<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 1 Глава первая надесять О еже яко несть свойственна человеку плотская похоть, но от преступления адамля роду нашему прибывшая. От тления и греха рожден бывши, не к тлению и греху паки обращайся, но от тления к нетлению усердно восходити тщися, яко да прежде общаго воскресния умершую грехом и страстьми, безгрешием и безстрастием воскресиши душу, и от смерти к безсмертию приведеши ю. Не древняго адама преступльшаго, но втораго Христа безгрешнаго жизни последуй: живущии бо по плоти по преступльшем адаме, умрети имут, Христу же последующии, умершии в веце сем плотскому мудрованию, ктому не узрят смерти горестныя, точию радостное о Господе от плоти преселение. [2] Адам, егда бы пребыл в свойственном ему от Господа устроении, егда бы пребыл при Бозе, любовию от того не отлучаяся. от негоже создан бысть, не бы подпал смерти и тлению. Но понеже остави творца, к твари же прилепися: остави свойственное, отнюдуже бытие свое име, прилепися же не к свойственному плотскому неразумному вожделению, того ради по нужде подпаде тлению и смерти: нетления бо и жизни отлучився, по нужде подпаде в сицево плотское неразумное сочетание, и от совершенна разума и возраста, преступлением низведе естество наше в детский возраст и безсловесное младоумие, во еже малыми немотствующими отрочаты в мир сей всем раждатися нам. Ты же отрочатем рожден бывый, не ктому в младоумие впадай, но в совершен, якоже возраст, сице и разум возрастай и преуспевай: сам же возрастши, инех не в безсловесие детское, но в совершен возраст и разум благовествованием родити тщися: да от тмы неразумия к свету разума и познания приведеши всех. [3] Не по преступлении несвойственной плотской жизни прилепляйся, но прежде преступления от Господа безгрешному устроению благоразумен подражатель буди. Еже бо днесь по плоти житие, по преступлении тое содеяся, а еже по духу, прежде преступления, от Господа самаго сие устроение бе. Темже не по преступлении, но прежде преступления духовней о Господе последуй жизни, да прежде смерти, смерти и тления греховнаго свободишися. Лучше благоизвольно днесь во временной жизни воскреснути духом, и жити всегда Господеви, неже по горестной смерти, с неизвестным чаянием, чаяти воскресния и жизни. Лучше днесь оставляти временное плотское сладострастие со оправданием и похвалою, неже посем со осуждением и поношением сего лишатися. Темже не повинися плотскому неразумному вожделению, но разумом плотския похоти востязай, да не яко младоумен детищь посмеян будеши. [4] Якоже не от сочетания, и безсловесныя плотския похоти адам и ева исперва сотворени быша, сице и мы вси тако раждатися в мир имели быхом: и якоже адам, абие вси от небытия в бытие приведени были быхом. Но понеже преступи адам заповедь, и самоизвольно безсловесию, и похотем плотским подпаде, того ради по нужде сице безсловесно быти, и раждатися в мир, и мы осуждени есмы. Оттуду толикия скорби и печали, плача же и рыдания исполнена жизни наша: последи же смертию горькою тую печатлеем. Хотя бо Господь извести честное от недостойнаго, смертным пресечением, от плотскаго сплетения пресекаему жизнь нашу быти устрои, да не вечнующее пребудет злое, но да возведет нас всех верующих на лучшее древнее достояние и первообразие: аще бо бы сие было добро и совершенно, не бы взыскивал Бог от нас лучших, не бы смертию пресецал плотскую жизнь нашу. [5] От свойственнаго свойства, в несвойственное плотское хотение поползшеся, смерти и тлению подпадохом. Исперва бо не в смерть, ни в безсловесное плотское похотение и сочетание от Господа создани быхом: но в Божественное желание и любовь. Ибо в раи прежде преступления не бе похоти и плотскаго вожделения, но по преступлении и по изгнании из рая плотская похоть и вожделение бысть, таже посем смерть. Сего ради похоть плотская смертию упраждняется, упражднена же бывши смертию, не ктому паки во грядущей вечной жизни след ея обрящется, но Божественнаго желания и любве вси Богу угождающии во веки веков наслаждатися будут. [6] Раждается человек от жены плотски в живот, и паки безсловесно соединяяйся ей, обумирает от Бога душею: якоже соль от воды раждается, и паки воде прикасаяся растопляется и исчезает, сице и в сем есть. Сего ради от плотскаго греховнаго сочетания рожден бывши, не паки ко греховному плотскому сплетению лепися, да не яко соль растаеши. Не бо на сие от Бога сотворен еси, да паки на таяжде греховная плотская действа обращаешися и умираеши, но да ко первообразному свойству, и от Господа безгрешному устроению восходиши, и преуспеваеши взыскуя лучших и Блаженнейших. Приятен убо есть по закону днесь по плоти брак, но чистота и целомудрие сугубо суть лучша и преславнейша, в няже исперва от Господа устроен бе адам. брак убо точию чистотствовати, и вящшая разумети не хотящим, или не могущим, днесь на малое время попущен есть, чистота же пребывающая есть во веки вечныя. [7] Крещением во Христа, вторым Духовным порождением рожден бывши, от первороднаго греха водою и Духом омылся еси: не ктому убо паки грехом плотския похоти и действия пленися: да не возвращающемуся псу на своя блевотины уподобишися. От тмы и безсловесия отвратился еси, не паки ко тме и безсловесию обращайся, но к свету разума, и всех вещей познания провозрастай, и присоединен бывай. Богом сотворен еси, к нему лепися. Богом создан еси, к нему любовию соединен буди. От него бытие свое имаши, к нему всею душею твоею прилепляйся: чрез плотское бо греховное вожделение и похоть содеяся смерть, и от Бога всеконечное отчуждение: чрез сохранение же чистоты живот, и к Богу совершенное присвоение. [8] Рожденное от плоти, плоть есть, и рожденное от Духа, Дух есть (Иоан. за\ч 8). Рожден еси Духовным рождением крещения, паки же вторым Духовным рождением иночества родился еси не ктому убо плотскому рождению греховному, и сплетению телесному ревнуй, или завиди: но восходи на лучшая и преславнейшая. Якоже Богу обещался еси, сице Духовне возрастай и преуспевай: сам Духовне родившися, и инех Духовно родити тщися, а не плотскою сластию пленен буди. Плотское бо сочетание точию не могущим, или не хотящим удержаватися, оставлено бысть, не изволяющим же лучшая, хуждшая оставляются. Егда любовь Божественная презирается, тогда плотское безсловесное наступает связание. [9] Темже престани плотскаго детскаго играния желати самоизвольно, да не по сем оставляти будеши и неволею с вящшею своею тяжестию. Да не прельщает тя доброта и красота лица тленныя плоти: истлевает бо и изменяется, и погибает вскоре: несть видети состаревшагося Благолепна: несть бо во гробе красоты неистлевшия, ниже в долго время сия пребывающая суть. Всяка бо красота плотская огнь есть, всяко благолепие роса утренняя, всяка плоть трава, всяка слава человеческая яко цвет сельный: изше трава, и цвет ея отпаде: глагол же Господень точию един, и Божественная его любовь пребывает во веки (Иако\в за\ч 8). [10] Призывает ли тя уязвлятися красотою лица истлевшая во гробе плоть, обыкшаго зрети пристрастно зримая? но убо днесь зри во гробе сущих прежде тебе, тогда посем навыкнеши, яже будут и по тебе, яко некто рече. Ничтоже бо ино и по тебе быти имать, точию еже пред тобою со инеми сбыстся: а еже со инеми сбыстся, сие и с тобою всяко неизменно сбудется. Сего ради не прилагай сердца своего к твари, но все желание свое и любовь возводи ко вся сотворшему, отнюдуже бытие свое имаши идеже ти естественне свойственно есть: ибо нигдеже инде, во всех сих обрящеши вечный живот, и непреложну души своей тишину, точию в Господе Бозе, и в пресвятой его любви, и в благодати пресвятаго и животворящаго Духа.