<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 2 Глава первая О еже блюстися во всех вещех суетнаго велехваления. Похвали Иерусалиме Господа, хвали Бога твоего сионе (Псалом 147), глаголет Пророк. Никтоже достоин похваляемь и прославляемь во всем быти имать, точию един Бог вся сотворивый, имже вся быша. Хвалите (рече) Господа вси языцы, похвалите его вси людие (Псалом 116). Хвально и прославлено имать быти имя Господне во веки. и паки: да не хвалится премудрый в мудрости своей, ни богатый в богатстве своем: но о сем да хвалится, хваляйся, еже разумети и знати Господа, и творити суд и правду посреде земли (1 Цар\с: гл\ва 2). [2] Во всех вещех не похваляйся сам, ни от иных похвалы ищи, ниже похваляемым от кого завиди, да не сугубую тщету во обоих приимеши, разсыпание исправлений, и осуждение зависти. Не хваляй бо себе, но егоже Бог похвалит, той во всем есть искусен: хваляйся бо, рече, о Господе да хвалится (2 Корин. за\ч 190): прославляяйся, о Господе да прославляется, егоже вся суть. Не от человек в чесом велехвалимый, утешения от похвал ищи: но в Бозе вся даровавшем истинно взыскуй: человеческа бо временна и непостоянна, Божия же вечна и непреложна. Тщися ты о славе Божией, яко да и Бог прославит тя. Аще бо о славе Божией пещися будеши, сам тщеславитися не восхощеши, и Бог самаго прославит тя: аще же ты Бога презрев, о своих си пещися будеши, Бог оставит тя. [3] Не похваляйся сам, ниже похваляющих тя в сладость приемли, да не восплащение своих благ похвалением человеческим зде восприимеши: Блажащии бо вас лстят вы, и стези ног ваших возмущают, глаголет Пророк (Исаии гл\ва 3). От похвалы бо родится самолюбие, от самолюбия же гордыня и дмение, таже и от Бога отчуждение. Лучше не соделати что преславно в мире, неже соделавши безмерно велехвалитися. Фарисей бо преславная соделав, велехваляйся возношением, погибе: мытарь же ничтоже благо соделав, смирением спасеся. Овому во благих его от похвалы ров бысть: овому же смирения ради от рова возведение. глаголет бо: яко сниде сей оправдан в дом свой паче онаго (Луки за\ч 89). Похвалися Давид исчитанием множества людей, и смертную казнь в людех подят. Езекиа множеством богатства пред послы вавилонскими похвалися, всего сокровища своего пострада. Посем навуходоносор созиданием вавилона похвалися, со скоты яко скот седмь лет траву яде. [4] Аще что твориши благо, блюдися велехваления: аще же похвалишися, вся, яже исправлением стяжал еси, велехвалением напрасно погубиши, и благодати Божия оттщетишися: от похвалы бо возношение, от возношения же падение, падением же, от Бога отлучение. Бог вся сотворивый, не тако от человек, яко подобает, и прославляемь и величаемь есть: ты же ничтоже от себе имеяй, безсловесно от всех похваляемь и прославляемь быти хощеши. Не желай убо себе похвалы от человек, ниже похваляйся сам, увесть бо Бог, уведят и человецы, аще дела твоя блага будут, и кроме твоего велехваления похвалят тя. Аще бо сам велехвалитися будеши, вси презрят тя: аще же ты сам велехвалитися не будеши, Бог и вси человецы похвалят тя. аще о себе умолчиши, Бог возглаголет о тебе: аще же сам о себе велеречити будеши. Бог умолкнет о тебе, и отвержет тя. [5] Не буди якоже кокошь, о коемлибо исправлении велехвалящися, да не помощи Божия оттщетишися. кокошь бо о изнесении своего яица, абие пред всеми возглашает, и велехваляся кдачет, яко изнесе яице: ты же не буди тако безумен, ниже пред всеми изявляй своя исправления, да не зде себе восплащение от человек восприимеши: но молчанием покрывай своя исправления, да от Бога единаго уведана и похвалена будут. Аще бо ты сам похваляешися, от Бога похвален не будеши. аще ты сам велехвалишися, никтоже от человек похвалит тя: аще ли ни, вси ублажат тя. обаче лучше ти есть, да инии похвалят тя, неже ты сам безсловесно похвалишися. Не хвалися во утренних, не веси бо что родит находяй [день:] да хвалит тя искренний твой, а не твоя уста, глаголет соломон (Притчей 27). [6] Действо есть велие твоего неразумия, яко своя безчисленная злая ни единому от человек открыти и явити изволяеши: аще же будет и мало что благое, всем радостно открываеши, всем желательно явити, и от всех похваляемь и прославляемь быти хощеши, яко да от всех гордостнаго тщеславия насладишися. Почто убо ты требуеши утешения от похвал человеческих? Довольно ти есть на сем, аще дела твоя от Бога единаго ведома и благоприятна будут. Темже не похваляйся сам, но от Господа единаго похвалы ожидай: не похваляяй бо себе ни в чемже, во всем есть премудр: безсловесно же в чем велехваляйся: во всем есть безумен. безсловесен есть сей и неразумен зело, иже чуждею, а не своею ризою похваляется, или в чуждем богатстве, а не во своем полагает свое упование, сице и в тебе сие. [7] Инии множество исправиша добродетелей: расточиша имения, оставиша богатства, содеяша преславная, просветиша мир, умудриша человеки, многих души спасоша, и не похваляхуся: ты же ни мало что благо сотворь, ниже мало что благоугодно содеяв, о ничесомже безсловесно велехвалишися. Не похваляйся убо ты сам, но аще Бог похвалит тя, сему внемли. аще бо что будет благо, и кроме твоего велехваления Бог увесть: аще ему есть угодно, и не хотящу ти прославит тя: прославит убо он, и не презрит ни единаго без велияго возмездия. Аще бо ты сам похвалятися будеши, разума лишишися, и от Бога похвален не будеши. [8] Не похваляйся ни в чемже, ниже глаголи, яко богат есмь, и всеми благими обогатихся, и ничтоже требую, но не веси, яко ты еси окаянен, нищ, и мний, и слеп, и наг, глаголет таин видец (Апокал. гл\ва 3). Сего ради, егда и вся сотворите повеленная вам, глаголите: яко раби непротребни есмы, еже должни бехом сотворити, сотворихом, глаголет Господь (Луки за\ч 84). Всяка бо правда человеческая пред Господем, яко руб поверженный есть на гноищи, глаголет Пророк (Исаии гл\ва 7). Вем бо яко ни ты человек велехвалящихся любиши, егда кто пред тобою величаяйся похваляется: сице ниже Бог: ты же ничтоже от себе имеяй, соплетая себе похвалу пред инеми, и вся себе причитая велехвалишися. Но не нам, Господи, не нам, но имени твоему даждь славу, глаголет Пророк (Псалом 113). Хвалися ты о Бозе, и Бог восхвалится о тебе: возлюби ты Бога, и Бог возлюбит тебе: аще ты, своя си взыскуя, презриши Бога, и Бог презрит тя, и отринет тя. [9] Что хвалишися во злобе сильне, глаголет Пророк (Псалом 51)? Почто требуеши от иных во Благих похвалы? и сам бо ты веси, яко благо есть. Благое бо благим есть всегда, аще и ни от единаго есть похваляемо: злое же злым, аще и ни от единаго есть хулимо. Аще тебе и вси человецы похваляют, что ти от сего прибудет: аще ни един, в чем оттщетишися? аще и ни от единаго во благом похвален был бы еси, от Бога же самаго егда похвален будеши, довлеет ти. От человек хвалиму быти ничтоже есть: не бо человек ради имаши что творити благое, но Бога ради. Сего ради не от человек, но от Бога единаго похвалы и возвышения ищи, да во веки от него похвален и прославлен будеши, и возмездие вечное от него приимеши. [10] Темже во благополучии и почитании, не зело велехвалися, в презрении же в развращение и в нечаяние не впадай, но во обоих мерен и благоразумен пребуди. Егда ти есть что благо и радостно, не безсловесне похваляяся веселися: егда же что зло приключится, не безпамятно скорбию себе снедай. Век бо сей настоящий удобь пременителен есть, и вся вещи в нем превратны: но Богу о всех вещех славословие и Благодарение приноси, и ему вся причитай, да и он тебе вся своя привменит, и вечный живот подаст.