуя убежит мнения, и познавая свою немощь, яко от себе ничтоже имать, пребудет всегда смиряяся. [7] Якоже злому многажды не всяко зло благословных ради вин попущает, сице ниже благому благое: обоих же предложение в дело написует. Аще бо бы злый все злое, благий же все благое, кроме попущения Божия, и Благому помогания возмогл бы, никтоже ни в чемже помощи Божия желал бы, никтоже о молитве и молении радел бы: но все кийждо по воли своей творил бы, ничтоже смотрение Бога премышляющаго и обладающаго мнел бы быти, ни в чем власти разность творцу от твари была бы. Сего ради не велика себе разумей быти, но мни, яко ничтоже еси: мняй бо себе быти что, себе льстит, слеп сый душею, непросвещен в разуме, и не весть, камо идет. [8] Аще не Господь созиждет дом, всуе трудишася зиждущии: аще не Господь сохранит град, всуе бде стрегий, глаголет Пророк (Псалом 126). Тщися ты, и трезвися во благом, на себе же упования не полагай, но Богу моляся помощи его усердне всегда взыскуй. Аще поможет ти, и поспешит ти Господь, совершится дело, аще ли ни, вся твоя разсыплются. Аще бы что и было мнимо твое благо, от Господа же будет не приятно, кая ти есть польза? Аще бы и восхотел еси в возношении твоем чим мнимым своим пред Господем удобритися, он же не приимет, что себе поможеши? но речет ти: друже, не обижу тебе, возми свое, и иди по притчи евангельской (Матф. за\ч 80). Сего ради вся исправления наша, не сице в нас суть, якоже в милости Христовой. Аще себе мниши быти что, сего ради пред ним ничтоже еси, понеже себе сице быти разумееши. Аще себе разумна и Благопотребна быти мыслиши, сего ради весма непотребен еси. Аще себе чиста и праведна и свята разумееши, сего ради окаяннейший, и грешнейший паче всех человек пред Господем вменяешися, понеже себе сице разумееши: нечист бо пред Господем всяк высокосердый, глаголет соломон (Притчей 16). [9] Сего ради буди смирен, разумей свою немощь: памятствуй, яко вся суть Божия, а не наша, вся от Бога суть, а не от тебе, всяко даяние Благо и всяк дар совершен, свыше есть, сходяй от отца светов, глаголет апостол (Иако\в за\ч 8). Памятствуй, яко все в милости Христовой есть, а не в твоей силе и власти: памятствуй, яко волею и неволею ко греху преклонен еси: веси, яко кроме помощи Божия и его Благодати яко паучинная сеть. Не буди горд и самомнителен, да не уподобишися бесу: бес бо сим от Бога отпаде. яко вся себе причитоваше, Богу же вся сотворшему ничтоже: сего ради всего отпаде, и обнажися Господни Благодати, и вечному томлению предуготова себе сосуд. Не мни себе быти праведна и свята, премудра и всякия чести достойна: не мни себе лучша и благопотребнейша инех, но паче всех грешнейша и безумнейша, и неключима быти себе вменяй: ты бо пред Богом без смирения ничтоже еси: преспеяние бо смирения, есть преспеяние добродетели и всякаго исправления. [10] Не буди о себе высокомудрствуяй, мня, яко ты един своим разумом и премудростию всех превозшел еси, и вся един сам обяти могий: но внемли, яко велий есть мир, и вси концы земли, в нихже различных во обоих санах лиц, Духовных и мирских, неисчетное множество премудрых и разумных, всякаго преподобия и чести достойных обретается, ихже Благодать пресвятаго Духа пречудне упремудри, и различне удобри, имже ты ни в след шествовал еси, ихже ты не веси, ниже разумом твоим постигнути можеши, колико есть безчисленное множество тмами тем во всем превосходящих тебе. Бегаяй мнит, яко скорее всех течет сам, егда же со инеми спряжется, тогда познавает свою немощь.