<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 2 Глава вторая О еже не зело утешатися о почитании и славе человечестей, прелестна бо суть. Не желай, человече, почитаемь и славимь быти от человек, да не Божественныя славы оттщетишися: не зело утешайся о славе сего мира, да не внезапу безчестием огорчен будеши: по славе бо и по почитании человечестем абие последовати обыче безчестие, по благополучении земном, тщета: по веселии и утешении плотстем, скорбь и печаль: изменителен бо есть век сей, и вся вещи в нем преходящия суть. за благополучением бо изменение и неБлагополучение всегда созади в след шествует. [2] Не прилагай сердца своего к почитанию и славе человечестей, лестна бо есть, и маловременна: ничтоже есть известно в мире, точию един Бог, и его предвечная слава: вся бо в мире сем пременяются, и всякое почитание и слава с ним преходит. Сего ради не утверждай стопы ноги твоея на сих, да не яко на леду весенном обтаявши прельщен останешися тогда, егда кое есть ти благополучение. [3] Не самолюбствуй, ниже зело веселися о почитании и величании сего мира: яко да посем и о безчестии его не на мнозе опечалишися. не зело утверждайся о почитании его, абие бо внезапу последует ему изменение: почитание бо и слава человеческа подобна есть огненной искре, внезапу блиснувшей и абие угасшей: или говору водному во мгновении ока вознесшемуся и абие разседшуся. Темже не зело утешайся о сих: утешаяйбося безсловесно о почитании и благополучении сего мира, веждь, яко посем внезапу о изменении сих безпамятно скорбети имаши. [4] Не пребывает никогдаже во единой мере слава и почитание человеческое: но яко луна непрестанно изменяется. сего ради не зело утешайся о почитании и благополучении сего мира преходящаго: абие бо в след его шествует внезапное изменение. мир сей непостоянен есть, и вся вещи в нем пременительны: днесь бо слава и почитание, и абие внезапу безчестие: днесь веселие и радость, и абие внезапу скорбь и печаль: днесь здравие, и абие недуг: днесь живот, и абие смерть: ихже мир многажды многими почитаньми и прелестно обогатил, сих внезапу смерть обнажи. [5] Не надымайся сердцем в гордыни своей, ниже величайся о человеческом предпочитании, мня себе велика быти: но яко сонная мечтания, сия быти вменяй. Несть бо постоянно почитание человеческое, но зело превратно. Почтоша иудее ветвьми и ваиами Господа, и абие оплеваша его (Иоан. за\ч 41): предпочтоша вмале, и абие внезапу обезчестиша его. Едини почитаху друзии же Крест на пропятие готовяху: преклоняху пред ним колена, и абие по ланите его ударяху. приглаголаху: радуйся Царю иудейский: и абие терновый венец не пречистую главу возлагаху (Иоан. за\ч 59). Сицево есть почитание и слава человеческая. Почтен бысть царь Давид чрез самуила на царствие помазанием: и абие саулом гонимь бяше (1 Цар\с гл\ва 16). Почтен бысть от царя арта_ксер_кса паче всех князей аман, и абие повешен бысть (Есфи\р гл\ва 7), внезапное есть изменение Благополучение и прочитание 510. [6] Злохитростен есть мир, и его почитания: егда бо человек в благоденствии есть, вси почитают и славят его: егда же в презрении, вси отвращаются. Егда во благополучии, множество другов и ласкателей: егда же в злострадании, вси далече отстоят. Апостоли, егда Христос от всех почитаемь и чудимь бяше, вси в след его шествоваху, егда же злостраждаше вси его оставльше, далече бежаша. Темже не надейся на Благополучение и почитание человеческое, но на Бога всю надежду и упование свое возлагай: день и нощь к нему единому сердцем и умом всегда возвышайся. [7] Предпочитание и слава человеческа, за благополучением, якоже сень за солнцем шествует: егда солнце сияет, тогда и сень обретается: егда же изниче, тогда и сень погибает. сице и егда есть кому благополучение, вси человецы славят и почитают: егда же лишение, вси презирают и нерадят о нем. Уподобися польному желтому цвету иже с восхождением солнца от востока развивается, со захождением же паки к западу согибается, и никогдаже во единой мере стоит: сице и мир сей со нравы и почитаньми своими. [8] Предпочитают убо многажды, и славят человецы пред очима сладостне, отшедше же посем клевещут, и оглаголуют горестне. Днесь добрая глаголют, и абие утро злая: пред очима сице, за очима же инако. Несть постоянно, но пременно почитание человеческо, зело же прелестно и превратно. Едини почитают, друзии же безчестят: едини похваляют, друзии же хулят: едини добрая вещают, друзии же злая. несть мощно пребыти неподвижно, в равней мере человеческия славы же и почитания, но всегда в премене. [9] Мир сей с почитаньми своими присно обращателен устроен есть, якоже коло @млиновое@ {@мелничье@}: всегда от горы низу, и от низу горе непрестанно обращается: егда же престанет вода тещи, тогда и оно остает праздно. Мир сей всегда лицемерствует: вящшая бо от ветров и бури премена на высоте почитания стоящим, неже во удоли смирения и презрения шествующим. Елико бо велико почитание, толико вящшая боязнь, елико кто развеличится почитанием и славою, толико посем смирится безчестием, или зде от человек, или онамо от бесов. елико, рече, развеличися и разсвирепе почитанием и славою, толико дадите ей ран и безчестия (Апокал. гл\ва 18). [10] Темже, по елику почитаемь еси, по толику и недостойна себе твори почитания: да пребывает в души твоей всегдашнее смирение. Памятствуй смерть, яко не зрит на саны и почитания, но всех равно сравняет. Где бо днесь славимый, богатый и почитаемый? где князи и господие? где витии и премудрии века сего? где сильнии и храбрии и мужественнии? где многими странами и землями обладавшии? мал гроб вмести их днесь. Где прекраснии и благолепием лица цветущии? отидоша, яко никогдаже быша: изменишася, ни следа почитания и славы оставиша.