<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 1 Глава десятая О еже не порабощатися блудными помыслы, и скверными похотьми. Не буди обуреваемь блудными помыслы, и скверными похотьми, и действы, да не от Бога отлучишися: ниже ревнуй творящим то, да не безумных безумнейший явишися: на мало бо время попущено бысть сие человеком, да познавше суету, изберут себе лучшая. Темже чистоту и целомудрие всем сердцем возлюби, да прилепишися чисте чистому, чистоты и целомудрия образ из себе показавшему: с нимже пребудеши любовию неразлучно во веки веков, наслаждающися Божественныя славы. [2] Не буди раскаяваяйся о своем предложении, и иноческом обещании, но Богу благодарение приноси, яко свободи тя от уз плотския работы, и приведе тя в честное сие обещание, во ограду словесных своих овец, и даде тебе власть чадом его быти, и безпрепинательно шествовати к горнему присносущному наслаждению. Аще бо велие есть в человецех работати земному царю, и имети от него благодать, колико паче Царю Небесному угождати и быти всегда в любви его. [3] _О колико лучшее есть и честнейшее чистотное по Бозе ангельское житие паче плотскаго сплетения! Несть ни единаго удивления и похвалы жити по плоти: сице бо не точию христианин, но и языцы, и зверие, и скоти жительствуют: жити же ангельски чисто, о едином Бозе, дело есть преславно: сице бо живяху святии, и Богу соединишася, преславная на земли содеяша, и просветишася яко солнце в мире, и ныне почивают в непрестанной радости во веки вечныя. Ничтоже есть велие по плоти жити: отвне точию зрящим прелестне любимо, внутрь же воззревшим зело мерзостно есть: тягота совести, помрачение разума, безсловесное связание, недоумение, порабощение: при смерти же велия скорбь, и тяжесть души. [4] Наилучшее мирское по плоти житие, не сравняется с чистотным ангельским целомудренным житием. Будет ли добро и согласно по плоти в супружестве житие? обаче безсловесное порабощение, по руку и по ногу связание: не согласно ли? злейшее есть всех мучений. Не родятся ли чада? печаль есть. родятся ли? сугубое есть попечение. благия ли суть чада? мног мятеж и попечение. злыя ли суть? зельное душе есть томление, сугубая скорбь и печаль: и временное здешнее злопожитие, и тамошняго неизвестное получение. Иночествуяй же, и чистотне по Бозе живяй, о всем мирен и безпечален есть: удобь спасение получит, ничимже бо связан есть: не порабощен есть плотскою страстию, о Бозе всегда поучается, на смерть выну готов: день пребыв Благодарит Господа, вечер молится с нощию: ничим препинаемь или возбраняемь есть: мерою правою житие управляя, яко в раи пребывание свое имать. [5] Внемли, кое утешение и покой приносит плотская любовь и сласть? вмале точию сласть, и посем тяжесть: вмале похоть, и посем мерзость: вмале красота, и посем гной: вмале утешение, и посем скорбь: и тако повсегда непрестанно ратуется, и прельщается душа: презревый же сия вся, и прилепивыйся истинною любовию Господеви, о всем без печали и без болезни есть: плотская бо безсловесная похоть, и любовь безумна, во всем слепа есть, пленится многажды, и связуется человек, и не весть чесого ради связуется: ни бо есть жизни вечныя подательна, ни чести и славы прилагающа, паче же и отемлюща. Аще ради красоты безсловесно пленится, но Бог ю созда: аще ради Благолепия и Благих нравов, но Бог вся устрои. Богу вся сотворшему наипаче подобает прилеплятися: от него бо суть вся, а не от тленной твари. [6] Почто твари прилепляешися, а не творцу твари? лучше почитаеши тварь, неже создавшаго ю? красоту, неже сице украсившего ю? кто бо кое дело лучше похваляет паче соделавшаго е? не вси ли глаголем, егда видим кое благохудожне соделанное дело, _о како сей художник добр и премудр соделавый сие дело? не вси ли удивляемся и похваляем художника паче, неже дело соделанное? делу же не зело удивляемся, понеже дело само себе не содела, ниже когда соделати может, сице и Богу в Божиих удивлятися и похваляти его имамы, и ему всею душею своею прилеплятися, а не тленной твари. Аще бо похваляеши тварь, лучше похваляй создавшаго ю: тварь бо истлеет, и в прах и пепел пременится: Господь же един вечен, пребываяй во век века. Тварь убо ты не зело любити должен еси: понеже тварь сама себе не сотвори. аще бо есть красна тварь, но не сама себе сице украси: аще Благолепна, но не сама себе содела: сего ради творцу всея твари и создателю всем сердцем да прилепляешися, отнюдуже весь еси: нигдеже бо инде обрящеши вечный покой, и тихое пристанище, точию в Господе Бозе, и в пресвятой его Благодати. Прилепление бо к твари, смерть есть, к творцу же твари, живот есть, и присносущная радость. [7] Мнози быша исполняюще плотския похоти, и истлеша: и днесь исполняют, и сии вси истлети имут: не пребудет тако плотская любовь и похоть во веки, ниже красота временная сице останет, яже не обратится в тление. Не пребудет богатство, и снидет слава: нашедши бо смерть, вся сия погубит (Иоан. Дамаск. гл\ва 3), якоже некто рече. Мир сей и вся настоящая вскоре изменяются, и похоть плотская, и всяко земное наслаждение яко сень преходит: несть плотския похоти и любве, яже не преложится в тяжесть: ниже красоты временныя, яже не пременится в тление: ни сласти плотския, яже не претворится в мерзость: несть нигдеже известнаго упокоения, точию во едином Господе Бозе, якоже к Пророку илии в горе хоривской речеся: не бысть в буре страстей Господь, ни во огни блуда и раждежения, ни в вихри всякаго греховнаго страстования, но в дусе света тонка, безстрастия и чистоты: тамо Господь (3 Цар\с гл\ва 19) и Благодать его, тамо и вечный покой. [8] Колико бяше в мире красных лиц? и истлеша: колико бяше благолепных тварей? и преидоша: колико бе благоугодных и любимых тварей? вся в смрад и гной обратишася, преидоша яко никогдаже быша. Тамо бо в грядущей жизни, ни женятся, ни посягают, ниже ктому себе плотски любити могут: но яко ангели Божии будут (Матф. за\ч 91), о самом точию Господе Бозе присно радующеся и веселящеся: не временною красотою, ни любовию и похотию плотскою утешатися будут, но точию самим Господем, и благодатию его. [9] Окаянная есть воистинну сия похоть и любовь плотская, ейже в след шествует тяжесть. Суетна есть воистинну сия сласть, яже влечет с собою горесть. Суетна сия красота, яже в смрад и гной обращается, яже не дарует покоя, ни живота вечнаго, паче же отемлет. Вотще человек сим утешатися имать, еже отидет вскоре: туне имать к сим прилеплятися душею, яже с ним не пребудут во веки: всуе к сему имать прилагати свое сердце, еже яко сень мимоходит. [10] _О како и коль красно, еже ангельски чистотно, безмятежно и безпечально со ангельскими и преподобными лики жити вкупе! о сем бо Господь обеща живот вечный, и упокоит сицеву душу вечным упокоением, и дарует ей присносущную радость, и непрестанное веселие, и речет ей: прииди вся добрая ближняя моя, и порока несть в тебе (Песн. песн. гл\ва 4). И будет ей Благодать пресвятаго Духа, пища и питие тамо, и присносущное наслаждение: воспоют бо сицевии пред Престолом Божиим песнь нову, еяже никтоже ин может пети, точию сии, иже со женами не осквернишася: девственницы бо суть (Апокал. гл\ва 14), глаголет таин видец.